LEMBE MI JULAWI

1 Man Yehova ulwong’o Musa man eweco i bang’e niai kud i hema mi rombo, ewacu kumae: 2 “Wec ku Juisrael* man iwac igi kumae: ‘Tek ng’atu moko m’i kindwu ubemito ekel girathiera ni Yehova kud i kind udul lim, ecikere nikelo girathierane kud i kind dhieng’, rombe kadi ke diegi.

3 “‘Tek girathiera parene utie lam m’awang’a m’egamu kud i kind dhieng’, ecikere nibedo thwon dhiang’ ma mulima mbe i kume. Ebikele ku berocwinye i wang’ Yehova i dhu kamondo mi hema mi rombo. 4 Ecikere niketho cinge iwi lam m’awang’ane, man jubijole ire pi nitimo adunya pire.

5 “‘I ng’eye, jucikiri nithumo nyathi thwon dhiang’ne i wang’ Yehova, man wot Arun ma gi julam gibikelo rimbe man gibikire i theng pemlam ceke ma n’i dhu kamondo mi hema mi rombo. 6 Jucikiri niyang’u lam m’awang’ane man nithumo iye unding’ unding’. 7 Wot Arun ma gi julam gibikudho mac iwi pemlam man gibipangu yen iwi maje. 8 Wot Arun ma gi julam gibipangu unding’ girathieranegi ku wiye man miyo m’i kum rong’ini iwi yen ma n’i wi mac ma n’i wi pemlam. 9 Cindi iye ku tiende jubilwoko ku pii, man jalam biwang’u pinje zoo biduny iwi pemlam ni lam m’awang’a. Ebibedo girathiera ma juwang’u ku mac ni piny ma ng’wice ng’ar* ni Yehova.

10 “‘Tek girathiera pare ma pi lam m’awang’ane uai kud i kind nyithi rombe kunoke nyithi diegi, ecikere nikelo ma thwoni ma mulima mbe i kume. 11 Jubithume i thenge ma yo malu mi pemlam i wang’ Yehova, man wot Arun ma gi julam gibikiro rimbe i theng pemlamne ceke. 12 Ebithumo iye unding’ unding’, man jalam bipangugi karacelo ku wiye man miyo m’i kum rong’ini iwi yen ma n’i wi mac iwi pemlam. 13 Ebilwoko cindi iye ku tiende ku pii, man jalam bithiero gin ceke man ebiketho gibiduny iwi pemlam. Etie lam m’awang’a, girathiera ma juwang’u ku mac ni piny ma ng’wice ng’ar* ni Yehova.

14 “‘Ento tek ebethiero winyo ni lam m’awang’a ni Yehova, ebikelo girathiera parene kud i kind akuru mi lum kunoke kud i kind nyithindh akuru mi pacu. 15 Jalam bikele i bang’ pemlam, ebithumo wiye man ebiwang’e kara eduny iwi pemlamne, ento rimbe ucikere nicwir i ng’et pemlam. 16 Ecikere niwodho usukurune, nidoyo yuke man nibayugi i ng’et pemlam yo nyangu kaka ma jucoko iye dhu vuru.* 17 Ebikake kud i vombe m’umbe nipoko iye ni ario. I ng’eye, jalam biwang’e kara eduny iwi pemlam iwi yen ma n’i wi mac. Etie lam m’awang’a, girathiera ma juwang’u ku mac ni piny ma ng’wice ng’ar* ni Yehova.

2 “‘Ento tek ng’atu* moko ubekelo girathiera mi nying cam ni Yehova, girathiera parene ucikere nibedo mogo ma yom; ecikere nikonjo mo i wiye, man ecikere niketho udok sengi i wiye. 2 I ng’eye, ebitere i bang’ wot Arun ma gi julam, man jalam bijobo mogo ma yomne ku mo man udok sengi pong’ cinge acel, ebiwang’e kara eduny ni jampoy* iwi pemlam ni girathiera ma juwang’u ku mac ni piny ma ng’wice ng’ar* ni Yehova. 3 Dong girathiera mi nying camne ma bidong’ ci, bibedo p’Arun ku wote; etie piny ma leng’ m’usagu ma jugamu kud i kum girathiera ma juwang’u ku mac ni Yehova.

4 “‘Tek ibekelo girathiera mi nying cam ma jutedo iwi kendo, ecikere nibedo mi mogo ma yom, mukathi ma ngulu ngulu ma thobi mbe i iye ma jujebo ku mo, kunoke mukathi m’apada ma thobi mbe i iye ma juwiro mo i kume.

5 “‘Tek girathiera peri en e girathiera mi nying cam ma jutedo i atangala,* ecikere nibedo mi mogo ma yom, ma thobi mbe i iye, man ma jujebo ku mo. 6 Jucikiri ning’weko iye thindho thindho man nikonjo mo i wiye. Etie girathiera mi nying cam.

7 “‘Tek girathiera peri en e girathiera mi nying cam ma jucelo i jamcelo, ecikere nibedo mi mogo ma yom ma jujebo ku mo. 8 Ibitero girathiera mi nying cam ma jutimo kumeno ni Yehova, man ibiwomiye i bang’ jalam, ma bilund tere i bang’ pemlam. 9 Jalamne bigamu kum girathiera mi nying camne moko ni jampoy,* man ebiwang’e kara eduny iwi pemlam ni girathiera ma juwang’u ku mac ni piny ma ng’wice ng’ar* ni Yehova. 10 Dong girathiera mi nying camne ma bidong’ bibedo p’Arun ku wote ni piny ma leng’ m’usagu zoo ma jugamu kud i kum girathiera ma juwang’u ku mac ni Yehova.

11 “‘Girathiera mi nying cam ma wubekelo ni Yehova ucikere nibedo ma thobi mbe i iye, kum ukwayu ngo wukel piny ma thobi n’i iye kadi miyokic uduny ni girathiera ma juwang’u ku mac ni Yehova.

12 “‘Wucopo kelogi ni Yehova ni girathiera mi landu wi mwoka, ento kudi giidh iwi pemlam ni piny ma ng’wice ng’ar.*

13 “‘Kubang’ girathiera peri mi nying cam ucikere nibedo ma kadu romo; man kud iyii ya kadu mi lembariba pa Mungu peri ukos i girathiera peri mi nying cam. Girathiera peri ceke ibithiero ku kadu.

14 “‘Tek ibekelo girathiera mi nying cam mi landu wi mwoka ni Yehova, icikiri nikelo nying cam ma nyen* ma jucelo iwi mac, nying cam ma nyen ma jurego ni girathiera mi nying cam mi landu wi mwoka peri. 15 Icikiri niketho mo i wiye man udok sengi i wiye. Etie girathiera mi nying cam. 16 Jalam biketho ebiduny ni jampoy,* niwacu kum nying cam ma juregone moko, mo, man udok sengine ceke ni girathiera ma juwang’u ku mac ni Yehova.

3 “‘Tek girathiera pare en e lam mi kwiyocwiny man tek egame kud i kind dhieng’, dok ebed ma thwoni kadi rwaya, ecikere nitero lim ma mulima mbe i kume i wang’ Yehova. 2 Ebiketho cinge iwi girathiera pare, man jubithume i dhu kamondo mi hema mi rombo; man wot Arun, ma gi julam gibikiro rimbe i theng pemlam ceke. 3 Ebitero kum lam mi kwiyocwiny ni girathiera ma juwang’u ku mac ni Yehova: miyo m’uumo kum cindi iye, miyo ceke m’udhoko kum cindi iye, 4 man rong’ini ario ku miyo m’i kumgi ma ni ceng’ini ku pier. Ebiwodho bende bor m’i kum cwiny karacelo ku rong’ini. 5 Wot Arun biwang’e kara eduny iwi pemlam, iwi lam m’awang’a ma juketho iwi yen ma n’i wi mac; etie girathiera ma ng’wice ng’ar* ma juwang’u ku mac ni Yehova.

6 “‘Tek girathiera pare ma pi lam mi kwiyocwiny ni Yehova uai kud i kind rombe kadi diegi, ebikelo nyok kadi vong’ ma mulima mbe i kume. 7 Tek ekelo nyog urombo re ma ni girathiera pare, e ebikele i wang’ Yehova. 8 Ebiketho cinge iwi girathiera parene, man jubithume i wang’ hema mi rombo. Wot Arun bikiro rimbe i theng pemlam ceke. 9 Ebikelo miyo ma juwodho i kum lam mi kwiyocwinyne ni girathiera ma juwang’u ku mac ni Yehova. Ebiwodho yibe ma miyo ceke ma ni ceng’ini ku cogo m’i ng’eye, miyo m’uumo kum cindi iye, miyo ceke m’udhoko kum cindi iye, 10 man rong’ini ario ku miyo m’i kumgi ma ni ceng’ini ku pier. Ebiwodho bende bor m’i kum cwiny karacelo ku rong’ini. 11 E jalam biwang’e kara eduny iwi pemlam ni cam,* girathiera ma juwang’u ku mac ni Yehova.

12 “‘Tek girathiera pare utie diel, e ebikele i wang’ Yehova. 13 Ebiketho cinge i wiye, man jubithume i wang’ hema mi rombo; wot Arun gicikiri nikiro rimbe i theng pemlam ceke. 14 Thenge m’ebitero ni girathiera pare ma juwang’u ku mac ni Yehova utie miyo m’uumo kum cindi iye, miyo ceke m’udhoko kum cindi iye, 15 man rong’ini ario ku miyo m’i kumgi ma ni ceng’ini ku pier. Ebiwodho bende bor m’i kum cwiny karacelo ku rong’ini. 16 Jalam biwang’ugi kara giduny iwi pemlam ni cam,* girathiera ma juwang’u ku mac ni piny ma ng’wice ng’ar.* Miyo ceke utie pa Yehova.

17 “‘Maeni bibedo cik ma nja i kind dhanu m’utuk mwu ceke, i kabedo mwu ceke: Kud wucam miyo kadi rimo nyanok de.’”

4 Yehova uyero bende ni Musa kumae: 2 “Wac ni Juisrael nia, ‘Tek ng’atu* moko udubo akakaka ngo m’etimo ko lembe moko i kind lembe ma Yehova ukwero nia kud jutim:

3 “‘Tek jalam ma juwiro re m’udubo man ewayu kier iwi dhanu, ecikere nikelo nyathi thwon dhiang’ ma mulima mbe i kume ni Yehova ni lam mi dubo pi dubo m’etimo. 4 Ebikelo thwon dhiang’ne i dhu kamondo mi hema mi rombo i wang’ Yehova, ebiketho cinge i wiye man ecikere nithume i wang’ Yehova. 5 I ng’eye, jalam ma juwiro bigamu kum rimb thwon dhiang’ne moko man ebitere i hema mi rombo; 6 jalamne biroyo nyig cinge i rimone man ebikiro kum rimone moko wang’ abiro i wang’ Yehova i wang’ ridho mi kamaleng’. 7 Jalamne biketho bende kum rimone moko i kum tung pemlam mir udok ma ng’wice ng’ar, ma n’i wang’ Yehova i hema mi rombo; man ebikonjo dong rimb thwon dhiang’ne ceke m’udong’ i the pemlam mi lam m’awang’a ma n’i dhu kamondo mi hema mi rombo.

8 “‘I ng’eye, ebiwodho miyo ceke mi thwon dhiang’ mi lam mi dubone, m’uketho i iye miyo m’uumo kum cindi iye man miyo m’udhoko kum cindi iye, 9 man rong’ini ario ku miyo m’i kumgi ma ni ceng’ini ku pier. Ebiwodho bende bor m’i kum cwiny karacelo ku rong’ini. 10 Ebiwodho wathkum ma rom ma juwodho i kum thwon dhiang’ mi lam mi kwiyocwiny. Man jalam biketho gibiduny iwi pemlam mi lam m’awang’a.

11 “‘Ento adila thwon dhiang’ne man ringe ceke ku wiye, tiende, cindi iye, man weyne, 12 niwacu dong thwon dhiang’ne ceke, ebiketho juter woko i ng’ey kagonjo kaka ma leng’ ma jubed juoyo iye vuru,* man ebiwang’e iwi yen iwi mac. Jucikiri niwang’e kaka ma jubed juoyo iye vuru.

13 “‘Tek cokiri mi Juisrael ceke gikier ma gidubo ko akakaka ngo, ento cokirine ung’eyo ngo nia gitimo gin ma Yehova ukwero nia kud jutim, 14 man tek i ng’eye dubone ubin ung’eyere, ukwayu cokirine umii nyathi thwon dhiang’ pi lam mi dubo man gitere i wang’ hema mi rombo. 15 Judongo mi cokiri biketho cing’gi iwi thwon dhiang’ne i wang’ Yehova, man gibithume i wang’ Yehova.

16 “‘I ng’eye, jalam ma juwiro bitero kum rimb thwon dhiang’ne moko i hema mi rombo. 17 Man jalamne biroyo nyig cinge i rimone man ebikiro kum rimone moko wang’ abiro i wang’ Yehova i wang’ ridho. 18 I ng’eye, ebiketho kum rimone moko i kum tung pemlam ma n’i wang’ Yehova i hema mi rombo; man ebikonjo dong rimone ceke m’udong’ i the pemlam mi lam m’awang’a ma n’i dhu kamondo mi hema mi rombo. 19 Ebiwodho miyone ceke man ebiwang’e kara eduny iwi pemlam. 20 Ebitimo lembe ma rom m’etimo i kum thwon dhiang’ mucelo mi lam mi dubo i kum thwon dhiang’ maeni de. Ebitimo kumeno, man jalamne bitimo adunya pigi, e dubo migi biwekere. 21 Ebiketho juter thwon dhiang’ne woko i ng’ey kagonjo man ebiwang’e tap calu m’ewang’u ko thwon dhiang’ ma kwong’a. Etie lam mi dubo pi cokiri.

22 “‘Tek jadit ma wijo moko udubo akakaka ngo m’etimo ko lembe moko m’i kind lembe ceke ma Yehova Mungu pare ung’olo nia kud jutim, uketho ewayu kier i wiye, 23 kunoke tek ebin enyang’ i kum dubo moko m’etimo m’eturo ko cik, ecikere nitero nyathi nyog diel ma mulima mbe i kume ni girathiera. 24 Ebiketho cinge iwi nyathi nyog dielne man ebithume kaka ma jubed juthumo iye lam m’awang’a i wang’ Yehova. Etie lam mi dubo. 25 Jalam bigwelo kum rimo mi lam mi dubone moko ku lwete man ebikethe i kum tung pemlam mi lam m’awang’a, man ebikonjo dong rimo m’udong’ne i the pemlam mi lam m’awang’a. 26 Ebiwang’u miyone ceke biduny iwi pemlam calu miyo mi lam mi kwiyocwiny; man jalam bitimo adunya pire pi dubo pare, e dubo pare biwekere.

27 “‘Tek ng’atu* moko m’i kind dhanu m’i ng’ombe udubo akakaka ngo man ewayu kier i wiye m’etimo ko lembe moko ma Yehova ung’olo nia kud jutim, 28 kunoke tek ebin enyang’ pi dubo m’etimo, ecikere nitero vong’ diel ma mulima mbe i kume ni girathiera pare pi dubo m’etimo. 29 Ebiketho cinge iwi lam mi dubone man ebithumo lam mi dubone kaka ma rom ma juthumo iye lam m’awang’a. 30 Jalam bigwelo kum rimo mi lam mi dubone moko ku lwete man ebikethe i kum tung pemlam mi lam m’awang’a, man ebikonjo dong rimo m’udong’ne i the pemlam. 31 Ebiwodho miyone ceke, tap calu ma juwodho ko miyo mi lam mi kwiyocwiny, man jalam biwang’e kara eduny iwi pemlam ni piny ma ng’wice ng’ar* ni Yehova; man jalam bitimo adunya pire, e dubo pare biwekere.

32 “‘Ento tek ebethiero nyathin urombo ni lam pare mi dubo, ecikere nitero urombo ma vong’ ma mulima mbe i kume. 33 Ebiketho cinge iwi lam mi dubone man ebithume ni lam mi dubo kaka ma jubed juthumo iye lam m’awang’a. 34 Jalam bigwelo kum rimo mi lam mi dubone moko ku lwete man ebikethe i kum tung pemlam mi lam m’awang’a, man ebikonjo dong rimo m’udong’ne i the pemlam. 35 Ebiwodho miyone ceke i ayi ma rom ma juwodho ko miyo m’i kum nyathi nyog urombo mi lam mi kwiyocwiny, man jalam biwang’ugi kara giduny iwi pemlam, iwi girathiera ma juwang’u ku mac ni Yehova; man jalam bitimo adunya pire pi dubo m’etimo, e dubo pare biwekere.

5 “‘Tek ng’atu* moko tie sadeni mi lembe moko kunoke eneno kadi ke ewinjo pi lembene, man ewinjo jubesayu sadeni* mi lembene ento elund enyutho ngo lembe m’eng’eyone, e nwang’u edubo, man ebicungo i dhu kosa pare.

2 “‘Kunoke tek ng’atu* moko umulo kum piny m’ucido, nik’ebed avuj yedi mi lum m’ucido, lei mi pacu m’ucido, kadi giracwiya ma nyalini m’ucido, en de nwang’u ecido man kier n’i wiye kadok nwang’u eng’eyo ngo pire de. 3 Kunoke tek ng’atu moko umulo m’eng’eyo ngo kum piny m’ucido ma n’i kum dhanu, gin moko ci m’ucido ma copo cide, man ebin enyang’ i kum lembene, e nwang’u kier n’i wiye.

4 “‘Kunoke tek ng’atu* moko ukwong’o kwong’ vur vur nia ebitimo lembe moko, nik’ebed lembe ma ber kadi ma rac, nik’ebed girang’o de ma nwang’u eng’eyo ngo pire, ento edog enyang’ i ng’eye nia ekwong’o kwong’ vur vur, e nwang’u kier n’i wiye.*

5 “‘Tekene kier n’i wiye pilembe edubo i kum gin acel m’i kind lembunogi, ecikere nituco nia edubo nenedi. 6 Ebikelo bende girathiera pare mi kier ni Yehova pi dubo m’etimo, niwacu vong’ m’ebigamu kud i kind lim, nik’ebed vong urombo kunoke vong’ diel pi lam mi dubo. I ng’eye jalam bitimo adunya pire pi dubo pare.

7 “‘Ento tek jamcinge mbe m’ecopo nwang’u ko urombo, ecikere nikelo ni Yehova akuru ario mi lum kunoke nyithindh akuru ario mi pacu ni girathiera pare mi kier pi dubone; acel pi lam mi dubo, man ma kucelo ke pi lam m’awang’a. 8 Ukwayu etergi i bang’ jalam, ma biwok lar thiero ma pi lam mi dubo man ebing’wenyo wiye kud i ng’ute, m’umbe nicode ngik. 9 Ebikiro kum rimo mi lam mi dubone moko i theng pemlam, ento donge ma bidong’ jubiketho bicwir i the pemlam. Etie lam mi dubo. 10 Ebithiero ma kucelo ni lam m’awang’a nimakere ku cikne; man jalam bitimo adunya pire pi dubo m’etimo, e dubo pare biwekere.

11 “‘Tek jamcinge mbe m’ecopo nwang’u ko akuru ario mi lum kunoke nyithindh akuru ario mi pacu, e girathiera pare m’ecikere nikelo pi dubo pare bibedo apaje mir efa* mi mogo ma yom ni lam mi dubo. Kud emed mo i iye kadi udok sengi i wiye, kum etie lam mi dubo. 12 Ebikele i bang’ jalam, man jalam bigamu kume pong’ cinge acel ni jampoy* man ebiwang’e kara eduny iwi pemlam iwi girathiera ma juwang’u ku mac ni Yehova. Etie lam mi dubo. 13 Jalam bitimo adunya pire pi dubo m’etimo, dubo moko ci m’i kind maeno, e dubo pare biwekere. Dong girathierane ma bidong’ bibedo pa jalam, tap calu girathiera mi nying cam.’”

