Yeremia
8 “I rundi maeca,” Yehova wacu, “jubiwodho cogo jubim mi Yuda, cogo judongo ma wijo pare, cogo julam, cogo jubila man cogo ju ma bedo i Yeruzalem kud i liel migi. 2 Jubimoyogi i wang’ ceng’, i wang’ dwi man i wang’ udul mony ceke m’i polo ma gimaru, ma gibed gitimo igi, ma gilubo tokgi, ma giyenyo kakagi man ma gikulo korgi piny igi. Jubicokogi ngo kadi akunya de jubikunyogi ngo. Gibidoko calu uweyo i wang’ ng’om.”
3 “Man dong juruot ma rac maeni ma biboth bing’iyo tho kakare ning’iyo kwo i kabedo ceke m’abilalugi i iye,” Yehova mir udul uwacu.
4 “Man icikiri niwacu igi kumae: ‘Yehova uwacu kumae:
“Nyo gibipodho man gibiai ungo kendo?
Tek ng’atu acel uloko, nyo ma kucelo de biloko ngo?
5 Pirang’o dhanu maeni, niwacu dhanu mi Yeruzalem gibemediri nidubo?
Gimoko kii i kum ndra;
Gikwero niloko.
6 Aciko itha man amedara niwinjo, ento ayi ma gibeweco ko utie ngo atira,
Ng’atu moko mbe m’uyewo dubo pare kadi m’upenjo kumae: ‘Atimo ang’o?’
Ng’atuman m’i kindgi ubelubo tok lembe ma dhanu dupa ubetimo, calu riuni* m’uberingo i lwiny.
7 Kadok nunda mi kor polo de ung’eyo nindo pare;*
Ento dhanu para ubenyang’ ungo i pokolembe pa Yehova.”’
8 ‘Wucopo yero nenedi kumae: “Wa riek man watie ku cik* pa Yehova”?
Kum i andha, jubetiyo ku kalamu mi ndra mi jugor pi nikiewo kende kende vupo.
9 Lewic umaku jururieko.
Ndiri ung’oy i igi man jubimakugi.
Nen! gikwero lembe pa Yehova,
E ka dong’ rieko migine ni kani?
10 Pieno abimiyo mon migi ni jumaco mange,
Podho migi de ni jumange;
Niai i kum ng’atu ma nok nitundo i kum ng’atu ma dit, ng’atuman ubenwang’u piny i ayi m’atira ngo;
Niai i kum jabila nitundo i kum jalam, ng’atuman ubevuro avure.
11 Man gibetemo nithiedho rem* pa nya dhanu para nyaswa swa man giyero kumae:
“Kwiyocwiny unuti! Kwiyocwiny unuti!”
Ma ke kwiyocwiny umbe.
12 Nyo lewic unegogi pi gin ma judagu ma gitimo?
Lewic unegogi ngo nyanok de!
Ging’eyo de ngo nia lewic utie ang’o!
Pieno gibipodho i kind ju m’udaru podho.
Saa m’abikelo matira i wigi gibikier,’ Yehova wacu.
13 ‘Saa m’abicobogi, abijigo wigi,’ Yehova wacu.
‘Nying ulok moko mbe ma bidong’ iwi yende, kadi nying ulam iwi yende man ithgi bithwo.
E piny m’amiyo igi birwinyo igi.’”
14 “Wabedo keni pirang’o?
Dong’ wacokura man wamondu i adhura ma tek man wathowu kuca.
Kum Yehova Mungu mwa bikabuwa,
Man emiyo iwa piny m’adra n’i iye nia wamadhi,
Pilembe wadubo ni Yehova.
15 Wabino geno kwiyocwiny, ento lembe ma ber moko mbe m’utundo,
Wabino geno keyokum, ento ndiri re m’utie!
16 Kuzo pa riuni pare uwinjere niai i Dan.
Nikum badwand thwoni riuni pare,
Ng’om zoo ubeyengere.
Gibemondo man gibemvoro ng’om ku piny ceke ma n’i iye,
Adhura ku dhanu ma bedo i iye.”
17 “Kum nen, abeoro thwol i kindwu,
Thwol ma jukwir ma jucopo rambu ngo,
Man gibitong’owu andha,” Yehova wacu.
18 Can para key ungo;
Adundena betwoyo.
19 Jubewagu kony niai i ng’om ma bor,
Nya dhanu para re m’ubewak kumae:
“Nyo Yehova mbe i Sayuni?
Kunoke nyo ubimo pare mbe i iye?”
“Pirang’o ginyayu ng’eicwiny i iya kud ayi gin m’acwiya migi m’ang’ika,
Ku mungu migi ma juwirok ma tijgi mbe?”
20 “Kayucam ukadhu, cir de ujik,
Ento fodi jubodhowa ngo!”
21 Rem mi kum nya dhanu para udaru runga;
Avoc.
Ndiri umaka.
22 Nyo balsam umbe i Gilead?
Kadike nyo jakey kum umbe kuca?
Pirang’o nya dhanu para ukey ungo?