Zaburi
147 Wupak Yah!*
Etie lembe ma ber niwero wer mi pak* ni Mungu mwa;
Etie lembe ma mit man m’uromo nia jupake!
2 Yehova ubegiero Yeruzalem;
Ebecoko dhu dhanu mir Israel ma gilal.
3 Ekeyo ju m’adundegi tur;
Eriwo wang’ rem migi.
4 Ekwanu wend nyikaluku;
Elwong’ogi ceke ku nying’gi.
5 Rwoth mwa tie dwong’ man tego pare tie lee akeca;
Ajiki mi rieko* pare mbe.
6 Yehova ting’o ju ma mol malu,
Ento eredho jutimrac i ng’om.
7 Wuwer ni Yehova ku dwoko foyofoc;
Wuwer wer mi pak ni Mungu mwa kud adungu.
8 Ng’atu m’uumo polo kud afuru,
Ng’atu ma ketho koth cwii iwi ng’om,
Ng’atu ma ketho lum twii iwi gudi.
9 Emiyo cam ni lei,
Ni nyithindh ungoro m’ubekwaye.
10 Anyong’a nege ngo i kum tego mi riuni;
Kadi iye wang’ ungo i kum tego* mi dhanu.
11 Anyong’a nego Yehova i kum dhanu ma gibelwore,
I kum dhanu ma gibekuro mer pare ma lokere ngo.
12 Pak Yehova, E Yeruzalem.
Yung Mungu peri, E Sayuni.
13 Edwoko riu mi dhugang’ mir adhura peri tek;
Epoko mugisa iwi woti i ii.
14 Eketho kwiyocwiny i ng’om peri;
Eyeng’i ku nganu ma ber nisagu.*
15 Eoro ng’ol pare iwi ng’om;
Lembe pare ringo pio pio.
16 Eoro pei calu bongu mi yuk rombe;
Elalu i pei* calu vuru.
17 Ecoro lungu pei pare calu lungu mukathi.
Ng’a ma copo cungo i wang’ koyo pare?
18 Eoro lembe pare man giloy.
Eketho yamu koto man pii mol.
19 Etwong’o lembe pare ni Yakobo,
Telowic pare man lembapoka pare ni Israel.
20 Etimo ngo kumeno ni thek moko mange acel de;
Ging’eyo ngo gin moko nyanok de i kum lembapoka pare.
Wupak Yah!*