JUPOKLEMBE

1 I ng’ey tho pa Yocuwa, Juisrael* gipenjo Yehova kumae: “Ng’a m’i kindwa ma bilar idho malu pi nikiedo i dhu Jukanani?” 2 Yehova udwoko kumae: “Suru pa Yuda re ma bilar idho. Nen! adaru miyo ng’om mi Kanan i cing’gi.” 3 E suru pa Yuda uyero ni suru pa Simeon m’umeggi kumae: “Wubin waidh wakudwu i ng’om ma jumiyo iwa pi nicikiedo i dhu Jukanan. I ng’eye wabicidho wakudwu i ng’om ma jumiyo iwu.” Pieno suru pa Simeon ucidho karacelo kugi.

4 Kinde ma suru pa Yuda uidho, Yehova umiyo Jukanan ku Juperizi i cing’gi man giloyo dhanu elufu apar (10 000) i Bezek. 5 Ginwang’u Adoni-bezek i Bezek, gikiedo i dhoge keca man giloyo Jukanan ku Juperizi. 6 Saa ma Adoni-bezek uberingo, giriemo toke, e gimake man ging’ondo nyig cinge ma dongo ku nyig tiende de ma dongo. 7 E Adoni-bezek uyero kumae: “Jubim pier abiro ma jung’ondo nyig cing’gi ma dongo ku nyig tiendgi ma dongo gikwanyu ng’ili cam i the meza para. Mungu uculo ira tap calu m’agam atimo.” I ng’eye gitere i Yeruzalem, man ewok etho kuca.

8 Bende, dhanu mi Yuda gikiedo lwiny i dhu Yeruzalem man gimake; ginego dhanu mir adhurane ku palamularu man giwang’e ku mac. 9 I ng’ey maeno, dhanu mi Yuda giloro piny pi nikiedo i dhu Jukanan ma gibedo i ng’om gudi, i Negeb man i Cefela. 10 E dhanu mi Yuda gicidho i kum Jukanan ma gibekwo i Hebron (nwang’u nying’ Hebron ular ubino Kiriath-arba), man giloyo Cecai, Ahiman, man Thalmai.

11 Giai ku keca, gicidh gikiedo i dhu dhanu mi Debir. (Nwang’u nying’ Debir ular ubino Kiriath-sefer.) 12 Kaleb ugam uwacu kumae: “Ng’atu ma bikiedo i dhu adhura mi Kiriath-sefer man ebimake, abimiyo ire nyara ma Aksa ni dhaku.” 13 E Othniel ma wod Kenaz m’umin Kaleb ma nyanok umaku adhurane. Kaleb ugam umiyo ire Aksa ma nyare ni dhaku. 14 Kinde ma Aksa ubedok yo pare, erero Othniel nia ukway podho moko i bang’ won. Egam elor ku wi kana* pare. Man Kaleb upenje kumae: “Ibemito ang’o?” 15 Edwoko ire kumae: “Akweyi, mii ira mugisa, kum idaru miyo ira theng ng’om moko yo piny,* mii ira bende Guloth-maim.”* E Kaleb umiyo ire Guloth ma Malu ku Guloth ma Piny.

16 Man nyikway Jakeni ma jalwon Musa giidho karacelo ku dhanu mi Yuda kud i adhura mi ngasi, man gicidho i langa mi Yuda yo piny mir Arad. Gidok kuca man gicaku bedo i kind dhanu ma kuca. 17 Ento suru pa Yuda karacelo ku suru pa Simeon m’umeggi gicidho i kum Jukanan ma gibedo i adhura mi Zefath, gikiedo lwiny i dhu adhurane, e ginyothe. Pieno gicaku nying adhurane nia Horma.* 18 I ng’eye, suru pa Yuda umaku adhura mi Gaza ku ng’om m’i ng’ete, Ackelon ku ng’om m’i ng’ete, man Ekron ku ng’om m’i ng’ete. 19 Yehova ubino karacelo ku suru pa Yuda; pieno gimaku ng’om gudi, ento ecopere ngo igi niriemo dhanu ma bedo i ng’om pambu,* pilembe dhanune gibino ku magali mi lwiny mi cuma. 20 Jumiyo Hebron ni Kaleb tap calu ma Musa ular ung’olo, man eriemo wot Anak adek cen ku keca.

21 Ento nyikway Benjamin giriemo ngo Juyebusi ma gibedo i Yeruzalem, pieno Juyebusi gimediri asu nibedo karacelo ku nyikway Benjamin i Yeruzalem cil tin.

22 I saa ma rom eno, nyikway Yozefu giidho pi nimaku Bethel, man Yehova ubino karacelo kugi. 23 Nyikway Yozefu gibino libo Bethel (nwang’u nying adhurane ular ubino Luz), 24 man julibne gineno ng’atu moko m’ubewok kud i adhura. E giyero ire kumae: “Wakweyi, nyuth iwa yo m’umondo i adhura maeni, man wabitimo iri bero.”* 25 E ng’atune unyutho igi yo m’umondo i adhura, man ginego dhanu mir adhurane ku palamularu, ento giweko ng’atu maeno ku juruot pare ceke gicidho. 26 Ng’atune ugam ucidho i ng’om mi Juhithi man ewok egiero adhura moko ecaku nyinge Luz, m’utie nying adhurane nitundo tin eni.

27 Suru pa Manase umaku ngo adhura mi Beth-cean ku nyithindh adhura m’i ng’ete,* mi Tanak ku nyithindh adhura m’i ng’ete, mi Dor ku nyithindh adhura m’i ng’ete, mi Ibleam ku nyithindh adhura m’i ng’ete, man mi Megido ku nyithindh adhura m’i ng’ete. Jukanan giceriri asu i ng’ombe. 28 Kinde ma Juisrael gidoko tek, giketho Jukanan gicaku timo tic mir adici, ento giriemogi ceke ngo.

29 Suru pa Efraim de uriemo ngo Jukanan m’ubedo i Gezer. Pieno Jukanan gimediri asu nikwo i kindgi i Gezer.

30 Suru pa Zabulon uriemo ngo dhanu mi Kitron man dhanu mi Nahalol. Jukanan gimediri asu nibedo i kindgi, ento juketho gicaku timo tic mir adici.

31 Suru pa Acer uriemo ngo dhanu mir Ako, dhanu mi Sidon, mir Alab, mir Akzib, mi Helba, mir Afik, man mi Rehob. 32 Pieno nyikway Acer gimediri asu nibedo i kind Jukanan ma gibekwo i ng’ombe, pilembe giriemogi ngo.

33 Suru pa Nafthali uriemo ngo dhanu mi Beth-cemec man dhanu mi Beth-anath, ento gimediri asu nibedo i kind Jukanan ma gibekwo i ng’ombe. Giketho dhanu mi Beth-cemec ku mi Beth-anath gicaku timo tic mir adici igi.

34 Juamor gicero dhu nyikway Dan i ng’om gudi, kum giyiyo ngo nia gilor piny i pambu.* 35 E Juamor giceriri asu nibedo iwi Got Heres, i adhura mi Ajalon, man mi Calbim. Ento kinde ma tego mi* suru pa Yozefu umedere,* giketho gicaku timo tic mir adici. 36 Ng’om mi Juamor ucaku niai i gengi m’uidho i Akrabim, man niai i Sela niidho malu.

2 I ng’eye malaika pa Yehova uai kud i Gilgal, eidho i Bokim man ewacu kumae: “Awodhowu kud i Misiri akelowu i ng’om m’akwong’o pire ni kwaruwu. M’umedo maeno ayero nia, ‘abituro lembariba para kudwu ki ngo. 2 Wun lundo, wucikuru ngo nitimo lembariba ku dhanu m’i ng’om maeni man wucikuru nituro pemlam migi cen.’ Ento wuworo ngo dwanda. Pirang’o wutimo kumeno? 3 Eno re m’uketho ayero bende nia, ‘abiriemogi ngo cen kud i weng’wu, man gibibedo iwu ni uwic, e wubipodho i uwic mi woro mungu migi.’”

4 Kinde ma malaika pa Yehova uyero wec maeni ni Juisrael ceke, dhanu gicaku wak ma tek. 5 Pieno gicaku nying’ kabedone nia Bokim,* man githiero lam ni Yehova keca.

6 Saa ma Yocuwa uyero ni dhanu nia gidoki, Juisrael ceke gicidho ng’atuman i bang’ giralaga pare pi nimaku ng’ombe. 7 Dhanu gimediri nitimo ni Yehova i nindo ceke ma Yocuwa ukwo i iye, man i nindo ceke mi judongo ma gidong’ gikwo yor i ng’ey Yocuwa, man ma gineno lembe ma dongo ceke ma Yehova utimo ni Israel. 8 Yocuwa ma wod Nun, ma tie jatic pa Yehova ugam utho nwang’u etie ku oro dak acel kud apar. 9 E jukunye i ng’om ma jumiyo ire ni giralaga i Timnath-heres, i ng’om gudi pa Efraim, yo malu mi Got Gac. 10 Dhanu m’utuk maeno ceke githo calu kwarugi, man dhanu m’utuk mange uwok i ng’eygi ma ging’eyo Yehova ngo, kadok gin m’etimo ni Israel de.

11 E Juisrael gitimo gin ma rac i wang’ Yehova man gitimo ni* Baal. 12 Kumeno re ma giweko Yehova, Mungu pa weggi m’uwodhogi kud i ng’om mi Misiri. Gilubo mungu mange, ma gi mungu mi dhanu m’i ng’om m’udhokogi, girum i wang’gi man ginyayu ng’eicwiny i Yehova. 13 Giweko Yehova man gitimo ni Baal, man ni ayi gin m’acwiya ma Actoreth. 14 E ng’eicwiny pa Yehova uopo i kum Israel, pieno emiyogi i cing’ weg ayeki man giyakugi. Ewenjogi* i cing’ judegi m’utiekogi, uketho gibino mbe ku copo mi cungo i wang’ judegi migi. 15 Kaka moko ci ma gicidho i iye, cing’ Yehova ubino i kumgi pi nikelo can i wigi, tap calu ma Yehova ular uyero, man tap calu ma Yehova ular ung’olo igi ku kwong’, uketho gibino i masendi ma dit. 16 Pieno Yehova ubed umiyo igi jupoklembe pi nibodhogi kud i cing’ ju m’ubeyakugi.

17 Ento gikwero niwinjo kadok jupoklembe, gitimo asara ku mungu mange, man girum i wang’gi. Gilokiri nyapio pio kud i yo ma kwarugi ma gibed giworo cik pa Yehova giwotho i iye. Gitimo ngo calu kwarugi. 18 Ka Yehova umiyo igi japoklembe moko, Yehova bedo ku japoklembene, man ebodhogi kud i cing’ judegi migi i nindo ceke ma japoklembene tie i iye kwo; kum kisa ubed unego Yehova i kumgi pi cur ma gibecur ko nikum dhanu m’ubediyogi, man m’ubesendogi.

19 Ento ka japoklembene tho ci, gidok gitimo kendo lembe ma reco nisagu ma weggi utimo, nwang’u gibelubo tok mungu mange, gibetimo igi man giberum i wang’gi. Gibed giweko ngo timo migi man kura migi mi jai. 20 E ng’eicwiny pa Yehova ugam uopo i kum Israel man ewacu kumae: “Calu thek maeni uturo lembariba para m’ang’olo ni kwarugi man giwora ngo, 21 an bende abiriemo ngo kud i wang’gi kadok thek acel de m’i kind thek ma Yocuwa uweko kinde m’etho. 22 Abitimo kumeni kara amul i Juisrael pi ning’eyo ka nyo gibimoko i kum yo pa Yehova, man gibiwotho i iye calu ma kwarugi timo.” 23 E Yehova uweko thek maeno gidong’ asu. Eriemogi ngo nyapio pio, man emiyogi ngo i cing’ Yocuwa.

3 Maeni gi thek ma Yehova uweko gidong’ asu kara gimul i Juisrael ceke ma ging’eyo ngo pi lwiny moko acel de mi Kanan 2 (lembe maeni utimere kara dhanu m’utuk m’ulubo mir Israel ging’ey nia lwiny utie ang’o, gi ju ma nwang’u gilar ging’eyo ngo lembe ma kumeno i wang’e): 3 Rwodhi abic mi Jufilisti, ku Jukanan ceke, Jusidon, man Juhivi ma gikwo iwi Got Lebanon, niai i kum Got Baal-hermon nitundo bor i kum Lebo-hamath.* 4 Juweko thek maeno kara nikumgi jumul i Israel pi ning’eyo ka nyo gibiworo cik ma Yehova umiyo ni weggi nikadhu kud i bang’ Musa. 5 Pieno Juisrael gikwo i kind Jukanan, Juhithi, Juamor, Juperizi, Juhivi, man Juyebusi. 6 Juisrael gibed gigamu anyira migi ni mon, man gibed gimiyo awiya migi ma nyir ni wotgi, e gicaku timo ni mungu migi.

7 E Juisrael gitimo gin ma rac i wang’ Yehova, man giwil i kum Yehova Mungu migi, gitimo ni Baal man ni mbegi mi thier.* 8 Pieno ng’eicwiny pa Yehova uopo i kum Israel man elworogi i cing’ Kucan-ricathaim m’ubimo mi Mezopothamia.* Juisrael gitimo ni Kucan-ricathaim pi oro abora. 9 I ng’eye, kinde ma Juisrael gikwayu Yehova ukonygi, Yehova umiyo jalar pi nibodhogi; en e Othniel ma wod Kenaz m’umin Kaleb ma nyanok. 10 Tipo pa Yehova ubino i wiye, e edoko japoklembe mir Israel. Kinde m’ecidho i lwiny, Yehova umiyo Kucan-ricathaim m’ubimo mi Mezopothamia* i cinge man evoyo Kucan-ricathaim. 11 I ng’ey maeno, ng’om uyom* pi oro pier ang’wen. E Othniel ma wod Kenaz ugam utho.

12 Juisrael gicaku timo kendo gin ma rac i wang’ Yehova. Pieno Yehova uweko Eglon m’ubimo mi Moab uvoyo Israel, pilembe gitimo gin ma rac i wang’ Yehova. 13 M’umedo maeno, ecoro Juamon ku Juamalek i kumgi. Gitugo lwiny i dhu Israel man gimaku adhura mi ngasi. 14 Juisrael gitimo ni Eglon m’ubimo mi Moab pi oro apar abora. 15 I ng’eye Juisrael gikwayu Yehova ukonygi, e Yehova umiyo igi jalar; en e Ehud ma wod Gera mi suru pa Benjamin ma cinge tie acam. Nindo moko i ng’eye, Juisrael giore eter ajok ni Eglon m’ubimo mi Moab. 16 Nwang’u Ehud uthiedho ire palamularu ma lake kun ku kun, ma borne bot acel,* man eroye i the bongu pare i dire ma yor acwic. 17 E ecidh emiyo ajokne ni Eglon m’ubimo mi Moab. Nwang’u Eglon ucwey lee mandha.

