SAMWEL MI KWONG’O

1 Nwang’u ng’atu moko ubino nuti i Ramathaim-zofim* i ng’om gudi pa Efraim, ma nyinge ubino Elkana. Ebino wod Yeroham ma wod Elihu, ma wod Thohu ma wod Zuf ma Jaefraim. 2 Ebino ku mon ario; nying’ dhakune acel ubino Ana, ma kucelo ke Penina. Penina ubino kud awiya, ento Ana ubino mbe kud awiya. 3 Kubang’ oro, Elkana ubed uai kud i adhura pare man ecidho i Cilo pi nitimo thier* man nithiero lam ni Yehova Mungu mir udul. Kuca re ma wot Eli ario, niwacu Hofni giku Fineas gibed gitimo calu julam ni Yehova.

4 Nindo moko kinde ma Elkana ubethiero lam, emiyo theng girathierane moko ni dhaku pare ma Penina, man ni awiya pa Penina ma co ku ma nyir ceke. 5 Re ni Ana emiyo thenge ma cuu m’usagu zoo, pilembe egam emare lee; ento Yehova umiyo ngo awiya* ni Ana. 6 M’umedo maeno, nyeke ubed unyware saa ceke pi ninyayu can i iye, pilembe Yehova umiyo ngo ire awiya. 7 Ebed etimo kumeno kubang’ oro; ka Ana ubeidho i ot pa Yehova ci, nyeke ubed unyware lee mandha uketho ebed ewak man ecamu de ngo. 8 Ento Elkana ma cware uyero ire kumae: “Ana, iwagu ang’o? Pirang’o ibecamu ngo, man pirang’o itie ku can lee kumeno?* Nyo an a ber ungo iri nisagu awiya ma co apari?”

9 I ng’ey ma gidaru nicamu man nimadhu i Cilo kuca, Ana ugam uai malu. I saa maeno, nwang’u Eli ma jalam ubedo iwi kom i ng’et dhugola mir hekalu* pa Yehova. 10 Ana ubino ku can lee dit i cwinye,* e ecaku rwo i bang’ Yehova man ewak lee dit akeca. 11 Man etimo lembang’ola ku kwong’ kumae: “E Yehova Mungu mir udul, kenen kite m’abesendara ko e; tekene ipoy pira an a jatic peri man wii wil ungo i kum jatic peri, man imiyo nyathin ma nico ni jatic peri, e abimiye iri Yehova i nindo mi kwo pare zoo, man riedi bimulo ngo wiye.”

12 Kinde m’eberwo pi saa ma lee i wang’ Yehova, Eli ubino neno dhoge. 13 Nwang’u Ana ubeweco i adundene, dend dhoge re m’ubino goyere, ento dwande ubino winjere ngo. Pieno Eli uparu nia emer amera. 14 E Eli uyero ire kumae: “Ibimediri ku mero peri no nitundo awene? Wek nimadhu pigulok.” 15 Ana udwoko ire kumae: “Ungo rwoth para! An a dhaku ma can ubenego adundene lee; amadhu ngo pigulok kadi kit kong’o moko ci, ento abekoro lembe m’i cwinya* ni Yehova. 16 Kud inen jatic peri ni dhaku ma kony pare mbe, kum ang’abacwiny man can para ma dit re m’uketho aweco nitundo kawoni.” 17 Eli ulund udwoko kumae: “Cidh ma cwinyi kwiyo, dong’ Mungu mir Israel umii iri gin m’ikwayu i bang’e.” 18 E Ana uwacu kumae: “Wek jatic peri unwang’ bero i weng’i.” Pieno dhakune ucidho, ecamu man can uthum kud i wang’e.

19 Urwonde giai pir kugweno man girum i wang’ Yehova, i ng’eye gidok i pacu migi i Rama. Elkana utimo ribiri ku Ana ma dhaku pare, man Yehova upoy pire. 20 E i kind oro acel* Ana unwang’u ic man enyolo nyathin ma nico; ecaku nyinge Samwel* pilembe eyero kumae: “Akwaye i bang’ Yehova.”

21 I ng’ey kare, Elkana uidho i Cilo ku juruot pare ceke pi nithiero lam ma kubang’ oro ni Yehova man pi nimiyo girathiera ma ku kwong’. 22 Ento Ana uidho ngo, kum eyero ni cware kumae: “Tek nyathin bikwiro cak ci, abitere i wang’ Yehova, man niai saa maeca ebibedo kuca.” 23 E Elkana ma cware uyero ire kumae: “Tim gin m’ubedo ber i weng’i. Bed i pacu nitundo ikwir nyathinne. Dong’ Yehova utim lembe m’iyero.” Pieno dhakune ubedo i pacu, eketho wode udhoth nitundo m’ekwire ku cak.

24 Saa ma nyathinne ukwiro cak ci, Ana uidho kude malu i Cilo; ecidho ku thwon dhiang’ mi oro adek, mogo efa* acel man pigulok agulu acel ma dit. Egam ecidho i ot pa Yehova i Cilo karacelo ku nyathinne. 25 E juthumo thwon dhiang’ man jutero nyathinne i bang’ Eli. 26 Ana ugam uwacu kumae: “Tim ira kisa rwoth para! Tek andha ibedo kwo rwoth para, an re m’atie dhaku ma nindo moko ugam ucungo i ng’eti kakeni pi nirwo i bang’ Yehova. 27 Agam arwo kara anwang’ nyathin maeni, e Yehova umiyo ira gin m’akwayu i bang’e. 28 An lundo kawoni abemiye* ni Yehova. I nindo mi kwo pare zoo ebibedo pa Yehova.”

E erum* keca i wang’ Yehova.

2 E Ana urwo kumae:

11 E Elkana ugam udok i pacu pare i Rama, ento wode udoko jatic pa* Yehova i the telowic pa Eli ma jalam.

12 Ento wot Eli gibino dhanu ma reco; gibed giworo Yehova de ngo. 13 Gibed gitimo kumae i kum gin ma dhanu ucikiri nimiyo ni julam: ka ng’atu moko ubino thiero lam, jatic pa jalam bino ku kanya ma lake adek i cinge saa ma ring’o ubetwak, 14 man eroyo kanyane i agulu, i aole, i aziza, kunoke i agulu ma cinge acel. Jalam ubed uting’o ire gin moko ci ma kanyane ucobo. Gibed gitimo kumeno i kum Juisrael ceke ma gicidho i Cilo. 15 Bende, ma fodi ng’atu m’ubethiero lam uketho ngo juwang’u miyo, jatic pa jalam ubed ubino man eyero ni ng’atune kumae: “Mii ring’o ma juromo vulo avula ni jalam. Kum ebigamu ngo ring’o m’ateda kud i beng’i, ento ring’o ma numu kende.” 16 Ka ng’atune uyero ni jaticne kumae: “Kewek jular juwang’ miyo, ka dong’ i ng’eye iting’ gin moko ci m’iyenyo,”* eyero kumae: “Ungo, miye kawoni, kan ungo abiting’e ku kero!” 17 E dubo mi juticne udoko dit akeca i wang’ Yehova, kum dhanune gibed giworo ngo girathiera ma jubethiero ni Yehova.

18 Nwang’u Samwel ubino timo i wang’ Yehova kinde ma fodi e jalawobi, man ebed ekendo* efodh* mi bongu ma nwang’.* 19 Bende, min ubed uyiko ire nyathi koti ma bote mbe, man ekele ire kubang’ oro saa ma ka gibino ku cware pi nithiero lam ma kubang’ oro. 20 E Eli umiyo mugisa ni Elkana giku dhaku pare man ewacu kumae: “Yehova umii iri nyathin nikadhu kud i bang’ dhaku maeni kaka nyathin ma wumiyo ni Yehova.” E gigam gidok i pacu. 21 E Yehova uneno kisa i kum Ana, pieno enwang’u ic man enyolo awiya ma co mange adek ku jumanyir ario. E jalawobi Samwel umedere nidongo i wang’ Yehova.

22 Nwang’u Eli utii lee akeca, ento ewinjo lembe ceke ma wote gibino timo i kum Juisrael ceke, man ayi ma gibed givuto ko ku jumamon ma gibetimo i dhugola mi hema mi rombo. 23 Ebed eyero igi kumae: “Pirang’o wubemeduru nitimo lembe ma kumeno? Kum gin m’abewinjo dhanu ceke ubeyero piwu tie rac. 24 Ungo, wota, lembe m’abewinjo jubedwoko piwu m’ubewotho i kind dhanu pa Yehova tie ber ungo. 25 Tek ng’atu moko udubo i kum dhanu wadi, ng’atu mange romo kwayu Yehova pire;* ento tek ng’atini udubo i kum Yehova, ng’a ma romo rwo pire?” Ento gikwero niwinjo weggi, kum Yehova ukeco ninegogi. 26 I saa maeno jalawobi Samwel umedere nidongo man ninwang’u bero i wang’ Yehova kud i wang’ dhanu de.

27 Dhanu pa Mungu moko ubino i bang’ Eli man uyero ire kumae: “Yehova uyero kumae: ‘Nyo agam anyuthara ngo kamaleng’ ni ot pa kwaru, kinde ma gibino i ng’eca i Misiri i ot pa Farao? 28 Man ang’iyo kwaru kud i kind suru ceke mir Israel kara ebed jalam para man eidh i dhu pemlam para pi nithiero lam,* pi niwang’u udok ma ng’wice ng’ar, man nikendo efodh* i wang’a; amiyo bende girathiera ceke ma Juisrael* githiero ku mac ni ot pa kwaru. 29 Pirang’o wubecayu* lam para man girathiera para m’ang’olo juthier i ot para? Pirang’o ibemediri niyungo woti nisagu an, ma wubecwey ko ku ng’et piny ma beco mi girathiera ceke mi dhanu para Israeli?

30 “‘Eno re m’uketho Yehova Mungu mir Israel ubeyero kumae: “Andha nwang’u ayero nia ot peri man ot pa kwaru bitimo ira saa ceke.” Ento kawoni Yehova uwacu kumae: “Thelembene dong’ ujik magwei, kum abiyungo ju ma gibeyunga, ento ju m’ubecaya abinenogi ni gin moko ngo.” 31 Nen! nindo ubebino m’abikabu tego peri* man tego m’i ot pa wuru cen, ma dong’ ng’atu moko mbe m’i ot peri ma bikwo nitundo i tiyo. 32 Kinde ma lembe ceke ubewotho ma ber i Israel, ibilund neno jakwor peri i ot para, man ng’atu moko mbe ma bikwo kendo nitundo i tiyo i ot peri. 33 Ng’atu acel m’i ot peri m’abiweko utim iwi pemlam para biketho weng’i bitho man ebing’abu cwinyi,* ento wend dhanu ma dupa m’i ot peri bitho ku palamularu mi dhanu. 34 Bende, lembe ma bitimere i kum woti ario ma Hofni giku Fineas bibedo lanyuth iri: gin ario ceke gibitho ceng’ acel. 35 I ng’eye abing’iyo ira jalam mandha. Ebitimo calku lembe m’adundena yenyo;* abigiero ire ot* ma bigalu man saa ceke ebibedo jalam ni ng’atu m’awiro. 36 Ng’atu moko ci m’udong’ i ot peri bibino man ebirumo conge i wang’e pi ninwang’u sente man lungu mukathi moko, ebiyero kumae: “Ka copere kemii ira tic moko mi bedo jalam, kara anwang’ lungu mukathi moko m’aromo camu.”’”

3 I saa maeno, nyathi jalawobi Samwel ubino timo ni Yehova i the telowic pa Eli, ento i nindo maeca Yehova ubed uweco ngo wang’ ma pol, man gin ma wok i wang’ de ubino nok.

2 Nindo acel, Eli uvuto kaka m’ebed evuto i iye man wang’e doko nyaviavia ma dong’ ecopo neno piny cuu ngo. 3 Nwang’u fodi junego ngo thala pa Mungu, man Samwel ke uvuto i hekalu* pa Yehova kaka ma Sanduku pa Mungu ubino i iye. 4 Yehova ugam ulwong’o Samwel. E eyii kumae: “Anuti.” 5 Pieno Samwel uringo i bang’ Eli man ewacu kumae: “Ani e, kum ilwong’a.” Ento Eli udwoko ire kumae: “Alwong’i ngo. Dok ivuti.” E edok evuto. 6 Yehova ulwong’e kendo kumae: “Samwel!” E Samwel ugam uai man ecidho i bang’ Eli, ewacu kumae: “Ani e, kum ilwong’a.” Ento Eli udwoko ire kumae: “Alwong’i ngo woda. Dok ivuti.” 7 (Nwang’u fodi Samwel ung’eyo Yehova ngo, man lembe pa Yehova de nwang’u fodi unyuthere ngo ire.) 8 Yehova ulwong’e kendo wang’ mir adege kumae: “Samwel!” E Samwel uai malu man ecidho i bang’ Eli, ewacu kumae: “Ani e, kum ilwong’a.”

E Eli unyang’ nia Yehova re m’ubelwong’o jalawobine. 9 Eli ugam uwacu ni Samwel kumae: “Dok ivuti, tek elwong’i, yer kumae: ‘Weci Yehova, kum jatic peri ubewinjo.’” E Samwel udok uvuto kakare.

10 Yehova ubino man ecungo keca, e elwong’e calu m’i wang’e kumae: “Samwel, Samwel!” E Samwel uyero kumae: “Weci, kum jatic peri ubewinjo.” 11 Yehova uyero ni Samwel kumae: “Nen! abetimo lembe moko i Israel, ma ng’atu moko ci ma biwinje, lembene bitime rac mandha.* 12 I nindo maeca, abiketho lembe ceke m’ayero pi Eli man pi ot pare utimere, niai i acaki nitundo i ajiki. 13 Ukwayu iyer ire nia abekelo pokolembe ma rondo ku rondo iwi ot pare pi dubo m’eng’eyo pire cuu, kum wote gibelamu Mungu, ento ejukogi ngo. 14 Pieno re m’akwong’o ni ot pa Eli nia lam moko mbe kadi girathiera moko acel de mbe ma biumo wi dubo m’i ot pa Eli.”

15 Samwel uvuto nitundo kugweno; i ng’eye eyabu dhugola mi ot pa Yehova. Lworo ubino nego Samwel nikoro pi gin ma wok i wang’ne ni Eli. 16 Ento Eli ulwong’o Samwel kumae: “Samwel woda!” E Samwel udwoko kumae: “Anuti.” 17 Eli upenje kumae: “Eyero iri lembang’o? Ka copere, kud imung’ lembene ira. Dong’ Mungu umii iri matira man emede lee tek imung’o ira kadok lembe acel kud i kind lembe ceke m’eyero iri.” 18 E Samwel ukoro ire lembe ceke, emung’o ngo ire kadok lembe acel de. Eli uwacu kumae: “Eni tie Yehova. Wek etim lembe ma ber i wang’e.”

19 Samwel umedere nidongo, man Yehova ubino karacelo kude, eweko ngo lembe pare acel de udong’ m’utimere ngo.* 20 Juisrael ceke niai i Dan nitundo i Ber-ceba gigam ging’eyo nia Yehova ung’iyo Samwel ubed jabila pare. 21 E Yehova umedere ninyuthere i Cilo, kum Yehova unyuthere en gire ni Samwel i Cilo, man kuca re ma Yehova ubed uweco i bang’e.

4 Man lembe pa Samwel ubed ucidho i Israel ceke.

I ng’eye Juisrael gicidho pi nikiedo lwiny ku Jufilisti; giwok gigonjo i ng’et Ebenezer, Jufilisti ke gigonjo i Afek. 2 Jufilisti gigam gikperiri pi lwiny kara gikied i dhu Israel, ento lwiny udoko lieth i kum Israel, pieno Jufilisti uvoyogi. E ginego jumaco ma romo elufu ang’wen (4 000) i lum kaka ma lwiny ubekadhu i iye. 3 Kinde ma dhanu gidwogo i kagonjo, judongo mir Israel gipenjo kumae: “Pirang’o Yehova uweko Jufilisti giloyowa* tini? Wacidh wagemu sanduku mi lembariba pa Yehova kud i Cilo kara ebed karacelo kudwa, man ebodhwa kud i cing’ judegi mwa.” 4 E juoro dhanu i Cilo man gicidh gigamu sanduku mi lembariba pa Yehova mir udul, m’ujany malu iwi* jukerubi. Wot Eli ario, niwacu Hofni giku Fineas de gicidho karacelo ku sanduku mi lembariba pa Mungu mandha.

5 Kinde ma sanduku mi lembariba pa Yehova utundo i kagonjo, Juisrael ceke gikok ma tek mandha, uketho ng’om uyengere ayenga. 6 Saa ma Jufilisti giwinjo ba dwal mi kok, gipenjo kumae: “Pirang’o jubekok ma tek kumeni i kagonjo mi Juebrania?” E i ng’eye giwinjo nia Sanduku pa Yehova utundo i kagonjo. 7 Lworo ulund umaku Jufilisti, kum giyero kumae: “Mungu udaru tundo i kagonjo!” Pieno giwacu kumae: “Can i wiwa, kum nwang’u fodi lembe ma kumeni utimere ngo nyanok de i wang’e! 8 Can i wiwa! Ng’a ma bibodhowa kud i cing’ Mungu ma dwong’ maeni? En re m’etie Mungu m’ugam ugoyo Jumisiri ku kit tho ma tung’ tung’ i langa. 9 Cwinywu bed tek calu co wu Jufilisti, kara kud wutim ni Juebrania tap calu ma gitimo iwu. Wukied calu co!” 10 Pieno Jufilisti gikiedo ku Juisrael man giloyogi, e ng’atuman uringo udok i hema pare. Dhanu utho lee dit; i ng’ete mi Juisrael junego juaskari elufu pier adek (30 000) ma giwotho ku tiendgi. 11 Juyaku bende Sanduku pa Mungu, man wot Eli ario, niwacu Hofni giku Fineas de githo.

12 E ng’atu moko mi suru pa Benjamin uringo ku kaka ma jubekiedo lwiny i iye, man etundo i Cilo de cing’ nica ma bongu pare uyec man kud utur i wiye. 13 Kinde ma ng’atune tundo, nwang’u Eli ubedo iwi kom i dhu yo m’ebekiyo, pilembe cwinye ubino pido lee dit* pi Sanduku pa Mungu mandha. Ng’atu maeno umondo i adhura man enyutho rwonglembene ni dhanu, e dhanu ceke mir adhura gimor ku wak. 14 Kinde ma Eli uwinjo dhanu ubewak, epenjo kumae: “Jubegoyo nduru kumeni pirang’o?” E ng’atu ma rom eno ubino pio pio man edwoko lembene ni Eli. 15 (Nwang’u Eli ubino ku oro pier abung’wen wi abora, man wang’e cor ma dong’ eneno piny ungo.) 16 E ng’atune uyero ni Eli kumae: “An re m’aai kaka ma jubekiedo lwiny i iye! Aringo de tin eni ku kuca.” Eli ugam upenje kumae: “Woda, lembang’o m’utimere?” 17 E ng’atu m’ukelo rwonglembene ukoro kumae: “Israel uringo kud i wang’ Jufilisti, man juloyo dhanu kud aloci ma lee dit; woti ario ma Hofni giku Fineas de githo, man Sanduku pa Mungu mandha de juyaku.”

18 Saa ma ng’atune ulwong’o nying’ Sanduku pa Mungu mandha ci, e Eli upodho ataru kud iwi kom pare ma nwang’u n’i ng’et dhugola. Ng’ute ugam utur man etho, kum nwang’u dong’ etii man edoko pek. Ebedo japoklembe mir Israel pi oro pier ang’wen. 19 Nwang’u ci wode ma dhaku pa Fineas iye uteng’ini, man edhingo oy. Saa m’ewinjo nia juyaku Sanduku pa Mungu mandha man nia kwarumire giku cware de githo, e egung’ pilembe iye ucaku remo rek man enyolo nyathin. 20 Kinde m’ebetho, mon ma gicungo i ng’ete giwacu kumae: “Lworo kud unegi, kum inyolo nyathin ma nico.” Re edwoko de ngo lembe moko man edieng’ de ngo pi lembene.* 21 Ento ecaku nying’ nyathinne nia Ikabod,* kum ewacu kumae: “Dwong’ mir Israel ucidho i ng’eca;” ebino weco pi Sanduku pa Mungu mandha ma juyaku man pi lembe m’utimo kwarumire giku cware. 22 Eyero kumae: “Dwong’ mir Israel ucidho i ng’eca, kum juyaku Sanduku pa Mungu mandha.”

5 Kinde ma Jufilisti giyaku Sanduku pa Mungu mandha, giting’e kud i Ebenezer gitere i Acdod. 2 Jufilisti giting’o Sanduku pa Mungu mandha man gitere i hekalu* pa Dagon, e gikethe i ng’et Dagon. 3 Kinde ma Juacdod giai urwonde pir kugweno, ginwang’u Dagon upodho arieba wang’e i ng’om i wang’ Sanduku pa Yehova. E giting’o Dagon man gidwoke kakare. 4 I nindo m’ulubo, kinde ma giai kugweno pir, ginwang’u Dagon upodho arieba wang’e i ng’om i wang’ Sanduku pa Yehova. Wi Dagon ku cinge ario zoo ung’ol man upodho i wang’ dhugola. Wathkume ma ve rec kende* re m’udong’ ma gin m’utime mbe. 5 Eno re m’uketho nitundo tin de julam pa Dagon karacelo ku ju ceke ma gibemondo i hekalu pa Dagon, giwotho ngo i wang’ dhugola pa Dagon i Acdod kaka m’epodho i iye.

