Lembrieko
7 Woda, wor lembe para,
Man gwok lembang’ola para cuu.
2 Wor lembang’ola para man ikwo;
Gwok telowic* para calu tongili weng’i.
3 Twiigi i kum nyig cingi;
Kiewgi iwi ban mir adundeni.
4 Yer ni rieko kumae: “In i nyamira,”
Man lwong’ nyang’ i lembe kumae: “Wat para,”
5 Pi nigwoki ni dhaku ma wang’e tar,*
6 Kud i wang’ kiyongila m’i wang’ madhirisa mi ot para,
Aneno yo piny,
7 Man aneno ju ma rieko migi mbe,*
Kud i kind aradu, aneno jalawobi moko m’ukoso rieko.*
8 Ekadhu ceng’ini i lukumba mi yo pa dhakune,
Man ecidho yor i bang’ ot pare
9 Kinde ma piny ubegamere, dhug uthieno
Kinde ma diewor man mudho udhingo.
10 I ng’eye aneno dhaku moko urombo kude,
M’ukendere calu* won asara, man etie ku rieko ma rac i adundene.
11 Dhoge tek man wiye tek.
Ebedo ngo* i pacu.
12 Eni eni nwang’u ewok woko, i ng’eye ekadhu i lela ma lac
Ebekemo piny ceng’ini i lukumba ceke mi gengi.
13 Emaku jalawobine man ecwiyo limbe;
Ma lewic umbe i wang’e, ewacu ire kumae:
14 “Nwang’u ukwayu athier lam mi kwiyocwiny.
Tin apong’o lembang’ola para ma ku kwong’.
15 Eno re m’uketho awok pi nibino rombo kudi,
Pi niseyi man anweng’i!
16 Apedho bongu ma nwang’* ma leng’ iwi kavuto para,
Bongu ma nwang’ m’ujebo rangi m’uai i Misiri.
17 Akwoyo mira, ukodhoro, man apoka yen ma ng’wice ng’ar iwi kavuto para.
18 Bin, wek wamerara ku mer nitundo kugweno;
Wek wawinj mido mer ma lake tek i kindwa,
19 Kum cwara mbe i pacu;
Ecidho i woth ma bor.
20 Eting’o usau mi sente ecidho ko,
Ebidwogo ngo nitundo ma dwi bigudo.”
21 Ewonde ku wec dupa mi thokojo.
Ewondo wang’e ku wec ma mit.
22 E rek kumeni ecaku lubo toke calu thwon dhiang’ ma jubecithumo,
Calu ng’atu ma rieko pare mbe ma jutwiyo ku kongo pi nicimiyo ire matira,
23 Nitundo m’athero ucobo cwinye;
Calu winyo ma ringo i uwic, eng’eyo ngo nia lembe maeno bikabu kwo* pare.
24 Man kawoni woda,* winja;
Keth wii i kum lembe m’abeyero.
25 Kud iwek adundeni ulokere yor i yo pare.
Kud iwek tiendi ukier yor i gengi pare,
26 Kum eketho dhanu dupa gipodho ni avu,
Man ju m’enego wendgi lee dit.
27 Ot pare terojo i Liel;*
Eloro piny i kusika ma kut mi tho.