Isaya
28 Can iwi jamker mi wic* ma hayere* mi jumero mir Efraim
Man iwi thiwe m’uner mi dwong’ mi leng’o pare,
Ma n’i wi poga ma miyo mi ju ma pigulok ukadhu i wang’gi!
2 Nen! Yehova utie ku ng’atu moko ma tek man ma jarukara.
Calu koth m’ubecwii ku yamu, ku lukoth man pei, avuvu ma nyotho piny,
Calu koth m’ubecwii ku yamu ma tek mi pii ma dit ma umo ng’om,
Ebing’ure ma tek piny i ng’om.
3 Jubinyono i jamker mi wic ma lulere*
Mi jumero mir Efraim i the tielo.
4 Man thiwe m’uner mi dwong’ mi leng’o pare,
Ma n’i wi poga ma miyo
Bidoko calu nying ulam m’ular ucek i wang’ saa pa oro.
Kinde ma ng’atu moko nene, epone man emwonye ndhu ndhu.
5 I nindo maeca, Yehova mir udul bidoko ni jamker mi wic mi yung, man jamker mi wic ma leng’ ma juthiwe ni dong dhanu pare m’udong’. 6 Man ebidoko ni tipo mi bedopwe ni ng’atu m’ubedo pi nipoko lembe man ukungu mi tego ni ju m’ubecero dhu ju m’ubesayu rop i dhugang’ mir adhura.
7 Ju maeni bende gibekier nikum pigulok;
Kong’o migi ma lake tek uketho gibewotho thamba thamba.
Julam ku jubila gibekier nikum kong’o ma lake tek;
Pigulok ubenyotho wigi,
Man gibewotho thamba thamba nikum kong’o migi ma lake tek;
Gin ma wok i wang’ migi uketho gibekier
Man gibekier i pokolembe.
8 Kum meza migi upong’ ku ng’ok ma rac,
Eromo kaka ceke.
9 Jubimiyo ng’eyong’ec ni ng’a,
Man ng’a ma jubikoro ire lemkwenda?
Nyo ni ju ma juai jukwiro ku dhu cak akwira,
Ni ju ma juai jukabu akaba ku dhu thuno?
10 Kum etie “lembang’ola iwi lembang’ola, lembang’ola iwi lembang’ola,
Cik iwi cik, cik iwi cik,*
Nyanok keni, nyanok kaca.”
11 Pieno ebiweco i bang’ dhanu maeni nikadhu kud i bang’ ju ma gwong’o ni dhoggi,* man i dhok pa jawirok. 12 E eyero igi kumae: “Eni tie kayom. Wek ng’atu m’uol uyom; eni tie kaka ma junwang’u iye yom,” ento gikwero niwinjo. 13 Pieno wec pa Yehova bibedo igi kumae:
“Lembang’ola iwi lembang’ola, lembang’ola iwi lembang’ola,
Cik iwi cik, cik iwi cik,*
Nyanok keni, nyanok kaca,”
E gibikier kinde ma gibewotho,
Man gibipodho ataru,
Gibitur man gibimoko i uwic, e jubimakugi.
14 Pieno wuwinj wec pa Yehova, wu jukuhaya,
Wu jubim mi dhanu maeni mi Yeruzalem,
15 Pilembe wubeyero kumae:
Kinde ma pii ma tek m’ucorere rek ubekadhu,
Ebitundo ngo i wiwa,
Kum wadaru ketho ndra ni kapondo mwa
Man wadaru pondo i lemndra.”
16 Pieno Rwoth Ubimo ma Malu Ngbir Yehova uyero kumae:
“Nen, abeketho kidi ma jumulo iye calu kathere i Sayuni,
Kidi ma pire tek mi gul mi kathere mandhandha.
Ng’atu m’utie ku yiyoyic, ndiri binege ngo.
17 Man abiketho pokolembe m’atira ni thol mi pimo piny,
Bedopwe ke ni jamtiro piny.*
Pei biweyo kapondo mi ndra,
Man pii bipong’o i kapondone.
18 Lembariba mwu ma wutimo ku Tho birany,
Man winjiri ma wuketho i kindwu ku Liel* bicungo ngo.
Kinde ma pii ma tek m’ucorere ubekadhu,
Ebirungo iwu.
19 Nja kinde m’ebekadhu,
Ebiweyowu cen;
Kum ebibekadhu kubang’ kugweno,
Ku dieceng’ man ku diewor.
Ndiri kende re ma biketho gibinyang’ i lembe ma giwinjo.”*
20 Kum kavuto dungulu magwei m’eromo rieyere ngo i wiye,
Man jam um de liki liki magwei m’eromo dolere ngo i iye.
21 Kum Yehova biai malu calu i kum Got Perazim;
Ebitugere fuk calu i poga* ma ceng’ini ku Gibeon,
Kara etim tic pare, tic m’ukoc,
Man kara etim tic pare, tic ma tung’.
22 Kawoni dong’ kud wubed ku cac,
Kara kindwu kud udok diny magwei,
Kum adaru winjo niai kud i bang’ Rwoth Ubimo ma Malu Ngbir Yehova mir udul
Nia nyoth udaru kethere pi ng’ombe zoo.*
23 Wucik ithwu man wuwinj dwanda;
Wuketh wiwu cuu man wuwinj lembe m’abeyero.
24 Nyo jarafur furo fur duu i wang’ nicoyo kodhi?
Nyo egoyo man eteng’o i ng’om pare thiri thiri?
25 Kinde m’edaru lilo wiye,
Nyo edhenyo ngo kumini ma col man ecoyo kumini
Man nyo epidho ngo nganu, kal, man nganu ma juyuke kakagi
Ku nganu ma poke tek i dhoge tingili?
26 Kum Mungu pare ponje* i ayi m’atira;
Eponje.
27 Kum jufwodo ngo kumini* ma col ku jamfwodo cam,
Man juketho ngo tiend magali ukadh iwi kumini.
Ento jufwodo kumini ma col kud undoy,
Man kumini kud uluth.
28 Nyo ng’atini fwodo cam pi niyiko mukathi?
Ungo, etimo ngo kumeno m’umbe niweko;
Man kinde m’ebeketho tiend magali pare ubekadhu i wiye ku riuni,
De erege ngo.