Zaburi
BUKU MIR ABIC
(Zaburi 107-150)
107 Wudwok foyofoc ni Yehova pilembe e ber;
Mer pare ma lokere ngo bedo rondo ku rondo.
2 Wek ju ma Yehova waru giyer lembe maeni,
Ju m’ewarugi kud i cing’* judegi,
3 Gi ju m’ecoko dhoggi niai kud i ng’om,
Niai ku yo nyangu man ku yo reto,*
Niai ku yo malu man ku yo piny.
4 Giwotho swa i langa;
Ginwang’u ngo yo ma romo terogi i adhura moko ma gicopo kwo i iye.
5 Kec ku rieu ubino negogi;
Ng’eyong’ec migi urwinyo pilembe givoc.
6 Gimediri niwak i bang’ Yehova i can migi;
Man ebodhogi kud i lembe ma tek ma gibino i iye.
7 Eketho giwotho kud i yo m’atira
Kara gitund i adhura ma giromo kwo i iye.
8 Dong’ dhanu gidwok foyofoc ni Yehova pi mer pare ma lokere ngo
Man pi tic pare ma wang’u ijo m’etimo pi wot dhanu.
10 Jumoko gibino kwo i mudho ma col bii,
Gi jurukol ma gibeneno can man jutwiyogi ku cuma.
11 Kum gigam gijai i kum lembe pa Mungu;
Giworo ngo juk pa Ng’atu ma Malu ngbir.
12 Pieno ejwigo adundegi nikadhu kud i peko;
Gikier man ng’atu moko bino mbe ma copo konyogi.
13 Gikwayu Yehova ukonygi i can migi;
Ebodhogi kud i lembe ma tek ma gibino i iye.
14 Ewodhogi kud i mudho ma pek,
Man eturo i jamtwic migi.
15 Dong’ dhanu gidwok foyofoc ni Yehova pi mer pare ma lokere ngo
Man pi tic pare ma wang’u ijo m’etimo pi wot dhanu.
16 Kum erungo i dhugola mi mola
Man eturo i riu mi cuma.
17 Rieko migi bino mbe man gineno can ma lee
Pi dubo migi man pi kosa migi.
18 Ava cam ceke uai i kumgi;*
Gicoro ceng’ini i dhugola mi tho.
19 Gibed gilwong’o Yehova ukonygi i can migi;
Ebed ebodhogi kud i lembe ma tek ma gibino i iye.
20 Ebed eoro lembe pare man ekeyo kumgi
Man ebodhogi kud i vur ma nwang’u gimoko i iye.
21 Dong’ dhanu gidwok foyofoc ni Yehova pi mer pare ma lokere ngo
Man pi tic pare ma wang’u ijo m’etimo pi wot dhanu.
22 Dong’ githier lam mi dwoko foyofoc
Man gitwong’ pi tic pare ku kok mir anyong’a.
23 Ju ma giwotho ku meli iwi nam,
Ma gitimo tic migi iwi pii ma dongo,
24 Gineno tic pa Yehova
Man tic pare ma wang’u ijo m’i the pii.
25 Gineno kite ma yamu ma tek tuk ko kan eng’olo,
Etugo mujanga mi nam.
26 Giidho malu i polo;
Gipiey i the pii.
Amora mi kumgi* thum kinde ma gineno peko ubebino.
27 Wigi wirogi man giwotho thambathamba calu ng’atu m’umer,
Man bodho migi ceke tije doko mbe.
28 E giwak i bang’ Yehova i can migi,
Man ebodhogi kud i lembe ma tek ma gibino i iye.
29 Ekwiyo lak yamu ma tek;
Mujanga mi nam gam piey.
30 Anyong’a negogi kinde m’epiey,
Man etelo wigi nitundo i dhu wat ma gimaru.
31 Dong’ dhanu gidwok foyofoc ni Yehova pi mer pare ma lokere ngo
Man pi tic pare ma wang’u ijo m’etimo pi wot dhanu.
32 Dong’ gipake i cokiri mi dhanu,
Man dong’ giyunge i cokiri* mi judongo.
33 Eloko kulo doko ni ng’om langa
Man kaka ma pii ubedhenyini i iye ni ng’om m’uthwo,
34 Ng’om ma cego piny ni ng’om kadu,
Nikum racu mi ju m’ubedo i iye.
35 Eloko langa doko ni jugu m’upong’ kud agada
Man ng’om m’uthwo ni kaka ma pii dhenyini i iye.
36 Eketho ju ma kec ubenego gibed keca,
Kara gigier igi adhura ma giromo kwo i iye.
37 Gicoyo piny i podho
Man gipidho ulok ma cego nyinge lee.
38 Epoko mugisa i wigi man gimediri lee mandha;
Eweko ngo lim migi ujwiki.
39 Ento kendo wendgi udoko nok man jujwigogi
Nikum masendi, can man litho.
40 Ekonjo cac iwi weg yung
Man eketho giwotho swa i langa ma gengi mbe i iye.
41 Ento egwoko jucan* kara kud jusendgi
Man eketho juruot migi doko dupa dupa calu udul lim.
42 Ng’atu m’atira neno lembe maeni man anyong’a nege;
Ento dhanu ceke ma reco gimiyo dhoggi.
43 Ng’atu moko ci ma riek bineno lembe maeni,
Man ebiparu cuu pi tic mi mer ma lokere ngo pa Yehova.