Lembrieko
25 Maeni bende tie lembrieko pa Suleman, ma dhanu pa Hezekia m’ubimo mi Yuda gikiewo:*
2 Dwong’ pa Mungu tie nigwoko lembe ubed amung’,
Man dwong’ mi jubim tie niluro i lembe cuu.
3 Calu ma polo ni malu man ng’om tie thuc,
Kumeno bende i adunde jubim yenyere ngo.
4 Kab ceth cuma kud i kum mola ma tar
E ebiwok ma en zoo etie ma leng’.
5 Kab jatimrac cen kud i wang’ ubimo,
E komker pare bicungo nging’ nging’ i bedopwe.
6 Kud iyungiri giri i wang’ ubimo,
Man kud ibed i kind dhanu ma pigi tek,
7 Kum e ber nia en re m’eyer iri kumae: “Bin ibed kae,”
Kakare ma nia enyay lewic i wii i wang’ won yung.
8 Kud icidh nyapio pio niroyo kesi,
Kum ibitimo ang’o i ng’eye tek jadhugola peri unyayu lewic i wii?
9 Yik lembe m’i kindwu ku jadhugola peri,
Ento kud ituc lembe ma jukoro iri i amung’,*
10 Kara ng’atu m’ubewinjo kud unyay lewic i wii
Man imew rwonglembe* ma rac ma romo dok cokere ngo.
11 Calu pom mi mola ma kwar i ajeni mi mola ma tar,
Lembe ma juyero tap i saane de tie kumeno.
12 Calu lengethu mi mola ma kwar man jamruko mi mola ma kwar ma julilo,
Jamii juk ma riek de tie kumeno ni ith m’uwinjo juk.
13 Tap calu ng’ico mi pei i nindo mi kayucam,
Jaor mandha de tie kumeno ni ju m’uore,
Kum eyomo cwiny* jadit pare.
14 Calu afuru ku yamu ma cwiyo koth ungo,
Ng’atu ma lulere pi giramiya moko m’emiyo ngo* de tie kumeno.
15 Nikum twiyocwiny juloko paru pa jadit mir askari,
Man leb mi bero* copo turo cogo.
16 Tek inwang’u miyokic, cam kadhiri m’uromo iri,
Kum tek icame akeca, icopo ng’oge.
17 Tiendi kud ubed saa ceke i ot pa jadhugola peri,
Kara kud eol kudi man edegi.
18 Calu undoy, palamularu man athero ma lake bith,
Ng’atu ma miyo lembatuca mi vupo i kum jadhugola pare de tie kumeno.
19 Nijengiri iwi ng’atu ma genere ngo* i saa mi peko
Tie calu nyamu piny ku lak m’utur kunoke niwotho ku tielo ma tego mbe i iye.
20 Ng’atu m’ubewero wer ni ng’atu ma can n’i adundene
Tie calu ng’atu ma wodho bongu kud i kume i saa mi koyo
Man calu giramadha ma wac ma jukonjo iwi kadawasi.
21 Tek kec ubenego jadegi peri, mii ire cam* ecam;
Tek rieu ubenege, mii ire pii emadhi,
22 Kum ibicoko cugimac i wiye,*
Man Yehova bimiyo iri sukulia.
23 Yamu ma yo malu kelo koth,
Man leb ma yero nying’ nyayu ng’eicwiny.
24 E ber nibedo i gund wi ot
Kakare nibedo i ot ma rom ku dhaku ma jatiti.*
25 Rwonglembe ma ber m’uai i ng’om ma bor
Tie calu pii ma ng’ic ni ng’eyong’ec* m’uol.
26 Calu kulo ma wang’e tuk man pii m’atong’a m’unyothere,
Won bedopwe ma wekere ni* jatimrac de tie kumeno.
27 Etie ber ungo nicamu miyokic akeca,
Kadi etie lembe mi dwong’ ungo niyenyo dwong’ mijo gijo.
28 Ng’atu ma bimo ngo wi ng’eicwiny pare* tie calu adhura m’urungere,
Ma gang’kidine mbe.