Lembrieko

12 Ng’atu m’umaru twiny nwang’u emaru ng’eyong’ec,

Ento ng’atu m’udagu juk nwang’u rieko pare mbe.

 2 Ng’atu ma ber nwang’u bero i wang’ Yehova,

Ento epoko lembe iwi ng’atu ma pangu lembe ma rac.

 3 Ng’atu moko mbe ma copo bedo museme nikum lembe ma rac,

Ento jubidoyo won bedopwe ki ngo.

 4 Dhaku m’uromo en e jamker mi wic ni cware,

Ento dhaku ma timo lembe mi lewic e calu twoyo ma tobo cogone.

 5 Paru mi weg bedopwe tie atira,

Ento juk mi jutimrac tie ndra.

 6 Wec mi jutimrac tie libo ma negojo,*

Ento dhu ju m’atira bodhogi.

 7 Kinde ma juredho jutimrac, gibedo mbe,

Ento ot mi weg bedopwe bimedere nicungo.

 8 Jupaku ng’atini nikum rieko m’i dhoge,

Ento jubicayu ng’atu m’adundene rac.

 9 Eber nibedo ng’atu ma juyungo ngo akeca, re m’utie ku jatic

Kakare nibedo ng’atu ma yungere gire, re m’ulund ukoso cam.*

10 Won bedopwe gwoko lim* pare,

Ento kadok kisa pa jatimrac de tie rac.

11 Ng’atu ma furo ng’om pare biyeng’ ku cam,

Ento ng’atu m’ulubo tok gin ma konyne mbe ukoso rieko.*

12 Jatimrac ketho cwinye i kum gin ma jutimrac mange gimaku,

Ento ulag weg bedopwe cego nyinge.

13 Ng’atu ma rac moko i uwic nikum wec pare mi dubo,

Ento won bedopwe both kud i can.

14 Ng’atini yeng’ ku piny ma beco nikum wec m’i dhoge,

Man tic mi cinge bimiyo ire sukulia.

15 Yo pa jakasegu tie atira i wang’e gire,

Ento ng’atu ma riek winjo juk.

16 Jakasegu nyutho ndhu ndhu* nia lembe moko ubetime rac,

Ento ng’atu ma tie ku riekowang’ dieng’ ungo ku* wec ma rac.

17 Jamulembe mandha biyero lemandha,*

Ento jamlembe mi ndra cwayu ndra.

18 Wec ma juparu iye ngo tie calu cob mi palamularu,

Ento leb ng’atu ma riek keyo kum.

19 Dendhok ma yero lemandha bibedo rondo ku rondo,

Ento leb ma cwayu ndra bigalu pi kare moko kende.

20 Ndra n’i adunde ju ma gipangu nitimo lembe ma rac,

Ento jumii juk mi kwiyocwiny gibedo ku mutoro.

21 Lembe moko mbe ma rac ma binwang’u won bedopwe,

Ento jatimrac binwang’ere ku masendi dupa.

22 Yehova udagu dendhok ma cwayu ndra,

Ento ju ma gitimo ku bedoleng’ ginyayu anyong’a i iye.

23 Ng’atu ma tie ku riekowang’ kanu lembe m’eng’eyo,

Ento adunde jakasegu dhwolo kasegu pare woko.

24 Cing’ ju ma gitimo tic kud amora bibimo,

Ento jubiketho cing’ ma nyap i kum tic mir adici.

25 Adieng’acwiny mir adunde ng’atini nure,*

Ento wec ma ber nyayu anyong’a i iye.

26 Won bedopwe ng’iyo luba pare cuu,

Ento timo mi jutimrac ketho girwinyo.

27 Janyap riemo ngo tok ley,

Ento amora tie gin ma pire tek ni dhanu.

28 Yo mi bedopwe terojo i kwo;

I gengine tho umbe.