RUTHA

1 I nindo ma jupoklembe gibino poko iye lembe, kec ugam upodho i ng’om mir Israel; e ng’atu moko uai kud i Bethlehem mi Yuda, ecidh ekwo ni umondo i ng’om mi Moab; en karacelo ku dhaku pare man wote ario. 2 Ng’atune nyinge bino Elimelek,* dhaku pare ke nyinge bino Naomi,* man nying’ wote ario ke ubino Malon* man Kilion.* Gibino dhanu mir Efratha ma giai i Bethlehem i Yuda. Gitundo i ng’om mi Moab man gibedo kuca.

3 I ng’ey nindo moko, Elimelek ma cwar Naomi ugam utho; e Naomi udong’ ku wote ario. 4 I ng’eye, wotene gigamu Nyimoab; acel nyinge bino Orpa, ma kucelo ke nyinge bino Rutha. Gibedo kuca oro ma romo apar. 5 I ng’eye, wode ma Malon giku Kilion de gigam githo gin ario ceke, man dhakune dong’ kende m’umbe awiya pare ario kadi cware bende. 6 E eng’iyo nia kwayu eai edok kud i ng’om mi Moab, kum ewinjo kud i Moab kuca nia Yehova miyo mugisa kendo ni dhanu pare man emiyo igi cam;* e mon wote de gicidho karacelo kude.

7 Pieno eai ku kaka ma nwang’u ebekwo i iye karacelo ku mon wote ario zoo. Kinde ma gibewotho i yo pi nidok i ng’om mi Yuda, 8 Naomi uyero ni mon wote ario ceke kumae: “Wucidhi, wuloki, ng’atuman udok i ot pa min. Dong’ Yehova unyuth iwu mer ma lokere ngo tap calu ma wun de wunyutho ni cogwu ma githo man ira bende. 9 Wek Yehova uketh* ng’atuman m’i kindwu nwang’ kayom i ot pa cware.” E ecwiyo limbgi man giwak ma tek. 10 Gimediri niyero ire kumae: “Ungo, wan wabidok mwa wakudi i bang’ dhanu ma thu.” 11 Ento Naomi uyero kumae: “Wuloki jumanyir para. Wubelubo toka pirang’o? Nyo asu fodi acopo nyolo awiya ma co ma romo doko cogwu? 12 Wuloki jumanyir para. Wucidhi, kum adaru tii lee dit m’acopo giero ngo. Kadok nwang’u aromo bedo ku genogen mi nwang’u nico uthieno ma tin man anyolo awiya ma co, 13 nyo wubikurogi nitundo ma gibidongo? Nyo wubikwero nidok giero co mange pigi? Ungo, jumanyir para, can ubenega lee dit piwu, pilembe cing’ Yehova ulokere i kuma.”

14 Giwak kendo ma tek mandha, i ng’eye Orpa ucwiyo limb wang’umire man eloko edok. Ento Rutha umoko pare asu i kume. 15 E Naomi uyero ire kumae: “Nen! ci yori uloko ubedok i bang’ dhanu ma thugi man i bang’ mungu pare. Wudok wukude.”

16 Ento Rutha uyero ire kumae: “Kud irera nia aweki man alok kud i toki; kum kaka m’ibecidho i iye, an de abicidho kuca man kaka m’ibivuto i iye, an de abivuto keca. Juthu bibedo juthuwa man Mungu peri bibedo Mungu para. 17 Kaka m’ibitho i iye, an de abitho man jubikunya keca. Dong’ Yehova umii ira matira man emede nisagu tek gin mange m’uweko tho upoko kindwa wakudi.”

18 Kinde ma Naomi neno nia Rutha ubemito pare asu gicidh gikude, eweko nicere. 19 E gin ario zoo gimediri ku woth cil ma gitundo ko i Bethlehem. Saa ma gitundo i Bethlehem, adhurane ceke uyengere pigi, man jumamon gibino penjo kumae: “Eni tie Naomi andha?” 20 Ento ebed edwoko ni monne kumae: “Kud wulwong’a Naomi.* Wulwong’a Mara,* kum Jategokpo udwoko kwo kec mandha ira. 21 Acidho m’apong’ ku piny, ento Yehova uketho adwogo ma cinga nanu. Pirang’o wulwong’a Naomi, ma ke Yehova re m’ulokere i kuma man Jategokpo re m’unyayu can i kuma?”

22 Kumeno re ma Naomi udwogo kud i ng’om mi Moab, karacelo ku ci wode ma Rutha ma Nyamoab. Gitundo i Bethlehem i acaki mi kayu nganu ma juyuke.

