YOCUWA

1 I ng’ey tho pa Musa ma jatic pa Yehova, Yehova wacu ni Yocuwa* ma wod Nun, ma jatic pa Musa kumae: 2 “Musa ma jatic para udaru tho. Dong’ kawoni ai malu, kadh loka Yordan, in ku dhanu maeni ceke man wumond i ng’om m’abemiyo igi, gi dhanu mir Israel. 3 Abimiyo iwu kabedo ceke ma wubiketho tiendwu i iye, tap calu m’ang’olo ni Musa. 4 Ng’om mwu bicaku niai i langa nitundo i Lebanon man nicidho bir i kulo ma dit, niwacu Efrath, ng’om ceke mi Juhithi, man nitundo i Nam ma dit* yo reto.* 5 Ng’atu moko mbe ma bibedo ku copo mi cungo i dhogi i kwo peri zoo. Abibedo kudi tap calu m’abedo ku Musa. Abikuni ngo kadi awenja de abiwenji ngo. 6 Cwinyi bed tek man bed tek, kum in re m’ibiketho dhanu maeni bilagu ng’om m’akwong’o ni kwarugi nia abimiyo igi.

7 “Kende kende cwinyi bed tek man bed tek mandha. Wor cuu mandha Cik ceke ma Musa ma jatic para ung’olo iri. Kud ilokiri kud i kume yor acwic kadi yor acam, kara itim lembe ku rieko kaka moko ci m’ibecidho i iye. 8 Buku maeni mi Cik ucikere ngo niai kud i dhogi, man icikiri nisome ku dwal ma yoo* dieceng’ ku diewor, kara iwor cuu mandha lembe ceke m’ukiewere i iye, e ka yo peri bibedo miero man ibitimo lembe ku rieko. 9 Nyo adaru ng’olo ngo iri? Cwinyi bed tek man bed tek. Ndiri kud umeki kadi lworo de kud unegi. Kum Yehova Mungu peri ni kudi kaka moko ci m’icidho i iye.”

10 I ng’eye, Yocuwa ung’olo ni bajego mi dhanu kumae: 11 “Wukadh i kind kagonjo man wung’ol ni dhanu kumae: ‘Wuketh cam ubed ayika, pilembe i ng’ey nindo adek wubikadhu loka Yordan, pi nimondo man nimaku ng’om ma Yehova Mungu mwu ubemiyo iwu kara wumaki.’”

12 Ento ni suru pa Ruben, suru pa Gad man ni nusu mi suru pa Manase, Yocuwa wacu kumae: 13 “Wupoy i kum lembe ma e, ma Musa ma jatic pa Yehova ung’olo iwu: ‘Yehova Mungu mwu ubemiyo iwu yom man edaru miyo iwu ng’om maeni. 14 Mon mwu, awiya mwu, man udul lim mwu bibedo i ng’om ma Musa umiyo iwu i thenge maeni* mi Yordan, ento jurumony mwu ceke ma tek bikadhu lokaca i wang’ umego mwu ma gikperiri pi lwiny. Wucikuru nikonyogi 15 nitundo ma Yehova bimiyo yom ni umego mwu tap calu m’emiyo iwu, man gin bende gibimaku ng’om ma Yehova Mungu mwu ubemiyo igi. I ng’eye, wubidwogo i ng’om ma jumiyo iwu nia wubed i iye man wumake, ng’om ma Musa ma jatic pa Yehova ugam umiyo iwu i thenge ma yo nyangu mi Yordan.’”

16 Gidwoko ni Yocuwa kumae: “Wabitimo lembe ceke m’ing’olo, man wabicidho kaka moko ci m’ibiorowa i iye. 17 In bende wabiwinji tap calu ma wabed wawinjo ko lembe ceke ma Musa uyero. Kende kende Yehova Mungu peri ubed kudi tap calu m’ebedo ku Musa. 18 Jubinego ng’atu moko ci m’ujai i kum lembe m’ing’olo man m’uworo ngo lembe ceke m’ing’olo ire. Kende kende cwinyi bed tek man bed tek.”

2 I ng’eye Yocuwa ma wod Nun uoro jumaco ario nyalwe niai kud i Cithim ni julib. Eyero igi kumae: “Wucidhi man wulib ng’ombe, akecane Yeriko.” E gicidho man giwok gitundo i ot pa won asara moko ma nyinge Rahab, e gibedo keca. 2 Jugam junyutho ni ubimo mi Yeriko kumae: “Nen! jumaco mir Israel umondo keni ku diewor pi nilibo ng’ombuni.” 3 E ubimo mi Yeriko uoro kwenda i bang’ Rahab, ewacu kumae: “Wodh jumaco m’ubino man m’ubedo i ot peri no, kum gibino pi nilibo ng’ombuni zoo.”

4 Ento dhakune ting’o jumaco arione man ekanugi. I ng’eye ewacu kumae: “Eyo, jumaco moko bino i bang’a, re ang’eyo ngo kaka ma giai i iye. 5 Kinde ma piny udaru gamere ma dong’ jubeciciko dhugang’, jumacone gigam giwok; ang’eyo ngo kaka ma gicidho i iye. Ento ka wulubo tokgi pio pio, wubiwok nwang’ugi.” 6 (Ento nwang’u eketho giidho malu iwi ot, man ekanugi i kind tiend lin* ma jumoyo iwi ot.) 7 Pieno jumacone giriemo tokgi yor i Yordan, ku kaka ma pige mwomere i iye, man juciko dhugola gang’ wang’ acel kinde ma giwok.

8 I wang’ ma fodi jumaco maeno ginindo ngo, eidho malu i bang’gi iwi ot. 9 Ewacu ni jumacone kumae: “Ang’eyo andha nia Yehova bimiyo iwu ng’ombuni, man nia lworo mwu udaru podho i wiwa. Dhanu ceke mi ng’ombuni cwinygi ung’abere piwu. 10 Kum wawinjo kite ma Yehova udwono ko pii mi Nam ma kwar kud i weng’wu kinde ma wuai i Misiri, man gin ma wutimo i kum jubim ario mi juamor, Sihon giku Og, ma wunyotho i ng’et Yordan ma yo lokaca.* 11 Kinde ma wawinjo pi lembene, cwinywa ng’abere man ng’atu moko acel de mbe ma tie ku tegocwiny piwu, kum Yehova Mungu mwu en e Mungu ma malu i polo man ma piny iwi ng’om. 12 Dong’ kawoni akwayuwu, wukwong’ ira ku nying’ Yehova nia calu anyutho iwu mer ma lokere ngo, wun de wubinyutho mer ma lokere ngo ni juruot pa vwa, man wucikuru nimiyo ira giranyutha ma jugeno. 13 Wucikuru nibodho kwo pa vwa man pa maa, mir umego ku nyimego para ku piny migi ceke, man wucikuru nibodhowa* ni tho.”

14 E jumacone gidwoko ire kumae: “Wabimiyo kwo mwa pi kwo mwu!* Tek ibituco ngo wi lembe mwa maeni, wabinyutho iri mer ma lokere ngo man gwokobedoleng’ kinde ma Yehova bimiyo ng’ombuni iwa.” 15 Eketho giloro ku thol kud i wang’ madhirisa, kum ot pare ubino i kum gang’kidi mir adhura, niwacu ebed ekwo iwi gang’kidi. 16 E ewacu igi kumae: “Wucidh i ng’om gudi man wupond kuca pi ceng’ adek, kara ju m’uberiemo tokwu kud ginwang’wu. E i ng’eye tek ju m’uberiemo tokwune gibiloko, wuromo cidho i yo mwu.”

17 Jumacone gidwoko ire kumae: “Kier bibedo mbe i wiwa pi kwong’ maeni m’iketho wakwong’o, 18 kende kende ndhu kinde ma wabitundo i ng’ombuni, bikwayu itwii thol ma kwar ngbo maeni i madhirisa m’iketho waloro kud i iye. Icikiri nicoko wuru, meru, umego peri, man juruot pa wuru ceke karacelo kudi i oduni. 19 Tek ng’atu moko bikadhu dhugola ot peri pi niwok woko, rimbe bibedo i wiye gire man wan wabibedo agonya. Ento tek lembe ma rac unwang’u* ng’atu moko ci m’ubedo kudi i ot, rimbe bibedo i wiwa. 20 Re tek ibituco wi lembe mwa maeni, wabibedo agonya ni kier pi kwong’ m’iketho wakwong’o.” 21 Edwoko kumae: “Dong’ ebed ku ba dhogwu.”

E ewekogi man gicidho i yo migi. I ng’eye etwiyo thol ma kwar ngbo i wang’ madhirisa. 22 Pieno giai man gicidho i ng’om gudi man gibedo kuca pi ceng’ adek, nitundo ma ju m’uriemo tokgi uloko ko. Ju m’uriemo tokgi usayugi kpe i gengi ceke, ento ginwang’ugi ngo. 23 Jumaco arione gigam giloro kud i ng’om gudi man gikadhu kulo gidwogo i bang’ Yocuwa ma wod Nun. Gigonyo ire lembe ceke m’utimere igi. 24 E giyero ni Yocuwa kumae: “Yehova udaru miyo ng’ombe zoo iwa. I andha, dhanu mi ng’ombe ceke cwinygi udaru ng’abere piwa.”

3 I ng’eye Yocuwa uai pir kugweno, man en ku Juisrael* zoo gitugo woth kud i Cithim man gitundo i Yordan. Givuto diewor keca i wang’ nikadhu yo loka.

2 I ng’ey ceng’ adek, bajego ukadhu i kind kagonjo 3 man ging’olo ni dhanu kumae: “Saa ma wuneno julam ma gi Julawi giyeyo sanduku mi lembariba pa Yehova Mungu mwu tap ci, wucikuru niai ku kaka ma wun’i iye man nilubo toke. 4 Ento wuwek kindwu ubed bor kude, bot* ma romo elufu ario (2 000); kud wucor drii i kume kara wung’ey yo ma wuromo kwanyu, kum fodi i wang’e de wuwotho ngo kud i yo maeni.”

5 Yocuwa ugam uyero ni dhanu kumae: “Wudwokuru leng’, kum urwo Yehova bitimo gin ma wang’u ijo i kindwu.”

6 I ng’eye Yocuwa uwacu ni julam kumae: “Wuting’ sanduku mi lembariba man wutel yo i wang’ dhanu.” E giting’o sanduku mi lembariba, man gikadhu i wang’ dhanu.

7 E Yehova uwacu ni Yocuwa kumae: “Tin eni abicaku dodi i wang’ Israel zoo, kara ging’ey nia abibedo kudi, tap calu m’abedo ku Musa. 8 Icikiri ning’olo ni julam m’uyeyo sanduku mi lembariba kumae: ‘Kinde ma wutundo i dhu pii mi Yordan, wucung tip i pii mi Yordanne.’”

9 Man Yocuwa uwacu ni Juisrael kumae: “Wubin kae man wuwinj lembe pa Yehova Mungu mwu.” 10 I ng’eye, Yocuwa uwacu kumae: “Nikum lembe maeni, wubing’eyo nia Mungu ma kwo n’i kindwu, man nia andha ebiriemo cen kud i weng’wu Jukanan, Juhithi, Juhivi, Juperizi, Jugirgaci, Juamor, man Juyebusi. 11 Nen! Sanduku mi lembariba pa Rwoth mi ng’om zoo ubekadhu i weng’wu pi nimondo i Yordan. 12 Dong’ kawoni wugam jumaco apar ario kud i suru mir Israel, ng’atu acel pi suruman. 13 Saa ma the tiend julam m’uyeyo Sanduku pa Yehova ma Rwoth mi ng’om zoo bimulo* pii mi Yordan tap ci, e pii mi Yordanne m’ubemol niai yo malu bijik man bicungo tip calu gang’.”

14 Pieno kinde ma dhanu utugo woth kud i hema migi tap i wang’ kadhu Yordan, julam m’uyeyo sanduku mi lembariba utelo yo i wang’gi. 15 E saa ma ju m’uyeyo Sanduku utundo i Yordan man julam m’uyeyo Sanduku giroyo tiendgi i pii ma n’i dhu wat tap ci (nwang’u Yordan bepong’ i dhu watne i nindo ceke mi kayucam), 16 e pii m’ubemol niai ku yo malu ucungo tip. Giting’iri calu gang’ ku bor mandha i Adam ma tie adhura ma ceng’ini mandha ku Zarethan, kinde ma pii m’ubemol yor i Nam mir Araba, niwacu Nam kadu* udwono. Gijik, man dhanu ukadhu loka yor i wang’ Yeriko. 17 Saa ma julam m’uyeyo sanduku mi lembariba pa Yehova fodi gicungo asu tip iwi ng’om m’uthwo i die Yordan, Israel ceke ukadhu yo loka iwi ng’om m’uthwo, nitundo ma thek zoo ukadhu loka Yordan.

4 Ndhu ndhu kinde ma thek zoo udaru kadhu loka Yordan, Yehova uwacu ni Yocuwa kumae: 2 “Gam jumaco apar ario kud i kind dhanu, ng’atu acel niai kud i suruman, 3 man ng’ol igi lembe ma e: ‘Wuting’ kidi apar ario niai kud i die Yordan kaka ma julam ucungo tip i iye, man wuyeygi wuwok wukethgi kaka ma wubivuto i iye diewor.’”

4 E Yocuwa ugam ulwong’o dhanu apar ario m’eng’iyo niai kud i kind Juisrael, ng’atu acel niai kud i suruman, 5 man Yocuwa wacu igi kumae: “Wukadh i wang’ Sanduku pa Yehova Mungu mwu i die Yordan, man ng’atuman ucikere niting’o kidi acel iwi goke calku wend suru mi Juisrael, 6 kara ebed ni giranyutha i kindwu. Yor i ng’eye, tek awiya mwu gibipenjowu kumae: ‘Pirang’o wuketho kidi maeni keni?’ 7 Wucikuru niyero igi kumae: ‘Pilembe pii mi Yordan ugam ucungo i wang’ sanduku mi lembariba pa Yehova. Kinde m’ebekadhu Yordan, pii mi Yordan ugam ucungo. Kidi maeni gibibedo ni poy mi nja ni dhanu mir Israel.’”

8 Pieno Juisrael gitimo tap calu ma Yocuwa ung’olo. Giting’o kidi apar ario niai kud i die Yordan tap calu ma Yehova ung’olo ni Yocuwa, kara ubed rom ku wend suru mi Juisrael. Gikadhu kugi loka kaka ma gibivuto i iye ku diewor man gikethogi keca.

9 Yocuwa ucomo bende kidi apar ario i die Yordan kaka ma tiend julam m’uyeyo sanduku mi lembariba ucungo i iye, man kidine ni keca nitundo tin eni.

10 Julam m’uyeyo Sanduku gicungo asu i die Yordan nitundo ma Yocuwa udaru niyero lembe ceke ma Yehova ung’olo eyer nia jutim, calku lembe ceke ma Musa ung’olo ni Yocuwa. I saa maeno, dhanu bino kadhu pio pio yo loka. 11 Ndhu ndhu saa ma dhanu ceke udaru nikadhu yo loka, e julam de gigam gikadhu yo loka ku Sanduku pa Yehova, ma dhanu ubeneno. 12 Man suru pa Ruben, suru pa Gad man nusu mi suru pa Manase de gikadhu yo loka ma gikperiri pi lwiny i wang’ Juisrael mange, tap calu ma Musa ular ung’olo igi. 13 Juaskari ma romo elufu pier ang’wen (40 000) ma giting’o jamlwiny pi lwiny, gikadhu i wang’ Yehova, e gimondo i pambu mi langa mi Yeriko.

