POY MI CIK

1 Maeni lembe ma Musa uyero ni Israel ceke i ng’om mi Yordan i langa, i pambu mi langa i wang’ Suf, i kind Paran, Tofel, Laban, Hazeroth man Dizahab. 2 Niai kud i Horeb nitundo i Kadec-barnea, tie woth mi nindo apar acel kud i yo mi Got Seir. 3 I oro mi pier ang’wende, i dwi mir apar acel, i nindo ma kwong’a mi dwije, Musa uweco i bang’ Juisrael* nimakere ku lembe ceke ma Yehova ung’olo ire nia eyer igi. 4 Eno ubino i ng’ey m’eloyo Sihon m’ubimo mi Juamor, ma nwang’u bedo i Hecbon man Og m’ubimo mi Bacan ma nwang’u bedo i Actaroth i Edrei. 5 Musa ucaku koro i Cik i ng’om mi Yordan, i ng’om mi Moab, ewacu kumae:

6 “Yehova Mungu mwa uyero iwa i Horeb kumae: ‘Wudaru bedo dong’ lee dit i ng’om gudi maeni. 7 Wuwir wucidh nitundo i ng’om gudi mi Juamor man yor i bang’ ng’om ceke m’utieko ng’ete i Araba, ng’om gudi, Cefela, Negeb man dhu nam, ng’om mi Jukanan man Lebanon* nitundo yor i kulo ma dit, niwacu kulo Efrath. 8 Nen! aketho ng’ombe i weng’wu, wumondi man wumak ng’om ma Yehova ukwong’o pire ni kwaruwu, ni Abraham, Isak man Yakobo nia ebimiyo igi man ni nyikwaygi* yor i ng’eygi.’

9 “Man ayero iwu i saa maeca kumae: ‘Acopo yeyowu ngo kenda. 10 Yehova Mungu mwu unyayu wendwu man tin eni wendwu dong’ udoko lee calu nyikaluku mi polo. 11 Wek Yehova Mungu pa kwaruwu unyay wendwu wang’ elufu nisagu ma wutie ko kawoni man emii iwu mugisa tap calu m’eng’olo iwu. 12 Aromo yeyo ter mwu ma pek ku titi mwu e kenda nenedi? 13 Wulond kud i suru mwu, jumaco ma weg ng’eyong’ec, ma riek man m’ung’eyo lembe man abikethogi ni jutelwic mwu.’ 14 Wudwoko ira kumae: ‘Lembe m’iyero iwa nia watim utie ber.’ 15 Pieno, agamu jutelwic mi suru, jumaco ma riek man m’ung’eyo lembe man akethogi ni judongo mi dhanu elufu, judongo mi dhanu dak, judongo mi dhanu pier abic, judongo mi dhanu apar man bajego mi suru mwu.

16 “I saa nica ang’olo ni jupoklembe mwu kumae: ‘Ka wuwinjo lembe m’i kind umegwu, wupok lembe atira i kind ng’atini kud umin kunoke umondo. 17 Kud wubed kud akoyakoya i pokolembe. Wucikuru niwinjo ng’atu ma nok ku ma dit ceke rom. Kud wuwek dhanu unyay lworo i iwu, kum pokolembe utie pa Mungu man tek pokolembe moko utie tek iwu, wucikuru nikele i bang’a man abiwinje.’ 18 I saa maeca amiyo iwu telowic pi lembe ceke ma wucikuru nitimo.

19 “I ng’eye watugo woth niai kud i Horeb man wawotho kud i die langa maeni ceke ma dwong’ man ma nyayu lworo ma wuneno kud i yo mi ng’om gudi mi Juamor tap calu ma Yehova ung’olo iwa, ram ma wabin watundo ko i Kadec-barnea. 20 E ayero iwu kumae: ‘Wudaru tundo i ng’om gudi mi Juamor ma Yehova Mungu mwa ubemiyo iwa. 21 Nen! Yehova Mungu mwu umiyo ng’ombe iwu. Wuidhi, wumake tap calu ma Yehova Mungu pa kwaruwu uyero iwu. Lworo kud unegwu kadi ndiri de kud umakwu.’

22 “Ento wun ceke wubino i bang’a man wuyero kumae: ‘Wek waor jumaco moko gilar gicidh ginen iwa ng’ombe kara gidwog ginyuth iwa nia wang’ol yo ma kani man ka nyo wabiwok nwang’u kit adhura ma nenedi.’ 23 Parune uwok ber i wang’a, uketho ang’iyo dhanu apar ario m’i kind jumaco mwu, ng’atu acel kubang’ suruman. 24 Giai man giidho i ng’om gudi, gitundo i Poga* mir Eckol man giwok gilibe. 25 Gigamu kum nying yen moko mi ng’ombe gidwogo ko i bang’wa; gidwogo bende iwa ku rapor nia, ‘ng’om ma Yehova ubemiyo iwa utie ng’om ma cuu.’ 26 Ento wukwero niidho man wujai i kum lembe ma Yehova Mungu mwu ung’olo. 27 Wumeduru asu ning’ur i hema mwu ma wubeyero ko kumae: ‘Tie nikum adegi ma Yehova udagu kowa re m’uketho ewodhowa kud i ng’om mi Misiri pi nimiyowa i cing’ Juamor kara gidarwa. 28 Kabedo ma nenedi ma wacidho i iye? Umego mwa gituro cwinywa,* giyero kumae: “Gitie dhanu ma dongo dongo man ma lazangara nikadhuwa man adhura migi tie ma dongo ma jutieko ku gang’kidi nitundo i polo* man waneno bende wot Juanakim kuca.”’

29 “E ayero iwu kumae: ‘Ndiri kud umakwu kadi lworo de kud unegwu pigi. 30 Yehova Mungu mwu bitelo yo i weng’wu man ebikiedo piwu tap calu m’etimo i Misiri i weng’wu. 31 Man wuneno ayi ma Yehova Mungu mwu uyeyo kowu i langa, tap calu ma ng’atini yeyo ko wode, kakare ceke ma wucidho i iye cil ma wutundo ko i kabedo maeni.’ 32 Ento nikum lembuno zoo de, wubedo mbe ku yiyoyic i Yehova Mungu mwu 33 m’utelo yo i weng’wu kara elib iwu kabedo ma wuromo gonjo i iye. Enyuthere i mac kud uthieno man i afuru ku dieceng’ pi ninyutho iwu yo m’ukwayu wuwoth i iye.

34 “I saa maeno zoo, Yehova uwinjo lembe ma wubino yero man ng’eicwiny umake, e ekwong’o kumae: 35 ‘Ng’atu moko acel de mbe m’i kind dhanu m’utuk ma rac maeni ma bineno ng’om ma ber m’akwong’o nia abimiyo ni kwaruwu, 36 ndhu Kaleb ma wod Yefune kende. Ebinene man abimiyo ire ng’om m’ewotho i iye man ni wote, pilembe elubo tok Yehova kud adundene zoo. 37 (Ng’eicwiny umaku Yehova i kuma de, ke piwu, man eyero kumae: “In de ibimondo ngo i iye. 38 Yocuwa ma wod Nun ma cungo i weng’i re ma bimondo i ng’ombe. Keth ebed tek,* kum en re m’ebiketho Israel bilagu ng’ombe.”) 39 M’umedo maeno, awiya mwu ma wuwacu nia gibidoko ni jambayeki man wotwu ma tin ging’eyo ngo gin ma ber kadi ma rac, gin re ma gibimondo man abimiyo ng’ombe igi ni aba. 40 Ento wun, wulok ku ng’eiwu wucidh i langa kud i yo mi Nam ma kwar.’

41 “E wulund wuwacu ira kumae: ‘Wadubo ni Yehova. Kawoni wabiidho malu man wabikiedo tap calu ma Yehova Mungu mwa ung’olo iwa!’ Pieno ng’atuman m’i kindwu uting’o umbu pare mi lwiny, man wuparu nia ebibedo lembe ma yot niidho iwi got. 42 Ento Yehova wacu ira nia, ‘yer igi kumae: “Kud wuidh malu nikiedo, kum abibedo mbe kudwu. Tek wuidho, judegi mwu bivoyowu.”’ 43 Pieno ayero iwu, ento wuwinjo ngo. Wulund wujai i kum lembe ma Yehova ung’olo man rikini mi kumwu uketho wung’ap niidho iwi got. 44 E Juamor ma bedo iwi gode giwok pi nirombo kudwu man giriemowu calu ma kic riemo kojo, e gilalu iwu i Seir nitundo bir i Horma. 45 Wugam wuloko man wucaku wak i wang’ Yehova, ento Yehova winjowu ngo kadi ithe de eciko ngo i beng’wu. 46 Eno re m’uketho wubedo lee mandha i Kadec.

2 “l ng’eye, waloko man wacidho i langa kud i yo mi Nam ma kwar tap calu ma Yehova uyero ira man wawotho pi nindo ma dupa ma wabedhoko ko Got Seir. 2 Tokcenne Yehova uwacu ira kumae: 3 ‘Wudaru dhoko goduni romo. Kawoni wuwir wudok yo malu. 4 Man ng’ol ni dhanune kumae: “Wubikadhu ceng’ini kud i mupaka mir umego mwu ma gi nyikway Esau ma gibedo i Seir. Lworo binegogi i kumwu man wubed ku weng’wu lee mandha. 5 Kud wutug ali i dhoggi,* kum abimiyo ngo ng’om migi nyanok de iwu kadok kaka ma romo tielo acel de, pilembe adaru miyo Got Seir ni Esau, ni aba pare. 6 Wucikuru nimiyo igi sente pi cam ma wubicamu man wucikuru niculo pi pii ma wubimadhu. 7 Kum Yehova Mungu mwu umiyo iwu mugisa i gin ceke ma wutimo. Eng’eyo ma ber mandha pi woth mwu i langa ma dit maeni. I oro pier ang’wen maeni, Yehova Mungu mwu ubedo kudwu man wukoso ngo gin moko acel de.”’ 8 Pieno wakadhu ceng’ini kud umego mwa ma gi nyikway Esau ma gibedo i Seir, ma waweko ko gengi mir Araba bor niai kud i Elath man niai kud i Ezion-geber.

“I ng’eye wawiro man wawotho kud i yo mi langa mi Moab. 9 Yehova ulund uyero ira kumae: ‘Kud wutug ali kadi lwiny i dhu Moab kum abimiyo ngo iwu ng’om pare nyanok de ni aba, pilembe adaru miyo Ar ni aba ni nyikway Lot. 10 (Juemim gilar gibed gikwo keca, gibino dhanu ma dongo dongo man wendgi de ubino lee, gidongo ma boco calu Juanakim. 11 Jurefaim de jubed junenogi calu Juanakim man Jumoab ubed ulwong’ogi nia Juemim. 12 I wang’e Juhori gibed gikwo i Seir, ento nyikway Esau gimaku ng’om migi man ginyothogi man gicaku bedo kakagi, tap calu ma Israel bitimo i ng’om ma jumiyo ire ni aba ma Yehova bimiyo ire andha.) 13 Kawoni wucidhi man wukadh loka Poga* mi Zered.’ E wagam wakadhu loka Poga* mi Zered. 14 Niai ma waai i Kadec-barnea nitundo ma wakadhu ko Poga* mi Zered, wawotho pi oro pier adek wi abora cil ma dhanu m’utuk mi jumaco ma kiedo lwiny githo ko ceke kud i kagonjo, tap calu ma Yehova ular ukwong’o igi. 15 Cing’ Yehova ubino i kumgi pi nidarugi kud i kagonjo nitundo ma githum ko tup.

16 “Kinde ma jumaco ma kiedo lwiny githo ceke kud i kind dhanu, 17 Yehova ugam uweco kendo i bang’a, eyero kumae: 18 ‘Tin eni ukwayu ikadh ceng’ini ku ng’om mi Moab, niwacu Ar. 19 Kinde m’ibiwok ceng’ini ku Juamon, kud isendgi kadi kud irokgi, kum abimiyo ngo iri nyanok de ng’om mi Juamon ni aba, pilembe adaru miye ni nyikway Lot ni aba migi. 20 Maeno bende jubed jukwane ni ng’om mi Jurefaim. (Jurefaim ular ubed ukwo keca man Juamon ubed ulwong’ogi nia Juzamzumim. 21 Gibino dhanu ma dongo dongo, wendgi de bino lee man gidongo ma boco calu Juanakim, ento Yehova udarugi kud i wang’ Juamon, man Juamon uriemogi cen, e gicaku bedo kakagi. 22 Eno tie gin m’etimo pi nyikway Esau ma kawoni gibedo i Seir kinde m’edaru Juhori kud i wang’gi kara giriemgi man gibed kakagi nitundo tin eni. 23 Pi Juavim ke, gibed gibedo i pacu m’ubembo nitundo i Gaza cil ma Jukafthorim m’uai i Kafthor ubin udaru kogi man gicaku bedo kakagi.

24 “‘Wuai malu man wukadh kud i Poga mir Arnon. Nen! amiyo Sihon ma Jaamor m’ubimo mi Hecbon i cingwu. Pieno, wucak maku ng’om pare man wutug lwiny i dhoge. 25 Niai tin eni, abicaku ketho ndiri ku lworo mwu bimaku dhanu ceke ma n’i the polo ma biwinjo rwonglembe mwu. Akpal bimakugi man kumgi bimiel piwu.’*

26 “I ng’eye, aoro jukwenda niai kud i langa mi Kedemoth i bang’ ubimo Sihon mi Hecbon ku kwenda ma e mi kwiyocwiny: 27 ‘Wek akadh kud i ng’om peri. Abiwotho kud i ndaki man abiwiro ngo yor acwic kadi yor acam. 28 Abicamu cam man abimadhu pii m’ibilworo ira alwora kende. Wek ndhu akadh ku tienda kende ci. 29 Eno tie gin ma nyikway Esau ma gibedo i Seir man Jumoab ma gibedo i Ar gitimo ira cil m’akadhu ko loka Yordan i ng’om ma Yehova Mungu mwa ubemiyo iwa.’ 30 Ento ubimo Sihon mi Hecbon uweko ngo wakadhi, pilembe Yehova Mungu mwu uweko wiye* doko tek man cwinye doko nwang’ kara emiye i cingwu calu m’edaru timo.

31 “I ng’eye Yehova wacu ira kumae: ‘Nen! acaku miyo Sihon ku ng’om pare iri. Cak maku ng’om parene.’ 32 Kinde ma Sihon uwok ku dhanu pare ceke pi nirombo kudwa i lwiny i Yahaz, 33 Yehova Mungu mwa ugam umiye i cingwa, uketho wavoye ku wote man dhanu pare zoo. 34 I saa maeca, wamaku adhura pare ceke man wanyotho adhurane zoo uketho i iye jumaco, jumamon man awiya. Waweko ngo ng’atu moko acel de udong’ kwo. 35 Wagam wayaku iwa kende kende udul lim, karacelo ku jambayeki kud i adhura ma tung’ tung’ ma wamaku. 36 Niai i Aroer ma n’i dhu Poga mir Arnon* (uketho i iye adhura ma n’i poga) nicidho bir i Gilead, adhura moko mbe ma watundo ngo i iye. Yehova Mungu mwa umiyogi ceke i cingwa. 37 Ento wucoro ngo i kum ng’om mi Juamon, i dhu Poga* ceke mi Yabok man i adhura ma tung’ tung’ mi ng’om gudi, kadi kaka moko ci ma Yehova Mungu mwa ukwero.

3 “I ng’eye, wawiro man waidho kud i Yo mi Bacan. Man Og m’ubimo mi Bacan uwok ku dhanu pare ceke pi nirombo kudwa i lwiny i Edrei. 2 E Yehova ugam uyero ira kumae: ‘Lworo kud unegi i kume, pilembe abimiye i cingi ku dhanu pare ceke man ng’om pare; ibitimo i kume tap gin m’itimo i kum Sihon m’ubimo mi Juamor m’ubed ukwo i Hecbon.’ 3 Pieno, Yehova Mungu mwa umiyo bende Og m’Ubimo mi Bacan ku dhanu pare ceke i cingwa man wamedara nigoye nitundo ma ng’atu acel de mbe m’udong’ kwo kud i kind dhanu pare. 4 I ng’eye, wamaku adhura pare ceke; wamayugi kud adhura ceke, acel de mbe m’udong’: adhura pier abusiel, niwacu ng’om mir Argob zoo ma en e ker pa Og i Bacan. 5 Adhurane ceke jutiekogi ku gang’kidi ma wiw m’utie ku dhugola man riu, karacelo kud adhura dupa ma thindho thindho. 6 Ento wanyothogi tap calu ma watimo i kum ubimo Sihon mi Hecbon; wanyotho adhura ceke, uketho i iye jumaco, jumamon man awiya. 7 Man wacoko iwa udul lim zoo ku jambayeki mir adhura ma tung’ tung’.

8 “I saa maeca, wamaku ng’om mi jubim ario mi Juamor ma gibino i ng’om mi Yordan, niai i Poga* mir Arnon nitundo bir i kum Got Hermon 9 (got ma Jusidon ubed ulwong’o Sirion, Juamor ke ubed ulwong’e Senir), 10 adhura ceke mi pambu, Gilead ceke man Bacan ceke nicidho bir i Saleka kud Edrei ma gin adhura mi ker pa Og mi Bacan. 11 Kum Ubimo Og mi Bacan ubino ng’atu ma tokcen m’udong’ i kind Jurefaim. Tara* pare ubino mi cuma* man fodi asu eni Raba mi Juamon, bor pare tie bot* abung’wen man lac wang’e ke bot ang’wen nimakere ku bot ma jubed jupimo ko piny. 12 I saa maeca, wagam wamaku ng’om ma e: niai i Aroer ma n’i dhu Poga mir Arnon* man nusu ng’om gudi mi Gilead man amiyo adhura mi ng’ombe ni suru pa Ruben man ni suru pa Gad. 13 Man dong Gilead ku Bacan ceke mi ker pa Og, amiyogi ni nusu mi suru pa Manase. Ng’om ceke mir Argob ma nwang’ere i Bacan ugam ung’eyere ni ng’om mi Jurefaim.

14 “Yair ma wod Manase umaku ng’om ceke mir Argob nicidho bir i kieu mi Jugecur man mi Jumaakath man ecaku nyinge i kum pacu maeno mi Bacan nia Havoth-yair* cil tin eni. 15 Man adaru miyo Gilead ni Makir. 16 Man ni suru pa Ruben ku suru pa Gad, amiyo niai i Gilead nicidho i Poga mir Arnon.* Diere pa pogane utie kieu migi man ecidho bir nitundo i Yabok ma en e poga mi kieu mi Juamon, 17 man Araba ku Yordan man dhu kulone niai i Kinereth nicidho i nam mir Araba niwacu Nam kadu* i the lung’ mi Pisga yo nyangu.

18 “I ng’eye ang’olo iwu kumae: ‘Yehova Mungu mwu umiyo iwu ng’om maeni kara wumake. Jumaco mwu ceke ma cwinygi tek, gibiting’o jamlwiny man gibikadhu lokaca i wang’ umego mwu ma gi Juisrael. 19 Kende kende mon mwu, awiya mwu man udul lim mwu (ang’eyo ma ber nia wutie kud udul lim dupa) re ma bimediri nibedo i adhura ma tung’ tung’ m’amiyo iwu, 20 cil ma Yehova bimiyo ko yom ni umego mwu calu m’etimo iwu man gin bende gibimaku ng’om ma Yehova Mungu mwu bimiyo igi loka Yordan. I ng’eye, wubidwogo ng’atuman i dhug aba pare m’amiyo iwu.’

21 “I saa maeca, ang’olo ni Yocuwa kumae: ‘Ineno ku weng’i gin ma Yehova Mungu mwu utimo i kum jubim ario maeni. Yehova bitimo gin ma rom i kum ker ceke m’ibikadhu i bang’gi lokaca. 22 Kud wulworgi, kum Yehova Mungu mwu re m’ubekiedo piwu.’

23 “Saa maeca akwayu Yehova awacu kumae: 24 ‘E Rwoth Ubimo ma Malu ngbir Yehova, icaku nyutho dwong’ peri man cingi ma tek ni jatic peri, kum mungu ma kani i polo kadi i ng’om ma copo timo wadi udu ma kumeni calu ini? 25 Timba wek akadh lokaca man anen ng’om ma ber ma n’i loka Yordan, ng’om gudi ma ber maeni man Lebanon.’ 26 Ento Yehova ubino ku ng’eicwiny asu i kuma piwu, man emito ngo ewinja. Yehova ulund uyero ira kumae: ‘Eromo! Kud iwec ira iwi lembuno kendo nyanok de. 27 Idh malu iwi Pisga man inen yo reto, yo malu, yo piny man yo nyangu man inen ng’ombe ku weng’i kum loka Yordan e re ibikadhu ngo. 28 Keth Yocuwa ni jatela, tiel cwinye man idwoke tek pilembe en re m’ebikadhu lokaca i wang’ dhanu maeni man en re m’ebiketho gilag ng’om m’ibineno.’ 29 Lembe maeno zoo utimere kinde ma nwang’u wabedo i poga i wang’ Beth-peor.

4 “Kawoni wuwinji, E Israel, cik man telowic mi pokolembe m’abeponjo iwu nia wuwor kara wubed kwo man wumondi wumak ng’om ma Yehova Mungu pa kwaruwu ubemiyo iwu. 2 Kud wumed kum lembe m’abeng’olo iwu kadi kud wuwodh kume kara wugwok lembang’ola pa Yehova Mungu mwu m’abeng’olo iwu.

