Yeremia
16 Lembe pa Yehova ubino kendo i bang’a, uyero kumae: 2 “Kud igam iri dhaku, man kud ibed kud awiya ma co ku ma nyir i kabedo maeni. 3 Kum maeni tie lembe ma Yehova uyero pir awiya ma co ku ma nyir m’unyoliri keni, pi meggi m’unyologi man pi weggi m’unyologi i ng’ombuni. 4 ‘Gibitho ku twoyo ma negojo, ento ng’atu moko mbe ma biwagugi kadi ma bikunyogi; gibidoko calu uweyo i wang’ ng’om. Gibitho ku palamularu man ndru, man avujgi bibedo ni cam ni winyo mi kor polo man ni yedi mi ng’om.’
5 Kum Yehova uwacu kumae:
‘Kud imond i ot ma ju m’ubewagu ju m’utho ubecamu cam i iye,
Man kud icidh igoy nduru kadi nikumo.’
‘Kum akabu kwiyocwiny kud i bang’ dhanu maeni,’ Yehova wacu,
‘Man bende mer para ma lokere ngo, ku kisa para.
6 Ju ma dongo ku ma thindho ceke bitho i ng’ombuni.
Jubikunyogi ngo,
Awaga de ng’atu ma biwagugi mbe,
Ng’atu moko mbe ma bithumo kume pigi kadi ma bigobo wiye pigi.*
7 Man ng’atu moko mbe ma bimiyo cam ni ju ma n’i lemcan,
Pi nijuko cwinygi pi ju migi m’utho;
Kadi ng’atu moko mbe ma bimiyo igi kikombe mi jukocwiny
Kara gimadhi pi weggi kunoke pi meggi m’utho.
8 Man kud imond i ot mi foc
Nibedo karacelo kugi pi nicamu man nimadhu.’
9 “Kum Yehova mir udul ma Mungu mir Israel uwacu kumae: ‘Abijigo dwal mir anyong’a man dwal mi foc, dwand cwar mugole man dwand nyamugole i kabedo maeni, i nindo mi kwo mwu, ma wun de wubeneno.’
10 “Saa m’ibiyero lembuni ceke ni dhanu maeni, gibipenji kumae: ‘Pirang’o Yehova ung’olo nyoth maeni zoo i wiwa? Kosa ang’o man dubo ang’o ma watimo ni Yehova Mungu mwa?’ 11 Icikiri nidwoko igi kumae: ‘“Tie pilembe kwaruwu giweka,” Yehova wacu, “man gimediri nilubo tok mungu mange, nitimo igi man nikulo korgi piny igi. Ento gilund giweka man cik para de giworo ngo. 12 Man wutimo lembe ma reco magwei nisagu ma kwaruwu gitimo, ng’atuman m’i kindwu ubelubo tok thwon mir adundene ma rac kakare niworo an. 13 Pieno abivudhowu kud i ng’om maeni i ng’om ma wun ku kwaruwu de wung’eyo ngo, man kuca bikwayu wuwok wutim ni mungu mange dieceng’ ku diewor, kum kisa binega ngo i kumwu.”’
14 “‘Ento nindo bebino,’ Yehova wacu, ‘ma gibiyero ngo kendo kumae: “Calu andha Yehova bedo kwo, en m’ewodho dhanu mir Israel kud i ng’om mi Misiri!” 15 Ento gibiyero kumae: “Calu andha Yehova bedo kwo, en m’edwogo dhanu mir Israel niai kud i ng’om ma yo malu, man niai kud i ng’om ceke ma nwang’u elalugi i iye!” Man abidwogogi i ng’om migi m’alar amiyo ni kwarugi.’
16 ‘Nen, abeoro juwak judwar nam dupa,’ Yehova wacu,
‘Man gibidwarugi.
I ng’ey maeno, abioro juwak judwar ley dupa,
Man gibidwarugi iwi gudi kud iwi ungulu gudi* ceke
Man i kind cana m’ukak.
17 Kum wang’a n’i wi lembe ceke ma gitimo.*
Gibedo ngo aponda i wang’a,
Kadi kosa migi de ubedo ngo aponda i wang’a.
18 Mi kwong’o, abiculo mukero m’uromo pi kosa man dubo migi.
Kum gicido ng’om para kud ayi gin m’acwiya migi ma judagu ma kwo mbe i igi,*
Man gipong’o giralaga para ku piny migi ma judagu.’”
19 Ee Yehova, in m’i tegona man ot para ma tek,
Kaka m’aringo i iye i saa mi can,
Thek bibino i beng’i niai kud i tung’ ng’om,
Man gibiyero kumae: “Gin ma kwaruwa gilagu tie kende kende vupo,
Gin ma iye nanu man ma miyo ngo bero moko.”
20 Nyo ng’atini copo yiko ire mungu
Ma ke i andha gi mungu ngo?
21 “Pieno abiketho gibing’eyo,
Eyo, abiketho gibing’eyo kero ku tego para wang’uni,
Man gibing’eyo andha nia nyinga tie Yehova.”