LEMKEI MIR ARIO

1 Ker pa Suleman ma wod Daudi udoko tek magwei; Yehova Mungu pare de ubino karacelo kude man edode malu nisagu.

2 Suleman ugam uwaku Israel ceke: judongo mi dhanu elufu ku mi dhanu dak, jupoklembe, man judongo mir Israel ceke, niwacu judongo mi thepacu zoo. 3 I ng’eye, Suleman karacelo ku cokiri ceke gicidho kaka ma malu i Gibeon, kum nwang’u hema mi rombo pa Mungu mandha, ma Musa ma jatic pa Yehova ugam uyiko i langa ubino kuca. 4 Ento nwang’u Daudi uketho jugamu Sanduku pa Mungu mandha kud i Kiriath-jearim man jukele kaka m’eyiko pire; eguro hema ni Sandukune i Yeruzalem. 5 Man juketho pemlam mi mola ma Bezalel ma wod Uri ma wod Hur ugam uyiko i wang’ hema mi thier pa Yehova man Suleman ku cokiri ceke gibed girwo i wang’e.* 6 Suleman uthiero lam keca i wang’ Yehova. Ethiero lam m’awang’a elufu acel (1 000) iwi pemlam mi mola mi hema mi rombo.

7 I diewor nica, Mungu uwok ni Suleman man ewacu ire kumae: “Kway gin m’imaru amii iri.” 8 E Suleman udwoko ni Mungu kumae: “Inyutho mer ma lokere ngo ma lee dit ni Daudi ma vwa, man iketha ni ubimo kakare. 9 Kawoni, E Yehova Mungu, wek lembe m’ing’olo ni Daudi ma vwa utimere, kum iketha ni ubimo iwi dhanu ma wendgi lee calu nying utur mi ng’om. 10 Dong’ kawoni, mii ira rieko man ng’eyong’ec kara atel wi dhanu maeni,* kum ng’a ma copo poko lembe mi dhanu peri maeni ma wendgi dit kumeni?”

11 E Mungu uyero ni Suleman kumae: “Calu m’adundeni uyenyo gin maeni man ikwayu ngo jamcing’, lonyo, man yung kadi tho* mi ju m’udegi, ikwayu ngo bende nia ikwo lee,* ento ikwayu rieko ku ng’eyong’ec pi nipoko lembe mi dhanu para m’akethi ni ubimo i wigi, 12 abimiyo iri rieko man ng’eyong’ec. Ento abimiyo iri bende jamcing’ ku lonyo man yung m’ubimo moko acel de mbe m’ular ubedo ko i weng’i man ma bibedo ko i ng’eyi.

13 Pieno, Suleman uloko ku kaka ma malu ma n’i Gibeon, kaka ma hema mi rombo ubino i iye, edok i Yeruzalem; man ecamu ker iwi Israel. 14 Suleman umedere nicoko magali man riuni;* ebino ku magali elufu acel ku dak ang’wen (1 400) man riuni elufu apar ario (12 000). Ekethogi i adhura ma tung’ tung’ mi magali man ceng’ini kud ubimo i Yeruzalem. 15 Ubimo uketho mola ma tar man mola ma kwar unyamere i Yeruzalem calu kidi, man yend tido unyamere calu yend duru mi Cefela. 16 Riuni* pa Suleman ubed uai kud i Misiri man jukuloka p’ubimo gibed ging’iewo udul riuni* i bei ma rom. 17 Magaliman ma gibed giroyo niai kud i Misiri beine ubino tongolo mi mola ma tar dak abusiel, man riuni acel ke beine ubino dak acel ku pier abic; gin lundo, gidog gibed gilworogi* ni jubim ceke mi Juhithi man ni jubim mi Siria.

2 E Suleman ung’olo nia jugom ot pi nying’ Yehova man ot* mi ker pare. 2 Suleman ukiewo nying’ dhanu elufu pier abiro (70 000) pi niyeyo ter, dhanu elufu pier abora (80 000) pi nipayu kidi iwi gudi, man dhanu elufu adek ku dak abusiel (3 600) pi nineno wigi. 3 M’umedo maeno, Suleman uoro kwenda ni Hiram m’ubimo mi Turo kumae: “Tim ira bende calu m’itimo ni Daudi ma vwa kinde m’ioro ire yend tido kara egom ko ot* m’ekwo i iye. 4 Kawoni abegiero ot pi nying’ Yehova Mungu para, man athiere ire kara jubed juwang’ udok ma ng’wice ng’ar i wang’e, man bende pi mukathi ma jurodo iwi wadi* man pi lam m’awang’a, kugweno kud uthieno, i ceng’ Sabatu, i por pa dwi, man i nindo mi foc pa Yehova Mungu mwa. Maeni tie lembang’ola ma nja ku nja ni Israel. 5 Ot m’abegomo bibedo ma dit, kum Mungu mwa e dwong’ ma sagu mungu mange ceke. 6 Ento ng’a ma copo gomo ot ire? Kum kadok polo, eyo, kadi polo i dwong’ne zoo* de copo rome ngo. Dong’ an e ke a ng’a, ma nia agom ot ire? Gin m’aromo timo tie kende kende nigomo kaka ma juketho yiro mi lam uduny i iye i wang’e. 7 Kawoni or ira ng’atu moko ma jabodho m’ung’eyo cuu tic mi mola ma kwar, mi mola ma tar, mi mola, mi cuma, mi bongu ma nwang’ mi rangi m’uluga, mi wuzi ma kwar ngbo, mi wuzi mi ble* man ng’atu m’ung’eyo bodho mi ng’iko piny m’ang’ika. Ebitimo tic i Yuda man i Yeruzalem karacelo ku jubodho para, ma Daudi ma vwa ung’iyo. 8 Man or ira yend tido, yend jenevriye,* man yend algum mi Lebanon, kum ang’eyo cuu nia jutic peri ging’eyo nitong’o yen mi Lebanon cuu. Jutic para bitimo tic karacelo ku jutic peri. 9 Gibicoko ira dhu yen lee dit, kum ot m’abecigiero bibedo dwong’ dwong’ ma yerere ngo. 10 Man nen! abimiyo cam ni jutic peri, niwacu ni jung’ond yen ma gibing’ondo yen: nganu kor* elufu pier ario (20 000), nganu ma juyuke kor elufu pier ario, pigulok agulu* elufu pier ario, man mo agulu elufu pier ario.

11 E Hiram m’ubimo mi Turo ukiewo lembe ma e, eoro ni Suleman: “Yehova umaru dhanu pare, uketho ekethi ibed ubimo migi.” 12 Hiram udog umedo kumae: “Dong’ pak ubed ni Yehova Mungu mir Israel m’ucwiyo polo ku ng’om, pilembe emiyo ni ubimo Daudi wod ma riek, ma won ng’eyong’ec man ma nyang’ i lembe, ma bigiero ot ni Yehova man ot mi ker pare. 13 Abeoro Hiram-abi ma jabodho m’ung’eyo tic cuu mandha. 14 Etie wod dhaku ma nyasuru pa Dan, ento won ubino Jaturo. Eng’eyo tic mi mola ma kwar, mi mola ma tar, mi mola, mi cuma, mi kidi, mi yen, mi bongu ma nwang’ mi rangi m’uluga, mi wuzi mi ble,* mi bongu ma leng’, man mi wuzi ma kwar ngbo. Ecopo timo kit tic moko ci mi ng’iko piny man mi kubo piny ma jumiyo ire. Ebitimo karacelo ku jutic peri man ku jubodho pa rwoth para ma Daudi ma wuru. 15 Kawoni rwoth para, dong’ or nganu, nganu ma juyuke, mo man pigulok m’ing’olo nia ibimiyo ni jutic peri. 16 Wabing’ondo iri yen i Lebanon; wabing’ondo lee kadhiri m’iyenyo man wabitwiyo dhoggi karacelo, e wabiorogi ku yo mi pii nitundo i Yopa; in lundo ibilabugi nitundo i Yeruzalem.”

17 I ng’eye Suleman ukwanu jumaco ceke ma gibino umondo i ng’om mir Israel, i ng’ey kwan ma Daudi ma won ukwanu, man wendgi ubino elufu dak acel pier abic wi adek ku dak abusiel (153 600). 18 E eketho dhanu elufu pier abiro (70 000) m’i kindgi ni juyey ter, dhanu elufu pier abora (80 000) kara gibed gipay kidi iwi gudi, man junen wi tic elufu adek ku dak abusiel (3 600) kara gibed giketh dhanu tim tic.

3 E Suleman ucaku giero ot pa Yehova i Yeruzalem iwi got Moria, kaka ma Yehova gam uwok i iye ni Daudi ma won, tap kaka ma Daudi ugam uyiko i lela mi fwodo cam pa Ornan ma Jayebusi. 2 Ecaku giedone i nindo mir arionde mi dwi mir ario, i oro mir ang’wende mi camuker pare. 3 Kathere ma Suleman uketho pi nigiero ot pa Mungu mandha borne ubino bot pier abusiel man lacne ubino bot pier ario, calku jam pimo piny ma con.* 4 Pond ot ma n’i wang’e borne ubino bot pier ario, man emaku kalac mi ode,* kadongone ke ubino pier ario;* eumo kume yor i iye ku mola ma kwar m’alili. 5 Eumo kor ot ma ditne ku bau mi yen jenevriye.* I ng’eye, eumo wiye ku mola ma kwar ma leng’, man ekubo cal mi yend ngasi i kume man nyoro. 6 M’umedo maeno, eruko ode ku kidi ma beco ma pigi tek; man mola ma kwar m’etiyo ko ubino mola ma kwar m’uai i Parvaim. 7 Eumo kum otne, riune, wang’ dhugolane, kor ode, man dhugolane ku mola ma kwar; man eng’iko jukerubi i kor otne.