14 I nindo maeca, Yehova udodo Yocuwa i wang’ Israel zoo man giwore* lee i nindo mi kwo pare zoo, tap calu ma gibed giworo Musa de lee.

15 I ng’eye Yehova wacu ni Yocuwa kumae: 16 “Ng’ol ni julam m’uyeyo sanduku mi Lembatuca nia giwok kud i Yordan.” 17 Pieno Yocuwa ung’olo ni julam kumae: “Wuwok kud i Yordan.” 18 Kinde ma julam m’uyeyo sanduku mi lembariba pa Yehova giwok kud i die Yordan man the tiend julam unyono ng’om m’uthwo, e pii mi Yordan ucaku mol kendo, man epong’ i dhu watne calu m’i wang’e.

19 Dhanu gigam gikadhu Yordan i nindo mir apaje mi dwi ma kwong’a, man gigonjo i Gilgal, yo nyangu mi kieu mi Yeriko.

20 Man kidi apar ario ma giting’o kud i Yordan ca ke, Yocuwa ucomogi i Gilgal. 21 I ng’eye ewacu ni Juisrael kumae: “I nindo m’ubino kinde m’awiya mwu bipenjo weggi nia, ‘kidi maeni thelembene tie ang’o?’ 22 wubikoro ni awiya mwu kumae: ‘Juisrael gikadhu Yordan kud iwi ng’om m’uthwo 23 kinde ma Yehova Mungu mwu uthwoyo pii mi Yordan i wang’gi nitundo ma gikadhe, tap calu ma Yehova Mungu mwu utimo i kum Nam ma kwar, kinde m’ethwoye i wang’wa nitundo ma wakadhe. 24 Etimo lembuno kara dhanu m’i ng’om zoo ung’ey kite ma cing’ Yehova tek ko, man kara wulwor Yehova Mungu mwu saa ceke.’”

5 Ndhu ndhu kinde ma jubim ceke mi Juamor ma gibino i thenge ma yo reto* mi Yordan, man jubim ceke mi Jukanan ma gibino ceng’ini i dhu nam giwinjo nia Yehova uthwoyo pii mi Yordan i wang’ Juisrael nitundo ma gikadhu ko yo loka, cwinygi ung’abere* man tegocwiny migi uthum* nikum Juisrael.

2 I nindo maeca, Yehova uwacu ni Yocuwa kumae: “Yik iri pala mi kidi ma tek ma lake bith, man tim yaa i kum jumaco mir Israel kendo wang’ mir arionde.” 3 Pieno Yocuwa uyiko pala mi kidi ma tek ma lake bith man etimo yaa i kum jumaco mir Israel i Gibeath-haraloth.* 4 Thelembe m’uketho Yocuwa utimo yaa i kumgi ni e: Jumaco ceke m’i kind dhanu m’uai kud i Misiri, niwacu jumaco ma kiedo lwiny,* githo i langa i woth, i ng’ey ma giai kud i Misiri. 5 Nwang’u jutimo yaa i kum dhanu ceke m’uai kud i Misiri, ento nwang’u dhanu ceke m’unyoliri i langa i saa mi woth jutimo ngo yaa i kumgi, i ng’ey ma giai kud i Misiri. 6 Juisrael ugam uwotho i langa pi oro pier ang’wen, nitundo ma thekne zoo utho, niwacu jumaco ma kiedo lwiny ma giai kud i Misiri, man ma giworo ngo dwand Yehova. Yehova ukwong’o igi nia ebiweko ngo nyanok de ginen ng’om ma Yehova ukwong’o ni kwarugi nia ebimiyo iwa, ng’om ma molo cak ku miyokic. 7 Pieno eting’o wotgi malu kakagi. Ju maeno re ma Yocuwa utimo yaa i kumgi; jutimo yaa i kumgi pilembe i saa pa woth jugam jutimo ngo yaa i kumgi.

8 Kinde ma judaru timo yaa i kum thek zoo, gibedo asu kaka ma gin’i iye i kagonjo, nitundo ma gikey ko.

9 I ng’eye, Yehova uwacu ni Yocuwa kumae: “Tin eni akabu cen lewic ma Jumisiri unyayu i wiwu.” Pieno julwong’o nying’ kabedone nia Gilgal* nitundo tin eni.

10 Juisrael gimediri nigonjo i Gilgal, man gitimo Kadhukuwijo i nindo apar ang’wen mi dwije ku dhug uthieno i pambu mi langa mi Yeriko. 11 Man urwonde i ng’ey Kadhukuwijo, gicaku camu cam m’i ng’ombe man nying cam m’acela i nindo ma rom eno. 12 E urwonde kinde ma gicamu kum cam moko m’i ng’ombe, mana ugam ujik; mana ubino mbe kendo ni Juisrael, ento gicaku camu cam m’i ng’om mi Kanan i oro maeca.

13 Kinde ma Yocuwa ubino ceng’ini ku Yeriko, egam eneno jalwo moko ucungo i wang’e ku palamularu i cinge. Yocuwa ucidho i bang’e man epenje kumae: “Nyo in’i thenge mwa kunoke i thenge mi judhogwa?” 14 E ewacu kumae: “Ungo, ento abino calu jadit ma wijo* mir udul mony pa Yehova.” Yocuwa ugam urum i ng’om, epodho arieba wang’e man eyero ire kumae: “Rwoth para umito yero ang’o ni jatic pare?” 15 Jadit ma wijo mir udul mony pa Yehova udwoko ni Yocuwa kumae: “Wodh wara peri kud i tiendi, pilembe kaka m’icungo i iye utie leng’.” E wang’ acel Yocuwa utimo kumeca.

6 Nwang’u juciko dhu Yeriko kikiki mandha nikum Juisrael; ng’atu moko mbe m’ubino wok, man ng’atu moko mbe m’ubino mondo.

2 E Yehova uwacu ni Yocuwa kumae: “Nen! adaru miyo Yeriko i cingi kud ubimone man jurumonyne ma jurukara. 3 Wu jumaco ceke ma wu juaskari wucikuru niwotho i ng’et adhurane tingili, wudhoke wang’ acel. Eno re ma gin ma wubitimo pi nindo abusiel. 4 Keth julam abiro giting’ tung urombo abiro i wang’ Sanduku. Ento i nindo mir abirone, wucikuru niwotho i ng’et adhurane tingili wang’ abiro, man julam gicikiri nikudho tung’ne. 5 Kinde ma jukudho tung urombo man wuwinjo dwand tung’ne* ci, dhanu ceke ucikiri nikok ku kok ma dit mi lwiny. E gang’ mir adhurane birwombere man dhanu ucikiri nimondo, ng’atuman atira i wang’e.”

6 Pieno Yocuwa ma wod Nun ulwong’o julam karacelo man ewacu igi kumae: “Wuting’ sanduku mi lembariba, man julam abiro ucikiri niting’o tung urombo abiro i wang’ Sanduku pa Yehova.” 7 I ng’eye ewacu ni dhanu kumae: “Wucok woth man wuwoth i ng’et adhura tingili, man udul mony ma ku jamlwiny ucikiri nitelo yo i wang’ Sanduku pa Yehova.” 8 Man tap kinde ma Yocuwa udaru niweco i bang’ dhanu, julam abiro m’uting’o tung urombo abiro i wang’ Yehova gikadhu yor i wang’e, man gikudho tung’ne. E sanduku mi lembariba pa Yehova ulubo tokgi. 9 Man udul mony ma ku jamlwiny utelo yo i wang’ julam ma gibino kudho tung urombo, man udul mony ma bedong’ tokcen ubino lubo tok Sanduku, kinde ma julam gibino mediri ameda nikudho tung urombone.

10 Yocuwa ugam ung’olo ni dhanu kumae: “Kud wukoki, kadi dwendwu de kud uwinjere. Wec moko de kud uwok kud i dhogwu nitundo i nindo m’abiyero iwu kumae: ‘Wukoki! E wubikok.” 11 Egam eketho Sanduku pa Yehova udhoko adhura, edhoke wang’ acel; i ng’eye gidok i kagonjo man givuto diewor kuca.

12 Urwonde Yocuwa uai pir kugweno, man julam giting’o Sanduku pa Yehova. 13 Julam abiro ma giting’o tung urombo abiro gibino wotho i wang’ Sanduku pa Yehova, ma gibemediri ameda nikudho tung urombone. Udul mony ma ku jamlwiny utelo yo i wang’gi, man udul mony ma bedong’ tokcen ubino lubo tok Sanduku pa Yehova, julam ke gibino mediri ameda nikudho tung urombo. 14 I nindo mir arionde de giwotho i ng’et adhura tingili wang’ acel man i ng’eye gidok i kagonjo. Gitimo kumeno pi nindo abusiel.

15 I nindo mir abirone de giai pir kugweno niai ma mombwa thumo, man giwotho i ng’et adhura tingili i ayi ma rom wang’ abiro. I nindo maeno kende re ma giwotho wang’ abiro i ng’et adhura tingili. 16 Wang’ mir abirone, julam gikudho tung urombo, man Yocuwa uwacu ni dhanu kumae: “Wukoki, kum Yehova udaru miyo iwu adhurane. 17 Wunyoth adhurane ku piny m’i iye ceke, en zoo etie pa Yehova. Kende kende Rahab ma won asara re ma wuwek ubed kwo, en ku dhanu ceke ma n’i ot pare, pilembe ekanu jukwenda ma waoro. 18 Ento wugwokuru ni gin ma juketho pi nyoth, kara kud awanya gin ma juketho pi nyoth unegwu man wuting’e, ma wuketh ko cokiri mir Israel udok ni gin ma juketho pi nyoth man wukel masendi* i wiye. 19 Ento mola ma tar ku mola ma kwar man piny mi mola ku cuma, utie gin ma leng’ ni Yehova. Jucikiri niterogi i kakanpiny pa Yehova.”

20 E dhanu kok kinde ma jukudho tung urombo. Ndhu ndhu kinde ma dhanu uwinjo dwand tung urombo man kok ma dit mi lwiny, gang’kidi ugam urwombere. I ng’ey maeno, dhanu umondo i adhura, ng’atuman atira i wang’e, man gimaku adhurane. 21 Gigam ginyotho piny zoo m’ubino i adhura ku palamularu, jumaco ku jumamon, aradu ku ju m’utii, thwoni dhieng’, rombe, man kana.

22 Yocuwa uwacu ni jumaco ario m’ugam ulibo ng’ombe kumae: “Wumond i ot pa dhaku ma won asara, man wuwodhe ku piny ceke m’etie ko, tap calu ma wukwong’o ire. 23 E awobi ma julibne gimondo man giwodho Rahab karacelo ku won, min, umego pare man ku piny pare ceke, eyo, giwodhe ku jupagi zoo man giterogi museme woko i ng’ey kagonjo mir Israel.

24 I ng’eye giwang’u adhurane ku piny ceke ma n’i iye ku mac. Ento mola ma tar, mola ma kwar man piny mi mola ku mi cuma, gimiyo i kakanpiny mi ot pa Yehova. 25 Yocuwa uweko kende kende Rahab ma won asara man juruot pa won ku piny ceke m’ebino ko, man ekwo i Israel nitundo tin eni, pilembe ekanu jukwenda ma Yocuwa uoro pi nilibo Yeriko.

26 I saa maeca, Yocuwa ukwong’o* kumae: “Ng’atu ma bicaku giero adhura mi Yeriko kendo, kwong’ ubed i wiye i wang’ Yehova. Wode ma kayu bitho kinde m’ebiketho kathere, man wode ma cogo bitho kinde m’ebiroyo dhugolane.”

27 Pieno Yehova ubedo ku Yocuwa, man nyinge uyik i wang’ ng’om zoo.

7 Ento Juisrael gigwoko ngo bedoleng’ migi i kum piny ma juketho pi nyoth, kum Akan ma wod Karmi ma wod Zabdi ma wod Zera mi suru pa Yuda, uting’o kum piny ma juketho pi nyoth. Uketho kwinyo pa Yehova uopo i kum Juisrael.

2 I ng’eye, Yocuwa uoro jumaco uai i Yeriko ucidho i Ai ma ni ceng’ini ku Beth-aven man yo nyangu mi Bethel, ewacu igi kumae: “Wuidhi, wucidh wulib ng’ombe.” E jumacone giidho man gilibo Ai. 3 Saa ma gidwogo i bang’ Yocuwa, giyero ire kumae: “Bikwayu ngo dhanu zoo uidhi. Jumaco ma romo elufu ario (2 000) kunoke elufu adek (3 000) kende ci romo voyo Ai. Kud iol dhanu ceke m’iketh gicidh ko, kum dhanu ma kucane gi nyanok mandha.”

4 E jumaco ma romo elufu adek (3 000) uidho kuca, ento giwok giringo i wang’ dhanu mi Ai. 5 Dhanu mi Ai unego jumaco pier adek wi abusiel man giriemo tokgi niai i dhugang’ mir adhura nitundo bir i Cebarim,* man gimediri ninegogi i lung’. E tegocwiny* mi dhanune uloy man uoy calu pii.

6 E Yocuwa uyeco kendi pare man epodho arieba wang’e i ng’om i wang’ Sanduku pa Yehova nitundo uthieno, en ku judongo mir Israel man giwotho dhenyo utur i wigi. 7 Yocuwa uyero kumae: “Aka! E Rwoth Ubimo ma Malu ngbir Yehova, pirang’o iketho dhanu maeni ukadhu tho kulo Yordan e zoo kende kende pi nimiyowa i cing’ Juamor kara unyothwa? Timba nwang’ wayii wabed mwa yo loka* Yordan ca ci! 8 Tim ira kisa, E Yehova, acopo yero ang’o kawoni ma dong’ Israel udaru ringo* i wang’ judegi pare? 9 Kinde ma Jukanan man dhanu ceke ma bedo i ng’ombe gibiwinjo pi lembene, gibitiekowa man gibiweyo nyingwa kud i ng’om, man ibitimo ang’o pi nyingi ma dwong’i?”

10 Yehova udwoko ni Yocuwa kumae: “Ai malu! Pirang’o ivuto arieba weng’i? 11 Israel udaru dubo. Gituro lembariba m’ang’olo igi nia giwor. Giting’o kum piny ma juketho pi nyoth, gikwale, man gikane i kind piny migi. 12 Pieno, Juisrael gibituc ungo nicungo i dhu judegi migi. Gibiloko ng’eygi man gibiringo i wang’ judegi migi, pilembe gidoko ni piny ma juketho pi nyoth. Abibedo ngo kudwu kendo ka fodi wunyotho ngo piny ma juketho pi nyoth kud i kindwu. 13 Ai malu man dwok dhanu leng’! Yer igi kumae: ‘Wudwokuru leng’ pir urwo, kum Yehova Mungu mir Israel uwacu kumae: “Piny ma juketho pi nyoth n’i kindwu, E Israel. Wubituc ungo nicungo i dhu judegi mwu, cil ma wubikabu cen piny ma juketho pi nyoth kud i kindwu. 14 Wucikuru nibino kugweno, suru kubang’ suru, man suru ma Yehova bing’iyo bicoro ceng’ini; wat kubang’ wat, man wat ma Yehova bing’iyo bicoro ceng’ini; juruot kubang’ juruot, man juruot ma Yehova bing’iyo bicoro ceng’ini man ng’atuman acel acel. 15 Man ng’atu ma jubinwang’u ku piny ma juketho pi nyoth, jubiwang’e ku mac, en karacelo ku piny pare ceke, pilembe eturo lembariba pa Yehova man pilembe etimo lembacidi i Israel.”’”