14 Yehova umedere asu niweco i bang’ Musa, eyero kumae: 15 “‘Tek ng’atu moko ugwoko ngo bedoleng’ pare m’edubo ko akakaka ngo i kum piny ma leng’ pa Yehova, ecikere nikelo ni Yehova nyog urombo ma mulima mbe i kume kud i kind lim ni girathiera mi kier; jubing’olo valer pare i cekel* mi mola ma tar nimakere ku cekel mi kabedo ma leng’.* 16 Man ebiculo pi dubo m’etimo i kum kabedo ma leng’ man ebimedo bende thenge acel wi abic mi valerne. Ebimiye i bang’ jalam, kara jalam utim adunya pire ku nyog urombo mi girathiera mi kier, e dubo pare biwekere.

17 “Tek ng’atu* moko udubo m’etimo ko lembe moko m’i kind lembe ma Yehova ukwero nia kud jutim, kadok eng’eyo ngo pire de, kier n’i wiye asu man ebicungo i dhu kosa parene. 18 Ecikere nikelo nyog urombo ma mulima mbe i kume kud i kind lim pare i bang’ jalam ni girathiera mi kier, nimakere ku valer ma jung’olo. I ng’eye ke jalam bitimo adunya pire pi kier m’ekier ko akakaka ngo man m’eng’eyo ngo, e dubo pare biwekere. 19 Etie girathiera mi kier. Kier n’i wiye andhandha pilembe edubo ni Yehova.”

6 Yehova umedere niweco i bang’ Musa, eyero kumae: 2 “Tek ng’atu moko udubo man egwoko ngo bedoleng’ pare ni Yehova m’ewondo ko wadi iwi lembe m’uneno piny moko ma jumiyo nia enen wiye kadi ke piny moko ma juweko i bang’e, kunoke ekwalu kadi ke eyaku wadi, 3 kunoke nyo enwang’u piny moko m’urwinyo man ebecwayu vupo iwi lembene, man tek ebekwong’o kwong’ mi ndra iwi dubo ma kumeno ma nyo etimo, ecikere nitimo lembe m’ulubo e: 4 Tekene edubo man kier n’i wiye, ecikere nidwoko piny m’ekwalu, piny m’emayu, piny m’eyaku, piny ma jumiyo nia enen wiye, kunoke piny m’urwinyo m’enwang’u, 5 kunoke piny moko ci m’ebekwong’o kwong’ mi ndra i wiye; ecikere niculo kawang’e zoo man ebimedo thenge acel wi abic mi valerne. Ebimiye i bang’ won pinje i nindo ma jubinwang’u nia kier n’i wiye andha. 6 Man ebitero nyog urombo ma mulima mbe i kume kud i kind lim pare i bang’ jalam ni girathiera pare mi kier ni Yehova, nimakere ku valer ma juketho pi girathiera mi kier. 7 Jalam bitimo adunya pire i wang’ Yehova, e jubiweko ire lembe moko ci m’etimo m’ukelo kier i wiye.”

8 Yehova umedere niweco i bang’ Musa, eyero kumae: 9 “Ng’ol ni Arun ku wote kumae: ‘Maeni tie cik mi lam m’awang’a: Lam m’awang’a bibedo kaka ma juwang’u iye piny i die wi pemlam diewor traka nitundo kugweno, man jubigwoko macne umedere niliel iwi pemlam. 10 Jalam bironyere ku bongu pare ma segi ma nwang’,* man ebironyo pali* mi bongu ma nwang’ i kume. I ng’eye, ebiwodho vuru* mi lam m’awang’a ma mac uwang’u iwi pemlam man ebikethogi i ng’et pemlam. 11 I ng’eye, ebiwodho bongu pare man ebironyo bongu mange, ebiting’o vuru ebitero kaka ma leng’ woko i ng’ey kagonjo. 12 Jubigwoko mac umedere niliel iwi pemlam. Kud etho. Jalam ucikere nimedo yen i wiye kubang’ kugweno man ebipangu lam m’awang’a i wiye, man ebiwang’u miyo mi lam mi kwiyocwiny kara uduny i wiye. 13 Jubigwoko mac umedere niliel iwi pemlam saa ceke. Kud etho.

14 “‘Maeni tie cik mi girathiera mi nying cam: Wu wot Arun wubikele i wang’ Yehova i wang’ pemlam. 15 Ng’atu acel m’i kindgi bigamu mogo ma yom mi girathiera mi nying cam pong’ cinge acel ku mone moko man udok sengi ceke ma n’i wi girathiera mi nying cam, man ebiwang’e kara eduny iwi pemlam ni piny ma ng’wice ng’ar* pi jampoy* ni Yehova. 16 Arun ku wote gibicamu donge ma bidong’. Jubicame calu mukathi ma thobi mbe i iye i kabedo ma leng’. Gibicame i lela hema mi rombo. 17 Kud jutede ku piny moko ma thobi n’i iye. Amiye ni makapiny migi kud i kum girathiera para ma juwang’u ku mac. Etie piny ma leng’ m’usagu, calu lam mi dubo man calu girathiera mi kier. 18 Jumaco ceke m’i kind wot Arun bicame. Etie makapiny migi ma nja i kind dhanu m’utuk migi ceke, m’uai kud i kum girathiera ma juwang’u ku mac ni Yehova. Piny ceke m’umulo kumgi* bidoko leng’.’”

19 Yehova uweco kendo i bang’ Musa, ewacu kumae: 20 “Maeni girathiera m’Arun ku wote gibikelo ni Yehova i nindo ma jubiwire i iye: apaje mir efa* mi mogo ma yom ni girathiera ma nja, nusune kugweno man dong nusune uthieno. 21 Jubitede ku mo i atangala.* Ibikele ma dong’ jujebe ma ber ku mo man ibibino kude ma jung’weko iye ng’ili ng’ili ni girathiera mi nying cam ma jutedo ni piny ma ng’wice ng’ar* ni Yehova. 22 Jalam ma bidong’ kakare ma juwiro kud i kind wote bitimo kumeno. Maeni en e cik ma nja: Jubiketho ebiduny ni Yehova ni girathiera ma zoo. 23 Girathiera ceke mi nying cam ma pa jalam ucikere nibedo girathiera ma zoo. Kud jucame.”

24 Yehova uweco kendo i bang’ Musa, ewacu kumae: 25 “Yer ni Arun ku wote kumae: ‘Maeni en e cik mi lam mi dubo: Kaka ma jubithumo iye lam m’awang’a, jubithumo bende lam mi dubo kakeca i wang’ Yehova. Etie gin ma leng’ m’usagu. 26 Jalam ma bithiere pi dubo bicame. Ebicame i kabedo ma leng’, i lela hema mi rombo.

27 “‘Piny moko ci m’umulo kum ringe bidoko leng’, man tek ng’atu moko ukiro rimbe i kum kendi pare, icikiri nilwoko gin ma rimo ukirere i kumene i kabedo ma leng’. 28 Jubing’enyo agulu mir ulobo ma jutede i iye. Ento tek jutede i agulu mi mola, e jucikiri nirude man nilwoke ku pii.

29 “‘Jumaco ceke m’i kind julam bicame. Etie piny ma leng’ m’usagu. 30 Ento jubicamu ngo lam mi dubo tek jutero rimbe moko i hema mi rombo pi nitimo adunya i kabedo ma leng’. Jubiwang’e ku mac.

7 “‘Maeni en e cik mi girathiera mi kier: Etie piny ma leng’ m’usagu. 2 Jubithumo girathiera mi kier kaka ma rom ma jubed juthumo iye lam m’awang’a, man jucikiri nikiro rimbe i kum pemlam i thenge ceke. 3 Ebikelo miyone ceke, m’uketho i iye yibe ma miyo, miyo m’uumo kum cindi iye, 4 man rong’ini ario ku miyo m’i kumgi ma ni ceng’ini ku pier. Ebiwodho bende bor m’i kum cwiny karacelo ku rong’ini. 5 Jalam biketho gibiwang’ kara giduny iwi pemlam ni girathiera ma juwang’u ku mac ni Yehova. Etie girathiera mi kier. 6 Jumaco ceke m’i kind julam bicame, man jucikiri nicame i kabedo ma leng’. Etie piny ma leng’ m’usagu. 7 Jubitiyo ku cik mi lam mi dubo pi girathiera mi kier bende; ebibedo pa jalam m’utiyo kude pi nitimo adunya.

8 “‘Ka jalam uthiero lam m’awang’a pi ng’atu moko, adila mi lam m’awang’a ma jukelo i bang’ jalamne bibedo pare.

9 “‘Girathiera ceke mi nying cam ma jutedo iwi kendo kunoke ma jutedo i jamcelo kadi ke i atangala bibedo pa jalam m’uthiere. Ebibedo pare. 10 Ento girathiera ceke mi nying cam ma jujebo ku mo kadi ke m’uthwo, bibedo pi wot Arun ceke; gibipoke rom rom.

11 “‘Maeni cik mi lam mi kwiyocwiny ma ng’atini romo thiero ni Yehova: 12 Tek ebekele pi nidwoko foyofoc, ebikelo lam mi dwoko foyofocne karacelo ku mukathi ma ngulu ngulu ma thobi mbe i iye ma jujebo ku mo, mukathi m’apada ma thobi mbe i iye ma juwiro mo i kume, man mukathi ma ngulu ngulu ma jutedo ku mogo ma yom ma jujebo ma ber man ma junyobo ku mo. 13 Ebikelo girathiera parene karacelo ku mukathi ma ngulu ngulu ma thobi n’i iye man lam mi dwoko foyofoc mi lam pare mi kwiyocwiny. 14 Kud i kum girathiera maeno, ebigamu mukathi acel acel m’ebithiero ni makapiny ma leng’ ni Yehova; ebibedo pa jalam m’ukiro rimo mi lam mi kwiyocwiny. 15 Jubicamu ring’o mi lam mi dwoko foyofoc mi lam pare mi kwiyocwiny i nindo m’ethiere i iye. Kud egwok kume moko nitundo kugweno.

16 “‘Tek lam mi girathiera pare tie lam mi lembang’ola ma ku kwong’ kunoke girathiera ma ku berocwiny, jubicame i nindo m’ethiero lam parene i iye, man jucopo camu bende donge m’udong’ urwonde. 17 Ento dong ring’o mi lamne moko ci ma bidong’ i nindo mir adege jucikiri niwang’u ku mac. 18 Tek jucamu kum ring’o mi lam mi kwiyocwiny parene moko i nindo mir adege, jubijolo ngo ng’atu m’ukele. Jubikwane ngo ire; etie gin ma judagu, man ng’atu* m’ucamu kume moko bicungo i dhu kosa pare. 19 Tek ring’o moko umulo kum piny moko ci m’ucido, jubicame ngo. Jubiwang’e ku mac. Ng’atu ma leng’ bicamu ring’o ma leng’.

20 “‘Ento tek ng’atu* moko ma leng’ ungo ucamu ring’o mi lam mi kwiyocwiny, ma pa Yehova, jucikiri nikabu* ng’atune cen kud i kind juthugi. 21 Tek ng’atu* moko umulo kum piny m’ucido, dok ebed piny m’ucido mi dhanu, kadi lei m’ucido kunoke piny m’ucido ma judagu, man ecamu kum ring’o mi lam mi kwiyocwiny, ma pa Yehova, jucikiri nikabu* ng’atune cen kud i kind juthugi.’”

22 Yehova umedere niweco i bang’ Musa, ewacu kumae: 23 “Yer ni Juisrael kumae: ‘Kud wucam miyo moko ci mi thwon dhiang’ kadi mi nyathi nyog urombo kunoke mi diel. 24 Jucopo tiyo ku miyo mi lei ma junwang’u utho man miyo mi lei ma lei mange unego pi lembe mange, ento kud wucame nyanok de. 25 Kum ng’atu moko ci ma tek ucamu miyo mi lei m’ekelo ni girathiera ma juwang’u ku mac ni Yehova, jucikiri nikabe* cen kud i kind juthugi.

26 “‘Kud wucam rimo nyanok de kaka moko ci ma wubedo i iye, dok ebed rimb winyo kadi rimb lei. 27 Ng’atu* moko ci m’ucamu rimo jucikiri nikabe* cen kud i kind juthugi.’”

28 Yehova umedere niweco i bang’ Musa, ewacu kumae: 29 “Yer ni Juisrael kumae: ‘Ng’atu moko ci m’ubekelo lam pare mi kwiyocwiny ni Yehova bitero kum lam pare mi kwiyocwinyne ni girathiera ni Yehova. 30 Ebikelo miyone i cinge karacelo ku dhu kor ni girathiera ma juwang’u ku mac ni Yehova, man ebileke kun ku kun ni girathiera m’aleka i wang’ Yehova. 31 Jalam biwang’u miyone kara eduny iwi pemlam, ento dhu kor bibedo p’Arun ku wote.

32 “‘Wubimiyo bamb ma yor acwic ni makapiny ma leng’ m’uai kud i lam mwu mi kwiyocwiny ni jalam. 33 Wod Arun m’uthiero rimo mi lam mi kwiyocwiny ku miyone bibedo ku tiende ma yor acwic ni makapiny* pare. 34 Kum agamu dhu kor mi girathiera m’aleka man bamb mi makapiny ma leng’ kud i kum lam mi kwiyocwiny mi Juisrael, man amiyogi ni Arun ma jalam man ni wote; etie cik ma nja ni Juisrael.

35 “‘Eno ubino makapiny m’uai kud i kum girathiera pa Yehova ma juwang’u ku mac ma jukoyo ang’et pi julam, pir Arun ku wote, i nindo ma juthierogi i iye kara gibed julam pa Yehova. 36 Yehova ung’olo nimiyo igi makapiny maeno m’uai i bang’ Juisrael i nindo m’ewirogi i iye. Etie cik ma nja pi dhanu m’utuk migi ceke.’”

37 Maeno tie cik pi lam m’awang’a, girathiera mi nying cam, lam mi dubo, girathiera mi kier, lam mi ketho ng’atini i tic, man lam mi kwiyocwiny, 38 tap calu ma Yehova ung’olo ni Musa iwi got Sinai i nindo m’eng’olo ni Juisrael nia gikel girathiera migi ni Yehova i langa mi Sinai.

8 Yehova umedere niweco i bang’ Musa, ewacu kumae: 2 “Gam Arun ku wote, kendi, mo mi wirowir, thwon dhiang’ mi lam mi dubo, nyogi rombe ario, man katoko mi mukathi ma thobi mbe i iye, 3 man keth cokiri ceke ucokiri karacelo i dhu kamondo mi hema mi rombo.”

4 E Musa utimo tap calu ma Yehova ung’olo ire, man cokiri ceke ucokiri karacelo i dhu kamondo mi hema mi rombo. 5 Musa ugam uyero ni cokiri kumae: “Maeni tie gin ma Yehova ung’olo nia watimu.” 6 E Musa ugamu Arun ku wote man ekelogi ceng’ini, ejomogi ku pii. 7 I ng’ey maeno, eronyo kanzu i kum Arun, etwiyo piere ku thondh pier, eronye ku koti ma bote mbe, eronyo efodh i kume man etwiye ku mukaba m’awiya mir efodhne pi nimake ebed kakare. 8 I ng’eye, eketho jamkor i kore man eketho Urim ku Thumim i jamkorne. 9 E eroyo jamboyo wic ma segi i wiye man eketho ban m’uriang’ini mi mola ma kwar, ma en e giranyutha mi thieriri ma leng’* i kum jamboyo wic ma segine i terwang’e, tap calu ma Yehova ung’olo ni Musa.

10 Musa ugam uting’o mo mi wirowir man ewiro hema mi thier ku piny ceke m’ubino i iye, man edwokogi leng’. 11 I ng’eye, ekiro kum moje moko wang’ abiro iwi pemlam man ewiro pemlamne kud ajenine ceke, man jamlogo ku tiende ma jukethe i wiye pi nidwokogi leng’. 12 Tokcenne ekonjo kum mo mi wirowirne moko iwi Arun man ewire pi nidwoke leng’.

13 I ng’eye, Musa ugamu wot Arun ekelogi ceng’ini man eronyogi ku kanzu, etwiyo piergi ku thondh pier man eroyo jamboyo wic i wigi, tap calu ma Yehova ung’olo ni Musa.

14 I ng’eye, ekelo thwon dhiang’ mi lam mi dubo, man Arun ku wote giketho cing’gi iwi thwon dhiang’ mi lam mi dubone. 15 Musa uthume man egwelo rimbe ku lwete eketho iwi tung pemlam i ng’ete zoo, man edwoko pemlamne leng’ nikum dubo, ento ekonjo dong rimone i the pemlam, pi nidwoke leng’ kara jutim adunya i wiye. 16 I ng’ey maeno, egamu miyo ceke m’ubino i kum cindi iye, bor m’i kum cwiny, man rong’ini ario ku miyo migi, man Musa uketho giduny iwi pemlam. 17 I ng’eye, eketho juwang’u dong thwon dhiang’ne, niwacu adilane, ringe, man weyne ku mac woko i ng’ey kagonjo, tap calu ma Yehova ung’olo ni Musa.

18 Edog ekelo nyog urombo mi lam m’awang’a ceng’ini, man Arun ku wote giketho cing’gi iwi nyog urombone. 19 Musa ugam uthume man ekiro rimbe i kum pemlam i thenge ceke. 20 Ethumo i nyog urombone kubang’ wadhe, man Musa uwang’u wiyene ku wadhenegi, man miyo m’i kum rong’ini kara giduny. 21 Elwoko cindi iye man tiende ku pii, man Musa uketho nyog urombone zoo uduny iwi pemlam. Ebedo lam m’awang’a ma ng’wice ng’ar. Ebedo girathiera ma juwang’u ku mac ni Yehova, tap calu ma Yehova ung’olo ni Musa.

22 Edog ekelo nyog urombo mir arionde, ma en e nyog urombo mi kethojo i tic, man Arun ku wote giketho cing’gi iwi nyog urombone. 23 Musa uthume man egamu kum rimbe moko eketho i the ith Arun ma yor acwic, man i nyig cinge ma dit ma yor acwic, man i nyig tiende ma dit ma yor acwic. 24 I ng’eye, Musa ukelo wot Arun ceng’ini man eketho kum rimone moko i the ithgi ma yor acwic, iwi nyig cing’gi ma dit ma yor acwic, man iwi nyig tiendgi ma dit ma yor acwic; ento dong rimone m’udong’ Musa ukiro i kum pemlam i thenge ceke.

25 I ng’eye, egamu miyo, yibe ma miyo, miyo ceke m’i kum cindi iye, bor m’i kum cwiny, rong’ini ario ku miyo m’i kumgi, man bamb ma yor acwic. 26 Eting’o mukathi acel ma ngulu ngulu ma thobi mbe i iye, mukathi acel ma ngulu ngulu ma jujebo ku mo, man mukathi m’apada acel kud i katoko mi mukathi ma n’i wang’ Yehova. I ng’eye, ekethogi iwi wadhe ma miyo man iwi bamb ma yor acwic. 27 I ng’ey maeno, ekethogi zoo i die cing’ Arun man i die cing’ wote man ecaku lekogi kun ku kun ni girathiera m’aleka i wang’ Yehova. 28 Musa ulund ugamugi kud i cing’gi man ewang’ugi kara giduny iwi pemlam i die wi lam m’awang’a. Eno ubino lam ma ng’wice ng’ar* mi kethojo i tic. Ebedo girathiera ma juwang’u ku mac ni Yehova.

29 I ng’eye, Musa ugamu dhu kor man eleke kun ku kun ni girathiera m’aleka i wang’ Yehova. Maeno re m’udoko ni makapiny pa Musa kud i kum nyog urombo mi kethojo i tic, tap calu ma Yehova ung’olo ni Musa.

30 Musa ugamu kum mo mi wirowir moko man kum rimo moko m’ubino iwi pemlam ekiro i kum Arun man i kum kendi pare, i kum wote man i kum kendi mi wote ma gibino karacelo kude. I ayi maeno re m’edwoko Arun ku kendi pare leng’ man bende wote ku kendi migi.

31 I ng’eye, Musa uyero ni Arun ku wote kumae: “Wuted ring’one i dhu kamondo mi hema mi rombo, man wubicame keca ku mukathi ma n’i katoko mi kethojo i tic, tap calu ma jung’olo ira kumae: ‘Arun ku wote gibicame.’ 32 Dong ring’o ku mukathine ma bidong’ wubiwang’u ku mac. 33 Kud wuwok woko kud i kamondo mi hema mi rombo pi nindo abiro, nitundo ma nindo mi kethowu i tic bithum i iye, pilembe bikwayu nindo abiro pi niketho wudok julam.* 34 Yehova ung’olo nia watim gin ma watimo tin e pi nitimo adunya piwu. 35 Wubibedo i dhu kamondo mi hema mi rombo pi nindo abiro dieceng’ ku diewor man wubitimo lembe ma wucikuru nitimo ni Yehova kara kud wutho; kum eno re ma gin ma jung’olo ira.”

