Zaburi
Ni jatel wi wer. Wer pa Daudi.
2 Ewodha kud i vur ma iye bewoy,
Kud i ucodho ma thuc.
Man eketho acungo iwi cana;
Eketho awotho kaka ma tek.
3 I ng’eye, eketho wer ma nyen i dhoga,
Ma en e pak ni Mungu mwa.
Dhanu dupa gibineno ku lworo
Man gibiketho genogen migi iwi Yehova.
4 Jamutoro tie ng’atu m’ugeno Yehova
Man ma dikere ngo ku jujai kadi ku dhanu ma reco.*
5 Itimo lembe dupa mire maa!
E Yehova Mungu para,
Tic peri wang’u ijo man paru peri yor i bang’wa gi dupa;
Ng’atu moko mbe ma jucopo poro kudi;
Kan apimo niyero pigi man niweco pigi,
Gi lee dit mir akwana.
6 Iyenyo ngo* lam kadi girathiera,
Ento iyabu itha pi niwinjo.
Ikwayu ngo lam m’awang’a man lam mi dubo.
7 Man ayero kumae: “Nen, abino.
Jugoro pira i kithabu m’adola.
8 E Mungu para, anyong’a nega nitimo yeny peri,
Man cik peri n’i adundena.
9 Abetwong’o lembanyong’a mi bedopwe i cokiri ma dit.
Nen! E Yehova, acero ngo dend dhoga
Calu m’ing’eyo ma ber.
10 Aumo ngo wi bedopwe peri i adundena,
Abetwong’o saa ceke nia itie Mungu ma jugeno man Mungu ma bodhojo.
Akanu ngo mer peri ma lokere ngo man lemandha peri i cokiri ma dit.”
11 E Yehova, kud icer kisa peri ira,
Timba mer peri ma lokere ngo man lemandha peri ugwoka saa ceke.
12 Peko m’utwoda gi lee dit ma gicopo kwaniri ngo.
Kosa para gi dupa akeca uketho ginura man acopo neno ngo yo para;
Gi lee ma sagu yuk wiya,
Pieno amora thum i kuma.
13 E Yehova, akweyi, bed ayika nibodha.
E Yehova, bin pio pio pi nikonya.
14 Wek dhanu ceke ma gisayu nikabu kwo* para
Lewic unyay i wigi man gidok pang’ pang’.
Wek ju m’anyong’a negogi i masendi para
Gilok ku ng’eygi ku lewic.
15 Wek dhanu ma gibeyero ira kumae: “Aha! Aha!”
Igi uwang’ lii nikum lewic migi gigi.
16 Ento wek ju ma gibeyenyo kakeri,
Mutoro man anyong’a neggi i kumi.
Wek saa ceke ju ma gimaru tic mi both peri giyer kumae:
“Dong’ Yehova unwang’ yung.”
17 Ento an, jakonyna mbe man a jacan;
Dong’ Yehova ulok wang’e yor i bang’a.
Itie jakonyna man jalarna;
E Mungu para, kud igal.