AI

1 Man maeni gi nying’ wot Israel m’umondo i Misiri karacelo ku Yakobo, ma ng’atuman umondo ku juruot pare: 2 Ruben, Simeon, Lawi, man Yuda; 3 Isakar, Zebulon, man Benjamin; 4 Dan man Nafthali; Gad man Acer. 5 Dhanu* ceke m’unyoliri ni Yakobo* ubino pier abiro, ento nwang’u dong’ Yozefu n’i Misiri. 6 Tokcenne, Yozefu ugam utho, man bende umego pare ceke ku dhanu m’utuk maeca zoo. 7 Man Juisrael* unyol man wendgi umedere lee mandha. Gimediri ninyay man nidoko tek lee i ayi ma wang’u ijo, uketho ng’ombe upong’ kugi.

8 I ng’ey kare, ubimo ma nyen m’ugam ung’eyo ngo Yozefu, ucaku bimo i Misiri. 9 Pieno, eyero ni dhanu pare kumae: “Nen! dhanu mir Israel wendgi lee man gi tek nisaguwa. 10 Dong’ wakwowu kugi ku rieko. Kum kan ungo, gibimediri ninyay man ka lwiny bituk, gibidikiri ku judhogwa man gibikiedo i dhogwa; e gibiai kud i ng’ombuni.”

11 Pieno giketho judong tic mir adici i wigi kara unurgi ku tic ma tek, man gigiero adhura mi Pithom ku Ramses ni kakanpiny pa Farao. 12 Ento kinde ma gibemediri nisendogi, Juisrael gilund gimediri ameda ninyol man ninyay lee mandha, uketho ndiri umakugi man adegi umondo i igi i kum Juisrael. 13 Eno uketho Jumisiri gidiyo Juisrael i ng’eca ma tek. 14 Gidwoko kwo migi kec ku tic ma tek, ma ginyono ko ulobo, gigoyo briki, man gitimo tic ma tung’ tung’ i podho calu ng’eca. Eyo, giketho gitimo kwond tic ceke ma tek mi ng’eca m’umbe kisa.

15 I ng’eye, ubimo mi Misiri uweco ku Cifra giku Pua ma gi juoymon ma Juebrania, 16 man eng’olo igi kumae: “Kinde ma wubekonyo mon ma Juebrania nigonyiri, wunen cuu nyathin m’ubewokne:* tek e nico, wunege; ento tek e nyaku, wuweke ebed kwo.” 17 Re juoymonne gilund gilworo Mungu mandha, man gitimo ngo lembe m’ubimo mi Misiri ung’olo igi. Giwotho weko awiya ma co ubedo kwo. 18 I ng’ey kare, ubimo mi Misiri ulwong’o juoymon maeno man epenjogi kumae: “Pirang’o wuweko awiya ma co ubedo asu kwo?” 19 Gidwoko ni Farao kumae: “Mon ma Juebrania gi calu mon ma Jumisiri ngo. Gi tek man gilar gioy ma nwang’u fodi jaoymon utundo de ngo i bang’gi.”

20 Pieno, Mungu utimo bero ni juoymonne, man dhanune gimediri ninyay man nidoko tek lee. 21 Man calu juoymon eno gigam gilworo Mungu mandha, i ng’eye edog emiyo igi awiya. 22 Tokcenne, Farao ung’olo ni dhanu pare ceke kumae: “Wubay mukere ceke ma co mi Juebrania i Kulo Nil, ento ma nyir ceke wuwek ubed kwo.”

2 I rundi maeca, jalwo moko mi suru pa Lawi ugamu dhaku de mi suru pa Lawi. 2 I ng’eye, dhakune ugamu iye man enyolo nyathin ma nico. Kinde m’eneno maram nyathinne leng’ ko, ekane pi dwi adek. 3 Saa ma kane udoko tek ire, egamu sondu* mi kolo man ewiro gudhro kud udok i kume, e eroyo nyathinne i iye man ecidh ekethe i kind undodu m’i dhu Kulo Nil. 4 Ento nyamin nyathinne ucungo ku bor pi nineno gin ma bitimere i kume.

5 Kinde ma Nya Farao uloro nijom i Nil, jutic pare ma nyir ubino wotho i dhu kulo Nil. Man egam eneno sondu i kind undodu. E wang’ acel eoro ng’eca pare ma nyaku ucidh ugame. 6 Saa m’eyabe, eneno nyathin, man nyathi jalawobine ubino wak. Pieno kisa unege i kume, man eyero kumae: “Eni ndhu acel m’i kind awiya mi Juebrania.” 7 E nyamin nyathinne upenjo Nya Farao kumae: “Nyo imito acidh alwong’ japidi moko i kind mon ma Juebrania kara utung nyathinne iri?” 8 Nya Farao udwoko ire kumae: “Eyo, cidhi!” E wang’ acel nyakune ucidho man elwong’o min nyathinne. 9 Nya Farao ugam uyero ire kumae: “Gam nyathin e i beng’i; tunge ira, man abiculi.” E dhakune ugamu nyathinne man etunge. 10 Kinde ma nyathinne udongo, etere i bang’ Nya Farao, man edoko wode. Ecaku nyinge Musa* man eyero kumae: “Tie pilembe awodhe kud i pii.”

11 I rundi maeca, kinde ma Musa udaru dongo,* ewok i bang’ umego pare pi nineno tic ma tek ma gibetimo,* man ewok eneno Jamisiri moko ubefwodo Jaebrania, m’acel m’i kind umego pare. 12 Pieno eloko wang’e kun ku kun, man calu eneno ng’atu moko mbe, enego Jamisirine man eyike i kwiyo.

13 Urwonde de ewok kendo, man ewok enwang’u Juebrania ario gibedhaw i kindgi. Pieno epenjo ng’atu m’ukoso kumae: “Pirang’o ibegoyo jawodhi?” 14 Ento edwoko ire kumae: “Ng’a m’ukethi ni jadit ma wijo man japoklembe i wiwa? Nyo imito inega calu m’inego ko Jamisiri?” E lworo umaku Musa man ewacu kumae: “Karaman lembuni udaru ng’eyere!”

15 I ng’eye, Farao uwinjo pi lembene man eyenyo nia eneg Musa; ento Musa uringo bor ku Farao man ecidh ebedo i ng’om mi Midian. Ewok ebedo piny i ng’et pii moko m’atong’a. 16 Nwang’u jalam mi Midian ubino ku jumanyir abiro, man jumanyirne gibino pi nitwomo pii man nipong’o wer, kara udul lim pa weggi umadh pii. 17 Ento calu ma naka, jukwac gibino man giriemogi cen. E Musa uai malu, ekonyo* jumanyirne man emiyo pii ni udul lim migi. 18 Saa ma gidok i pacu i bang’ Reuel* ma weggi, ewok epenjogi ku zungo kumae: “Tinne ke wudwogo i pacu pio kumeni nenedi?” 19 Gidwoko kumae: “Jamisiri moko uwok ularuwa kud i cing’ jukwac, etwomo iwa kadok pii, man emiyo bende pii ni udul lim.” 20 E eyero ni jumanyir pare kumae: “Ka eni kani ke? Pirang’o wuweko jalwone udong’ i ng’eywu? Wucidh wulwong’e, kara ecam karacelo kudwa.” 21 I ng’ey maeno, Musa uyiyo nibedo yo pa jalwone, man jalwone umiyo Zipora ma nyare ubed ni dhaku pa Musa. 22 I ng’ey kare enyolo nyathin ma nico, man Musa ucaku nyinge Gercom,* kum ewacu kumae: “Adoko umondo i ng’om pa jawirok.”

23 I ng’ey nindo m’ulwar, ubimo mi Misiri ugam utho, ento Juisrael gimediri nicur man niwagiri pi ng’eca ma gin’i iye, man wak ma gikwayu ko kony pi ng’ecane umedere niidho malu i bang’ Mungu mandha. 24 Tokcenne, Mungu uwinjo cur migi man epoy pi lembariba pare m’egam etimo kud Abraham, Isak, man Yakobo. 25 E Mungu uloko wang’e i bang’ Juisrael man eneno lembe ma gibekadhu kud i iye.

3 Musa ugam udoko jakway udul lim pa jalwon ma Yethro ma jalam mi Midian. Nindo moko, kinde m’ebekwayu udul limne man ebecidho kugi yo reto mi langa, ewok etundo i kum got pa Mungu mandha i Horeb. 2 E malaika pa Yehova uwok ire i lebmac i kind yend ukudho m’udinyo. Kinde m’ebenene, eneno nia mac ubeliel i kum yend ukudhone, ento yende ubewang’ ungo. 3 Pieno Musa uyero kumae: “Akecoro ceng’ini pi nineno cuu thangu maeni, man nineno nia pirang’o yend ukudho m’udinyo e ubewang’ ungo.” 4 Kinde ma Yehova uneno nia ebecoro ceng’ini pi nineno cuu, Mungu ulwong’e kud i yend ukudho m’udinyo kumae: “Musa! Musa!” Edwoko kumae: “Anuti eni.” 5 Egam eyero kumae: “Kud icor ceng’ini. Wodh wara peri kud i tiendi, pilembe kaka m’icungo i iye en e ng’om ma leng’.”

6 Emedo kumae: “An a Mungu pa wuru, Mungu p’Abraham, Mungu pa Isak, man Mungu pa Yakobo.” E Musa ukanu wang’e, pilembe ebino lworo nineno Mungu mandha. 7 Yehova umedo bende kumae: “Andha adaru neno masendi mi dhanu para ma gin’i Misiri, man awinjo wak ma gibewak ko pi dhanu m’ubediyogi nitimo tic ma tek; ang’eyo cuu litho ma gibenwang’u. 8 Abiloro piny nibodhogi kud i the cing’ Jumisiri man abiwodhogi kud i ng’om maeca, abiterogi i ng’om ma ber man ma lac, i ng’om ma molo cak ku miyokic, ng’om mi Jukanan, mi Juhithi, mi Juamor, mi Juperizi, mi Juhivi, man mi Juyebusi. 9 Nen! wak mi dhanu mir Israel udaru tundo i bang’a, man aneno bende ayi ma Jumisiri ubesendo kogi m’umbe kisa. 10 Kawoni dong’ abiori i bang’ Farao, man ibiwodho dhanu para ma Juisrael kud i Misiri.”

11 Ento Musa udwoko ni Mungu mandha kumae: “An a ng’a ma nia acidh i bang’ Farao, man awodh Juisrael kud i Misiri?” 12 Mungu lund uwacu ire kumae: “Abibedo kudi, man maeni bibedo iri ni giranyutha ma nia an re m’aori: I ng’ey m’ibiwodho dhanune kud i Misiri, wubitimo* ni Mungu mandha iwi got maeni.”

13 Ento Musa uyero ni Mungu mandha kumae: “Wakeketh nia acidho i bang’ Juisrael man ayero igi kumae: ‘Mungu pa kwaruwu uora i beng’wu.’ Ka gipenja kumae: ‘Nyinge ng’a?’ Abidwoko igi ang’o?” 14 Mungu udwoko ni Musa kumae: “Abidoko gin m’ang’iyo* nidoko.”* Man emedo kumae: “Ibiyero ni Juisrael kumae: ‘Abidoko uora i beng’wu.’” 15 I ng’eye, Mungu uyero kendo ni Musa kumae:

“Ibiyero ni Juisrael kumae: ‘Yehova Mungu pa kwaruwu, Mungu p’Abraham, Mungu pa Isak, man Mungu pa Yakobo uora i beng’wu.’ Eno re m’utie nyinga pi nja, man nikum nying’ maeno re ma dhanu m’utuk ceke bibepoy pira. 16 Kawoni cidhi, cok judongo mir Israel man iyer igi kumae: ‘Yehova Mungu pa kwaruwu, Mungu p’Abraham, pa Isak, man pa Yakobo uwok ira man eyero kumae: “Andha adaru nenowu, man aneno bende lembe ma jubetimo i kumwu i Misiri. 17 E ang’olo nia abiwodhowu kud i masendi ma wubenwang’u i the cing’ Jumisiri, man abiterowu i ng’om mi Jukanan, mi Juhithi, mi Juamor, mi Juperizi, mi Juhivi, man mi Juyebusi, ng’om ma molo cak ku miyokic.”’

18 “Andha gibiwinjo dwendi man wubicidho, in karacelo ku judongo mir Israel i bang’ ubimo mi Misiri, man wucikuru niyero ire kumae: ‘Yehova Mungu mi Juebrania uweco kudwa. Dong’ wakweyi, wek wacidh i woth mi nindo adek i langa kara wathier lam ni Yehova Mungu mwa.’ 19 Ento an gira ang’eyo cuu nia ubimo mi Misiri biyiyo ngo iwu nia wucidhi ka fodi cing’ ma tek kudiye ngo. 20 Pieno bikwayu ariey cinga man agoy Misiri ku thangu para ceke m’abitimo i iye; e i ng’ey maeno, ebiweko wubicidho. 21 Abiketho dhanu maeni binwang’u bero i wang’ Jumisiri, man kinde ma wubecidho, wubicidho ngo zoo de ma cingwu nanu. 22 Dhakuman ucikere nikwayu jadhugola pare man dhaku ma bedo yo pare umii piny mi mola ma tar ku mi mola ma kwar, man bende bongu, man wubironyogi i kum wotwu ku nyigwu; e wubiyaku Jumisiri.”

4 Ento Musa udwoko kumae: “Re wakeketh nia giyiya ngo man giwinjo ngo dwanda, kum gibiyero kumae: ‘Yehova unyuthere ngo iri.’” 2 Yehova ugam upenje kumae: “Ang’o ma n’i cingi no?” Edwoko nia, “uluth.” 3 Eyero kumae: “Bole i ng’om.” E ebole i ng’om man uludhe doko ni thwol, man Musa uringe. 4 Yehova ulund uyero ni Musa kumae: “Riey cingi man imake ku yibe.” Egam erieyo cinge man emake, e edoko ni uluth i cinge. 5 I ng’eye, Mungu uyero kumae: “Eno biketho gibiyiyo nia Yehova Mungu pa kwarugi, Mungu p’Abraham, Mungu pa Isak, man Mungu pa Yakobo uwok iri.”

6 Yehova uyero ire kendo kumae: “Akweyi, keroy cingi i bongu ma n’i kori.” E eroyo cinge i bongu pare. Kinde m’ewodhe, nen, dhobu unang’u cinge udoko ma tar calu pei! 7 I ng’eye eyero kumae: “Dwok cingi i bongu ma n’i kori.” Egam edwoko cinge i bongu pare. Kinde m’ewodhe kud i bongune, cinge udok kubang’e calu dend kume mange! 8 Eyero kumae: “Tek giyii ngo kunoke gikwanu ngo ku giranyutha ma kwong’a, e gibiyiyo giranyutha mir arionde no kokoro. 9 Ento tek asu giyiyo ngo giranyutha ario maeni man gikwero niwinjo dwendi, ibigamu pii moko mi Kulo Nil man ikonje iwi ng’om m’uthwo; e pii m’igamu kud i Nilne bidoko ni rimo iwi ng’om m’uthwo.”

10 Musa uyero ni Yehova kumae: “Tim ira kisa, Yehova, an to ang’eyo weco ber akeca ngo ba, nik’ebed niai con kadi niai m’ibeweco ku jatic peri e de, kum dhoga pek man leba de pek.” 11 Yehova uyero ire kumae: “Ng’a m’ucwiyo dhu dhanu, kadi ng’a ma ketho gidoko buba, udhing’, ginen piny cuu kunoke abinga? Nyo tie an a Yehova ngo? 12 Dong’ kawoni cidhi, man abibedo kudi kinde m’ibeweco,* abiponji ku gin m’icikiri niyero.” 13 Ento eyero kumae: “Tim ira kisa, Yehova, timba or ng’atu moko ci mange m’ibemito ior.” 14 E ng’eicwiny pa Yehova ugam uopo i kum Musa, man ewacu kumae: “Nyo umeru m’Arun ma Jalawi e umbe? Ang’eyo nia eromo weco ma ber mandha. Man kawoni ebebino pi nirombo kudi. Kinde m’ebineni, anyong’a binego adundene. 15 Dong’ icikiri niweco kude man ninyutho ire gin m’ebiyero.* Abibedo kudi man kude bende kinde ma wubeweco, man abiponjowu ku gin ma wubitimo. 16 Ebiweco i bang’ dhanu kakeri man ebibedo jayerlembe peri, in ke ibibedo calu Mungu ire.* 17 Ibiting’o uluth maeni i cingi man ibitimo kude giranyutha.”

18 Pieno Musa udok i bang’ Yethro ma jalwon man eyero ire kumae: “Akweyi, abemito acidhi man adok i bang’ umego para i Misiri pi nineno ka nyo fodi asu gi kwo.” Yethro udwoko ni Musa kumae: “Cidh ma cwinyi kwiyo.” 19 I ng’ey maeno, Yehova uyero ni Musa i Midian kumae: “Cidhi, dok i Misiri, pilembe dhanu ceke m’ubino yenyo kwo peri* gidaru tho.”

20 E Musa uting’o dhaku pare man wote ekethogi iwi kana, man etugo woth pi nidok i ng’om mi Misiri. Eting’o bende uluth pa Mungu mandha i cinge. 21 Yehova ugam uyero ni Musa kumae: “I ng’ey m’ibitundo i Misiri, nen nia itimo udu ceke m’amiyo iri copo mi timo i wang’ Farao. Ento abiweko adundene udok nwang’, man ebiweko ngo dhanu para ucidhi. 22 Icikiri niyero ni Farao nia, ‘Yehova uyero kumae: “Israel tie woda, kayu para. 23 Abeyero iri nia, wek woda ucidhi kara etim ira. Ento tekene ikwero niweke, abinego wodi, kayu peri.”’”

24 Kinde m’ewok i gengi i kaka m’ukwayu evut i iye, Yehova urombo kude man eyenyo nia enege. 25 Tokcenne, Zipora uting’o kidi ma lake bith etimo ko yaa i kum wode, man eketho dendkum mi yome umulo tiende, e ewacu kumae: “Utie pilembe in i cwar mugole mi rimo ira.” 26 E Mungu uweke ecidho. I saa maeno, Zipora uwacu kumae: “Cwar mugole mi rimo” nikum yaa.

27 I ng’eye, Yehova uyero ni Arun kumae: “Cidh i langa pi nirombo ku Musa.” E ecidho man erombo kude i kum got pa Mungu mandha man emothe ku cwiyo limbe. 28 Man Musa ukoro ni Arun lembe ceke ma Yehova m’uore uyero ire, man giranyutha ceke m’eng’olo ire nia etim. 29 I ng’ey maeno, Musa gikud Arun gicidho man gicoko judongo ceke mir Israel. 30 Arun ukoro igi lembe ceke ma Yehova uyero ni Musa, man etimo giranyutha i wang’ dhanu. 31 E dhanune gigam giyiyo. Saa ma giwinjo nia Yehova upoy pi Juisrael man nia eneno masendi migi, gikulo korgi piny man gipodho arieba wang’gi.

5 I ng’ey maeno, Musa gikud Arun gimondo i bang’ Farao man giyero ire kumae: “Yehova Mungu mir Israel uwacu kumae: ‘Wek dhanu para ucidhi kara gitim ira foc i langa.’” 2 Ento Farao udwoko kumae: “Yehova tie ng’a, ma nia acikara niworo dwande, m’awek ko Israel ucidhi? Ang’eyo ngo Yehova nyanok de, man ke abiweko ngo Israel ucidhi.” 3 Gilund giyero kumae: “Mungu mi Juebrania uweco kudwa. Dong’ wakweyi, wabemito wacidhi pi woth mi nindo adek i langa, man wathier lam ni Yehova Mungu mwa; kan ungo, ebigoyowa ku thong’om kunoke ku palamularu.” 4 Ubimo mi Misiri udwoko igi kumae: “Musa wukud Arun, pirang’o wubeketho dhanu uwek tic migi? Wudok i dhu tic* mwu!” 5 Man Farao umedo kumae: “Wukenen maram wend dhanu m’i ng’ombe lee ko, man wulund wubemito giyom i kum tic migi?”

6 Nindo ma rom eca, Farao ung’olo ni juwitic mir adici man ni bajego mi jutic mi Juisrael kumae: 7 “Kud wumii lum kendo ni dhanu maeno ma gigoy ko briki. Wuwek gicidh gicok lum gin gigi. 8 Ento wucikuru niketho gigoy wend briki ma rom calu ma gibed gigoyo i wang’e. Kud wujwig wende igi, kum gibenambu anamba.* Eno re m’uketho gibewagiri nia, ‘wamito wacidhi, wamito wathier lam ni Mungu mwa!’ 9 Wuketh gitim tic ma tek lee man kud wuwek igi saa moko, kara kud giketh wigi i kum ndra.”

10 Pieno, juwitic mir adici man bajego mi jutic mi Juisrael giwok man gicidh giyero ni dhanune kumae: “Wuwinj lembe ma Farao uyero e: ‘Abimiyo ngo iwu lum kendo. 11 Wucidh wusay lum mwu wun giwu kaka moko ci ma wucopo nwang’e i iye, ento tic mwu bijwik ungo nyanok de.’” 12 E dhanune gilal mba mba i ng’om mi Misiri zoo pi nicoko soka kaka lum. 13 Man juwitic mir adici uwotho cegogi kumae: “Ng’atuman ucikere nidaru tic pare ma kubang’ ceng’, tap calu kinde ma jubed jumiyo iwu lum.” 14 Bende juwitic mir adici pa Farao ucaku fwodo bajego mi jutic ma giketho iwi Juisrael. Gipenjogi kumae: “Pirang’o nyaworo ku tin wutuc ungo nigoyo wend briki ma wubed wugoyo i wang’e?”

15 Pieno, bajego mi jutic mi Juisrael gimondo i bang’ Farao man giwagiri kumae: “Pirang’o ibetimo jutic peri kumeni? 16 Jubemiyo ngo lum ni jutic peri, ento jubeyero iwa kumae: ‘Wugoy briki!’ Jubefwodowa, wa jutic peri, ma ke kosa n’i wi dhanu peri.” 17 Ento edwoko kumae: “Wubenambu anamba, wubenambu anamba!* Eno re m’uketho wubeyero nia, ‘wamito wacidhi, wamito wathier lam ni Yehova.’ 18 Dong’ kawoni wucidhi, wudok i kum tic! Jubimiyo ngo iwu lum, ento wucikuru nigoyo wend briki ma rom.”

19 E bajego mi jutic mi Juisrael gineno nia gin’i peko ma lee nikum lembe ma jung’olo igi nia, “kud wujwig nyanok de wend briki ma wucikuru nigoyo kubang’ ceng’.” 20 Kinde ma giwok kud i bang’ Farao, giwok girombo ku Musa gikud Arun ma nwang’u gicungo keca pi nirombo kugi. 21 E wang’ acel giwacu igi kumae: “Yehova re m’unen lembe ma wubetimo man epok lembe i wiwu, kum wuketho Farao ku jutic pare gidaguwa* man wuketho palamularu i cing’gi kara ginegwa.” 22 E Musa ulokere i bang’ Yehova man ewacu kumae: “Yehova, pirang’o iketho dhanu maeni gineno cani? Pirang’o iora? 23 Niai i ceng’ m’amondo i bang’ Farao pi niweco ku nyingi ci, efosendo dhanu maeni dong’ ku rac, man andha in de ibodho ngo dhanu peri.”

6 E Yehova uyero ni Musa kumae: “Kawoni ibineno gin m’abitimo i kum Farao. Cing’ ma tek bidiye niweko gicidhi, man cing’ ma tek bidiye niriemogi cen kud i ng’om pare.”

2 I ng’eye, Mungu uyero ni Musa kumae: “An a Yehova. 3 Con abed anyuthara ni Abraham, ni Isak, man ni Yakobo calu Mungu ma Jategokpo, ento aketho ngo ging’eya pi lembe m’uneno nyinga ma Yehova. 4 Atimo bende lembariba para kugi pi nimiyo igi ng’om mi Kanan, ng’om ma gigam gikwo i iye calu umondo. 5 Kawoni adaru winjo cur mi dhanu mir Israel ma Jumisiri udwoko ni ng’eca, man apoy pi lembariba para.

6 “Pieno, yer ni Juisrael kumae: ‘An a Yehova, abiwodhowu kud i the ter ma pek mi Jumisiri man abibodhowu kud i ng’eca ma gikethowu i iye. Abiwaruwu ku bot ma tek* man ku pokolembe ma dit. 7 Abigamuwu calu dhanu para man abibedo Mungu mwu, e wubing’eyo andhandha nia an a Yehova Mungu mwu m’ubewodhowu kud i the ter ma pek mi Misiri. 8 Man abiterowu i ng’om m’ang’olo pire ku kwong’* nia abimiyo ni Abraham, ni Isak, man ni Yakobo; abimiye iwu kara ebed ni aba mwu. An a Yehova.’”

9 I ng’eye, Musa ukoro lembuno ni Juisrael, ento giwinjo ngo Musa nikum cwinygi m’utur man nikum ng’eca ma tek ma gibino i iye.

10 Yehova ugam uweco i bang’ Musa, eyero kumae: 11 “Mond i bang’ Farao m’ubimo mi Misiri, man iyer ire nia ecikere niweko Juisrael uwok kud i ng’om pare.” 12 Ento Musa udwoko ni Yehova kumae: “Nen! Juisrael de giwinja ngo; ka dong’ Farao ke biwinja nenedi, an m’aweco cuu ngo e?”* 13 Ento Yehova uyero kendo ni Musa gikud Arun lembe ma ging’ol ni Juisrael man ni Farao m’ubimo mi Misiri, pi niwodho Juisrael kud i ng’om mi Misiri.

14 Maeni wic mi juruot mi Juisrael: wot Ruben ma kayu pa Israel ubino Hanok, Palu, Hezron, man Karmi. Eno juruot pa Ruben.

15 Wot Simeon ubino Yemuel, Yamin, Ohad, Yakin, Zohar, man Caul ma wod Nyakanan. Eno juruot pa Simeon.

16 Maeni tie nying’ wot Lawi, nimakere ku thekwaru migi: Gercon, Kohath, man Merari. Wend oro mi kwo pa Lawi ubino dak acel ku pier adek wi abiro.

17 Wot Gercon ubino Libni man Cimei, nimakere ku wat migi.

18 Wot Kohath ubino Amram, Izhar, Hebron, man Uziel. Wend oro mi kwo pa Kohath ubino dak acel ku pier adek wi adek.

19 Wot Merari ubino Mahli giku Muci.

Eno ubino wat mi Julawi, nimakere ku thekwaru migi.

20 Amram ugamu Yokebed ma wayumire ni dhaku ire. Enyolo ire Arun giku Musa. Wend oro mi kwo pa Amram ubino dak acel ku pier adek wi abiro.

21 Wot Izhar ubino Kora, Nefeg, man Zikri.

22 Wot Uziel ubino Micael, Elzafan, man Sithri.

23 Arun ugamu Eliceba ma nyaku pa Aminadab, ma nyamin Nason ni dhaku ire. Enyolo ire Nadab, Abihu, Eleazar, man Ithamar.

24 Wot Kora ubino Asir, Elkana, man Abiasaf. Eno ubino ju pa Kora.

25 Eleazar ma wod Arun ugamu dhaku pare i kind jumanyir pa Putiel. E enyolo ire Fineas.

Maeno gi jutelwic mi thepacu mi Julawi, nimakere ku wat migi.