6 Cing’ Yehova udoko pek iwi Juacdod, uketho emiyo matira ni dhanu mi Acdod ku mi kabedo m’i ng’ete man egoyogi ku min ic. 7 Saa ma dhanu mi Acdod gineno lembe m’ubetimere, giyero kumae: “Ukwayu ngo Sanduku pa Mungu mir Israel ubed asu i kindwa, kum etimowa lith dit karacelo ku mungu mwa ma Dagon.” 8 Pieno gioro jucidh julwong’o rwodhi mi Jufilisti ceke man gipenjogi kumae: “Ukwayu watim Sanduku pa Mungu mir Israel e nenedi?” Rwodhine gidwoko kumae: “Dong’ Sanduku pa Mungu mir Israel ucidh i Gath.” E gitero Sanduku pa Mungu mir Israel kuca.

9 I ng’ey ma gitere i Gath, cing’ Yehova ubino i kum adhurane, e ndiri ma lee unyay i dhanu. Emiyo matira ni dhanu mir adhurane niai i kum awiya nitundo i kum judongo, man egoyogi ku min ic. 10 Pieno, gioro Sanduku pa Mungu mandha i Ekron, ento saa ma Sanduku pa Mungu mandha utundo i Ekron ci, dhanu mir Ekron gicaku kok kumae: “Gikelo Sanduku pa Mungu mir Israel i bang’wa kara unegwa ku dhanu mwa!” 11 E gioro jucidh jucoko rwodhi ceke mi Jufilisti man giyero kumae: “Wudwok Sanduku pa Mungu mir Israel cen; wuwek edok kaka m’ebino i iye, kara wan karacelo ku dhanu mwa kud watho.” Kum nwang’u ndiri tho udaru lal i adhura ceke. Cing’ Mungu mandha ubino pek akeca i wigi, 12 man dhanu ma githo ngo jugoyogi ku min ic. E wak mi dhanu mir adhura ma gibekwayu ko kony uidho nitundo malu i polo.

6 Sanduku pa Yehova utimo dwi abiro i ng’om mi Jufilisti. 2 E Jufilisti gilwong’o julam ku juewlembe man gipenjogi kumae: “Ukwayu watim Sanduku pa Yehova nenedi? Wunyuth iwa kite ma wacopo dwoke ko kaka m’ebino i iye.” 3 Giyero kumae: “Tek wubemito dwoko sanduku mi lembariba pa Yehova Mungu mir Israel, ukwayu ngo wuore edoki m’umbe girathiera. Ukwayu wudwoke ire kokoro ku girathiera moko pi dubo mwu. Ka wutimo kumeno re ma wubikey, man wubing’eyo nia pirang’o cinge uwekowu ngo.” 4 E gipenjo kumae: “Wamii ire kit girathiera ma nenedi?” Gidwoko kumae: “Nimakere ku wend rwodhi mi Jufilisti, wuor ayi pa min ic mi mola ma kwar abic man uyo mi mola ma kwar abic, kum masendi ma rom eno re m’ubino i wiwu man iwi rwodhi mwu. 5 Ukwayu wuyik ayi pa min ic, ayi p’uyo m’ubenyotho ng’om mwu, man wucikuru nimiyo dwong’ ni Mungu mir Israel. Saa moko nyo ebiweko nimiyo matira iwu, ni mungu mwu, man iwi ng’om mwu. 6 Kud wudwok adundewu nwang’ calu ma dhanu mi Misiri man Farao de gigam gidwoko ko adundegi nwang’. Kinde m’etimogi mvuk, ginwang’u nia ukwayu giwek Israel ucidhi, e Israel ucidho. 7 Kawoni wuyik magali ma nyen man wugam megi dhieng’ ario ma tie ku nyithindhgi ma fodi jutwiyo ngo mberembere i wigi. I ng’eye, wutwii megi dhieng’ne i kum magaline, ento wudwok nyithindhgi i dwol. 8 Wugam Sanduku pa Yehova man wukethe i magaline, wuketh bende piny ma wuyiko ku mola ma kwar ma wubeoro ire calu girathiera mi dubo mwu i sanduku moko i ng’ete. E wuore ecidhi 9 man wunen: Tekene eidho i ndaki mi Beth-cemec pi nidok i ng’om pare, nwang’u Mungu mir Israel re m’utimo tho lembe ma rac maeni i kumwa. Ento tek ungo, wabing’eyo nia tie ngo cinge re m’ugoyowa; etie peko m’uwok gire.”

10 E dhanune gitimo kumeno. Gigamu megi dhieng’ ario ma tie ku nyithindhgi man gitwiyogi i kum magali, ento giciko bang’ nyithindhgi i dwol. 11 Gigam giketho Sanduku pa Yehova i magaline karacelo ku sanduku ma tie kud uyo mi mola ma kwar man ayi pa min ic ma giyiko. 12 E megi dhieng’ne gicidho atira i ndaki mi Beth-cemec. Giwotho kwa i gengi acel ma dit, ma gibewak kinde ma gibecidho; gilokiri ngo yor acwic kadi yor acam. Kinde ma gibecidho, rwodhi mi Jufilisti gilubo tokgi nitundo i kieu mi Beth-cemec. 13 Nwang’u dhanu mi Beth-cemec gibino kayu nganu i poga.* Saa ma giting’o wang’gi gineno Sanduku, e anyong’a unegogi lee. 14 Magaline uwok umondo i podho pa Yocuwa ma Jabeth-cemec, man ewok ecungo keca i kum kidi moko ma dit. E dhanu maeno gikaku yen mi magaline man githiero megi dhieng’ne ni lam m’awang’a ni Yehova.

15 E Julawi giloro Sanduku pa Yehova man sanduku m’ubino i ng’ete, m’utie ku piny mi mola ma kwar i iye; gikethogi iwi kidi ma ditne. Cing’ nica dhanu mi Beth-cemec githiero lam m’awang’a, man githiero lam ni Yehova.

16 Kinde ma rwodhi abic mi Jufilisti gineno lembe maeno, e gidok i Ekron de cing’ nica. 17 Maeni tie ayi pa min ic mi mola ma kwar ma Jufilisti gioro ni Yehova pi dubo migi: acel pi Acdod, acel pi Gaza, acel pi Ackelon, acel pi Gath, man acel pir Ekron. 18 Man gioro wend uyo mi mola ma kwar calku wend adhura ceke mi Jufilisti ma rwodhi abic gibimo wigi; nik’ebed adhura ma tek, kadi pacu mi kiaru.

Kidi ma dit ma giloro Sanduku pa Yehova i wiye udong’ calu jampoy nitundo i nindo ma tin eni i podho pa Yocuwa ma Jabeth-cemec. 19 Ento Mungu ugoyo dhanu mi Beth-cemec pilembe gineno Sanduku pa Yehova. Enego dhanu m’i kindgi elufu pier abic ku pier abiro (50 070),* man dhanu ucaku wak pilembe Yehova unegogi ku nek ma dit. 20 E dhanu mi Beth-cemec gipenjo kumae: “Ng’a ma bicungo i wang’ Yehova, Mungu maeni ma leng’, man ku keni ke ebicidho i bang’ ng’a?” 21 Gigam gioro jukwenda ucidh uyer ni dhanu mi Kiriath-jearim kumae: “Jufilisti gidwogo Sanduku pa Yehova. Wulor wubin wugame edok i beng’wu.”

7 E dhanu mi Kiriath-jearim gibin gigamu Sanduku pa Yehova, man gitere malu iwi got i ot p’Abinadab; e ging’iyo* Eleazar ma wode kara egwok Sanduku pa Yehova.

2 Niai ma Sanduku udok i Kiriath-jearim, nindo uton lee; oro pier ario. E dhanu ceke mir Israel gicaku sayu* Yehova. 3 E Samwel uyero ni dhanu ceke mir Israel kumae: “Tekene wubedwogo i bang’ Yehova kud adundewu ceke, wukab cen kud i kindwu mungu mi juwirok man ayi gin m’acwiya ma Actoreth. Man wuthieruru kud adundewu ceke ni Yehova, man wutim ire kende, e ebibodhowu kud i cing’ Jufilisti.” 4 Juisrael gigam gikabu Baal man ayi gin m’acwiya ma Actoreth cen, e gitimo ni Yehova kende.

5 I ng’eye, Samwel uyero kumae: “Wucok Juisrael ceke karacelo i Mizpa, man abikwayu Yehova piwu.” 6 E gicokiri karacelo i Mizpa man gitwomo pii gikonjo i wang’ Yehova, e gikwiro cam i nindo maeca. Kuca dhanu uwacu kumae: “Wadubo ni Yehova.” Man Samwel ucaku timo calu japoklembe i Israel i Mizpa.

7 Kinde ma Jufilisti giwinjo nia Juisrael gicokiri karacelo i Mizpa, rwodhi mi Jufilisti giidho i kum Juisrael. Saa ma Juisrael giwinjo lembene, lworo unegogi lee i kum Jufilisti. 8 E Juisrael giyero ni Samwel kumae: “Kud iwek nikwayu Yehova Mungu mwa kara ekonywa man kara ebodhwa kud i cing’ Jufilisti.” 9 E Samwel ugamu nyathin urombo ma dhoth man ethiere ni lam m’awang’a ma zoo ni Yehova; man Samwel ukwayu Yehova kara ekony Israel, e Yehova udwoko wang’ kwac pare. 10 Kinde ma Samwel ubino thiero lam m’awang’a, Jufilisti gicoro i kum Israel pi lwiny. E cing’ nica Yehova uketho polo mor ma tek iwi Jufilisti, man enyotho wigi. E Juisrael giloyogi. 11 Dhanu mir Israel gigam giwok kud i Mizpa man giriemo tok Jufilisti, ginegogi nitundo yo piny mi Beth-kar. 12 E Samwel uting’o kidi moko man ecome i kind Mizpa ku Yecana, man ecaku nyinge Ebenezer;* kum ewacu kumae: “Nitundo kawoni Yehova ukonyowa.” 13 Kumeno re ma Jufilisti gikwiyo, man gibino kendo ngo i ng’om mir Israel; cing’ Yehova ubedo i kum Jufilisti i nindo ceke ma Samwel ukwo i iye. 14 Bende, Jufilisti gidwoko ni Juisrael adhura migi ma gilar gimayu niai i Ekron nitundo i Gath; man Juisrael umayu bende ng’om migi kud i cing’ Jufilisti.

Man kwiyocwiny ubino nuti bende i kind Juisrael ku Juamor.

15 Samwel ubedo japoklembe i Israel i kwo pare zoo. 16 Kubang’ oro ebed ecidho i Bethel, i Gilgal, man i Mizpa, man ebed epoko lembe mir Israel i kabedo maeno ceke. 17 Ento i ng’eye ebed edok i Rama, pilembe ot pare ubino kuca, man kuca de ebed epoko lembe mir Israel. Egiero pemlam ni Yehova i Rama kuca.

8 Kinde ma Samwel utii, eketho wote ni jupoklembe i Israel. 2 Nying’ wode ma kayu ubino Yoel, man mir ario ke nyinge ubino Abiya; gibino jupoklembe i Ber-ceba. 3 Ento wote gilubo ngo lapor pare. Gibed gimaru ninwang’u piny i ayi m’atira ngo, gibed giyiyo kanyaka,* man gibed gipoko lembe i ayi m’atira ngo.

4 I ng’ey kare, judongo mir Israel ceke gicokiri karacelo man gicidho i bang’ Samwel i Rama. 5 Giwacu ire kumae: “Kenen! idaru tii man woti de gibelubo ngo lapor peri. Kawoni keth ubimo moko i wiwa kara epok lembe mwa calu thek mange ceke.” 6 Ento lembene ufoyo ngo i* Samwel kinde ma giyero kumae: “Mii iwa ubimo kara epok lembe i wiwa.” E Samwel urwo i bang’ Yehova, 7 man Yehova uwacu ni Samwel kumae: “Winj lembe ceke ma dhanu maeni gibeyero iri; kum gikwero in ungo, ento gikwero an kara kud abed ubimo migi. 8 Gibetimo tap calu ma gicaku timo niai m’awodhogi kud i Misiri nitundo tin; giweka wang’ dupa man gitimo ni mungu mange, eno tie tap gin ma gibetimo i kumi kawoni. 9 Dong’ winjgi. Ento ukwayu ipoygi thwolo thwolo; nyuth igi gin m’ubimo ma bicamu ker i wigi bibedo ku twero mi lwong’o i bang’gi.”

10 E Samwel ukoro lembe ceke ma Yehova uyero ni dhanu ma gibino kwaye nia eketh ubimo i wigi. 11 Ewacu kumae: “Ubimo ma bicamu ker i wiwu bibedo ku twero mi lwong’o gin ma e: ebigamu wotwu man ebikethogi i tic mi magali pare, man ebidwokogi ni juring kana pare, jumoko ke biberingo i wang’ magali pare. 12 Man ebiketho ire judongo iwi dhanu elufu, man judongo iwi dhanu pier abic. Jumoko bibefuro podho pare ku kwej dhiang’, bibekayu cam pare, jumange ke gibibeyiko jamlwiny pare, man jamtic mi magali pare. 13 Ebiketho jumanyir mwu gibed jujeb mo m’awira,* jurutedo, man juted mukathi. 14 Ebigamu podho mwu ma beco, podho mwu ma beco mir ulok, ku podho mwu ma beco mir oliv man ebimiyogi ni jutic pare. 15 Ebigamu apaje mi cam mi podho mwu man mi podho mwu mir ulok, ebimiyo ni judongo pare man ni jutic pare. 16 Bende, ebigamu jutic mwu ma co ku ma nyir, dhieng’ mwu ma beco ku kana mwu de, man ebitimo kugi tic pare. 17 Ebigamu apaje mi diegi ku rombe mwu, man wubidoko jutic pare. 18 Nindo bibino ma wubiwak pir ubimo ma wung’iyo kara ubim wiwu, ento Yehova bidwoko ngo iwu lembe i nindo maeca.”

19 Re asu dhanu gikwero niwinjo lembe ma Samwel ukoro igi, giwacu kumae: “Mbe, wan wamito mwa wabed kud ubimo i wiwa. 20 E wabibedo calu thek mange ceke, man ubimo mwa bipoko lembe mwa, ebitelo wiwa, man ebikiedo lwiny mwa.” 21 I ng’ey ma Samwel uwinjo lembe ceke ma dhanu uyero, ekoro lembene ni Yehova. 22 Yehova ugam uwacu ni Samwel kumae: “Winjgi, man keth ubimo kara ubim wigi.” I ng’eye, Samwel uyero ni dhanu mir Israel kumae: “Ng’atuman m’i kindwu udok i adhura ma thugi.”

9 Nwang’u ng’atu moko ubino nuti mi suru pa Benjamin ma nyinge Kic; ebino wod Abiel ma wod Zeror ma wod Bekorath ma wod Afia; ebino Jabenjamin man egam elony lee. 2 Wode moko ubino nuti ma nyinge Saul, ebino jalawobi ma leng’. Ng’atu moko mbe m’ubino leng’ nisage i kind Juisrael; edongo ma bor nisagu dhanu ceke, man gin zoo gijik i goke.

3 Nindo moko kana* pa Kic ma won Saul urwinyo, e Kic uyero ni wode ma Saul kumae: “Ka copere ting’ ng’atu acel kud i kind jutic man wucidh wusay kude ka kana.” 4 Gikadhu kud i ng’om gudi pa Efraim man kud i ng’om mi Calica, ento ginwang’ugi ngo. Giwotho i ng’om mi Calim, kuca de ginwang’u ngo kanane. Gikadhu kud i ng’om mi suru pa Benjamin ceke, ento ginwang’ugi ngo.

5 Kinde ma gitundo i ng’om mi Zuf, Saul uyero ni jatic pare ma ni kude kumae: “Bin wadoki, maru cwiny vwa bicaku pido piwa kakare ma nia cwinye upid pi kana.” 6 Ento jatic pare udwoko ire kumae: “Nen, dhanu pa Mungu moko tie i adhura eni, etie dhanu mir awora. Gin ceke ma tek eyero timere andha. Kawoni wakewacidh i bang’e. Saa moko nyo ebinyutho iwa yo m’ukwayu wakwany.” 7 E Saul uyero ni jatic parene kumae: “Ka wacidho i bang’ ng’atune, wabiwok miyo ire ang’o? Mukathi de mbe i usau mwa e, man giramiya moko de mbe ma waromo wok miyo ni dhanu pa Mungu mandha. Watie kud ang’o?” 8 E jaticne udwoko ni Saul kendo kumae: “Nen! atie ku nusu pa nusu mi cekel* mi mola ma tar i cinga. Abimiye ni dhanu pa Mungu mandha, man ebinyutho iwa yo m’ukwayu wakwany.” 9 (Con i Israel, ka ng’atu moko ubecisayu kaka Mungu, eyero kumae: “Bin wacidh i bang’ janenlembe.” Kum ng’atu ma tin julwong’o jabila, con jubed julwong’e nia janenlembe.) 10 E Saul uyero ni jatic pare kumae: “Lembe m’iyero tie ber. Dong’ wacidhi.” Pieno gicidho i adhura ma dhanu pa Mungu mandha ubino i iye.

11 Kinde ma gibecidho i yo m’uidho i adhura, girombo ku jumanyir ma gibecitwomo pii. E gipenjogi kumae: “Nyo janenlembe ni keni?” 12 Gidwoko kumae: “Eyo, enuti. Eni weng’wu kano. Wular woth, kum tin ebino i adhura pilembe dhanu ubethiero lam kaka ma malu tin eni. 13 Kinde ma wumondo i adhura ci, e wubiwok nwang’e nwang’u fodi eidho ngo kaka ma malu pi nicamu. Dhanu bicamu ngo ka fodi etundo ngo, kum en re m’ebed emiyo mugisa iwi lam. Tek edaru timo kumeno ka dhanu ma julwong’o copo camu. Dong’ wuidh ndhu ndhu eni, e wubinwang’e.” 14 E giidho i adhura. Kinde ma gimondo i adhurane, nwang’u Samwel ubebino rombo kugi kara giidh kugi kaka ma malu.

15 Nindo acel i wang’e ma fodi Saul utundo ngo, Yehova ular uyero ni* Samwel kumae: 16 “Urwo unyoni, abioro ng’atu moko m’i ng’om mi suru pa Benjamin i beng’i. Ukwayu iwire kara ebed jatela mi dhanu para Israel, man ebibodho dhanu para kud i cing’ Jufilisti. Kum aneno masendi mi dhanu para, man wak migi utundo i bang’a.” 17 Kinde ma Samwel uneno Saul, Yehova uyero ire kumae: “Eni tie ng’atu m’ayero pire iri nia, ‘en re m’ebibimo wi dhanu para.’”

18 E Saul ucoro i bang’ Samwel i diere mi dhugang’ man epenje kumae: “Akweyi keyer ira, ot pa janenlembe ni kani?” 19 Samwel udwoko ni Saul kumae: “An re m’atie janenlembe. Kadh i wang’a kara waidh kaka ma malu, man wabicamu karacelo kudi tin. Abiweki ibicidho urwo kugweno, man abikoro iri lembe ceke m’ibemito ning’eyo.* 20 Bende kud idieng’ pi kana m’urwinyo nindo adek udaru kadhu, kum judaru nwang’ugi. Man piny ma beco ceke mir Israel gi pa ng’a? Gitie peri man gitie pi ot pa wuru ceke ngo?” 21 E Saul udwoko kumae: “An a ng’atu mi suru pa Benjamin ma en e suru ma nok nisagu kud i kind suru mir Israel ungo? Man juruot fwa kabang’gi mbe magwei kud i kind juruot ceke mi suru pa Benjamin ungo? Dong’ pirang’o iyero ira lembe maeni?”

22 E Samwel uting’o Saul giku jatic pare man eterogi i kusika ma jucamu i iye cam, e emiyo igi kabedo ma beco nisagu mi jumange ma julwong’o; nwang’u dhanu m’ubino keca wendgi romo pier adek. 23 Samwel ugam uyero ni ng’atu m’ubetedo cam kumae: “Kel ring’o m’amiyo i beng’i man m’ayero iri nia igwok ang’et ca.” 24 E jaratedone uting’o bamb ku piny mange m’ubino i wiye, man ekethe i wang’ Saul. E Samwel uyero kumae: “Piny ma jukanu juketho i weng’i eno. Cam, pilembe jukanugi iri tap pi saa maeni. Kum ayero igi nia ‘atie ku welo.’” Pieno Saul ucamu karacelo ku Samwel cing’ nica. 25 E giloro niai kaka ma malu gidwogo i adhura, man emedere niweco ku Saul iwi ot.* 26 Giai urwonde kugweno pir, man kinde ma piny ubelero Samwel ulwong’o Saul ma nwang’u n’i wi ot, eyero ire kumae: “Yikiri, kara aweki icidhi.” Pieno Saul uyikere man en giku Samwel zoo giwok woko. 27 Kinde ma giloro giwok i kieu mir adhura, Samwel uyero ni Saul kumae: “Yer ni jatic peri ukadh i wang’wa,” e ekadhu i wang’gi. Samwel umedo kumae: “Ento in, cungi kara aketh iwinj lembe pa Mungu.”

