UBIMO MIR ARIO

1 I ng’ey tho p’Ahab, Jumoab gijai ni Israel.

2 Nwang’u Ahazia ubino i kusika pare ma yo malu i Samaria, e epodho kud i wang’ girakada mi ot pare man elimo ret. Pieno eoro jukwenda, ewacu igi kumae: “Wucidh wupenj Baal-zebub ma mungu mir Ekron pi ning’eyo ka nyo abiboth kud i remo maeni.” 3 Ento malaika pa Yehova uyero ni Eliya* ma Jaticbi kumae: “Ai icidh iromb ku jukwenda p’ubimo mi Samaria man iwac igi kumae: ‘Nyo Mungu mbe ambea i Israel m’uketho wubecidho penjo lembe i bang’ Baal-zebub ma mungu mir Ekron e? 4 Pi thelembe maeno Yehova uwacu kumae: “Ibiai ungo kud iwi kavuto m’ivuto i wiye, kum ibitho andha.”’” E Eliya ucidho.

5 Saa ma jukwenda gidwogo i bang’e, epenjogi kumae: “Wuloko pirang’o?” 6 Gidwoko ire kumae: “Ng’atu moko ubin urombo kudwa man eyero iwa kumae: ‘Wulok wudok i bang’ ubimo m’uorowu man wuwac ire nia, “Yehova uyero kumae: ‘Nyo Mungu mbe ambea i Israel m’uketho ioro jucidh jupenj lembe i bang’ Baal-zebub ma mungu mir Ekron e? Pi thelembe maeno, ibiai ungo kud iwi kavuto m’ivuto i wiye, kum ibitho andha.’”’” 7 E epenjogi kumae: “Ng’atu m’ubin urombo kudwu man m’uyero lembe maenine ayi pare tie nenedi?” 8 Gidwoko ire kumae: “Ng’atune ukendo bongu mi yuk lei man etwiyo mukaba mir adila i piere.” E ndhu ndhu ubimo uwacu kumae: “Eca tie Eliya ma Jaticbi.”

9 E ubimo uoro jadit mi juaskari pier abic karacelo ku juaskari pier abicne i bang’ Eliya. Kinde ma jaditne uidho i bang’ Eliya, nwang’u Eliya ubedo i die wi got. Egam ewacu ire kumae: “Dhanu pa Mungu mandha, ubimo ubeyero kumae: ‘Lor piny.’” 10 Ento Eliya udwoko ni jaditne kumae: “Tek andha atie dhanu pa Mungu, dong’ mac ulor kud i polo man uweng’i in ku juaskari peri pier abic.” E mac uloro kud i polo man uwang’e ku juaskari pare pier abic.

11 Ubimo udok uoro kendo jadit mange mi juaskari pier abic karacelo ku juaskari pier abicne i bang’ Eliya. Ecidho man ewacu ni Eliya kumae: “Dhanu pa Mungu mandha, ubimo ubeyero kumae: ‘Lor piny pio.’” 12 Ento Eliya udwoko igi kumae: “Tek atie dhanu pa Mungu mandha, dong’ mac ulor kud i polo man uweng’i in ku juaskari peri pier abic.” E mac pa Mungu uloro kud i polo man uwang’e karacelo ku juaskari pare pier abic.

13 Ubimo udok uoro kendo jadit mi juaskari pier abic mir adege ku juaskari pare pier abic. Ento jadit mi juaskari pier abic maeno mir adek uidho man ewok erumo conge i ng’om i wang’ Eliya, e ekwaye kumae: “Dhanu pa Mungu mandha, akweyi, wek kwo para ku kwo mi* jutic peri pier abic maeni ubed ni gin ma pire tek i weng’i. 14 Mac udaru loro kud i polo man uwang’u judongo mir askari pier abic ario kud ungu mi juaskari pier abic abic ma gibino i wang’a, ento kawoni wek kwo* para ubed ni gin ma pire tek i weng’i.”

15 E malaika pa Yehova uwacu ni Eliya kumae: “Lor karacelo kude. Kud ilwore.” Egam eai malu man eloro karacelo kude i bang’ ubimo. 16 Eliya uwok uwacu ni ubimo kumae: “Yehova uyero kumae: ‘Ioro jukwenda ucidh upenj lembe i bang’ Baal-zebub ma mungu mir Ekron. Nyo Mungu mbe ambea i Israeli? Pirang’o ipenjo ngo lembe i bang’e? Pi thelembe maeno, ibiai ungo kud iwi kavuto m’ivuto i wiye, kum ibitho andha.’” 17 E etho calku lembe pa Yehova ma Eliya uwacu; man calu m’enyolo ngo nyathin ma nico, Yehoram* udoko ubimo kakare i oro mir arionde mi camuker pa Yehoram ma wod Yehocafath m’ubimo mi Yuda.

18 Dong kpawa mi kwo pa Ahazia man lembe m’etimo, jukiewogi i buku mi kpawa mi jubim mir Israel.

2 Kinde ma Yehova ubeciting’o Eliya malu i polo* kud i kind yamu ma tek, Eliya gikud Elica giai kud i Gilgal. 2 Eliya uwacu ni Elica kumae: “Akweyi, dong’ keni, pilembe Yehova uora i Bethel.” Ento Elica udwoko kumae: “Calu andha Yehova ubedo kwo man in de ibedo* kwo, abiweki ngo.” Pieno giloro i Bethel. 3 E wot jubila* ma gin’i Bethel gibin girombo kud Elica man giwacu ire kumae: “Nyo ing’eyo de nia tin Yehova ubeting’o jadit peri kara kud etel wii?” E edwoko kumae: “Adaru ng’eyo. Wuling’.”

4 Eliya ugam uwacu ni Elica kumae: “Akweyi, dong’ keni, kum Yehova uora i Yeriko.” Ento edwoko kumae: “Calu andha Yehova ubedo kwo man in de ibedo* kwo, abiweki ngo.” Pieno gicidho i Yeriko. 5 I ng’eye wot jubila ma gin’i Yeriko gicoro i bang’ Elica man giwacu ire kumae: “Nyo ing’eyo de nia tin Yehova ubeting’o jadit peri kara kud etel wii?” E edwoko kumae: “Adaru ng’eyo. Wuling’.”

6 Eliya ugam uwacu ire kumae: “Akweyi, dong’ keni, kum Yehova uora i Yordan.” Ento edwoko kumae: “Calu andha Yehova ubedo kwo man in de ibedo* kwo, abiweki ngo.” Pieno gin ario ceke gicidho. 7 Wot jubila pier abic bende gicidho. Eliya gikud Elica giwok gicungo i dhu kulo Yordan, ento gin gibino neno ku bor. 8 I ng’eye, Eliya uting’o kendi pare ma segi, edole man egoyo ko pii, e pii upokere yor acam man yor acwic; ketho gin ario zoo gikadhu iwi ng’om m’uthwo.

9 Kinde ma gikadhu tap, Eliya uyero ni Elica kumae: “Kway gin m’imito atim iri ma fodi juting’a ngo kud i beng’i.” Pieno Elica udwoko kumae: “Kan ecopere, nyo acopo lagu ng’et tipo peri wang’ ario?” 10 Edwoko kumae: “Ikwayu lembe ma tek. Tekene inena kinde ma jubeting’a kud i beng’i, ebitimere iri calu m’ikwayu; ento tekene inena ngo, ebitimere ngo.”

11 Kinde ma gibemediri ku woth man gibeweco, rek kumeni magali mi mac man riuni mi mac upoko kindgi gin ario, e Eliya uidho i polo* i kind yamu ma tek. 12 Kinde ma Elica ubino neno, ebino kok kumae: “Vwa, vwa! Magali mir Israel ku juring riuni pare!” Kinde ma dong’ ecopo neno ngo Eliya, eyeco bongu pare ni ario. 13 I ng’eye, Elica uting’o kendi ma segi pa Eliya m’upodho kud i kume man eloko ecidh ecungo i dhu kulo Yordan. 14 E Elica ugoyo pii ku kendi ma segi pa Eliya m’ugam upodho kud i kume man ewacu kumae: “Yehova Mungu pa Eliya ni kani?” Kinde m’egoyo pii, pige upokere yor acam man yor acwic, e Elica ukadhu.

15 Saa ma wot jubila ma gin’i Yeriko gineno Elica ku bor, giyero kumae: “Tipo pa Eliya udwogo iwi Elica.” Pieno gicidh girombo kude man girum i wang’e i ng’om. 16 Giwacu ire kumae: “Dhanu ma tek pier abic utie karacelo kudwa wa jutic peri. Dong’ wakweyi, wek gicidh gisay kaka jadit peri. Saa moko nyo tipo* pa Yehova uting’e malu man ucidh ubole iwi got moko kunoke i poga moko.” Ento eyero kumae: “Kud wuorgi.” 17 Ento gimediri asu nirere nitundo ma lewic umake, e eyero kumae: “Wuorgi ya.” E gioro dhanu pier abic ucidh usaye pi nindo adek, ento ginwang’e ngo. 18 Kinde ma gidwogo i bang’e, nwang’u ebedo asu i Yeriko. E ewacu igi kumae: “Ayero iwu ngo nia kud wucidhi?”

19 I ng’ey kare, dhanu mir adhurane giyero ni Elica kumae: “Jadit mwa kenen, adhura maeni ubedo kaka ma ber; ento pii m’i iye rac man ng’ombe de mugumba kwanyu.”* 20 E ewacu kumae: “Wukel ira nyathi tabu moko ma nyen man wuketh kadu i iye.” Pieno gikelo tabu i bang’e. 21 E ecidho ka ma piine ucaku i iye man ebolo kadu i iye, ewacu kumae: “Yehova uwacu kumae: ‘Akeyo pii maeni. Dong’ ebikelo tho kadi mugumba kendo ngo.’”* 22 E nitundo tin eni pige key, calku lembe ma Elica uyero.

23 E eai ku keca ecidho i Bethel. Kinde ma en’i yo, awiya moko ma co mir adhura giwok man gicaku nyware ma gibewacu kumae: “Idh malu, in ma wii wang’! Idh malu, in ma wii wang’!” 24 Tokcenne elokere eneno bang’gi man elamugi ku nying’ Yehova. E meg urudi ario uwok kud i luli man giyeco i awiya pier ang’wen wi ario m’i kindgi. 25 Ku keca emedere ku woth ecidho iwi got Karmel, man ku kuca eloko edok i Samaria.

3 Yehoram ma wod Ahab udoko ubimo mir Israel i Samaria i oro mir apar aborane mi camuker p’Ubimo Yehocafath mi Yuda, man ebimo pi oro apar ario. 2 Emedere nitimo lembe ma rac i wang’ Yehova, ento ungo i kadhiri pa won kadi pa min, kum ekabu mbegi mi thier pa Baal ma won uyiko. 3 Ento emoko i kum dubo ma Yeroboam ma wod Nebat ucwalu Israel nitimo. Ekoc ungo kud i kumgi.

4 Nwang’u Meca m’ubimo mi Moab ubino jatung rombe, man ebed eculo nyithi rombe elufu dak acel (100 000) ku nyogi rombe elufu dak acel ma junyaru ngo yukgi ni ajok ni ubimo mir Israel. 5 Saa ma Ahab utho ci, ubimo mi Moab ugam ujai ni ubimo mir Israel. 6 Pieno Ubimo Yehoram uwok nindo nica kud i Samaria man ewaku Israel ceke. 7 Eoro bende kwenda i bang’ Ubimo Yehocafath mi Yuda, ewacu kumae: “Ubimo mi Moab ujai ira. Nyo wabicidho karacelo kudi pi nikiedo i dhu Moabi? Edwoko kumae: “Wabicidho. An a calu in. Dhanu para gi calu dhanu peri. Riuni* para de gi calu riuni peri.” 8 I ng’eye, Yehocafath upenjo kumae: “Wabing’olo i yo ma kani?” Edwoko kumae: “Wabing’olo i yo mi langa mir Edom.”

9 E ubimo mir Israel man ubimo mi Yuda kud ubimo mir Edom gicidho. I ng’ey ma gidhokiri ku woth pi nindo abiro, pii ugam uthum ni juaskari man ni lei ma giwotho ko. 10 Ubimo mir Israel ugam uwacu kumae: “Aka! Yehova ulwong’owa wa jubim adek maeni ndhu pi nimiyowa i cing’ Moab ba!” 11 E Yehocafath uyero kumae: “Nyo jabila pa Yehova moko mbe kakeni ma waromo penjo Yehova nikadhu kud i bang’e?” Ng’atu acel m’i kind jutic p’ubimo mir Israel ugam udwoko kumae: “Elica ma wod Cafath m’ubed uthiwo pii i cing’ Eliya* unuti.” 12 I ng’eye, Yehocafath uyero kumae: “Ebinyutho iwa yeny pa Yehova.” Pieno ubimo mir Israel giku Yehocafath man ubimo mir Edom giloro i bang’e.

13 Elica uyero ni ubimo mir Israel kumae: “Lembang’o i kindwa wakudi?* Cidh i bang’ jubila pa wuru man i bang’ jubila pa meru.” Ento ubimo mir Israel uyero ire kumae: “Ungo, kum Yehova re m’ulwong’owa wa jubim adek maeni pi nimiyowa i cing’ Moab.” 14 E Elica uwacu kumae: “Calu andha Yehova mir udul m’abetimo ire* ubedo kwo, ka nwang’u pi woro Yehocafath m’Ubimo mi Yuda ngo, nwang’u aneno beng’i de ngo kadi akwanu kudi de ngo. 15 Kawoni wukel ira jagoy adungu.”* Kinde ma jagoy adungu ucaku goyo adungu tap, cing’ Yehova ubino iwi Elica. 16 Eyero kumae: “Yehova uwacu kumae: ‘Wutong’ vur dupa dupa i poga maeni, 17 kum Yehova uyero kumae: “Wubineno ngo yamu man wubineno ngo koth; re asu poga maeni bipong’ ku pii, man wubimadhu pige wun karacelo ku lim mwu, man leya mwu mange de.”’ 18 Ento eno tie lembe ma nyanok i wang’ Yehova, kum ebimiyo Moab de i cingwu. 19 Wurwomb adhura ma tek ceke man adhura ma pigi tek ceke, wung’ond yen ma beco ceke, wucul dhu kulo ceke, man wunyoth podho ma beco ceke ku kidi.”

20 E kugweno i saa ma jubed juthiero iye girathiera mi nying cam mi kugweno, pii ugam ucoro rek niai yor i Edom man pige upong’o ng’om ceke.

21 Jumoab ceke gigam giwinjo nia jubim giidho pi nikiedo i dhoggi, pieno giwaku jumaco ceke ma giromo yeyo jambali,* man gicungo i kieu. 22 Kinde ma giai pir kugweno, ceng’ ubino caru pii, man pige ubino nen kwar calu rimo ni Jumoab ma ni yor i thenge ma yo lokaca. 23 Giwacu kumae: “Maeni tie rimo! M’umbe jiji jubim gidaru negiri i kindgi ku palamularu. Pieno, E Jumoab, wacidh wayeku piny!” 24 Kinde ma Jumoab gimondo i kagonjo mir Israel, Juisrael giai malu man gicaku negogi, e giringo Juisrael. Juisrael gimondo i Moab man giwotho nego Jumoab kinde ma gibemondo. 25 Girwombo adhura man ng’atuman ucanyu kidi i podho ma beco ceke, man gipong’o podhonegi ku kidi. Giculo dhu kulo ceke man ging’ondo yen ma beco ceke. Tokcenne, gang’kidi mi Kir-hareseth re m’udong’, e weg lacur gitieke man girwombe.

26 Saa m’ubimo mi Moab uneno nia lwiny uvoye, ecoko jumaco dak abiro ma gitie ku palamularu kara giyab yo pi nicidho i bang’ ubimo mir Edom, ento ecopere ngo igi. 27 Pieno, eting’o wode ma kayu ma nwang’u ubecicamu ker kakare man ethiere ni lam m’awang’a iwi gang’kidi. E ng’eicwiny ma dit umaku dhanu* i kum Israel uketho giweko ubimo mi Moab man gidok i ng’om migi.

4 Nindo acel, dhaku moko ma cware ubino i kind wot jubila ubin uwak i bang’ Elica kumae: “Jatic peri ma won ot para utho, man ing’eyo cuu nia saa ceke ebed elworo Yehova. Kawoni jamii banja moko ubino pi nigamu awiya para ario zoo kara gidok ng’eca pare.” 2 E Elica uwacu ni dhakune kumae: “Acopo timo iri ang’o? Yer ira, itie kud ang’o i ot peri?” Edwoko kumae: “An a jatic peri ambe ku gin moko acel de i ot, ndhu mo agulu* acel kende.” 3 E Elica uyero ire kumae: “Wok icidh i bang’ judhugola peri zoo ikway ajeni ma igi thwolo. Kud ikway nyanok kende. 4 I ng’eye, mond i ot man icik dhugola i beng’wu ku woti. Pong’ mo i ajenine ceke, man m’udaru pong’o keth ang’et.” 5 E dhakune uweko Elica.

Kinde m’eciko dhugola i bang’gi ku wote, wote gikoko ajeni i bang’e man ewotho konjo mo i igi. 6 Saa m’ajenine gipong’o, ewacu ni wode acel kumae: “Kok ira ajeni mange.” Ento wodene udwoko ire kumae: “Ajeni mange mbe.” E mo ujik. 7 E emondo i bang’ dhanu pa Mungu mandha man edwoko ire lembene, e Elica uyero kumae: “Cidh ilwor moje man icul banja ma n’i ii, donge m’udong’ ke wukwo ko ku woti.”

8 Nindo moko Elica ucidho i Cunem; nwang’u dhaku moko mir awora bedo kuca, man dhakune urere nia ecam cam i bang’e. Dong’ kan ebekadhu ku keca ci, ebed ewiro pi nicamu i bang’e. 9 Pieno eyero ni cware kumae: “Ang’eyo nia ng’atu ma bebino kakeni e utie ng’atu ma leng’ pa Mungu. 10 Dong’ akweyi, wek wayik nyathi kusika moko iwi ot man waketh ire kavuto, meza, kom, ku tiend thala, kara tek ebino i bang’wa, ebed ebed kuca.”

11 Nindo acel Elica ubino keca man eidho i kusika iwi ot pi nivuto. 12 I ng’eye, eyero ni Gehazi ma jatic pare kumae: “Kelwong’ Nyacunem maeni.” E Gehazi ulwong’e man ebin ecungo i wang’ Elica. 13 E Elica uwacu ni Gehazi kumae: “Akweyi, yer ni dhakune kumae: ‘Idaru sendiri lee dit piwa. Dong’ acopo timo ang’o iri? Nyo ukwayu anyuth piri ni ubimo kunoke ni jadit mir udul askari?’” Ento dhakune udwoko kumae: “An abekwo i kind juthuwa ma dhe.” 14 E Elica upenjo kumae: “Dong’ jucopo timo ang’o ire?” Gehazi udwoko kumae: “Embe ku nyathin ma nico man cware de utii.” 15 Ndhu ndhu Elica uyero kumae: “Kelwong’e.” E Gehazi ulwong’e man ebin ecungo i wang’ dhugola. 16 Elica ugam uyero kumae: “Oro ma cen unyoni, ibiting’o nyathin ma nico i kori.” Ento dhakune uwacu kumae: “Ungo, rwoth para, dhanu pa Mungu mandha! Kud iwond jatic peri.”

17 E dhakune ugamu iye man enyolo nyathin ma nico i oro m’ulubo, i saa ma rom ma Elica ular uyero ire. 18 E nyathinne udongo. Nindo acel ecidho i bang’ won ma nwang’u ni karacelo ku jukay cam. 19 Ewotho wacu ni won kumae: “Wiya yo, wiya yo!” E won uyero ni jatic pare kumae: “Tere i bang’ min.” 20 Pieno jaticne udwoke i bang’ min man ebedo i kor min nitundo dieceng’, i ng’eye etho. 21 E min ugam uidho kude malu, ecidh epiele iwi kavuto pa dhanu pa Mungu mandha, e eciko dhugola man ecidho. 22 I ng’eye elwong’o cware man ewacu ire kumae: “Akweyi, or ira jatic acel ku kana acel. Abecidho pio pio i bang’ dhanu pa Mungu mandha man abidwogo.” 23 Ento cwarene uyero ire kumae: “Pirang’o ibecidho i bang’e tini? Tin tie ngo por pa dwi kadi sabatu.” Ento edwoko kumae: “Lembe ceke tie ma ber.” 24 Pieno etwiyo kabedo iwi kana man eyero ni jatic pare kumae: “Ring pio pio. Kud ijwig lak ng’wec ka fodi ayero iri an ungo.”