26 Arun giku Musa eno re ma Yehova uyero igi kumae: “Wuwodh dhanu mir Israel kud i ng’om mi Misiri i ungu ungu.” 27 Gin eno, niwacu Musa gikud Arun, re ma gigam giweco i bang’ Farao m’ubimo mi Misiri pi niwodho dhanu mir Israel kud i Misiri.

28 I nindo maeca, kinde ma Yehova uweco ku Musa i ng’om mi Misiri, 29 Yehova uwacu ni Musa kumae: “An a Yehova. Yer lembe ceke m’abeyero iri ni Farao m’ubimo mi Misiri.” 30 E Musa uyero ni Yehova kumae: “Nen! aweco cuu ngo,* dong’ Farao ke biwinja nenedi?”

7 E Yehova uwacu ni Musa kumae: “Nen, aketho idoko calu Mungu ni Farao, man Arun m’umeru bidoko ni jabila peri. 2 Ibiyero ire lembe ceke m’ang’olo iri, man Arun m’umeru biyerogi ni Farao. E ebiweko Juisrael biwok kud i ng’om pare. 3 Ento an, abiweko cwiny Farao udok nwang’, man abimedo giranyutha para kud udu dupa i ng’om mi Misiri. 4 Re Farao biwinjowu ngo. E abiketho cinga iwi Misiri man abiwodho udul dhanu para ma Juisrael kud i ng’om mi Misiri ku pokolembe ma dit. 5 Man Jumisiri gibing’eyo andha nia an a Yehova, kinde m’abirieyo cinga i kum Jumisiri man abiwodho Juisrael kud i kindgi.” 6 E Musa gikud Arun gitimo lembe ma Yehova ung’olo igi; gitimo tap kumeca. 7 Musa ubino ku oro pier abora man Arun ke ubino ku oro pier abora wi adek kinde ma giweco ku Farao.

8 I ng’eye, Yehova uyero ni Musa gikud Arun kumae: 9 “Tek Farao biwacu iwu nia, ‘wuketim udu,’ ibilund yero ni Arun kumae: ‘Ting’ uluth peri man ibole i wang’ Farao.’ E ebidoko ni thwol ma dit.” 10 Pieno, Musa gikud Arun gimondo i bang’ Farao man gitimo tap calu ma Yehova ung’olo. Arun ubolo uluth pare i wang’ Farao ku jutic pare, e edoko ni thwol ma dit. 11 Ento Farao uketho julwong’o jururieko ku baajoga. Man baajoga mi Misiri de gitimo lembe ma rom ku maji migi. 12 Ng’atuman ubolo uluth pare, man gidoko ni thwol ma dongo dongo; ento uluth p’Arun umwonyo uluth migi. 13 Re asu cwiny Farao udoko nwang’ man ewinjogi ngo, tap calu ma Yehova ular uyero.

14 I ng’eye, Yehova uwacu ni Musa kumae: “Cwiny Farao tie nwang’. Ekwero niweko dhanu para ucidhi. 15 Cidh i bang’ Farao urwo kugweno. Nen! ebicidho i dhu pii, man icung i dhu Kulo Nil pi nirombo kude; ting’ bende uluth m’ugam ulokere ni thwol ca i cingi. 16 Man icikiri niyero ire kumae: ‘Yehova Mungu mi Juebrania uora i beng’i man ewacu kumae: “Wek dhanu para ucidhi kara gitim ira i langa,” ento nitundo kawoni iworo ngo. 17 Yehova uwacu kumae: “Nikum lembe maeni, ibing’eyo nia an a Yehova. Nen, abigoyo pii mi Kulo Nil kud uluth m’i cinga, man ebidoko ni rimo. 18 Rec mi Nil bitho, man ng’wic Nil bidoko tik, e ebicopere ngo ni Jumisiri nimadhu pii mi Nil.”’”

19 I ng’eye, Yehova uwacu ni Musa kumae: “Yer ni Arun kumae: ‘Ting’ uluth peri man iriey cingi iwi pii mi Misiri, iwi kulo ma n’i iye, iwi pii m’ariega m’i iye,* iwi kut m’i iye, man iwi nam ceke m’i iye kara gidok ni rimo.’ Rimo bibedo i ng’om mi Misiri zoo, cil i agulu mi yen man mi kidi.” 20 E ndhu ndhu Musa gikud Arun gitimo tap calu ma Yehova ung’olo. Arun uting’o uluth malu man egoyo pii mi Kulo Nil i wang’ Farao ku jutic pare, man pii ceke ma n’i kulone udoko ni rimo. 21 Pieno, rec m’i kulone utho, man ng’wic kulone udoko tik, e ecopere ngo ni Jumisiri nimadhu pii mi Nil, man rimo uromo die ng’om mi Misiri zoo.

22 Ento baajoga mi Misiri de gitimo lembe ma rom ku maji migi, uketho cwiny Farao umedere nibedo nwang’ man ewinjogi ngo, tap calu ma Yehova ular uyero. 23 E Farao udok i ot pare, man edieng’ ungo ku lembe maeno de. 24 Man Jumisiri ceke gicaku tong’o pii i ng’et Nil kun ku kun pi niyenyo pii m’amadha, pilembe gicopo madhu ngo pii mi Nil nyanok de. 25 Man nindo abiro zoo ukadhu i ng’ey ma Yehova ugoyo Nil.

8 I ng’eye, Yehova uwacu ni Musa kumae: “Mond i bang’ Farao man iyer ire nia, ‘Yehova wacu kumae: “Wek dhanu para ucidhi kara gitim ira. 2 Tek asu ibekwero niweko gicidhi, abigoyo ng’om peri ceke ku goco mir udul ungwal. 3 Man ungwal bipong’ bik i Kulo Nil, gibiwok man gibimondo i ot peri, i kusika peri, iwi kavuto peri, i udi mi jutic peri, iwi dhanu peri, i kendo peri, man i jam mieno kwen peri. 4 Ungwal bicoriri i wii, iwi dhanu peri, man iwi jutic peri ceke.”’”

5 I ng’eye, Yehova uyero ni Musa kumae: “Wac ni Arun kumae: ‘Riey cingi kud uluth peri iwi kulo, iwi pii m’ariega mi Nil, man iwi kut, man keth ungwal ucorere iwi ng’om mi Misiri.’” 6 E Arun urieyo cinge iwi pii mi Misiri, e udul ungwal ucaku wok man uumo ng’om mi Misiri. 7 Ento baajoga mi Misiri de gitimo lembe ma rom ku maji migi; gin de giketho ungwal ucoro iwi ng’om mi Misiri. 8 I ng’eye Farao ugam ulwong’o Musa gikud Arun man ewacu igi kumae: “Wukway Yehova ukab udul ungwal kud i bang’a man kud i bang’ dhanu para, pilembe abemito awek dhanu mwu gicidhi kara githier lam ni Yehova.” 9 E Musa udwoko ni Farao kumae: “Abeweko dwong’ne ubed iri m’iyer ko ira saa m’akway ko Mungu kara udul ungwal uai kud i beng’i, kud i bang’ jutic peri, kud i bang’ dhanu peri, man kud i udi peri. Gibidong’ ndhu i Kulo Nil kende.” 10 E ewacu nia, “urwo.” Pieno Musa uyero kumae: “Ebitimere calku lembe m’iyero, kara ing’ey nia ng’atu moko acel de mbe ma calu Yehova Mungu mwa. 11 Ungwal biai kud i beng’i, kud i udi peri, kud i bang’ jutic peri, man kud i bang’ dhanu peri. Gibidong’ ndhu i Nil kende.”

12 E Musa gikud Arun gigam giwok kud i bang’ Farao, man Musa ukwayu Yehova pir ungwal m’ecoro iwi Farao. 13 Man Yehova utimo calu ma Musa ukwayu, e ungwal ucaku tho i udi, i lela, man i lum. 14 Jucaku coko dhug ungwalne i ungu ungu ma kwanere ngo, man ng’wic ng’ombe udoko tik. 15 Kinde ma Farao uneno nia yamu ukudhogi, edwoko cwinye nwang’ man ekwero niwinjogi, tap calu ma Yehova ular uyero.

16 Yehova ugam uyero ni Musa kumae: “Yer ni Arun kumae: ‘Riey uluth peri man igoy utur mi ng’om, e ebidoko ni uber i ng’om mi Misiri zoo.’” 17 Man gitimo kumeno. Arun urieyo cinge kud uluth pare man egoyo utur mi ng’om, e uber ucorere iwi dhanu man iwi lei. Utur ceke mi ng’om udoko ni uber i ng’om mi Misiri zoo. 18 Baajoga gi ii nitimo lembe ma rom man nikelo uber ku maji migi, ento lembene uvoyogi. Man uber ucorere iwi dhanu man iwi lei. 19 E baajoga giyero ni Farao kumae: “Eni lwet Mungu!” Ento cwiny Farao umedere nibedo nwang’ man ewinjogi ngo, tap calu ma Yehova ular uyero.

20 I ng’eye, Yehova uwacu ni Musa kumae: “Ai malu pir kugweno man icung i wang’ Farao. Nen! ebibino i dhu kulo! Man icikiri niyero ire nia, ‘Yehova uwacu kumae: “Wek dhanu para ucidhi kara gitim ira. 21 Ento tek iweko ngo dhanu para ucidhi, abioro umiyo* i wii, iwi jutic peri, iwi dhanu peri, man i udi peri. Umiyo bipong’ bik i udi mi Misiri, man ebiumo kadok ng’om ma gicungo i wiye.* 22 I nindo maeca, abikoyo andha ng’om mi Gocen ma dhanu para gibedo i iye. Umiyo acel de bibedo mbe kuca. Nikum lembuni ibing’eyo nia an a Yehova, an’i ng’ombuni. 23 Abiketho tung’ tung’ i kind dhanu para ku dhanu peri. Giranyutha maeno biwok urwo.”’”

24 Man Yehova utimo kumeno, e udul umiyo ma lee ucaku corere i ot pa Farao, i udi mi jutic pare, man i ng’om mi Misiri zoo. Man umiyo unyotho ng’ombe. 25 Tokcenne Farao ulwong’o Musa gikud Arun man ewacu igi kumae: “Wucidh wuthier lam ni Mungu mwu, re i ng’ombuni.” 26 Ento Musa udwoko kumae: “Etie lembe m’umaku piny ungo nitimo kumeno, kum ni Jumisiri gin ma wabithiero ni Yehova Mungu mwa utie gin ma judagu. Dong’ ka wathiero gin ma Jumisiri gidagu, de i wang’gine, nyo gibicanyuwa ngo ku kidi? 27 Wabicidho pi woth mi nindo adek nitundo i langa, man kuca re ma wabithiero lam ni Yehova Mungu mwa, tap calu m’eyero iwa.”

28 Farao ugam uwacu kumae: “Abiweko wubicidho pi nithiero lam ni Yehova Mungu mwu i langa. Ento kud wucidh bor akeca. Wukway pira.” 29 E Musa uwacu kumae: “Kawoni abeai kud i vuti man abikwayu Yehova, e urwo umiyo biai kud i bang’ Farao, kud i bang’ jutic pare, man kud i bang’ dhanu pare. Ento Farao uwek niwondowa* m’ebekwero ko niweko dhanu ucidh uthier lam ni Yehova.” 30 Musa ugam uwok kud i bang’ Farao man ekwayu Yehova. 31 E Yehova utimo calku wec pa Musa, man umiyo uai kud i bang’ Farao, kud i bang’ jutic pare, man kud i bang’ dhanu pare. Acel de mbe m’udong’. 32 Ento Farao udwoko cwinye nwang’ kendo man eweko ngo dhanu ucidhi.

9 E Yehova uyero ni Musa kumae: “Mond i bang’ Farao man iwac ire kumae: ‘Yehova Mungu mi Juebrania uyero kumae: “Wek dhanu para ucidhi kara gitim ira. 2 Ento tek ikwero niweko gicidhi man imediri nicerogi, 3 nen! cing’ Yehova bibino i kum udul lim peri ma n’i lum. Thong’om ma rac bigoyo riuni, kana, ngamia, dhieng’, man rombe. 4 Yehova biketho tung’ tung’ i kind udul lim mir Israel kud udul lim mi Misiri, man lim mi Juisrael acel de mbe ma bitho.”’” 5 Yehova uketho bende nindone, eyero kumae: “Urwo Yehova bitimo lembe maeno i ng’ombuni.”

6 E urwonde ci Yehova utimo lembuno, man kwond udul lim ceke mi Jumisiri ucaku tho, ento lim acel de mbe m’utho kud i kind udul lim mi Juisrael. 7 Kinde ma Farao upenjo pi ninyang’, judwoko ire nia lim acel de mbe m’utho kud i kind udul lim mir Israel. Re asu cwiny Farao umedere nibedo nwang’, man eweko ngo dhanu ucidhi.

8 I ng’eye, Yehova uwacu ni Musa gikud Arun kumae: “Wujob vuru mir uka pong’ cingwu ario zoo, man Musa ucikere nidhenye i yamu i wang’ Farao. 9 Ebidoko ni ng’ili utur i ng’om mi Misiri zoo, man ebidoko ni vur ma tuc n’i iye i kum dhanu man i kum lei i ng’om mi Misiri zoo.”

10 Pieno gigamu vuru kud i uka man gicungo i wang’ Farao. E Musa udhenye i yamu, man edoko ni vur ma ku tuc i iye, m’ukwodo kum dhanu ku lei. 11 Baajoga gituc ungo nicungo i wang’ Musa nikum vur, pilembe vurne kwot i kum baajogane man i kum Jumisiri zoo. 12 Ento Yehova uweko cwiny Farao udoko nwang’ man ewinjogi ngo, tap calu ma Yehova ular uyero ni Musa.

13 I ng’eye, Yehova wacu ni Musa kumae: “Ai malu pir kugweno man icung i wang’ Farao, wok iyer ire kumae: ‘Yehova Mungu mi Juebrania uwacu kumae: “Wek dhanu para cidhi kara gitim ira. 14 Kum kawoni abetiro goco para zoo pi nigoyo adundeni, jutic peri, man dhanu peri; kara ing’ey nia ng’atu moko mbe ma calu an iwi ng’om zoo. 15 Kum nitundo kawoni nwang’u dong’ adaru rieyo cinga man agoyi ku dhanu peri ku thong’om ma rac, man eni nwang’u adaru kebi cen* kud iwi ng’om. 16 Ento aweki ibedo kwo ndhu pi thelembe ma e: kara anyuth iri tego para, man kara jutwong’ pi nyinga i ng’om zoo. 17 Re fodi asu ibeting’iri man ibeweko ngo dhanu para cidhi. 18 Nen, urwo unyoni, abiketho pei ma rac dit bicwii, kit pei ma fodi ucwii ngo nyanok de i Misiri niai m’ecaku cil kawoni. 19 Dong’ or jucidh jucok dhug udul lim peri ceke man piny ceke m’ibedo ko i lum, juroygi kaka m’agwoka. Dhanu moko ci kadi lei ma binwang’ere i lum man ma jubiroyo ngo i ot bitho kinde ma pei bicorere i wigi.”’”

20 Dhanu ceke m’i kind jutic pa Farao ma giworo lembe pa Yehova, giroyo jutic migi man udul lim migi pio i ot, 21 ento ju ma gidieng’ ungo ku wec pa Yehova giweko jutic migi kud udul lim migi i lum.

22 Yehova ugam uyero ni Musa kumae: “Riey cingi yor i polo kara pei ucorere iwi ng’om mi Misiri zoo, iwi dhanu ku lei, man iwi uboko ceke mi lum mi ng’om mi Misiri.” 23 E Musa urieyo uluth pare yor i polo, man Yehova uoro morpolo ku pei, man mac* uloro iwi ng’om; e Yehova umedere niketho pei ucwii iwi ng’om mi Misiri. 24 Pei ubino cwii, man mac uwotho mil i kind peine. Lake ubino tek dit, ayi maeca nwang’u fodi utimere ngo i ng’ombe niai ma Misiri udoko thek. 25 Peine ufwodo piny ceke m’ubino i die lum i ng’om mi Misiri, niai i kum dhanu nitundo i kum lei, erungo uboko ceke man ezeko i yen ceke mi lum. 26 I ng’om mi Gocen kaka ma Juisrael ubino i iye kende re ma pei ubino mbe.

27 Pieno Farao uoro jucidh julwong’o Musa gikud Arun man ewacu igi kumae: “Ma wang’uni e re adubo. Yehova tie pwe, an ku dhanu para wakoso. 28 Kway Yehova kara morpolo ku pei pa Mungu ujiki. E abibedo ayika niweko wucidhi, wubigalu ngo dong’ lee.” 29 E Musa udwoko ire kumae: “Saa m’abiwok kud i adhura eni ci, abithang’u cinga i wang’ Yehova. E morpolo bijik man pei de bimedere ngo kendo, kara ing’ey nia ng’om utie pa Yehova. 30 Ento adaru ng’eyo nia kadok i ng’ey maeno de, in ku jutic peri wubilworo ngo Yehova Mungu.”

31 Lin* ku nganu ma juyuke ugam unyothere, pilembe nwang’u nganu ma juyuke ung’ok man lin ke ucaku bethiwo. 32 Ento nganu ku nganu ma poke tek ginyothiri ngo, pilembe gin gicek kpe. 33 Musa uai kud i bang’ Farao ewok kud i adhura man ethang’u cinge i wang’ Yehova, e morpolo ku pei ugam ujik, man koth ugam ujigo nicwii iwi ng’om. 34 Kinde ma Farao uneno nia koth, pei, man morpolo ujik, e edubo kendo man edwoko cwinye nwang’, en karacelo ku jutic pare. 35 Cwiny Farao umedere nibedo nwang’ man eweko ngo Juisrael ucidhi, tap calu ma Yehova ular uyero nikadhu kud i bang’ Musa.

10 I ng’eye, Yehova uyero ni Musa kumae: “Mond i bang’ Farao, kum aweko cwinye man cwiny jutic pare udoko nwang’, kara atim giranyutha para maeni tap i wang’e, 2 man kara itwong’ ni woti man ni nyikweyi kite m’agoyo ko Misiri ku rac man giranyutha m’atimo i kindgi; e wubing’eyo andhandha nia an a Yehova.”

3 Pieno Musa gikud Arun gimondo i bang’ Farao man giyero ire kumae: “Yehova Mungu mi Juebrania uwacu kumae: ‘Ibikwero nijwigiri ira nitundo awene? Wek dhanu para ucidhi kara gitim ira. 4 Kum tek ikwero asu niweko dhanu para ucidhi, nen, urwo abioro bonyo i die ng’om peri. 5 Gibiumo wang’ ng’om ma dong’ ebicopere ngo nineno ng’om. Gibicamu piny ceke ma pei uweko man m’udong’ iwu, man gibicamu yen mwu ceke m’ubedongo i podho. 6 Gibipong’o udi peri, udi mi jutic peri ceke, man udi mi Misiri zoo i kadhiri ma kwaru peri man kwaru mi kwaru peri de gineno ngo nyanok de niai ma gicaku bedo i ng’ombe nitundo tin.’” E eloko ng’eye man ewok kud i bang’ Farao.

7 Jutic pa Farao gigam giwacu ire kumae: “Jalwo eni re bisendowa* nitundo awene? Wek dhanu no ucidhi kara gitim ni Yehova Mungu migi. Fodi ibenyang’ ungo asu nia Misiri udaru nyothere?” 8 Pieno judwogo Musa gikud Arun i bang’ Farao, man Farao uyero igi kumae: “Wucidh wutim ni Yehova Mungu mwu. Re jukani ma bicidho?” 9 E Musa uyero kumae: “Wabicidho karacelo kud aradu mwa, dhanu mwa m’utii, wotwa ku nyigwa, rombe mwa, man dhieng’ mwa, pilembe wabitimo foc ni Yehova.” 10 Farao uyero igi kumae: “Tek ndhu awekowu kud awiya mwu wucidho andha ci, nwang’u Yehova n’i kudwu andha! Kum ubenen kamaleng’ nia wukeco nitimo lembe ma rac. 11 Mbe! Jumaco mwu kende re ma romo cidho pi nitimo ni Yehova, kum eno re ma tie gin ma wukwayu.” E juriemogi cen kud i wang’ Farao.

12 Yehova ugam uyero ni Musa kumae: “Riey cingi iwi ng’om mi Misiri, kara bonyo ucor iwi ng’om mi Misiri man gicam uboko ceke m’i ng’ombe, piny ceke ma pei uweko.” 13 E ndhu ndhu nica Musa urieyo uluth pare iwi ng’om mi Misiri, man Yehova uketho yamu ma yo nyangu ukoto iwi ng’ombe cing’ nica duu ku diewor traka. Kinde ma piny uruu, yamu ma yo nyangune ukelo bonyo. 14 E bonyo ucoro i ng’om mi Misiri zoo man gipoto i kieu mi Misiri ceke. Ebino rac dit; niai con de nwang’u fodi wend bonyo ma lee rukeca ubino mbe, man bibedo de mbe kendo nyanok de. 15 Giumo wang’ ng’ombe ceke man gicido ng’ombe bii; gimvoro uboko ceke m’i ng’ombe man nying yen ceke ma nwang’u pei uweko; piny moko acel de mbe ma numu m’udong’ iwi yen kadi iwi uboko m’i lum i ng’om mi Misiri zoo.

16 Pieno Farao ulwong’o Musa gikud Arun pio pio man eyero kumae: “Adubo ni Yehova Mungu mwu man iwu bende. 17 Dong’ akweyi, timba wek dubo para wang’ acel maeni kende ci, man wukway Yehova Mungu mwu kara ekab ndhu goco mi tho maeni ci kud i wiya.” 18 Pieno ewok* kud i bang’ Farao man ekwayu Yehova. 19 E Yehova uloko wi yamu, man edoko ni yamu ma tek ma yo reto; yamune ucoko bonyo cen man ecorogi i Nam ma kwar. Bonyo acel de mbe m’udong’ i ng’om mi Misiri zoo. 20 Ento Yehova uweko cwiny Farao udoko nwang’, man eweko ngo Juisrael ucidhi.

21 Yehova ugam uyero ni Musa kumae: “Riey cingi yor i polo kara mudho ubed iwi ng’om mi Misiri, mudho ma bii ma pek ma juromo mulo.” 22 E wang’ acel Musa urieyo cinge yor i polo, man mudho m’uculere uumo ng’om mi Misiri zoo pi ceng’ adek. 23 Gineniri ngo i kindgi man ng’atu acel de mbe m’uai ku kaka m’ebino i iye pi ceng’ adek; ento i kabedo mi Juisrael ceke der ubino nuti. 24 E Farao ulwong’o Musa man eyero ire kumae: “Wucidh wutim ni Yehova. Rombe ku dhieng’ mwu kende re ma bidong’ i ng’eywu. Kadok awiya mwu de romo cidho karacelo kudwu.” 25 Ento Musa uyero kumae: “In re m’ibimiyo iwa bende lam ku lam m’awang’a, man wabiwok thierogi ni Yehova Mungu mwa. 26 Wabicidho kud udul lim mwa bende. Lei* acel de mbe ma bidong’, kum wabitiyo ku moko m’i kindgi pi nitimo thier ni Yehova Mungu mwa, man ka fodi watundo ngo kuca, wacopo ng’eyo ngo nia wabithiero ang’o ni Yehova.” 27 Pieno Yehova uweko cwiny Farao udoko nwang’, man Farao uyiyo ngo ya ewek gicidhi. 28 Farao ugam uyero ire kumae: “Ai cen kud i wang’a! Kud ipim apima de nineno wang’a kendo, kum i nindo m’ibineno iye wang’a ci, ibitho.” 29 E Musa udwoko kumae: “Tap calu m’iyero, abipimo ngo nineno weng’i kendo.”

11 E Yehova uyero ni Musa kumae: “Abikelo goco mange acel iwi Farao man iwi Misiri. I ng’ey maeno, ebiweko wuai ku keni. Kinde m’ebiyiyo andha nia wucidhi, ebiriemowu ariema ku keni. 2 Dong’ yer ni dhanu nia, jumaco ku jumamon ceke gicikiri nikwayu judhugola migi umii piny mi mola ma tar ku mi mola ma kwar.” 3 Man Yehova uketho dhanune ginwang’u bero i wang’ Jumisiri. M’umedo maeno, nwang’u Musa udoko ng’atu ma juworo lee i ng’om mi Misiri i kind jutic pa Farao man i kind dhanu.

4 E Musa uyero kumae: “Yehova uwacu kumae: ‘I kum diewor ma ling’, abiwotho i die Misiri, 5 man kayu ceke m’i ng’om mi Misiri bitho, niai i kum kayu pa Farao m’ujany iwi komker pare, nitundo i kum kayu pa ng’eca m’uberego rego iwi kidi rego man kayu ceke mir udul lim. 6 Nduru ma dit bibedo nuti i die ng’om mi Misiri zoo, wagi nduru ma niai con de ubino mbe man ma bibedo de mbe kendo. 7 Ento gwok acel de mbe ma bigbuyo* i kum Juisrael, dok ebed i kum dhanu kadi lim migi, kara wung’ey nia Yehova copo ketho tung’ tung’ i kind Jumisiri ku Juisrael.’ 8 Man jutic peri ceke gibiloro andha i bang’a man gibipodho arieba wang’gi ira ma gibeyero kumae: ‘Cidhi, in karacelo ku dhanu ceke m’ubelubo toki.’ I ng’ey maeno, abicidho.” E ewok kud i bang’ Farao m’ethung’ ku ng’eicwiny.

9 Yehova gam uyero ni Musa kumae: “Farao biwinjowu ngo, kara udu para umedere i ng’om mi Misiri.” 10 Musa gikud Arun gitimo udu maeno ceke i wang’ Farao, ento Yehova uweko cwiny Farao udoko nwang’, uketho eweko ngo Juisrael uwok kud i ng’om pare.

12 Yehova ugam uyero ni Musa gikud Arun i ng’om mi Misiri kumae: 2 “Dwi maeni bibedo iwu ni acaki mi dwi. Ebibedo iwu ni dwi ma kwong’a mi oro. 3 Wuyer ni cokiri mir Israel ceke kumae: ‘I nindo mir apaje mi dwijuni, ng’atuman ucikere nigamu urombo acel pi juruot* pare, urombo acel kubang’ ot. 4 Ento tek juruotne gi nyanok mandha ma giromo daru ngo urombone, gipoke i kindgi ku judhugola migi* ma ceng’ini i ot migi nimakere ku wend dhanu. Kinde ma wubetimo kwan, wunen kadhiri ma ng’atuman bicamu. 5 Urombone ucikere nibedo nyog urombo mi oro acel man ma mulima mbe i kume. Wucopo ng’iyo i kind nyithi rombe kunoke i kind nyithi diegi. 6 Wucikuru nigwoke nitundo i nindo mir apar ang’wende mi dwi maeni, e juruotman mi cokiri mir Israel bithume saa ma piny ubegamere.* 7 Gicikiri nigamu kum rimbe moko man niwire i kum ng’et dhugola ario man i kum riu mi wi dhugola udi ma gibicame i iye.

8 “‘Gicikiri nicamu ring’one diewor maeca. Gibivule iwi mac man gibicame ku mukathi ma thobi mbe i iye man kud uboko ma kec. 9 Kud wucam kume moko ci ma numu kadi ma jutedo ku pii, ento wuvule avula iwi mac, wiye karacelo ku tiende man cindi iye bende. 10 Kud wugwok kume moko nitundo kugweno, ento donge ma bidong’ nitundo kugweno, wucikuru niwang’u ku mac. 11 Man wucikuru nicame ma pierwu ubedo atwiya, ma wara ni tiendwu man m’uluth mwu n’i cingwu; man wucame pio pio. En e Kadhukuwijo pa Yehova. 12 Kum abikadhu i die ng’om mi Misiri i diewor maeca, man abigoyo kayu ceke m’i ng’om mi Misiri, niai i kum dhanu nitundo i kum lei; man abikelo pokolembe iwi mungu ceke mi Misiri. An a Yehova. 13 Rimo bibedo ni giranyutha mwu i kum udi ma wun’i iye; kinde m’abineno rimone, abikadhu kud i wiwu man gocone bibino ngo i wiwu pi ninyothowu, kinde m’abigoyo ng’om mi Misiri.