10 Samwel ugam uting’o cupa mi mo man ekonje iwi Saul. Ecwiyo limbe man eyero kumae: “Nyo Yehova uwiri ngo kara ibed jatela iwi dhanu pare? 2 Kinde ma wabipokara kudi tin, ibinwang’u dhanu ario ceng’ini ku kabuli pa Racel i Zelza i ng’om mi suru pa Benjamin, man gibiyero iri kumae: ‘Kana m’icidho nisayu judaru nwang’ugi. Kawoni dong’ wuru ubedieng’ ungo pi kanane, ento ebedieng’ piri. Ebewacu kumae: “Abitimo ang’o pi ninwang’u woda?”’ 3 Ku keca, cidhi nitundo i bang’ yen ma dit mi Tabor, kuca ibiwok rombo ku dhanu adek ma gibeidho malu i Bethel pi nitimo thier* ni Mungu mandha. Ng’atu acel uyeyo nyithi diegi adek, ng’atu mange uyeyo lungu mukathi adek, man ng’atu ma kucelo ke uyeyo agulu ma dit mi pigulok. 4 Gibipenji nia itie nenedi man gibimiyo iri lungu mukathi ario, man in umaku ijol lungu mukathine kud i bang’gi. 5 I ng’eye, ibicidho iwi ungulu got* pa Mungu mandha, kaka ma nyathi kagonjo moko mi Jufilisti n’i iye. Kinde m’itundo i adhura, ibirombo kud ungu mi jubila ma gibeloro niai kud i kaka ma malu, ma nwang’u jubegoyo jamgoyo wer ma juthondhe, jubepadu nyithi vul, jubekudho usegu, man jubegoyo adungu i wang’gi kinde ma gibeewo. 6 Tipo pa Yehova bibino i wii ku tego man in de ibiewo karacelo kugi, e ibilokiri ibidoko ni ng’atu mange. 7 Kinde ma giranyutha maeni gitimiri, tim gin ceke m’icopo timo, pilembe Mungu mandha ni karacelo kudi. 8 I ng’eye, lar ilor ira i Gilgal, man abilubo toki kuca pi nithiero lam m’awang’a man lam mi kwiyocwiny. Icikiri nikuro pi nindo abiro nitundo m’abin, ka dong’ abinyutho iri gin m’ukwayu itim.”

9 Kinde ma Saul ulokere pi niweko Samwel, e ndhu ndhu Mungu ucaku loko adundene kara udok calu adunde ng’atu mange, man giranyutha maeni ceke utimere kubang’e i nindo maeca. 10 E giai ku keca giidho iwi ungulu got,* man ungu moko mi jubila girombo kude. E wang’ acel tipo pa Mungu ubino i wiye ku tego, man ecaku ewo i kindgi. 11 Kinde ma dhanu ceke ma ging’eyo Saul con ginene ebeewo karacelo ku jubila, giyero i kindgi kumae: “Ang’o m’utimo wod Kic e? Nyo Saul de tie acel m’i kind jubila?” 12 E ng’atu acel ma keca udwoko lembe kumae: “Ka jubila mange no ke weggi tie ng’a?” E niai eca lembabola ma e uwok: “Nyo Saul de utie acel m’i kind jubila?”

13 Saa m’edaru niewo, ecidho i kaka ma malu. 14 I ng’eye, umin won Saul upenjo Saul giku jatic pare kumae: “Wuai kani?” E Saul udwoko ire kumae: “Waai wasayu kana, ento saa ma waneno nia waromo nwang’ugi ngo, wacidho i bang’ Samwel.” 15 Umin won Saulne udok upenjogi kumae: “Keyer ira ka copere, Samwelne uyero iri ang’o?” 16 Saul udwoko ni umin won kumae: “Eyero iwa nia judaru nwang’u kana.” Ento Saul ukoro ngo ire lembe ma Samwel uyero pi ker.

17 I ng’eye, Samwel ulwong’o dhanu gicokiri karacelo i wang’ Yehova i Mizpa, 18 man eyero ni Juisrael kumae: “Yehova Mungu mir Israel uyero kumae: ‘An re m’awodho Israel kud i Misiri man abodhowu kud i the cing’ Jumisiri, man kud i the tego mi ker ceke m’ubino nisendowu. 19 Ento tin wukwero Mungu mwu m’ubodhowu kud i lembe ceke ma reco man i masendi mwu, man wuyero kumae: “Wan wamito mwa iketh ubimo i wiwa.” Dong’ kawoni wucung i wang’ Yehova kubang’ suru mwu man kubang’ thekwaru* mwu.”’

20 E Samwel uketho suru ceke mir Israel gicoro ceng’ini, man jung’iyo suru pa Benjamin. 21 I ng’eye, eketho suru pa Benjamin gicoro ceng’ini kubang’ juruot, e jung’iyo juruot pa Matri. Tokcenne jung’iyo Saul ma wod Kic. Ento kinde ma jucidho nisaye, junwang’e ngo kaka moko. 22 Pieno gipenjo Yehova kumae: “Nyo ng’atune ubino andha keni?” Yehova udwoko kumae: “Ebino, ento epondo i kind ter.” 23 E giringo gicidh gigame ku kuca. Kinde m’ecungo i diere mi dhanu, edongo ma bor nisagu dhanu ceke man gin zoo gijik i goke. 24 Samwel ugam uyero ni dhanu ceke kumae: “Wubeneno ng’atu ma Yehova ung’iyo? I kind dhanu zoo ng’atu moko mbe ma calu en.” E dhanu ceke gikok kumae: “Ubimo kwo nja!”

25 Samwel ukoro ni dhanu pi piny m’ubimo bibedo ku twero mi lwong’o, man ekiewogi i buku, e eketho bukune i wang’ Yehova. I ng’eye, Samwel ulalu dhanu ceke, ng’atuman udok yo pare. 26 Saul bende udok i pacu pare i Gibea karacelo ku jurumony ma Yehova umulo adundegi. 27 Ento dhanu moko ma kony migi de mbe giyero kumae: “Ng’atuni bibodhowa nenedi?” E gicaye man gikelo ngo ire giramiya moko acel de. Ento en eyero ngo lembe moko.*

11 I ng’eye, Nahac ma Jaamon uidho man ebin eketho kagonjo pare i kum Yabec i Gilead. E dhanu ceke mi Yabec giyero ni Nahac kumae: “Tim lembariba* kudwa, e wabitimo iri.” 2 Nahac ma Jaamon ulund udwoko kumae: “Abitimo lembariba kudwu ndhu ka wuyiyo lembe ma e: nia juloy weng’wu mir acwic zoo. Abitimo kumeno pi ninyayu lewic iwi Israel ceke.” 3 E judongo mi Yabec giwacu ire kumae: “Mii iwa nindo abiro kara waor jukwenda i ng’om mir Israel ceke. Tekene ng’atu moko unwang’ere ngo ma copo bodhowa, e wabiwekara i cingi.” 4 Kinde ma jukwendane gitundo i Gibea ma thugi Saul, gikoro lembe maeno ni dhanu; e dhanu ceke giwak ma tek.

5 Ento i saa maeno nwang’u Saul ubedwogo kud i lum m’eleko tok udul lim m’eai ekwayu, e Saul upenjo kumae: “Ang’o m’ubetimo dhanu? Gibewagu ang’o?” Jugam jukoro ire kwenda m’uai i bang’ dhanu mi Yabec. 6 Kinde ma Saul uwinjo lembe maeno, tipo pa Mungu ubino i wiye ku tego, man kwinyo uopo i iye. 7 E egamu thwoni dhieng’ ario ethumo igi unding’ unding’, man emiyo unding’ne i bang’ jukwenda gitero i ng’om mir Israel ceke, giwacu kumae: “Ng’atu m’ulubo ngo tok Saul giku Samwel ung’ey nia jubithumo i dhieng’ pare kumeni!” E lworo pa Yehova umaku dhanu, pieno gin ceke gibino ma dhoggi ripo.* 8 Egam ekwanu dhanune i Bezek, man wend Juisrael ubino elufu dak adek (300 000), wend dhanu mi suru pa Yuda ke ubino elufu pier adek (30 000). 9 E Saul ku dhanu pare giyero ni jukwenda m’ubinone kumae: “Wuwok wuyer ni dhanu mi Yabec i Gilead kumae: ‘Urwo saa ma lak ceng’ ubedoko tek, wabibodhowu.’” Jukwendane gigam gicidho man giyero lembe maeno ni dhanu mi Yabec, e anyong’a unegogi lee. 10 Dhanu mi Yabec gilund giwacu ni Juamon kumae: “Urwo wabimiyara iwu, man wubitimo gin ceke ma wumaru i kumwa.”

11 Urwonde Saul upoko i dhanu ni ungu adek, man gikakiri i die kagonjo mi judegi migi i kur mi kugweno,* e ginego Juamon nitundo ma lak ceng’ udoko tek. Dhanu m’i kindgi m’uboth gilal ma jumoko mbe m’udong’ ario karacelo. 12 E dhanu giyero ni Samwel kumae: “Jukani ma gibino yero nia gibemito ngo Saul ubed ubimo i wiwa ca? Wumiigi i bang’wa kwe, kara waneggi cen.” 13 Ento Saul uyero kumae: “Jubinego ngo ng’atu moko tin eni, pilembe tin Yehova ubodho Israel.”

14 I ng’eye, Samwel uyero ni dhanu kumae: “Wubin wacidhu i Gilgal pi nitwong’o kendo nia Saul utie ubimo.” 15 E dhanu ceke gicidho i Gilgal, man i Gilgal kuca giwok giketho Saul ni ubimo i wang’ Yehova. I ng’eye, githiero lam mi kwiyocwiny keca i wang’ Yehova, man Saul ku dhanu ceke mir Israel gitimo foc* ku mutoro ma dit.

12 I ng’eye, Samwel uyero ni Israel ceke kumae: “Nen, adaru timo* gin ceke ma wukwayu i bang’a, man aketho ubimo kara ubim wiwu. 2 Ubimo ma bitelo wiwu ni e! Ento an dong’ adaru tii man wiya julwar, wota de ni karacelo kudwu. Atelo wiwu niai ma fodi an aradu nitundo tin. 3 Ani eni. Tek atimo lembe moko ma rac, wutuce i wang’ Yehova man i wang’ ng’atu pare ma juwiro: Nyo amayu thwon dhiang’ kunoke kana pa ng’atu moko? Kunoke nyo ayaku kadi asendo ng’atu moko? Nyo ayiyo kanyaka* pa ng’atu moko uketho apoko lembe cuu ngo? Tek atimo kumeno, abidwokogi iwu.” 4 E giyero kumae: “Iyakuwa ngo kadi isendowa ngo, kadi iyiyo ngo gin moko acel de kud i cing’ ng’atini.” 5 Pieno eyero igi kumae: “Tin eni Yehova giku ng’atu pare ma juwiro gi jumulembe para nia wunwang’u ngo gin ma wucopo dota pire.”* E gidwoko kumae: “Eyo, e jamulembe.”

6 E Samwel uyero ni dhanu kumae: “Yehova m’utiyo ku Musa gikud Arun man m’uwodho kwaruwu kud i ng’om mi Misiri, e jamulembe. 7 Kawoni wuyikuru, kum abipoko lembe i wiwu i wang’ Yehova pi bero* ceke ma Yehova utimo iwu man ni kwaruwu.

8 “Kinde ma Yakobo utundo i Misiri man kinde ma kwaruwu ucaku kwayu Yehova ukonygi, Yehova uoro Musa gikud Arun pi niwodho kwaruwu kud i Misiri man pi nimiyo igi kabedo maeni. 9 Ento giwil i kum Yehova Mungu migi, e elworogi i cing’ Sisera ma jatel wi udul askari pa Hazor man i cing’ Jufilisti, man i cing’ ubimo mi Moab; e gikiedo i dhoggi. 10 I ng’eye gikwayu Yehova ukonygi man giwacu kumae: ‘Wadubo, kum waweko Yehova pi nitimo ni Baal man ni ayi gin m’acwiya ma Actoreth; kawoni bodhwa kud i cing’ judegi mwa kara watim iri.’ 11 E Yehova uoro Yerubaal man Bedan, man Yeftha man Samwel, man ebodhowu kud i cing’ judegi mwu ceke m’utiekowu, kara wukwo ku bedomoth. 12 Saa ma wuneno Nahac m’ubimo mi Juamon ubino i kumwu, wumeduru niyero ira nia, ‘mbe wan wamito mwa wabed kud ubimo i wiwa!’ Kadok nwang’u Yehova Mungu mwu re m’utie Ubimo mwu. 13 Kawoni ubimo ma wung’iyo ni e, en re m’e ng’atu ma wukwayu. Nen! Yehova uketho ubimo i wiwu. 14 Tek wulworo Yehova, wutimo ire, wuworo dwande, man wujay ungo i kum lembang’ola pa Yehova, man tek wun karacelo kud ubimo m’ubebimo wiwu wulubo Yehova Mungu mwu, nwang’u ber. 15 Ento tek wuworo ngo dwand Yehova man wujay i kum lembang’ola pa Yehova, Yehova bimiyo iwu matira man ni wegwu bende. 16 Kawoni wuyikuru pi nineno gin ma dit maeni ma Yehova ubecitimo i weng’wu. 17 Nyo tin utie nindo mi kayu nganu ngo? Abikwayu Yehova kara eketh polo umor man koth ucwii; e wubing’eyo man wubinyang’ nia wutimo lembe ma rac dit i wang’ Yehova kinde ma wukwayu iwu ubimo.”

18 Samwel ugam ukwayu Yehova, man Yehova uketho polo mor man koth ucwii cing’ nica, e dhanu ceke gilworo Yehova man Samwel lee dit. 19 Dhanu ceke gigam giyero ni Samwel kumae: “Kway Yehova Mungu peri pi jutic peri, pilembe wamito ngo watho, kum kinde ma wakwayu ubimo, wamedo racu ameda i kum dubo mwa ceke.”

20 Pieno Samwel uyero ni dhanu kumae: “Lworo kud unegwu, gin maeni ceke ma wutimo tie rac andha. Ento kende kende, kud wuwek nilubo Yehova, man wutim ni Yehova kud adundewu ceke. 21 Kud wuweke pi nilubo gin ma igi nanu,* ma romo konyo ngo man ma romo bodhojo ngo, pilembe igi nanu. 22 Kum Yehova biwenjo ngo dhanu pare nikum nyinge ma dwong’, pilembe Yehova ung’iyo en gire nia ekethwu wubed dhanu pare. 23 Ento an re ecopere ngo ira nia adub ni Yehova m’awek nirwo ko piwu, man abimedara niponjowu ku yo ma ber man m’atira. 24 Kende kende wulwor Yehova man wutim ire i andha* kud adundewu ceke, kum wuwuneno lembe ma dongo m’etimo iwu. 25 Ento ka wutimo lembe ma rac akakaka, ebinyothowu cen,wun karacelo kud ubimo mwu ceke.”

13 Saul ubino ku oro . . .* kinde m’edoko ubimo, man ebimo iwi Israel pi oro ario. 2 Saul ugam ung’iyo dhanu elufu adek (3 000) kud i kind Juisrael; dhanu elufu ario (2 000) m’i kindgi gibino kude i Mikmac man i ng’om gudi mi Bethel, ento dhanu elufu acel (1 000) gibino karacelo ku Yonathan i Gibea mi Benjamin. Elalu dong dhanu udok, ng’atuman i hema pare. 3 I ng’eye, Yonathan uloyo udul askari mi Jufilisti m’ubino i Geba, man Jufilisti giwinjo pi lembene. E Saul uketho jukudho agwara i ng’om mir Israel ceke, man juyero kumae: “Wu Juebrania wuwinji!” 4 Juisrael ceke gigam giwinjo rwonglembe ma e: “Saul uloyo udul askari moko mi Jufilisti, man kawoni ng’wic Juisrael udoko tik i kind Jufilisti.” Pieno dhanu ceke gicokiri karacelo man gilubo tok Saul i Gilgal.

5 Jufilisti bende gicokiri karacelo pi nikiedo i dhu Juisrael, gibino ku magali mi lwiny elufu pier adek (30 000), man juring riuni* elufu abusiel (6 000) kud udul askari ma wendgi kwanere ngo calu nying kwiyo mi dhu nam. Giidho man giwok gigonjo i Mikmac yo nyangu mi Beth-aven. 6 E dhanu mir Israel gineno nia lembe udoko tek igi, pilembe gibino i ariti; e gipondo i oding’om, i vur, i cana, i kapondo m’i the ng’om, man i vuj pii m’atong’a. 7 Juebrania moko gikadhu kadok kulo Yordan giringo i ng’om mi suru pa Gad man i ng’om Gilead. Ento Saul udong’ asu i Gilgal, man dhanu ceke ma gibino lubo ng’eye kumgi ubino miel. 8 Ekuro asu pi nindo abiro nitundo i saa ma tap ma Samwel ugam uketho, ento Samwel ubino ngo i Gilgal man dhanu gicaku lal kud i kum Saul. 9 Tokcenne Saul uyero kumae: “Wukel lam m’awang’a ku lam mi kwiyocwiny i bang’a.” E ethiero lam m’awang’a.

10 Ento kinde ma fodi edaru nithiero lam m’awang’ane adara ci, Samwel ugam utundo. E Saul ucidh urombo kude pi nijole. 11 Samwel upenje kumae: “Itimo ang’o eni?” Saul ulund udwoko kumae: “Aneno nia dhanu gibelal kud i kuma, in de ibino ngo i saa m’ukethere, man Jufilisti ke gicokiri i Mikmac. 12 Pieno aparu kumae: ‘Kawoni Jufilisti gibiloro nikiedo i kuma i Gilgal, man fodi akwayu ngo kony pa Yehova.’ E anwang’u nia gin mange m’acopo timo mbe, kwayu ndhu athier lam m’awang’a.”

13 E Samwel uyero ni Saul kumae: “Itimo lembe mi ming’o. Iworo ngo lembang’ola ma Yehova Mungu peri umiyo iri. Ka nwang’u iworo, nwang’u Yehova ubeketho ker peri ucung nging’ nging’ iwi Israel pi nja. 14 Ento kawoni, ker peri bigalu ngo. Yehova binwang’u ng’atu ma kacwinye, man Yehova bikethe ebibedo jatela iwi dhanu pare, pilembe iworo ngo lembe ma Yehova ung’olo iri.”

15 Samwel ugam uai kud i Gilgal eidho i Gibea mi Benjamin, e Saul ukwanu dhanu, ju ma gidong’ karacelo kude gibino kago dhanu dak abusiel. 16 Nwang’u Saul ku wode ma Yonathan man dhanu ma gidong’ kugi gibedo i Geba mi Benjamin, ento Jufilisti giketho kagonjo migi i Mikmac. 17 Ungu adek mi juaskari gibed giwok kud i kagonjo mi Jufilisti. Ungu acel ubed ukwanyu ndaki m’ucidho i Ofra, yor i ng’om mi Cual; 18 ungu mange ubed ukwanyu ndaki m’ucidho i Beth-horon, man ungu mir adek ubed ukwanyu ndaki m’ucidho i kieu m’uneno wi poga mi Zeboim, yor i langa.

19 Nwang’u jabodho ma thiedho cuma ubino mbe acel de i ng’om mir Israel ceke, pilembe Jufilisti giwacu kumae: “Ukwayu ngo Juebrania giyik palamularu kadi tong’.” 20 E Juisrael ceke gibed giloro i bang’ Jufilisti pi nipaku lak kwej dhiang’ migi, lak piki, lak ley, kunoke lak viringo migi. 21 Gibed giculo pim* acel pi nipaku lak kwej dhiang’ migi, lak piki, lak hara ma lake adek, lak ley, man pi niyiko dindo migi. 22 Pieno i nindo mi lwiny, ng’atu moko acel de mbe i kind dhanu ma gibino ku Saul man Yonathan m’ubedo ku palamularu kadi tong’ i cinge; Saul giku wode ma Yonathan kendgi re ma gibino ku jamlwiny.

23 Nwang’u udul askari moko mi Jufilisti gibin giketho kagonjo migi i kakadhu mi Mikmac.

14 Nindo moko, Yonathan ma wod Saul uyero ni jatic ma yeyo jamlwiny pare kumae: “Bin wakadh lokaca i kagonjo ma nok mi Jufilisti.” Ento enyutho ngo lembene ni won. 2 Nwang’u Saul ugonjo ceng’ini ku Gibea i the yend ulemo ma nwang’ere i Migron. Man dhanu ma romo dak abusiel gibino karacelo kude. 3 (Nwang’u Ahiya ukendo efodh.* Ebino wod Ahitub m’umin Ikabod, ma wod Fineas, ma wod Eli ma jalam pa Yehova i Cilo.) Man juaskari gigam ging’eyo ngo nia Yonathan usaru. 4 Nwang’u kakadhu ma Yonathan ubino ii nikadhu kud i igi pi nicidho i kagonjo ma nok mi Jufilisti nwang’ere i kind cana ario ma lakgi bith; nying’ canane acel ubino Bozez man nying’ ma kucelo ke Sene. 5 Canane acel ucungo njeng’ yo malu i wang’ Mikmac, ma kucelo ke ucungo yo piny i wang’ Geba.

6 E Yonathan uyero ni jayey jamlwiny pare kumae: “Bin wakadh lokaca i kagonjo ma nok mi dhanu maeno ma jutimo ngo yaa i kumgi. Saa moko nyo Yehova bikonyowa, kum gin moko mbe ma copo cero Yehova ku bodhojo, nik’ebed ku wel ma lee kunoke ku wel ma nok.” 7 Jayey jamlwiny parene ugam udwoko ire kumae: “Tim gin moko ci m’adundeni ubecweli nitimo. Cidh kaka moko ci m’imaru, an abilubo para toki kakare ceke m’adundeni ubecweli nicidho i iye.” 8 E Yonathan uwacu kumae: “Wabikadhu lokaca i bang’ dhanu maeno man wabinyuthara i wang’gi. 9 Tekene giyero iwa nia, ‘wucung de kakeno nitundo ma wabin i beng’wu!’ E wabicungo kaka ma wan’i iye, wabiidho ngo i bang’gi. 10 Ento tek giyero nia, ‘wuidh i dhogwa!’ E wabiidho, kum Yehova bimiyogi i cingwa. Eno bibedo ni lanyuth iwa.”