25 E ecidho i bang’ dhanu pa Mungu mandha iwi Got Karmel. Saa ma dhanu pa Mungu mandha unene ku bor, eyero ni Gehazi ma jatic pare kumae: “Nen! Nyacunem ubebino ca. 26 Ka copere ring icidh iromb kude man ipenje kumae: ‘Itie ma beri? Cweri tie ma beri? Nyathin peri de ubedo ma beri?’” E dhakune udwoko kumae: “Lembe ceke tie ma ber.” 27 Kinde m’etundo i bang’ dhanu pa Mungu mandha iwi got, e wang’ acel ewok egwaku tiende kii. Gehazi ugam ucoro ceng’ini kara ecwale cen, ento dhanu pa Mungu mandha uyero kumae: “Weke, kum en’i can ma dit,* man Yehova ukanu lembene ira, enyutho ngo ira.” 28 E dhakune uyero kumae: “Rwoth para, nyo akwayu nyathin ma nico i beng’i de? Ayero iri ngo nia, ‘kud iketh abed ku genogen ma iye nanu’?”

29 Ndhu ndhu Elica uyero ni Gehazi kumae: “Twii bongu peri i pieri, ting’ uluth para man icidhi. Kan iwok irombo ku ng’atu moko, kud imothe; man tek ng’atu moko ubemothi, kud igam dhoge. Cidhi man iwok iketh uluth para i terwang’ jalawobine.” 30 E min jalawobine uwacu kumae: “Calu andha Yehova ubedo kwo man in giri* de ibedo kwo, abiweki ngo.” Pieno Elica uai man gicidho karacelo kude. 31 Gehazi ular utelo yo i wang’gi man ewok eketho uluth i terwang’ jalawobine, ento dwal moko mbe m’uwinjere kadi kume de eyiko ngo. Egam eloko ecidh erombo kud Elica man ewacu ire kumae: “Jalawobine uai ungo.”

32 Kinde ma Elica umondo i ot, ewok enwang’u jalawobine uvuto iwi pem pare m’etho. 33 Egam emondo i kusika man eciko dhugola i bang’gi gin ario, e ecaku rwo i bang’ Yehova. 34 I ng’eye, eidho iwi pem man eriebere iwi nyathinne; eketho dhoge i dhu jalawobine, wang’e i wang’ jalawobine, man cinge i cing’ jalawobine; eriebere asu i wiye, e kum nyathinne ucaku doko mor. 35 Elica ucaku wotho kun ku kun i ot, i ng’eye eidho iwi kavuto man eriebere kendo iwi nyathinne. E jalawobine ugiro wang’ abiro, i ng’eye egam eyabu wang’e. 36 E Elica ulwong’o Gehazi man eyero kumae: “Lwong’ Nyacunem.” Pieno elwong’e man emondo i bang’e. E Elica uwacu ire kumae: “Gam wodi.” 37 Egam emondo epodho i the tiend Elica man erum piny i ng’om i wang’e, i ng’eye, eting’o wode man ecidho.

38 Saa ma Elica udok i Gilgal, nwang’u ndru upodho i ng’ombuca. Kinde ma wot jubila gibedo i wang’e, eyero ni jatic pare kumae: “Keth agulu ma dit i mac man ted cam ni wot jubila.” 39 E ng’atu acel m’i kind wot jubila ucidho i lum pi ning’wedo dek; ewok enwang’u ulok mi lum man epono upoko kud i kume pong’ i bongu pare. I ng’eye, eloko edok, ethumo igi man eketho i agulu dek, m’eng’eyo de ngo nia eca tie ang’o. 40 I ng’eye gikethe i wang’ dhanu kara gicame, ento saa ma gibile ci, gikok kumae: “E dhanu pa Mungu mandha, tho n’i agulu.” Man gicame ngo. 41 E Elica uwacu kumae: “Wukekel mogo moko.” Egam ekonjo mogone i agulu, i ng’eye eyero kumae: “Kethe i wang’ dhanu.” Pieno gin moko ma romo timojo rac ubino mbe i agulune.

42 Ng’atu moko ubino niai kud i Baal-calica; ekelo mukathi pier ario mi nganu ma juyuke ni dhanu pa Mungu mandha. Juyiko mukathine ku nying cam ma jukayu ma kwong’a, ebino bende kud usau acel mi nying cam ma nyen. E Elica uyero kumae: “Miigi ni dhanu kara gicam.” 43 Ento jatic pa Elica uwacu kumae: “Acopo ketho piny maeni nenedi i wang’ dhanu dak aceli?” Edwoko ire kumae: “Miye ni dhanu gicam, kum Yehova uwacu kumae: ‘Gibicamu man donge moko de bidong’.’” 44 E ekethe i wang’gi man gicamu, donge moko de dong’ calu ma Yehova uyero.

5 Nwang’u Naaman ma jadit mir udul askari p’ubimo mi Siria ubino ng’atu ma dit man pire ubino tek i rwoth pare, pilembe nikadhu kud i bang’e Yehova umiyo aloci* ni Siria. Ebino jaramony ma jarukara, ento ebino won dhobu.* 2 Nindo moko kinde ma Jusiria gicidho niyaku piny, giwok gimaku nyathi nyaku moko ni ng’eca kud i ng’om mir Israel, e edoko jatic pa dhaku pa Naaman. 3 Ewacu ni dhaku maeno ma min pacu kumae: “Ka nwang’u ndhu rwoth para ucidho i bang’ jabila i Samaria! Nwang’u ekeyo dhobu pare.” 4 E ecidho* i bang’ rwoth pare man ekoro ire lembe ma nyaku m’uai i Israel uyero.

5 I ng’eye, ubimo mi Siria uwacu kumae: “Cidhi kawoni! Abioro barua moko ni ubimo mir Israel.” Pieno ecidho, eting’o mola ma tar talanto* apar, mola ma kwar ma pekne cekel* elufu abusiel (6 000), man bongu apar ma juwilo ko wagi. 6 Etero baruane i bang’ ubimo mir Israel, baruane uwacu kumae: “Aoro jatic para Naaman karacelo ku barua maeni i beng’i kara ikey dhobu pare.” 7 Kinde m’ubimo mir Israel usomo baruane, eyeco bongu pare man ewacu kumae: “Atie Mungu ma copo nego man weko bedo kwo? Eoro ng’atu maeni i bang’a man ewacu nia akey dhobu pare! Wun giwu wunen nia ebesayu ali i bang’a.”

8 Ento kinde m’Elica ma dhanu pa Mungu mandha uwinjo nia ubimo mir Israel uyeco bongu pare, e wang’ acel eoro kwenda i bang’ ubimo kumae: “Pirang’o iyeco bongu peri? Akweyi, wek ebin i bang’a kara eng’ey nia jabila moko nuti i Israel.” 9 E Naaman ubino ku riuni* pare man ku magali pare mi lwiny, man ewok ecungo i kamondo mi ot pa Elica. 10 Ento Elica uoro jakwenda moko ucidh uyer ire kumae: “Cidh ijom wang’ abiro i Yordan, e ring’ kumi bidok kakare, man ibidoko leng’.” 11 E ng’eicwiny ugam umaku Naaman man ecoko woth m’ebeyero kumae: “Aparu yor i iya nia, ‘ebiwok i bang’a man ebicungo i wang’a, ebilwong’o nying’ Yehova Mungu pare ma nwang’u ebeleko cinge iwi dhobune pi nikeye.’ 12 Nyo Abana man Farpar ma gi kulo mi Dameski, gi ber ungo ma sagu kulo ceke mir Israeli? Acopo jom ungo i igi man adoko leng’i?” E eloko man ecidho ku kwinyo.

13 Jutic pare gicoro i bang’e man giwacu ire kumae: “Wegwa, ka nwang’u jabila ukwayu nia itim lembe moko ma tek, nyo nwang’u itimo ngo? Ka dong’ kawoni m’eyero iri kende kende nia, ‘jom man idok leng’,’ nyo icopo timo ngo?” 14 E eloro piny man emondo i* Yordan wang’ abiro calu ma dhanu pa Mungu mandha uyero. E ring’ kume udok kakare calu pa nyathi jalawobi, man edoko leng’.

15 I ng’eye, edok i bang’ dhanu pa Mungu mandha, en karacelo ku dhanu ceke m’ewotho kugi* man ewok ecungo i wang’e, ewacu kumae: “Kawoni dong’ ang’eyo nia Mungu mange mbe kaka moko ci i ng’om zoo m’uweko i Israel kende. Dong’ akweyi, jol giramiya* ma e kud i cing’ jatic peri.” 16 Ento Elica uwacu kumae: “Calu andha Yehova m’abetimo ire* ubedo kwo, abiyiyo ngo giramiya peri.” Erere nia eyii, ento ekwero magwei. 17 Tokcenne Naaman uwacu kumae: “Dong’ akweyi, wek jujob ira ng’om m’i ng’ombuni kadhiri ma kana* ario copo yeyo, kum an a jatic peri abithiero ngo kendo lam m’awang’a kadi lam ni mungu mange m’uweko ni Yehova. 18 Ento Yehova uwek ira a jatic peri lembe acel ma e: Kinde ma rwoth para ucidho i ot* pa Rimon pi nirum kuca, ebed ejengere i kum cinga, pieno bekwayu arum i ot pa Rimon. Dong’ akweyi, Yehova uwek ira lembe maeno an a jatic peri kinde m’aberum i ot pa Rimon.” 19 E Elica uwacu ire kumae: “Cidh ma cwinyi kwiyo.” E eweke. I ng’ey ma fodi ecidho bor akeca ngo, 20 Gehazi ma jatic pa Elica ma dhanu pa Mungu mandha uwacu yor i iye kumae: ‘Rwoth para uweko Naaman ma Jasiria ucidho m’egamu de ngo gin m’ekelo. Calu andha Yehova ubedo kwo, abiringo i toke man abigamu piny moko kud i bang’e.’ 21 Pieno Gehazi uriemo tok Naaman. Kinde ma Naaman uneno ng’atu moko ubering’ini i toke, elor ku wi magali pare pi nirombo kude man epenje kumae: “Nyo lembe ceke tie ma beri?” 22 E Gehazi udwoko kumae: “Lembe ceke tie ma ber. Jadit para uora ewacu kumae: ‘Nen! awobi moko ario ma gitie i kind wot jubila gitundo i bang’a kawoni eni niai kud i ng’om gudi pa Efraim. Akweyi, mii igi talanto acel mi mola ma tar man bongu ario ma juwilo ko wagi.’” 23 Naaman uwacu kumae: “Kumeno, gam talanto ario.” E erere man eboyo talanto ario mi mola ma tar i usau ario ku bongu ma juwilo ko wagi ario, man emiyogi i bang’ jutic pare ario ma giyeye, gitelo ko yo i wang’ Gehazi.

24 Kinde m’etundo i Ofel,* egamugi kud i cing’gi man ekethogi i ot, e elokogi gidok. I ng’ey ma gicidho, 25 emondo man ecungo i vut jadit pare. Elica ugam upenje kumae: “Gehazi, iai kani?” Ento edwoko kumae: “Jatic peri aai ungo kaka moko.” 26 Elica uwacu ire kumae: “Nyo adundena ubino ngo karacelo kudi kuca kinde ma ng’atuca ulor ku wi magali pare pi nirombo kudi? Nyo eni tie saa mi yiyo mola ma tar kunoke mi yiyo bongu, kadi podho mir oliv kadi podho mir ulok, kadi rombe kadi dhieng’, kadi jutic ma co kunoke jutic ma moni? 27 Kawoni dhobu pa Naaman bimoko i kumi man i kum nyikweyi pi nja.” E ndhu ndhu ewok kud i wang’ Elica ma dhobu umake ekwor ma tar calu pei.

6 Nindo moko wot jubila giwacu ni Elica kumae: “Nen! kaka ma wabebedo i iye wakudwu tie diny dit iwa. 2 Wakweyi, wek wacidh i Yordan. E ng’atuman m’i kindwa bitong’o yen kuca man wabigiero kabedo kuca ma kara wakwo i iye.” E Elica udwoko kumae: “Wucidhi.” 3 Ng’atu acel m’i kindgi uwacu kumae: “Nyo in de iromo cidho karacelo ku jutic peri?” E edwoko kumae: “Abicidho.” 4 Pieno ecidho karacelo kugi, e gitundo i Yordan man gicaku tong’o yen. 5 Saa ma ng’atu acel m’i kindgi ubetong’o yen, ley pare uvuth kud i kum ragop man epodho i pii, e ekok kumae: “Akayo rwoth para, ley maeni akwayu akwaya ba!” 6 Dhanu pa Mungu mandha upenje kumae: “Epodho kakani?” E enyutho ire kaka m’epodho i iye. Elica ugam utong’o dund yen moko man ebole keca, eketho leyne uwok iwi pii. 7 Eyero ire kumae: “Ting’e.” Pieno erieyo cinge man eting’e.

8 Nwang’u ubimo mi Siria ucidho nikiedo lwiny i dhu Israel. Eporo lembe karacelo ku jutic pare man ewacu igi kumae: “Abiketho kagonjo para kaka ma kumae man kaka ma kumae karacelo kudwu.” 9 I ng’eye, dhanu pa Mungu mandha uoro kwenda i bang’ ubimo mir Israel man ewacu kumae: “Bed ku weng’i, kud ikadh kud i kabedo ma kumae, kum Jusiria gibebino tap ku keca.” 10 Pieno ubimo mir Israel uoro kwenda i kabedo ma dhanu pa Mungu mandha upoye pire. Elica umedere nipoye, man etundo ngo kakeca wang’ dupa.*

11 Lembe maeni unyayu kwinyo i ubimo* mi Siria, pieno ecoko jutic pare man ewacu igi kumae: “Wuyer ira! Ng’a m’i kindwa ma n’i thenge p’ubimo mir Israeli?” 12 I ng’eye, ng’atu acel m’i kind jutic pare uyero kumae: “Rwoth para ubimo, tie ngo ng’atu moko acel de m’i kindwa! Tie Elica ma jabila i Israel re m’ubekoro ni ubimo mir Israel lembe m’ibeyero i kusika peri.” 13 E eyero kumae: “Wucidh wusay kakare, kara aor dhanu ucidh umake.” I ng’eye, judwoko ni ubimo kumae: “En’i Dothan.” 14 E ndhu ndhu eoro riuni* ku magali mi lwiny kuca karacelo kud udul askari ma dit; gitundo diewor man gitieko adhura.

15 Kinde ma jatic* pa dhanu pa Mungu mandha uai kugweno con man ewok woko, eneno udul askari karacelo ku riuni* man magali mi lwiny utieko adhura gbur. E wang’ acel jaticne ukok ni Elica kumae: “Akayo rwoth para! Wabitimara nenedi?” 16 Ento Elica uyero ire kumae: “Lworo kud unegi! Kum ju ma ni kudwa gi dupa ma sagu ju ma ni kugi.” 17 E Elica ucaku rwo man ewacu kumae: “E Yehova, akweyi, yab wang’e kara enen.” E ndhu ndhu Yehova uyabu wang’ jaticne man eneno, man nen! ng’om gudi maeca ceke upong’ ku riuni* man magali mi lwiny mi mac m’utieko Elica tingili.

18 Saa ma Jusiria gibeloro i bang’ Elica, erwo i bang’ Yehova man ewacu kumae: “Akweyi, goy dhanu maeni ku corwang’.” E egoyogi ku corwang’, tap calu ma Elica ukwayu. 19 Elica ulund uyero igi kumae: “Maeni tie yone ngo, man eni tie adhurane ngo. Wulub toka, man abiterowu i bang’ ng’atu ma wubesayu.” Ento eterogi i Samaria.

20 Saa ma gitundo i Samaria, Elica uwacu kumae: “E Yehova, yab wang’gi kara ginen.” E Yehova uyabu wang’gi, man gineno nia gin’i die Samaria. 21 Kinde m’ubimo mir Israel unenogi, eyero ni Elica kumae: “Vwa, nyo ubekwayu ngo aneggi, nyo ubekwayu ngo aneggi nia?” 22 Ento eyero kumae: “Ubekwayu ngo ineggi. Dhanu m’imaku ni ng’eca ku palamularu peri man athero peri ilund inegogi anega? Mii igi mukathi ku pii kara gicam man gimadhi, e iwekgi gidok i bang’ rwoth migi.” 23 Pieno, eyiko foc ma dit igi. E gicamu man gimadhu, i ng’eye ke eweko gidok i bang’ rwoth migi. Niai cing’ nica, udul weg ayeki mi Jusiria gibino ngo kendo i ng’om mir Israel.

24 I ng’eye, Ben-hadad m’ubimo mi Siria ucoko dhu askari* pare ceke karacelo man eidho malu pi nicitieko Samaria. 25 Pieno ndru ma dit upodho i Samaria, man gitieko adhurane nitundo ma wi kana acel udoko tongolo mi mola ma tar pier abora, man ceth akuru mukero acel wi ang’wen mi kab* acel udoko tongolo mi mola ma tar abic. 26 Saa m’ubimo mir Israel ubino kadhu iwi gang’kidi, dhaku moko uwagere i bang’e kumae: “E rwoth para ubimo, konywa!” 27 E ubimo udwoko kumae: “Tek Yehova ukonyi ngo, an ke aromo nwang’u iri kony kani? Nyo i lela mi fwodo cam? Kadi ke i vur mi biyo pigulok kunoke i vur mi biyo mo?” 28 Ubimo upenje kumae: “Lembang’o ma rac kudi?” Edwoko kumae: “Dhaku e uwacu ira nia, ‘mii wodi wacam tin, woda ke wabicamu urwo.’ 29 E watedo woda man wacame. Urwonde ayero ire nia, ‘emii wode wacam.’ Ento ekanu wode.”

30 Kinde m’ubimo uwinjo wec pa dhakune ci, eyeco bongu pare. Saa m’ebekadhu kud iwi gang’kidi, dhanu ginene ekendo kendi mi saki i bongu pare. 31 E ubimo uwacu kumae: “Dong’ Mungu umii ira matira man emede lee tek wi Elica ma wod Cafath udong’ asu i kume tin!”

32 Nwang’u Elica ubedo i ot pare, man judongo gibedo karacelo kude. Ubimo uoro ng’atu moko utelo yo i wang’e, ento ma fodi jakwendane utundo ngo, Elica uyero ni judongo kumae: “Wuneno de nia wod janek maeni uoro ng’atu moko kara ubin ukab wiya ceni? Ka wuneno jakwenda maeno utundo, wucik dhugola man wutiel dhugolane kara kud emondi. Nyo ba tiend rwoth pare ubewinjere ngo i ng’eye?” 33 Kinde ma fodi Elica ubeweco, jakwenda maeno utundo i bang’e, e ubimo uwacu kumae: “Masendi maeni uai i bang’ Yehova. Dong’ pirang’o akur kony pa Yehova asu?”

7 Elica ugam uyero kumae: “Wuwinj lembe pa Yehova. Yehova uwacu kumae: ‘Urwo unyoni i dhugang’* mi Samaria, sea* acel mi mogo ma yom jubilworo cekel* acel, man sea ario mi nganu ma juyuke de jubilworo cekel acel.’” 2 E jego p’ubimo m’egeno uyero ni dhanu pa Mungu mandha kumae: “Kadok nwang’u Yehova uyabu dhu polo man eketho nying cam ucwii, nyo andha lembe maeno romo timere?” Elica udwoko kumae: “Ibinene ku weng’i, ento ibicame ngo.”

3 Nwang’u weg dhobu moko ang’wen gibedo i kamondo mi dhugang’ mir adhura, e giyero i kindgi kumae: “Pirang’o wabed keni nitundo ma watho ko? 4 Ka wayero nia, ‘wamond i adhura,’ ku ndru ma n’i iye e, wabiwok tho kuca. Ka wabedo kakeni de asu wabitho. Dong’ wacidhu i kagonjo mi Jusiria. Tek giwekowa kwo, wabibedo kwo; ento tek ginegowa, e wabitho.” 5 Gigam giai i dhu uthieno kinde ma piny ubegamere man gimondo i kagonjo mi Jusiria. Saa ma gitundo i dhu kagonjo mi Jusiria, ginwang’u dhanu mbe keca.