3 “Wuneno ku weng’wu gin ma Yehova timo i lembe pa Baal mi Peor; Yehova Mungu mwu udaru cen kud i kindwu dhanu ceke ma gilubo tok Baal mi Peor. 4 Ento wun ma wumoko kii i kum Yehova Mungu mwu, wun ceke wutie kwo tin eni. 5 Nen! aponjowu ku cik man telowic mi pokolembe tap calu ma Yehova Mungu para ung’olo ira, kara wuworgi i ng’om ma wubimaku. 6 Wucikuru niworogi cuu mandha kum eno binyutho ni dhanu ma biwinjo pi cik maeno ceke nia wu riek man wunyang’ i lembe, e gibiwacu kumae: ‘M’umbe jiji, thek ma dit maeni gi dhanu ma riek man nyang’ i lembe.’ 7 Kum thek ma dit ma kani ma mungu pare ni ceng’ini kude calu ma Yehova Mungu mwa ni kudwa saa moko ci ma walwong’e i iye? 8 Man thek ma dit ma kani m’utie ku cik ma pwe man telowic mi pokolembe calu cik maeni zoo m’abeketho i weng’wu tin eni?

9 “Kende kende wubed ku weng’wu man wunen ber* kara kud wuwil ku gin ma weng’wu uneno man kud giwok kud i adundewu i nindo ceke mi kwo mwu. Wucikuru bende niketho wotwu ku nyikweywu ung’eygi. 10 I nindo ma wucungo i wang’ Yehova Mungu mwu i Horeb, Yehova uyero ira kumae: ‘Cok ira dhu dhanu karacelo kara aketh giwinj lembe para kara giponj nilwora i nindo ceke ma gibikwo i iye iwi ng’om man giponj wotgi.’

11 “E wucoro ceng’ini man wucungo i the got man got ubino wang’ ku mac nitundo bir i polo;* mudho bino nuti, afuru man mudho ma bii. 12 Man Yehova caku weco i beng’wu kud i mac. Wuwinjo dwal mi wec ento wuneno ngo ayi moko, dwal kende m’ubino nuti. 13 Man etwong’o iwu lembariba pare m’eng’olo nia wuwor, niwacu Cik apar.* Yor i ng’eye, ekiewogi iwi bankidi ario. 14 I saa maeca, Yehova ung’olo ira nia aponjwu ku cik man telowic mi pokolembe ma wubiworo i ng’om ma wubimondo i iye pi nimaku.

15 “Pieno, wunen ber* kum wuneno ngo ayi moko ci i nindo ma Yehova uweco i beng’wu i Horeb kud i die mac, 16 kara kud wunyothuru ma wuyik ko iwu ayi gin m’acwiya m’ang’ika m’unyutho ayi gin moko ci, nik’ebed ayi pa co kadi pa mon, 17 ayi lei ceke m’i ng’om, kadi ayi winyo moko ci ma ringo i kor polo, 18 ayi piny moko ci ma lak alaka iwi ng’om, kadi ayi rec ceke ma n’i pii i the ng’om. 19 Kinde ma wung’ayu weng’wu i polo man wuneno ceng’ ku dwi man nyikaluku, udul mony ceke m’i polo, kud wuwek juwondwu ya wukul korwu piny igi man wutim igi. Yehova Mungu mwu umiyogi ni dhanu ceke mi the polo zoo. 20 Ento wutie ju ma Yehova uting’o man ewodho kud i ukaa mi loyo cuma kud i Misiri kara wudok dhanu ma pare gire* calu ma wutie tin eni.

21 “Ng’eicwiny umaku Yehova i kuma piwu man ekwong’o nia abikadhu ngo Yordan kadi nimondo i ng’om ma ber ma Yehova Mungu mwu ubemiyo iwu ni giralaga. 22 Kum ubekwayu atho i ng’ombuni, abikadhu ngo Yordan ento wun wubikadhu lokaca man wubimaku ng’om ma ber maeni. 23 Wubed ku weng’wu kara wiwu kud uwil i kum lembariba ma Yehova Mungu mwu utimo kudwu man kud wuyik iwu ayi gin m’acwiya m’ang’ika, ayi gin moko ci ma Yehova Mungu mwu ukwero iwu. 24 Kum Yehova Mungu mwu en e mac ma wang’u piny ruk, Mungu ma mito jutim ire kende.

25 “Tek wubinyolo wotwu man nyikweywu, man wukwo pi nindo ma lee i ng’ombe man wunyothuru ma wuyiko ko ayi gin m’acwiya m’ang’ika mi kite moko ci man wutimo lembe ma rac i wang’ Yehova Mungu mwu pi ninyayu can i iye, 26 abeting’o polo ku ng’om ni jumulembe i kumwu tin nia wubirwinyo kokoro man pio kud i ng’om ma wubekadhu Yordan pi nimaku; wubigalu ngo i iye ento wubithum kpo. 27 Yehova bilalu iwu i kind dhanu man ju ma nok m’i kindwu kende re ma biboth kud i kind thek ma Yehova biterowu i iye. 28 Kuca wubiwok timo ni mungu mi yen man mi kidi ma cing’ dhanu yiko en, mungu ma neno ngo piny, ma winjo ngo lembe, ma camu ngo kadi ma ng’wiyo de ngo piny.

29 “Tek wusayu Yehova Mungu mwu ku kuca, wubinwang’e andha, tek wukwaye kud adundewu ceke man ku ng’eyong’ec* mwu ceke. 30 Tokcenne kinde ma wubinweng’uru ku peko ma lee man lembe maeno ceke utimere i kumwu, e wubilund dwogo i bang’ Yehova Mungu mwu man wubiwinjo dwande. 31 Kum Yehova Mungu mwu tie Mungu ma jakisa, ebiwenjowu ngo, ebinyothowu de ngo man ebiwil ungo ku lembariba m’etimo ku kwong’ ni kwaruwu.

32 “Kawoni wupenji pi rundi ma yang’ con i wang’ rundi mwu, niai i nindo ma Mungu cwiyo iye dhanu i ng’om, wusay niai i gund polo acel nicidho i gunde ma kucelo. Nyo lembe moko ma dit kumeni udaru timere de kadi lembe moko ci ma kumeno udaru winjere de? 33 Nyo dhanu moko mange udaru winjo de dwand Mungu ubeweco niai kud i mac i ayi ma wuwinjo man wumeduru nibedo kwo? 34 Kunoke nyo Mungu udaru pimo de niting’o thek moko ire kud i kind thek mange ku pokolembe,* ku giranyutha, kud udu, ku lwiny, ku cing’ ma tek, ku bot m’arieya, man ku timo ma ng’oyo ndiri calu ma Yehova Mungu mwu utimo piwu i Misiri i weng’wu? 35 Wun giwu junyutho iwu lembe maenogi kara wung’ey nia Yehova tie Mungu mandha, mange mbe m’uweko en. 36 Eketho wuwinjo dwande niai kud i polo pi nitwinyowu, man iwi ng’om eketho wuneno mac pare ma dit man wuwinjo wec pare niai kud i mac.

37 “Calu m’emaru kwaruwu man eng’iyo nyikwaygi* yor i ng’eygi, ewodhowu kud i Misiri i wang’e ku tego pare ma dit. 38 Eriemo thek ma dit man ma tek nisaguwu kud i weng’wu pi niroyowu i ng’om migi man nimiye iwu ni giralaga calu m’etie ko tin. 39 Dong’ wung’ey tin eni man wugwok lembene i adundewu nia Yehova tie Mungu mandha malu i polo man piny iwi ng’om. Mange mbe. 40 Wucikuru niworo cik pare man lembang’ola pare m’abeng’olo iwu tin eni kara lembe woth iwu ma ber man ni wotwu yor i ng’eywu kara wukwo lee i ng’om ma Yehova Mungu mwu ubemiyo iwu.

41 I saa maeca, Musa ukoyo adhura adek i thenge ma yo nyangu mi Yordan, 42 kara tek ng’atu moko unego wadi akakaka ngo, ma nwang’u elar edage de ngo i wang’e, eringi i adhura acel m’i kind maeno kara ebed kwo. 43 Adhurane gini e: Bezer i langa iwi ting’ ting’* pi suru pa Ruben, Ramoth-gilead pi suru pa Gad man Galon i Bacan pi suru pa Manase.

44 Maeni tie Cik ma Musa uketho i wang’ dhanu mir Israel. 45 Eni tie poyowic, cik man telowic mi pokolembe ma Musa umiyo ni Juisrael i ng’ey ma giwok kud i Misiri, 46 i ng’om mi Yordan i poga ma n’i wang’ Beth-peor i ng’om p’ubimo Sihon mi Juamor m’ubed ubedo i Hecbon ma Musa ku Juisrael givoyo i ng’ey ma giwok kud i Misiri. 47 Gimaku ng’om pare ku ng’om p’ubimo Og mi Bacan, jubim ario mi Juamor ma gibino i ng’om ma yo nyangu mi Yordan, 48 niai i Aroer ma n’i dhu Poga mir Arnon* nitundo i kum Got Sayuni, niwacu Hermon, 49 man Araba* ceke i ng’om ma yo nyangu mi Yordan, nicidho bir i Nam mir Araba i the lung’ mi Pisga.

5 I ng’eye, Musa ucoko Juisrael ceke man ewacu igi kumae: “E Israel, wuwinj cik man telowic mi pokolembe m’abetwong’o iwu tin, wucikuru ning’eyogi man niworogi cuu mandha. 2 Yehova Mungu mwa utimo kudwa lembariba i Horeb. 3 Yehova utimo ngo lembariba maeno ku kwaruwa, ento kudwa wan ceke ma watie kwo tin kakeni. 4 Yehova uweco kudwu wang’ ku wang’ iwi got kud i die mac. 5 I saa maeca, acungo i kind Yehova kudwu pi nikoko iwu wec pa Yehova kum lworo ubino negowu pi mac man wuidho ngo iwi got. Eyero kumae:

6 “‘An a Yehova Mungu peri m’uwodhi kud i ng’om mi Misiri, kud i ot mi ng’eca. 7 Kud ibed nyanok de ku mungu moko ci mange m’uweko an.

8 “‘Kud iyik iri ayi gin m’acwiya m’ang’ika kadi ayi gin moko ci ma n’i malu i polo kunoke ma n’i piny i ng’om kadi ma n’i pii i the ng’om. 9 Kud ikul kori piny igi kadi kud iwek juteli nitimo igi, kum an a Yehova Mungu peri a Mungu ma kwayu jutim ire kende, ma kelo matira pi kosa mi wego iwi wot, iwi dhanu m’utuk mir adege man iwi dhanu m’utuk mir ang’wende mi ju m’udaga, 10 ento ma nyutho mer ma lokere ngo* nitundo kadok ni dhanu m’utuk mir elufu mi ju m’umara man m’ubeworo lembang’ola para.

11 “‘Kud itii ku nying’ Yehova Mungu peri i ayi m’umaku piny ungo, kum Yehova biweko ngo m’umbe matira ng’atu moko ci m’utiyo ku nyinge i ayi m’umaku piny ungo.

12 “‘Wor ceng’ Sabatu, kara igwoke ebed leng’ tap calu ma Yehova Mungu peri ung’olo iri. 13 Ibitiyo man ibitimo tic peri ceke pi ceng’ abusiel. 14 Ento ceng’ mir abirone tie Sabatu ni Yehova Mungu peri. Kud itim tic moko ci, nik’ebed in, kadi wodi, kadi nyeri, kadi ng’eca peri ma co, kunoke ma nyaku, kadi thwon dhiang’ peri, kadi kana peri, kadi lei peri moko ci mi pacu, kadi umondo peri ma bedo i adhura* peri, kara ng’eca peri ma co man ma nyaku uyom calu in. 15 Poy nia igam idoko ng’eca i ng’om mi Misiri man Yehova Mungu peri uwodhi ku kuca ku cing’ ma tek man ku bot m’arieya. Eno re m’uketho Yehova Mungu peri ung’olo iri nia iwor ceng’ Sabatu.

16 “‘Yung wuru ku meru tap calu ma Yehova Mungu peri ung’olo iri, kara ikwo pi nindo ma lee man lembe ubed miero iri i ng’om ma Yehova Mungu peri ubemiyo iri.

17 “‘Kud ineg nek.

18 “‘Kud itim abor.*

19 “‘Kud ikwal kwo.

20 “‘Kud imii lembatuca mi ndra i kum wedu.

21 “‘Kud iketh cwinyi i kum dhaku pa wedu. Kud iketh cwinyi i ayi m’umaku piny ungo i kum ot pa wedu, kadi i kum podho pare, kadi i kum ng’eca pare ma co, kadi i kum ng’eca pare ma nyaku, kadi i kum thwon dhiang’ pare, kadi i kum kana pare, kadi i kum piny moko ci m’utie pa wedu.’

22 “Cik* maeno, Yehova uyero ni cokiri peri ceke iwi got kud i die mac, kud i afuru man kud i mudho ma bii ku dwal ma dit man emedo ngo lembe moko; e ekiewogi iwi bankidi ario man emiyogi i bang’a.

23 “Ento ndhu ndhu kinde ma wuwinjo dwal m’ubewok kud i mudho saa ma got ubino wang’ ku mac, jutelwic mi suru mwu ceke ku judongo gigam gibino i bang’a. 24 E wuyero kumae: ‘Nen! Yehova Mungu mwa unyutho iwa dwong’ ku dito pare man wawinjo dwande kud i mac. Tin waneno nia karaman Mungu romo weco ku ng’atini re emedere asu nibedo kwo. 25 Dong’ pirang’o ukwayu watho? Kum mac ma dit maeni romo wang’uwa. Tekene wamedara niwinjo dwand Yehova Mungu mwa, wabitho andha. 26 Kum ng’a m’i kind kum ceke* m’uwinjo dwand Mungu ma kwo ubeweco kud i die mac calu ma wawinjo man asu emedere nikwo? 27 In re m’icidhi ceng’ini niwinjo lembe ceke ma Yehova Mungu mwa biyero, man in re m’ibiyero lembe ceke ma Yehova Mungu mwa uyero iri, wabiwinjo man wabitimo lembene.’

28 “E Yehova ugam uwinjo lembe ma wuyero ira man Yehova uwacu ira kumae: ‘Adaru winjo lembe ma dhanu maeno giyero iri. Lembe ceke ma giyero no tie ber. 29 Ka nwang’u ndhu saa ceke gibed giketho adundegi pi nilwora man pi niworo lembang’ola para ceke, e nwang’u lembe wotho ber igi man ni wotgi pi nja ku nja. 30 Cidh iwac igi kumae: “Wudok i hema mwu.” 31 Ento in ibidong’ keni karacelo kuda man abinyutho iri lembang’ola ceke, cik man telowic mi pokolembe m’icikiri niponjo igi man m’ukwayu giwor i ng’om m’abemiyo igi kara gimaki.’ 32 Kawoni wucikuru nibedo ku weng’wu pi nitimo tap calu ma Yehova Mungu mwu ung’olo iwu. Kud wulokuru yor acwic kadi yor acam. 33 Wucikuru niwotho i yo ceke ma Yehova Mungu mwu ung’olo iwu kara wubed kwo man lembe ubed miero iwu man nindo mwu ung’adi i ng’om ma wubimaku.

6 “Maeni gi lembang’ola, cik man telowic mi pokolembe ma Yehova Mungu mwu umiyo juponj kowu kara wuworgi kinde ma wubikadhu yo lokaca i ng’om ma wubecimaku, 2 kara wulwor Yehova Mungu mwu, man wuwor cik pare ceke, ku lembang’ola pare m’abeng’olo iwu, wun ku wotwu man nyikweywu i nindo ceke mi kwo mwu, kara wukwo pi nindo ma lee. 3 Man wucikuru niwinjo, E Israel, man wuworgi cuu mandha kara lembe ubed miero iwu man wunyay wudok lee i ng’om ma molo cak ku miyokic tap calu ma Yehova Mungu pa kwaruwu ung’olo iwu.

4 “Winji, E Israel: Yehova Mungu mwa en e Yehova acel kende. 5 Icikiri nimaru Yehova Mungu peri kud adundeni ceke, ku ng’eyong’ec* peri ceke man ku tegoni ceke.* 6 Lembe maeni m’abeng’olo iri tin, ucikere nibedo i adundeni, 7 man icikiri niponjogi cuu* ni woti man niweco pigi kinde m’ibedo i ot peri, kinde m’ibewotho i yo, kinde m’ivuto man kinde m’iai malu. 8 Twiigi ni jam poyowic i cingi man gicikiri nibedo calu giratwiya mi terwang’ i terweng’i.* 9 Kiewgi iwi ng’et dhugola mi ot peri man iwi dhugang’ peri.

10 “Kinde ma Yehova Mungu mwu uroyowu i ng’om m’ekwong’o ni kwaruwu m’Abraham, Isaak man Yakobo nia ebimiyo iwu adhura ma dongo man ma beco ma wugiero de ngo wun, 11 udi m’upong’ ku kwond piny ceke ma beco ma wutimo ngo tije wun, pii m’atong’a ma wutong’o ngo wun, podho mir ulok man yend oliv ma wupidho ngo wun, man wucamu nitundo ma wuyeng’, 12 wubed ku weng’wu kara kud wuwil ku Yehova m’uwodhowu kud i ng’om mi Misiri, kud i ot mi ng’eca. 13 Yehova Mungu mwu re ma wucikuru nilworo, en re ma wucikuru nitimo ire, man i nyinge re ma wucikuru nikwong’o kwong’. 14 Kud wulub tok mungu mange, mungu moko ci mi dhanu m’udhokowu tingili. 15 Kum Yehova Mungu mwu ma n’i kindwu utie Mungu ma kwayu jutim ire kende. Kan ungo, ng’eicwiny pa Yehova Mungu mwu biopo i kumwu man ebidaruwu kud i wang’ ng’om.

16 “Kud wumul i Yehova Mungu mwu calu ma wugam wumulo iye i Masa. 17 Wucikuru niworo cuu mandha lembang’ola pa Yehova Mungu mwu, poyowic pare man cik pare m’eng’olo iwu nia wuwor. 18 Wucikuru nitimo lembe m’atira man ma ber i wang’ Yehova, kara lembe ubed miero iwu man wumondi wumak ng’om ma ber ma Yehova ukwong’o pire ni kwaruwu, 19 ku riemo judegi mwu ceke kud i weng’wu, tap calu ma Yehova ung’olo.

20 “I nindo m’ubino, tek wodi bipenji kumae: ‘Thelembe mi poyowic, mi cik man telowic mi pokolembe ma Yehova Mungu mwa ung’olo iwu e utie ang’o?’ 21 E ibidwoko ni wodi kumae: ‘Wagam wadoko ng’eca pa Farao i Misiri, ento Yehova uwodhowa kud i Misiri ku cing’ ma tek. 22 Yehova umedere nioro i wang’wa ma wabeneno giranyutha kud udu ma dongo man ma nyotho piny iwi Misiri, iwi Farao man iwi juruot pare ceke. 23 Man ewodhowa ku kuca kara ekelwa keni pi nimiyo iwa ng’om m’egam ekwong’o pire ni kwaruwa. 24 I ng’eye, Yehova ung’olo iwa nia wawor cik maeni ceke man walwor Yehova Mungu mwa pi bero mwa ma nja kara wamedara nikwo calu ma watie tin eni. 25 Man eno binyutho nia watie weg bedopwe tek waworo lembang’ola maeno ceke cuu mandha i wang’ Yehova Mungu mwa, tap calu m’egam eng’olo iwa.’

7 “Kinde ma Yehova Mungu peri biroyi i ng’om m’ibecimondo i iye pi nimaku, ebiweyo bende cen kud i weng’i thek ma e ma wendgi lee: Juhithi, Jugirgaci, Juamor, Jukanan, Juperizi, Juhivi man Juyebusi, thek abiro ma wendgi lee dit man ma tek nisegi. 2 Yehova Mungu peri bimiyogi i cingi man ibivoyogi. Icikiri ninyothogi andha. Kud itim kugi lembariba moko ci, kadi kisa de kud unegi i kumgi. 3 Kud itim lembariba mi gamiri nyanok de kugi, kud imii nyigi ni wotgi kadi kud igam nyiggi ni woti. 4 Kum gibiloko woti cen kum lubo toka pi nitimo ni mungu mange, e ng’eicwiny pa Yehova biopo i kumi man ebinyothi pio.

5 “Ento icikiri nitimo lembe ma e i kumgi: Rwomb pemlam migi, ng’eny kidi migi mi thier, ng’ond mbegi migi mi thier* man wang’ ayi gin m’acwiya migi m’ang’ika pet. 6 Kum itie dhanu ma leng’ ni Yehova Mungu peri man Yehova Mungu peri ung’iyi kara idok dhanu pare, piny pare ma segi* kud i kind dhanu ceke ma n’i wang’ ng’om.

7 “Utie ngo nia pilembe wendwu ubino lee kud i kind dhanu zoo re m’uketho Yehova umeri man eng’iyi, kum wendwu ubino nok nisagu i kind dhanu zoo. 8 Ento tie nikum mer ma Yehova umeri ko man pilembe egwoko kwong’ m’ekwong’o ni kwaru peri re m’uketho Yehova uwodhi ku cing’ ma tek, pi niweri kud i ot mi ng’eca, kud i the tego* pa Farao m’ubimo mi Misiri. 9 Ing’eyo cuu nia Yehova Mungu peri tie Mungu mandha, Mungu ma jugeno, ma gwoko lembariba pare ku mer ma lokere ngo nitundo i kum dhanu m’utuk mir elufu mi ju m’umare man m’ubegwoko lembang’ola pare. 10 Ento ju m’udage ebiculo igi wang’ acel ku nyoth, ebigalu ngo nimiyo matira ni ju m’udage, ebiculo igi wang’ acel. 11 Pieno, nen nia igwoko lembang’ola man cik ku telowic mi pokolembe m’abeng’olo iri tin eni man iworgi.