11 E gin ario ceke gicidh ginyuthiri i wang’ kagonjo ma nok mi Jufilisti. Jufilisti gigam giyero kumae: “Wukenen ca! Juebrania gibewok kud i vur ma nwang’u gipondo i iye.” 12 Pieno dhanu ma gin’i kagonjo ma nokne giyero ni Yonathan giku jayey jamlwiny pare kumae: “Wukepim niidho i bang’wa kwe do, wabimiyo iwu ponji ma wubizungo azunga!” Ndhu ndhu Yonathan ugam uyero ni jayey jamlwiny pare kumae: “Lub toka, kum Yehova bimiyogi i cing’ Israel.” 13 E Yonathan uidho m’ebemulo amula ku cinge man ku tiende, jayey jamlwiny pare ke ubino yor i ng’eye; Yonathan ucaku goyo Jufilisti i ng’om, man jayey jamlwiny pare uwotho nwayu dong’gi anwaya yor i ng’eye. 14 Wang’ ma kwong’a maeni ma Yonathan giku jayey jamlwiny pare gicidho i kumgi, gigoyo dhanu ma romo pier ario i nyathi kaka moko ma borne tie nyanok.*

15 E ndiri umaku juaskari ma gin’i kagonjo i lum man juaskari ceke ma gin’i kagonjo ma nok, kadok ungu adek mi juaskari ma gibed giwok de ndiri umakugi. Digidi ucaku yengo ng’om, man lworo ma dit* m’uai i bang’ Mungu umakugi. 16 Jukur pa Saul ma gibino i Gibea mi Benjamin gineno nia woy ubemew kakare ceke i kagonjo mi judegi.

17 E Saul uyero ni juaskari ma gini karacelo kude kumae: “Ka copere wukwan juaskari, kara wang’ey nia ng’a m’umbe i kindwa.” Kinde ma gikwanu juaskari, ginwang’u nia Yonathan giku jayey jamlwiny pare gimbe keca. 18 Saul ugam uyero ni Ahiya kumae: “Kel Sanduku pa Mungu mandha kae!” (Kum nwang’u Sanduku pa Mungu mandha ubino karacelo ku Juisrael i saa maeca.*) 19 Saa ma Saul ubeweco ku jalam, woy ubino medere ameda i kagonjo mi Jufilisti. Saul ugam uyero ni jalam kumae: “Wek lembe m’ibetimo no.”* 20 E Saul ku juaskari ceke ma gibino karacelo kude gicokiri man gicidho i lwiny, kuca giwok ginwang’u Jufilisti gibenegiri i kindgi ku palamularu, man wi dhanu unyothere lee dit. 21 Kadok Juebrania ma gilar gibino i thenge mi Jufilisti man ma giidho karacelo kugi i kagonjo bende, i saa maeno gidok i thenge mi Juisrael i the telowic pa Saul giku Yonathan. 22 Dhanu mir Israel ceke ma nwang’u gipondo i ng’om gudi pa Efraim giwinjo nia Jufilisti uringo, e gin bende giriemo tokgi pi nikiedo i dhoggi. 23 Pieno Yehova ubodho Israel cing’ nica, man lwiny umedere nikadhu Beth-aven.

24 Ento cing’ nica juaskari mir Israel givoc, pilembe Saul ular uketho giyiyo dhu kwong’ m’ekwong’o kumae: “Kwong’ ubed iwi ng’atu ma bibilo cam* moko ci i wang’ uthieno, man i wang’ ma fodi aculo ngo kwor i kum judegi para!” Pieno ng’atu moko acel de mbe m’ubilo cam moko.

25 E jaskari* ceke gimondo i luli, man miyokic moko ubedo nuti keca i ng’om. 26 Kinde ma juaskari gibemondo i luli, gineno miyokic ubelotini, ento ng’atu acel de mbe m’ucamu, pilembe gilworo kwong’. 27 Ento Yonathan ugam uwinjo ngo kwong’ ma won uketho juaskari giyiyo dhoge, pieno erieyo uluth m’ubino i cinge, ecobo ko i pedo kic. Saa m’enang’u miyokicne, e tego dwogo i kume.* 28 E ng’atu moko m’i kind juaskari uyero ire kumae: “Wuru uketho juaskari giyiyo dhu kwong’ moko ma kwiny, eyero nia, ‘kwong’ ubed iwi ng’atu m’ucamu cam tin eni!’ Eno re m’uketho dhanu givoc.” 29 Ento Yonathan udwoko kumae: “Vwa unyayu peko ma lee dit i kum dhanu. Kenen ma miyokic m’abilo nyanok kende udwogo ko tego i kuma.* 30 Dong’ ka nwang’u tin juweko juaskari gibedo agonya nicamu kum piny ma ginwang’u i bang’ judegi migi, nwang’u ecibedo ber rukani! Nwang’u Jufilisti gibetho lee nisagu.”

31 Cing’ nica gimediri ninego Jufilisti niai i Mikmac nitundo i Ajalon, e dhanu ufo ol dong’ magwei. 32 Pieno dhanu gicoriri kud abamba iwi jambayeki man giting’o rombe, dhieng’ ku nyithi dhieng’ ginegogi iwi ng’om, e gicamu ring’one ku rimbe kpo. 33 Jugam judwoko lembene ni Saul, juyero kumae: “Nen! dhanu gibedubo ni Yehova, gibecamu ring’o ku rimbe zoo.” E Saul uwacu kumae: “Wutimo lembe m’umbe yiyoyic. Wung’iel kidi ma dit wukel i bang’a kae pio.” 34 I ng’eye, Saul uwacu kumae: “Wukadh i kind dhanu man wuyer igi kumae: ‘Ng’atuman m’i kindwu ukel thwon dhiang’ pare kud urombo pare, ebin ethumgi keni kan ecamgi. Kud wudub ni Yehova ma nia wucam ko ring’o ku rimbe bende.’” E ng’atuman m’i kindgi ukelo thwon dhiang’ pare uthieno maeca man ethume keca. 35 Saul ugam ugiero pemlam ni Yehova. Eno ubino pemlam ma kwong’a m’egiero ni Yehova.

36 I ng’eye, Saul uwacu kumae: “Waloru piny ku diewor, wariemu tok Jufilisti man wayekugi nitundo ma piny biruu. Wabiweko ngo ng’atu acel de ma bidong’ kwo.” Gidwoko kumae: “Tim gin moko ci m’ineno ber i weng’i.” E jalam uyero kumae: “Wakepenj Mungu mandha de keni eni.” 37 Saul ugam upenjo Mungu kumae: “Nyo ukwayu alor i tok Jufilisti? Nyo ibimiyogi i cing Israeli?” Ento cing’ nica Mungu udwoko ngo ire lembe moko. 38 E Saul uyero kumae: “Wu judongo mi dhanu ceke wubin kae, wuyeny man wunwang’ nia dubo ma nedi m’utimere tin eni. 39 Kum calu andha Yehova bedo kwo, en m’ebodho Israel, kadok unwang’ere nia tie Yonathan ma woda de, ecikere nitho.” Ento ng’atu moko acel de mbe m’ugamu dhoge. 40 I ng’eye, Saul uwacu ni Juisrael ceke kumae: “Wun wubibedo i thenge acel, waku Yonathan ma woda ke wabibedo i thenge ma kucelo.” E dhanu gidwoko ire kumae: “Tim gin moko ci m’ineno ber i weng’i.”

41 Pieno Saul ukwayu Yehova kumae: “E Mungu mir Israel, dwok iwa lembe ku Thumim!” E Thumim ung’iyo Yonathan giku Saul, ento dhanu gidong’ gigi agonya. 42 Saul ugam uwacu kumae: “Wugoy gagi pi ning’eyo ka nyo tie an kunoke woda ma Yonathan.” E gagi upodho iwi Yonathan. 43 Saul ulund upenjo Yonathan kumae: “Yer ira, itimo lembang’o?” Yonathan udwoko ire kumae: “Abilo ndhu nyathi miyokic moko nyanok kende kud i dhu uluth m’ubino i cinga. Ani eni! Atie ayika nitho!”

44 E Saul uwacu kumae: “Dong’ Mungu umii ira matira man emede lee kan itho ngo Yonathan.” 45 Ento juaskari gidwoko ni Saul kumae: “Nyo ndhu andha Yonathan ucikere nitho, ma en re m’ekelo aloci* ma dit maeni i Israeli? Etie lembe ma timere ngo! Calu andha Yehova bedo kwo, kadok yukwiye acel de mbe ma bipodho i ng’om, kum etimo gin maeni tin eni ku kony pa Mungu.” Kumeno re ma dhanu gigam gibodho* Yonathan, e edong’ etho ngo.

46 Pieno Saul uweko niriemo tok Jufilisti, e Jufilisti gidok i ng’om migi.

47 Saul udwoko ker pare udoko tek iwi Israel man ekiedo i dhu judegi pare ceke kun ku kun: ekiedo i dhu Jumoab, Juamon, Juedom, i dhu jubim mi Zoba, man i dhu Jufilisti; kakare ceke m’ecidho i iye, ebed eloyo en. 48 Ebed ekiedo lwiny kud amora ma lee. Evoyo Juamalek man ebodho Israel kud i cing’ ju m’ubed uyakugi.

49 Maeni ubino wot Saul: Yonathan, Icvi, man Malki-cua. Ebino bende ku jumanyir ario: Nying’ ma jaditne ubino Merab, ma nokne ke nyinge bino Mikal. 50 Nying’ dhaku pa Saul ubino Ahinoam ma nyaku pa Ahimaaz. Nying’ jadit mi juaskari pare ubino Abner ma wod Ner, m’umin won Saul. 51 Kic ubino won Saul, man Ner ma won Abner ubino wod Abiel.

52 I nindo mi camuker pa Saul ceke, lwiny ubino kwar mandha i kindgi ku Jufilisti. Ka Saul uneno ng’atu moko ma tek kunoke ma cwinye tek, eroye i tic pare.

15 E Samwel uyero ni Saul kumae: “Yehova ugam uora niwiri ni ubimo iwi dhanu pare Israel; kawoni winj lembe ma Yehova ubeyero. 2 Yehova mir udul uyero kumae: ‘Abiculo kwor i kum Juamalek pi lembe ma gitimo i kum Israel saa ma gikiedo i dhoggi kinde ma giwok kud i Misiri. 3 Kawoni cidhi, neg Juamalek man nyothgi ku piny migi ceke. Kud iwekgi* ento neggi ceke: jumaco ku jumamon, awiya ku mukere, dhieng’ ku rombe, ngamia man kana bende.’” 4 E Saul uwaku juaskari man ekwanugi i Telaim: wend juaskari ma wotho ku tiendgi ubino elufu dak ario (200 000), man dhanu mi Yuda ke elufu apar (10 000).

5 Saul ucidho nitundo i adhura mi Amalek man ekanu libo ceng’ini ku poga. 6 E Saul uyero ni Jukeni kumae: “Wucidhi, wuwok kud i kind Juamalek, amaru nyothowu ceke karacelo kugi. Kum wunyutho mer ma lokere ngo ni dhanu mir Israel ceke saa ma giwok kud i Misiri.” Pieno Jukeni giwok kud i kind Juamalek. 7 I ng’eye Saul unego Juamalek niai i Havila nitundo i Cur ma tie ceng’ini ku Misiri. 8 Emaku Agag m’ubimo mir Amalek ma kwo, dhanu mange ke enegogi ceke ku palamularu. 9 Ento Saul karacelo ku juaskari pare giweko Agag man giweko* rombe ma beco, dhieng’ ma beco, ku lei m’ucwey, man piny mange ceke ma beco. Gimito ngo ginyothgi. Ento ginyotho piny mange ceke ma reco man ma gimaru ngo.

10 E lembe pa Yehova ubino i bang’ Samwel kumae: 11 “Can ubenego adundena pilembe aketho Saul ni ubimo, kum eweko niluba man etimo ngo lembe m’ayero.” E cwiny Samwel udieng’ akeca man ewak i bang’ Yehova diewor traka. 12 Urwonde pir kugweno kinde ma Samwel uai pi nicirombo ku Saul, juyero ni Samwel kumae: “Saul ucidho i Karmel man egiero ire jampoy kuca. I ng’eye eloko man eloro i Gilgal.” 13 Kinde ma Samwel utundo i bang’ Saul, Saul uyero ire kumae: “Yehova umii iri mugisa. Adaru timo lembe ma Yehova ung’olo.” 14 Ento Samwel uyero kumae: “Ka dong’ dwand rombe man dwand dhieng’ ma itha ubewinjo e ke uai kani?” 15 Saul udwoko kumae: “Juai kugi kud i bang’ Juamalek, pilembe juaskari giweko* udul rombe ku dhieng’ ma beco kara juthiergi ni lam ni Yehova Mungu peri; ento piny mange m’udong’ wanyotho ceke.” 16 E Samwel uyero ni Saul kumae: “Ling’! Wek ayer iri gin ma Yehova uwacu ira diewor ma tin.” Saul ugam uyero ire kumae: “Yer!”

17 Samwel umedo kumae: “Nyo igam ineniri ngo ni dhanu ma ka kite mbe kinde ma jukethi ni jatel wi suru mir Israel, man kinde ma Yehova uwiri ibed ubimo iwi Israeli? 18 I ng’eye, Yehova uori i tic man eyero kumae: ‘Cidhi man inyoth judubo ma Juamalek ceke. Kied i dhoggi nitundo idargi ceke.’ 19 Dong’ pirang’o iworo ngo dwand Yehova? Ilund icoriri peri kud abamba iwi jambayeki man itimo gin ma rac i wang’ Yehova!”

20 Ento Saul uyero ni Samwel kumae: “Aworo dwand Yehova do! Acidho i tic ma Yehova uora nitimo, man adwogo kud Agag m’ubimo mi Juamalek, Juamalek ke anyothogi ceke. 21 Ento kud i kind jambayeki, juaskari giting’o rombe ku dhieng’ ma beco m’i kind piny ma nwang’u ukwayu junyothi, pi nithierogi ni lam ni Yehova Mungu peri i Gilgal.”

22 E Samwel uyero kumae: “Ang’o ma nyayu anyong’a i Yehova, nyo utie lam m’awang’a man lam kunoke nyo utie niworo dwand Yehova? Nen! woro ber ma sagu lam, man niwinjo cuu ber ma sagu miyo mi nyog urombo; 23 kum nijai tie rom ku dubo mi ewolembe, man nirikini ku kuhaya tie rom ku timo lembajoga man niworo mungu m’araga.* Calu m’ikwero niworo lembe pa Yehova, en de ekweri ibibedo ngo ubimo.”

24 E Saul uyero ni Samwel kumae: “Adubo, kum akadhu kud iwi lembe ma Yehova ung’olo man kud iwi lembe m’iyero, pilembe alworo dhanu man awinjo lembe ma giyero. 25 Kawoni akweyi, wek dubo para, man walok wakudi kara awok arum i ng’om i wang’ Yehova. 26 Ento Samwel uyero ni Saul kumae: “Abiloko ngo karacelo kudi, kum ikwero lembe pa Yehova, man Yehova de ukweri ibimediri ngo nibedo ubimo iwi Israel.” 27 Kinde ma Samwel ulokere ebecidho, Saul umaku dhu bongu pare ma bote mbe kii, ento eyec i cinge. 28 E Samwel uyero ire kumae: “Yehova uyeco ker mir Israel kud i beng’i tin, man ebimiye ni ng’atu mange ma ber nisegi. 29 Mungu ma dwong’ mir Israel bicwayu ndra ngo kadi ebiloko ngo paru pare,* kum en etie ngo dhanu ma nia elok paru pare.”

30 E Saul uyero kumae: “Adubo. Ento akweyi, yunga i wang’ judongo mi dhanu para man i wang’ Israel. Wadok karacelo kudi man abiwok rum i ng’om i wang’ Yehova Mungu peri.” 31 Pieno Samwel uloko karacelo ku Saul, man Saul uwok urum i ng’om i wang’ Yehova. 32 Samwel ugam uyero kumae: “Wukel Agag m’ubimo mir Amalek i bang’a kae.” E Agag ubino i bang’e ma kume konjo koyo,* nwang’u ebino yero yor i iye kumae: ‘Ng’wic tho udaru kadhu andha kud i wiya.’ 33 Ento Samwel uyero kumae: “Tap calu ma palamularu peri uketho mon ubedo mbe kud awiya, meru lundo bibedo mbe kud awiya nisagu jumamon mange ceke.” E Samwel utong’o i Agag nziki nziki i wang’ Yehova i Gilgal.

34 Samwel ugam udok i Rama, man Saul ke udok i pacu pare i Gibea. 35 Nitundo ma Samwel utho eneno ngo kum Saul kendo, kum Samwel ucidho ma cwinye ubedieng’ lee pi Saul. Man can unego adunde Yehova pilembe eketho Saul ni ubimo iwi Israel.

16 Yehova ugam uyero ni Samwel kumae: “Ibibedo ku can pi Saul rukani ma an ke dong’ adaru kwere kara kud ebed ubimo iwi Israel e? Pong’ tung’ peri ku mo man cidhi. Abiori i bang’ Yese ma Jabethlehem, pilembe ang’iyo ira ubimo i kind wote.” 2 Ento Samwel uwacu kumae: “Abicidho nenedi? Kinde ma Saul biwinjo lembene, ebinega.” Yehova udwoko ire kumae: “Ting’ rwaya dhiang’ icidh kudo, man iyer kumae: ‘Abino thiero lam ni Yehova.’ 3 Lwong’ Yese ubin i bang’ lamne, i ng’eye abinyutho iri gin m’ukwayu itim. Ibiwiro ira ng’atu m’abinyutho iri.”

4 Samwel utimo lembe ma Yehova uyero ire. Kinde m’etundo i Bethlehem man judongo mir adhurane girombo kude, kumgi ucaku miel man gipenje kumae: “Nyo ibino ma beri?” 5 E edwoko kumae: “Eyo, abino ma ber. Abino nithiero lam ni Yehova. Wudwokuru leng’ man wubin kaka ma an’i iye nithiero lam.” E edwoko Yese man wote leng’, i ng’eye ecokogi pi lam. 6 Kinde ma gibetundo, Samwel uneno Eliab man ewacu kumae: “M’umbe jiji, ng’atu ma Yehova uwiro ucungo i wang’a eni.” 7 Ento Yehova uyero ni Samwel kumae: “Kud inen wang’e man kite m’edongo ko ma bor, pilembe akwere. Kum ayi ma dhanu neno ko lembe utie ngo ayi ma Mungu neno ko lembe; dhanu neno ayi ma yo woko, ento Yehova neno i adunde.” 8 I ng’eye, Yese ulwong’o Abinadab man eketho ekadhu i wang’ Samwel, ento Samwel uyero kumae: “En de Yehova ung’iye ngo.” 9 Yese udok uketho Cama ukadhu, ento Samwel uwacu kumae: “Maeni de Yehova ung’iyo ngo.” 10 E Yese uketho wote abiro gikadhu i wang’ Samwel, ento Samwel uwacu ire kumae: “Yehova ung’iyo ngo ng’atu acel de m’i kindgi.”

11 Tokcenne Samwel upenjo Yese kumae: “Awiya peri ma cone gi ceke eni? Edwoko ire kumae: “Ma cogo re ma fodi udong’; ebekwayu rombe.” E Samwel uwacu ni Yese kumae: “Or jucidh julwong’e, pilembe wabibedo ngo i dhu cam ka fodi etundo ngo keni.” 12 E Yese uoro jucidh julwong’o Daudi man ekele i bang’ Samwel. Nwang’u Daudi ubino ng’atu ma landu, wang’e ubino leng’, man e leng’ mir anena. Yehova ugam uwacu ni Samwel kumae: “Ai malu, wire, kum tie en eni!” 13 E Samwel uting’o tung’ ma mo n’i iye man ewiro Daudi i wang’ umego pare. Niai cing’ nica, tipo pa Yehova ucaku tiyo ku tego iwi Daudi. I ng’eye Samwel uai man edok i Rama.

14 Nwang’u tipo pa Yehova udaru weko Saul, man Yehova uweko tipo ma rac unyay lworo i iye. 15 E jutic pa Saul giyero ire kumae: “Kenen, Mungu uweko tipo ma rac ubenyayu lworo i ii. 16 Kawoni wakweyi rwoth mwa, ng’ol iwa wa jutic peri ma wan’i weng’i wacidh wasay ng’atu moko ma tie jabodho mi goyo adungu. Kinde ma Mungu uweko tipo ma rac ubino i wii, ebigoyo adungu, e ibiwinjiri ma ber.” 17 Pieno Saul uyero ni jutic pare kumae: “Wucidh wusay ira ng’atu ma goyo adungu ma ber man wukele i bang’a.”

18 Jatic acel ugam uyero kumae: “Wukewinji! Aneno wod Yese moko ma Jabethlehem utie jabodho mi goyo adungu, cwinye tek, man etie jaramony ma tek. Eweco ma ber man e leng’, bende Yehova ni kude.” 19 E Saul uoro jukwenda ucidh uyer ni Yese kumae: “Or ira wodi ma Daudi m’ubekwayu rombe no.” 20 Yese ugam uting’o mukathi, usau mi pigulok man nyathi diel, e etwiyogi iwi kana man eorogi ni Saul karacelo ku wode ma Daudi. 21 Kumeno re ma Daudi ubino i bang’ Saul man ecaku timo ire. Saul umare lee dit man edoko jayey jamlwiny pare. 22 E Saul uoro kwenda ni Yese kumae: “Kan ecopere, wek Daudi udong’ i tic para, pilembe enyayu mutoro i iya.” 23 Kinde ma Mungu uweko tipo ma rac ubino iwi Saul, Daudi gam ting’o adungu man egoye. E cwiny Saul kwiyo man ewinjere ma ber, e tipo ma racne gam weke.

