Lembrieko
8 Nyo rieko ubelwong’o ngo?
Nyo ng’iyo i lembe ubeting’o ngo dwande malu?
2 Ecungo kaka ma malu i dhu yo,
Man i akarayo.
3 I ng’et dhugang’ ma terojo i adhura,
I kamondo mi dhugola,
Ebemedere nikok ma tek kumae:
4 “Abelwong’o wun, Ee dhanu;
Abeting’o dwanda malu iwu ceke.*
5 Wu dhanu ma wung’eyo ngo lembe akeca, wuponj riekowang’;
Wu jukusegu, wunwang’ adunde mi nyang’ i lembe.*
6 Wuwinji, kum gin m’abeyero pire tie tek,
Dend dhoga weco gin m’atira;
7 Kum dhoga yero lemandha nyamung’ mung’,
Man dend dhoga udagu lembe ma rac.
8 Wec mi dhoga ceke gi pwe.
Acel de mbe m’i kindgi m’ugondere kadi ma rac.
9 Ju ma ng’iyo i lembe ginyang’ i igi ceke yot yot
Man gitie atira ni ju ma ginwang’u ng’eyong’ec.
10 Jol twiny para kakare nijolo mola ma tar
Man ng’eyong’ec kakare nijolo mola ma kwar ma leng’.
11 Kum rieko ber ma sagu korai,*
Jucopo pore ngo ku piny mange ceke ma pigi tek.
12 An a rieko, abedo karacelo ku ju ma gitie ku riekowang’;
Anwang’u ng’eyong’ec man copo mi paru i lembe.
13 Lworo Yehova en e dagu gin ma rac.
Adagu yungiri gijo ku kuhaya man timo ma rac ku wec ma reco.
14 Atie ku juk ma beco man rieko;
Nyang’ i lembe man tego gi para.
15 Nikuma, jubim gimediri nibimo,
Man jutic ma dongo giwodho cik m’atira.
16 Nikuma, judongo ma wijo gimediri nibimo,
Man weg yung gipoko lembe i atira.
17 Amaru ju m’umara,
Man ju ma gibeyenya gibinwang’a.
18 Lonyo man dwong’ ni karacelo kuda,
Lonyo ma galu* man bedopwe bende.
19 Nyinga m’acego tie ber ma sagu mola ma kwar, ma sagu kadok mola ma kwar ma julilo,
Man gin m’acego tie ber ma sagu mola ma tar ma leng’.
20 Awotho i yo mi bedopwe,
I die gengi mi pokolembe ma pwe.
21 Amiyo giralaga ma cuu ni ju ma gimara,
Man apong’o dero migi.
22 Yehova ucwiya ni acaki mi yo pare,
Acaki mi tic pare ma yang’ con.
23 Juketho acungo niai con,*
Niai i acaki, niai yang’ con ma fodi ng’om umbe.
24 Kinde ma fodi pii ma thuc ubino mbe, junyola*
Kinde ma nwang’u fodi kulo m’udhenyini ubino mbe.
25 I wang’ ma fodi juketho ngo gudi kakagi,
I wang’ ungulu gudi,* nwang’u dong’ junyola,
26 Kinde ma fodi ecwiyo ngo ng’om ku podho m’i iye,
Kadi thungulu ng’om ma kwong’a mi ng’om.
27 Kinde m’ebeyiko polo, abino nuti keca;
Kinde m’eriedo kieu* iwi pii,
28 Kinde m’eketho* afuru malu,
Kinde m’eketho thekiri mi kulo ma thuc,
29 Kinde m’eketho cik ni nam
Nia pige ucikere ngo nikadhu kaka m’eng’olo,
Kinde m’eketho* kathere mi ng’om,
30 Abino i ng’ete calu jatic ma jabodho.
Abino ng’atu m’anyong’a nege i kume nisagu kubang’ nindo;
Anyong’a ubed unega i wang’e saa ceke;
31 Anyong’a ubed unega pi ng’om pare ma jukwo i wiye,
Man anyong’a ubed unega lee i kum wot dhanu.*
32 Man kawoni wota, wuwinja;
Eyo, jumutoro gi ju ma giworo lembe para.
33 Wuwinj twiny, man wudok riek,
Man kud wucaye.
34 Jamutoro en e ng’atu m’ubewinja
M’ubebino kugweno pir i* dhugola para kubang’ nindo,
Man m’ubekuro ceng’ini i dhugola para;
35 Kum ng’atu m’unwang’a binwang’u kwo,
Man enwang’u bero m’uai i bang’ Yehova.
36 Ento ng’atu m’udieng’ ungo kuda nwang’u enyayu peko i kume gire,*
Man ju ma gidaga gimaru tho.”