2 Nwang’u ng’atu moko ubino nuti i kind payoc Naomi m’ulony lee mandha; nyinge ubino Boaz man ebino wat pa Elimelek.

2 Rutha ma Nyamoab ugam uyero ni Naomi kumae: “Akweyi, wek acidh i podho pi nibeko kund cam i kind wic cam i ng’ey ng’atu moko ci m’abinwang’u bero i wang’e.” E Naomi uwacu ire kumae: “Cidhi, nyara.” 3 E ecidho man ecaku beko kund cam m’udong’ i ng’ey jukay cam. Rek kumeni, egam etundo i podho pa Boaz m’ubino wat pa Elimelek. 4 Tap i saa maeno, Boaz utundo kud i Bethlehem man eyero ni jukay cam kumae: “Yehova ubed kudwu.” Man gidwoko ire kumae: “Yehova umii iri mugisa.”

5 E Boaz upenjo jalawobi m’ubeneno wi jukay cam kumae: “Eni tie nya ng’a?” 6 Jalawobine udwoko kumae: “Eno Nyamoab ma gidwogo giku Naomi niai kud i ng’om mi Moab. 7 Epenja kumae: ‘Nyo acopo beko man acopo coko kund cam i kind wic* cam ma jukayu m’udong’ i ng’ey jukay cami?’ Man ecaku timo tic niai kugweno m’etundo keni, fodi eni kan ecidh ebedo i the tipo pi niyom nyanok.”

8 E Boaz uyero ni Rutha kumae: “Winji, nyara. Kud icidh ibek kund cam i podho mange kadi kud icidh kamange; bed ceng’ini ku jutic para ma nyir. 9 Keth weng’i i kum podho ma gibekayu, man icidh kugi. Ang’olo ni awobi ma gibetimo tic para nia kud gimul kumi.* Ka rieu pii umeki, cidh kaka m’agulu pii n’i iye man imadh pii m’awobine gitwomo.”

10 E Rutha urum piny man epodho arieba wang’e, eyero ni Boaz kumae: “Ibetimo ira bero kumeni nedi, man ibedieng’ pira nedi ma an ke a nya kamange e?” 11 Boaz udwoko ire kumae: “Jukoro ira lembe ceke m’itimo ni wang’umiri i ng’ey tho pa cweri; kite m’iweko ko wuru, meru, man ng’om thu pi nicidho i bang’ dhanu m’ilar ing’eyogi de ngo i wang’e. 12 Dong’ Yehova ucul iri kawang’ gin m’itimo, man inwang’ sukulia m’uromo tap i bang’ Yehova Mungu mir Israel, m’ibin isayu kapondo i the vombe.” 13 E Rutha udwoko ire kumae: “Inyutho ira bero ma dit rwoth para, kum ijuko cwinya man iyero wec m’utielo cwinya,* kadok nwang’u atie ngo acel m’i kind jutic peri de.”

14 Kinde ma saa pa cam uromo, Boaz uyero ire kumae: “Bin kwe kara icam mukathi moko, man iroy dund mukathi peri i giramadha ma wac.” E ebedo i ng’et jukay cam. I ng’eye Boaz umiyo ire nying cam moko m’acela, man ecamu eyeng’, man eweko donge de udong’. 15 Kinde m’eai malu pi nibeko kund cam, Boaz ung’olo ni awobi ma gibetimo tic pare kumae: “Wuwek ebeki kadok i kind wic* cam ma jukayu, man kud wusende. 16 Wuwodh bende wic cam moko kud i kind ma jutwiyo dhoge, wubol i ng’eywu ire kara ebeki, man kud wuyer lembe moko acel de pi nicere.”

17 Pieno emedere nibeko kund cam i podhone nitundo uthieno. Kinde m’efwodo nying nganu ma juyuke m’ebekone, etundo kago efa* acel. 18 E eting’o cam m’ebekone edok ko i adhura man ewok enyuthe ni wang’umire. Rutha udok bende ku dong cam m’udong’ i ng’ey m’ecamu eyeng’, man emiye ire.