17 Jufilisti gigam gicoko dhu juaskari* migi pi lwiny. Gicokiri i Soko ma nwang’ere i ng’om mi Yuda, man gigonjo i Efes-damim i kind Soko kud Azeka. 2 Saul ku juaskari mir Israel de gicokiri man gigonjo i poga* mi Ela, e gikperiri pi nikiedo lwiny i dhu Jufilisti. 3 Jufilisti gibino i theng got acel, Juisrael ke gibino i theng got ma kucelo; poga re m’upoko kindgi.

4 E jarukara moko uwok kud i kagonjo mi Jufilisti; nyinge ubino Goliath man ebino dhanu mi Gath; edongo bot abusiel ku lac cing’ acel.* 5 Ekendo sabu mi mola i wiye, man eronyo koti mi cuma ma kume upangere iwi wagi wi wagi. Pek mi koti pare mi cumane ubino cekel elufu abic (5 000).* 6 Ekendo jamgwoko kor tielo i tiende, man ebielo tong’ m’adundo mi mola i ng’eye. 7 Yend tong’ pare ubino ma dit calu yen pa jacwii kendi, man wi tong’ne mi cuma kende ci pekne ubino cekel dak abusiel;* jamak ban pare ke utelo yo i wang’e. 8 E ewok ecungo, man ekok ni udul askari mir Israel kumae: “Pirang’o wubin wukperuru pi lwinyi? Nyo an a Jafilisti ngo, man wun ke wutie ngo jutic pa Sauli? Wung’ii iwu ng’atu moko man wuore elor i bang’a kwe. 9 Tekene etuc nikiedo kuda man enega, e wabidoko jutic mwu. Ento tek avoye man anege, wubidoko jutic mwa man wubitimo iwa.” 10 Jafilistine umedo kumae: “Aroko* udul askari mir Israel tin eni. Wumii ira ng’atu mwu acel man wakied kude!”

11 Kinde ma Saul ku Juisrael ceke giwinjo wec maeno ma Jafilisti uyero, ndiri ung’oy i igi man lworo de umondo lee i igi.

12 Nwang’u Daudi ubino wod Yese ma Jaefratha mi Bethlehem i ng’om mi Yuda. Yese ubino kud awiya ma co abora, man i rundi pa Saul nwang’u dong’ edaru tii. 13 Awobi pa Yese adek ma judongo gilubo tok Saul i lwiny. Wote adek ma gicidho i lwinyne gini e: ma kayu nyinge Eliab, mir arionde nyinge Abinadab, man mir adege ke nyinge Cama. 14 Daudi ubino nyathin ma cogo man awiya pagi adek ma judongo ke gilubo tok Saul.

15 Kinde ma Daudi ubino timo ni Saul, ebed ecidho bende wang’ ma pol i Bethlehem pi nikwayu rombe pa won. 16 I saa maeno, Jafilistine ubed ucoro nja kugweno kud uthieno man ecungo i wang’ Juisrael. Etimo kumeno pi nindo pier ang’wen.

17 I ng’eye, Yese uyero ni Daudi ma wode kumae: “Ka copere, gam nying cam m’acela efa* apar ma e, ku lungu mukathi apar ma e, iter pio pio ni umego peri i kagonjo. 18 Gam bende lungu cak m’umakere* apar ma e, iwok imii ni jadit mi juaskari.* Wok inyang’ ka nyo umego peri gitie ma ber, man idwog ku gin m’unyutho nia gibedo ma ber.” 19 Nwang’u wot Yesene gibino karacelo ku Saul, ku juaskari mir Israel mange ceke i poga mi Ela pi nikiedo i dhu Jufilisti.

20 E Daudi uai pir kugweno man eweko ng’atu moko udong’ ukur wi rombe; i ng’eye, eboyo dhu ter man ecidho tap calu ma won ung’olo ire. Kinde m’etundo i kagonjo, nwang’u juaskari gibecidho kaka ma gibikiedo i iye, ma gibekok ku kok mi lwiny. 21 Juisrael ku Jufilisti gikperiri ma udul monyman ubeneno wagi. 22 Ndhu ndhu Daudi ugam uweko ter pare i bang’ ng’atu m’ubeneno wi ter man eringo kaka ma lwiny ubetimere i iye. Saa m’etundo, ecaku penjo umego pare nia gibedo nenedi.

23 Kinde m’ebeweco kugi, jarukara ma nyinge Goliath ma Jafilisti m’uai kud i Gath ugam utundo. Ewok kud i kind udul askari mi Jufilisti, man eyero lembe ma rom m’ebed eyero i wang’e, e Daudi uwinjo lembene. 24 Saa ma dhanu mir Israel ceke gineno ng’atu maeno, ndiri umakugi, e giringo. 25 Dhanu mir Israel gibino yero kumae: “Wubeneno jalwo m’ubebino ca? Ebebino niroko* Israel. Ng’atu ma binege ubimo bimiyo ire lonyo ma dit, ebimiyo ire nyare, man ebiketho ot pa won biculo ngo palatha man bitimo ngo tic mange mir adici i Israel.”

26 E Daudi upenjo juaskari m’ucungo i ng’ete kumae: “Jubitimo ang’o ni ng’atu ma binego Jafilisti ca man ma bikabu lewic cen kud iwi Israeli? I andha ca Jafilisti maeni ma jutimo ngo yaa i kume etie ng’a, m’ebeng’ap ko niroko* udul askari pa Mungu ma kwo e?” 27 E juaskari gikoro ire lembe m’ubimo ng’olo man gimedo kumae: “Jubitimo kumeni ni ng’atu ma binege.” 28 Kinde ma Eliab m’umin Daudi ma kayu uwinjo ebeweco ku juaskari, ng’eicwiny umake i kume man epenje kumae: “Ibino timo ang’o piny kuni? Iweko rombe ma nok ca ku ng’a i langa kuca? Ang’eyo cuu nia rikini re m’ubesendi man itie ku paru ma rac i adundeni; ibino peri nineno lwiny.” 29 E Daudi uyero kumae: “Kawoni e alund atimo ang’o? An apenjo para apenja kende!” 30 Daudi ulund ulokere cen kud i bang’e, man epenjo ng’atu mange ku penji ma rom ku m’i wang’e, e juaskari gidwoko ire de lembe ma rom.

31 Ento jumoko giwinjo wec pa Daudi eno nyagwil, e gidwoko lembene ni Saul. Pieno Saul uoro jucidh julwong’e. 32 Daudi uwok uwacu ni Saul kumae: “Cwiny ng’atu moko kud ung’abere* pi Jafilisti maeni. An a jatic peri abicikiedo kude.” 33 Ento Saul uyero ni Daudi kumae: “Icopo cikiedo ngo i dhu Jafilisti maeno, kum fodi in aradu, en ke ecaku kiedo lwiny* niai ma fodi en aradu.” 34 Daudi ugam uyero ni Saul kumae: “An a jatic peri adoko jakwac mir udul rombe pa vwa. Nindo moko umvor ubin umaku urombo kud i dwol, nindo mange lundo urudi re m’ubino. 35 Ariemo tokgi agoyogi, e abodho rombe kud i cing’gi. Kinde ma gilokiri i kuma, amakugi ku yir mi tikgi* athorogi man anegogi. 36 An a jatic peri anego umvor kud urudi de, Jafilisti maeni ma jutimo ngo yaa i kume bidoko calu acel m’i kindgi, kum eroko udul askari pa Mungu ma kwo.” 37 Daudi umedo kumae: “Yehova m’ubodha kud i the lwet cing umvor man kud i the lwet cing urudi re ma bibodha kud i cing’ Jafilisti maeni.” E Saul uyero ni Daudi kumae: “Cidhi, dong’ Yehova ubed kudi.”

38 Saul ugam uronyo Daudi ku kendi pare. Ekendo sabu mi mola i wiye, i ng’eye eronyo koti mi cuma i kume. 39 Daudi udok utwiyo palamularu pa Saul iwi kendi pare man epimo niwotho, ento woth uvoye, kum nwang’u eng’iyo kugi ngo. Daudi ugam uyero ni Saul kumae: “Acopo wotho ngo ku piny maeni, kum ang’iyo kugi ngo.” E Daudi uwodhogi cen. 40 I ng’eye, eting’o uluth pare i cinge man eng’iyo kidi abic ma kumgi foth i poga keca, ekethogi i usau pare mi kwac, lacur pare ke ubino i cinge. E ecaku coro i bang’ Jafilisti.

41 Jafilistine de ucoro ceng’ini mandha ku Daudi, man jamak ban pare utelo yo i wang’e. 42 Kinde ma Jafilisti uneno Daudi, ecaye man evone; pilembe ebino de aradu ma kume leng’ man wang’e leng’. 43 E Jafilistine uwacu ni Daudi kumae: “Nyo an a gwok m’ibebino i bang’a ku yen e?” I ng’eye, elamu Daudi ku nying’ mungu pare. 44 E eyero ni Daudi kumae: “Bin i bang’a do, abimiyo ringi ni winyo mi kor polo man ni yedi mi lum.”

45 Daudi udwoko ni Jafilistine kumae: “Ibebino i bang’a ku palamularu, ku tong’ man bende tong’ m’adundo, ento an abebino i beng’i i nying’ Yehova Mungu mir udul, ma en e Mungu mir udul askari mir Israel m’iroko.* 46 Tin eni Yehova bimiyi i cinga, abinegi man abithumo wii cen; bende tinuni abimiyo avuj dhanu mi kagonjo mi Jufilisti ni winyo mi kor polo man ni yedi mi ng’om; e dhanu mi ng’om ceke bing’eyo nia Mungu unuti andha i Israel. 47 Man dhanu zoo m’ucokiri keni* bing’eyo nia Yehova mbe ku yeny mi palamularu kadi mi tong’ pi nibodhowa, kum lwiny tie pa Yehova man ebimiyo wun ceke i cingwa.”

48 E Jafilisti utugo woth man ecoro ceng’ini mandha ku Daudi, ento Daudi uringo pio pio yor i bang’ udul mony mi judegi migi pi nirombo ku Jafilistine. 49 Daudi ugam uroyo cinge i usau pare man ewodho kidi acel, e eng’ure ku lacur. Ecanyu Jafilistine i terwang’e, man kidi umondo sok i terwang’e, e erwombere piny i ng’om arieba wang’e. 50 Kumeno re ma Daudi uvoyo Jafilisti maeno ku lacur man ku kidi acel. Daudi ugoye i ng’om man enege ma ke nwang’u palamularu de mbe i cinge. 51 Daudi umedere ku ng’wec man ewok ecungo i wiye. E emaku palamularu pa Jafilistine ewodhe kud i ukorone man ethumo ng’ute, kara jung’ey nia etho andha. Kinde ma Jufilisti gineno nia jarukara migi udaru tho, gikonjo ng’wec.

52 E dhanu mir Israel ku mi Yuda giai malu man gikok ma tek, giriemo tok Jufilisti niai kud i poga nicidho i dhugang’ mir Ekron. Avuj Jufilisti m’utho uvuto i gengi niai i Caraim nitundo i Gath man i Ekron. 53 I ng’ey ma Juisrael giriemo tok Jufilisti ma tek mandha, giloko gidok giyaku piny mi kagonjo migi.

54 I ng’eye, Daudi uting’o wi Jafilisti etero i Yeruzalem, ento jamlwiny pa Jafilistine eketho i hema pare.

55 Kinde ma Saul uneno Daudi ubecirombo ku Jafilisti, epenjo Abner ma jatel wi udul askari pare kumae: “Abner, jalawobi maeni tie wod ng’a?” Abner udwoko ire kumae: “Tek andha ibedo kwo,* E ubimo, ang’eyo ngo!” 56 Ubimo uyero kumae: “Say ning’eyo nia won jalawobi maeni tie ng’a.” 57 Pieno, saa ma Daudi udwogo ku kaka m’eai enego iye Jafilisti, e ndhu ndhu Abner uting’e man etere i wang’ Saul ku wi Jafilisti i cinge. 58 E Saul upenje kumae: “Jalawobi, in i wod ng’a?” Daudi udwoko ire kumae: “An a wod jatic peri ma Yese ma Jabethlehem.”

18 Kinde ma Daudi udaru niweco ku Saul, Yonathan giku Daudi gitwiyo mer ma ceng’ini i kindgi,* e Yonathan ucaku maru Daudi calu en gire.* 2 Niai cing’ nica, Saul ucero Daudi i bang’e man eyiyo ngo nia edok i ot pa won. 3 E Yonathan giku Daudi gitimo lembariba, pilembe egam emaru Daudi calu en gire.* 4 Yonathan ugam uwodho bongu pare ma bote mbe ma nwang’u ekendo, man emiye ni Daudi karacelo ku bongu pare mi lwiny, palamularu pare, athero pare, man mukaba pare. 5 E Daudi ucaku cidho i lwiny, man kakare ceke ma Saul uore i iye, lembe ubed uwotho ber ire.* Pieno Saul ukethe ni jatel wi jukied lwiny, e lembene unyang’u dhanu ceke man jutic pa Saul bende.

6 Ka Daudi karacelo ku juwagi gidwogo ku kaka ma giai ginego iye Jufilisti, jumamon gibed giwok kud i adhura mir Israel ceke pi nibino rombo kud Ubimo Saul, ma gibewer man gibemiel kud anyong’a, gibepadu nyithi vul, man gibegoyo jamgoyo wer ma thondhe adek. 7 Jumamon ma gibino timo foc pir aloci maeno gibed giwer kumae:

8 E kwinyo ugam uopo lee i Saul pilembe werne unyang’e ngo, kum eyero kumae: “Mon maeni gibewero nia Daudi unego elufu apar (10 000), an ke nia anego elufu acel (1 000). Eni ke dong’ gidhingo miyo ire ker de e!” 9 Niai cing’ nica, Saul uketho wang’e i kum Daudi.

10 Urwonde Mungu uweko tipo ma rac umaku Saul, man ecaku timere tung’* i ot, kinde ma Daudi ubegoyo adungu calu m’ebed etimo. Nwang’u Saul utie ku tong’ i cinge, 11 e ecobo tong’ne m’ebeyero yor i iye kumae: ‘Abiguro Daudi i kor ot!’ Ento Daudi uuc ire wang’ ario. 12 E lworo unego Saul i kum Daudi pilembe Yehova uweke ento ebino ku Daudi. 13 Pieno Saul ukabe kud i wang’e man ekethe ni jatelwic mi juaskari elufu, e Daudi ubed utelo wi juaskari i lwiny.* 14 Lembe umedere niwotho ma ber ni Daudi* i gin ceke m’ebetimo man Yehova de ubino karacelo kude. 15 Kinde ma Saul uneno nia lembe ubewotho ma ber mandha ni Daudi, lworo unege akeca i kume. 16 Ento dhanu mir Israel ku mi Yuda ceke gimaru Daudi, pilembe ebed etelo wigi i lwiny migi.

17 I ng’eye, Saul uyero ni Daudi kumae: “Nyara ma kayu ma Merab ni e. Abimiye iri ni dhaku. Ento ukwayu imediri ninyutho tegocwiny pira man ikied lwiny pa Yehova.” Kum Saul uyero yor i iye gire kumae: ‘Mito ngo anege ku cinga gira, ento cing’ Jufilisti re m’unege.’ 18 Daudi ulund uyero ni Saul kumae: “An a ng’a, man wedi para kadi juruot pa vwa gi jukani i Israel, ma nia adok jalwod ubimo?” 19 Ento kinde ma saa uromo m’ukwayu jumii Merab ma nya Saul ni Daudi, nwang’u dong’ judaru miye ni dhaku ni Adriel mi Mehola.*

20 Nwang’u nya Saul ma nyinge Mikal umaru Daudi, man junyutho lembene ni Saul, e anyong’a unege lee. 21 E Saul uyero kumae: “Abimiye ni Daudi kara ebed ni uwic ire, kumeno re ma cing’ Jufilisti bibino i wiye.” Saul ugam uyero ni Daudi wang’ mir arionde kumae: “Tin ibidoko jalwoda.”* 22 Bende, Saul ung’olo ni jutic pare kumae: “Wucidh wuwec ku Daudi i amung’ man wuyer ire nia, ‘nen! anyong’a ubenego ubimo i kumi, man jutic pare ceke gimeri lee. Dong’ dok jalwod ubimo.’”* 23 Kinde ma jutic pa Saul giyero lembe maeno ni Daudi, edwoko igi kumae: “Wuneno nia etie lembe ma yot nibedo jalwod ubimo,* ma an ke a jacan man kony para de mbe e?” 24 Jutic pa Saul gigam gidwoko ire lembe ma Daudi uyero.

25 E Saul uwacu kumae: “Wucidh wuyer ni Daudi nia, ‘ubimo mbe ku yeny mi keny, ento etie ku yeny mi dendkum mi yom co mi Jufilisti dak acel pi niculo kwor i kum judegi p’ubimo.’” Kum Saul upangu i wiye nia Jufilisti re ma binego Daudi. 26 Jutic pare gigam gikoro lembe maeno ni Daudi, man Daudi unwang’u nia dong’ etie ber ya edok jalwod ubimo.* Ento ma fodi saa ma jung’olo uromo ngo, 27 Daudi ucidho karacelo ku dhanu pare man ginego Jufilisti dak ario, e ekelo wel ma tap mi dendkum mi yomgi i bang’ ubimo, kara ebed jalwod ubimo. E Saul umiyo ire nyare ma Mikal ni dhaku. 28 Saul ugam unyang’ nia Yehova ni karacelo ku Daudi man nia nyare ma Mikal de umaru Daudi lee. 29 Lembe maeno uketho dong’ Saul ulworo Daudi magwei, man Saul udoko jakwor pa Daudi i dong kwo pare ceke.

30 Judongo ma wijo mi Jufilisti gibed giwok nikiedo lwiny ku Juisrael, ento ka giwok ci Daudi ubed uloyogi* nisagu jutic pa Saul ceke; e juyunge lee.

19 I ng’eye, Saul unyutho ni wode ma Yonathan man ni jutic pare ceke nia ebemito nego Daudi cen. 2 Calu ma nwang’u Yonathan ma wod Saul umaru Daudi lee, eyero ni Daudi kumae: “Saul ma vwa ubemito negi. Dong’ bed ku weng’i urwo kugweno, man cidh ipond kaka ma ling’. 3 Wabiciwotho ku vwa i lum, ceng’ini ku kaka ma in’i iye. Abikoro piri ire, man tek awinjo lembe moko ci, abinyuthe iri kokoro.”

4 E Yonathan uweco ber pi Daudi ni won ma Saul. Yonathan uyero ire kumae: “Ubimo kud udub i kum jatic pare ma Daudi, pilembe edubo iri ngo man lembe m’etimo iri umiyo iri bero. 5 Eketho kwo pare i ariti* kinde m’ecidh enego Jafilisti, uketho Yehova umiyo aloci* ma dit ni Israel ceke. Ineno lembe maeno man anyong’a negi lee. Dong’ pirang’o ibemito dubo i kum ng’atu m’ukoso ngo, m’iketho ko juneg Daudi mi mananu e?” 6 E Saul uwinjo Yonathan man ekwong’ere kumae: “Calu andha Yehova bedo kwo, jubinege ngo.” 7 I ng’eye, Yonathan ulwong’o Daudi man ekoro ire lembe maeni ceke. E Yonathan utero Daudi i bang’ Saul, man Daudi umedere nitimo ire calu m’i wang’e.

8 I ng’ey kare, lwiny ugam utuk kendo, e Daudi ucidh ukiedo i dhu Jufilisti, man enegogi ku nek ma lee dit, e giringo kud i wang’e.

9 Nindo moko Yehova uweko tipo ma rac ubino iwi Saul kinde m’ebedo i ot pare ku tong’ pare i cinge, Daudi ke nwang’u ubino goyo adungu. 10 E Saul umito ecob Daudi ku tong’ pare i kor ot, ento Daudi uuc ire man tong’ne umoko dir i kor ot. Daudi ugam uringo man ebodhere i diewor maeca. 11 I ng’eye, Saul uoro dhanu ucidh ukur kum ot pa Daudi kara gikenge man ginege urwonde kugweno. Ento Mikal ma dhaku pa Daudi uyero ire kumae: “Tekene iringo ngo* diewor ma tin, urwo ibibedo ni avu.” 12 Ndhu ndhu nica, Mikal uluro Daudi ku wang’ madhirisa kara eringi man ebodhere. 13 Mikal ugam uting’o therafim* man epiele iwi kavuto, eting’o bende voi mi yuk diel eketho kaka ma wi Daudi bebedo i iye, man eume ku bongu.

14 Saul uoro dhanu ucidh ugam Daudi, ento Mikal uyero igi kumae: “Eberemo.” 15 E Saul uoro dhanu ucidh unen Daudi man eyero igi kumae: “Wuyeye ku kavuto parene wukele i bang’a kae kara anege cen.” 16 Kinde ma dhanune gimondo i ot, ginwang’u therafim* re m’utie iwi kavuto man voi mi yuk diel kaka ma nwang’u wi Daudi bebedo i iye. 17 E Saul uyero ni Mikal kumae: “Pirang’o iwonda kumeni man iweko jadegi para uringo man ebodhere?” Mikal udwoko ni Saul kumae: “Eyero ira nia, ‘wek aringi, kan ungo anegi!’”

18 Daudi ugam uringo man ebodhere, ecidho i bang’ Samwel i Rama. Ewok ekoro lembe ceke ma Saul utimo ire ni Samwel. E giku Samwel ceke giai ku keca gicidh gibedo i Nayoth. 19 I ng’eye, juyero ni Saul kumae: “Nen! Daudi n’i Nayoth i Rama.” 20 E wang’ acel Saul uoro dhanu ucidh umak Daudi. Kinde ma giwok gineno jubila ma giteng’ini i kind jubila gibeewo man Samwel ke ucungo ubetelo wigi, tipo pa Mungu ubino iwi dhanu ma Saul uoro, man gin bende gicaku timiri ve jubila.