18 Kinde m’Ehud udaru nimiyo ajok, gigam giloko ku dhanu m’uyeyo ajokne. 19 Ento saa ma gitundo i kum ayi gin m’ang’ika* mi Gilgal, elund eloko ku ng’eye man ecidh eyero kumae: “E ubimo, atie ku rwonglembe mir amung’ iri!” Ubimo ugam uyero kumae: “Wuling’!” E jutic pare ceke giweke. 20 Pieno Ehud ubino i bang’e nwang’u ebedo kende i kusika pare ma yo malu ma iye ng’ic. E Ehud uyero kumae: “Atie ku rwonglembe ma Mungu uoro iri.” E eai malu kud iwi komker* pare. 21 Ehud ugam uwodho palamularu ma n’i dire ma yor acwic ku cinge ma yor acam, e edhuye i Eglon. 22 Lak palane ku there ceke umondo truk i iye, man miyo uciko wi palane, kum Ehud uwodho ngo palamularune kud i iye; e ceth uwok kud i iye. 23 Ehud uwok kud i wang’ ot,* eciko dhugola ceke mi kusika ma yo malu man etielogi i ng’eye. 24 I ng’ey m’ecidho, jutic giloko man gineno nia dhugola ceke mi kusika ma yo malu ubedo atwiya. Pieno giyero kumae: “Eni ebekonyere* i kusika ma ng’ic ma yor i iye.” 25 Gikuro kpe nitundo wigi lal, ento kinde ma gineno nia asu ebeyabu ngo dhugola mi kusika ma yo malu, giting’o nyamufutha man giyabu dhugolanegi, e gineno rwoth migi upodho i die ng’om, ma dong’ etho!

26 Kinde ma fodi gibenyamiri, Ehud uringo, ekadhu kud i kaka mir ayi gin m’ang’ika* man etundo museme i Seira. 27 Saa m’etundo, ekudho agwara i ng’om gudi pa Efraim; e Juisrael giloro piny kud i ng’om gudi, en ke ebino telo wigi. 28 I ng’eye eyero igi kumae: “Wulub toka, kum Yehova udaru miyo judegi mwu ma Jumoab i cingwu.” E gilubo toke man gimaku kulo Yordan kaka m’emwomere i iye pi nicero dhu Jumoab kara kud gikadhi, man giweko ngo ng’atu moko acel de ukadhi. 29 I saa maeno, ginego Jumoab ma romo elufu apar (10 000), gin ceke gi jumaco ma tek man ma cwinygi de tek; kadok acel de mbe m’uboth. 30 Niai i ceng’ maeca, Jumoab gibedo i the loc mir Israel, e ng’om ugam uyom* pi oro pier abora.

31 I ng’ey Ehud ke ubino Camgar ma wod Anath, m’unego Jufilisti dak abusiel kud uluth ma lake ju cuma* ma juleko ko dhiang’; en de egam ebodho Israel.

4 Ento i ng’ey ma Ehud utho, Juisrael gitimo lembe ma rac kendo i wang’ Yehova. 2 E Yehova uwenjogi* i cing’ Yabin m’ubimo mi Kanan, m’ubino bimo i Hazor. Jadit mir udul askari pare ubino Sisera m’ubed ukwo i Haroceth-ha-goyim.* 3 Nwang’u Yabin* ubino ku magali mi cuma dak abung’wen man esendo Juisrael ku rac pi oro pier ario. E Juisrael giwak i bang’ Yehova.

4 Nwang’u Debora ma jabila ma dhaku ma ci Lapidoth ubino poko lembe i Israel i nindo maeca. 5 Ebed ebedo i the yend thith pare* i kind Rama ku Bethel i ng’om gudi pa Efraim; Juisrael gibed gicidho i bang’e pi pokolembe. 6 Eoro jucidh julwong’o Barak ma wod Abinoam kud i Kedec-nafthali man ewacu ire kumae: “Yehova Mungu mir Israel ung’olo kumae: ‘Cidhi man idh iwi* got Tabor, ting’ jumaco elufu apar (10 000) mi suru pa Nafthali man pa Zabulon karacelo kudi. 7 Abikelo Sisera ma tie jadit mir udul askari pa Yabin i beng’i, karacelo ku magali pare mi lwiny, man udul askari pare i kulo* Kicon, man abimiye i cingi.’”

8 E Barak uyero ire kumae: “Tek wabicidho wakudi, abicidho; ento tek ibicidho ngo, an de abicidho ngo.” 9 Debora udwoko ire kumae: “Abicidho kudi andhandha. Ento lwiny m’ibecidho i iyene bimiyo ngo iri yung, kum Yehova bimiyo Sisera i cing’ ng’atu ma dhaku.” E Debora uai malu man ecidho karacelo ku Barak i Kedec. 10 Barak uwaku suru pa Zabulon man pa Nafthali i Kedec, e jumaco elufu apar (10 000) gilubo ng’eye. Debora bende uidho karacelo kude.

11 Nwang’u Heber ma Jakeni ukoyere ku Jukeni, ma tie nyikway Hobab ma jalwon Musa, man eguro hema pare ceng’ini ku yen ma dit mi Zananim ma n’i Kedec.

12 Juyero ni Sisera nia Barak ma wod Abinoam uidho iwi got Tabor. 13 E wang’ acel Sisera ucoko magali pare ceke mi lwiny; magali dak abung’wen mi cuma, man udul askari ceke m’ubino kude ma giai i Haroceth-ha-goyim,* e gicidho i kulo* mi Kicon. 14 Debora uwacu ni Barak kumae: “Ai malu, kum tin tie ceng’ ma Yehova bimiyo iye Sisera i cingi. Nyo Yehova utelo yo en ungo i weng’i?” E Barak uloro kud iwi got Tabor karacelo ku jumaco elufu apar (10 000) m’ubelubo ng’eye. 15 Yehova ugam ujebo wi Sisera ku magali pare ceke mi lwiny, man udul askari pare ceke i wang’ palamularu pa Barak. Pieno Sisera upiey kud iwi magali pare man eringo ku tiende. 16 Barak uriemo tok magali mi lwiny man udul askarine nitundo bor i Haroceth-ha-goyim.* E junego udul askari pa Sisera ceke ku palamularu; kadok acel de mbe m’udong’.

17 Ento Sisera uringo ku tiende nitundo i hema pa Yael ma dhaku pa Heber ma Jakeni, kum kwiyocwiny ubino nuti i kind Yabin m’ubimo mir Hazor ku ot pa Heber ma Jakeni. 18 E Yael uwok woko pi nirombo ku Sisera man ewacu ire kumae: “Mondi rwoth para, mond kae. Lworo kud unegi.” E Sisera umondo i hema pare, man eume ku balangiti. 19 I ng’eye, Sisera uwacu ire kumae: “Ka copere, kemii ira pii moko nyanok amadhi, kum rieu ubenega.” E Yael uyabu dhu usau mi cak man emiyo emadhu, i ng’eye edok eume kendo. 20 Sisera uwacu ire kumae: “Cung i dhugola mi hema, man ka ng’atu moko ubino man upenji nia, ‘nyo ng’atu moko tie keni?’ Wac nia, ‘umbe!’”

21 Ento Yael ma dhaku pa Heber uting’o gute* mi hema man nyondo* i cinge. E kinde ma Sisera unindo rut nikum olo, Yael ukwalu tiende nyayoo yoo, ecoro i ng’ete man eguro gutene i thenge; egure ekadhu plu i ng’om, e Sisera ugam utho.

22 Barak utundo keca m’eberiemo tok Sisera, e Yael uwok pi nirombo kude man ewacu kumae: “Bin, abinyutho iri ng’atu m’ibesayu.” Barak umondo karacelo kude man eneno Sisera uvuto ma dong’ etho ku gute* mi hema ma juguro ukadhu plu i thenge.

23 I nindo maeca, Mungu uketho Yabin m’ubimo mi Kanan i the loc mi Juisrael. 24 Juisrael gidoko tek nisagu i kum Yabin m’ubimo mi Kanan, nitundo ginyotho Yabin m’ubimo mi Kanan cen.

5 I nindo maeca, Debora karacelo ku Barak ma wod Abinoam giwero wer ma e:

 3 Wuwinji, e wu jubim! Wucik ithwu, wu jutelwic!

Abiwer ni Yehova.

Abiwero wer mi pak* ni Yehova Mungu mir Israel.

Wupak Yehova!

I ng’eye dhanu pa Yehova giloro piny i dhugang’.

12 Cew, cew, E Debora!

Cew, cew, wer wer!

Ai malu Barak! Ter dhanu m’imaku bor, e in i wod Abinoam!

Juore ecidho ku tiende i poga.*

Jiji ubino lee i kind ungu pa Ruben.

Kum jiji ubino lee i kind ungu pa Ruben.

Ento giyaku ngo mola ma tar nyanok de.

Inyono wi weg tego i the tiendi, E ng’eyong’ec* para.

25 Sisera ukwayu pii, emiyo ire cak.

Emiyo ire cak m’umakere i tabu ma leng’ mi timo foc.*

Pirang’o woy mi tiend magali pare ubegalu kumeni?’

E ng’om uyom* pi oro pier ang’wen.

6 Ento Juisrael gitimo kendo gin ma rac i wang’ Yehova, e Yehova umiyogi i cing’ Jumidian pi oro abiro. 2 Jumidian gisendo Juisrael lee. Lembe mi Jumidian uketho Juisrael giyiko igi kapondo* i gudi, i oding’om, man kaka ma tundo tek i iye. 3 Tek Juisrael gipidho piny, Jumidian, Juamalek, man dhanu ma yo nyangu gibin gitugo lwiny i wigi. 4 Gibed gibin gigonjo i kum Juisrael, man ginyotho cam m’ucek i ng’ombe nitundo i Gaza, giweko ngo cam moko nyanok de ni Juisrael; kadok urombo, kadi thwon dhiang’, kadi kana. 5 Kum gibed gibino ku lim migi man hema migi wel ma lee dit calu bonyo, man wendgi ku wend ngamia de copo kwanere ngo; gimondo i ng’ombe man ginyothe. 6 Pieno Jumidian giketho Juisrael udoko jucan ma ngolo ngolo; e Juisrael gigam gikwayu Yehova ukonygi.

7 Kinde ma Juisrael gikwayu Yehova ulargi kud i cing’ Jumidian, 8 Yehova ugam uoro jabila moko i bang’ Juisrael m’uwacu igi kumae: “Yehova Mungu mir Israel uyero kumae: ‘Awodhowu kud i Misiri, kud i ng’om ma nwang’u wubino ng’eca i iye. 9 Pieno abodhowu kud i cing’ Jumisiri man kud i cing’ jusend mwu ceke, man ariemogi cen kud i weng’wu, e amiyo ng’om migi iwu. 10 Man awacu iwu kumae: “An a Yehova Mungu mwu. Wucikuru ngo nilworo mungu mi Juamor ma wubebedo i ng’om migi.” Ento wuwora ngo.’”*

11 I ng’eye malaika pa Yehova ubino man ewok ebedo i the yen ma dit m’ubino i Ofra; ebino yen pa Yoac ma Jaabiezer. Nwang’u wode ma Gideon ubefwodo nganu i vur mi biyo pigulok kara Jumidian kud unen. 12 E malaika pa Yehova uwok ire man eyero kumae: “Yehova ni kudi, in m’i jaramony ma tek.” 13 Gideon ulund udwoko ire kumae: “Tim ira kisa, rwoth para; tekene Yehova ni kudwa, pirang’o ke lembe maeni zoo uwok i wiwa? Tic pare ma wang’u ijo ni kani, ma kwaruwa gikoro pire iwa kinde ma giyero nia, ‘nyo Yehova ngo re m’uwodhowa kud i ng’om mi Misiri?’ Ento kawoni Yehova uwenjowa man emiyowa i cing’ Jumidian.” 14 E Yehova uneno bang’e man eyero ire kumae: “Cidh ku tego m’itie ko, man ibibodho Juisrael kud i cing’ Jumidian. Nyo tie an ungo m’abeori?” 15 Gideon udwoko ire kumae: “Tim ira kisa Yehova. Acopo bodho Israel nenedi? Nen! jufwa* gi nok magwei i suru pa Manase, man an de a nok nisagu zoo i ot pa vwa.” 16 Ento Yehova uyero ire kumae: “Abibedo karacelo kudi, e ibigoyo Jumidian ve ibegoyo ng’atu acel.”

17 I ng’eye Gideon uyero ire kumae: “Tek anwang’u bero i weng’i, tim ira giranyutha moko kara ang’ey nia in re m’ibeweco kuda. 18 Akweyi, kud icidh ku keni nitundo m’abidwogo ku giramiya para man abikethe i weng’i.” E edwoko ire kumae: “Abibedo keni nitundo m’ibidwogo.” 19 Gideon ugam ucidho man etedo nyathi diel, egamu bende mogo efa* acel etedo ko mukathi ma thobi mbe i iye. Eketho ring’one i kithunga man cweje ke i agulu mi tedo; e eterogi woko i bang’e man ewok emiyogi ire i the yen ma dit.

20 E malaika pa Mungu mandha uwacu ire kumae: “Ting’ ring’o ku mukathi ma thobi mbe i iye man ikethgi iwi cana ma dit ma ca, konj cwe bende.” E etimo kumeno. 21 I ng’eye malaika pa Yehova urieyo uluth m’ubino i cinge man emulo kum ring’o ku mukathi ma thobi mbe i iye ku dhog uluthne, e mac uwok hew kud i canane man uwang’u ring’o ku mukathi ma thobi mbe i iye bende. Malaika pa Yehova ugam urwinyo kud i wang’e. 22 E Gideon unyang’ nia eca ubino malaika pa Yehova.

Man Gideon uyero ndhu ndhu kumae: “Can i wiya, Ubimo ma Malu ngbir Yehova, kum aneno malaika pa Yehova wang’ ku wang’!” 23 Ento Yehova uwacu ire kumae: “Bed ma cwinyi kwiyo. Lworo kud unegi; ibitho ngo.” 24 Gideon ugam ugiero pemlam kakeca ni Yehova, man julwong’o nyinge Yehova-calom* nitundo tin. Fodi etie asu i Ofra mi Juabiezer.

25 I diewor maeca Yehova uyero ire kumae: “Ting’ thwon dhiang’ pa wuru, thwon dhiang’ne mir ario ma oro pare abiro, man rwomb pemlam ma wuru ugiero ni Baal cen, ng’ond mbegi mi thier* ma n’i ng’ete bende. 26 I ng’ey m’igiero pemlam ni Yehova Mungu peri i kaka ma tek maeni ku kidi m’irodo aroda, ting’ thwon dhiang’ mir ario man ithiere ni lam m’awang’a iwi nyithi dund yen mi mbegi mi thier* m’ing’ondo.” 27 E Gideon uting’o jumaco apar m’i kind jutic pare man etimo tap calu ma Yehova uyero ire. Ento elworo dhanu mi ot pa won ku dhanu mir adhura lee mandha uketho etime ngo ku dieceng’, pieno etime ku diewor.

28 Urwonde kinde ma dhanu mir adhurane giai pir kugweno, gineno nia jurwombo pemlam pa Baal, jung’ondo mbegi mi thier* m’ubino i ng’ete de, man juthiero thwon dhiang’ mir ario iwi pemlam ma jugiero. 29 E gipenjiri i kindgi kumae: “Ng’a m’utimo gin maeni?” I ng’ey ma gisayu lembe, giyero kumae: “Gideon ma wod Yoac re m’utimo gin maeni.” 30 Pieno dhanu mir adhurane giwacu ni Yoac kumae: “Wodh wodi woko kara etho, kum erwombo pemlam pa Baal man eng’ondo mbegi mi thier* ma n’i ng’ete.” 31 Yoac ulund uyero ni dhanu ceke m’ubino loko dhoggi kude kumae: “Nyo wun re ma wucikuru nicero bang’ Baali? Nyo wun re ma wucikuru nibodhe? Ng’atu m’ubecero bang’ Baal jucikiri ninege cen kugweno maeni. Kan etie mungu, ecer bang’e gire calu ma ng’atu moko urwombo pemlam pare.” 32 E niai cing’ nica ecaku lwong’o Gideon nia Yerubaal*, kum ewacu kumae: “Wuwek Baal ucer bang’e gire, pilembe ng’atu moko urwombo pemlam pare.”