14 “‘Nindo maeno bibedo iwu ni poy, man wucikuru nitimo foc ni Yehova i nindone i kind dhanu m’utuk mwu zoo. Wucikuru nikwiro nindone kum en e cik ma nja. 15 Wubicamu mukathi ma thobi mbe i iye pi nindo abiro. Eyo, i nindo ma kwong’a wucikuru nikabu thobi cen kud i udi mwu, pilembe ng’atu moko ci ma bicamu piny ma thobi n’i iye niai i nindo ma kwong’a nitundo i nindo mir abiro, jucikiri nikabu* ng’atu* maeno cen kud i Israel. 16 I nindo ma kwong’a, wubitimo coko ma leng’ man i nindo mir abiro de wubitimo coko mange ma leng’. Tic moko mbe ma jubitimo i kind nindo maeno. Kende kende gin ma ng’atini utie ku yeny mi camu, re ma wuromo tedo.

17 “‘Wucikuru nitimo Foc mi mukathi ma thobi mbe i iye, kum tap i ceng’ maeno re m’abiwodho udul dhanu mwu kud i ng’om mi Misiri. Man wucikuru nikwiro ceng’ maeno i kind dhanu m’utuk mwu zoo kum etie cik ma nja. 18 Niai i nindo apar ang’wen mi dwi ma kwong’a ku dhug uthieno, wucikuru nicamu mukathi ma thobi mbe i iye nitundo i nindo pier ario wi acel mi dwije ku dhug uthieno. 19 Kud junwang’ thobi i udi mwu pi ceng’ abiro, pilembe ng’atu moko ci ma bicamu piny ma thobi n’i iye, nik’ebed umondo kadi anyoli mi ng’ombe, jucikiri nikabu* ng’atu* maeno cen kud i cokiri mir Israel. 20 Kud wucam piny moko ci ma thobi n’i iye, i pacu mwu ceke wucikuru nicamu mukathi ma thobi mbe i iye.’”

21 E wang’ acel Musa ulwong’o judongo ceke mir Israel man ewacu igi kumae: “Wucidh wung’ii nyithi leya,* ng’atuman pi juruot pare man wuthumgi ni lam mi Kadhukuwijo. 22 I ng’eye, wucikuru niroyo uwij hizop* i rimo ma n’i sani man wuwir rimone i kum riu mi wi dhugola man i kum ng’et dhugola ario; ng’atu moko mbe m’i kindwu m’ucikere niwok kud i dhugola mi ot pare nitundo kugweno. 23 E kinde ma Yehova bikadhu pi nigoyo Jumisiri man ebineno rimo ma n’i kum riu mi wi dhugola man i kum ng’et dhugola ario, Yehova bikadhu andha kud iwi dhugolane man ebiyiyo ngo goco mi tho* umond i udi mwu.

24 “Wucikuru nitimo lembe maeno, kum etie cik ma nja iwu man ni wotwu. 25 Man kinde ma wubimondo i ng’om ma Yehova bimiyo iwu tap calu m’eyero, ukwayu wubed wutim seremoni maeno. 26 Man kinde ma wotwu bipenjowu nia, ‘seremoni maeni thelembene ang’o?’ 27 Wucikuru nidwoko kumae: ‘Etie lam mi Kadhukuwijo ni Yehova, m’ukadhu kud iwi udul mi Juisrael i Misiri kinde m’egoyo Jumisiri, ento eweko udi mwa.’”

E dhanu ukulo korgi piny man gipodho arieba wang’gi. 28 Pieno Juisrael gicidho man gitimo tap calu ma Yehova ung’olo ni Musa gikud Arun. Gitimo tap kumeca.

29 E ku diewor ma ling’, Yehova ugoyo kayu ceke m’i ng’om mi Misiri, niai i kum kayu pa Farao m’ujany iwi komker pare, nitundo i kum kayu pa ng’eca ma n’i kol* man kayu mi leya ceke. 30 Farao uai malu ku diewor maeca, karacelo ku jutic pare ceke man Jumisiri mange ceke, e wak ma dit ubino i kind Jumisiri, pilembe ot acel de mbe ma dhanu tho ngo i iye. 31 E wang’ acel elwong’o Musa gikud Arun ku diewor maeca man ewacu igi kumae: “Wuai, wuwok cen kud i kind dhanu para, wun ku Juisrael mange ceke, wucidh wutim ni Yehova, tap calu ma wuyero. 32 Wucok bende udul rombe kud udul dhieng’ mwu man wucidhi calu ma wuyero. Re wumii ira bende mugisa.”

33 Man Jumisiri gicaku rero dhanune nia giai pio kud i ng’ombe, ma gibewacu kumae: “Pilembe wan ceke dong’ watie ve avu!” 34 Pieno dhanune giting’o kwen migi ma ginyobo ma nwang’u fodi giketho ngo thobi i iye, karacelo ku jam mieno kwen migi, giboye i bongu migi man gikethe iwi gokgi. 35 Juisrael gitimo gin ma Musa uyero igi man gikwayu Jumisiri umii igi piny mi mola ma tar ku mi mola ma kwar man bende bongu. 36 Yehova uketho dhanune ginwang’u bero i wang’ Jumisiri. Pieno gimiyo piny ma Juisrael gikwayu man giyaku Jumisiri.

37 E Juisrael gitugo woth kud i Ramses gicidho i Sukoth; gibino jumaco ma romo elufu dak abusiel (600 000) m’ubewotho ku tiendgi, m’umbe nikwanu awiya. 38 Man udul dhanu ma lee m’ujebiri* de ucidho karacelo kugi, man bende udul rombe, kud udul dhieng’, udul lim ma wende lee dit. 39 Gigam giting’o kwen ma ginyobo ma giai ko i Misiri man gicaku tede ni mukathi ma ngulu ngulu ma thobi mbe i iye, pilembe juriemogi rek kud i Misiri ma nwang’u fodi giyiko ngo igi cam ma gibicamu i yo.

40 Nwang’u bedo mi Juisrael ma gibedo ko i Misiri ubino oro dak ang’wen ku pier adek. 41 I ajiki mi oro dak ang’wen ku pier adek eno, tap i ceng’ maeca, udul dhanu pa Yehova ceke giwok kud i ng’om mi Misiri. 42 Etie diewor ma gibibepoy ko pi wodh ma Yehova uwodho kogi kud i ng’om mi Misiri. Diewor maeni bibedo diewor ma dhanu mir Israel ceke gibibepoy pire pi niyungo Yehova i kind dhanu m’utuk migi zoo.

43 I ng’eye, Yehova uwacu ni Musa gikud Arun kumae: “Maeni en e cik mi Kadhukuwijo: umondo moko mbe ma bicame. 44 Ento tek ng’atu moko tie ku ng’eca m’eng’iewo ku sente, icikiri nitimo yaa i kume. I ng’ey maeno kan ecopo came. 45 Jawirok man jatic ma juculo acula copo camu ngo kume moko. 46 Jucikiri nicame i ot acel. Kud wuwok ku kum ring’one nyanok de woko, man kud wutur cogone kadok acel de. 47 Cokiri ceke mir Israel ucikiri nitimo focne. 48 Tek umondo moko ma bedo i beng’i ubemito etim Kadhukuwijo ni Yehova, dhanu ma co pare ceke jucikiri nitimo yaa i kumgi. E i ng’eye ecopo coro ceng’ini pi nitimo Kadhukuwijo, man ebidoko calu anyoli mi ng’ombe. Ento nico ma jutimo ngo yaa i kume copo camu ngo kume moko. 49 Cik ma rom eno jubitiyo ko pir anyoli man pir umondo ma bedo i kindwu.”

50 Pieno Juisrael ceke gitimo lembe ma Yehova ung’olo ni Musa gikud Arun kubang’e kubang’e. Gitimo tap kumeca. 51 E tap i ceng’ maeca, Yehova uwodho Juisrael karacelo kud udul migi kud i ng’om mi Misiri.

13 Yehova umedere niweco i bang’ Musa, eyero kumae: 2 “Dwok ira* kayu ceke ma co* m’i kind Juisrael leng’. Kayu ceke ma co mi dhanu kadi mi lei gi para.”

3 E Musa uyero ni dhanu kumae: “Wupoy pi nindo maeni ma wuwok i iye kud i Misiri, kud i ot mi ng’eca, pilembe Yehova uwodhowu ku keni ku cing’ ma tek. Pieno, kud wucam piny moko ci ma thobi n’i iye. 4 Wubewok tin eni i dwi mir Abib.* 5 Saa ma Yehova biketho imondo i ng’om mi Jukanan, mi Juhithi, mi Juamor, mi Juhivi, man mi Juyebusi, ng’om m’ekwong’o ni kwaru peri nia ebimiyo iri, ng’om ma molo cak ku miyokic, e kwayu wubed wutim seremoni maeni i dwijuni. 6 Wubicamu mukathi ma thobi mbe i iye pi nindo abiro, man i nindo mir abirone jubitimo foc ni Yehova 7 Jubicamu mukathi ma thobi mbe i iye pi nindo abiro; kud junwang’ piny moko ci ma thobi n’i iye i beng’i, man thobi de kud junwang’ i beng’i i die ng’om peri zoo.* 8 Man i nindo maeca ibiyero ni wodi kumae: ‘Tie pi lembe ma Yehova utimo ira kinde m’awok kud i Misiri.’ 9 Man maeno bibedo iri ni giranyutha i cingi man ni poy* i terweng’i,* kara cik pa Yehova ubed i dhogi, pilembe Yehova uwodhi kud i Misiri ku cing’ ma tek. 10 Wucikuru niworo cik maeni i nindo m’ukethere kubang’ oro.

11 “Saa ma Yehova biketho imondo i ng’om mi Jukanan, ng’om m’ekwong’o iri man ni kwaru peri nia ebimiyo iri, 12 icikiri nithiero kayu ma co* ceke ni Yehova, man bende kayu ceke ma thwoni mir udul lim m’inwang’u; gi pa Yehova. 13 Ibiwaru kayu ceke mi kana kud urombo, ento tek iware ngo, kwayu itur ng’ute. Man icikiri niwaru kayu ma co ceke mi woti.

14 “Tek nindo moko wodi upenji kumae: ‘Thelembe mi gin maeni tie ang’o?’ E ibidwoko ire nia, ‘Yehova uwodhowa kud i Misiri, kud i ot mi ng’eca ku cing’ ma tek. 15 Kinde ma Farao ukwero ku tegowic niweko wacidhi, Yehova unego kayu ceke m’i ng’om mi Misiri, niai i kum kayu mi dhanu nitundo i kum kayu mi lei. Eno re m’uketho abethiero kayu ma co ceke* ni Yehova, man abewaru kayu ceke mi wota.’ 16 Man eno bibedo ni giranyutha i cingi man ni giratwiya mi terwang’ i terweng’i,* pilembe Yehova uwodhowa kud i Misiri ku cing’ ma tek.”

17 Kinde ma Farao uweko dhanune gicidho, Mungu utelo ngo wigi yor i gengi m’i ng’om mi Jufilisti, kadok nwang’u ebino ceng’ini de. Kum Mungu uwacu kumae: “Dhanu maeni gicopo loko paru migi kinde ma gibirombo ku lwiny man gibidwogo i Misiri.” 18 Pieno, Mungu uketho dhanune gidhoko kud i yo m’i langa mi Nam ma kwar. Ento Juisrael giwok kud i ng’om mi Misiri ma gikperiri calu mi lwiny. 19 Musa ucidho bende ku cogo Yozefu, pilembe Yozefu uketho wot Israel gikwong’o ku cwinygi ceke, eyero kumae: “Mungu bipoy piwu kokoro, man wucikuru niyeyo cogona cen ku keni.” 20 Gicoko woth kud i Sukoth man giwok gigonjo i Etham, i dhu langa.

21 Man Yehova ubino wotho i wang’gi i mbegi mir afuru ku dieceng’ pi nitelo wigi i yo, man i mbegi mi mac ku diewor pi nimiyo igi der, kara gituc niwotho dieceng’ ku diewor. 22 Mbegi mir afurune uai ungo kud i wang’ dhanu ku dieceng’, kadi mbegi mi mac de uai ungo ku diewor.

14 Yehova ugam uyero ni Musa kumae: 2 “Yer ni Juisrael nia gidok ku ng’eygi man giketh kagonjo migi i wang’ Pihahiroth, i kind Migdol ku nam ma n’i wang’ Baal-zefon. Wuketh kagonjo i wang’e ceng’ini ku nam. 3 E Farao biyero pi Juisrael nia, ‘gibewotho swa i ng’om ma wigi unyothere. Langa udaru umo bang’gi.’ 4 Abiweko cwiny Farao udok nwang’ man ebiriemo tokgi. Abiyungara nikum Farao man udul mony pare ceke; e Jumisiri gibing’eyo andha nia an a Yehova.” Man gitimo kumeno.

5 I ng’ey kare, judwoko ni ubimo mi Misiri nia dhanune giluy. E wang’ acel cwiny Farao ku jutic pare ulokere i kum dhanune, man giwacu kumae: “Pirang’o watimo lembuni man wagonyo Juisrael kud i tic mi ng’eca ma gibetimo iwa?” 6 Pieno eketho magali pare mi lwiny ubedo ayika, man ecoko dhanu pare karacelo kude. 7 Egamu magali dak abusiel m’alonda man magali mange ceke mi Misiri ku jurumony iwi magalineman. 8 E Yehova uweko cwiny Farao m’ubimo mi Misiri udoko nwang’, man eriemo tok Juisrael, ma ke nwang’u Juisrael gibino wok migi ma cwinygi tek.* 9 Jumisiri giriemo tokgi, man riuni* ku magali pa Farao ceke, juring riuni man udul mony pare girubogi nwang’u gigonjo i dhu nam, ceng’ini ku Pihahiroth ma n’i wang’ Baal-zefon.

10 Kinde ma Farao uwok ceng’ini, Juisrael giting’o wang’gi man gineno Jumisiri uberiemo tokgi. Ndiri ugam umaku Juisrael man gicaku wak i bang’ Yehova. 11 Giwacu ni Musa kumae: “Ikelowa wabin watho i langa keni, pilembe kakuny re m’umbe i Misiri? Eni itimo lembang’o iwa m’iwodho kowa kud i Misiri? 12 Nyo etie ngo tap lembuni re ma wagam wayero iri i Misiri nia, ‘wekwa giwa kara watim mwa ni Jumisiri’? Kum etie ber iwa nitimo ni Jumisiri kakare nitho i langa.” 13 E Musa uwacu ni dhanu kumae: “Lworo kud unegwu. Wucung ma tek man wunen gin ma Yehova bitimo iwu pi nibodhowu tin. Kum Jumisiri ma wubeneno tin e, wubinenogi ngo kendo kadok nyanok de. 14 Yehova ku kume bikiedo piwu, man wun wubibedo mwu ling’.”

15 Yehova ugam uwacu ni Musa kumae: “Pirang’o ibewak asu asu i bang’a? Yer ni Juisrael nia giting’ kagonjo migi. 16 Man in ke ting’ uluth peri malu iriey cingi iwi nam man ipok iye, kara Juisrael gikadh kud i die nambe iwi ng’om m’uthwo. 17 Ento an, abiweko cwiny Jumisiri udok nwang’, kara gimond i tokgi. Abiyungara nikum Farao man udul mony pare ceke, magali pare mi lwiny, man juring riuni pare. 18 Man Jumisiri bing’eyo andha nia an a Yehova kinde m’abiyungara nikum Farao, nikum magali pare mi lwiny, man nikum juring riuni pare.”

19 E malaika pa Mungu mandha ma nwang’u utelo yo i wang’ Israel uai man udok yor i ng’eygi, man mbegi mir afuru ma nwang’u ubino i wang’gi de udok yor i ng’eye man ucungo yor i ng’eygi. 20 Ebin ecungo i kind Jumisiri ku Juisrael. I thenge acel, ebino afuru ma ku mudho. I thenge ma kucelo ke, ebino caru piny ku diewor. E ungu acel ucoro ngo i kum ungu ma kucelo diewor traka.

21 Musa ugam urieyo cinge iwi nam; man Yehova uketho nam udok ku ng’eye ku yamu ma yo nyangu diewor traka, e edwoko die nam ni ng’om m’uthwo, man pii ugam upokere. 22 Pieno Juisrael gikadhu kud i die nam iwi ng’om m’uthwo, man pii ubedo igi ni gang’ i cing’gi ma yor acwic ku ma yor acam. 23 Jumisiri giriemo tokgi man riuni pa Farao ceke, magali pare mi lwiny, man juring riuni pare gicaku mondo i tokgi i die nam. 24 I saa mi kur mi kugweno,* Yehova uneno udul Jumisiri kud i mbegi mi mac man mir afuru, man ejebo wi udul mony mi Jumisiri. 25 Ewotho wodho tiend magali migi uketho gibino ringo magaline ku peko, man Jumisiri gicaku yero kumae: “Waringu cen kud i kum Israel, pilembe Yehova ubekiedo pigi i dhu Jumisiri.”

26 I ng’eye, Yehova uwacu ni Musa kumae: “Riey cingi iwi nam kara pii udwog iwi Jumisiri, iwi magali migi mi lwiny, man iwi juring riuni migi.” 27 E wang’ acel Musa urieyo cinge iwi nam, man kinde ma mombwa thumo, nam ucaku dwogo kakare. Saa ma Jumisiri giberinge, Yehova uwito Jumisiri i die nam. 28 Pii m’udwogo uumo magali mi lwiny, juring riuni, man udul mony pa Farao ceke m’umondo i die nam i tok Juisrael. Kadok ng’atu acel de mbe m’i kindgi m’udong’ kwo.

29 Ento Juisrael giwotho ku wi ng’om m’uthwo i die nam, man pii ubedo igi ni gang’ i cing’gi ma yor acwic ku ma yor acam. 30 I ayi maeno re ma Yehova ubodho Israel i ceng’ maeca kud i cing’ Jumisiri, man Israel uneno avuj Jumisiri i dhu wat. 31 Israel uneno bende tego ma dit ma Yehova utiyo ko i kum Jumisiri, e dhanune gicaku lworo Yehova man nibedo ku yiyoyic i Yehova man i jatic pare ma Musa.

15 Saa nica, Musa karacelo ku Juisrael giwero wer ni Yehova kumae:

“Wek awer ni Yehova, kum edodere malu.

Ebolo riuni* ku ng’atu m’uberingo kude i die nam.

 2 Yah* en e tego para man kero para, pilembe edoko both para.

En re m’e Mungu para, man abipake; Mungu pa vwa, man abidode.

 3 Yehova en e jaramony ma tek. Yehova tie nyinge.

 5 Pii m’udhetho uumogi; gimwony i the pii ma thuc calu kidi.

 9 Jadegi uwacu kumae: ‘Abiriemo tokgi! Abiwok makugi!

Abipoko i jambayeki nitundo abiyeng’!*

Abiwodho palamularu para! Man cinga bidiyogi!’

11 E Yehova, ng’a ma calu in i kind mungu?

Ng’a ma calu in, in m’inyuthiri giri nia i leng’ lee?

In m’i Ng’atu m’ukwayu julwor ku wer mi pak, Ng’atu ma timo musana dupa.

12 Irieyo cingi ma yor acwic, man ng’om umwonyogi.

Kum dhanu ceke mi Kanan bitur.

16 Lworo ku ndiri bimakugi.

18 Yehova bibedo ubimo rondo ku rondo.

20 I ng’eye, Miriam ma jabila ma dhaku, ma nyamin Arun uting’o nyathi vul i cinge, man mon ceke gilubo ng’eye ku nyithi vul man ku miel. 21 Man Miriam uwotho gamu dhu wer mi jumaco kumae:

“Wuwer ni Yehova, kum edodere malu.

Ebolo riuni ku ng’atu m’uberingo kude i die nam.”

22 I ng’ey kare, Musa utelo wi Juisrael giai kud i Nam ma kwar man gicidho nitundo i langa mi Cur. Giwotho pi nindo adek i langa, ento ginwang’u ngo pii. 23 Gigam gitundo i Mara,* ento ecopere ngo igi nimadhu pii mi Marane pilembe ebino kec. Eno re m’uketho jucaku nyinge Mara. 24 E dhanu ucaku ng’ur i kum Musa ma gibewacu kumae: “Wabimadhu ang’o?” 25 E Musa uwak i bang’ Yehova man Yehova unyutho ire yen moko. Saa m’ebolo yende i pii, e pige udoko mit.

Mungu umiyo igi telowic keca man eketho igi ukungu mi pokolembe, ekethogi bende i amulaic keca. 26 Ewacu kumae: “Tek iwinjo dwand Yehova Mungu peri cuu mandha, man itimo lembe m’atira i wang’e, tek iketho wii i kum lembe m’eng’olo, man iworo cik pare ceke, e abikelo ngo thong’om moko ci m’agam akelo iwi Jumisiri i wii; kum an a Yehova, abekeyo kumi.”

27 I ng’eye gitundo i Elim, kaka ma kulo apar ario man tiend ngasi pier abiro n’i iye. Pieno gigonjo keca i ng’et pii.

16 I ng’ey ma gitugo woth kud i Elim, cokiri mi Juisrael ceke utundo i langa mi Sin ma nwang’ere i kind Elim ku Sinai, i nindo apar abic mi dwi mir arionde yo ng’ey ma giai kud i ng’om mi Misiri.

2 E cokiri mi Juisrael ceke ucaku ng’ur i kum Musa gikud Arun i langa. 3 Juisrael giwotho wacu igi kumae: “Timba nwang’u watho i cing’ Yehova i ng’om mi Misiri, kinde ma wabedo i dhug agulu ring’o, ma wabecamu mukathi i kadhiri ma iwa yenyo. Ento kawoni wukelowa i langa maeni kara cokiri e zoo utho ku kec.”

4 Yehova ugam uwacu ni Musa kumae: “Nen, abiketho mukathi bicwii niai kud i polo, man ng’atuman ucikere nicicoko kadhiri ma birome kubang’ ceng’, kara akethgi i amulaic pi nineno ka nyo andha gibiwotho nimakere ku cik para kunoke ngo. 5 Ento i nindo mir abusiende kinde ma gibitedo piny ma gicoko, ebibedo kadhiri ma gibed gicoko kubang’ ceng’ mange wang’ ario.”

6 E Musa gikud Arun giyero ni Juisrael ceke kumae: “Uthieno ma tin, wubing’eyo andha nia Yehova re m’uwodhowu kud i ng’om mi Misiri. 7 Kugweno wubineno dwong’ pa Yehova, kum Yehova udaru winjo ng’ur ma wung’ur ko i kume. Wan e ke wa ng’a ma nia wung’ur i kumwa?” 8 Musa umedo kumae: “Uthieno kinde ma Yehova bimiyo iwu ring’o ma wubicamu man kugweno mukathi ma biromowu, e wubineno nia Yehova uwinjo ng’ur ma wubeng’ur ko i kume. Ento wan e ke wa ng’a? Wubeng’ur i kumwa ngo, ento i kum Yehova.”

9 I ng’eye, Musa uwacu ni Arun kumae: “Yer ni cokiri ceke mi Juisrael kumae: ‘Wucor ceng’ini i wang’ Yehova, kum edaru winjo ng’ur mwu.’” 10 Kinde m’Arun udaru niweco i bang’ cokiri ceke mi Juisrael ci, e ndhu ndhu giloko wang’gi yor i langa, man nen! dwong’ pa Yehova uwok i afuru.

11 Yehova uweco kendo i bang’ Musa, ewacu kumae: 12 “Adaru winjo ng’ur mi Juisrael. Wac igi kumae: ‘Kinde ma piny ubegamere,* wubicamu ring’o man kugweno wubiyeng’ ku mukathi, e wubing’eyo andhandha nia an a Yehova Mungu mwu.’”

13 Pieno uthieno nica aywer ucoro man uumo kagonjo, man kugweno thoi ma lee ung’ier man utieko kagonjone zoo. 14 Saa ma thoine uoy, piny moko ma yom ma ng’ili ng’ili udong’ iwi langa calu thoi ma tar i ng’om. 15 Kinde ma Juisrael ginene, gicaku penjiri i kindgi kumae: “Eni ang’o?” Kum nwang’u ging’eyo ngo nia ebino ang’o. Musa ugam uwacu igi kumae: “Eno tie mukathi ma Yehova umiyo iwu ni cam. 16 Yehova ung’olo kumae: ‘Ng’atuman ucikere nicoko kadhiri m’eromo camu. Wucoke mukero acel mir omer* pi ng’atuman nimakere ku wend dhanu* ma ng’atuman m’i kindwu utie ko i hema pare.’” 17 E Juisrael gicaku timo kumeno; gicoke, jumoko ucoko lee, jumange ke ucoko nyanok. 18 Saa ma gipime kud omer, ng’atu m’ucoko lee ubedo ko ngo lee nisagu man ng’atu m’ucoko nyanok de pare urem ungo. Gicoke ng’atuman nimakere ku kadhiri m’ecopo camu.

19 I ng’eye, Musa uyero igi kumae: “Ng’atu moko kud uwek donge moko nitundo kugweno.” 20 Ento giwinjo ngo Musa. Kinde ma jumoko uweko donge moko udong’ nitundo kugweno, ukoko ugam unyol i iye man ng’wice udoko tik, e ng’eicwiny umaku Musa i kumgi. 21 Gibed gicoke nja kugweno, ng’atuman nimakere ku kadhiri m’ecopo camu. Ka lak ceng’ udoko tek ci, eloy.

22 Ceng’ mir abusiende, gicoko kadhiri mukathine wang’ ario, mukero ario mir omer pi ng’atuman. E judongo ma wijo ceke mi cokiri gibino man gidwoko pi lembene ni Musa. 23 Musa ugam uyero igi kumae: “Maeni lembe ma Yehova uwacu: urwo bibedo yom* ma zoo, ebibedo sabatu ma leng’ ni Yehova. Wuted gin m’ukwayu wutedi, man wubog gin m’ukwayu wubogi; i ng’eye wukan donge moko ci ma bidong’ man wugwoke nitundo kugweno.” 24 Gikane nitundo kugweno tap calu ma Musa ung’olo, man ng’wice udoko tik ungo kadi ukoko de ubedo mbe i iye. 25 I ng’eye, Musa uwacu kumae: “Wucame tin, pilembe tin utie sabatu ni Yehova. Tin wubinwang’e ngo iwi ng’om. 26 Wubibecoke pi nindo abusiel, ento i nindo mir abirone, niyero ceng’ Sabatu, ebibedo mbe.” 27 Ento jumoko m’i kind dhanune uwok asu pi nicicoke i nindo mir abiro, enre giwok ginwang’u ngo gin moko.

28 Pieno Yehova uwacu ni Musa kumae: “Wubikwero niworo lembe m’ang’olo man cik para nitundo awene? 29 Wiwu kud uwil nia Yehova umiyo iwu Sabatu. Eno re m’uketho ceng’ mir abusiende emiyo iwu mukathi pi nindo ario. Nindo mir abiro ng’atuman ucikere nibedo kakare; ng’atu moko kud uwok ku ka m’e n’i iye.” 30 Pieno dhanune giworo Sabatu* i ceng’ mir abiro.

