Zaburi
Ni jatel wi wer; juwere i dwal mi “Kud inyothi.” Miktam* pa Daudi. Kinde m’eringo Saul man ecidh epondo i oding’om.
57 Nyuth ira bero, E Mungu, nyuth ira bero,
Kum apondo* i beng’i,
Man abipondo i the vombi cil ma peko bithum ko.
2 Abewak i bang’ Mungu ma Malu ngbir,
I bang’ Mungu mandha, ma daru peko para ceke.
3 Ebioro kony niai kud i polo man ebibodha.
Ebijebo wi ng’atu m’ubemito maka. (Sela)
Mungu binyutho ira mer pare ma lokere ngo man bedoleng’ pare.
4 Umvor utieka* tingili;
Ubekwayu avut i kind dhanu ma gibemito gimvora,
Ma lakgi ve tong’ man athero
Man ma lebgi bith ve lak palamularu.
5 Dodiri malu iwi polo, E Mungu;
Wek dwong’ peri ubed iwi ng’om zoo.
6 Giciko voi pi nimaku tienda;
Can m’unura* ugomo kora piny.
Gitong’o vur i wang’a,
Ento gipodho i iye gin gigi. (Sela)
7 Adundena ucungo nging’ nging’, E Mungu,
Adundena ucungo nging’ nging’.
Abiwero wer man abigoyo mizik.
8 Cew, dwong’ para.
Cew, E jamgoyo wer ma juthondhe; in bende, E adungu.
Abicewo mombwa.
9 Abipeki i kind dhanu, E Yehova;
Abiwero iri wer mi pak* i kind thek.
10 Kum mer peri ma lokere ngo e dwong’, e ni malu ve polo,
Man bedoleng’ peri de cidho cil i kum afuru.
11 Dodiri malu iwi polo, E Mungu;
Wek dwong’ peri ubed iwi ng’om zoo.