16 Pieno urwonde Yocuwa uai pir kugweno man eketho Israel ucoro ceng’ini, suru kubang’ suru, man jung’iyo suru pa Yuda. 17 E eketho wat pa Yuda ucoro ceng’ini man jung’iyo wat mi ju pa Zera, i ng’eye eketho wat mi ju pa Zera ucoro ceng’ini, ng’atuman acel acel man jung’iyo Zabdi. 18 Tokcenne eketho juruot pa Zabdi ucoro ceng’ini, ng’atuman acel acel man jung’iyo Akan ma wod Karmi ma wod Zabdi ma wod Zera mi suru pa Yuda. 19 E Yocuwa uwacu ni Akan kumae: “Akweyi woda, yung Yehova Mungu mir Israel man tuc lembe peri ire. Akweyi, kor ira gin m’itimo. Kud imung’e ira.”

20 Akan udwoko ni Yocuwa kumae: “Andha an re m’adubo ni Yehova Mungu mir Israel, man gin m’atimo ni e: 21 Saa m’aneno kendi ma segi m’uai i Cinear man cekel* dak ario mi mola ma tar, lungu mola ma kwar ma pekne cekel pier abic i kind jambayeki, thamane umondo i iya man ating’ogi. Akunyogi i hema para man sente ni yor i there.”

22 E wang’ acel Yocuwa uoro dhanu uringo i hema. Nwang’u bongune jukane i hema pare man sente ni yor i there. 23 E gicoko pinje kud i hema man gikelogi i bang’ Yocuwa ku Juisrael ceke man gikethogi i wang’ Yehova. 24 I ng’eye, Yocuwa man Israel ceke gigamu Akan ma wod Zera ku mola ma tar, kendi ma segi, man lungu mola ma kwar karacelo ku wote, nyige, thwon dhiang’ pare, kana pare, udul lim pare, hema pare ku piny pare ceke, man giterogi i Poga* mir Akor. 25 Yocuwa uwacu kumae: “Pirang’o ikelo nyoth i wiwa? Yehova bikelo nyoth* i wii tin eni.” E Juisrael ceke gicanye ku kidi, i ng’eye giwang’ugi ku mac. I ayi maeno re ma gicanyu gin zoo ku kidi. 26 Man girodo kidi ma dit i wiye m’utie nitundo tin eni. E kwinyo ma lake tek pa Yehova ugam ukwiyo. Eno re m’uketho nying’ kabedone utie Poga mir Akor* cil tin eni.

8 E Yehova uyero ni Yocuwa kumae: “Lworo kud unegi kadi ndiri de kud ung’oy i ii. Gam jumaco ceke ma kiedo lwiny man idh karacelo kugi i kum Ai. Nen, adaru miyo i cingi ubimo mi Ai, dhanu pare, adhura pare, man ng’om pare. 2 Tim i kum Ai man i kum ubimone tap gin m’itimo i kum Yeriko man ubimone; jambayeki kud udul lim m’i iye kende re ma wuromo yaku iwu. Kan libo* yor i ng’ey adhurane.”

3 E Yocuwa karacelo ku jumaco ma kiedo lwiny ceke giidho i kum Ai. Yocuwa ung’iyo jurumony ma jurukara elufu pier adek (30 000) man eorogi ku diewor. 4 Egam eng’olo igi kumae: “Nen, wucikuru nikanu libo i ng’ey adhura. Kud wucidh bor akeca kud adhurane, man wun ceke wubed ayika. 5 An ku dhanu ceke ma ni karacelo kuda wabicoro i kum adhura, man kinde ma giwok i kumwa calu m’i wang’e, wabiringogi. 6 Saa ma giwok niriemo tokwa, wabitelogi gibiweko adhura bor, kum gibiwacu kumae: ‘Giberingowa tap calu m’i wang’e.’ Man wabiringogi. 7 E wucikuru niai ku kaka ma wukanu iye libo man wumak adhurane; Yehova Mungu bimiye i cingwu. 8 Saa ma wumaku adhurane ci, wugud mac i kume. Wucikuru nitimo calku lembe pa Yehova. Nen, eno tie lembe m’ang’olo iwu.”

9 E Yocuwa uorogi, man giwotho nitundo kaka ma gikanu iye libo; giwok gipondo i kind Bethel ku Ai, yo reto mi Ai, ento Yocuwa ubedo karacelo ku dhanu diewor maeca.

10 I ng’eye, Yocuwa uai malu pir kugweno man ecoko dhug udul, en ku judongo mir Israel gitelo wigi nitundo i Ai. 11 Juaskari ceke m’ubino karacelo kude giwotho man gibino i wang’ adhura. Giwok gigonjo yo malu mi Ai, man poga upoko kindgi ku Ai. 12 I saa ma rom eno, nwang’u Yocuwa ugamu jumaco ma romo elufu abic (5 000) man eketho gikanu libo i kind Bethel ku Ai yo reto mir adhura. 13 E dhanu uketho kagonjo ma dit yo malu mir adhura, udul mony ma bedong’ tokcen ke ubino yo reto mir adhurane, man Yocuwa ucidho ku diewor maeca i die poga.*

14 Man saa m’ubimo mi Ai uneno lembuno ci, en ku dhanu mir adhura giwok pio pio pir kugweno pi nicirombo ku Israel i lwiny i kabedo moko m’ubeneno wi pambu mi langa. Ento nwang’u eng’eyo ngo nia jukanu ire libo yor i ng’ey adhura. 15 Kinde ma dhanu mi Ai giloy i wigi, Yocuwa ku dhanu mir Israel zoo giringo ku i gengi yor i langa. 16 E juwaku dhanu mir adhura zoo pi niriemo tokgi; man kinde ma giberiemo tok Yocuwa, jutelogi giweko adhura bor. 17 Nico moko mbe m’udong’ i Ai man i Bethel m’uwok ungo i tok Israel. Giweko adhura udong’ thwolo man giriemo tok Israel.

18 E Yehova ugam uyero ni Yocuwa kumae: “Riey tong’ ma n’i cingi icim ko yor i bang’ Ai, kum abimiye i cingi.” E Yocuwa urieyo tong’ ma n’i cinge yor i bang’ adhurane. 19 Saa m’erieyo cinge tap ci, ju ma nwang’u ukanu libo giai malu pio pio ku kaka ma gipondo i iye, giringo i adhura man gimake. E gigudo mac ndhu ndhu i kum adhurane.

20 Kinde ma dhanu mi Ai gilokiri, gineno yiro mir adhura ucikere i kor polo, man kero mi ringo kaka moko ci uthum i kumgi. E dhanu ma nwang’u uberingo yor i langa ulokiri i kum ju m’uberiemogi. 21 Kinde ma Yocuwa ku Israel ceke gineno nia ju m’ukanu libo gidaru maku adhura man gineno yiro mir adhurane ucikere malu, giloko man gicaku goyo dhanu mi Ai. 22 Dhanu mange uwok kud i adhura pi nirombo kugi, e dhanu mi Ai gimoko i uwic i diere, kum Juisrael moko ubino i thenge acel man jumange i thenge ma kucelo. Ginegogi nitundo ma ng’atu acel de mbe m’uboth kadi m’uvuth. 23 Ento gimaku ubimo mi Ai ma kwo man gitere i wang’ Yocuwa.

24 I ng’ey ma Israel udaru nego dhanu ceke ma bedo i Ai i lum, niwacu i langa kaka ma giriemo tokgi i iye, man kinde ma ginego ng’atu ma tokcen m’i kindgi ku palamularu, e Israel ceke uloko i Ai man gigoye ku palamularu. 25 Wend dhanu ceke ma junego cing’ nica i kind jumaco ku jumamon ubino elufu apar ario (12 000), niwacu dhanu ceke mi Ai. 26 Yocuwa uloro ngo cinge m’erieyo ku tong’ nitundo m’enego dhanu ceke mi Ai. 27 Ento Israel ucoko igi udul lim man jambayeki mir adhurane calku lembe ma Yehova ung’olo ni Yocuwa.

28 I ng’eye, Yocuwa uwang’u Ai man edwoke ni udhuru mir uvuru ma nja, e edong’ kumeca nitundo tin. 29 Eliero ubimo mi Ai iwi yen nitundo i dhug uthieno, man kinde ma ceng’ ubecimwony, Yocuwa ung’olo nia julor avuje cen kud iwi yen. I ng’eye, gibayu avuje i kamondo mi dhugang’ mir adhura man gidhuro dhu kidi ma dit i wiye man kidine ni keca nitundo tin eni.

30 E ka Yocuwa ufougiero pemlam iwi Got Ebal ni Yehova Mungu mir Israel, 31 tap calu ma Musa ma jatic pa Yehova ugam ung’olo ni Juisrael man calu ma jukiewo i buku mi Cik pa Musa kumae: “Pemlam mi kidi ma zoo ma jupayu ngo kume ku cuma.” Githiero lam m’awang’a i wiye ni Yehova man bende lam mi kwiyocwiny.

32 I ng’eye, ekiewo iwi kidi keca Cik ma rom ma Musa ular ukiewo i wang’ Juisrael. 33 Israel ceke, judongo migi, bajego, man jupoklembe migi gicungo i ng’et Sanduku kun ku kun i wang’ julam ma gi Julawi ma beyeyo sanduku mi lembariba pa Yehova. Umondo kud anyoli bende ubino nuti keca. Nusu migi ucungo i wang’ Got Gerizim, man nusu mange ke i wang’ Got Ebal (tap calu ma Musa ma jatic pa Yehova ular ung’olo) pi nimiyo mugisa ni dhanu mir Israel. 34 I ng’eye, esomo lembe ceke mi Cik ku dwande ma tek, mugisa kud alam nimakere ku lembe ceke ma jukiewo i buku mi Cik. 35 I kind lembe ceke ma Musa ung’olo, acel de mbe m’udong’ ma Yocuwa usomo ngo ku dwande ma tek i wang’ cokiri ceke mir Israel, uketho i iye jumamon, awiya, man umondo ma kwo* i kindgi.

9 Saa ma jubim ceke m’ubino yo reto mi Yordan giwinjo lembe m’utimere, ju m’i ng’om gudi, m’i Cefela, m’i dhu wat mi Nam ma dit* ceke, man m’i wang’ Lebanon, niwacu Juhithi, Juamor, Jukanan, Juperizi, Juhivi, man Juyebusi, 2 gigam gitimo lembariba pi nikiedo i dhu Yocuwa man Israel.

3 Dhanu mi Gibeon bende giwinjo lembe ma Yocuwa utimo i kum Yeriko man Ai. 4 Pieno gitimo ku rieko: Gitwiyo asamba usau ma giketho cam i iye iwi kana migi, man bende asamba usau pigulok m’uyec ka jusudo; 5 gironyo bende asamba wara ma jusudo asuda i tiendgi, man gikendo asamba bongu. Mukathi migi zoo ma giyeyo ubino m’uthwo man m’ubeoy ng’ili ng’ili. 6 E gicidho i bang’ Yocuwa i kagonjo i Gilgal, man giwok giyero ire man ni dhanu mir Israel kumae: “Waai i ng’om ma bor. Dong’ wakwayuwu, wutim lembariba kudwa.” 7 Ento dhanu mir Israel uwacu ni Juhivi eno kumae: “Moko nyo wukwo de ceng’ini kudwa kae. Dong’ wacopo timo lembariba kudwu nenedi?” 8 Gidwoko ni Yocuwa kumae: “Wa jutic* peri.”

E Yocuwa upenjogi kumae: “Wu jukani, man wuai kani?” 9 E gidwoko ire kumae: “Jutic peri giai i ng’om ma bor mandha pi woro ma giworo ko nying’ Yehova Mungu peri, pilembe wawinjo pi rwonge ku lembe ceke m’etimo i Misiri 10 man lembe ceke m’etimo i kum jubim ario mi Juamor m’ubino i thenge ma yo loka* mi Yordan: Ubimo Sihon mi Hecbon gikud Ubimo Og mi Bacan, ma gibino i Actaroth. 11 E judongo mwa ku dhanu m’i ng’om mwa ceke giyero iwa kumae: ‘Wuting’ cam pi woth man wucidh wuromb kugi. Wuwok wuyer igi kumae: “Wabibedo jutic mwu, dong’ wutim lembariba kudwa.”’ 12 Mukathi ma wating’o nia wabiwotho camu e ubino ma lieth kinde ma wabeai kud i udi mwa pi nibino keni i beng’wu. Kawoni wukenen kite m’ethwo ko man m’ebeoy ko ng’ili ng’ili. 13 Man usau pigulok maeni ubino ma nyen saa ma wapong’ogi, ento kawoni gidaru yec. Man bongu mwa ku wara mwa de udaru doko asamba nikum woth ma bor ma wawotho.”

14 Pieno dhanu mir Israel gigamu* kum cam migi moko, ento gipenjo ngo Yehova. 15 E Yocuwa utimo kugi kwiyocwiny man etimo kugi lembariba pi niweko gibed kwo, man eno re ma gin ma judongo ma wijo mi cokiri ging’olo igi ku kwong’.

16 Nindo adek i ng’eye, i ng’ey ma gitimo kugi lembariba, ka giwinjo nia karaman gikwo ceng’ini kugi, ndhu i ng’etgi keca. 17 E Juisrael gitugo woth man gitundo i adhura migi i nindo mir adege; adhura migine ubino Gibeon, Kefira, Beroth, man Kiriath-jearim. 18 Ento Juisrael giloy ungo ku lwiny i wigi, pilembe judongo ma wijo mi cokiri gidaru kwong’o igi kwong’ ku nying’ Yehova Mungu mir Israel. E cokiri ceke ucaku ng’ur i kum judongo ma wijo. 19 Pieno judongo ma wijo giyero ni cokiri zoo kumae: “Calu ma wadaru kwong’o igi kwong’ ku nying’ Yehova Mungu mir Israel, eyiyere ngo iwa nitimogi rac. 20 Wabitimo lembe ma e: Wabiweko gibed kwo, kara kud ng’eicwiny pa Mungu uop i kumwa nikum kwong’ ma wakwong’o igi.” 21 Man judongo ma wijo gimedo kumae: “Wuwek gibed kwo, ento wuketh gidok jumwod yen man jutwom pii pi cokiri ceke.” Eno tie gin ma judongo ma wijo ging’olo igi.

22 Yocuwa ugam ulwong’ogi man ewacu igi kumae: “Pirang’o wuwondowa nia, ‘waai i kabedo ma bor mandha kudwu,’ ma ke karaman wubedo de ndhu i kindwa eni? 23 Niai kawoni dong’ kwong’ ni wiwu, man saa zoo wubibedo ng’eca; wubibemwodo yen man wubibetwomo pii pi ot pa Mungu para.” 24 Gidwoko ni Yocuwa kumae: “Utie pilembe jukoro cuu mandha ni jutic peri nia Yehova Mungu peri ung’olo ni Musa ma jatic pare nia emii iwu ng’ombe ceke, man enyoth dhanu m’i iye pet kud i weng’wu. E lworo umakuwa pi kwo* mwa ni kumwu, eno re m’uketho watimo lembuni. 25 Kawoni dong’ wan’i cingi eni. Tim iwa gin moko ci m’iparu nia utie ber man atira.” 26 Man eno re ma gin m’etimo igi; ebodhogi kud i cing’ Juisrael, e ginegogi ngo. 27 Ento niai cing’ nica, Yocuwa uketho gidoko jumwod yen man jutwom pii pi cokiri man pi pemlam pa Yehova i kabedo ma Mungu ung’iyo man nitundo tin de gitimo kumeno.