21 Saa ma juyero lembene ni Saul, e ndhu ndhu nica eoro dhanu mange, gin bende gicaku timiri calu jubila. Saul udok uoro kendo dhanu mange, ungu mir adege, ento gin de giwok gicaku timiri calu jubila. 22 Tokcenne egam ecidho en ku kume i Rama. Kinde m’etundo i bang’ pii m’atong’a ma dit ma n’i Seku, epenjo kumae: “Samwel giku Daudi gini kani?” Judwoko ire kumae: “Gin’i Nayoth kuca i Rama.” 23 Kinde ma Saul uai ku keca m’ebemedere ku woth pi nicidho i Nayoth i Rama, tipo pa Mungu ubino i wiye bende, man ewotho m’ebetimere ve jabila nitundo m’etundo i Nayoth i Rama. 24 En de ewodho bongu kud i kume, man en bende ecaku timere ve jabila i wang’ Samwel. E evuto keca muneru* cing’ nica duu man diewor nica traka. Pieno re ma juyero kumae: “Nyo Saul bende utie acel m’i kind jubila?”

20 I ng’eye, Daudi uringo kud i Nayoth i Rama. Ento ecidho i bang’ Yonathan man epenje kumae: “Re atimo ang’o? Anyotho ang’o, kadi adubo ang’o ni wuru m’ebeyenyo ekab ko kwo* para e?” 2 E Yonathan uyero ire kumae: “Eni tie lembe ma timere ngo! Ibitho ngo. Nen! vwa bitimo ngo gin moko acel de, dok ebed ma dit kadi ma nok m’umbe ninyutho ira. Vwa copo kanu ira lembe maeno nenedi? Copere ngo.” 3 Ento Daudi umedere niyero kumae: “Wuru ung’eyo ma ber nia atie jarimbi man nyo eparu nia, ‘kud anyuth lembuni ni Yonathan maru can binyay i iye.’ Ento calu andha Yehova ubedo kwo man in de ibedo* kwo, an dong’ dagutielo acel kende m’udong’ i kindwa ku tho!”

4 E Yonathan uwacu ni Daudi kumae: “Gin ceke m’iyero,* abitimo iri.” 5 Daudi ugam uwacu ni Yonathan kumae: “Urwo tie por pa dwi; nwang’u ubemitere nia abed kokoro i dhu cam karacelo kud ubimo. Dong’ in wek acidhi man apondi i lum nitundo uthieno mi ceng’ mir adege. 6 Tek wuru unyang’ nia ambe, iwac ire kumae: ‘Daudi ukwayu rusa i bang’a nia awek ecidh pio pio i adhura ma thugi i Bethlehem, pilembe gicithiero lam ma kubang’ oro kuca karacelo ku juruot pagi zoo.’ 7 Tekene edwoko nia, ‘ber,’ eno nyutho nia gin ma bitimo jatic peri mbe. Ento tek kwinyo uopo i iye, e ibing’eyo nia ekeco nitima rac. 8 Nyuth mer ma lokere ngo ni jatic peri, kum itimo lembariba ku jatic peri i wang’ Yehova. Ento tek adubo, nega in giri. Pirang’o kwayu imiya i cing’ wuru?”

9 E Yonathan uyero kumae: “Etie lembe ma copere ngo nia gin maeno utimere i kumi! Tek awinjo nia vwa ukeco nitimi rac, ndhu acopo nyutho ngo iri?” 10 Daudi udok upenjo Yonathan kumae: “Dong’ ng’a ma binyutho ira ka wuru udwoko iri lembe ku kwinyo?” 11 Yonathan uwacu ni Daudi kumae: “Kebin wacidh i wang’ lum.” E gin ario zoo gicidho i wang’ lum. 12 Man Yonathan uyero ni Daudi kumae: “Dong’ Yehova Mungu mir Israel ubed jamulembe, nia nitundo urwo unyoni kunoke cing’ ma ca nwang’u aii ning’eyo paru pa vwa. Tek etie ku paru ma ber i wii Daudi, nyo abioro ngo kwenda i beng’i man abituco ngo lembene iri? 13 Ento tek vwa ubemito timi rac, dong’ Yehova umii ira matira an a Yonathan man emede lee, tek atuco ngo iri lembene man aketho icidho ku kwiyocwiny. Dong’ Yehova ubed karacelo kudi, tap calu m’ebedo ku vwa. 14 Man in, nyo ibinyutho ngo ira mer ma lokere ngo ma calu pa Yehova kinde ma fodi akwo man kadok atho? 15 Kud iwek ninyutho mer ma lokere ngo ni juruot para, kadok kinde ma Yehova uweyo judegi peri ceke kud i wang’ ng’om.” 16 Pieno Yonathan utimo lembariba ku ot pa Daudi, ewacu kumae: “Yehova ucul kwor i kum judegi pa Daudi.” 17 E Yonathan uketho Daudi ukwong’ere kendo pi ninyutho nia emare, kum Yonathan ugam umaru Daudi calu m’emarere gire.*

18 I ng’eye, Yonathan uyero ni Daudi kumae: “Urwo tie por pa dwi; jubiseyi, pilembe kom peri bidong’ mananu. 19 I ceng’ mir adek, jubilund seyi nisagu; dong’ ukwayu ibin kaka m’ipondo i iye nindo m’ukadhu,* man ibed ceng’ini ku kidi kae. 20 E abikilo nying athero adek yor i ng’ete acel, ve nia abekilo gin moko. 21 Abilund oro jatic para, abiyero ire kumae: ‘Cidh isay ka nying athero.’ Tek awacu ni jatic para nia, ‘nen! nying athero n’i ng’eti, cokgi,’ e i saa maeno icopo dwogo. Kum calu andha Yehova bedo kwo, eno nyutho nia lembe zoo tie ma ber iri man ariti mbe. 22 Ento tek ayero ni jalawobine nia, nen! nying athero n’i weng’i kuca,’ e icidhi, kum eno nwang’u Yehova uori bor. 23 Pi lembang’ola ma watimo wakudi ke, dong’ Yehova ubed i kindwa rondo ku rondo.”

24 E Daudi ucidh upondo i wang’ lum. Kinde ma dwi upor, ubimo ucidh ubedo i dhu cam pi nicamu. 25 Ubimo ubedo i kum ot kaka ma naka ebedo i iye. Yonathan ke ubedo m’eloko wang’e yor i bang’e, man Abner ubedo i ng’et Saul, kaka Daudi ke udong’ mananu. 26 Cing’ nica Saul uyero ngo lembe moko, kum ewacu yor i iye kumae: ‘Lembe moko utimere m’uketho e leng’ ungo. Eyo, ecido andha.’ 27 Urwonde i ng’ey dwi m’upor, niwacu i nindo mir arionde, kaka Daudi udong’ asu mananu. E Saul upenjo Yonathan ma wode kumae: “Pirang’o wod Yese ubino ngo ba cam nyaworo ku tin de?” 28 Yonathan udwoko ni Saul kumae: “Daudi ukwayu rusa i bang’a nia aweke ecidh i Bethlehem. 29 Eyero kumae: ‘Akweyi, wek acidhi, pilembe juruot fwa gibethiero lam i adhura, man umira ung’olo nia kwayu an de abed utie. Dong’ tek anwang’u bero i weng’i, akweyi, wek acidh nyaling’ pi nineno umego para.’ Eno re m’uketho Daudi ubino ngo i dhu meza p’ubimo.” 30 E kwinyo uopo i Saul i kum Yonathan man eyero ire kumae: “In i wod dhaku ma jajai, igeno nyo ang’eyo ngo nia ing’iyo nibedo i thenge pa wod Yese pi ninyayu lewic i wii giri man iwi meru?* 31 Ka fodi wod Yese tie kwo iwi ng’om ci, ibicungo ngo nging’ nging’ kadi ker peri de. Kawoni or ng’atu moko ucidh ugame ukele i bang’a kae, pilembe ecikere nitho.”*

32 Ento Yonathan uyero ni won ma Saul kumae: “Jubenege pirang’o? Re etimo ang’o?” 33 E Saul ucobe ku tong’ kara enege cen, pieno Yonathan unyang’ nia won udaru keco ninego Daudi andha. 34 E ndhu ndhu Yonathan uai kud i dhu meza ma kwinyo ma lee ubenege, man ecamu ngo piny moko i nindo mir arionde i ng’ey dwi m’upor, kum can ubino nege i kum Daudi man won de ucide.

35 Urwonde kugweno, Yonathan ucidho i lum kaka ma gicikiri nia gibirombo i iye ku Daudi, jatic moko m’aradu de ubino karacelo kude. 36 Man eyero ni jatic parene kumae: “Ka copere, ring icidh igam nying athero m’abecikilo e.” Jaticne ugam uringo, man Yonathan ukilo nying athero bor i wang’e. 37 Kinde ma jatic utundo kaka ma Yonathan ukilo nying athero i iye, Yonathan ukok ire kumae: “Nying atherone ni bor i weng’i kuca!” 38 Yonathan ukok ire kendo kumae: “Tim pio! Ring ma tek! Kud igal!” E jatic pa Yonathan ucidh ucoko nying athero man edwogo kugi i bang’ jadit pare. 39 Jaticne unyang’ ungo i lembe moko acel de, ento Yonathan giku Daudi kendgi re ma ginyang’ i lembene. 40 E Yonathan umiyo jamlwiny pare i bang’ jatic pare man ewacu ire kumae: “Cidhi, dwokgi i adhura.”

41 Kinde ma jaticne cidho, Daudi uwok ku kaka m’ebino i iye ceng’ini keca yo piny. I ng’eye, erum i ng’om man epodho arieba wang’e wang’ adek, e gicwiyo limbgi man giwagiri lee mandha, ento Daudi uwak m’usagu. 42 Yonathan ugam uyero ni Daudi kumae: “Cidh ma cwinyi kwiyo, kum wan ario zoo wakwong’o ku nying’ Yehova, wawacu kumae: ‘Dong’ Yehova ubed i kindwa wakudi man i kind nyikweyi* ku nyikwaya* rondo ku rondo.’”

E Daudi uai man ecidho, Yonathan ke udok i adhura.

21 I ng’eye, Daudi utundo i Nob i bang’ Ahimelek ma jalam. Kinde m’Ahimelek uneno Daudi, kume ucaku miel man ewacu ire kumae: “Pirang’o itie kendi ma ng’atu mange mbe kudi?” 2 Daudi udwoko ni Ahimelek ma jalam kumae: “Ubimo ung’olo ira nia atim lembe moko, ento eyero nia, ‘kud iketh ng’atu moko ung’ey lembe moko acel de pi tic m’abeori pire, man telowic m’amiyo iri.’ E wacikara kud awobi para nia wabecirombo kugi kaka moko. 3 Dong’ tek itie ku lungu mukathi moko abic kunoke gin moko ci m’itie ko, miigi ira.” 4 Ento jalam udwoko ni Daudi kumae: “Ambe ku mukathi ma wuromo camu, ento mukathi ma leng’ re m’unuti; acopo miyogi ndhu kan awobi peri gitimo ngo ribiri ku jumamon.”* 5 Daudi udwoko ni jalam kumae: “Watimo ngo ribiri nyanok de ku jumamon tap calu m’i wang’e kinde ma wabed wawok pi nicidho i lwiny. Kan awobi maeni gibed gigwokiri kara gibed leng’ kadok kinde ma wabecitimo tic ma watimo nja, dong’ ukwayu gigwokiri gibed leng’ nisagu ngo tin e?” 6 E jalam umiyo mukathi ma leng’ ire, pilembe nwang’u mukathi mange mbe keca m’uweko mukathi m’anyutha, ma juting’o kud i wang’ Yehova pi niwile ku mukathi ma nyen i nindo ma jubed juwile i iye.

7 Nwang’u jatic pa Saul moko ubedo nuti keca cing’ nica ma jucere i wang’ Yehova. Nyinge ubino Doeg ma Jaedom. Ebino jadit mi jukwac pa Saul.

8 E Daudi uyero ni Ahimelek kumae: “Nyo itie ku tong’ moko kadi palamularu keni? Ating’o ngo palamularu para man jamlwiny para, pilembe ubimo uora i tic ma nyapio pio.” 9 Jalam udwoko kumae: “Palamularu pa Goliath ma Jafilisti m’igam inego i poga* mi Ela re m’utie keni. Juboye i bongu man en’i ng’ey efodh.* Tek imito iting’e iri, ting’e, pilembe palamularu maeni kende re m’utie keni. E Daudi uyero kumae: “Mange mbe ma calu en. Miye ira.”

12 Daudi ung’iyo i lembe ma giyero, e lworo unege lee dit i kum Akic m’ubimo mi Gath. 13 Pieno eranju kite i wang’gi man etimere calu abelu i kindgi.* Ekubo piny i kum dhugola mi dhugang’ man eweko lawdhoge ucwir i kum yir tike. 14 E Akic uyero ni jutic pare kumae: “Wuneno kpo nia ng’atuni tie abelu! Dong’ pirang’o wukele i bang’a? 15 Nyo wuparu nia wend abelu tie nok i bang’a m’uketho wukelo ng’atu maeni utimere calu abelu i wang’a? Pirang’o awek ng’atu maeni umond i ot para?”

22 E Daudi uai ku keca, ecidh epondo i oding’om mir Adulam. Kinde m’umego pare man juruot pa won zoo giwinjo lembe maeno, giloro kuca i bang’e. 2 Man dhanu ceke ma lembe ubesendogi, weg banja man ju ma lembe uton i igi,* gicokiri karacelo kude man edoko jadit migi. Dhanu m’ubino karacelo kude giromo dak ang’wen.

3 I ng’eye, Daudi uai ku keca ecidho i Mizpa i Moab, man ewok eyero ni ubimo mi Moab kumae: “Akweyi, wek vwa giku maa gibed karacelo kudi kakeni nitundo m’abing’eyo gin ma Mungu bitimo ira.” 4 Pieno, ewekogi karacelo kud ubimo mi Moab, e gibedo kude i nindo ceke ma Daudi ubino i iye i kapondo.

5 I ng’ey kare, jabila Gad uyero ni Daudi kumae: “Kud imediri asu nibedo i kapondo. Ai ku keno, cidh i ng’om mi Yuda.” Pieno Daudi uai man ecidh ebedo i luli mi Hereth.

6 Saul ugam uwinjo nia junwang’u Daudi ku dhanu ma gibino karacelo kude. Nwang’u Saul ubedo i Gibea i the yend tamaris ma n’i kaka m’uting’ere m’emaku tong’ pare i cinge, man jutic pare ceke gicungo gitieko ng’ete tingili. 7 E Saul uwacu ni jutic pare m’ucungo i ng’ete kumae: “Wuwinji, wu dhanu mi suru pa Benjamin. Nyo wod Yese de bimiyo podho man podho ulok iwu ceke? Nyo ebiketho wun ceke wubibedo judongo mi dhanu elufu man judongo mi dhanu daki? 8 Wun ceke wucamu gamba i kuma! Ng’atu moko acel de mbe m’i kindwu m’unyutho ira nia woda ma buu utimo lembariba ku wod Yese! Ng’atu moko acel de mbe m’i kindwu ma kisa nege i kuma man unyutho ira nia woda ma buu upiko lembe i jatic para kara ukan ira libo, calu ma wubeneno tin eni.”

9 E Doeg ma Jaedom, ma jadit mi jutic pa Saul ma nwang’u ucungo keca uyero kumae: “Aneno wod Yese utundo i Nob i bang’ Ahimelek ma wod Ahitub. 10 Ahimelek upenjo Yehova pire man emiyo ire cam. Emiyo ire kadok palamularu pa Goliath ma Jafilisti.” 11 E wang’ acel ubimo uoro jucidh julwong’ Ahimelek ma wod Ahitub ma jalam ku julam ceke m’i ot pa won ma gibino i Nob. Pieno, gin ceke gibino i bang’ ubimo.

12 E Saul uyero kumae: “Winji, e wod Ahitub!” Ahimelek udwoko ire kumae: “Abewinji, rwoth para.” 13 Saul uwacu ire kumae: “Pirang’o wucamu gamba i kuma in wuku wod Yese, ma imiyo ko ire mukathi, palamularu, man ipenjo Mungu pire? Ejai ira man epondo ebekiyo ninega calu m’ubetimere eni.” 14 E Ahimelek udwoko ni ubimo kumae: “Ng’a m’i kind jutic peri ceke ma jugeno* calu Daudi? Etie jalwod ubimo, etie bende jadit mi jukur kumi, man dhanu m’i ot peri giyunge. 15 Nyo tin utie wang’ ma kwong’a m’abepenjo Mungu pire? Ecopere ira ngo nitimo lembe m’ibeyero no! Dong’ ubimo kud unwang’ nia an a jatic pare man juruot pa vwa ceke watie weg racu, pilembe jatic peri ung’eyo ngo gin moko acel de i kum lembe maeni.”

16 Ento ubimo uyero kumae: “Ibitho andha Ahimelek, in ku juruot pa wuru ceke.” 17 E ubimo uyero ni jukur* ma gicungo i ng’ete kumae: “Wulokuru man wuneg julam pa Yehova, pilembe gidok i ng’ete pa Daudi! Ging’eyo nia ebino ringo, re ginyutho ngo ira!” Ento jutic p’ubimo gimito ngo giriey cing’gi pi ninego julam pa Yehova. 18 Ubimo ugam uyero ni Doeg kumae: “Lokiri man ineg julam maeni!” E ndhu ndhu Doeg ma Jaedom ucidho man enego julamne en gire. Cing’ nica, enego dhanu pier abora wi abic ma gikendo efodh* mi bongu ma nwang’.* 19 Enyotho bende Nob ma tie adhura mi julam ku palamularu; enego bende ku palamularu jumaco ku jumamon, awiya man mukere, thwoni dhieng’, kana, man rombe.

20 Ento wod Ahimelek acel ma nyinge Abiathar uringo man elubo tok Daudi. Ahimelek ubino wod Ahitub. 21 Abiathar uwok uyero ni Daudi kumae: “Saul unego julam pa Yehova.” 22 E Daudi uyero ni Abiathar kumae: “Cing’ nica, kinde m’aneno Doeg ma Jaedom i Nob, ang’eyo nia ebinyutho lembene kokoro ni Saul. Dhanu ceke* m’i ot pa wuru ma githo, kosane n’i wiya. 23 Dong’ wabed kudi keni. Lworo kud unegi, kum ng’atu moko ci m’ubesayu kwo* peri nwang’u ebesayu kwo* para, abigwoki.”

23 I ng’eye, juyero ni Daudi kumae: “Jufilisti gibekiedo i kum adhura mi Keila, man gibeyaku piny i lela mi fwodo cam.” 2 E Daudi upenjo Yehova kumae: “Nyo ukwayu acidh akied i dhu Jufilisti maeni?” Yehova udwoko ni Daudi kumae: “Cidh ikied i dhoggi man ibodh Keila.” 3 Ento dhanu pa Daudi giyero ire kumae: “Kenen! fodi kud i Yuda keni de lworo ubenegowa kumeni, dong’ ka wabicidho i Keila pi nikiedo i dhu udul askari mi Jufilisti ke lworo binegowa rukani!” 4 E Daudi upenjo Yehova kendo. Yehova udwoko ire kumae: “Ai malu, lor piny i Keila, pilembe abimiyo Jufilisti i cingi.” 5 Pieno, Daudi karacelo ku dhanu pare gicidho i Keila man gikiedo i dhu Jufilisti. Eyaku lim migi man enegogi ku nek ma lee dit, e Daudi ubodho dhanu mi Keila.

6 Kinde ma Abiathar ma wod Ahimelek uringo i bang’ Daudi i Keila, nwang’u ewotho kud efodh* moko. 7 Jugam juwacu ni Saul kumae: “Daudi ubino i Keila.” E Saul uyero kumae: “Mungu udaru miye i cinga,* kum eroyere gire i uwic kinde m’emondo i adhura ma dhugolane tie man ma jutwiyo ku riu.” 8 E Saul ucoko juaskari pare ceke pi lwiny, kara gilor i Keila, gitiek Daudi karacelo ku dhanu pare. 9 Saa ma Daudi uwinjo nia Saul ubepangu lembe i kume, eyero ni Abiathar ma jalam kumae: “Kel efodh* kae.” 10 Daudi ugam uyero kumae: “E Yehova Mungu mir Israel, awinjo nia Saul ubemito bino i Keila pi ninyotho adhurane pira. 11 Nyo jutela* mi Keila gibimiya i cinge? Nyo Saul biloro andha calu ma jatic peri uwinjo? E Yehova Mungu mir Israel, akweyi, yer ni jatic peri.” Yehova udwoko kumae: “Ebiloro.” 12 Daudi udok upenjo kumae: “Nyo jutela mi Keila gibimiya ku dhanu para de i cing’ Sauli? Yehova udwoko kumae: “Eyo, gibimiyowu.”

13 E ndhu ndhu Daudi karacelo ku dhanu pare giai malu, wendgi ubino ma romo dak abusiel. Man giai kud i Keila gicidho kakare ceke ma gicopo bedo i iye museme. Kinde ma juyero ni Saul nia Daudi uringo kud i Keila, eriemo ngo toke. 14 Daudi ubedo i ng’om gudi mi langa mi Zif, kaka ma tundo i iye tie tek. Saul ubed usaye saa ceke, ento Yehova umiye ngo i cinge. 15 Kinde ma Daudi ubino i langa mi Zif i Horec, enyang’ nia* Saul ucidho nisaye kara enege.*

16 Yonathan ma wod Saul ugam ucidho i bang’ Daudi i Horec, man ewok ekonye nidwoko genogen pare tek* i Yehova. 17 Eyero ire kumae: “Lworo kud unegi, kum vwa ma Saul binweng’i ngo; ibibedo ubimo iwi Israel, man an abibedo mir ario i ng’eyi; vwa ma Saul de ung’eyo lembuni.” 18 I ng’eye, gin ario ceke gitimo lembariba i wang’ Yehova, e Daudi udong’ i Horec, Yonathan ke udok i pacu pare.