36 Man Arun ku wote gitimo lembe ceke ma Yehova ung’olo nikadhu kud i bang’ Musa.

9 I nindo mir aborane, Musa ulwong’o Arun ku wote man judongo mir Israel. 2 Ewacu ni Arun kumae: “Gam piri giri nyathi dhiang’ acel pi lam mi dubo man nyog urombo acel pi lam m’awang’a, ma gin zoo mulima kumgi, man ikelgi i wang’ Yehova. 3 Ento ibiyero ni Juisrael kumae: ‘Wugam nyog diel acel pi lam mi dubo, nyathi dhiang’ acel, man nyathi nyog urombo acel ma oro migi acel acel, man ma mulima mbe i kumgi pi lam m’awang’a, 4 man thwon dhiang’ acel ku nyog urombo acel pi lam mi kwiyocwiny, pi nithierogi i wang’ Yehova, man girathiera mi nying cam ma jujebo ku mo, pilembe tin Yehova binyuthere iwu.’”

5 E gikelo piny ma Musa ung’olone i wang’ hema mi rombo. I ng’eye, cokiri ceke ucoro man ucungo i wang’ Yehova. 6 Man Musa uwacu kumae: “Maeni gin ma Yehova ung’olo nia wutim, kara dwong’ pa Yehova unyuthere iwu.” 7 Musa ugam uyero ni Arun kumae: “Cor i bang’ pemlam man ithier lam peri mi dubo ku lam peri m’awang’a, man itim adunya piri man pi juruot peri; i ng’eye, thier girathiera mi dhanu man itim adunya pigi, tap calu ma Yehova ung’olo.”

8 E Arun ucoro ndhu ndhu i bang’ pemlam man ethumo nyathi dhiang’ mi lam mi dubo ma pire gire. 9 I ng’eye, wot Arun gikelo rimone i bang’e man eroyo lwete i rimone, ekethe i tung pemlam, man dong rimone m’udong’ ke ekonjo i the pemlam. 10 Ewang’u miyo, rong’ini, man bor m’i kum cwiny mi lam mi dubone kara giduny iwi pemlam, tap calu ma Yehova ung’olo ni Musa. 11 Man ewang’u ringe kud adilane ku mac woko i ng’ey kagonjo.

12 I ng’eye, Arun uthumo lam m’awang’a man wote gimiyo rimone i bang’e, man ekire i kum pemlam i thenge ceke. 13 Gimiyo wathkum lam m’awang’ane ku wiye i bang’e, man ewang’ugi kara giduny iwi pemlam. 14 Bende, elwoko cindi iye ku tiende man ewang’ugi kara giduny iwi lam m’awang’a iwi pemlam.

15 I ng’eye, ekelo girathiera mi dhanu, man egamu diel mi lam mi dubo ma pi dhanu, ethume man ethiere ni lam mi dubo calu mi kwong’o. 16 Ekelo lam m’awang’a man ethiere nimakere ku cik mi lam m’awang’a.

17 I ng’eye, ekelo girathiera mi nying cam, egamu kume pong’ cinge man ewang’e kara eduny iwi pemlam, umedo kum lam m’awang’a mi kugweno.

18 I ng’ey maeno, Arun uthumo thwon dhiang’ man nyog urombo mi lam mi kwiyocwiny m’ubino pi dhanu. I ng’eye, wote gimiyo rimone i bang’e man ekire i theng pemlam ceke. 19 Ento pi wathkum thwon dhiang’ne ma miyo, yib nyog urombone ma miyo, miyo m’uumo kum cindi iye, rong’ini, man bor m’i kum cwiny, 20 giketho wathkum ma miyo maeno ceke iwi dhu kor, man i ng’eye ewang’u wathkume ma miyone kara giduny iwi pemlam. 21 Ento Arun uleko kor ku bamb ma yor acwic kun ku kun ni girathiera m’aleka i wang’ Yehova, tap calu ma Musa ung’olo.

22 I ng’eye, Arun uting’o cinge yor i bang’ dhanu, emiyo igi mugisa man kinde m’edaru thiero lam mi dubo ku lam m’awang’a, man lam mi kwiyocwiny, egam elor. 23 Tokcenne Musa gikud Arun gimondo i hema mi rombo, i ng’eye giwok woko man gimiyo mugisa ni dhanu.

E dwong’ pa Yehova ugam unyuthere ni dhanu ceke, 24 man mac uai i bang’ Yehova ucaku wang’u lam m’awang’a ku wadhe ma miyonegi iwi pemlam. Saa ma dhanu ceke uneno lembuno, gicaku kok man gipodho arieba wang’gi i ng’om.

10 I ng’ey kare, Nadab gikud Abihu ma gi wot Arun, ng’atuman uting’o tabu pare mi mac giketho mac i iye man giketho udok ma ng’wice ng’ar i wiye. I ng’eye, gicaku thiero mac m’uyiyere ngo i wang’ Yehova, m’eng’olo ngo nia gitim. 2 E mac uwok kud i wang’ Yehova man uwang’ugi, e githo i wang’ Yehova. 3 I ng’eye, Musa uwacu ni Arun kumae: “Yehova uwacu kumae: ‘Abidwokara leng’ nikum dhanu ma ni ceng’ini kuda, man abinwang’u dwong’ i wang’ dhanu ceke.’” E Arun ubedo ling’.

4 Musa ugam ulwong’o Micael gikud Elzafan ma gi wot Uziel m’umin won Arun, man ewacu igi kumae: “Wubin kwe, wuyey umegwu cen kud i wang’ kabedo ma leng’ man wutergi woko i ng’ey kagonjo.” 5 E gibino man giyeyo avujgi ku kanzu migi man giterogi woko i ng’ey kagonjo, tap calu ma Musa uyero igi.

6 I ng’eye, Musa uyero ni Arun man ni wote mange ma Eleazar gikud Ithamar kumae: “Kud wuwek yuk wiwu zakara kadi kendi mwu de kud wuyeci, kara kud wutho man kara ng’eicwiny kud umak Mungu i kum cokiri maeni zoo. Umego mwu m’i udi ceke mir Israel re ma gibiwagu ju ma Yehova unego ku mac. 7 Kud wuwok woko kud i kamondo mi hema mi rombo, wumaru tho, kum mo mi wirowir pa Yehova n’i wiwu.” E gitimo calku lembe ma Musa uyero.

8 I ng’eye, Yehova uyero ni Arun kumae: 9 “Kud imadh pigulok kadi kong’o mange ma lake tek, in ku woti kinde ma wubemondo i hema mi rombo, kara kud wutho. Etie cik ma nja pi dhanu m’utuk mwu ceke. 10 Eno tie kara wung’ey tung’ tung’ i kind piny ma leng’ ku ma sai, man i kind piny m’ucido ku ma leng’, 11 man kara wuponj Juisrael ku telowic ceke ma Yehova umiyo igi nikadhu kud i bang’ Musa.”

12 I ng’eye, Musa uwacu ni Arun man ni wote m’udong’ ma Eleazar gikud Ithamar kumae: “Wuting’ dong girathiera mi nying cam m’udong’ kud i kum girathiera ma juwang’u ku mac ni Yehova man wucame calu mukathi ma thobi mbe i iye ceng’ini ku pemlam, pilembe etie piny ma leng’ m’usagu. 13 Wucikuru nicame i kabedo ma leng’, pilembe etie makapiny peri man makapiny mi woti m’uai kud i girathiera ma juwang’u ku mac ni Yehova, kum eno re m’utie gin ma jung’olo ira. 14 Ibicamu bende dhu kor mi girathiera m’aleka man bamb mi makapiny ma leng’ i kabedo ma leng’, in ku woti man nyigi karacelo kudi, pilembe eno re m’utie piny ma jumiyo iri ni makapiny peri man makapiny mi woti kud i kum lam mi kwiyocwiny mi Juisrael. 15 Gibikelo bamb mi makapiny ma leng’ man dhu kor mi girathiera m’aleka karacelo ku girathiera mi miyo ma juwang’u ku mac, kara julek girathiera m’alekane kun ku kun i wang’ Yehova; man ebibedo ni makapiny peri ma nja iri man ni woti karacelo kudi, tap calu ma Yehova ung’olo.”

16 Man Musa usayu diel mi lam mi dubo mii, ento enwang’u nia karaman judaru wang’e. Pieno ng’eicwiny umake i kum Eleazar man Ithamar ma gi wot Arun m’udong’, man ewacu kumae: 17 “Pirang’o wucamu ngo lam mi dubo i kabedo ma leng’, ma ke etie piny ma leng’ m’usagu man emiye iwu kara wuyey kosa mi cokiri man wutim adunya pigi i wang’ Yehova? 18 Nen! jutero ngo rimbe i kabedo ma leng’. Nwang’u umaku andha wucame i kabedo ma leng’, tap calu ma jung’olo ira.” 19 Arun udwoko ni Musa kumae: “Nen! tin githiero lam migi mi dubo man lam migi m’awang’a i wang’ Yehova. I ng’ey lembe m’uwok i wiya tin e, ka nwang’u acamu lam mi dubo, nyo nwang’u lembene ucinyayu anyong’a i Yehova?” 20 Saa ma Musa uwinjo kumeno ci, e lembene uwok ber i wang’e.

11 I ng’eye, Yehova uyero ni Musa gikud Arun kumae: 2 “Wuyer ni Juisrael kumae: ‘Maeni giracwiya ma kwo m’i wi ng’om ma wucopo camu: 3 Wucopo camu lei ceke ma i ubong’ tiendgi ukaru man upokere man ma gamu cam kud i igi ka donyamu iye kendo.

4 “‘Ento i kind lei ma gamu cam kud i igi ka donyamu iye kendo kunoke ma i ubong’ tiendgi ukaru, kud wucam ma e: ngamia, pilembe egamu cam kud i iye kan edog enyamu iye kendo, ento i ubong’ tiende ukaru ngo. Etie piny m’ucido iwu. 5 Uduka de, pilembe egamu cam kud i iye kan edog enyamu iye kendo, ento i ubong’ tiende ukaru ngo. Etie piny m’ucido iwu. 6 Afoyo mi lum bende, pilembe egamu cam kud i iye kan edog enyamu iye kendo, ento i ubong’ tiende ukaru ngo. Etie piny m’ucido iwu. 7 Kul de, pilembe i ubong’ tiende ukaru man upokere, ento egamu ngo cam kud i iye kan edog enyamu iye kendo. Etie piny m’ucido iwu. 8 Kud wucam ring’gi kadok nyanok de, kadi amula de kud wumul avujgi. Gitie piny m’ucido iwu.

9 “‘Maeni gin ma wuromo camu kud i kind piny ceke m’i pii: piny moko ci m’i pii ma jucwake man m’apokane nuti, dok ebed m’i nam kadi m’i kulo, wuromo camu. 10 Ento piny moko ci m’i nam kadi m’i kulo ma cwake man m’apokane mbe, i kind giracwiya ceke ma nyalini man giracwiya mange ceke ma kwo* ma n’i pii, tie gin ma judagu iwu. 11 Eyo, gicikiri nibedo gin ma judagu iwu. Kud wucam ring’gi kadok nyanok de, man avujgi de ucikere nibedo iwu ni gin ma judagu. 12 Piny ceke ma n’i pii ma cwake man apokane mbe utie piny ma judagu iwu.

13 “‘Maeni giracwiya ma juvombgi ma wucikuru nineno ni gin ma judagu; kud jucamgi, kum gitie gin ma judagu: acur, acuth, ango ma col, 14 ulwith man kwond acey ceke, 15 kwond ungoro ceke, 16 udo, tula, winy nam, kwond abiba ceke, 17 kwiriloi, alungu, tula ma jutunge, 18 batha mi pii, ugoro, ango, 19 nunda, kwond ukok ceke, akonyo, man ulik. 20 Giracwiya ceke ma juvombgi ma nyalini* ma wotho iwi tiendgi ang’wen tie piny ma judagu iwu.

21 “‘I kind giracwiya ma nyalini ma juvombgi ma wotho iwi tiendgi ang’wen, wucopo camu kende kende ju ma badgi ni wi tiendgi ma gipor ko iwi ng’om. 22 Wuromo camu ma e: kwond bonyo ma tung’ tung’ ma wotho awotha, urogo, undir, man usene. 23 Giracwiya mange ceke ma nyalini ma juvombgi ma tiendgi ang’wen tie piny ma judagu iwu. 24 Wubibedo ma wucido nikum piny maeno. Ng’atu moko ci m’umulo kum avujgi bibedo m’ecido nitundo uthieno. 25 Ng’atu moko ci m’uyeyo avujgi ucikere nilwoko kendi pare; ebibedo m’ecido nitundo uthieno.

26 “‘Lei moko ci ma i ubong’ tiende ukaru, ento i ubong’ tiendene upokere ngo man ma gamu ngo cam kud i iye kan edog enyamu iye kendo utie gin m’ucido iwu. Ng’atu moko ci m’umulo kumgi bibedo m’ecido. 27 I kind giracwiya ceke ma wotho iwi tiendgi ang’wen, giracwiya moko ci ma kwo ma wotho iwi die tiende tie gin m’ucido iwu. Ng’atu moko ci m’umulo kum avujgi bibedo m’ecido nitundo uthieno. 28 Ng’atu m’uyeyo avujgi ucikere nilwoko kendi pare, man ebibedo m’ecido nitundo uthieno. Gitie piny m’ucido iwu.

29 “‘Maeni giracwiya ma nyalini iwi ng’om m’utie gin m’ucido iwu: vuyu, uyo, kwond rugwec ceke, 30 tokorogondo, kwigo, rugwec mi pii, rugwec mi kwiyo, man balang’ong’ana. 31 Giracwiya maeno ma nyalini gitie piny m’ucido iwu. Ng’atu moko ci m’umulo kum avujgi bibedo m’ecido nitundo uthieno.

32 “‘Piny moko ci ma gipodho i wiye kinde ma githo bibedo ni piny m’ucido, dok ebed ajeni mi yen, kendi, adila, kadi kendi mi saki. Ajeni moko ci ma jutiyo ko jucikiri niroyo i pii, man ebibedo m’ecido nitundo uthieno, kan i ng’eye ebidoko leng’. 33 Tek gipodho i ajeni mir ulobo, icikiri nirungo iye man piny moko ci m’ubino i iye bibedo ni piny m’ucido. 34 Kit cam moko ci ma pii m’uai i ajenine umulo kume bibedo ni gin m’ucido, man giramadha moko ci ma n’i ajenine bibedo ni gin m’ucido. 35 Gin moko ci m’avujgi upodho i wiye bibedo ni gin m’ucido. Nik’ebed kendo kadi babula ma nyanok, jucikiri nituro iye nziki nziki. Gicido man gibibedo ni piny m’ucido iwu. 36 Kulo ku vur ma jugwoko iye pii kende re ma bibedo asu leng’, ento ng’atu moko ci m’umulo avujgi bibedo m’ecido. 37 Tek avujgi upodho iwi kodhi moko ma jubecicoyo, kodhine bibedo leng’ asu. 38 Ento tek jukonjo pii iwi kodhine man ng’et avuje moko upodho i wiye, kodhine bibedo ni gin m’ucido iwu.

39 “‘Tek lei moko ma wucopo camu utho, ng’atu moko ci m’umulo kum avuje bibedo m’ecido nitundo uthieno. 40 Ng’atu moko ci m’ucamu kum avuje ucikere nilwoko kendi pare, man ebibedo m’ecido nitundo uthieno. Ng’atu moko ci m’uyeyo avuje ucikere nilwoko kendi pare, man ebibedo m’ecido nitundo uthieno. 41 Giracwiya ceke ma nyalini m’i ng’om utie gin ma judagu. Kud jucame. 42 Kud wucam giracwiya moko ci ma mol ku kore, giracwiya moko ci ma wotho iwi tiende ang’wen kunoke giracwiya moko ci m’i ng’om ma nyalini ma tiendgi dupa, kum gitie piny ma judagu. 43 Kud wudwokuru giwu ni gin ma judagu nikum giracwiya moko ci ma nyalini, kud wuciduru giwu, man kud wudwokuru giwu ni gin m’ucido nikumgi. 44 Kum an a Yehova Mungu mwu, man wucikuru nidwokuru leng’ man nibedo leng’, pilembe an a leng’. Dong’ kud wudwokuru giwu* ni piny m’ucido nikum giracwiya moko ci ma nyalini ma wotho iwi ng’om. 45 Kum an a Yehova, m’ubewodhowu kud i ng’om mi Misiri pi ninyuthara iwu nia an a Mungu, man wucikuru nibedo leng’, pilembe an a leng’.

46 “‘Eno tie cik pi lei ma tung’ tung’, giracwiya ma juvombgi, giracwiya ceke ma kwo* ma wotho i die pii, man giracwiya* ceke ma nyalini m’i wi ng’om, 47 pi niketho tung’ tung’ i kind piny m’ucido ku ma leng’, man i kind giracwiya ma kwo ma jucopo camu ku ma jucopo camu ngo.’”

12 Yehova umedere niweco i bang’ Musa, ewacu kumae: 2 “Yer ni Juisrael kumae: ‘Tek dhaku moko ugamu iye man enyolo nyathin ma nico, ebibedo m’ecido pi nindo abiro, tap calu m’ebedo m’ecido i saa m’ebeneno iye nindo pare. 3 I nindo mir aborane, jubitimo yaa i dendkum mi yom nyathinne. 4 Dhakune bimedere nidwokere leng’ nikum rimo pi nindo mange pier adek wi adek. Kud emul kum piny moko ci ma leng’ man kud emond i kabedo ma leng’, nitundo m’ebidaru nindo pare mi dwokirileng’.

5 “‘Tek enyolo nyathin ma nyaku, ebilund bedo m’ecido pi nindo apar ang’wen, tap calu m’ebedo m’ecido i saa m’ebeneno iye nindo pare. Ebimedere nidwokere leng’ nikum rimo pi nindo mange pier abusiel wi abusiel. 6 Saa ma nindo mi dwokirileng’ pare pi nyathin ma nico kadi ma nyaku bithum, ebikelo nyathi nyog urombo acel ma oro pare ukadhu ngo acel pi lam m’awang’a man nyathin akuru mi pacu acel kunoke akuru mi lum acel pi lam mi dubo i bang’ jalam i dhu kamondo mi hema mi rombo. 7 Jalamne bitere i wang’ Yehova man ebitimo adunya pi dhakune, e ebidoko leng’ nikum rimo m’uoy kud i kume. Eno tie cik pi dhaku m’unyolo nyodo, dok ebed nyathin ma nico kadi ma nyaku. 8 Ento tek dhakune copo nwang’u ngo urombo, ebilund tero akuru ario mi lum kunoke nyithindh akuru ario mi pacu, acel pi lam m’awang’a man ma kucelo pi lam mi dubo, man jalam bitimo adunya pire, e ebidoko leng’.’”

13 Yehova umedere niweco i bang’ Musa gikud Arun, ewacu kumae: 2 “Tek piny moko ukwot i dendkum ng’atu moko, nik’ebed nyunyu kunoke kume urwodho man edoko ni dhobu* i dend kume, jucikiri nitere i bang’ Arun ma jalam kunoke i bang’ ng’atu acel m’i kind wote ma gi julam. 3 Jalam bing’iyo wang’ rem ma n’i dend kumene. Tek yukkum ma n’i wang’ rembe udoko ma tar man wang’ rembe ubenen nia emwony nisagu dendkum, nwang’u etie dhobu. Jalam bing’iye man ebing’olo nia ng’atune cido. 4 Ento tek dendkum ng’atu m’urwodhone udoko ma tar man ebenen nia emwony nisagu dend kume mange, man yukkume udoko ma tar, e jalam bikoyo ng’atu ma tie ku rembe kende pi nindo abiro. 5 I ng’eye, jalam bing’iyo ng’atune i nindo mir abirone, man tek ubenen nia rembe ujik man enyay ungo i dend kume, jalam bikoyo ng’atune kende pi nindo mange abiro.