12 “Tek imediri niwinjo telowic maeni mi pokolembe, iworogi man itiyo kugi, Yehova Mungu peri bigwoko lembariba man mer ma lokere ngo m’ekwong’o pire ni kwaru peri. 13 Ebimeri, ebimiyo iri mugisa man ebiketho ibinyay, eyo ebimiyo iri awiya dupa,* man ebimiyo mugisa iwi cam mi ng’om peri, nying cam peri, pigulok peri ma nyen, mo peri, nyithi dhieng’ mir udul lim peri ku nyithi rombe mi dwol peri i ng’om m’ekwong’o ni kwaru peri nia ebimiyo iri. 14 Ibidoko jamugisa nisagu dhanu ceke. Nico kadi dhaku moko mbe m’i kindwu ma bibedo jamugumba, kadi lim peri moko mbe ma bibedo m’umbe nyithindhe. 15 Yehova bikabu cen twoyo ceke kud i beng’i, ebikelo ngo i wiwu twoyo moko ci ma reco ma wugam wung’eyo i Misiri, ento ebiterogi iwi ju ceke m’udegi. 16 Icikiri ninyotho* dhanu ceke ma Yehova Mungu peri umiyo i cingi. Kisa kud unegi* i kumgi man kud itim ni mungu migi pilembe eno bidoko iri ni uwic.

17 “Tek iwacu i adundeni nia ‘Thek maeni wendgi ukadhuwa, wacopo riemogi nenedi?’ 18 Lworo kud unegi i kumgi, icikiri nipoy i kum gin ma Yehova Mungu peri utimo i kum Farao man i kum Misiri zoo. 19 Pokolembe* ma dongo ma weng’i uneno, giranyutha kud udu man cing’ ma tek ku bot m’arieya ma Yehova Mungu peri uwodhi ko. Eno re ma gin ma Yehova Mungu peri bitimo i kum dhanu ceke m’ibelworo. 20 Yehova Mungu peri bioro turcwiny* i wigi nitundo ma dong ju m’udong’ man m’upondo i weng’i bithum ko. 21 Lworo kud umeki i kumgi kum Yehova Mungu peri ni kudi, en e Mungu ma dwong’ man ma ng’oyo ndiri.

22 “Yehova Mungu peri biriemo thek maeni andha nok nok kud i weng’i. Bikwayu ngo idargi pio pio kara yedi ma kwiny mi lum kud unyay i kumi. 23 Yehova Mungu peri bimiyogi i cingi man ebivoyogi ceke nitundo ma gibithum ko pet. 24 Ebimiyo jubim migi i cingi man ibiweyo nying’gi cen kud i the polo. Ng’atu moko mbe ma bicungo i weng’i nitundo m’ibidarugi pet. 25 Icikiri niwang’u ayi gin m’acwiya m’ang’ika mi mungu migi i mac. Awanya mola ma tar ku mola ma kwar ma n’i kumgi kud unegi man kud iting’gi iri, gimaru doko iri ni uwic, kum etie gin ma Yehova Mungu peri udagu. 26 Kud ikel piny ma judagu i ot peri, imaru doko ni piny m’uromo ku nyoth calu gin. Dage ku cwinyi zoo man ikece magwei pilembe etie piny m’uromo ku nyoth.

8 “Icikiri nibedo ku weng’i pi niworo lembang’ola ceke m’abemiyo iri tin eni, kara imediri nikwo, inyay man imondi imak ng’om ma Yehova Mungu ukwong’o pire ni kwaru peri. 2 Poy pi yo ma bor ma Yehova Mungu peri uketho iwotho i iye pi oro pier ang’wen maeni i langa, pi nijwigi man pi nikethi i amulaic, pi ning’eyo gin ma n’i adundeni, ka nyo ibigwoko lembang’ola pare kunoke ngo. 3 Pieno ejwigi, eweko kec unegi man eketho ikwo ku mana m’ing’eyo ngo kadi kwaru peri de ging’eyo ngo kara ing’ey nia dhanu kwo ku cam* kende ngo, ento ku lembe ceke m’uai i dhu Yehova. 4 Bongu m’ikendo utii ngo kadi tiendi de ukwot ungo pi oro pier ang’wen maeni. 5 Ing’eyo cuu i adundeni nia tap calu ma ng’atini tiro wode, Yehova Mungu peri de ubino tiri.

6 “Dong’ icikiri nigwoko lembang’ola pa Yehova Mungu peri ma nwang’u ibewotho i yo pare man ibelwore. 7 Kum Yehova Mungu peri uberoyi i ng’om ma ber, ng’om kulo m’umol,* m’udenyini man pii ma thuc m’umol i poga man i ng’om gudi. 8 Ng’om mi nganu ku nganu ma juyuke, mir ulok, mi yend ulam, man ulemo, ng’om mi moj oliv ku miyokic, 9 ng’om ma cam bibedo ngo nok i iye man gin m’ibikoso de mbe, ng’om ma kidi m’i iye utie ku cuma i igi man kud i gudine ibibewodho mola ma tar.

10 “Kinde m’icamu man iyeng’, icikiri nipaku Yehova Mungu peri pi ng’om ma ber m’emiyo iri. 11 Bed ku weng’i kara kudi wii wil ku Yehova Mungu peri m’ikos ko nigwoko lembang’ola pare, telowic pare mi pokolembe man cik pare m’abeng’olo iri tin eni. 12 Kinde m’idaru camu man iyeng’, igiero udi ma beco man ibedo i igi, 13 kinde ma dhieng’, rombe man diegi peri unyay man mola ma tar ku mola ma kwar peri umedere, man itie ku piny ceke bik, 14 kud iwek kuhaya umond i ii man uketh iwil ku Yehova Mungu peri m’uwodhi kud i Misiri, kud i ot mi ng’eca, 15 m’uketho iwotho kud i die langa ma dit man ma ng’oyo ndiri, ma tie ku thwol ma jukwir man ith, kud i ng’om ngele ma pii mbe i iye. Eketho pii uwok kud i cana ma tek. 16 Man etungi ku mana i langa ma kwaru peri ging’eyo ngo pi nijwigi man pi nikethi i amulaic kara ibin inwang’ mugisa i nindo m’ubino. 17 Tek ibiyero i adundeni kumae: ‘Tego para gira man kero mi cinga gira re m’uwodho ira lonyo maeni.’ 18 Poy nia Yehova Mungu peri re m’umiyo iri tego mi nwang’u lonyo, pi nipong’o lembariba pare m’etimo ku kwong’ ni kwaru peri calu m’etimo tin eni.

19 “Tek wubiwil ku Yehova Mungu mwu kadok nyanok ci man wubilubo tok mungu mange, wubitimo igi man wubikulo korwu piny igi, abetuco lembe i kumwu tin eni nia wubithum andha. 20 Wun de wubirwinyo calu thek ma Yehova ubenyotho kud i weng’wu, pilembe wutuc ungo niwinjo dwand Yehova Mungu mwu.

9 “Winji, E Israel, tin ibekadhu Yordan pi nimondo man niyaku thek ma dit man ma tek nisegi, adhura ma dongo man ma jutieko ku gang’kidi nitundo i polo,* 2 dhanu ma dongo dongo man ma boco boco, wot Juanakim m’ing’eyo pigi man m’iwinjo jubewacu pigi kumae: ‘Ng’a ma copo cungo i wang’ wot Anak?’ 3 Pieno, icikiri ning’eyo tin nia Yehova Mungu peri bikadhu loka i weng’i. En e mac ma wang’u piny ruk, man ebidarugi. Ebijwigogi i weng’i kara iriemgi pio man inyothgi tap calu ma Yehova ugam ung’olo iri.

4 “Kinde ma Yehova Mungu peri biriemogi cen kud i weng’i, kud iyer i adundeni kumae: ‘Tie bedopwe para re m’uketho Yehova uroya pi nimaku ng’om maeni.’ Ento tie racu mi thek maeno re m’uketho Yehova uberiemogi cen kud i weng’i. 5 Utie ngo nikum bedopwe peri, kadi adundeni m’atira re m’uketho ibecimondo pi nimaku ng’om migi. Ento tie nikum racu mi thek maeno re m’uketho Yehova Mungu uberiemogi cen kud i weng’i man pi nipong’o lembe ma Yehova ukwong’o ni kwaru peri m’Abraham, Isak man Yakobo. 6 Dong’ ng’ey nia utie ngo nikum bedopwe peri re ma Yehova Mungu peri ubemiyo iri ng’om ma ber maeni pi nimake, kum itie dhanu ma jathwon.*

7 “Wupoy, wiwu kud uwil nyanok de pir ayi ma wuroko ko Yehova Mungu mwu i langa. Niai i nindo ma wuweko ng’om mi Misiri cil ma wutundo ko i kabedo maeni, wujai ni Yehova. 8 Kadok i Horeb de wuroko Yehova man Yehova ubino ku ng’eicwiny lee i kumwu, uketho ebino ayika pi nidaruwu. 9 Kinde m’aidho iwi got pi nigamu bankidi, bankidi mi lembariba ma Yehova utimo kudwu, abedo iwi got pi nindo pier ang’wen, dieceng’ ku diewor, m’abecamu ngo cam man m’abemadhu ngo pii. 10 E Yehova umiyo bankidi ario i bang’a ma lwet Mungu re m’ukiewo wigi, man i wigi ubino lembe ceke ma Yehova uyero iwu iwi got, kud i die mac i nindo ma wucokuru i iye. 11 I ajiki mi nindo pier ang’wen, dieceng’ ku diewor, Yehova umiyo bankidi ario i bang’a, bankidi mi lembariba, 12 man Yehova uyero ira kumae: ‘Ai malu, lor pio pio ku keni pilembe dhanu peri m’iwodho kud i Misiri gidaru badhiri. Gilokiri pio pio kud i yo m’ang’olo igi nia gilubi. Giyiko igi ayi gin m’acwiya mi cuma.’* 13 I ng’eye, Yehova uyero ira kumae: ‘Aneno dhanu maeni man nen! gitie dhanu ma juthwon.* 14 Dong’ weka, man abidarugi, abiweyo nying’gi kud i the polo, man abiketho ibidoko thek ma tek man ma wende lee nisagugi.’

15 “E agam aloko man aloro kud iwi got kinde ma got ubino wang’ ku mac man bankidi ario mi lembariba ubino i cinga zoo. 16 I ng’eye ating’o wang’a man aneno nia wudaru dubo ni Yehova Mungu mwu! Wuyiko iwu nyathi dhiang’ mi cuma.* Wulokuru pio kud i yo ma Yehova ung’olo iwu nia wulubi. 17 E ating’o bankidi ario, abologi ku cinga ario zoo man ang’enyogi i weng’wu. 18 I ng’eye, apodho arieba wang’a i wang’ Yehova calu ma kwong’a pi nindo pier ang’wen, dieceng’ ku diewor. Acamu ngo cam kadi pii de amadhu ngo nikum dubo ceke ma wudubo ma wutimo ko gin ma rac i wang’ Yehova man wunyayu ng’eicwiny i iye. 19 Kum lworo ubino nega pi ng’eicwiny ma dit ma Yehova ubino ko i kumwu, m’ebino ko ayika pi nidaruwu. Ento Yehova uwinja saa maeca bende.

20 “Yehova ubino ku ng’eicwiny lee i kum Arun uketho ebino ayika pi ninyothe, ento akwayu pir Arun i saa maeca bende. 21 I ng’eye, ating’o nyathi dhiang’ ma tie jamdubo ma wuyikone man awang’e i mac; ang’enyo iye man arege nyung’u nyung’u nitundo edoko ma yom calu utur man aoyo uturne i pii m’umol niai kud iwi got.

22 “M’umedo maeno, i Tabera, i Masa man i Kibroth-hatava de wuroko Yehova, uketho ng’eicwiny umake. 23 Kinde ma Yehova uorowu kud i Kadec-barnea, ewacu kumae: ‘Wuidhi man wumak ng’om m’abimiyo iwu andha!’ Wujai kendo i kum lembe ma Yehova Mungu mwu ung’olo, wubedo ngo ku yiyoyic i iye man wuwore de ngo. 24 Niai m’ang’eyowu ci, wubed wujai mwu ni Yehova.

25 “Pieno, abedo asu m’apodho arieba wang’a i wang’ Yehova pi nindo pier ang’wen, dieceng’ ku diewor; apodho arieba wang’a kumeno pilembe Yehova yero nia ebidaruwu. 26 Acaku kwayu Yehova man awacu kumae: ‘E Rwoth Ubimo ma Malu ngbir Yehova, kud ikel nyoth iwi dhanu peri. Gitie piny peri ma segi* m’iwaru ku dwong’ peri man iwodho kud i Misiri ku cing’ ma tek. 27 Poy pi jurutic peri m’Abraham, Isak man Yakobo. Kud iketh wii i kum thwon mi dhanu maeni, i kum racu migi man i kum dubo migi. 28 Kan ungo dhanu mi ng’om m’iwodhowa kud i iye biwacu kumae: “Lembe uvoyo Yehova avoya ka terogi i ng’om m’eng’olo igi man adegi m’edagu kogi re m’uketho ewodhogi pi niterogi i langa.” 29 Kum gitie dhanu peri man piny peri ma segi* m’iwodho ku tego peri ma dit man ku boti m’arieya.’

10 “I saa maeca, Yehova uwacu ira kumae: ‘Pay iri bankidi ario calu ma kwong’a man iidh i bang’a iwi got; yik iri bende sanduku* mi yen. 2 Man abikiewo iwi bankidine wec m’ubino iwi bankidi ma kwong’a m’ing’enyo man ibikethogi i sanduku.’ 3 Pieno, ayiko sanduku mi yend utiep man apayu bankidi ario calu ma kwong’a man aidho iwi got ku bankidi arione i cinga. 4 E ekiewo iwi bankidine wec m’elar ekiewo i wang’e, Cik apar* ma Yehova uyero iwu iwi got kud i die mac i nindo ma wucokuru i iye; man Yehova umiyogi i bang’a. 5 E aloko man aloro kud iwi got, aketho bankidine i sanduku m’ayiko, kaka ma gin’i iye asu, tap calu ma Yehova ung’olo ira.

6 “I ng’eye, Juisrael gitugo woth kud i Beroth Bene-yakan man gicidho i Mosera. Arun uwok utho keca man jukunye de keca, e wode ma Eleazar udoko jalam kakare. 7 Ku keca gitugo wot gicidho i Gudgoda, man kud i Gudgoda gidog gicidho i Yotbathan ma tie ng’om ma pii m’ubemol lee i iye.*

8 “I saa maeno Yehova ukoyo suru pa Lawi ang’et pi niyeyo sanduku mi lembariba pa Yehova, pi nicungo i wang’ Yehova kara gitim ire man pi nimiyo mugisa i nyinge calu ma gibetimo cil tin eni. 9 Eno re m’uketho jumiyo ngo makapiny kadi giralaga ni Lawi karacelo kud umego pare. Yehova re m’utie giralaga pare, tap calu ma Yehova Mungu peri uyero ire. 10 An ku kuma abedo iwi got calu m’agam atimo wang’ ma kwong’a pi nindo pier ang’wen, dieceng’ ku diewor, man Yehova uwinja i saa maeca bende. Yehova ugam umito ngo enyothwu. 11 I ng’eye Yehova uwacu ira kumae: ‘Tel yo i wang’ dhanu man wuyikuru pi woth kara gimondi man gimak ng’om m’akwong’o ni kwarugi nia abimiyo igi.’

12 “Dong’ kawoni, E Israel, Yehova Mungu peri ubekwayu ang’o i beng’i? Ndhu lembe ma e kende: nia ilwor Yehova Mungu peri, iwoth i yo pare ceke, imare, itim ni Yehova Mungu peri kud adundeni ceke man ku ng’eyong’ec* peri ceke, 13 man iwor lembang’ola ku cik pa Yehova m’abeng’olo iri tin eni pi bero peri giri. 14 Nen, polo utie pa Yehova Mungu peri kadok polo mi polo* man ng’om ku piny ceke m’i iye. 15 Ento Yehova ucoro i vut kwaru peri kendgi man enyutho mer pare igi kendgi, eng’iyo in m’i nyikwaygi kud i kind dhanu ceke, e tin wutie pare. 16 Kawoni wucikuru nilwoko* adundewu man wuwek thwon.* 17 Kum Yehova Mungu mwu en e Mungu mi mungu, man Rwoth mi rwodhi, Mungu ma dwong’, ma jatego, man ma jang’oy ndiri, ma nyutho ngo akoyakoya ni ng’atu moko acel de man ma yiyo ngo kanyaka. 18 Etimo bedopwe ni nyathikic* man ni dhatho, emaru umondo man emiyo ire cam ku kendi. 19 Wun de wucikuru nimaru umondo kum wugam wudoko umondo i ng’om mi Misiri.

20 “Yehova Mungu peri re m’icikiri nilworo, en re m’icikiri nitimo ire, en re m’icikiri nimoko i kume man i nyinge re m’icikiri nikwong’o kwong’. 21 En re m’etie ng’atu m’icikiri nipaku. Etie Mungu peri m’utimo iri lembe maeni ceke ma dwong’ man ma ng’oyo ndiri m’igam ineno ku weng’i. 22 Kwaru peri uloro i Misiri ku dhanu* pier abiro man kawoni Yehova Mungu peri uketho wendwu udoko lee calu nyikaluku mi polo.

11 “Wucikuru nimaru Yehova Mungu mwu man saa ceke wuwor lembe m’ekwayu i beng’wu, cik pare, telowic pare mi pokolembe man lembang’ola pare. 2 Wung’eyo nia tin abeweco i beng’wu, i bang’ wotwu ngo ma ging’eyo ngo kadi gineno de ngo twiny pa Yehova Mungu mwu, dwong’ pare, cinge ma tek man bote m’arieya. 3 Gineno ngo giranyutha pare man gin m’etimo i Misiri, i kum Farao m’ubimo mi Misiri man i kum ng’om pare zoo. 4 Gineno ngo bende gin m’etimo i kum udul mony mi Misiri, i kum riuni* man magali mi lwiny pa Farao ma pii mi Nam ma kwar uumogi kinde ma gibino riemo tokwu, man Yehova unyothogi wang’ acel magwei.* 5 Gineno ngo gin m’etimo piwu* i langa cil ma wutundo ko i kabedo maeni. 6 Gineno ngo bende gin m’etimo i kum Dathan gikud Abiram ma gi wot Eliab ma wod Ruben kinde ma ng’om uyabu dhoge man umwonyogi karacelo ku juruot migi man hema migi man piny ceke ma kwo ulubo tokgi i wang’ Israel zoo. 7 Wun re ma weng’wu uneno lembe ma dongo ceke ma Yehova utimo.

8 “Wucikuru nigwoko lembang’ola ceke m’abemiyo iwu tin eni kara wudok tek man wukadh lokaca i ng’ombe pi nimake, 9 man kara wukwo lee i ng’om ma Yehova ukwong’o nia ebimiyo ni kwaruwu man ni nyikwaygi,* ng’om ma molo cak ku miyokic.

10 “Ng’om ma wubecimaku tie ngo ve ng’om mi Misiri ma wuwok kud i iye, kaka ma wubed wucoyo i iye kodhi mwu man wuriego wang’e ku tiendwu* calu podho mi dek ma col. 11 Ento ng’om ma wubecimondo i iye pi nimaku en e ng’om gudi man ng’om pambu mi poga. Emadhu piikoth m’uai i polo. 12 En e ng’om ma Yehova Mungu peri ubegwoko en. Wang’ Yehova Mungu peri ni wiye saa ceke niai i caku pa oro nitundo i thum pa oro.

13 “Man tek wubiworo cuu mandha lembang’ola para m’abeng’olo iwu tin, man tek wubimaru Yehova Mungu mwu, man tek wubitimo ire kud adundewu ceke man ku ng’eyong’ec* mwu ceke, 14 abimiyo bende koth ni ng’om mwu i saane, koth ma kwong’a ku koth ma tokcen man wubicoko dhu cam mwu, pigulok mwu ma nyen man mo mwu. 15 Abiketho uboko bitwii i podho mwu ni udul lim mwu, e wubicamu man wubiyeng’. 16 Wubed ku weng’wu, kud wuwek adundewu uwondere man ukier ma nia wutim ni mungu mange man wukul korwu piny igi. 17 Kan ungo ng’eicwiny pa Yehova biopo i kumwu man ebiciko dhu polo kara koth kud ucwii, e ng’om mwu bicego ngo nyinge man wubirwinyo pio kud i ng’om ma ber ma Yehova ubemiyo iwu.

18 “Wucikuru nikiewo lembe maeni m’ayero iwi adundewu man iwi ng’eyong’ec* mwu; wutwiigi ni jam poyowic i cingwu man gicikiri nibedo calu giratwiya mi terwang’ i terweng’wu.* 19 Wuponjgi ni awiya mwu, wuwec pigi kinde ma wubedo i ot mwu, kinde ma wubewotho i yo, kinde ma wuvuto man kinde ma wuai malu. 20 Kiewgi i kum ng’et dhugola mi ot peri man i kum dhugang’ peri, 21 kara wun ku wotwu wukwo lee i ng’om ma Yehova ukwong’o nimiyo ni kwaruwu, tek ndhu fodi polo n’i wi ng’om ci.

