Lembrieko
18 Ng’atu m’ubekoyere kende nwang’u ebesayu awanya pare gire;
Ekwero* rieko ceke.
2 Anyong’a nego ngo jakasegu i kum nyang’ i lembe;
Ento ewodho gin ma n’i adundene woko.
3 Kinde ma jatimrac utundo, cac bende tundo,
Man karacelo ku koso yung lewic bedo nuti.
4 Wec mi dhu ng’atini gi calu pii ma thuc.
Acaki* mi rieko tie calu kulo m’ubedhenyini.
5 E ber ungo nicwaku bang’ jatimrac
Kadi nicero won bedopwe ku twero pare.
6 Wec pa jakasegu terojo i dhaw,
Man dhoge lwong’o goco.
7 Dhu jakasegu kelo nyoth i wiye,
Man dend dhoge tie uwic ni kwo* pare.
8 Wec pa jayernying’ gi calu cam ma mit;*
Giloro piny nitundo i ic.
9 Ng’atu ma tie janyap i tic pare
Tie umin ng’atu ma kelo nyoth.
10 Nying’ Yehova tie ot ma wiw ma tek.
Won bedopwe ringo i iye man enwang’u gwok.*
11 Lonyo pa jalonyo tie adhura pare ma tek;
I paru pare etie calu gang’kidi ma gwoke.
12 Ting’iri lar mondo i adunde ng’atini i wang’ m’epodhi,
Man i wang’ dwong’, jwigiri lar bedo nuti.
13 Kinde ma ng’atini ubedwoko lembe i wang’ niwinjo lembene ceke,
Etie lembe mi kasegu man mi lewic.
15 Adunde ng’atu ma riek nwang’u ng’eyong’ec,
Man ith ng’atu ma riek bende yenyo ng’eyong’ec.
16 Giramiya pa ng’atini yabu ire yo;
Man etere i bang’ dhanu ma dongo.
17 Ng’atu ma kwong’a m’ubekoro lembe pare nen nia ve ebeyero lemandha,
Nitundo ma jadhoge bino man epenje ku penji.*
18 Bolo gagi jigo piem
Man epoko* kind ju ma tek ma giwinjiri ngo i kindgi.
19 Umego ma jutimo rac doko tek nisagu adhura ma tek,
Man dhaw moko nuti ma calu riu mi dhugola ot ma tek.
20 Ng’atini bipong’o iye nikum wec m’i dhoge;
Ebiyeng’ ku gin ma dend dhoge uwodho.
21 Leb utie ku copo mi nego man mi ketho jubed kwo;*
Ju ma gimaru nitiyo kude gibicamu nyinge.
22 Ng’atu m’unwang’u dhaku ma ber nwang’u enwang’u gin ma ber,
Man ejolo bero pa Yehova.
23 Jacan kwayujo akwaya kinde m’ebeweco,
Ento jalonyo dwoko lembe ku kwinyo.
24 Jurimo moko nuti ma gitie ayika ninyayu peko i kumgi i kindgi,
Ento jarimo moko nuti ma moko kii nisagu umego.