Yeremia
9 Akaa, ka nwang’u ndhu wiya tie pii,
Wang’a ke utie kut mi piwang’!
E nwang’u awak dieceng’ ku diewor
Pi nek ma junego ko dhanu mi jupara.
2 Akaa, ka nwang’u ndhu atie ku kabedo moko i langa calu juruwoth!
3 Gigomo lebgi calu atumb athero;
Ndra re m’ubamu i ng’ombe ento lemandha ngo.
“Gimediri ameda ku racu,
Man giciko ngo ithgi i bang’a,” Yehova wacu.
4 “Wun ceke wubed ku weng’wu i kum jirani mwu,
Man kud wugen kadok umego mwu.
Kum umego ceke cibojo,
Man jirani ceke gi juyernying’.
5 Ng’atuman ubekwalu jirani pare,
Man ng’atu moko mbe m’ubeyero lemandha.
Giponjo lebgi ucway ndra.
Gibeol aola ku timo lembe ma reco.
6 Ibekwo i kind ndra.
I ndra migi gikwero ning’eya,” Yehova wacu.
7 Pieno, Yehova mir udul uwacu kumae:
“Abiloyo igi man abimulo igi,
Kum acopo timo ang’o mange ku nya dhanu para?
8 Dhoggi utie athero mi nek ma cwayu ndra.
Ng’atini weco pi kwiyocwiny ku dhoge ni jirani pare,
Ento yor i iye ekanu libo.”
9 “Nyo acikara ngo nikwayu giwodh wel pi lembuno?” Yehova wacu.
“Nyo acikara ngo* niculo kwor i kum thek ma kumeno?
10 Abiwak man abigoyo nduru pi gudi
Man abiwero wer wak pi luba mi langa,
Pilembe juwang’ugi, uketho ng’atu moko mbe m’ubekadhu kud i igi,
Man dwand udul lim de ubewinjere ngo.
Winyo mi kor polo man yedi udaru ringo; gidaru ai.
11 Abidwoko Yeruzalem ni udhuru mi kidi, ni kabedo mir utho,
Man abidwoko adhura mi Yuda ni uvuru, ma ng’atu moko mbe ma bibedo i iye.
12 Ng’a ma riek lee pi ninyang’ i lembuni?
Dhu Yehova uweco i bang’ ng’a pi nitwong’o lembene?
Pirang’o ng’ombe unyothere?
Pirang’o ethwo calu langa,
Ma dong’ ng’atu moko mbe m’ubekadhu kud i iye?”
13 Yehova udwoko kumae: “Tie pilembe gikwero cik* para m’aketho i wang’gi, man pilembe gilube ngo man giworo ngo dwanda. 14 Ento gilubo tok adundegi ku thwon, man gilubo tok ayi gin m’acwiya pa Baal, calu ma weggi uponjo kogi nitimo. 15 Pieno, maeni tie lembe ma Yehova mir udul ma Mungu mir Israel uwacu: ‘Nen, abeketho dhanu maeni ucam yendadra man abiketho gibimadhu pii ma juadra. 16 Abilalugi i kind thek ma gin ku weggi de ging’eyo ngo, man abioro palamularu i tokgi nitundo m’abidarugi pet.’
17 Yehova mir udul uwacu kumae:
‘Wutim lembe ku rieko.
Wucok jumamon ma wero wer wak,
Man wulwong’ jumamon ma jubodho i wagu wak,
18 Kara gibin pio man gigoy iwa nduru,
Kara piwang’wa ucwir,
Man pii umol kud i bind wang’wa.
19 Kum dwand nduru ubewinjere niai i Sayuni kumae:
“Eni nia jufojunyothowa anyotha nia!
Lewic mwa tie dit ba!
Kum waweko ng’ombe man jurwombo udi mwa.”
20 Wu jumamon, wuwinj wec pa Yehova.
Dong’ ithwu ujol wec mi dhoge.
Wuponj nyigwu ku nduru maeni,
Man wuponjuru i kindwu ku wer wak maeni.
21 Kum tho uidho malu man emondo kud i madhirisa mwa;
Emondo i ot ma wiw mwa ma tek
Pi nikabu awiya mwa kud i gengi
Man awobi kud i akarayo.’
22 Wac kumae: ‘Yehova uwacu kumae:
“Avuj dhanu bipodho calu uweyo i wang’ lum,
Calu kanga cam ma nyen yor i ng’ey jakay cam
Ma ng’atu moko mbe ma bicokogi.”’”
23 Yehova uwacu kumae:
“Jararieko kud ululere pi rieko pare;
Won tego de kud ululere pi tego pare;
Man jalonyo de kud ululere pi lonyo pare.”
24 “Ento ng’atu m’ubeyungere, wek eyungere pi lembe ma e:
Nia e riek man eng’eya,
Nia an a Yehova, a Ng’atu ma nyutho mer ma lokere ngo, pokolembe m’atira man bedopwe i ng’om,
Kum anyong’a nega pi lembe maeno,” Yehova wacu.
25 “Nen! nindo bebino,” Yehova wacu, “man abiketho dhanu ceke ma jutimo yaa i kumgi ma re fodi jutimo ngo yaa i kumgi uwodh wel, 26 niwacu Misiri, Yuda, Edom, Amon ku Moab man dhanu ceke ma bedo i langa ma juthumo yukwic mi theng’gi; kum jutimo ngo yaa i kum thek ceke man jutimo ngo yaa i kum adunde ot mir Israel zoo.”