19 I ng’ey kare, dhanu mi Zif giidho malu i bang’ Saul i Gibea man giyero ire kumae: “Daudi upondo ceng’ini kudwa kaka ma tundo i iye tek i Horec, iwi ungulu got mir Hakila ma nwang’ere yo piny* mi Yecimon.* 20 Saa ma tek imaru* nia ilor, E ubimo, lor, man wabiwok miye i cing’ ubimo.” 21 E Saul uwacu kumae: “Yehova umii iwu mugisa, kum kisa unegowu i kuma. 22 Dong’ wucidhi, man wusay ning’eyo nia en’i kani tap man nia ng’a m’unene kuca, kum juyero ira nia etie riek akeca. 23 Wuyeny cuu kaka ceke m’ebed epondo i iye; tek wunwang’u kakare mandha, e wudwog i bang’a. E wabicidho wakudwu, man abikeye akeya kadok nwang’u epondo i kind dhanu elufu* mi Yuda.”

24 Pieno giai man gitelo yo i wang’ Saul pi nicidho i Zif. I saa maeno nwang’u Daudi ku dhanu pare gin’i langa mi Maon i Araba yo piny mi Yecimon. 25 Saul ku dhanu pare gigam gibino pi nisayu kaka Daudi. Kinde ma junyutho lembene ni Daudi, wang’ acel eloro ecidh epondo i lak cana i langa mi Maon, man ebedo kuca. Saa ma Saul uwinjo lembuno, eriemo tok Daudi nitundo i langa mi Maon. 26 Kinde ma Saul utundo i kum got, Daudi ku dhanu pare gibino i ng’et gotne ma kucelo. Daudi ubino timo pio kara eringi kud i wang’ Saul, ento nwang’u dong’ Saul ku dhanu pare gidhingo maku Daudi ku dhanu pare. 27 E jakwenda moko utundo i bang’ Saul man eyero ire kumae: “Bin pio, kum Jufilisti gidaru mondo i ng’om!” 28 Saul ugam uweko niriemo tok Daudi man ecidho i dhu Jufilisti. Eno re m’uketho jucaku nying’ kaka maeca nia Cana mi pokiri.

29 E Daudi uai ku keca man eidho ecidh ebedo kaka ma tundo i igi tek i En-gedi.

24 Kinde ma Saul uloko ku kaka m’eai eriemo iye tok Jufilisti, ndhu ndhu juyero ire kumae: “Nen! Daudi n’i langa mi En-gedi.”

2 Pieno Saul ucoko dhanu elufu adek (3 000) ma jung’iyo kud i Israel ceke, man gicidh giyenyo kugi kaka Daudi karacelo ku dhanu pare i lak cana kaka ma diegi mi lum kwo i iye. 3 Saul utundo kaka ma dwol mi rombe ma jugiero ku kidi n’i iye i dhu yo, man oding’om moko de ubedo nuti keca. Egam emondo i iye pi nikonyere;* saa maeno nwang’u Daudi karacelo ku dhanu pare gibedo i oding’ombe yor i ajikine. 4 Dhanu pa Daudi giyero ire kumae: “Tin tie nindo ma Yehova ubeyero iri nia, ‘nen! abemiyo jakwor peri i cingi, man iromo timo gin moko ci ma ber i weng’i i kume.” Pieno Daudi uai malu man ecidh ethumo dhu kendi pa Saul ma bote mbe nyayoo yoo. 5 Ento i ng’eye cwiny Daudi ucaku pido,* pilembe ethumo dhu kendi pa Saul ma bote mbe. 6 Eyero ni dhanu pare kumae: “Etie lembe ma copere ngo ira i wang’ Yehova nia atim gin ma kumeni i kum rwoth para ma tie ng’atu ma Yehova uwiro, nia aketh cinga i kume; kum en e ng’atu ma Yehova uwiro.” 7 Pieno Daudi ucero* dhanu pare ku wec maeno, man eweko ngo gimul kum Saul. Saul ke uwok kud i oding’om, man ecidho i yo pare.

8 I ng’eye, Daudi uai malu man ewok woko kud i oding’omne, e elwong’o tok Saul ku dwande ma tek, ewacu kumae: “Rwoth para ubimo!” Kinde ma Saul uneno ng’eye, Daudi urum piny man epodho arieba wang’e, edong’ asu i ng’om. 9 Daudi uyero ni Saul kumae: “Pirang’o re ibewinjo wec mi dhanu ma gibeyero nia, ‘nen! Daudi ubeyenyo etimi raci’? 10 Tinuni ineno ku weng’i nia Yehova umiyi i cinga i oding’om. Ento kinde ma ng’atu moko uyero nia anegi, kisa unega i kumi man ayero nia, ‘abiketho ngo cinga i kum rwoth para, kum en e ng’atu ma Yehova uwiro.’ 11 Dong’ kenen, vwa, eyo, kenen dhu tiend kendi peri ma bote mbe n’i cinga e; kum anegi ngo kinde m’athumo dhu tiend kendi peri ma bote mbe. Kawoni iromo neno man inyang’ nia akeco ngo nitimi rac kadi nijai iri, man adubo ngo iri ma in ke lundo ibedwara pi nikabu kwo* para cen. 12 Dong’ Yehova upok lembe i kindwa wakudi, man dong’ Yehova ucul kwor i kumi pi lembe m’itimo i kuma; ento an abiketho ngo cinga i kumi. 13 Lembabola moko ma con uyero nia, ‘racu ai kud i bang’ ju ma reco,’ pieno an abiketho ngo cinga i kumi. 14 Nyo ubimo mir Israel uberiemo toka? An a ng’a? An m’a calu avuj gwok, man a calu kukun e! 15 Dong’ Yehova bed japoklembe, man ebipoko lembe i kindwa wakudi. Ebing’iyo i lembene man ebicero bang’a, ebiketho lembe uwoth ira atira man ebibodha kud i cingi.”

16 Kinde ma Daudi udaru niyero ire wec maeni, Saul uwacu kumae: “Nyo eni tie dwendi andha, Daudi ma woda?” E Saul ucaku wak ma tek. 17 Eyero ni Daudi kumae: “In i pwe nisagu an, kum itimo ira bero, ento an adwoko iri wang’e ku racu. 18 Eyo, tin inyutho ira pi bero m’itimo ira, kum inega ngo kinde ma Yehova umiya i cingi. 19 Kum ng’a ma kan unwang’u jadegi pare, eweke ecidho i yo pare m’umbe nitime raci? Yehova bimiyo iri sukulia ma ber pi lembe m’itimo ira tin. 20 Dong’ kawoni nen! ang’eyo nia andha ibidoko ubimo man nia ker mir Israel bigalu i cingi. 21 Kawoni kwong’ ira ku nying’ Yehova nia ibidaru ngo the nyikwaya* i ng’eya man ibiketho ngo nyinga urwiny kud i ot pa vwa.” 22 E Daudi ugam ukwong’o kwong’ ni Saul, man i ng’eye Saul udok i pacu pare. Ento Daudi karacelo ku dhanu pare giidho i kapondo migi.

25 I ng’ey kare Samwel utho, e Israel ceke gicokiri karacelo pi niwage man pi nikunye ceng’ini ku ot pare i Rama. I ng’eye Daudi uai malu man eloro i langa mi Paran.

2 Nwang’u ng’atu moko tie i Maon ma tic pare ubino i Karmel.* Egam elony lee mandha; ebino ku rombe elufu adek (3 000) man diegi elufu acel (1 000); i saa maeno nwang’u ebino nyaru yuk rombe pare i Karmel. 3 Nying’ ng’atune ubino Nabal, man nying’ dhaku pare ubino Abigail. Dhakune ubino riek man wang’e leng’, ento cware ubino ng’atu ma i lembe pare tek man ma timo pare rac. Ebino nyakwar Kaleb. 4 Daudi ugam uwinjo kud i langa nia Nabal ubenyaru yuk rombe pare. 5 Pieno Daudi uoro awobi apar i bang’e, man Daudi uwacu ni awobine kumae: “Wuidh i Karmel, man kinde ma wutundo i bang’ Nabal, wuwac ire nia apenjo ka nyo etie ma ber. 6 I ng’eye wuyer ire kumae: ‘Dong’ ikwo nja, man kwiyocwiny ubed iri, kwiyocwiny ubed ni juruot peri, man kwiyocwiny ubed ni piny peri ceke. 7 Awinjo nia ibenyaru yuk rombe peri. Kinde ma jukwac peri gibino karacelo kudwa, watimogi ngo rac, man gin moko acel de mbe m’urwinyo igi pi nindo ceke ma gibino i Karmel. 8 Penj awobi peri, e gibikoro iri. Dong’ timba awobi para ginwang’ bero i weng’i, pilembe wabino i saa mir anyong’a.* Kan ecopere, mii gin moko ci ma cingi nwang’u ni jutic peri man ni wodi ma Daudi.’”

9 Pieno awobi pa Daudi gicidho man gikoro lembe maeni ceke ni Nabal ku nying’ Daudi. Kinde ma gidaru, 10 Nabal udwoko lembe ni jutic pa Daudi kumae: “Daudi tie ng’a, man wod Yese tie ng’a? I nindo maeni jutic dupa giberingo judongo migi. 11 An ating’ para mukathi para, pii para, man ring’o m’athumo ni jutic ma gibenyaru yuk rombe para man alund amiigi ni dhanu moko m’ang’eyo de ngo kaka ma giai i iye?”

12 E awobi pa Daudi giloko man gikoro ire lembe maeno ceke. 13 E ndhu ndhu Daudi uyero ni dhanu pare kumae: “Ng’atuman uting’ palamularu pare!” Pieno gin ceke gitwiyo palamularu migi i piergi, Daudi bende utwiyo palamularu pare i piere. Man dhanu ma romo dak ang’wen giidho karacelo ku Daudi, dhanu dak ario ke gidong’ i bang’ ter.

14 I saa maeno, ng’atu acel m’i kind jutic ucidh uyero ni Abigail ma dhaku pa Nabal kumae: “Kenen! Daudi uoro jukwenda niai kud i langa kara gibin gimoth rwoth mwa ku wec ma ber, ento etugere igi ku dhoge ma rac. 15 Dhanu maeno gitimo iwa bero lee. Gitimowa ngo rac nyanok de, man gin moko acel de mbe m’urwinyo i saa ceke ma wabino karacelo kugi i wang’ lum. 16 Gibino i ng’etwa calu gang’, dok ebed diewor kadi dieceng’, pi nindo ceke ma wabino karacelo kugi ma wabekwayu rombe. 17 Dong’ kawoni nen nia iromo timo ang’o, kum gin maeni bikelo nyoth iwi jadit mwa man i kum juruot pare de, en ke lundo etie ng’atu ma kony pare mbe, ma ng’atu moko acel de mbe ma copo weco i bang’e.”

18 Pieno Abigail utimo pio man eting’o lungu mukathi dak ario, pigulok agulu ario ma dongo, urombo ma juthumo abic, nying cam m’acela mukero abic,* mukathi mi nying ulok dak acel, man mukathi mi nying ulam m’uthwo dak ario; ekethogi ceke iwi kana. 19 I ng’eye eyero ni jutic pare kumae: “Wutel yo i wang’a, abelubo ng’eywu.” Ento eyero ngo lembe moko acel de ni Nabal ma cware.

20 Kinde m’ebino loro piny m’ebedo iwi kana pare, Daudi ku dhanu pare ma gibebino yor i bang’e ginene ngo pilembe got ugeng’e, e ewok erombo kugi. 21 Nwang’u Daudi ubino yero kumae: “Asendara mananu nigwoko piny pa jalwo maeni ceke i langa. Piny pare moko acel de mbe m’urwinyo, re elund ebeculo ira wang’ bero ku racu. 22 Dong’ Mungu umii matira ni judegi pa Daudi* man emede lee, tekene nitundo urwo kugweno aweko ng’atu ma co* acel mi ot pare kwo.”

23 Kinde m’Abigail uneno Daudi, etimo pio elor ku wi kana man epodho aruma i ng’om i wang’ Daudi, e ekulo wiye i ng’om. 24 I ng’eye epodho i the tiende man ewacu ire kumae: “Rwoth para, wek kosa maeni ubed i wiya; wek jatic peri uwec i beng’i, winj lembe ma jatic peri ubeyero iri. 25 Akweyi rwoth para, kud iketh wii i kum Nabal ma kony pare mbe e. Pilembe calu nyinge ma Nabal* unyutho, etie abelu. Ento an a jatic peri, aneno ngo awobi ma in i rwoth para ioro. 26 Man kawoni rwoth para, calu andha Yehova bedo kwo man in de ibedo kwo,* tie Yehova re m’uceri kara kud ineg nek* man kara kud icul kwor* ku cingi giri. Dong’ judegi peri man dhanu ma gibesayu nitimo rwoth para rac gidok calu Nabal. 27 Dong’ kawoni akweyi rwoth para, mii giramiya* maeni m’akelo iri ni awobi ma gibelubo ng’eyi. 28 Akweyi, wek dubo pa jatic peri, kum andha Yehova biketho ot pa rwoth para bigalu pi nindo ma lee, kum rwoth para ubekiedo lwiny pa Yehova, man fodi itimo ngo lembe moko ma rac acel de i nindo peri ceke. 29 Kinde ma ng’atu moko uai malu pi nidweri man pi nisayu kwo* peri, Yehova Mungu peri, e rwoth para, biboyo kwo peri bibedo museme i usau mi kwo. Ento ebing’uro kwo mi judegi peri bor calu kidi ma jung’uro ku lacur. 30 Man kinde ma Yehova utimo ni rwoth para lembe ceke ma beco m’eng’olo, man eketho idoko jatela iwi Israel, 31 ibibedo ngo ku can i adundeni, kadi ang’eyang’o de biwok ungo i ii* pilembe nia inego nek,* man nia rwoth para uculo kwor ku cinge gire.* Dong’ kinde ma Yehova bitimo iri bero, e rwoth para, poy pi jatic peri.”

32 E Daudi uyero ni Abigail kumae: “Pak ubed ni Yehova Mungu mir Israel, m’uori ibin irombo kuda tin! 33 Mugisa kwenyi pi rieko peri! Man mugisa kwenyi bende pilembe tin icera kara kud aneg nek* man kara kud acul kwor ku cinga gira.* 34 Ka nwang’u ibino ngo nyapio pio nirombo kuda, calu andha Yehova Mungu mir Israel m’ucera nitimowu rac ubedo kwo, nwang’u nitundo urwo kugweno ng’atu moko acel de mbe ma co* mi ot pa Nabal m’udong’ kwo.” 35 E Daudi ujolo gin m’ekelo ire man ewacu ire kumae: “Dok yo peri ku kwiyocwiny. Nen, awinjo lembe m’iyero man abitimo gin m’ikwayu.”

36 Abigail ugam udok i bang’ Nabal. Nwang’u Nabal ubetimo foc calu ubimo i ot pare, cwiny Nabal ukwiyo man emer lee dit . Abigail uyero ngo ire lembe moko acel de nitundo urwonde kugweno ma piny ulero. 37 Kugweno kinde ma kong’o uthum kud i wang’ Nabal, dhaku pare ugam ukoro ire lembe ceke m’ukadhu. E adundene udoko ve adunde ng’atu m’utho, man evuto ma kume de yikere ngo calu kidi. 38 I ng’ey nindo ma romo apar, Yehova ugoyo Nabal, e etho.

39 Kinde ma Daudi uwinjo nia Nabal utho, eyero kumae: “Pak ubed ni Yehova m’ucungo i kuma i ng’ey ma Nabal unywara, man m’ucero jatic pare kara kud etim gin moko ma rac; Yehova udwoko racu pa Nabal i wiye gire!” I ng’eye Daudi uoro dhanu ucidh upenj dwand Abigail nia ebemito game ni dhaku. 40 Jutic pa Daudi gigam gicidho i bang’ Abigail i Karmel man giwacu ire kumae: “Daudi uorowa i beng’i kara wabin wagemi ire ni dhaku.” 41 E ndhu ndhu eai malu man erum arieba wang’e i ng’om, ewacu kumae: “Atie ayika nibedo jatic ma bibelwoko tiend jutic pa rwoth para.” 42 Abigail ugam uai malu pio pio man eidho iwi kana pare man jutic pare ma mon abic gilubo ng’eye. Gidok ku dhanu ma Daudi uoro, man edoko dhaku pa Daudi.

43 Daudi ugamu bende Ahinoam mi Yezreel, e gin ario ceke gidoko mon pare.

44 Ento nwang’u Saul umiyo nyaku pare ma Mikal , ma dhaku pa Daudi ni Palthi ma wod Laic ma dhanu mi Galim.

26 I ng’ey nindo moko, dhanu mi Zif gibino i bang’ Saul i Gibea man giyero kumae: “Daudi upondo iwi ungulu got* mir Hakila, i wang’ Yecimon.”* 2 E Saul uai malu man eting’o dhanu elufu adek (3 000) ma jung’iyo mir Israel, eloro kugi piny i langa mi Zif pi nicisayu kaka Daudi kuca. 3 Saul uwok ugonjo iwi ungulu got* mir Hakila, ma n’i wang’ Yecimon i dhu gengi. Saa maeno nwang’u Daudi kwo i langa; egam ewinjo nia Saul ulubo toke pi nisaye i langa. 4 Pieno Daudi uoro julib gikegicidh ginen ka nyo andha Saul ubino. 5 I ng’eye, Daudi ucidho kaka ma Saul ugonjo i iye, man eneno kaka ma Saul gikud Abner ma wod Ner ma jadit mi juaskari pare ginindo i iye; Saul uvuto man enindo i kagonjo, man juaskari ma gigonjo kugi gitieko ng’ete gbur. 6 E Daudi upenjo Ahimelek ma Jahithi man Abicai ma wod Zeruya m’umin Yoab kumae: “Wabiloro waku ng’a i kagonjo pa Sauli?” Abicai udwoko kumae: “Wabiloro wakudi.” 7 Pieno Daudi gikud Abicai gimondo i kagonjo ku diewor, man giwok ginwang’u Saul uvuto ubenindo i kagonjo; tong’ pare ubedo acoma i ng’om i thiwiye. Abner ku juaskari mange ke givuto i ng’ete gbur.

8 Abicai ugam uwacu ni Daudi kumae: “Tin Mungu udaru miyo jadegi peri i cingi; dong’ kawoni akweyi, wek agur tong’ i iye cik i ng’om wang’ acel kende, abigure ngo wang’ ario.” 9 Ento Daudi uyero ni Abicai kumae: “Kud itime rac, kum ng’a ma copo ketho cinge i kum ng’atu ma Yehova uwiro man ebedo ma lembe mbe i wiye?” 10 Daudi umedo kumae: “Calu andha Yehova ubedo kwo, Yehova en gire binege; kunoke nindo pare biromo ci ebitho; kunoke ebicidho i lwiny, e jubiwok nege. 11 Etie lembe ma copere ngo ira i wang’ Yehova nia aketh cinga i kum ng’atu ma Yehova uwiro! Dong’ akweyi, ting’ tong’ ma n’i thiwiye kud upoko pii no man wacidh i wang’wa.” 12 E Daudi uting’o tong’ kud upoko pii m’ubino i thiwi Saul man gicidho. Ng’atu moko mbe m’unenogi, kadi m’ung’eyo pigi, kadi m’ucew, kum nwang’u gin ceke ginindo, pilembe Yehova uketho nindo ma pek upodho i wigi. 13 I ng’eye, Daudi ukadhu yo lokaca man ecidh ecungo bor iwi got, ma kindgi ung’adu nya lee ku kaka ma Saul ubino i iye.

14 Daudi ugam ukok i bang’ udul askari man i bang’ Abner ma wod Ner, eyero kumae: “Abner, re igamu dhoga ngo?” Abner udwoko kumae: “In i ng’a m’ibelwong’o ubimo e?” 15 E Daudi uyero ni Abner kumae: “Nyo in i jarukara* ngo? Man ng’a ma rom kudi i Israeli? Dong’ pirang’o ke ikuro ngo wi rwoth peri ubimo? Kum ng’atu acel m’i kind juaskari umondo ku diewor pi ninego rwoth peri ubimo. 16 Itimo lembe ma rac. Calu andha Yehova ubedo kwo, iromo ku tho, kum ikuro ngo wi rwoth peri ma tie ng’atu ma Yehova uwiro. Kenen ng’eti! Tong’ p’ubimo kud upoko pii m’ubino i thiwiye ni kani?”

17 E Saul ung’iyo dwand Daudi man epenje kumae: “Daudi woda, eni tie dwendi?” Daudi udwoko ire kumae: “Eni tie dwanda, rwoth para ubimo.” 18 Emedo kumae: “Pirang’o rwoth para uberiemo tok jatic pare? Atimo ang’o? Man adubo ang’o? 19 Rwoth para ubimo, akweyi, kewinj jatic peri: Tek Yehova re m’ubecweyi i kuma, dong’ ejol* girathiera para mi nying cam. Ento tek dhanu re m’ubecweyi i kuma, kwong’ ubed i wigi i wang’ Yehova; pilembe tin giriema bor kud i kind dhanu pa Yehova,* giwacu kumae: ‘Cidh itim ni mungu mange!’ 20 Man kawoni kud iwek atho bor i ng’om ma Yehova mbe i iye, kum ubimo mir Israel uwok nicisayu kaka kukun acel kende ve eberiemo aywer iwi gudi.”