22 “Tek wubeworo cuu mandha lembang’ola m’abemiyo iwu, man wubetiyo kude, niwacu tek wumaru Yehova Mungu mwu, wuwotho i yo pare ceke man wumoko i kume, 23 Yehova biriemo cen thek maeni ceke kud i weng’wu man wubiyaku thek ma dongo man ma wendgi lee nisaguwu. 24 Kaka moko ci ma tiendwu binyono bidoko mwu. Niai i langa nitundo i Lebanon, niai i Kulo niwacu Kulo Efrath nitundo i Nam ma yo reto,* eno re ma bidoko kieu mwu. 25 Ng’atu moko mbe ma bicungo i dhogwu, Yehova Mungu mwu binyayu ndiri man lworo mwu i ng’om ceke ma wubiwotho i wiye, tap calu m’eng’olo iwu.

26 “Nen! abeketho i weng’wu tin eni mugisa kud alam: 27 mugisa, tek wubeworo lembang’ola pa Yehova Mungu mwu m’abeng’olo iwu tin eni, 28 man alam, tek wuworo ngo lembang’ola pa Yehova Mungu mwu man wulokuru cen kud i yo m’abeng’olo iwu nia wulubi tin eni man wulubo tok mungu ma wung’eyo ngo.

29 “Kinde ma Yehova Mungu mwu biroyowu i ng’om ma wubecimaku, wucikuru nimiyo mugisa iwi got Gerizim man nilamu alam iwi got Ebal. 30 Nyo gitie ngo loka Yordan yo reto* i ng’om mi Jukanan ma kwo i Araba i wang’ Gilgal i ng’et yen ma dongo mi More? 31 Kum wubekadhu Yordan pi nimondo man nimaku ng’om ma Yehova Mungu mwu ubemiyo iwu. Kinde ma wubimake man wubikwo i iye, 32 wucikuru nibedo ku weng’wu kara wutii ku cik man telowic mi pokolembe ceke m’abeketho i weng’wu tin eni.

12 “Maeni tie cik man telowic mi pokolembe ma wucikuru niworo cuu mandha i nindo ceke ma wubikwo i iye i ng’om ma Yehova Mungu pa kwaruwu bimiyo iwu kara wumaki. 2 Wucikuru ninyotho pet kaka ceke ma thek ma wubiriemo gibed gitimo ni mungu migi i iye, dok ebed iwi gudi ma dongo, kadi iwi ungulu gudi* kunoke i the yen moko ci m’uluk. 3 Wucikuru nirwombo pemlam migi cen, nimugo mbegi migi mi thier,* niwang’u yen migi mi thier i mac, man nitong’o cen ayi gin m’acwiya m’ang’ika mi mungu migi. Wuruc nying’gi kud i kabedone.

4 “Kud wutim ni Yehova Mungu mwu i ayi maeno. 5 Ento wuyeny Yehova Mungu mwu kaka moko ci m’eng’iyo niketho nyinge man kabedo pare i iye i kind suru mwu ceke man wucidh kakeca. 6 Kuca re ma wubitero i iye lam mwu m’awang’a, lam mwu, apaje mwu, ajok mi cingwu, girathiera mwu ma wung’olo ku kwong’, girathiera mwu ma ku berocwiny man kayu mi dhieng’, mi rombe ku mi diegi mwu. 7 Wun ku juruot mwu, wucikuru nicamu kuca i wang’ Yehova Mungu mwu man anyong’a unegwu i gin ceke ma wubetimo, pilembe Yehova Mungu mwu udaru miyo iwu mugisa.

8 “Kud wutim calu ma wabetimo kakeni tin eni ma ng’atuman ubetimo gin moko ci m’ufoyo iye,* 9 pilembe fodi wumondo ngo i kayom man i giralaga ma Yehova Mungu mwu ubemiyo iwu. 10 Saa ma wubikadhu Yordan man wubibedo i ng’om ma Yehova Mungu mwu ubemiyo iwu ni aba, ebiketho wubiyom andha kud i kum judegi mwu ceke m’udhokowu man wubibedo museme. 11 Wubitero piny ceke m’abeng’olo iwu i kabedo ma Yehova Mungu mwu ung’iyo nia nyinge ubed i iye: lam mwu m’awang’a, lam mwu, apaje mwu, ajok mi cingwu man girathiera mwu moko ci ma wung’olo ku kwong’ ni Yehova. 12 Anyong’a binegowu i wang’ Yehova Mungu mwu, wun, wotwu, nyigwu, ng’eca mwu ma co ku ma nyir man Julawi ma n’i adhura mwu, pilembe jumiyo ngo igi makapiny kadi giralaga i kindwu. 13 Wubed ku weng’wu, kud wuthier lam mwu m’awang’a i kabedo moko ci mange ma wucopo neno. 14 Wucikuru nithiero lam mwu m’awang’a kende kende i kabedo ma Yehova ung’iyo i theng ng’om mi suru mwu man keca re ma wucikuru nitimo lembe ceke m’abeng’olo iwu.

15 “Ento saa moko ci ma tek wumito,* wuromo thumo lim man wucamu ringe calku mugisa ma Yehova Mungu mwu umiyo iwu i adhura* mwu ceke. Ng’atu m’ucido man ng’atu ma leng’ copo came calu ma jucamu ko amur kunoke ruda. 16 Enre kud wucam rimo; wucikuru nioye i ng’om calu pii. 17 Ebiyiyere ngo iwu nia wucam i adhura* mwu apaje mi nying cam mwu, pigulok mwu ma nyen, mo mwu, kayu mi dhieng’ man mi diegi ku rombe mwu, girathiera mwu moko ci mi lembang’ola ma wutimo ku kwong’, girathiera mwu ma ku berocwiny, kadi ajok m’uai i cingwu. 18 Wucikuru nicamugi i wang’ Yehova Mungu i kabedo ma Yehova Mungu mwu bing’iyo, wun ku wotwu, nyigwu, jatic mwu ma co ku ma nyaku man Julawi ma bedo i adhura* mwu; man anyong’a binegowu i wang’ Yehova Mungu mwu i lembe ceke ma wutimo. 19 Wubed ku weng’wu, kud wuwil ku Julawi i nindo ceke ma wukwo i iye i ng’om mwu.

20 “Saa ma Yehova Mungu peri biyabu i ng’om peri, tap calu m’eng’olo iri man ibiyero nia ‘amito acam ring’o,’ pilembe ava camu ring’o ubenegi, icopo camu ring’o saa moko ci m’avane negi. 21 Tek kabedo ma Yehova Mungu peri ung’iyo pi niketho nyinge i iye ni bor lee kudi, e icikiri nithumo lim moko m’i kind dhieng’ kunoke m’i kind diegi kadi rombe ma Yehova umiyo iri, tap calu m’ang’olo iri man icikiri nicame i adhura* peri saa moko ci m’avane negi. 22 Iromo came calu ma jucamu ko amur man ruda; ng’atu m’ucido ku ng’atu ma leng’ ceke copo came. 23 Kende kende, kec ku cwinyi zoo nia ibicamu ngo rimo, pilembe rimo tie kwo* man kud icam kwo ku ring’o. 24 Kud icame. Icikiri nioye i ng’om calu pii. 25 Kud icame, kara lembe ubed miero iri man ni nyithindhi yor i ng’eyi, pilembe ibetimo gin m’atira i wang’ Yehova. 26 Kinde m’ibebino i kabedo ma Yehova bing’iyo, ting’ kende kende piny peri ma leng’ man girathiera peri mi lembang’ola ma ku kwong’. 27 Kuca ibiwok thiero lam peri m’awang’a, ring’o ku rimone, iwi pemlam pa Yehova Mungu peri man jubikonjo rimo mi lam peri i kum pemlam pa Yehova Mungu peri, ento ringe re icopo camu.

28 “Bed ku weng’i m’iwor ko lembe maeni ceke m’abeng’olo iri kara saa ceke lembe uwoth iri ma ber man ni woti yor i ng’eyi, pilembe ibetimo gin ma ber man m’atira i wang’ Yehova Mungu peri.

29 “Kinde ma Yehova Mungu peri binyotho thek m’ibeciyaku pet, man dong’ ibekwo i ng’om migi, 30 bed ku weng’i kara kud ipodh i uwic i ng’ey ma judaru nyothogi kud i weng’i. Kud ipenj lembe iwi mungu migi m’ibeyero ko nia, ‘thek maeni gibed gitimo ni mungu migi nenedi? An de abitimo lembe ma rom.’ 31 Kud itim lembuno ni Yehova Mungu peri, pilembe gibed gitimo ni mungu migi lembe ma reco ma Yehova udagu, gibed giwang’u kadok wotgi man nyiggi i mac ni mungu migi. 32 Lembe ceke m’abeng’olo iri utie gin m’inen nia itimo. Kud imed gin moko i kume kadok awodha de kud iwodh kume.

13 “Tek jabila moko kunoke ng’atu ma ewo lembe nikum lek uwok i kindwu man eewo iwu giranyutha kadi ke thangu, 2 man giranyutha kunoke thangu m’eweco pire iwune utimere kubang’e kubang’e kinde m’ebeyero nia, ‘walubu tok mungu mange,’ mungu ma wung’eyo ngo ‘man watimu igi,’ 3 kud wuwinj lembe pa jabila kadi jalek lekne, pilembe Yehova Mungu mwu ubemulo iwu pi ning’eyo ka nyo wumaru Yehova Mungu mwu kud adundewu ceke man ku ng’eyong’ec* mwu ceke. 4 Yehova Mungu mwu re ma wucikuru nilubo toke, en re ma wucikuru nilworo, lembang’ola pare re ma wucikuru niworo, dwande re ma wucikuru niwinjo, en re m’etie ng’atu ma wucikuru nitimo ire man en re ma wucikuru nimoko i kume. 5 Ento jucikiri ninego jabila kunoke jalekne cen, pilembe ebecwalu dhanu ujai i kum Yehova Mungu mwu m’uwodhowu kud i ng’om mi Misiri man m’uwaruwu kud i ot mi ng’eca, kara wulokuru kud i yo ma Yehova Mungu mwu ung’olo nia wuwoth i iye. Wucikuru nikabu piny ma rac cen kud i kindwu.

6 “Tek umeru, wo meru, kunoke wodi kadi nyeri, kunoke dhaku peri mir amara, kadi jawodhi ma ceng’ini* magwei utemo nibidho weng’i i amung’ m’ewacu kumae: ‘Wacidh watim ni mungu mange,’ mungu ma in kadi kwaru peri de ung’eyo ngo, 7 i kind mungu mi thek ceke m’udhokowu, dok ebed ma ceng’ini kudwu kadi ma bor kudwu, niai i gund ng’om acel nicidho i gunde mucelo, 8 kud itim lembe m’eyero kadi kud iwinje, kisa kadi ngisi kud unegi, agwoka de kud igwoke; 9 ento icikiri ninege andha. Cingi maku ubed ma kwong’a nibino nege, cing’ dhanu mange bibino i ng’eye. 10 Icikiri nicanye ku kidi nitundo etho, pilembe ebino sayu niloki cen kud i kum Yehova Mungu peri m’uwodhi kud i ng’om mi Misiri, kud i ot mi ng’eca. 11 E Israel ceke biwinjo man lworo bimakugi man gibitimo ngo nyanok de wadi gin ma rac ma kumeno i kindwu.

12 “Tek wuwinjo juyero i adhura moko m’i kind ma Yehova Mungu mwu umiyo iwu wubed i iye nia, 13 ‘dhanu moko ma kony migi mbe* uwok kud i kindwu pi niwingo wi dhanu ma bedo i adhura migi ma giwacu kumae: “Wacidh watimu ni mungu mange,” mungu ma wung’eyo ngo,’ 14 wung’ii i lembene, wutim sayusac cuu mandha man wupenj pi lembene. E tek unwang’ere nia etie lemandha man lembe ma kumeni ma judagu utimere i kindwu, 15 wucikuru ninego dhanu ma bedo i adhurane andha ku palamularu. Wunyoth adhurane man piny ceke ma n’i iye; udul lim ma n’i iye bende wunyothi ku palamularu. 16 I ng’eye, cok dhu jambayekine ceke, itergi i akarayo mir adhurane man iwang’ adhurane ku mac. Jambayekine bibedo ni girathiera ma boo ni Yehova Mungu peri. Adhurane bidoko ni udhuru mi nyoth mi nja. Kud judog jugiere kendo nyanok de. 17 Cingi kud uting’ gin moko ci ma jukoyo pi nyoth, kara Yehova ulok cen kud i ng’eicwiny pare m’uopo man enyuth iri kisa ku ngisi man eketh inyay, tap calu m’ekwong’o ni kwaru peri. 18 Kum icikiri niworo* Yehova Mungu peri ma nwang’u ibegwoko lembang’ola pare ceke m’abeng’olo iri tin. I ayi maeno re m’ibitimo lembe m’atira i wang’ Yehova Mungu peri.

14 “Wun, wu wot Yehova Mungu mwu. Kud wuthum kumwu kadi kud wuliel bind weng’wu* pir avu. 2 Kum wutie dhanu ma leng’ ni Yehova Mungu mwu man Yehova ung’iyowu kara wudok dhanu pare, piny pare ma segi* kud i kind dhanu ceke ma n’i wang’ ng’om.

3 “Kud wucam piny moko ci ma judagu. 4 Lei ma wuromo camu ni e: thwon dhiang’, urombo, diel, 5 ruda, amur, fura, diel mi gudi, nyajwaya, urombo mi lum man urombo mi gudi. 6 Wucopo camu lei moko ci ma i ubong’ tiende ukaru man upokere ni ario man ma gamu cam kud i iye ka donyamu iye kendo. 7 Ento kud wucam lei m’ulubo e ma gamu cam kud i igi ka donyamu kendo, kunoke ma i ubong’ tiendgi ukaru: ngamia, afoyo mi lum man uduka, pilembe gigamu cam kud i igi ka gidog ginyamu kendo ento i ubong’ tiendgi ukaru ngo. Gitie piny m’ucido iwu. 8 Kul bende, pilembe i ubong’ tiende ukaru, ento egamu ngo cam kud i iye kan edog enyamu kendo. Etie piny m’ucido iwu. Kud wucam ring’gi man avujgi de kud wumul.

9 “Kud i kind piny ceke ma kwo i pii, wuromo camu ma e: piny moko ci ma jucwake man m’apokane nuti wuromo camu. 10 Ento kud wucam piny moko ci ma cwake kadi apokane mbe. Etie piny m’ucido iwu.

11 “Wuromo camu winyo moko ci ma leng’. 12 Ento kud wucam winyo ma e: acur, acuth, ango ma col, 13 ulwith, acey, kwond kalawenge ceke, 14 kwond ungoro ceke, 15 udo, tula, winjnam, kwond abiba ceke, 16 kwiriloi, tula ma jutunge, batha mi pii, 17 ugoro, ango, alungu, 18 nunda, kwond ukok ceke, akonyo man ulik. 19 Giracwiya ceke ma nyalini ma juvombgi bende tie piny m’ucido iwu. Kud jucamgi. 20 Wuromo camu giracwiya moko ci ma leng’ ma juvombe.

21 “Kud wucam lei moko ma junwang’u utho. Wuromo miye ni umondo ma bedo i adhura* mwu man eromo came, kunoke wuromo lwore ni umondo. Kum wutie dhanu ma leng’ ni Yehova Mungu mwu.

“Kud wuted nyathi diel i cag min.

22 “Icikiri nimiyo kokoro apaje mi nying cam peri ceke m’ucek i podho kubang’ oro. 23 Ibicamu apaje mi nying cam peri, pigulok peri ma nyen, mo peri man kayu mi dhieng’ ku mi diegi man rombe peri i wang’ Yehova Mungu peri, i kabedo m’eng’iyo nia nyinge ubed i iye, kara iponj nilworo Yehova Mungu peri saa zoo.

24 “Ento tek wothne copo bedo bor lee iri man iromo yeye ngo nitundo i kabedo ma Yehova Mungu peri ung’iyo niketho nyinge i iye, pilembe en’i bor lee kudi, kum Yehova Mungu peri bimiyo iri mugisa, 25 e iromo wile ku sente, man ku sente peri i cingi cidh i kabedo ma Yehova Mungu peri bing’iyo. 26 Iromo wok tiyo ku sente pi ning’iewo piny moko ci m’imito:* dhieng’, rombe, diegi, pigulok ku giramadha mange ma lake tek, man piny moko ci ma ii yenyo.* Ibicamu keca i wang’ Yehova Mungu peri, man anyong’a binegi in ku juruot peri. 27 Man kud iwil ku Julawi ma n’i adhura peri, pilembe jumiyo ngo igi makapiny kadi giralaga i kindwu.

28 “Nja i ng’ey oro adek, bed iwodh apaje mi cam peri ceke mi oro maeca man ikethe i die adhura peri. 29 E Jalawi ma jumiyo ngo ire makapiny kadi giralaga i kindwu, umondo, nyathikic* man dhatho ma bedo i adhura mwu gibibino gibicamu man gibiyeng’, kara Yehova Mungu peri umii iri mugisa i lembe ceke m’ibetimo.

15 “Nja i ng’ey oro abiro, icikiri nimiyo gony. 2 Kit gonyne ni e: Ng’atuman m’umiyo banja ni jawodhe biweko banja ma n’i iyene. Ebikwayu ngo cul i bang’ jawodhe kadi i bang’ umin, kum judaru twong’o gony calu ma Yehova ung’olo. 3 Icopo penjo cul i bang’ umondo, ento icikiri niweko piny moko ci ma nwang’u mito umeru ucul iri. 4 Enre ng’atu moko mbe m’i kindwu m’ucikere nidoko jacan, kum Yehova bimiyo mugisa andha iri i ng’om ma Yehova Mungu peri ubemiyo iri imaki ni giralaga, 5 tekene ndhu ibiworo cuu mandha dwand Yehova Mungu peri man ibilubo cuu mandha lembang’ola maeni ceke m’abemiyo iri tin eni. 6 Kum Yehova Mungu peri bimiyo iri mugisa, tap calu m’eng’olo iri, man ibimiyo banja ni thek dupa, ento ibibedo mbe ku yeny mi gamu banja; ibibimo wi thek dupa, ento gin gibibimo ngo wii.

7 “Tek umeru moko udoko jacan i kindwu i adhura moko mi ng’om ma Yehova Mungu peri ubemiyo iri, kud idwok adundeni nwang’ kadi cingi de kud idwok nwang’ ni umeru ma jacan. 8 Icikiri niyabu ire cingi ku berocwiny man ku yore moko ci mii ire banja mi piny ceke m’etie ku yenyne kunoke m’urem ire. 9 Bed ku weng’i kara kud ibed ku paru ma rac ma e i adundeni m’iwac ko nia ‘oro mir abiro, oro mi gony udhingo,’ man icer berocwiny peri ni umeru ma jacan ma kud imii ko ire piny moko. Tek elwong’o Yehova i kumi, e ebibedo iri ni dubo. 10 Icikiri nimiyo ire ku berocwiny man kud imii ire m’imino weng’i, kum pi lembe maeno re ma Yehova Mungu peri bipoko mugisa iwi tic peri ceke, dok iwi gin ceke m’itimo. 11 Kum dhanu ma jucan bibedo nuti kwa i ng’ombe. Eno re m’uketho abeng’olo iri nia, ‘Icikiri niyabu cingi ku berocwiny ni umeru ma jacan man m’utagu i ng’om peri.’

12 “Tek julworo iri umeru moko ma Jaebrania kadi Nyaebrania man edaru timo iri pi oro abusiel, e i oro mir abirone icikiri niweke ebed agonya. 13 Man tek igonye, kud iwek ecidh ma cinge nanu. 14 Icikiri nimiyo ire ku berocwiny piny moko m’uai i dwol peri, i lela peri mi fwodo cam man i vur peri mi biyo mo ku pigulok. Tap calu ma Yehova Mungu peri umiyo iri mugisa, icikiri nimiyo ire. 15 Poy nia igam idoko ng’eca i ng’om mi Misiri man Yehova Mungu peri uweri. Eno re m’uketho abeng’olo iri tin eni nia itim lembuno.

16 “Ento tek eyero iri nia ‘abiai ungo ku yo peri’ pilembe emeri man emaru juruot peri, kum ebedo kud anyong’a kinde ma en’i beng’i, 17 e icikiri niting’o sindhani ituc ko ithe i wang’ dhugola man ebidoko jaratic peri pi nja. Ibitimo lembe ma rom eno i kum ng’eca peri ma nyaku. 18 Kinde m’ibeweke ebed agonya man ebeai kud i beng’i, kud inene ni lembe ma tek, pilembe tic m’etimo iri pi oro abusiel ukadhu pa jaratic ma juculo acula wang’ ario, man Yehova Mungu peri umiyo iri mugisa i lembe ceke m’utimere.

19 “Icikiri nidwoko kayu mi thwoni dhieng’ man mi diegi ku rombe leng’ ni Yehova Mungu peri. Kud itim tic moko ci ku kayu mi dhieng’* peri man kud inyar yuk rombe peri ma kayu. 20 In ku juruot peri wucikuru nicame i wang’ Yehova Mungu peri kubang’ oro i kabedo ma Yehova bing’iyo. 21 Ento tek etie ku mulima moko i kume, nyo ke en abala, wang’e tho kunoke etie ku mulima moko ma lee, kud ithiere ni Yehova Mungu peri. 22 Ibicame i adhura* peri; ng’atu m’ucido ku ng’atu ma leng’ ceke copo came, calu ve etie amur kunoke ruda. 23 Ento kud icam rimbe; icikiri nioye i ng’om calu pii.