6 Kum Yehova uketho dhanu ma n’i kagonjo mi Jusiria giwinjo dwand magali mi lwiny man dwand riuni,* ebino dwal mir udul askari ma lee dit. Pieno giyero i kindgi kumae: “Nen! ubimo mir Israel uculo jubim mi Juhithi ku jubim mi Misiri kara gibin gikied i dhogwa!” 7 E ndhu ndhu giai malu man giringo ku dhu uthieno nica. Giweko hema migi, riuni* migi, kana migi, ku kagonjone ceke calu m’ebino ko; giringo pi nibodho kwo* migi.

8 Kinde ma weg dhobune gitundo i dhu kagonjo, gimondo i hema acel gicaku camu man gimadhu. Gicoko mola ma tar, mola ma kwar, man bongu kud i hemane gicidh gikanu. I ng’eye giloko kendo gimondo i hema mange man gicoko piny ku keca de gicidh gikanu.

9 Tokcenne giwacu i kindgi kumae: “Lembe ma wabetimo e tie ber ungo. Tin tie nindo mi lembanyong’a! Ka wabedo ling’ man wakuro nitundo kugweno, ukwayu jumii iwa matira. Dong’ wacidh wadwoku lembuni i kal* p’ubimo.” 10 E gicidh gilwong’o jukur dhugang’ mir adhura man gikoro igi kumae: “Wacidho i kagonjo mi Jusiria, ento wanwang’u dhanu mbe kuca, wawinjo ngo kadok dwand ng’atu acel de. Ndhu riuni ku kana re ma jutwiyo man hema udong’ gigi.” 11 E wang’ acel jukur dhugang’ gikok pi ninyutho lembe maeno ni dhanu m’i kal* p’ubimo.

12 Ubimo ugam uai ndhu ndhu ku diewor man eyero ni jutic pare kumae: “Wuwek akekor iwu lembe ma Jusiria gibemito timo i kumwa. Ging’eyo nia kec ubenegowa, e giweko kagonjo migi gicidh gipondo i lum ma gibeyero kumae: ‘Gibiwok kud i adhura man wabimakugi ma kwo, e wabimondo i adhurane.’” 13 I ng’eye, ng’atu acel m’i kind jutic pare uwacu kumae: “Wakweyi, wek jumaco moko giting’ riuni* abic kud i kind m’udong’ i adhura. Kum kadok nwang’u gicidho kunoke gidong’ karacelo kudwa* de, asu gibitho, gin de gibitho calu ma Juisrael mange ceke de gidaru tho. Edong’ nyanok wan ceke de wabitho. Dong’ wek waorgi gicidh ginen lembe m’utimere.” 14 E giting’o magali ario ku riuni,* man ubimo uorogi i kagonjo mi Jusiria, eyero kumae: “Wukecidh wunen.” 15 Dhanune gigam gilubo tok Jusiria nitundo i Yordan; ginwang’u gengi zoo upong’ ku bongu man ajeni ma Jusiria giwotho bayu kinde ma giberingo ku ndiri. E jukwendane giloko man gidwoko lembene ni ubimo.

16 I ng’eye, dhanu giwok gicidh giyaku piny i kagonjo mi Jusiria; pieno mogo ma yom sea acel julworo cekel acel, man nganu ma juyuke sea ario de julworo cekel acel, calu ma Yehova ular uyero. 17 Ubimo ugam uketho jego m’egeno ukur dhugang’, ento dhanu ginyono iye i dhugang’ keca man etho, tap calu ma dhanu pa Mungu mandha ular uyero ni ubimo kinde m’eloro i bang’e. 18 Lembene utimere tap calu ma dhanu pa Mungu mandha ular uyero ni ubimo kumae: “Urwo unyoni i dhugang’ mi Samaria, sea ario mi nganu ma juyuke jubilworo cekel acel, man sea acel mi mogo ma yom de jubilworo cekel acel.” 19 Ento jego uyero ni dhanu pa Mungu mandha kumae: “Kadok nwang’u Yehova uyabu dhu polo man eketho nying cam ucwii, nyo andha lembe maeno romo timere?” Elica udwoko kumae: “Ibinene ku weng’i, ento ibicame ngo.” 20 Lembene utimere i kume tap kumeca; kum dhanu ginyone i dhugang’ man etho.

8 Elica ugam uyero ni dhaku m’ecero wode* kumae: “Ai, in ku juruot peri man cidh ikwo calu umondo kaka moko ci m’icopo, pilembe Yehova uyero nia ndru ubebino podho i ng’ombuni man ebitimo oro abiro.” 2 E dhakune uai malu man etimo calu ma dhanu pa Mungu mandha uyero. Eai ku juruot pare man gicidh gibedo i ng’om mi Jufilisti pi oro abiro.

3 I ajiki mi oro abiro, dhakune uloko kud i ng’om mi Jufilisti man ecidh edoto pi ot pare man pi podho pare ni ubimo. 4 Nwang’u ubimo ubeweco ku Gehazi ma jatic pa dhanu pa Mungu mandha, eyero kumae: “Akweyi, kor ira lembe ceke ma dongo ma Elica utimo.” 5 Tap i saa m’ebekoro ni ubimo kite ma Elica ugam ucero ko ng’atu m’utho, dhaku m’egam ecero wodene utundo i bang’ ubimo; ekelo adote pi ot pare man pi podho pare. E wang’ acel Gehazi uyero kumae: “Rwoth para ubimo, dhakune ni eni man wode m’Elica ugam ucero de ni eni.” 6 E ubimo upenjo dhakune, man ekoro ire kite ma lembene ukadhu ko. I ng’eye ubimo uketho jadit moko mi kal ukonye, ewacu ire kumae: “Dwok piny pa dhaku maeni ceke man cul ire sente ma nwang’u ecopo nwang’u ku piny m’ucek i podho pare niai i nindo m’eai kud i ng’ombuni nitundo kawoni.”

7 Elica ucidho i Dameski kinde ma Ben-hadad m’ubimo mi Siria ubino twoyo. E jucidh junyutho lembene ire kumae: “Dhanu pa Mungu mandha ubino keni.” 8 E ubimo uyero ni Hazael kumae: “Ting’ giramiya man cidh iromb ku dhanu pa Mungu mandha. Penj Yehova nikadhu kud i bang’e kumae: ‘Nyo twoyo para e bikeyi?’” 9 Hazael ucidh urombo kud Elica man etero ire giramiya; giramiyane ubino piny ceke ma beco mi Dameski ma ngamia pier ang’wen re m’uyeyo. Ebino man ewok ecungo i wang’ Elica, ewacu kumae: “Wodi ma Ben-hadad m’ubimo mi Siria uora abin apenji nia nyo twoyo pare bikey.” 10 Elica udwoko ire kumae: “Cidh iyer ire kumae: ‘Ibikey andha.’ Ento Yehova unyutho ira nia ebitho andha.” 11 Man Elica unene tel nitundo ma lewic umake. I ng’eye dhanu pa Mungu mandha ucaku wak. 12 Hazael upenjo kumae: “Rwoth para, pirang’o ibewaki?” Elica udwoko kumae: “Pilembe ang’eyo can m’ibinyayu i kum dhanu mir Israel. Ibiwang’u kabedo migi ma tek ku mac, ibinego juaskari migi ku palamularu, ibing’enyo i awiya migi nziki nziki, man ibikaku i mon migi ma igi nuti dra.” 13 Hazael uwacu kumae: “An a jatic peri m’atie gin moko de ngo* e acopo timo lembe ma kumeno nenedi?” Ento Elica uwacu kumae: “Yehova unyutho ira nia ibidoko ubimo iwi Siria.”

14 I ng’eye eweko Elica man edok i bang’ rwoth pare, rwoth parene uwok upenje kumae: “Elica uwacu iri ang’o?” Edwoko ire kumae: “Eyero nia ibikey andha.” 15 Ento urwonde Hazael uting’o jam um, eroye i pii man eume kii* i wang’e nitundo etho. E Hazael udoko ubimo kakare.

16 I oro mir abije mi camuker pa Yehoram ma wod Ahab m’ubimo mir Israel, kinde ma Yehocafath ubino ubimo mi Yuda, Yehoram ma wod Ubimo Yehocafath mi Yuda udoko ubimo. 17 Yehoram ubino ku oro pier adek wi ario kinde m’edoko ubimo, man ecamu ker pi oro abora i Yeruzalem. 18 Ewotho i yo mi jubim mir Israel calu ma ot p’Ahab utimo, pilembe egamu nyaku p’Ahab ni dhaku ire; man emedere nitimo lembe ma rac i wang’ Yehova. 19 Ento Yehova ugam umito ngo enyoth Yuda pi Daudi ma jatic pare, kum egam eng’olo nia ebimiyo thala ire man ni wote pi nindo ceke.

20 I rundi pa Yehoram, dhanu mir Edom gijai ni Yuda man giketho ubimo migi i wigi gigi. 21 Pieno Yehoram uai ku magali pare ceke man ekadhu loka i Zair. Eai ku diewor man eloyo dhanu mir Edom ma nwang’u gitieke man gitieko judongo mi magali pare; e dhanune giringo i hema migi. 22 Ento dhanu mir Edom gimediri asu nijai i kum Yuda nitundo tin eni. I saa maeno, dhanu mi Libna de ujai.

23 Dong kpawa mi kwo pa Yehoram man lembe ceke m’etimo, jukiewogi i buku mi kpawa mi jubim mi Yuda. 24 I ng’eye, Yehoram uvuto pi niyom ku kwaru pare, man jukunye karacelo ku kwaru pare i Adhura pa Daudi. E wode ma Ahazia udoko ubimo kakare.

25 I oro mir apar arionde mi camuker pa Yehoram ma wod Ahab m’ubimo mir Israel, Ahazia ma wod Ubimo Yehoram mi Yuda udoko ubimo. 26 Ahazia ubino ku oro pier ario wi ario kinde m’edoko ubimo man ecamu ker pi oro acel i Yeruzalem. Nying’ min ubino Athalia ma nyakwar* Ubimo Omri mir Israel. 27 Ewotho i yo ma ot p’Ahab uwotho i iye man emedere nitimo lembe ma rac i wang’ Yehova calu ma ot p’Ahab utimo, pilembe ebino wat mi ot p’Ahab nikadhu kud i gamiri. 28 Pieno ecidho karacelo ku Yehoram ma wod Ahab pi nikiedo lwiny i dhu ubimo Hazael mi Siria i Ramoth-gilead, ento Jusiria ginyayu ret i kum Yehoram. 29 E Ubimo Yehoram uloko udok i Yezreel pi nicithiedho rem ma Jusiria ginyayu i kume i Rama kinde m’ecidho nikiedo i dhu Ubimo Hazael mi Siria. Ahazia ma wod Yehoram m’ubimo mi Yuda ucidho i Yezreel pi nineno Yehoram ma wod Ahab, pilembe jugam junyayu ret* i kume.

9 Jabila Elica ulwong’o ng’atu acel m’i kind wot jubila man eyero ire kumae: “Twii bongu peri i pieri man gam cupa ma e mi mo nyapio pio, cidh i Ramoth-gilead. 2 Kinde m’itundo kuca, wok iyeny ka Yehu ma wod Yehocafath ma wod Nimci; wok imond i ot man iting’e kud i kind umego pare, e wumond kude i kusika ma yor i iye. 3 I ng’eye, ting’ cupa mi mo man ikonj moje i wiye man iyer kumae: ‘Yehova uwacu kumae: “Awiri ni ubimo iwi Israel.”’ I ng’eye yab dhugola man iringi m’umbe galu.”

4 E jatic pa jabila ugam ucoko woth pi nicidho i Ramoth-gilead. 5 Kinde m’etundo, nwang’u judongo mir udul askari gibedo keca. E eyero kumae: “Atie ku lemkwenda moko iri, E jadit.” Yehu upenjo kumae: “Ni ng’a m’i kindwa e?” Edwoko kumae: “Iri, E jadit.” 6 Pieno Yehu uai malu man emondo i ot; jatic maeno ukonjo mo i wi Yehu man eyero ire kumae: “Yehova Mungu mir Israel uwacu kumae: ‘Awiri nibedo ubimo iwi dhanu pa Yehova ma Israel. 7 Ibinego juruot p’Ahab ma rwoth peri ceke, man abiculo kwor pi rimb jutic para ma jubila man pi rimb jutic pa Yehova ceke ma Yezabel unego. 8 E juruot p’Ahab ceke gibinyothiri; man abidaru jumaco* ceke m’i ot p’Ahab, uketho i iye dhanu ma jukony migi mbe man ma ng’ic mir Israel. 9 Man abiketho ot p’Ahab bidoko calu ot pa Yeroboam ma wod Nebat man calu ot pa Baca ma wod Ahiya. 10 Yezabel ke gwogi bicame i theng podho mi Yezreel, man ng’atu moko mbe ma bikunye.’” E egam eyabu dhugola man eringo.

11 Saa ma Yehu udok i bang’ judongo mange mir udul askari p’ubimo, gipenje kumae: “Nyo lembe ceke tie ma beri? Pirang’o abelu maeni ubino i beng’i?” Edwoko igi kumae: “Wung’eyo ng’atuno man kit wec pare de.” 12 Ento giyero kumae: “Eno vupo! Wakweyi, kekor iwa.” E Yehu ukoro igi lembe ma ng’atune uyero, emedo nia ng’atune uyero bende kumae: “Yehova uwacu kumae: ‘Awiri ni ubimo iwi Israel.’” 13 E ng’atuman m’i kindgi uting’o bongu pare pio pio man upedho iwi mangasi kara ewoth i wiye; e gikudho agwara man giwacu kumae: “Yehu udoko ubimo!” 14 I ng’eye, Yehu ma wod Yehocafath ma wod Nimci ucamu gamba i kum Yehoram.

Nwang’u Yehoram ku juaskari mir Israel ceke gin’i Ramoth-gilead ma gibecero bang’ Israel kinde ma Hazael m’Ubimo mi Siria ubin utugo lwiny i dhoggi. 15 I ng’eye, ubimo Yehoram udok i Yezreel pi nithiedho rem ma Jusiria ginyayu i kume saa m’ebino kiedo kud Ubimo Hazael mi Siria.

Yehu ugam uyero kumae: “Tek wuyiyo* dhu lembe para, kud wuwek ng’atu moko uvuth kud i adhura keni pi nicidwoko lembe maeni i Yezreel.” 16 E Yehu uidho iwi magali pare man ecidho i Yezreel, kum nwang’u Yehoram uvuto kuca ma rem n’i kume, man Ahazia m’Ubimo mi Yuda ucidho pi nicineno Yehoram. 17 Saa ma jakur m’ucungo iwi ot ma wiw i Yezreel uneno udul dhanu pa Yehu ubebino, e wang’ acel eyero kumae: “Abeneno udul dhanu.” Yehoram uyero kumae: “Ting’ askari acel ma ringo ku riuni* man iore nicirombo kugi, man epenjgi kumae: ‘Nyo wubebino ku kwiyocwinyi?’” 18 E askari acel ma ringo ku riuni* ucidho pi nirombo kude man ewacu kumae: “Ubimo uyero kumae: ‘Nyo wubebino ku kwiyocwinyi?’” Ento Yehu udwoko kumae: “In lembe peri tie ang’o ku ‘kwiyocwinyi’? Kadh i ng’eya kwe!”

E jakur ugam udwoko kumae: “Jakwendane utundo i bang’gi, ento eloko ngo.” 19 E eoro askari ma ringo ku riuni mange, man kinde m’etundo i bang’gi, eyero kumae: “Ubimo uyero kumae: ‘Nyo wubebino ku kwiyocwinyi?’” Ento Yehu uyero kumae: “In lembe peri tie ang’o ku ‘kwiyocwinyi’? Kadh i ng’eya kwe!”

20 E jakur udwoko kumae: “Jakwendane utundo i bang’gi, ento eloko ngo, man ng’atu m’ubetelo wigi uberingo calu Yehu ma nyakwar* Nimci, kum ebed eringo calu abelu.” 21 Yehoram uyero kumae: “Wutwii magali para!” E jutwiyo magali pare mi lwiny man Yehoram m’Ubimo mir Israel gikud Ahazia m’Ubimo mi Yuda giwok ma ng’atuman uidho iwi magali pare mi lwiny pi nicirombo ku Yehu. Giwok girombo kude i theng podho pa Naboth ma Jayezreel.

22 Saa ma Yehoram uneno Yehu, e ndhu ndhu epenjo kumae: “Yehu, nyo ibebino ku kwiyocwinyi?” Ento edwoko kumae: “Kwiyocwiny ma nenedi ma romo bedo nuti ka fodi asara pa meru ma Yezabel utie man lembajoga pare upong’ asu?” 23 E Yehoram uloko wi magali pare pi niringo, man ewacu ni Ahazia kumae: “Wadaru rombo mwa aromba, Ahazia!” 24 Yehu ugam uting’o athero pare i cinge man ekilo Yehoram i die ng’eye, e nying athero ukadhu plu kud i adundene man erwombere i magali pare mi lwiny. 25 I ng’eye, Yehu uyero ni Bidkar ma jego pare kumae: “Ting’e man ibaye i podho pa Naboth ma Jayezreel. Poy nia wabino ringo karacelo* wakudi i ng’ey Ahab ma won kinde ma Yehova uyero lembe ma e pir Ahab: 26 ‘An a Yehova ayero kumae: “Andha calu m’aneno rimb Naboth man rimb wote nyaworo, abiculo kwor iri de i theng podho maeni,” Yehova wacu.’ Pieno ting’e ibaye i theng podhone calu ma Yehova uwacu.”

27 Saa ma Ahazia m’Ubimo mi Yuda uneno lembe m’ubetimere, eringo kud i gengi m’i ng’et podho ma dit.* (I ng’eye Yehu uriemo toke man ewacu kumae: “Wunege bende!” E ginyayu ret i kume i magali pare kinde m’ebeidho i Gur ma ni ceng’ini ku Ibleam. Ento emedere niringo nitundo i Megido man etho kuca. 28 E jutic pare giyeye i magali gitere i Yeruzalem, man gikunye i kabuli pare karacelo ku kwaru pare i Adhura pa Daudi. 29 Ahazia udoko ubimo mi Yuda i oro mir apar acende mi camuker pa Yehoram ma wod Ahab.)

30 Kinde ma Yehu utundo i Yezreel, Yezabel uwinjo lembene. Pieno ewiro wang’e ku jam ruko wang’ ma col,* eyiko bende yuk wiye ma leng’, man ebino neno lembe m’ubekadhu piny ku wang’ madhirisa. 31 Saa ma Yehu ubemondo i dhugang’, Yezabel uwacu kumae: “Nyo lembe uwotho ma ber ni Zimri m’unego rwoth pare?” 32 Yehu ugam ung’ayu wang’e eneno wang’ madhirisa man ewacu kumae: “Ng’a ma n’i thenge para? Ng’a?” E ndhu ndhu judongo ario kunoke adek mi kal gineno yo piny i bang’e. 33 E Yehu uyero kumae: “Wubole piny!” Pieno gibole piny, man rimbe moko ukirere i kor ot man i kum riuni,* e Yehu ukadhu kud i wiye ku riuni pare. 34 I ng’eye, emondo i ot ecamu man emadhu. E eyero kumae: “Ka copere, wuting’ dhaku maeni ma kwong’ n’i wiye man wuyike, kum e nyar ubimo.” 35 Ento saa ma gicidho pi niyike, ginwang’u kende kende upoko wiye, tiende, man cinge. 36 Kinde ma giloko man gikoro lembene ni Yehu, ewacu kumae: “Eno upong’o lembe ma Yehova uyero nikadhu kud i bang’ jatic pare Eliya ma Jaticbi, m’eyero nia, ‘gwogi bicamu Yezabel i theng podho mi Yezreel. 37 Man avuj Yezabel bidoko calu uweyo i podho m’i theng ng’om mi Yezreel, kara kud juyer kumae: “Eni tie Yezabel.”’”

10 Nwang’u wot Ahab pier abiro gin’i Samaria. Pieno Yehu ukiewo barua man eoro baruanegi i Samaria ni judongo ma wijo mi Yezreel, ni judongo, man ni jukur mir awiya p’Ahab,* eyero kumae: 2 “Wuni karacelo ku wot rwoth mwu, wutie ku magali mi lwiny, riuni, wun’i adhura ma tek, man wutie bende ku jamlwiny; kinde ma barua maeni bitundo i beng’wu, 3 wung’ii ng’atu moko ma ber m’usagu man m’uromo* kud i kind wot rwoth mwu man wukethe iwi komker pa won. E wukied pi ot pa rwoth mwu.”

