Lembrieko
6 Woda, tek iwodhiri niculo banja pa jadhugola peri
Tek iripo dhogi* ku jawirok,
2 Tek imoko i uwic nikum lembe m’ing’olo,
Imoko nikum wec mi dhogi,
3 Tim lembe ma e woda, man igonyiri giri,
Kum ipodho i cing’ jadhugola peri:
Cidh ijwigiri giri man ikway kisa lee i bang’e.
4 Kud iwek nindo ukadh i weng’i,
Kadi rip rip i bind weng’i.
5 Vudhiri giri calu amur kud i cing’ jadwar,
Man calu winyo kud i cing’ jacik winyo.
6 Cidh i bang’ ukok, in m’i janyap;
Nen tic pare man dok riek.
7 Kadok nwang’u embe ku jadit, jatelwic kadi jabim,
8 Eyiko cam pare i saa pa oro,
Man ecoko dhu cam pare i saa mi kayucam.
9 In m’i janyap, ibinindo nitundo awene?
Ibiai kud i wang’ nindo peri awene?
10 Kenind nyanok, nyathi rip rip moko nyanok,
Kegwak cingi nyanok pi niyom,
11 E can bipodho i wii calu won ayeki,
Man canpiny calu ng’atu ma tie ku jamlwiny.
12 Ng’atu ma kony pare mbe man ma jatimrac wotho kun ku kun ku wec ma reco;
13 Ediyo wang’e, egoyo tiende, man eyengo nyig cinge.
14 Kud adunde ma rac,
Epangu lembe ma reco saa ceke man emewo athube.
15 Pieno, peko bitundo i wiye rek;
I saa ma nyanok ci jubirunge ma dong’ ecopo key ungo.
16 Piny moko abusiel unuti ma Yehova udagu,
Eyo, piny abiro m’edagu* magwei:
17 Wang’ mi cac, leb ma cwayu vupo, man cing’ ma cwiro rimb ju ma lembe mbe i wigi.
18 Adunde ma pangu lembe ma reco, man tielo ma ringo pio pio i bang’ lembe ma rac,
19 Jamulembe mi ndra ma cwayu vupo ve eyuyo ayuya,
Man ng’atu moko ci ma thubo kind umego.
20 Woda, wor lembang’ola pa wuru,
Man kud iwek nilubo ponji* pa meru.
21 Riwgi saa ceke i kum adundeni;
Twiigi i ng’uti.
23 Kum lembang’ola utie thala,
Man cik utie lero,
Telowic man twiny gitie yo mi kwo.
24 Gibigwoki ni dhaku ma rac,
Ni leb mir abidhe pa dhaku ma won asara.*
25 Kud imar leng’o pare i adundeni
Kadi kud iwek emeki ku wang’e ma telojo,
26 Kum nikum dhaku ma won asara, ng’atini dong’ ku lungu mukathi acel kende,
Ento tek etie dhaku pa ng’atu mange, ebimaku kwo* ma pire tek.
27 Nyo ng’atini copo coko cugimac i kore man bongu pare wang’ ungo?
28 Kunoke nyo ng’atini copo wotho iwi cugimac ma lieth man tiende wang’ ungo?
29 Etie tap kumeno ni ng’atu moko ci m’utimo ribiri ku dhaku pa jadhugola pare;
Ng’atu moko mbe m’umulo kume ma binwang’u ngo matira.
30 Dhanu cayu ngo jakwo
Tek ekwalu pi nidaru kec m’unege.*
31 Enre tek jurube, ebiculo kawang’ pinje wang’ abiro;
Ebiweko piny ceke ma pigi tek mi ot pare.
32 Ng’atu moko ci m’utimo abor* ku dhaku nwang’u rieko pare mbe;*
Ng’atu m’utimo kumeno kelo nyoth i wiye gire.*
33 Ebinwang’u kende kende ret man koso yung,
Man lewic pare bikabere ngo.
34 Kum nyeko nyayu ng’eicwiny lee i cwar dhaku;
Kisa binege ngo nyanok de kinde m’ebeculo kwor.
35 Ebiyiyo ngo cul* moko acel de;
Kume bipiey ungo kadok nwang’u imiyo giramiya dupa.