6 “Jalam bidong’iye kendo i nindo mir abirone; tek wang’ rembe uthwo man enyay ungo i dend kume, jalamne bing’olo nia e leng’, ebino kende kende nyunyu. E ng’atune bilwoko kendi pare man ebidoko leng’. 7 Ento tek nyunyune* unyay andha i dend kume i ng’ey m’enyuthere i wang’ jalam kara ung’ol nia etie leng’, ebidonyuthere kendo* i wang’ jalam. 8 Jalam bing’iye, man tek nyunyune unyay i dend kume, e jalamne bing’olo nia ecido. Eno tie dhobu.

9 “Tek twoyo mi dhobu umaku ng’atu moko, jucikiri nitere i bang’ jalam, 10 man jalam biwong’iye. Tek piny ma tar ukwot i dend kume man eloko yuk kume udoko ma tar, man dhu ka m’ukwotne utuc, 11 etie dhobu ma galu lee i dendkum; e jalam bing’olo nia ng’atune cido. Kud ekoye kakende, pilembe ecido. 12 Tek dhobune unyay i kume zoo man eumo kum ng’atune niai i wiye nitundo i tiende, kaka moko ci ma jalam copo neno, 13 man tek jalam ung’iye man eneno nia dhobu uromo dend kume zoo, e ebing’olo nia ng’atu ma dhobu umakune tie leng’.* Calu ma dhobune zoo udoko ma tar, etie leng’. 14 Ento tek rem moko ma dhoge tuc uwok i kum ng’atune, ebibedo m’ecido. 15 Tek jalam uneno dhu rem m’utucne, ebing’olo nia ng’atune cido. Rem ma dhoge tucne tie piny m’ucido. Eno tie dhobu. 16 Ento tek rem ma dhoge tucne udoko kendo ma tar, e ebibino i bang’ jalam. 17 Jalam biwong’iyo ng’atune, man tek eneno rembe udoko ma tar, e jalam bing’olo nia ng’atu ma rem n’i kumene utie leng’. E leng’.

18 “Tek vur ukwodo kum ng’atini man ekey, 19 ento piny ma tar ukwot kaka vurne kunoke piny ma nyangberu ngberu urwodho kakare, ecikere nicinyuthere ni jalam. 20 Jalam bing’iye, man tek ubenen nia emwony nisagu dendkum man yuk kume udoko ma tar, e jalam bing’olo nia ecido. Eno tie twoyo mi dhobu m’umoc kaka vur. 21 Ento tek jalam ung’iye man eneno nia yukkum ma tar umbe i wang’e man nia emwony ungo nisagu dendkum, bende tek ubenen nia ekwor, e jalam bikoye kakende pi nindo abiro. 22 Man tek ubenen kamaleng’ nia enyay i dend kume, e jalam bing’olo nia ecido. Etie tho. 23 Ento tek piny m’urwodhone ujik kakar acel kende man enyay ungo, etie kende kende akwoda kwoda ma vur re m’unyayu; jalam bing’olo nia ng’atune leng’.

24 “Kunoke tek ng’atu moko tie ku poyomac i kume man wang’ poyo m’ukey cuu cuu ngone urwodho nyangberu ngberu kunoke nyatar tar, 25 e jalam bing’iye. Tek yukkum ma n’i ka m’urwodhone udoko ma tar man ubenen nia emwony nisagu dendkum, eno tie dhobu re m’umoc kaka poyone, man jalam bing’olo nia ng’atune cido. Eno tie twoyo mi dhobu. 26 Ento tek jalam ung’iye man eneno nia yukkum ma tar umbe i wang’ ka m’urwodhone, man emwony ungo nisagu dendkum, e jalam bikoyo ng’atune kende pi nindo abiro. 27 Jalam bing’iyo ng’atune i nindo mir abiro, man tek ubenen kamaleng’ nia elal i dend kume, e jalam bing’olo nia ng’atune cido. Eno tie twoyo mi dhobu. 28 Ento tek piny m’urwodhone ujik kakar acel kende man enyay ungo i dend kume man ekwor, etie kende kende poyo re m’ukwot, e jalam bing’olo nia ng’atune leng’, pilembe tie poyo re m’ukwot.

29 “Tek rem upodho i kum ng’atu ma nico kunoke ma dhaku, i wiye kunoke i tike, 30 e jalam bing’iyo wang’ rembe. Tek ubenen nia emwony nisagu dendkum man yukkum ma n’i wang’e ubogere man e nyatar tar, e jalam bing’olo nia ng’atune ucido; eno tie tho m’i the yukwic kunoke m’i the yirtik. Etie dhobu mi wic kunoke mi tik. 31 Ento tek jalam uneno nia rembe ubenen nia emwony ungo nisagu dendkum man yukkum ma col umbe i wang’e, jalam ucikere nikoyo ng’atu ma rem n’i kumene kende pi nindo abiro. 32 Jalam bing’iyo rembe i nindo mir abirone, man tek kaka ma rembe n’i iye unyay ungo man yukkum m’ubogere utwii ngo i wang’e, man tek kaka ma rembe n’i iye ubenen nia umwony ungo nisagu dendkum, 33 jucikiri ninyaru wiye kunoke yir tike, ento jubinyaru ngo kaka ma rembe n’i iye. I ng’eye, jalam bikoyo ng’atu ma rem n’i kumene kende pi nindo abiro.

34 “Jalam bidong’iyo kaka ma rem n’i iyene kendo i nindo mir abirone, man tek rem m’i the yuk wiye man m’i the yir tike ulal ungo i dendkumne man ubenen nia emwony ungo nisagu dendkum, e jalam bing’olo nia ng’atune leng’; ng’atune ucikere nilwoko kendi pare man ebidoko leng’. 35 Ento tek ubenen kamaleng’ nia rembe ulal i dend kume i ng’ey m’edwokere leng’, 36 jalam bing’iyo ng’atune, man tek rembe ulal i dend kume, jalam bisendere ngo niyenyo yukkum m’ubogere; ng’atu maeno ucido. 37 Ento tek eng’iye man enwang’u nia rembe ulal ungo man yukkum ma col utwii i iye, nwang’u rembe ukey. Ng’atune utie leng’, man jalam bing’olo nia etie leng’.

38 “Tek piny urwodho i dendkum ng’atu moko ma nico kunoke ma dhaku man tek piny m’urwodhone ma tar, 39 jalam bing’iyogi. Tek piny m’urwodho i kumene ukwor ma tar, nwang’u gwenyo ma timojo rac ungo re m’upodho i kume. Ng’atu maeno tie leng’.

40 “Tek yuk wi ng’atu moko ma nico ulwer man wiye wang’, ng’atune tie leng’. 41 Tek yuk wiyene lwer yor i terwang’e man keca re m’uwang’, nwang’u e leng’. 42 Ento ka rem ma nyangberu ngberu upodho kaka m’uwang’ i die wiye kunoke i terwang’e, eno tie dhobu re m’upodho i die wiye kunoke i terwang’e. 43 Jalam bing’iyo ng’atune; tek kaka ma rembe ukwodo i die wiye m’uwang’ kunoke i terwang’ene utie nyangberu ngberu man ebenen calu dhobu i dend kume, 44 e nwang’u etie won dhobu. Ecido, man jalam ucikere ning’olo nia ecido nikum twoyo ma n’i die wiye. 45 Jubiyeco kendi pa won dhobu m’utie ku twoyone, ebiweko yuk wiye zakara, ecikere niumo yir m’i dhu ume man nikok kumae: ‘Acido yo, acido yo!’ 46 Ebibedo m’ecido i nindo ceke m’etie ku twoyone. Calu ecido, ebibedo kakende. Kabedo pare bibedo woko i ng’ey kagonjo.

47 “Tek twoyo mi dhobu umaku bongu, dok ebed bongu mi yuk urombo kadi bongu ma nwang’,* 48 dok ebed i wuzi mi bongu m’acwiya kadi ke thol m’akieda mi bongu ma nwang’ kunoke mi yuk urombo, kunoke adila kadi gin moko ci ma juyiko kud adila, 49 tek tho m’umaku bongu, adila, wuzi mi bongu m’acwiya man mi yuk urombo, kunoke piny moko ci ma juyiko kud adila ubenen mi rangi mi ith lum ma nyanumu numu kunoke ma nyakwar kwar, e nwang’u dhobu re m’umake; man jucikiri nitere i bang’ jalam. 50 Jalam bing’iyo thoje, man ecikere nikoyo piny ma thoje n’i kume kakende pi nindo abiro. 51 Kinde m’ebeng’iyo thoje i nindo mir abirone man eneno nia enyay i bongune, i wuzi mi bongu m’acwiya, i thol m’akieda kadi i adila (kadok nwang’u adilane jutiyo ko pi lembang’o de), nwang’u thoje tie dhobu ma rac dit, man etie piny m’ucido. 52 Ecikere niwang’u bongune, nik’ebed wuzi mi bongu m’acwiya kunoke thol m’akieda mi yuk urombo, kunoke mi bongu ma nwang’ kadi ke piny moko ci ma juyiko kud adila ma thoje unwang’ere i iye; kum etie dhobu ma rac dit. Jucikiri niwang’e i mac.

53 “Ento tek jalam ung’iye man thoje unyay ungo i bongune, kadi i wuzi mi bongu m’acwiya, kunoke i thol m’akieda, kadi i piny moko ci ma juyiko kud adila, 54 e jalam bing’olo nia julwok piny ma tho n’i kumene, man ebikoye kakende pi nindo mange abiro. 55 Jalam bilund ng’iyo piny ma tho n’i iyene i ng’ey ma julwoke mii. Tek ayi piny m’umakene ulokere ngo, kadok thoje unyay ungo i kume de, nwang’u ecido. Icikiri niwang’e ku mac pilembe dhobu udaru came, dok ebed yor i iye kunoke yo woko.

56 “Ento tek jalam ung’iye man i ng’ey ma julwoke mii enwang’u ka ma thoje n’i iye ukwor, ebiyece cen kud i kum kendine kunoke kud i kum adila, kadi wuzi mi bongu m’acwiya kunoke thol m’akieda. 57 Enre tek edog emoc kendo i kum theng bongune mange kadi i kum wuzi mi bongu m’acwiya kunoke i kum thol m’akieda, kadi i kum piny moko ci ma juyiko kud adila, eno nwang’u ebenyay; e jucikiri niwang’u piny moko ci ma thoje umaku ku mac. 58 Ento tek thoje urwinyo kud i kum bongu kadi i kum wuzi mi bongu m’acwiya kunoke thol m’akieda kadi piny moko ci ma juyiko kud adila m’ilwoko, icikiri nilwoke kendo wang’ mir arionde, man ebidoko leng’.

59 “Eni tie cik mi twoyo mi dhobu m’umaku bongu mi yuk urombo kadi bongu ma nwang’, kunoke kum wuzi mi bongu m’acwiya kadi thol m’akieda, kunoke piny moko ci ma juyiko kud adila, pi ning’olo nia etie leng’ kunoke ecido.”

14 Yehova umedere niweco i bang’ Musa, ewacu kumae: 2 “Maeni tie cik pi won dhobu i nindo ma jubiyiyo dwokirileng’ pare, i saa m’ukwayu jutere i bang’ jalam. 3 Jalam biwok woko i ng’ey kagonjo pi ning’iyo ng’atune. Tek dhobu parene ukey, 4 jalam bing’olo ire nia ekel piny ma e pi dwokirileng’ pare: winyo ario ma kwo ma leng’, yend tido, wuzi ma kwar ngbo, man hizop. 5 Jalam bing’olo nia juneg winyone acel i agulu mir ulobo iwi pii m’ubemol. 6 Ento ecikere niting’o winyone ma kwo karacelo ku yend tido, wuzi ma kwar ngbo, man hizop, e eroygi karacelo i rimb winyo ma junego iwi pii m’ubemol. 7 E i ng’eye, ebikire wang’ abiro i kum ng’atu m’ubedwokere leng’ nikum dhobu man ebing’olo nia e leng’, man ebiweko winyo ma kwone uringi i lum.

8 “Ng’atu m’ubedwokere leng’ne ucikere nilwoko kendi pare, nilielo yuk kume ceke man nijom, e ebidoko leng’. I ng’ey maeno, ecopo dwogo i kagonjo, ento ebibedo ngo i hema pare pi nindo abiro. 9 I nindo mir abirone, ecikere nilielo yuk wiye ceke, yir tike man bind wang’e. I ng’ey m’elielo yir mi kume ceke, ebilwoko kendi pare man ebijom; e ebidoko leng’.

10 “I nindo mir aborane, ebigamu nyithi nyogi rombe ario ma mulima mbe i kumgi, nyathi vong urombo acel ma oro pare ukadhu ngo acel ma mulima mbe i kume, thenge adek wi apar mir efa* mi mogo ma yom ma jujebo ku mo ni girathiera mi nying cam, man mo log* acel; 11 man jalam m’ung’olo nia ng’atune tie leng’ bikelo ng’atu m’ubedwokere leng’ne, karacelo ku girathieranegi i wang’ Yehova i dhu kamondo mi hema mi rombo. 12 Jalam bigamu nyathi nyog urombone acel man ebithiere ni girathiera mi kier karacelo ku mo log acel, man ebilekogi kun ku kun ni girathiera m’aleka i wang’ Yehova. 13 I ng’eye, ebithumo nyathi nyog urombone kaka ma jubed juthumo iye lam mi dubo man lam m’awang’a i kabedo ma leng’, pilembe calu lam mi dubo, girathiera mi kier de tie pa jalam. Etie piny ma leng’ m’usagu.

14 “I ng’eye, jalam bigamu kum rimo mi girathiera mi kierne, man ebikethe i the ith ma yor acwic pa ng’atu m’ubedwokere leng’ne, iwi nyig cinge ma dit ma yor acwic, man iwi nyig tiende ma dit ma yor acwic. 15 Jalam bigamu kum mo moko m’i logne man ebikonje i die cinge ma yor acam. 16 Jalam biroyo nyig cinge ma yor acwic i mo ma n’i die cinge ma yor acam, man ebikiro kum moje moko ku nyig cinge wang’ abiro i wang’ Yehova. 17 I ng’eye, jalam biketho kum mo m’udong’ i die cinge i the ith ma yor acwic pa ng’atu m’ubedwokere leng’ne, iwi nyig cinge ma dit ma yor acwic, man iwi nyig tiende ma dit ma yor acwic iwi rimo mi girathiera mi kier. 18 Jalam biketho mo m’udong’ i die cinge iwi ng’atu m’ubedwokere leng’ne, man ebitimo adunya pire i wang’ Yehova.

19 “Jalam bithiero lam mi dubo man ebitimo adunya pi ng’atu m’ubedwokere leng’ nikum cilo pare, i ng’eye ebithumo lam m’awang’a. 20 Jalam bidothiero lam m’awang’ane ku girathiera mi nying cam iwi pemlam, man ebitimo adunya pi ng’atune, e ebidoko leng’.

21 “Ento tek ng’atune jacan man jamcinge nok, ebigamu nyathi nyog urombo acel ni girathiera mi kier pi girathiera m’aleka, kara jutim ko adunya pire, karacelo kud apaje mir efa* mi mogo ma yom ma jujebo ku mo ni girathiera mi nying cam, mo log acel, 22 man akuru ario mi lum kunoke nyithindh akuru ario mi pacu, nimakere ku jamcinge. Acel bibedo pi lam mi dubo, ma kucelo ke pi lam m’awang’a. 23 I nindo mir aborane, ebiterogi i bang’ jalam i dhu kamondo mi hema mi rombo i wang’ Yehova kara dwokirileng’ pare uyiyere.

24 “Jalam bigamu nyathi nyog urombo mi girathiera mi kier ku mo log acel, man jalam bilekogi kun ku kun ni girathiera m’aleka i wang’ Yehova. 25 I ng’eye, jalam bithumo nyathi nyog urombo mi girathiera mi kier man ebigamu kum rimb girathiera mi kierne moko ebiketho i the ith ma yor acwic pa ng’atu m’ubedwokere leng’ne, iwi nyig cinge ma dit ma yor acwic, man iwi nyig tiende ma dit ma yor acwic. 26 Jalam bikonjo kum moje moko i die cinge gire ma yor acam, 27 man ebitono ku nyig cinge ma yor acwic kum mo moko ma n’i die cinge ma yor acamne wang’ abiro i wang’ Yehova. 28 Man jalam biketho kum mo ma n’i die cinge i the ith ma yor acwic pa ng’atu m’ubedwokere leng’ne, iwi nyig cinge ma dit ma yor acwic, man iwi nyig tiende ma dit ma yor acwic kaka ma rom m’eketho iye rimo mi girathiera mi kier. 29 I ng’eye, jalam biketho mo m’udong’ i die cinge iwi ng’atu m’ubedwokere leng’ne, pi nitimo adunya pire i wang’ Yehova.

30 “Ebithiero akuru acel mi lum kunoke nyathin akuru acel mi pacu, nimakere ku jamcinge, 31 acel m’ecopo nwang’u pi lam mi dubo, ma kucelo ke pi lam m’awang’a karacelo ku girathiera mi nying cam; man jalam bitimo adunya pi ng’atu m’ubedwokere leng’ne i wang’ Yehova.

32 “Eno utie cik pi ng’atu ma dhobu umaku ma re jamcinge mbe i nindo ma juyiyo dwokirileng’ pare.”

33 I ng’eye, Yehova uyero ni Musa gikud Arun kumae: 34 “Saa ma wubimondo i ng’om mi Kanan m’abecimiyo iwu ni aba, man tek aketho twoyo mi dhobu umaku ot moko m’i ng’om mwu, 35 e won ode ucikere nibino i bang’ jalam man niyero ire kumae: ‘Kit tho moko umaku ot para.’ 36 Jalam bing’olo nia juwodh piny ceke kud i ode i wang’ nibino ng’iyo thoje, kara kud ebin eng’ol nia piny ceke ma n’i ode ucido; i ng’ey maeno, jalam bimondo i ode pi ning’iye cuu. 37 Ebing’iyo kaka ma thoje umaku, man tek tho m’umaku kor ode utie mi rangi mi ith lum ma nyanumu numu kunoke ma nyakwar kwar, man tek ubenen nia emwony nisagu kor ot, 38 jalam biwok kud i dhugola mi ode man ebikoyo ode kakende pi nindo abiro.

39 “I ng’eye, jalam bidwogo i nindo mir abirone man ebing’iye cuu. Tek thoje unyay i kor ode, 40 jalam bing’olo nia juwodh kidi ma tho umakune cen man jubaye woko i ng’ey adhura kaka m’ucido. 41 I ng’eye, ebiketho jugob i ode cuu mandha man ulobo ma jugobone jubioyo woko i ng’ey adhura kaka m’ucido. 42 Jubidoroyo kidi mange kaka kidi ma juwodho, man ebitiyo kud ulobo mange pi nifiyo kor ode.

43 “Tek asu thoje udwogo man ucaku kendo i ode i ng’ey ma nwang’u juwodho kidi, jugobo i ode man jufiyo kore kendo, 44 e jalam bimondo i ode man ebing’iye. Tek thoje unyay i iye, nwang’u dhobu ma rac dit re ma n’i ode. Ode cido. 45 Ebiketho jubirwombo ode, man ebiketho juyey kidine, yende, man ulobone ceke juter woko i ng’ey adhura kaka m’ucido. 46 Ento ng’atu moko ci ma bimondo i ode i kind nindo ma jukoye kakende bibedo m’ecido nitundo uthieno; 47 ng’atu moko ci m’uvuto i ode ucikere nilwoko kendi pare, man ng’atu moko ci m’ucamu i ode ucikere nilwoko kendi pare.

48 “Ento tek jalam ubino man eneno nia thoje unyay ungo i ode i ng’ey ma jufiyo kore kendo, e jalam bing’olo nia ode leng’, pilembe thoje thum. 49 Pi nidwoko ode leng’ nikum cilo,* ebigamu winyo ario, yend tido, wuzi ma kwar ngbo, man hizop. 50 Ebinego winyone acel i agulu mir ulobo iwi pii m’ubemol. 51 I ng’eye, ebigamu yend tido, hizop, wuzi ma kwar ngbo, ku winyone ma kwo man ebiroyogi i rimb winyo ma junego man i pii m’ubemol, e ebikire wang’ abiro yor i bang’ ode. 52 Man ebidwoko ode leng’ nikum cilo* ku rimb winyo, pii m’ubemol, winyo ma kwo, yend tido, hizop, man wuzi ma kwar ngbo. 53 I ng’eye, ebiweko winyo ma kwone woko i ng’ey adhura uringi i lum man ebitimo adunya pi ode, e ode bidoko leng’.