4 Ento lworo unegogi lee man giyero kumae: “Nen! fodi jubim ario de ucungo ngo i wang’e, ka wan e wacopo cungo i wang’e nenedi?” 5 E janen wi kal,* jatela* mir adhura, judongo, man jukur mir awiya p’Ahab gioro kwenda i bang’ Yehu, giwacu kumae: “Wan wa jutic peri man wabitimo gin ceke m’iyero iwa. Wabiketho ngo ng’atu moko ni ubimo. Tim gin ma ber i weng’i.”

6 Edok ekiewo barua mange igi, eyero kumae: “Tek wun’i thenge para man wutie ayika niwora, urwo unyoni wubin ku wi wot rwoth mwu i bang’a i Yezreel.”

Nwang’u wot ubimo pier abiro gibedo i bang’ dhanu ma pigi tek mir adhura m’ubino tungogi. 7 Kinde ma ginwang’u baruane ci, gigam giting’o wot ubimo man ginegogi, gibino jumaco pier abiro, man giketho wigi i katoko e giorogi i bang’ Yehu i Yezreel. 8 Jakwenda moko ugam umondo i bang’ Yehu man eyero ire kumae: “Jukelo wi wot ubimo.” Edwoko kumae: “Dhurgi ungu ario i kamondo mi dhugang’ mir adhura man gibed keca nitundo kugweno.” 9 Urwonde kugweno ewok woko, ecungo i wang’ dhanu ceke man eyero kumae: “Wun lembe mbe i wiwu.* Eyo, acamu gamba i kum rwoth para man anege, dong’ ju ma e zoo ke ng’a m’unegogi? 10 Pieno wung’ey nia kud i kind lembe pa Yehova ma Yehova uyero pi ot p’Ahab, acel de mbe ma bipong’o ngo;* Yehova utimo tap lembe m’eyero nikadhu kud i bang’ jatic pare Eliya.” 11 Yehu unego bende dhanu ceke m’i ot p’Ahab ma gidong’ i Yezreel, dhanu pare ma pigi tek ceke, jurimbe man julam pare; eweko ngo ire ng’atu acel de ma kwo.

12 I ng’eye, eai man ecoko woth pi nicidho i Samaria. Nwang’u ot* ma jukwac betwiyo rombe i iye ubino i dhu gengine. 13 Yehu uwok urombo kud umego p’Ahazia m’Ubimo mi Yuda kakeca man epenjogi kumae: “Wu jukani?” Gidwoko kumae: “Wan umego p’Ahazia man wabeloro piny pi ning’eyo ka nyo wot ubimo man wot min ubimo* gibedo ma ber.” 14 E ndhu ndhu Yehu uwacu ni dhanu pare kumae: “Wumakgi ma kwo!” Pieno gimakugi ma kwo man ginegogi i dhu pii m’atong’a mi ot ma jutwiyo rombe i iye, gibino jumaco pier ang’wen wi ario. Eweko ngo ng’atu acel de m’i kindgi uboth.

15 Kinde m’eai ku keca ebecidho, ewok erombo ku Yehonadab ma wod Rekab ma nwang’u ubebino rombo kude. Yehu ugam umothe* man epenje kumae: “Nyo adundeni ceke* ni yor i bang’a calu m’adundena ni karacelo kud adundeni?”

Yehonadab udwoko kumae: “Eyo.”

Yehu udok uyero kumae: “Tek kumeno, mii cingi i bang’a kae.”

Pieno emiyo cinge man Yehu upeye eidho i bang’e i magali pare. 16 E eyero kumae: “Bin wacidhi kara inen amora m’atie ko pi Yehova.”* E Yehu uringo kude i magali pare mi lwiny. 17 Egam etundo i Samaria man enego dhanu ceke m’i ot p’Ahab ma gidong’ i Samaria nitundo m’edarugi zoo calku lembe pa Yehova m’elar eyero nikadhu kud i bang’ Eliya.

18 Yehu ucoko bende dhu dhanu ceke karacelo man ewacu igi kumae: “Ahab uworo Baal nyanok, an a Yehu abilund wore dong’ lee nisagu. 19 Pieno wucok jubila pa Baal ceke, dhanu ceke ma gitimo ire thier, ku julam pare zoo i bang’a. Kud wuwek ng’atu acel de udong’, kum abemito thiero lam ma dit ni Baal. Ng’atu ma tek bibino ngo jubinege.” Ento Yehu ubino timo ku rieko kara enyoth ju ma gitimo thier* ni Baal.

20 Yehu umedo kumae: “Wulwong’ coko ma dit pi Baal.” E julwong’o cokone. 21 I ng’eye, Yehu uoro kwenda i Israel ceke, e ju ma gitimo thier* ni Baal zoo gibino. Ng’atu moko acel de mbe m’udong’ m’ubino ngo. Gimondo i ot* pa Baal man gipong’o ot pa Baal thur. 22 Egam eyero ni ng’atu ma neno wi kaka ma jugwoko i iye bongu kumae: “Kel bongu ni dhanu ceke ma gitimo thier* ni Baal.” E ekelo bongu igi. 23 I ng’eye, Yehu giku Yehonadab ma wod Rekab gimondo i ot pa Baal. Yehu ugam uwacu ni ju ma gitimo thier* ni Baal kumae: “Wusay cuu man wuriem ju ma gitimo thier ni Yehova ceke ku keni, ju ma gitimo thier ni Baal kendgi re ma gidong’.” 24 Tokcenne gimondo i ot pi nithiero lam man lam m’awang’a. Nwang’u Yehu uketho dhanu pare moko pier abora gicungo woko man ewacu igi kumae: “Tek ng’atu acel m’i kind dhanu m’abemiyo i cingwu e uvuth uringo, wubiculo kawang’ kwo pare ku kwo mwu.”*

25 Saa ma Yehu udaru nithiero lam m’awang’a ci, e eyero ni jukur* man ni ba jego kumae: “Wumondi man wuneggi! Kud wuwek ng’atu acel de uringi!” E jukur ku jego ginegogi ku palamularu man gibayugi woko, gicidho nitundo i hekalu* ma yor i iye mi ot pa Baal. 26 I ng’eye, giwodho mbegi mi thier* m’i ot pa Baal man giwang’ugi ceke. 27 Gituro mbegi mi thier pa Baal, girwombo bende ot pa Baal man gidwoke ni kabini, e edong’ kumeca nitundo tin.

28 Kumeno re ma Yehu ujigo wi Baal kud i Israel. 29 Ento Yehu ulokere ngo kud i kum dubo ma Yeroboam ma wod Nebat ucwalu Israel nitimo, niwacu elokere ngo kud i kum timo thier ni nyithi dhieng’ mi mola ma kwar m’ubino i Bethel man i Dan. 30 Pieno, Yehova uyero ni Yehu kumae: “Calu m’itimo lembe ma ber man m’atira i wang’a, itimo lembe ceke m’adundena ukeco nitimo i kum ot p’Ahab, woti bibedo iwi komker mir Israel nitundo i kum dhanu m’utuk mir ang’wen.” 31 Ento Yehu utimo ngo kero niwotho i Cik pa Yehova Mungu mir Israel kud adundene ceke. Elokere ngo kud i kum dubo ma Yeroboam ucwalu Israel nitimo.

32 I nindo maeca Yehova ucaku jwigo kum ng’om mir Israel. Hazael ubed utugo lwiny i wigi i kabedo ma dupa mi ng’ombe; 33 niai i Yordan yo nyangu, ng’om mi Gilead ceke, niwacu ng’om mi suru pa Gad, mi suru pa Ruben, man mi suru pa Manase; man niai i Aroer ma nwang’ere i dhu poga mi Arnon nicidho i Gilead man i Bacan.

34 Dong kpawa mi kwo pa Yehu, lembe ceke m’etimo, man tic mi tego m’etimo, jukiewogi i buku mi kpawa mi jubim mir Israel. 35 I ng’eye, Yehu uvuto pi niyom ku kwaru pare man jukunye i Samaria; e wode ma Yehoahaz udoko ubimo kakare. 36 Wend nindo ma Yehu ucamu iye ker iwi Israel i Samaria ubino oro pier ario wi abora.

11 Kinde m’Athalia ma min Ahazia uneno nia wode udaru tho, eai malu man enego dhanu ceke ma copo dok camu ker.* 2 Ento Yehoceba ma nyaku p’Ubimo Yehoram ma nyamin Ahazia uting’o Yehoac ma wod Ahazia man ekwale kud i kind wot ubimo ma nwang’u jubecinego, egwoke karacelo ku japidi pare i kusika mi vuto ma yor i iye. Kumeno re ma jukane ni Athalia, e judong’ junege ngo. 3 Jukane karacelo ku japidi pare i ot pa Yehova pi oro abusiel, man saa maeno Athalia ubino bimo iwi ng’ombe.

4 I oro mir abirone, Yehoyada uoro kwenda i bang’ judongo mi juaskari dak ma gikuro kum ubimo* man ma gikuro kal,* man eketho gibino i bang’e i ot pa Yehova. Etimo lembariba kugi man eketho gikwong’o kwong’ i ot pa Yehova, i ng’eye enyutho igi wod ubimo. 5 Eng’olo igi kumae: “Wubitimo lembe ma e: wubipoko i ungu ma bitimo i ceng’ Sabatu ni adek; ungune acel bikuro ot* p’ubimo cuu mandha, 6 ungu mir arionde bibedo i dhugang’ ma julwong’o Kathere, ungu mir adege bibedo i dhugang’ ma n’i ng’ey jukur mi kal. Wubilewuru alawa pi nigwoko hekalu.* 7 Ungu mwu ario ma nwang’u gimbe ku tic i ceng’ Sabatu de gicikiri nikuro kum hekalu pa Yehova cuu mandha pi nigwoko ubimo. 8 Wucikuru nitieko kum ubimo tingili, ng’atuman ku jamlwiny pare i cinge. Ng’atu moko ci m’ubemito kakere kud i kindwu, wucikuru ninege cen. Wubed karacelo kud ubimo kakare ceke m’ebecidho i iye.”*

9 E judongo mi juaskari dak gitimo tap gin ma Yehoyada ma jalam ung’olo. Pieno, ng’atuman ucoko dhanu pare ma gibino ku tic i ceng’ Sabatu karacelo ku ju ma gibino mbe ku tic i ceng’ Sabatu, e gimondo i bang’ Yehoyada ma jalam. 10 E jalam umiyo tong’ ku ban m’ubino p’Ubimo Daudi ni judongo mi juaskari dak. Nwang’u jukanugi i ot pa Yehova. 11 Man jukur mi kal gicidh girieyo i wang’ hekalu, ng’atuman ku jamlwiny pare i cinge. Girieyo niai i ng’et hekalune ma yor acwic nitundo i ng’ete ma yor acam ceng’ini i kum pemlam man i kum hekalu; gitieko ubimo tingili. 12 I ng’eye, Yehoyada uwodho wod ubimo woko man eketho jamker mi wic ku Lembatuca* i wiye, e gikethe ni ubimo man giwire. Gicaku padu cing’gi man giwacu kumae: “Ubimo kwo nja!”

13 Kinde m’Athalia uwinjo dwand dhanu ma giberingo, e ndhu ndhu ebino i bang’ dhanu ma nwang’u gin’i ot pa Yehova. 14 E eneno ubimo ucungo keca i ng’et mbegi calu ma jubed jutimo i saa ma kumeno. Jutelwic man ju ma kudho agwara gibino karacelo kud ubimo, man anyong’a ubino nego dhanu ceke mi ng’ombe man gibino kudho agwara. Athalia ugam uyeco bongu pare man ekok kumae: “Wucamu gamba! Wucamu gamba!” 15 Ento Yehoyada ma jalam ung’olo ni judongo mi dhanu dak, niwacu ju ma jukethogi iwi udul askari, ewacu igi kumae: “Wuwodhe woko kud i kind udul askari; tekene ng’atu moko ulubo ng’eye, wunege cen ku palamularu!” Kum nwang’u jalam ular uyero kumae: “Ukwayu ngo junege i ot pa Yehova.” 16 Pieno gimake man kinde ma gitundo kude kaka ma juroyo riuni* kud i iye i kal* p’ubimo, gigam ginege kakeca.

17 E Yehoyada utimo lembariba i kind Yehova kud ubimo man dhanu, nia gibimediri nibedo dhanu pa Yehova, etimo bende lembariba i kind ubimo ku dhanu. 18 I ng’eye, dhanu ceke mi ng’ombe gibino i ot* pa Baal man girwombo pemlam pare, ging’enyo i ayi gin m’acwiya pare nziki nziki, man ginego Matan ma jalam pa Baal i wang’ pemlam.

I ng’eye, jalam uketho jutelwic pi nineno wi ot pa Yehova. 19 Bende, Yehoyada uting’o judongo mi dhanu dak, jukur kum ubimo,* jukur kal, man dhanu ceke mi ng’ombe pi nilwoko ubimo niai i ot pa Yehova niloro i kal p’ubimo. Gikwanyu yo mi dhugang’ mi jukur mi kal.* Kinde ma gitundo kuca, Yehoac ubedo iwi komker mi jubim. 20 Pieno anyong’a unego dhanu ceke mi ng’ombe man adhura ukwiyo, pilembe junego Athalia ku palamularu i kal* p’ubimo.

21 Yehoac ubino ku oro abiro kinde m’edoko ubimo.

12 I oro mir abirone mi camuker pa Yehu, Yehoac udoko ubimo man ecamu ker i Yeruzalem pi oro pier ang’wen. Nying’ min ubino Zibia man ebino dhanu mi Ber-ceba. 2 Yehoac umedere nitimo lembe m’atira i wang’ Yehova i nindo ceke ma Yehoyada ma jalam uponje i iye. 3 Ento jukabu ngo kaka ma malu, man dhanu gimediri asu nithiero lam man niketho yiro mi lam uduny i kaka ma malu.

4 Yehoac uyero ni julam kumae: “Wuting’ sente ceke ma jukelo i ot pa Yehova ni giramiya ma leng’, sente ma ng’atuman ukelo calu ajok, sente ma jukelo pi niwaru dhanu calku welpiny ma juketho, man sente ceke m’adunde ng’atuman* ucwale nikelo i ot pa Yehova. 5 Julam gibigamu sentene gin gigi kud i bang’ ju m’ukelogi* man gibitiyo kugi pi niyiko ot, kaka moko ci m’unyothere.”*

6 I oro mi pier ario wi adege mi camuker p’Ubimo Yehoac, nwang’u fodi julam giyiko ngo kum ot m’unyothere. 7 Pieno, Ubimo Yehoac ulwong’o Yehoyada ma jalam ku julam mange man ewacu igi kumae: “Pirang’o wubeyiko ngo kum ot m’unyothere? Ka kumeno dong’ kud wugam sente kud i bang’ ju m’ubemiyogi, ndhu tekene wutiyo kugi pi niyiko kum ot.” 8 E julam giwinjiri nia dong’ gibigamu ngo sente kud i bang’ dhanu, man nia gibineno ngo wi tic mi yiko otne.

9 Yehoyada ma jalam ugamu sondu man etuco vur yor i wiye, e ekethe i ng’et pemlam yor i cing’ mir acwic kinde ma ng’atini ubemondo i ot pa Yehova. Julam ma gibed gikuro ng’et dhugola gibed giketho sente ceke ma jukelo i ot pa Yehova i sondune. 10 Saa ma ka gineno nia sente udoko lee i sondune, jagor p’ubimo man jalam ma dit gibed gibin gicoko dhoge* man gikwanu sente ma jukelo i ot pa Yehova. 11 Kinde ma gikwanu sentene, gibed gimiye i bang’ ju ma juketho unen wi tic m’ubetimere i ot pa Yehova. Gin lundo giculo kude ju m’ubetimo tic mi bau, jurugiedo ma gibetimo tic i ot pa Yehova, 12 man jubodho mi giedo ku jupay kidi. Bende ging’iewo bau, kidi ma jupayu kumgi pi niyiko ot pa Yehova m’unyothere, man gitiyo ku sentene pi lembe mange ceke m’ukwayere pi niyiko ode.

13 Ento jutiyo ngo ku sente moko acel de ma jukelo i ot pa Yehova pi niculo tic mi yiko base mi mola ma tar, jamnego mac, sani, agwara, kunoke kit jamtic moko ci mi mola ma kwar kadi mi mola ma tar pi ot pa Yehova. 14 Gibed gimiyo sentene kende kende i bang’ ju ma gibetimo tic, man gitiyo kude pi niyiko ot pa Yehova. 15 Gibed gitimo ngo kwan iwi dhanu ma gimiyo sente i bang’gi kara gicul ju m’utimo tic, kum gibino dhanu ma jugeno. 16 Ento jubed jukelo ngo sente mi girathiera mi kier, man sente mi girathiera mi dubo i ot pa Yehova; ebino mi julam.

17 I saa maeno re ma Hazael m’ubimo mi Siria ubin ukiedo i dhu adhura mi Gath man emake, i ng’eye eng’iyo nia ecidh emak* Yeruzalem de. 18 Pieno, Yehoac m’Ubimo mi Yuda uting’o giramiya ceke ma leng’ ma kwaru pare, niwacu Yehocafath, Yehoram, man Ahazia ma gi jubim mi Yuda gidwoko leng’, ku giramiya ma leng’ ma pare, ku mola ma kwar ceke m’ubino i kakanpiny mi ot pa Yehova kud i ot* p’ubimo, eorogi ni Hazael m’ubimo mi Siria. E Hazael uweko Yeruzalem.

19 Dong kpawa mi kwo pa Yehoac, lembe ceke m’etimo, jukiewogi i buku mi kpawa mi jubim mi Yuda. 20 Ento jutic pa Yehoac gidikiri man gicamu gamba i kume, e ginege i Beth-milo* i gengi m’uloro i Sila. 21 Yozakar ma wod Cimeath man Yehozabad ma wod Comer ma gi jutic pa Yehoac re ma gigoye man ginege. Jukunye karacelo ku kwaru pare i Adhura pa Daudi, e wode ma Amazia udoko ubimo kakare.

13 I oro mi pier ario wi adege mi camuker pa Yehoac ma wod Ahazia m’ubimo mi Yuda, Yehoahaz ma wod Yehu udoko ubimo iwi Israel i Samaria, man ebimo pi oro apar abiro. 2 Ebed etimo lembe ma rac i wang’ Yehova, man emedere asu nitimo dubo ma Yeroboam ma wod Nebat ucwalu Israel nitimo. Eweko ngo nitimo dubone. 3 E ng’eicwiny pa Yehova ubogere i kum Israel, man emiyogi i cing Ubimo Hazael mi Siria man i cing’ Ben-hadad ma wod Hazael i nindo migi ceke.

4 I ng’ey kare, Yehoahaz ukwayu Yehova, man Yehova uwinje, kum nwang’u eneno masendi m’ubimo mi Siria ukelo iwi Israel. 5 Pieno, Yehova umiyo jalar pi nigonyo Israel kud i the loc mi Siria, e Juisrael gicaku bedo i udi migi calu m’i wang’e.* 6 (Ento giweko ngo dubo m’i ot pa Yeroboam ma Yeroboam ucwalu Juisrael nitimo. Gimediri asu ku dubone,* man mbegi mi thier* de ucungo asu i Samaria.) 7 Udul mony pa Yehoahaz udong’ kende kende juring riuni* pier abic, magali apar, juaskari elufu apar (10 000) ma giwotho ku tiendgi, kum ubimo mi Siria unyothogi, enyonogi calu utur i saa mi fwodo cam.

8 Dong kpawa mi kwo pa Yehoahaz, lembe ceke m’etimo, man tic mi tego m’etimo, jukiewogi i buku mi kpawa mi jubim mir Israel. 9 Yehoahaz ugam uvuto pi niyom ku kwaru pare man jukunye i Samaria, e wode ma Yehoac udoko ubimo kakare.

10 I oro mi pier adek wi abirone mi camuker p’Ubimo Yehoac mi Yuda, Yehoac ma wod Yehoahaz udoko ubimo iwi Israel i Samaria, man ebimo pi oro apar abusiel. 11 Ebed etimo lembe ma rac i wang’ Yehova, man eweko ngo dubo ceke ma Yeroboam ma wod Nebat ucwalu Israel nitimo. Emedere asu ku* dubonegi.