8 Eyiko kusika* ma tie Kamaleng’ m’usagu; bor pare rom ku kalac mi ode, niwacu bot pier ario, man kalacne de bot pier ario. Eumo kume ku mola ma kwar ma leng’ talanto* dak abusiel. 9 Pek mi mola ma kwar ma juyiko ko musumali ubino cekel* pier abic; man eumo kusika ma yo malu ku mola ma kwar.

10 I ng’eye, eyiko jukerubi ario i kusika* ma tie Kamaleng’ m’usagu, man eumo kumgi ku mola ma kwar. 11 Vomb jukerubine ceke bor migi ubino bot pier ario: jakerubine ma kwong’a vombe acel borne ubino bot abic man ubemulo kum kor ot, vombe ma kucelo de borne ubino bot abic man ubemulo vomb jakerubine ma kucelo. 12 Man jakerubi mir ario vombe acel borne ubino bot abic man ubemulo kor ot ma kucelo, man vombe ma kucelo de borne ubino bot abic man ubemulo vomb jakerubi ma kwong’a. 13 Jukerubi maeno giyaru vombgi umaku bot pier ario; man gicungo iwi tiendgi man giloko wang’gi yor i ot.*

14 Eyiko bende ridho mi wuzi mi ble,* mi bongu ma nwang’ mi rangi m’uluga, mi wuzi ma kwar ngbo, man mi bongu ma leng’; ekubo cal mi jukerubi i kume.

15 I ng’eye eyiko mbegi ario i wang’ ode; kadongo migi ubino bot pier adek wi abic man uthac m’i wi mbegineman ubino bot abic. 16 Man eyiko nyoro, ekethogi iwi mbegine, man eyiko nying ulemo dak acel man ekethogi iwi nyorone. 17 Ecomo mbegine i wang’ hekalune, acel yor acwic* ma kucelo ke yor acam;* ecaku nying’ ma yor acwic nia Yakin* man ma yor acam ke nia Boaz.*

4 I ng’eye, eyiko pemlam mi mola; bor pare ubino bot pier ario, lac iye bot pier ario, man kadongone bot apar.

2 Eyiko bende Nam ku cuma m’atwaga. Juyike nyangulu ngulu man ebino bot apar niai i dhoge acel nicidho i dhoge ma kucelo; dongone ubino bot abic man ngulu ngulu pare ubino bot pier adek. 3 Juyiko jamruko mir ayi p’upoko utieko dhu Namne tingili, i bot acel juketho apar. Juthero upokone leni ario man juthiedhogi karacelo ku Namne. 4 Namne ucungo iwi thwoni dhieng’ apar ario: adek ubeneno yo malu, adek ubeneno yo reto, adek ubeneno yo piny man adek ubeneno yo nyangu; jukethe iwi dhieng’ne, man giloko ng’eygi zoo yor i diere. 5 Dhoge ma thuthuru ubino wang’ cing’* acel; juyiko dhoge calu dhu kopo man calu thiwe. Ebed eroyo* pii agulu* elufu adek (3 000).

6 Bende, eyiko base apar; eketho abic yor acwic man abic yor acam. Jubed julwoko piny ma jutiyo ko pi lam m’awang’a i basenegi. Ento julam gibed gilogo ku pii mi Nam.

7 I ng’eye, eyiko tiend thala apar mi mola ma kwar calu m’ukwayere, man ekethogi i hekalu; eketho abic yor acwic man abic yor acam.

8 Eyiko bende meza apar man ekethogi i hekalu, abic yor acwic man abic yor acam; man eyiko tabu mi mola ma kwar dak acel.

9 Edok eyiko lela mi julam man lela ma dit. Eyiko bende dhugola mi lelane man eumo kum dhugolanegi ku mola. 10 Man eketho Nam yor acwic, ku yo piny ma yo nyangu.

11 Hiram uyiko bende tabu mi vuru, lupau man tabu.

E Hiram udaru tic ceke m’ubimo Suleman ukwayu etim pi ot pa Mungu mandha; eyiko gin ma e: 12 mbegi ario man uthac m’i wi mbegi ma juyiko ve kibakuli m’ubino iwi mbegi arione; jamruko ma ve voi ario pi niumo wi uthac ario ma juyiko ve kibakuli m’ubino iwi mbegi; 13 nying ulemo dak ang’wen pi jamruko ma ve voi ario, nying ulemo leni ario pi jamrukoneman, pi niumo wi uthac ario ma juyiko ve kibakuli iwi mbeginegi; 14 burwethi mi cwalu pii apar ku base apar m’i wigi; 15 Nam man thwoni dhieng’ apar ario ma Namne bedo i wigi. 16 tabu mi vuru, lupau, kanya, man ajeni ceke ma Hiram-abiv uyiko ku mola m’afwoda ni ubimo Suleman pi ot pa Yehova. 17 Ubimo uthiedhogi i ulobo ma dhoge thuthuru i theng ng’om mi Yordan i kind Sukoth ku Zereda. 18 Suleman uyiko ajeni maeno ceke i kadhiri ma lee dit, uketho jupimo ngo pek mi mola.

19 Suleman uyiko ajeni ceke pi ot pa Mungu mandha: pemlam mi mola ma kwar; meza ma jubed juketho mukathi m’anyutha i wigi; 20 tiend thala ku thala m’i wigi mi mola ma kwar m’alili, kara ubed uliel i wang’ Kamaleng’ m’usagu* calu ma cik ukwayu; 21 man thiwe, thala, pensi mi mola ma kwar pi ng’wenyo piny, ma en e mola ma kwar m’alili; 22 jamnego mac, tabu, kikombe,* tabu mi mac mi mola ma kwar m’alili; man eyiko kamondo mi ode, dhugolane m’umondo i Kamaleng’ m’usagu, man dhugola mi ot mir hekalu ku mola ma kwar.

5 E Suleman udaru tic ceke m’ukwayu etim pi ot pa Yehova. Suleman ugam uroyo piny ma Daudi ma won udwoko leng’ i ode, man eketho mola ma tar, mola ma kwar, ku jamtic mange ceke i kakanpiny mi ot pa Mungu mandha. 2 I saa maeno, Suleman ucoko dhu judongo mir Israel, niwacu jutelwic ceke mi suru man judongo mi thepacu mir Israel. Gibino i Yeruzalem pi nigamu sanduku mi lembariba pa Yehova kud i adhura pa Daudi, niwacu Sayuni. 3 Jumaco ceke mir Israel gicokiri i wang’ ubimo pi nitimo foc* ma jubed jutimo i dwi mir abiro.

4 E judongo ceke mir Israel gibino, man Julawi gigam giting’o Sanduku. 5 Giyeyo Sanduku, hema mi rombo man ajeni ceke ma leng’ m’ubino i hemane. Julam ku Julawi* re ma giyeyogi. 6 Ubimo Suleman karacelo ku cokiri ceke mir Israel ma juwaku pi nibino rombo kude gibino i wang’ Sanduku. Pieno, juthiero rombe ku dhieng’ ma wendgi lee dit ma copo kwanere de ngo. 7 I ng’eye, julam gitero sanduku mi lembariba pa Yehova kakare, i kusika m’upondo mi ot, niwacu i Kamaleng’ m’usagu, i the vomb jukerubi. 8 E vomb jukerubi uyarere iwi ka ma Sandukune n’i iye; kumeno re ma jukerubine giumo wi Sanduku man wi ramak ma juyeye ko ku malu. 9 Ramakne gibino bor lee dit, uketho dhoggi ubed unen niai kud i Kamaleng’ ma nwang’ere i wang’ kusika m’upondo, ento gibed ginen ungo ku woko. Man gitie keca nitundo tin. 10 Piny mange ubino mbe i Sandukune, ndhu bankidi ario ma Musa ugam uketho i iye i Horeb, kinde ma Yehova timo lembariba ku dhanu pare Israel saa ma giwok kud i Misiri.

11 Kinde ma julam giwok kud i Kamaleng’ (kum julam ceke mir ungu ceke ma gibino nuti gidwokiri gigi leng’), 12 Julawi ceke ma gi juruwer ma gini the telowic p’Asaf, pa Heman, pa Yeduthun, man pa wodgi man umego migi gikendiri ku bongu ma leng’ ma gimaku jamgoyo wer ma woy awoya, jamgoyo wer ma juthondhe man adungu. Gicungo yo nyangu mi pemlam, man julam dak acel pier ario ma gibekudho agwara gibino karacelo kugi. 13 Kinde ma jukudh agwara man juruwer gibepaku Yehova man gibedwoko ire foyofoc ma dwandgi ripo acel, man kinde ma dwand agwara, dwand jamgoyo wer ma woy awoya, man dwand jamtic mange mi goyo wer ubeidho kinde ma gibepaku Yehova, “pilembe e ber man mer pare ma lokere ngo bedo rondo ku rondo,” afuru gam upong’o ot bik, niwacu ot pa Yehova. 14 Afurune uketho ecopere ngo ni julam nicungo pi nitimo tic migi, kum dwong’ pa Yehova upong’o ot pa Mungu mandha bik.

