Isaya
50 Yehova uwacu kumae:
“Waraga mi lalu gamiri pa megwu m’ariemo ni kani?
Kunoke alworowu ni jumii banja para ma kani?
Nen! kosa mwu re m’uketho julworowu,
Man kier mwu re m’uketho juriemo megwu.
2 Dong’ ke pirang’o ng’atu moko bino mbe saa m’atundo?
Pirang’o ng’atu moko mbe m’uyii saa m’alwong’o?
Nyo cinga dungulu magwei pi niwaru,
Kunoke nyo tegona mbe pi nilaru?
Nen! nikum wec para nam thwo;
Aketho kulo doko langa.
Rec m’i igi top nikum pii m’umbe,
Man githo nikum rieu.
3 Aronyo polo ku mudho,
Man ayiko kendi mi saki ni jam umne.”
4 Rwoth Ubimo ma Malu Ngbir Yehova umiyo ira leb mi ju ma juponjo,*
Kara ang’ey kite m’aromo dwoko ko wec m’atira* ni ng’atu m’uol.
Ebed ecewa kubang’ kugweno;
Ebed ecewo itha kara awinj lembe calu ju ma juponjo.
5 Rwoth Ubimo ma Malu Ngbir Yehova uyabu itha,
Man ajai ungo.
Alokara ngo cen.
6 Athiero ng’eya ni ju m’ubegoya
Man limba ni ju m’ubefudho yir tika.
Akanu ngo wang’a ni ju m’ubecida man ni ju m’ubeng’ulo law i wang’a.
7 Ento Rwoth Ubimo ma Malu Ngbir Yehova bikonya.
Eno re m’uketho lewic binega ngo.
Pieno abiketho wang’a calu kidi ma lake bith,
Man ang’eyo nia jubinyayu ngo lewic i wiya.
8 Ng’atu m’ubeng’olo nia atie pwe ni ceng’ini.
Ng’a ma romo dota?*
Wek wacung wakude karacelo.*
Ng’a m’utie ku lembe i kuma?
Dong’ ecor i vuta.
9 Nen! Rwoth Ubimo ma Malu Ngbir Yehova bikonya.
Ng’a ma bing’olo nia kier n’i wiya?
Nen! gibitii calu bongu.
Man rudho bicamugi.
10 Ng’a m’i kindwu ma lworo Yehova
Man ma winjo dwand jatic pare?
Ng’a m’uwotho i mudho ma col bii, m’umbe der moko ci?
Wek eketh genogen pare i nying’ Yehova man ejengere iwi Mungu pare.
11 “Nen! wun ceke ma wubecwinyo mac,
Ma wubeketho ng’ili mac ukethere,
Wuwoth i der mac mwu,
I kind ng’ili mac ma wucwinyone.
Gin ma wubinwang’u kud i cinga ni e:
Wubivuto i litho ma rac.