31 Dhanu mir Israel gicaku nying’ mukathine nia “mana.”* Ebino tar calu nying cam moko,* man midone ubedo calu mido mukathi ma jutedo ku miyokic. 32 E Musa uwacu kumae: “Yehova ung’olo kumae: ‘Wucoke mukero mir omer acel man ebed ni piny ma jubigwoko i kind dhanu m’utuk mwu ceke, kara ginen mukathi m’amiyo iwu wucamu i langa kinde m’abewodhowu kud i ng’om mi Misiri.’” 33 Musa ugam uyero ni Arun kumae: “Gam agulu man iketh mana mukero mir omer acel i iye man ikethe i wang’ Yehova, kara ebed ni piny ma jubigwoko i kind dhanu m’utuk mwu ceke.” 34 Tap calu ma Yehova ung’olo ni Musa, Arun ukethe i wang’ Lembatuca kara ebed agwoka. 35 Juisrael gicamu mana pi oro pier ang’wen, cil ma gitundo i ng’om ma dhanu bedo i iye. Gicamu mana cil ma gitundo ko i wang’ kieu mi ng’om mi Kanan. 36 Omer acel mondo wang’ apar i efa* acel.

17 Cokiri mi Juisrael ceke gigam gitugo woth kud i langa mi Sin man giwotho begonjo calku lembe ma Yehova ung’olo, man giwok giketho kagonjo migi i Refidim. Ento pii ma dhanune giromo madhu ubino mbe.

2 Pieno, dhanune gicaku dhaw iwi Musa man giwacu kumae: “Mii iwa pii m’amadha.” Ento Musa udwoko igi kumae: “Pirang’o wubedhaw i wiya? Pirang’o wubemeduru nimulo i Yehova?” 3 Ento rieu pii ubino nego dhanune lee mandha keca, man gimediri ning’ur i kum Musa ma gibewacu kumae: “Pirang’o iwodhowa kud i Misiri pi nibino negowa ku wotwa man udul lim mwa ku rieu pii?” 4 Tokcenne, Musa uwak i bang’ Yehova kumae: “Dong’ atim ang’o ni dhanu maeni? Edong’ nyanok ci gibicanya ku kidi!”

5 E Yehova uyero ni Musa kumae: “Kadh i wang’ dhanu, man iting’ judongo moko mir Israel karacelo kudi man bende uluth m’igoyo ko Kulo Nil. Ting’e i cingi man icidhi. 6 Nen! abicungo i weng’i keca iwi cana i Horeb. Goy canane man pii biwok kud i iye, e dhanu bimadhe.” Musa utimo kumeno i wang’ judongo mir Israel. 7 E ecaku nying’ kabedone Masa* man Meriba,* nikum dhaw mi Juisrael man pilembe gimulo i Yehova ma giwacu ko kumae: “Eni re Yehova e n’i kindwa kunoke ngo?”

8 I ng’eye, Juamalek gibino pi nikiedo i dhu Israel i Refidim. 9 E Musa uwacu ni Yocuwa kumae: “Ng’ii iwa jumaco man wucidh wukied i dhu Juamalek. Urwo, abicungo iwi ungulu got* kud uluth pa Mungu mandha i cinga.” 10 Yocuwa utimo tap calu ma Musa uyero ire, man ekiedo i dhu Juamalek. Ento Musa, Arun, man Hur giidho malu iwi ungulu got.*

11 Saa ma ka cing’ Musa ni malu ci, Juisrael gibedo tek ma sagu; ento tek Musa uloro cinge ci, e Juamalek gidoko tek ma sagu. 12 Saa ma cing’ Musa udoko pek, gigamu kidi giketho ebedo i wiye. I ng’eye, Arun giku Hur gibedo i ng’ete kun ku kun man gitielo cinge, uketho cinge ubedo ma tek nitundo i mwony pa ceng’. 13 Pieno Yocuwa uvoyo Amalek man dhanu pare ku palamularu.

14 Yehova ugam uwacu ni Musa kumae: “Kiew lembe maeni i kithabu kara ebed ni poy* man iyer ni Yocuwa nia, ‘abiruco magwei poy ma pir Amalek kud i the polo.’” 15 I ng’eye, Musa ugiero pemlam man ecaku nyinge Yehova-nisi,* 16 ewacu kumae: “Calu cing Amalek n’i kum komker pa Yah, Yehova bikiedo lwiny i dhoge i kind dhanu m’utuk pare zoo.”

18 Man Yethro ma jalam mi Midian, ma jalwon Musa uwinjo pi lembe ceke ma Mungu utimo ni Musa man ni dhanu pare ma Israel, kite ma Yehova uwodho ko Israel kud i Misiri. 2 Nwang’u Yethro ma jalwon Musa ujolo Zipora ma dhaku pa Musa, kinde m’eore edwogo i bang’e 3 karacelo ku wote ario. Nying’ nyathinne acel ubino Gercom,* pilembe Musa uwacu kumae: “Adoko umondo i ng’om pa jawirok.” 4 Ma kucelo ke nyinge ubino Eliezer,* pilembe eyero kumae: “Mungu pa vwa en e jakony para, m’ubodha kud i lak palamularu pa Farao.”

5 E Yethro ma jalwon Musa, karacelo ku wot Musa man dhaku pare gibino i bang’ Musa i langa kaka m’egonjo i iye i kum got pa Mungu mandha. 6 I ng’eye, eoro kwenda ni Musa kumae: “An a jalwuru ma Yethro, abebino i beng’i karacelo ku dhaku peri man wote ario.” 7 E wang’ acel Musa uwok pi nicirombo ku jalwon. Ewok ekulo kore piny man ecwiyo limbe. Ng’atuman m’i kindgi upenjo pi bedo pa wadi, man i ng’eye gimondo i hema.

8 Musa ukoro ni jalwon lembe ceke ma Yehova utimo i kum Farao man Misiri pir Israel, peko ceke m’unwang’ugi i yo, man ayi ma Yehova ubodho kogi. 9 Anyong’a unego Yethro pi bero ceke ma Yehova utimo ni Israel m’elaru kogi kud i Misiri.* 10 Man Yethro uyero kumae: “Pak ubed ni Yehova, m’ularuwu kud i Misiri man kud i cing’ Farao, man m’ularu dhanu maeni kud i the loc mi Misiri. 11 Kawoni ang’eyo nia Yehova tie dwong’ nisagu mungu mange ceke, nikum gin m’etimo i kum ju m’usendo dhanu pare ku kuhaya.” 12 I ng’eye, Yethro ma jalwon Musa ukelo lam m’awang’a man lam ni Mungu, man Arun ku judongo ceke mir Israel gibin gicamu cam karacelo ku jalwon Musa i wang’ Mungu mandha.

13 Urwonde, Musa ubedo calu ma naka pi nipoko lembe mi dhanu, man dhanu wotho cungo i wang’e niai kugweno nitundo uthieno. 14 Saa ma jalwon Musa uneno lembe ceke m’ebetimo ni dhanu, ewacu kumae: “Eni ibetimo ang’o ni dhanu e? Pirang’o ibedo keni kendi man dhanu ceke ucungo i weng’i niai kugweno nitundo uthieno?” 15 Musa udwoko ni jalwon kumae: “Pilembe dhanu ucuku bebino i bang’a pi nipenjo Mungu. 16 Ka lembe moko wok, jukele i bang’a; man an ke ukwayu apok lembe i kind dhanu man aketh jung’ey lembe ma Mungu mandha ung’olo ku cik pare.”

17 Jalwon Musa ugam uyero ire kumae: “Lembe m’ibetimo no utie ber ungo. 18 Andha ibivoc, in ku dhanu ma ni kudi e zoo, kum ter maeni tie pek dit iri man icopo yeye ngo kendi. 19 Dong’ kawoni winja. Abimiyo iri juk man Mungu bibedo kudi. In icung kaka dhanu i wang’ Mungu mandha, man icikiri nitero lembe i wang’ Mungu mandha. 20 Ukwayu iponjgi ku telowic man cik, man bende iketh ging’ey yo m’umito giwoth i iye man tic m’umaku gitim. 21 Ento ukwayu ing’ii kud i kind dhanu jumaco m’uromo, ma lworo Mungu, ma gi dhanu ma jugeno man m’udagu nwang’u piny i ayi m’atira ngo, man ikethgi iwi dhanu gibed judongo mir elufu, judongo mi dak, judongo mi pier abic, man judongo mir apar. 22 Gibibepoko lembe mi dhanu ka tek uwok, man gibibekelo lembe ceke ma tek i beng’i, ento lembe ceke ma ng’ili ng’ili gibibeng’olo gin. Wek giyey ter karacelo kudi, kara idwok lembe yot iri. 23 Tek itimo lembuni man Mungu de ung’olo iri kumeno, ibivoc ungo, man ng’atuman bidok i pacu pare ma cwinye kwiyo.”

24 E ndhu ndhu Musa uwinjo dwand jalwon man etimo lembe ceke m’eyero. 25 Musa ugam ung’iyo jumaco m’uromo kud i kind Israel ceke man ekethogi iwi dhanu ni judongo mir elufu, judongo mi dak, judongo mi pier abic, man judongo mir apar. 26 Pieno gibed gipoko lembe mi dhanu ka tek uwok. Lembe ma tek re ma gitero i bang’ Musa, ento lembe ceke ma ng’ili ng’ili gibed gipoko gin. 27 I ng’ey lembuno, Musa ulwoko jalwon man edok i ng’om pare.

19 I dwi mir adege i ng’ey ma Juisrael giwok kud i ng’om mi Misiri, i nindo ma rom, gitundo i langa mi Sinai. 2 Gigam gicoko woth kud i Refidim gitundo i langa mi Sinai man giwok gigonjo i langane. Israel ugonjo keca i wang’ got.

3 I ng’eye, Musa uidho i bang’ Mungu mandha, man Yehova ulwong’e kud i got, eyero kumae: “Yer ni ot pa Yakobo man iwac ni Juisrael kumae: 4 ‘Wuneno wun giwu gin m’atimo i kum Jumisiri, kara ayeywu iwi vomb acur man akelwu i bang’a. 5 Kawoni tek wuwinjo dwanda kubang’e kubang’e man wuworo lembariba para, e andha wubidoko piny para ma segi* kud i kind dhanu ceke, kum ng’om zoo en e para. 6 Wubidoko ira ni ker mi julam man thek ma leng’.’ Eno re ma lembe m’ibiyero ni Juisrael.”

7 Pieno, Musa ucidho man ewaku judongo mi dhanu; ekoro igi lembe maeno ceke ma Yehova ung’olo ire. 8 I ng’ey maeno, dhanu ceke gidwoko ma dwandgi uripo acel kumae: “Lembe ceke ma Yehova uyero, watie ayika nitimo.” E ndhu ndhu Musa utero lembe ma dhanu udwoko ni Yehova. 9 Man Yehova uwacu ni Musa kumae: “Nen! abibino i beng’i i afuru ma col kara dhanu uwinji saa m’abeweco kudi man kara saa ceke gibed ku yiyoyic i ii bende.” E Musa udwoko lembe ma dhanu uyero ni Yehova.

10 I ng’eye, Yehova uwacu ni Musa kumae: “Cidh i bang’ dhanu man idwokgi leng’ tin kud urwo, man gicikiri nilwoko bongu migi. 11 Gicikiri nibedo ayika pi nindo mir adege, pilembe i nindo mir adege Yehova biloro iwi got Sinai i wang’ dhanu ceke. 12 Keth kieu ni dhanu i kum gode gbur man iyer igi kumae: ‘Wubed ku weng’wu, kud wuidh got kadi kud wumul kum kieune. Ng’atu moko ci ma bimulo gode jubinege andha. 13 Cing’ ng’atu moko kud umul kume, kan ungo jubicanye ku kidi kunoke jubikile.* Nik’ebed lei kadi dhanu, ebikwo ngo.’ Ento kinde m’agwara* biwak, giromo idho i bang’ got.”

14 E Musa uloro kud iwi got i bang’ dhanu, ecaku dwoko dhanu leng’ man gilwoko kendi migi. 15 Ewacu ni dhanu kumae: “Wuyikuru pi nindo mir adek. Kud wutim ribiri.”*

16 Kugweno mi nindo mir adege, polo ucaku mor, lukoth ubemil, man afuru ma dhoge pek ubedo iwi got, ku dwand agwara ma tek lee, man kum dhanu ceke m’i kagonjo ucaku miel. 17 E Musa uwodho dhanu kud i kagonjo kara giromb ku Mungu mandha, man gicungo i the got. 18 Wi got Sinai zoo ubino dunyo yiro, pilembe Yehova uloro i wiye i mac; yirone ubino idho calu yiro mir uka, man gode zoo ubino yengere ma tek mandha. 19 Kinde ma dwand agwara ubemedere ameda nidoko tek, Musa uweco, man dwand Mungu mandha udwoko ire lembe.

20 Pieno Yehova uloro piny iwi got Sinai, i die wi gode. I ng’eye, Yehova ulwong’o Musa i die wi gode, man Musa uidho. 21 Yehova ugam uwacu ni Musa kumae: “Lor piny man icim dhanu nia kud gipim nikadhu kieu pi nineno Yehova, kan ungo dupa m’i kindgi bitho. 22 Man julam ma becoro thiri thiri i vut Yehova gidwokiri gigi leng’, kara Yehova kud ugoygi.” 23 Musa ugam uyero ni Yehova kumae: “Dhanu copo idho ngo iwi got Sinai, kum idaru cimowa nia, ‘keth kieu i kum got gbur, man idwoke leng’.’” 24 Ento Yehova uyero ire kumae: “Cidhi, lor piny, man wudwog malu kuni, in wukud Arun, ento kud iwek julam man dhanu ukadh kieu pi niidho i bang’ Yehova, kara kud egoygi.” 25 E Musa uloro piny i bang’ dhanu man ekoro igi.

20 I ng’eye, Mungu uyero lembe maeni ceke, ewacu kumae:

2 “An a Yehova Mungu peri, m’uwodhi kud i ng’om mi Misiri, kud i ot mi ng’eca. 3 Kud ibed ku mungu moko ci mange m’uweko an.

4 “Kud iyik iri ayi gin m’acwiya m’ang’ika kadi ayi gin moko ma ni malu i polo, kunoke ma ni piny i ng’om, kadi ma n’i pii i the ng’om. 5 Kud ikul kori piny igi kadi kud iwek jubidh weng’i nitimo igi, kum an a Yehova Mungu peri, a Mungu m’akwayu jutim ire kende, ma kelo matira pi kosa mi wego iwi wot, iwi dhanu m’utuk mir adege, man iwi dhanu m’utuk mir ang’wende mi ju m’udaga, 6 ento ma nyutho mer ma lokere ngo nitundo kadok ni dhanu m’utuk mir elufu mi ju m’umara man m’ubeworo lembang’ola para.

7 “Kud itii ku nying’ Yehova Mungu peri i ayi m’umaku piny ungo, kum Yehova biweko ngo m’umbe matira ng’atu m’utiyo ku nyinge i ayi m’umaku piny ungo.

8 “Poy pi ceng’ Sabatu, kara igwoke ebed leng’. 9 Ibitiyo man ibitimo tic peri ceke pi ceng’ abusiel, 10 ento ceng’ mir abirone tie sabatu ni Yehova Mungu peri. Kud itim tic moko ci, nik’ebed in, kadi wodi, kadi nyeri, kadi ng’eca peri ma co, kadi ng’eca peri ma nyaku, kadi lei peri m’i pacu, kadi umondo peri ma bedo i pacu* peri. 11 Kum pi ceng’ abusiel Yehova ucwiyo polo ku ng’om, nam ku piny ceke ma n’i igi, man ecaku yom i ceng’ mir abirone. Eno re m’uketho Yehova upoko mugisa iwi ceng’ Sabatu man edwoke leng’.

12 “Yung wuru ku meru, kara ikwo pi nindo ma lee i ng’om ma Yehova Mungu peri ubemiyo iri.

13 “Kud ineg nek.

14 “Kud itim abor.*

15 “Kud ikwal kwo.

16 “Kud imii lembatuca mi ndra i kum wedu tek i sadeni.

17 “Kud iketh cwinyi i kum ot pa wedu. Kud iketh cwinyi i kum dhaku pa wedu, kadi i kum ng’eca pare ma co, kadi i kum ng’eca pare ma nyaku, kadi i kum thwon dhiang’ pare, kadi i kum kana pare, kadi i kum piny moko ci ma wedu utie ko.”

18 Dhanu ceke ubino nuti kinde ma polo ubemor, lukoth ubemil, agwara ubewak, man got ubethwogo yiro. Kinde ma gineno lembuno, kumgi umiel man gicungo ku bor. 19 Pieno giyero ni Musa kumae: “In re m’iwec kudwa timba, e wabiwinjo; kud iwek Mungu uwec kudwa en, wamaru tho.” 20 E Musa uwacu ni dhanu kumae: “Lworo kud unegwu, kum Mungu mandha ubino pi nimulo iwu, kara wumeduru nilwore man kud wudubi.” 21 Pieno dhanu ucungo asu ku bor, ento Musa ucoro ceng’ini i kum afuru ma col kaka ma Mungu mandha ubino i iye.

22 I ng’eye, Yehova uyero ni Musa kumae: “Yer ni Juisrael kumae: ‘Wuneno wun giwu nia aweco i beng’wu niai kud i polo. 23 Kud wuyik mungu mi mola ma tar i ng’eta, man kud wuyik iwu mungu mi mola ma kwar. 24 Gier ira pemlam mi ng’om, man ibithiero lam m’awang’a peri i wiye, lam peri mi kwiyocwiny, rombe peri, man dhieng’ peri. Kaka ceke m’abiketho jupoy pi nyinga i iye, abibino i beng’i man abimiyo iri mugisa. 25 Tek igiero ira pemlam mi kidi, kud igiere ku kidi m’apaya. Kum tek itiyo ku jamtic mi payu piny i wiye, e ibicide. 26 Kud iidh malu i bang’ pemlam para ku mangasi, muneru peri bimaru nen i wiye.’

21 “Eni tie telowic mi pokolembe m’ibimiyo igi:

2 “Tek ing’iewo ng’eca ma Jaebrania, ebitimo calu ng’eca pi oro abusiel, ento i oro mir abirone, ebibedo agonya m’umbe niculo piny moko. 3 Tek ebino kende, ebidok de kende. Ento tek etie cwar dhaku, e dhaku pare bidok karacelo kude. 4 Tek rwoth pare umiyo ire dhaku man dhakune unyolo ire awiya ma co kunoke ma nyir, dhakune kud awiya pare bidoko pa rwoth pare, man en ke ebidok kende. 5 Ento tek ng’ecane urido lembe man ewacu nia, ‘amaru rwoth para, dhaku para, man awiya para; abemito ngo abed agonya,’ 6 e rwoth pare bitere i wang’ Mungu mandha. I ng’eye, ebitere i wang’ dhugola kunoke i ng’et dhugola, man rwoth pare bituco ithe ku sindhani, e ebidoko ng’eca pare pi nja.

7 “Tek ng’atu moko ulworo nyare ubed ng’eca, jubigonye ngo i ayi ma rom ku pa ng’eca ma co. 8 Tek rwoth pare ufoyo ngo kude man egame ngo ire ni dhaku* ento eketho ng’atu mange ung’iewe,* ebibedo mbe ku twero mi lwore ni umondo, kum edaru cibe. 9 Tek eng’iye ni wode, ebitimo ire calku twero mi jumanyir. 10 Tek egamu ire dhaku mange, e cam, kendi man twero mi gamiri pa dhaku ma kwong’a ucikere ngo nijwik. 11 Tek ebimiyo ngo ire piny adek maeno, e ebicidho m’etie agonya m’umbe niculo sente moko.

12 “Ng’atu moko ci m’ugoyo dhanu uketho etho, en de jucikiri ninege. 13 Ento tek etime aka ngo man Mungu mandha uweko lembene timere, abinyutho iri kaka m’eromo ringo i iye. 14 Tek ng’eicwiny umaku ng’atu moko lee i kum wadi man enege akakaka, ng’atune ucikere nitho, kadok bikwayu igame kud i kum pemlam para. 15 Ng’atu m’ugoyo won kunoke min, jucikiri ninege cen.

16 “Tek ng’atu moko ukwalu dhanu man elwore kunoke junwang’e i bang’e, jucikiri ninege cen.

17 “Ng’atu ma tek ulamu won kunoke min, jucikiri ninege cen.

18 “Tek dhanu moko gibedhaw man ng’atu acel ugoyo wadi ku kidi kunoke ku ngumi,* ma re etho ngo, ento gocone ubole iwi kavuto, jubitimo lembe ma e: 19 Tek ecopo ai malu ewok woko m’ekomo kud uluth, e ng’atu m’ugoyene binwang’u ngo matira. Ento ebiculo kende kende kawang’ saa ma ng’atu m’unwang’u retne unyotho pi tic pare, cil ma kume bikey ko ma zoo.

20 “Tek ng’atu moko ugoyo ng’eca pare ma co kunoke ma nyaku ku dund yen man etho i cinge, jubiculo kwor i kume. 21 Ento tek etho ngo i ng’ey nindo acel kunoke ario, jubiculo ngo kwor i kume, pilembe etie ng’atu ma jung’iewo ku sente pa rwoth pare.

22 “Tek jumoko gibedhaw i kindgi man gigudo dhaku ma iye nuti, uketho eoy ma nwang’u fodi saa pare uromo ngo,* ento ebino ngo ret mi tho, e ng’atu m’ugude ucikere niculo piny ma cwar dhakune bing’olo i wiye; man ecikere nicule nikadhu kud i bang’ jupoklembe. 23 Ento tek ret mi tho uwok, icikiri niculo kwo kawang’ kwo,* 24 wang’ kawang’ wang’, lak kawang’ lak, cing’ kawang’ cing’, tielo kawang’ tielo, 25 ka m’uwang’ kawang’ ka m’uwang’, rem kawang’ rem, goco kawang’ goco.

26 “Tek ng’atu moko ugoyo wang’ ng’eca pare ma co kunoke ma nyaku man eloye, ebiweke ebicidho m’etie agonya kawang’ wang’ene. 27 Tek ng’atu moko umugo lak ng’eca pare ma co kunoke ma nyaku, ebiweke ebicidho m’etie agonya kawang’ lakene.

28 “Tek thwon dhiang’ moko ugudo ng’atu moko ma nico kunoke ma dhaku man ng’atune utho, jucikiri nicanyu thwon dhiang’ne ku kidi nitundo etho man jubicamu ngo ringe; ento won thwon dhiang’ne binwang’u ngo matira. 29 Ento tek thwon dhiang’ moko begudo dhanu man jucimo won kpe, ento egwoke ngo, man enego ng’atu moko ma nico kunoke ma dhaku, jubicanyu thwon dhiang’ne ku kidi man won thwon dhiang’ne de jubinege. 30 Tek jung’olo jamgony* i wiye, ecikere nimiyo piny ceke ma jung’olo i wiye pi niwaru kwo* pare. 31 Jubitiyo ku telowic maeni mi pokolembe i kum won thwon dhiang’ne kadok egudo nyathin ma nico kunoke ma nyaku. 32 Tek thwon dhiang’ne ugudo ng’eca ma co kunoke ma nyaku, e won dhiang’ne biculo cekel* pier adek ni rwoth pa ng’eca ma cone kadi ke ma nyakune, man jubicanyu thwon dhiang’ne ku kidi nitundo ebitho.

33 “Tek ng’atu moko uyabu wi vur kadi ke etong’o vur moko man eumo ngo wiye, e thwon dhiang’ kunoke kana upodho i iye, 34 won vuje biculo kawang’e. Ebiculo welpinje ni won leine man lei m’uthone bidong’ ire. 35 Tek thwon dhiang’ pa ng’atu moko ugudo thwon dhiang’ pa ng’atu mange man etho, gibilworo thwon dhiang’ ma kwone man gibipoko i welpiny ma jung’iewe kone; gibipoko bende i lei m’uthone. 36 Kunoke tek ung’eyere nia thwon dhiang’ moko begudo lei mange de, ento won ugwoke ngo, ecikere niculo kawang’ thwon dhiang’ ku thwon dhiang’, man lei m’utho bidong’ ire.

22 “Tek ng’atu moko ukwalu thwon dhiang’ kunoke urombo man ethume kadi ke elwore, ebiculo thwoni dhieng’ abic kawang’ thwon dhiang’ne man rombe ang’wen kawang’ urombone.

2 (“Tek junwang’u jakwo moko ubeturo piny pi nimondo i ot man jugoye etho, rimbe bibedo ngo iwi ng’atu moko. 3 Ento tek lembene timere ma ceng’ udaru wok, rimbe bibedo iwi ng’atu m’unege.)

“Jakwone ucikere niculo kawang’ piny m’ekwalu. Ento tek embe ku piny moko, jubilwore pi niculo kawang’ piny m’ekwalu. 4 Tek junwang’u piny m’ekwalune ma kwo i bang’e, dok ebed thwon dhiang’ kadi kana kunoke urombo, ecikere niculo kawang’e wang’ ario.

5 “Tek ng’atu moko ubekwayu lim pare i lum kadi ke i podho mir ulok, man eweko gicamu podho pa ng’atu mange, ebiculo kawang’e ku piny ma beco mi podho pare kunoke ku piny ma beco mi podho pare mir ulok.

6 “Tek ng’atu moko ucwinyo mac man maje umaku yend ukudho m’udinyo kunoke kanga cam kadi ke nying cam ma n’i wi tiende kunoke podho, ng’atu m’ucwinyo maje ucikere niculo kawang’ piny m’uwang’ne.

7 “Tek ng’atu moko umiyo sente kunoke piny moko i bang’ jawodhe nia egwoki man juwok jukwale kud i ot pa jawodhene, tek junwang’u jakwone, ecikere niculo kawang’e wang’ ario. 8 Tek jakwone unwang’ere ngo, jucikiri nitero won ode i wang’ Mungu mandha pi ning’eyo ka nyo en re m’ewito piny pa jawodhe kunoke ngo. 9 Tek lembe moko uwok nia ng’atu moko utie ku piny pa wadi i ayi m’atira ngo, dok ebed thwon dhiang’, kana, urombo, kendi, kunoke piny moko ci m’urwinyo man elund eyero nia, ‘eni tie para!’ e gin ario zoo gibitero lembe migine i wang’ Mungu mandha. E ng’atu ma Mungu biyero nia ukoso biculo kawang’ pinje ni jawodhe wang’ ario.

10 “Tek ng’atu moko umiyo kana kunoke thwon dhiang’, kadi ke urombo kunoke lei m’i pacu i bang’ jawodhe nia ugwoki, ento leine uwok utho kunoke edoko abala, kadi ke juyake jucidho kude ma ng’atu moko mbe m’ubeneno, 11 ng’atu ma jugwoko pinje i bang’e ucikere nikwong’o kwong’ i kindgi i wang’ Yehova, nia ewito ngo piny pa jawodhe; man won pinje ucikere niyiyo. E ng’atu ma jugwoko pinje i bang’e biculo ngo kawang’e. 12 Ento tek jukwalu limne akwala kud i bang’e, ukwayu ecul kawang’e ni won. 13 Tekene yedi m’i lum re m’uyece, ebikele ni kizibiti. Ebiculo ngo kawang’ piny ma yedi m’i lum re m’uyeco.

