Yob
14 “Ng’atu ma nico ma dhaku unyolo,
kwo pare adundo man epong’ ku can.*
2 Ebino calu thiwe, man i ng’eye ener* cen.
Eringo calu tipopiny man erwinyo.
3 Eyo, iciko weng’i i kume,
man ikele kara jupok lembe i wiye.*
4 Ng’a ma copo ketho ng’atu ma leng’ unyolere kud i ng’atu m’ucido?
Ng’atu moko acel de mbe!
5 Tek judaru ng’olo nindo pare,
wend dwi pare n’i beng’i;
iketho ire kieu m’ecopo kadhu ngo.
6 Lok weng’i cen kud i kume kara eyom,
cil m’edar ko nindo pare calu jatic ma juculo acula.
7 Kum genogen unuti kadok ni yen de.
Tek jung’onde, ebiloth kendo,
man nyithi jange ma thindho bimedere nidongo.
8 Tek ulage utii i ng’om
man cudhone uthwo
9 ng’wic pii kende ci biketho ebiloth,
man ebiwodho jange calu yen ma jupidho ma nyen.
10 Ento dhanu tho, man evuto gblaa, m’umbe tego;
tek ng’atini tho, eni kani?
11 Pii mi nam rwinyo,
man kulo dwono man ethwo.
12 Dhanu bende vuto piny man eai ungo malu.
Tek fodi polo nuti ci, ebiai ungo,
kadi ebicew de ngo kud i wang’ nindo pare.
13 Ah, timba nwang’u ikana i Liel!*
Timba nwang’u ikana nitundo ma ng’eicwiny peri ukadh ko.
Nwang’u ing’ol ira nindo moko man ipoy pira.
14 Tek dhanu tho, nyo ecopo kwo kendo?
I nindo ceke mi tic para ma tek mir adici, abikuro
nitundo ma gony para bibino ko.
15 Ibilwong’o, man abidwoko iri lembe.
Ava tic mi cingi binegi lee.*
16 Ento pi kawoni, ibemediri nikwanu dagutielo para acel acel;
ibeneno peri kwa dubo para.
17 Jumwono dhu kier para i usau,
man imwono dhu racu para kud udok.
18 Calu ma got podho man iye rungere,
man cana coro ku kaka m’ebino i iye;
19 calu ma pii nang’u kidi
man pige m’upong’ molo mor ng’om cen,
e in de inyotho genogen pa dhanu kumeno.
20 Idiye asu cil m’etho ko,
iranju ayine man irieme cen.
21 Juyungo wote, ento eng’eyo lembene ngo;
jujwigo yung migi, ento enyang’ de ngo.
22 Ewinjo litho ndhu kinde ma fodi etie ku ring’kum;
ewak* ndhu kinde ma fodi etie kwo.”