54 “Eno tie cik pi kwond dhobu ceke, rem m’i the yukwic kunoke m’i the yirtik, 55 dhobu mi kendi kadi ke mi ot, 56 man pi piny ma kwot akwota i kum, nyunyu, man piny ma rwodho arwodha i kumjo, 57 pi ning’eyo ka nyo piny moko cido kunoke e leng’. Eno tie cik pi dhobu.”

15 Yehova umedere niweco i bang’ Musa gikud Arun, ewacu kumae: 2 “Wuwec i bang’ Juisrael man wuwac igi kumae: ‘Tek piny moko ucwir kud i wathkum mi nyodo* pa nico moko, nwang’u piny m’ucwirne ucide. 3 Ecido nikum piny m’ucwirne, kadok pinje ubemedere asu niwok kud i wathkume mi nyodo kunoke ucule, ebibedo asu m’ecido.

4 “‘Kavuto moko ci ma ng’atu ma piny ucwir kud i kume uvuto i wiye bidoko ni gin m’ucido, man piny moko ci m’ebedo i wiye bidoko ni gin m’ucido. 5 Ng’atu m’umulo kum kavuto parene ucikere nilwoko kendi pare, nijom, man ebibedo m’ecido nitundo uthieno. 6 Ng’atu moko ci m’ubedo iwi piny ma ng’atu ma piny ucwir kud i kume ubedo i wiye ucikere nilwoko kendi pare, nijom, man ebibedo m’ecido nitundo uthieno. 7 Ng’atu moko ci m’umulo kum ng’atu ma piny ubecwir kud i kume ucikere nilwoko kendi pare, nijom, man ebibedo m’ecido nitundo uthieno. 8 Tek ng’atu ma piny ubecwir kud i kume ung’ulo law i kum ng’atu ma leng’, ng’atune ucikere nilwoko kendi pare, nijom, man ebibedo m’ecido nitundo uthieno. 9 Kabedo moko ci ma jubedo i wiye iwi lei ma ng’atu ma piny ubecwir kud i kume ubedo i wiye bidoko ni gin m’ucido. 10 Ng’atu m’umulo kum piny moko ci ma nwang’u ebedo i wiye, man ng’atu moko ci m’uyeyo pinje bilwoko kendi pare, ebijom, man ebibedo m’ecido nitundo uthieno. 11 Tek ng’atu ma piny ubecwir kud i kume ulwoko ngo cinge ku pii man emulo kum ng’atu moko, ng’atune ucikere nilwoko kendi pare, nijom, man ebibedo m’ecido nitundo uthieno. 12 Jucikiri ning’enyo agulu mir ulobo ma ng’atu ma piny ubecwir kud i kume umulo, man agulu mi yen m’emulo jucikiri nilwoko ku pii.

13 “‘Tekene piny m’ubecwirne ucungo man ng’atune udoko leng’, ebikwanu nindo abiro pi dwokirileng’ pare; ecikere nilwoko kendi pare man nijom i pii m’ubemol, e ebidoko leng’. 14 I nindo mir aborane, ecikere niting’o akuru ario mi lum kunoke nyithindh akuru ario mi pacu, ebin i wang’ Yehova i dhu kamondo mi hema mi rombo man emiigi i bang’ jalam. 15 Man jalam bithierogi, acel ni lam mi dubo, ma kucelo ke ni lam m’awang’a, e jalam bitimo adunya pire i wang’ Yehova pi piny m’ucwir i kumene.

16 “‘Tekene piikum* ng’atu moko ma nico uwok, ecikere nijomo kume zoo ku pii man ebibedo m’ecido nitundo uthieno. 17 Ecikere nilwoko kendi moko ci, kadi adila ma piikumne n’i wiye ku pii, man pinje bibedo m’ecido nitundo uthieno.

18 “‘Tekene nico moko uvuto ku dhaku man pii kume uwok, gicikiri nijom man gibibedo ma gicido nitundo uthieno.

19 “‘Tekene rimo ubecwir i kum dhaku moko, ebimedere nibedo i cilo pare ma kubang’ nindo m’eneno pi nindo abiro. Ng’atu moko ci ma bimulo kum dhakune bibedo m’ecido nitundo uthieno. 20 Piny moko ci m’evuto i wiye kinde m’ecido nikum nindo pare m’ebeneno bidoko ni gin m’ucido, man piny moko ci m’ebedo i wiye bidoko ni gin m’ucido. 21 Ng’atu moko ci m’umulo kum kavuto pa dhakune ucikere nilwoko kendi pare, nijom, man ebibedo m’ecido nitundo uthieno. 22 Ng’atu moko ci m’umulo kum piny m’ebedo i wiye ucikere nilwoko kendi pare, nijom, man ebibedo m’ecido nitundo uthieno. 23 Tek ebedo iwi kavuto kunoke iwi piny mange, ng’atu m’umulo piny m’ebedo i wiyene bibedo m’ecido nitundo uthieno. 24 Tek ng’atu ma nico moko uvuto kude, man cilo pare ma kubang’ nindo m’eneno uwok i kum ng’atu ma nicone, ebibedo m’ecido pi nindo abiro, man kavuto moko ci ma nicone uvuto i wiye bibedo m’ecido.

25 “‘Tek rimo ubecwir i kum ng’atu moko ma dhaku pi nindo ma dupa ma ke etie ngo saa ma nja m’eneno iye nindo pare, kunoke ecwir pi kare m’ulwar nisagu m’ecwir ko i saa m’eneno iye nindo pare, ebibedo m’ecido i kind nindo ceke ma rimone ubecwir i iye, tap calu m’ebedo m’ecido kinde m’ebeneno iye nindo pare. 26 Kavuto moko ci m’evuto i wiye i kind nindo ma rimone ubecwir i iye bidoko calu kavuto pare m’evuto i wiye kinde m’ecido nikum nindo pare m’ebed eneno, man piny moko ci m’ebedo i wiye bidoko ni gin m’ucido calu m’ebedo m’ecido kinde m’ebeneno nindo pare. 27 Ng’atu moko ci m’umulo kum pinje bibedo m’ecido, man ecikere nilwoko kendi pare, nijom, man ebibedo m’ecido nitundo uthieno.

28 “‘Ento ka rimo m’ubecwir kud i kumene ucungo, ebikwanu nindo abiro, kan ebidoko leng’. 29 I nindo mir aborane, ecikere niting’o akuru ario mi lum kunoke nyithindh akuru ario mi pacu, man ebiterogi i bang’ jalam i dhu kamondo mi hema mi rombo. 30 Jalam bithiero acel ni lam mi dubo man ma kucelo ni lam m’awang’a, man ebitimo adunya pi dhakune i wang’ Yehova pi piny m’ucido m’ucwir kud i kume.

31 “‘I ayi maeno re ma wucikuru nigwoko Juisrael i kum cilo migi, kara kud githo i cilo migi ma gicido ko hema mi thier para ma n’i kindgi.

32 “‘Eno tie cik pi nico ma piny ucwir kud i kume, nico m’ucido nikum pii kume m’uwok, 33 man pi dhaku kinde m’ecido nikum nindo pare m’ebeneno, nico kadi ke dhaku moko ci ma piny moko ucwir kud i kume, man nico m’uvuto ku dhaku m’ucido.’”

16 Yehova uweco i bang’ Musa i ng’ey tho pa wot Arun ario ma githo pilembe gicoro i vut Yehova. 2 Yehova uyero ni Musa kumae: “Yer ni Arun m’umeru nia kud ebed emond saa ceke i kabedo ma leng’ yor i ng’ey ridho, i wang’ jam umo wi Sanduku, kara kud etho; pilembe abinyuthara i afuru iwi jam umo wi Sandukune.

3 “Arun ucikere nikelo piny ma e kinde m’ebemondo i kabedo ma leng’: nyathi thwon dhiang’ acel pi lam mi dubo, man nyog urombo acel pi lam m’awang’a. 4 Ecikere nikendo kanzu ma leng’ mi bongu ma nwang’,* man pali* mi bongu ma nwang’ ucikere niumo kume,* man ecikere nitwiyere ku mukaba mi bongu ma nwang’, man ebiroyo jamboyo wic ma segi mi bongu ma nwang’ i wiye. Gitie kendi ma leng’. Ebilar jom kan ebironyogi.

5 “Ecikere nigamu kud i bang’ cokiri mir Israel nyithi nyogi diegi ario pi lam mi dubo man nyog urombo acel pi lam m’awang’a.

6 “E Arun ucikere nithiero thwon dhiang’ mi lam mi dubo ma pire gire, man nitimo adunya pire gire man pi ot pare.

7 “I ng’eye, ebigamu nyogi diegi ario man ebiketho gibicungo i wang’ Yehova i dhu kamondo mi hema mi rombo. 8 Arun bigoyo gagi iwi diegi arione, gagi acel ni Yehova man gagi ma kucelo ni Azazel.* 9 Arun bikelo diel ma gagi upodho i wiye ni Yehova man ebithiere ni lam mi dubo. 10 Ento diel ma gagi upodho i wiye pir Azazel, jucikiri nikele ma kwo ecung i wang’ Yehova pi nitimo adunya i wiye, kara juwek ecidhi pir Azazel i langa.

11 “Arun bikelo thwon dhiang’ mi lam mi dubo ma pire gire, man ebitimo adunya pire gire man pi ot pare; yo ng’ey maeno ebithumo thwon dhiang’ mi lam mi dubone ma pire gire.

12 “I ng’eye, ebigamu cugimac pong’ tabu mi mac kud iwi pemlam ma n’i wang’ Yehova, man udok ma ng’wice ng’ar ma yom pong’ cing’ ario, man ebikelogi i ng’ey ridho. 13 Ebiketho bende udok ma ng’wice ng’ar i mac i wang’ Yehova, man yiro mir udok ma ng’wice ng’ar biumo wi jam umo wi Sanduku ma n’i wi Lembatuca, kara kud etho.

14 “Ebigamu kum rimb thwon dhiang’ne moko ebikiro ku nyig cinge i wang’ jam umo wi Sanduku i thenge ma yo nyangu, man ebikiro kum rimone moko ku nyig cinge wang’ abiro i wang’ jam umo wi Sanduku.

15 “I ng’eye, ebithumo diel mi lam mi dubo ma pi dhanu man ebikelo rimbe i ng’ey ridho, man ebitimo lembe ma rom ku rimbe calu m’etimo ku rimb thwon dhiang’; ebikire yor i bang’ jam umo wi Sanduku man i wang’ jam umo wiye.

16 “Ecikere nitimo adunya pi kabedo ma leng’ pi timo m’ucido mi Juisrael man pi kier ku dubo migi. Eno re m’utie gin m’ecikere nitimo i hema mi rombo ma n’i kindgi, i kind timo migi m’ucido.

17 “Ng’atu mange mbe m’ucikere nibedo i hema mi rombo niai i saa m’emondo pi nitimo adunya i kabedo ma leng’, nitundo m’ebiwok. Ebitimo adunya pire gire, pi ot pare, man pi cokiri ceke mir Israel.

18 “I ng’eye, ebiwok i bang’ pemlam ma n’i wang’ Yehova, ebitimo adunya pi pemlamne, man ebigamu rimb thwon dhiang’ ku rimb diende moko ebiketho i tung pemlam i thenge zoo. 19 Ebikiro bende kum rimone moko iwi pemlam wang’ abiro ku nyig cinge man ebilonye, e ebidwoke leng’ nikum timo m’ucido mi Juisrael.

20 “Kinde m’edaru timo adunya pi kabedo ma leng’, hema mi rombo, man pemlam, ebikelo bende diel ma kwo. 21 Arun biketho cinge ario zoo iwi diel ma kwone man ebituco kosa ceke mi Juisrael i wiye, kier migi ceke, man dubo migi ceke; ebikethogi iwi diende man ebioro diende i langa i cing’ ng’atu ma jung’iyo* pi lembene. 22 Diende biyeyo dubo migi ceke i wiye ebicidho ko i ng’om langa, man ng’atune biwoweko diende ucidh i langa.

23 “I ng’eye, Arun bimondo i hema mi rombo man ebiwodho kendi ma nwang’ m’egam ekendo kinde m’emondo i kabedo ma leng’, man ebikethogi keca. 24 Ecikere nijom i kabedo ma leng’ man ebironyo kendi pare; i ng’eye ebiwok woko man ebithiero lam m’awang’a pare man lam m’awang’a mi dhanu, e ebitimo adunya pire gire man pi dhanu. 25 Ebiwang’u miyo mi lam mi dubo kara uduny iwi pemlam.

26 “Ng’atu m’ucidh uweko diel ma pir Azazel ucikere nilwoko kendi pare man nijom; i ng’ey maeno kan ecopo dwogo i kagonjo.

27 “Man thwon dhiang’ mi lam mi dubo ku diel mi lam mi dubo ma rimbgi jutero i kabedo ma leng’ pi nitimo adunya, jubiwodho woko i ng’ey kagonjo, man adilagi ku ring’gi man wey migi jubiwang’u ku mac. 28 Ng’atu m’uwang’ugi ucikere nilwoko kendi pare man nijom; i ng’ey maeno kan ecopo dwogo i kagonjo.

29 “Maeni bibedo cik ma nja iwu: I dwi mir abirone, i nindo apar mi dwije, wucikuru ninyayu can i iwu giwu,* man kud wutim tic moko ci, dok ebed anyoli kadi umondo ma bedo i kindwu. 30 I nindo maeno jubitimo adunya piwu pi ning’olo nia wutie leng’. E wubibedo leng’ nikum dubo mwu ceke i wang’ Yehova. 31 Etie sabatu mi yom ma zoo, man wucikuru ninyayu can i iwu giwu.* Etie cik ma nja.

32 “Jalam ma juwiro man ma juketho* ubed ni jalam kaka won bitimo adunya man bironyo kendi ma nwang’, ma en e kendi ma leng’. 33 Ebitimo adunya pi kamaleng’ m’usagu, pi hema mi rombo, man pi pemlam; ebitimo bende adunya pi julam man pi dhanu ceke mi cokiri. 34 Eno bibedo cik ma nja iwu, pi nitimo adunya pi Juisrael pi dubo migi ceke wang’ acel kubang’ oro.”

E etimo tap calu ma Yehova ung’olo ni Musa.

17 Yehova umedere niweco i bang’ Musa, ewacu kumae: 2 “Wec i bang’ Arun ku wote man Juisrael ceke, yer igi nia, ‘Yehova ung’olo kumae:

3 “‘“Tek ng’atu moko mi ot mir Israel uthumo thwon dhiang’ kunoke nyathi nyog urombo kadi diel i kagonjo, kunoke kan ethume woko i ng’ey kagonjo, 4 kakare nitere i dhu kamondo mi hema mi rombo pi nithiere ni Yehova i wang’ hema mi thier pa Yehova, rimo bibedo iwi ng’atune. Ecwiro rimo, man jucikiri nikabu* ng’atune cen kud i kind juthugi. 5 Eno tie kara lam ma Juisrael gibed githiero i die lum gibed gikele dong’ i bang’ Yehova i dhu kamondo mi hema mi rombo i bang’ jalam. Ukwayu gibed githiere ni lam mi kwiyocwiny ni Yehova. 6 Man jalam bikiro rimbe iwi pemlam pa Yehova i dhu kamondo mi hema mi rombo man ebiwang’u miyone kara eduny ni piny ma ng’wice ng’ar* ni Yehova. 7 Pieno gicikiri ngo nithiero kendo lam ni pajogi mir ayi pa diegi,* ma gibed gitimo kugi asara. Eno bibedo cik ma nja iwu i kind dhanu m’utuk mwu ceke.”’

8 “Icikiri niyero igi kumae: ‘Ng’atu moko ci mi ot mir Israel kunoke umondo moko ci ma bedo i kindwu m’uthiero lam m’awang’a kunoke lam 9 man m’ukele ngo i dhu kamondo mi hema mi rombo pi nithiere ni Yehova, jucikiri nikabe* cen kud i kind juthugi.

10 “‘Tek ng’atu moko mi ot mir Israel kadi umondo ma bedo i kindwu ucamu rimo moko ci, abiketho wang’a andha i kum ng’atu* m’ucamu rimone, man abikabe* cen kud i kind juthugi. 11 Kum kwo* mi ring’kum n’i rimo, man an gira amiye iwu iwi pemlam pi nitimo adunya piwu,* pilembe rimo re ma timo adunya nikum kwo* ma n’i iye. 12 Pi thelembe maeno re m’ayero ni Juisrael kumae: “Kudi ng’atu* moko ci m’i kindwu ucam rimo, kadok umondo ma bedo i kindwu de kud ucam rimo.”

13 “‘Tek Jaisrael kadi ke umondo moko ma bedo i kindwu ubedwaru lei man emaku lei moko mi lum kunoke winyo moko ma juromo camu, ecikere nicwiro rimbe man niumo wi rimone ku ng’om. 14 Kum kwo mi kwond ring’kum ceke n’i rimbe, pilembe kwo n’i iye. Pi thelembe maeno re m’ayero ni Juisrael kumae: “Kud wucam rimo mi kwond ring’kum moko ci, pilembe kwo* mi kwond ring’kum moko ci tie rimbe. Ng’atu ma bicame, jubikabe* cen.” 15 Tek ng’atu* moko, nik’ebed anyoli kadi ke umondo ucamu lei m’utho gire kunoke ma yedi mi lum uyeco, ecikere nilwoko kendi pare, nijom, man ebibedo m’ecido nitundo uthieno; i ng’eye ebidoko leng’. 16 Ento tek elwokogi ngo man ejom ungo,* e ebicungo i dhu kosa pare.’”

18 Yehova umedere niweco i bang’ Musa, ewacu kumae: 2 “Wec ku Juisrael man iyer igi kumae: ‘An a Yehova Mungu mwu. 3 Kud wutimuru calu dhanu m’i ng’om mi Misiri, kaka ma wubed wubedo i iye; kaka m’abeterowu i iye i ng’om mi Kanan de kud wuwok wutim gin ma dhanu m’i iye gitimo. Man cik migi de kud wulubi. 4 Wucikuru niworo telowic para mi pokolembe, man nigwoko cik para man niwotho i igi. An a Yehova Mungu mwu. 5 Wucikuru nigwoko cik para ku telowic para mi pokolembe; ng’atu m’ubetimo kumeno bikwo ni kumgi. An a Yehova.

6 “‘Kudi ng’atu moko m’i kindwu ucor i kum wedi pare ma ceng’ini pi nitimo kude ribiri.* An a Yehova. 7 Kud itim ribiri ku wuru, man kud itim ribiri ku meru. Etie meru, pieno kud itim ribiri kude.

8 “‘Kud itim ribiri ku ci wuru. Eno tie ninyayu lewic iwi wuru.*

9 “‘Kud itim ribiri ku nyameru, dok ebed nyawuru kunoke nyaku pa meru, kadok junyole i ot ma rom kunoke kaka mange.

10 “‘Kud itim ribiri ku nyawodi kunoke nyanyeri, pilembe gitie muneru peri giri.

11 “‘Kud itim ribiri ku nyaciwuru, ma en e kodhi pa wuru, pilembe etie nyameru.

12 “‘Kud itim ribiri ku wayu. Etie wat pa wuru ma gi rimo acel kude.

13 “‘Kud itim ribiri ku nyamin meru, pilembe etie wat pa meru ma gi rimo acel kude.

14 “‘Kud inyay lewic iwi umin wuru* m’itim ko ribiri ku dhaku pare. Kum etie ve wayu.

15 “‘Kud itim ribiri ku ci wodi. Etie dhaku pa wodi, man kud itim kude ribiri.

16 “‘Kud itim ribiri ku ci umeru, pilembe eno tie ninyayu lewic iwi umeru.*

17 “‘Kud itim ribiri ku dhaku man ku nyaku pare. Kud igam nyawode, kadi nyanyare pi nitimo kude ribiri. Gitie wedi pare ma ceng’ini; etie timo ma rac dit.*

18 “‘Kud igam nyamin dhaku peri ni nyeke pi nitimo kude ribiri kinde ma fodi nyamin kwo.

19 “‘Kud icor i kum dhaku pi nitimo kude ribiri kinde m’ecido nikum nindo pare m’ebeneno.