12 Dong kpawa mi kwo pa Yehoac, lembe ceke m’etimo, tic mi tego m’etimo man kite m’ekiedo ko lwiny i dhu Ubimo Amazia mi Yuda, jukiewogi i buku mi kpawa mi jubim mir Israel. 13 Yehoac ugam uvuto pi niyom* karacelo ku kwaru pare, man Yeroboam* ujany iwi komker pare. Jukunyo Yehoac i Samaria karacelo ku jubim mir Israel.

14 Kinde ma twoyo umaku Elica, ma twoyone udok unege, Yehoac m’ubimo mir Israel uloro piny i bang’e man ewage, eyero kumae: “Vwa, vwa! Magali mir Israel ku juring riuni* pare!” 15 I ng’eye, Elica uwacu ire kumae: “Ting’ athero ku nying athero.” E eting’o athero ku nyinge. 16 Elica udok uyero ni ubimo mir Israel kumae: “Yikiri pi nikile.” E eyikere pi nikile, man Elica uketho cinge iwi cing ubimo. 17 I ng’eye ewacu ni ubimo kumae: “Yab madhirisa yo nyangu.” Egam eyabe. Elica udok uyero kumae: “Kil!” E ekilo. I ng’eye Elica uwacu kumae: “Nying athero mir aloci* pa Yehova en e nying athero mir aloci iwi Siria! Ibinego* Jusiria i Afek nitundo m’ibidarugi ceke.”

18 Emedo kumae: “Ting’ nying athero.” E eting’o nying atheronegi. I ng’eye, eyero ni ubimo mir Israel kumae: “Goy ko ng’om.” E egoyo ko ng’om wang’ adek man ejigo. 19 Ng’eicwiny ugam uopo i dhanu pa Mungu mandha i kume, man ewacu kumae: “Nwang’u ukwayu igoy ng’om wang’ abic kunoke wang’ abusiel! E nwang’u inego Jusiria nitundo m’idarugi zoo, ento kawoni dong’ ibigoyo Jusiria wang’ adek kende.”

20 I ng’ey lembe maeno, Elica utho man jukunye. Nwang’u udul weg ayeki mi Moab gibed gibino i ng’ombe i caku pa oro.* 21 Kinde ma dhanu moko gibino kunyo ng’atu moko, gineno udul weg ayeki ubebino, pieno gibolo avujene pio pio i kabuli ma jukunyo Elica i iye, e giringo. Saa ma avuj ng’atune umulo kum cogo Elica, egam ecer man ecungo iwi tiende.

22 Ubimo Hazael mi Siria usendo Israel i nindo ceke mi bimobim pa Yehoahaz. 23 Ento Yehova unyutho bero ku kisa pare igi man edieng’ pigi nikum lembariba pare m’etimo kud Abraham, Isak, man Yakobo. Emito ngo enyothgi, man elalugi ngo cen kud i vute nitundo tin. 24 Saa m’Ubimo Hazael mi Siria utho, wode ma Ben-hadad udoko ubimo kakare. 25 Yehoac ma wod Yehoahaz ugam umayu Ben-hadad ma wod Hazael cen kud adhura m’egam emaku i lwiny i bang’ Yehoahaz ma won. Yehoac uloye wang’ adek man emayu adhura mir Israel.

14 I oro mir arionde mi camuker pa Yehoac ma wod Yehoahaz m’ubimo mir Israel, Amazia ma wod Ubimo Yehoac mi Yuda udoko ubimo. 2 Ebino ku oro pier ario wi abic saa m’edoko ubimo, man ecamu ker pi oro pier ario wi abung’wen i Yeruzalem. Nying’ min ubino Yehoadin mi Yeruzalem. 3 Emedere nitimo lembe m’atira i wang’ Yehova, ento calu Daudi ma kwarumire re ngo. Etimo gin ceke calu ma Yehoac ma won utimo. 4 Ento jukabu ngo kaka ma malu, man dhanu gimediri asu nithiero lam man niketho yiro mi lam uduny i kaka ma malu. 5 Saa m’eketho ker ucungo nging’ nging’ i cinge tap ci, egam enego jutic pare ma ginego won m’ubino ubimo. 6 Ento enego ngo wot junek maeno nimakere ku cik pa Yehova ma jukiewo i buku mi Cik pa Musa kumae: “Kud juneg wego pi lembe m’awiya migi timo man awiya de kud junegi pi lembe ma weggi utimo; ento jubinego ng’atuman ndhu pi dubo pare gire.” 7 Enego Juedom i Poga mi kadu, gibino jumaco elufu apar (10 000); emaku adhura mi Sela i lwiny maeno, man nying adhurane udoko Yokthel nitundo tin.

8 E Amazia uoro jukwenda i bang’ Yehoac ma wod Yehoahaz ma wod Yehu m’ubimo mir Israel, ewacu kumae: “Bin, waromb kudi man wakied lwiny i kindwa.”* 9 Ubimo Yehoac mir Israel ulund uoro kwenda ni Ubimo Amazia mi Yuda kumae: “Lum ma kume ju ukudho mi Lebanon uoro kwenda ni yend tido mi Lebanon kumae: ‘Mii nyeri woda unyom ni dhaku.’ Ento yedi moko mi lum mi Lebanon ukadhu ku keca man enyono lum ma kume ju ukudhone cen. 10 Andha iloyo Edom, uketho kuhaya umondo i ii. Wek anyong’a negi pi dwong’ peri, ento bed i pacu* peri. Pirang’o ibemito wayu can man nyoth i wii man iwi Yuda bende?” 11 Ento Amazia uwinjo ngo.

Pieno Ubimo Yehoac mir Israel uidho man gikiedo lwiny i kindgi gikud Ubimo Amazia mi Yuda i Beth-cemec ma nwang’ere i Yuda. 12 E Israel uloyo Yuda, pieno ng’atuman uringo i pacu* pare. 13 Ubimo Yehoac mir Israel ugam umaku Ubimo Amazia mi Yuda ma wod Yehoac ma wod Ahazia i Beth-cemec. I ng’eye, gitundo i Yeruzalem man Yehoac urwombo gang’kidi mi Yeruzalem niai i kum Dhugang’ mir Efraim nitundo i kum Dhugang’ mi gul, ebino bot dak ang’wen.* 14 Ecoko mola ma kwar ceke ku mola ma tar man piny ceke m’ubino i ot pa Yehova ku m’ubino i kakanpiny mi ot* p’ubimo, ecoko bende ju ma jumaku. I ng’eye, edok i Samaria.

15 Dong kpawa mi kwo pa Yehoac, lembe m’etimo ku tic mi tego m’etimo, man ayi m’ekiedo ko lwiny i dhu Ubimo Amazia mi Yuda, jukiewogi i buku mi kpawa mi jubim mir Israel. 16 I ng’eye, Yehoac uvuto pi niyom karacelo ku kwaru pare man jukunye i Samaria karacelo ku jubim mir Israel; e wode ma Yeroboam* udoko ubimo kakare.

17 Amazia ma wod Yehoac m’ubimo mi Yuda ukwo pi oro apar abic i ng’ey tho pa Yehoac ma wod Yehoahaz m’ubimo mir Israel. 18 Ento dong kpawa mi kwo p’Amazia, jukiewogi i buku mi kpawa mi jubim mi Yuda. 19 I ng’eye, jucamu gamba i kume i Yeruzalem, e egam eringo i Lakic, ento juoro dhanu i toke i Lakic kuca, man giwok ginege. 20 E juyeyo avuje ku riuni,* man jukunye i Yeruzalem karacelo ku kwaru pare i Adhura pa Daudi. 21 I ng’eye, dhanu mi Yuda ceke gigamu Azaria* ma nwang’u ubino ku oro apar abusiel, man gikethe ni ubimo kaka Amazia ma won. 22 Egiero adhura mir Elath kendo man edwoke ni Yuda i ng’ey ma ubimo* uvuto pi niyom* karacelo ku kwaru pare.

23 I oro mir apar abije mi camuker p’Amazia ma wod Yehoac m’ubimo mi Yuda, Yeroboam ma wod Ubimo Yehoac mir Israel udoko ubimo i Samaria, man ebimo pi oro pier ang’wen wi acel. 24 Emedere nitimo lembe ma rac i wang’ Yehova, eweko ngo nitimo dubo ceke ma Yeroboam ma wod Nebat ucwalu Israel nitimo. 25 Etiro wang’ kieu mir Israel niai i Lebo-hamath* nitundo i Nam mir Araba,* nimakere ku lembe pa Yehova Mungu mir Israel m’eyero nikadhu kud i bang’ jatic pare ma Yona ma wod Amitai ma jabila ma thugi ni Gath-hefer. 26 Kum Yehova uneno can ma dit mir Israel. Ng’atu moko acel de mbe m’udong’ pi nikonyo Israel, kadok ng’atu moko ma jakony pare mbe kadi ng’atu ma ng’ic. 27 Ento Yehova ular ung’olo nia ebiweyo ngo nying’ Israel kud iwi ng’om. Pieno ebodhogi nikadhu kud i cing’ Yeroboam ma wod Yehoac.

28 Dong kpawa mi kwo pa Yeroboam, lembe ceke m’etimo ku tic mi tego m’etimo, ayi m’ekiedo ko lwiny man ayi m’edwoko ko Dameski kud Hamath ni Yuda i Israel, jukiewogi i buku mi kpawa mi jubim mir Israel. 29 I ng’eye, Yeroboam uvuto pi niyom* karacelo ku kwaru pare, karacelo ku jubim mir Israel; e wode ma Zekaria udoko ubimo kakare.

15 I oro mi pier ario wi abirone mi camuker p’Ubimo Yeroboam* mir Israel, Azaria* ma wod Ubimo Amazia mi Yuda udoko ubimo. 2 Ebino ku oro apar abusiel kinde m’edoko ubimo, man ecamu ker pi oro pier abic wi ario i Yeruzalem. Nying’ min ubino Yekolia ma dhanu mi Yeruzalem. 3 Emedere nitimo lembe m’atira i wang’ Yehova, tap calu ma Amazia ma won utimo. 4 Ento jukabu ngo kaka ma malu, man dhanu gimediri asu nithiero lam man niketho yiro mi lam uduny i kaka ma malu. 5 Yehova ugoyo ubimo ku dhobu, man ebedo won dhobu nitundo i nindo mi tho pare; ebed ebedo i ot pare kende; i saa maeno Yotham ma wod ubimo ubino neno wi kal,* man ebed epoko lembe mi dhanu m’i ng’ombe. 6 Dong kpawa mi kwo p’Azaria man lembe ceke m’etimo, jukiewogi i buku mi kpawa mi jubim mi Yuda. 7 I ng’eye, Azaria ugam uvuto pi niyom karacelo ku kwaru pare, man jukunye karacelo ku kwaru pare i Adhura pa Daudi; e Yotham ma wode udoko ubimo kakare.

8 I oro mi pier adek wi aborane mi camuker p’Ubimo Azaria mi Yuda, Zekaria ma wod Yeroboam udoko ubimo iwi Israel i Samaria, man ebimo pi dwi abusiel. 9 Etimo lembe ma rac i wang’ Yehova, tap calu ma kwaru pare gitimo. Eweko ngo nitimo dubo ma Yeroboam ma wod Nebat ucwalu Juisrael nitimo. 10 E Calum ma wod Yabec ucamu gamba i kume man enege i Ibleam. I ng’ey m’enege, edoko ubimo kakare. 11 Ento dong kpawa mi kwo pa Zekaria, jukiewogi i buku mi kpawa mi jubim mir Israel. 12 Eno upong’o lembe ma Yehova ular uyero ni Yehu kumae: “Woti gibibedo iwi komker mir Israel nitundo i kum dhanu m’utuk mir ang’wen.” E lembene utimere de kumeno.

13 Calum ma wod Yabec udoko ubimo i oro mi pier adek wi abung’wende mi camuker p’Ubimo Uzia mi Yuda, man ebimo i Samaria pi dwi acel zoo. 14 I ng’eye, Menahem ma wod Gadhi uai kud i Tirza ubino i Samaria man ewok enego Calum ma wod Yabec i Samaria. I ng’ey m’enege, edoko ubimo kakare. 15 Dong kpawa mi kwo pa Calum man gamba m’ecamu, jukiewogi i buku mi kpawa mi jubim mir Israel. 16 I saa maeno Menahem uai kud i Tirza man ebin erwombo adhura mi Tifsa man enego dhanu ceke m’i iye ku m’i kabedo m’i ng’ete, pilembe giyabu ngo dhugang’ mir adhurane ire. Erwombo adhurane man ekaku i mon ma igi nuti mir adhurane dra.

17 I oro mi pier adek wi abung’wende mi camuker p’Ubimo Azaria mi Yuda, Menahem ma wod Gadhi udoko ubimo iwi Israel, man ecamu ker pi oro apar i Samaria. 18 Emedere nitimo lembe ma rac i wang’ Yehova. Man i nindo pare ceke, eweko ngo nitimo dubo ceke ma Yeroboam ma wod Nebat ucwalu Israel nitimo. 19 Pul m’ubimo mir Asiria ubino i ng’om mir Israel; e Menahem umiyo mola ma tar talanto* elufu acel (1 000) ni Pul kara ekonye pi nidwoko ker pare udok tek. 20 Pieno, Menahem ujoko mola ma tar i bang’ dhanu ma pigi tek man julonyo mir Israel. Ejoko mola ma tar cekel* pier abic i bang’ ng’atuman, e emiye ni ubimo mir Asiria. I ng’eye, ubimo mir Asiria udok man ebedo ngo i ng’om mir Israel. 21 Dong kpawa mi kwo pa Menahem man lembe ceke m’etimo, jukiewogi i buku mi kpawa mi jubim mir Israel. 22 I ng’eye, Menahem ugam uvuto pi niyom* karacelo ku kwaru pare; e wode ma Pekahia udoko ubimo kakare.

23 I oro mi pier abije mi camuker p’Ubimo Azaria mi Yuda, Pekahia ma wod Menahem udoko ubimo iwi Israel i Samaria, man ecamu ker pi oro ario. 24 Emedere nitimo lembe ma rac i wang’ Yehova. Eweko ngo nitimo dubo ma Yeroboam ma wod Nebat ucwalu Israel nitimo. 25 I ng’eye, Peka ma wod Remalia ma jego pare ucamu gamba i kume man enege i Samaria i ot ma wiw ma tek m’i kal* p’ubimo karacelo kud Argob man Arie.* Dhanu pier abic mi Gilead gibino karacelo kude; i ng’ey m’enege, edoko ubimo kakare. 26 Dong kpawa mi kwo pa Pekahia man lembe ceke m’etimo, jukiewogi i buku mi kpawa mi jubim mir Israel.

27 I oro mi pier abic wi arionde mi camuker p’Ubimo Azaria mi Yuda, Peka ma wod Remalia udoko ubimo iwi Israel i Samaria, man ecamu ker pi oro pier ario. 28 Emedere nitimo lembe ma rac i wang’ Yehova, man eweko ngo nitimo dubo ma Yeroboam ma wod Nebat ucwalu Israel nitimo. 29 I nindo p’Ubimo Peka mir Israel, Ubimo Tiglath-pileser mir Asiria umondo ku lwiny man emaku adhura mi Iyon, mir Abel-beth-maka, mi Yanoa, mi Kedec, mir Hazor, man mi Gilead. Emaku bende Galilaya, niwacu ng’om ceke mi suru pa Nafthali, e ecoko dhanu mir adhurane eterogi i ng’eca i Asiria. 30 I ng’eye, Hoceya ma wod Ela ucamu gamba i kum Peka ma wod Remalia, e egoye man enege; man edoko ubimo kakare i oro mi pier arionde mi camuker pa Yotham ma wod Uzia. 31 Ento dong kpawa mi kwo pa Peka man lembe ceke m’etimo, jukiewogi i buku mi kpawa mi jubim mir Israel.

32 I oro mir arionde mi camuker pa Peka ma wod Remalia m’ubimo mir Israel, Yotham ma wod Ubimo Uzia mi Yuda udoko ubimo. 33 Ebino ku oro pier ario wi abic kinde m’edoko ubimo, man ecamu ker pi oro apar abusiel i Yeruzalem. Nying’ min ubino Yeruca ma nyaku pa Zadok. 34 Emedere nitimo lembe m’atira i wang’ Yehova, tap calu m’Uzia ma won utimo. 35 Ento jukabu ngo kaka ma malu, man dhanu gimediri asu nithiero lam man niketho yiro mi lam uduny i kaka ma malu. En re m’egiero dhugang’ ma malu mi ot* pa Yehova. 36 Dong kpawa mi kwo pa Yotham man lembe m’etimo, jukiewogi i buku mi kpawa mi jubim mi Yuda. 37 I nindo maeno, Yehova ucaku oro Rezin m’ubimo mi Siria man Peka ma wod Remalia pi nibino tugo ali i dhu Yuda. 38 I ng’eye, Yotham uvuto pi niyom karacelo ku kwaru pare, man jukunye ku kwaru pare i Adhura pa Daudi ma kwarumire. E wode ma Ahaz udoko ubimo kakare.

16 I oro mir apar abirone mi camuker pa Peka ma wod Remalia, Ahaz ma wod Ubimo Yotham mi Yuda udoko ubimo. 2 Ahaz ubino ku oro pier ario kinde m’edoko ubimo, man ecamu ker pi oro apar abusiel i Yeruzalem. Etimo ngo lembe m’atira i wang’ Yehova Mungu pare calu ma Daudi ma kwarumire ugam utimo. 3 Ento ewotho i yo mi jubim mir Israel, man ewang’u kadok wode ma buu i mac,* m’elubo ko timo ma Mungu udagu mi thek ma Yehova ugam uriemo kud i wang’ Juisrael. 4 Bende, ebed ethiero lam man eketho yiro mi lam uduny i kaka ma malu, iwi ungulu gudi,* man i the yen ceke m’uluk.

5 I saa maeno re m’Ubimo Rezin mi Siria giku Peka ma wod Remalia m’ubimo mir Israel giidho pi nikiedo lwiny i dhu Yeruzalem. Gitieko Ahaz i adhura, ento gituc ungo nimaku adhurane. 6 I kind nindo maeno, Ubimo Rezin mi Siria udwoko adhura mir Elath ni Edom, i ng’eye eriemo Juyahudi* cen kud i Elath. E Juedom gimondo i Elath man gibedo i iye nitundo tin. 7 Pieno Ahaz uoro jukwenda i bang’ Ubimo Tiglath-pileser mir Asiria, ewacu kumae: “An a jatic peri man wodi. Bin ilara kud i cing’ ubimo mi Siria man kud i cing’ ubimo mir Israel ma gibekiedo i dhoga.” 8 E Ahaz uting’o mola ma tar ku mola ma kwar ma nwang’u ubino i ot pa Yehova man i kakanpiny mi kal* p’ubimo man eorogi ni ubimo mir Asiria pi nituro kanyaka.* 9 Ubimo mir Asiria ugam uyiyo kwac pare, e ecidho i Dameski man emaku adhurane. Etero dhanu m’i iye i ng’eca i Kir, Rezin ke enego cen.

10 E Ubimo Ahaz ucidh urombo kud Ubimo Tiglath-pileser mir Asiria i Dameski. Saa m’Ubimo Ahaz uneno pemlam m’ubino i Dameski, egam eoro cal mi pemlamne m’ukoro acel acel kite ma juyike ko ni Uriya ma jalam. 11 Uriya ma jalam ugiero pemlamne nimakere ku telowic ceke m’Ubimo Ahaz uoro ire niai kud i Dameski. Uriya udaru nigiero pemlamne i wang’ m’Ubimo Ahaz udwog kud i Dameski. 12 Saa m’ubimo udwogo kud i Dameski man eneno pemlam, egam ecoro i bang’ pemlamne man ethiero girathiera i wiye. 13 Emedere niketho yiro mi lam m’awang’a pare man mi girathiera mi nying cam pare uduny iwi pemlam maeno; bende ebed ekonjo girathiera mi pigulok pare man ebed ekiro rimo mi lam mi kwiyocwiny pare iwi pemlamne. 14 Bende, pemlam mi mola ma nwang’u ubino i wang’ Yehova, niwacu i wang’ hekalu, eting’e cen ku kakare ekethe i ng’et pemlam pare ku yo malu; nwang’u pemlamne ubino i kind pemlam pare gire ku ot pa Yehova. 15 I ng’eye, Ubimo Ahaz ung’olo ni Uriya ma jalam kumae: “Duny yiro mi lam m’awang’a mi kugweno iwi pemlam ma dit, man bende girathiera mi nying cam mir uthieno, lam m’awang’a p’ubimo, girathiera mi nying cam pare, man bende lam m’awang’a, girathiera mi nying cam, man girathiera mi pigulok mi dhanu ceke. Icikiri bende nikiro rimo mi lam m’awang’a ceke man rimo mi lam mange ceke iwi pemlamne. Pemlam mi mola ke abineno an nia atime nenedi.” 16 E Uriya ma jalam utimo lembe ceke m’Ubimo Ahaz ung’olo.