6 I saa maeno, Suleman uwacu kumae: “E Yehova, igam iyero nia ibibedo i mudho ma col bii. 2 Kawoni adaru giero iri ot ma dwong’, ma en e kaka acel kara ibed i iye mi nja.”

3 I ng’eye, ubimo ulokere i bang’ dhanu ceke mir Israel ma gicungo man ecaku miyo mugisa iwi cokiri ceke mir Israel. 4 Eyero kumae: “Pak ubed ni Yehova Mungu mir Israel, ma ku dhoge gire ung’olo ni Daudi ma vwa, man ku cinge gire uketho lembene utimere; kum ewacu kumae: 5 ‘Niai i nindo m’awodho dhanu para Israel kud i ng’om mi Misiri, ang’iyo ngo adhura moko kud i suru ceke mir Israel ma nia jugier ot i iye pi nyinga kara juyung nyinga keca, man ang’iyo ngo ng’atu moko nia ubed jatela mi dhanu para Israel. 6 Ento ang’iyo Yeruzalem kara nyinga ubed i iye, man ang’iyo Daudi utel wi dhanu para Israel.’ 7 Daudi ma vwa ubino kud ava ma lee i adundene nigiero ot pi nying’ Yehova Mungu mir Israel. 8 Ento Yehova uyero ni Daudi ma vwa kumae: ‘Imito niai i adundeni nigiero ot pi nyinga, tie rac ungo nibedo kud ava maeno i adundeni. 9 Re ibigiero ode in ungo, ento wodi ma binyolere iri* re ma bigiero ot pi nyinga.’ 10 Yehova upong’o lembe m’eng’olo, kum acamu ker kaka vwa ma Daudi, man abedo iwi komker mir Israel tap calu ma Yehova ung’olo. Agiero bende ot pi nying’ Yehova Mungu mir Israel, 11 man i ode aketho Sanduku ma tie ku bankidi mi lembariba ma Yehova utimo karacelo ku dhanu mir Israel.”

12 I ng’eye, ecungo i wang’ pemlam pa Yehova i wang’ cokiri ceke mir Israel, man ethang’u cinge. 13 (Nwang’u Suleman uyiko bop mi mola man ekethe i die lela. Bor pare ubino bot* abic, kalacne bot abic, man kadongone bot adek; e ecungo i wiye.) Man erum piny i wang’ cokiri ceke mir Israel, ethang’u cinge malu i polo, 14 ewacu kumae: “E Yehova Mungu mir Israel, Mungu moko mbe ma calu in i polo kadi iwi ng’om. Igwoko lembariba man inyutho mer ma lokere ngo ni jutic peri ma gibewotho i weng’i kud adundegi ceke. 15 Ipong’o lembe m’ing’olo ni jatic peri ma Daudi ma vwa. Itimo lembang’ola ku dhogi giri, man tin iketho epong’o ku cingi giri. 16 Man kawoni, E Yehova Mungu mir Israel, pong’ lembe m’ing’olo ni jatic peri ma Daudi ma vwa kinde m’iyero kumae: ‘Tek woti gibedo ku wang’gi i kum timo migi man gilubo cik para, tap calu m’iwotho i yo para, e saa ceke kodhini bikoso ngo nibedo iwi komker mir Israel.’ 17 Dong’ kawoni, E Yehova Mungu mir Israel, wek lembe m’ing’olo ni jatic peri Daudi ubed lembe ma jugeno.

18 “Ento nyo andha Mungu bibedo karacelo ku dhanu iwi ng’omi? Nen! polo, eyo, polo i dwong’ne zoo* de copo romi ngo; dong’ ot maeni m’agiero iri tie nok rukani! 19 Kawoni cik ithi iwinj rwo pa jatic peri man kwac m’ebekweyi ko pi ninwang’u bero i weng’i, E Yehova Mungu para, man winj wak para m’abekwayu ko kony i beng’i, man rwo para an a jatic peri m’aberwo ko i weng’i. 20 Dong’ weng’i bed ayaba yor i bang’ ot maeni dieceng’ ku diewor, man yor i bang’ kabedo maeni m’iyero pire nia ibiketho nyingi i iye, kara iwinj rwo ma jatic peri uberwo ko yor i bang’ kabedo maeni. 21 Dong’ iwinj wak pa jatic peri m’ebekwayu ko kony man wak mi dhanu peri Israel kinde ma gibekwayu yor i bang’ kabedo maeni, man dong’ iwinj kud i kabedo peri i polo; eyo, dong’ iwinji man iwek igi.

22 “Tek ng’atu moko udubo ni wadi man juketho ekwong’o kwong’,* e en’i the kwong’* maeno, man i saa ma en’i the kwong’ne ebino i wang’ pemlam peri i ot maeni, 23 dong’ iwinj niai kud i polo man itim, ipok lembe mi jutic peri m’icul ko ni ng’atu ma rac kawang’ racu m’etimo, man ikel racu pare i wiye gire, ento inyuth nia ng’atu ma pwe lembe mbe i wiye,* man imii ire sukulia nimakere ku bedopwe pare.

24 “Man tek judegi mi dhanu peri Israel uloyogi pilembe gimediri nidubo iri, ento gilokiri i beng’i giyungo nyingi man girwo, gikweyi kara ginwang’ bero i weng’i i ot maeni, 25 dong’ iwinji kud i polo man iwek dubo mi dhanu peri Israel, man idwokgi i ng’om m’ilar imiyo igi man ni kwarugi.

26 “Kinde ma dhu polo ucikere man koth ubecwii ngo pilembe gimediri nidubo iri, ento girwo yor i bang’ kabedo maeni man giyungo nyingi man gilokiri kud i dubo migi pilembe ijwigogi,* 27 dong’ iwinji kud i polo man iwek dubo mi jutic peri, mi dhanu peri Israel, kum ibiponjogi pi yo ma ber m’ukwayu giwoth i iye; man ikel koth iwi ng’om peri m’imiyo ni dhanu peri calu giralaga.

28 “Tek ndru upodho i ng’om kadi thong’om, yamu ma thwoyo cam, laimo, udul bonyo kadi ungulu ma nyotho cam; kunoke tek judegi migi gitiekogi i adhura moko ci m’i ng’om maeni,* kadi tek kit masendi moko ci mange kunoke tho uwok, 29 e rwo moko ci man kwac moko ci ma ng’atu moko kadi dhanu peri Israel zoo gibikwayu (kum ng’atuman ung’eyo masendi man litho pare en gire) kinde ma githang’u cing’gi yor i bang’ ot maeni, 30 dong’ iwinji kud i polo ma tie kabedo peri, man iwek igi man ikonygi; man imii sukulia ni ng’atuman calku yo pare ceke, kum ing’eyo adundene (in kendi m’ing’eyo adunde dhanu cuu mandha), 31 kara gilwori man giwoth i yo peri i nindo ceke ma gibikwo i iye iwi ng’om m’imiyo ni kwaruwa.

32 “Bende pi jawirok ma tie ngo ng’atu m’i kind dhanu peri Israel man m’uai kud i ng’om ma bor pi nyingi* ma dwong’, pi tego mi cingi, man pi boti m’irieyo, tek ebino man erwo yor i bang’ ot maeni, 33 dong’ iwinj kud i polo, ma tie kabedo peri, man itim gin ceke ma jawirokne ukwayu i beng’i, kara dhanu ceke m’i wi ng’om ging’ey nyingi man gilwori calu ma dhanu peri Israel gibetimo, man kara ging’ey nia nyingi ulwong’ere i kum ot maeni m’agiero.

34 “Tek dhanu peri gicidho nikiedo lwiny i dhu judegi migi kaka moko ci m’iorogi i iye, man girwo i beng’i yor i bang’ adhura maeni m’ing’iyo man yor i bang’ ot m’agiero pi nyingi, 35 dong’ iwinj rwo migi kud i polo man kwac migi ma gikwayu pi ninwang’u bero i weng’i man ikonygi.

36 “Tek gidubo iri (kum ng’atu moko mbe ma dubo ngo), man ng’eicwiny umeki i kumgi, man iwekogi i cing’ judegi, e ju m’umakugi uterogi i ng’eca i ng’om moko ma bor kunoke ma ceng’ini, 37 man kud i ng’om ma juterogi ng’eca i iye kuca rieko migi dwogo man gilokiri i beng’i, gikweyi kara ginwang’ bero i weng’i i ng’om ma juterogi ni ng’eca i iye ma giyero nia, ‘wadubo, wakier man watimo lembe ma rac dit,’ 38 man gilokiri i beng’i kud adundegi ceke, ku ng’eyong’ec* migi ceke kud i ng’om mi ng’eca ma juterogi i iye ni ng’eca, man girwo ma gilokiri yor i bang’ ng’om migi m’imiyo ni kwarugi man i bang’ adhura m’ing’iyo man yor i bang’ ot m’agiero pi nyingi, 39 e niai kud i polo ma tie kabedo peri, winj rwo migi man kwac migi ma gikwayu pi ninwang’u bero i weng’i man ikonygi; man iwek dubo ma dhanu peri gitimo iri.