16 “Wor dwi mir Abib* man itim Kadhukuwijo ni Yehova Mungu peri, kum i dwi mir Abib, Yehova Mungu peri uwodhi kud i Misiri ku diewor. 2 Man icikiri nithiero lam mi Kadhukuwijo m’uai kud i kind rombe ku diegi man dhieng’ ni Yehova Mungu peri kaka ma Yehova ung’iyo nia nyinge ubed i iye. 3 Kud icame ku piny ma thobi ni iye; pi nindo abiro, icikiri nicamu mukathi ma thobi mbe i iye, mukathi mi can, pilembe iwok kud i ng’om mi Misiri nyapio pio. Tim lembe maeno kara ibed ipoy i kwo peri ceke pi nindo m’iwok i iye kud i ng’om mi Misiri. 4 Kud junwang’ thobi i beng’i i theng ng’om peri zoo pi nindo abiro, kadi kum ring’o moko ci ma ibithiero i diewor mi nindo ma kwong’a, kud ubed diewor traka nitundo urwonde kugweno. 5 Ebiyiyere ngo iri nia ithier lam mi Kadhukuwijo i adhura moko ci ma Yehova Mungu peri ubemiyo iri. 6 Ento ibitime i kabedo ma Yehova Mungu peri ung’iyo nia nyinge ubed i iye. Icikiri nithiero lam mi Kadhukuwijo ku dhug uthieno, ndhu ndhu i ng’ey mwony pa ceng’, i saa m’ukethere m’igam iwok i iye kud i ng’om mi Misiri. 7 Icikiri nitede man nicame kaka ma Yehova Mungu peri bing’iyo, man urwonde kugweno icopo dok i hema peri. 8 Ibicamu mukathi ma thobi mbe i iye pi nindo abusiel man nindo mir abirone bibedo coko ma dit ni Yehova Mungu peri. Kud itim tic moko.

9 “Icikiri nikwanu yenga abiro. Ibikwanu yenga abirone niai i nindo ma kwong’a m’ibicaku kayu i iye nying cam. 10 I ng’eye, ibitimo Foc mi yenga ni Yehova Mungu peri ku girathiera mi berocwiny m’uai i cingi, m’ibimiyo calku mukero ma Yehova Mungu peri miyo ko iri mugisa. 11 Man anyong’a binegi i wang’ Yehova Mungu peri, kaka ma Yehova Mungu peri ung’iyo nia nyinge bed i iye in ku wodi, nyeri, ng’eca peri ma co ku ma nyaku, Jalawi ma bedo i adhura* peri, umondo, nyathikic* man dhatho ma n’i kindwu. 12 Poy nia igam idoko ng’eca i Misiri, pieno wor man itii ku cik maeni.

13 “Ibitimo Foc mi otbak pi nindo abiro kinde m’icoko cam kud i lela mi fwodo cam man kud i vur mi biyo mo ku pigulok. 14 Anyong’a unegi i saa mi foc peri, in ku wodi, nyeri, ng’eca peri ma co ku ma nyaku, Jalawi, umondo, nyathikic* man dhatho ma n’i adhura peri. 15 Ibitimo foc pi nindo abiro ni Yehova Mungu peri i kabedo ma Yehova ng’iyo, kum Yehova Mungu peri bimiyo mugisa iwi piny ceke m’ucek iri man iwi piny ceke m’itimo, e anyong’a kende re ma binegi.

16 “Wang’ adek kubang’ oro, jumaco peri ceke ucikiri nibino i wang’ Yehova Mungu peri i kabedo m’eng’iyo i saa mi Foc mi mukathi ma thobi mbe i iye, i saa mi Foc mi yenga, man i saa mi Foc mi otbak man ng’atu moko mbe m’i kindgi m’ucikere nibino i wang’ Yehova ma cinge nanu. 17 Giramiya ma ng’atuman bitero, bibedo calku mukero mi mugisa ma Yehova Mungu peri umiyo iri.

18 “Icikiri niketho jupoklembe man bajego pi suruman i adhura ceke* ma Yehova Mungu peri ubemiyo iri, man gicikiri nipoko lembe mi dhanu i atira. 19 Kud inyoth pokolembe, kud ibed kud akoyakoya kadi kanyaka de kud iyii, kum kanyaka coro wang’ ju ma neno piny her man ecopo nyotho wec mi ju ma pwe. 20 Bedopwe, eyo, bedopwe re m’icikiri nilubo kara imediri nikwo man imak ng’om ma Yehova Mungu peri ubemiyo iri.

21 “Kud ipidh yen moko ci ni mbegi mi thier,* ceng’ini ku pemlam pa Yehova Mungu peri m’iyiko iri.

22 “Kadi mbegi mi thier de kud icom iri, kum etie gin ma Yehova Mungu peri dagu.

17 “Kud ithier ni Yehova Mungu peri thwon dhiang’ kadi urombo ma mulima n’i kume kunoke ma lembe moko ma rac n’i kume, kum ebibedo gin ma Yehova Mungu peri udagu.

2 “Keketh nia i adhura moko m’i kind ma Yehova Mungu peri ubemiyo iri, junwang’u jalwo kunoke dhaku moko i kindwu m’ubetimo lembe ma rac i wang’ Yehova Mungu peri man ebeturo lembariba pare. 3 Man ekier, ebeworo mungu mange man ebekulo kore piny igi kunoke ni ceng’ kadi ni dwi, kadi ni udul mony mi polo ma ke tie gin m’ang’olo ngo. 4 Saa ma judwoko pi lembene iri kunoke iwinjo pire, e icikiri nitimo sayusac cuu mandha iwi lembene. Tek unwang’ere nia tie lemandha man lembe ma kumeni ma judagu utimere i Israel, 5 icikiri niwodho jalwo kunoke dhaku m’utimo lembe ma racne woko i ng’ey dhugang’ mir adhura man jucikiri nicanyu jalwo kunoke dhakune ku kidi wang’ m’etho. 6 Nikum lembatuca mi* jumulembe ario kunoke adek jubinego ng’atu m’ukwayu junegi, ento jubinege ngo nikum lembatuca pa jamulembe acel kende. 7 Cing’ jumulembe maku ubed ma kwong’a nibino i kume pi ninege; cing’ jumange ceke bibino yor i ng’eye. Icikiri nikabu gin ma rac cen kud i kindwu.

8 “Tek lembe moko wok i adhura peri moko ma poko lembene tek iri, dok ebed lembe mi cwiro rimo, kadi lemtwero moko m’uwok ma jutero i wang’ cik, kunoke ret moko m’uwok kadi lembe mange mi dhaw, e icikiri niai man nicidho i kabedo ma Yehova Mungu peri ng’iyo. 9 Cidh i bang’ julam ma gi Julawi man i bang’ japoklembe m’ubetimo i kind nindo maeca, kor igi lembene man gibinyutho iri pi yub m’umakere. 10 E icikiri nitimo calku yub m’umakere ma ginyutho iri kud i kabedo ma Yehova ung’iyo. Nen nia itimo calku telowic ceke ma gimiyo iri. 11 Icikiri nitimo calku cik ma ginyutho iri man calku yub m’umakere ma gitwong’o iri. Kud ilokiri nyanok de yor acwic kadi yor acam kud i kum yub m’umakere ma ginyutho iri. 12 Ng’atu m’uberikini m’ebekwero ko niwinjo jalam m’ubetimo ni Yehova Mungu peri kunoke japoklembe ucikere nitho. Icikiri nikabu gin ma rac cen kud i Israel. 13 E dhanu ceke biwinjo man lworo bimakugi man gibirikini kendo ngo nyanok de.

14 “Kinde m’imondo i ng’om ma Yehova Mungu peri ubemiyo iri man dong’ imaku ng’ombe ibekwo i iye, man iwacu kumae: ‘Wek aketh ubimo i wiya calu thek ceke m’udhoka,’ 15 tek kumeno, ma jiji mbe icikiri niketho ubimo ma Yehova Mungu peri bing’iyo. Ubimo m’ibikethone ucikere niai kud i kind umego peri. Ukwerere niketho jawirok m’umeru ngo ni ubimo i wii. 16 Ento kud ecok riuni dupa ire kadi kud eketh dhanu udok i Misiri pi nimedo wend riuni, kum Yehova uwacu iwu kumae: ‘Kud wudok kendo nyanok de kud i yo maeni.’ 17 Kadi kud egam ire mon dupa, adundene bimaru kier. Bende kud ecok mola ma tar ku mola ma kwar i kadhiri ma lee mandha ire. 18 Kinde m’ebijany iwi komker pare, egam Cik maeni ma julam ma gi Julawi gigwoko man eloke i buku* pire gire.

19 “Ecikere nibedo kude man ecikere nisome i nindo ceke mi kwo pare, kara eponj nilworo Yehova Mungu pare man ewor lembe ceke mi Cik maeni, ku telowic maeni ma nwang’u ebetiyo kugi. 20 E adundene bidodere ngo iwi umego pare man ebilokere ngo kud i kum lembang’ola, dok ebed yor acwic kadi yor acam, kara ebed pi kare m’ulwar iwi komker pare, en ku wote i kind Israel.

18 “Julam ma gi Julawi, man i andha suru pa Lawi zoo, gibinwang’u ngo makapiny kadi giralaga i kind Israel. Gibicamu kum girathiera ma juwang’u ku mac ni Yehova ma tie giralaga pare. 2 Pieno, gibinwang’u ngo giralaga i kind utumeggi. Yehova re m’utie giralaga migi tap calu m’eyero igi.

3 “Kud i kum piny ma dhanu bethiero, maeni bibedo twero mi julam: Ng’atu moko ci m’uthiero lam, dok ebed thwon dhiang’ kadi urombo, ucikere nimiyo gok, limb man sume ni jalam. 4 Icikiri nimiyo ire landu wi mwoka mi nying cam peri, pigulok peri ma nyen, mo peri man yuk rombe ma kwong’a m’inyaru kud i dwol peri. 5 Yehova Mungu peri ung’iye ku wote kud i kind suru peri ceke kara gitim ni Yehova saa zoo.

6 “Tek Jalawi moko uai kud i adhura peri moko i Israel kaka ma nwang’u ekwo i iye man eyenyo ecidh kaka ma Yehova ung’iyo,* 7 eromo timo keca i nying’ Yehova Mungu pare calu umego pare ceke ma Julawi m’ucungo keca i wang’ Yehova. 8 M’umedo piny m’enwang’u nikum lworo aba mi kwaru pare, ebinwang’u cam rom rom kugi.

9 “Kinde m’imondo i ng’om ma Yehova Mungu peri ubemiyo iri, kud iponj niporo bang’ timo ma judagu mi theknegi. 10 Kud junwang’ ng’atu moko i beng’i ma wang’u wode kadi nyare i mac,* ng’atu moko ci ma ewo lembe, ng’atu ma timo maji, ng’atu ma lamu bila, ma timo lemjey, 11 ng’atu ma rogo dhanu, ng’atu ma weco ku tipo ju m’utho kadi ng’atu ma ewo lembe mi nindo m’ubino, kunoke ng’atu moko ci ma penjo lembe i bang’ ju m’utho. 12 Kum Yehova udagu ng’atu moko ci ma timo lembe maeno man nikum timo maeno ma judagu re ma Yehova Mungu peri uberiemogi cen kud i weng’i. 13 Icikiri nibedo ma kosa mbe i wii i wang’ Yehova Mungu peri.

14 “Kum thek maeno m’iberiemo gibed giwinjo ju ma timo maji man juew lembe, ento Yehova Mungu peri ukwero iri nia kud itim lembe moko ci ma kumeno. 15 Yehova Mungu peri biwodho jabila ma calu an kud i kind umego peri. Wucikuru niwinje. 16 Eno bibedo kawang’ lembe m’igam ipenjo ko Yehova Mungu peri i Horeb i nindo mi coko ma dit, saa m’iwacu kumae: ‘Kud iwek awinj dwand Yehova Mungu para man kud anen asu mac ma dit maeni, amaru tho.’ 17 E Yehova uyero ira kumae: ‘Lembe ma giyero no tie ber. 18 Abiwodho igi jabila ma calu in kud i kind umego migi man abiketho lembe para i dhoge, e ebiyero igi lembe ceke m’ang’olo ire. 19 Eyo, abikwayu wel i bang’ ng’atu ma tek biwinjo ngo lembe para m’ebiyero i nyinga.

20 “‘Tek jabila moko urikini pi niyero lembe moko i nyinga ma ke ang’olo ngo nia eyer, kunoke ebeweco i nying’ mungu mange, jabilane ucikere nitho. 21 Ento iromo penjiri i adundeni kumae: “Wabing’eyo ke nenedi nia Yehova uyero ngo lembene eni?” 22 I saa ma tek jabila uweco i nying’ Yehova man lembe m’eyero utimere ngo kadi ke gin m’utimere mbe, e nwang’u Yehova uyero ngo lembene en. Jabilane urikini arika pi niweco. Kud ilwore.’

19 “Saa ma Yehova Mungu peri binyotho thek ma Yehova Mungu peri ubemiyo ng’om migi iri man iriemogi, ibedo i adhura migi man i udi migi, 2 icikiri nikoyo ang’et adhura adek kud i ng’om ma Yehova Mungu peri ubemiyo iri imaki. 3 Icikiri nipoko i ng’om ma Yehova Mungu peri umiyo nia imaki ni adek man iyik gengi kara ng’atu m’unego nek utuc niringo i adhura acel m’i kindgi.

4 “Ng’atu m’unego nek copo ringo kuca pi nibodho kwo pare, tek egoyo jawodhe akakaka ngo man nwang’u elar edage de ngo i wang’e. 5 Ku lapor tek ecidho ku wadi i die luli pi nimwodo yen man eting’o cinge pi nitong’o yen ku ley, ento lak leje ukirere kud i kum ragobe ucidh ugoyo wadi man etho, e janeg nekne ucikere niringo i adhura acel m’i kind maeno pi nibodho kwo pare. 6 Tek ungo ke, jaculkwor mi rimo copo riemo tok janeg nekne nikum ng’eicwiny ma lee,* e ewok emake man enege kum adhurane ni bor dit. Ento nwang’u eromo ngo ku tho, pilembe elar edagu ngo wadi i wang’e. 7 Pi thelembe maeno re m’abeng’olo iri kumae: ‘Koy adhura adek ang’et.’

8 “Tek Yehova Mungu peri uyabu i ng’om peri calu m’ekwong’o ni kwaru peri man emiyo iri ng’om ceke m’eng’olo nia ebimiyo ni kwaru peri, 9 tek ndhu ibeworo cuu mandha lembang’ola maeni ceke m’abemiyo iri tin eni, m’imar ko Yehova Mungu peri man saa ceke iwoth i yo pare, e bikwayu imed adhura mange adek i kum adhura adek maeno. 10 I ayi maeno, jubicwiro ngo rimb ng’atu m’ukoso ngo i ng’om peri ma Yehova Mungu peri ubemiyo iri ni giralaga, man dubo mi rimo bibedo mbe i wii.

11 “Ento tek ng’atu moko ular udagu wadi man ekure pi nitime rac, e ewok egoye* bir, man etho man ng’atune uringo i adhura acel m’i kind maeno, 12 judongo mir adhura pare gibioro jucidh jugame ku kuca man gibimiye i cing’ jaculkwor mi rimo man ecikere nitho. 13 Kisa kud unegi* i kume man icikiri nikabu kud i Israel dubo m’uwok nikum cwiro rimb ng’atu m’udubo ngo, kara lembe ubed miero iri.

14 “Kinde m’ibinwang’u giralaga peri i ng’om ma Yehova Mungu peri ubemiyo iri imaki, kud icor kieu pa wedu ku kaka ma kwaru ular uketho kieunegi i iye.

15 “Nikum lembatuca pa jamulembe acel, juromo ng’olo ngo lembe iwi* ng’atini pi kosa kunoke dubo ma nyo etimo. Ento nikum lembatuca mi* jumulembe ario kunoke nikum lembatuca mi jumulembe adek re ma lembe ucikere nicungo kakare. 16 Tek jamulembe moko m’ubesayu nitimo wadi rac utuco lembe i kum ng’atu moko man edote nia enyotho lembe, 17 e jumaco ario ma gitie ku telirine gibicungo i wang’ Yehova, i wang’ julam man jupoklembe ma gibetimo i nindo maeca. 18 Jupoklembe bitimo sayusac mii man tek ng’atu m’utuco lembene utie jamulembe mi ndra man tek ekelo adote mi ndra iwi umin, 19 icikiri nitimo i kume tap gin ma nwang’u epangu nitimo i kum umin man icikiri nikabu gin ma rac cen kud i kindwu. 20 Ju m’udong’ biwinjo lembene man lworo bimakugi, e gibitimo ngo kendo nyanok de lembe ma rac ma calu maeni i kindwu. 21 Kisa kud unegi:* Kwo* bibedo kawang’ kwo, wang’ kawang’ wang’, lak kawang’ lak, cing’ kawang’ cing’, tielo kawang’ tielo.

20 “Tek icidho i lwiny i dhu judegi peri man ineno nia riuni,* magali man udul migi wendgi ukadhu peri, lworo kud unegi i kumgi, kum Yehova Mungu peri m’uwodhi kud i ng’om mi Misiri ni kudi. 2 Kinde m’ibecicidho i lwiny, jalam ucikere nibino man niweco i bang’ dhanu. 3 Eyer igi kumae: ‘Wuwinji, E Israel, wubecicidho i lwiny i dhu judegi mwu. Cwinywu bed tek. Lworo kud unegwu, ndiri de kud ung’oy i iwu kadi kumwu de kud umiel ni kumgi. 4 Kum Yehova Mungu mwu ubewotho kudwu pi nikiedo piwu i dhu judegi mwu man pi nibodhowu.’

5 “Bajego de biyero ni dhanu kumae: ‘Nyo ng’atu moko ugiero ot ma nyen man fodi eyabu ngo dhoge? Edok yo pare. Kan ungo ecopo wok tho e ng’atu mange re ma bidoyabu dhu ode. 6 Man nyo ng’atu moko upidho podho mir ulok ma fodi ecaku pono ngo nyinge? Edok yo pare. Kan ungo ecopo wok tho i lwiny, e ng’atu mange re ma bidocaku pono nyinge. 7 Nyo ng’atu moko upenjo nyaku man fodi egame ngo? Edok yo pare. Kan ungo ecopo wok tho i lwiny, e ng’atu mange re ma bidogamu nyakune.’ 8 Judong askari de bipenjo dhanu kumae: ‘Ng’a ma lworo ubenego man ma cwinye uturi? Edok yo pare kara kud eketh cwiny umego pare de utur calu en.’ 9 Kinde ma bajego udaru niweco i bang’ dhanu, gicikiri niketho judongo mir udul askari pi nitelo wi dhanu.

10 “Tekene icoro i kum adhura moko pi nikiedo i dhoge, icikiri bende ninyutho ire lembe m’ukwayere pi kwiyocwiny. 11 Tek edwoko iri lembe ku kwiyocwiny man eyabu iri dhugang’, e dhanu ceke ma nwang’iri keca bidoko peri pi tic mir adici man gibitimo iri. 12 Ento tekene ekwero lembe peri mi kwiyocwiny man elund ecaku kiedo i dhogi, e icikiri nitieke. 13 Man Yehova Mungu peri bimiye andha i cingi man icikiri nigoyo jumaco m’i iye ceke ku palamularu. 14 Ento jumamon, awiya, udul lim man piny ceke ma n’i adhurane ku jambayekine ceke iromo yaku iri, man ibicamu jambayeki mi judegi peri ma Yehova Mungu peri umiyo iri.

15 “Eno tie gin m’ibitimo i kum adhura ceke ma n’i bor akeca kudi man m’utie ngo i kind adhura mi thek maeni ma n’i ceng’ini kudi. 16 Ento i adhura mi dhanu maeni ma Yehova Mungu peri ubemiyo iri ni giralaga, kud iwek piny moko ci ma yuyo ni iye udong’ kwo. 17 Ento icikiri ninyothogi pet, Juhithi, Juamor, Jukanan, Juperizi, Juhivi man Juyebusi, tap calu ma Yehova Mungu peri ung’olo iri. 18 Kara kud giponji ku lubo timo migi ceke ma judagu ma gibed gitimo ni mungu migi, gimaru ketho ibidubo ni Yehova Mungu peri.

19 “Tekene itieko adhura moko pi nimake, man idaru kiedo i dhoge dong’ pi nindo dupa, kud iting’ ley pi ninyotho yen m’i iye. Icopo camu nying’gi, ento kud ing’ondgi. Nyo ukwayu itiek yen mi podho de ve itieko dhanu? 20 Iromo nyotho kende kende yen m’ing’eyo nia jucamu ngo nyinge. Iromo ng’onde man igiero kude jamtieko adhura i kum adhura m’ubekiedo lwiny i dhogi nitundo m’ebipodho ko.

21 “Tek junwang’u ng’atu moko ma junego i die lum i ng’om ma Yehova Mungu peri ubemiyo iri nia imaki man ung’eyere ngo nia ng’a m’unege, 2 judongo ku jupoklembe peri ucikiri nicidho man nipimo piny niai i kum avune nitundo i kum adhura m’udhoke. 3 I ng’eye, judongo mir adhura ma ceng’ini kud avune ucikiri nigamu kud i dwol nyathi dhiang’ ma fodi juketho ngo nyanok de i tic, niwacu ma jutwiyo ngo mberembere nyanok de i ng’ute. 4 Man judongo mir adhura maeno ucikiri niloro ku nyathi dhiang’ne i poga ma pii m’ubemol ni iye, ma jufuro ngo kadi jucoyo de ngo kodhi i iye, man gicikiri nituro ng’ut nyathi dhiang’ne i poga keca.

