Poy mi Cik
33 Maeni tie mugisa ma Musa ma dhanu pa Mungu mandha upoko iwi Juisrael, i wang’ tho pare. 2 Ewacu kumae:
“Yehova ubino kud i Sinai,
man erienyo der i wigi niai kud i Seir.
Erienyo dwong’ niai kud i ng’om gudi mi Paran,
man udul ma leng’ ubino karacelo kude;
i cinge ma yor acwic, jurumony pare.
3 Egam emaru dhanu pare;
jumaleng’ migi ceke n’i cingi.
Gibedo i the tiendi;
gicaku winjo wec peri.
4 (Musa umiyo iwa lembang’ola, cik,
kara ubed ni aba ni cokiri pa Yakobo.)
6 Wek Ruben ukwo man kud etho,
man wend dhanu pare kud ubed nok.”
7 Man iwi Yuda epoko mugisa ma e:
“E Yehova, winji dwand Yuda,
man timba dwoge i bang’ dhanu pare.
Cinge ucero ba* piny pare,
man timba konye i dhu judegi pare.
8 Pi Lawi, ewacu kumae:
“Thumim peri* man Urim peri utie pa ng’atu mandha iri,
m’igam imulo iye i Masa.
Icaku nyego kude i bang’ pii mi Meriba,
9 ng’atu m’uwacu pi won man pi min kumae: ‘Akwanu kugi ngo.’
Kadok umego pare de eng’eyogi ngo,
man edieng’ ungo ku wote ma buu.
Kum egwoko lembe peri,
man eworo lembariba peri.
10 Wek giponj Yakobo ku telowic peri mi pokolembe,
man Israel ku Cik peri.
Wek githier udok ma ng’wice ng’ar iri,*
man girathiera ma zoo iwi pemlam peri.
11 Mii mugisa iwi kero pare, E Yehova,
man anyong’a negi i kum tic mi cinge.
Tur tiend* ju m’ubeai malu i dhoge,
kara ju m’udage kudi giai malu kendo.”
12 Pi Benjamin, ewacu kumae:
“Wek ng’atu ma Yehova umaru ubed museme nikume;
kinde m’ebegwoke i nindo ceke,
ebibedo i kind goke.”
13 Pi Yozefu, ewacu kumae:
“Wek Yehova umii musiga iwi ng’om pare,
ku piny m’ang’iya mi polo,
ku thoi man pii mi kulo ma n’i piny,
14 ku piny m’ang’iya ma ceng’ ucego,
man piny m’ang’iya ma becek kubang’ dwi,
15 ku piny m’ang’iya mandha m’uai kud i gudi ma con,*
man piny m’ang’iya mir ungulu gudi* ma nja,
16 ku piny m’ang’iya mi ng’ombe man piny m’upong’ i iye,
man mugisa pa Ng’atu ma bedo i kind yend ukudho m’udinyo.
Wek ebin iwi Yozefu,
i die wi ng’atu ma jukoyo cen kud umego pare.
17 Yung pare tie calu pa nyathi thwon dhiang’ ma kayu,
man tunge utie tung jobi.
Ebicwalu ko dhanu
ceke karacelo nitundo i tung’ ng’om.
Gitie udul elufu apar pa Efraim,
man gitie elufu pa Manase.”
18 Pi Zebulon, eyero kumae:
“Anyong’a negi, E Zebulon, kinde m’ibewok woko,
man in i Isakar de, i hema peri.
19 Gibilwong’o dhanu iwi got.
Kuca gibithiero lam mi bedopwe.
Kum gibitwomo lonyo m’upong’ mi nam,
man piny m’akana m’upondo mi kwiyo.”
20 Pi Gad, ewacu kumae:
“Mugisa ubed ni ng’atu m’ucoro kieu pa Gad.
Evuto keca calu umvor,
m’utie ayika niyeco bot, eyo, kadok upokowic.
21 Ebilondo ng’ete ma kwong’a pire gire,
kum jugwoko makapiny pa jamii cik keca.
Jutelwic mi dhanu bicokiri karacelo.
Ebitimo bedopwe pa Yehova,
man telowic pare mi pokolembe pir Israel.”
22 Pi Dan, ewacu kumae:
“Dan en e nyathin umvor.
Ebipor malu niai kud i Bacan.”
23 Pi Nafthali, ewacu kumae:
“Nafthali uyeng’ ku bero
man epong’ ku mugisa pa Yehova.
Mak yo reto man yo piny.”
24 Pir Acer, ewacu kumae:
“Mungu umiyo wot dupa ni Acer.
25 Jamtwiyo dhugang’ peri gi mi cuma man mi mola,
man ibibedo museme i nindo peri ceke.*
26 Ng’atu moko mbe ma calu Mungu mandha pa Yecurun,
m’ubering’ini i die polo pi nikonyi,
man m’ubering’ini iwi afuru i dwong’ pare.
27 Mungu en e kapondo niai yang’ con,
cinge ma rondo ku rondo biting’i.
Man ebiriemo jadegi peri cen kud i weng’i,
man ebiwacu kumae: ‘Dargi!’
28 Israel bibedo museme,
man pii ma dhenyini pa Yakobo bibedo agwoka,
i ng’om mi nying cam man mi pigulok ma nyen,
ng’om ma polone bimolo thoi.
29 I jamutoro, E Israel,
ng’a ma calu in,
m’i dhanu ma Yehova bodho,
en m’e ban peri mi gwok,
man palamularu peri ma dwong’i?
Judegi peri bijung’ i weng’i,
man ibiwotho i die ng’eygi.”*