20 “‘Kud itim ribiri ku dhaku pa wedu,* imaru cido.

21 “‘Kud iyii juthier kodhini moko ci ni Molek. Kud icid nying’ Mungu peri i ayi maeno. An a Yehova.

22 “‘Kud ivut ku co calu ma juvuto ko ku dhaku. Etie timo ma judagu.

23 “‘Ng’atu ma nico moko kud utim ribiri ku lei pi nicidere gire kude; kadi dhaku de kud umiyere ni lei pi nitimo kude ribiri. Etie gin m’uturo cik mi kurajo.

24 “Kud wudwokuru giwu ni gin m’ucido nikum lembe moko ci m’i kind maeno, pilembe nikum lembuno ceke re ma thek m’aberiemo kud i weng’wu gidwokiri gigi ni gin m’ucido. 25 Pieno, ng’ombe ucido, man abikelo matira i wiye pi kier pare, e ng’ombe bing’ogo dhanu m’ubedo i iye cen. 26 Ento wun, wucikuru niworo cik ku telowic para mi pokolembe, man kud wutim gin moko ci m’i kind lembe maeno ma judagu, nik’ebed anyoli kadi umondo ma bedo i kindwu. 27 Kum dhanu m’ular ukwo i weng’wu i ng’ombe gibed gitimo lembe maeno ceke ma judagu, man kawoni ng’ombe ucido. 28 E ng’ombe bing’ogowu ngo pilembe ya wucide calu m’ebing’ogo ko thek m’ubino i weng’wu. 29 Tek ng’atu moko utimo gin moko ci m’i kind lembe maeno ma judagu, dhanu* ceke m’utimogi jucikiri nikabugi* cen kud i kind juthugi. 30 Wucikuru niworo lembe m’akwayu i beng’wu ma kud wutim ko gin moko ci m’i kind kura ma judagu ma jubed jutimo i weng’wu, kara kud wudwokuru giwu ni gin m’ucido nikumgi. An a Yehova Mungu mwu.’”

19 Yehova uweco kendo i bang’ Musa, eyero kumae: 2 “Wec ku cokiri mi Juisrael zoo man iyer igi kumae: ‘Wucikuru nibedo leng’, pilembe an a Yehova Mungu mwu, a leng’.

3 “‘Ng’atuman m’i kindwu ucikere niworo* min ku won, man wucikuru nigwoko sabatu para. An a Yehova Mungu mwu. 4 Kud wulokuru i bang’ mungu ma tijgi mbe kadi mungu mi cuma m’atwaga de kud wuyik iwu. An a Yehova Mungu mwu.

5 “‘Man tek wubethiero lam mi kwiyocwiny ni Yehova, wuthiere i ayi ma copo ketho ejolowu. 6 Jucikiri nicame i nindo ma juthiere i iye man urwonde, ento donge m’udong’ nitundo i nindo mir adege jucikiri niwang’u ku mac. 7 Ento tek jucamu kume moko i nindo mir adege, etie gin ma rac dit ma jubijolo ngo. 8 Ng’atu m’ucame bicungo i dhu kosa pare, pilembe ecido piny ma leng’ pa Yehova, man ng’atune* jucikiri nikabe* cen kud i kind juthugi.

9 “‘Kinde ma wubekayu cam i ng’om mwu, kud ikay nitundo i gund podho peri zoo man kud ibek kund mwoka peri m’udong’. 10 Bende, kud ibek kund ulok m’udong’ i podho peri mir ulok kadi nyinge m’uoy kud i podhone de kud ikwany. Icikiri niwekogi ni jacan* man ni umondo. An a Yehova Mungu mwu.

11 “‘Kud wukwal kwo, kud wubomb abombi, man kud wucway ndra i kindwu. 12 Kud wukwong’ kwong’ mi ndra ku nyinga ma wucid ko nying’ Mungu mwu. An a Yehova. 13 Kud ivur dhanu wedu man kud iyak ayeki. Kud icer cul pa jatic ma juculo acula diewor traka nitundo kugweno.

14 “‘Kud ilam* ng’atu ma ithe dhing’ kadi kud iketh gin ma redhojo i wang’ abinga, man icikiri nilworo Mungu peri. An a Yehova.

15 “‘Kud wubed ku gondiri i pokolembe mwu. Kud ibed kud akoyakoya pi jacan kadi kud inyuth bero ni jalonyo. Icikiri nipoko lembe pa wedu atira.

16 “‘Kud iwoth twong’ twong’ ku nying’ i kind juthu. Kud itim lembe moko ci ma romo ketho kwo* pa wedu i ariti. An a Yehova.

17 “‘Kud idag umeru i adundeni. Icikiri nijuko wedu kokoro, kara kud iyey dubo karacelo kude.

18 “‘Kud icul kwor kadi kud ibed kud akece i kum wot juthu, man icikiri nimaru wedu calu in giri. An a Yehova.

19 “‘Wucikuru niworo cik para: Kud iketh lim peri unyol ku kit lim mange. Kud icoy kit kodhi ario ma tung’ tung’ i podho peri, man kud irony kendi ma juyiko ku kit wuzi ario m’ukoc ma jucwiyo karacelo.

20 “‘Tek nico moko uvuto ku nyaku moko man etimo kude ribiri ma ke nwang’u etie ng’eca ma jung’iyo ni nico mange, ento nwang’u fodi juware ngo kadi agonya de jugonye ngo, jucikiri nimiyo igi matira. Ento anega re jubinegogi ngo, kum nwang’u fodi etie ngo agonya. 21 Nicone ucikere nikelo girathiera pare mi kier ni Yehova i dhu kamondo mi hema mi rombo, nyog urombo acel pi girathiera mi kier. 22 Jalam bitimo adunya pire ku nyog urombo mi girathiera mi kierne i wang’ Yehova pi dubo m’etimo, man jubiweko ire dubo m’etimo.

23 “‘Kinde ma wumondo i ng’ombe man wupidho yen moko ma pir acama, wucikuru nineno nyinge ni gin m’ucido man ma jukwero. Ebibedo ni gin ma jukwero* iwu pi oro adek. Kud jucame. 24 Ento i oro mir ang’wende, nyinge ceke bibedo leng’ kara anyong’a negwu i wang’ Yehova. 25 E i oro mir abije, wuromo camu nyinge, kara nyinge umed kum mwoka mwu. An a Yehova Mungu mwu.

26 “‘Kud wucam piny moko ci ma rimo n’i iye.

“‘Kud wulam bila kadi kud wutim maji.

27 “‘Kud wuliel theng wiwu kadi kud wunyoth dhu yir tikwu.

28 “‘Kud wuthum kumwu pi ng’atu m’utho,* man kud wuthey kiedo i kumwu. An a Yehova.

29 “‘Kud icid nyeri m’iketh ebed ko won asara, kara ng’ombe kud utim asara man epong’ ku timo mir acidi.

30 “‘Wucikuru nigwoko sabatu para, man wucikuru niworo* kabedo para ma leng’. An a Yehova.

31 “‘Kud wulokuru i bang’ ju ma weco ku tipo ju m’utho, man kud wucidh i bang’ juewlembe, wumaru cido nikumgi. An a Yehova Mungu mwu.

32 “‘Icikiri niai malu i wang’ ng’atu ma wiye julwar, man icikiri niyungo ng’atu m’utii, icikiri nilworo Mungu peri. An a Yehova.

33 “‘Tek umondo moko bedo kudwu i ng’om mwu, kud wusende. 34 Umondo ma bedo kudwu bidoko iwu calu anyoli i kindwu; man icikiri nimare calu in giri, kum wun de wubino umondo i ng’om mi Misiri. An a Yehova Mungu mwu.

35 “‘Kud wutii ku jam pimo piny m’atira ngo kinde ma wubepimo bor pa piny moko, pekne, kadi ke ditne. 36 Wucikuru nitiyo ku kilo ma tap, kidi mi pimo pek pa piny ma tap, jam pimo piny m’uthwo ma tap,* man jam pimo piny ma liw ma tap.* An a Yehova Mungu mwu m’uwodhowu kud i ng’om mi Misiri. 37 Pieno, wucikuru niworo cik para ceke ku telowic para ceke mi pokolembe, man wucikuru nilubogi. An a Yehova.’”

20 Yehova umedere niweco i bang’ Musa, ewacu kumae: 2 “Yer ni Juisrael kumae: ‘Ng’atu moko ci mir Israel man umondo moko ci ma bedo i Israel ma tek umiyo nyathin pare moko ni Molek, jucikiri ninege andha. Dhanu m’i ng’ombe ucikiri nicanye ku kidi wang’ m’etho. 3 An gira abiketho wang’a i kum ng’atuno, man abikabe* cen kud i kind juthugi, pilembe emiyo nyathin pare moko ni Molek, ecido kabedo para ma leng’ man ecido nyinga ma leng’. 4 Tekene dhanu m’i ng’ombe gimiyo wang’gi akakaka i kum lembe ma ng’atune utimo kinde m’emiyo kodhine ni Molek man ginege ngo, 5 e an gira abiketho wang’a andha i kum ng’atune ku juruot pare. Abikabe* cen kud i kind juthugi karacelo ku dhanu ceke m’udikiri kude i timo asara ku Molek.

6 “‘Ento pi ng’atu m’ulokere i bang’ ju ma weco ku tipo ju m’utho man i bang’ juewlembe pi nitimo kugi asara,* abilokara andhandha i kum ng’atuno* man abikabe* cen kud i kind juthugi.

7 “‘Wucikuru nidwokuru giwu leng’ man wubed leng’, pilembe an a Yehova Mungu mwu. 8 Wucikuru niworo cik para man nitiyo kugi. An a Yehova, m’ubedwokowu leng’.

9 “‘Tek ng’atu moko ulamu* won kunoke min, jucikiri ninege andha. Calu m’elamu won kunoke min, rimbe bibedo i wiye gire.

10 “‘Kawoni pi ng’atu m’utimo abor* ku ci ng’atu mange: Ng’atu m’utimo abor ku ci wadi, jucikiri ninege andha, ng’atu ma nico ku dhakune de. 11 Nico m’uvuto ku ci won unyayu lewic iwi won.* Gin ario zoo jucikiri ninegogi andha. Rimbgi bibedo i wigi gigi. 12 Tek ng’atu moko uvuto ku ci wode, gin ario zoo jucikiri ninegogi andha. Gituro cik mi kurajo. Rimbgi bibedo i wigi gigi.

13 “‘Tek nico moko uvuto ku nico calu ma juvuto ko ku dhaku, gin ario zoo gitimo gin ma judagu. Jucikiri ninegogi andha. Rimbgi bibedo i wigi gigi.

14 “‘Tek ng’atu moko ugamu dhaku ku dhamaru mire de, en e timo ma rac dit. Jucikiri niwang’u en ku monne de ku mac, kara timo ma rac dit* maeno kud umedere i kindwu.

15 “‘Tek ng’atu moko utimo ribiri ku lei, jucikiri ninege andha, man leine de wucikuru ninego cen. 16 Tek dhaku moko ucoro i kum lei moko pi nitimo kude ribiri, icikiri ninego dhakune ku leine de. Jucikiri ninegogi andha. Rimbgi bibedo i wigi gigi.

17 “‘Tek nico moko uvuto ku nyamin, nyawon kunoke nyaku pa min, man eneno muneru pare man nyakune de uneno muneru pa nicone, etie lembe mir acidi. Jucikiri nikabugi* cen i wang’ wot juthugi. Enyayu lewic iwi nyamin.* Ebicungo i dhu kosa pare.

18 “‘Tek nico moko uvuto ku dhaku m’ubeneno nindo pare man etimo kude ribiri, en ku dhakune giyabu rimbe m’ubecwir. Gin ario zoo jucikiri nikabugi* cen kud i kind juthugi.

19 “‘Kud itim ribiri ku nyamin meru kadi ku wayu, pilembe eno tie ninyayu lewic iwi wat ma wutie kude rimo acel. Gibicungo i dhu kosa migi. 20 Nico m’uvuto ku ci umin won unyayu lewic iwi umin won.* Gibicungo i dhu dubo migi. Gicikiri nitho m’umbe ninyol. 21 Tek nico moko ugamu ci umin, etie lembe ma rac dit. Enyayu lewic iwi umin.* Gicikiri nitho m’umbe ninyol.

22 “‘Wucikuru niworo cik para ceke ku telowic para ceke mi pokolembe, man nitiyo kugi, kara ng’om m’abeterowu wubed i iye kud ung’ogwu. 23 Kud wuwoth nimakere ku cik mi thek m’aberiemo kud i weng’wu; kum gitimo lembe maeno ceke, uketho adagugi ku rac. 24 Pi thelembe maeno re m’ayero iwu kumae: “Wubimaku ng’om migi ni aba, man abimiye iwu kara ebed aba mwu, ng’om ma molo cak ku miyokic. An a Yehova Mungu mwu, m’ukoyowu segi kud i kind dhanu mange.” 25 Wucikuru niketho tung’ tung’ i kind lei ma leng’ ku m’ucido, man i kind winyo m’ucido ku ma leng’; kud wudwokuru giwu ni gin ma judagu nikum lei kunoke winyo kadi ke piny moko ci ma lak alaka iwi ng’om m’akoyo ang’et iwu kara wunengi ni gin m’ucido. 26 Wucikuru nibedo leng’ ira, pilembe an a Yehova, a leng’, man abekoyowu segi kud i kind dhanu kara wubed ni piny para.

27 “‘Nico kunoke dhaku moko ci ma weco ku tipo ju m’utho kunoke ma jaewlembe,* jucikiri ninege andha. Dhanu ucikiri nicanyugi ku kidi wang’ ma githo. Rimbgi bibedo i wigi gigi.’”

21 Yehova umedere niyero ni Musa kumae: “Wec ku julam ma gi wot Arun man wac igi kumae: ‘Kudi ng’atu moko m’i kindwu ucidere kud avuj dhanu* i kind juthugi. 2 Ento ecopo timo kumeno pi wedi pare ma ceng’ini ma gitie kugi rimo acel, pi min, won, wode, nyare, man umin; 3 ecopo cidere bende pi nyamin ma ceng’ini tek e sumba* man fodi jugame ngo. 4 Ecopo cidere ngo man ecopo dwokere ngo ni gin m’ucido pi dhaku ma tie pa nico moko i kind juthugi. 5 Julam ucikiri ngo nilielo wigi kunoke nithumo dhu yir tikgi kadi nithumo kumgi. 6 Gicikiri nibedo leng’ ni Mungu migi, man kud gicid nying’ Mungu migi, kum gibed githiero girathiera ma juwang’u ku mac ni Yehova, mukathi* pa Mungu migi, pieno gicikiri nibedo leng’. 7 Kud gigam won asara, dhaku m’udaru cidere, kunoke dhaku ma gamiri pare ulal ku cware, pilembe jalam tie leng’ ni Mungu pare. 8 Icikiri nidwoke leng’, pilembe en re m’ethiero mukathi pa Mungu peri. Jalam ucikere nibedo leng’ iri, pilembe an a Yehova m’ubedwokowu leng’, a leng’.

9 “‘Tek nyaku pa jalam ucidere ku timo asara, nwang’u ecido won. Jucikiri niwang’e ku mac.

10 “‘Jalam ma dit m’i kind umego pare, ma jukonjo mo mi wirowir i wiye man ma juketho uronyo kendi pa jalam kud uwek yuk wiye zakara kadi kud uyec kendi pare. 11 Kud ecor i kum avuj ng’atu* moko ci; ecopo cidere ngo kadok pi won kadi pi min. 12 Kud ewok kud i kabedo ma leng’ man kud ecid kabedo ma leng’ pa Mungu pare, kum giranyutha mi thieriri, mo mi wirowir pa Mungu pare n’i wiye. An a Yehova.

13 “‘Ecikere nigamu nyaku ma sumba* ni dhaku. 14 Ecopo gamu ngo dhatho, dhaku ma gamiri pare lal, ma dong’ udaru cido, kunoke won asara; ento ecikere nigamu nyaku ma sumba kud i kind juthugi ni dhaku. 15 Kud ecid nyikwaye* i kind juthugi, kum an a Yehova m’ubedwoke leng’.’”

16 Yehova umedere niweco i bang’ Musa, eyero kumae: 17 “Yer ni Arun kumae: ‘I kind dhanu m’utuk mwu ceke, ng’atu ma tie ku mulima i kind nyikweyi* kud ucor pi nithiero mukathi pa Mungu pare. 18 Ng’atu moko ci ma tie ku mulima copo coro ngo ceng’ini: ng’atu m’abinga kunoke m’abala kadi ma ume kak kunoke ma cinge kadi ke tiende acel bor nisagu ma kucelo, 19 ng’atu ma tiende tur kunoke ma cinge tur, 20 won anguru, ng’atu m’utwil,* ng’atu ma wang’e acel goro, kunoke ma awuu ucorere i kume, ma tie ku nyunyu, kunoke ma nying’ mande tho. 21 Ng’atu moko mbe m’i kind nyikway* Arun ma jalam ma copo coro pi nithiero girathiera ma juwang’u ku mac ni Yehova tek etie ku mulima. Calu etie ku mulima, ecopo coro ngo pi nithiero mukathi pa Mungu pare. 22 Ecopo camu mukathi pa Mungu pare m’uai kud i kind piny ma leng’ m’usagu man m’uai kud i kind piny ma leng’. 23 Ento ecopo coro ngo ceng’ini ku ridho man ecopo coro ngo i bang’ pemlam, pilembe etie ku mulima i kume; man kud ecid kabedo para ma leng’, kum an a Yehova m’ubedwokogi leng’.’”

24 E Musa uweco i bang’ Arun ku wote man i bang’ Juisrael ceke.

22 Yehova uweco kendo i bang’ Musa, ewacu kumae: 2 “Yer ni Arun ku wote nia gibed ku wang’gi i kum ayi ma gibetiyo ko ku* piny ma leng’ mi Juisrael, man kud gicid nyinga ma leng’ nikum piny ma gibedwoko leng’ ira. An a Yehova. 3 Yer igi kumae: “I kind dhanu m’utuk mwu ceke, ng’atu moko ci m’i kind nyikweywu ma bicoro ceng’ini i kum piny ma Juisrael gidwoko leng’ ni Yehova, kinde m’ecido, ng’atune* jubikabe* cen kud i wang’a. An a Yehova. 4 Ng’atu moko mbe i kind nyikway Arun ma tek utie ku dhobu kunoke ma piny ubecwir kud i kume ma romo camu piny ma leng’ nitundo m’ebidoko leng’, dok ebed ng’atu m’umulo kum ng’atu m’ucido nikum ng’atu m’utho,* kadi nico ma pii kume uwok, 5 kunoke ng’atu moko m’umulo kum giracwiya ma nyalini kadi m’umulo kum ng’atu m’ucido pi thelembe moko ci ma copo ketho ecido. 6 Ng’atu* m’umulo kum piny maeno moko ci bibedo m’ecido nitundo uthieno man ecopo camu ngo piny ma leng’, ento ecikere nijom. 7 Saa ma ceng’ bimwony, ebidoko leng’; man i ng’eye eromo camu kum piny ma leng’ pilembe etie cam pare. 8 Bende, kud ecam lei m’utho gire kadi piny moko ci ma yedi mi lum re m’uyeco, ebimaru cido nikume. An a Yehova.

9 “‘Ukwayu gitim lembe ma gicikiri nitimo ira, kara kud gidub nikume man kud githo pire, pilembe nwang’u gicide. An a Yehova m’ubedwokogi leng’.

10 “‘Ng’atu m’umbe ku rusa* copo camu ngo piny moko ci ma leng’. Kadok jawirok ma welo pa jalam kadi jatic ma juculo acula de copo camu ngo piny moko ci ma leng’. 11 Ento tek jalam ung’iewo ng’atu* moko ku sente pare, ng’atune romo camu kum pinje. Ng’eca m’unyoliri i ot pa jalam bende gicopo camu kum cam pare. 12 Tek nyaku pa jalam ugiero ng’atu moko ma tie ngo jalam,* nyakune copo camu ngo kum girathiera ma leng’. 13 Ento tek nyaku pa jalamne udoko dhatho kunoke gamiri pare lal man nyathin pare de mbe, man edwogo i ot pa won calu mir aradu pare, ecopo camu kum cam pa won moko; ento ng’atu m’umbe ku rusa* copo came ngo.