33 Jumidian ceke ku Juamalek man dhanu ma yo nyangu gidikiri karacelo, gikadhu loka* i poga* mi Yezreel man gigonjo keca. 34 Tipo pa Yehova ugam ubino iwi* Gideon man ekudho agwara, e Juabiezer gicokiri i ng’eye. 35 Eoro jukwenda gicidh gilwong’ dhanu ceke mi suru pa Manase man gin de gicokiri i ng’eye. Eoro bende jukwenda i suru pa Acer, pa Zabulon, man pa Nafthali; gin bende gibin girombo kude.

36 E Gideon uyero ni Mungu mandha kumae: “Tek ibebodho Israel nikadhu kud i bang’a tap calu m’ing’olo, 37 nen, abepedho adila urombo i lela mi fwodo cam. Tek thoi ung’ier i kum adilane kende ento ng’om m’i ng’ete ceke uthwo kaw, e andha abing’eyo nia ibibodho Israel nikadhu kud i bang’a tap calu m’ing’olo.” 38 Man etimere de kumeno. Kinde m’eai urwonde pir kugweno, emino adila urombone man pii mi thoi m’ebiyo kud i adilane upong’o tabu ma dit mi timo foc.* 39 Gideon ulund uyero ni Mungu mandha kumae: “Ng’eicwiny peri kud uop i kuma, ento kewek akweyi kendo wang’ acel kende. Kewek apim kendo wang’ acel kende kud adila urombo. Ka copere, wek adila urombo kende m’uthwo kaw, ento thoi ung’ier iwi ng’om m’i ng’ete zoo.” 40 E Mungu utimo kumeno i diewor maeca; adila urombo kende m’uthwo, ento thoi ung’ier iwi ng’om m’i ng’ete ceke.

7 I ng’eye, Yerubaal niwacu Gideon, karacelo ku dhanu ceke m’ubino kude giai pir kugweno man gigonjo i dhu kulo mi Harod, Jumidian ke gigonjo yo malu migi i kum ungulu got* More i poga.* 2 E Yehova uyero ni Gideon kumae: “Acopo miyo ngo Jumidian i cingwu kum dhanu ma ni kudi gi lee dit. Israel bimaru lulere i wiya man ebiwacu nia, ‘cinga gira re m’ubodha.’ 3 Kawoni akweyi, yer ni dhanu ma ni karacelo kudi kumae: ‘Ng’atu ma tek lworo ubenege man kume ubemiel, elok edok i pacu.’” Pieno Gideon ukethogi i amulaic. E dhanu elufu pier ario wi ario (22 000) giloko gidok i pacu, dhanu elufu apar (10 000) re ma gidong’.

4 Ento Yehova uyero ni Gideon kendo kumae: “Fodi dhanu tie lee asu. Keth gilor piny i dhu kulo kara acidh alondgi* iri kuca. Kan abiyero iri nia, ‘cidh ku ng’atu ma e,’ e ibicidho kude; ento kan abiyero iri nia, ‘kud icidh ku ng’atu ma e,’ e ebicidho ngo.” 5 Egam eloro ku dhanu i dhu kulo.

E Yehova uyero ni Gideon kumae: “Koy ng’atu moko ci m’ubenang’u pii ku lebe calu gwok kud i kind ju ma girum iwi cong’gi pi nimadhu pii.” 6 Wend dhanu ma ginang’u pii anang’a, ma gitwome ku cing’gi ka gitero i dhoggi ubino jumaco dak adek. Dong dhanu mange ceke girum iwi cong’gi ka gimadhu pii.

7 E Yehova uyero ni Gideon kumae: “Abibodhowu ku jumaco dak adek ma ginang’u pii ku lebgi, man abimiyo Jumidian i cingwu. Ento wek dong dhanu mange no gidok i pacu.” 8 Pieno i ng’ey ma gigamu cam kud agwara kud i bang’ juaskari mange, Gideon uloko jumaco mange ceke mir Israel gidok i pacu, man edong’ ku juaskari dak adek kende. Nwang’u kagonjo mi Jumidian ni yo piny kugi i poga.

9 Diewor nica Yehova uyero ire kumae: “Ai malu man mak kagonjone, kum adaru miye i cingi. 10 Ento tek lworo ubenegi nimaku kagonjone, lor piny kuca karacelo ku jatic peri ma Pura. 11 Winj gin ma gibeyero, e i ng’eye ibinwang’u tegocwiny* mi maku kagonjone.” E Gideon giku Pura ma jatic pare giloro piny nitundo i dhu kagonjo mi judegi migi.

12 Nwang’u Jumidian, Juamalek man dhanu ceke ma yo Nyangu gicido pambu bii calu udul bonyo man wend ngamia migi kwanere ngo, kum gipong’ calu nying kwiyo mi dhu nam. 13 Kinde ma Gideon uloro, nwang’u ng’atu moko ubekoro lek m’eleko ni jawodhe, man ewacu kumae: “Aleko lek moko kumae: Lungu mukathi moko ma ngulu ngulu mi nganu ma juyuke ubino ng’ielere nitundo i kagonjo mi Jumidian. Kinde m’etundo i kum hema acel, egoye ma tek mandha, e hemane podho. Eyo, eloko there aloka man hemane rwombere.” 14 E jawodhene uyero kumae: “Eni copo bedo ndhu palamularu pa Gideon ma wod Yoac ma ng’atu mir Israel. Mungu udaru miyo Jumidian ku kagonjo ceke i cinge.”

15 Saa ma Gideon uwinjo ekoro lek man thelembene ci, egam epodho piny i wang’ Mungu. I ng’eye edok i kagonjo mi Juisrael man eyero kumae: “Wuai malu, kum Yehova udaru miyo kagonjo mi Jumidian i cingwu.” 16 E epoko i dhanu dak adek ni ungu adek man emiyo agwara i cing’gi ceke kud agulu ma dongo ma igi nanu, ku ridhro m’ubeliel i agulune. 17 E eyero igi kumae: “Wunen an man wutim tap calu m’abitimo. Kinde m’abitundo i dhu kagonjo, wutim tap calu m’atimo. 18 Saa m’abikudho agwara, an man dhanu ceke ma tie karacelo kuda, wun de wukudh agwara i ng’et kagonjo ceke man wukok kumae: ‘Pi Yehova man pi Gideon!’”

19 Gideon ku dhanu dak acel ma ni karacelo kude gitundo i dhu kagonjo i acaki mi kur mi diewor,* tap i ng’ey ma juai juwilo jukur awila. Gikudho agwara man ging’enyo agulu ma dongo m’ubino i cing’gi. 20 Ungu adek maeno gigam gikudho agwara man ging’enyo agulu ma dongone. Gimaku ridhro i cing’gi mir acam man gikudho agwara mi cing’gi ma yor acwic, e gikok ma tek kumae: “Palamularu pa Yehova man pa Gideon!” 21 I kind saa maeno ng’atuman ucungo kakare i ng’et kagonjo tingili, e udul mony mi Jumidian ceke giringo ma gibegoyo nduru. 22 Juaskari dak adekne gimediri asu nikudho agwara, man Yehova uloko dhu palamularu pa ng’atuman i kum wadi i kagonjone ceke; e juaskari mi Jumidian giringo bor nitundo i Beth-citha, yor i kum Zerera, giringo nitundo bor ceng’ini kud Abel-mehola i kum Tabath.

23 Man juwaku dhanu mir Israel mi suru pa Nafthali, pa Acer, man pa Manase ceke; gicokiri karacelo man giriemo tok Jumidian. 24 Gideon uoro jukwenda i ng’om gudi pa Efraim ceke man ewacu kumae: “Wulor i kum Jumidian man wucidh wung’ol dhoggi kaka ma pii mwomere i iye, nitundo bor i Beth-bara man i Yordan.” Pieno dhanu ceke mir Efraim gicokiri karacelo, gicidh ging’olo dhoggi kaka ma pii mwomere i iye nitundo i Beth-bara man i Yordan. 25 Gimaku bende rwodhi ario mi Jumidian, Oreb giku Zeeb; ginego Oreb iwi cana pa Oreb, Zeeb ke ginego i vur mi biyo pigulok pa Zeeb. Gimediri asu niriemo tok Jumidian man gikelo wi Oreb ku wi Zeeb i bang’ Gideon ceng’ini ku kulo Yordan.

8 E dhanu mi suru pa Efraim giyero ni Gideon kumae: “Itimo iwa lembang’o eni? Pirang’o ilwong’owa ngo kinde m’icidh ikiedo i dhu Jumidiani?” E gidhaw i wiye ku kwinyo mi tuko ngo. 2 Ento ewacu igi kumae: “Atimo ang’o m’usagu mwu? Kund cam ma Efraim ubeko uloyo ngo nying ulok m’Abiezer upono? 3 Mungu umiyo Oreb man Zeeb ma gi rwodhi mi Midian i cingwu, dong’ an ke atimo ang’o m’usagu mwu?” Kinde m’eweco i ayi* maeno, e kwinyo migi ukwiyo.

4 Gideon ugam utundo i kulo Yordan man ekadhu kulone. En ku dhanu dak adek m’ubino kude giol, ento gimediri asu niriemo tok judegi migi. 5 Eyero ni jumaco mi Sukoth kumae: “Ka copere, wumii lungu mukathi moko ni dhanu m’ulubo ng’eya kum giol, man aberiemo tok Zeba giku Zalmuna ma gi jubim mi Midian.” 6 Ento rwodhi mi Sukoth giyero kumae: “Nyo dong’ idaru maku Zeba giku Zalmuna i cingi ma nia wamii ko mukathi ni juaskari peri e?” 7 E Gideon uyero kumae: “Ber, ka Yehova bimiyo Zeba giku Zalmuna i cinga, abifwodowu kud ukudho man ku laa mi langa.” 8 Egam eai ku keca eidho i Penuel man ewok ekwayu gin ma rom, ento jumaco mi Penuel de gidwoko ire lembe calu jumaco mi Sukoth. 9 Pieno eyero bende ni jumaco mi Penuel kumae: “Kan adwogo ku kwiyocwiny, abirwombo ot ma wiw maeni cen.”

10 Nwang’u Zeba man Zalmuna gibino i Karkor kud udul askari migi, kago dhanu elufu apar abic (15 000). Gin eno kendgi re ma gidong’ kud i kind udul askari ceke mi dhanu ma yo Nyangu, kum nwang’u juaskari elufu dak acel pier ario (120 000) ma gimaku palamularu githo. 11 Gideon uidho asu kud i yo mi ju ma bedo i hema yo nyangu mi Noba man mi Yogbeha, man emaku kagonjo mi judegi migi ma nwang’u jubino kuro ngo. 12 Kinde ma Zeba giku Zalmuna giringo, eriemo tokgi man emaku jubim ario maeno mi Midian, Zeba man Zalmuna, e ndiri umaku dhanu ceke mi kagonjo.

13 Gideon ma wod Yoac ugam uloko kud i lwiny, eng’olo kud i kakadhu m’uidho i Heres. 14 Kinde ma en’i yo, ewok emaku jalawobi moko mi Sukoth man epenje ku penji. E jalawobine ukiewo ire nying’ rwodhi man judongo mi Sukoth; gin ceke gibino dhanu pier abiro wi abiro. 15 Egam ecidho i bang’ jumaco mi Sukoth man ewacu igi kumae: “Zeba giku Zalmuna gini eni, ma wunywara pigi wuwacu kumae: ‘Nyo dong’ idaru maku Zeba giku Zalmuna i cingi ma nia wamii ko mukathi ni dhanu peri ma giol e?’” 16 Egam emaku judongo mir adhurane, man emiyo ponji ni judongo mi Sukoth kud ukudho man laa mi langa. 17 I ng’eye erwombo ot ma wiw mi Penuel man enego jumaco mir adhurane.

18 Epenjo Zeba giku Zalmuna kumae: “Jumaco ma wunego i Tabor gibino dhanu ma nenedi?” Gidwoko kumae: “Gibino calu in, ng’atuman ubino nen ve wod ubimo.” 19 Gideon uyero kumae: “Gibino umego para, wot maa. Calu andha Yehova ubedo kwo, ka nwang’u wuwekogi ma kwo, nwang’u anegowu ngo.” 20 E eyero ni Yether ma kayu pare kumae: “Ai malu, man neggi.” Ento jalawobine uwodho ngo palamularu pare; lworo ubino nege, pilembe nwang’u fodi en aradu. 21 Zeba giku Zalmuna gilund giyero kumae: “Ai man inegwa in, kum jung’eyo nico nikum tego pare.”* Pieno Gideon ugam uai malu man enego Zeba giku Zalmuna, man eting’o jamruko mir ayi dwi m’upor m’ubino i ng’ut ngamia migi.

22 I ng’eye dhanu mir Israel giyero ni Gideon kumae: “Bim wiwa, in ku wodi man nyakweri, pilembe ibodhowa kud i cing’ Midian.” 23 Ento Gideon udwoko igi kumae: “Abibimo wiwu ngo, kadi woda de bibimo wiwu ngo. Yehova re ma bibimo wiwu.” 24 Gideon umedo kumae: “Akwayuwu ku gin acel: Ng’atuman m’i kindwu umii ira lengethu mi um acel m’i kind gin m’eyaku.” (Ju ma giloyone gibino ku lengethu mi um mi mola ma kwar pilembe gibino Juismael.) 25 Gidwoko ire kumae: “Wabimiyogi iri andha.” E gigam gipedho bongu moko man ng’atuman m’i kindgi ubolo lengethu acel mi um m’i kind gin m’eyaku i wiye. 26 Pek mi lengethu mi um mi mola ma kwar m’ekwayune utundo cekel* elufu acel ku dak abiro (1 700), man bende jamruko mir ayi dwi m’upor, lengethu, bongu mir uluga ma rwodhi mi Midian gibed gikendo, man tigo m’i ng’ut ngamia.

27 Gideon uyiko kude efodh* man ekethe i adhura ma thugi i Ofra; e Juisrael ceke gicaku wore* keca, man edoko ni uwic ni Gideon man ni juruot pare.

28 Pieno Jumidian gibedo i the loc mi Juisrael, man gisendogi ngo kendo;* e ng’om ugam uyom* pi oro pier ang’wen i nindo ceke pa Gideon.

29 E Yerubaal ma wod Yoac udok i pacu pare man ebedo kuca.

30 Gideon unyolo awiya ma co pier abiro,* pilembe ebino ku mon dupa. 31 Dhaku pare m’araga* mi Cekem bende unyolo ire nyathin ma nico man Gideon ucaku nyinge Abimelek. 32 E Gideon ma wod Yoac utho i ng’ey m’ekwo ma ber nitundo i tiyo, man jukunye i kabuli pa Yoac ma won i Ofra mi Juabiezer.

33 Ndhu ndhu i ng’ey tho pa Gideon, Juisrael gicaku woro* Baal kendo, man ging’iyo Baal-berith ni mungu migi. 34 Juisrael gipoy ungo i kum Yehova Mungu migi, m’ubodhogi kud i cing judegi migi ceke m’udhokogi; 35 bende gitimo ngo lembe i atira ni juruot pa Yerubaal, niwacu Gideon, pi bero ceke m’etimo ni Israel.

9 I ng’ey nindo moko, Abimelek ma wod Yerubaal ucidho i bang’ nero pare i Cekem, ewok ewacu igi man ni juruot pa kwarumire* ceke kumae: 2 “Akwayuwu, wukepenj jutela* ceke mi Cekem kumae: ‘Ang’o ma copo bedo ber iwu, nyo wot Yerubaal pier abiro ceke gibim i wiwu kunoke ng’atu acel kende re m’ubim i wiwu? Man wupoy nia an atie cogowu man ring’ kumwu* ma buu.’”