5 “Man julam ma gi Julawi gibicoro ceng’ini, pilembe Yehova Mungu peri ung’iyogi pi nitimo ire kara gimii mugisa i nying’ Yehova. Gibinyutho kite ma juromo yiko ko dhaw ceke ma nek unegere i iye. 6 I ng’eye, judongo ceke mir adhura ma ceng’ini kud avuj ng’atu ma junego gicikiri nilogo cing’gi iwi nyathi dhiang’ ma juturo ng’ute i poga. 7 Man gibiyero kumae: ‘Utie ngo cingwa re m’ucwiro rimo maeni, kadi wang’wa de uneno ngo ng’atu m’ucwire. 8 E Yehova, kud iketh lembe maeni iwi dhanu peri Israel m’igam iwaru man kud iwek kier mi rimo m’umbe ku lembe ubed i kind dhanu peri Israel.’ E dubo mi rimo bibedo mbe i wigi. 9 I ayi maeno re m’ibikabu kier mi rimo m’umbe ku lembe kud i kindwu, ma nwang’u ibetimo lembe m’atira i wang’ Yehova.

10 “Tekene icidho i lwiny i dhu judegi peri man Yehova Mungu peri uvoyogi iri man imakugi ni ng’eca, 11 man ineno i kind ng’ecane nyaku moko ma leng’ mandha m’uteli man imito igame iri ni dhaku, 12 icopo dok kude i ot peri. Ecikere nilielo yuk wiye, niliro lwete, 13 man ebiwodho cen bongu pare mi ng’eca, e ebibedo i ot peri. Ebiwagu min ku won pi dwi acel zoo, kan i ng’eye, iromo timo kude ribiri. Ibidoko cware man en ke ebidoko dhaku peri. 14 Ento tekene ifoyo ngo kude, ibiweke ecidh kaka moko ci ma iye yenyo. Ento iromo lwore ngo mi sente kadi nitiyo kude yanga yanga, pilembe idaru cide.

15 “Tek nico moko tie ku mon ario, m’emaru acel nisagu ma kucelo man gin ario zoo ginyolo ire awiya ma co ma ke nyathin ma kayune tie pa dhaku m’emaru ngo, 16 i nindo m’ebimiyo giralaga pare ni wote, biyiyere ngo ire niketho wod dhaku m’emaru ni kayu kaka wod dhaku m’emaru ngo ma tie kayu pare. 17 Ecikere niyiyo nia wod dhaku m’emaru ngo re m’utie kayu, m’emii ko ire theng piny ceke m’etie ko wang’ ario, kum en re m’etie acaki mi kero pare mi nyodo. Twero m’etie ko nyodo kayu tie pare.

18 “Tek ng’atu moko utie ku wode ma wiye tek man m’ujai, m’ukwero niworo won kadi min, man gi ii nitwinye ento ekwero niwinjogi, 19 won giku min gicikiri nimake man nitere i bang’ judongo i dhugang’ mir adhura pare. 20 Man gibiyero ni judongo mir adhura pare kume: ‘Wodwa e wiye tek man e jajai; ekwero niworowa. E jabamba man jamero.’ 21 E dhanu ceke mir adhura pare bicanye ku kidi wang’ m’ebitho. I ayi maeno re m’icikiri nikabu gin ma rac cen kud i kindwu, man Israel ceke biwinjo, e lworo bimakugi.

22 “Tek ng’atu moko utimo dubo m’uromo nia jung’ol ko tho i wiye, e junege man iliere iwi yen, 23 avuje ucikere ngo nivuto diewor traka iwi yende. Ento mito inen nia ikunye de cing’ nica, pilembe ng’atu ma juliero utie gin ma Mungu ulamu, man icikiri ngo nicido ng’om ma Yehova Mungu peri ubemiyo iri ni giralaga.

22 “Tekene ineno thwon dhiang’ kunoke urombo p’umeru urwinyo, kud ipeliri ve nia inene ngo. Icikiri nidwoke andha i bang’ umeru. 2 Ento tekene umerune kwo ngo ceng’ini kudi kadi ing’eye de ngo, icikiri nidok ku leine yo peri man ebibedo i beng’i nitundo m’umeru bisaye. E icikiri nidwoke i bang’e. 3 Eno tie gin m’icikiri nitimo ku kana pare, bongu pare man piny moko ci m’urwinyo ni umeru man m’inwang’u. Kud ipeliri ve inene ngo.

4 “Tek ineno kana p’umeru kadi thwon dhiang’ pare upodho i yo, kud ipeliri ve nia inene ngo. Icikiri andha nikonye niting’o lei pare uai malu.

5 “Dhaku kud ukend kendi pa nico, kadi nico de kud ukend kendi pa dhaku. Kum ng’atu m’utimo gin ma kumeno utie gin ma Yehova Mungu peri udagu.

6 “Tek inwang’u odiwinyo i dhu yo ma nyithindhe kunoke tonge n’i iye, dok ebed iwi yen kunoke i ng’om man min winyone uvuto iwi nyithindhe kunoke iwi tonge, kud imak min winyone karacelo ku nyithindhe. 7 Nen nia iweko min ucidho, ento iromo coko nyithindhe iri. Tim kumeno kara lembe uwoth ber iri man ikwo lee.

8 “Tekene igiero ot ma nyen, icikiri niketho bende gang’ iwi ode, kara kud ikel dubo mi rimo iwi ot peri nikum ng’atu m’upodho kud i wiye.

9 “Kud icoy kit kodhi ario ma tung’ tung’ i podho peri mir ulok. Kan ungo piny ceke ma kodhine bicego man m’ulokne bicego, jubimayu pi tic mir hekalu.

10 “Kud ifur fur ku thwon dhiang’ man ku kana karacelo.

11 “Kud ikend bongu ma juyiko ku yuk urombo man bongu ma nwang’* ma jucwiyo karacelo.

12 “Yik jamruko i dhu bongu m’ikendo i gunde ang’wen.

13 “Tek nico moko ugamu dhaku man etimo kude ribiri ento i ng’eye elund edage,* 14 man edote nia kura pare rac m’ebeyero ko nyinge rac kumae: ‘Agamu dhaku maeni, re kinde m’atimo kude ribiri, anwang’u ngo gin m’unyutho nia eng’eyo ngo co.’ 15 Won nyakune giku min gicikiri nikelo gin m’unyutho nia nyakune ung’eyo ngo co i bang’ judongo i dhugang’ mir adhura. 16 Won nyakune ucikere niyero ni judongo kumae: ‘Amiyo nyara ni jali ni dhaku, ento elund edage* 17 man ebedote nia kura pare rac, m’ebeyero ko kumae: “Awok anwang’u ngo gin m’unyutho nia nyeri ung’eyo ngo co.” Gin m’unyutho nia nyara ung’eyo ngo co ni e.’ E gibipedho bongune i wang’ judongo mir adhura. 18 Judongo mir adhurane bimaku jalne man gibitwinye. 19 Gibing’olo ecul cekel* dak acel mi mola ma tar man gibimiye ni won nyaku, pilembe jalne ucido nyaku ma sumba mir Israel, man ebimedere nibedo dhaku pare. Ebibedo mbe ku twero mi lalu gamiri kude i kwo pare zoo.

20 “Ento tek adotene utie lemandha, man gin moko mbe m’unyutho nia nyakune ng’eyo ngo co, 21 gibiwodho nyakune woko i dhugola ot pa won, man jumaco mir adhura pare bicanye ku kidi wang’ m’etho, pilembe etimo lembacidi i Israel m’etimo ko lemsasa mi tarwang’ kinde m’en’i ot pa won. I ayi maeno re m’icikiri nikabu gin ma rac cen kud i kindwu.

22 “Tek junwang’u nico moko uvuto ku dhaku pa jal mange, gin ario ceke gicikiri nitho, nico m’uvuto ku dhakune man dhakune bende. I ayi maeno re m’icikiri nikabu gin ma rac cen kud i Israel.

23 “Tek nyaku moko nuti m’ung’eyo ngo co ma re nico moko udaru penjo, ento nico mange uwok unwang’e i adhura man uvuto kude, 24 wucikuru niwodho gin ario zoo i dhugang’ mir adhura man nicanyugi ku kidi wang’ ma githo, nyakune pilembe egoyo ngo nduru i adhura, man nicone pilembe ecido dhaku pa jal wadi. I ayi maeno re m’icikiri nikabu gin ma rac cen kud i kindwu.

25 “Ento tek nicone urombo ku nyaku ma jupenjone i die lum man emake ku kero evuto kude, e nico m’uvuto kudene kende re m’ucikere nitho; 26 kud wutim gin moko i kum nyakune. Nyakune timo ngo dubo m’uromo ku tho. Lembuno ubedo ve kinde ma ka ng’atu moko uloy rek iwi wadi man enege. 27 Kum erombo ku nyakune i die lum, man nyaku ma jupenjone goyo nduru, ento ng’atu ma romo lare ubino mbe.

28 “Tek nico moko urombo ku nyaku ma fodi ung’eyo ngo co man ma jupenjo de ngo, e emake man evuto kude man jurubogi, 29 nico m’uvuto ku nyakune bimiyo cekel pier abic mi mola ma tar ni won nyakune, man ebidoko dhaku pare. Calu ecide, ebibedo mbe ku twero mi lalu kude gamiri i kwo pare zoo.

30 “Ng’atu moko kud ugam ci won, ebimaru cido won.*

23 “Ng’atu ma tek jugoyo ni koni nikum nying’ mande ma juloyo kunoke yome ma juthumo cen copo mondo ngo i cokiri pa Yehova.

2 “Nyathin ma luk copo mondo ngo i cokiri pa Yehova. Kadok cil i kum dhanu m’utuk mir apaje, nyikwaye moko mbe ma copo mondo i cokiri pa Yehova.

3 “Jaamon kadi Jamoab moko mbe ma romo mondo i cokiri pa Yehova. Kadok cil i kum dhanu m’utuk mir apaje, nyikwaygi moko mbe ma romo mondo kadok nyanok de i cokiri pa Yehova, 4 pilembe gibin gikonyowu ngo ku cam man ku pii kinde ma wuai kud i Misiri man pilembe giculo Balam ma wod Beor mi Pethor mi Mezopothamia i kumi kara ulemi. 5 Ento Yehova Mungu peri ukwero niwinjo Balam. Yehova Mungu peri ulund uloko alamne ni mugisa iri, pilembe Yehova Mungu peri umeri. 6 Kud itim lembe moko nyanok de ma ketho gibedo ku kwiyocwiny kadi gilony i nindo ceke mi kwo peri.

7 “Kud idag Jaedom kum en umeru.

“Kud idag Jamisiri kum igam idoko umondo i ng’om pare. 8 Awiya m’unyolere igi, dhanu migi m’utuk mir adege copo mondo i cokiri pa Yehova.

9 “Saa ma kan iketho kagonjo i kum judegi peri, icikiri nikoyiri i kum gin moko ci ma rac.* 10 Tek nico moko cido nikum piikum ma wok ku diewor, ecikere niwok woko i ng’ey kagonjo man kud edwog kendo i kagonjo. 11 Kinde ma piny ubegamere, ecikere nijom man i ng’eye eromo dwogo i kagonjo i mwony pa ceng’. 12 Kaka moko m’upondo* ubed unuti woko i ng’ey kagonjo ma jubibetiyo ko man icikiri nibecidho kuca. 13 Rakuny kud ukosi i kind jamtic peri. Kinde m’icinyongo woko, icikiri nikunyo vur kude man i ng’eye ium wi ceth m’ipielo. 14 Kum Yehova Mungu peri ubewotho i die kagonjo peri pi nibodhi man pi nimiyo judegi peri i cingi. Pieno kagonjo peri ucikere nibedo leng’, kara kud enen gin moko m’umaku piny ungo i beng’i man ewek niwotho karacelo kudi.

15 “Tek ng’eca moko uluy kud i bang’ rwoth pare man ebino i beng’i, kud idwoke i bang’ rwoth pare. 16 Eromo bedo i kindwu kaka moko ci m’eng’iyo i adhura peri moko acel, kaka moko ci m’emaru. Kud isende.

17 “Nyaisrael moko mbe ma romo doko won asara mir hekalu,* kadi Jaisrael moko acel de mbe ma copo doko won asara mir hekalu. 18 Kud ikel piny ma juculo ni dhaku ma won asara kadi piny ma juculo ni nico ma won asara* i ot pa Yehova Mungu peri pi nipong’o lembang’ola ma ku kwong’, kum gin ario zoo gitie piny ma Yehova Mungu peri udagu.

19 “Kud iketh umeru ucul piny ku faida, dok ebed faida iwi sente, iwi cam kadi iwi piny moko ci ma juromo culo faida i wiye. 20 Iromo ketho umondo culo piny ku faida, ento kud iketh umeru ucul piny ku faida i wiye, kara Yehova Mungu peri umii iri mugisa i lembe ceke m’ibetimo i ng’om m’ibecimaku.

21 “Tek itimo lembang’ola ma ku kwong’ ni Yehova Mungu peri, kud igal ku pong’e, kum Yehova Mungu peri bikwaye andha i beng’i; kan ungo, ebibedo ni dubo iri. 22 Tek itimo ngo lembang’ola ma ku kwong’, dubo bibedo mbe i wii. 23 Icikiri nitimo lembe m’iyero man icikiri nitiyo ku lembe m’ikwong’o ku dhogi calu girathiera ma ku berocwiny ni Yehova Mungu peri.

24 “Tek imondo i podho mir ulok pa wedu, iromo camu nyinge i kadhiri ma romo yeng’i,* ento kud iketh moko i usau peri.

25 “Tek imondo i podho mi nying cam pa wedu ma n’i wi tiende, iromo jaku nyinge m’uteng’ini ku cingi, ento kud iketh viringo i kum cam pa wedu.

24 “Tek ng’atu moko ugamu dhaku ento efoyo kude ngo pilembe enwang’u gin moko ma cuu ngo i bang’e, e ebikiewo ire barua mi lalu gamiri, ebimiye i bang’e man ebirieme cen ku yo pare. 2 I ng’ey ma dhakune ai kud i ot pa jalne, eromo cidho man ecopo giero ng’atu mange. 3 Tek jal mir arionde m’ugame de udage* man ukiewo barua mi lalu gamiri ire, umiyo i cinge man urieme cen kud i ot pare, kunoke tek jal mir arionde m’ugame utho, 4 cware ma kwong’a m’ular urieme bibedo mbe ku twero mi dogame kendo ni dhaku i ng’ey m’edaru cido, kum eno tie gin ma Yehova dagu. Kud ikel dubo i ng’om ma Yehova Mungu peri ubemiyo iri ni giralaga.

5 “Kinde ma ng’atu moko ugamu nyamugole, kud ecidh i lwiny kadok tic mange de kud juketh i kore. Ecikere nibedo agonya pi oro acel man ebibedo yo pare pi ninyayu mutoro i dhaku pare.

6 “Ng’atu moko kud umay kidi rego kunoke nyathi kidi regone ni lanyuth* pi lon, kum eno udog ubedo ve eting’o yore mi kwo pa ng’atini ni mukwatu.

7 “Tek junwang’u ng’atu moko ukwalu umin* ma Jaisrael, esende man elwore, e ng’atu m’ukwalene ucikere nitho. Icikiri nikabu gin ma rac cen kud i kindwu.

8 “Tek dhobu* upodho kaka moko, nen nia itimo calku lembe ceke ma julam ma gi Julawi gibing’olo iri. Nen nia itimo kubang’e kubang’e lembe m’ang’olo iri. 9 Poy i kum lembe ma Yehova Mungu peri utimo i kum Miriam i yo kinde ma wuwok kud i Misiri.

10 “Tek imiyo kit lon moko ci ni wedu, kud imond i ot pare pi nimayu gin m’ebimiyo ni mukwatu. 11 Cung woko man ng’atu m’ugamu lon ne bikelo piny m’ebemiyo ni mukwatu i beng’i woko. 12 Tek ng’atune n’i yeny, kud icidh ivuti ma fodi piny m’emiyo ni mukwatu utie asu i beng’i. 13 Saa ma ceng’ ubemwony, icikiri nidwoko ire ku yore moko ci piny m’emiyo ni mukwatu. E ebicivuto ku kendi pare man ebimiyo iri mugisa; eno bibedo ni bedopwe iri i wang’ Yehova Mungu peri.

14 “Kud ivur jatic ma juculo acula ma n’i yeny man ma jacan, dok ebed acel m’i kind umego peri kadi umondo ma bedo i ng’om peri i adhura* peri. 15 Icikiri nimiyo cul pare de cing’ nica i wang’ mwony pa ceng’, pilembe en’i yeny man kwo pare ucungo iwi cul parene. Kan ungo ebiwak i bang’ Yehova ku nyingi man dubo bibedo i wii.

16 “Kud juneg wego pi lembe m’awiya migi timo man awiya de kud junegi pi lembe ma weggi utimo. Jubinego ng’atini ndhu pi dubo pare gire.

17 “Kud inyoth pokolembe p’umondo kadi pa nyathikic* man kud imay kendi pa dhatho ni mukwatu pi lon. 18 Poy nia igam idoko ng’eca i Misiri man Yehova Mungu peri uweri ku kuca. Eno re m’uketho abeng’olo iri nia itim lembuno.

19 “Kinde m’ibekayu cam i podho peri man wii uwil ku kanga acel i die podhone, kud iloki pi nidogame. Wek edong’ ni umondo, ni nyathikic man ni dhatho kara Yehova Mungu peri umii iri mugisa i lembe ceke m’ibetimo.

20 “Kinde m’ibegoyo yend oliv peri kara nyinge uoy, kud idog igoy kendo jange m’idaru goyo. Nyinge m’udong’ bibedo p’umondo, nyathikic man dhatho.

21 “Kinde m’ibecoko nying ulok kud i podho peri mir ulok, kud idog ibek kunde m’udong’. Gicikiri nidong’ ni umondo, ni nyathikic man ni dhatho. 22 Poy nia igam idoko ng’eca i ng’om mi Misiri. Eno re m’uketho abeng’olo iri nia itim lembuno.

25 “Tek teliri uwok i kind dhanu ario, gicidhi gin gigi i wang’ jupoklembe, man gibipoko lembe migine. Gibing’olo nia ng’atu ma pwe kosa mbe i wiye, man jatimrac ke nia kosa n’i wiye. 2 Tek jatimracne uromo ku del, japoklembe bipiele i ng’om, man ebiketho jurwade del i wang’e. Wend delne bibedo rom ku racu m’etimo. 3 Eromo goye nitundo del pier ang’wen, ento kud ekadh maeno. Tek emedo nigoye del m’usagu wel maeno, lewic copo nyay iwi umeru i weng’i.

4 “Kud itwii dhu thwon dhiang’ kinde m’ibetiyo kude pi fwodo cam.

5 “Tek umego moko gibedo karacelo man acel m’i kindgi utho ma fodi wode mbe, e dhaku pa ng’atu m’uthone kud ugier ng’atu mange m’uweko m’i ot maeca. Yore bicidho i bang’e, ebigame ni dhaku man ebilage. 6 Jubicaku nying umin m’utho i kum nyathin ma kayu ma dhakune binyolo, kara nyinge kud urwiny i Israel.

7 “Ento tek ng’atune ubemito ngo egam ci umin m’utho, e ci umin ne bicidho i bang’ judongo i dhugang’ mir adhura man ebiyero kumae: ‘Yora ukwero nigwoko nying umin i Israel. Eyiyo ngo elaga.’ 8 Judongo mir adhura pare gicikiri nilwong’e man niweco kude. Tek ebejai asu man ebeyero kumae: ‘Abemito ngo agame,’ 9 e ci umin m’uthone bicoro i bang’e i wang’ judongo, ebiwodho wara pare kud i tiende, ebing’ulo law i wang’e, man ebiyero kumae: ‘Eni gin ma jucikiri nitimo i kum nico m’ukwero nigiero ot p’umin.’ 10 I ng’ey maeno, nying’ juruot pare* bing’eyere i Israel nia ‘ot pa ng’atu ma juwodho wara kud i tiende.’

11 “Tek jumaco ario ubedhaw man dhaku pa ng’atu acel m’i kindgi ubino nilaru cware kud i cing’ ng’atu m’ubefwode, man erieyo cinge emaku yom ng’atu m’ubefwodo cwarene, 12 icikiri ning’ondo cinge cen. Kisa kud unegi* i kume.

13 “Kud ibed ku jampimo pek pa piny* ario m’ukoc i usau peri, ma dit ku ma nok. 14 Kud ibed ku jampimo piny* ario ma tung’ tung’ i ot peri, ma dit ku ma nok. 15 Icikiri nibedo ku kilo ma tap man m’atira ku jampimo piny de ma tap man m’atira, kara ikwo lee i ng’om ma Yehova Mungu peri ubemiyo iri. 16 Kum ng’atu moko ci m’atira ngo m’ubetimo lembe ma kumeno, etie gin ma Yehova Mungu peri udagu.

17 “Poy i kum gin ma Juamalek gitimo i kumi i yo kinde m’ibewok kud i Misiri, 18 kite ma girombo ko kudi i yo man gitugo lwiny i dhu ju ceke ma gibino sendiri i ng’eyi kinde m’igam iol man ivoc. Gigam gilworo ngo Mungu. 19 Kinde ma Yehova Mungu peri bimiyo iri yom kud i cing’ judegi peri ceke m’udhoki i ng’om ma Yehova Mungu peri ubemiyo iri imaki ni giralaga, icikiri niruco nying Amalek cen kud i the polo. Wii kud uwil ki pi lembe maeni.