14 “‘Tek ng’atu moko ucamu piny ma leng’ aka ngo, ecikere nimedo thenge acel wi abic mi valerne man ecikere nimiyo girathiera ma leng’ i bang’ jalam. 15 Pieno, kud gicid piny ma leng’ mi Juisrael ma githiero ni Yehova, 16 gimaru kelo matira i wigi pi kier migi nikum camu piny migi ma leng’; kum an a Yehova m’ubedwokogi leng’.’”

17 Yehova umedere niweco i bang’ Musa, ewacu kumae: 18 “Wec kud Arun ku wote man ku Juisrael ceke man iyer igi kumae: ‘Tek Jaisrael moko kunoke umondo ma bedo i Israel ukelo lam m’awang’a ni Yehova pi nipong’o lembang’ola pare kunoke ni girathiera ma ku berocwiny, 19 ecikere nikelo lim ma thwoni ma mulima mbe i kume m’egamu kud i kind dhieng’, nyithi nyogi rombe kunoke diegi, kara jujole. 20 Kud wukel piny moko ci ma mulima ni kume, kum ebiketho jubijolowu ngo.

21 “‘Tek ng’atu moko ubekelo lam mi kwiyocwiny ni Yehova pi nipong’o lembang’ola, kunoke ni girathiera ma ku berocwiny, ecikere nibedo lim ma mulima mbe i kume m’egamu kud i kind dhieng’ kunoke rombe kadi diegi, kara jujole. Mulima moko nyanok de kud ubed i kume. 22 Kud juthier lim ma wang’e tho, ma wathkume moko tur, ma kume jurem, ma tie kud aluny, ma kume juagwenga kadi nyac; kud wukel lim moko ci ma kumeno ni Yehova, kadi athiera de kud wuthier wagi lim ma kumeno iwi pemlam ni Yehova. 23 Wucopo thiero thwon dhiang’ kunoke urombo ma tiende acel bor kunoke dungulu ni girathiera ma ku berocwiny, ento jubijole ngo kan etie girathiera mi lembang’ola. 24 Kud wuthier ni Yehova lim ma nying’ mande tho kunoke uloy, kadi ke juwodho kunoke juthumo, man kud wuthier wagi lim ma kumeno i ng’om mwu. 25 Man kud wugam lim moko ma kumeno kud i cing’ umondo pi nithiere ni cam* pa Mungu mwu, kum ginyothiri man gitie ku mulima. Jubijologi ngo iwu.’”

26 Yehova uweco kendo i bang’ Musa, ewacu kumae: 27 “Tek thwon dhiang’ kunoke nyathi nyog urombo kadi diel unyolere, ebimedere nibedo ku min pi nindo abiro. Ento niai i nindo mir aborane nicidho i wang’e jubijole ni girathiera, en e girathiera ma juwang’u ku mac ni Yehova. 28 Ento pi thwon dhiang’ kunoke urombo, kud wuthume ku nyathine i nindo ma rom.

29 “Tek wubethiero lam mi dwoko foyofoc ni Yehova, wucikuru nithiere kara jujolwu. 30 Jucikiri nicame cing’ nica. Kud wuwek donge moko nitundo kugweno. An a Yehova.

31 “Wucikuru nigwoko lembang’ola para man nitiyo kugi. An a Yehova. 32 Kud wucid nyinga ma leng’, man jucikiri nidwoka leng’ i kind Juisrael. An a Yehova m’ubedwokowu leng’, 33 ng’atu m’ubewodhowu kud i ng’om mi Misiri pi ninyuthara iwu nia an a Mungu. An a Yehova.”

23 Yehova umedere niweco i bang’ Musa, eyero kumae: 2 “Wec ku Juisrael man iyer igi kumae: ‘Foc pa Yehova mi nindo ma juketho ma wucikuru nitwong’o pigi utie coko ma leng’. Maeni gi foc para mi nindo ma juketho:

3 “‘Jucopo timo tic ceng’ abusiel, ento ceng’ mir abirone bibedo sabatu mi yom ma zoo, etie coko ma leng’. Wucopo timo ngo kit tic moko ci. Ebibedo sabatu ni Yehova kaka moko ci ma wubedo i iye.

4 “‘Maeni tie foc pa Yehova mi nindo ma juketho, coko ma leng’ ma wucikuru nitwong’o pigi i saa ma juketho pigi: 5 I dwi ma kwong’a, i nindo apar ang’wen mi dwije, i ng’ey mwony pa ceng’* tie Kadhukuwijo ni Yehova.

6 “Nindo apar abic mi dwije tie Foc mi mukathi ma thobi mbe i iye ni Yehova. Wucikuru nicamu mukathi ma thobi mbe i iye pi ceng’ abiro. 7 I nindo ma kwong’a, wubitimo coko ma leng’. Kud wutim tic moko ci ma tek. 8 Ento wubithiero girathiera ma juwang’u ku mac ni Yehova pi nindo abiro. Coko ma leng’ bibedo nuti i nindo mir abirone. Kud wutim tic moko ci ma tek.’”

9 Yehova umedere niweco i bang’ Musa, eyero kumae: 10 “Wec ku Juisrael man iwac igi kumae: ‘Kinde ma wubin wumondo i ng’om m’abemiyo iwu man wukayu cam i ng’ombe, wucikuru nikelo kanga mi landu wi mwoka mwu i bang’ jalam. 11 Man ebileko kangane kun ku kun i wang’ Yehova kara ejolwu. Jalam ucikere nileke i nindo m’i ng’ey Sabatu. 12 I nindo ma wubiketho julek iye kangane, wucikuru nithiero nyathi nyog urombo ma oro pare ukadhu ngo acel ni lam m’awang’a ni Yehova. 13 Girathiera mi nying cam ma jubithiere ko bibedo thenge ario wi apar mir efa* mi mogo ma yom ma jujebo ku mo ni girathiera ma juwang’u ku mac ni Yehova, ni piny ma ng’wice ng’ar.* Girathiera mi pigulokne ke bibedo thenge acel wi ang’wen mi hin* mi pigulok. 14 Kud wucam mukathi moko ci, nying cam m’acela, kadi nying cam ma nyen nitundo i nindo maeno, cil ma wubikelo ko girathiera pa Mungu mwu. Etie cik ma nja pi dhanu m’utuk mwu ceke, kaka moko ci ma wubedo i iye.

15 “‘Wukwan sabatu abiro niai i nindo m’i ng’ey Sabatu, niai i nindo ma wukelo iye kanga mi girathiera m’aleka. Gicikiri nibedo ni yenga ma zoo. 16 Wubikwanu nindo pier abic nitundo i nindo m’i ng’ey Sabatu mir abirone, man wucikuru nikelo girathiera mi nying cam ma nyen ni Yehova. 17 Wucikuru nikelo lungu mukathi ario ni girathiera m’aleka kud i kabedo mwu. Jucikiri niyikogi ku mogo ma yom thenge ario wi apar mir efa.* Jubitedogi ku thobi ni landu wi mwoka ni Yehova. 18 Man wucikuru nikelo lungu mukathine ku nyithi nyogi rombe abiro ma mulima mbe i kumgi ma oro migi acel acel, ku nyathi thwon dhiang’ acel man nyogi rombe ario. Gibibedo ni lam m’awang’a ni Yehova karacelo ku girathiera migi mi nying cam man girathiera migi mi pigulok ni girathiera ma juwang’u ku mac, ni piny ma ng’wice ng’ar* ni Yehova. 19 Man wucikuru nithiero nyathi diel acel ni lam mi dubo man nyithi nyogi rombe ario ma oro migi acel acel ni lam mi kwiyocwiny. 20 Jalam bilekogi kun ku kun ku lungu mukathi mi landu wi mwoka ni girathiera m’aleka i wang’ Yehova karacelo ku nyithi nyogi rombe ario. Gibibedo ni piny ma leng’ ni Yehova man gibibedo pa jalam. 21 I nindo nica, wubitwong’o pi coko ma leng’ piwu giwu. Wucopo timo ngo tic moko ci ma tek. Etie cik ma nja i kabedo mwu zoo pi dhanu m’utuk mwu ceke.

22 “‘Kinde ma wubekayu cam i ng’om mwu, kud ikay nitundo i gund podho peri zoo man kud ibek kund mwoka peri m’udong’. Icikiri niwekogi ni jacan* man ni umondo. An a Yehova Mungu mwu.’”

23 Yehova umedere niweco i bang’ Musa, eyero kumae: 24 “Yer ni Juisrael kumae: ‘I dwi mir abiro, i nindo ma kwong’a mi dwije, wucikuru niyom yom ma zoo. Etie poy ma jubitwong’o pire ku dwand agwara, coko ma leng’. 25 Wucopo timo ngo tic moko ci ma tek, man wubikelo girathiera ma juwang’u ku mac ni Yehova.’”

26 Yehova uweco kendo i bang’ Musa, ewacu kumae: 27 “Ento nindo apar mi dwi mir abirone tie Ceng’ mir adunya. Wucikuru nitimo coko ma leng’ man ninyayu can i iwu giwu,* bende wukel girathiera ma juwang’u ku mac ni Yehova. 28 Kud wutim tic moko ci i nindo ma segi maeno, pilembe etie ceng’ mir adunya pi nitimo adunya piwu i wang’ Yehova Mungu mwu. 29 Ng’atu* moko ci ma binyayu ngo can i iye* i nindo maeca jubikabe* cen kud i kind juthugi. 30 Man ng’atu* moko ci ma bitimo tic i nindo maeno abinyothe cen kud i kind juthugi. 31 Kud wutim kit tic moko ci. Etie cik ma nja pi dhanu m’utuk mwu ceke kaka moko ci ma wubedo i iye. 32 Etie sabatu mi yom ma zoo iwu, man wubinyayu can i iwu* i nindo mir abung’wende mi dwije i dhug uthieno. Wucikuru nikwiro sabatu mwu niai i dhug uthieno nitundo i dhug uthieno.”

33 Yehova umedere niweco i bang’ Musa, ewacu kumae: 34 “Yer ni Juisrael kumae: ‘Nindo apar abic mi dwi mir abirone tie Foc mi otbak pi nindo abiro ni Yehova. 35 Coko ma leng’ bibedo nuti i nindo ma kwong’a, man kud wutim tic moko ci ma tek. 36 Pi nindo abiro wucikuru nikelo girathiera ma juwang’u ku mac ni Yehova. I nindo mir aborane ke wucikuru nitimo coko ma leng’, man wucikuru nikelo girathiera ma juwang’u ku mac ni Yehova. Etie coko ma dit. Wucopo timo ngo tic moko ci ma tek.

37 “‘Maeni tie foc pa Yehova mi nindo ma juketho ma wucikuru nitwong’o ni coko ma leng’ pi nikelo girathiera ma juwang’u ku mac ni Yehova: lam m’awang’a man girathiera mi nying cam mi lam ku girathiera mi pigulok, nimakere ku lembe ma jupangu kubang’ ceng’. 38 Eno umedo kum piny ma juthiero i sabatu pa Yehova, man giramiya mwu, girathiera mwu ma wung’olo ku kwong’, man girathiera mwu ma ku berocwiny ma wubimiyo ni Yehova. 39 Ento i nindo apar abic mi dwi mir abirone, kinde ma wudaru coko piny m’ucek i ng’ombe, wucikuru nitimo foc pa Yehova pi ceng’ abiro. Nindo ma kwong’a bibedo yom ma zoo man nindo mir aborane de bibedo yom ma zoo. 40 I nindo ma kwong’a, wubigamu nying yen ma beco, jang thith, jang yen m’udinyo, man yen mbegu mi poga,* man wubibedo kud anyong’a i wang’ Yehova Mungu mwu pi nindo abiro. 41 Wubitime ni foc ni Yehova pi nindo abiro kubang’ oro. Wucikuru nitime i dwi mir abirone; etie cik ma nja i kind dhanu m’utuk mwu ceke. 42 Wucikuru nibedo i otbak pi nindo abiro. Anyoli ceke mir Israel ucikere nibedo i otbak, 43 kara dhanu m’utuk mwu mi nindo m’ubino ging’ey nia aketho Juisrael gibedo i otbak kinde m’abewodhogi kud i ng’om mi Misiri. An a Yehova Mungu mwu.’”

44 E Musa ukoro pi foc pa Yehova mi nindo ma juketho ni Juisrael.

24 Yehova umedere niweco i bang’ Musa, eyero kumae: 2 “Ng’ol ni Juisrael nia gikel iri mo ma leng’ mir oliv m’aoda pi der, kara thala uliel saa ceke. 3 Arun biketho thala uliel saa ceke i wang’ Yehova niai dhug uthieno nitundo kugweno i wang’ ridho mi Lembatuca i hema mi rombo. Etie cik ma nja pi dhanu m’utuk mwu ceke. 4 Ebiketho thalanegi iwi tiend thala mi mola ma kwar m’alili i wang’ Yehova saa ceke.

5 “Ibigamu mogo ma yom man ibitedo ko mukathi apar ario ma ngulu ngulu. Ibiyiko mukathiman ku thenge ario wi apar mir efa.* 6 Ibirodogi abusiel abusiel i leni ario iwi meza mi mola ma kwar m’alili i wang’ Yehova. 7 Ibiketho udok sengi m’alili iwi leniman, man ebibedo ni mukathi ma pi jampoy* ma juwang’u ku mac ni Yehova. 8 Ecikere nipangu mukathine thiri thiri i wang’ Yehova kubang’ ceng’ Sabatu. Etie lembariba ma nja ku Juisrael. 9 Ebibedo p’Arun ku wote man gibicame i kabedo ma leng’, pilembe etie piny ma leng’ m’usagu ire m’uai kud i kum girathiera ma juwang’u ku mac ni Yehova. Etie cik ma nja.”

10 Nwang’u i kind Juisrael Nyaisrael moko ubino ku wode ma won tie Jamisiri; e wodene gicaku dhaw ku Jaisrael moko i kagonjo. 11 Wod Nyaisrael eno ucaku cido Nying’* man nilame.* Pieno jukele i bang’ Musa. Karaman min ubino Celomith ma nyaku pa Dibri mi suru pa Dan. 12 Gitwiyo bang’e nitundo ma Yehova unyutho igi kamaleng’ gin m’ukwayu gitim.

13 E Yehova uyero ni Musa kumae: 14 “Wodh ng’atu m’ulamu alamne woko i ng’ey kagonjo, man ju ceke m’uwinje gicikiri niketho cing’gi i wiye, i ng’eye cokiri ceke ucikere nicanye ku kidi. 15 Man icikiri niyero ni Juisrael kumae: ‘Tek ng’atu moko ulamu Mungu pare, ebicungo i dhu dubo pare. 16 Ng’atu m’ucido nying’ Yehova, jucikiri ninege andha. Cokiri ceke ucikere nicanye andha ku kidi. Jubinego umondo calu ma junego ko anyoli m’ucido Nying’.

17 “‘Tek ng’atu moko ukabu kwo pa dhanu,* jucikiri ninege andha. 18 Ng’atu moko ci m’ugoyo man unego lei mi pacu* ecikere niculo kawang’e, kwo kawang’ kwo.* 19 Tek ng’atu moko unyayu ret i kum wadi, en de gin m’etimo jubitimo i kume. 20 Tur pa cogo kawang’ tur pa cogo, wang’ kawang’ wang’, lak kawang’ lak, kit ret ma rom m’enyayu jubinyayu bende kumeca i kume. 21 Ng’atu m’ugoyo man unego lei ucikere niculo kawang’e, ento ng’atu m’ugoyo man unego dhanu jucikiri ninege anega.

22 “‘Jubitiyo ku telowic mi pokolembe ma rom piwu, kadok ebed ni umondo kadi ni anyoli; pilembe an a Yehova Mungu mwu.’”

23 I ng’eye, Musa uweco ku Juisrael man giwodho ng’atu m’ulamu alamne woko i ng’ey kagonjo, e gicanye ku kidi. Kumeno re ma Juisrael gitimo tap lembe ma Yehova ung’olo ni Musa.

25 Yehova uweco kendo i bang’ Musa iwi got Sinai, ewacu kumae: 2 “Wec ku Juisrael man iwac igi kumae: ‘Kinde ma wubin wumondo i ng’om m’abemiyo iwu, kwayu ng’ombe ukwir sabatu ni Yehova. 3 Pi oro abusiel ibicoyo kodhi i podho peri, man pi oro abusiel ibilwero jang ulok peri, man ibicoko dhu cam m’ucek i ng’ombe. 4 Ento oro mir abiro bibedo sabatu mi yom ma zoo ni ng’ombe, en e sabatu ni Yehova. Kud icoy kodhi i podho peri kadi jang ulok peri de kud ilwer. 5 Kud ikay cam m’udog utwii gire m’uoy kud i kodhi m’udong’ i ng’ey kayucam, man kud ipon ulok m’ilwero ngo jange. Ng’ombe ucikere niyom pi oro acel zoo. 6 Ento icopo camu piny ma ng’ombe bicego i kind sabatune; in, ng’eca peri ma co man ma nyaku, jaratic peri m’iculo acula man umondo ma bedo i beng’i de copo came, 7 man bende lei mi pacu ku yedi mi lum m’i ng’om peri. Jucopo camu piny ceke ma ng’ombe bicego.

8 “‘Wubikwanu oro abiro mi sabatu, niwacu oro abiro wang’ abiro, man wend nindo mi oro abiro mi sabatune bicamu oro pier ang’wen wi abung’wen. 9 E ibikudho agwara ma tek i dwi mir abiro, i nindo apar mi dwije; i Ceng’ mir adunya, wucikuru niketho dwand agwarane uwinjere i ng’om mwu zoo. 10 Wucikuru nidwoko oro mi pier abije leng’ man nitwong’o gony i ng’ombe ni dhanu ceke ma bedo i iye. Ebidoko ni Jibile iwu, man ng’atuman m’i kindwu ucikere nidok i bang’ aba pare man i bang’ juruot pare. 11 Oro mi pier abije bidoko ni Jibile iwu. Wubicoyo ngo kodhi kadi wubikayu ngo piny m’utwii gire kud i kind nying cam m’udong’, kadi nying ulok ma julwero ngo de wubipono ngo. 12 Kum etie Jibile. Ecikere nibedo leng’ iwu. Wucopo camu kende kende gin ma ng’om ucego gire.

13 “‘I oro maeno mi Jibile, ng’atuman m’i kindwu ucikere nidok i bang’ aba pare. 14 Tek ibelworo piny moko ni wedu kunoke ibeng’iewo piny moko i bang’e, kud wuvururu i kindwu. 15 Icikiri ning’iewo piny i bang’ dhanu wedu nimakere ku wend oro m’udaru kadhu i ng’ey Jibile, man ecikere nilworo iri pinje nimakere ku wend oro m’udong’ ma cam bicek i iye. 16 Tek oro m’udong’ne lee, ecopo medo beine; tek orone udong’ nyanok ke, ecikere nijwigo beine, pilembe ebelworo iri wend kayucam. 17 Kudi ng’atu moko m’i kindwu uvur wadi, man icikiri nilworo Mungu peri, kum an a Yehova Mungu mwu. 18 Tek wubeworo cik para man wubetiyo ku telowic para mi pokolembe, e wubibedo museme i ng’ombe. 19 Ng’ombe bicego nyinge ma wubicamu i kadhiri ma iwu uyenyo man wubibedo museme i iye.

20 “‘Ento tek wupenjo kumae: “Wabicamu ang’o i oro mir abirone tek wacoyo ngo kodhi kunoke wacoko ngo dhu cam mwa m’uceki?” 21 Abioro mugisa para i wiwu i oro mir abusiende man ng’om bicego cam ma bikonyowu pi oro adek. 22 I ng’eye, wubicoyo kodhi i oro mir aborane man wubiwotho camu cam m’ucek con nitundo i oro mir abung’wende. Wubiwotho camu cam m’ucek con nitundo ma ma nyen bicek ko.

23 “‘Kud julwor ng’om mi magwei, kum ng’ombe tie para. Pilembe i wang’a wun umondo man wu jubedo. 24 I ng’om ceke ma tie aba mwu, wubibedo ku twero mi dong’iewo ng’ombe kendo.