40 “Kawoni, E Mungu para, akweyi, dong’ weng’i bed ayaba man cik ithi pi niwinjo rwo ma juberwo i* kabedo maeni. 41 Man kawoni, E Yehova Mungu, idh malu i kayom peri, in ku Sanduku mi tego peri. E Yehova Mungu, wek julam peri gironyiri ku both man wek anyong’a neg dhanu ma gibegwoko bedoleng’ migi iri pi lembe ma beco m’itimo. 42 E Yehova Mungu, kud iwenj* ng’atu peri ma juwiro. Dong’ ipoy pi mer ma lokere ngo m’inyutho ni Daudi ma jatic peri.”

7 Saa ma Suleman udaru nirwo, e ndhu ndhu mac uloro kud i polo man uwang’u lam m’awang’a ku lam, man dwong’ pa Yehova upong’o otne. 2 Ecopere ngo ni julam nimondo i ot pa Yehova, pilembe dwong’ pa Yehova upong’o ot pa Yehova. 3 Dhanu mir Israel ceke gibino neno kinde ma mac uloro man dwong’ pa Yehova ubino iwi ode; e girum piny man gipodho arieba wang’gi i ng’om kaka ma jutelo. Gidong’ asu iwi ng’om man gifoyo Yehova “pilembe e ber man mer pare ma lokere ngo bedo rondo ku rondo.”

4 E ubimo ku dhanu ceke githiero lam i wang’ Yehova. 5 Ubimo Suleman uthiero dhieng’ elufu pier ario wi ario (22 000) man rombe elufu dak acel pier ario (120 000). Kumeno re m’ubimo man dhanu ceke giyabu dhu* ot pa Mungu mandha. 6 Julam gigam gicungo kaka ma gibed gitimo iye tic, man bende Julawi ma gibino ku jamgoyo wer ma jubed jugoyo kinde ma jubewero wer ni Yehova. (Ubimo Daudi re m’ugam uyiko jamgoyo wer maeno pi nidwoko foyofoc ni Yehova saa ma Daudi ubed upake karacelo kugi,* “kum mer pare ma lokere ngo bedo rondo ku rondo.”) Julam gibino kudho agwara ma tek i wang’gi; saa maeno, nwang’u Juisrael ceke gicungo acunga.

7 I ng’eye, Suleman udwoko die lela ma n’i wang’ ot pa Yehova udoko leng’, kum keca re m’egam ethiero lam m’awang’a man miyo mi lam mi kwiyocwiny, pilembe pemlam mi mola ma Suleman uyiko ubino nok dit m’ecopo romo ngo lam m’awang’a, lam mi kwiyocwiny, girathiera mi nying cam, man miyo. 8 I nindo nica, Suleman utimo foc karacelo ku Israel ceke pi ceng’ abiro; ebino cokiri ma dit mandha mi dhanu m’uai i Lebo-hamath* niloro piny i ndaba* mi Misiri. 9 Ento i nindo mir aborane,* gitimo coko ma dit, pilembe gitimo foc mi yabu dhu pemlam pi ceng’ abiro man foc mi otbak pi ceng’ abiro. 10 E i nindo mi pier ario wi adege mi dwi mir abiro, elalu dhanu; e gidok i pacu migi ma gitie ku mutoro man m’anyong’a ubenego adundegi pi bero ceke ma Yehova utimo ni Daudi, ni Suleman man ni Israel ma dhanu pare.

11 Kumeno re ma Suleman udaru nigiero ot pa Yehova man ot* p’ubimo, man gin ceke ma Suleman ubino paru i adundene pi ot pare man pi ot pa Yehova, etimogi ma ber mandha. 12 I ng’eye, Yehova uwok ni Suleman diewor man ewacu ire kumae: “Awinjo rwo peri man ang’iyo ot maeni ni kaka ma jubed juthier ira lam i iye. 13 Tek aciko dhu polo man koth ucwii ngo, man tek ang’olo ni bonyo unyoth ng’om man aoro thong’om i kind dhanu para, 14 tek dhanu para ma nyinga lwong’ere i kumgi gijwigiri gigi, girwo man giyenyo kakara,* gilokiri cen kud i yo migi ma reco, e abiwinjo kud i polo, abiweko dubo migi man abicangu ng’om migi. 15 Niai kawoni, wang’a bibedo ayaba man abiciko itha pi niwinjo rwo mi kabedo maeni. 16 Man kawoni, ang’iyo ot maeni man adwoke leng’ kara nyinga ubed i iye mi nja, man wang’a kud adundena bibedo i wiye saa ceke.

17 Man in, tekene iwotho i wang’a calu ma wuru ma Daudi uwotho, m’itimo gin moko ci m’ang’olo iri man iworo cik para ku lembapoka para, 18 e abiketho komker mi ker peri bicungo nging’ nging’, tap calu m’atimo lembariba ku Daudi ma wuru, ayero kumae: ‘Saa ceke kodhini bikoso ngo nibimo iwi Israel.’ 19 Ento tek wulokuru cen man wuweko cik para man lembang’ola para m’aketho i weng’wu, ento wucaku timo ni mungu mange man wurum i wang’gi, 20 abimugo Israel cen kud i ng’om para m’amiyo igi, man abinyotho ot maeni m’adwoko leng’ pi nyinga cen kud i wang’a, man abiketho ebidoko ni jamcac* man jamng’iero i kind dhanu ceke. 21 Man ot maeni bidoko ni uvuru. E ng’atu moko ci m’ubekadhu kud i ng’ete binene ku zungo man ebiwacu kumae: ‘Pirang’o Yehova utimo lembe ma kumeni i kum ng’ombuni man i kum ot maeni?’ 22 E jubidwoko ire kumae: ‘Etie pilembe giweko Yehova Mungu pa kwarugi m’uwodhogi kud i ng’om mi Misiri man gimoko i kum mungu mange, girum i wang’gi, man gitimo igi. Pi thelembe maeno re m’ekelo peko maeni ceke i wigi.’”

8 Suleman uting’o oro pier ario pi nigiero ot pa Yehova man ot* pare. 2 Suleman ugiero kendo adhura ma Hiram umiyo ire man eketho Juisrael* i igi. 3 M’umedo maeno, Suleman ucidh ukiedo lwiny i dhu dhanu mir Hamath-zoba man emaku ng’ombe. 4 I ng’eye, egiero kendo Tadmor i langa man adhura ceke ma jukanu piny i igi m’elar egiero i Hamath. 5 Egiero bende Beth-horon ma yo malu ku Beth-horon ma yo piny, ma gitie adhura ma tek ma gitie ku gang’kidi, dhugang’, man riu; 6 man Baalath kud adhura ceke ma Suleman kanu piny i igi, adhura ceke mi magali, adhura mi juring riuni,* ku gin moko ci ma Suleman uyenyo nigiero i Yeruzalem, i Lebanon, man i ng’om ceke ma ni the bimobim pare.

7 Dhanu ceke ma gidong’ kud i kind Juhithi, Juamor, Juperizi, Juhivi, man Juyebusi, ma gibino ngo i kind Juisrael, 8 nyikwaygi ma gidong’ i ng’ombe, niwacu ju ma Juisrael unyothogi ngo, Suleman ukethogi nitimo tic mir adici calu ng’eca nitundo tin eni. 9 Ento Suleman uketho ngo Jaisrael moko acel de udoko ng’eca pi nitimo tic pare pilembe gibino jurumony pare, judongo mi jutelwic pare, judongo mi juring magali pare, man mi juring riuni* pare. 10 Judongo ma gibino iwi juwitic p’ubimo Suleman gibino dhanu dak ario ku pier abic; gibed gitelo wi dhanu.

11 Suleman uwodho bende Nya Farao kud i Adhura pa Daudi, edwoke i ot m’egiero ire, kum ewacu kumae: “Kadok etie dhaku para de, ukwayu ngo ebed i ot pa Daudi m’ubimo mir Israel, kum kabedo ma Sanduku pa Yehova ubino i igi gitie leng’.”

12 I ng’eye, Suleman uthiero lam m’awang’a ni Yehova iwi pemlam pa Yehova m’egiero i wang’ pond ot. 13 Ethiero lam ma kubang’ ceng’ man lam ma cik pa Musa ung’olo pi ceng’ Sabatu, pi por pa dwi, man pi foc ma jutimo wang’ adek kubang’ oro, niwacu Foc mi mukathi ma thobi mbe i iye, Foc mi yenga, man Foc mi otbak.* 14 M’umedo maeno, eketho ungu mi julam gitim tic migi nimakere ku lembe ma Daudi ma won ung’olo, man eketho Julawi i tic migi kara gipak Mungu man gikony* julam calu m’ukwayere kubang’ ceng’, man jukur mi dhugang’ i ungu migi kara gibed gikur dhugang’ ma tung’ tung’, kum eno re m’utie lembe ma Daudi ma dhanu pa Mungu mandha ugam ung’olo. 15 Man gikier ungo kud i kum cik m’ubimo ng’olo ni julam man ni Julawi pi lembe moko ci kadi pi lembe m’uneno dero. 16 Pieno, tic pa Suleman ceke upangere ma ber,* niai ma juketho the giedo mi ot pa Yehova cil m’ethum ko. E judaru nigiero ot pa Yehova.