26 “Tek dong’ idaru mondo i ng’om ma Yehova Mungu peri ubemiyo iri ni giralaga man imaku ng’ombe man ibekwo i iye, 2 ibiting’o kum landu wi mwoka mi piny ceke m’ucek* i ng’om, m’icoko kud i ng’om peri ma Yehova Mungu peri ubemiyo iri, man ikethgi i katoko; e icidh ikethgi i kaka ma Yehova Mungu peri ung’iyo nia nyinge ubed i iye. 3 Ibicidho i bang’ jalam ma bitimo i nindo maeno, man iyer ire kumae: ‘Tin abetwong’o ni Yehova Mungu peri nia atundo i ng’om ma Yehova ukwong’o ni kwaruwa nia ebimiyo iwa.’

4 “E jalam bigamu katoko kud i cingi man ebikethe i wang’ pemlam pa Yehova Mungu peri. 5 Ibiyero i wang’ Yehova Mungu peri kumae: ‘Vwa ubino Jaaramea m’ubewotho kun ku kun,* e eloro piny i Misiri man ebedo kuca ni umondo ku juruot pare ma nok. Ento kuca edoko thek ma dit, ma tek, man ma wendgi lee. 6 Jumisiri gitimowa rac, gisendowa man gidiyowa ku tic mi ng’eca ma tek mandha. 7 E wacaku wak i bang’ Yehova ma Mungu pa kwaruwa, man Yehova uwinjo dwandwa man eneno can mwa ku nzero mwa, man masendi mwa. 8 Tokcenne Yehova uwodhowa kud i Misiri ku cing’ ma tek man bot m’arieya, ku timo ma ng’oyo ndiri man giranyutha kud udu. 9 I ng’eye, ekelowa i kabedo maeni man emiyo iwa ng’ombuni ma en e ng’om ma molo cak ku miyokic. 10 Kawoni akelo landu wi mwoka mi cam m’ucek i ng’om ma Yehova umiyo ira.’

“Icikiri nikethe i wang’ Yehova Mungu peri man nikulo kori piny i wang’ Yehova Mungu peri. 11 E anyong’a binegi pi gin ceke ma beco ma Yehova Mungu peri umiyo iri man ni juruot peri, in karacelo ku Jalawi man umondo ma bedo i kindwu.

12 “Tek idaru coko apaje ceke mi piny m’ucek i oro mir adege, ma en e oro mir apaje, ibimiye ni Jalawi, ni umondo, ni nyathikic,* man ni dhatho, e gibicamu man gibiyeng’ i adhura* peri. 13 I ng’eye, ibiyero i wang’ Yehova Mungu peri kumae: ‘Adaru piny ma leng’ kud i ot para man amiye ni Jalawi, ni umondo, ni nyathikic, man ni dhatho, tap calu m’ing’olo ira. Aturo ngo, kadi acayu ngo cik peri. 14 Acamu ngo kume moko kinde m’atie ku can kadi awodho de ngo kume moko kinde m’a leng’ ungo, kadi amiyo de ngo kume moko ni ju m’utho. Aworo dwand Yehova Mungu para man atimo gin ceke m’ing’olo ira. 15 Kawoni, nen piny, kud i kabedo peri ma leng’, ma en e polo, man mii mugisa ni dhanu peri Israel man iwi ng’om m’imiyo iwa, tap calu m’ikwong’o ni kwaruwa, ma en e ng’om ma molo cak ku miyokic.’

16 “Tin eni Yehova Mungu peri ubeng’olo iri nia iwor cik maeni man telowic pare mi pokolembe. Icikiri niworogi man nitiyo kugi kud adundeni ceke man ku ng’eyong’ec* peri ceke. 17 Tin idaru nwang’u lembe ma Yehova uyero ma nia ebidoko Mungu peri tek ibewotho i yo pare man ibeworo cik pare, lembang’ola pare, telowic pare mi pokolembe, man tek ibewinjo dwande. 18 Man tin Yehova unwang’u lembe m’iyero nia idoko dhanu pare, piny pare ma segi,* tap calu m’eng’olo iri, man nia ibiworo lembang’ola pare ceke 19 man nia ebidodi malu iwi thek mange ceke m’ecwiyo, m’ebeyungi ko man ebeketho nyingi uyiki, man ebemiyo iri dwong’ kinde m’ibenyuthiri giri nia itie dhanu ma leng’ ni Yehova Mungu peri, tap calu m’eng’olo.”

27 I ng’eye, Musa karacelo ku judongo mir Israel ging’olo ni dhanu kumae: “Wuwor lembang’ola ceke m’abemiyo iwu tin eni. 2 Man i nindo ma wubikadhu loka kulo Yordan man wumondo i ng’om ma Yehova Mungu mwu ubemiyo iwu, wucom kidi ma dongo man wufii kumgi kud ulobo.* 3 E wukiew wec mi Cik maeni ceke i kumgi kinde ma wukadhu lokaca, kara wumond i ng’om ma Yehova Mungu mwu ubemiyo iwu, ma en e ng’om ma molo cak ku miyokic, tap calu ma Yehova Mungu pa kwaruwu ung’olo iwu. 4 Kinde ma wukadhu kulo Yordan, wucikuru nicoko dhu kidi maeno iwi got Ebal man wufii kumgi kud ulobo, tap calu m’abeng’olo iwu tin eni. 5 Wubigiero bende pemlam kuca ni Yehova Mungu mwu, ma en e pemlam mi kidi. Kud wutii ku jamtic mi cuma i wigi. 6 Wucikuru nigiero pemlam pa Yehova Mungu mwu ku kidi ma zoo, man nithiero lam m’awang’a ni Yehova Mungu mwu i wiye. 7 Wubithiero lam mi kwiyocwiny man wubicamugi keca, e anyong’a binegowu i wang’ Yehova Mungu mwu. 8 Man wubikiewo wec ceke mi Cik maeni kamaleng’ iwi kidinegi.”

9 I ng’eye, Musa ku julam ma gi Julawi giweco i bang’ Israel ceke, giwacu kumae: “Wubed ling’ man wuwinji, E Israel. Tin eni wudaru doko dhanu pa Yehova Mungu mwu. 10 Wucikuru niwinjo dwand Yehova Mungu mwu man niworo lembang’ola pare ku cik pare m’abeng’olo iwu tin eni.”

11 Cing’ nica Musa ung’olo ni dhanu kumae: 12 “Ka wukadhu loka Yordan, suru m’ulubo e gibicungo iwi got Gerizim pi nimiyo mugisa iwi dhanu: Simeon, Lawi, Yuda, Isakar, Yozefu man Benjamin. 13 Man suru m’ubelubo e bicungo iwi got Ebal pi nikogo kwong’: Ruben, Gad, Acer, Zebulon, Dan man Nafthali. 14 E Julawi gibiyero ni dhanu ceke mir Israel ku dwandgi ma tek kumae:

15 “‘Kwong’ ubed iwi ng’atu m’uyiko man m’ukanu ayi gin m’acwiya m’ang’ika kadi ayi gin m’acwiya mi cuma,* ma ke tie gin ma Yehova udagu, ma en e tic mi cing’ jabodho.’* (E dhanu ceke bidwoko kumae: ‘Amen!’*)

16 “‘Kwong’ ubed iwi ng’atu m’ucayu won ku min.’ (E dhanu ceke bidwoko kumae: ‘Amen!’)

17 “‘Kwong’ ubed iwi ng’atu ma bicoro giranyutha mi kieu pa wadi.’ (E dhanu ceke bidwoko kumae: ‘Amen!’)

18 “‘Kwong’ ubed iwi ng’atu ma biketho abinga urwiny i yo.’ (E dhanu ceke bidwoko kumae: ‘Amen!’)

19 “‘Kwong’ ubed iwi ng’atu ma binyotho pokolembe p’umondo, pa nyathikic,* kadi ke pa dhatho.’ (E dhanu ceke bidwoko kumae: ‘Amen!’)

20 “‘Kwong’ ubed iwi ng’atu m’uvuto ku ci won, kum ecido won.’* (E dhanu ceke bidwoko kumae: ‘Amen!’)

21 “‘Kwong’ ubed iwi ng’atu m’uvuto ku lei moko ci.’ (E dhanu ceke bidwoko kumae: ‘Amen!’)

22 “‘Kwong’ ubed iwi ng’atu m’uvuto ku nyamin, nyawon kadi nyaku pa min.’ (E dhanu ceke bidwoko kumae: ‘Amen!’)

23 “‘Kwong’ ubed iwi ng’atu m’uvuto ku dhamarumire.’ (E dhanu ceke bidwoko kumae: ‘Amen!’)

24 “‘Kwong’ ubed iwi ng’atu m’ukanu libo man unego wadi.’ (E dhanu ceke bidwoko kumae: ‘Amen!’)

25 “‘Kwong’ ubed iwi ng’atu m’uyiyo kanyaka pi ninego ng’atu m’udubo ngo.’ (E dhanu ceke bidwoko kumae: ‘Amen!’)

26 “‘Kwong’ ubed iwi ng’atu m’umoko ngo i kum lembe m’i Cik maeni pi nitiyo kugi.’ (E dhanu ceke bidwoko kumae: ‘Amen!’)

28 “Man tek andha ndhu ibiwinjo dwand Yehova Mungu peri, ma nwang’u ibelubo cuu mandha lembang’ola pare ceke m’abeng’olo iri tin, Yehova Mungu peri bidodi andha iwi thek mange ceke ma n’i wi ng’om. 2 Kum tek imediri niwinjo dwand Yehova Mungu peri, mugisa maeni ceke bibino i wii man bikwenyi.

3 “Mugisa bikwenyi i adhura, man mugisa bikwenyi i kiaru.

4 “Mugisa bikwanyu awiya peri,* kodhi mi ng’om peri, man nyithindh udul lim peri, nyithi dhieng’, ku rombe peri.

5 “Mugisa bikwanyu katoko peri, man kpanu peri.

6 “Mugisa bikwenyi kinde m’ibemondo, man mugisa bikwenyi kinde m’ibewok woko.

7 “Yehova biketho ibivoyo judegi peri m’ubeai i kumi. Gibiloy i wii kud i yo acel, ento gibiringi kud i yo abiro ma tung’ tung’. 8 Yehova bing’olo mugisa iri iwi dero peri man iwi gin ceke m’ibetimo, man ebimiyo iri mugisa andha i ng’om ma Yehova Mungu peri ubemiyo iri. 9 Yehova biketho ibed ire ni dhanu ma leng’, tap calu m’ekwong’o iri, kum imediri nigwoko lembang’ola pa Yehova Mungu peri man iwotho i yo pare. 10 Bikwayu dhanu mi ng’om ceke ginen nia nying’ Yehova ulwong’ere i kumi, man lworo binegogi i kumi.

11 “Yehova biketho ibipong’ bik kud awiya, man ebiketho udul lim ku nying cam mi ng’om bipong’ bik i ng’om ma Yehova ukwong’o ni kwaru peri nia ebimiyo iri. 12 Yehova biyabu iri dhu dero pare ma leng’, niwacu polo, pi nimiyo koth iwi ng’om peri i nindone, man nimiyo mugisa iwi gin ceke m’ibetimo. Ibimiyo banja ni thek dupa, ento in ibibedo mbe ku yeny mi gamu banja. 13 Yehova Mungu peri biketho ibibedo ni wic, ento ni yib ungo; man ibibedo malu, ento piny ungo, tek imediri niworo lembang’ola pa Yehova Mungu peri m’abeng’olo iri tin eni pi nilubogi man nitiyo kugi. 14 Kud ilokiri yor acwic kadi yor acam kud i kum lembe ceke m’abeng’olo iri tin eni, pi nilubo tok mungu mange man nitimo igi.

15 “Ento tek iwinjo ngo dwand Yehova Mungu peri, tek ibedo ngo ku weng’i pi niworo lembang’ola pare ceke man cik pare m’abeng’olo iri tin eni, e kwong’ maeni ceke bibino i wii man bimeki.

16 “Kwong’ bibedo i wii i adhura, man kwong’ bibedo i wii i kiaru.

17 “Kwong’ bibedo iwi katoko peri, man iwi kpanu peri.

18 “Kwong’ bibedo iwi awiya peri,* iwi nying cam m’i ng’om peri, man iwi nyithi dhieng’ ku rombe peri.

19 “Kwong’ bibedo i wii kinde m’ibemondo man kwong’ bibedo i wii kinde m’ibewok woko.

20 “Yehova bioro kwong’ i wii, ebijebo wii, man ebimiyo iri matira i gin ceke m’ibetimo, cil m’ibithum man ibirwinyo ko pio, nikum timo peri ma reco man wek m’iweka ko. 21 Yehova biketho thong’om bimoko i kumi, cil m’ebideri kud i ng’om m’ibecidho i iye pi nimaku. 22 Yehova bigoyi kud aonda ma tek, malaria ma cego kum, akwoda kwoda, lietho ma tek, palamularu, yamu ma thwoyo cam, laimo,* man gibilubo toki cil m’ibithum ko. 23 Polo mi wii bibedo mola, man ng’om mi theri bibedo cuma. 24 Yehova biketho koth ma bicwii iwi ng’om peri bidoko ni mogo, man ni utur ma biloro i wii niai kud i polo nitundo m’ibithum pet. 25 Yehova biketho judegi peri bivoyi. Ibiloy i wigi kud i yo acel, ento ibiringogi kud i yo abiro ma tung’ tung’; man ndiri bimaku ker ceke mi ng’om kinde ma gibineno man gibiwinjo lembe ma rac m’utimerene. 26 Man avujwu bibedo ni cam ni winyo ceke mi polo, man ni lei mi ng’om ma ng’atu moko mbe ma binyayu lworo i igi.

27 “Yehova bigoyi ku vur mi Misiri, ku minic, kud awuu ma corere i kumjo, man gwenyo ma copo key ungo kud i kumi. 28 Yehova bibolo abelu i wii, ebiketho weng’i bitho, man wi binyothere. 29 Ibiwotho big big ku dieceng’, tap calu m’abinga wotho ko big big i mudho, man piny moko ci m’ibetimo birombo ngo iri; e jubikweli man jubiyeki saa ceke ma ng’atu moko mbe ma bibodhi. 30 Ibipenjo nyaku, ento nico mange bimake ku kero. Ibigiero ot, ento ibikwo ngo i iye. Ibipidho podho mir ulok, ento ibitiyo ngo ku nyinge. 31 Jubithumo thwon dhiang’ peri i weng’i, ento ibicamu ngo kum ringe moko. Jubikwalu kana peri i the weng’i, ento jubidwoge ngo i beng’i. Jubimiyo rombe peri ni judegini, ento ng’atu moko mbe ma bileri. 32 Jubimiyo woti ku nyigi ni dhanu mange ma in de ibeneno, man avagi binegi, ento cingi bibedo mbe ku tego mi timo lembe moko. 33 Dhanu m’ing’eyo de ngo bicamu nying cam m’i ng’om peri, man piny ceke m’ucek iri; saa ceke jubikweli man jubinyono ii. 34 Gin ma weng’i bineno bibolo abelu i wii.

35 “Yehova bigoyi ku vur ma lith man ma key ungo i congi man i tiendi, niai i the tiendi nitundo i tatu wii. 36 Yehova biteri kud ubimo m’iketho i wii, i bang’ thek ma in ku kwaru peri de wung’eyo ngo, man kuca ibitimo ni mungu mange, mungu mi yen man mi kidi. 37 Man ibidoko ni gin ma ng’oyo ndiri ku jamcac* man jamng’iero i kind dhanu ceke ma Yehova ubeteri i kindgi.

38 “Ibicoyo kodhi lee i podho, ento ibikayu nyanok, kum bonyo bimvore. 39 Ibipidho man ibifuro podho mir ulok, ento ibimadhu ngo pigulokne man ibicoko ngo piny moko, kum ukoko bicame pet. 40 Ibibedo ku yend oliv i ng’om peri ceke, ento ibiwiro ngo moje i kumi, pilembe oliv perine bipodho cen. 41 Ibinyolo awiya ma co ku ma nyir, ento gibibedo ngo peri, pilembe jubiterogi i ng’eca. 42 Udul ukoko* binur i kum yen peri ceke, man i kum nying cam m’i ng’om peri. 43 Umondo ma bedo i kindwu bimedere ameda nidoko tek nisegi, ento in tego peri bimedere ameda nijwik. 44 Ebimiyo iri banja, ento in ibimiyo ngo ire banja. Ebidoko wic, ento in ibidoko yib.

45 “Kwong’ maeni ceke bibino i wii andha, ebilubi, man ebimeki nitundo m’ibithum pet, pilembe iwinjo ngo dwand Yehova Mungu peri, pi niworo lembang’ola pare, cik pare m’eng’olo iri. 46 Man kwong’ne bibedo asu i wii, man iwi nyikweyi ni giranyutha man thangu ma nja, 47 pilembe itimo ngo ni Yehova Mungu peri ku mutoro man anyong’a mir adunde, kinde m’ibedo ku kwond piny ceke lee. 48 Yehova bioro judegi peri i kumi, man ibitimo igi kinde ma kec ku rieu ubenegi, ikendiri nyacan can man ikoso piny ceke. Ebiketho mberembere mi cuma i ng’uti nitundo m’ebideri ko.

49 Yehova biting’o thek ma bor i kumi niai kud i gund ng’om, ebiloro i wii rek calu acur, thek m’ibinyang’ ungo i dhok migi, 50 thek ma wang’gi kwiny, ma biworo ngo ju m’utii kadi ma bitimo ngo kisa ni ju m’aradu. 51 Gibicamu nyithindh udul lim peri man nying cam m’i ng’om peri cil m’ibithum ko pet. Gibiweko ngo iri nying cam moko nyanok de, pigulok ma nyen kunoke mo, nyithi dhieng’ kadi rombe, cil ma gibinyothi. 52 Gibitieki, gibitwiyo beng’i i adhura* peri ceke kud i die ng’om peri zoo, cil ma gang’kidi peri ma wiw man ma tek m’igeno birwombere ko. Eyo, gibitieki andha i adhura peri ceke i die ng’om peri ma Yehova Mungu peri umiyo iri. 53 Judegi peri bitieki ku rac man gibinyayu can lee i kumi, ma biketho ibicamu ring awiya peri,* ring woti ku nyigi ma Yehova Mungu peri umiyo iri.

54 “Kadok nico m’ubekwo kwo ma ber hai, man ma dieng’ pi jumange akeca i kindwu de kisa binege ngo i kum umin, kadi i kum dhaku pare m’emaru, kadi i kum wote m’udong’. 55 Man ebimiyo ngo igi nyanok de ring wote m’ebicamu, pilembe embe ku piny moko mange nikum tiek ma ku rac man masendi ma judegi peri bikelo iwi adhura peri. 56 Man kadok dhaku ma kwo kwo ma ber, man ma dieng’ akeca pi jumange i kindwu, ma romo paru ngo apara de niketho the tiende i ng’om, pilembe ebekwo ma ber dit de bibedo mbe ku kisa i kum cware m’emaru, kadi i kum wode, kadi i kum nyare, 57 kadi i kum pel m’uwok kud i kind tiende i ng’ey m’eoy, man i kum wote m’enyolo, kum ebicamugi i amung’ nikum tiek ma ku rac man masendi ma judegi peri bikelo iwi adhura peri.

58 “Tek ibiworo ngo cuu mandha wec ceke mi Cik maeni ma jukiewo i buku maeni, man tek ibilworo ngo nying’ ma dwong’ maeni man ma ng’oyo ndiri, ma en e nying’ Yehova Mungu peri, 59 e Yehova bigoyi ku nyikweyi ku thong’om ma tek dit, thong’om ma dit man ma thum ungo, man ku twoyo ma rac dit ma thum ungo. 60 Ebidwogo twoyo ceke m’ibed ilworo i Misiri i wii, man gibimoko korodo i kumi. 61 M’umedo maeno, Yehova bikelo i wii kadok twoyo ceke kadi thong’om ma jukiewo ngo pigi i buku mi Cik maeni nitundo m’ibithum ko pet. 62 Kadok nwang’u wubinyay calu nyikaluku mi polo, re wendwu bidong’ nyanok pilembe wuwinjo ngo dwand Yehova Mungu mwu.

63 “Man tap calu ma Yehova ugam ufoyo niketho wulony man wunyay, kumeno bende Yehova bifoyo ninyothowu man nidaruwu pet, man jubikabuwu kud i ng’om ma wubecimaku.

64 “Yehova bilaluwu i kind thek ceke, niai i gund ng’om acel nitundo i gunde mucelo, man kuca wubitimo ni mungu mi yen man mi kidi, ma in ku kwaru peri de wung’eyo ngo. 65 Ibibedo mbe ku kwiyocwiny, kadi kaka ma the tiendi romo yom i iye i kind thek maenogi. Ento kuca, Yehova bimiyo iri adieng’acwiny, wang’ m’ucor, man koso genogen. 66 Kwo peri bibedo i ariti ma lee, man ibibedo ku ndiri dieceng’ ku diewor, ibibedo mbe ku genogen ma nia ibiboth. 67 Kugweno ibiyero nia, ‘nwang’u timba eni ubed uthieno ci!’ man uthieno ke ibiyero nia, ‘nwang’u timba eni ubed kugweno ci!’ nikum ndiri ma binyay i adundeni man nikum gin ma weng’i bineno. 68 Yehova bidwoki andha i Misiri ku meli, kud i yo m’ayero pire iwu kumae: ‘Wubinene ngo kendo nyanok de.’ Man kuca bikwayu wulworuru giwu ni judegi mwu ni ng’eca ma co man ma nyir, ento ng’atu moko mbe ma bing’iewi.”