25 “‘Tek umeru udoko jacan man ukwayu elwor kum aba pare moko, e jawar ma wat pare ma ceng’ini ucikere nibino man ning’iewo piny m’umin ulworo. 26 Tek ng’atu moko umbe ku jawar, ento edoko jalonyo man enwang’u yore mi ware, 27 ebikwanu valerne nimakere ku wend oro m’udaru kadhu niai m’elwore, man ebidwoko valer mi wend oro m’udong’ i bang’ ng’atu m’elwore ire. I ng’eye, eromo dok i bang’ aba pare.

28 “‘Ento tek enwang’u ngo yore mi dogame kud i bang’e, e gin m’elworone bibedo asu pa ng’atu m’ung’iewe nitundo i oro mi Jibile; jubidwoke ire i Jibile man ebidok i bang’ aba pare.

29 “‘Tek ng’atu moko ulworo ot ma n’i adhura ma gang’ utieko, ebibedo ku twero mi doware i kind oro acel niai i saa m’elwore i iye; twero pare mi doware bibedo pi oro acel zoo. 30 Ento tek oro acel uthum ma fodi eware ngo, e ot ma n’i adhura ma gang’ utiekone bidoko ni piny pa ng’atu m’ung’iewe mi magwei i kind dhanu m’utuk pare ceke. Jubidwoke ngo i Jibile. 31 Enre udi ma n’i pacu ma gang’ utieko ngo ng’ete jubikwanugi ni podho ma n’i die lum. Jubibedo asu ku twero mi warugi man jubidwokogi i Jibile.

32 “‘Ento pi udi mi Julawi ma nwang’ere i adhura migi, Julawine gibibedo ku copo mi warugi saa zoo. 33 Tek juwaru ngo piny mi Julawi, e jubidwoko ot migi ma julworo i adhura bende i Jibile, pilembe udi mir adhura mi Julawi utie aba migi i kind Juisrael. 34 M’umedo maeno, luba m’utieko ng’et adhura migi jucopo lworo ngo, pilembe etie aba migi mi nja.

35 “‘Tek umeru ma n’i ceng’ini kudi udoko jacan man embe ku copo mi pong’o yeny pare gire, icikiri nikonye calu m’icopo konyo ko umondo man jabedo, kara emedere nibedo kwo kudi. 36 Kud inwang’ kuloka i kume kadi kud edok iri ni kudocu.* Icikiri nilworo Mungu peri, kara umeru umedere nibedo kwo kudi. 37 Kud imii ire sente peri m’ecul ku faida, kadi kud imii ire cam peri m’inwang’ ko faida. 38 An a Yehova Mungu mwu m’uwodhowu kud i ng’om mi Misiri pi nimiyo iwu ng’om mi Kanan, kara anyuthara gira nia an a Mungu mwu.

39 “‘Tek umeru ma bedo ceng’ini kudi udoko jacan man ukwayu elworere gire iri, kud idiye etim tic mi ng’eca. 40 Jubitiyo kude calu jaratic ma juculo acula, calu jabedo. Ebitimo iri nitundo i oro mi Jibile. 41 I ng’eye ebiweki, en kud awiya pare* man ebidok i bang’ juruot pare. Ecikere nidok i bang’ aba pa kwaru pare. 42 Kum gitie ng’eca para m’awodho kud i ng’om mi Misiri. Gicikiri ngo nilworiri gigi i ayi ma julworo ko ng’eca. 43 Kud itii kude yanga yanga, man icikiri nilworo Mungu peri. 44 Ng’eca peri ma co man ma nyir ucikere niai kud i thek m’udhokowu, wucopo ng’iewo ng’eca ma co kunoke ma nyaku i bang’gi. 45 Wucopo ng’iewo bende ng’eca i bang’ wot umondo ma bedo i kindwu man i bang’ juruot migi ma ginyolo i ng’om mwu, e gibidoko ni aba mwu. 46 Wucopo wekogi ni giralaga ni wotwu yor i ng’eywu kara ulaggi ni aba mi nja. Wucopo tiyo kugi calu jurutic, ento kud itii kud umego peri ma Juisrael ku gero.

47 “‘Ento tek umondo moko kunoke jabedo moko ma bedo i kindwu udoko jalonyo man umeru udoko jacan i ng’ete man ukwayu elworere gire ni umondo kadi ni jabedo ma bedo i kindwu, kadi i bang’ ng’atu acel m’i kind juruot p’umondone, 48 ebibedo asu ku twero mi war i ng’ey m’elworere gire. Ng’atu acel m’i kind umego pare copo dong’iewe kendo, 49 kunoke umin won kadi wod umin won copo dong’iewe kendo, kunoke wedi pare moko ci ma ceng’ini,* ng’atu acel m’i kind juruot pare copo dong’iewe kendo.

“‘Kunoke tek en gire edoko jalonyo, ecopo bende ning’iewere gire. 50 Gibitimo kwan giku ng’atu m’ung’iewe niai i oro m’elworere i iye ire nitundo i oro mi Jibile, man bei mi lwor pare bibedo rom ku wend orone. Nindo m’etimo iye tic i kind oro maeno jubikwanu nimakere ku cul pa jaratic ma juculo acula. 51 Tek wend oro m’udong’ne tie lee, ecikere niculo bei mi war pare nimakere ku wend oro m’udong’ne. 52 Ento tek oro ma nok kende re m’udong’ nitundo i oro mi Jibile, ebitimo kwan pire gire man ebiculo sente mi war pare nimakere ku wend oro m’udong’ne. 53 Ebimedere nitimo ire kubang’ oro calu jaratic ma juculo acula; man ukwayu inen nia rwoth pare utiyo ngo kude ku gero. 54 Ento tek ecopo dong’iewere ngo gire i ayi maeno, e ebibedo agonya i oro mi Jibile, en karacelo kud awiya pare.*

55 “‘Kum Juisrael gitie ng’eca para. Gitie ng’eca para m’awodho kud i ng’om mi Misiri. An a Yehova Mungu mwu.

26 “‘Kud wuyik iwu mungu m’araga ma tijgi mbe, man kud wucom ayi gin m’acwiya m’ang’ika kunoke kidi mi thier, man kud wuketh kidi m’ang’ika i ng’om mwu pi nirum i wang’e; kum an a Yehova Mungu mwu. 2 Wucikuru nigwoko sabatu para man wucikuru niworo* kabedo para ma leng’. An a Yehova.

3 “‘Tek wubemeduru niwotho nimakere ku cik para, niworo lembang’ola para man wubetiyo kugi, 4 abiketho koth bicwii i nindone, man ng’om bicego nyinge, yen m’i die lum de bicego nying’gi. 5 Nindo mwu mi fwodo cam bicidho nitundo i saa mi pono nying ulok, man nindo mwu mi pono nying ulok bicidho nitundo i saa mi coyo kodhi; wubicamu cam* i kadhiri ma iwu yenyo man wubibedo museme i ng’om mwu. 6 Abiketho kwiyocwiny i ng’ombe man wubivuto ma ng’atu moko mbe m’unyayu ndiri i iwu; abiriemo yedi ma reco mi lum cen kud i ng’ombe, man palamularu mi lwiny bikadhu ngo kud i ng’om mwu. 7 Wubiriemo tok jukwor mwu andha, man gibipodho i weng’wu nikum palamularu. 8 Dhanu abic m’i kindwu biriemo tok dhanu dak acel, man dhanu dak acel biriemo tok dhanu elufu apar (10 000), man jukwor mwu bipodho i weng’wu nikum palamularu.

9 “‘Abiloko wi bero para* i beng’wu, abiketho wubinyol man wubinyay, man abigwoko lembariba para kudwu. 10 Kinde ma fodi wubecamu cam ma con m’ucek i oro m’i wang’e, bikwayu wuoy ma con ne cen kara uwek kaka ni ma nyen. 11 Abiketho hema mi thier para i kindwu, man abikwerowu ngo.* 12 Abiwotho i kindwu man abibedo Mungu mwu, man wun giwu de wubibedo dhanu para. 13 An a Yehova Mungu mwu m’uwodhowu kud i ng’om mi Misiri kara kud wubed ng’eca migi kendo; aturo yen mi mberembere mwu man aketho wuwotho ma wiwu ni malu.*

14 “‘Ento tek wubiwinja ngo kunoke wubiworo ngo lembang’ola maeni ceke, 15 tek wukwero cik para, man tek wudagu* cik mi pokolembe para, uketho wuworo ngo lembang’ola para ceke, man wuturo lembariba para, 16 an lundo abitimo lembe ma e: Matira m’abimiyo iwu bibedo masendi mir aonda ma tek, malaria ma cego kum ma biketho weng’wu bidoko abinga man biolo kwo mwu. Wubicoyo kodhi mananu, kum jukwor mwu re ma bicame. 17 Abiketho wang’a i kumwu, man jukwor mwu bivoyowu; ju m’udaguwu biwotho i wiwu man wubiringo ma ng’atu moko mbe m’uriemowu.

18 “‘Tek lembe maeno de uketho wuwinja ngo, e bikwayu amii iwu matira wang’ abiro nisagu pi dubo mwu. 19 Abituro tego mi kuhaya mwu man abiketho polo mwu bidoko calu cuma man ng’om mwu calu mola. 20 Wubidaru tego mwu mananu man ng’om mwu de bicego ngo nyinge, yen m’i ng’om mwu de bicego ngo nying’gi.

21 “‘Ento tek wubemeduru nijai ira man wubekwero niwinjo dwanda, e bikwayu agoywu wang’ abiro nisagu, calku dubo mwu. 22 Abioro yedi mi lum i kindwu, gibikabu awiya mwu, gibidaru lei mwu mi pacu, man gibijwigo wendwu, man gengi mwu bicido.

23 “‘Tek nikum lembuno de wujolo ngo twiny para, man wumeduru asu nijai ira, 24 e an de abijai iwu, man an gira abigoyowu wang’ abiro pi dubo mwu. 25 Abikelo palamularu mi culo kwor i wiwu pilembe wuturo lembariba. Tek wucokuru i adhura mwu, abioro thong’om i kindwu man abimiyowu i cing’ jakwor. 26 Kinde m’abinyotho kaka* ma wukanu iye mukathi,* mon apar bitedo mukathi mwu i kendo acel kende, jubipoko mukathi iwu ku kilo; man wubicamu, ento wubiyeng’ ungo.

27 “‘Tek nikum lembuno de wuwinja ngo, man wubemeduru asu nijai ira, 28 abijai iwu dong’ ku rac, man bikwayu an gira amii iwu matira wang’ abiro pi dubo mwu. 29 E wubicamu ring’ wotwu man wubicamu ring’ nyigwu. 30 Abinyotho kaka ma malu mwu mi thier man abirungo pemlam mwu mir udok ma ng’wice ng’ar, man abipangu avujwu iwi avuj ayi gin m’acwiya mwu ma judagu,* abidaguwu man abilokara cen kud i kumwu.* 31 Abimiyo adhura mwu ni palamularu man abiketho kabedo mwu ma leng’ bidoko ni uvuru, man abing’wiyo ngo ng’wic lam mwu ma ng’ar.* 32 An gira abidwoko ng’ombe ni uvuru, man jukwor mwu ma bedo i iye gibinene ku zungo. 33 Abilalu iwu i kind thek, man abiwodho palamularu i ng’eywu; ng’om mwu bidoko ni uvuru man adhura mwu de jubinyotho.

34 “‘I saa maeca ng’ombe biculo kawang’ sabatu pare nindo ceke m’ebibedo i iye ni uvuru, kinde ma wun’i ng’om mi jukwor mwu. I saa maeca ng’ombe biyom,* pilembe ukwayu ecul kawang’ sabatu pare. 35 Ebiyom nindo ceke m’ebibedo i iye ni uvuru, pilembe eyom ungo i kind sabatu mwu kinde ma nwang’u wubedo i iye.

36 “‘Ento pi ju ma biboth, abipong’o adundegi ku ndiri i ng’om mi jukwor migi, man badwand ith yen ma yamu ubeleko biketho gibiringo; gibiringo ve ng’atu m’uberingo palamularu man gibipodho ma ng’atu moko mbe m’uberiemogi. 37 Gibikier ng’atuman wi wadi man wi wadi calu dhanu m’uberingo palamularu, ma ke ng’atu moko mbe m’uberiemogi. Wubibedo mbe ku copo mi ceruru ni jukwor mwu. 38 Wubithum i kind thek, man ng’om mi jukwor mwu bicamuwu. 39 Jukumwu ma bidong’ jubiweko gibitop i ng’om mi jukwor mwu pi kosa mwu. Eyo, gibitop cen pi kosa pa weggi. 40 E gibituco kier migi gigi man kier ku koso gwokobedoleng’ pa weggi man gibiyiyo nia andha gikoso gwokobedoleng’ nikum jai ma gijai ko ira. 41 Pieno, an de ajai igi uketho aterogi i ng’om mi jukwor migi.

“‘Kuno nyo adundegi ma jutimo ngo yaa i kume* bidoko mol, man gibiculo pi kosa migi. 42 Man abipoy i kum lembariba para ma ku Yakobo, lembariba para ma kud Isak, man abipoy i kum lembariba para ma kud Abraham, man abipoy i kum ng’ombe. 43 Kinde ma giweko ng’ombe udong’ kende, ebino culo kawang’ sabatu pare; man kinde m’edong’ ni uvuru ma gimbe, gibino culo kawang’ kosa migi, pilembe gikwero cik para mi pokolembe man gidagu* cik para. 44 Ento nikum lembuno zoo de, kinde ma gin’i ng’om mi jukwor migi, abikwerogi ngo mi magwei kadi akuna de abikunogi ngo ma nia adar kogi kot, pilembe eno romo turo lembariba para m’atimo kugi, kum an a Yehova Mungu migi. 45 Pigi, abipoy pi lembariba para m’atimo ku kwarugi m’awodho kud i ng’om mi Misiri i wang’ thek, kara anyuthara igi nia an a Mungu migi. An a Yehova.’”

46 Maeno tie cik, cik mi pokolembe, man cik ma Yehova uketho i kindgi ku Juisrael iwi got Sinai nikadhu kud i bang’ Musa.

27 Yehova umedere niweco i bang’ Musa, eyero kumae: 2 “Wec ku Juisrael man iwac igi kumae: ‘Tek ng’atu moko utimo lembang’ola ma segi nia ebimiyo ni Yehova wel piny ma rom ku valer pa dhanu,* 3 valer pa ng’atu ma nico ma oro pare ucaku niai pier ario nitundo i pier abusiel bibedo cekel* pier abic mi mola ma tar nimakere ku cekel mi kabedo ma leng’.* 4 Ento tek etie ng’atu ma dhaku, valer pare bibedo cekel pier adek. 5 Tek oro pare ucaku niai abic nitundo pier ario, valer pa ng’atu ma nico bibedo cekel pier ario, tek e nyaku ke cekel apar. 6 Tek etie nyathin ma niai dwi acel nitundo i oro abic, valer pa ng’atu ma nico bibedo cekel abic mi mola ma tar, tek e nyaku ke cekel adek mi mola ma tar.

7 “‘Tek oro pare tie pier abusiel niidho malu, valer pare bibedo cekel apar abic tek e ng’atu ma nico, tek e dhaku ke cekel apar. 8 Ento tekene e jacan magwei m’ecopo culo ngo valer ma juketho, ng’atune bicungo i wang’ jalam, man jalam bing’olo valer pare. Jalam bing’olo valerne nimakere ku jamcing’ ng’atu m’utimo lembang’olane.

9 “‘Tek eng’olo nia ebimiyo lei ma juromo thiero ni Yehova, piny moko ci ma juromo miyo ni Yehova bidoko piny ma leng’. 10 Eromo wilo ngo lei ma cuu ku ma rac kunoke ma rac ku ma cuu. Ento tek ukwayu ewil lei ma nwang’u ebemiyo ku mange, lei ma nwang’u ebemiyo ku m’ewile ko ne ceke bidoko leng’. 11 Tekene etie lei m’ucido ma juromo kelo ngo ni girathiera ni Yehova, ebiketho leine bicungo i wang’ jalam. 12 Jalam bing’olo valerne nimakere kud ayi ma leine cuu kunoke rac ko. Valer ma jalam bing’olo bibedo kumeca. 13 Ento tek ebemito edog eng’iewe, ecikere nimiyo valerne man nimedo bende thenge acel wi abic.

14 “‘Tek ng’atu moko udwoko ot pare leng’ ni piny ma leng’ ni Yehova, jalam bing’olo valerne, dok ebed cuu kunoke rac. Beine bibedo nimakere ku valer ma jalam bing’olo. 15 Ento tek ng’atu m’udwoko ot pare leng’ne ubemito edog eng’iewe, ecikere nimiyo sente mi valerne man ebimedo thenge acel wi abic i wiye, e ode bidoko pare.

16 “‘Tek ng’atu moko udwoko podho pare moko leng’ ni Yehova, jubing’olo valerne nimakere ku kadhiri mi kodhi m’ukwayu jucoy i iye: omer* acel mi kodhi nganu ma juyuke bibedo cekel pier abic mi mola ma tar. 17 Tek edwoko podho parene leng’ niai i oro mi Jibile, valer ma jung’olone bibedo kubang’e. 18 Tekene edwoko podho parene leng’ i ng’ey Jibile, jalam bing’olo ire beine nimakere ku wend oro m’udong’ nitundo i oro mi Jibile m’ulubo, man jucikiri niwodhe iwi valerne. 19 Ento tek ng’atu m’udwoko podhone leng’ ubemito edog eng’iewe, ecikere nimiyo sente mi valerne man nimedo thenge acel wi abic i wiye, e podhone bidong’ ire. 20 Ento tek eng’iewo ngo podhone man julwore ni ng’atu mange, dong’ ecopo dong’iewo ngo podhone kendo. 21 Tek jugonyo podhone i Jibile, ebidoko piny ma leng’ ni Yehova calu podho ma juthiero ire. Ebidoko aba mi julam.

22 “‘Tek ng’atu moko udwoko podho m’eng’iewo ang’iewa leng’ ni Yehova, ma ke etie ngo kum giralaga pare, 23 jalam bitimo ire kwan mi valerne nitundo i oro mi Jibile, man ebimiyo valer ma jung’olone cing’ nica. Etie piny ma leng’ ni Yehova. 24 I oro mi Jibile, podhone bidok i bang’ ng’atu m’eng’iewe i bang’e, i bang’ ng’atu ma ng’ombe tie pare.

25 “‘Jucikiri ning’olo valer ceke nimakere ku kadhiri mi cekel mi kabedo ma leng’. Cekel acel ucikere ni bedo gera* pier ario.

26 “‘Ento kudi ng’atu moko udwok kayu mi leya leng’, kum enyolere ni kayu ni Yehova. Dok ebed thwon dhiang’ kadi urombo, etie dong’ pa Yehova. 27 Tek etie i kind lei m’ucido man eware nimakere ku valer ma jung’olo, ecikere nimiyo valerne man nimedo thenge acel wi abic i wiye. Ento tekene edog eng’iewe ngo, jubilwore nimakere ku valer ma jung’olone.

28 “‘Piny moko mbe ma juromo lworo kunoke ma juromo dong’iewo tek ng’atu moko udaru thiere i the cik* ni Yehova kud i kind piny pare; dok ebed dhanu kunoke leya kadi podho m’etie ko. Piny ceke ma judaru thiero utie piny ma leng’ m’usagu ni Yehova. 29 M’umedo maeno, jucopo waru ngo ng’atu ma jung’olo lembe i wiye* man ma juketho ang’et pi nyoth. Jucikiri ninege andha.

30 “‘Apaje ceke mi ng’om, dok ebed mi cam mi podho kadi mi nying yen utie pa Yehova. Etie piny ma leng’ ni Yehova. 31 Tek ng’atu moko ubemito edog eng’iew apaje pare, ecikere nimiyo valerne man nimedo thenge acel wi abic i wiye. 32 Ento pir apaje ceke mi dhieng’, man mi rombe ku diegi, piny ceke ma kadhu kud i ther uluth pa jakwac, lei* mir apaje ucikere nibedo piny ma leng’ ni Yehova. 33 Ecikere ngo ning’iyo ka nyo e cuu kunoke e rac, kadok awila de kud ewile. Ento tekene epimo niwile, m’emiyo ku m’emito wile kone ceke bidoko ni piny ma leng’. Jucopo dong’iewogi ngo.’”

34 Eno tie lembang’ola ma Yehova umiyo ni Musa pi Juisrael iwi got Sinai.