10 Kinde m’Ubimo Adoni-zedek mi Yeruzalem uwinjo nia Yocuwa umaku Ai man enyothe, etimo i kum Ai man ubimone tap gin m’etimo i kum Yeriko man ubimone, man kite ma dhanu mi Gibeon gitimo ko kwiyocwiny ku Israel man gibedo i kindgi, 2 ndiri ugam umake, pilembe Gibeon ubino adhura ma dit calu adhura mi jubim. Ebino ma dit nisagu Ai, man jumaco m’i iye ceke ubino jurumony. 3 E Adoni-zedek m’ubimo mi Yeruzalem uoro kwenda i bang’ Hoham m’ubimo mir Hebron, Piram m’ubimo mi Yarmuth, Yafia m’ubimo mi Lakic, man Debir m’ubimo mir Eglon, ewacu kumae: 4 “Wubin wukonya kara wagoy Gibeon, pilembe edaru timo kwiyocwiny ku Yocuwa man Juisrael.” 5 E jubim abic mi Juamor, niwacu ubimo mi Yeruzalem, ubimo mir Hebron, ubimo mi Yarmuth, ubimo mi Lakic, man ubimo mir Eglon gicoko dhoggi karacelo kud udul mony migi man gicidh gigonjo i kum Gibeon pi nikiedo i dhoge.

6 Dhanu mi Gibeon gigam gicwalu kwenda i bang’ Yocuwa i kagonjo i Gilgal giwacu kumae: “Kud iwek* ng’eca peri. Bin pio! Larwa man ikonywa! Pilembe jubim ceke mi Juamor mi ng’om gudi gidaru cokiri i kumwa. 7 Pieno, Yocuwa uidho kud i Gilgal karacelo ku jurumony ceke man juaskari ceke ma jurukara.

8 Yehova ugam uyero ni Yocuwa kumae: “Kud ilworgi, kum adaru miyogi i cingi. Ng’atu moko acel de mbe m’i kindgi ma bituc nicungo i dhogi.” 9 E Yocuwa ucoro rek i wigi i ng’ey m’ewotho diewor traka niai i Gilgal. 10 Yehova ugam ujebo wigi i wang’ Israel man Juisrael unegogi ku nek ma dit i Gibeon. Giriemo tokgi i yo m’uidho i Beth-horon man ginegogi nitundo bir i Azeka man i Makeda. 11 Saa ma giberingo kud i wang’ Israel man gin’i lung’ mi Beth-horon, Yehova ucoro lungu pei ma dongo dongo niai kud i polo i wigi nitundo bir i Azeka, man githo. I andha, wend ju ma pei unego ukadhu wend ju ma Juisrael ginego ku palamularu.

12 Ubino cing’ ma Yehova ukabu Juamor kud i wang’ Juisrael eca re ma Yocuwa uyero ni Yehova i wang’ Israel kumae:

13 E ceng’ ucungo dii man dwi de ucoro ngo nitundo ma thek mir Israel uculo ko kwor i kum judegi pare. Nyo jukiewo ngo pi lembuno i buku pa Yacari? Ceng’ ucungo dii i die kor polo man emwony pio ngo kago nindo acel zoo. 14 Nindo ma kumeca ubino mbe nyanok de, dok ebed i wang’e kadi i ng’eye kinde ma Yehova uwinjo iye dwand dhanu, kum Yehova ubino kiedo pir Israel.

15 I ng’ey maeno, Yocuwa karacelo ku Israel ceke gidok i kagonjo i Gilgal.

16 I saa ma rom eno, nwang’u jubim abic giringo man gipondo i odicana i Makeda. 17 E judwoko ni Yocuwa kumae: “Junwang’u jubim abic upondo i odicana i Makeda.” 18 Pieno Yocuwa uwacu kumae: “Wung’iel kidi ma dongo i dhu odicanane man wuketh jumoko m’i kindwu ukurgi. 19 Ento wu jumange kud wucungi. Wuriem tok judegi mwu man wugoygi yor i ng’eygi. Kud wuwek gimond i adhura migi, kum Yehova Mungu mwu udaru miyogi i cingwu.”

20 I ng’ey ma Yocuwa ku Juisrael gidaru ninegogi ku nek ma dit mandha, nitundo ma nwang’u gibeciweyogi pet ento jumoko uboth, pilembe giringo man gimondo i adhura ma jutieko ku gang’kidi, 21 e dhanu ceke udok museme i bang’ Yocuwa i kagonjo i Makeda. Ng’atu moko mbe m’ung’ap niyero wec moko* i kum Juisrael. 22 I ng’eye, Yocuwa uwacu kumae: “Wuyab dhu odicana man wukel jubim abic ma n’i odicanane i bang’a.” 23 Pieno gikelo jubim abicne i bang’e niai kud i odicana: ubimo mi Yeruzalem, ubimo mir Hebron, ubimo mi Yarmuth, ubimo mi Lakic, man ubimo mir Eglon. 24 Kinde ma gikelo jubim maeno i bang’ Yocuwa, elwong’o jumaco mir Israel ceke man eyero ni judong askari m’ucidho kude i lwiny kumae: “Wubin kae. Wunyon the tok jubim e.” Pieno gibino man ginyono the tokgi. 25 I ng’eye, Yocuwa uyero igi kumae: “Lworo kud unegwu kadi ndiri de kud ung’oy i iwu. Cwinywu ubed tek man wubed tek, kum eno re m’utie gin ma Yehova bitimo i kum judegi mwu ceke ma wubekiedo i dhoggi.”

26 E Yocuwa ugoyogi man enegogi, elierogi iwi yen abic, man gibedo aliera iwi yende nitundo dhug uthieno. 27 Saa ma ceng’ umwony, Yocuwa ung’olo nia julorgi kud iwi yen man jubolgi i odicana ma gikegipondo i iye. I ng’eye jung’ielo kidi ma dongo dongo i dhu odicanane, man kidine gitie keca nitundo tin eni.

28 Yocuwa umaku Makeda i nindo maeca man egoye ku palamularu. Enego ubimone man dhanu* ceke m’i iye, eweko ngo ng’atu moko udong’ kwo. Tap gin m’etimo i kum ubimo mi Yeriko re m’etimo i kum ubimo mi Makeda.

29 I ng’eye, Yocuwa karacelo ku Israel ceke giai kud i Makeda gicidho i Libna man gikiedo i dhu Libna. 30 Yehova umiye bende kud ubimone i cing Israel, man gigoye ku dhanu* ceke m’i iye ku palamularu, giweko ngo ng’atu moko udong’ kwo i iye. Tap gin m’etimo i kum ubimo mi Yeriko re m’etimo i kum ubimone.

31 I ng’eye, Yocuwa karacelo ku Israel ceke giai kud i Libna gicidho i Lakic man giwok gigonjo keca, e gikiedo i dhoge. 32 Yehova umiyo Lakic i cing Israel, man gimake i nindo mir arionde. Gigoye ku dhanu* ceke m’i iye ku palamularu tap calu ma gitimo i kum Libna.

33 I ng’eye, Horam m’ubimo mi Gezer uidho malu pi nikonyo Lakic, ento Yocuwa ugoye ku dhanu pare ceke nitundo ma ng’atu acel de mbe m’udong’ kwo.

34 E Yocuwa karacelo ku Israel ceke giai kud i Lakic gicidho nitundo i Eglon man giwok gigonjo keca, e gikiedo i dhoge. 35 Gimake cing’ nica man gigoye ku palamularu. Ginyotho dhanu* ceke m’i iye cing’ nica, tap calu ma gitimo i kum Lakic.

36 I ng’eye, Yocuwa karacelo ku Israel ceke giidho niai kud i Eglon nitundo i Hebron man gikiedo i dhoge. 37 Gimake man gigoye, ubimone, adhurane, man dhanu* ceke m’i iye ku palamularu; giweko ngo ng’atu acel de udong’ kwo. Enyothe ku dhanu m’i iye ceke, tap calu m’etimo i kum Eglon,.

38 Tokcenne, Yocuwa karacelo ku Israel ceke gilokiri yor i Debir man gikiedo i dhoge. 39 Emake kud ubimone man adhurane ceke, man gigoyogi ku palamularu, ginyotho dhanu* ceke ma n’i iye, giweko ngo ng’atu acel de udong’ kwo. Tap gin m’etimo i kum Hebron man Libna kud ubimone re m’etimo i kum Debir kud ubimone.

40 Yocuwa uvoyo ng’om ceke mi ng’om gudi, Negeb, Cefela, man lung’, ku jubim migi ceke. Eweko ngo ng’atu acel de udong’ kwo; enyotho piny moko ci ma yuyo n’i iye, tap calu ma Yehova Mungu mir Israel ugam ung’olo. 41 Yocuwa uvoyogi niai i Kadec-barnea nitundo i Gaza, man ng’om ceke mi Gocen niidho bir i Gibeon. 42 Yocuwa umaku jubim maeno zoo ku ng’om migi ceke i saa ma rom, pilembe Yehova Mungu mir Israel re m’ubino kiedo pir Israel. 43 I ng’eye, Yocuwa udok karacelo ku Israel ceke i kagonjo i Gilgal.

11 Kinde ma Yabin m’ubimo mir Hazor uwinjo pi lembene ci, e eoro kwenda i bang’ Yobab m’ubimo mi Madon, ni ubimo Cimron, man ni ubimo Akcaf, 2 ni jubim m’ubino i ng’om gudi ma yo malu, ni ju mi pambu* mi Kinereth yo piny, ni ju mi Cefela, man ni ju mi lung’ mi Dor yo reto, 3 ni Jukanan ma n’i yo nyangu ku yo reto, ni Juamor, ni Juhithi, ni Juperizi, ni Juyebusi i ng’om gudi, man ni Juhivi ma n’i the Hermon i ng’om mi Mizpa. 4 E giwok kud udul mony migi ceke, udul ma wendgi kwanere ngo calu nying kwiyo mi dhu nam, karacelo ku riuni* man magali mi lwiny lee dit. 5 Jubim maeno ceke giwinjiri pi nirombo man gibin gigonjo karacelo i dhu pii mi Merom pi nikiedo i dhu Israel.

6 E Yehova uyero ni Yocuwa kumae: “Lworo kud unegi pigi, kum urwo i saa ma rom eni, abimiyogi ceke ni Israel man wubinegogi. Wucikuru nitong’o ler mi cong’ riuni migi, man wucikuru niwang’u magali migi i mac.” 7 E Yocuwa karacelo ku jurumony ceke giloy i wigi rek i dhu kulo mi Merom. 8 Yehova umiyogi i cing Israel, man givoyogi, giriemo tokgi nitundo bir i Sidon ma dit, nitundo i Misrefoth-maim man nitundo i Poga mi Mizpa yo nyangu, man gigoyogi nitundo ma ng’atu acel de mbe m’udong’ kwo. 9 E Yocuwa utimo tap calu ma Yehova ung’olo ire; etong’o ler mi cong riuni migi man ewang’u magali migi i mac.

10 M’umedo maeno, Yocuwa udog uloko man emaku Hazor; enego ubimone ku palamularu, pilembe con Hazor ular ubino adhura ma dit mi ker maenogi ceke. 11 Ginego dhanu* ceke m’i iye ku palamularu man ginyothogi pet. Piny moko ci ma yuyo n’i iye m’udong’ umbe. I ng’eye, ewang’u Hazor ku mac. 12 Yocuwa umaku adhura mi jubim maeno ceke man evoyo jubim migi ceke ku palamularu. Enyothogi, tap calu ma Musa ma jatic pa Yehova ung’olo. 13 Ento m’uweko Hazor, Israel uwang’u ngo adhura moko ci m’i kind adhura ma nwang’ere iwi ungulu gudi.* Hazor kende re ma Yocuwa uwang’u. 14 Juisrael giyaku igi jambayeki ceke mir adhura maeno kud udul lim. Ento ginego dhanu ceke ku palamularu nitundo ma gidaru ng’atuman acel acel m’i kindgi. Giweko ngo ng’atu moko ci ma yuyo n’i iye. 15 Lembe ma Yehova ung’olo ni Musa ma jatic pare re ma Musa ung’olo ni Yocuwa, man Yocuwa utimo de kumeca. Eweko ngo gin moko udong’ m’etimo ngo i kind lembe ceke ma Yehova ung’olo ni Musa.

16 Yocuwa uvoyo ng’om maeni ceke, ng’om gudi, Negeb ceke, ng’om ceke mi Gocen, Cefela, Araba, man ng’om gudi mir Israel ku Cefelane* de, 17 niai kum Got Halak m’uidho i Seir man bir i Baal-gad i Poga mi Lebanon i the Got Hermon. Emaku jubim migi ceke, evoyogi, man enegogi. 18 Yocuwa ukiedo lwiny i dhu jubim maeno ceke pi kare ma lee. 19 M’uweko Juhivi ma bedo i Gibeon, adhura moko mbe m’utimo kwiyocwiny ku Juisrael. Givoyo jumange ceke ku lwiny. 20 Yehova re m’uweko adundegi udoko nwang’ kara gikied lwiny i dhu Israel, wek kara enyothgi m’umbe kisa nyanok de. Ugam ukwayu judargi, tap calu ma Yehova ung’olo ni Musa.

21 I rundi maeca, Yocuwa uweyo cen Juanakim kud i ng’om gudi, kud i Hebron, kud i Debir, kud i Anab, man kud i ng’om gudi ceke mi Yuda ku ng’om gudi ceke mir Israel. Yocuwa unyothogi kud adhura migi pet. 22 Jaanakim moko mbe m’udong’ i ng’om mi Juisrael; gidong’ i Gaza, i Gath, man i Acdod kende. 23 Pieno, Yocuwa umaku ng’ombe zoo, tap calu ma Yehova ugam ung’olo ni Musa, man Yocuwa umiye ni giralaga ni Israel ni makapiny migi kara jupoke i suru migi. E ng’ombe ugam uyom ni lwiny.

12 Maeni jubim m’i ng’om ma Juisrael givoyo man ma gimaku ng’om migi yo nyangu mi Yordan, niai i Poga* mir Arnon niidho i kum Got Hermon man Araba ceke ku yo nyangu: 2 Ubimo Sihon mi Juamor m’ubed ukwo i Hecbon; ebed ebimo wi Aroer ma n’i dhu Poga* mir Arnon, man niai i diere mi pogane ku nusu Gilead nitundo bir i Poga mi Yabok ma tie kieu mi Juamon. 3 Ebimo bende wi Araba nitundo bir i nam mi Kinereth* yo nyangu, nicidho bir i Nam mir Araba, niwacu Nam kadu* ku yo nyangu yor i bang’ Beth-yecimoth, man yo piny i the lung’ mi Pisga.

4 Juisrael gimaku bende ng’om p’Ubimo Og mi Bacan m’ubino i kind ju ma tokcen mi Jurefaim man m’ubed ukwo i Actaroth man i Edrei. 5 Ebed ebimo iwi ng’om m’ucoko Got Hermon, Saleka man Bacan ceke nitundo bir i kieu mi Jugecur man mi Jumaakath, man wi nusu Gilead nitundo i ng’om p’Ubimo Sihon mi Hecbon.

6 Musa ma jatic pa Yehova ku Juisrael givoyogi. I ng’ey maeno Musa ma jatic pa Yehova umiyo ng’om migi ni aba ni suru pa Ruben, ni suru pa Gad, man ni nusu mi suru pa Manase.

7 Maeni utie jubim mi ng’om ma Yocuwa ku Juisrael givoyo yo reto mi Yordan, niai i Baal-gad i Poga mi Lebanon nicidho bir i Got Halak m’uidho i Seir. I ng’ey maeno Yocuwa umiyo ng’om migi ni suru mir Israel ni aba ni makapiny migi. 8 Ng’ombe ubino ng’om gudi, Cefela, Araba, lung’, langa, man Negeb, niwacu ng’om mi Juhithi, Juamor, Jukanan, Juperizi, Juhivi, man Juyebusi.