3 E nero pare gicidh gikoro lembe m’ekwayune ni jutela ceke mi Cekem, man ging’iyo* nilubo tok Abimelek, kum giwacu kumae: “En e umegwa ma buu.” 4 E gimiyo ire sente mi tongolo mi mola ma tar pier abiro m’uai kud i hekalu* pa Baal-berith, man ku sentene Abimelek upangu dhanu ma gikoso gin ma gitim man ma wigi tek kara giwoth kude. 5 I ng’eye ecidho i ot pa won i Ofra man enego umego pare, niwacu wot Yerubaal, dhanu pier abiro iwi kidi acel. Yotham ma wod Yerubaal ma cogo kende m’uboth, pilembe egam epondo.

6 E jutela ceke mi Cekem man dhanu ceke mi Beth-milo gicokiri karacelo man giketho Abimelek ni ubimo ceng’ini ku yen ma dit ma n’i ng’et mbegi m’ubino i Cekem.

7 Kinde ma judwoko lembene ni Yotham, e wang’ acel ecidh ecungo i die wi got Gerizim man ekok igi ku dwande ma tek kumae: “Wuwinja, wu jutela mi Cekem, e Mungu de biwinjowu.

8 “Nindo moko yen gicokiri karacelo pi niwiro ubimo kara ubim wigi. E giyero ni yend oliv kumae: ‘Bim wiwa.’ 9 Ento yend oliv uwacu igi kumae: ‘Nyo ukwayu awek moja* ma jutiyo ko pi nimiyo dwong’ ni Mungu man ni dhanu, man acidh ayengara iwi yen mange?’ 10 I ng’eye, yen giyero ni yend ulam kumae: ‘Bin ibim wiwa.’ 11 Ento yend ulam udwoko igi kumae: ‘Nyo ukwayu awek mido para man nyinga ma beco, man acidh ayengara iwi yen mange?’ 12 I ng’ey maeno, yen giyero ni yend ulok kumae: ‘Bin ibim wiwa.’ 13 Yend ulok ulund udwoko igi kumae: ‘Nyo umaku awek pigulok para ma nyasa* ma nyayu mutoro i Mungu man i dhanu, man acidh ayengara iwi yen mange?’ 14 Tokcenne, yen mange ceke giyero ni yend ukudho kumae: ‘Bin ibim wiwa.’ 15 E yend ukudho uwacu ni yen kumae: ‘Tek andha wubemito wuwira kara abed ubimo i wiwu, wubin wupond i the tipona. Ento kan ungo, dong’ mac uai kud i kind ukudho man uwang’ tido mi Lebanon cen.’

16 “Dong’ wukepar, nyo wutimo lemandha man m’uromo ku yung kinde ma wuketho Abimelek ni ubimo, man nyo wunyutho bero ni Yerubaal ku juruot pare, man wutimo ire lembe m’uromo kude? 17 Kinde ma vwa ukiedo piwu, eketho kwo* pare i ariti pi nibodhowu kud i cing’ Jumidian. 18 Ento tin wulokuru i kum juruot pa vwa man wunego wote, dhanu pier abiro iwi kidi acel. E wuketho Abimelek ma wod dhaku pare ma ng’eca ni ubimo iwi jutela mi Cekem, ndhu nia pilembe etie umegwu. 19 Dong’ tekene wubetimo lemandha man m’uromo ku yung ni Yerubaal ku juruot pare tin eni, anyong’a negwu i kum Abimelek man en de anyong’a nege i kumwu. 20 Ento kan ungo, wek mac uwok kud i Abimelek man uwang’ jutela mi Cekem ku Beth-milo, man wek mac uwok kud i jutela mi Cekem ku Beth-milo man uwang’ Abimelek.”

21 E Yotham uringo ucidh upondo i Ber, man ekwo kuca pilembe ebino lworo umin m’Abimelek.

22 Abimelek ucamu ker* iwi Israel pi oro adek. 23 I ng’eye, Mungu uweko kwor* unyol* i kind Abimelek ku jutela mi Cekem, e gijai ni Abimelek. 24 Lembe maeno utimere pi niculo kwor pi nek ma rac ma junego ko wot Yerubaal pier abiro, kara rimbgi ubed iwi umeggi m’Abimelek pilembe enegogi, man iwi jutela mi Cekem pilembe gikonyo Abimelek ninego umego pare. 25 E jutela mi Cekem gioro dhanu ucidh ukanu libo ni Abimelek iwi gudi, man gibed giyaku dhanu ceke m’ubekadhu kud i yo kaka ma gin’i iye. Jugam judwoko lembene ni Abimelek.

26 I ng’eye, Gaal ma wod Ebed karacelo kud umego pare gikadhu loka i Cekem man jutela mi Cekem giwok giketho genogen migi i wiye. 27 Gicidho i podho man gipono nying ulok mi podho mir ulok migi, gibiye man gitimo foc,* i ng’eye gicidho i ot pa mungu migi; gicamu, gimadhu, man gilamu Abimelek. 28 Man Gaal ma wod Ebed uwacu kumae: “Abimelek tie ng’a man Cekem* tie ng’a ma nia watim ire e? Nyo etie ngo wod Yerubaal, man Zebul ke tie ngo jaor pare? Wun wutim ni dhanu pa Hamor ma won Cekem! Ento wan watim ire pirang’o? 29 Ka nwang’u ndhu dhanu maeni gin’i the tela para, nwang’u ang’ielo Abimelek.” E eyero ni Abimelek kumae: “Med wend juaskari peri man wubin wukied i dhoga.”

30 Kinde ma Zebul ma jadit ma wijo mir adhura uwinjo wec pa Gaal ma wod Ebed, kwinyo uopo i iye. 31 E eoro jukwenda i amung’* ucidh uyer ni Abimelek kumae: “Nen! Gaal ma wod Ebed kud umego pare gin’i Cekem kawoni, man gibecwalu dhanu mir adhura kara gijai i kumi. 32 Dong’ bin ku diewor in karacelo ku dhanu peri, man wuvut i lum wukan libo keca. 33 Kugweno kinde ma ceng’ ubewok ci, ai con man imak adhura; ka en ku dhanu ma ni kude giwok nikiedo kudi, tim gin moko ci m’icopo pi nivoye.”*

34 E Abimelek ku dhanu ceke ma ni karacelo kude giai malu ku diewor, gipokiri ni ungu ang’wen man givuto ma gikanu libo i ng’et Cekem. 35 Saa ma Gaal ma wod Ebed uwok man ucidh ucungo i kamondo mi dhugang’ mir adhura, Abimelek ku dhanu ma gini karacelo kude giwok ku kaka ma nwang’u gikanu libo i iye. 36 Kinde ma Gaal uneno dhanu, ewacu ni Zebul kumae: “Kenen! dhanu moko ubeloro kud iwi gudi.” Ento Zebul udwoko ire kumae: “Tipo gudi re m’ubenen i weng’i ve dhanu.”

37 I ng’eye Gaal uwacu kumae: “Kenen! dhanu ubeloro kud i diere pa ng’om, man ungu acel ubebino kud i gengi m’i the yen ma dit mi Meonenim.” 38 Zebul udwoko ire kumae: “Kawoni de keting’iri ya, ‘in ungo m’iwacu nia Abimelek utie ng’a ma wacikara nitimo ire?’ Nyo eno tie ngo dhanu m’igam ikwero? Woki icidh ikied kugi.”

39 E Gaal uwok ku jutela mi Cekem ma gibelubo ng’eye man ecidh ekiedo i dhu Abimelek. 40 Abimelek uriemo tok Gaal, ento eringe, man dhanu dupa githo nitundo i kamondo mi dhugang’ mir adhura.

41 Abimelek umedere asu nibedo i Aruma, Zebul ke uriemo Gaal kud umego pare cen kud i Cekem. 42 Urwonde dhanu mir adhura giwok woko, man junyutho lembene ni Abimelek. 43 E eting’o dhanu pare man epokogi ni ungu adek man givuto i lum, gikanu libo. Kinde m’eneno dhanu gibewok kud i adhura, eloy i wigi man enegogi. 44 Abimelek kud ungu ma ni kude gicidho nyapio pio man gicungo i kamondo mi dhugang’ mir adhura, ungu ario ke giloy iwi dhanu ceke m’ubino i lum man ginegogi. 45 Abimelek ukiedo i kum adhurane cing’ nica duu man emake. Enego dhanu m’i iye, i ng’eye ke erwombo adhurane cen man ecoyo kadu i iye.

46 Kinde ma jutela ceke mi ot ma wiw mi Cekem giwinjo lembe maeno, ndhu ndhu giringo i oding’om* mir hekalu* pa El-berith. 47 Saa ma judwoko ni Abimelek nia jutela ceke mi ot ma wiw mi Cekem gicokiri karacelo, 48 e Abimelek ku dhanu ceke ma gini kude giidho iwi got Zalmon. Abimelek uting’o ley i cinge etong’o ko jang yen man eting’e ekethe iwi goke, e eyero ni dhanu ma ni kude kumae: “Gin ma wuneno atimo no, wun de wutim pio kumeno!” 49 E dhanu ceke gitong’o jang yen man gilubo tok Abimelek. Giketho jang yenne i kum oding’om man gicwinyo mac iwi oding’omne. Pieno dhanu ceke m’i ot ma wiw mi Cekem bende githo; gibino jumaco ku jumamon ma wendgi romo elufu acel (1 000).

50 I ng’eye Abimelek ucidho i Thebez; egonjo i kum Thebez man emake. 51 Nwang’u ot ma wiw moko ubedo nuti i diere mir adhurane, man dhanu ceke ma co ku ma mon ku jutela ceke mir adhurane giringo keca. Gitielo bang’gi i iye man giidho iwi ot ma wiwne. 52 Abimelek uii cil m’etundo i kum ot ma wiwne man emake. Ecoro ceng’ini ku kamondo mi ot ma wiw maeno kara ecwinye ku mac. 53 E dhaku moko ubolo kidi rego* iwi Abimelek man eng’enyo upoko wiye. 54 Pio pio egam elwong’o jatic m’uyeyo jamlwiny pare man eyero ire kumae: “Wodh palamularu peri inega ko cen, kara kud juyer nia dhaku re m’unega.” E jatic parene udhuye, man etho.

55 Saa ma dhanu mir Israel gineno nia Abimelek utho, gin zoo giloko gidok i pacu. 56 Kumeno re ma Mungu uculo ni Abimelek kawang’ racu m’etimo ni won m’enego ko umego pare pier abiro. 57 Mungu uketho bende racu ceke mi dhanu mi Cekem udwogo i wigi gigi. Pieno kwong’ pa Yotham ma wod Yerubaal utimere i kumgi.

10 I ng’ey Abimelek, Thola ma wod Pua, ma wod Dodo ma en e ng’atu mi suru pa Isakar uwok pi nibodho Israel. Ebed ekwo i Camir i ng’om gudi pa Efraim. 2 Thola ubino japoklembe mir Israel pi oro pier ario wi adek. I ng’eye etho man jukunye i Camir.

3 I ng’ey Thola, Yair ma Jagilead uwok man ebino japoklembe mir Israel pi oro pier ario wi ario. 4 Ebino kud awiya ma co pier adek ma gibed giringo ku kana pier adek, man gibino kud adhura pier adek ma julwong’o Havoth-yair nitundo tin; ginwang’iri i ng’om mi Gilead. 5 I ng’eye Yair utho man jukunye i Kamon.

6 Juisrael gitimo lembe ma rac kendo i wang’ Yehova, man gicaku timo ni Baal, ni ayi gin m’acwiya ma Actoreth, ni mungu mir Aram,* ni mungu mi Sidon, ni mungu mi Moab, ni mungu mi Juamon, man ni mungu mi Jufilisti. Giweko Yehova man gitimo ngo ire. 7 E kwinyo pa Yehova uopo i kum Israel, man ewenjogi* i cing’ Jufilisti ku Juamon. 8 Pieno, gidiyo Juisrael man gisendogi lee mandha; pi oro apar abora gisendo Juisrael ceke ma gini loka kulo Yordan m’ubino ng’om mi Juamor i Gilead. 9 Juamon gibed gikadhu bende loka kulo Yordan pi nikiedo i dhu suru pa Yuda ku pa Benjamin, man ot pa Efraim; e Israel uneno can ma yawe mbe. 10 Pieno, Juisrael gikwayu Yehova ukonygi, giwacu kumae: “Wadubo iri, kum waweko Mungu mwa man watimo ni Baal.”

11 Ento Yehova uyero ni Juisrael kumae: “Nyo abodhowu ngo kud i cing’ Jumisiri, kud i cing’ Juamor, Juamon, Jufilisti, 12 Jusidon, Juamalek, man Jumidian kinde ma gibesendowu? Saa ma wuwak i bang’a, abodhowu kud i cing’gi. 13 Re wuweka man wutimo ni mungu mange. Pieno abibodhowu kendo ngo. 14 Wucidh wukway kony i bang’ mungu ma wung’iyone. Dong’ gibodhwu i saa mi can mwu.” 15 Ento Juisrael giyero ni Yehova kumae: “Wadubo! Tim iwa gin moko ci m’ubedo ber i weng’i. Ento wakweyi, bodhwa tin eni.” 16 E gikabu mungu mi juwirok* cen kud i kindgi man gitimo ni Yehova, uketho edoko ire tek* niweko Juisrael gimediri nineno can.

17 I ng’eye Juamon giwakiri karacelo man giguro kagonjo migi i Gilead. E Juisrael bende gicokiri karacelo man giguro kagonjo migi i Mizpa. 18 Dhanu mi Gilead ku judongo ma wijo giweco i kindgi kumae: “Ng’a ma bitelo wiwa pi nicikiedo i dhu Juamoni? Ng’atune bidoko rwoth iwi dhanu mi Gilead ceke.”

11 Nwang’u Yeftha ma Jagilead en e jaramony ma tek; ebino wod dhaku ma won asara. Nying’ won Yeftha ubino Gilead. 2 Ento dhaku pa Gilead bende unyolo ire awiya ma co. Kinde ma wot dhaku parene gidongo, giriemo Yeftha cen man giwacu ire kumae: “Ibilagu ngo piny moko i ot pa wegwa, pilembe itie nyathin pa dhaku mange.” 3 Pieno Yeftha uringo umego pare man ecidh ebedo i ng’om mi Tob. E dhanu ma gikoso gin ma gitim gicokiri i bang’ Yeftha, man gicaku wotho kude.

4 I ng’ey kare, Juamon gitugo lwiny i dhu Israel. 5 Kinde ma Juamon gitugo lwiny i dhu Israel, e ndhu ndhu judongo mi Gilead gicidho i ng’om mi Tob pi nigamu Yeftha. 6 Giyero ni Yeftha kumae: “Bin itel wiwa, kara wakied i dhu Juamon.” 7 Ento Yeftha uyero ni judongo mi Gilead kumae: “Nyo wun ungo ma wugam wudaga lee uketho wuriema cen kud i ot pa vwa? Dong’ pirang’o wubino i bang’a kawoni kinde ma wubenweng’uru ku peko?” 8 E judongo mi Gilead giyero ni Yeftha kumae: “Eno re m’uketho wadwogo i beng’i kawoni. Kan icidho karacelo kudwa man ikiedo i dhu Juamon, ibidoko jadit i wiwa man iwi dhanu ceke mi Gilead.” 9 E Yeftha uyero ni judongo mi Gilead kumae: “Ka wuketho adok pi nikiedo i dhu Juamon man Yehova uketho aloyogi, e andha abidoko jadit mwu!” 10 Judongo mi Gilead giyero ni Yeftha kumae: “Yehova ubed jamulembe* i kindwa tekene watimo ngo calu m’iyero.” 11 Pieno Yeftha ucidho ku judongo mi Gilead, man dhanu ukethe ni jatela man jadit migi. E Yeftha uyero lembe pare ceke kendo i wang’ Yehova i Mizpa.