14 “Tek ng’atu moko ukwayu lim pa wadi, man limne uwok udoko abala kunoke etho ma won umbe kude, ng’atu m’ukwayu limne ucikere niculo kawang’e. 15 Tek nwang’u won utie i vute, ebiculo ngo kawang’e. Tek nwang’u jupange apanga ke, sente ma jupange ko ca ci bibedo kawang’e.

16 “Tek ng’atu moko ubidho nyaku moko ma sumba* ma nwang’u fodi jupenjo ngo man evuto kude, ecikere nikolo keny i wiye kara edok dhaku pare. 17 Tek won nyakune ukwero magwei nimiye ire, ecikere asu niculo sente kadhiri mi keny.

18 “Kud iwek dhaku m’ajoga ubed kwo.

19 “Ng’atu moko ci ma tek uvuto ku lei, jucikiri ninege andha.

20 “Ng’atu ma tek uthiero lam ni mungu moko ci mange m’uweko ni Yehova kende, jucikiri ninyothe cen.

21 “Kud itii kud umondo yanga yanga kadi kud isende, kum wun de wubino umondo i ng’om mi Misiri.

22 “Kud wusend dhatho kadi nyathikic.* 23 Tek isendogi kadok nyanok, uketho giwak i bang’a, abiwinjo wak migi kokoro; 24 e ng’eicwiny para biopo man abinegowu ku palamularu, man mon mwu bidong’ ni montho man awiya mwu de bidong’ ni nyithikic.

25 “Kan imiyo sente ni banja ni jacan* m’i kind dhanu para, ng’atu ma bedo i kindwu, icikiri ngo nidoko ire calu jamii lon. Kud iketh ecule ku faida.

26 “Tek igamu kendi pa wedu ni gin m’unyutho nia ebiculo banja,* kwayu idwoke ire i wang’ mwony pa ceng’. 27 Kum eno kende ma tie jam um pare, bongu m’eumo ko kume; dong’ ebiumo ang’o kinde m’evuto? Kan ebiwak i bang’a, abiwinje andhandha, kum an a jakisa.*

28 “Kud ilam* Mungu kadi kud ilam jabim* mi juthu.

29 “Kud ibed ku jiji nimiyo ira girathiera mi cam peri m’ucek bik man mi piny m’udhir i pany* peri. Icikiri nimiyo ira kayu mi woti. 30 Maeni gin m’ibitimo ni thwon dhiang’ peri man ni urombo peri: ebitimo nindo abiro ku min. Ento i nindo mir aborane, ibimiye ira.

31 “Wucikuru ninyutho ira nia wutie dhanu ma leng’, man kud wucam ring’ piny moko ci ma yedi m’i lum uyeco i lum. Kwayu wubole ni gwogi.

23 “Kud imew lemndra. Kud iwinjiri ku jatimrac m’idok ko jamulembe ma sayu nitimo wadi rac. 2 Kud ilub tok udul dhanu pi nitimo lembe ma rac, man kud inyoth pokolembe ma pwe m’imii ko lembatuca mi ndra pi ninyayu anyong’a i udul dhanu. 3 Kud ibed kud akoyakoya i kesi pa ng’atu ma jacan.

4 “Kan inwang’u thwon dhiang’ kunoke kana pa jadegini urwinyo, icikiri nidwoke i bang’e. 5 Tek inwang’u kana pa ng’atu moko m’udegi upodho man ter udiye, kud itimiri ve nia inene ngo man icidhi i weng’i. Icikiri nikonye man nigonyo terne kud i kum lei.

6 “Kud inyoth pokolembe pa jacan m’i kindwu i kesi pare.

7 “Ur cen adote mi ndra,* man kud ineg ng’atu m’udubo ngo man won bedopwe, pilembe abing’olo ngo nia jatimrac utie won bedopwe.*

8 “Kud iyii kanyaka, kum kanyaka coro wang’ ju ma neno piny her man ecopo balu wec mi ju ma pwe.

9 “Kud isend umondo. Kum wung’eyo kite m’umondo winjere ko,* pilembe wun de wubino umondo i ng’om mi Misiri.

10 “Ibifuro podho peri pi oro abusiel man ibiwotho kayu cam m’ucek i iye. 11 Ento i oro mir abiro kud ifur podhone, weke eyom; jucan m’i kind dhanu mwu re ma bicamu cam m’ucek i iye, man piny ma gibiweko, yedi m’i lum re ma bicamu. Kwayu itim lembe ma rom eno bende i kum podho peri mir ulok man podho peri mir oliv.

12 “Ibitimo tic peri pi nindo abusiel; ento i nindo mir abirone, icikiri niyom i kum tic peri kara thwon dhiang’ peri ku kana peri giyom, man kara wod ng’eca peri ma nyaku man umondo gituc ninwang’u tego.

13 “Wunen nia wutimo gin ceke m’ayero iwu man kud wulwong’ nying’ mungu mange; kud juwinj pigi awinja de i dhogwu.

14 “Ibitimo ira foc wang’ adek kubang’ oro. 15 Ibitimo Foc mi mukathi ma thobi mbe i iye. Ibicamu mukathi ma thobi mbe i iye pi nindo abiro, tap calu m’ang’olo iri i saa m’ukethere i dwi mir Abib,* pilembe i saa maeno re m’iwok kud i Misiri. Ng’atu moko kud ubin i wang’a ma cinge nanu. 16 Ibitimo bende Foc mi kayucam* mi landu wi mwoka mi tic peri ma tek, mi gin m’icoyo i podho, i ng’eye ke ibitimo Foc mi coko dhu cam* i thum pa oro, kinde m’ibecoko adwogi mi tic peri ma tek kud i podho. 17 Wang’ adek kubang’ oro, jumaco peri ceke bibino i wang’ Yehova ma Rwoth mandha.

18 “Kud ithier rimo mi lam para ku gin moko ci ma thobi n’i iye. Man lam mi miyo ma juthiero i foc para ucikere ngo nibedo diewor traka nitundo kugweno.

19 “Ibitero landu wi mwoka ma beco mi cam m’ucek i ng’om peri i ot pa Yehova Mungu peri.

“Kud ited nyathi diel i cag min.

20 “Abeoro malaika i weng’i pi nigwoki i yo man niteri i kabedo m’adaru yiko. 21 Keth wii i kume man wor dwande. Kud ijai ire, kum ebiweko ngo kier mwu, pilembe nyinga n’i iye. 22 Ento tekene iworo dwande kubang’e kubang’e man itimo lembe ceke m’ayero, abibedo jadegi mi ju m’udegi man abisendo ju m’ubesendi. 23 Kum malaika para bitelo yo i weng’i man ebiteri i bang’ Juamor, Juhithi, Juperizi, Jukanan, Juhivi man Juyebusi, man abinyothogi pet. 24 Kud ikul kori piny ni mungu migi, kadi kud iwek jubidh weng’i nitimo igi, man kud ikwany bang’ timo migi. Ento icikiri niturogi man nirwombo mbegi migi mi thier cen. 25 Wucikuru nitimo ni Yehova Mungu mwu, e ebipoko mugisa iwi mukathi peri man iwi pii peri. Abikabu twoyo kud i beng’i. 26 Dhaku moko mbe ma iye bidubere i ng’om peri kadi ma bibedo jamugumba, man abiketho ibikwo lee.*

27 “Abioro lworona bitelo yo i weng’i man abijebo wi dhanu ceke m’ibirombo ko, man abiketho judegi peri ceke biringo kud i weng’i ma lembe uvoyogi.* 28 Abioro turcwiny* bitelo yo i weng’i, man ebiriemo Juhivi, Jukanan, man Juhithi cen kud i weng’i. 29 Abiriemogi ngo kud i weng’i i oro acel kende, maru ng’ombe bidong’ ni uvuru man yedi m’i lum bimaru nyay i iye i kumi. 30 Abiriemogi nok nok kud i weng’i, nitundo ibinyol lee man ibimaku ng’ombe.

31 “Abiketho kieu mi ng’om peri bibedo niai i Nam ma kwar nitundo i nam mi Jufilisti, man niai i langa nitundo i kum Kulo;* kum abimiyo dhanu m’i ng’ombe i cingwu man ibiriemogi cen kud i weng’i. 32 Kud itim lembariba moko kugi kadi ku mungu migi. 33 Kud gibed i ng’om peri, maru gibiketho ibidubo ira. Tek itimo ni mungu migi, e ma jiji mbe ebidoko iri ni uwic.”

24 I ng’eye, eyero ni Musa kumae: “Idh i bang’ Yehova, in wukud Arun, Nadab man Abihu karacelo ku judongo pier abiro mir Israel, man wuwok wukul korwu piny ku bor. 2 Musa bicoro kende i bang’ Yehova; ento jumange kud ucor, man dhanu mange kud uidh kude.”

3 I ng’eye, Musa ubin ukoro lembe ceke ma Yehova uyero man telowic mi pokolembe ceke ni dhanu, e dhanu ceke udwoko ma dwandgi uripo acel kumae: “Lembe ceke ma Yehova uyero, watie ayika nitimo.” 4 Pieno, Musa ukiewo lembe ceke ma Yehova uyero. E eai pir kugweno man egiero pemlam i the got man bende mbegi apar ario calku wend suru apar ario mir Israel. 5 I ng’ey maeno, eoro awobi mir Israel gicidh githiero lam m’awang’a man githiero thwoni dhieng’ ni lam mi kwiyocwiny ni Yehova. 6 Musa udog ugamu nusu mi rimo eketho i tabu, man nusu mi rimone ma kucelo ke ekiro i kum pemlam. 7 E eting’o kithabu mi lembariba man esome ku dwande ma tek ni dhanu. Man dhanune gidwoko kumae: “Lembe ceke ma Yehova uyero, watie ayika nitimo man wabibedo wor.” 8 Pieno Musa ugamu rimo man ekire iwi dhanu, eyero kumae: “Eni tie rimo mi lembariba ma Yehova utimo kudwu nimakere ku lembe maeni ceke.”

9 Musa gikud Arun, Nadab man Abihu karacelo ku judongo pier abiro mir Israel gigam giidho malu, 10 man gineno Mungu mir Israel. Piny ma n’i the tiende ubino calu kaka ma jutelo ku kidi ma julwong’o safir, man ebino leng’ calu polo ku kume. 11 Etimo dhanu mir awora mir Israelne rac ungo, man gineno Mungu mandha i gin ma wok i wang’, e gicamu man gimadhu.

12 I ng’eye, Yehova uyero ni Musa kumae: “Idh i bang’a iwi got man ibed kuni. Abimiyo iri bankidi ku cik man lembang’ola m’abikiewo pi ponji migi.” 13 Pieno, Musa uai ku jatic pare ma Yocuwa, man Musa uidho malu iwi got pa Mungu mandha. 14 Ento elar eyero ni judongo kumae: “Wukurwa kakeni nitundo ma wabiloko i beng’wu. Arun giku Hur gini kudwu. Ng’atu moko ci m’utie ku lemkesi copo cidho i bang’gi.” 15 E Musa ugam uidho iwi got kinde m’afuru uumo gode.

16 Dwong’ pa Yehova ubedo iwi got Sinai, man afuru uume pi nindo abusiel. I nindo mir abirone, egam elwong’o Musa kud i kind afuru. 17 I wang’ Juisrael m’ubeneno, dwong’ pa Yehova ubino nen calu mac m’ubewang’u piny i die wi got. 18 I ng’eye, Musa umondo i afuru man eidho malu iwi got. Man Musa ubedo iwi got pi nindo pier ang’wen, dieceng’ ku diewor.

25 Yehova ugam uyero ni Musa kumae: 2 “Wac ni dhanu mir Israel nia gimii ira ajok; wugam ajokne i bang’ ng’atu moko ci m’adundene ucwale nimiyo. 3 Ajok ma wubigamu i bang’gi ni e: mola ma kwar, mola ma tar, mola, 4 wuzi mi ble,* thol mi rangi m’uluga,* wuzi ma kwar ngbo, bongu ma nwang’* ma leng’, yuk diegi, 5 adila nyogi rombe ma jukworo ku rangi ma kwar, adila lei m’i nam,* yend utiep, 6 mo pi thala, balsam pi mo mi wirowir man pir udok ma ng’wice ng’ar, 7 kidi ma nyinge oniks,* man kidi mange ma jubimwono i kum efodh* man i kum jamkor. 8 Ukwayu giyik ira kabedo ma leng’, man abibedo i kindgi. 9 Wubiyiko hemane man jamticne ceke kubang’e kubang’e, nimakere kud ayi* m’abenyutho iri.

10 “Gibiyiko sanduku mi yend utiep; borne bibedo bot* ario ku nusu, lac wang’e bibedo bot acel ku nusu, man dongone de bot acel ku nusu. 11 I ng’eye, ibiumo kume ku mola ma kwar m’alili. Ibiumo kumene yor i iye ku yo woko bende man ibiyiko jamruko mi mola ma kwar i dhoge tingili. 12 Ibithiedho wende ang’wen mi mola ma kwar pi sandukune man ibimwonogi yor iwi tiende ang’wen; wende ario i thenge acel man wende ario mange i thenge ma kucelo. 13 Ibiyiko ramak ma boco boco mi yend utiep, man ibiumo kumgi ku mola ma kwar. 14 Ibiroyo ramaknegi i wend Sandukune i ng’ete ng’ete kara juyey kugi Sandukune. 15 Ramakne bibedo i wend Sanduku; kud juwodhgi kud i kume. 16 Ibiketho Lembatuca m’abimiyo iri i Sandukune.

17 “Ibiyiko jam umo wiye mi mola ma kwar m’alili, borne bibedo bot ario ku nusu, man lac wang’e ke bot acel ku nusu. 18 Ibiyiko jukerubi ario mi mola ma kwar; yikgi ku jamtic mi fwodo cuma man ikethgi iwi jam umo wiye i dhoge kun ku kun. 19 Yik jukerubi i dhoge ario kun ku kun, jakerubi acel yor i dhu jam umo wiye acel, man jakerubi mange i dhoge ma kucelo. 20 Jukerubine gibirieyo vombgi ario yo malu, man tipo vombgi biumo wi jam umo wi sanduku, man jakerubiman bilokere i bang’ wadi. Wang’ jukerubine bineno wi jam umo wi sanduku. 21 Ibiketho jam umo wi sandukune iwi Sanduku, man i Sandukune ke ibiketho Lembatuca m’abimiyo iri. 22 Abibenyuthara iri keca man abibeweco kudi kud iwi jam umo wi sanduku. Abiketho ibing’eyo lembe ceke m’abing’olo iri pi Juisrael kud i kind jukerubi ario ma n’i wi sanduku mi Lembatuca.

23 “Ibiyiko bende meza mi yend utiep; borne bibedo bot ario, lac wang’e bot acel, dongone ke bot acel ku nusu. 24 Ibiumo kume ku mola ma kwar m’alili man ibiyiko jamruko mi mola ma kwar i dhoge tingili. 25 Ibiyiko jamgwok ma lac wang’e rom ku wang’ cing’ acel* bitieko ng’ete tingili, man bende jamruko mi mola ma kwar i kum jamgwokne tingili. 26 Ibiyiko wende ang’wen mi mola ma kwar, man ibiketho wendene i gunde ang’wen, kaka ma judiko iye tiend meza ang’wenne ku wiye. 27 Wendene ucikere nibedo ceng’ini ku jamgwok, man jubiroyo ramak ma boco boco i igi pi niyeyo mezane. 28 Ibiyiko ramaknegi ku yend utiep man ibiumo kumgi ku mola ma kwar kara jubed juyey kugi mezane.

29 “Ibiyiko bende sanine, kikombene, kibinikane man tabune ma jubibekonjo ko girathiera mi pigulok. Ibiyikogi ku mola ma kwar m’alili. 30 Man ibiketho mukathi m’anyutha iwi mezane i wang’a thiri thiri.

31 “Ibiyiko tiend thala ku mola ma kwar m’alili. Tiend thalane jubiyiko ku jamtic mi fwodo cuma. The tiende, tiende, jange, kikombene, lwende m’ukudo ku thiwene bibedo gin acel. 32 Man jange abusiel bikaru kud i kum tiend thalane: jange adek niai kud i thenge acel, man jange adek mange niai kud i thenge ma kucelo. 33 I kum jangeneman jubirubo kikombe adek mir ayi pa thiw yend amand, ku lwende m’ukudo m’uwotho lubere ku thiwe; man i kum jange ma kucelo de jubirubo kikombe adek mir ayi pa thiw yend amand, ku lwende m’ukudo m’uwotho lubere ku thiwe. I ayi maeno re ma jange abusiel zoo biwotho karu kud i kum tiend thalane m’i diere. 34 I kum tiend thalane m’i diere, jubirubo kikombe ang’wen mir ayi pa thiw yend amand, ku lwende m’ukudo m’uwotho lubere ku thiwenegi. 35 Lwende acel m’ukudo bibedo i the jange ario ma kwong’a m’ukaru kud i kum tiende m’i diere, lwende acel m’ukudo bibedo i the jange ario m’ulubo, man lwende mange acel bibedo i the jange ario ma tokcen. I ayi maeno re ma jange abusiel bikaru kud i kum tiende m’i diere. 36 Jubiyiko tiend thalane zoo, lwende m’ukudo, man jange, ku mola ma kwar m’alili, man ebibedo ni gin acel ma juyiko ku jamtic mi fwodo cuma. 37 Ibiyiko thala abiro pi tiend thalane, man kinde ma thalane gibeliel, gibibelero kaka ma n’i yor i wang’e. 38 Rang’wenynegi* man tabu mi macnegi bibedo mi mola ma kwar m’alili. 39 Jubiyike karacelo kud ajeninegi ku talanto* acel mi mola ma kwar m’alili. 40 Nen nia iyikogi nimakere kud ayi* ma junyutho iri iwi got.

26 “Yik hema mi thier ku bongu apar ma nwang’* ma leng’ ma jucwiyo ku wuzi m’awiya, ku wuzi mi ble,* ku thol mi rangi m’uluga,* man ku wuzi ma kwar ngbo. Man keth dheyo mir ayi jukerubi i kumgi. 2 Bor mi bonguman mi hemane bibedo bot* pier ario wi abora man lac wang’e bibedo bot ang’wen. Bongu mi hemane zoo ucikere nibedo rom rom. 3 Jubilongo bongune abic karacelo kara ewodh bongu acel ma lac, man jubilongo bongune abic ma kucelo kara ewodh bende bongu acel ma lac. 4 Ibitudo thol mi ble* dupa dupa i dhu bongu ma lac mi hema kaka ma jubithube i iye ku ma kucelo, man ibitimo lembe ma rom eno i dhu bongu ma tokcen mi ma kucelo ma julongo ma lac kaka ma jubithubogi i iye. 5 Ibiyiko thol ma jutudo pier abic i dhu bongu mi hemane acel, man thol mange pier abic ma jutudo i dhu bongune ma kucelo, kara man ubed ku jadhoge kaka ma jubithubogi i iye. 6 Ibiyiko ratwic pier abic mi mola ma kwar, man ibithubo bongu mi hema karacelo ku ratwicnegi, kara hema mi thierne udok ni gin acel.

7 “Ibiyiko bende bongu mi yuk diegi ni hema ma jubiumo iwi hema mi thier. Ibiyiko bongune apar acel. 8 Bor mi bonguman bibedo bot pier adek, man lac wang’e bibedo bot ang’wen. Bongu apar acel mi hemane zoo bibedo rom rom. 9 Ibilongo bongu abic mi hemane karacelo man ibilongo bongu mange abusiel karacelo, man ibibanu bongu mir abusiende kud i wang’ hema. 10 Ibiyiko thol pier abic ma jutudo i dhu bongu acel mi hemane, niwacu i dhu bongu ma tokcen mi ma julongo ma lac, man thol pier abic mange i dhu bongune ma kucelo kaka ma jubithubogi i iye. 11 Ibiyiko ratwic pier abic mi mola man ibiroyo ratwicnegi i thol ma jutudo pi nithubo hemane karacelo, e gibidoko ni gin acel. 12 Dhu bongu ma bikadhu bioy piny. Nusu mi bongu ma bikadhune bioy piny yor i ng’ey hema mi thier. 13 Dhu bongu mi hemane ma bikadhu bot acel i ng’ete kun ku kun bioy pi niumo hema mi thierne.

14 “Ibiyiko bende jam umo hemane kud adila rombe ma jukworo ku rangi ma kwar, man iwi maeno ibiumo adila lei m’i nam.*

15 “Ibiyiko kadhruma mi hema mi thierne ku yend utiep, man ibiketho gibicungo atira. 16 Dongo pa kadhrumaman bibedo bot apar, man lac wang’e ke bot acel ku nusu. 17 Kadhrumaneman bibedo ku karib ario* ma judiko karacelo. Ibiyiko kadhruma ceke mi hema mi thier i ayi maeno. 18 Ibiyiko kadhruma pier ario pi theng hema mi thierne ma yo piny, m’uloko yo piny.

19 “Ibiyiko kathere pier ang’wen ma igi roko mi mola ma tar i the kadhruma pier ario: kathere ario ma igi roko i the kadhruma acel pi karibne ario, man kathere ario ma igi roko i the kadhrumaman m’ulubo pi karibne ario. 20 Pi theng hema mi thierne ma kucelo, niwacu thenge ma yo malu, ibiyiko kadhruma pier ario 21 man kathere ma igi roko pier ang’wen mi mola ma tar pigi: kathere ario ma igi roko i the kadhruma acel, man kathere ario ma igi roko i the kadhrumaman m’ulubo. 22 Pi ng’ey hema mi thierne yo reto, ibiyiko kadhruma abusiel. 23 Ibiyiko kadhruma ario ma bibedo ni ngucu ario m’i gul m’i ng’ey hema mi thier. 24 Gibibedo ario ario niai i there nitundo i wiye, nitundo i kum gwang’ ma kwong’a. Gin ario zoo jucikiri niyikogi kumeno, man gibibedo ni ngucu ario m’i gul. 25 Kadhrumane bibedo abora ku kathegi apar abusiel ma igi roko mi mola ma tar: kathere ario ma igi roko i the kadhruma acel, man kathere ario ma igi roko i the kadhrumaman m’ulubo.

26 “Ibiyiko fitho* mi yend utiep: fitho abic pi kadhruma m’i ng’et hema mi thierne acel, 27 fitho abic pi kadhruma m’i ng’ete ma kucelo mi hema mi thierne, man fitho abic pi kadhruma m’i ng’ete ma yo reto mi hema mi thierne, niwacu yor i ng’eye. 28 Fithone m’i diere m’ukadhu i kor kadhruma bimaku niai i dhoge acel nitundo i dhoge ma kucelo.

29 “Ibiumo kum kadhrumanegi ku mola ma kwar man ibiyiko wendenegi ku mola ma kwar pi nimaku fithonengi, man ibiumo kum fithonegi de ku mola ma kwar. 30 Icikiri niguro hema mi thier nimakere kud ayi ma junyutho iri iwi got.

31 “Ibiyiko ridho ku wuzi mi ble,* ku thol mi rangi m’uluga, ku wuzi ma kwar ngbo, man ku bongu ma nwang’ ma leng’ mi wuzi m’awiya. Ibiketho dheyo mir ayi jukerubi i kume. 32 Ibing’abe iwi mbegi ang’wen mi yend utiep ma juumo kumgi ku mola ma kwar. Gol migi bibedo mi mola ma kwar. Mbeginegi bicungo iwi kathere ang’wen ma igi roko mi mola ma tar. 33 Ibing’abu ridhone i the ratwic man ibikelo sanduku mi Lembatuca keca i ng’ey ridho. Ridhone bipoko iwu kind Kamaleng’ ku Kamaleng’ m’usagu. 34 Icikiri niumo wi sanduku mi Lembatuca kud i Kamaleng’ m’usagu.

35 “Ibiketho meza i wang’ ridho, atira i wang’ tiend thala ma n’i thenge ma yo piny mi hema mi thier; man meza ke ibiketho i thengene ma yo malu. 36 Pi kamondo mi hemane, ibiyiko ridho ku wuzi mi ble,* ku thol mi rangi m’uluga, ku wuzi ma kwar ngbo, man ku bongu ma nwang’ ma leng’ mi wuzi m’awiya ma jucwiyogi karacelo. 37 Ibiyiko mbegi abic mi yend utiep pi ridhone, man ibiumo kumgi ku mola ma kwar. Gol migi bibedo mi mola ma kwar, man ibithiedho kathere abic ma igi roko mi mola pigi.

27 “Ibiyiko pemlam mi yend utiep; borne bibedo bot* abic man lac wang’e bot abic. Ng’ete ang’wen zoo ucikere nibedo rom rom man dongo pare bibedo bot adek. 2 Ibiyiko tunge iwi gunde ang’wen; tungene bibedo jamkum pemlamne, man ibiumo kum pemlamne ku mola. 3 Ibiyiko ndoy pi nijobo vurune,* karacelo ku lupau, tabu, kanya, man tabu mi mac; ibiyiko ajenine ceke ku mola. 4 Ibiyiko singa m’akada pi pemlamne, voi mi mola, man iwi voine ibiketho wende ang’wen mi mola iwi gunde ang’wen. 5 Ibiketho voine yor i the dhu pemlam, man ebimaku diere mi pemlamne i kadongone. 6 Ibiyiko ramak ma boco boco mi yend utiep pi pemlam, man ibiumo kumgi ku mola. 7 Ibiroyo ramaknegi i wende, kara ramakne ubed i ng’ete ario kun ku kun kinde ma jubeyeyo pemlamne. 8 Ibiyiko pemlamne ve sondu mi bau ma iye thwolo. Yike tap calu ma junyutho iri iwi got.

9 “Ibiyiko lela mi hema mi thier. Pi ng’et lelane ma yo piny m’uneno yo piny, jubitwiyo ridho mi bongu ma nwang’* ma leng’ mi wuzi m’awiya; borne bibedo bot dak acel i ng’ete maeca. 10 Ebibedo ku mbegi pier ario, man ku kathere pier ario ma igi roko mi mola. Gol mi mbegine ku jamtwic migi bibedo mi mola ma tar. 11 I thenge ma yo malu bende jubitwiyo ridho ma borne bot dak acel, karacelo ku mbegi pier ario man kathere migi pier ario ma igi roko mi mola, ku gol man jamtwic mi mola ma tar pi mbeginegi. 12 I thenge ma yo reto, i kalac mi lelane, jubitwiyo ridho ma borne bot pier abic, ku mbegi apar man kathere apar ma igi roko. 13 Lac wang’ lelane i thenge ma yo nyangu, yo ka ma ceng’ wok i iye, bibedo bot pier abic. 14 Jubitwiyo ridho ma borne bot apar abic i ng’ete acel, ku mbegi adek man kathere adek ma igi roko. 15 Man i ng’ete ma kucelo de, jubitwiyo ridho bot apar abic, ku mbegi adek man kathere adek ma igi roko.

16 “Kamondo mi lelane bibedo ku ridho ma borne bot pier ario ma juyiko ku wuzi mi ble,* ku thol mi rangi m’uluga, ku wuzi ma kwar ngbo, man bongu ma nwang’ ma leng’ mi wuzi m’awiya ma jucwiyogi karacelo; ebibedo bende ku mbegi ang’wen man kathere ang’wen ma igi roko. 17 Mbegi ceke m’utieko lelane tingili bibedo ku jamtwic mi mola ma tar man gol mi mola ma tar, ento kathegi ma igi roko bibedo mi mola. 18 Bor pa gang’ne bibedo bot dak acel, lac wang’e bot pier abic, man dongone bot abic; jubiyiko gang’ne ku bongu ma nwang’ ma leng’ mi wuzi m’awiya, man ebibedo ku kathere ma igi roko mi mola. 19 Ajeni man jamtic ceke ma jubitiyo ko i tic mi hema mi thier, nik’ebed gute mi hemane kadi gute ceke mi gang’ne, bibedo mi mola.