17 I ng’eye Suleman ucidho i Ezion-geber man i Eloth i dhu nam i ng’om mir Edom. 18 Hiram uoro jutic pare gitero ire meli man junam ma ging’eyo lemnam cuu gicidho karacelo ku jutic pa Suleman i Ofir; ku kuca giyeyo mola ma kwar talanto* dak ang’wen ku pier abic gitero ni Ubimo Suleman.

9 Ubimo ma dhaku mi Ceba ugam uwinjo rwong Suleman; pieno ebino i Yeruzalem kara emul i Suleman ku penji ma tek.* Ewotho ku piro mi dhanu ma lee dit man ku ngamia m’uyeyo moj balsam ku mola ma kwar i kadhiri ma lee dit man kidi ma pigi tek. Emondo i bang’ Suleman man eweco kude iwi lembe ceke m’ubino i adundene. 2 E Suleman udwoko wang’ penji pare ceke. Gin moko acel de mbe ma koro iye ire ubino tek* ni Suleman.

3 Kinde m’ubimo ma dhaku mi Ceba uneno rieko pa Suleman, ot m’egiero, 4 cam m’i wi meza pare, kite ma judongo pare gibedo ko i dhu meza, kite ma jutic pare ma gitimo i dhu meza gimiyo ko cam man kendi migi, ju ma gimiyo ire giramadha man kendi migi, man lam m’awang’a m’ebed ethiero i ot pa Yehova, e dhoge thwo kaw.* 5 Egam ewacu ni ubimo kumae: “Rwonglembe m’awinjo kinde m’an’i ng’om para iwi lembe m’itimo* man iwi rieko peri ubino lemandha. 6 Ento ayiyo ngo lembe ma jukorone nitundo m’abino an gira man aneno ku wang’a gira. Re kenen! karaman jukoro ngo ira kadok ng’et dwong’ mi rieko peri. Ikadhu rwonglembe m’awinjo swa. 7 Dhanu peri gi jumutoro, man jutic peri ma gicungo i weng’i saa ceke man giwinjo rieko peri de gi jumutoro! 8 Pak ubed ni Yehova Mungu peri m’ukethi iwi komker pare kara ibed ubimo ni Yehova Mungu peri, pilembe anyong’a unege i kumi. Calu ma Mungu peri umaru Israel man emito gibed pi nja, ekethi ni ubimo iwi Israel, kara ipok lembe atira man iketh bedopwe utimere.”

9 I ng’eye, emiyo mola ma kwar talanto* dak acel ku pier ario ni ubimo man moj balsam kadhiri ma lee dit man bende kidi ma pigi tek. Jukelo ngo kendo moj balsam kadhiri ma lee rom ku m’ubimo ma dhaku mi Ceba ukelo ni Ubimo Suleman.

10 M’umedo maeno, jutic pa Hiram man jutic pa Suleman ma gikelo mola ma kwar niai kud i Ofir, gikelo bende yend algum man kidi ma pigi tek. 11 Ubimo uyiko mangasi mi ot pa Yehova man mi ot* pare ku yend algumne, man eyiko ko bende adungu ku jamgoyo wer ma juthondhe ni juruwer. I wang’e nwang’u fodi juneno ngo piny moko ma kumeno i ng’om Yuda.

12 Ubimo Suleman bende umiyo ni ubimo ma dhaku mi Ceba piny ceke m’emito man m’ekwayu, nisagu* piny m’ekelo ni ubimo. I ng’eye, eloko edok i ng’om pare karacelo ku jutic pare.

13 Mola ma kwar m’ubed umondo ni Suleman kubang’ oro pekne ubed utundo talanto dak abusiel ku pier abusiel wi abusiel, 14 m’uweko mola ma kwar man mola ma tar ma jukuloka ma wotho awotha, jukuloka, jubim ceke mir Arabia man jubim mi theng ng’om* gibed gikelo ni Suleman.

15 Ubimo Suleman uyiko ban ma dongo dak ario ku mola ma kwar m’ajeba (banman ucamu mola ma kwar m’ajeba cekel* dak abusiel). 16 Eyiko bende nyithi ban* dak adek mi mola ma kwar m’ajeba (nyathi banman ucamu mola ma kwar mina* adek). I ng’eye ubimo ukethogi i ot ma julwong’o Ot mi luli mi Lebanon.

17 Ubimo uyiko bende komker ma dit mi lak liec man eumo kume ku mola ma kwar m’alili. 18 Pi nitundo i bang’ komkerne, mangasi ubino abusiel man i kum komkerne jutwiyo dul mi the tielo mi mola ma kwar. Cing komne ubino nuti kun ku kun, man umvor ario ucungo i ng’et cingeman. 19 Umvor apar ario ucungo iwi mangasi abusiel zoo, umvor acel acel i dhu mangasi abusiel ceke. Ker mange mbe m’uyiko piny ma kumeca. 20 Kikombe* mi giramadha p’Ubimo Suleman ceke ubino mi mola ma kwar, man ajeni ceke m’i ot ma julwong’o Ot mi luli mi Lebanon ubino mi mola ma kwar m’alili. Piny moko ma juyiko ku mola ma tar ubino mbe, kum i nindo pa Suleman jubed juneno mola ma tar ni gin moko ngo. 21 Kum meli p’ubimo ubed ucidho i Tharsis karacelo ku jutic pa Hiram. Wang’ acel i ng’ey oro adek, udul meli mi Tharsis ubed udwogo ma nwang’u giyeyo mola ma kwar, mola ma tar, lakliec, way, man weliweli.

22 Pieno, lonyo man rieko p’Ubimo Suleman ubino dit nisagu mi jubim mange ceke mi ng’om. 23 Man jubim mi ng’om zoo gibed gisayu giwec ku* Suleman kara giwinj rieko pare ma Mungu mandha uketho i adundene. 24 Ng’atuman ubed ubino ku giramiya; gibed gikelo piny ma juyiko ku mola ma tar, piny ma juyiko ku mola ma kwar, bongu, jamlwiny, moj balsam, riuni,* man kit kana mange.* Jubed jutimo kumeno kubang’ oro. 25 Suleman ubino ku kusika elufu ang’wen (4 000) ma jugwoko iye riuni ku magali pare man ebino ku riuni* elufu apar ario (12 000). Ebed egwokogi i adhura mi magali man ceng’ini ku kaka m’ebedo i iye i Yeruzalem. 26 Man ebimo wi jubim ceke ma niai i Kulo* nicidho i ng’om mi Jufilisti man nitundo i kieu mi Misiri. 27 Ubimo uketho mola ma tar unyamere i Yeruzalem calu kidi, man yend tido unyamere calu yend duru mi Cefela. 28 Man jubed jukelo riuni* ni Suleman niai kud i Misiri, man niai kud i ng’om mange ceke.

29 Dong kpawa mi kwo pa Suleman, niai i acaki nitundo i ajiki, jukiewogi i kind lembe pa Nathan ma jabila, i lembila pa Ahiya ma Jacilo, man i lembagora mi gin ma wok i wang’ ma Ido ma jaewlembe ukiewo pi Yeroboam ma wod Nebat. 30 Suleman ubimo iwi Israel ceke i Yeruzalem pi oro pier ang’wen. 31 I ng’eye, Suleman ugam uvuto pi niyom karacelo ku kwaru pare man jukunye i Adhura pa Daudi ma won; e wode ma Rehoboam udoko ubimo kakare.

10 Rehoboam ugam ucidho i Cekem, kum nwang’u Juisrael ceke gicidho i Cekem pi nikethe ebed ubimo. 2 Yeroboam ma wod Nebat ugam uwinjo lembene (nwang’u fodi asu en’i Misiri pilembe egam eringo Ubimo Suleman), e Yeroboam udwogo kud i Misiri. 3 I ng’eye jucidh julwong’e, man Yeroboam ku Israel ceke gibino i bang’ Rehoboam man giwacu ire kumae: 4 “Wuru udwoko mberembere mwa udoko pek. Ento in tekene idwoko tic ma pek* ma wabed watimo ni wuru udoko yot, man idwoko mberembere ma pek m’eketho i wiwa udoko yot, e wabitimo iri.”

5 Egam eyero igi kumae: “Wudwog i bang’a i ng’ey nindo adek.” E dhanu gidok. 6 Ubimo Rehoboam ugam ukwayu juk i bang’ judongo* ma gitimo ni Suleman ma won kinde ma fodi ebino kwo, ewacu kumae: “Wuparu nia ukwayu adwok lembe nenedi ni dhanu maeni?” 7 Gidwoko ire kumae: “Kan inyutho bero ni dhanu maeni, inyayu anyong’a i igi man idwoko wang’ lembe migi i ayi ma ber, e saa ceke gibibedo jutic peri.”

