Isaya
9 Ento mudhone bibedo ngo calu kinde ma ng’ombe ubedo i masendi, calu i rundi ma con kinde ma jubed jucayu ng’om pa Zebulon ku ng’om pa Nafthali. Ento i ng’eye ebiketho jubiyunge, niwacu yo mi dhu nam, i ng’om mi Yordan, Galilaya mi thek.
2 Dhanu m’ubino wotho i mudho
Gineno der ma dit.
Ju m’ubedo i ng’om mi mudho ma bii ke
Der ucarugi.
3 Iketho thek unyay;
Iketho anyong’a pare umedere lee.
Anyong’a ubenegogi i weng’i
Calu m’anyong’a nego ko dhanu i saa mi kayucam,
Calu ju m’ubepoko jambayeki kud anyong’a.
4 Kum irungo i mberembere mi ter migi nziki nziki,
Uluth ma juberwadu ko gokgi, undoy pa jawitic,
Calu i rundi pa Midian.
5 Wara ceke mi juaskari ma yengo ng’om kinde ma giwotho
Man kendi ceke ma juvuko i rimo
Bidoko ni yenmac.*
Jubilwong’o nyinge Jamii juk ma wang’u ijo, Mungu ma jatego, Wego ma rondo ku rondo, Jadit ma wijo mi kwiyocwiny.
7 Kajik mi nyay mi bimobim* pare
Man mi kwiyocwiny bibedo mbe
Iwi komker pa Daudi man iwi ker pare
Pi niketho ecung ma tek man pi nitiele
Nikadhu kud i pokolembe m’atira man bedopwe,
Niai kawoni man rondo ku rondo.
Amora pa Yehova mir udul bitimo lembuni.
8 Yehova uoro wec i kum Yakobo,
Man ebino i kum Israel.
9 E dhanu ceke bing’eyo lembene,
Efraim man ju ma bedo i Samaria,
Ma gibewacu ku ting’iri migi man ku cac mir adundegi kumae:
10 “Briki udaru rwombere,
Ento wabigiero ku kidi m’apaya.
Judaru ng’ondo yend duru,
Ento wabipidho yend tido kakagi.”
11 Yehova bitugo judhu Rezin i kume
Man ebicwalu judegi pare i timo,
12 Siria biai ku yo nyangu man Jufilisti ku yo reto;
Gibing’amu dhoggi gibiramu ko Israel.
Pi lembuno zoo, ng’eicwiny pare uloko ngo ku ng’eye,
Ento cinge tie asu arieya pi nigoyo.
13 Kum dhanu udwogo ngo i bang’ Ng’atu m’ugoyogi;
Gisayu ngo kaka Yehova mir udul.
14 Yehova bing’ondo kud i Israel
Wic ku yib, jang yen man usi* i nindo acel kende.
15 Jadit man ng’atu mir awora mandha utie wic,
Man jabila m’ubeponjo ponji mi ndra re m’utie yib.
16 Ju m’ubetelo wi dhanu maeni giketho gibewoth swa
Man wi ju ma jubetelo wigi ulal.
17 Pi thelembe maeno re m’anyong’a binego ngo Yehova pir awobi migi,
Man kisa binege ngo i kum nyithikic* migi man montho migi,
Pilembe gin ceke gi jujai man jutimrac
Man dhok ceke ubeyero lemkasegu.
Pi lembuno zoo, ng’eicwiny pare uloko ngo ku ng’eye,
Ento cinge tie asu arieya pi nigoyo.
18 Kum lembe ma reco ubewang’ calu mac,
M’ubewang’u yend ukudho m’udinyo man doy,
Ebidhuro mac i kum vunga mi luli,
Man gibiduny i yiro ma ve afuru.
Ng’atu moko mbe ma biuro kadok umin.
20 Jubitong’o yor acwic
Ento kec binegojo asu;
Man jubicamu yor acam
Ento jubiyeng’ ungo.
Ng’atuman biramu ring’ bote gire,
21 Manase biramu Efraim,
Man Efraim biramu Manase.
Gibicokiri karacelo iwi Yuda.
Pi lembuno zoo, ng’eicwiny pare uloko ngo ku ng’eye,
Ento cinge tie asu arieya pi nigoyo.