Isaya
42 Nen! jatic para m’acungo i kume!
Ng’atu para m’ang’iyo, m’anyong’a nega i kume!*
Aketho tipo para i wiye;
Ebitero bedopwe ni thek.
2 Ebikok ungo kadi dwande de ebiting’o ngo,
Man ebiketho ngo dwande uwinjere i gengi.
3 Ebirungo ngo agada m’utur,
Man ebinego ngo kithambi m’ubedunyo yiro.
Ebiketho bedopwe bitimere kakare.
4 Ebikwiyo ngo man ebirungere ngo nitundo m’ebiketho bedopwe bitimere i ng’om;
Man cula ubemedere nikuro cik* pare.
5 Mungu mandha, Yehova,
Ma Jacwii polo man Ng’atu ma Dit m’upedhogi,
Ng’atu m’upedho ng’om ku piny ma cek i iye,
Ng’atu ma miyo yuyo ni dhanu m’i iye,
Man tipo ni dhanu ma wotho i wiye, uyero kumae:
6 “An a Yehova, alwong’i i bedopwe;
Amaku cingi.
Abigwoki man abimiyi ibed ni lembariba ni dhanu
Man der mi thek,
7 Kara iyab wang’ abinga,
Iwodh ju ma n’i kol i the ng’om
Man iwodh ju m’ubedo i mudho i kol.
8 An a Yehova. Eno re ma nyinga;
Amiyo ngo dwong’ para ni ng’atu moko acel de,*
Kadi yung para ni ayi gin m’acwiya m’ang’ika.
9 Nen! lembe ma kwong’a udaru kadhu;
Kawoni abetwong’o lembe ma nyen.
Anyutho pigi iwu ma fodi giwok ungo.”
10 Wuwer wer ma nyen ni Yehova,
Pak pare niai kud i tung’ ng’om,
Wu ju ma wuloro i nam man piny ceke m’upong’e,
Wu cula man ju ma bedo i iye.
11 Wek langa kud adhurane giting’ dwandgi,
Kagonjo ma Kedar bedo i igi.
Wek ju ma bedo i odicana ukok kud anyong’a;
Wek gikoki niai kud i die wi gudi.
12 Wek gimii dwong’ ni Yehova
Man gi twong’ pak pare i cula.
13 Yehova biwok calu jarukara.
Ebicewo amora pare calu jaramony.
Ebikok, eyo, ebikogo kok mi lwiny;
Ebinyutho nia e jarukara nisagu judegi pare.
14 “Amedara nibedo ling’ pi kare m’ulwar.
Abedo ling’ man adiyara;
Calu dhaku m’ubegonyere,
Abicur, abiyuyo ma tek, man abigamu ng’eta zoo i saa ma rom.
15 Abinyotho gudi kud ungulu gudi*
Man abithwoyo uboko migi pet.
Abidwoko kulo ni cula*
Man abithwoyo kut mir undodu.
16 Abitelo wi abinga i yo ma ging’eyo ngo
Man abiketho gibiwotho i yo ma ging’iyo ko ngo.
Abidwoko mudho m’i wang’gi ni der
Man abidwoko ng’om ma kli kli bidoko ni ng’om m’upoto.
Eno re ma gin m’abitimo igi, man abiwenjogi ngo.”
17 Gibidok ku ng’eygi man lewic ma lee bimakugi,
Gi ju ma gigeno ayi gin m’acwiya m’ang’ika,
Ju ma yero ni ayi gin m’acwiya mi cuma* kumae: “Wun wu mungu mwa.”
18 Wuwinji, wu ju ma ithwu dhing’;
Wuyab weng’wu man wunen, wun ma wun abinga.
19 Ng’a m’abinga m’uweko jatic para,
M’udhing’ magwei calu jakwenda m’aoro?
Ng’a m’abinga magwei calu ng’atu m’amiyo ire sukulia,
M’abinga magwei calu jatic pa Yehova?
20 Ineno piny dupa, ento iketho ngo wii i kumgi.
Iyabu ithi, ento gin m’iwinjo mbe.
21 Pi bedopwe pare,
Anyong’a nego Yehova niyungo cik* man niketho ebed dwong’.
22 Ento eno tie dhanu ma juyaku man ma jumayu;
Gin ceke gimoko i uwic i vur man jukanugi i kol.
Juyakugi ma ng’atu moko mbe m’ulargi,
Man jumayugi ma ng’atu moko mbe m’uyer kumae: “Wudwoggi!”
23 Ng’a m’ikindwu ma biwinjo lembuni?
Ng’a ma biciko ithe man biwinjo pi rundi m’ubino?
24 Ng’a m’umiyo juk ni Yakobo
Man Israel i cing weg ayeki?
Nyo utie ngo Yehova, ma ng’atu ma wadubo ire?
Gikwero niwotho i yo pare,
Man giworo ngo cik* pare.
25 E emedere nikonjo kwinyo pare iwi Israel,
Ng’eicwiny pare man kwinyo pare ma lake tek mi lwiny.
Ewang’u piny ceke m’i ng’etgi, ento gikwanu ko ngo.
Eopo i kumgi, ento giketho ngo cwinygi i kum lembene.