8 Ento ekwero juk ma judongo* umiyo ire, re elund epenjo paru mir aradu ma gidongo kugi ma i saa maeno gibino jutic pare. 9 Epenjogi kumae: “Wuparu nia ukwayu adwok lembe nenedi ni dhanu maeni ma giyero ira nia, ‘dwok mberembere ma wuru uketho i wiwa udok yot’ e?” 10 Aradu ma gidongo kugi giwacu ire kumae: “Ni dhanu maeni ma giwacu iri nia, ‘wuru udwoko mberembere mwa udoko pek, ento in dwoke edok yot’; wac igi kumae: ‘Nyig cinga ma nyanok bibedo dit nisagu pier vwa. 11 Vwa uketho mberembere ma pek i wiwu, ento an abiketho ebidoko pek nisagu. Vwa umiyo iwu matira ku del, ento an abitimo kumeno ku del ma lake bith.’”

12 Yeroboam man dhanu ceke gidwogo i bang’ Rehoboam i nindo mir adege, tap calu m’ubimo ular uwacu kumae: “Wudwog i bang’a i nindo mir adek.” 13 Ento ubimo udwoko igi lembe ku gero. Kumeno re ma Rehoboam ukwero juk ma judongo* umiyo ire. 14 Eweco i bang’gi nimakere ku juk m’aradu umiyo ire, ewacu kumae: “Abimedo pek mi mberembere mwu, man abiketho ebidoko pek nisagu. Vwa umiyo iwu matira ku del, ento an abitimo kumeno ku del ma lake bith.” 15 E ubimo uwinjo ngo dwand dhanu, kum Mungu mandha re m’uketho lembe ulokere kumeno, kara lembe ma Yehova ular uyero ni Yeroboam ma wod Nebat ku dhu Ahiya ma Jacilo utimere kakare.

16 Calu m’ubimo ukwero niwinjo, e Juisrael ceke gidwoko ire kumae: “Girang’o m’udiko kindwa ku Daudi? Gin ma wabilagu de mbe i bang’ wod Yese. Ng’atuman udok i bang’ mungu pare, E Israel. Kawoni gwok ot peri giri, E Daudi!” E Juisrael ceke gidok i pacu* migi.

17 Ento Rehoboam umedere nibimo wi Juisrael ma gikwo i adhura mi Yuda.

18 I ng’eye, Ubimo Rehoboam uoro Hadoram m’ubino jadit mi ju ma gitimo tic mir adici i bang’ Juisrael, ento ging’ure ku kidi nitundo etho. Ubimo Rehoboam unwang’u yore m’eidho ko iwi magali pare man eringo i Yeruzalem. 19 Niai cing’ nica Juisrael gijai i kum ot pa Daudi nitundo tin.

11 Kinde ma Rehoboam utundo i Yeruzalem, e wang’ acel ecoko dhu dhanu mi suru pa Yuda man mi suru pa Benjamin, kara gicidh gikied i dhu Israel pi nidwoko ker i cing Rehoboam; gibino jurumony elufu dak acel ku pier abora (180 000) ma ging’eyo lwiny cuu.* 2 E lembe pa Yehova ubino i bang’ Cemaya ma dhanu pa Mungu mandha, m’uwacu kumae: 3 “Yer ni Rehoboam ma wod Suleman m’ubimo mi Yuda, man ni Juisrael ceke mi suru pa Yuda man mi suru pa Benjamin nia, 4 ‘Yehova uwacu kumae: “Wucikuru ngo niidho pi nicikiedo i dhu umego mwu; ng’atuman udok i pacu pare kum an re m’aketho lembe maeno utimere.”’” E giworo lembe pa Yehova man giloko, gicidh gikiedo ngo i dhu Yeroboam.

5 Rehoboam ukwo i Yeruzalem man egiero adhura ma tek i Yuda. 6 Egiero* Bethlehem, Etham, Tekoa, 7 Beth-zur, Soko, Adulam, 8 Gath, Mareca, Zif, 9 Adoraim, Lakic, Azeka, 10 Zora, Ajalon man Hebron, ma ceke gin adhura ma tek m’ubino i Yuda man i Benjamin. 11 M’umedo maeno, edwoko kabedo ma tek udoko tek nisagu man eketho judong askari i igi; ebed emiyo igi cam, mo, pigulok, 12 man ebed eoro ban ma dongo ku tong’ i adhura ma tung’ tung’, edwoko adhurane udoko tek lee mandha man ng’om mi Yuda ku mi Benjamin ubedo i the tela pare.

13 Man julam ku Julawi ma gibino i Israel ceke giai kud i ng’om migi, gidok i thenge pa Rehoboam. 14 Julawi giweko luba migi man piny migi, e gidwogo i Yuda man i Yeruzalem, pilembe Yeroboam man wote giriemogi kara kud gitim calu julam ni Yehova. 15 I ng’eye, Yeroboam uketho ire julam kara gitim i kaka ma malu, gitim ni pajogi mir ayi pa diegi* man gitim ni nyithi dhieng’ m’eyiko. 16 Man dhanu m’uai kud i suru ceke mir Israel ma giketho adundegi pi niyenyo kaka Yehova Mungu mir Israel, gilubo tok julam i Yeruzalem kara githier lam ni Yehova Mungu pa kwarugi. 17 Pi oro adek gidwoko ker mi Yuda udoko tek, man gidiko cing’gi ku Rehoboam ma wod Suleman, kum giwotho i gengi pa Daudi man pa Suleman pi oro adek.

18 I ng’eye, Rehoboam ugamu Mahalath ma nyaku pa Yerimoth ma wod Daudi, m’enyolo kud Abihail ma nyaku pa Eliab ma wod Yese. 19 I ng’eye, enyolo ire awiya ma co: Yeuc, Cemaria, man Zaham. 20 I ng’ey Mahalath, egamu Maaka ma nyakwar Absalom; i ng’ey kare, Maaka nyolo ire Abiya, Atai, Ziza, man Celomith. 21 Rehoboam umaru Maaka ma nyakwar Absalom lee nisagu mon pare mange ceke man mon pare m’araga; kum ebino ku mon apar abora man mon m’araga pier abusiel. Man enyolo awiya ma co pier ario wi abora kud awiya ma nyir pier abusiel. 22 Pieno, Rehoboam uketho Abiya ma wod Maaka ubed jadit man jatela mir umego pare, pilembe ebino mito nia ekethe edok ubimo. 23 Ento etimo ku rieko, man eoro* wote moko i ng’om ceke mi Yuda man mi Benjamin i adhura ceke ma tek, man ebed emiyo igi cam lee, egamu igi bende mon dupa dupa.

12 I ng’ey ma ker pa Rehoboam ucungo ma tek, man en de edoko tek, eweko nilubo cik pa Yehova man Israel ceke de utimo calu en. 2 I oro mir abije mi camuker p’ubimo Rehoboam, Cicak m’Ubimo mi Misiri uidho nikiedo lwiny i kum Yeruzalem, kum gigwoko ngo bedoleng’ migi ni Yehova. 3 Ebino ku magali elufu acel ku dak ario (1 200), juring riuni* elufu pier abusiel (60 000) man udul juaskari ma kwaniri ngo m’ubino karacelo kude niai i Misiri: Julibya, Jusuki man Juethiopia. 4 Emaku adhura ma tek mi Yuda, man tokcenne etundo i Yeruzalem.

5 Jabila Cemaya ugam ubino i bang’ Rehoboam man i bang’ judongo ma wijo mi Yuda ma gicokiri i Yeruzalem pi Cicak, man ewacu igi kumae: “Yehova uwacu kumae: ‘Wuweka, pieno an bende awekowu i cing’ Cicak.’” 6 E judongo ma wijo mir Israel man ubimo gijwigiri gigi, man giwacu kumae: “Yehova en e pwe.” 7 Kinde ma Yehova uneno nia gijwigiri gigi, e lembe pa Yehova ugam ubino i bang’ Cemaya kumae: “Gijwigiri gigi. Abinyothogi ngo, man i ng’ey kare ma nyanok abibodhogi. Abikonjo ngo kwinyo para iwi Yeruzalem nikadhu kud i bang’ Cicak. 8 Ento gibidoko jutic pare, kara ging’ey tung’ tung’ i kind timo ira man timo ni jubim* mi ng’om mange.”

9 E Ubimo Cicak mi Misiri ubin ukiedo i dhu Yeruzalem. Ecoko lonyo m’i ot pa Yehova man lonyo m’i ot* p’ubimo. Ecoko piny ceke, uketho i iye ban mi mola ma kwar ma Suleman ugam uyiko. 10 E Ubimo Rehoboam uyiko ban mi mola kakagi, man emiyogi i bang’ judongo mi jukur* ma gibed gikuro dhugola mi ot p’ubimo. 11 Kan ubimo ubebino i ot pa Yehova, jukur gibed gibino bende kude ma gimaku ban, man i ng’eye ke gidwokogi i kusika mi jukur. 12 Calu m’ubimo ujwigere gire, ng’eicwiny pa Yehova ugam ukwiyo kud i kume man enyotho ngo adhurane ceke. M’umedo maeno, nwang’u fodi piny moko ma beco nwang’ere asu i Yuda.