13 Nwang’u dong’ Yocuwa udaru tii man oro pare de ucidho. E Yehova uwacu ire kumae: “Idaru tii man oro peri de ucidho, ento fodi ng’om udong’ lee m’ukwayu jumaki. 2 Ng’om m’udong’ne ni e: ng’om ceke mi Jufilisti man mi Jugecur zoo 3 (niai i jang Nil* ma n’i yo nyangu mi Misiri niidho bir i kieu mir Ekron yo malu, ma jubed jukwanu ni theng ng’om mi Jukanan) uketho i iye ng’om mi rwodhi abic mi Jufilisti, niwacu Gaza, Acdod, Ackelon, Gath, man Ekron; ng’om mi Juavim 4 yo piny; ng’om ceke mi Jukanan; Meara ma tie ng’om mi Jusidon nitundo bir i Afek i dhu kieu mi Juamor; 5 ng’om mi Jugebal man Lebanon ceke yo nyangu, niai i Baal-gad i the Got Hermon nitundo i Lebo-hamath;* 6 dhanu ceke ma bedo i ng’om gudi niai i Lebanon nitundo i Misrefoth-maim; man Jusidon ceke. Abiriemogi* cen kud i wang’ Juisrael. Bikwayu kende kende ipoke ni Israel ni giralaga, tap calu m’ang’olo iri. 7 Dong’ kawoni pok ng’ombe ni giralaga ni suru abung’wen man ni nusu mi suru pa Manase.”

8 Suru pa Ruben man suru pa Gad gimaku giralaga migi ma Musa ugam umiyo igi yo nyangu mi Yordan karacelo ku nusu mi surune ma kucelo, tap calu ma Musa ma jatic pa Yehova ugam umiyo igi: 9 niai i Aroer ma n’i dhu Poga mir Arnon,* man adhura ma n’i diere mi pogane, man ting’ ting’* ceke mi Medeba nitundo bir i Dibon; 10 man adhura ceke p’Ubimo Sihon mi Juamor m’ubimo i Hecbon nitundo bir i kieu mi Juamon; 11 man bende Gilead ku ng’om mi Jugecur man mi Jumaakath ku Got Hermon zoo man Bacan ceke nitundo bir i Saleka; 12 ker ceke pa Og i Bacan m’ubed ubimo i Actaroth man i Edrei. (Ebino i kind ju ma tokcen mi Jurefaim.) Musa uvoyogi man eriemogi* cen. 13 Ento Juisrael giriemo ngo* Jugecur man Jumaakath, kum Jugecur man Jumaakath kwo i kind Israel cil tin eni.

14 Ni suru mi Julawi kende re m’emiyo ngo giralaga. Girathiera ma juwang’u ku mac ni Yehova Mungu mir Israel re ma giralaga migi, tap calu m’eng’olo igi.

15 I ng’eye Musa umiyo giralaga ni suru mi ju pa Ruben calku juruot migi, 16 man ng’om migi umaku niai i Aroer ma n’i dhu Poga mir Arnon,* adhura ma n’i diere mi pogane, man ting’ ting’ ma n’i kum Medeba; 17 Hecbon man adhurane ceke ma n’i wi ting’ ting’, Dibon, Bamoth-baal, Beth-baal-meon, 18 Yahaz, Kedemoth, Mefaath, 19 Kiriathaim, Sibma, man Zereth-cahar ma n’i wi got i pambu ma piny, 20 Beth-peor, lung’ mi Pisga, Beth-yecimoth, 21 adhura ceke mi ting’ ting’, man ker ceke p’Ubimo Sihon mi Juamor m’ubed ubimo i Hecbon. Musa uvoye ku rwodhi ma e mi Midian: Evi, Rekem, Zur, Hur, man Reba ma gi judongo ma wijo* pa Sihon m’ubed ubedo i ng’ombe. 22 Juisrael ginego Balam ma wod Beor m’ubino ajoga ku palamularu karacelo ku jumange ma ginego. 23 Kieu mi suru mi ju pa Ruben ubino Yordan; ng’om maeno ubino giralaga mi ju pa Ruben calku juruot migi kud adhura man pacu m’utiekogi.

24 M’umedo maeno, Musa udog umiyo giralaga ni suru pa Gad, ju pa Gad calku juruot migi, 25 man ng’om migi ucoko Yazer, adhura ceke mi Gilead man nusu ng’om mi Juamon nitundo bir i Aroer m’ubeneno Raba; 26 niai i Hecbon nitundo i Ramath-mizpe man Bethonim, man niai i Mahanaim nitundo i kieu mi Debir; 27 man i poga, Beth-haram, Beth-nimra, Sukoth, man Zafon, dong ker p’Ubimo Sihon mir Hecbon, man Yordan ubino kieune niai piny i dhu nam Kinereth i thenge ma yo nyangu mi Yordan. 28 Eno ubino giralaga mi ju pa Gad calku juruot migi kud adhura man pacu m’utiekogi.

29 M’umedo maeno, Musa umiyo giralaga ni nusu mi suru pa Manase, ni nusu mi suru pa Manasene calku juruot migi. 30 Ng’om migi ubembo niai i Mahanaim man ecoko Bacan zoo, ker ceke p’Ubimo Og mi Bacan, man kagonjo ceke mi Yair i Bacan, i zoo adhura pier abusiel. 31 Nusu Gilead man Actaroth kud Edrei, adhura mi ker pa Og i Bacan jumiyo ni wot Makir ma wod Manase, ni nusu wot Makir calku juruot migi.

32 Eno ubedo giralaga ma Musa umiyo igi i pambu mi langa mi Moab loka Yordan yo nyangu mi Yeriko.

33 Ento ni suru mi Julawi, Musa umiyo ngo giralaga. Yehova Mungu mir Israel re m’utie giralaga migi, tap calu m’eng’olo igi.

14 Man maeni utie piny ma Juisrael gimaku ni giralaga i ng’om mi Kanan, ma Eleazar ma jalam giku Yocuwa ma wod Nun ku jutelwic mi thepacu mi suru mir Israel gimiyo igi kara gilagi. 2 Suru abung’wen ku nusu unwang’u giralaga migi ku gagi, tap calu ma Yehova ugam ung’olo nikadhu kud i bang’ Musa. 3 Musa ular umiyo giralaga ni suru mange ario ku nusu yo loka* Yordan, ni Julawi ke emiyo ngo giralaga i kindgi. 4 Jubed jukwanu nyikway Yozefu ni suru ario: Manase man Efraim. Jumiyo ngo makapiny i ng’ombe ni Julawi, ndhu adhura ma gibed gibedo i iye kende man luba migi pir udul lim migi man pi piny migi. 5 E Juisrael gipoko ng’ombe, tap calu ma Yehova ugam ung’olo ni Musa.

6 I ng’eye, dhanu mi Yuda gibino i bang’ Yocuwa i Gilgal, man Kaleb ma wod Yefune ma Jakenizi uwacu ire kumae: “Ing’eyo ma ber gin ma Yehova uyero ni Musa ma dhanu pa Mungu mandha piwa wakudi i Kadec-barnea. 7 Abino ku oro pier ang’wen kinde ma Musa ma jatic pa Yehova uora kud i Kadec-barnea pi nilibo ng’ombe, man adwogo ku rapor mandha.* 8 Kadok nwang’u umego para ma waidho wakugi giketho cwiny dhanu utur* de, an alubo Yehova Mungu para ku cwinya zoo. 9 Musa ugam ukwong’o cing’ nica kumae: ‘Ng’om ma tiendi unyono bidoko ni giralaga peri man mi woti pi nja, pilembe ilubo Yehova Mungu para ku cwinyi zoo.’ 10 Tap calu ma Yehova ung’olo, eketho abedo kwo pi oro pier ang’wen wi abic niai ma Yehova utimo lembang’ola maeni ni Musa kinde ma Israel ubewotho i langa; tin eni oro para pier abora wi abic, man fodi atie kwo. 11 Tin eni de a tek boo calu i nindo ma Musa ugam uora i iye. Tego para kawoni de tie kubang’e, pi lwiny man pi tic mange de. 12 Dong’ mii ira ng’om gudi maeni ma Yehova ung’olo pire cing’ nica. Kadok nwang’u cing’ nica iwinjo nia Juanakim gini keca de man gitie kud adhura ma dongo ma jutieko ku gang’kidi, Yehova bibedo kuda andha man abiriemogi* cen, tap calu ma Yehova ung’olo.”

13 E Yocuwa umiyo mugisa ni Kaleb ma wod Yefune man emiyo ire Hebron ni giralaga. 14 Pi thelembe maeno re ma Hebron utie giralaga pa Kaleb ma wod Yefune ma Jakenizi cil tin eni, pilembe elubo Yehova Mungu mir Israel ku cwinye zoo. 15 Con nwang’u nying Hebron ubino Kiriath-arba (Arba ubino ng’atu ma dit i kind Juanakim). E ng’ombe ugam uyom ni lwiny.

15 Ng’om ma jupoko* ni suru pa Yuda pi juruot migi ubembo nitundo i kieu mir Edom, langa mi Zin nitundo i Negeb i dhoge ma yo piny. 2 Kieu migi ma yo piny ucaku niai i tung Nam kadu,* niai kaka ma nam umondo i iye i ng’om i thenge m’uneno yo piny. 3 Man eloro yo piny nitundo i kaidho mir Akrabim, ekadhu kud i Zin, eidho niai yo piny nitundo i Kadec-barnea yor i Hezron, eidho i Adar, man edhoko yor i Karka. 4 I ng’eye, ekadhu kud i Azmon man ebembo nitundo i Ndaba* mi Misiri, man kieune ucidh ujik i Nam.* Eno ubino kieu migi ma yo piny.

5 Kieune ma yo nyangu ubino Nam kadu* nitundo kaka ma Yordan umondo i iye i nam, man kieu mi gunde ma yo malu ubino kaka ma nam umondo i iye i ng’om, kaka ma Yordan umondo i iye i nam. 6 Kieune uidho nitundo i Beth-hogla, ekadhu ku yo malu i Beth-araba, man kieune uidho cil i bang’ kidi pa Bohan ma wod Ruben. 7 Kieune uidho nitundo i Debir i Poga* mir Akor man edhoko yo malu nitundo i Gilgal ma n’i wang’ kaidho mir Adumim ma tie yo piny mi ndaba, man kieune ukadhu kud i kulo mir En-cemec ecidh ejik i En-rogel. 8 Kieune uidho i Poga pa Wod Hinom nitundo i lung’ pa Jayebusi yo piny, niwacu Yeruzalem, man kieune uidho nitundo i die wi got m’ubeneno wi Poga mir Hinom yo reto ma n’i tung Poga* mi Jurefaim yo malu. 9 Man kieune ucaku niai i die wi got nitundo kaka ma kulo mi Neftoa ucaku i iye man ebembo nitundo i adhura mi Got Efron; man kieune ukadhu kud i Baala, niwacu Kiriath-jearim. 10 Kieune udhoko niai i Baala yo reto nitundo i Got Seir, ekadhu ku wi lung’ mi Got Yearim yo malu, niwacu Kesalon, man eloro nitundo i Beth-cemec, ekadhu nitundo i Timna. 11 Kieune ubembo nitundo i lung’ mir Ekron yo malu, ekadhu kud i Cikeron, edog ekadhu kud i Got Baala, ebembo nitundo i Yabnel, man kieune ucidh ujik i nam.

12 Kieune ma yo reto ubino Nam ma dit* ku dhu watne. Eno ubino kieu mi nyikway Yuda calku juruot migi i ng’ete zoo.

13 Man calku lembe ma Yehova ung’olo ni Yocuwa, emiyo makapiny ni Kaleb ma wod Yefune i kind nyikway Yuda, niwacu Kiriath-arba, niyero Hebron (Arba ubino won Anak). 14 E Kaleb uriemo wot Anak adek ku keca: Cecai, Ahiman, man Thalmai ma gi nyikway Anak. 15 I ng’eye, eai ku keca ecidh ekiedo i dhu dhanu mi Debir. (Nwang’u nying’ Debir ular ubino Kiriath-sefer.) 16 Kaleb ugam uwacu kumae: “Ng’atu ma bikiedo i dhug adhura mi Kiriath-sefer man ebimake, abimiyo ire nyara ma Aksa ni dhaku.” 17 E Othniel ma wod Kenaz m’umin Kaleb umaku adhurane. Kaleb ugam umiyo ire Aksa ma nyare ni dhaku. 18 Kinde ma Aksa ubedok yo pare, erero Othniel nia ukway podho moko i bang’ won. Egam elor ku wi kana* pare. Man Kaleb upenje kumae: “Ibemito ang’o?” 19 Edwoko ire kumae: “Akweyi, mii ira mugisa, kum idaru miyo ira theng ng’om moko yo piny;* mii ira bende Guloth-maim.”* E emiyo ire Guloth ma Malu ku Guloth ma Piny.

20 Eno ubino giralaga mi suru pa Yuda calku juruot migi.

21 Adhura m’ubino i tung ng’om mi suru pa Yuda yor i kieu mir Edom yo piny ubino: Kabzeel, Eder, Yagur, 22 Kina, Dimona, Adada, 23 Kedec, Hazor, Ithnan, 24 Zif, Telem, Bealoth, 25 Hazor-hadata, man Kerioth-hezron, niwacu Hazor, 26 Amam, Cema, Molada, 27 Hazar-gada, Hecmon, Beth-peleth, 28 Hazar-cual, Ber-ceba, Biziothia, 29 Baala, Iyim, Ezem, 30 Eltholad, Kesil, Horma, 31 Ziklag, Madmana, Sansana, 32 Lebaoth, Cilhim, Ain, man Rimon; i zoo adhura pier ario wi abung’wen karacelo ku pacu m’i ng’etgi.

33 I Cefela ubino: Ecthaol, Zora, Acna, 34 Zanoa, En-ganim, Thapua, Enam, 35 Yarmuth, Adulam, Soko, Azeka, 36 Caraim, Adithaim, man Gedera ku Gederothaim;* adhura apar ang’wen ku pacu m’i ng’etgi.

37 Zenan, Hadaca, Migdal-gad, 38 Dilean, Mizpa, Yokthel, 39 Lakic, Bozkath, Eglon, 40 Kabon, Lamam, Kitlic, 41 Gederoth, Beth-dagon, Naama, man Makeda; adhura apar abusiel ku pacu m’i ng’etgi.

42 Libna, Ether, Acan, 43 Ifta, Acna, Nezib, 44 Keila, Akzib, man Mareca; adhura abung’wen ku pacu m’i ng’etgi.

45 Ekron kud nyithindh adhura m’i ng’ete man pacu m’i ng’ete; 46 niai i Ekron nicidho yo reto, adhura ceke m’ulwobere i kum Acdod ku pacu m’i ng’etgi.

47 Acdod, nyithindh adhura m’i ng’ete man pacu m’i ng’ete; Gaza, nyithindh adhura m’i ng’ete man pacu m’i ng’ete nitundo i Ndaba mi Misiri, i Nam ma dit,* man i ng’om ma n’i kieune.

48 Man i ng’om gudi, Camir, Yatir, Soko, 49 Dana, Kiriath-sana, niwacu Debir, 50 Anab, Ecthemo, Anim, 51 Gocen, Holon, man Gilo; adhura apar acel ku pacu m’i ng’etgi.

52 Arabia, Duma, Ecan, 53 Yanim, Beth-thapua, Afeka, 54 Humta, Kiriath-arba, niwacu Hebron, man Zior; adhura abung’wen ku pacu m’i ng’etgi.