12 I ng’eye Yeftha uoro jukwenda i bang’ ubimo mir Amon, ewacu kumae: “Lembang’o i kindwa wakudi m’ibin itugo ko lwiny i ng’om para e?” 13 E ubimo mi Juamon uyero ni jukwenda pa Yeftha kumae: “Pilembe Israel umayu ng’om para kinde ma giwok kud i Misiri, niai i Arnon nitundo i Yabok man cil i Yordan. Dong’ kawoni dwoge m’umbe ali.” 14 Ento Yeftha uoro jukwenda udok kendo i bang’ ubimo mi Juamon 15 pi niyero ire kumae:

“Yeftha uwacu kumae: ‘Israel umayu ngo ng’om mi Jumoab man ng’om mi Juamon, 16 kum kinde ma Israel uwok kud i Misiri, giwotho kud i langa nitundo bor i Nam ma kwar man gitundo i Kadec. 17 I ng’eye Israel uoro jukwenda i bang’ ubimo mir Edom, ewacu kumae: “Kan ecopere, wek akadh kud i ng’om peri,” ento ubimo mir Edom uwinjo ngo. Eoro bende kwenda i bang’ ubimo mi Moab, ento eyiyo ngo. E Israel umedere nibedo i Kadec. 18 Kinde ma gibewotho kud i langa, gikadhu kud i ng’et ng’om mir Edom man kud i ng’et ng’om mi Moab. Giwotho yo nyangu mi ng’om mi Moab man gigonjo i ng’om mir Arnon; gikadhu ngo kieu mi Moab, pilembe Arnon ubino kieu mi Moab.

19 “‘I ng’eye, Israel uoro jukwenda i bang’ Sihon m’ubimo mi Juamor, m’ubino camu ker i Hecbon; Israel uwacu ire kumae: “Kan ecopere, wek wakadh kud i ng’om peri wacidh i kabedo mwa.” 20 Ento Sihon uweko ngo Juisrael gikadh kud i ng’om pare pilembe egenogi ngo, pieno Sihon ucoko dhanu pare ceke man gigonjo i Yahaz, e gikiedo i dhu Israel. 21 Yehova Mungu mir Israel umiyo Sihon man dhanu pare ceke i cing Israel, e Israel uloyogi man emaku ng’om ceke mi Juamor ma gibino jurubedo mi ng’ombe. 22 E gimaku ng’om ceke mi Juamor, niai i Arnon nicidho i Yabok, man niai i langa nitundo i Yordan.

23 “‘Yehova Mungu mir Israel re m’ugam uriemo Juamor kud i wang’ dhanu pare Israel, dong’ kawoni ibemito iriemgi ceni? 24 Nyo ibedo ngo ku piny moko ci ma Kemoc ma mungu peri umiyo iri? Pieno ng’atu moko ci ma Yehova Mungu mwa uriemo kud i wang’wa, wabirieme cen. 25 Nyo i ber ma sagu Balak ma wod Zipor m’ubimo mi Moabi? Nyo etuc ninyego de ku Israel, kadi nyo ekiedo de i dhoggi? 26 Niai ma Israel ucaku bedo i Hecbon ku nyithindh adhura m’i ng’ete,* i Aroer ku nyithindh adhura m’i ng’ete, man i adhura ceke ma n’i dhu kulo Arnon oro udoko dak adek kawoni, pirang’o wupimo ngo apima de nimayugi i kind oro maeno? 27 Adubo ngo iri, ento in re m’itimo rac m’ibin itugo lwiny i dhoga. Dong’ Yehova ma Japoklembe, upok lembe tin i kind dhanu mir Israel ku dhanu mir Amon.’”

28 Ento ubimo mi Juamon uwinjo ngo lemkwenda ma Yeftha uoro ire.

29 Tipo pa Yehova ugam ubino iwi Yeftha, man ekadhu kud i ng’om mi Gilead man mi Manase ecidho i Mizpa* mi Gilead, kud i Mizpa mi Gilead emedere ku woth nitundo i bang’ Juamon.

30 I ng’eye Yeftha utimo lembang’ola ni Yehova, eyero kumae: “Kan imiyo Juamon i cinga andha, 31 e ng’atu ma biwok kud i dhugola mi ot para kinde m’adwogo ku kwiyocwiny kud i bang’ Juamon, ng’atuca bibedo peri Yehova, man abithiere ni lam m’awang’a.”

32 E Yeftha ucidh ukiedo ku Juamon, man Yehova umiyogi i cinge. 33 Enegogi ku nek ma lee dit niai i Aroer nitundo i Minith man cil i Abel-keramim; enyotho adhura pier ario. E Juamon gibedo i the loc mi Juisrael.

34 Tokcenne Yeftha udok i pacu pare i Mizpa, man nen! nyare uwok pi nirombo kude m’ebepadu nyathi vul man ebemiel! Nwang’u ebino nyathin pare m’acel kulong’. M’uweko en ci, ebino mbe ku nyathin mange ma co kadi ma nyaku. 35 Kinde m’enene, eyeco bongu pare man ewacu kumae: “Akayoo, nyara! Inyayu can lee i iya,* kum itie ng’atu m’ang’olo nia ucidhi. Adaru ng’olo lembe ku kwong’* ni Yehova, man acopo dok ungo ku ng’eya.”

36 Ento eyero ire kumae: “Baba, kan ing’olo lembe moko ni Yehova, tim i kuma calu m’ing’olo, kum Yehova uculo iri kwor iwi Juamon ma gi judegi peri.” 37 Eyero ni won kumae: “Wek gin ma e utimere ira: Wek abed kenda pi dwi ario, acidh bor iwi gudi man awag bedo sumba para ku jumanyir wada.”*

38 E eyero ire kumae: “Cidhi!” Pieno Yeftha uore ecidho pi dwi ario, man ecidho iwi gudi karacelo ku jurimbe pi niwagu bedo sumba pare. 39 Saa ma dwi arione thum, edwogo i bang’ won, e won upong’o lembe m’eng’olo pire. Etimo ngo ribiri ku co. E lembe maeni udoko ni kura* i Israel: 40 Kubang’ oro, jumanyir mir Israel gibed gicidho pi nipaku nyaku pa Yeftha ma Jagilead wang’ ang’wen i oro acel.

12 I ng’eye, dhanu mir Efraim gicokiri karacelo gikadhu loka i Zafon* man giyero ni Yeftha kumae: “Pirang’o ilwong’owa ngo nia wacidh wakudwu kinde m’ikadhu loka pi nikiedo i dhu Juamoni? Wabiwang’u ot peri ku in de i iye.” 2 Ento Yeftha udwoko igi kumae: “Wakiedo lwiny ma tek karacelo ku dhanu para i dhu Juamon. Alwong’owu wubin wukonya, ento wubodha ngo kud i cing’gi. 3 Kinde m’aneno nia wucopo bodha ngo, e ang’iyo niketho kwo para* i ariti man nicikiedo i dhu Juamon, man Yehova umiyogi i cinga. Dong’ pirang’o tin wubino kiedo i dhoga?”

4 E Yeftha ucoko jumaco ceke mi Gilead, man gikiedo i dhu Efraim; dhanu mi Gilead giloyo dhanu mir Efraim ma nwang’u gilar giwacu kumae: “Wun wu Jugilead ma wubekwo i ng’om mi suru pa Efraim man pa Manase, wutie de ju m’upiey kud i ng’om mi suru pa Efraim.” 5 E dhanu mi Gilead gikadhu i wang’ dhanu mir Efraim man gicidh gimaku kaka ma kulo Yordan mwomere i iye; ka ng’atu moko mir Efraim ubemito ringo, eyero kumae: “Wek akadh lokaca”; e dhanu mi Gilead penje kumae: “Itie Jaefraimi?” Kan edwoko nia, “ungo!” 6 E giyero ire kumae: “Dong’ keyer nia Ciboleth.” Ento ewacu nia, “Siboleth,” kum ecopo yero ngo wecne cuu. Gilund gimake man ginege kaka ma kulo Yordan mwomere i iye. E i saa maeca junego Juefraim elufu pier ang’wen wi ario (42 000).

7 Yeftha ubedo japoklembe i Israel pi oro abusiel, i ng’eye Yeftha ma Jagilead utho man jukunye i adhura pagi i Gilead.

8 I ng’ey Yeftha, Ibzan mi Bethlehem re m’udoko japoklembe i Israel. 9 Ebino kud awiya ma co pier adek man jumanyir pier adek. Eoro jumanyir pare gicidh gigiero co mange ma wedi migi ngo, man ekelo mon ma ka mange pier adek ni wote. Ebedo japoklembe mir Israel pi oro abiro. 10 E Ibzan utho man jukunye i Bethlehem.

11 I ng’ey Ibzan, Elon ma Jazabulon re m’udoko japoklembe i Israel; epoko lembe i Israel pi oro apar. 12 I ng’eye, Elon ma Jazabulon utho man jukunye i Ajalon i ng’om mi suru pa Zabulon.

13 I ng’ey Elon, Abdon ma wod Hilel ma Japirathon re m’udoko japoklembe i Israel. 14 Ebino ku wote pier ang’wen man nyikwaye pier adek ma gibed giringo ku kana pier abiro. Epoko lembe i Israel pi oro abora. 15 E Abdon ma wod Hilel ma Japirathon utho man jukunye i Pirathon i ng’om mi suru pa Efraim iwi got mi Juamalek.

13 Juisrael gitimo lembe ma rac kendo i wang’ Yehova, e Yehova umiyogi i cing’ Jufilisti pi oro pier ang’wen.

2 I saa maeno, nwang’u ng’atu moko ma nyinge Manoa ubedo nuti i Zora, i suru pa Dan. Dhaku pare ubino jamugumba man ebino mbe ku nyathin. 3 Nindo moko malaika pa Yehova uwok ni dhakune man ewacu ire kumae: “Nen, in i jamugumba man imbe ku nyathin. Ento ibigamu ii man ibinyolo nyathin ma nico. 4 Dong’ bed ku weng’i, kud imadh pigulok kadi kit kong’o moko ci, man kud icam gin moko ci m’ucido. 5 Nen! ibigamu ii man ibinyolo nyathin ma nico. Riedi bimulo wiye ngo, pilembe nyathinne bibedo Janaziri* pa Mungu niai i nyoliri pare,* man ebicaku nibodho Israel kud i cing’ Jufilisti.”

6 E dhakune ucidho i bang’ cware man eyero ire kumae: “Dhanu pa Mungu mandha moko ubino i bang’a; ayi pare ubino calu pa malaika pa Mungu mandha, man ayine wang’u ijo lee mandha. Apenjo ngo kaka m’eai i iye, man nyinge de enyutho ngo ira. 7 Ento ewacu ira kumae: ‘Nen! ibigamu ii man ibinyolo nyathin ma nico. Dong’ kud imadh pigulok kadi kit kong’o moko ci, man kud icam gin moko ci m’ucido, pilembe nyathinne bibedo Janaziri pa Mungu niai i nyoliri pare* nitundo i nindo mi tho pare.’”

8 Manoa ukwayu Yehova man eyero kumae: “Tim ira kisa Yehova. Akweyi, wek dhanu pa Mungu mandha m’iai ioro udwog kendo niponjowa iwi ayi ma wacikara nitungo ko nyathin ma binyolerene.” 9 E Mungu mandha uwinjo Manoa, pieno eoro malaika pa Mungu mandha udwogo kendo i bang’ dhakune kinde m’ebedo i podho; nwang’u cware ma Manoa ubino mbe karacelo kude. 10 Dhakune ringo pio man ecidh eyero ni cware kumae: “Nen! ng’atu m’ubino i bang’a nindo moko ca uwok ira kendo.”

11 E Manoa uai malu man gicidho ku dhaku pare. Ebino i bang’ ng’atune man epenje kumae: “Nyo in re m’itie ng’atu m’uweco i bang’ dhaku para?” Edwoko kumae: “Tie an.” 12 E Manoa uyero kumae: “Dong’ lembe m’iyero utimere kakare! Kit kwo pa nyathinne bibedo nenedi, man ebitimo tij ang’o?” 13 Malaika pa Yehova ulund uyero ni Manoa kumae: “Dhaku peri ucikere nigwokere i kum gin ceke m’anyutho ire. 14 Kud ecam piny moko ci m’uai i kum ulok, kud emadh pigulok kadi kit kong’o moko ci, man kud ecam gin moko ci m’ucido. Ecikere niworo gin ceke m’ang’olo ire.”

15 Manoa udok uyero ni malaika pa Yehova kumae: “Akweyi, kebed nyanok, kara wated iri nyathi diel moko.” 16 Ento malaika pa Yehova uwacu ni Manoa kumae: “Kadok abedo de, abicamu ngo cam peri; ento tek imito imii lam m’awang’a ni Yehova, icopo miyo.” Nwang’u Manoa ung’eyo ngo nia eca tie malaika pa Yehova. 17 E Manoa upenjo malaika pa Yehova kumae: “Nyingi tie ng’a? kara ka lembe m’iyero utimere, wayungi.” 18 Malaika pa Yehova ulund udwoko ire kumae: “Ibepenjo nyinga pirang’o? Nying’ne tie nying’ ma wang’u ijo.”

19 E Manoa uting’o nyathi diel ku girathiera mi nying cam, man ethierogi iwi cana ni Yehova. Man Mungu utimo gin ma wang’u ijo kinde ma Manoa giku dhaku pare gibeneno. 20 Saa ma lebmac ubeidho malu i polo kud iwi pemlam, malaika pa Yehova uidho kud i lebmac m’i wi pemlamne kinde ma Manoa giku dhaku pare gibeneno. E wang’ acel gipodho arieba wang’gi i ng’om. 21 Malaika pa Yehova uwok ungo kendo ni Manoa giku dhaku pare. E Manoa unyang’ nia eca ubino malaika pa Yehova. 22 Manoa ugam uyero ni dhaku pare kumae: “Watho andha, pilembe waneno Mungu.” 23 Ento dhaku pare uwacu ire kumae: “Ka nwang’u Yehova umito enegwa, nwang’u ejolo ngo lam m’awang’a man girathiera mi nying cam kud i cingwa, nwang’u enyutho ngo iwa tho gin maeni ceke, man nwang’u ekoro ngo iwa lembe maeni zoo.”

24 I ng’eye, dhakune unyolo nyathin ma nico man ecaku nyinge Samson; kinde ma nyathinne ubedongo, Yehova umedere nimiyo ire mugisa. 25 I ng’ey kare, tipo pa Yehova ubino i wiye i Mahane-dan, i kind Zora ku Ecthaol.

14 E Samson uloro i Timna, man i Timna kuca ewok eneno Nyafilisti* moko. 2 Pieno eidho malu man eyero ni won giku min kumae: “Aneno Nyafilisti moko i Timna; emaku wang’a, man amito wugame ira ni dhaku.” 3 Ento won giku min giyero ire kumae: “Nyo icopo nwang’u ngo dhaku i kind wedi peri man i kind dhanu mwa ceke? Nyo ndhu ubekwayu icidh igam dhaku i kind Jufilisti ma jutimo ngo yaa i kumgi?” Ento Samson uyero ni won kumae: “Game ira, kum en re m’efoyo iya.”* 4 Won giku min ginyang’ ungo nia lembe maeno uai i bang’ Yehova, kum ebino sayu yore m’ekied ko ku Jufilisti; nwang’u i saa nica Jufilisti gibimo wi Israel.

5 Pieno Samson uloro i Timna karacelo ku won man min. Kinde m’etundo i podho mir ulok mi Timna, nen! umvor* moko ubino i bang’e m’eberundo. 6 E tipo pa Yehova umiyo ire tego man eyeco iye ni ario, tap calu ma ng’atini copo yeco ko i nyathi diel ni ario ndhu ku cinge. Ento eyero ngo lembe m’etimone ni won kadi ni min. 7 E egam eloro man eweco ku nyakune; nwang’u fodi asu en re m’emaku wang’ Samson.