20 “Ng’ol ni Juisrael nia gikel iri mo ma leng’ mir oliv m’aoda pi der, kara thala uliel saa ceke. 21 I hema mi rombo, i wang’ ridho ma ni ceng’ini ku Lembatuca, Arun ku wote gibiketho thala bibeliel niai dhug uthieno nitundo kugweno i wang’ Yehova. Etie cik ma nja ma Juisrael gibibeworo i kind dhanu m’utuk migi ceke.

28 “Lwong’ Arun m’umeru karacelo ku wote kud i kind Juisrael kara ebed ira jalam: Arun karacelo ku Nadab man Abihu, Eleazar man Ithamar ma gi wot Arun. 2 Yik kendi ma leng’ ni Arun m’umeru, pi dwong’ man leng’o. 3 Ibiweco ku dhanu ceke ma jubodho,* ju m’apong’o ku tipo mi rieko, man gibiyiko kendi p’Arun pi dwoke leng’, kara ebed ira jalam.

4 “Maeni kendi ma gibiyiko: jamkor, efodh, koti ma bote mbe, kanzu m’uriedo karekare, jamboyo wic ma segi, man thondh pier; gibiyiko kendi ma leng’ maeno ni Arun m’umeru ku wote, kara ebed ira jalam. 5 Jutic ma jubodhone gibitiyo ku mola ma kwar, wuzi mi ble,* thol mi rangi m’uluga, wuzi ma kwar ngbo, man bongu ma nwang’* ma leng’.

6 “Gibiyiko efodh ku mola ma kwar, ku wuzi mi ble,* ku thol mi rangi m’uluga, ku wuzi ma kwar ngbo, ku bongu ma nwang’ ma leng’ mi wuzi m’awiya, man gibiketho dheyo i kumgi. 7 Ebibedo ku dund bongu ario mi goke ma judiko karacelo pi nithubo dhoge m’i wang’e ku m’i ng’eye. 8 Thondh pier m’acwiya ma jutwiyo i kum efodh pi nimake ebed kakare ucikere nibedo mi piny ma rom: mi mola ma kwar, mi wuzi mi ble,* mi thol mi rangi m’uluga, mi wuzi ma kwar ngbo, man mi bongu ma nwang’ ma leng’ mi wuzi m’awiya.

9 “Ibigamu kidi ario ma nyinge oniks* man ibing’iko nying’ wot Israel i kumgi, 10 nying’ abusiel iwi kidine acel, man nying’ abusiel m’udong’ iwi kidine ma kucelo, niai i ma kayu nitundo i ma cogo. 11 Jabodho ma ng’iko kidi bing’iko nying’ wot Israel iwi kidi arione, calu ma jung’iko ko kum jamketho ayi.* I ng’eye ibiketho jumwongi i jamgwok mi mola ma kwar. 12 Ibiketho kidi arione iwi dund bongu mi gok efodh ni kidi mi poy pi wot Israel, man Arun biyeyo nying’gi i wang’ Yehova iwi dund bongu ario mi goke kara ebed ni poy. 13 Ibiyiko jamgwokne mi mola ma kwar 14 man nyoro ario mi mola ma kwar m’alili ma juwiyo calu thol, man ibitwiyo nyoro ma calu tholnegi i kum jamgwok.

15 “Ibiketho jabodho ma ruko kum kendi biyiko jamkor mi pokolembe. Ebiyike calu efodh ku mola ma kwar, ku wuzi mi ble,* ku thol mi rangi m’uluga, ku wuzi ma kwar ngbo, man ku bongu ma nwang’ ma leng’ mi wuzi m’awiya. 16 Ka jubane ni ario, ng’ete ang’wen zoo ucikere nibedo rom rom; borne lac cing’ acel,* man lac wang’e de lac cing’ acel. 17 Ibiketho kidi i kum jamkorne, man ebibedo leni ang’wen. Leni mi kwong’o tie ku kidi ma nying’gi rubi, thopaz, man emerod.* 18 Leni mir arionde utie ku kidi ma nying’gi thurkwaz, safir, man yaspi.* 19 Leni mir adege utie ku kidi ma nying’gi lecem, agath, man amethiste.* 20 Leni mir ang’wende utie ku kidi ma nying’gi krizolith, oniks, man jad.* Jucikiri nimwonogi i jamgwok mi mola ma kwar. 21 Kidine gibibedo calku nying’ wot Israel apar ario. Jubing’iko kidiman calu ma jung’iko ko kum jamketho ayi, man nying’man bicungo kaka suru acel m’i kind suru apar ario.

22 “Ibiyiko nyoro mi mola ma kwar m’alili ma jukiedo calu thol pi jamkorne. 23 Ibiyiko lagith ario mi mola ma kwar pi jamkor man ibimwono lagith arione i kum jamkor i gunde ario. 24 Ibiroyo thol ario mi mola ma kwar i lagith arione i gund jamkor. 25 Ibiroyo dhu thol arione i jamgwok ario man ibitwiyogi iwi dund bongu mi gok efodh yor i wang’e. 26 Ibiyiko lagith ario mi mola ma kwar man ibikethogi i gund jamkorne ario yor i iye i thenge m’uloko i bang’ efodh. 27 Ibiyiko lagith ario mange mi mola ma kwar yor i wang’ efodh, yor i the dund bongu ario mi goke yo piny, ceng’ini ku kaka ma juthube i iye, yor iwi thondh pier m’acwiya mir efodh. 28 Jubitwiyo jamkor kara ebed kakare ku thol mi ble,* jubitwiyo lagithne i kume i kum lagith mir efodh. Eno biketho jamkorne bibedo kakare i kum efodh yor iwi thondh pier m’acwiya.

29 “Arun ucikere niyeyo nying’ wot Israel iwi jamkor mi pokolembe iwi adundene kinde m’ebemondo i Kamaleng’, kara ebed ni poy saa ceke i wang’ Yehova. 30 Ibiketho Urim ku Thumim* i jamkor mi pokolembe, man gicikiri nibedo iwi adunde Arun kinde m’ebemondo i wang’ Yehova, man Arun ucikere niyeyo jampokolembe mi Juisrael iwi adundene i wang’ Yehova saa ceke.

31 “Ibiyiko koti ma bote mbe mir efodh ma en zoo e mi wuzi mi ble.* 32 Ebibedo ku ng’ute i dierene. Jacwii kendi bikwoyo dhu ng’utene tingili. Ebibedo calu ng’ut koti mi cuma kara kud eyeci. 33 Ibiyiko ayi nying yend ulemo ku wuzi mi ble,* ku thol mi rangi m’uluga, man ku wuzi ma kwar ngbo i dhu tiende tingili, man ibiwotho ketho ngara mi mola ma kwar i kindgi. 34 Ibiketho ngara mi mola ma kwar kud ayi nying ulemo biwotho lubiri aluba; ngara acel mi mola ma kwar, man ayi nying ulemo de acel i dhu tiend koti ma bote mbe tingili. 35 Arun ucikere nikende pi nitimo tic, man dwand ngarane ucikere niwinjere kinde m’ebemondo i kabedo ma leng’ i wang’ Yehova man kinde m’ebewok woko, kara kud etho.

36 “Ibiyiko ban m’uriang’ini mi mola ma kwar m’alili man ibing’iko kume calu ma jung’iko ko kum jamketho ayi kumae: ‘Leng’o en e pa Yehova.’ 37 Ibitwiye i kum jamboyo wic ma segi ku thol mi ble;* ebibedo i terwang’ i kum jamboyo wic ma segi. 38 Ebibedo i terwang’ Arun, man Arun biyeyo kier kinde ma ng’atu moko udubo i kum piny ma leng’ ma Juisrael gidwoko leng’ kinde ma githierogi ni giramiya ma leng’. Ebibedo saa ceke i terwang’e, kara ginwang’ bero i wang’ Yehova.

39 “Ibicwiyo kanzu mi bongu ma nwang’ ma leng’ m’uriedo karekare man jamboyo wic ma segi mi bongu ma nwang’ ma leng’, man ibicwiyo bende thondh pier.

40 “Ibiyiko bende kanzu, thondh pier, man jamboyo wic ni wot Arun pi dwong’ man leng’o. 41 Ibironyo umeru m’Arun man wote karacelo kude, ibiwirogi, ibikethogi ni julam,* man ibidwokogi leng’ kara gibed ira ni julam. 42 Yik igi bende pali* mi bongu ma nwang’ pi niumo muneru migi. Ebimaku niai i pier nitundo i bamb. 43 Arun ku wote gicikiri nikendogi kinde ma gibemondo i hema mi rombo kunoke kinde ma gibecoro i kum pemlam pi nitimo tic i kabedo ma leng’, kara dubo kud ubed i wigi man kud githo. Eno tie cik ma nja pire man pi nyikwaye* yor i ng’eye.

29 “Maeni tie gin m’ibitimo pi nidwokogi leng’ kara gibed ira julam: Gam nyathi thwon dhiang’ acel, nyogi rombe ario ma mulima mbe i kumgi, 2 mukathi ma thobi mbe i iye, mukathi ma ngulu ngulu ma thobi mbe i iye ma jujebo ku mo, man mukathi m’apada ma thobi mbe i iye ma juwiro mo i kume. Ibitedogi ku mogo nganu ma yom 3 man ikethgi i katoko kan ikelgi i wang’a i katokone, karacelo ku thwon dhiang’ man nyogi rombe ario.

4 “Ibikelo Arun man wote i kamondo mi hema mi rombo man ibijomogi ku pii. 5 I ng’eye, gam kendi man irony Arun ku kanzu, koti ma bote mbe mir efodh, efodh, man jamkor, man itwii thondh pier m’acwiya mir efodh kii i piere. 6 Ibironyo jamboyo wic ma segi i wiye, man ibiketho giranyutha mi thieriri ma leng’* i kum jamboyo wic ma segine; 7 man iting’ mo mi wirowir ikonj i wiye man iwire.

8 “I ng’eye, keth wote de gicor, ironygi ku kanzu 9 man itwii thondh pier i piergi, niwacu Arun ku wote, man iketh jamboyo wic i wigi; e tic mi lamulam bibedo migi ni cik ma nja. I ayi maeno re m’ibiketho Arun karacelo ku wote i tic mi julam.*

10 “I ng’eye, kel thwon dhiang’ i wang’ hema mi rombo man Arun ku wote gibiketho cing’gi iwi thwon dhiang’ne. 11 Thum thwon dhiang’ne i wang’ Yehova i dhu kamondo mi hema mi rombo. 12 Gam kum rimb thwon dhiang’ne i lweti iwire i kum tung pemlam, man ikonj dong rimone zoo i the pemlamne. 13 I ng’eye, wodh miyo ceke m’uumo kum cindi iye ku bor ma n’i kum cwiny, man rong’ini ario ku miyo ma n’i kumgi; wang’gi kara giduny iwi pemlam. 14 Ento ring’ thwon dhiang’ne, adilane man weyne ibiwang’u woko i ng’ey kagonjo. Thwon dhiang’ne tie lam mi dubo.

15 “I ng’eye, gam nyog urombo acel, man Arun ku wote gicikiri niketho cing’gi iwi nyog urombone. 16 Thum nyog urombone man igam rimbe ikir i ng’et pemlamne zoo. 17 Thum nyog urombone unding’ unding’, man ilwok cindi iye ku tiende, man ipang unding’negi karacelo ku wiye. 18 Icikiri niwang’u nyog urombone zoo man niketho yirone uduny iwi pemlam. Etie lam m’awang’a ni Yehova, piny ma ng’wice ng’ar.* Etie lam ma juwang’u ku mac ni Yehova.

19 “I ng’eye, gam nyog urombo ma kucelo, man Arun ku wote gicikiri niketho cing’gi iwi nyog urombone. 20 Thum nyog urombone man igam kum rimbe moko iketh i the ith Arun ma yor acwic, man i the ith wote ma yor acwic, i nyig cing’gi ma dit ma yor acwic, man i nyig tiendgi ma dit ma yor acwic; man ikir rimone i kum ng’et pemlamne zoo. 21 I ng’eye, gam kum rimo ma n’i wi pemlam man kum mo mi wirowir man ikire i kum Arun man i kum kendi pare, bende i kum wote ku kendi migi, kara en ku kendi pare man wote ku kendi migi gibed leng’.

22 I ng’eye, wodh miyo m’i nyog urombone, yibe ma miyo, miyo m’uumo kum cindi iye, bor m’i kum cwiny, rong’ini ario ku miyo m’i kumgi, man bambe ma yor acwic, kum etie nyog urombo mi kethojo i tic. 23 Gam bende lungu mukathi acel m’ang’ina, mukathi acel ma ngulu ngulu ma jujebo ku mo, man mukathi acel m’apada kud i katoko mi mukathi ma thobi mbe i iye ma n’i wang’ Yehova. 24 Ibikethogi zoo i cing Arun man i cing’ wote, man ibilekogi kun ku kun ni girathiera m’aleka i wang’ Yehova. 25 I ng’eye, gamgi kud i cing’gi man iwang’gi iwi pemlam, i die wi lam m’awang’a ni piny ma ng’wice ng’ar* i wang’ Yehova. Etie girathiera ma juwang’u ku mac ni Yehova.

26 “Dog igam dhu kor nyog urombo mi kethojo i tic ma juthiero pir Arun man ileke ni girathiera m’aleka i wang’ Yehova, man ebidoko ni maka peri. 27 Dwok dhu kor girathiera m’aleka leng’ man bende bamb girathiera ma leng’ ma juleko man ma jugamu kud i kum nyog urombo mi kethojo i tic, kud i kum piny ma juthiero pir Arun man pi wote. 28 Ebidoko ni piny p’Arun ku wote calku cik ma nja ma Juisrael gicikiri niworo, kum etie theng girathiera ma leng’, man ebidoko ni theng girathiera ma leng’ ma Juisrael gibibemiyo. Etie theng girathiera ma leng’ ni Yehova m’uai kud i kum lam migi mi kwiyocwiny.

29 “Kendi ma leng’ p’Arun, wote gibitiyo ko yor i ng’eye kinde ma jubiwirogi man jubikethogi ni julam. 30 Jalam m’i kind wote ma bidong’ kakare man ma bimondo i hema mi rombo pi nitimo tic i kabedo ma leng’ bikendogi pi nindo abiro.

31 “Ibigamu nyog urombo mi kethojo i tic man ibitedo ringe i kabedo ma leng’. 32 Arun ku wote gibicamu ring’ nyog urombone ku mukathi ma n’i katoko i dhu kamondo mi hema mi rombo. 33 Gibicamu piny ma jutimo ko adunya pi nikethogi ni julam* man pi nidwokogi leng’. Ento ng’atu m’umbe ku rusa* copo camugi ngo, kum gitie piny ma leng’. 34 Tek kum ring’o moko mi lam mi kethojo i tic man mukathi udong’ nitundo kugweno, icikiri niwang’u donge m’udong’ne ku mac. Kud jucame, kum etie piny ma leng’.

35 “Ibitimo kumeno ni Arun ku wote, calku lembe ceke m’ang’olo iri. Ibimaku nindo abiro pi nikethogi ni julam.* 36 Ibithiero thwon dhiang’ mi lam mi dubo kubang’ ceng’ pir adunya, man ibidwoko pemlam leng’ nikum dubo kinde m’ibetimo adunya pire, man ibiwire pi nidwoke leng’. 37 Ibimaku nindo abiro pi nitimo adunya pi pemlam, man icikiri nidwoke leng’ kara edok ni pemlam ma leng’ m’usagu. Ng’atu moko ci m’umulo kum pemlamne ucikere nibedo leng’.

38 “Maeni tie gin m’ibithiero iwi pemlam: nyithi nyogi rombe ario ma oro migi acel acel kubang’ ceng’ thiri thiri. 39 Ibithiero nyathi nyog urombo acel kugweno man ma kucelo saa ma piny ubegamere.* 40 Pi nyathi nyog urombo ma kwong’a, gam mogo ma yom mukero ma mondo wang’ apar i efa* acel m’ujebere ku moj oliv ma juodo nusu pa nusu pa hin* acel, man girathiera mi pigulok nusu pa nusu pa hin acel mi pigulok. 41 Ibithiero nyathi nyog urombo mir arionde saa ma piny ubegamere,* karacelo ku girathiera mi nying cam man mi pigulok ma rom calu mi kugweno. Ibithiere ni piny ma ng’wice ng’ar,* en e girathiera ma juwang’u ku mac ni Yehova. 42 Ebibedo ni lam m’awang’a ma thiri thiri ma wubibethiero i kind dhanu m’utuk mwu ceke i dhu kamondo mi hema mi rombo i wang’ Yehova, kaka m’abinyuthara iwu i iye pi niweco kudwu.

43 “Abinyuthara ni Juisrael keca, man ebidoko leng’ nikum dwong’ para. 44 Abidwoko hema mi rombo man pemlam leng’, man abidwoko Arun ku wote leng’ kara gibed ira julam. 45 Abibedo i kind dhanu mir Israel, man abibedo Mungu migi. 46 E gibing’eyo andhandha nia an a Yehova Mungu migi, m’uwodhogi kud i ng’om mi Misiri kara abed i kindgi. An a Yehova Mungu migi.

30 “Ibiyiko pemlam ni kaka mi wang’u udok ma ng’wice ng’ar; ibiyike ku yend utiep. 2 Ng’ete ang’wen zoo ucikere nibedo rom rom, bor pare bot acel,* lac wang’e bot acel, man dongone bot ario. Ku tunge zoo ebibedo gin acel. 3 Ibiumo kume ku mola ma kwar m’alili: die wiye, ng’ete tingili, man tunge; man ibiyiko jamruko mi mola ma kwar i dhoge tingili. 4 Ibiyiko bende wende ario mi mola ma kwar pire i the jamruko m’i dhoge i thenge ario kun ku kun, man wendene bimaku ramak ma boco boco ma jubibetiyo ko pi niyeye. 5 Yik ramak ma boco boco mi yend utiep man um kumgi ku mola ma kwar. 6 Keth pemlamne i wang’ ridho ma ni ceng’ini ku sanduku mi Lembatuca, i wang’ jam umo wiye ma n’i wi Lembatuca, kaka m’abinyuthara iri i iye.

7 “Arun biwang’u udok ma ng’wice ng’ar i wiye, man ebiketho yirone biwotho duny iwi pemlam kinde m’ebeyiko thala kubang’ kugweno. 8 Bende, kinde m’Arun ubecwinyo thala saa ma piny ubegamere,* ebiwang’u udok ma ng’wice ng’ar. En e girathiera mir udok ma ng’wice ng’ar ma jubibethiero thiri thiri i wang’ Yehova i kind dhanu m’utuk mwu ceke. 9 Kud wuthier udok ma ng’wice ng’ar m’uyiyere ngo i wiye, kadok lam m’awang’a, kadi girathiera mi nying cam, man kud wukonj girathiera mi pigulok i wiye. 10 Arun ucikere nitimo adunya iwi tunge wang’ acel kubang’ oro. Ebitimo adunya pire ku kum rimo moko mi lam mi dubo mir adunya wang’ acel kubang’ oro i kind dhanu m’utuk mwu ceke. Etie pemlam ma leng’ m’usagu ni Yehova.”

11 I ng’eye, Yehova uyero ni Musa kumae: 12 “Kinde m’ibekwanu wot Israel pi ning’eyo wendgi ci, ng’atuman ucikere nimiyo jamgony pi kwo* pare ni Yehova i saa m’ibekwanu wendgine. Eno tie kara thong’om kud upodh i wigi i saa ma jubekiewo nying’gi. 13 Maeni gin ma dhanu ceke ma jukiewo nying’gi bimiyo: nusu cekel* nimakere ku cekel mi kabedo ma leng’.* Gera* pier ario utie cekel acel. Nusu cekel utie ajok ni Yehova. 14 Ng’atu moko ci ma jukiewo nyinge ma oro pare pier ario niidho malu bimiyo ajok pa Yehova. 15 Jalonyo bimiyo ngo lee nisagu man jacan de bimiyo ngo ajok i the nusu cekel* ni Yehova pi nitimo adunya pi kwo* mwu. 16 Icikiri nigamu sente mi mola ma tar mir adunya i bang’ Juisrael man nimiye pi tic mi hema mi rombo, kara ebed ni poy i wang’ Yehova pi Juisrael, pi nitimo adunya pi kwo* mwu.”

17 Yehova uweco kendo i bang’ Musa, eyero kumae: 18 “Yik jamlogo mi mola man tiende ma jubibekethe i wiye pi logo; i ng’eye kethe i kind hema mi rombo ku pemlam man ikonj pii i iye. 19 Arun ku wote gibibelwoko cing’gi ku tiendgi keca. 20 Kinde ma gibecimondo i hema mi rombo kunoke kinde ma gibecoro i bang’ pemlam pi nitimo tic man nithiero lam m’awang’a, pi niketho yirone uduny ni Yehova, gibilogo ku pii kara kud githo. 21 Gicikiri nilwoko cing’gi man tiendgi kara kud githo; ebibedo igi ni telowic ma nja ni Arun man ni nyikwaye i kind dhanu m’utuk migi ceke.”

22 Yehova uyero bende ni Musa kumae: 23 “I ng’eye, ibigamu mo ma e ma ng’wicgi ng’ar ma beco m’usagu: mira m’utal cekel dak abic, man nusu mi kadhiri maeno, cekel dak ario pier abic mir apoka yen ma ng’wice ng’ar, cekel dak ario pier abic mi thiang’ ma ng’wice ng’ar, 24 man kasia cekel dak abic ma jupimo nimakere ku cekel mi kabedo ma leng’,* karacelo ku moj oliv hin acel.* 25 I ng’eye, tii kugi pi niyiko mo ma leng’ mi wirowir; jucikiri nijebogi karacelo ku bodho.* Ebibedo mo ma leng’ mi wirowir.

26 “Ibiwiro hema mi rombo man sanduku mi Lembatuca kude, 27 man bende meza kud ajenine ceke, tiend thala kud ajenine, pemlam mir udok ma ng’wice ng’ar, 28 pemlam mi lam m’awang’a kud ajenine ceke, man jamlogo ku tiende ma jukethe i wiye. 29 Icikiri nidwokogi leng’ kara gidok leng’ m’usagu. Ng’atu moko ci m’ubemulo kumgi ucikere nibedo leng’. 30 Man ibiwiro Arun ku wote, man ibidwokogi leng’ kara gibed ira julam.

31 “Ibiyero ni Juisrael kumae: ‘Maeni bimedere nibedo mo ma leng’ mi wirowir ira i kind dhanu m’utuk mwu ceke. 32 Kud juwire i kum dhanu, man kud wuyik piny moko ci ma jujebo i ayi maeno. Etie piny ma leng’. Ebimedere nibedo piny ma leng’ iwu. 33 Ng’atu moko ci m’uyiko mo ma ng’wice ng’ar ma calu maeno man m’uwire i kum ng’atu m’umbe ku rusane,* jucikiri nikabe* cen kud i kind juthugi.’”

34 I ng’eye, Yehova uyero ni Musa kumae: “Gam mo ma e ma ng’wicgi ng’ar kadhiri ma rom rom: udok nataf, onika, galbanum, man udok sengi ma leng’. 35 Yik kugi udok ma ng’wice ng’ar; jucikiri nijebo piny maeno ma ng’wice ng’ar ku bodho,* kadu ubed i iye, susu kud ubed i iye, man ebed leng’. 36 Ibirego kume moko ni mogo ma yom, man ibiketho kumene moko i wang’ Lembatuca i hema mi rombo, kaka m’abinyuthara iri i iye. Ecikere nibedo leng’ m’usagu iwu. 37 Kud wuyik udok ma ng’wice ng’ar ma jujebo ku gin ma kumeno iwu. Icikiri ninene ni gin ma leng’ ni Yehova. 38 Ng’atu moko ci ma biyiko kit udok ma kumeno pi ning’wiyo ng’wice ma ng’ar, jucikiri nikabe* cen kud i kind juthugi.”

31 Yehova umedere niweco i bang’ Musa, eyero kumae: 2 “Nen, adaru ng’iyo* Bezalel ma wod Uri ma wod Hur mi suru pa Yuda. 3 Abipong’e ku tipo pa Mungu, abimiyo ire rieko, nyang’ i lembe, man ng’eyong’ec mi kwond bodho ceke, 4 kara epang tic mi bodho, etii ku mola ma kwar, mola ma tar, man mola, 5 kara epay kum kidi man emwongi i jamgwok, man kara eyik kwond piny ceke ma juyiko ku yen. 6 M’umedo maeno, aketho Oholiab ma wod Ahisamak mi suru pa Dan pi nikonye, man abiketho rieko i adunde dhanu ceke ma jubodho,* kara giyik piny ceke m’ang’olo iri: 7 hema mi rombo, sanduku mi Lembatuca man jam umo wiye ma n’i wiye, jam hemane ceke, 8 meza kud ajenine, tiend thala mi mola ma kwar m’alili kud ajenine ceke, pemlam mir udok ma ng’wice ng’ar, 9 pemlam mi lam m’awang’a kud ajenine ceke, jamlogo ku tiende ma jukethe i wiye, 10 kendi ma jucwiyo ku bodho, kendi ma leng’ p’Arun ma jalam, kendi pa wote ma gitimo ko tic mi lam, 11 mo mi wirowir, man udok ma ng’wice ng’ar pi kabedo ma leng’. Gibitimo lembe ceke m’ang’olo iri.”

12 Yehova uyero bende ni Musa kumae: 13 “Wec i bang’ Juisrael man iyer igi kumae: ‘Asagane, wucikuru niworo sabatu para, kum etie giranyutha i kindwa wakudwu i kind dhanu m’utuk mwu, kara wung’ey nia an a Yehova, abedwokowu leng’. 14 Wucikuru niworo Sabatu, kum etie gin ma leng’ iwu. Ng’atu ma tek bicide, jucikiri ninege. Tek ng’atu moko utimo tic i nindone, jucikiri nikabu* ng’atune* cen kud i kind juthugi. 15 Jucopo timo tic ceng’ abusiel, ento ceng’ mir abirone bibedo sabatu mi yom ma zoo. Etie gin ma leng’ ni Yehova. Ng’atu moko ci ma bitimo tic i ceng’ Sabatu, jucikiri ninege cen. 16 Juisrael gicikiri niworo Sabatu; gicikiri nikwiro Sabatu i kind dhanu m’utuk migi ceke. Etie lembariba ma nja. 17 Etie giranyutha ma nja i kindwa ku dhanu mir Israel, kum pi ceng’ abusiel Yehova ucwiyo polo ku ng’om, man i ceng’ mir abirone ejigo tic man eyom.’”

18 Kinde ma Mungu udaru weco ku Musa iwi got Sinai ci, emiyo bankidi ario mi Lembatuca i bang’e, bankidi ma Mungu ugoro piny i wiye ku lwete.

32 I saa ma rom eno, dhanu uneno nia Musa ubegalu niloro ku wi got. Pieno gicokiri i ng’et Arun man giwacu kumae: “Ai malu, yik iwa mungu ma bitelo yo i wang’wa, kum wang’eyo ngo gin m’uwok i kum Musa maeni, ma ng’atu m’uwodhowa kud i ng’om mi Misiri.” 2 Pieno Arun uyero igi kumae: “Wuwodh lengethu mi mola ma kwar m’i ith mon mwu, m’i ith wotwu, m’i ith nyigwu man wukelgi i bang’a.” 3 E dhanu ceke ucaku wodho lengethu mi mola ma kwar ma n’i ithgi man gikelogi i bang’ Arun. 4 Egamu mola ma kwarne kud i bang’gi, eyike ku jampayu piny ewodho ko ayi* nyathi dhiang’. E gicaku wacu kumae: “Mungu peri ni eni, E Israel, m’uwodhi kud i ng’om mi Misiri.”