55 Maon, Karmel, Zif, Yuta, 56 Yezreel, Yokdeam, Zanoa, 57 Kayin, Gibea, man Timna; adhura apar ku pacu m’i ng’etgi.

58 Halhul, Beth-zur, Gedor, 59 Maarath, Beth-anoth, man Elthekon; adhura abusiel ku pacu m’i ng’etgi.

60 Kiriath-baal, niwacu Kiriath-jearim, man Raba; adhura ario ku pacu m’i ng’etgi.

61 I langa: Beth-araba, Midin, Sekaka, 62 Nibcan, Adhura mi kadu, man En-gedi; adhura abusiel ku pacu m’i ng’etgi.

63 Ento Juyebusi ma nwang’u bedo i Yeruzalem, dhanu mi Yuda gituc ungo niriemogi, uketho Juyebusi bedo asu ku dhanu mi Yuda i Yeruzalem cil tin eni.

16 Man ng’om ma gagi upodho i wiye* ni nyikway Yozefu umaku niai i Yordan i Yeriko nitundo i kulo ma n’i yo nyangu mi Yeriko, man ekadhu kud i langa m’ucaku niai i Yeriko nitundo i ng’om gudi mi Bethel. 2 Ebembo niai i Bethel mi Luz man ecidho nitundo i kum kieu mi Juarki i Atharoth, 3 i ng’eye eloro yo reto nitundo i kieu mi Jufleti cil i kieu mi Beth-horon ma piny man Gezer, ecidh ejik i nam.

4 E Manase gikud Efraim ma gi wot Yozefu gimaku ng’om migi. 5 Maeni tie kieu mi ng’om ma nyikway Efraim gimaku calku juruot migi: Kieu mi giralaga migi yo nyangu ubino Atharoth-adar nitundo bir i Beth-horon ma malu, 6 man kieune ucidho nitundo i nam. Mikmethath ubino yo malu, kieune udog uwiro udok yo nyangu nitundo i Tanath-cilo, man ecidho yo nyangu i Yanoa. 7 E kud i Yanoa eloro i Atharoth man Naara, ecidh egudo kum Yeriko man ecidho nitundo i Yordan. 8 Niai kud i Thapua, kieune ucidho yo reto nitundo i Ndaba mi Kana man ecidh ejik i nam. Eno tie giralaga mi suru pa Efraim calku juruot migi; 9 nyikway Efraim gibino bende kud adhura i die i giralaga pa Manase, niyero adhura ceke ku pacu m’i ng’etgi.

10 Ento giriemo ngo Jukanan ma nwang’u bedo i Gezer, man Jukanan bedo asu i kind Efraim cil tin eni, e juketho gitimo tic mir adici.

17 I ng’eye, gagi upodho iwi suru pa Manase, pilembe en re m’ebino kayu pa Yozefu. Calu Makir ma kayu pa Manase man won Gilead ubino jaaskari, jumiyo ire Gilead ku Bacan. 2 Man gagi upodho iwi dong nyikway Manase calku juruot migi: wot Abiezer, wot Helek, wot Asriel, wot Cekem, wot Hefer, man wot Cemida. Eno ubino nyikway Manase ma wod Yozefu, jumaco calku juruot migi. 3 Ento Zelofehad ma wod Hefer ma wod Gilead ma wod Makir ma wod Manase ubino mbe kud awiya ma co, ebino kud awiya ma nyir kende; man nying awiya pare ma nyirne ni e: Mala, Noa, Hogla, Milka, man Tirza. 4 E gibino i wang’ Eleazar ma jalam, Yocuwa ma wod Nun, man judongo ma wijo, giwacu kumae: “Yehova re m’ung’olo ni Musa nia jumii iwa giralaga i kind umego mwa.” E calu ma Yehova ung’olo, jumiyo igi giralaga i kind umego pa weggi.

5 M’uweko ng’om mi Gilead man mi Bacan, ma tie i thenge ma yo loka* mi Yordan, jumiyo bende theng ng’om apar ni Manase, 6 kum jumanyir pa Manase ginwang’u giralaga karacelo ku wote, man ng’om mi Gilead udoko ni piny mi dong nyikway Manase.

7 Man kieu pa Manase ucaku niai i Acer nitundo i Mikmethath m’ubeneno Cekem, man kieune umedere yo piny* nitundo i ng’om mi dhanu ma bedo i En-Thapua. 8 Ng’om mi Thapua udoko pa Manase, ento Thapua m’ubino i kieu pa Manase ubino mi nyikway Efraim. 9 Man kieune uloro nitundo i Ndaba mi Kana yo piny mi ndabane. Adhura mir Efraim ubino i kind adhura pa Manase, man kieu pa Manase ubino yo malu mi ndaba, man ecidh ejik i nam. 10 Yo piny ubino pa Efraim, yo malu ke ubino pa Manase, man nam ubino kieu pa Manase, yo malu ecidh* egudo kum Acer, man yo nyangu, Isakar.

11 I ng’om pa Isakar man p’Acer jumiyo Beth-cean ni Manase kud nyithindh adhura m’i ng’ete, Ibleam ku nyithindh adhura m’i ng’ete, dhanu ma bedo i Dor ku nyithindh adhura m’i ng’ete, dhanu ma bedo i En-dor ku nyithindh adhura m’i ng’ete, dhanu ma bedo i Taanak ku nyithindh adhura m’i ng’ete, man dhanu ma bedo i Megido ku nyithindh adhura m’i ng’ete, ng’om adek m’uting’ere.

12 Ento nyikway Manase gituc ungo nimaku adhura maenogi; Jukanan giceriri nibedo i ng’ombe. 13 Kinde ma Juisrael gidoko tek, gidiyo Jukanan nitimo tic mir adici, ento giriemogi* ngo zoo.

14 Nyikway Yozefu giwacu ni Yocuwa kumae: “Pirang’o giralaga m’imiyo iwa* ku gagi utie ng’om acel kende? Wendwa lee, kum Yehova umiyo iwa mugisa nitundo kawoni eni.” 15 Yocuwa udwoko igi kumae: “Tek wendwu lee, wuidh i luli man wujwer iwu kaka kuca i ng’om mi Juperizi man mi Jurefaim, kum ng’om gudi pa Efraim utie nok iwu.” 16 E nyikway Yozefu giwacu kumae: “Ng’om gudi utie nok iwa, man Jukanan ceke ma bedo i ng’om mi pogane* gitie ku magali mi lwiny mi cuma, ju mi Beth-cean ku nyithindh adhura m’i ng’ete man ju ma n’i Poga* mi Yezreel. 17 Yocuwa uwacu ni juruot pa Yozefu, niwacu ni Efraim man Manase kumae: “Wendwu tie lee, man wu tek lee. Wubinwang’u ngo theng ng’om acel kende, 18 ento ng’om gudi bende bibedo mwu. Kadok nwang’u etie luli de, wubijwere, man ebibedo tung ng’om mwu. Kum wubiriemo Jukanan cen kadok nwang’u gi tek man gitie ku magali mi lwiny mi cuma de.”

18 I ng’eye, cokiri ceke mi Juisrael ucoko dhoggi i Cilo man giguro hema mi rombo kakeca, kum kawoni nwang’u dong’ ng’ombe n’i the loc migi. 2 Ento nwang’u fodi suru abiro mi Juisrael udong’ m’unwang’u ngo ng’om ni giralaga. 3 Yocuwa ugam uyero ni Juisrael kumae: “Wubigalu rukani ku maku ng’om ma Yehova Mungu pa kwaruwu umiyo iwu? 4 Wuwodh ira jumaco adek kubang’ suruman kara aorgi; gibiciwotho i die ng’ombe man gibikubo karth mi ng’ombe calku giralaga migi. I ng’eye gibidwogo i bang’a. 5 Gibipoke i kindgi ni abiro. Yuda bidong’ i ng’om pare yo piny man juruot pa Yozefu de bidong’ i ng’om migi yo malu. 6 Ento wun, wukub karth mi ng’ombe, wupok iye ni abiro, man wukele i bang’a. E abibolo gagi piwu keni i wang’ Yehova Mungu mwa. 7 Enre jubimiyo ngo theng ng’om ni Julawi i kindwu, pilembe tic mi lamulam pa Yehova re m’utie giralaga migi; man Gad, Ruben, ku nusu mi suru pa Manase gidaru maku giralaga migi ma Musa ma jatic pa Yehova umiyo igi i thenge ma yo nyangu mi Yordan.

8 E jumacone giyikiri pi nicidho, man Yocuwa ung’olo ni ju ma biwokubo karth mi ng’ombe kumae: “Wucidh wuwoth i die ng’ombe, wukub karthne man wudwog i bang’a; e abidobolo gagi piwu keni i Cilo i wang’ Yehova.” 9 Pieno jumacone gicidho man giwotho i die ng’ombe, gikubo karth mi ng’ombe calkud adhura m’i iye, gipoko i ng’ombe ni abiro man gigoro lembene ceke i buku. I ng’eye gidwogo i bang’ Yocuwa i kagonjo i Cilo. 10 Yocuwa ugam ubolo gagi pigi i Cilo i wang’ Yehova. Keca re ma Yocuwa upoko ng’om ni Juisrael calku giralaga migi.

11 E gagi upodho iwi suru pa Benjamin calku juruot migi, man ng’om migi ma gagi upodho i wiye ubino i kind nyikway Yuda ku nyikway Yozefu. 12 I thenge ma yo malu, kieu migi ukwong’o i Yordan, man kieu migi uidho nitundo i lung’ mi Yeriko yo malu, eidho nitundo iwi got yo reto, man ebembo nitundo i langa mi Beth-aven. 13 Ku keca kieune ucidho nitundo i Luz, i lung’ ma yo piny mi Luz, niwacu Bethel; kieune uloro nitundo i Atharoth-adar iwi got ma ni yo piny i Beth-horon ma piny. 14 Kieune ukadhu i thenge ma yo reto man uwiro udok yo piny niai i kum got m’ubeneno Beth-horon yo piny; ecidh ejik i Kiriath-baal, niwacu Kiriath-jearim ma tie adhura mi Yuda. Eno ubino thenge ma yo reto.

15 Thenge ma yo piny ukwong’o i tung Kiriath-jearim man kieune ucidho yo reto; ecidho nitundo kaka ma kulo mi Neftoa ucaku i iye. 16 Kieune uloro nitundo i tung got m’ubeneno Poga pa Wod Hinom, ma n’i Poga* mi Jurefaim yo malu, man eloro nitundo i Poga pa Hinom, nitundo i lung’ mi Juyebusi yo piny, man nitundo i En-rogel. 17 Kieune ukadhu yo malu man ecidho nitundo i En-cemec, i ng’eye ecidho yor i Geliloth ma n’i wang’ kaidho mir Adumim, man eloro nitundo i kum kidi pa Bohan ma wod Ruben. 18 Kieune umedere nitundo i lung’ ma yo malu ma n’i wang’ Araba man eloro nitundo i Araba. 19 Kieune umedere nitundo i lung’ ma yo malu mi Beth-hogla, man ecidh ejik kaka ma Nam kadu* umondo i iye i ng’om yo malu, kaka ma Yordan ucidh umondo i iye i nam yo piny. Eno ubino kieune ma yo piny. 20 Man Yordan ubino kieune i thenge ma yo nyangu. Eno ubino giralaga mi nyikway Benjamin calku juruot migi, ku kieune m’i ng’ete kun ku kun ceke.

21 Man adhura ma jumiyo ni suru pa Benjamin calku juruot migi ni e: Yeriko, Beth-hogla, Emek-keziz, 22 Beth-araba, Zemaraim, Bethel, 23 Avim, Para, Ofra, 24 Kefar-amoni, Ofni, man Geba; adhura apar ario ku pacu m’i ng’etgi.

25 Gibeon, Rama, Beroth, 26 Mizpa, Kefira, Moza, 27 Rekem, Irpeel, Tarala, 28 Zela, Ha-elef, Yebusi, niwacu Yeruzalem, Gibea, man Kiriath; adhura apar ang’wen ku pacu m’i ng’etgi.

Eno ubino giralaga mi nyikway Benjamin calku juruot migi.

19 Gagi mir arionde upodho iwi Simeon, iwi suru pa Simeon calku juruot migi. Man giralaga migi ubino i die giralaga pa Yuda. 2 Giralaga migi ubino Ber-ceba ku Ceba, Molada, 3 Hazar-cual, Baala, Ezem, 4 Eltholad, Bethul, Horma, 5 Ziklag, Beth-markaboth, Hazar-susa, 6 Beth-lebaoth man Caruhen; adhura apar adek ku pacu m’i ng’etgi; 7 Ain, Rimon, Ether, man Acan; adhura ang’wen ku pacu m’i ng’etgi; 8 man bende pacu ceke m’utieko adhura maenogi nitundo bir i Baalath-ber, ma julwong’o bende Rama ma yo piny. Eno ubino giralaga mi suru pa Simeon calku juruot migi. 9 Jugamu giralaga mi nyikway Simeon kud i kum theng ng’om pa Yuda, pilembe makapiny pa Yuda ubino lee dit igi. Pieno ginwang’u aba migi i die giralaga pa Yuda.

10 I ng’eye, gagi mir adege upodho iwi nyikway Zebulon calku juruot migi, man kieu mi giralaga migi ucidho bir i Sarid. 11 Kieu migi uidho yo reto nitundo i Mareal, ecidh egudo kum Dabeceth, i ng’eye ecidho nitundo i poga* ma n’i wang’ Yokneam. 12 Man kieune uai kud i Sarid ecidho yo nyangu yo ka ma ceng’ wok kud i iye, nitundo i mupaka mi Kisloth-thabor man emedere nitundo Daberath, i ng’eye eidho nitundo i Yafia. 13 Man ku keca emedere yo nyangu yo ka ma ceng’ wok kud i iye nitundo i Gath-hefer cil i Eth-kazin, man ecidho nitundo i Rimon, e emedere nitundo i Nea. 14 Man kieune udhoko yo malu nitundo i Hanathon, man ecidh ejik i Poga mir Ifta-el. 15 Ng’om migine umaku bende Katath, Nahalal, Cimron, Idala, man Bethlehem; adhura apar ario ku pacu m’i ng’etgi. 16 Eno ubino giralaga mi nyikway Zebulon calku juruot migi. Eno ubino adhura migi ku pacu m’i ng’etgi.

17 Gagi mir ang’wende upodho iwi Isakar, iwi nyikway Isakar calku juruot migi. 18 Man kieu migi ucidho nitundo i Yezreel, Kesuloth, Cunem, 19 Hafaraim, Cion, Anaharath, 20 Rabith, Kicion, Ebez, 21 Remeth, En-ganim, En-hada, man Beth-pazez. 22 Man kieune ucidh ugudo kum Tabor man Cahazuma ku Beth-cemec, man mupakane ucidh ujik i Yordan; adhura apar abusiel ku pacu m’i ng’etgi. 23 Eno ubino giralaga mi suru pa Isakar calku juruot migi; adhura migi ku pacu m’i ng’etgi.

24 I ng’eye, gagi mir abije upodho iwi suru p’Acer calku juruot migi. 25 Man kieu migi ubino Helkath, Hali, Beten, Akcaf, 26 Alamelek, Amad, man Mical; yo reto kieune ucidh ugudo kum Karmel man Cihor-libnath, 27 man kieune udok yo nyangu nitundo i Beth-dagon, ecidh egudo kum Zebulon man Poga mir Ifta-el yo malu, Beth-emek ku Neiel man ecidho nitundo i Kabul i thenge ma yor acam, 28 man nitundo i Ebron, Rehob, Hamon, man Kana, nicidho bir i Sidon ma dit. 29 Man kieune udok yor i Rama nicidho bir i adhura ma jutieko kume ku gang’ mi Turo. I ng’eye kieune udok yor i Hosa man ecidh ejik i nam i ng’om mir Akzib, 30 Uma, Afek, man Rehob; adhura pier ario wi ario ku pacu m’i ng’etgi. 31 Eno ubino giralaga mi suru p’Acer calku juruot migi. Eno ubino adhura migi ku pacu m’i ng’etgi.