8 I ng’eye kinde m’edwogo nigamu dhakune kara edok kude i pacu, erobo pi nineno avuj umvor m’egam enego, man ewok enwang’u njuru kic ku miyo i ukoro umvorne. 9 Pieno ewodho miyone i cinge man ewotho nang’e saa m’ebecidho. Kinde m’enwang’u tok won giku min, emiyo moko igi gin de ginang’. Ento eyero ngo igi nia ewodho miyone kud i ukoro umvor.

10 Won ugam uloro i bang’ dhakune, man Samson uyiko foc* moko keca; kum awobi gibed gitimo kumeno. 11 Kinde ma dhanu unene, gikelo awobi wagi pier adek kara gibed kude. 12 E Samson uwacu igi kumae: “Wuwek abol iwu koy moko. Tek i kind nindo abiro mi foc* wukoro ira there man wudwoko ira wang’e, abimiyo iwu bongu ma nwang’ pier adek man bongu mange ma beco pier adek. 13 Ento tek dwoko wang’e uvoyowu, wubimiyo ira bongu ma nwang’ pier adek man bongu mange ma beco pier adek.” Giyero kumae: “Bol iwa koy perine; wabemito wawinje.” 14 Pieno eyero igi kumae:

Ento gonyo the koyne uvoyogi pi nindo adek. 15 I nindo mir ang’wende, giyero ni dhaku pa Samson kumae: “Bidh cweri kara ekor iwa the koy. Kan ungo, wabiweng’i, in ku juruot pa wuru ceke ku mac. Wulwong’owa keni kara wubin wuyak piny mwa?” 16 Pieno dhaku pa Samson uwak i bang’e man ewacu kumae: “Karaman idaga; imara ngo! Ibolo koy ni jufwa, re ilund ikoro ngo ira there.” E Samson uyero ire kumae: “Fodi akoro ngo there ni vwa kadi ni maa de, dong’ alund akor there iri ke nedi?” 17 Ento emedere niwak i kume i dong nindo abiro mi focne. E i nindo mir abirone Samson ukoro ire thelembe mi koyne, pilembe ebino rere akeca. I ng’eye dhakune ukoro thelembe mi koyne ni jupagi. 18 Pieno i nindo mir abirone i wang’ mwony pa ceng’,* dhanu mir adhura gigam giyero ni Samson kumae:

Edwoko igi kumae:

19 E tipo pa Yehova umiyo ire tego man eloro i Ackelon; kuca ewok enego jumaco pier adek, eting’o bongu migi man emiyo bongu ma beco ni ju ma gikoro the koy pare. E eloko edok i ot pa won ma kwinyo ubenege.

20 I ng’eye julund jumiyo dhaku pa Samson ni ng’atu acel m’i kind awobi m’ubedo karacelo kude.

15 I ng’ey ceng’ moko i saa mi kayu nganu, Samson ucidho niliewo dhaku pare, etero ire nyathi diel moko. Ewacu kumae: “Amito amond i bang’ dhaku para i kusika.” Ento won dhakune uyiyo ngo nia emondi. 2 Eyero kumae: “Aparu nia dong’ idage. E amiye ni jalawobi acel m’i kind ju m’ubino kudi. Nyo wang’ nyamin ma nok leng’ ma sagu ngo? Akweyi, game kakare.” 3 Ento Samson uyero kumae: “Wang’uni re Jufilisti gibiwak ungo i wiya nia atimogi rac.”

4 E Samson ucidho man emaku nzer dak adek. I ng’eye eting’o ridhro, etwiyo yib nzerne ario ario, man eroyo ridhro i kind yibgi m’etwiyone. 5 E ecwinyo mac i kum ridhrone man elalu nzer i podho mi Jufilisti m’ubino ku cam m’ucungo iwi tiende. Ewang’u piny ceke: ewang’u kanga ma jutwiyo, cam ma fodi n’i wi tiende, podho mir ulok, man podho mir oliv bende.

6 Jufilisti gigam gipenjo kumae: “Ng’a m’utimo gin maeni?” Judwoko igi kumae: “Samson ma jalwod Jatimna re m’utimo gin maeni, pilembe jalwon uting’o dhaku pare emiyo ni acel m’i kind awobi m’ubino karacelo kude.” E Jufilisti giidho malu gicidh giwang’u dhakune man won bende ku mac. 7 I ng’eye Samson uwacu igi kumae: “Calu ma wutimo lembe maeno, abibedo ngo yoo ka fodi aculo ngo kwor i kumwu.” 8 E enegogi acel acel;* ebino nek ma lee dit. I ng’eye, eloro piny man ecidh ebedo i odicana* ma julwong’o Etham.

9 I ng’eye, Jufilisti giidho malu gigonjo i ng’om mi Yuda man gibino wotho ng’aa i Lehi. 10 E dhanu mi Yuda upenjogi kumae: “Pirang’o wuidho nikiedo i dhogwa?” Gidwoko kumae: “Waidho pi nimaku* Samson, kara watim gin m’etimo i kumwa i kume.” 11 Pieno dhanu mi Yuda elufu adek (3 000) giloro piny i odicana* ma julwong’o Etham man gipenjo Samson kumae: “Ing’eyo ngo nia Jufilisti re ma gibebimo wiwa? Dong’ pirang’o itimo gin maeni i kumwa?” Edwoko igi kumae: “Atimo igi gin ma gitimo i kuma.” 12 Ento giyero ire kumae: “Wabino meki kara wamiyi i cing’ Jufilisti.” E Samson uwacu igi kumae: “Wukwong’ ira nia wubinega wun ungo.” 13 Giyero ire kumae: “Ungo, wabitwiyi atwiya kende man wabimiyi i cing’gi, ento wabinegi ngo.”

E gitwiye ku thol ario ma nyen man giwodhe kud i odicana. 14 Kinde ma Samson utundo i Lehi, Jufilisti giwoy ku woy mir aloci saa ma gibecirombo kude. E tipo pa Yehova umiyo ire tego, man thol ma n’i bote udoko calu thond bongu ma mac uwang’u, kongo ma jutwiye ko de uoy lwany kud i cinge. 15 Egam enwang’u cogo moko mi ding thwon kana ma fodi tie ma ng’ic; e erieyo cinge eting’e man enego ko dhanu elufu acel (1 000). 16 I ng’eye Samson uwacu kumae:

“Ku cogo acel mi ding kana, adhurogi ungu acel, ungu ario!

Ku cogo acel mi ding kana, anego dhanu elufu acel (1 000).”

17 Kinde m’edaru niweco, ebayu cogo mi ding kanane cen man elwong’o kabedo maeca nia Ramath-lehi.* 18 I ng’eye rieu pii umake lee mandha, uketho ekwayu kony i bang’ Yehova eyero kumae: “In re m’imiyo aloci ma lee maeni ni jatic peri. Nyo kawoni dong’ ubekwayu atho ku rieu pii man apodh i cing’ dhanu ma jutimo ngo yaa i kumgi?” 19 E Mungu ukaku wang’ ora m’ubino i Lehi, man pii ucorere kud i iye. Kinde m’emadhe, e tipone* dwogo man kero dwogo i kume. Pieno ecaku nying’ kabedone nia En-hakore.* Enwang’ere i Lehi nitundo tin.

20 E Samson ubedo japoklembe i Israel i nindo mi Jufilisti pi oro pier ario.

16 Ceng’ acel Samson ucidho i Gaza man ewok eneno dhaku moko ma won asara kuca, e emondo i bang’e. 2 Juyero ni dhanu mi Gaza kumae: “Samson utundo keni.” Pieno gitieke man gikanu libo ire diewor traka i dhugang’ mir adhura. Gibedo ling’ diewor traka ma gibeyero yor i igi kumae: “Kinde ma piny ubelero, wabinege.”

3 Ento Samson uvuto asu nitundo diewor ma ling’. E eai malu diewor ma ling’ man emaku dhugola mi dhugang’ mir adhura ku kadhrumane ario, man emugogi ku riune de. Ekethogi iwi goke man eyeyogi nitundo iwi got m’ubeneno Hebron.

4 I ng’eye, emaru dhaku moko mi poga mi Sorek ma nyinge ubino Delila. 5 Pieno rwodhi mi Jufilisti gibino i bang’ dhakune man giwacu ire kumae: “Bidhe* man ing’ey nia ang’o m’ubemiyo ire kit tego ma lee kumeno, kite ma waromo voyo ko tego pare, watwiye man wakwiye. Tek itimo kumeno, ng’atuman m’i kindwa bimiyo iri tongolo mi mola ma tar elufu acel ku dak acel (1 100).”

6 I ng’eye Delila uwacu ni Samson kumae: “Akweyi, nyuth ira kaka ma tego peri ma dit beai i iye, man gin ma juromo tiyo ko pi nitwiyi man nikwiyi.” 7 Samson uyero ire kumae: “Tek jutwiya ku thondh athero abiro ma nyen ma fodi uthwo ngo,* abidoko ng’ic man abidoko ndhu calu dhanu mange.” 8 Pieno rwodhi mi Jufilisti gikelo thondh athero abiro ma nyen ma fodi uthwo ngo i bang’ Delila, man etwiye ku tholne. 9 Nwang’u gikanu libo i kusika, man Delila ukok ire kumae: “Samson, Jufilisti gidaru coro i wii!” E ecodo i thondh atherone calu ma thol* cot ko yot yot kan emulo mac. E amung’ mi tego pare ung’eyere ngo.

10 I ng’eye Delila uyero ni Samson kumae: “Nen! inywara man iwonda. Kawoni dong’ keyer ira nia juromo twiyi kud ang’o?” 11 E eyero ire kumae: “Ka jutwiya ku thol ma nyen ma fodi jutimo ko ngo tic, abidoko ng’ic man abidoko ndhu calu dhanu mange.” 12 Delila ugam uting’o thol ma nyen etwiye ko man ekok kumae: “Samson, Jufilisti gidaru coro i wii!” (Saa maeno nwang’u jukanu libo i kusika.) E ecodo thol mi bote cen calu wuzi.

13 I ng’eye Delila uyero ni Samson kumae: “Nitundo kawoni inywara man iwonda. Nyuth ira gin ma juromo twiyi ko.” E eyero ire kumae: “Kwoy yuk wiya m’akieda abiro e ku wuzi mi cwiyo bongu.” 14 E etimo kumeno, eguro yuk wiyene ku gute* mi jamcwiyo bongu man ekok kumae: “Samson, Jufilisti gidaru coro i wii!” Egam ecew kud i wang’ nindo man efudho gute ku wuzine de cen.

15 Delila ulund uyero ire kumae: “Icopo yero nenedi nia imara, ma kun ke igena de ngo e? Wang’ adek maeni zoo inywara man iyero ngo ira kaka ma tego peri ma dit uai i iye.” 16 Calu m’ebed erere man ecung’e kubang’ ceng’, ebadhu cwiny* Samson ma dong’ ecopo ciro ngo. 17 E tokcenne eyabu ire adundene man eyero kumae: “Riedi fodi umulo wiya ngo, pilembe an a Janaziri* pa Mungu niai m’anyolara.* Tek junyaru wiya ci, tego para biweka, abidoko ng’ic, man abidoko calu dhanu mange ceke.”

18 Kinde ma Delila uneno nia edaru yabu ire adundene, e ndhu ndhu elwong’o rwodhi mi Jufilisti man eyero kumae: “Wang’uni re wubin, kum edaru yabu ira adundene.” Pieno rwodhi mi Jufilisti gibino i bang’e man gikelo ire sente. 19 E Delila uketho enindo iwi bambe; man elwong’o ng’atu moko, eketho ng’atune unyaru yuk wiye abiro m’akieda. I ng’eye ecaku bimo wiye, kum nwang’u tego pare ubeweke. 20 E ekok kumae: “Samson, Jufilisti gidaru coro i wii! Egam ecew kud i wang’ nindo man ewacu kumae: “Abitimo calu m’abed atimo nja man abibodhara gira.” Ento eng’eyo ngo nia Yehova udaru weke. 21 Pieno Jufilisti gimake man gigolo nying wang’e. I ng’eye giloro kude i Gaza man gitwiye ku kongo ario mi mola, e edoko jareg nying cam i kol. 22 Ento yuk wiye ucaku twii kendo i ng’ey ma junyare.

23 E rwodhi mi Jufilisti gicokiri karacelo pi nithiero lam ma dit ni Dagon ma mungu migi man nitimo foc, kum gibino wacu kumae: “Mungu mwa umiyo Samson ma jadegi mwa i cingwa!” 24 Kinde ma dhanu ginene, gipaku mungu migi man giwacu kumae: “Mungu mwa umiyo jadegi mwa i cingwa, en e ng’atu m’unyotho ng’om mwa man unego ju dupa m’i kindwa.”

25 Calu ma gibino kud anyong’a lee i adundegi, giyero kumae: “Wulwong’ Samson kara ebin esemb iwa lembe.” E juwodho Samson woko kud i kol kara enyay anyong’a i igi; juketho ecungo i kind mbegi. 26 E Samson uyero ni jalawobi m’umaku cinge kumae: “Keth amul kum mbegi m’utielo ot kara ajengara i kumgi.” 27 (Nwang’u jumaco ku jumamon gipong’ bik i otne. Rwodhi mi Jufilisti ceke gibedo keca, man jumaco ku jumamon ma romo elufu adek [3 000] gibino iwi ot ma gibeneno Samson kinde m’ebesembo igi lembe.)

28 E Samson ukwayu Yehova kumae: “Rwoth Ubimo Yehova, akweyi, poy pira man mii ira tego. Akweyi, E Mungu, ndhu wang’ acel maeni kende ci, wek acul kwor i kum Jufilisti pi nying wang’a acel kende ci.”

29 I ng’eye Samson utielere i kum mbegi ario m’i diere ma ot ucungo i wigi, ejenjo cinge ma yor acwic i kum mbegine acel, cinge ma yor acam ke i kum ma kucelo. 30 Samson ugam ukok kumae: “Wek atho* ku Jufilisti!” E ecwalu mbegi ku tego pare zoo, man ot urwombere iwi rwodhi karacelo ku dhanu ceke m’ubino i iye. Pieno cing’ m’ebetho, enego dhanu lee nisagu m’enego kinde ma fodi e kwo.

31 I ng’eye umego pare karacelo ku juruot pa won ceke giloro piny pi nigamu avuje. Giidho kude man gikunye i kind Zora ku Ecthaol i kabuli* pa Manoa ma won. Samson ubino japoklembe i Israel pi oro pier ario.

17 Nwang’u ng’atu moko ubino nuti ma nyinge Mika i ng’om gudi pa Efraim. 2 Eyero ni min kumae: “Tongolo mi mola ma tar elufu acel ku dak acel (1 100) ma juting’o kud i beng’i m’awinjo ibelamu alam pire ca, nen! tongolo mi mola ma tarne n’i bang’a. An re m’agam ating’ogi.” E min uwacu kumae: “Dong’ Yehova umii mugisa ni woda.” 3 Pieno edwoko tongolo mi mola ma tar elufu acel ku dak acel (1 100) i bang’ min, ento min uwacu ire kumae: “Abithiero mola ma tar para ni Yehova. Abemito itii kude pi niyiko iri ayi gin m’acwiya m’ang’ika man ayi gin m’acwiya m’atwaga. Dong’ abedwoko tongolo mi mola ma tar maeni i beng’i.”

