Yeremia
1 Maeni tie wec pa Yeremia* ma wod Hilkia ma tie ng’atu acel m’i kind julam i Anathoth i ng’om pa Benjamin. 2 Lembe pa Yehova ubino i bang’e i rundi pa Yosiya ma wod Amon m’ubimo mi Yuda i oro mir apar adege mi camuker pare. 3 Edog ebino kendo i bang’e i rundi pa Yehoiakim ma wod Yosiya m’ubimo mi Yuda, nitundo i ajiki mi oro mir apar acende mi camuker pa Zedekia ma wod Yosiya m’ubimo mi Yuda, nitundo ma dhanu mi Yeruzalem ucidho i ng’eca i dwi mir abije.
4 Lembe pa Yehova ubino i bang’a, uyero kumae:
Aketho ibed jabila ni thek.”
6 Ento ayero kumae: “Akaa, Ee Rwoth Ubimo ma Malu Ngbir Yehova,
Ang’eyo weco ngo, kum a nyathin ma nyanok.”
7 Yehova ugam uyero ira kumae:
“Kud iyer nia ‘itie nyathin ma nyanok.’
Kum icikiri nicidho i bang’ dhanu ceke m’aori i bang’gi,
Man icikiri niyero lembe ceke m’ang’olo iri.
8 Lworo kud unegi pir ayi ma ginen ko,
Kum ‘ani kudi pi nibodhi,’ Yehova wacu.”
9 Yehova ugam urieyo cinge man emulo dhoga. Man Yehova uyero ira kumae: “Aketho wec para i dhogi. 10 Nen, akethi tin iwi thek man iwi ker pi nifudho man nituro, pi ninyotho man nirwombo, pi nigiero man nipidho.”
11 Lembe pa Yehova ubino kendo i bang’a, uyero kumae: “Yeremia, ibeneno ang’o?” E adwoko kumae: “Abeneno jang yend amandh.”*
12 Yehova uyero kumae: “Ineno tap, kum adaru cew andhandha i kum wec para pi niketho etimere kakare.”
13 Lembe pa Yehova ubino i bang’a wang’ mir arionde, uwacu kumae: “Ibeneno ang’o?” E adwoko kumae: “Abeneno agulu* m’ubewalini,* man dhoge ulung’ere niai ku yo malu.” 14 Yehova ugam uwacu ira kumae:
“Masendi bicoro niai ku yo malu
Iwi dhanu ceke ma bedo i ng’ombe.
15 Kum ‘abewaku juruot ceke mi ker ma yo malu,’ Yehova wacu,
‘Man gibibino; ng’atuman biketho komker pare
I dhu kamondo mi gang’ mi Yeruzalem,
I kum gang’kidine tingili
Man i kum adhura ceke mi Yuda.
16 Man abitwong’o pokolembe para i kumgi pi timo ma reco migi ceke,
Pilembe giweka
Man gibedunyo yiro mi lam ni mungu mange
Man gibekulo korgi piny ni tic mi cing’gi gigi.’
17 Ento icikiri nitwiyo pieri,
Man icikiri niai pi niyero lembe ceke m’ang’olo iri.
Kud ilworgi,
Kara kud anyay ndiri i ii i wang’gi.
18 Kum adaru kethi tin eni ni adhura ma tek,
Mbegi mi cuma, man gang’kidi mi mola i dhu ng’ombuni ceke,
Ni jubim mi Yuda man judongo ma wijone,
Ni julamne man dhanu mi ng’ombe.
19 E gibikiedo andha i dhogi,
Ento gibivoyi ngo,
Kum ‘ani kudi pi nibodhi,’ Yehova wacu.”