Zaburi
135 Wupak Yah!*
Wupak nying’ Yehova;
Wupake wu jutic pa Yehova,
2 Wun ma wucungo i ot pa Yehova,
I lela mi ot pa Mungu mwa.
3 Wupak Yah, kum Yehova e ber.
Wuwer wer mi pak* ni nyinge, kum e ber nitimo kumeno.
4 Kum Yah ung’iyo Yakobo ire gire,
Israel ni piny pare ma segi.*
5 Kum ang’eyo cuu nia Yehova tie dwong’;
Rwoth mwa tie dwong’ nisagu mungu mange ceke.
6 Yehova timo gin moko ci m’emaru nitimo
I polo man iwi ng’om, i nam man i kaka ma thuc ceke.
7 Eketho afuru* duny niai kud i tung’ ng’om;
Eketho lukoth mil* pi koth;
Eketho yamu wok kud i dero pare.
8 Enego kayu mi Misiri,
Dok ebed dhanu, kunoke lei.
9 Eoro giranyutha man udu i die ii, E Misiri,
I kum Farao man jutic pare ceke.
10 Enego thek dupa
Man jubim ma tek
11 Sihon m’ubimo mi Juamor,
Og m’ubimo mi Bacan,
Man bimobim ceke mi Kanan.
12 Emiyo ng’om migi ni giralaga,
Ni giralaga ni Israel ma dhanu pare.
13 E Yehova, nyingi bedo rondo ku rondo.
E Yehova, nyingi m’uyik* bedo i kind dhanu m’utuk ceke.
14 Kum Yehova bicero ba dhanu pare,
Man kisa binege* i kum jutic pare.
15 Ayi gin m’acwiya mi thek gi mi mola ma tar man mi mola ma kwar,
Gi tic ma cing’ dhanu utimo en.
16 Dhoggi nuti, ento giweco ngo;
Wang’gi nuti, ento gineno piny ungo;
17 Ithgi nuti, ento giwinjo ngo.
Yuyo umbe i dhoggi.
18 Dhanu m’ubeyikogi gibidoko calu gin,
Man bende ju ceke m’uketho genogen migi i wigi.
19 E ot mir Israel, wupak Yehova.
E ot pa Arun, wupak Yehova.
20 E ot pa Lawi, wupak Yehova.
Wun ma wulworo Yehova, wupak Yehova.
21 Dong’ jupak Yehova i Sayuni,
En m’e Ng’atu ma bedo i Yeruzalem.
Wupak Yah!