Yeremia
11 Lembe pa Yehova ubino i bang’ Yeremia, uyero kumae: 2 “Wuwinj wec mi lembariba maeni, wu dhanu!
“Yere* ni dhanu mi Yuda man ni dhanu ma bedo i Yeruzalem 3 man wac igi kumae: ‘Yehova Mungu mir Israel uwacu kumae: “Kwong’ iwi ng’atu m’uworo ngo wec mi lembariba maeni, 4 m’ang’olo ni kwaruwu i ceng’ m’awodhogi kud i ng’om mi Misiri, kud i uka mi loyo cuma kumae: ‘Wuwor dwanda man wutim lembe ceke m’ang’olo iwu, e wubidoko dhanu para man abibedo Mungu mwu, 5 kara atim lembe m’ang’olo ku kwong’ ni kwaruwu, ma nia abimiyo igi ng’om ma molo cak ku miyokic, calu m’etie ko tin eni.’”’”
E adwoko kumae: “Amen,* Ee Yehova.”
6 I ng’eye, Yehova uyero ira kumae: “Twong’ wec maeni ceke i adhura mi Yuda man i gengi mi Yeruzalem kumae: ‘Wuwinj wec mi lembariba maeni man wutii kugi. 7 Kum acimo kwaruwu thwolo thwolo niai i nindo m’awodhogi kud i ng’om mi Misiri cil tin eni, acimogi kendo kendo* kumae: “Wuwor dwanda.” 8 Ento giwinjo ngo man giciko ngo ithgi; ng’atuman ulund umedere nilubo tok adundene ma rac ku thwon. Pieno akelo i wigi wec mi lembariba maeni ceke m’ang’olo igi nia giwor, ento gikwero nitiyo kugi.’”
9 I ng’eye, Yehova wacu ira kumae: “Dhanu mi Yuda ku mi Yeruzalem gibecamu gamba pi nijai ira. 10 Giloko i tok kosa pa kwarugi ma yang’ con m’ugam ukwero niworo wec para. Gin bende gilubo tok mungu mange man gitimo igi. Ot mir Israel man ot mi Yuda uturo lembariba m’atimo ku kwarugi. 11 Pieno Yehova uwacu kumae: ‘Nen, abekelo nyoth i wigi ma gibiboth ungo kud i iye. Saa ma gibikwayu kony i bang’a, abiwinjogi ngo. 12 E adhura mi Yuda ku dhanu ma bedo i Yeruzalem bicidho i bang’ mungu ma gibed githiero lam igi* pi nikwayu kony i bang’gi, ento mungune bilarugi ngo nyanok de i saa mi nyoth migi. 13 Kum wend mungu mwu unyay lee calu wend adhura mwu, Ee Yuda, man wuguro pemlam dupa ni piny mi lewic* calu wend gengi m’upong’ i Yeruzalem, pemlam pi nithiero lam ni Baal.’
14 “Ento in,* kud irwo pi dhanu maeni. Kud iwak pigi man kud irwo pigi, kum abiwinjo ngo kinde ma gibelwong’a nikum nyoth migi.
15 Twero ma kani ma jamerna tie ko mi bedo i ot para
Ma ke dhanu dupa ubetimo lembe ma reco ma gipangu?
Nyo ku ring’o ma leng’* giromo cero nyoth kud ubin i wigi?
Nyo ibipekiri i saa maeca?
16 Con Yehova ubed ulwong’i nia yend oliv m’uluk,
Ma leng’ man ma nyinge beco.
Ecwinyo mac i kume ku woy ma dit,
Man juturo jange.
17 “Yehova mir udul ma ng’atu m’upidhi uyero nia nyoth bibino i wii pi lembe ma reco ma ot mir Israel man ot mi Yuda gitimo, ma ginyayu ko ng’eicwiny i iya ku lam ma githiero ni Baal.”
18 Yehova unyutho ira uketho ang’eyo;
I saa nica, iketho aneno lembe ma gibetimo.
19 Abino calu nyathin urombo ma mol ma jubetero i kathum.
Ang’eyo ngo nia gibino camu gamba i kuma nia,
“Wanyothu yende ku nyinge
Man wang’odue cen kud i ng’om mi ju ma kwo,
Kara kud jupoy pi nyinge kendo.”
20 Ento Yehova mir udul poko lembe ku bedopwe;
Eng’iyo i pidoic m’upondo* man i adunde.
Wek anen kwor peri m’ibiculo i wigi,
Kum aweko lemkesi para i cingi.
21 Maeni tie lembe ma Yehova uyero pi dhanu mir Anathoth m’ubesayu nikabu kwo peri* man m’uwacu kumae: “Kud iew lembila ku nying’ Yehova, imaru tho i the cingwa.” 22 Pieno Yehova mir udul uwacu kumae: “Nen, abikwayu giwodh wel. Awobi bitho i lak palamularu, man wotgi ku nyiggi bitho ku ndru. 23 Kadok dong’gi acel de mbe ma bidong’, pilembe abikelo nyoth iwi dhanu mir Anathoth i oro m’abikwayu giwodh wel i iye.”