4 I ng’ey m’edwoko mola ma tar i bang’ min, min uting’o tongolo mi mola ma tar dak ario man emiyogi i bang’ jabodho mi mola ma tar. Eyiko ayi gin m’acwiya m’ang’ika kud ayi gin m’acwiya m’atwaga, man jukethogi i ot pa Mika. 5 Mika maeno ubino ku ot mi mungu m’araga, man eyiko efodh* ku therafim* man eketho* acel m’i kind wote utim ire calu jalam. 6 I nindo maeca, nwang’u jabim moko ubino mbe i Israel. Ng’atuman ubed utimo gin ma ber i wang’e gire.*

7 Nwang’u jalawobi moko ubino nuti m’uai i Bethlehem i Yuda, m’ubino ng’atu mi ot pa Yuda;* ebino Jalawi m’ubed ukwo kuca pi saa moko. 8 Eai kud i adhura mi Bethlehem i Yuda pi nisayu kaka m’ecopo kwo i iye. Kinde ma en’i woth pare, etundo i ng’om gudi pa Efraim, i ot pa Mika. 9 E Mika upenje kumae: “Iai kani?” Edwoko kumae: “Atie Jalawi, aai kud i Bethlehem i Yuda man abewotho pi nisayu kaka m’akwo i iye.” 10 Pieno Mika uyero ire kumae: “Bed i bang’a man tim ira calu wego* man jalam. Abibemiyo iri tongolo mi mola ma tar apar kubang’ oro man bongu m’uromo kudi ku cemo peri de.” Jalawine ugam umondo i ot pare. 11 E Jalawine uyiyo nibedo i bang’ Mika, man jalawobi maeno udoko ve ng’atu acel m’i kind wote. 12 Bende Mika uketho* Jalawine utim ire calu jalam, man ekwo i ot pa Mika. 13 E Mika uyero kumae: “Kawoni ang’eyo nia Yehova binyutho bero ira, kum Jalawi udoko jalam para.”

18 I nindo maeca, jabim ubino mbe i Israel. Man i nindo maeca, dhanu mi suru pa Dan gibino yenyo kaka* moko ma gicopo bedo i iye, kum nitundo saa maeno nwang’u fodi ginwang’u ngo giralaga i kind suru mir Israel.

2 Dhanu mi suru pa Dan gigam gioro jumaco abic ma giromo mi suru migi. Giai kud i Zora man Ecthaol, gicidho pi nilibo ng’ombe man pi nineno iye. Giwacu igi kumae: “Wucidhi man wunen i ng’ombe.” Kinde ma dhanune gitundo i ng’om gudi pa Efraim i pacu pa Mika, givuto keca. 3 Saa ma gidhingo ot pa Mika, ging’iyo dwand* jalawobi ma Jalawi. E gicidho i bang’e man gipenje kumae: “Ng’a m’ukeli keni? Itimo ang’o kakeni? Ang’o m’ubeceri keni?” 4 Ekoro igi lembe ma Mika utimo ire, man eyero kumae: “Emiyo ira cul kara atim ire calu jalam.” 5 E giyero ire kumae: “Wakweyi, kepenj Mungu ka nyo wotho mwa bibedo ber.” 6 Jalamne udwoko igi kumae: “Wucidh ma cwinywu kwiyo, Yehova ni kudwu i woth mwu.”

7 E jumaco abic maeno gicidho man gitundo i Laic. Giwok gineno kite ma dhanu mir adhurane gibedo ko, ma gimbe ku yeny pa ng’atu moko calu Jusidon. Gibedo gigi ma lworo mbe, man jubim moko ma weg adici de ubedo mbe ma copo mondo i ng’om migi pi nisendogi. Gibino bor ku Jusidon, man gibed gidikiri ngo i lembe moko ci ku ng’atu mange.

8 Kinde ma giloko gidwogo i bang’ umego migi i Zora man i Ecthaol, umegone gipenjogi kumae: “Lembe uwotho nenedi?” 9 Gidwoko kumae: “Waidhu i kumgi, kum waneno nia ng’ombe tie ber mandha. Pirang’o wutie ku jiji? Kud wugal nicimaku ng’ombe. 10 Ka wubitundo, wubiwok nwang’u dhanu m’ubedo ma lworo mbe, man ng’ombe de tie lac. Mungu umiye i cingwu, man etie kaka ma gin moko ci mi ng’om urem ungo i iye.”

11 E dhanu dak abusiel mi suru pa Dan ma giweg jamlwiny gicoko woth kud i Zora man Ecthaol. 12 Gicidho man gigonjo i Kiriath-jearim i ng’om mi Yuda. Pi thelembe maeno re ma julwong’o kabedone nia Mahane-dan cil tin. Enwang’ere yo reto mi Kiriath-jearim. 13 Giai ku keca gicidho i ng’om gudi pa Efraim, man gitundo i bang’ ot pa Mika.

14 E dhanu abic ma gicidh gilibo ng’om mi Laic giyero ni umego migi kumae: “Wung’eyo de nia efodh* unuti i udi maeni, ku therafim,* ayi gin m’acwiya m’ang’ika, man ayi gin m’acwiya m’atwaga? Wupar pi gin ma wubitimo.” 15 Pieno giwok gicungo keca, man girobo i bang’ ot pa jalawobi ma Jalawi ceng’ini ku ot pa Mika, man gipenje nia etie nenedi. 16 Saa maeno, nwang’u dhanu dak abusiel mi suru pa Dan ma giweg jamlwiny gicungo i kamondo mi dhugang’. 17 Dhanu abic ma gicidh gilibo ng’om gigam gimondo i ot pi niting’o ayi gin m’acwiya m’ang’ika, efodh,* therafim,* man ayi gin m’acwiya m’atwaga. (Nwang’u jalam ucungo i kamondo mi dhugang’ ku dhanu dak abusiel ma giweg jamlwiny.) 18 Gimondo i ot pa Mika man giting’o ayi gin m’acwiya m’ang’ika, efodh,* therafim,* man ayi gin m’acwiya m’atwaga. E jalam uyero igi kumae: “Wubetimo ang’o no?” 19 Ento giyero ire kumae: “Ling’ cen! Mii dhogi, bin wacidh wakudwu kara ibed iwa ni wego* man jalam. Ang’o ma ber iri, nyo utie nibedo jalam mi ot pa ng’atu acel, kunoke nidoko jalam mi suru acel mir Israel ma tie ku juruot dupa?” 20 E lembene ufoyo i jalam. Pieno eting’o efodh,* therafim,* kud ayi gin m’acwiya m’ang’ika, man ecidho ku dhanune.

21 E gilokiri man gimediri ku woth migi. Giketho awiya, lim man piny migi ma pigi tek utelo yo i wang’gi. 22 Kinde ma fodi kindgi ung’adu nyanok ku ot pa Mika ci, dhanu ma udi migi ni ceng’ini ku ot pa Mika gicokiri karacelo man gicaku lubo tok dhanu mi suru pa Dan. 23 Saa ma gibewoy asu i tokgi, dhanu mi suru pa Dan giloko wang’gi i bang’gi, man gipenjo Mika kumae: “Lembang’o? Pirang’o wucokuru kumeno?” 24 E Mika udwoko igi kumae: “Fodi wucoko mungu para m’ayiko man wuting’o jalam de wucidho ko, gin m’adong’ ko acel de mbe. Ka wuromo penja nenedi nia, ‘ang’o m’ubetimi?’” 25 Dhanu mi suru pa Dan gidwoko kumae: “Kud iting’ dwendi i wiwa kumeno; kan ungo dhanu ma giweg ng’eicwiny* gicopo podho i wii, man iromo cule ku kwo* peri man kwo mi juruot peri.” 26 E dhanu mi suru pa Dan gimediri ku woth migi. Saa ma Mika uneno nia tego migi uvoyo pare, egam eloko man edok i pacu pare.

27 I ng’ey ma giting’o piny ma Mika uyiko ku jalam pare de, gicidho i Laic i bang’ dhanu m’ubedo gigi ma lworo mbe. Ginegogi ku palamularu man giwang’u adhura migi cen ku mac. 28 Ng’atu moko bino mbe ma romo laru adhurane, kum ebedo bor ku Sidon man dhanu m’i iye gibed gidikiri ngo i lembe moko ci ku ng’atu mange; bende, adhurane ubino i poga* mi Beth-rehob. I ng’eye, gigiere kendo man gibedo i iye. 29 M’umedo maeno, gicaku nying adhurane nia Dan calu nying’ weggi ma Dan ma Israel unyolo. Ento nying adhurane ular ubino Laic. 30 I ng’eye, dhanu mi suru pa Dan giketho ayi gin m’acwiya m’ang’ika ucungo igi, man Yonathan ma wod Gercom, ma wod Musa karacelo ku wote gidoko julam mi suru pa Dan, nitundo i nindo ma jutero dhanu mi ng’ombe i ng’eca. 31 E giketho ayi gin m’acwiya m’ang’ika ma Mika uyiko ucungo, man ebedo keca i nindo ceke ma ot pa Mungu mandha ubino i Cilo.

19 I nindo maeca, kinde ma fodi jabim moko mbe i Israel, Jalawi moko ma kwo kaka ma bor i ng’om gudi pa Efraim, ugamu ire dhaku m’araga* mi Bethlehem i Yuda. 2 Ento dhaku pare m’aragane* ubed utimo abor;* e dhakune ugam uweke man ecidho i ot pa won i Bethlehem, i Yuda. Ebedo kuca pi dwi ang’wen. 3 I ng’eye cware ulubo toke pi nicithoke kara edwogi; ewotho ku jatic pare ma co man kana ario. Dhakune uwok uroye i ot pa won; kinde ma won unene, anyong’a unege lee nirombo ku jalwode. 4 E jalwon, niwacu won dhaku pare, ucere nia ebed karacelo kugi pi ceng’ adek; giwotho becamu, gimadhu man ebed evuto de kakeca.

5 I ceng’ mir ang’wende, kinde ma giai pir kugweno pi nicidho, won dhakune uyero ni jalwode kumae: “Kecam piny moko kara umii tego i kumi,* kan i ng’eye, wuromo cidho.” 6 Pieno gibedo piny, man gin ario zoo gicamu man gimadhu karacelo; i ng’ey maeno, won dhakune uyero ni ng’atune kumae: “Akweyi, vut keni man anyong’a neg adundeni.” 7 Kinde ma ng’atune uai kara ecidhi, jalwon umedere asu nikwaye, uketho evuto kendo.

8 Ceng’ mir abije, kinde m’eai kugweno pir kara ecidhi, won dhakune uyero kumae: “Akweyi, kecam piny moko kara umii tego i kumi.”* E ginyamiri nitundo ma ceng’ uwiro ko, man gin ario zoo gimediri asu nicamu. 9 Saa ma ng’atune uai kara ecidh ku dhaku pare m’araga* karacelo ku jatic pare, jalwon, niwacu won dhaku pare, uyero ire kumae: “Kenen! kawoni piny udhingo nyutho. Akweyi, vuti. Ceng’ de dong’ ubemwony. Vut kakeni man adundeni bed kud anyong’a. Urwo icopo ai con pi woth peri man idok i pacu* peri.” 10 Ento ng’atune mito ngo nia evut kendo, uketho eai man ecidho nitundo i Yebus, niwacu Yeruzalem. Ewotho ku kana ario ma ter n’i ng’eygi, dhaku pare m’araga* man jatic pare.

11 Kinde ma giwok ceng’ini ku Yebus, nwang’u dong’ ceng’ udhingo mwony. Pieno jatic uyero ni rwoth pare kumae: “Nyo wacopo cungo ngo i adhura maeni mi Juyebusi man wavuto keni?” 12 Ento rwoth pare uyero ire kumae: “Ukwayu ngo wacung i adhura mi juwirok* ma gi Juisrael ungo. Wabicidho nitundo i Gibea.” 13 E eyero ni jatic pare kumae: “Bin, wakewaii nitundo i Gibea kunoke i Rama. Wabivuto i adhura acel m’i kind adhura maeno.” 14 Pieno gimediri asu ku woth migi man ceng’ ucaku mwony kinde ma gidhingo Gibea ma nwang’ere i suru pa Benjamin.

15 E gigam gicungo kakeca man girobo i Gibea kara givut keca. Kinde ma gimondo, giwok gibedo i akarayo mir adhurane, ento ng’atu moko mbe m’udok kugi i ot pare kara givut i bang’e. 16 Tokcenne dhu uthieno maeca, jadwong’ moko m’uai utimo tic i podho pare utundo. Ebino dhanu mi ng’om gudi pa Efraim, man ebino kwo i Gibea pi nindo moko; ento dhanu mir adhurane gibino dhanu mi suru pa Benjamin. 17 Kinde ma jadwong’ne uting’o wang’e, eneno jarawotho moko ubedo i akarayo mir adhura, e epenje kumae: “Icidho kani man iai ke kani?” 18 Edwoko kumae: “Waai i Bethlehem i Yuda, man wabecidho kaka ma bor i ng’om gudi pa Efraim, ma tie kaka m’abedo i iye. Abino i Bethlehem i Yuda man abecidho i ot pa Yehova;* ento ng’atu moko mbe m’udok kuda i ot pare. 19 Watie ku lum man cam m’uromo pi kana mwa, man watie ku mukathi ku pigulok piwa waku dhaku man jatic mwa. Gin m’urem umbe.” 20 Ento jadwong’ne uyero kumae: “Bed ma cwinyi kwiyo! Abimiyo gin ceke m’urem iri. Re kud ivut i akarayo e.” 21 Pieno etere i ot pare man emiyo cam* ni kana. I ng’eye gilwoko tiendgi man gicamu, gimadhu de.

22 Kinde ma fodi gibenambu kud anyong’a, dhanu moko ma reco mir adhura gibin gitieko ot man gikwong’o dhongo dhugola, ma gibeyero ni jadwong’ ma won otne kumae: “Wodh jalwo m’umondo i ot peri no kara wavut kude.” 23 E won otne uwok woko man ewacu igi kumae: “Ungo, umego para. Akwayuwu, kud wutim lembe ma rac maeno. Ng’atu maeni tie welo i ot para. Kud wutim lembe mir acidi kumeno. 24 Nyara ma sumba* ni e, man dhaku m’araga* pa ng’atuni de nuti e; wuwek awodhgi man wumakgi, wutim kugi gin ceke ma wumito. Ento kud wutim lembe mir acidi maeno i kum ng’atuni.”

25 Ento dhanune gikwero niwinjo dwand jadwong’ maeno, e ng’atune umaku dhaku pare m’araga man ewodhe woko i bang’gi. Givuto kude mi tek tek man gitime rac diewor traka nitundo kugweno. Kinde ma piny ubelero, girieme edok. 26 Dhakune tundo kugweno pir man ewok epodho i dhugola mi ot pa ng’atu ma rwoth pare ubino i iye. Evuto kakeca nitundo ma piny ulero. 27 Kinde ma rwoth pare uai kugweno, man eyabu dhugola mi otne kara emedere ku woth pare, eneno dhaku, niwacu dhaku m’araga* pare uvuto i wang’ dhugola ma cinge n’i the dhugola. 28 E eyero ni dhakune kumae: “Ai malu wacidhu.” Ento edwoko ngo lembe moko. E ng’atune uting’e man ekethe iwi kana man gidok kude i pacu pare.

29 Saa m’etundo i pacu pare, egamu pala man eting’o avuj dhaku m’araga* pare, ethume ni wathkum apar ario ku wang’ cogone, man eoro wathkumene acel acel i suru mir Israel ceke. 30 Dhanu ceke ma gineno lembene giwacu kumae: “Lembe ma kumeni fodi utimere ngo, kadi juneno de ngo niai ma Juisrael giwok kud i ng’om mi Misiri nitundo tin. Wung’ii i lembene,* wuwec i wiye, man wunyuth iwa gin m’ukwayu watim.”