5 Saa m’Arun uneno kumeno, egiero pemlam i wang’e. I ng’eye, Arun ukok kumae: “Urwo tie foc ni Yehova.” 6 Pieno, urwonde giai pir kugweno man gicaku thiero lam m’awang’a man nikelo lam mi kwiyocwiny. I ng’ey maeno dhanu ubedo piny pi nicamu man nimadhu. I ng’eye giai malu pi nimiel.

7 Yehova ugam uwacu ni Musa kumae: “Cidhi, lor piny, pilembe dhanu peri m’iwodho kud i ng’om mi Misiri gidaru badhiri. 8 Gilokiri pio kud i yo m’ang’olo igi nia giwoth i iye. Giyiko igi ayi* nyathi dhiang’ man gibewotho kulo korgi piny ire man gibethiero ire lam, ma gibewacu kumae: ‘Mungu peri ni eni, E Israel, m’uwodhi kud i ng’om mi Misiri.’” 9 Yehova uwacu bende ni Musa kumae: “Aneno nia dhanu maeni gitie dhanu ma juthwon.* 10 Dong’ kawoni weka, man abijigo wigi i ng’eicwiny para m’uopo, man wek aketh idok thek ma dit kakagi.”

11 E Musa upaku dhoge ni Yehova Mungu pare man ewacu kumae: “E Yehova, pirang’o kwinyo peri ubeopo i kum dhanu peri i ng’ey wodhogi kud i ng’om mi Misiri ku tego ma dit man ku cing’ ma teki? 12 Kum Jumisiri gibiwacu nia, ‘ebino ku paru ma rac kinde m’ewodhogi. Emito eneggi i kind gudi man ejig wigi kud iwi ng’omi? Dong’ lokiri kud i kwinyo peri m’uopo, man ilok paru peri* iwi yub m’imaku mi kelo lembe ma rac maeni iwi dhanu peri. 13 Poy pir Abraham, Isak, man Israel ma gi jutic peri, m’ikwong’o igi ku nyingi giri iwacu kumae: ‘Abiketho kodhi mwu binyay calu nyikaluku m’i kor polo, man abimiyo ng’om maeni ceke m’ang’olo pire ni nyikwaywu, kara gigame ni aba mi nja.’”

14 Pieno, Yehova uloko paru pare* pi lembe ma rac ma nwang’u eyero ebikelo iwi dhanu pare.

15 I ng’eye, Musa ulokere man eloro kud iwi got ku bankidi ario mi Lembatuca i cinge. Bankidine jugoro wigi i ng’ete ario zoo; jugoro wigi yor i wang’e ku yor i ng’eye. 16 Bankidine Mungu uyiko en gire, man gorne ubino gor pa Mungu m’eng’iko iwi bankidinegi. 17 Kinde ma Yocuwa ucaku winjo woy mi dhanu nikum kok migi, eyero ni Musa kumae: “Ba dwal mi lwiny ubewinjere i kagonjo.” 18 Ento Musa uyero kumae:

19 Kinde ma Musa uwok ceng’ini ku kagonjo, man eneno nyathi dhiang’ ku miel m’ubemielere, ng’eicwiny pare ugam uopo, e ebolo bankidi kud i cinge man eng’enyogi i the got. 20 Egam eting’o nyathi dhiang’ ma giyiko, ewang’e ku mac man erege edoko ni mogo; i ng’eye edhenyo mogone i pii man eketho Juisrael gimadhe. 21 Musa ugam upenjo Arun kumae: “Dhanu maeni gitimo iri ang’o m’uketho ikelo tho dubo ma dit kumeni i wigi?” 22 Arun udwoko kumae: “Ng’eicwiny kud umeki, rwoth para. Ing’eyo ma ber nia dhanu maeni wigi zoo n’i kum timo lembe ma rac. 23 E giyero ira kumae: ‘Yik iwa mungu ma bitelo yo i wang’wa, kum wang’eyo ngo gin m’uwok i kum Musa maeni, ma ng’atu m’uwodhowa kud i ng’om mi Misiri.’ 24 Agam ayero igi kumae: ‘Ng’atu moko ci ma tek utie ku mola ma kwar dong’ ewodhe emiye i bang’a.’ I ng’eye abole i mac, e ewodho nyathi dhiang’ maeni.”

25 Musa uneno nia dhanune giceriri ngo pilembe Arun ucerogi ngo, uketho gicidiri i wang’ judegi migi. 26 I ng’eye, Musa ucidh ucungo i dhu kagonjo man eyero kumae: “Ng’a ma n’i thenge pa Yehova? Ebin i bang’a!” E Julawi ceke gicokiri i ng’ete. 27 Egam eyero igi kumae: “Yehova Mungu mir Israel uwacu kumae: ‘Ng’atuman m’i kindwu ucikere niting’o palamularu pare man ekadh i kind kagonjo ceke kubang’ dhugola, eneg umin, jadhugola pare, man jawodhe ma ceng’ini.’” 28 Julawi gitimo lembe ma Musa uyero. E cing’ nica, junego jumaco ma romo elufu adek (3 000). 29 I ng’eye, Musa uyero kumae: “Wukoyuru ang’et* ni Yehova tin, kum ng’atuman m’i kindwu ucidho i kum wode ma dhe man i kum umin ma buu; tin ebimiyo iwu mugisa.”

30 Urwondene ci, Musa uyero ni dhanu kumae: “Wutimo dubo ma dit mandha, man kawoni abiidho i bang’ Yehova pi nineno ka nyo aromo umo wi dubo mwu.” 31 Pieno, Musa uloko i bang’ Yehova man ewacu kumae: “Dhanu maeni gitimo dubo ma dit andha ba! Giyiko igi mungu mi mola ma kwar! 32 Ento tek imito, wek dubo migi; tek ungo ke, timba dong’ wey nyinga cen kud i kithabu peri m’ikiewo.” 33 Ento Yehova uyero ni Musa kumae: “Ng’atu m’udubo ira re m’abiweyo nyinge kud i kithabu para. 34 Dong’ kawoni cidhi, tel wi dhanu nitundo i kabedo m’ayero pire iri. Nen! malaika para bitelo yo i weng’i, man i nindo m’abikelo iye pokolembe, abimiyo matira igi pi dubo migi.” 35 I ng’eye, Yehova ucaku goyo dhanu pilembe giyiko nyathi dhiang’, nyathi dhiang’ m’Arun ugam uyiko.

33 Yehova uyero bende ni Musa kumae: “Ai ku keni karacelo ku dhanu m’iwodho niai kud i ng’om mi Misiri. Wucidh i ng’om m’akwong’o pire ni Abraham, ni Isak, man ni Yakobo kumae: ‘Abimiye ni nyikweyi.’ 2 Abioro malaika utel yo i weng’i man abiriemo Jukanan, Juamor, Juhithi, Juperizi, Juhivi, man Juyebusi. 3 Wucidhi i ng’om ma molo cak ku miyokic. Ento an abicidho ngo i kindwu, kum wutie dhanu ma juthwon,* man acopo wok jigo wiwu i gengi.”

4 Kinde ma dhanune giwinjo rwonglembe ma rac maeno, e gicaku kumo, man ng’atu acel de mbe m’i kindgi m’uronyo jamruko pare. 5 Yehova ugam uyero ni Musa kumae: “Yer ni Juisrael nia, ‘wutie dhanu ma juthwon.* Aromo kadhu i kindwu wang’ acel ci ajigo wiwu. Dong’ kawoni kud wurony jamruko mwu kinde m’abeng’iyo nia atim ang’o i kumwu.’” 6 Pieno, niai kud i kum Got Horeb, Juisrael gironyo ngo dong’ jamruko migi.

7 Musa ugam uting’o hema pare man ecidh egure woko i ng’ey kagonjo, bor nyanok, man elwong’e hema mi rombo. Ng’atu moko ci m’ubemito penjo Yehova ubed ucidho i hema mi rombo ma ni woko ku kagonjo. 8 Tek Musa uwok pi nicidho i hema ci, dhanu ceke ubed uai man gicungo i dhu hema migi, e gineno tok Musa nitundo m’emondo i hema. 9 Saa ma ka Musa umondo i hemane ci, mbegi mir afuru ubed uloro man ecungo i dhu hemane kinde ma Mungu ubeweco ku Musa. 10 Saa ma ka dhanu ceke gineno mbegi mir afurune ucungo i dhu hema ci, e ng’atuman m’i kindgi ai malu man ekulo kore piny i dhu hema ma pare. 11 Yehova ubed uweco ku Musa wang’ ku wang’, tap calu ma ng’atini weco ko ku wadi. Kan edwogo i kagonjo, Yocuwa ma wod Nun, ma jatic man jakony pare ubed uai ungo kud i hema.

12 Musa ugam uyero ni Yehova kumae: “Nen, iyero ira nia, ‘tel wi dhanu maeni,’ ento iketho ang’eyo ngo ng’atu m’ibioro karacelo kuda. M’umedo maeno, iyero nia, ‘ang’eyi ku nyingi* man inwang’u bende bero i wang’a.’ 13 Dong’ akweyi, tek anwang’u bero i weng’i, keth ang’ey yo peri, kara ang’eyi man amedara ninwang’u bero i weng’i. Nen bende thek maeni nia utie dhanu peri.” 14 E Mungu uyero kumae: “An gira abicidho* karacelo kudi, man abimiyo iri yom.” 15 Musa ulund udwoko ire kumae: “Tekene in giri ibicidho ngo* karacelo kudwa, dong’ kud iketh waai ku keni. 16 Jubing’eyo nenedi nia anwang’u bero i weng’i, an ku dhanu peri? Nyo etie ngo nikum cidho m’ibicidho karacelo kudwa, re ma an ku dhanu peri wabikoc ku dhanu mange ceke m’i wang’ ng’omi?”

17 Yehova umedo kendo ni Musa kumae: “Abitimo bende gin maeni m’ikwayu, pilembe inwang’u bero i wang’a man ang’eyi ku nyingi.” 18 E Musa uyero kumae: “Akweyi, nyuth ira dwong’ peri.” 19 Ento eyero kumae: “Abiketho bero para ceke bikadhu i weng’i, man abitwong’o nying’ Yehova i weng’i; abitimo bero ni ng’atu m’abitimo ire bero, man kisa binega i kum ng’atu ma kisa binega i kume.” 20 Ento emedo kumae: “Icopo neno ngo wang’a, kum dhanu copo nena ngo man ebed asu kwo.”

21 Yehova uyero bende kumae: “Kaka moko n’i ng’eta e. Cung iwi cana. 22 Kinde ma dwong’ para ubekadhu, abikethi i odicana man abigeng’o beng’i ku cinga nitundo m’abikadhu ko. 23 I ng’ey maeno abiting’o cinga, e ibineno ng’eya. Ento wang’a jucopo neno ngo.”

34 I ng’eye, Yehova uwacu ni Musa kumae: “Pay iri bankidi ario calu ma kwong’a, man abikiewo iwi bankidine wec m’ubino iwi bankidi ma kwong’a m’ing’enyo. 2 Yikiri pir urwo kugweno, pilembe ibiidho malu kugweno iwi got Sinai man ibicungo i wang’a keca i die wi got. 3 Ento ng’atu moko kud uidh kudi, man kud junen ng’atu mange iwi gode zoo. Kadok rombe kadi dhieng’ de kud ucam i wang’ gode.”

4 E Musa upayu bankidi ario calu ma kwong’a, man eai pir kugweno eidho iwi got Sinai, tap calu ma Yehova ung’olo ire, man eting’o bankidi arione i cinge. 5 E Yehova uloro piny i afuru man ecungo karacelo kude keca, man etwong’o nying’ Yehova. 6 Yehova ukadhu i wang’e m’ebetwong’o kumae: “Yehova, Yehova, Mungu ma jakisa man ma jabero,* ma yoo ni ng’eicwiny man m’upong’ ku mer ma lokere ngo* man lemandha, 7 ma nyutho mer ma lokere ngo ni dhanu elufu, ma weko kosa, kier, man dubo, ento ebiweko ngo nyanok de ng’atu m’udubo m’umbe matira, ma kelo matira pi kosa mi wego iwi wot man iwi nyikwayu, iwi dhanu m’utuk mir adege man iwi dhanu m’utuk mir ang’wende.”

8 Musa ukulo kore pio pio i ng’om man epodho arieba wang’e. 9 I ng’eye, ewacu kumae: “Tek kawoni anwang’u bero i weng’i, E Yehova, dong’ akweyi Yehova, woth karacelo kudwa i kindwa kadok nwang’u watie dhanu ma juthwon* de, man iwek kosa ku dubo mwa, man ijolwa ni piny peri.” 10 Elund edwoko ire kumae: “Abetimo lembariba ma e: I wang’ dhanu peri ceke, abitimo gin ma wang’u ijo ma fodi utimere ngo nyanok de iwi ng’om zoo kadi i kind thek ceke, man dhanu ceke ma wubedo i kindgi gibineno tic pa Yehova, kum etie gin ma ng’oyo ndiri m’abetimo ni kumwu.

11 “Keth wii cuu i kum lembe m’abeng’olo iri tin. Nen, aberiemo kud i weng’i Juamor, Jukanan, Juhithi, Juperizi, Juhivi, man Juyebusi. 12 Bed ku weng’i kara kud itim lembariba ku dhanu ma bedo i ng’om m’ibecidho i iye, maru ebidoko ni uwic i kindwu. 13 Ento wucikuru nirwombo pemlam migi cen, nimugo mbegi migi mi thier, man nitong’o yen migi mi thier* cen. 14 Kud ikul kori piny ni mungu mange, kum ung’eyere nia Yehova* kwayu jutim ire kende.* Eyo, en e Mungu m’ekwayu jutim ire kende. 15 Bed ku weng’i kara kud itim lembariba ku dhanu m’i ng’ombe, pilembe kinde ma gibetimo asara ku mungu man gibethiero lam ni mungu migi, ng’atu moko bilwong’i man ibicamu kum lam pare. 16 E m’umbe jiji ibigamu nyiggi moko ni woti, man nyiggi bitimo asara ku mungu migi, e gibiketho woti de bitimo asara ku mungu migi.

17 Kud iyik mungu m’araga mi cuma m’atwaga.

18 “Ibitimo Foc mi mukathi ma thobi mbe i iye. Ibicamu mukathi ma thobi mbe i iye tap calu m’ang’olo iri; time pi nindo abiro i saa m’ukethere i dwi mir Abib,* pilembe i dwi mir Abib re m’iwok kud i Misiri.

19 “Kayu ceke ma co* gi para, uketho i iye udul lim peri ceke, nik’ebed kayu mi thwon dhiang’ kadi mir urombo. 20 Ibiwaru kayu mi kana kud urombo. Ento tek iware ngo, ukwayu itur ng’ute. Icikiri niwaru kayu ceke mi woti. Ng’atu moko mbe m’ucikere nibino i wang’a ma cinge nanu.

21 “Ibitimo tic pi nindo abusiel, ento i nindo mir abirone ibiyom.* Dok ebed i nindo mi furofur kadi mi kayucam, ibiyom.

22 Man ibitimo Foc peri mi yenga ku landu wi mwoka mi nganu m’ikayu, man Foc mi coko dhu cam* i thum pa oro.

23 “Wang’ adek kubang’ oro, jumaco peri ceke bibino i wang’ Yehova, Mungu mir Israel ma Rwoth mandha. 24 Kum abiriemo thek mange cen kud i weng’i, man abidwoko ng’om peri lac, man ng’atu moko mbe ma bibedo ku mito mi ng’om peri kinde m’ibeidho pi nicineno wang’ Yehova Mungu peri wang’ adek kubang’ oro.

25 “Kud ithier rimo mi lam para ku gin moko ci ma thobi n’i iye. Kud igwok lam mi foc mi Kadhukuwijo diewor traka nitundo kugweno.

26 “Ibitero landu wi mwoka ma beco mi ng’om peri i ot pa Yehova Mungu peri.

“Kud ited nyathi diel i cag min.”

27 Yehova umedere niyero ni Musa kumae: “Kiew lembe maeni, kum calku lembene, abetimo lembariba kudi man ku Israel.” 28 Ebedo kuca ku Yehova pi nindo pier ang’wen, dieceng’ ku diewor. Ecamu ngo piny moko man kadok pii de emadhu ngo. Man Mungu ugoro lembe mi lembariba iwi bankidi, niwacu Cik apar.*

29 Musa ugam uloro kud iwi got Sinai, man bankidi ario mi Lembatuca ubino i cinge. Kinde m’eloro kud iwi got, Musa ung’eyo ngo nia dend wang’e ubino rieny pilembe eai eweco ku Mungu. 30 Saa m’Arun ku Juisrael ceke gineno Musa, gineno nia dend wang’e uberieny, e gilworo nicoro ceng’ini i vute.

31 Ento Musa ulwong’ogi; e Arun ku judongo ma wijo ceke mi cokiri gibino i bang’e, man Musa uweco kugi. 32 I ng’ey maeno, Juisrael ceke gicoro ceng’ini i bang’e, man eyero igi lembe ceke ma Yehova ung’olo ire iwi got Sinai. 33 Saa ma ka Musa udaru niweco kugi, e eumo wang’e ku bongu. 34 Ento kinde ma Musa ubemondo i wang’ Yehova pi niweco kude, ebed eyabu bongune cen nitundo ewok woko. I ng’eye ewok woko man eyero ni Juisrael lembe ceke ma jung’olo. 35 Man Juisrael gibed gineno nia wang’ Musa uberieny; e Musa doumo wang’e kendo nitundo emondo pi niciweco ku Mungu.*

35 I ng’ey kare, Musa ucoko dhu cokiri mi Juisrael ceke karacelo man eyero igi kumae: “Maeni tie gin ma Yehova ung’olo nia jutim: 2 Jucopo timo tic pi ceng’ abusiel, ento ceng’ mir abirone bidoko gin ma leng’ iwu, sabatu mi yom ma zoo ni Yehova. Ng’atu moko ci ma bitimo tic i cenge, jubinege cen. 3 Kud wukudh mac i kabedo mwu moko ci i ceng’ Sabatu.”

4 I ng’eye, Musa uyero ni cokiri ceke mi Juisrael kumae: “Yehova ung’olo kumae: 5 ‘Wugam ajok ni Yehova kud i kindwu. Wek ng’atu moko ci m’adundene keco ukel ajok ni Yehova: mola ma kwar, mola ma tar, mola, 6 wuzi mi ble,* thol mi rangi m’uluga,* wuzi ma kwar ngbo, bongu ma nwang’* ma leng’, yuk diegi, 7 adila nyogi rombe ma jukworo ku rangi ma kwar, adila lei m’i nam,* yend utiep, 8 moj thala, balsam pi mo mi wirowir man pir udok ma ng’wice ng’ar, 9 kidi ma nyinge oniks,* man kidi mange ma jubimwono i kum efodh man i kum jamkor.

10 “Wek ju ceke ma gi jubodho* i kindwu gibin man giyik piny ceke ma Yehova ung’olo, 11 niwacu, hema mi thier ku jambe ceke, man jam umne, ratwicne ku kadhrumane, fithone,* mbegine, man kathere ma igi roko; 12 Sanduku ku ramakne ma boco boco, jam umo wiye, man ridho mi poko iye; 13 meza ku ramakne ma boco boco, ajenine ceke, man mukathi m’anyutha; 14 tiend thala pi der kud ajeninegi, man thalane ku mo pi der; 15 pemlam mir udok ma ng’wice ng’ar ku ramakne ma boco boco; mo mi wirowir man udok ma ng’wice ng’ar; ridho pi kamondo mi hema mi thier; 16 pemlam mi lam m’awang’a ku singane m’akada mi mola, ramakne ma boco boco man ajenine ceke, jamlogo ku tiende ma jubikethe i wiye; 17 ridho ma jubitieko ko lela ni gang’, mbegine man kathegi ma igi roko, ridho pi kamondo mi gang’ne; 18 gute* mi hema mi thier man gute mi gang’ne ku thondhgi; 19 kendi ma jucwiyo ku bodho pi nitimo i kabedo ma leng’, kendi ma leng’ p’Arun ma jalam, man kendi mi wote pi nitimo tic mi lam.’”

20 E cokiri mi Juisrael ceke gigam giai kud i wang’ Musa. 21 Kubang’ dhanu ceke m’adundegi ucwalugi man ma igi uyenyo gibino man gikelo ajok migi ni Yehova ma jubitiyo ko pi hema mi rombo, pi ticne ceke, man pi kendi ma leng’. 22 Jumaco ku jumamon uwotho bino; ng’atuman m’adundene ucwale ukelo jamruko mi kor, lengethu, lagith, man jamruko mange ku kwond piny ceke mi mola ma kwar. Gin ceke gimiyo girathiera* migi mi mola ma kwar ni Yehova. 23 Man dhanu ceke ma gibedo ku wuzi mi ble,* thol mi rangi m’uluga,* wuzi ma kwar ngbo, bongu ma nwang’ ma leng’, yuk diegi, adila nyogi rombe ma jukworo ku rangi ma kwar, man adila lei m’i nam* gikelogi. 24 Dhanu ceke ma gibino ayika nijoko mola ma tar man mola gikelo ajok pa Yehova, man dhanu ceke ma gibino ku yend utiep pi konyo theng ticne moko ci gikele.

25 Mon ceke ma gi jubodho giwiyo wuzi ku cing’gi man gikelo piny ma giwiyone: wuzi mi ble,* thol mi rangi m’uluga, wuzi ma kwar ngbo, man wuzi ma nwang’ ma leng’. 26 Man mon ceke ma gi jubodho m’adundegi ucwalugi giwiyo yuk diegi.

27 Man judongo ma wijo gikelo kidi ma nyinge oniks* man kidi mange ma jubimwono i kum efodh man i kum jamkor, 28 man balsam ku mo pi der, pi mo mi wirowir man pir udok ma ng’wice ng’ar. 29 Jumaco ku jumamon ceke m’adundegi ucwalugi gikelo piny pi tic ma Yehova ung’olo nikadhu kud i bang’ Musa nia jutim; Juisrael gikele ni girathiera ma ku berocwiny ni Yehova.

30 I ng’eye, Musa uyero ni Juisrael kumae: “Wunen, Yehova udaru ng’iyo Bezalel ma wod Uri ma wod Hur mi suru pa Yuda. 31 Edaru pong’e ku tipo pa Mungu, emiyo ire rieko, nyang’ i lembe, man ng’eyong’ec mi kwond bodho ceke 32 kara epang tic mi bodho, etii ku mola ma kwar, mola ma tar, man mola, 33 kara epay kum kidi man emwongi i jamgwok, man kara eyik kwond piny ceke mi bodho ma juyiko ku yen. 34 Man eketho copo mi ponjo jumange i adundene, man i adunde Oholiab ma wod Ahisamak mi suru pa Dan. 35 Epong’ogi ku rieko* mi timo tic ceke mi bodho, tic pa jaruk kum kendi, jacwii wuzi mi ble,* thol mi rangi m’uluga, wuzi ma kwar ngbo, man wuzi ma nwang’ ma leng’, man tic pa jacwii kendi. Dhanu maeno gibitimo kwond tic ceke man gibipangu kwond tic ceke mi bodho.

36 “Bezalel gibitimo karacelo gikud Oholiab man jubodho ceke* ma Yehova umiyo igi rieko man nyang’ i lembe, kara ging’ey nitimo piny ceke m’ukwayere pi tic ma leng’ tap calu ma Yehova ung’olo.”

2 I ng’eye, Musa ulwong’o Bezalel gikud Oholiab man jubodho ceke ma Yehova uketho rieko i adundegi, ng’atu moko ci m’adundene ucwale niwodhere pi timo tic. 3 E gigamu kud i bang’ Musa ajok ceke ma Juisrael ukelo pi niyiko piny m’ugwaku kum tic ma leng’. Ento Juisrael gimediri asu nikelo girathiera ma ku berocwiny kubang’ kugweno.

4 I ng’ey ma gicaku tic ma leng’, jutic ceke ma jubodho gikwong’o bino acel acel 5 man giwotho yero ni Musa kumae: “Dhanu ubekelo piny lee nisagu m’ukwayere pi tic ma Yehova ung’olo nia jutim.” 6 E Musa ung’olo nia jukadh i kind kagonjo man jutwong’ kumae: “Dong’ kudi ng’atu moko ukel piny mange pir ajok ma leng’, nik’ebed jumaco kadi jumamon.” Pieno, jucero dhanu ya kud gikel piny mange. 7 Piny ubino ma romo pi tic ceke m’ukwayu jutim, man ekadhu akadha ngi.

8 E jutic ceke ma jubodho giyiko hema mi thier ku bongu apar ma nwang’* ma leng’ mi wuzi m’awiya, ku wuzi mi ble,* ku thol mi rangi m’uluga, man ku wuzi ma kwar ngbo; man eketho* dheyo mir ayi jukerubi i kumgi. 9 Bor mi bonguman mi hemane ubino bot* pier ario wi abora man lac wang’e ubino bot ang’wen. Bongu mi hemane zoo gibino rom rom. 10 I ng’eye, elongo bongu abic mi hema karacelo, man elongo bongune mange abic karacelo. 11 Edog etudo thol mi ble* dupa dupa i dhu bongune acel mi hema kaka ma jubithube i iye ku ma kucelo. Etimo lembe ma rom eno i dhu bongu ma kucelo ma tokcen mi hema i kaka ma rom ma jubithubogi i iye. 12 Eyiko thol ma jutudo pier abic i dhu bongu mi hemane acel, man thol ma jutudo pier abic i dhu bongune ma kucelo kaka ma jubithubogi i iye, kara tholneman ma jutudo ubed ku jadhoge. 13 Tokcenne, eyiko ratwic pier abic mi mola ma kwar, man ethubo bongu mi hema karacelo ku ratwicnegi, uketho hema mi thier udoko ni gin acel.

14 I ng’eye, eyiko bongu mi yuk diegi ni hema ma juumo iwi hema mi thier. Eyiko bongune apar acel. 15 Bor mi bonguman mi hemane ubino bot pier adek man lac wang’e bot ang’wen. Bongu apar acel mi hemane zoo ubino rom rom. 16 I ng’eye, elongo bongu abic mi hemane karacelo, man elongo bongune abusiel mange karacelo. 17 Edog eyiko thol pier abic ma jutudo man erieyogi i dhu bongu ma tokcen mi hema kaka ma jubithubogi i iye, man erieyo thol mange pier abic ma jutudo i dhu bongune ma kucelo ma juthube kude. 18 Eyiko bende ratwic pier abic mi mola pi niribo hemane karacelo kara edok ni gin acel.

19 Eyiko jam umo hemane kud adila rombe ma jukworo ku rangi ma kwar man jam um mir adila lei m’i nam* ma jubiumo iwi maeno.

