Yeremia
18 Eni tie lembe pa Yehova m’ubino i bang’ Yeremia: 2 “Ai man ilor piny i ot pa jacwii agulu, man kuca abiwoketho ibiwinjo wec para.”
3 E aloro i ot pa jacwii agulu, man ebino timo tic iwi ukobre mi cwiyo agulu. 4 Ento agulu ma jacwii agulune ubino cwiyo kud ulobo unyothere i cinge. Pieno jacwii agulu udog ucwiye ni agulu mange, tap calu m’efoyo.*
5 I ng’eye lembe pa Yehova ubino i bang’a, uyero kumae: 6 “‘Nyo acopo timowu ngo tap calu ma jacwii agulu maeni utimo, Ee ot mir Israel?’ Yehova wacu. ‘Nen! wun’i cinga tap calu ulobo i cing’ jacwii agulu, Ee ot mir Israel. 7 Saa moko ci ma tek ayero nia abifudho, abirwombo man abinyotho thek kunoke ker moko, 8 man tek thekne uweko timo pare ma rac ma nwang’u aweco pire, an bende abiloko paru para* pi nyoth ma nwang’u akeco nia abikelo i wiye. 9 Ento saa moko ci ma tek ayero nia abigiero man abipidho thek kunoke ker moko, 10 man tek etimo lembe ma rac i wang’a man eworo ngo dwanda, abiloko paru para* pi lembe ma ber ma nwang’u akeco nitimo ire.’
11 “Kawoni akweyi, yer ni dhanu mi Yuda man ni ju ma bedo i Yeruzalem kumae: ‘Yehova uwacu kumae: “Nen, abeyiko* nyoth man abepangu lembe ma rac i kumwu. Timba wulokuru kud i yo mwu ma rac, wuwil yo mwu, man timo mwu.”’”
12 Ento gibiyero kumae: “Kud isendiri mananu! Kum wabilubo tok paru mwa, man ng’atuman m’i kindwa bitimo lembe nimakere ku thwon mir adundene ma rac.”
13 Pieno Yehova uwacu kumae:
“Akwayuwu, wukenyang’ i kind thek.
Ng’a m’udaru winjo lembe ma kumeni?
Nyaku ma sumba mir Israel utimo lembe ma rac nisagu zoo.
14 Nyo pei mi Lebanon rwinyo kud iwi cana i lung’ne?
Kunoke nyo pii ma ng’ic m’umol niai ku bor copo thwo?
15 Ento dhanu para giwil kuda.
Kum gibethiero lam ni gin ma tije mbe,
Man gibeketho dhanu ubekier kud i yo migi, i gengi ma con,
Kara giwoth i yo ma ng’ili ng’ili m’upoto ngo man ma kpee ngo,*
16 Pi nidwoko ng’om migi udok ni gin ma ng’oyo ndiri
Man gin ma julwiyo i kume ku zungo rondo ku rondo.
Dhanu ceke m’ukadhu ku keca igi biwang’ lii kinde ma gibenene man gibiyengo wigi.
17 Calu yamu ma yo nyangu, abilalu igi i wang’ jadegi.
I nindo mi nyoth migi abiloko igi ng’eya, ento wang’a ngo.”
18 Man giyero kumae: “Wubin, wacemu gamba i kum Yeremia, kum cik* birwinyo ngo kud i bang’ julam mwa, kunoke juk kud i bang’ jururieko kadike wec kud i bang’ jubila. Wubin wawecu rac i kume* man kud waciku ithwa i kum lembe m’eyero.”
19 Cik ithi i bang’a, Ee Yehova,
Man winj lembe ma jukwor para gibeyero.
20 Nyo judwoko wang’ bero ku racu?
Kum gidaru tong’o vur pi kwo para.*
Poy maram acungo ko i weng’i pi niweco ber pigi,
Kara kwinyo peri ulokere kud i bang’gi.
21 Pieno keth wotgi utho ku ndru,
Man keth githo i lak palamularu.
Kab awiya mi mon migi man gidok montho.
Wek thong’om uneg jumaco migi,
Juneg awobi migi i lwiny ku palamularu.
22 Keth nduru uwinjere i udi migi
Saa m’ibikelo udul weg ayeki rek i wigi.
Kum gitong’o vur pi nimaka
Man giciko uwic ni tienda.
23 Ento in, Ee Yehova,
Ing’eyo cuu lembe ceke ma reco ma gipangu pi ninega.
Kud ium wi kier migi.
Man kud iwey dubo migi kud i weng’i,
Wek gikier i weng’i
I saa m’ibimiyo igi matira nikum ng’eicwiny peri.