Isaya
2 Maeni tie gin ma Isaya ma wod Amoz uneno pi Yuda man pi Yeruzalem:
2 I dong nindo mir ajiki,*
Got ma ot pa Yehova n’i wiye
Bicungo ma tek malu iwi usimbru gudi,
Man ebidodere malu iwi ungulu gudi,*
E thek ceke bicoriri i bang’e.
3 Man dhanu dupa gibicidho man gibiyero kumae:
“Wubin, waidhu malu iwi got pa Yehova,
I ot pa Mungu pa Yakobo.
Ebiponjowa ku yo pare,
Man wabiwotho i yo pare.”
Kum cik* biwok kud i Sayuni,
Man lembe pa Yehova kud i Yeruzalem.
4 Ebipoko lembe i kind thek
Man ebidwoko lembe atira i kind dhanu dupa.
E gibifwodo palamularu migi ni kwej dhiang’
Man tong’ migi ni uligu.
Thek biting’o ngo palamularu i kum thek wadi,
Kadi gibiponjo ngo lwiny kendo nyanok de.
5 Wubin, Ee juruot pa Yakobo,
Wek wawothu i der pa Yehova.
6 Kum iwenjo dhanu peri ma juruot pa Yakobo,
Pilembe gipong’ bik ku piny m’uai yo Nyangu;
Gibetimo lembajoga calu Jufilisti,
Man gipong’ kud awiya mi juwirok.
7 Ng’om migi pong’ ku mola ma tar man mola ma kwar,
Man ajiki mi lonyo migi mbe.
Ng’om migi pong’ ku riuni,*
Man ajiki mi magali migi mbe.
8 Ng’om migi pong’ ku mungu ma tijgi mbe,
Girum piny ni tic mi cing’gi gigi,
Ni gin ma nyig cing’gi re m’uyiko.
9 E ng’atini kulo kore piny man ejwigere,
Dong’ icopo timo ngo igi kisa.
10 Mond i cana man pond i utur
Nikum bedonuti pa Yehova ma ng’oyo ndiri
Man dwong’ pare ma dit.
11 Jubijwigo doro m’i wang’ dhanu,
Man kethiri mi dhanu de jubijwigo.
Yehova kende re ma bidodere cing’ nica.
12 Kum etie nindo pa Yehova mir udul.
Ebebino iwi dhanu ceke ma nim man ma ting’iri,
Iwi dhanu ceke, dok ebed m’udodere kadi m’ujwigere,
13 Iwi yend tido mi Lebanon ceke m’uting’ere man m’udodere
Iwi yen ceke m’ujany mi Bacan,
14 Iwi gudi ceke ma wiw
Man iwi ungulu gudi ceke m’uting’ere malu,
15 Iwi udi ma wiw ceke m’uting’ere malu man iwi gang’kidi ma tek ceke,
16 Iwi meli ceke mi Tharsis,
Man iwi yei ceke ma beco.
17 Jubijwigo ting’iri mi dhanu
Man jubijwigo kethiri mi dhanu.
Yehova kende re ma bidodere i nindo maeca.
18 Mungu ma tijgi mbe bithum pet.
19 Dhanu bimondo i odicana
Man i oding’om
Nikum bedonuti pa Yehova ma ng’oyo ndiri
Man dwong’ pare ma dit,
Saa m’ebiai malu pi niketho ng’om uyengere nikum ndiri.
20 I nindo maeca, dhanu bibayu mungu migi ma tijgi mbe mi mola ma tar man mi mola ma kwar,
Ma giyiko igi kara gibed girum i wang’e
Man gibibayugi ni vuyu* man ni ulik,
21 Kara gimond i odicana
Man i kind cana m’ukak,
Nikum bedonuti pa Yehova ma ng’oyo ndiri
Man dwong’ pare ma dit,
Saa m’ebiai malu pi niketho ng’om uyengere nikum ndiri.
22 Dong’ pi bero mwu giwu, wujig nigeno dhanu ma dhanu e,
Ma tie kende kende yuyo mi odi ume.*
Juromo kwane pi thelembang’o?