13 Ubimo Rehoboam udwoko ker pare tek i Yeruzalem man emedere nibimo. Rehoboam ubino ku oro pier ang’wen wi acel kinde m’edoko ubimo, man ebimo pi oro apar abiro i Yeruzalem ma tie adhura ma Yehova ung’iyo kud i kind suru ceke mir Israel kara eketh nyinge ubed i iye. Nying’ min ubimo ubino Naama, ma Nyaramon. 14 Ento etimo lembe ma rac, kum ekeco ngo i adundene niyenyo kaka Yehova.

15 Dong kpawa mi kwo pa Rehoboam, niai i acaki nitundo i ajiki, jukiewogi i kind lembe pa Cemaya ma jabila man pa Ido ma jaewlembe, ma nwang’ere i buku mi thekwaru. Lwiny ugam ucok ungo i kind Rehoboam giku Yeroboam. 16 I ng’eye, Rehoboam ugam uvuto pi niyom karacelo ku kwaru pare man jukunye i adhura pa Daudi; e wode ma Abiya udoko ubimo kakare.

13 I oro mir apar abora mi camuker p’ubimo Yeroboam, Abiya udoko ubimo mi Yuda. 2 Ebimo pi oro adek i Yeruzalem; nying’ min ubino Mikaya ma nyaku pa Uriel mi Gibea. Man lwiny ubino nuti i kind Abiya giku Yeroboam.

3 Pieno, Abiya ucidho nikiedo lwiny ku juaskari elufu dak ang’wen (400 000) ma gi jurumony ma jurukara ma ging’eyo lwiny cuu.* Man Yeroboam karacelo ku jumaco elufu dak abora (800 000) ma gi jurumony ma jurukara ma ging’eyo lwiny cuu, gikperiri pi nikiedo lwiny i dhoge. 4 Abiya ugam ucungo iwi got Zemaraim ma nwang’ere i ng’om gudi pa Efraim, man ewacu kumae: “E Yeroboam man Israel ceke, wuwinja! 5 Wung’eyo ngo nia Yehova Mungu mir Israel umiyo ker mi nja ni Daudi iwi Israel, emiye ire man ni wote nikadhu kud i lembariba mi kadu?* 6 Ento Yeroboam ma wod Nebat ma jatic pa Suleman ma wod Daudi uai i kum rwoth pare man ejai ire. 7 Man dhanu ma gikoso gin ma gitim man ma reco gicokiri karacelo kude, e tego migi ukadhu pa Rehoboam ma wod Suleman kinde ma nwang’u fodi en aradu man elwor, e ecungo ngo i dhoggi.

8 Kawoni wuparu nia wucopo cungo i wang’ ker pa Yehova ma n’i cing’ wod Daudi, pilembe wutie udul ma lee man wutie ku nyithi dhieng’ mi mola ma kwar ma Yeroboam uyiko ni mungu iwu. 9 Nyo wun ungo ma wuriemo julam pa Yehova ma nyikway Arun man Julawi, man wuketho ngo julam mwu giwu calu dhanu mi ng’om mange? Ng’atu moko ci m’ubino ku* nyathi thwon dhiang’ man rombe abiro, wukethe edoko ni jalam mi piny moko ma ke tie mungu de ngo. 10 Ento wan, Yehova re m’utie Mungu mwa, man waweke ngo; julam mwa ma gi nyikway Arun, gibetimo ni Yehova man Julawi ubekonyogi ku tic. 11 Gibeketho yiro mi lam man mir udok ma ng’wice ng’ar uduny ni Yehova kubang’ kugweno man kubang’ uthieno. Giketho bende mukathi ma jurodo iwi wadi* iwi meza mi mola ma kwar m’alili; man kubang’ uthieno, gibecwinyo thala ma n’i wi tiend thala mi mola ma kwar pilembe wabepong’o gin m’ukwayu watim ni Yehova Mungu mwa. Ento wun wuweke. 12 Kawoni wunen, Mungu mandha ni kudwa man ebetelo wiwa; julam pare de gini kudwa man gibekudho agwara pi nitwong’owa kara wakied i dhogwu. E dhanu mir Israel, kud wukied i dhu Yehova Mungu pa kwaruwu, kum wubiloyo ngo.”

13 Ento Yeroboam uoro jucidh jukanu libo yor i ng’eygi; pieno juaskari pare ma dupa udong’ yor i wang’ Yuda, man ju ma gicidh gikanu libo ke gibino yor i ng’eygi. 14 Kinde ma dhanu mi Yuda gilokiri gineno ng’eygi, ginwang’u nia ubekwayu gikied lwiny yor i wang’gi ku yor i ng’eygi de; pieno, giwak i bang’ Yehova man julam gibino kudho agwara ma tek mandha. 15 Dhanu mi Yuda gicaku kok ku kok mi lwiny, man saa ma dhanu mi Yuda gikok ku kok mi lwiny, Mungu mandha umiyo aloci ni Abiya man ni Yuda iwi Yeroboam man Israel ceke. 16 Juisrael giringo i wang’ dhanu mi Yuda, man Mungu umiyogi i cing’gi. 17 Abiya karacelo ku dhanu pare ginegogi lee, man avuj Juisrael umedere nipodho nitundo dhanu elufu dak abic (500 000) ma ging’eyo lwiny cuu.* 18 Kumeno re ma junyayu lewic iwi dhanu mir Israel cing’ nica, ento dhanu mi Yuda giloyo, pilembe gijengiri iwi Yehova Mungu pa kwarugi. 19 Abiya umedere asu niriemo tok Yeroboam man emaku adhura pare mi Bethel ku nyithindh adhura m’i ng’ete,* Yecana ku nyithindh adhura m’i ng’ete, man Efrain ku nyithindh adhura m’i ng’ete. 20 E Yeroboam unwang’u ngo tego pare kendo i rundi p’Abiya; i ng’eye, Yehova ugoye man etho.

21 Ento tego p’Abiya umedere ameda; i ng’ey kare, egamu mon apar ang’wen, man enyolo awiya ma co pier ario wi ario man awiya ma nyir apar abusiel. 22 Dong kpawa mi kwo p’Abiya, lembe m’etimo, man wec pare jukiewogi i gor pa jabila Ido.

14 I ng’eye, Abiya uvuto pi niyom ku kwaru pare, man jukunye i adhura pa Daudi; e wode ma Asa udoko ubimo kakare. I rundi pare, ng’om uyom* pi oro apar.

2 Asa utimo lembe ma ber man m’atira i wang’ Yehova Mungu pare. 3 Ekabu pemlam mi juwirok man kaka ma malu cen, erungo i kidi mi thier man eng’ondo mbegi mi thier* de cen. 4 M’umedo maeno, eng’olo ni dhanu mi Yuda nia giyeny Yehova Mungu pa kwarugi man giwor cik ku lembang’ola de. 5 Pieno ekabu kaka ma malu man pemlam mir udok ma ng’wice ng’ar kud i adhura ceke mi Yuda; i the bimobim pare, ker ukwiyo gire. 6 Egiero adhura ma tek i Yuda, kum nwang’u ng’om ukwiyo gire man ng’atu moko mbe m’ukiedo lwiny i dhoge i kind oro maeno, pilembe Yehova umiyo ire yom. 7 E ewacu ni dhanu mi Yuda kumae: “Wagieru adhura maeni man watieku ng’etgi ku gang’kidi, ot ma wiw, dhugang’* man ku riu. Kum fodi ng’om n’i cingwa, pilembe wayenyo Yehova Mungu mwa. Wayenye, man emiyo iwa yom i ng’etwa tingili.” Pieno, gidaru giedo migi ma ber.

8 Asa ubino ku juaskari elufu dak adek (300 000) i suru pa Yuda, ma gitie ku ban ma dongo man tong’. I suru pa Benjamin ke, wend jurumony ma jurukara ubino elufu dak ario ku pier abora (280 000) ma gimaku ban ma thindo* man ma gitie kud athero.*

9 I ng’eye, Zera ma Jaethiopia ubino i kumgi ku juaskari milion acel (1 000 000) man magali dak adek. Saa m’etundo i Mareca, 10 Asa ucidho pi nikiedo kude man gikperiri pi lwiny i poga mi Zefatha i Mareca. 11 E Asa ukwayu Yehova Mungu pare man ewacu kumae: “E Yehova, kadok ju m’ibekonyo gi dupa, kadi gimbe ku tego de, eno tie gin moko ngo iri. E Yehova Mungu mwa, konywa, kum wajengara i wii, man wabino i dhu udul dhanu maeni ku nyingi. E Yehova, in i Mungu mwa. Kud iwek dhanu ma tho e uvoyi.”

12 E Yehova uketho Asa man Yuda giloyo Juethiopia; e Juethiopia giringo. 13 Asa man dhanu ma n’i kude giriemo tokgi nitundo i Gerar man Juethiopia gimediri nipodho nitundo ma ng’atu acel de mbe m’i kindgi m’udong’ kwo, kum Yehova kud udul mony pare re ma ginyothogi. I ng’eye dhanu mi Yuda gicoko jambayeki lee mandha. 14 M’umedo maeno, ginyotho adhura ceke m’utieko Gerar, kum lworo pa Yehova ubino iwi dhanu mir adhurane; man giyaku piny ceke mir adhurane, pilembe piny ma jucopo yaku ubino lee dit i igi. 15 Ginyotho bende hema mi weg udul lim, man gicoko rombe ku ngamia i kadhiri ma lee dit; i ng’eye, gidok i Yeruzalem.