17 M’umedo maeno, Ubimo Ahaz utong’o i mola ma dhoge rebe rebe ma ve bau ma juguro i ng’et burwethi mi cwalu pii nziki nziki man eting’o base cen kud iwi burwethine, bende eting’o Nam cen kud iwi thwoni dhieng’ mi mola ma nwang’u Namne ubedo i wigi man ekethe kaka ma jutelo ku kidi. 18 Eting’o bende cen dhir* ma wiye auma ma jugiero ceng’ini kud hekalu man ma jubed jutiyo ko i ceng’ Sabatu. M’umedo maeno eciko dhugang’ ma yo woko m’ubimo ubed umondo ko i hekalu pa Yehova; etimo gin maeno pilembe ebino lworo ubimo mir Asiria.

19 Dong kpawa mi kwo pa Ahaz man lembe m’etimo, jukiewogi i buku mi kpawa mi jubim mi Yuda. 20 I ng’eye, Ahaz uvuto pi niyom karacelo ku kwaru pare man jukunye ku kwaru pare i Adhura pa Daudi; e Hezekia* ma wode udoko ubimo kakare.

17 I oro mir apar arionde mi camuker p’Ubimo Ahaz mi Yuda, Hoceya ma wod Ela udoko ubimo iwi Israel i Samaria man ecamu ker pi oro abung’wen. 2 Emedere nitimo lembe ma rac i wang’ Yehova, ento ungo i mukero ma jubim mir Israel ma gilar gibino i wang’e gitimo. 3 Ubimo Calmaneser mir Asiria uidho pi nikiedo lwiny i dhoge, e Hoceya udoko jatic pare man ecaku culo ire ajok. 4 Ento ubimo mir Asiria uwinjo nia Hoceya umondo i lem camu gamba moko, kum eoro jukwenda i bang’ Ubimo So mi Misiri man ekelo ngo ajok ni ubimo mir Asiria calu mi oro m’i wang’e. Pieno ubimo mir Asiria utwiye man ubole i kol.

5 Ubimo mir Asiria umondo ku lwiny i ng’ombe ceke, e etundo i Samaria man etieko adhurane pi oro adek. 6 I oro mir abung’wende mi camuker pa Hoceya, ubimo mir Asiria ugam umaku Samaria. E etero dhanu mir Israel i ng’eca i Asiria man eketho gibedo i Hala kud i Habor i dhu kulo mi Gozan, man i adhura mi Jumedi.

7 Lembe maeno utimere pilembe dhanu mir Israel gidubo ni Yehova Mungu migi, m’uwodhogi kud i ng’om mi Misiri kud i the loc pa Farao m’ubimo mi Misiri. Gitimo thier* ni mungu mange, 8 gikwanyu kura mi thek ma Yehova uriemo kud i wang’ Juisrael, man gikwanyu kura ma jubim mir Israel gicaku there.

9 Juisrael gimediri nitimo lembe m’atira ngo i wang’ Yehova Mungu migi. Gigiero kaka ma malu i adhura migi ceke, nik’ebed i otkur ma wiw kadi i adhura ma tek.* 10 Gicomo igi kidi mi thier man mbegi mi thier* iwi ungulu gudi ceke ma wiw, man i the yen ceke m’uluk; 11 man i kaka ceke ma malu gibed giketho yiro mi lam uduny tap calu thek m’ular ubino i wang’gi ma Yehova uriemo gicidho i ng’eca. Gimediri nitimo lembe ma reco pi ninyayu ng’eicwiny i Yehova.

12 Gimediri nitimo ni ayi gin m’acwiya ma gi gin ma judagu,* ma Yehova ular ucimogi pire kumae: “Kud wutim lembe maeni!” 13 Yehova umedere nicimo Israel man Yuda nikadhu kud i bang’ jubila pare ceke man juewlembe pare ceke, ewacu kumae: “Wulokuru cen kud i yo mwu ma reco! Wuwor lembang’ola para, cik para, man lembe ceke ma jukiewo i cik m’ang’olo ni kwaruwu man m’aoro iwu nikadhu kud i bang’ jutic para ma jubila.” 14 Ento giwinjo ngo man gimediri asu ku tegowic* calu kwarugi ma gigam ginyutho ngo yiyoyic i Yehova Mungu migi. 15 Gimediri nikwero telowic pare man lembariba pare m’etimo karacelo ku kwarugi man poyowic pare m’emiyo pi nipoyogi; gimediri bende niworo ayi gin m’acwiya ma tijgi mbe man gin de tijgi udoko mbe; gilubo lapor mi thek ceke m’utiekogi ma Yehova ung’olo igi nia kud gilub lapor migi.

16 Gimediri niweko lembang’ola pa Yehova Mungu migi ceke, man giyiko ayi gin m’acwiya m’atwaga mi nyithi dhieng’ ario ku mbegi mi thier,* girumo cong’gi i wang’ udul m’i polo ceke man gitimo ni Baal. 17 Giwang’u bende wotgi ku nyiggi i mac,* giewo lembe man gilamu bila; gimiyiri zoo* nitimo lembe ma rac i wang’ Yehova pi ninyayu ng’eicwiny i iye.

18 Pieno, kwinyo pa Yehova uopo lee mandha i kum Israel, uketho ekabugi cen kud i wang’e. Eweko ngo ng’atu acel de udong’, ndhu suru pa Yuda kende.

19 Kadok dhanu mi suru pa Yuda de giworo ngo lembang’ola pa Yehova Mungu migi; gin de gikwanyu kura ma Israel ulubo. 20 Yehova ugam uwenjo Juisrael ceke,* ejwigogi man emiyogi i cing’ weg ayeki nitundo m’elalugi cen kud i wang’e. 21 Eyeco Israel cen kud i ot pa Daudi, man giketho Yeroboam ma wod Nebat ni ubimo. Ento Yeroboam uketho Israel uweko nilubo Yehova man ecwalugi nitimo dubo ma dit. 22 E dhanu mir Israel gimediri nitimo dubo ma Yeroboam ugam utimo. Gilokiri ngo cen kud i kum dubone 23 nitundo ma Yehova ukabu Israel kud i wang’e tap calu m’elar etwong’o nikadhu kud i bang’ jutic pare ceke ma gi jubila. Pieno jucoko Juisrael kud i ng’om migi juterogi i ng’eca i Asiria, man gibedo kuca nitundo tin.

24 E ubimo mir Asiria ucoko dhanu kud i Babeli, kud i Kutha, kud i Ava, kud i Hamath, man kud i Sefarvaim, man ekethogi i adhura mi Samaria kaka Juisrael; gimaku Samaria man gikwo i adhura m’i iye. 25 Ku kwong’a saa ma gicaku kwo kuca, gibed gilworo ngo* Yehova. Pieno Yehova uoro umvor i kindgi, e ginego dhanu m’i kindgi moko. 26 Jugam judwoko ni ubimo mir Asiria kumae: “Thek m’itero i ng’eca man iketho gibed i adhura mi Samaria ging’eyo ngo dini* pa Mungu m’i ng’ombe. Pieno ebeoro umvor i kindgi man gibenegogi, pilembe ng’atu moko acel de mbe i kindgi m’ung’eyo dini pa Mungu m’i ng’ombe.”

27 Ubimo mir Asiria ugam ung’olo kumae: “Wuketh jalam acel m’i kind julam ma wumaku ku kuca wutero i ng’eca udok ukwo kuca, kara eponjgi ku dini pa Mungu m’i ng’ombe.” 28 Pieno, jalam acel m’i kind julam ma giyaku kud i Samaria gitero i ng’eca uloko pi nikwo i Bethel; e ecaku ponjogi kud ayi ma gicikiri nilworo* ko Yehova.

29 Ento dhanu mi thekman giyiko mungu migi gigi man gikethogi i udi mi timo thier ma nwang’iri i kaka ma malu ma Jusamaria giyiko; dhanu mi thekman gitimo kumeno i adhura ma gibino kwo i iye. 30 Pieno, dhanu mi Babeli giyiko igi ayi gin m’acwiya ma Sukoth-benoth, dhanu mi Kuth giyiko igi ayi gin m’acwiya ma Nergal, dhanu mir Hamath giyiko igi ayi gin m’acwiya ma Acima, 31 man dhanu mi Ava giyiko igi ayi gin m’acwiya ma Nibhaz giku Tartak. Dhanu mi Sefarvaim gibed giwang’u wotgi i mac ni Adramelek gikud Anamelek ma gi mungu mi Sefarvaim. 32 Kadok nwang’u gibed gilworo Yehova, re ging’iyo igi julam kud i kind udul dhanu pi nitimo i kaka ma malu, man julam maeno gibed gitimo tic mi lamulam igi i udi mi timo thier i kaka ma malu. 33 Pieno, gibed gilworo Yehova, ento gibed gitimo thier* ni mungu migi gigi calku dini* mi thek ma juyakugi kud i igi.

34 Gilubo migi dini* migi ma con nitundo tin. Ng’atu moko acel de mbe m’i kindgi m’utimo thier ni Yehova, man ng’atu acel de mbe m’ulubo lembapoka pare, Cik pare, man lembang’ola ma Yehova umiyo ni wot Yakobo m’egam eloko nyinge udoko Israel. 35 Kinde ma Yehova utimo lembariba ku Israel, egam eng’olo igi kumae: “Kud wulwor mungu mange, man kud wurum piny i wang’gi kadi kud wutim igi, kud wuthier igi lam. 36 Ento Yehova m’uwodhowu kud i ng’om mi Misiri ku tego ma dit man bot ma tek,* re ma tie Ng’atu ma wucikuru nilworo man ire re ma wucikuru nirum piny, man wucikuru nithiero lam ire . 37 Man telowic pare, lembapoka pare, Cik, man lembang’ola m’ekiewo iwu, wucikuru niworogi cuu mandha saa ceke, man kud wulwor mungu mange. 38 Kud wuwil i kum lembariba m’atimo kudwu, man kud wulwor mungu mange. 39 Ento Yehova Mungu mwu re ma wucikuru nilworo, kum en re m’ebibodhowu kud i cing’ judegi mwu ceke.”

40 Ento thek maeni gikwero niwinjo dwande, man gilubo migi dini* migi ma con. 41 Pieno gicaku lworo Yehova, ento gibed gitimo bende ni ayi gin m’acwiya m’ang’ika migi. Wotgi man nyikwaygi de gitimo tap calu kwarugi nitundo tin.

18 I oro mir adege mi camuker pa Hoceya ma wod Ela m’ubimo mir Israel, Hezekia ma wod Ubimo Ahaz mi Yuda udoko ubimo. 2 Ebino ku oro pier ario wi abic kinde m’edoko ubimo, man ecamu ker pi oro pier ario wi abung’wen i Yeruzalem. Nying’ min ubino Abi* ma nyaku pa Zekaria. 3 Emedere nitimo lembe m’atira i wang’ Yehova, tap calu ma Daudi ma kwarumire utimo. 4 En re m’ekabu kaka ma malu cen, eng’enyo i kidi mi thier man eng’ondo mbegi mi thier* cen. Bende erungo i thwol mi mola ma Musa ugam uyiko; kum nitundo i saa maeca, nwang’u Juisrael gibed giketho yiro mi lam uduny asu ire, man jubed julwong’e nia ayi gin m’acwiya ma thwol mi mola.* 5 Hezekia ugeno Yehova Mungu mir Israel; i kind jubim ceke mi Yuda m’ubimo yor i ng’eye kadi m’ular ubimo i wang’e, ng’atu moko mbe m’ubino calu en. 6 Emoko i kum Yehova. Eweko ngo nilube man emedere niworo lembang’ola ma Yehova umiyo nikadhu kud i bang’ Musa. 7 Man Yehova ubino karacelo kude. Kaka moko ci ma tek ecidho i iye, ebed etimo lembe ku rieko. Ejai ni ubimo mir Asiria man ekwero nitimo ire. 8 Eloyo bende Jufilisti nitundo i Gaza man i ng’om m’i ng’ete, nik’ebed i otkur ma wiw kadi i adhura ma tek.*

9 I oro mir ang’wende mi camuker p’Ubimo Hezekia, niwacu i oro mir abirone mi camuker pa Hoceya ma wod Ela m’ubimo mir Israel, Ubimo Calmaneser mir Asiria uidho i kum Samaria man ecaku tieko adhurane. 10 Kinde ma oro mir adek ubethum, Juasiria gimaku adhurane; i oro mir abusiende mi camuker pa Hezekia, niwacu oro mir abung’wende mi camuker p’Ubimo Hoceya mir Israel, jumaku Samaria. 11 I ng’eye, ubimo mir Asiria utero Juisrael i ng’eca i Asiria, man eketho gibedo i Hala, i Habor i dhu kulo Gozan, man i adhura mi Jumedi. 12 Lembe maeni utimere pilembe giwinjo ngo dwand Yehova Mungu migi, ento gimediri nituro lembariba pare, niwacu lembe ceke ma Musa ma jatic pa Yehova ung’olo. Giwinjo ngo, kadok awora de giworo ngo.

13 I oro mir apar ang’wende mi camuker p’Ubimo Hezekia, Senakerib m’ubimo mir Asiria ubino i kum adhura ceke ma tek mi Yuda man emakugi. 14 Pieno Ubimo Hezekia mi Yuda uoro kwenda ni ubimo mir Asiria i Lakic kumae: “Atimo kosa. Wek nikiedo lwiny i dhoga, e abimiyo iri piny ceke m’ing’olo i wiya.” E ubimo mir Asiria ugam ung’olo iwi Ubimo Hezekia mi Yuda amandi mi mola ma tar talanto* dak adek man mi mola ma kwar talanto pier adek. 15 Pieno, Hezekia umiyo mola ma tar ceke m’ubino i ot pa Yehova man m’ubino i kakanpiny mi kal* p’ubimo. 16 I saa maeno Ubimo Hezekia mi Yuda ugam uwodho* dhugola mir hekalu pa Yehova man ng’et dhugolane m’egam eumo* kume en gire man emiyogi ni ubimo mir Asiria.

17 I ng’eye, ubimo mir Asiria uoro Tartan,* Rabsaris,* man Rabcake* kud udul askari ma dit niai i Lakic gicidho i bang’ Ubimo Hezekia i Yeruzalem. Giidho i Yeruzalem man giwok gicungo i kum yo mi pii mi kut ma malu, ma n’i kum gengi ma dit ma n’i ng’et podho pa jalwok bongu. 18 Kinde ma gilwong’o ubimo uwok woko, Eliakim ma wod Hilkia m’ubino janen wi kal,* Cebna ma jagor, man Yoa ma wod Asaf ma jagor lemkei giwok i bang’gi.

19 Pieno, Rabcake uwacu igi kumae: “Akwayuwu, wuwac ni Hezekia kumae: ‘Ubimo ma dwong’ m’ubimo mir Asiria uwacu kumae: “Iketho genogen peri iwi ang’o? 20 Iwacu kumae: ‘Atie ku rieko man tego mi kiedo lwiny;’ ento eni tie wec ma igi nanu. Iketho genogen peri iwi ng’a m’uketho ibeng’ap nijai ira e? 21 Nen! iketho genogen peri iwi Misiri ma tie agada ma iye kak, ma ka ng’atu moko ujengere i wiye ecobo cinge man erikere i iye. Farao m’ubimo mi Misiri utie kumeno ni dhanu ceke ma giketho genogen migi i wiye. 22 Man kan iyero ira kumae: ‘Wageno Yehova Mungu mwa;’ nyo en ungo re ma Hezekia ukabu kaka ma malu man pemlam pare, m’ebeyero ni Yuda ku Yeruzalem kumae: ‘Wucikuru nirum i wang’ pemlam maeni i Yeruzalem’?”’ 23 Dong’ kawoni akweyi, wuwinjuru ku rwoth para ubimo mir Asiria kumae: abimiyo iri riuni* elufu ario (2 000) kara anen ka nyo icopo nwang’u wend dhanu ma romo ringo kugi. 24 Dong’ icopo tuc nenedi niriemo kadok jabim acel m’i ng’et ng’om ma tie ng’atu ma nok magwei i kind jutic pa rwoth para, ma ke ilund ibegeno Misiri kara ukonyi ku magali man juring riuni? 25 Nyo tie Yehova ngo re m’umiyo ira twero mi bino i kum kaka maeni pi ninyothe ceni? Yehova en gire re m’uwacu ira kumae: ‘Idh i kum ng’om maeni man inyothe cen.’”

26 E Eliakim ma wod Hilkia, Cebna, man Yoa giwacu ni Rabcake kumae: “Wakweyi, wec i bang’ jutic peri ku dhu Aramea,* kum wawinjo; kud iwec i bang’wa ku dhok mi Juyahudi maru dhanu m’upong’ iwi gang’kidi biwinjo.” 27 Ento Rabcake udwoko igi kumae: “Nyo rwoth para uora niyero lembe maeni ni rwoth mwu man iwu kendwu? Nyo tie ngo bende ni dhanu maeni ma gibedo iwi gang’kidi, gin ma gibicamu cethgi man gibimadhu lajgi wukugi?”

28 I ng’eye, Rabcake ucungo man ekok ku dwande ma tek ku dhok mi Juyahudi, ewacu kumae: “Wuwinj lembe p’ubimo ma dwong’, m’ubimo mir Asiria. 29 Ubimo uyero kumae: ‘Kud wuwek Hezekia uwondwu, kum ecopo bodhowu ngo kud i cinga. 30 Man kud wuwek Hezekia uketh wugen Yehova ku wec m’ebeyero kumae: “Yehova bibodhowa andha, man jubimiyo ngo adhura maeni i cing ubimo mir Asiria.” 31 Kud wuwinj Hezekia, kum ubimo mir Asiria uwacu kumae: “Wutim kwiyocwiny kuda man wumiyuru,* e ng’atuman m’i kindwu bicamu nying ulok pare man bicamu nying ulam pare, man ebimadhu pii m’atong’a pare gire, 32 nitundo m’abin man aterwu i ng’om ma calu ng’om mwu giwu, ng’om m’upong’ ku nying cam ku pigulok ma nyen, ng’om m’upong’ ku mukathi ku podho mir ulok, m’upong’ ku yend oliv man miyokic. E wubibedo kwo man wubitho ngo. Dong’ kud wuwinj Hezekia, kum ebewondowu awonda m’ebewacu nia, ‘Yehova bibodhowa.’ 33 Nyo mungu mi thek moko nuti de m’udaru bodho ng’om migi kud i cing ubimo mir Asiria? 34 Mungu mir Hamath man mi Arpad gini kani? Mungu mi Sefarvaim, mi Hena, man mi Iva gini kani? Nyo gibodho Samaria kud i cinga de? 35 I kind mungu ceke m’i ng’om, mungu ma kani m’udaru bodho ng’om pare kud i cinga, ma nia Yehova re m’ulund ubodh Yeruzalem kud i cinga e?”’”

36 Ento dhanu gibedo ling’, gidwoko ngo ire lembe moko acel de, pilembe ubimo ular uwacu kumae: “Kud wudwok lembe moko ire.” 37 Ento Eliakim ma wod Hilkia, m’ubino janen wi kal,* Cebna ma jagor, man Yoa ma wod Asaf ma jagor lemkei gidwogo i bang’ Hezekia ma giyeco bongu migi man gikoro ire lembe ma Rabcake uyero.

