Isaya
44 “Kawoni winji, Ee Yakobo ma jatic para,
Man in m’ang’iyi, Ee Israel.
2 Maeni tie lembe ma Yehova uwacu,
En m’e Jacwic peri man ng’atu m’ung’ini,
Ng’atu m’ukonyi niai kud i ic,*
‘Lworo kud unegi jatic para ma Yakobo,
Man in m’ang’iyi, Yecurun.*
3 Kum abikonjo pii iwi ng’atu ma rieu ubenego*
Man kulo m’ubemol iwi ng’om m’uthwo.
Abikonjo tipona iwi kodhini
Man mugisa para iwi nyikweyi.
4 Man gibitwii kud i kind lum ma numu,
Calu mbegu i dhu kulo.
5 Ng’atu acel biwacu kumae: “An a pa Yehova.”
Ng’atu ma kucelo bilwong’ere ku nying’ Yakobo
Man ng’atu mange lundo bikiewo iwi cinge kumae: “Pa Yehova.”
Man ebilwong’ere ku nying Israel.’
6 Maeni tie lembe ma Yehova uwacu,
Ubimo mir Israel man Jawar pare, Yehova mir udul:
‘An a Ng’atu ma kwong’a man ma tokcen.
Mungu mange mbe, ndhu an.
7 Ng’a ma calu ani?
Wek ekoki, eyer lembene man enyuthe ira!
Calu m’atimo niai i rundi m’aketho i iye dhanu mi rundi ma yang’ con,
Wek giyer lembe ma bibino
Man bende lembe ma bidotimere.
8 Ndiri kud umakwu,
Man kumwu de kud umiel ni lworo.
Nyo alar ayero ngo ni ng’atuman m’i kindwu man atwong’o ngo iwu?
Wu jumulembe para.
Nyo Mungu mange tie m’uweko ani?
Cana mange mbe, mange mbe m’ang’eyo.’”
9 Dhanu ceke ma yiko ayi gin m’acwiya m’ang’ika gi gin moko ngo,
Man piny migi ma gimaru akeca bibedo mbe ku sukulia,
Calu gi jumulembe migi, gin ma gineno* mbe man gin ma ging’eyo de mbe,
Pieno lewic bimaku ju m’uyikogi.
10 Ng’a ma copo yiko mungu kadi ma copo twagu ayi gin m’acwiya mi cuma
Ma copo miyo ngo ire sukulia?
11 Nen! Lewic binego juwadi ceke!
Jabodhone tie dhanu ma dhanu.
Wek gin ceke gicokiri man gicungi.
Ndiri bimakugi man lewic binegogi karacelo.
12 Jathiedh cuma thiedho cuma iwi cugimac ku jamtic pare.
Eyike ku nyondo,
Efwode ku tego mi cinge.
I ng’eye kec make man tego pare thum;
Calu m’emadhu ngo pii, egam eol.
13 Jabodho mi bau rieyo thol mi pimo piny, eriedo wang’e ku caki ma kwar.
Eyike ku jamgobo bau man eriede ku jamtwodo piny.
14 Ng’atu moko nuti ma tic pare tie ning’ondo yend tido.
Elondo kit yen moko, yen m’ujany,
Man eweke edoko ma tek i kind yen mi luli.
Epidho yend lorie man koth ketho edongo.
15 I ng’eye edoko yen ma jukudho ko mac.
Egamu kume moko pi nioyo;
Epangu mac man etedo mukathi.
Ento eyiko bende mungu man ewore.
Eyike ni ayi gin m’acwiya m’ang’ika man ekulo kore i wang’e.
16 Nusu yende moko ewang’u i mac;
Ku nusune evulo ring’o m’ecamu, man eyeng’.
Eoye bende man eyero kumae:
“Aha! Kuma doko mor kinde m’abeneno mac.”
17 Ento donge eyiko ni mungu, ni ayi gin m’acwiya pare m’ang’ika.
Ekulo kore i wang’e man ewore.
Erwo ire man eyero kumae:
“Bodha, kum in i munguna.”
18 Ging’eyo ngo gin moko, man ginyang’ ungo i gin moko,
Pilembe jumwono wang’gi uketho gicopo neno ngo piny,
Man rieko mbe i adundegi.
19 Ng’atu moko mbe m’uparu lembe i adundene,
Kadi m’utie ku ng’eyong’ec kunoke m’unyang’ i lembe m’eyer ko kumae:
“Nusune awang’u i mac, man cugine atedo ko mukathi man avulo ko ring’o mir acama.
E nyo ndhu donge ukwayu ayik ko gin ma judagu?
Nyo ndhu ukwayu awor dund yeni?”*
20 Ecamu vuru.
Adundene m’uwonde uketho ekier.
Ecopo larere ngo gire* kadi niyero nia:
“Eni re i cinga ma yor acwic e tie ndra ngo?”
21 “Poy pi lembuni, Ee Yakobo man in, Ee Israel,
Kum i tie jatic para.
Acwiyi man i tie jatic para.
Abiwil ungo kudi, Ee Israel.
22 Abiketho kier peri birwinyo calu ve i ng’ey afuru
Man dubo peri calu ve i ng’ey afuru ma pek.
Dwog i bang’a, kum abiweri.
23 Wukok kud anyong’a, wu polo,
Kum Yehova udaru timo lembe!
Wugoy muzira mir aloci, wu kaka ma thuc mi ng’om!
Wukok ku m’utoro, wu gudi,
In i luli bende man yen peri ceke!
Kum Yehova udaru waru Yakobo,
Man enyutho leng’o pare iwi Israel.”
24 Yehova, ma Jawarni,
M’ucwiyi niai ma in’i ic uwacu kumae:
“An a Yehova, m’ucwiyo piny ceke,
Apedho polo gira,
Man apedho ng’om.
Ng’a m’ubino karacelo kuda?
25 Athiro giranyutha mi jubila mi ndra,*
Man an re m’atie Ng’atu ma ketho juewlembe timiri ve abelu;
Ng’atu ma nyotho wi jururieko
Man adwoko ng’eyong’ec migi ni lemkasegu;
26 Ng’atu ma ketho wec pa jatic pare timere kakare
Man ma ketho lembaewa mi jukwenda pare pong’o kubang’e kubang’e;
Ng’atu ma wacu pi Yeruzalem kumae: ‘Jubibedo i iye,’
Man pir adhura mi Yuda kumae: ‘Jubidogierogi kendo,
Man abidogiero uvurune;’
27 Ng’atu ma yero ni pii ma thuc kumae: ‘Duny,
Man abidwono kulo peri ceke’;
28 Ng’atu ma yero pi Kuro* kumae: ‘E jakwac para,
Man ebitimo lembe ceke ma iya yenyo’;
Ng’atu ma yero pi Yeruzalem kumae: ‘Jubidogiere kendo,’
Man pir hekalu, ‘jubiketho kathere peri.’”