32 Gagi mir abusiende upodho iwi nyikway Nafthali, iwi nyikway Nafthali calku juruot migi. 33 Kieu migi ukwong’o i Helef niai i kum yen ma dit mi Zananim, ecidho i Adami-nekeb man i Yabnel nitundo bir i Lakum; man ecidh ejik i Yordan. 34 Kieune udok yo reto nitundo i Aznoth-thabor. Ku keca emedere nitundo i Hukok ecidh egudo kum Zebulon yo piny, Acer yo reto, man Yuda i kum Yordan i thenge ma yo nyangu. 35 Man adhura ma jutieko ku gang’ ubino Zidim, Zer, Hamath, Rakath, Kinereth, 36 Adama, Rama, Hazor, 37 Kedec, Edrei, En-hazor, 38 Iron, Migdal-el, Horem, Beth-anath, man Beth-cemec; adhura apar abung’wen ku pacu m’i ng’etgi. 39 Eno ubino giralaga mi suru pa Nafthali calku juruot migi; adhura migi ku pacu m’i ng’etgi.

40 Gagi mir abirone upodho iwi suru pa Dan calku juruot migi. 41 Man mupaka mi giralaga migi ubino Zora, Ecthaol, Ir-cemec, 42 Calabin, Ajalon, Ithla, 43 Elon, Timna, Ekron, 44 Eltheke, Gibethon, Baalath, 45 Yehud, Bene-berak, Gath-rimon, 46 Me-jarkon, man Rakon, man mupakane ukadhu ceng’ini kud i wang’ Yopa. 47 Ento ng’om pa Dan ubino nyanok dit igi. Pieno giidho malu man gikiedo i dhu Lecem, gimake man gigoye ku palamularu, e edoko ni piny migi man gicaku bedo i iye, ci giwilo nying’ Lecem udoko Dan, calu nying’ kwarugi ma Dan. 48 Eno ubino giralaga mi suru pa Dan calku juruot migi. Eno ubino adhura migi ku pacu m’i ng’etgi.

49 I ayi maeno re ma gidaru pok mi ng’ombe ni giralaga calku kieune. I ng’eye Juisrael gimiyo giralaga ni Yocuwa ma wod Nun i kindgi. 50 Calku lembe ma Yehova ung’olo, gimiyo ire adhura m’epenjo, niwacu Timnath-sera i ng’om gudi pa Efraim. E egiero adhurane man ecaku bedo i iye.

51 Eno ubino giralaga ma Eleazar ma jalam, Yocuwa ma wod Nun, man jutelwic mi thepacu mi suru mir Israel gipoko ku gagi i Cilo i wang’ Yehova i dhu kamondo mi hema mi rombo. E gigam gidaru pok mi ng’ombe.

20 I ng’eye, Yehova uwacu ni Yocuwa kumae: 2 “Yer ni Juisrael kumae: ‘Wung’ii iwu adhura mi karingo m’agam ayero iwu pire nikadhu kud i bang’ Musa, 3 kara ng’atu m’unego dhanu* akakaka ngo kunoke m’eng’eyo ngo uring kuca. Man adhurane bibedo kaka ma wubiberingo i iye jaculkwor mi rimo. 4 Ecikere niringo i adhura acel m’i kind maeno man ebiwocungo i dhugang’ mir adhurane, ebikoro lembe pare ni judongo mir adhurane. E gibijole i adhurane man gibimiyo ire kabedo, e ebikwo karacelo kugi. 5 Tek jaculkwor mi rimo uriemo toke, kud gimii ng’atu m’unego nekne i cinge, kum enego wadi m’eng’eyo ngo man nwang’u elar edage de ngo. 6 Ecikere nibedo i adhurane nitundo m’ebicungo i pokolembe i wang’ cokiri man ebibedo kuca cil ma jalam ma dit m’ubetimo tic i saa maeca bitho ko. I ng’eye ng’atu m’unego nekne copo dok i adhura m’egam eringo kud i iye, man eromo domondo i adhura pare man i ot pare.’”

7 E adhura ma gigam gidwoko leng’ne* gini e: Kedec i Galilaya i ng’om gudi pa Nafthali, Cekem i ng’om gudi pa Efraim, man Kiriath-arba, niwacu Hebron i ng’om gudi pa Yuda. 8 I ng’om mi Yordan yo nyangu mi Yeriko ging’iyo Bezer i langa iwi ting’ ting’* kud i kum ng’om mi suru pa Ruben, Ramoth i Gilead kud i kum ng’om mi suru pa Gad, man Golan i Bacan kud i kum ng’om mi suru pa Manase.

9 Eno re m’udoko ni adhura ma jung’iyo pi Juisrael ceke man pir umondo ma bedo i kindgi, kara tek ng’atu moko unego dhanu* akakaka ngo, ering kuca man kud etho i cing’ jaculkwor mi rimo ka fodi ecungo ngo i pokolembe i wang’ cokiri.

21 Jutelwic mi thepacu mi Julawi gigam gibino i bang’ Eleazar ma jalam, Yocuwa ma wod Nun, man jutelwic mi thepacu mi suru mir Israel, 2 man giyero igi i Cilo i ng’om mi Kanan kumae: “Yehova ung’olo nikadhu kud i bang’ Musa nia jumii iwa adhura ma wabibebedo i iye karacelo ku lubane pir udul lim mwa.” 3 E calku lembe ma Yehova ung’olo, Juisrael giwodho adhura maenogi ku lubane kud i kum giralaga migi man gimiyogi ni Julawi.

4 Gagi ugam upodho iwi juruot mi Jukohath. E jumiyo adhura apar adek ku gagi ni Julawi ma gi nyikway Arun ma jalam kud i kum ng’om mi suru pa Yuda, mi suru pa Simeon, man mi suru pa Benjamin.

5 Man ni dong Jukohath, jumiyo adhura apar; jugamu adhurane kud i kum ng’om mi juruot mi suru pa Efraim, mi suru pa Dan, man mi nusu mi suru pa Manase.

6 Man ni Jugercon jumiyo adhura apar adek ma jugamu kud i kum ng’om mi juruot mi suru pa Isakar, mi suru p’Acer, mi suru pa Nafthali, man mi nusu mi suru pa Manase i Bacan.

7 Ni Jumerari calku juruot migi, jumiyo adhura apar ario kud i kum ng’om mi suru pa Ruben, mi suru pa Gad, man mi suru pa Zebulon.

8 I ayi maeno re ma Juisrael gimiyo adhura ku lubane ku gagi ni Julawi, tap calu ma Yehova ugam ung’olo nikadhu kud i bang’ Musa.

9 Pieno, kud i kum ng’om mi suru pa Yuda man mi suru pa Simeon, jumiyo adhura maenigi ma julwong’ogi ku nying’gi, 10 jumiyogi ni Julawi ma gi nyikway Arun ma gi juruot mi Jukohath, pilembe gagi ma kwong’a ular upodho i wigi. 11 Gimiyo igi Kiriath-arba, niwacu Hebron i ng’om gudi pa Yuda ku luba m’utiekogi (Arba ubino won Anak). 12 Ento podho mir adhurane ku pacu m’i ng’ete, jumiyo ni Kaleb ma wod Yefune ubed ni aba pare.

13 Man ni wot Arun ma jalam jumiyo adhura mi karingo pi ng’atu m’unego nek, niwacu Hebron ku lubane, man Libna ku lubane, 14 Yatir ku lubane, Ecthemoa ku lubane, 15 Holon ku lubane, Debir ku lubane, 16 Ain ku lubane, Yutha ku lubane, man Beth-cemec ku lubane, adhura abung’wen ma jugamu kud i kum ng’om mi suru ario maeno.

17 Man kud i kum ng’om mi suru pa Benjamin: Gibeon ku lubane, Geba ku lubane, 18 Anathoth ku lubane, man Almon ku lubane, adhura ang’wen.

19 Adhura ceke ma jumiyo ni nyikway Arun ma jalam ubino adhura apar adek ku lubane.

20 Man ni juruot mi Jukohath ma nwang’u udong’ i kind Julawi, jumiyo igi adhura ku gagi kud i kum ng’om mi suru pa Efraim. 21 Jumiyo igi adhura mi karingo pi ng’atu m’unego nek, niwacu Cekem ku lubane i ng’om gudi pa Efraim, Gezer ku lubane, 22 Kibzaim ku lubane, man Beth-horon ku lubane, adhura ang’wen.

23 Man kud i kum ng’om mi suru pa Dan: Eltheke ku lubane, Gibethon ku lubane, 24 Ajalon ku lubane, Gath-rimon ku lubane, adhura ang’wen.

25 Man kud i kum ng’om mi nusu mi suru pa Manase: Taanak ku lubane, man Gath-rimon ku lubane, adhura ario.

26 Adhura ceke ma jumiyo ni dong juruot mi Jukohath karacelo ku lubane ubino apar.

27 Jugercon ma gi juruot mi Julawi ginwang’u adhura mi karingo pi ng’atu m’unego nek kud i kum ng’om mi nusu mi suru pa Manase, niwacu Golan i Bacan ku lubane, man Bectera ku lubane, adhura ario.

28 Man kud i kum ng’om mi suru pa Isakar: Kicion ku lubane, Daberath ku lubane, 29 Yarmuth ku lubane, man En-ganim ku lubane, adhura ang’wen.

30 Man kud i kum ng’om mi suru p’Acer: Mical ku lubane, Abdon ku lubane, 31 Helkath ku lubane, man Rehob ku lubane, adhura ang’wen.

32 Man kud i kum ng’om mi suru pa Nafthali: adhura mi karingo pi ng’atu m’unego nek, niwacu Kedec i Galilaya ku lubane, Hamoth-dor ku lubane, man Kartan ku lubane, adhura adek.

33 Adhura ceke ma jumiyo ni Jugercon calku juruot migi ubino adhura apar adek ku lubane.

34 Dong Julawi, niwacu juruot mi Jumerari, jumiyo igi adhura niai kud i kum ng’om mi suru pa Zebulon: Yokneam ku lubane, Karta ku lubane, 35 Dimna ku lubane, man Nahalal ku lubane, adhura ang’wen.

36 Kud i kum ng’om mi suru pa Ruben ke: Bezer ku lubane, Yahaz ku lubane, 37 Kedemoth ku lubane, man Mefaath ku lubane, adhura ang’wen.

38 Man kud i kum ng’om mi suru pa Gad: adhura mi karingo pi ng’atu m’unego nek, niwacu Ramoth i Gilead ku lubane, Mahanaim ku lubane, 39 Hecbon ku lubane, man Yazer ku lubane, i zoo adhura ang’wen.

40 Adhura ceke ma jumiyo ni Jumerari calku juruot migi, niwacu dong juruot mi Julawi, ubino adhura apar ario.

41 Adhura ceke ma jumiyo ni Julawi i die giralaga mi Juisrael ubino adhura pier ang’wen wi abora karacelo ku lubane. 42 Adhuraman ubino ku luba pare i ng’ete tingili; adhurane ceke ubedo kumeno.

43 Kumeno re ma Yehova umiyo ni Israel ng’om ceke m’elar ekwong’o nia ebimiyo ni kwarugi, e gimaku ng’ombe man gicaku bedo i iye. 44 M’umedo maeno, Yehova umiyo igi yom i ng’ete ceke, tap calu m’elar ekwong’o ni kwarugi, man ng’atu acel de mbe i kind judegi migi ceke m’utuc nicungo i dhoggi. Yehova umiyo judegi migi ceke i cing’gi. 45 Kud i kind lembe ceke ma beco ma Yehova ung’olo ni ot mir Israel, lembang’ola* acel de mbe m’upong’o ngo, gin ceke gipong’o.

22 I ng’eye, Yocuwa ulwong’o suru pa Ruben, suru pa Gad, man nusu mi suru pa Manase 2 man ewacu igi kumae: “Wutimo lembe ceke ma Musa ma jatic pa Yehova ung’olo iwu, man wuworo dwanda i lembe ceke m’ang’olo iwu. 3 Wuwenjo ngo umego mwu i nindo maeni zoo, cil tin eni; man wuworo lembang’ola pa Yehova Mungu mwu. 4 Kawoni Yehova Mungu mwu udaru miyo yom ni umego mwu, tap calu m’eng’olo igi. Dong’ kawoni wucopo dok i hema mwu i ng’om ma Musa ma jatic pa Yehova umiyo ubed ni aba mwu i thenge ma yo loka* mi Yordan. 5 Kende kende wunen cuu mandha nia wutiyo ku lembang’ola man Cik ma Musa ma jatic pa Yehova umiyo iwu. Wumar Yehova Mungu mwu, wuwoth i yo pare ceke, wuwor lembang’ola pare, wumok i kume, man wutim ire kud adundewu ceke man ku ng’eyong’ec* mwu ceke.”

6 I ng’eye, Yocuwa umiyo igi mugisa man eweko gicidho, e gidok i hema migi. 7 Nwang’u Musa umiyo giralaga i Bacan ni nusu mi suru pa Manase, man ni nusu mi surune ma kucelo ke Yocuwa umiyo ng’om i thenge ma yo reto mi Yordan karacelo kud umego migi. M’umedo maeno, saa ma Yocuwa ubeweko gidok i hema migi, emiyo igi mugisa 8 man ewacu igi kumae: “Wudok i hema mwu ku lonyo bik, kud udul lim dupa mandha, ku mola ma tar man mola ma kwar, mola man cuma, man kendi i kadhiri ma lee mandha. Wupok jambayeki mi judegi mwu i kindwu karacelo kud umego mwu.”

9 I ng’ey maeno, suru pa Ruben, suru pa Gad, man nusu mi suru pa Manase gipokiri ku Juisrael mange i Cilo i ng’om mi Kanan, man gidok i ng’om mi Gilead i ng’om ma en aba migi ma nwang’u dong’ gibedo i iye calku lembe ma Yehova ung’olo nikadhu kud i bang’ Musa. 10 Saa ma gitundo i ng’om mi Yordan i ng’om mi Kanan, suru pa Ruben, suru pa Gad, man nusu mi suru pa Manase giwok gigiero pemlam ma dit man mi zungo keca i ng’et Yordan. 11 I ng’ey kare, Juisrael mange giwinjo jubeyero kumae: “Nen! suru pa Ruben, suru pa Gad, man nusu mi suru pa Manase gigiero pemlam i kieu mi ng’om mi Kanan i ng’om mi Yordan i thenge mi Juisrael.” 12 Saa ma Juisrael giwinjo pi lembuno, cokiri ceke mi Juisrael ucoko dhoggi i Cilo pi nicikiedo lwiny i dhoggi.

