Zekaria
13 “I nindo maeca, jubiyabu dhu pii m’atong’a ni ot pa Daudi man ni jurubedo mi Yeruzalem kara gidwokiri leng’ kud i kum dubo migi man cilo migi.
2 “I nindo maeca,” Yehova mir udul uwacu, “abikabu nying’ ayi gin m’acwiya kud i ng’ombe man jubipoy pigi kendo ngo; man abikabu jubila man tipo mi gin m’ucido kud i ng’ombe. 3 Man tek ng’atu moko ubeewo kendo, won ku min m’unyole gibiyero ire kumae: ‘Ibikwo ngo, pilembe icwayu ndra i nying’ Yehova.’ Man won ku min m’unyole gibicobe plu pi lembe m’ebeewo.
4 “I nindo maeca lewic bimaku jubila ceke pi gin ma wok i wang’ migi kinde ma gibeewo; man gibikendo ngo kendi ma segi mi yuk ley pi nicwayu ndra. 5 Man ng’atuman m’i kindgi biyero kumae: ‘Atie jabila ngo. Atie jarafur pilembe ng’atu moko ung’iewa kinde m’abino aradu.’ 6 Man tek ng’atu moko upenje kumae: ‘Ka rem ma n’i kumi* no ke uai kani?’ ebidwoko kumae: ‘Rem maeni anwang’u i ot mi jurimba.’”*
7 “Ee palamularu, cew i kum jakwac para,
I kum ng’atu ma tie jawodha,” Yehova mir udul uwacu.
“Goy jakwac man dong’ dwol* ulal;
Man abiloko cinga i kum ju ma kabang’gi mbe.”
8 “Man i ng’ombe ceke,” Yehova wacu,
“Jubikabu cen thenge ario m’i iye man gibitho;
Man thenge mir adege jubiweko bidong’ i iye.
9 Abiketho thenge mir adegene bikadhu kud i mac;
Man abililogi calu ma julilo ko mola ma tar,
Man abipimogi calu ma jupimo ko mola ma kwar.
Gibilwong’o nyinga,
Man abidwoko igi lembe.
Abiyero kumae: ‘Gitie dhanu para,’
Man gibiyero kumae: ‘Yehova tie Mungu mwa.’”