21 E Saul uwacu kumae: “Adubo. Dong’ dwogi, Daudi ma woda; kum abitimi rac kendo ngo, pilembe tin ineno kwo* para ni gin ma pire tek i weng’i. Eyo, atimo lemkasegu man atimo kosa ma lee.” 22 Daudi udwoko kumae: “Tong’ p’ubimo ni e. Dong’ jalawobi moko ubin kuni pi nigame. 23 Yehova re ma biculo ng’atuman pi bedopwe pare man pi gwoko bedoleng’ pare, kum tin nwang’u Yehova umiyi i cinga, ento amito ngo aketh cinga i kum ng’atu ma Yehova uwiro. 24 Nen! calu ma tin aneno kwo* peri ni gin ma pire tek, dong’ Yehova de unen kwo para ni gin ma pire tek, man dong’ ebodha kud i masendi ceke.” 25 E Saul udwoko ni Daudi kumae: “Mugisa kwenyi, Daudi ma woda. Andha ibitimo lembe ma dongo, man gin ceke m’ibitimo bibedo miero.” I ng’eye Daudi ucidho i yo pare, Saul ke udok i pacu pare.

27 Ento Daudi uyero yor i iye gire kumae: “Nindo moko Saul binega. Etie ber nia aringi i ng’om mi Jufilisti, e Saul biweko nisaya i ng’om ceke mir Israel man abiboth kud i cinge.” 2 Pieno Daudi ku dhanu dak abusiel ma gibino karacelo kude giai man gikadhu i bang’ Akic ma wod Maok m’ubimo mi Gath. 3 Daudi man dhanu pare gibedo karacelo kud Akic i Gath; ng’atuman m’i kind dhanune ubino ku juruot pare. Daudi ke ubino karacelo ku jumamon pare ario: Ahinoam mi Yezreel gikud Abigail mi Karmel ma dhatho pa Nabal. 4 Kinde ma judwoko ni Saul nia Daudi uringo i Gath, eweko nisayu kakare.

5 I ng’eye, Daudi uyero ni Akic kumae: “Tek anwang’u bero i weng’i, mii ira kabedo moko i adhura acel mi kiaru kara abed kuca. Pirang’o jatic peri ukwo kudi i adhura ma kal n’i iye?” 6 Pieno cing’ nica Akic umiyo ire Ziklag. Eno re m’uketho Ziklag utie adhura mi jubim mi Yuda nitundo tin.

7 Wend nindo ma Daudi ukwo i iye i kiaru mi Jufilisti ubino oro acel ku dwi ang’wen. 8 Daudi gibed giidho karacelo ku dhanu pare pi niciyaku Jugecur, Jugirzi, man Juamalek, kum dhanu maeno gibed gikwo i ng’om m’umoyere nicaku i Telam nicidho i Cur man niloro piny nitundo i ng’om mi Misiri. 9 Ka Daudi umaku ng’ombe, ebed eweko ngo ng’atu ma nico kadi ng’atu ma dhaku udong’ kwo, ento ecoko udul lim, dhieng’, kana, ngamia, man bongu, e i ng’eye ke edok kugi i bang’ Akic. 10 Akic ubed upenje kumae: “Tin icidh iyaku kani?” Daudi dwoko kumae: “Yo piny* mi Yuda,” kunoke “Yo piny mi Juyeramel,” kunoke “Yo piny mi Jukeni.” 11 Daudi ubed uweko ngo ng’atu moko ma co kadi ma dhaku udong’ kwo maru jubitere i Gath, kum ebed eparu kumae: “Gibimaru tuco wiwa, man gibikoro lembe m’atimo.” (Daudi ubed utimo kumeno i nindo ceke m’ekwo i kiaru mi Jufilisti.) 12 Pieno Akic ugeno Daudi, man eyero yor i iye gire kumae: ‘Ng’wice udaru doko tik andha dong’ i kind jupagi ma Israel, dong’ ebibedo jatic para pi nja.’

28 I nindo maeno, Jufilisti gicoko dhu udul askari migi pi nikiedo i dhu Juisrael. E Akic uyero ni Daudi kumae: “M’umbe jiji, ing’eyo nia in ku dhanu peri wabicidho karacelo kudwu i lwiny.” 2 Daudi udwoko ni Akic kumae: “Ing’eyo cuu gin ma jatic peri bitimo.” Akic udok uyero ni Daudi kumae: “Pieno re m’abikethi ibed jakur kuma mi nja.”*

3 Nwang’u Samwel utho, man Israel ceke giwage man gikunye i adhura ma thugi i Rama. Man nwang’u Saul ukabu cen dhanu ceke ma giweco ku tipo dhanu man ju ma giewo lembe kud i ng’om Israel.

4 Jufilisti gicokiri man gicidh giketho kagonjo migi i Cunem. E Saul ucoko Juisrael ceke man giketho kagonjo migi i Gilboa. 5 Kinde ma Saul uneno kagonjo mi Jufilisti, lworo umake man adundene ucaku dhongo pio pio mandha. 6 Nwang’u Saul upenjo Yehova wang’ dupa, ento Yehova udwoko ngo ire wang’ lembe; dok ebed i lek kadi kud Urim kadok nikadhu kud i bang’ jubila. 7 Tokcenne Saul uwacu ni jutic pare kumae: “Wunwang’ ira ka dhaku ma weco ku tipo dhanu m’utho, e abicidho i bang’e nicipenje ku lembe.” Jutic pare gidwoko ire kumae: “Nen! dhaku moko ma weco ku tipo dhanu m’utho unuti i En-dor.”

8 Pieno Saul uranjere man ekendo bongu mange, e en ku dhanu pare ario gicidho i bang’ dhakune ku diewor. Saul uyero ire kumae: “Akweyi, kan ecopere, kewec ku tipo dhanu m’utho pi ninyutho ira lembe mi nindo m’ubino, man keth ng’atu moko m’abinyutho iri uwok woko i bang’a.” 9 Ento dhakune udwoko ire kumae: “Ing’eyo cuu gin ma Saul utimo, kite m’ekabu ko cen ju ma weco ku tipo dhanu m’utho man ju ma ewo lembe kud i ng’om mir Israel. Dong’ pirang’o imito maka* i uwic kara junega?” 10 Saul ugam ukwong’o ire ku nying’ Yehova, eyero kumae: “Calu andha Yehova bedo kwo, dubo bibedo mbe i wii nyanok de i lembe maeni!” 11 Dhakune uyero ire kumae: “Imito aketh ng’a m’uwok iri?” E edwoko ire kumae: “Keth Samwel re m’uwok ira.” 12 Kinde ma dhakune uneno “Samwel,”* ekok ku tego pare ceke ewacu ni Saul kumae: “Pirang’o iwonda? Karaman itie Saul!” 13 Ubimo uyero ire kumae: “Lworo kud unegi; yer ira, ineno ng’a?” Dhakune udwoko ni Saul kumae: “Aneno ng’atu moko ma calu mungu ubeidho malu kud i ng’om.” 14 E wang’ acel Saul upenje kumae: “Ayine tie nenedi?” Edwoko kumae: “Tie ng’atu moko m’utii re m’ubeidho malu, man ekendo bongu ma bote mbe.” E Saul unyang’ nia eca tie “Samwel,” man erum piny man epodho arieba wang’e, edong’ asu i ng’om.

15 E “Samwel” uwacu ni Saul kumae: “Pirang’o ibesenda man pirang’o iketho julwong’a?” Saul udwoko kumae: “An’i lembe ma tek mi tuko ngo. Jufilisti gibekiedo i kuma, man Mungu de uweka, dong’ ebedwoko ngo ira wang’ lembe nik’ebed nikadhu kud i bang’ jubila, kadi nikadhu kud i lek; pieno re m’alwong’i kara inyuth ira gin m’ukwayu atim.”

16 “Samwel” uwacu kumae: “Pirang’o ibepenjo an, ma ke dong’ Yehova udaru weki man edoko jadhogi e? 17 Yehova bitimo* lembe m’elar eyero nikadhu kud i bang’a: Yehova biyeco ker cen kud i cingi man ebimiye ni wedu ma Daudi. 18 Calu iworo ngo dwand Yehova man inyotho ngo Juamalek m’unyayu ng’eicwiny ma lake tek i iye, eno re m’uketho Yehova ubetimo gin maeni iri tin. 19 M’umedo maeno, Yehova bimiyo Juisrael ku in de i cing’ Jufilisti, man urwo in ku woti wubinwang’a kuni. Yehova bimiyo bende udul askari mi Juisrael i cing’ Jufilisti.”

20 Kinde ma Saul uwinjo lembe ma “Samwel” uyero, e wang’ acel epodho sii i ng’om man lworo ma dit umake. Man tego moko acel de mbe m’udong’ i kume, pilembe nwang’u ecamu ngo cing’ nica duu man diewor traka. 21 Kinde ma dhakune ubino i bang’ Saul man eneno nia can umondo lee i iye, ewacu ire kumae: “An a jatic peri aworo dwendi, aketho kwo para i ariti* man atimo lembe m’iwacu atim. 22 Dong’ kawoni akweyi, winj lembe ma jatic peri ubeyero. Wek aketh nyathi dund mukathi moko i weng’i icam, kara inwang’ tego moko m’imediri ko ku woth peri.” 23 Re ekwero man ewacu kumae: “Abicamu ngo.” Ento jutic pare man dhakune girere asu. Tokcenne ewinjo dwandgi man eai malu kud i ng’om, ebedo iwi pem. 24 Nwang’u dhakune tie ku nyathi dhiang’ ma fulful i pacu, e ethume* nyapio pio man eting’o mogo enyobo ni kwen, i ng’eye etede ni mukathi ma thobi mbe i iye. 25 Ekethogi i wang’ Saul ku jutic pare, e gicamu. I ng’eye giai man gicidho ku diewor.

29 Jufilisti gigam gicoko dhu juaskari migi ceke i Afek, man i saa maeno nwang’u Juisrael gigonjo i dhu kulo i Yezreel. 2 Man rwodhi mi Jufilisti gibino kadhu kud ungu mi juaskari dak man elufu. Daudi ku dhanu pare ke gicoko tokgi karacelo kud Akic. 3 Ento judongo ma wijo mi Jufilisti gipenjo kumae: “Juebrania e gibetimo ang’o keni?” Akic udwoko ni judongo ma wijo mi Jufilistine kumae: “Eni tie Daudi ma jatic pa Saul m’Ubimo mir Israel. Wabedo kude keni oro udaru kadhu acel kawoni. Anwang’u ngo lembe moko ma rac acel de i iye niai i nindo m’eweko Saul ebino i bang’a nitundo tin eni.” 4 Ento ng’eicwiny umaku judongo ma wijo mi Jufilisti i kum Akic, man giyero ire kumae: “Keth ng’atuno udok cen. Wek edok kaka m’iketho ebed i iye. Kud iwek elor piny karacelo kudwa i lwiny maru ebiwok lokere i kumwa i saa mi lwiny. Kum yo ma ber m’eromo nyayu ko mutoro i rwoth pare utie nitero wi dhanu mwa i bang’e ngo? 5 Nyo eni tie ngo Daudi ma jugam juwer pire man jumiel ma jubeyero kumae:

6 E Akic ulwong’o Daudi man ewacu ire kumae: “Calu andha Yehova ubedo kwo, in i ng’atu m’atira; nwang’u amaru nia icidh kud udul askari para i lwiny maeni, kum anwang’u ngo lembe moko ma rac acel de i ii, niai i nindo m’ituc i iye i bang’a nitundo tin eni. Ento rwodhi maeni gigeni ngo. 7 Dong’ dok ma cwinyi kwiyo man kud itim lembe moko ma copo foyo ngo i rwodhi mi Jufilisti.” 8 Ento Daudi udwoko ni Akic kumae: “Atimo ang’o? Kosa ang’o m’inwang’u i jatic peri niai i nindo m’atundo i iye i beng’i nitundo tini? Dong’ pirang’o kud acidh karacelo kudi man akied i dhu judegi pa rwoth para ubimo?” 9 Akic udwoko ni Daudi kumae: “I wang’a, niai eca itie dhanu ma ber calu malaika pa Mungu buu. Ento judongo ma wijo mi Jufilisti giwacu ira kumae: ‘Kud iwek ng’atu maeni ucidh karacelo kudwa i lwiny.’ 10 Dong’ ai urwo pir kugweno, in karacelo ku jutic p’ubimo ma wubino kugi; man wucidhi con kugweno kinde ma piny ubelero.”

11 Pieno Daudi karacelo ku dhanu pare giai malu pir kugweno man gidok i ng’om mi Jufilisti, Jufilisti ke giidho i Yezreel.

30 Kinde ma Daudi karacelo ku dhanu pare gitundo i Ziklag i nindo mir adege, ginwang’u Juamalek ubin umondo ku lwiny yo piny,* gimondo i Ziklag man gimaku adhura mi Ziklag man giwang’e ku mac. 2 Giyaku jumamon ku dhanu ceke mir adhurane, ju ma thindho ku ju ma dongo ceke. Ginego ngo ng’atu acel de, ento gicokogi man gicidho kugi i yo migi. 3 Saa ma Daudi karacelo ku dhanu pare gitundo i adhurane, ginwang’u juwang’e ku mac man mon migi ku wotgi man nyiggi ceke juyakugi jucidho kugi. 4 Pieno Daudi karacelo ku dhanu ma gibino kude giwak ma tek nitundo ma tego mi kumgi uthum, ma dong’ giromo mediri ngo ku wak. 5 Mon pa Daudi ario, niwacu Ahinoam mi Yezreel man Abigail ma dhatho pa Nabal mi Karmel de juyakugi jucidho kugi. 6 Cwiny Daudi ung’abere akeca, pilembe dhanu ma gibino karacelo kude gibino yero nia ging’ure ku kidi, kum gin ceke ng’eicwiny umakugi lee* pi wotgi man nyiggi ma juyaku. Ento Daudi unwang’u tego nikum Yehova Mungu pare.

7 I ng’eye, Daudi uyero ni Abiathar ma jalam ma wod Ahimelek kumae: “Ka copere, kel efodh* kae.” E Abiathar ukelo efodh i bang’ Daudi. 8 Daudi upenjo Yehova kumae: “Nyo ukwayu ariem tok udul weg ayeki maeni? Nyo abirubogi?” E edwoko ire kumae: “Riem tokgi, kum ibirubogi andha, man ibimayu dhanu ku piny ceke ma giyaku.”

9 E ndhu ndhu Daudi ucidho ku dhanu dak abusiel ma gibino karacelo kude, gicidho nitundo i ndaba* mi Bezor, man dhanu moko uwok udong’ keca. 10 Daudi karacelo ku dhanu dak ang’wen gimediri asu niriemo tokgi, ento dhanu dak ario gigam gidong’, pilembe giol lee ma giromo kadhu ngo ndaba mi Bezor.

11 Giwok ginwang’u Jamisiri moko i wang’ lum man gitere i bang’ Daudi. Gimiyo ire cam moko man pii m’amadha, 12 gimiyo ire bende kum mukathi mi nying ulam m’uthwo man mukathi ario mi nying ulok. I ng’ey m’ecamu, kero dwogo i kume,* kum nwang’u ecamu ngo cam moko kadi emadhu de ngo pii pi ceng’ adek dieceng’ ku diewor. 13 Daudi upenje kumae: “In i jatic pa ng’a, man iai kani?” Edwoko kumae: “An a Jamisiri, a jatic pa Jaamalek, ento rwoth para uweka pilembe twoyo umaka ceng’ adek udaru kadhu. 14 Wan re ma wacidh wamondo ku lwiny yo piny i ng’om mi Jukerethi, i ng’om mi Yuda, man yo piny* mi ng’om pa Kaleb, wawang’u bende Ziklag ku mac.” 15 E Daudi upenje kumae: “Nyo iromo tera i bang’ udul mi weg ayeki maeno?” Edwoko ire kumae: “Ndhu kan ikwong’o ira ku nying’ Mungu nia ibinega ngo man ibimiya ngo i cing’ rwoth para, abiteri piny i bang’gi.”

16 Pieno etere kaka ma gimoyiri foo i iye i ng’ombuca, ma gibecamu, gibemadhu man gibetimo foc pi jambayeki ma lee ma giyaku kud i ng’om mi Jufilisti man kud i ng’om mi Yuda. 17 E Daudi unegogi niai dhu mombwa nitundo dhu uthieno; ng’atu moko acel de mbe m’uboth, m’uweko dhanu dak ang’wen ma giringo ku ngamia. 18 Daudi umayu piny ceke ma Juamalek giyaku, man ebodho bende mon pare ario. 19 Piny migi moko acel de mbe m’urwinyo, nik’ebed piny ma nok kadi ma dit. Gimayu wotgi ku nyiggi man jambayeki; Daudi umayu piny ceke ma nwang’u giyaku. 20 E Daudi ucoko rombe ceke, diegi, dhieng’, man thwoni dhieng’ mi Juamalek; dhanu pare gilekogi i wang’ udul lim migi man giwacu kumae: “Eni tie jambayeki pa Daudi.”

21 I ng’eye, Daudi karacelo ku dhanu ma gibino kude gitundo i bang’ dhanu dak ario ma gigam gidong’ i dhu ndaba mi Bezor, pilembe gigam giol akeca uketho gicidho ngo karacelo ku Daudi; gin de gibin girombo ku Daudigi. Kinde ma Daudi utundo i bang’gi, epenjogi nia gitie nenedi. 22 Ento dhanu ceke ma reco man ma kony migi mbe ma gibino i kind ju ma gicidho ku Daudigi giyero kumae: “Calu ma gilubo ngo tokwa, wabimiyo ngo igi jambayeki moko acel de ma wamayu; ng’atuman ugam kende kende dhaku pare kud awiya pare ecidh ko cen.” 23 Ento Daudi uyero kumae: “Umego para, wucikuru ngo nitimo kumeno ku piny ma Yehova umiyo iwa. Egwokowa man emiyo udul weg ayeki ma gibino i kumwa i cingwa. 24 Ng’a ma copo yiyo lembe ma wubeyero no? Makapiny pa ng’atu m’ucidho i lwiny bibedo rom ku makapiny pa ng’atu m’udong’ i bang’ ter. Dhanu ceke binwang’u makapiny ma rom.” 25 Niai cing’ nica lembe ma Daudi uyero udoko ni telowic man cik i Israel nitundo tin.

26 Kinde ma Daudi udwogo i Ziklag, eoro kum jambayeki moko ni judongo mi Yuda ma gibino jurimbe, man eyero kumae: “Aoro iwu giramiya* moko eni. Etie kum piny ma wayaku i bang’ judegi pa Yehova.” 27 Eoro giramiyane ni ju mi Bethel, ni ju mi Ramoth mi Negeb,* ni ju mi Yatir, 28 ni ju mi Aroer, ni ju mi Sifmoth, ni ju mi Ecthemoa, 29 ni ju mi Rakal, ni ju mir adhura mi Juyeramel, ni ju mir adhura mi Jukeni, 30 ni ju mi Horma, ni ju mi Boracan, ni ju mir Athak, 31 ni ju mi Hebron, man ni ju mi kabedo ceke ma Daudi karacelo ku dhanu ma gibino kude gibed giwotho i iye.

31 Nwang’u Jufilisti gibekiedo lwiny i dhu Juisrael. E dhanu mir Israel giringo kud i wang’ Jufilisti, man ju ma dupa githo iwi got Gilboa. 2 Jufilisti gidiyo Saul ku wote ceng’ini mandha, e ginego Yonathan, Abinadab, man Malki-cua ma gi wot Saul. 3 Lak lwiny udoko tek mandha i kum Saul, e weg athero ginene, man ginyayu ret ma lee i kume. 4 Pieno Saul uyero ni jayey jamlwiny pare kumae: “Wodh palamularu peri man idhuya ko, kara dhanu maeni ma jutimo ngo yaa i kumgi kud gibin man gidhuya, gisenda ku rac.” Ento jayey jamlwiny pare umito ngo edhuye, pilembe lworo ubino nege lee. Pieno Saul uting’o palamularu pare man epodho i wiye. 5 Kinde ma jayey jamlwiny pa Saul uneno nia etho, en bende epodho iwi palamularu pare man etho karacelo kude. 6 E Saul ku wote adek, jayey jamlwiny pare, man dhanu pare ceke githo karacelo cing’ nica. 7 Kinde ma Juisrael ma gibedo i ng’om mi poga* man i ng’om Yordan gineno nia dhanu mir Israel uringo, man nia Saul ku wote bende githo, gicaku weko adhura migi man giringo; e Jufilisti gibino man gibedo i adhurane.

8 Urwonde, kinde ma Jufilisti gibino yaku piny mi ju ma ginego, ginwang’u Saul ku wote adek bende githo iwi got Gilboa. 9 E githumo wiye man gicoko jamlwiny pare. I ng’eye gioro kwenda i ng’om mi Jufilisti pi nimewo lembe maeno i hekalu* mi mungu m’araga migi man i kind dhanu. 10 Gigam giketho jamlwiny pare i hekalu pa Actoreth ma tie ayi gin m’acwiya, man giguro avuje i kor gang’kidi mi Beth-can. 11 Kinde ma dhanu ma gibedo i Yabec-gilead giwinjo lembe ma Jufilisti utimo i kum Saul, 12 jurumony ceke giai malu man giwotho diewor traka gicidh giloro avuj Saul kud avuj wote kud i kum gang’kidi mi Beth-can. Gidwogo kugi i Yabec man giwang’ugi keca. 13 I ng’eye gicoko cogogi, gikunyogi i Yabec i the yend tamaris, man gikwiro cam pi nindo abiro.