19 Wang’umire ugam upenje kumae: “Tin ibeko kund cam kani? Itimo tic kani? Mugisa ukwany ng’atu m’uwok udieng’ piri.” E ekoro ni wang’umire pi ng’atu m’etimo tic i podho pare, eyero kumae: “Ng’atu m’atimo tic i podho pare tin nyinge Boaz.” 20 E Naomi uyero ni ci wode kumae: “Dong’ Yehova m’uweko ngo ninyutho mer ma lokere ngo ni ju ma kwo ku ju m’utho de umii ire mugisa.” Naomi umedo kumae: “Ng’atuno tie wat mwa. Etie acel m’i kind ju ma gitie ku twero mi laguwa.”* 21 E Rutha ma Nyamoab uwacu kumae: “Eyero ira bende nia, ‘bed ceng’ini kud aradu ma gibetimo tic para nitundo ma gibidaru nikayu cam para ceke.’” 22 Naomi ugam uyero ni ci wode ma Rutha kumae: “Nyara, e ber nia icidh karacelo ku jutic pare ma nyir, kakare ma nia jucidh jusendi i podho mange.”

23 Pieno ebedo ceng’ini ku jutic ma nyir pa Boaz, man ebeko kund cam nitundo ma nindo mi kayu nganu ma juyuke man mi kayu nganu uthum ko. E emedere asu nibedo ku wang’umire.

3 Nindo moko, Naomi ma wang’umire uyero ire kumae: “Nyara, nyo e ber ungo nia asay iri kayom* moko kara lembe ceke uwoth ma ber iri? 2 Boaz ma wutimo karacelo ku jutic pare ma nyir en e wat mwa. Tin uthieno ebekworo wang’ nganu ma juyuke i lela mi fwodo cam. 3 Dong’ jom man wir mo ma ng’wice ng’ar i kumi; i ng’eye kendiri* man lor i lela mi fwodo cam. Kud iketh eng’ey nia ini keca nitundo m’edar nicamu man nimadhu. 4 Kinde m’evuto, nen cuu ka m’evuto i iye; i ng’eye, cidh iyab bongu ku wi tiende man ivuti. E ebiyero iri gin m’ukwayu itim.”

5 E edwoko ire kumae: “Abitimo lembe ceke m’iyero ira.” 6 Egam eloro piny i lela mi fwodo cam man etimo lembe ceke ma wang’umire yero ire nia etim. 7 I kind saa maeno Boaz ucamu man emadhu, man anyong’a ubino nego adundene. I ng’eye ecidh evuto i dhu nying cam m’udhurere. E Rutha ukwalere nyayoo yoo man ebin eyabu bongu ku wi tiende, e evuto. 8 Diewor ma ling’ koyo ucaku yengo Boaz man elokere, e eneno dhaku moko uvuto i the tiende. 9 Boaz upenje kumae: “In i ng’a?” Edwoko ire kumae: “An a Rutha ma jatic peri. Um bongu* iwi jatic peri, pilembe itie wat mwa.”* 10 E Boaz uyero ire kumae: “Dong’ Yehova umii iri mugisa nyara. Kum i lembe maeni inyutho mer peri ma lokere ngo nisagu wang’ ma kwong’a, pilembe iyenyo ngo awobi; nik’ebed ma jucan kadi ma julonyo. 11 Dong’ kawoni nyara, lworo kud unegi. Abitimo iri gin ceke m’ikwayu, kum dhanu ceke mir adhura* ung’eyo nia itie dhaku ma ber mandha. 12 Andha atie wat mwu,* ento wat mwu moko ma ceng’ini nisaga utie. 13 Bed keni uthieno ma tin, man urwo kugweno tek ebilegi,* tie ber! Wek elegi. Ento kan ebimito ngo elegi, calu andha Yehova bedo kwo, abilegi an. Vut keni nitundo kugweno.”

14 E egam evuto i the tiende nitundo kugweno, man i ng’eye eai ma fodi piny ulero cuu ngo ma jucopo ng’iyo ngo ng’atini. E Boaz uyero kumae: “Kud jung’ey nia dhaku moko ubino i lela mi fwodo cam.” 15 Bende Boaz uyero ire kumae: “Bin ku bongu mi kumi man mak dhoge kii.” E emaku dhoge kii man Boaz ukonjo mukero abusiel* mi nganu ma juyuke i iye man ekethe i wiye, i ng’eye Boaz udok i adhura.

16 E edok i bang’ wang’umire. Wang’umire uwok upenje kumae: “Nyara, lembe uwotho iri nenedi?”* Rutha ugam ukoro ire lembe ceke ma ng’atune utimo ire. 17 Rutha umedo kumae: “Emiyo ira mukero abusiel maeni mi nganu ma juyuke man ewacu ira kumae: ‘Kud idok i bang’ wang’umiri ma cingi nanu.’” 18 Naomi uyero ire kumae: “Nyara, bed kakeni ikur nitundo m’ibing’eyo kite ma lembene biwotho ko, kum ng’atuno biyom ungo ka fodi edaru ngo lembene tin eni.”

