Isaya
54 “Kok ku mutoro, in m’i dhaku ma jamugumba m’unyol ungo!
Anyong’a negi man kok ku mutoro, in m’inwang’u ngo litho mi nyodo,
Kum wot* dhaku ma julandu upong’
Nisagu wot dhaku ma cware* nuti,” Yehova wacu.
2 “Yab kaka hema peri udok ma lac.
Yab i bongu mi hema peri ma dit.
Kud iceriri, dwok thol mi hema peri udok ma bor,
Man keth gute* mi hema peri ubed ma tek.
3 Kum ibimoyiri yor acwic man yor acam.
Kodhi peri bimaku thek,
Man gibibedo i adhura m’udong’ ni uvuru.
4 Lworo kud unegi, kum jubinyayu ngo lewic i wii;
Man lewic kud unegi, kum cwinyi bitur ungo.
Kum wii biwil i kum lewic m’unegi i aradu peri,
Man ibipoy ungo kendo i kum cac m’ibino ko dhatho.”
5 “Kum Jacwic peri ma Dit utie ve cweri,*
Yehova mir udul utie nyinge,
Man Ng’atu ma Leng’ mir Israel utie Jawarni.
Jubilwong’e Mungu mi ng’om zoo.
6 Kum Yehova ulwong’i calu dhaku ma julandu man ma cwinye ng’abere,
Calu dhaku ma jugamu kinde m’en aradu man i ng’eye jukwere,” Mungu peri wacu.
7 “Kum akeawenji pi kare ma nok,
Ento abidwogi ku kisa ma dit.
8 Akanu wang’a iri pi kare moko nikum ng’eicwiny para m’udhir,
Ento nikum mer ma lokere ngo, kisa binega i kumi,” Yehova ma Jawarni wacu.
9 “Lembuni utie ira calu mi rundi pa Noa.
Tap calu m’akwong’o nia pii pa Noa biumo ngo ng’om kendo,
Kumeno bende abekwong’o nia ng’eicwiny bimaka ngo kendo i kumi kadi abijuki de ngo.
10 Kum gudi romo kabere
Man ungulu gudi* romo yengere;
Ento mer para ma lokere ngo bikabere ngo kud i beng’i,
Kadi lembariba para mi kwiyocwiny de biyengere ngo.” Eno tie lembe ma Yehova, ma Ng’atu ma kisa ubenege i kumi uwacu.
11 “Ee dhaku m’utagu, m’avuvu uungo, ma jukere ngo,
Abeketho kidi peri kud ulobo ma tek
Man kathere peri ku safir.*
12 Abiyiko udi ma wiw peri ku rubi*
Dhugang’ peri ku kidi m’uriang’ini,*
Man kieu peri ceke ku kidi ma pigi tek.
13 Man Yehova biponjo woti* ceke,
Man kwiyocwiny mi woti bibedo lee.
14 Jubiketho ibicungo ma tek i bedopwe.
Jubiketho ibibedo bor kud adici;
Ibilworo ngo gin moko kadi gin ma binyayu ndiri i ii de bibedo mbe,
Kum ebicoro ngo ceng’ini kudi.
15 Tek ng’atu moko biroki kud ali,
Ebibedo ngo nikum ng’ol para.
Ng’atu moko ci ma biroki bipodho nikumi.”
16 “Nen! an gira acwiyo jabodho
Ma vuko cugimac,
Man ma yiko jamlwiny ku tic pare.
An gira acwiyo bende janyoth pi nikelo nyoth.
17 Jamlwiny moko mbe ma juyiko piri ma bitimo gin moko i kumi,
Man ibing’olo lembe iwi leb ceke ma biai i kumi i pokolembe.
Eno re m’utie giralaga mi jutic pa Yehova,
Man bedopwe migi uai i bang’a,” Yehova wacu.