Eklezia
1 Wec pa jacok dhu dhanu* ma wod Daudi, ubimo mi Yeruzalem.
2 “Gin ma iye nanu nisagu zoo!” jacok dhu dhanu ubewacu,
“Gin ma iye nanu nisagu zoo! Gin ceke iye nanu!”
3 Ng’atini romo nwang’u ang’o i tic ma tek pare ceke
M’ebemulere ko i the ceng’i?
4 Dhanu m’utuk acel kadhu man dhanu m’utuk mange bino,
Ento ng’om bedo* mi nja.
6 Yamu cidho yo piny man ewirere edok yo malu;
Emedere nidhokere kun ku kun; yamu medere ku woth pare.
7 Kulo ceke* mol loro i nam, re nam pong’ ungo.
Giloko gidok kendo i kaka ma gimol kud i iye, kara gimol kendo.
8 Piny ceke olojo;
Ng’atu moko mbe ma romo weco pire.
Wang’ yeng’ ungo ku neno piny;
Kadi ith de pong’ ungo ku winjo lembe.
9 Gin m’ubino nuti tie gin ma bibedo nuti,
Man gin m’utimere re ma bitimere kendo;
Gin moko mbe ma nyen i the ceng’.
10 Nyo gin moko nuti de ma ng’atini romo wacu pire kumae: “Kenen, e tie gin ma nyeni”?
Elar ebedo nuti niai yang’ con;
Elar ebedo nuti i wang’ rundi mwa.
11 Ng’atu moko mbe ma poy pi dhanu mi rundi ma con;
Kadi ng’atu moko mbe ma bipoy pi dhanu ma bibino i ng’eye;
Kadi ju ma bibino i ng’eygi de gibipoy pigi ngo.
12 An a jacok dhu dhanu abino ubimo iwi Israel i Yeruzalem. 13 Aketho adundena pi niponjo man ning’iyo ku rieko i gin ceke m’ubetimere i the polo, niwacu tic mi can ma Mungu umiyo ni wot dhanu kara gisendiri ko.
14 Aneno tic ceke m’ubino timere i the ceng’,
Man nen! gin ceke iye nanu, etie riemo tok yamu.
15 Gin m’ugom copo tirere ngo,
Man gin m’umbe copo kwanere ngo.
16 E awacu i adundena kumae: “Nen! anwang’u rieko lee dit nisagu ng’atu moko ci m’ular ubino i wang’a i Yeruzalem, man adundena unwang’u rieko ku ng’eyong’ec lee dit.” 17 Aketho adundena pi ning’eyo rieko man lembabelu* man pi ning’eyo kasegu, man maeni de tie riemo tok yamu.
18 Kum rieko m’akeca kelo can lee,
Uketho ng’atu m’ubemedo ng’eyong’ec nwang’u ebemedo can.