4 Pieno, Boaz uidho malu i dhugang’ mir adhura man ebedo keca. Man nen! jawar* m’eweco pirene ubino kadhu. E Boaz uyero kumae: “E ng’ati e, kebin ibed kae.” E ecidho man ewok ebedo. 2 I ng’eye, Boaz uting’o judongo apar mir adhura man eyero igi kumae: “Wukewubed kae.” E gibedo.

3 Boaz ugam uyero ni jawarne* kumae: “Naomi m’udwogo kud i Moab ubelworo ng’om m’ubino p’umegwa ma Elimelek. 4 E aparu nia anyuth lembene iri, man ayer iri nia ing’iew ng’ombe i wang’ dhanu man i wang’ judongo ma thuwa. Tek ibiwaru ng’ombe, ware; ento tek ibiware ngo, nyuth ira kara ang’ey, kum in re m’itie ku twero mi ware; an atie mir arionde i ng’eyi.” E edwoko kumae: “Atie ayika niwaru ng’ombe.” 5 Boaz ugam uyero ire kumae: “I nindo m’ibing’iewo podho kud i bang’ Naomi, nwang’u ing’iewe bende kud i bang’ Rutha ma Nyamoab ma dhaku pa ng’atu m’utho; kara iketh nying’ ng’atu m’utho ulwong’ere asu i kum giralaga pare.” 6 E jawarne* uyero kumae: “Acopo waru ngo ng’ombe, amaru nyotho giralaga para. Ware iri ku twero para mi waru war, pilembe aromo ware ngo.”

7 Nwang’u con i kura mir Israel, tek jubemito nyutho nia gin moko tie kumeca i lembe m’uneno twero mi waru war man mi wilo gin moko ci, jubed jutimo kumae: ng’atini wodho wara mi tiende man emiye i bang’ ng’atu m’i thenge ma kucelo; kumeno re ma jubed junyutho i Israel nia dhogjo urombo iwi lembe moko ma juwinjiri i wiye. 8 Pieno kinde ma wat ma ceng’inine uyero ni Boaz nia, “ng’iew ng’ombe iri,” ewodho wara pare kud i tiende. 9 E Boaz uyero ni judongo ku dhanu ceke kumae: “Tin wun wu jumulembe* nia abeng’iewo piny ceke m’ubino pa Elimelek, man piny ceke m’ubino pa Kilion giku Malon kud i bang’ Naomi. 10 Abegamu ira bende* Rutha ma Nyamoab m’ubino dhaku pa Malon, kara nying’ ng’atu m’utho ulwong’ere asu i kum giralaga pare, man kara nying’ ng’atu m’utho kud uling’ kud i kind umego pare, man kud i adhura ma thugi.* Wun wu jumulembene* tin eni.”

11 E dhanu ceke ma gibino i dhugang’ mir adhura man judongo giyero kumae: “Eyo, wa jumulembene!* Dong’ Yehova uketh dhaku m’ubecimondo i ot peri ubed calu Racel man calu Leya, ma gin ario zoo ginyolo thek mir Israel. Wek lembe bed iri miero i Efratha man keth piri ng’eyere ma ber* i Bethlehem. 12 Man nikum nyathin* ma Yehova bimiyo iri nikadhu kud i bang’ dhaku maeni, wek ot peri udok calu pa Perez ma Thamar unyolo ni Yuda.”

13 Pieno Boaz ugamu Rutha man edoko dhaku pare. Etimo ribiri kude man Yehova uketho enwang’u ic, e enyolo nyathin ma nico. 14 E jumamon giyero ni Naomi kumae: “Pak ubed ni Yehova, en m’eweki ngo m’umbe jawar tin eni. Dong’ jutwong’ nyinge* i Israel ceke! 15 Edwoki* kwo* kendo man ebigwoki kinde m’itii, pilembe ci wodi m’unyole umeri man e ber iri ma sagu awiya ma co abiro.” 16 Naomi ugamu nyathinne man eting’e i kore, e edoko japidi* pare. 17 I ng’eye, mon ma gi judhugola pare gicaku nying’ nyathinne. Giyero kumae: “Junyolo nyathin ma nico ni Naomi,” man gilwong’o nyinge Obed. En e won Yese ma won Daudi.

18 Maeni en e thekwaru* pa Perez: Perez unyolo Hezron; 19 Hezron unyolo Ram; Ram unyolo Aminadab; 20 Aminadab unyolo Nacon; Nacon unyolo Salmon; 21 Salmon unyolo Boaz; Boaz unyolo Obed; 22 Obed unyolo Yese; man Yese ke unyolo Daudi.