13 E Juisrael gioro Fineas ma wod Eleazar ma jalam i bang’ suru pa Ruben, suru pa Gad, man nusu mi suru pa Manase i ng’om mi Gilead, 14 man gicidho karacelo ku judongo ma wijo apar, jadit ma wijo acel kubang’ thepacu mi suru ceke mir Israel, ng’atuman m’i kindgi ubino jatelwic mi thepacu pagi m’i kind elufu mir Israel. 15 Saa ma gitundo i bang’ suru pa Ruben, suru pa Gad, man nusu mi suru pa Manase i ng’om mi Gilead, giwacu igi kumae:

16 “Cokiri pa Yehova ceke uyero kumae: ‘Eni dubo ma nenedi ma wutimo i kum Mungu mir Israel e? Tin wuloko ng’eywu ni Yehova ma wugiero ko iwu pemlam man wujai ni Yehova. 17 Nyo kier mi Peor ca ubino gin ma nok iwa? Kadok nwang’u thong’om upodho iwi cokiri pa Yehova de, re fodi wadwokara ngo leng’ nikum kierne cil tin eni. 18 Man wulund wumito wulok ng’eywu ni Yehova! Tek wujai tin ni Yehova, e urwo ng’eicwiny bimake i kum cokiri ceke mir Israel. 19 Kawoni tek utie pilembe ng’om m’utie aba mwu re m’ucido, wukadh loka i ng’om m’utie aba pa Yehova kaka ma hema mi thier pa Yehova bedo i iye man wubed i kindwa, ento kud wujai ni Yehova man kud wudwokwa ni jujai ku pemlam mange ma wugiero iwu m’umedo pemlam pa Yehova Mungu mwa. 20 Saa m’Akan ma wod Zera utimo dubo pi lembe m’uneno piny ma juketho pi nyoth, nyo ng’eicwiny uopo ngo i kum cokiri ceke mir Israeli? Man etho ngo en kende pi kier pare.’”

21 E suru pa Ruben, suru pa Gad, man nusu mi suru pa Manase gidwoko ni jutelwic mir elufu mir Israel kumae: 22 “E Yehova, Mungu mi mungu!* E Yehova, Mungu mi mungu! Eng’eyo, man Israel de bing’eyo. Tek wajai man wadubo ni Yehova, dong’ kud ebodhwa tin eni. 23 Tek wagiero iwa pemlam pi niloko ng’eywa ni Yehova man pi nithiero lam m’awang’a, girathiera mi nying cam, man lam mi kwiyocwiny i wiye, e Yehova bimiyo iwa matira. 24 Tie kumeno ngo, watimo lembuni pi thelembe mange, kum waparu kumae: ‘I nindo m’ubino, wotwu biyero ni wotwa kumae: “Lembang’o i kindwu ku Yehova Mungu mir Israeli? 25 Yehova uketho Yordan ubed ni kieu i kindwa wakudwu, wa suru pa Ruben ku pa Gad. Dong’ maka mwu mbe i bang’ Yehova.” Man wotwu bicero wotwa ku timo ni* Yehova.’

26 “E wayero kumae: ‘Ukwayu watimu lembe moko kokoro, wagieru pemlam pi lam m’awang’a ngo kadi pi lam de ngo, 27 ento kara ebed ni jamulembe i kindwa wakudwu ku nyikwaywa* yor i ng’eywa nia wabitimo mwa thier ni Yehova ku lam mwa m’awang’a, lam mwa, lam mwa mi kwiyocwiny, kara i nindo m’ubino wotwu kud uyer ni wotwa kumae: “Maka mwu mbe i bang’ Yehova.”’ 28 E wawacu kumae: ‘Tek i nindo m’ubino gibiwacu lembuno iwa man ni nyikwaywa,* wabidwoko kumae: “Wunen ayi pemlam m’urombo ku pemlam pa Yehova ma kwaruwa gigam giyiko pi lam m’awang’a ngo kadi pi lam de ngo, ento kara ebed ni jamulembe i kindwa wakudwu.”’ 29 Etie lembe m’apara de wacopo paru ngo nia wajai ni Yehova man nia tin walok ng’eywa ni Yehova ma wagier ko pemlam pi lam m’awang’a, pi girathiera mi nying cam, man pi lam, m’uweko pemlam pa Yehova Mungu mwa ma n’i wang’ hema pare mi thier!”

30 Saa ma Fineas ma jalam, judongo ma wijo mi cokiri, man jutelwic mir elufu mir Israel m’ubino karacelo kude giwinjo lembe ma nyikway Ruben, nyikway Gad, man nyikway Manase giyero, lembene unyang’ugi. 31 E Fineas ma wod Eleazar ma jalam uyero ni nyikway Ruben, nyikway Gad, man ni nyikway Manase kumae: “Tin wafong’eyo nia Yehova n’i kindwa, pilembe wutimo ngo dubo maeni i kum Yehova. Kawoni wudaru bodho Juisrael kud i cing’ Yehova.”

32 E Fineas ma wod Eleazar ma jalam man judongo ma wijo giai kud i bang’ suru pa Ruben man suru pa Gad i ng’om mi Gilead man gidok i ng’om mi Kanan, e gidog gikoro lembene ni Juisrael mange. 33 Man raporne unyang’u Juisrael. E Juisrael gipaku Mungu man giweco ngo kendo nyanok de iwi lembe mi cikiedo lwiny i dhu suru pa Ruben man suru pa Gad pi ninyotho ng’om ma gibedo i iye.

34 Pieno suru pa Ruben man suru pa Gad gicaku nying’ pemlamne,* pilembe “etie jamulembe i kindwa nia Yehova utie Mungu mandha.”

23 Nindo dupa i ng’ey ma Yehova udaru miyo yom ni Israel kud i cing’ judegi migi ceke m’udhokogi, saa ma nwang’u dong’ Yocuwa utii man oro pare de ucidho, 2 Yocuwa ulwong’o Israel ceke, judongo migi, jutelwic migi, jupoklembe migi man bajego migi, e ewacu igi kumae: “Adaru tii, oro para de ucidho. 3 Wun giwu wuneno lembe ceke ma Yehova Mungu mwu utimo ni thek maeno ceke piwu, pilembe Yehova Mungu mwu re m’ubino kiedo piwu. 4 Nen, apoko iwu ng’om mi thek ma fodi udong’ ku gagi ni giralaga ni suru mwu, man bende ng’om mi thek ceke m’anyotho niai i Yordan nitundo i Nam ma dit* yo reto.* 5 Yehova Mungu mwu re m’uwotho cwalugi cen kud i weng’wu, eriemogi* cen piwu man wumaku ng’om migi, tap calu ma Yehova Mungu mwu ugam ung’olo iwu.

6 “Dong’ cwinywu ubed tek lee mandha kara wuwor man wutii ku lembe ceke m’ugorere i buku mi Cik pa Musa, ma kud wulokuru ko nyanok de kud i kume yor acwic kadi yor acam, 7 kud wudikuru nyanok de ku thek maeno m’udong’ i kindwu. Kud wulwong’ kadok nying’ mungu migi alwong’a de, kadi kwong’ de kud wukwong’ ku nying’gi, man kud wutim igi nyanok de, kadi korwu de kud wukul igi. 8 Ento wumok i kum Yehova Mungu mwu, tap calu ma wutimo nitundo tin eni. 9 Yehova biriemo thek ma dongo man ma tek cen kud i weng’wu, kum fodi ng’atu moko mbe m’utuc nicungo i weng’wu nitundo tin eni. 10 Ng’atu acel kende m’i kindwu ci biriemo dhanu elufu, pilembe Yehova Mungu mwu ubekiedo piwu, tap calu m’eng’olo iwu. 11 Dong’ wubed ku weng’wu saa ceke ma wumar ko Yehova Mungu mwu.

12 “Ento tek wuloko ng’eywu man wumoko i kum dong dhanu mi thek maeni m’udong’ i kindwu, tek wutimo kugi lembariba mi gamiri,* man wudikuru kugi, gin de gidikiri kudwu, 13 e wung’ey cuu nia Yehova Mungu mwu biweko niriemo* iwu thek maeno. Gibidoko calu voi man uwic, calu del mi fwodo vutwu man calu ukudho i weng’wu cil ma wubirwinyo ko tup kud i ng’om maeni ma ber ma Yehova Mungu mwu umiyo iwu.

14 “Kawoni wunen! abecitho,* man wung’eyo cuu kud adundewu ceke man ku ng’eyong’ec* mwu ceke nia kud i kind lembe ceke ma beco ma Yehova Mungu mwu ung’olo iwu, acel de mbe m’upong’o ngo. Gin ceke gipong’o iwu. Acel de mbe m’upong’o ngo. 15 Ento tap calu ma lembe ma beco ceke ma Yehova Mungu mwu ung’olo iwu upong’o iwu, kumeno bende Yehova bikelo ruvwa ceke* m’eng’olo i wiwu man ebidaruwu kud i ng’om ma ber maeni ma Yehova Mungu mwu umiyo iwu. 16 Tek wuturo lembariba pa Yehova Mungu mwu m’eng’olo iwu nia wuwor man tek wucidh wutimo ni mungu mange man wukulo korwu igi, e ng’eicwiny pa Yehova biopo i kumwu man wubirwinyo pio kud i ng’om ma ber m’emiyo iwu.”

24 I ng’eye, Yocuwa ucoko dhu suru ceke mir Israel karacelo i Cekem man elwong’o judongo mir Israel, jutelwic migi, jupoklembe migi, ku bajego migi man gicungo i wang’ Mungu mandha. 2 Yocuwa ugam uyero ni dhanu ceke kumae: “Yehova Mungu mir Israel uwacu kumae: ‘Yang’ con kwaruwu gikwo yo loka Kulo* man gibed gitimo ni mungu mange. Tera ma won Abraham man ma won Nahor de ubino i kindgi.

3 “‘I ng’ey kare, awodho kwaruwu m’Abraham ku yo loka Kulo,* aketho ewotho i die ng’om mi Kanan zoo, man aketho nyikwaye* unyay. Amiyo ire Isak; 4 ni Isak adog amiyo Yakobo man Esau. I ng’ey kare, amiyo got Seir ni Esau ni aba pare; man Yakobo ku wote giloro i Misiri. 5 I ng’ey kare aoro Musa gikud Arun, man agoyo Misiri ku lembe m’atimo i kindgi, e awodhowu. 6 Saa m’abewodho kwaruwu kud i Misiri man wutundo i dhu nam, Jumisiri gibedo riemo tok kwaruwu ku magali mi lwiny man juring riuni* nitundo bir i Nam ma kwar. 7 Gicaku wak i bang’ Yehova, e eketho mudho i kindwu ku Jumisiri, man edwogo nam i wigi, e nambe uumogi. Wun giwu wuneno ku weng’wu gin m’atimo i Misiri. I ng’eye, wubedo i langa pi oro* dupa.

8 “‘Akelowu i ng’om mi Juamor m’ubed ubedo yo loka* Yordan, man gikiedo i dhogwu. Ento amiyogi i cingwu kara wumak ng’om migi, man adarugi pet kud i weng’wu. 9 I ng’eye, Balak ma wod Zipor m’ubimo mi Moab uai man ukiedo i dhu Israel. E elwong’o Balam ma wod Beor kara ulamwu. 10 Ento akwero niwinjo Balam. Pieno, emiyo iwu mugisa wi wadi wi wadi, man abodhowu kud i cinge.

11 “‘I ng’eye, wukadhu loka Yordan man wutundo i Yeriko. Man judongo* mi Yeriko, Juamor, Juperizi, Jukanan, Juhithi, Jugirgaci, Juhivi, man Juyebusi gikiedo i dhogwu, ento amiyogi i cingwu. 12 E aoro turcwiny* utelo yo i weng’wu, man eriemogi cen kud i weng’wu, niwacu jubim ario mi Juamor. Ubedo ngo nikum palamularu mwu kadi nikum athero mwu. 13 I ayi maeno re m’amiyo iwu ng’om ma wuol ungo pire man adhura ma wugiero ngo wun, e wucaku bedo i igi. Wubecamu piny m’uai i podho mir ulok man i podho mir oliv ma wupidho ngo wun.’

14 “Dong’ wulwor Yehova, wutim ire ku bedopwe* man gwokobedoleng’,* man wukab mungu ma kwaruwu gitimo igi yo loka Kulo* man i Misiri, man wutim ni Yehova. 15 Ento tek enen rac i weng’wu nitimo ni Yehova, wung’ii wun giwu tin eni nia wubitimo ni ng’a, ka nyo wubitimo ni mungu ma kwaruwu gitimo igi yo loka Kulo* kunoke ni mungu mi Juamor ma wubedo i ng’om migi. Ento an ku juoda re, wabitimo mwa ni Yehova.”

16 E dhanu udwoko kumae: “Wacopo paru ngo apara de niweko Yehova man nitimo ni mungu mange. 17 Yehova Mungu mwa re m’uwodhowa ku kwaruwa kud i ng’om mi Misiri, kud i ot mi ng’eca. En re m’etimo giranyutha ma dongo maeni i wang’wa, man en re m’ewotho gwokowa kud i yo ceke ma wawotho i iye, man kud i kind dhanu ceke ma wakadhu kud i kindgi. 18 Yehova uriemo dhanu ceke, uketho i iye Juamor m’ubed ukwo i ng’ombuni i wang’wa. Pieno, wan de wabitimo ni Yehova, pilembe en re m’e Mungu mwa.”

19 E Yocuwa uwacu ni dhanu kumae: “Wucopo timo ngo ni Yehova, kum etie Mungu ma leng’; etie Mungu ma kwayu jutim ire kende. Ebiweko ngo kier* ku dubo mwu. 20 Tek wuweko Yehova man wutimo ni mungu ma juwirok, e en de ebilokere i kumwu man ebidaruwu i ng’ey bero m’etimo iwu.”

21 Ento dhanu uyero ni Yocuwa kumae: “Ungo, wabitimo ni Yehova!” 22 E Yocuwa uwacu ni dhanu kumae: “Wu jumulembe mwu giwu nia nikum paru mwu giwu, wung’iyo wun giwu nitimo ni Yehova.” E gidwoko kumae: “Wa jumulembe.”

23 “Ka kumeno, dong’ wukab mungu ma juwirok ma n’i kindwu, man wulok adundewu i bang’ Yehova Mungu mir Israel.” 24 Dhanu uyero ni Yocuwa kumae: “Wabitimo ni Yehova Mungu mwa, man wabiworo dwande!”

25 E Yocuwa utimo lembariba ku dhanu cing’ nica man eketho igi cik ku lembang’ola i Cekem. 26 I ng’eye, Yocuwa ukiewo lembe maeno i buku mi Cik pa Mungu, man eting’o kidi ma dit ecomo i the yen ma dit ma n’i ng’et kabedo ma leng’ pa Yehova.

27 Man Yocuwa uyero ni dhanu ceke kumae: “Wunen! Kidi maeni bibedo jamulembe i kumwa, pilembe ewinjo lembe ceke ma Yehova uyero iwa, man ebibedo jamulembe i kumwu, kara kud wukwer Mungu mwu.” 28 E Yocuwa ulalu dhanu, ng’atuman udok i bang’ giralaga pare.

29 I ng’ey lembuno, Yocuwa ma wod Nun ma jatic pa Yehova ugam utho ma nwang’u oro pare dak acel kud apar. 30 E jukunye i ng’om ma jumiyo ire ni giralaga i Timnath-sera ma nwang’ere i ng’om gudi pa Efraim yo malu mi Got Gac. 31 Israel umedere nitimo ni Yehova i nindo ceke ma Yocuwa ukwo i iye man i nindo ceke mi judongo m’udog ukwo i ng’ey Yocuwa man m’ugam ung’eyo lembe ceke ma Yehova utimo pir Israel.

32 Cogo Yozefu ma Juisrael giai ko i Misiri juwok jukunyo i Cekem i theng podho ma Yakobo ugam ung’iewo i bang’ wot Hamor ma won Cekem ku sente mi tongolo dak acel; man edoko ni giralaga mi wot Yozefu.

33 Eleazar ma wod Arun de ugam utho. E jukunye i ungulu got* pa Fineas ma wode ma jugam jumiyo ire i ng’om gudi pa Efraim.