29 Maeni tie wec mi lembariba ma Yehova ung’olo ni Musa nia etim ku dhanu mir Israel i ng’om mi Moab, pi nimedo kum lembariba m’etimo kugi i Horeb.

2 E Musa ugam ulwong’o Israel ceke karacelo, man ewacu igi kumae: “Wuneno lembe ceke ma Yehova utimo i weng’wu i ng’om mi Misiri i kum Farao, i kum jutic pare ceke, man i kum ng’om pare ceke, 3 pokolembe* ma dongo ma weng’wu uneno, giranyutha man udu ma dongo maenogi. 4 Ento Yehova umiyo ngo iwu adunde mi nyang’, wang’ mi neno, man ith mi winjo lembe nitundo tin eni. 5 ‘Kinde m’abino telo wiwu pi oro pier ang’wen i langa, kendi mwu utii ngo i kumwu, man wara mwu de utii ngo i tiendwu. 6 Wucamu ngo mukathi, man wumadhu ngo pigulok, kadi kong’o moko ci ma lake tek, kara wung’ey nia an a Yehova Mungu mwu.’ 7 Tokcenne wutundo i kabedo maeni, man Sihon m’ubimo mi Hecbon giku Og m’ubimo mi Bacan giwok woko nirombo kudwa i lwiny, ento wavoyogi. 8 I ng’ey maeno, wamaku ng’om migi man wamiye ni giralaga ni suru pa Ruben, ni suru pa Gad, man ni nusu suru pa Manase. 9 Pieno, wuketh wec mi lembariba maeni i timo man wuworgi, kara lembe ceke ma wubetimo uwoth ma ber.

10 “Wun ceke wucungo tin i wang’ Yehova Mungu mwu, jutelwic mi suru mwu, judongo mwu, bajego mwu, jumaco ceke mir Israel, 11 awiya mwu, mon mwu, man umondo ma bedo i kind kagonjo mwu, niai i kum ng’atu ma coko iwu yen nitundo i kum ng’atu ma twomo iwu pii. 12 Wuni keni pi nimondo i lembariba man kwong’ pa Yehova Mungu mwu, ma Yehova Mungu mwu ubetimo kudwu tin eni, 13 kara ekethwu tin eni ni dhanu pare, man kara ebed Mungu mwu tap calu m’elar eng’olo iwu man ekwong’o ni kwaruwu m’Abraham, Isak, man Yakobo.

14 “Lembariba ku kwong’ maeni abetimo ngo kudwu kendwu, 15 ento tie ku ju m’ucungo karacelo kudwa tin keni i wang’ Yehova Mungu mwa, man ku ju m’umbe karacelo kudwa keni tin eni. 16 (Kum wung’eyo ma ber kite ma wagam wakwo ko i ng’om mi Misiri man kite ma wakadhu ko kud i kind thek ma tung’ tung’ i woth mwa. 17 Man wubed wuneno piny migi ma judagu, man ayi gin m’acwiya migi ma judagu* mi yen man mi kidi, mi mola ma kwar man mi mola ma tar, m’ubino i kindgi.) 18 Wubed ku weng’wu kara kud junwang’ i kindwu tin eni nico kadi dhaku moko, juruot kadi suru moko m’adundene ulokere kud i kum Yehova Mungu mwa, pi nicitimo ni mungu mi thek maeno, kara kud junwang’ ulag piny moko i kindwu ma cego nyinge ma kwir n’i iye man ma kec.

19 “Ento tek ng’atu moko uwinjo wec mi kwong’ maeni, man ebehayere yor i adundene m’ebewacu kumae: ‘Abibedo ma cwinya kwiyo kadok nwang’u abecerara asu niwotho i yo m’adundena uyenyo de,’ ma ke eno bikelo nyoth i lembe ceke mi yo pare, 20 Yehova bibedo ngo ayika nitimo kisa ni ng’atu maeno. Ento ng’eicwiny pa Yehova biopo i kum ng’atune, man alam ceke ma jukiewo pire i buku maeni bibino andha i wiye, man Yehova biweyo nyinge andha kud i the polo. 21 E Yehova bikoyo ng’atu maeno cen kud i kind suru ceke mir Israel, kara enwang’ere ku can calkud alam ceke mi lembariba ma jukiewo i buku mi Cik maeni.

22 “Kinde ma dhanu m’utuk mi wotwu mi nindo m’ubino, man umondo m’uai kud i ng’om ma bor bineno thong’om mi ng’ombe, tho ma Yehova ukelo i wiye­, 23 muganga ku kadu man mac m’uwang’u piny, uketho ng’ombe zoo jubicoyo ngo kodhi i iye, kadi piny de bitwii ngo i iye, kadi lum moko ci biloth ungo i iye, calu ma jurwombo ko Sodoma ku Gomora, Adma man Zeboim ma Yehova ugam urwombo nikum ng’eicwiny pare, man nikum kwinyo pare, 24 gin karacelo ku thek ceke gibiwacu kumae: ‘Pirang’o Yehova utimo lembe maeni i kum ng’ombuni? Girang’o m’uopo ng’eicwiny ma dit kumeni?’ 25 E jubidwoko kumae: ‘Utie pilembe giweko lembariba pa Yehova, ma Mungu pa kwarugi, m’etimo kugi kinde m’ewodhogi kud i ng’om mi Misiri. 26 Ento gicidh gitimo ni mungu mange, man gikulo korgi piny igi, mungu ma ging’eyo ngo man m’eyiyo ngo nia gitim igi. 27 E ng’eicwiny pa Yehova uopo i kum ng’om maeno, man ekelo alam ceke ma jukiewo i buku maeni iwi ng’ombe. 28 Pieno, Yehova ufudho ulaggi kud i ng’om migi, nikum ng’eicwiny pare, kwinyo, man kwinyo pare ma lake tek, man ebayugi i ng’om mange, kaka ma gin’i iye tin eni.’

29 “Lembe m’upondo utie pa Yehova Mungu mwa, ento lembe m’unyuthere utie mwa man pa nyikwaywa pi nja, kara watii ku wec ceke mi Cik maeni.

30 “Kinde ma lembe maeni ceke bipong’o i wii, mugisa kud alam m’aketho i weng’i, man ibipoy pigi* i kind thek ceke ma Yehova Mungu peri ulalu ii i kindgi, 2 man idwogo i bang’ Yehova Mungu peri man iwinjo dwande calku lembe ceke m’abeng’olo iri tin eni, in ku woti kud adundeni ceke man ku ng’eyong’ec* peri ceke, 3 e Yehova Mungu peri bidwogo juperi ma jumaku man kisa binege i kumi, man ebicoko dhogi kud i kind dhanu ceke ma Yehova Mungu peri ugam ulalu ii i kindgi. 4 Kadok nwang’u dhanu perine gilal nitundo i gund polo de, Yehova Mungu peri bicoko dhogi niai ku kuca, man ebidwogi kendo. 5 Yehova Mungu peri bidwogi i ng’om ma kwaru peri umaku ni aba, man ebibedo ni aba peri; ebiketho ibilony man ibinyay lee nisagu kwaru peri. 6 Yehova Mungu peri bidwoko adundeni man adunde nyikweyi leng’,* kara imar Yehova Mungu peri kud adundeni ceke, man ku ng’eyong’ec* peri ceke, kara ikwo. 7 E Yehova Mungu peri bikelo alam maeni ceke iwi judegi peri m’udegi, man m’ugam unyayu ragedo i kumi.

8 “Pieno ibidwogo man ibiwinjo dwand Yehova man ibiworo lembang’ola pare ceke m’abeng’olo iri tin eni. 9 Yehova Mungu peri biketho ibilony lee mandha i tic ceke mi cingi, ebimedo wend awiya peri, udul lim peri, man cam m’ucek i ng’om peri, kum Yehova bifoyo niketho ilony, tap calu m’egam efoyo niketho kwaru peri gilony. 10 Kum ibiwinjo dwand Yehova Mungu peri man ibiworo lembang’ola ku cik pare ma jukiewo i buku mi Cik maeni, man ibidwogo i bang’ Yehova Mungu peri kud adundeni ceke, man ku ng’eyong’ec* peri ceke.

11 “Lembang’ola maeni m’abeng’olo iri tin eni utie tek hai ungo iri, kadi abora de ebor ungo iri. 12 En’i polo ngo ma nia iwac ko kumae: ‘Ng’a ma biidho i polo pi nigame iwa kara wawinje man wawore?’ 13 Kadi en’i loka nam de ngo ma nia iwac ko kumae: ‘Ng’a ma bikadhu loka nam pi nigame iwa kara wawinje man wawore?’ 14 Kum lembene ni ceng’ini mandha kudi, en’i dhogi man i adundeni kara itii kude.

15 “Nen, abeketho i weng’i tin kwo ku bero, man tho ku racu. 16 Tek iwinjo lembag’ola pa Yehova Mungu peri m’abeng’olo iri tin eni, m’ibemaru ko Yehova Mungu peri, ibewotho i yo pare, man ibeworo lembang’ola pare ku cik pare man telowic pare mi pokolembe, e ibikwo man ibinyay, man Yehova Mungu peri bimiyo iri mugisa i ng’om m’ibecimaku.

17 “Ento tek adundeni ulokere cen, tek iwinjo ngo man iweko jubidho weng’i man ikulo kori piny ni mungu mange man itimo igi, 18 abeyero iri tin eni nia ibithum andha. Ibikwo ngo lee i ng’om m’ibekadhu i iye loka Yordan pi nimaku. 19 Abeting’o polo ku ng’om ni jumulembe i kumi tin eni, nia aketho kwo ku tho i weng’i, mugisa kud alam. Man icikiri ning’iyo kwo kara ikwo, in ku nyikweyi, 20 m’imar ko Yehova Mungu peri, iwinj dwande, man imok i kume; kum en e kwo peri man nikume ibikwo pi nindo ma lee i ng’om ma Yehova ukwong’o nia ebimiyo ni kwaru peri m’Abraham, Isak, man Yakobo.”

31 I ng’eye, Musa ucidh uyero wec ma e ni Israel zoo, 2 ewacu igi kumae: “Tin eni oro para udoko dak acel ku pier ario. Acopo medara ngo dong’ nitelo wiwu,* kum Yehova uwacu ira kumae: ‘Loka Yordan e re ibikadhu ngo.’ 3 Yehova Mungu mwu re ma bikadhu i weng’wu, en re m’ebidaru thek maeno pet kud i weng’wu man wubiriemogi cen. Yocuwa re ma bitelo wiwu pi nikadhu lokaca, tap calu ma Yehova uyero. 4 Yehova bitimo i kumgi tap lembe m’etimo i kum Sihon giku Og ma gi jubim mi Juamor, man i kum ng’om migi kinde m’edarugi pet. 5 Yehova bivoyogi iwu, man wubitimo i kumgi calku lembang’ola ceke m’agam amiyo iwu. 6 Cwinywu bed tek man wubed tek. Lworo kud unegwu kadi ndiri de kud umakwu i wang’gi, kum Yehova Mungu mwu re m’ubewotho kudwu. Ebikunowu ngo kadi awenja de ebiwenjowu ngo.”

7 I ng’eye Musa ulwong’o Yocuwa man ewacu ire i wang’ Israel ceke kumae: “Cwinyi bed tek man bed tek, kum in re m’ibiroyo dhanu maeni i ng’om ma Yehova ukwong’o ni kwarugi nia ebimiyo igi, man ibimiye igi ni giralaga. 8 Yehova re m’utelo yo i weng’i, man ebimedere nibedo kudi. Ebikuni ngo kadi awenja de ebiwenji ngo. Lworo kud unegi kadi ndiri de kud ung’oy i ii.”

9 I ng’eye Musa ukiewo Cik maeni man emiye i bang’ julam ma gi Julawi, ma giyeyo sanduku mi lembariba pa Yehova, man i bang’ judongo ceke mir Israel. 10 Musa ung’olo igi kumae: “Kubang’ ajiki mi oro abiro, i nindo ma juketho i oro mi gony i saa mi Foc mi otbak, 11 kinde ma Israel ceke uwok pi nicungo i wang’ Yehova Mungu peri i kabedo m’eng’iyo, wucikuru nisomo Cik maeni ni Israel ceke kara giwinje. 12 Wucok dhanu karacelo, jumaco, jumamon, awiya,* man umondo peri ma kwo i adhura* peri ma tung’ tung’, kara giwinji man giponj lembe iwi Yehova Mungu peri, gilwore man gibed ku wang’gi nitiyo ku wec ceke mi Cik maeni. 13 E wotgi m’ung’eyo ngo Cik maeni biwinjo man biponjo nilworo Yehova Mungu mwu i nindo ceke ma wubikwo i iye i ng’om ma wubekadhu loka Yordan pi nimaku.”

14 Yehova ugam uwacu ni Musa kumae: “Nen! nindo peri mi tho udhingo. Lwong’ Yocuwa man wucidh* i bang’ hema mi rombo kara akethe ni jatela.” E Musa giku Yocuwa gicidho i bang’ hema mi rombo. 15 I ng’eye, Yehova uwok i bang’ hema i mbegi mir afuru, man mbegi mir afurune ucungo i dhu hema.

16 Yehova ulund uwacu ni Musa kumae: “Nen! idhingo tho,* man dhanu maeni gibicaku timo asara mi tipo ku mungu ma juwirok ma n’i ng’om ma gibecidho i iye. Gibiweka man gibituro lembariba para m’atimo kugi. 17 I nindo maeca ng’eicwiny para biopo i kumgi man abiwekogi, abipanu wang’a igi nitundo ma jubinyotho kogi. E i ng’eye kinde ma peko ku can dupa unwang’ugi, gibiwacu kumae: ‘Eni nia peko maeni uwok i wiwa pilembe Mungu mwa mbe i kindwa ngo nia?’ 18 Ento abimedara asu nipanu wang’a i nindo maeca nikum racu ceke ma gitimo ma gilokiri ko i bang’ mungu mange.

19 “Kawoni wukiew iwu wer maeni man wuponje ni Juisrael. Wuketh ging’eye,* kara wer maeni ubed ni jamulembe para i kum dhanu mir Israel. 20 Kinde m’abiterogi i ng’om m’agam akwong’o pire ni kwarugi, ng’om ma molo cak ku miyokic, gibicamu nitundo giyeng’ man lembe bidoko igi miero,* gibilokiri i bang’ mungu mange man gibitimo igi, gibikoso ira woro man gibituro lembariba para. 21 Kinde ma peko ku can dupa binwang’ugi, wer maeni bibedo ni jamulembe igi (kum wi nyikwaygi ucikere ngo niwil ku weje), kum adaru ng’eyo gin ma gibeparu, kadok i wang’e ma fodi aroyogi ngo i ng’om m’akwong’o pire.”

22 E Musa ugam ukiewo wer maeni i nindo maeca man eponje ni Juisrael.

23 I ng’eye eketho* Yocuwa ma wod Nun ni jatela man ewacu kumae: “Cwinyi bed tek man bed tek, kum in re m’ibiroyo Juisrael i ng’om m’agam akwong’o pire igi, man abimedara nibedo kudi.”

24 E ndhu ndhu kinde ma Musa udaru kiewo wec ceke mi Cik maeni i buku, 25 Musa ung’olo ni Julawi ma yeyo sanduku mi lembariba pa Yehova, ewacu kumae: 26 “Wugam buku maeni mi Cik man wukethe i ng’et sanduku mi lembariba pa Yehova Mungu mwu, man ebibedo ni jamulembe keca i kumwu. 27 Kum ang’eyo ma ber jai mwu ku thwon mwu.* Ka fodi kinde m’abino kwo de wujai i kum Yehova, dong’ i ng’ey tho para ke wubijai rukani! 28 Wucok ira judongo ceke mi suru mwu ku bajego mwu, man wek ayer wec maeni i ithgi, man ating’ polo ku ng’om ni jumulembe i kumgi. 29 Kum ang’eyo ma ber nia i ng’ey tho para wubitimo lembe ma rac andha, man wubilokuru cen kud i yo m’ang’olo pire iwu. Man peko bipodho i wiwu andha i nindo m’ubino, kum wubitimo gin ma rac i wang’ Yehova man wubinyayu ng’eicwiny i iye ku tic mi cingwu.”

30 I ng’eye, Musa uyero wec mi wer maeni niai i acaki nitundo i ajikine i ith cokiri ceke mir Israel:

 3 Kum abitwong’o nying’ Yehova.

Wuyer pi dwong’ pa Mungu mwa!

 5 Gin re ma gitimo lembe ku gondiri.

Gin awiya pare ngo, mulima tie migi gigi.

Gitie dhanu m’utuk m’ugondiri man m’unyothiri.

15 Kinde ma Yecurun* ucwey, egweyo tiende pi nijai.

Icwey, ifung’ini, ii pong’.

Abioro lak yedi man kwir pa thwol mir utur i kumgi.

29 Ka nwang’u ndhu gi riek! Nwang’u giparu cuu pi lembe maeni.

Nwang’u giparu pir ajiki migi.

Wek giai malu man gikonywu.

Wek gidok ni kapondo mwu.

44 E Musa ubino man eyero wec ceke mi wer maeni i ith dhanu, en gikud Hoceya* ma wod Nun. 45 I ng’ey ma Musa udaru yero wec maeno zoo ni Israel ceke, 46 ewacu igi kumae: “Wugwok i adundewu wec ceke m’abecimo ko weng’wu tin eni, kara wung’ol ni wotwu nia gibed ku wang’gi man gitii ku wec ceke mi Cik maeni. 47 Kum etie wec ma iye nanu ngo iwu, ento en e kwo mwu man nikum wec maeni, iromo kwo lee i ng’om m’ibekadhu i iye loka Yordan pi nimaku.”

48 Yehova ugam uweco i bang’ Musa nindo ma rom eno, ewacu kumae: 49 “Idh malu iwi got maeni mir Abarim, Got Nebo ma n’i ng’om mi Moab m’ubeneno yor i bang’ Yeriko man inen ng’om mi Kanan m’abecimiyo ni Juisrael ni aba. 50 I ng’eye, ibitho iwi got m’ibeciidho i wiye, man jubicoki karacelo ku dhanu peri,* tap calu m’Arun m’umeru utho iwi Got Hor man jucoke karacelo ku dhanu pare, 51 pilembe wun ario zoo wugwoko ngo bedoleng’ mwu ira i kind Juisrael i bang’ pii mi Meriba i Kadec i langa mi Zin, kum wudwoka ngo leng’ i wang’ dhanu mir Israel. 52 Ibineno ng’ombe ku bor, ento ibimondo ngo i ng’om m’abemiyo ni dhanu mir Israel.”

33 Maeni tie mugisa ma Musa ma dhanu pa Mungu mandha upoko iwi Juisrael, i wang’ tho pare. 2 Ewacu kumae:

 7 Man iwi Yuda epoko mugisa ma e:

 8 Pi Lawi, ewacu kumae:

12 Pi Benjamin, ewacu kumae:

13 Pi Yozefu, ewacu kumae:

18 Pi Zebulon, eyero kumae:

19 Gibilwong’o dhanu iwi got.

Kuca gibithiero lam mi bedopwe.

20 Pi Gad, ewacu kumae:

“Mugisa ubed ni ng’atu m’ucoro kieu pa Gad.

Jutelwic mi dhanu bicokiri karacelo.

22 Pi Dan, ewacu kumae:

“Dan en e nyathin umvor.

Ebipor malu niai kud i Bacan.”

23 Pi Nafthali, ewacu kumae:

Mak yo reto man yo piny.”

24 Pir Acer, ewacu kumae:

“Mungu umiyo wot dupa ni Acer.

34 I ng’eye, Musa uidho niai kud i pambu mi langa mi Moab iwi Got Nebo, i die wi Pisga m’ubeneno bang’ Yeriko. Man Yehova unyutho ire ng’ombe ceke, niai i Gilead nitundo i Dan, 2 man Nafthali ceke ku ng’om pa Efraim man pa Manase, man ng’om pa Yuda ceke nitundo bir i nam ma yo reto,* 3 Negeb man theng ng’om mi Yordan, pambu mi poga mi Yeriko, adhura mi yend ngasi nitundo bir i Zoar.

4 E Yehova uwacu ire kumae: “Maeni utie ng’om m’agam akwong’o pire ni Abraham, Isak, man Yakobo, awacu kumae: ‘Abimiye ni nyikweyi.’* Aketho inene ku weng’i, ento ibikadhu ngo loka kuca.”

5 I ng’ey maeno, Musa ma jatic pa Yehova utho keca i ng’om mi Moab, tap calu ma Yehova ular uyero. 6 Egam ekunye i poga i ng’om mi Moab i wang’ Beth-peor, man ng’atu moko mbe m’ung’eyo ka liel pare nitundo tin eni. 7 Musa ubino ku oro dak acel ku pier ario i nindo m’etho i iye. Nwang’u wang’e ucor ungo man tego pare de uweke ngo. 8 Dhanu mir Israel uwagu Musa i pambu mi langa mi Moab pi nindo pier adek. E nindo mi wak man mi lemcan ma pi Musa ugam uthum.

9 Yocuwa ma wod Nun ugam upong’ ku tipo mi rieko, pilembe Musa ular uketho cinge i wiye; man Juisrael gicaku winje man gitimo tap calu ma Yehova ung’olo ni Musa. 10 Ento jabila mange acel de mbe m’udog uwok i Israel ma calu Musa, ma Yehova ung’eyo wang’ ku wang’. 11 Etimo giranyutha ceke kud udu ma Yehova ugam uore nia ecidh etim i ng’om mi Misiri i kum Farao ku jutic pare ceke man ng’om pare ceke. 12 Musa utimo lembuno i wang’ Israel ceke ku cing’ ma tek man ku tego ma ng’oyo ndiri.