19 Kinde m’Ubimo Hezekia uwinjo lembe maeno, ndhu ndhu eyeco bongu pare man eumo kendi mi saki i kume, e ecidho i ot pa Yehova. 2 I ng’eye, eoro Eliakim m’ubino janen wi kal,* Cebna ma jagor, man judongo mi julam ma giumo kendi mi saki, kara gicidh i bang’ jabila Isaya ma wod Amoz. 3 Giwacu ire kumae: “Ubimo Hezekia uyero kumae: ‘Tin utie nindo mi can, mi cac,* man mi lewic; kum watie ve dhaku ma moc ugoyo,* ento tego m’enyol ko nyodone mbe. 4 Saa moko nyo Yehova Mungu peri biwinjo wec pa Rabcake ceke ma rwoth pare m’ubimo mir Asiria uore ebin eroko ko Mungu ma kwo, man nyo Yehova Mungu peri bimiyo matira ire pi wec m’ewinjo. Pieno, rwo pi dong dhanu ma giboth.’”

5 E jutic p’Ubimo Hezekia gicidho i bang’ Isaya, 6 man Isaya uyero igi kumae: “Wuwac ni rwoth mwu kumae: ‘Yehova uyero kumae: “Lworo kud unegi pi wec m’iwinjo, ma gi wec mir acidi ma jutic p’ubimo mir Asiria gicida ko. 7 Nen, aberoyo paru moko i wiye, ebiwinjo rwonglembe moko man ebiloko ebidok i ng’om pare ma dhe; e abiketho jubinege ku palamularu i ng’om pare ma dhe.”’”

8 Saa ma Rabcake uwinjo nia ubimo mir Asiria uweko adhura mi Lakic, eloko edok i bang’e man ewok enwang’u ebekiedo i kum Libna. 9 Ubimo mir Asiria ugam uwinjo jubeyero nia Ubimo Tiraka mir Ethiopia ubino pi nikiedo i dhoge. E eoro jukwenda kendo i bang’ Hezekia, eyero kumae: 10 “Wuwac ni Ubimo Hezekia mi Yuda kumae: ‘Kud iwek Mungu peri m’ibegeno no uwondi ku wec ma nia, “jubimiyo ngo Yeruzalem i cing ubimo mir Asiria.” 11 Nen! idaru winjo lembe ma jubim mir Asiria gitimo i kum ng’om ceke, kite ma ginyotho kogi. Nyo in kendi re m’ibibothi? 12 Nyo mungu mi thek ma kwaru para unyotho gibodho theknegi? Gozan, Haran, Rezef, man dhanu mir Eden ma gibino i Tel-asar gini kani? 13 Ubimo mir Hamath, ubimo mi Arpad, man ubimo mir adhura mi Sefarvaim, mi Hena ku mi Iva gini kani?’”

14 E Hezekia ugamu baruane kud i cing jukwenda man esomogi. I ng’eye, Hezekia ucidho i ot pa Yehova, man epedhogi* i wang’ Yehova. 15 E Hezekia ucaku rwo i bang’ Yehova, eyero kumae: “E Yehova Mungu mir Israel, in m’ijany malu iwi* jukerubi, in kendi m’itie Mungu mandha mi ker ceke m’i ng’om. Icwiyo polo ku ng’om. 16 E Yehova, cik ithi man iwinji! Yab weng’i man inen, E Yehova! Winj wec ma Senakerib uoro jubin juroki ko, in m’i Mungu ma kwo. 17 E Yehova, andha jubim mir Asiria ginyotho thek ku ng’om migi de. 18 Man gibolo mungu migi i mac, pilembe gibino mungu ngo ento gibino tic mi cing dhanu, niwacu yen man kidi. Eno re m’uketho gituc ninyothogi. 19 Ento kawoni, E Yehova Mungu mwa, wakweyi, bodhwa kud i cinge, kara ker ceke m’i ng’om ung’ey nia in kendi m’i Mungu, E Yehova.”

20 E Isaya ma wod Amoz uoro kwenda i bang’ Hezekia kumae: “Yehova Mungu mir Israel uwacu kumae: ‘Awinjo rwo peri m’irwo ko i bang’a pir Ubimo Senakerib mir Asiria. 21 Yehova uyero pire kumae:

“Nyasayuni ma sumba ubeceyi, ebeng’ieri.

Nyayeruzalem ubeyengo wiye m’ebeceyi ko.

22 Iroko ng’a man icido nying’ ng’a?

Tie Ng’atu Maleng’ mir Israel!

Abing’ondo yend tido ma boco m’i iye, yend jenevriye* ma beco m’i iye.

Abimondo kaka ma bor m’usagu m’i iye, i luline m’ujiyere nisagu.

25 Nyo iwinjo ngo? Akeco lembe maeni niai con.

Ayike* cuu niai con.

Kawoni dong’ abecitime.

Ibidwoko adhura ma tek ni udhuru mir uvuru.

29 “‘Man maeni bibedo iri* ni giranyutha: oro maeni ibicamu cam m’utwii gire; oro m’i ng’eye ke ibicamu nying camne m’ukek man udok ucek; ento i oro mir adege ibicoyo kodhi, ibikaye, man ibipidho podho mir ulok, e ibicamu nyinge. 30 Dong dhanu mi ot pa Yuda ma giboth, niwacu dong ju m’udong’ gibiguro ulaggi bimondo piny man gibicego nyinggi malu. 31 Kum dong dhanu biwok kud i Yeruzalem man ju m’uboth ke biwok kud iwi Got Sayuni. Amora pa Yehova mir udul bitimo maeni.

32 “‘Pieno, Yehova uyero pir ubimo mir Asiria kumae:

35 E i diewor nica malaika pa Yehova ubino man enego juaskari elufu dak acel pier abora wi abic (185 000) i kagonjo mi Juasiria. Kinde ma dhanu giai pir kugweno, gineno gin ceke givuto ma gin avu. 36 Ubimo Senakerib mir Asiria ugam ucidho man eloko edok i Nineve, e ebedo kuca. 37 Nindo acel, kinde m’erum piny i ot* pa Nisrok ma mungu pare, Adramelek giku Carezer ma gi wote ma buu ginege ku palamularu man giringo i ng’om mi Ararat. E wode ma Esar-hadon udoko ubimo kakare.

20 I nindo maeno, Hezekia ucaku twoyo man nwang’u edhingo tho. E jabila Isaya ma wod Amoz ugam ubino i bang’e man uwacu ire kumae: “Yehova uyero kumae: ‘Mii telowic ni juruot peri, kum ibitho; ibikey ungo.’” 2 E eloko wang’e yor i kum ot man ecaku rwo i bang’ Yehova kumae: 3 “Abekweyi, E Yehova, ka copere, poy nia awotho i weng’i i lemandha man kud adunde ma zoo; atimo lembe ma ber i weng’i.” E Hezekia ucaku wak lee mandha.

4 Ma fodi Isaya utundo ngo i die lela, lembe pa Yehova ubino i bang’e man uwacu kumae: 5 “Lok idok ku ng’eyi man iwac ni Hezekia ma jatela mi dhanu para kumae: ‘Yehova Mungu pa Daudi ma kwaru uyero kumae: “Awinjo rwo peri. Aneno piweng’i. Dong’ abikeyo kumi. I nindo mir adege, ibicidho i ot pa Yehova. 6 Abimedo oro apar abic iwi kwo* peri man abibodhi, abibodho bende adhura maeni kud i cing ubimo mir Asiria, abicero bang’ adhura maeni pira gira man pi Daudi ma jatic para.”’”

7 I ng’eye, Isaya uyero kumae: “Wukel mukathi mi nying ulam m’uthwo.” E jukelo mukathine man jukethe iwi vur p’ubimo, e yoo yoo ecaku key.

8 Hezekia upenjo Isaya kumae: “Giranyutha ang’o ma bikonya ning’eyo nia Yehova bikeyo kuma, man nia i nindo mir adege abicidho i ot pa Yehova?” 9 Isaya udwoko kumae: “Giranyutha m’uai i bang’ Yehova m’unyutho nia Yehova bitimo lembe m’eyero ni e: Nyo ibemito tipopiny ma n’i wi mangasi* ucidh i wang’e dagutielo apar kunoke elok ku ng’eye dagutielo apari?” 10 Hezekia uwacu kumae: “Etie lembe ma yot nia tipopiny ucidh i wang’e dagutielo apar, ento etie lembe ma yot ungo nia edok ku ng’eye dagutielo apar.” 11 Pieno, jabila Isaya ukwayu Yehova, man eketho tipopiny m’ubino iwi mangasi pa Ahaz udok ku ng’eye dagutielo apar ma nwang’u ke dong’ edaru loro dagutielonegi.

12 I saa maeno ubimo mi Babeli, niwacu Berodak-baladan ma wod Baladan ugam uoro barua ku giramiya ni Hezekia, kum ewinjo nia Hezekia ubino twoyo. 13 Hezekia ugam ujolo* jukwendane man enyutho igi ot m’ekanu iye lonyo pare ceke, niwacu mola ma tar, mola ma kwar, moj balsam ku mo mange ma beco, jamlwiny pare, man piny ceke m’ubino i kakanpiny pare. Gin moko mbe m’udong’ ma Hezekia unyutho ngo igi i ot* pare man i the bimobim pare ceke.

14 I ng’ey lembe maeno, jabila Isaya ucidho i bang’ Ubimo Hezekia man epenje kumae: “Dhanu maeno giyero ang’o man giai kani?” Hezekia udwoko ire kumae: “Giai i ng’om ma bor i Babeli.” 15 I ng’eye, epenje kumae: “Gineno ang’o i ot* peri?” Hezekia udwoko kumae: “Gineno piny ceke ma n’i ot para. Gin moko mbe m’anyutho ngo igi i kakanpiny para.”

16 E Isaya uyero ni Hezekia kumae: “Kewinj lembe ma Yehova ubeyero: 17 ‘Nen! nindo ubebino ma jubiyeyo iye piny ceke ma n’i ot* peri man piny ceke ma kwaru peri gikanu nitundo tin, jubitero i Babeli. Gin moko mbe ma bidong’,’ Yehova wacu. 18 ‘Man woti moko m’ibinyolo de jubiyakugi man gibidoko jutic ma dongo mi kal p’ubimo mi Babeli.’”

19 E Hezekia uyero ni Isaya kumae: “Lembe pa Yehova m’iyero tie ber.” I ng’eye, emedo kumae: “Tek kwiyocwiny ku bedomoth* bibedo nuti i nindo para, nwang’u tie ber.”

20 Dong kpawa mi kwo pa Hezekia, tic mi tego ceke m’etimo kud ayi m’eyiko ko kut mi pii man yo mi pii, man ayi m’etelo ko pii i adhura, jukiewogi i buku mi kpawa mi jubim mi Yuda. 21 I ng’eye, Hezekia uvuto pi niyom* karacelo ku kwaru pare; e wode ma Manase udoko ubimo kakare.

21 Manase ubino ku oro apar ario kinde m’edoko ubimo, man ecamu ker pi oro pier abic wi abic i Yeruzalem. Nying’ min ubino Hefziba. 2 Etimo lembe ma rac i wang’ Yehova, m’elubo ko timo ma reco mi dhanu mi thek mange ma Yehova uriemo kud i wang’ dhanu mir Israel. 3 Edok egiero kendo kaka ma malu ma Hezekia ma won unyotho. Eguro pemlam ni Baal man eyiko mbegi mi thier,* tap calu m’Ahab m’ubimo mir Israel utimo. Bende, erum i wang’ udul m’i polo ceke man etimo igi. 4 Egiero bende pemlam i ot pa Yehova, ma Yehova uyero pire kumae: “Abiketho nyinga ubed i Yeruzalem.” 5 Man egiero pemlam ni udul mi polo ceke, i lela ario mi ot pa Yehova. 6 Ewang’u wode ma buu i mac;* etimo maji, elamu bila, eketho ju ma weco ku tipo dhanu m’utho, man juewlembe. Etimo lembe ma reco i wang’ Yehova i mukero ma lee dit, pi ninyayu ng’eicwiny i iye.

7 Eketho ayi gin m’acwiya m’ang’ika mi mbegi mi thier m’eyiko i ot ma Yehova uyero pire ni Daudi man ni wode ma Suleman kumae: “Abiketho nyinga ubed mi nja i ot maeni man i Yeruzalem, ma tie adhura m’ang’iyo kud i kind suru ceke mir Israel. 8 Man tekene Juisrael giworo cuu mandha lembe ceke m’ang’olo igi, niwacu Cik ceke ma jatic para ma Musa ung’olo igi nia gilubi, abiketho ngo giwoth kendo swa niweko ng’om m’amiyo ni kwarugi.” 9 Ento giworo ngo, man Manase umedere niketho gikier bor; eketho gitimo lembe ma rac lee nisagu kadok mi dhanu mi thek mange ma Yehova unyotho kud i wang’ Juisrael.

10 Yehova ubed uweco nikadhu kud i bang’ jutic pare jubila, ewacu kumae: 11 “Manase m’ubimo mi Yuda utimo lembe ma reco maeni ceke; etimo rac nisagu Juamor ceke ma gibino i wang’e, man eketho Yuda udubo kud ayi gin m’acwiya pare ma gi gin ma judagu.* 12 Pieno, Yehova Mungu mir Israel uwacu kumae: ‘Abekelo nyoth iwi Yeruzalem man iwi Yuda, ma ng’atu moko ci ma biwinjo pire, lembene bitime rac mandha.* 13 Man abitelo thol mi pimo piny m’apimo ko Samaria i kum Yeruzalem, man abitiyo ku jam pimo piny* m’alima m’apimo ko ot p’Ahab, e abiweyo Yeruzalem tetete tap calu ma ng’atini weyo ko tabu tetete, eweye man eloko there. 14 Abiwenjo dong dhanu* para m’udong’ man abimiyogi i cing’ judegi migi, e judegi migi ceke bimakugi ni ng’eca man gibiyaku piny migi, 15 pilembe gitimo lembe ma rac i wang’a man gimediri ninyayu can i iya niai i nindo ma kwarugi uwok i iye kud i Misiri nitundo tin.’”

16 Manase ucwiro bende rimb dhanu ma gikoso ngo i mukero ma lee dit nitundo epong’o Yeruzalem gunde kun ku kun, m’uweko dubo m’eketho ko Yuda udubo, m’ecwalu kogi nitimo lembe ma rac i wang’ Yehova. 17 Dong kpawa mi kwo pa Manase ku lembe ceke m’etimo man dubo m’etimo, jukiewogi i buku mi kpawa mi jubim mi Yuda. 18 I ng’eye, Manase uvuto pi niyom karacelo ku kwaru pare man jukunye i podho m’i kal pare, i podho pa Uza; e wode ma Amon udoko ubimo kakare.

19 Amon ubino ku oro pier ario wi ario kinde m’edoko ubimo man ecamu ker pi oro ario i Yeruzalem. Nying’ min ubino Meculemeth ma nyaku pa Haruz mi Yotba. 20 Emedere nitimo lembe ma rac i wang’ Yehova, tap calu ma Manase ma won utimo. 21 Ewotho i yo ceke ma won uwotho i iye, man emedere nitimo ni ayi gin m’acwiya ma judagu ma won utimo igi man erum i wang’gi bende. 22 Pieno, eweko Yehova Mungu pa kwaru pare, man ewotho ngo i yo pa Yehova. 23 Nindo moko jutic p’ubimo Amon gicamu gamba i kume man ginege i ot pare gire. 24 Ento dhanu m’i ng’ombe ginego ju ceke ma gicamu gamba i kum Ubimo Amon, man giketho wode ma Yosiya udoko ubimo kakare. 25 Dong kpawa mi kwo p’Amon, niwacu lembe m’etimo, jukiewogi i buku mi kpawa mi jubim mi Yuda. 26 Pieno jugam jukunye i liel pare i podho pa Uza, e wode ma Yosiya udoko ubimo kakare.

22 Yosiya ubino ku oro abora kinde m’edoko ubimo man ecamu ker pi oro pier adek wi acel i Yeruzalem. Nying’ min ubino Yedida ma nyaku pa Adaya ma dhanu mi Bozkath. 2 Etimo lembe m’atira i wang’ Yehova man ewotho i yo pa Daudi ma kwarumire ceke, ekier ungo yor acwic kadi yor acam.

3 I oro mir apar aborane mi camuker p’Ubimo Yosiya, ubimo uoro Cafan ma jagor ma wod Azalia, ma wod Meculam i ot pa Yehova, eyero kumae: 4 “Idh malu i bang’ Hilkia ma jalam ma dit, man iketh ecok dhu sente ceke ma jukelo i ot pa Yehova, ma jukur dhugola gijoko i bang’ dhanu. 5 Jumii sentene i bang’ ju ma juketho ginen wi tic mi ot pa Yehova, gin ke gibidok miye i bang’ jutic mi ot pa Yehova ma gibiyiko kum ode m’unyothere.* 6 Gibimiye i bang’ bafundi, jurugiedo, man jubodho mi giedo; gin ke gibing’iewo kude yen man kidi m’apaya pi niyiko kum ot. 7 Ento jubitimo ngo kwan i wigi pi sente ma jumiyo i bang’gi, kum gitie dhanu ma jugeno.”

8 I ng’eye, Hilkia ma jalam ma dit uwacu ni Cafan ma jagor kumae: “Anwang’u buku mi Cik i ot pa Yehova.” Pieno, Hilkia umiyo bukune i bang’ Cafan, man Cafan ucaku some. 9 I ng’eye, Cafan ma jagor ucidho i bang’ ubimo man eyero ire kumae: “Jutic peri gicidh giwodho sente m’ubino i hekalu, man gimiye i bang’ ju ma juketho unen wi tic m’ubetimere i ot pa Yehova.” 10 Cafan ma jagor uyero bende ni ubimo kumae: “Hilkia ma jalam umiyo buku ma e i bang’a.” E Cafan ucaku some i wang’ ubimo.

11 Kinde m’ubimo uwinjo lembe mi buku mi Cik, e ndhu ndhu eyeco bongu pare. 12 I ng’eye ubimo ung’olo ni Hilkia ma jalam, Ahikam ma wod Cafan, Akbor ma wod Mikaya, Cafan ma jagor man ni Asaya ma jatic p’ubimo kumae: 13 “Wucidh wupenj lembe i bang’ Yehova pira, pi dhanu, man pi Yuda ceke iwi lembe ma jukiewo i buku maeni ma junwang’u; kum kwinyo pa Yehova uopo lee dit i kumwa, pilembe kwaruwa giworo ngo wec ma jukiewo i buku maeni, gitimo ngo lembe ceke ma jukiewo piwa.”

14 E Hilkia ma jalam, Ahikam, Akbor, Cafan, man Asaya gicidho i bang’ Hulda ma jabila ma dhaku. Ebino dhaku pa Calum ma wod Tikva ma wod Harhas ma jagwok bongu, man ebed ebedo i Theng adhura ma nyen mi Yeruzalem; e giweco kude keca. 15 Eyero igi kumae: “Yehova Mungu mir Israel uwacu kumae: ‘Wuyer ni ng’atu m’uorowu i bang’a kumae: 16 “Yehova uwacu kumae: ‘Abikelo nyoth iwi kabedo maeni man iwi dhanu ma bedo i iye, niwacu lembe ceke m’i buku m’ubimo mi Yuda usomo. 17 Calu ma giweka man gibeketho yiro mi lam uduny ni mungu mange pi ninyayu ng’eicwiny i iya ku tic ceke ma gibetimo, kwinyo para biopo i kum kabedo maeni man lake bikwiyo ngo.’” 18 Ento wuyer ni ubimo mi Yuda m’uorowu wubin wupenj lembe i bang’ Yehova kumae: “Pi lembe m’iwinjo, Yehova Mungu mir Israel uwacu kumae: 19 ‘Calu m’adundeni ujolo* lembe para man ijwigiri giri i wang’ Yehova kinde m’iwinjo pi gin m’awacu pi kabedo maeni man pi dhanu m’i iye nia kwong’ bibino i wigi man ndiri binego dhanu pigi; iyeco bongu peri man iwak i wang’a, an de awinji, Yehova wacu. 20 Pi thelembe maeno, abicoki karacelo ku kwaru peri,* man ibivuto ku kwiyocwiny i liel peri. Weng’i bineno ngo nyoth ceke m’abikelo iwi kabedo maeni.’”’” E gidwoko lembe maeno ni ubimo.