20 I ng’eye, eyiko kadhruma mi hema mi thierne ku yend utiep, man eketho gicungo atira. 21 Dongo pa kadhrumaneman ubino bot apar man lac wang’e ke bot acel ku nusu. 22 Kadhrumaneman ubino ku karib ario ma judiko karacelo. Eyiko kadhruma ceke mi hema mi thier i ayi maeno. 23 Pieno eyiko kadhruma pi theng hema mi thierne ma yo piny, kadhruma pier ario i thenge m’uloko yo piny. 24 I ng’eye, eyiko kathere pier ang’wen ma igi roko mi mola ma tar ma bibedo i the kadhruma pier ario: kathere ario ma igi roko i the kadhruma acel pi karibne ario, man kathere ario ma igi roko i the kadhrumaman m’ulubo pi karibne ario. 25 Pi thenge ma kucelo mi hema mi thierne, niwacu thenge ma yo malu, eyiko kadhruma pier ario 26 man kathere ma igi roko pier ang’wen mi mola ma tar pigi: kathere ario ma igi roko i the kadhruma acel, man kathere ario ma igi roko i the kadhrumaman mange zoo.

27 Pi ng’ey hema mi thierne yo reto, eyiko kadhruma abusiel. 28 Eyiko kadhruma ario ni ngucu m’i gul mi hema mi thier i gunde ario ma yor i ng’eye. 29 Ngucune gibino ario ario niai i there nitundo i wiye, nitundo i kum gwang’ ma kwong’a. Eyiko ngucu m’i gunde ario zoo kumeno. 30 Pieno wend kadhrumane zoo ubino abora karacelo ku kathegi apar abusiel ma igi roko mi mola ma tar: kathere ario ma igi roko i the kadhrumaman.

31 I ng’eye eyiko fitho* mi yend utiep: fitho abic pi kadhruma m’i ng’ete acel mi hema mi thierne, 32 fitho abic pi kadhruma m’i ng’ete ma kucelo mi hema mi thier, man fitho abic pi kadhruma m’i ng’ey hema mi thier, niwacu yo reto. 33 Eyiko bende fitho m’i diere m’ukadhu kud i kor kadhruma niai i thenge acel nitundo i thenge ma kucelo. 34 Eumo kum kadhrumanegi ku mola ma kwar, man eyiko wendenegi ku mola ma kwar pi nimaku fithonegi, man eumo kum fithonegi de ku mola ma kwar.

35 I ng’eye, eyiko ridho ku wuzi mi ble,* ku thol mi rangi m’uluga, ku wuzi ma kwar ngbo, man ku bongu ma nwang’ ma leng’ mi wuzi m’awiya. Eketho dheyo mir ayi jukerubi i kume. 36 Edog eyiko mbegi ang’wen mi yend utiep pire man eumo kumgi ku mola ma kwar; eyiko bende gol mi mola ma kwar, man ethiedho kathere ang’wen ma igi roko mi mola ma tar pigi. 37 I ng’ey maeno eyiko ridho pi kamondo mi hemane ku wuzi mi ble,* ku thol mi rangi m’uluga, ku wuzi ma kwar ngbo, man ku bongu ma nwang’ ma leng’ mi wuzi m’awiya ma jucwiyogi karacelo, 38 man bende mbegi migi abic ku gol migi. Eumo wigi man jamtwic migi ku mola ma kwar, ento kathegi abic ma igi roko ubino mi mola.

37 I ng’eye, Bezalel uyiko Sanduku mi yend utiep. Borne ubino bot* ario ku nusu, lac wang’e bot acel ku nusu, man dongone de bot acel ku nusu. 2 Eumo kume ku mola ma kwar m’alili yor i iye ku yo woko bende, man eyiko jamruko mi mola ma kwar i dhoge tingili. 3 I ng’ey maeno ethiedho wende ang’wen mi mola ma kwar pi Sandukune, man ekethogi yor iwi tiende ang’wen, wende ario i thenge acel man wende ario mange i thenge ma kucelo. 4 I ng’eye, eyiko ramak ma boco boco mi yend utiep man eumo kumgi ku mola ma kwar. 5 E eroyo ramaknegi i wend Sanduku i ng’ete ng’ete pi niyeyo Sandukune.

6 Eyiko jam umo wiye mi mola ma kwar m’alili. Borne ubino bot ario ku nusu man lac wang’e ke bot acel ku nusu. 7 I ng’eye, eyiko jukerubi ario ku mola ma kwar ku jamtic mi fwodo cuma, man ekethogi iwi jam umo wiye i dhoge kun ku kun. 8 Jakerubi acel ubino yor i dhoge acel man jakerubi mucelo yor i dhoge ma kucelo. Eyiko jukerubinegi iwi jam umo wiye i dhoge kun ku kun. 9 Jukerubi arione girieyo vombgi yo malu, man tipo vombgi uumo wi jam umo wi sanduku. Jakerubiman ulokere i bang’ wadi, man wang’gi ubino neno wi jam umo wi sanduku.

10 I ng’eye, eyiko meza mi yend utiep. Borne ubino bot ario, lac wang’e bot acel, man dongone ke bot acel ku nusu. 11 Eumo kume ku mola ma kwar m’alili man eyiko jamruko mi mola ma kwar i dhoge tingili. 12 I ng’eye, eyiko jamgwok ma lac wang’e rom ku wang’ cing’ acel* utieko ng’ete tingili man bende jamruko mi mola ma kwar i kum jamgwokne tingili. 13 M’umedo maeno, ethiedho wende ang’wen mi mola ma kwar pire man eketho wendenegi i gunde ang’wen kaka ma judiko iye tiend meza ang’wenne ku wiye. 14 Wendene ubedo ceng’ini ku jamgwok pi nimaku ramak ma boco boco ma juyeyo ko mezane. 15 I ng’eye, eyiko ramak ma boco boco mi yend utiep man eumo kumgi ku mola ma kwar pi niyeyo meza. 16 I ng’ey maeno, eyiko ajeni m’i wi mezane ku mola ma kwar m’alili: sanine, kikombene,* tabune, man kibinikane ma jubibekonjo ko girathiera mi pigulok.

17 Man eyiko tiend thala ku mola ma kwar m’alili. Eyiko tiend thalane ku jamtic mi fwodo cuma. The tiende, tiende m’i diere, kikombene, lwende m’ukudo ku thiwene zoo ubino gin acel. 18 Jange abusiel ukaru kud i kum tiende, jang tiend thalane adek i thenge acel man jange adek mange i thenge ma kucelo. 19 I kum jangeman jurubo kikombe adek mir ayi pa thiw yend amand, ku lwende m’ukudo m’uwotho lubere ku thiwe; man i kum jange ma kucelo de jurubo kikombe adek mir ayi pa thiw yend amand, ku lwende m’ukudo m’uwotho lubere ku thiwe. Jutimo kumeno pi jange abusiel m’ukaru kud i kum tiend thalane m’i diere. 20 Man i kum tiend thalane m’i diere, jurubo kikombe ang’wen mir ayi pa thiw yend amand, ku lwende m’ukudo m’uwotho lubere ku thiwenegi. 21 Lwende acel m’ukudo ubino i the jange ario ma kwong’a m’ukaru kud i kum tiende m’i diere, lwende acel m’ukudo ubino i the jange ario m’ulubo, man lwende mange acel ubino i the jange ario ma tokcen. I ayi maeno re ma jange abusiel ukaru ko kud i kum tiend thalane m’i diere. 22 Juyiko tiend thalane zoo, lwende m’ukudo man jange, ku mola ma kwar m’alili, man ebino ni gin acel ma juyiko ku jamtic mi fwodo cuma. 23 I ng’eye, eyiko thalane abiro ku rang’wenynegi man tabu mi macnegi ku mola ma kwar m’alili. 24 Eyiko tiend thalane karacelo kud ajeninegi ceke ku talanto* acel mi mola ma kwar m’alili.

25 Egam eyiko pemlam mir udok ma ng’wice ng’ar ku yend utiep. Ng’ete ang’wen zoo ubino rom rom: bor pare bot acel, lac wang’e bot acel, man dongone bot ario. Ku tunge zoo ebino gin acel. 26 Eumo kume ku mola ma kwar m’alili: die wiye, ng’ete tingili, man tunge; man eyiko jamruko mi mola ma kwar i dhoge tingili. 27 Eyiko wende ario mi mola ma kwar pire i the jamruko m’i dhoge i thenge ario kun ku kun, pi nimaku ramak ma boco boco ma jubed jutiyo ko pi niyeyo pemlamne. 28 I ng’ey maeno, eyiko ramak ma boco boco mi yend utiep man eumo kumgi ku mola ma kwar. 29 Eyiko bende mo ma leng’ mi wirowir, man udok ma ng’wice ng’ar ma leng’ ma jujebo ku bodho.*

38 Eyiko pemlam mi lam m’awang’a ku yend utiep. Ng’ete ang’wen zoo ubedo rom rom: borne bot* abic, lac wang’e bot abic, man dongo pare ke bot adek. 2 Egam eyiko tunge iwi gunde ang’wen. Ku tunge zoo ebino gin acel. I ng’eye eumo kume ku mola. 3 Edog eyiko bende ajeni ceke mi pemlamne: ndoy, lupau, tabu, kanya, man tabu mi mac. Eyiko ajenine ceke ku mola. 4 Eyiko bende singa m’akada pi pemlamne, voi mi mola, man ekethe yor i the jamgwok ma n’i dhoge ku yor i diere. 5 Ethiedho wende ang’wen i gunde ang’wen ceng’ini ku singa m’akada mi mola pi nimaku ramak ma boco boco. 6 I ng’ey maeno, eyiko ramak ma boco boco mi yend utiep man eumo kumgi zoo ku mola. 7 Eroyo ramaknegi i wende ma n’i ng’et pemlamne pi niyeye. Eyiko pemlamne ubedo ve sondu mi bau ma iye thwolo.

8 I ng’eye, eyiko jamlogo mi mola man tiende ma jubikethe i wiye de mi mola; etiyo ku kieu* mi jumamon ma jupangu ubed utimo i dhu kamondo mi hema mi rombo.

9 I ng’eye, eyiko lela. Pi ng’et lelane ma piny m’uneno yo piny, eyiko ridho mi bongu ma nwang’ ma leng’ mi wuzi m’awiya, ma borne bot dak acel. 10 Ebino ku mbegi pier ario, man ku kathere pier ario ma igi roko mi mola, man gol mi mbegine ku jamtwic migi ubino mi mola ma tar. 11 Thenge ma yo malu bende ubino ku ridho ma jutwiyo ma borne bot dak acel. Mbegi migi pier ario man kathegi pier ario ma igi roko ubino mi mola. Gol mi mbegine ku jamtwic migi ubino mi mola ma tar. 12 Ento thenge ma yo reto ubino ku ridho ma jutwiyo ma borne bot pier abic. Ebino ku mbegi apar man kathere apar ma igi roko, man gol mi mbegine ku jamtwic migi ubino mi mola ma tar. 13 Lac wang’ thenge ma yo nyangu, yo ka ma ceng’ wok i iye ubino bot pier abic. 14 Jutwiyo ridho ma borne bot apar abic i thenge acel, ku mbegi adek man kathere adek ma igi roko. 15 Man pi thenge ma kucelo mi kamondo mi lelane jutwiyo bende ridho ma borne bot apar abic, ku mbegi adek man kathere adek ma igi roko. 16 Ridho ceke ma jutwiyo m’udhoko lela tingili ni gang’ ubino mi bongu ma nwang’ ma leng’ mi wuzi m’awiya. 17 Kathere ma igi roko mi mbegine ubino mi mola, gol mi mbegine ku jamtwic migi ubino mi mola ma tar, juumo wigi ku mola ma tar, man mbegi ceke mi gang’ne ubino ku jamtwic mi mola ma tar.

18 Jucwiyo ridho m’i dhu kamondo mi lelane ku wuzi mi ble,* ku thol mi rangi m’uluga, ku wuzi ma kwar ngbo, man ku bongu ma nwang’ ma leng’ ma jucwiyo ku wuzi m’awiya. Ebino bor bot pier ario man dongo pare bot abic; dongone ubino rom ku pa ridho ma jutwiyo i lela ni gang’. 19 Juyiko mbegi migi ang’wen ku kathegi ang’wen ma igi roko ku mola. Gol migi ku jamtwic migi ubino mi mola ma tar man juumo wigi ku mola ma tar. 20 Gute* ceke mi hema mi thier man m’udhoko lela ubino mi mola.

21 Maeni en e wel piny mi hema mi thier, hema mi Lembatuca, ma Musa uketho jukwanu, en e tic mi Julawi i the telowic pa Ithamar ma wod Arun ma jalam. 22 Bezalel ma wod Uri ma wod Hur mi suru pa Yuda utimo lembe ceke ma Yehova ung’olo ni Musa. 23 Gibino karacelo gikud Oholiab ma wod Ahisamak mi suru pa Dan; ebino fundi, jabodho ma ruko kum kendi man jacwii wuzi mi ble,* thol mi rangi m’uluga, wuzi ma kwar ngbo, man bongu ma nwang’ ma leng’.

24 Mola ma kwar ceke ma jutiyo ko pi tic ceke mi kabedo ma leng’ ubino kadhiri mi mola ma kwar ma jukelo ni girathiera m’aleka: talanto* pier ario wi abung’wen man cekel* dak abiro ku pier adek nimakere ku cekel mi kabedo ma leng’.* 25 Man mola ma tar mi ju ma jukiewo nying’gi kud i kind dhanu m’i cokiri ubino talanto dak acel, man cekel elufu acel dak abiro ku pier abiro wi abic (1 775) nimakere ku cekel mi kabedo ma leng’.* 26 Nusu cekel ma kubang’ ng’atuman ubino nusu cekel nimakere ku cekel mi kabedo ma leng’,* wend dhanu ceke ma jukiewo nying’gi niai i oro pier ario niidho malu ubino elufu dak abusiel kud adek ku dak abic pier abic (603 550).

27 Kathere ma igi roko ma juthiedho pi kabedo ma leng’ man kathere ma igi roko ma pi ridho ucamu talanto dak acel; kathere ma igi roko dak acel ucamu talanto dak acel, talanto acel pi kathere acel ma iye roko. 28 Etiyo ku cekel elufu acel ku dak abiro pier abiro wi abic (1 775) pi niyiko gol mi mbegi, pi niumo wigi man nidikogi karacelo.

29 Mola ma jukelo ni girathiera* ubino talanto pier abiro man cekel elufu ario ku dak ang’wen (2 400). 30 Ku molane eyiko kathere ma igi roko mi kamondo mi hema mi rombo, pemlam mi mola ku singane m’akada mi mola, man ajeni ceke mi pemlam, 31 kathere ma igi roko m’udhoko lela, kathere ma igi roko mi kamondo mi lelane, man gute ceke mi hema mi thier ku gute ceke m’udhoko lelane.

39 Gicwiyo kendi ku wuzi mi ble,* ku thol mi rangi m’uluga, man ku wuzi ma kwar ngbo ku bodho pi tic mi kabedo ma leng’. Giyiko kendi ma leng’ p’Arun, tap calu ma Yehova ung’olo ni Musa.

2 Eyiko efodh* ku mola ma kwar, ku wuzi mi ble,* ku thol mi rangi m’uluga, ku wuzi ma kwar ngbo, man ku bongu ma nwang’* ma leng’ mi wuzi m’awiya. 3 Gifwodo ban mi mola ma kwar nitundo ma dhoge doko nyareberebe mandha, man elire ni thol pi nitiyo kude ku wuzi mi ble,* ku thol mi rangi m’uluga, ku wuzi ma kwar ngbo, man ku bongu ma nwang’ ma leng’, man juketho dheyo i kume. 4 Giyiko dund bongu mi goke man gidike i kum efodhne,* e githubo thenge m’i wang’e ku m’i ng’eye. 5 Man thondh pier* m’acwiya ma jutwiyo i kum efodh* pi nimake ebed kakare de juyiko ku piny ma rom: mola ma kwar, wuzi mi ble,* thol mi rangi m’uluga, wuzi ma kwar ngbo, man bongu ma nwang’ ma leng’ mi wuzi m’awiya, tap calu ma Yehova ung’olo ni Musa.

6 I ng’eye, gimwono kidi ma nyinge oniks* i jamgwok mi mola ma kwar, man ging’iko nying’ wot Israel i kum kidinegi calu ma jung’iko ko kum jamketho ayi.* 7 Ekethogi iwi gok efodh* ni kidi mi poy pi wot Israel, tap calu ma Yehova ung’olo ni Musa. 8 I ng’eye, eyiko jamkor ku bodho pa jaruk kum kendi; eruke calu efodh* ku mola ma kwar, ku wuzi mi ble,* ku thol mi rangi m’uluga, ku wuzi ma kwar ngbo, man ku bongu ma nwang’ ma leng’ mi wuzi m’awiya. 9 Ng’ete ang’wen zoo ubino rom rom kinde ma jubane ni ario. Giyiko jamkorne i ayi ma ka jubane ni ario, bor pare ku lac wang’e zoo ubedo rom ku lac cing’ acel.* 10 Giketho kidi leni ang’wen i kume. Leni mi kwong’o ubino ku kidi ma nying’gi rubi, thopaz, man emerod.* 11 Leni mir arionde ubino ku kidi ma nying’gi thurkwaz, safir, man yaspi.* 12 Leni mir adege ubino ku kidi ma nying’gi lecem, agath, man amethiste.* 13 Man leni mir ang’wende ubino ku kidi ma nying’gi krizolith, oniks, man jad.* Jumwonogi i jamgwok mi mola ma kwar. 14 Kidine ubedo calku nying’ wot Israel apar ario, man jung’iko nying’gine calu ma jung’iko ko kum jamketho ayi, nying’man ucungo kaka suru acel m’i kind suru apar ario.

15 I ng’eye, giyiko nyoro mi mola ma kwar m’alili ma jukiedo calu thol pi jamkor. 16 Man giyiko jamgwok ario mi mola ma kwar ku lagith ario mi mola ma kwar, man gimwono lagith arione i kum jamkor i gunde ario. 17 I ng’ey maeno, giroyo thol ario mi mola ma kwar i lagith arione i gund jamkor. 18 E giroyo dhu thol arione i jamgwok ario man gitwiyogi iwi dund bongu mi gok efodh* yor i wang’e. 19 Gidog giyiko lagith ario mi mola ma kwar man gikethogi i gund jamkorne ario yor i iye i thenge m’uloko i bang’ efodh.* 20 I ng’eye, giyiko lagith ario mange mi mola ma kwar man gikethogi yor i wang’ efodh,* yor i the dund bongu ario mi goke yo piny, man yor iwi kaka ma thondh pier m’acwiya urombo kud efodh i iye. 21 Tokcenne, gitwiyo jamkor ku thol mi ble* niai i kum lagithne nitundo i kum lagith mir efodh,* kara emak jamkor ubed kakare iwi efodh, yor iwi thondh pier m’acwiya, tap calu ma Yehova ung’olo ni Musa.

22 I ng’eye, eyiko koti ma bote mbe mir efodh* ma jacwii kendi ucwiyo, ma en zoo e mi wuzi mi ble.* 23 Ng’ut koti ma bote mbene ubino i diere, calu ng’ut koti mi cuma. Jucwiyo dhu ng’utene tingili kara kud eyeci. 24 I ng’eye, giyiko ayi nying ulemo ku wuzi mi ble,* ku thol mi rangi m’uluga, man ku wuzi ma kwar ngbo ma juwiyo karacelo i dhu tiend koti ma bote mbene. 25 Giyiko ngara mi mola ma kwar m’alili man giwotho kethogi i kind ayi nying ulemo i dhu tiend koti ma bote mbene tingili, i kind ayi nying ulemo; 26 giketho ngara uwotho lubere aluba kud ayi nying ulemo, ngara acel man ayi nying ulemo de acel i dhu tiend koti ma bote mbene tingili ma jubed jutiyo ko pi tic, tap calu ma Yehova ung’olo ni Musa.

27 Man giyiko kanzu mi bongu ma nwang’ ma leng’, ma jacwii kendi ucwiyo ni Arun man ni wote, 28 man jamboyo wic ma segi mi bongu ma nwang’ ma leng’, jamboyo wic ma juruko mi bongu ma nwang’ ma leng’, pali* mi bongu ma nwang’ ma leng’ mi wuzi m’awiya, 29 man thondh pier mi bongu ma nwang’ ma leng’ mi wuzi m’awiya, mi wuzi mi ble,* thol mi rangi m’uluga, man ku wuzi ma kwar ngbo ma jucwiyo karacelo, tap calu ma Yehova ung’olo ni Musa.

30 Tokcenne, giyiko ban m’uriang’ini, ma en e giranyutha mi thieriri ma leng’* ku mola ma kwar m’alili, man ging’iko gor i kume calu ma jung’iko ko kum jamketho ayi kumae: “Leng’o en e pa Yehova.” 31 Gitwiye ku thol mi wuzi mi ble* pi nikethe i kum jamboyo wic ma segi, tap calu ma Yehova ung’olo ni Musa.

32 Pieno tic ceke mi hema mi thier, ma en e hema mi rombo ugam uthum, man Juisrael gitimo lembe ceke ma Yehova ung’olo ni Musa. Gitimo tap kumeca.

33 I ng’eye, gikelo hema mi thier i bang’ Musa, hemane ku jambe ceke: ratwicne, kadhrumane, fithone,* man mbegine ku kathegi ma igi roko; 34 jam umo hemane mir adila rombe ma jukworo ku rangi ma kwar, jam umne mir adila lei m’i nam,* ridho mi poko iye; 35 sanduku mi Lembatuca ku ramakne ma boco boco man jam umo wiye; 36 meza kud ajenine ceke, man mukathi m’anyutha; 37 tiend thala mi mola ma kwar m’alili, thalane ma jurieyo i leni, man ajenine ceke ku mo pi der; 38 pemlam mi mola ma kwar, mo mi wirowir, udok ma ng’wice ng’ar, ridho mi kamondo mi hema; 39 pemlam mi mola man singane m’akada mi mola, ramakne ma boco boco, ajenine ceke, jamlogo man tiende ma jukethe i wiye; 40 ridho ma jubitwiyo i lela ni gang’, mbegine man kathere ma igi roko, ridho mi kamondo mi lelane, thol mi hemane ku gutenegi,* man ajeni ceke ma pi tic mi hema mi thier, pi hema mi rombo; 41 kendi ma jucwiyo ku bodho pi nitimo tic i kabedo ma leng’, kendi ma leng’ p’Arun ma jalam, man kendi mi wote pi nitimo tic mi lam.

42 Juisrael gitimo tije ceke calku lembe ceke ma Yehova ung’olo ni Musa. 43 Kinde ma Musa uneno cuu mandha tic migi ceke, enwang’u nia gitime tap calu ma Yehova ung’olo; e Musa umiyo mugisa igi.

40 I ng’eye, Yehova uyero ni Musa kumae: 2 “I nindo ma kwong’a mi dwi ma kwong’a, ibiguro hema mi thier, ma en e hema mi rombo. 3 Keth sanduku mi Lembatuca i iye, man cik bang’ Sandukune ku ridho. 4 Roy meza man ipang piny m’ukwayu ubed i wiye, roy tiend thala man icwiny thalane. 5 I ng’eye, keth pemlam mi mola ma kwar pir udok ma ng’wice ng’ar i wang’ sanduku mi Lembatuca, man twii ridho mi kamondo mi hema mi thier kakare.

6 “Ibiketho pemlam mi lam m’awang’a i wang’ kamondo mi hema mi thier, ma en e hema mi rombo, 7 man ibiketho jamlogo i kind hema mi rombo ku pemlamne, man ibikonjo pii i iye. 8 I ng’eye, gur gang’ utiek lelane tingili, man itwii ridho i dhu kamondo mi lelane. 9 Dog igam mo mi wirowir man iwir hema mi thierne ku piny ceke ma n’i iye, man idwoke leng’ ku jambe ceke, kara edok ni piny ma leng’. 10 Wir pemlam mi lam m’awang’a kud ajenine ceke man dwok pemlamne leng’, kara edok ni pemlam ma leng’ m’usagu. 11 Man wir jamlogo ku tiende ma jukethe i wiye man idwoke leng’.

12 “I ng’eye, kel Arun ku wote ceng’ini i dhu kamondo mi hema mi rombo, man ijomgi ku pii. 13 Man irony Arun ku kendi ma leng’, iwire man idwoke leng’, e ebibedo ira jalam. 14 I ng’ey maeno, kel wote bende ceng’ini man ironygi ku kanzu. 15 Wirgi tap calu m’iwiro ko weggi, kara gibed ira ni julam, man wirowir migi biketho gibitimo tic mi lamulam nja i kind dhanu m’utuk migi ceke.”

16 Musa utimo calku lembe ceke ma Yehova ung’olo ire. Etimo tap kumeca.

17 I dwi ma kwong’a, i oro mir arionde, i nindo ma kwong’a mi dwije, hema mi thier ugam ucungo. 18 Kinde ma Musa ubeguro hema mi thier, eketho kathere ma igi roko piny, ecomo kadhruma, eroyo fithonegi,* man ecomo mbegine. 19 Eyaru bongu mi hema iwi hema mi thierne, man epedho jam um mi hemane i wiye, tap calu ma Yehova ung’olo ni Musa.

20 I ng’ey maeno, eting’o Lembatuca man ekethe i Sanduku, eroyo ramak ma boco boco i kum Sandukune man eumo wi Sandukune ku jam umo wiye. 21 Eroyo Sanduku i hema mi thier man etwiyo ridho mi poko iye kakare, e eciko bang’ sanduku mi Lembatuca, tap calu ma Yehova ung’olo ni Musa.

22 I ng’eye, eketho meza i hema mi rombo i thenge ma yo malu mi hema mi thier i wang’ ridhone, 23 man epangu mukathi i leni iwi mezane i wang’ Yehova, tap calu ma Yehova ung’olo ni Musa.

24 Eketho tiend thala i hema mi rombo i wang’ meza, i thenge ma yo piny mi hema mi thier. 25 Ecwinyo thala i wang’ Yehova, tap calu ma Yehova ung’olo ni Musa.

26 I ng’eye, eketho pemlam mi mola ma kwar i hema mi rombo i wang’ ridho, 27 pi nidunyo udok ma ng’wice ng’ar i wiye, tap calu ma Yehova ung’olo ni Musa.

28 I ng’eye, eketho ridho mi kamondo mi hema mi thier kakare.

29 Eketho pemlam mi lam m’awang’a yor i dhu kamondo mi hema mi thier, ma en e hema mi rombo pi nithiero lam m’awang’a man nithiero girathiera mi nying cam i wiye, tap calu ma Yehova ung’olo ni Musa.

30 I ng’eye, eketho jamlogo i kind hema mi rombo ku pemlam man ekonjo pii i iye pi logo. 31 Musa man Arun ku wote gilwoko cing’gi ku tiendgi keca. 32 Kubang’ kare ma gibemondo i hema mi rombo kunoke gibecoro i bang’ pemlam, gibed gilogo, tap calu ma Yehova ung’olo ni Musa.

33 Tokcenne eguro gang’ utieko lela mi hema mi thier ku pemlam tingili, man etwiyo ridho i dhu kamondo mi lelane.

E Musa ugam udaru tic. 34 Afuru ucaku umo hema mi rombo, man dwong’ pa Yehova upong’o hema mi thier. 35 Ecopere ngo ni Musa nimondo i hema mi rombo pilembe afuru ubedo i wiye, man dwong’ pa Yehova upong’o hema mi thierne.

36 Kaka ceke ma Juisrael gibed gigonjo i iye i woth migi, kan afuru uai kud iwi hema mi thier ci, giting’o kagonjo migi. 37 Ento tekene afuru uai ungo, e giting’o ngo kagonjo nitundo i nindo m’afurune biai. 38 Kum afuru pa Yehova ubed ubedo iwi hema mi thier ku dieceng’ man mac ubed ubedo i wiye ku diewor i wang’ juruot mir Israel zoo, kaka ceke ma gibed gigonjo i iye i woth migi.