Lembrieko
28 Jutimrac giringo ma nwang’u ng’atu moko de mbe m’uriemogi,
Ento weg bedopwe cwinygi tek calu cwiny umvor.*
2 Judongo ma wijo giwiliri awila ka dubo* tie i ng’om,
Ento ku kony pa ng’atu acel ma won ng’iyo i lembe man ma won ng’eyong’ec, jadit ma wijo bedo* pi nindo ma lee.
3 Jacan ma yaku ng’atu ma ka kite mbe
E calu koth ma molo cam ceke.
4 Ju ma giweko niworo cik gipaku jatimrac,
Ento ju ma giworo cik ng’eicwiny negogi i kumgi.
5 Ju ma reco ginyang’ ungo i pokolembe ma pwe,
Ento ju ma giyenyo Yehova ginyang’ i lembe ceke.
6 Jacan m’ubegwoko bedocu pare
Uloyo jalonyo ma timo pare rac.
7 Wod ma riek woro cik,
Ento jarimb weg abamba nyayu lewic iwi won.
8 Ng’atu ma medo lonyo pare ku banja ma juculo ku faida* man ku faida m’atira ngo
Ubecoke ni ng’atu ma timo bero ni jacan.
9 Ng’atu m’ubekwero niwinjo cik
Kadok rwo pare de tie gin ma judagu.
10 Ng’atu m’ubewingo wi ju m’atira i yo ma rac bipodho i vur pare gire,
Ento ju ma kosa mbe i wigi gibilagu gin ma ber.
11 Jalonyo tie riek i wang’e gire,
Ento jacan ma won ng’iyo i lembe neno nia etie ng’a.
12 Kinde ma weg bedopwe giloyo, dwong’ ma dit bedo nuti
Ento kinde ma jutimrac giidho iwi ker, dhanu pondo aponda.
13 Ng’atu m’ubeumo wi kier pare lembe birombo ngo ire,
Ento jubitimo kisa ni ng’atu m’utucogi man m’uwekogi.
14 Jamutoro tie ng’atu ma saa ceke bedo nger,*
Ento ng’atu m’udwoko adundene nwang’ bipodho i can.
15 Calu umvor m’uberundo man calu urudi m’ucung’o iwi cam pare,
Jabim ma rac m’ubebimo wi dhanu ma jakony migi mbe de tie kumeno.
16 Jatelwic m’ukoso ng’iyo i lembe tiyo ku tego pare rac,
Ento ng’atu m’udagu piny ma junwang’u i ayi m’atira ngo medo kwo pare.
17 Ng’atu ma dubo mi rimo ubenure pilembe ekabu kwo pa ng’atu moko* bimedere niringo nitundo i liel.*
Dong’ ng’atu moko kud ukonye ki.
18 Ng’atu m’ubewotho ma kosa mbe i wiye biboth,
Ento ng’atu ma yo pare ugondere bipodho rek.
19 Ng’atu m’ubefuro podho pare bibedo ku cam* bik,
Ento ng’atu m’ubelubo tok lembe ma tije mbe bipong’ ku can.
20 Ng’atu mandha binwang’u mugisa dupa,
Ento ng’atu m’ubemito elony nyapio pio bidong’ ungo ma lembe mbe i wiye.
21 E ber ungo nibedo kud akoyakoya;
Ento ng’atini copo timo lembe ma rac kara enwang’ dund mukathi.
22 Jakumira* mito enwang’ lonyo nyapio pio,
Ento eng’eyo ngo nia can re m’ubecipodho i wiye.
23 Ng’atu ma juko dhanu binwang’u bero lee yor i ng’eye
Nisagu ng’atu ma wondo wang’jo ku lebe.
24 Ng’atu m’uyaku won ku min man ewacu kumae: “Etie rac ungo,”
Utie jawodh ng’atu ma kelo nyoth.
25 Ng’atu ma ketho cwinye i kum piny* tugo ali,
Ento ng’atu m’uketho genogen pare iwi Yehova, lembe bibedo miero ire.*
26 Ng’atu ma geno adundene gire utie jakasegu,
Ento ng’atu ma wotho ku rieko biboth.
27 Ng’atu ma miyo piny ni jucan bikoso ngo gin moko,
Ento ng’atu ma miyo wang’e igi binwang’u alam dupa.
28 Kinde ma jutimrac giidho iwi ker, dhanu pondo
Ento ka ginyothiri, weg bedopwe mediri.