Lembrieko
1 Lembrieko pa Suleman ma wod Daudi m’ubimo mir Israel:
2 Pi niponjo* rieko man twiny;
Pi ninyang’ i wec mi rieko;
3 Pi ninwang’u twiny ma miyo rieko,
Bedopwe, pokolembe ma ber,* man bedatira;
4 Pi niponjo riekowang’ ni ng’atu m’ung’eyo ngo lembe akeca;
Pi nimiyo ng’eyong’ec man copo mi paru i lembe ni jalawobi.
5 Ng’atu ma riek winjo man enwang’u ponji lee;
Man ng’atu ma tie ku copo mi nyang’ i lembe nwang’u bodho mi telowic*
6 Pi ninyang’ i lembrieko man i wec ma ng’eyo there tek,*
I wec mi ju ma riek man koy migi.
7 Lworo* Yehova tie acaki mi ng’eyong’ec.
Jukusegu kendgi re ma gicayu rieko man twiny.
8 Woda, winj twiny pa wuru,
Man kud iwek nilubo ponji* pa meru.
9 Gitie jamker mi wic ma leng’ mi thiwe ni wii
Man jamruko ma ber ni ng’uti.
10 Woda, tek judubo gibepimo niteli i bang’gi, kud iyii.
11 Tek giwacu kumae: “Bin karacelo kudwa.
Dong’ wakenu libo pi nicwiro rimo.
Wapondu pi nikiyo ju ma lembe mbe i wigi pi nilangu wiwa.
12 Wabimwonyogi ma kwo calu Liel,*
Ma lungu calu ju m’ubeloro i vur.
13 Wayeku piny migi ceke ma pigi tek;
Wabipong’o udi mwa ku jambayeki.
15 Woda, kud ilub tokgi.
Kud iwek tiendi uwoth i yo migi,
16 Kum tiendgi ringo pi nitimo lembe ma reco;
Gicidho pio pi nicwiro rimo.
17 Etie mananu niciko uwic* i wang’ winyo kinde m’ebeneno.
18 Eno re m’uketho gikanu libo pi nicwiro rimo;
Gipondo pi nikabu kwo* mi jumange.
19 Ju ma giyenyo ginwang’ lonyo i ayi m’atira ngo gitimo kumeno,
Man eno biketho gibibayu kwo* migi.
20 Rieko mandha ubekok ma tek i gengi.
Ebemedere niting’o dwande malu i akarayo.
21 Ebekok i lukumba* mi gengi ma dhanu kadhu lee kud i iye.
I kamondo mi dhugang’ mir adhura ebewacu kumae:
22 “Wu ju ma wung’eyo ngo lembe akeca wubimaru nibedo m’umbe ning’eyo lembe nitundo awene?
Wu jucac, wubimaru nicayu dhanu nitundo awene?
Man wu jukusegu, wubidagu ng’eyong’ec nitundo awene?
23 Wulokuru kinde m’ajukowu,
E abikonjo tipona i wiwu;
Abiketho wubing’eyo wec para.
24 Pilembe alwong’o, ento wumeduru nikwero,
Arieyo cinga, ento ng’atu moko mbe m’ubino ketho wiye,
25 Wumeduru nidieng’ ungo i kum juk para ceke
Man wukwero cimowang’ para,
26 An bende abing’ierowu kinde ma peko uwok i wiwu;
Abing’iero dhogwu kinde ma gin ma wubino lworo utundo,
27 Kinde ma gin ma wulworo ucoro i wiwu calu avuvu,*
Man can utundo i wiwu calu vira,
Kinde ma peko man lembe ma tek utundo i wiwu.
28 I saa nica gibimediri nilwong’a, ento abidwoko ngo lembe;
Gibiyenyo kakara kud ava, ento gibinwang’a ngo,
29 Pilembe gidagu ng’eyong’ec,
Man ging’iyo ngo nilworo Yehova.
30 Gikwero juk para;
Giworo ngo cimowang’ para ceke.
32 Kum jai mi ju ma ging’eyo ngo lembe akeca binegogi,
Man bedo m’umbe nidieng’ ma jukusegu gibedo ko binyothogi.
33 Ento ng’atu m’uwinja bibedo museme
Man ebibedo yoo m’umbe nilworo peko.”