20 Pieno, Juisrael ceke ma niai kud i Dan niloro i Berceba man niai kud i ng’om mi Gilead, gibin gicokiri karacelo i acel* i wang’ Yehova i Mizpa. 2 Judongo mi dhanu man suru ceke mir Israel de gibino nuti i cokiri mi dhanu pa Mungu; niwacu juaskari elufu dak ang’wen (400 000) ma giwotho ku tiendgi man ma giweg palamularu.

3 Dhanu mi suru pa Benjamin giwinjo nia dhanu mir Israel giidho i Mizpa, e dhanu mir Israel gipenjo kumae: “Wukekor iwa, lembe ma rac maeni utimere nenedi?” 4 E Jalawi ma cwar dhaku ma junego udwoko kumae: “Atundo i Gibea mi Benjamin ku dhaku para m’araga* kara wavut keca. 5 Ento ku diewor, dhanu* mi Gibea gicoriri i wiya, gitieko ot m’avuto i iye man gimito ginega; re gilund gimaku dhaku para m’araga* ku kero, givuto kude, man etho. 6 E ating’o avuj dhaku para m’aragane,* apoko iye man aoro wathkumeman i suru ceke mir Israel; kum gitimo lembe ma rac dit man mir acidi i Israel. 7 Dong’ wun wu dhanu ceke mir Israel, wuparu ang’o iwi lembuni?”

8 E dhanu ceke giai malu karacelo* man giyero kumae: “Ng’atu moko acel de mbe i kindwa ma bidok i hema pare kunoke i ot pare. 9 Dong’ watimu kumae i kum Gibea: wabolu gagi pi ning’eyo ju ma bicidho i kume. 10 Wabiting’o dhanu apar kud i kind dhanu dak acel i suru ceke mir Israel, dhanu dak acel kud i kind dhanu elufu acel (1 000), man dhanu elufu acel kud i kind dhanu elufu apar (10 000) pi nicijoko cam ni udul askari kara gicidh gicul kwor i kum Gibea mi suru pa Benjamin pi lembe mir acidi ma dhanu m’i iye utimo i Israel.” 11 Pieno, jumaco ceke mir Israel gicokiri karacelo i acel* ma dhoggi urombo pi nicidho i kum adhurane.

12 E suru mir Israel gioro dhanu i bang’ jumaco ceke mi suru pa Benjamin, giyero igi kumae: “Lembang’o ma rac kumeni m’utimere i beng’wu? 13 Kawoni wumii dhanu ma reco maeno mi Gibea i bang’wa kara waneggi man wakab gin ma rac cen kud i Israel.” Ento dhanu mi suru pa Benjamin gikwero niwinjo umego migi ma gi Juisrael.

14 Dhanu mi suru pa Benjamin gilund gicokiri kud i adhura migi gibino i Gibea, kara gikied i dhu dhanu mir Israel. 15 Cing’ nica, suru pa Benjamin ucoko dhu dhanu elufu pier ario wi abusiel (26 000) ma giweg palamularu kud i adhura migi, m’uweko dhanu dak abiro ma julondo mi Gibea. 16 I kind udul askari maeno, dhanu ma julondo ma cing’gi acam ubino dak abiro; ng’atuman m’i kindgi ubed ung’uro kidi ku lacur, man eng’uro kadok yukwic acel de tap.

17 M’uweko suru pa Benjamin, wend dhanu mir Israel m’ucokiri karacelo man ma gitie ku palamularu ubino elufu dak ang’wen (400 000); ng’atuman m’i kindgi ubino jaramony m’ung’eyo lwiny cuu mandha. 18 Giai malu man gicidho i Bethel pi nipenjo Mungu. Dhanu mir Israel giyero kumae: “Ng’a ma bitelo yo i wang’wa pi nicikiedo i dhu suru pa Benjamini?” Yehova dwoko kumae: “Suru pa Yuda re ma bitelo yo.”

19 I ng’eye, Juisrael giai kugweno man gigonjo i kum Gibea.

20 Dhanu mir Israel giwok pi nikiedo i dhu suru pa Benjamin, gikperiri pi lwiny i Gibea, kara gikied i dhoge. 21 E dhanu mi suru pa Benjamin giwok kud i Gibea, man cing’ nica ginego dhanu mir Israel elufu pier ario wi ario (22 000). 22 Ento jumaco mir udul askari mir Israel gidwoko cwinygi tek man gikperiri kendo pi lwiny kaka ma rom ma gilar gikperiri i iye i nindo ma kwong’a. 23 E Juisrael giidho malu man giwak i wang’ Yehova nitundo uthieno. Pieno gipenjo Yehova kumae: “Nyo ukwayu wacidh kendo pi nikiedo lwiny i dhu umegwa ma gi dhanu mi Benjamini?” E Yehova udwoko kumae: “Wucidh i kumgi.”

24 E i nindo mir arionde, Juisrael gicoro ceng’ini i kum dhanu mi Benjamin. 25 Suru pa Benjamin ulund uwok kud i Gibea pi nirombo kugi i nindo mir arionde, man ginego Juisrael mange elufu apar abora (18 000); gin ceke gibino weg palamularu. 26 E jumaco ceke mir Israel giidho malu i Bethel, giwak man gibedo kuca i wang’ Yehova. Gikwiro cam cing’ nica nitundo uthieno man githiero lam m’awang’a, ku lam mi kwiyocwiny i wang’ Yehova. 27 I ng’eye, dhanu mir Israel gipenjo Yehova, kum nwang’u sanduku mi lembariba pa Mungu mandha ubino keca i nindo maeca. 28 Nwang’u Fineas ma wod Eleazar, ma wod Arun re m’ubino timo* i wang’ sandukune i nindo maeca. E gipenjo kumae: “Nyo ukwayu ndhu wacidh asu kendo pi nikiedo i dhu umegwa ma gi dhanu mi suru pa Benjamin kunoke waweki?” Yehova udwoko kumae: “Wucidhi, pilembe urwo abimiyogi i cingwu.” 29 E Israel uketho dhanu gikanu libo i ng’et Gibea tingili.

30 I nindo mir adege, Juisrael gicidho i kum dhanu mi Benjamin man gikperiri pi lwiny i kum Gibea calu ma gibed gitimo i wang’e. 31 Kinde ma dhanu mi suru pa Benjamin giwok woko pi nirombo kud udul askari mir Israel, juaskarine gitelogi bor kud i adhura. I ng’eye, dhanu mi suru pa Benjamin gitugo lwiny calu mi nindo mange, man ginego jumaco moko mir Israel i gengi ma dongo ma acel uidho i Bethel, ma kucelo ke i Gibea. Giweko avuj dhanu ma romo pier adek i ng’eygi i lum. 32 E dhanu mi suru pa Benjamin giyero kumae: “Wabiloyo co maeni calu m’i wang’e.” Ento Juisrael giwacu kumae: “Wabiloko ku ng’eywa man wabitelogi bor kud i adhura nitundo i gengi ma dongo.” 33 Pieno, dhanu mir Israel ceke giwok ku kaka ma nwang’u gipondo i iye, gicidh gikperiri pi lwiny i Baal-thamar. I saa maeno, Juisrael ma nwang’u gikanu libo de giwok ku kaka ma nwang’u gipondo i iye ceng’ini ku Gibea. 34 Kumeno re ma dhanu elufu apar (10 000) ma jung’iyo kud i Israel ceke gibino i wang’ Gibea. E lwiny ugam ubogere ma rac mandha, ento dhanu mi Benjamin ging’eyo ngo nia nyoth migi ni ceng’ini.

35 Yehova uketho Israel uloyo Benjamin man cing’ nica, Juisrael ginego jumaco mi suru pa Benjamin elufu pier ario wi abic ku dak acel (25 100); gin ceke gibino weg palamularu.

36 Ento dhanu mi suru pa Benjamin giparu nia gibiloyo dhanu mir Israel pilembe giloko kud i wang’ suru pa Benjamin; ma ke dhanu mir Israel giloko pilembe gitie ku genogen iwi ju ma giketho ukanu libo i kum Gibea. 37 Ju ma gikanu libone gitimo pio pio man gicoriri iwi Gibea, giwok gilal i adhurane man ginego dhanu m’i iye ceke ku palamularu.

38 Nwang’u dhanu mir Israel gilar giwinjiri nia ju ma gikanu libo i kum adhura gibiwok cwinyo mac, man yirone m’uidho bipoyogi nia gidaru maku adhurane.

39 Kinde ma Juisrael gilokiri ku ng’eygi kud i lwiny, dhanu mi suru pa Benjamin gicaku kiedo man ginego dhanu mir Israel ma romo pier adek, e giyero kumae: “M’umbe jiji, wabiloyogi kendo calu mi lwiny m’i wang’e.” 40 Ento lanyuth mi mbegi mi yiro ucaku idho malu niai kud i adhura. Kinde ma dhanu mi suru pa Benjamin giloko wang’gi yor i ng’eygi, gineno adhura migi ceke ubewang’ man lebmacne ubeidho i polo. 41 E dhanu mir Israel gilokiri i kumgi man ndiri ung’oy i dhanu mi suru pa Benjamin, kum gineno nia nyoth udaru tundo i wigi. 42 Pieno, giloko kud i tok dhanu mir Israel, giringo yor i langa, ento julubo tokgi asu ku lwiny. Dhanu m’ubino i adhura de giwok man gidikiri pi ninegogi. 43 Gitieko dhanu mi suru pa Benjamin gbur man giriemo tokgi m’umbe niweko. Ginegogi tap i wang’ Gibea, yo nyangu. 44 E jumaco mi suru pa Benjamin elufu apar abora (18 000) githo, gin ceke gibino jurumony ma weg tego.

45 Dhanu mi suru pa Benjamin gilokiri man giringo i langa i kum cana mi Rimon. Juisrael ginego dhanu elufu abic (5 000) m’i kindgi i gengi ma dongo, man gimediri asu niriemo tokgi nitundo i Gidom. E ginego* jumaco mange elufu ario (2 000). 46 Jumaco ceke mi suru pa Benjamin ma giweg palamularu ma githo cing’ nica, wendgi tundo elufu pier ario wi abic (25 000). Gin ceke gibino jurumony ma weg tego. 47 Ento dhanu dak abusiel giringo i langa i bang’ cana mi Rimon man gibedo i lak canane pi dwi ang’wen.

48 Dhanu mir Israel gilokiri kendo i kum dong dhanu mi suru pa Benjamin m’udong’, man ginego ju m’ubino i adhura ku palamularu, ginego dhanu man lim ku piny ceke m’udong’. Bende, giwang’u adhura ceke ma gikadhu kud i igi.

21 Nwang’u dhanu mir Israel gilar gikwong’o kwong’ i Mizpa kumae: “Ng’atu moko acel de mbe m’i kindwa ma bimiyo nyare ni dhaku ni ng’atu mi suru pa Benjamin.” 2 Pieno, Juisrael gibino i Bethel man gibedo keca i wang’ Mungu mandha nitundo uthieno, ma gibegoyo nduru man gibewak ku can ma dit. 3 Man gibino yero kumae: “E Yehova Mungu mir Israel, pirang’o lembe maeni utimere i Israeli? Pirang’o tin suru acel zoo urwiny kud i Israeli?” 4 Urwonde dhanu giai pir kugweno, man gigiero pemlam keca pi nithiero lam m’awang’a man lam mi kwiyocwiny.

5 I ng’eye, dhanu mir Israel giwacu kumae: “Kud i kind suru ceke mir Israel, ng’a m’ubino ngo nicokere i wang’ Yehova?” Kum nwang’u gikwong’iri ku kwong’ ma dit nia, ng’atu moko ci m’uidho ngo i wang’ Yehova i Mizpa, jubinege andha. 6 E can ugam umondo lee i dhanu mir Israel pi lembe m’utimo dhanu mi suru pa Benjamin m’umeggi; giyero kumae: “Tin, judaru kabu suru acel cen kud i Israel. 7 Wabitimo ang’o pi ninwang’u mon ni ju m’udong’, ma ke wakwong’o ku nying’ Yehova nia wabimiyo ngo igi anyira mwa ni mon e?”

8 Gipenjo kumae: “Ng’a m’i kind suru mir Israel m’uidho ngo i wang’ Yehova i Mizpa?” Ugam unwang’ere nia ng’atu moko acel de mbe mi Yabec-gilead m’ubino i kagonjo, kaka ma dhanu gicokiri i iye. 9 Kinde ma jukwanu dhanu, junwang’u nia ng’atu moko mi Yabec-gilead acel de mbe ma ni keca. 10 E cokirine ugam uoro dhanu ma tek nisagu, elufu apar ario (12 000) kuca. Ging’olo igi kumae: “Wucidhi, man wuneg dhanu mi Yabec-gilead ku palamularu, wuneg kadok mon man awiya. 11 Wuwok wutim kumae: wuneg ng’atu moko ci ma co, man ng’atu moko ci ma dhaku m’udaru vuto ku co.” 12 I kind dhanu mi Yabec-gilead, ginwang’u jumanyir dak ang’wen ma sumba, ma fodi givuto ngo ku co. Pieno gikelogi i kagonjo i Cilo, ma nwang’ere i ng’om mi Kanan.

13 E cokiri ceke gioro kwenda ni dhanu mi suru pa Benjamin ma gin’iwi cana mi Rimon, man gikwayugi nia giketh kwiyocwiny i kindgi. 14 E i saa maeno, dhanu mi suru pa Benjamin gidwogo. Jumiyo igi mon ma juweko udong’ kwo kud i kind mon mi Yabec-gilead, ento wend mon ma junwang’une uromogi ngo. 15 Can unego dhanu pi lembe m’uwok i kum suru pa Benjamin, pilembe Yehova uketho pokiri uwok i kind suru mir Israel. 16 E judongo mi cokiri giyero kumae: “Wabitimo ang’o pi ninwang’u mon ni dong dhanu m’udong’, calu ma junego mon ceke mi suru pa Benjamin e?” 17 Gimedo kumae: “Ukwayu dhanu mi suru pa Benjamin ma giboth gibed ku giralaga, kara suru acel kud ukabere cen kud i Israel. 18 Ento wacopo miyo ngo anyira mwa ni mon igi, pilembe dhanu mir Israel gikwong’iri kumae: ‘Kwong’ ubed iwi ng’atu m’umiyo dhaku ni ng’atu moko mi suru pa Benjamin.’”

19 E giyero kumae: “Nen! kubang’ oro, jubed jutimo foc ni Yehova i Cilo ma nwang’ere yo malu mi Bethel, man yo nyangu mi gengi ma dit m’uai i Bethel uidho i Cekem, man yo piny mi Lebona.” 20 E ging’olo ni dhanu mi suru pa Benjamin kumae: “Wucidhi, man wukan libo i podho mir ulok. 21 Kinde ma wuneno jumanyir mi Cilo giwok woko pi nibino dhoko miel, ng’atuman m’i kindwu uwoki kud i podho mir ulok, man emak ire dhaku kud i kind jumanyir mi Cilo. I ng’eye wudwog i ng’om mi Benjamin. 22 Ka weggi kunoke umeggi gibin giwagiri i bang’wa, wabiyero igi kumae: ‘Wunyuth iwa bero pigi, kum wanwang’u ngo mon ni ng’atuman m’i kindgi i lwiny; man wun de ka nwang’u wumiyo mon igi, nwang’u wuturo kwong’ mwu.’”

23 E dhanu mi suru pa Benjamin gitimo tap kumeno; ng’atuman m’i kindgi umaku ire dhaku kud i kind mon ma gibino miel. I ng’eye, gidok i ng’om migi, man gidok gigiero adhura migi kendo, e gibedo i igi.

24 E i saa maeca, Juisrael gilal ku keca. Ng’atuman udok i suru pare man i bang’ juruot pare. Ku keca ng’atuman udok i ng’om pare.

25 I nindo maeca, nwang’u jabim moko bino mbe i Israel. Ng’atuman ubed utimo gin ma ber i wang’e gire.*