23 E ubimo uoro jucidh julwong’o judongo ceke mi Yuda ku mi Yeruzalem. 2 I ng’eye, ubimo ucidho i ot pa Yehova karacelo ku jumaco ceke mi Yuda, dhanu mi Yeruzalem ceke, julam man jubila, niwacu dhanu ceke niai i awiya nitundo i judongo. E esomo lembe ceke ma nwang’ere i buku mi lembariba ma junwang’u i ot pa Yehova i ithgi. 3 Ubimo ugam ucungo i ng’et mbegi man etimo lembariba* i wang’ Yehova, nia ebilubo Yehova man ebiworo lembang’ola pare, poyowic pare, man cik pare kud adundene ceke man ku ng’eyong’ec* pare ceke. Eng’olo nia ebitimo kumeno nwang’u ebekwo calku lembe ceke ma jukiewo i buku mi lembaribane. E dhanu zoo giyiyo dhu lembaribane.

4 I ng’eye, ubimo ng’olo ni Hilkia ma jalam ma dit ku julam mange ma gitimo kugi, man ni jukur dhugola nia giwodh cen kud i hekalu pa Yehova ajeni ceke ma juyiko pi Baal, pi mbegi mi thier,* man pir udul ceke m’i polo. E ewang’ugi woko mi Yeruzalem i podho mi Kidron, man etero vurune i Bethel. 5 Pieno, enego the tic mi julam mi mungu mi juwirok ma nwang’u jubim mi Yuda giketho kara gibed giduny yiro mi lam i kaka ma malu i adhura mi Yuda man i kabedo m’utieko Yeruzalem. Eriemo bende ju ma gibed giketho yiro mi lam uduny ni Baal, ni ceng’, ni dwi, ni yung’ini* mi zodiak, man ni udul ceke m’i polo. 6 Ewodho mbegi mi thier cen kud i ot pa Yehova etere nitundo i dhu adhura mi Yeruzalem, i Poga mi Kidron. E ewang’u mbegi mi thierne i Poga mi Kidron keca man eode edoko ni utur, e edhenyo uturne iwi liel mi jucan. 7 Erwombo bende udi mi jumaco ma timo asara mir hekalu m’ubino i ot pa Yehova man ma tie kaka ma mon gibed gikwoyo iye hema ma jubed juyiko ni hekalu pi woro mbegi mi thier.*

8 I ng’eye, ewodho julam ceke cen kud i adhura mi Yuda, man ecido kaka ma malu m’ubino kaka ma julam gibed giketho yiro mi lam uduny i iye, niai i Geba nitundo i Ber-ceba. Erwombo bende kaka ma malu mi dhugang’ m’ubino i kamondo mi dhugang’ pa Yocuwa ma jadit mir adhura, ma nwang’ere yor acam ka jubemondo kud i dhugang’ mir adhura. 9 Julam mi kaka ma malu gibed gitimo ngo i dhu pemlam pa Yehova i Yeruzalem, ento gibed gicamu mukathi ma thobi mbe i iye karacelo kud umego migi. 10 Ecido bende Tofeth ma nwang’ere i Poga pa Wot Hinom,* kara ng’atu moko acel de kud uwang’* wode kadi nyare i mac ni Molek. 11 Ekwero nia riuni ma jubim mi Yuda githiero* ni ceng’ kud umond i ot* pa Yehova kud i ot pa Nathan-melek ma jatic mi kal m’ubino i pond ot; man ewang’u magali pa ceng’ i mac. 12 Ubimo urwombo bende pemlam ma jubim mi Yuda giketho iwi ot, i kusika ma malu pa Ahaz, man pemlam ma Manase uketho i lela ario mi ot pa Yehova. Erungo igi man edhenyo utur migi i Poga mi Kidron. 13 Man ubimo ucido kaka ma malu m’i wang’ Yeruzalem m’ubino yo piny* mi got mi Nyoth,* ma Suleman m’ubimo mir Israel ugam ugiero ni mungu ma dhaku ma Actoreth ma en e gin ma judagu mi Jusidon; ni mungu ma Kemoc ma gin ma judagu mi Moab; man ni mungu ma Milkom ma gin ma judagu mi Juamon. 14 Eng’enyo i kidi mi thier nziki nziki man eng’ondo mbegi mi thier,* man epong’o kakagi ku cogo dhanu. 15 Erwombo bende pemlam mi Bethel, man kaka ma malu ma Yeroboam ma wod Nebat uyiko man m’ugam uketho Israel udubo. I ng’ey m’erwombo pemlam maeno man kaka ma malu, ewang’u kaka ma malu, eodo iye udoko ni utur, man ewang’u mbegi mi thier.*

16 Saa ma Yosiya ulokere man eneno liel ma n’i wi got, eketho jucoko cogo m’i lielnegi man eketho juwang’ugi iwi pemlam pi nicide, calku lembe pa Yehova ma dhanu pa Mungu mandha ugam uewo nia lembe maeni gibitimiri. 17 I ng’eye epenjo kumae: “Ca tie kidi mi liel pa ng’a m’abeneno ca?” E dhanu mir adhura gidwoko ire kumae: “Eca tie liel pa dhanu pa Mungu mandha m’uai i Yuda m’ular uewo pi lembe maeni m’itimo i kum pemlam mi Bethel.” 18 E eyero kumae: “Wuwek eyom. Ng’atu moko kud usend cogone.” Pieno gimulo ngo kum cogone man bende cogo jabila m’uai kud i Samaria.

19 Yosiya unyotho bende udi mi thier ceke mi kaka ma malu mir adhura mi Samaria zoo, ma jubim mir Israel gigiero pi ninyayu ng’eicwiny i Mungu, etimo lembe ma rom m’etimo i Bethel i kum udinegi. 20 Pieno, ethiero julam ceke mi kaka ma malu ma gibino kakeca iwi pemlam, man ewang’u cogo dhanu iwi pemlamnegi. I ng’eye, eloko edok i Yeruzalem.

21 I ng’eye, ubimo ung’olo ni dhanu ceke kumae: “Wutim Kadhukuwijo ni Yehova Mungu mwu calu ma jukiewo i buku maeni mi lembariba.” 22 Nwang’u fodi jutimo ngo kit Kadhukuwijo ma kumeni niai i nindo ma jupoklembe gibed gipoko iye lembe i Israel kadi i nindo ceke mi jubim mir Israel ku jubim mi Yuda. 23 Ento i oro mir apar aborane mi camuker p’Ubimo Yosiya, jutimo Kadhukuwijo maeni ni Yehova i Yeruzalem.

24 Yosiya udaru bende ju ma giweco ku tipo dhanu m’utho, juewlembe, terafim,* ayi gin m’acwiya ma gi gin ma judagu,* man gin ma judagu ceke m’ubino i ng’om mi Yuda man i Yeruzalem. Etimo kumeno pi nipong’o lembe ma jukiewo i buku mi Cik ma Hilkia ma jalam ugam unwang’u i ot pa Yehova. 25 Yor i wang’e jabim moko ubino mbe ma calu en m’ulokere i bang’ Yehova kud adundene ceke, ku ng’eyong’ec* pare ceke, man ku tegone ceke, calku Cik pa Musa ceke; kadi ng’atu moko mbe m’udok uwok i ng’eye ma calu en.

26 Ento asu lak kwinyo pa Yehova m’uopo i kum Yuda pi lembe ceke ma reco ma Manase utimo pi ninyayu ng’eicwiny i iye ukwiyo ngo. 27 Yehova uwacu kumae: “Abikabu Yuda de cen kud i wang’a, tap calu m’akabu ko Israel; man abiwenjo adhura maeni m’ang’iyo, niwacu Yeruzalem, man ot m’awacu pire nia, ‘jubilwong’o nyinga keca.’”

28 Dong kpawa mi kwo pa Yosiya man lembe ceke m’etimo, jukiewogi i buku mi kpawa mi jubim mi Yuda. 29 I rundi pa Yosiya, Farao Neko m’ubimo mi Misiri ubino nirombo kud ubimo mir Asiria i dhu kulo Efrath, e Yosia ucidho pi nikiedo kude; ento kinde ma Neko unene, enege i Megido. 30 E jutic pare giyeyo avuje i magali niai i Megido gidok kude i Yeruzalem man giyike i liel pare. I ng’eye, dhanu m’i ng’ombe giting’o Yehoahaz ma wod Yosiya, giwire man gikethe ni ubimo kaka won.

31 Yehoahaz ubino ku oro pier ario wi adek kinde m’edoko ubimo man ecamu ker pi dwi adek i Yeruzalem. Nying’ min ubino Hamutal ma nyaku pa Yeremia mi Libna. 32 Ecaku timo lembe ma rac i wang’ Yehova, calku lembe ceke ma kwaru pare gitimo. 33 Farao Neko ugam utwiye i kol i Ribla i ng’om mir Hamath pi nicere kara kud ebim i Yeruzalem, man eng’olo nia ng’om pare ucul amandi mi mola ma tar talanto* dak acel, ku mola ma kwar talanto acel. 34 M’umedo maeno, Farao Neko uketho wod Yosiya ma Eliakim ni ubimo kaka won ma Yosiya man eloko nyinge nia Yehoiakim; ento eting’o Yehoahaz edok kude i Misiri man ewok etho kuca. 35 Yehoiakim ugam umiyo mola ma tar ku mola ma kwar ni Farao, ento pi niculo mola ma tar ma Farao ukwayune, eng’olo ajok iwi dhanu m’i ng’ombe. Eng’olo wend mola ma tar ku mola ma kwar ma ng’atuman m’i ng’ombe ucikere nimiyo kara ecul ni Farao Neko.

36 Yehoiakim ubino ku oro pier ario wi abic kinde m’edoko ubimo, man ecamu ker pi oro apar acel i Yeruzalem. Nying’ min ubino Zebida ma nyaku pa Pedaya mi Ruma. 37 Emedere nitimo lembe ma rac i wang’ Yehova, calku lembe ceke ma kwaru pare gitimo.

24 I nindo mi camuker pa Yehoiakim, Ubimo Nebukadnezar mi Babeli ubin utugo lwiny i dhoge, e Yehoiakim udoko jatic pare pi oro adek. Ento egam elokere ire man ejai ire. 2 I ng’eye, Yehova ucaku oro udul mi weg ayeki mi Jukaldayo, Jusiria, Jumoab, man Juamon i kume. Ebed eorogi i kum Yuda kara ginyothe, nimakere ku lembe ma Yehova ular uyero nikadhu kud i bang’ jutic pare ma gi jubila. 3 I andha lembe maeno utimere i kum Yuda pilembe Yehova re m’ung’olo pi nikabugi cen kud i wang’e nikum dubo ceke ma Manase utimo, 4 man bende pi rimb dhanu ma gikoso ngo m’ecwiro; kum epong’o Yeruzalem ku rimb dhanu ma gikoso ngo man Yehova umito ngo ewek lembene.

5 Dong kpawa mi kwo pa Yehoiakim man lembe ceke m’etimo, jukiewogi i buku mi kpawa mi jubim mi Yuda. 6 I ng’eye, Yehoiakim uvuto pi niyom* karacelo ku kwaru pare; e wode ma Yehoiakin udoko ubimo kakare.

7 Ubimo mi Misiri upimo kendo ngo niwok kud i ng’om pare, pilembe ubimo mi Babeli uyaku piny ceke m’ubimo mi Misiri ubino ko, niai i ndaba mi Misiri nitundo i kulo Efrath.

8 Yehoiakin ubino ku oro apar abora kinde m’edoko ubimo, man ecamu ker i Yeruzalem pi dwi adek. Nying’ min ubino Nehucta ma nyaku pa Elnathan mi Yeruzalem. 9 Emedere nitimo lembe ma rac i wang’ Yehova tap calu ma won utimo. 10 I saa maeno, juaskari p’Ubimo Nebukadnezar mi Babeli gibino i kum Yeruzalem, man gitieko adhurane. 11 Ubimo Nebukadnezar mi Babeli ubino i bang’ adhurane kinde ma juaskari pare gitieke.

12 Ubimo Yehoiakin mi Yuda uwok i bang’ ubimo mi Babeli karacelo ku min, jutic pare, judongo ma wijo pare, man jutic pare ma dongo; e emake etere i ng’eca. Lembe maeno utimere i oro mir aborane mi camuker p’ubimo mi Babeli. 13 I ng’eye, ecoko lonyo ceke m’i ot pa Yehova man lonyo m’i kal* p’ubimo ku keca. Eng’ondo nziki nziki i ajeni ceke mi mola ma kwar ma Suleman m’ubimo mir Israel uyiko i hekalu pa Yehova. Lembe maeni utimere tap calu ma Yehova ular uyero. 14 Ecoko dhanu mi Yeruzalem ceke etero i ng’eca, judongo ma wijo ceke, jurumony ma jurukara ceke, man fundi ku ju ma timo tic mir uka* ceke; etero dhanu elufu apar (10 000) i ng’eca. Ng’atu moko acel de mbe m’udong’ i ng’eye, ndhu jucan ma ngolo ngolo m’i ng’ombe kendgi. 15 Kumeno re m’etero Yehoiakin i ng’eca i Babeli; eting’o bende min, mon pare, jutic pare ma dongo, man dhanu ma dongo m’i ng’ombe; ecokogi kud i Yeruzalem eterogi i ng’eca i Babeli. 16 Ubimo mi Babeli utero bende jurumony ceke i ng’eca i Babeli; wendgi ubino elufu abiro (7 000), etero bende fundi ku jutic mir uka* elufu acel (1 000); gin ceke gi dhanu ma tek man ma jutendogi pi lwiny. 17 Ubimo mi Babeli uketho Mathania m’umin won Yehoiakin ni ubimo kakare man eloko nyinge udoko Zedekia.

18 Zedekia ubino ku oro pier ario wi acel kinde m’edoko ubimo, man ecamu ker i Yeruzalem pi oro apar acel. Nying’ min ubino Hamutal ma nyaku pa Yeremia mi Libna. 19 Emedere nitimo lembe ma rac i wang’ Yehova tap calu ma Yehoiakim utimo. 20 Lembe maeno utimere i Yeruzalem man i Yuda nikum ng’eicwiny pa Yehova, nitundo m’elalugi cen kud i wang’e. Zedekia ugam ujai ni ubimo mi Babeli.

25 I oro mir abung’wende mi camuker pa Zedekia, i dwi mir apar, nindo apar mi dwije, Ubimo Nebukadnezar mi Babeli ubino i kum Yeruzalem kud udul askari pare ceke. Egonjo i kum adhurane man egiero gang’ i kume tingili pi nitieke, 2 man gitieko adhurane nitundo i oro mir apar acende mi camuker p’Ubimo Zedekia. 3 I nindo mir abung’wende mi dwi mir ang’wen kinde ma lak kec udoko tek mandha i adhurane, man cam ubino mbe ni dhanu m’i ng’ombe, 4 jugam jumugo wang’ gang’kidi, e juaskari ceke giringo ku diewor kud i dhugang’ ma n’i kind gang’kidi ario ceng’ini ku podho p’ubimo. Saa maeno nwang’u Jukaldayo gibetieko adhura; ubimo ke uringo kud i gengi m’ucidho i Araba. 5 Ento udul askari mi Jukaldayo giriemo tok ubimo man giwok ginwang’e i langa m’upoto mi Yeriko, juaskari pare ceke gilal kud i kume. 6 E gimaku ubimo gitere malu i bang’ ubimo mi Babeli i Ribla, man jung’olo lembe i wiye. 7 Junego wot Zedekia i wang’e m’ebeneno; i ng’eye Nebukadnezar uloyo wang’ Zedekia, etwiye ku kongo mi mola man etere i Babeli.

8 I dwi mir abije, nindo mir abiro mi dwije, i oro mir apar abung’wende mi camuker p’Ubimo Nebukadnezar mi Babeli, Nebuzaradan ma jadit mi jukur, ma en e jatic p’ubimo mi Babeli utundo i Yeruzalem. 9 Ewang’u ot pa Yehova, kal* p’ubimo, man udi ceke mi Yeruzalem; ewang’u bende udi mi dhanu ceke ma pigi tek. 10 Man juaskari mi Jukaldayo zoo ma gibino karacelo ku jadit mi jukur girwombo udi m’utieko Yeruzalem cen. 11 Nebuzaradan ma jadit mi jukur ugam ucoko dong dhanu m’udong’ i adhura, ju ma gipiey giringo i bang’ ubimo mi Babeli man dong lwak dhanu m’udong’, eterogi i ng’eca. 12 Ento jadit mi jukur uweko dhanu moko ma gi jucan ma ngolo ngolo gidong’ i ng’ombe kara gibed giyik kum yend ulok, man gitim tic mir adici. 13 Jukaldayo girungo i mbegi mi mola m’i ot pa Yehova nziki nziki, burwethi mi cwalu pii, man Nam mi mola m’ubino i ot pa Yehova; giyeyo molane gitero i Babeli. 14 Gicoko bende ndoy, lupau, jamnego mac, kikombe,* man ajeni ceke mi mola ma jubed jutimo ko tic i hekalu. 15 Bende jadit mi jukur ucoko tabu mi mac man tabu mi mola ma kwar ku mi mola ma tar m’alili. 16 Mola ma Suleman uyiko ko mbegi ario, Nam, man gadigadi i ot pa Yehova ubino lee dit uketho ecopere ngo nipimo pekne. 17 Mbegiman kabor pare ubino bot* apar abora, man uthac m’i wiye ubino mi mola; kabor mir uthacne ubino bot adek, man voi ku nying ulemo m’udhoko kum uthacne tingili juyikogi ceke ku mola. Mbegi mir ario ku voine de juyiko ayi ma rom.

18 Jadit mi jukur uting’o bende Seraya ma jadit mi julam, Zefania ma jalam mir ario, man jukur dhugola adek. 19 Man eting’o jadit mi kal acel kud i adhura m’ubino janen wi juaskari, ku dhanu abic ma gi jumii juk ma ceng’ini p’ubimo ma nwang’u gidong’ i adhura, man bende jagor pa jadit mir udul askari ma tie ng’atu m’ubed ucoko dhu juaskari m’i ng’ombe, man dhanu pier abusiel kud i kind dhanu m’i ng’ombe ma nwang’u gidong’ i adhura. 20 Nebuzaradan ma jadit mi jukur ucokogi man eterogi i bang’ ubimo mi Babeli i Ribla. 21 Ubimo mi Babeli ugoyogi man enegogi i Ribla i ng’om mir Hamath. Kumeno re ma jutero Yuda i ng’eca niai kud i ng’om pare.

22 Nebukadnezar m’ubimo mi Babeli uketho Gedalia ma wod Ahikam ma wod Cafan iwi dhanu m’eweko i ng’om mi Yuda. 23 Kinde ma judongo mir udul askari ceke ku dhanu migi giwinjo nia ubimo mi Babeli uketho Gedalia udong’ unen wi dhanu, e ndhu ndhu gibino i bang’e i Mizpa. Ju m’ubinone utie Ismael ma wod Nethania, Yohanan ma wod Kareya, Seraya ma wod Tanumeth ma Janetofa, man Yazania ma wod Maakath karacelo ku dhanu migi. 24 Gedalia ugam ukwong’o kwong’ ni judongone ku dhanu migi, ewacu igi kumae: “Lworo kud unegwu nibedo jutic mi Jukaldayo. Wukwo i ng’om maeni man wutim ni ubimo mi Babeli, e lembe biwotho ma ber iwu.”

25 I dwi mir abiro, Ismael ma wod Nethania ma wod Elicama m’ubino ng’atu acel m’i ot mi ker* ubino ku dhanu mange apar, e gigoyo Gedalia man ginege, ginego bende Juyahudi ku Jukaldayo ma gibino karacelo kude i Mizpa. 26 I ng’ey lembe maeno, dhanu ceke niai i kum awiya nitundo i kum judongo, uketho i iye judongo mir udul askari giai malu man giringo i Misiri, kum gibino lworo Jukaldayo.

27 I oro mi pier adek wi abirone niai m’Ubimo Yehoiakin mi Yuda ucidho i ng’eca, i dwi mir apar ario, nindo pier ario wi abiro mi dwije, Ubimo Evil-merodak mi Babeli ugonyo* Ubimo Yehoiakin mi Yuda kud i kol. I oro maeno re ma Evil-merodak udoko ubimo. 28 Ebed eweco ma ber i bang’e man edodo komker pare malu nisagu komker mi jubim mange ceke ma gibino karacelo kude i Babeli. 29 E Yehoiakin uwodho bongu pare mi kol cen, man ebed ecamu nja i dhu meza pare i dong kwo pare ceke. 30 Man ubimo uketho jubed jumiyo ire cam nja kubang’ ceng’ i dong kwo pare ceke.