Isaya
53 Ng’a m’uyiyo lembe m’ewinjo i bang’wa?*
Man cing’ Yehova ke unyuthere ni ng’a?
2 Ebidongo i wang’e* calu jang yen m’uloth, calu ulag yen i ng’om ngele.
Embe kud ayi kum mi yung kadi leng’o moko ci;
Man saa ma wanene, ayine maku ngo wang’wa.
3 Dhanu ucaye man uringe,
En m’e ng’atu ma nwang’u jukethe pi* litho man m’ung’iyo ku twoyo.
Udog ubedo ve jukanu wang’e iwa.*
Jucaye man wakwane ni gin ma tije mbe.
4 Andhandha eyeyo twoyo mwa en gire,
Man eyeyo litho mwa.
Re wanene calu ng’atu m’unwang’u goco, ma Mungu re m’ugoyo man usendo.
5 Ento jucobe pi kier mwa;
Jurunge pi kosa mwa.
Eyeyo matira pi kwiyocwiny mwa,
Man wakey nikum rem pare.
6 Wan ceke wabino wotho swa calu rombe,
Ng’atuman ukwanyu yo pare,
Man Yehova uketho kosa mwa ceke unur i wiye.
7 Jusende man eweko junyayu can i kume,
Ento ealu ngo dhoge.
Jutere i kathum calu urombo,
Calu min urombo ma bedo ling’ i wang’ junyar yuke,
Man ealu ngo dhoge.
8 Jukabe cen nikum adici man pokolembe;
Ng’a ma bidieng’ i kum lembe mi thekwaru pare?*
Kum jukabe cen kud i ng’om mi ju ma kwo;
Jufwode* pi kier mi dhanu para.
9 Man jumiyo ire kakuny* karacelo ku jutimrac,
Man jukunye ku julonyo* saa m’etho,
Kadok nwang’u etimo ngo racu*
Man junwang’u ngo ndra i dhoge.
10 Ento ubino yeny pa Yehova* nia jurunge, man eweko esendere.
Tek ibithiero kwo* pare ni girathiera mi kier,
Ebineno kodhi pare,* ebiketho nindo pare bing’adu,
Man nikadhu kud i bang’e, yeny pa Yehova bitimere kakare.
11 I ng’ey litho ma lee, gin m’ebineno bikwiyo cwinye.
Nikum ng’eyong’ec pare ng’atu ma pwe, jatic para,
Biketho jubikwanu dhanu dupa pwe,
Man ebiyeyo kier migi.
12 Pi thelembe maeno re m’amiyo ire makapiny i kind dhanu dupa,
Man ebipoko jambayeki ku jurukara,
Pilembe ekonjo kwo* pare kadok i tho
Man jukwane i kind judubo;
Eyeyo dubo mi dhanu dupa,
Man ekwayu pi judubo.