15 Tipo pa Mungu ugam ubino iwi Azaria ma wod Oded. 2 Pieno, ecidh erombo ku Asa man ewacu ire kumae: “Wuwinja, E Asa man Yuda ku Benjamin ceke; Yehova ni karacelo kudwu tek wumeduru nibedo karacelo kude; man tek wusaye, ebiweko wubinwang’e, ento tek wuweke en de ebiwekowu. 3 Pi nindo ma dupa Israel ubedo m’umbe Mungu mandha, m’umbe jalam m’uponjo, man ma cik de mbe. 4 Ento i saa mi masendi migi, gidwogo i bang’ Yehova Mungu mir Israel man giyenye, e eweko ginwang’e. 5 I saa maeca, ng’atu moko mbe m’ubed uwotho i kwiyocwiny,* pilembe yakini ubino lee i kind dhanu ceke mi ng’om ma tung’ tung’. 6 Thekman ubed unyotho thek mange, man adhura nyotho adhura mange, pilembe Mungu uweko ngo yom igi nikum kwond peko ceke. 7 Ento wun wubed tek man cwinywu kud utur,* pilembe wubinwang’u sukulia pi tic mwu.”

8 Kinde ma Asa uwinjo lembe maeno man lembila pa Oded ma jabila, e ndhu ndhu enwang’u tegocwiny man ekabu ayi gin m’acwiya ma judagu kud i ng’om mi Yuda man i Benjamin ceke, man kud i adhura m’emayu i ng’om gudi pa Efraim man eyiko bende pemlam pa Yehova m’ubino i wang’ Pond ot pa Yehova. 9 Man ecoko dhu dhanu mi Yuda ku mi Benjamin ceke karacelo, man bende umondo ma gibino kugi ma giai i suru pa Efraim, pa Manase, man pa Simeon; kum giringo wel ma lee dit niai kud i Israel gidwogo i bang’e, kinde ma gineno nia Yehova Mungu pare ni karacelo kude. 10 Pieno, gicokiri karacelo i Yeruzalem i dwi mir adek mi oro mir apar abije mi camuker pa Asa. 11 Cing’ nica, githiero dhieng’ dak abiro man rombe elufu abiro ni Yehova, ma giting’o kud i kind piny ma giyaku. 12 M’umedo maeno, gitimo lembariba nia gibiyenyo kaka Yehova Mungu pa kwarugi kud adundegi ceke man ku ng’eyong’ec* migi ceke. 13 Ng’atu ma biyenyo ngo kaka Yehova Mungu mir Israel jubinege cen, dok ebed nyathin kadi jadit, ng’atu ma co kadi ma dhaku. 14 Pieno, gikwong’o kwong’ ni Yehova ku dwandgi ma tek, ma gibekok kud anyong’a, gikudho agwara, man bilo. 15 Man anyong’a unego dhanu ceke mi Yuda pi kwong’ne, kum gikwong’o kwong’ne kud adundegi ceke man giyenyo kaka Yehova ku cwinygi ceke, e eweko ginwang’e man emedere nimiyo igi yom i ng’etgi ceke.

16 Ubimo Asa umayu kadok Maaka ma wang’umire cen ku dito mi bedo min ubimo,* pilembe eyiko ayi gin m’acwiya ma rac pi woro mbegi mi thier.* Asa ung’ondo ayi gin m’acwiya pare ma racne cen, erungo iye, man ewang’e i Poga mi Kidron. 17 Re jukabu ngo kaka ma malu kud i Israel; ento Asa utimo ni Mungu kud adundene ceke* i kwo* pare zoo. 18 Eting’o piny ma en man won gigam gidwoko leng’, eterogi i ot pa Mungu mandha: mola ma tar, mola ma kwar, man ajeni ma tung’ tung’. 19 Lwiny ubino mbe nitundo i oro mi pier adek wi abije mi camuker pa Asa.

16 I oro mi pier adek wi abusiende mi camuker pa Asa, Baca m’Ubimo mir Israel ubino pi nikiedo i kum Yuda, man ecaku giero* Rama pi nicero ng’atu moko ci kud uwoki, kadi kud umondi i bang’* Asa m’Ubimo mi Yuda. 2 E Asa uwodho mola ma tar ku mola ma kwar kud i kakanpiny mi ot pa Yehova man mi ot* p’ubimo, eorogi ni Ubimo Ben-hadad mi Siria ma nwang’u ubedo i Dameski, ewacu kumae: 3 “Lembariba tie i kindwa wakudi man i kind vwa giku wuru. Aoro iri mola ma tar man mola ma kwar moko eno. Dong’ tur lembariba m’i kindwu wuku Baca m’Ubimo mir Israel cen, kara eloki kud i ng’om para.”

4 Ben-hadad uwinjo ubimo Asa man eoro judongo mir askari pare gicidh gikiedo i kum adhura mir Israel, e girwombo Iyon, Dan, Abel-maim man kakanpiny ceke mir adhura mi Nafthali. 5 Kinde ma Baca uwinjo lembene, e wang’ acel eweko nigiero* Rama man ejigo tije. 6 I ng’eye, Ubimo Asa ucoko dhanu mi Yuda ceke, man giyeyo kidi ku yen ma Baca ubino giero ko Rama, man egiero kugi* Geba man Mizpa.

7 I saa maeno, Hanani ma janenlembe ubino i bang’ Ubimo Asa mi Yuda man ewacu ire kumae: “Calu m’ijengiri iwi ubimo mi Siria ento ijengiri ngo iwi Yehova Mungu peri, eno re m’uketho juaskari p’ubimo mi Siria giboth kud i cingi. 8 Nyo Juethiopia ku Julibya gibino udul askari ma dit akeca ma gitie ku magali man ku juring riuni* ngo? Ento pilembe ijengiri iwi Yehova, emiyogi i cingi. 9 Kum wang’ Yehova uberingo kun ku kun iwi ng’om zoo, kara enyuth tego* pare pi nikonyo ju m’adundegi tie zoo i bang’e.* I lembe maeni, itimo kasegu; niai kawoni, lwiny bicok ungo i kumi.”

10 Ento ng’eicwiny umaku Asa i kum janenlembe man ebole i kol pilembe kwinyo uopo i iye i kume pi lembe maeni. Man i saa maeno, Asa ucaku sendo dhanu mange m’i kind lwak. 11 Jukiewo kpawa pa Asa niai i acaki nitundo i ajikine, i Buku mi Jubim mi Yuda man mir Israel.

12 I oro mi pier adek wi abung’wende mi camuker pa Asa, tho moko umaku tiende man thoje umedere lee mandha; kadok kinde m’ebetwoyo, elokere ngo i bang’ Yehova, ento elokere i bang’ jukeykum. 13 I ng’eye Asa uvuto pi niyom karacelo ku kwaru pare; etho i oro mi pier ang’wen wi acende mi camuker pare. 14 Pieno juyike i liel ma dit m’eroko ire gire i adhura pa Daudi, man jupiele iwi kavuto ma jupong’o ku moj balsam man mo ma segi mi wir ma jujebo ku piny ma tung’ tung’ ma ng’wicgi ng’ar. M’umedo maeno, jukudho mac ma dit mandha pi niyunge.*

17 E Yehocafath ma wode udoko ubimo kakare man edwoko ker pare tek iwi Israel. 2 Eketho juaskari i adhura ceke ma tek mi Yuda, man nyithi kagonjo i ng’om mi Yuda man i adhura mir Efraim ma Asa ma won ugam umaku. 3 Yehova umedere nibedo ku Yehocafath pilembe ewotho i yo pa Daudi ma kwarumire, man eyenyo ngo ka Baal. 4 Kum eyenyo ka Mungu pa kwarumire man elubo* lembang’ola pare, ento elubo ngo timo mir Israel. 5 Yehova uketho ker ucungo ma tek i cinge, man dhanu mi Yuda ceke gimediri nimiyo giramiya ni Yehocafath; bende, ebino ku lonyo man dwong’ ma lee dit. 6 Elubo yo pa Yehova kud amora, man ekabu kadok kaka ma malu man mbegi mi thier* cen kud i Yuda.

7 I oro mir adege mi camuker pare, eoro jucidh jusayu kaka Ben-hail, Obadia, Zekaria, Nethanel, man Mikaya, ma gi judongo ma wijo pare kara giponj i adhura mi Yuda. 8 Julawi m’ulubo e gibino karacelo kugi: Cemaya, Nethania, Zebadia, Asahel, Cemiramoth, Yehonathan, Adoniya, Thobiya, Thob-adoniya, man karacelo kugi Elicama giku Yehoram ma gi julam. 9 Giting’o buku mi Cik pa Yehova man gicaku ponjo i Yuda, gicidho i adhura mi Yuda ceke ma gibeponjo dhanu.

10 Man lworo pa Yehova ubino iwi ker ceke m’udhoko Yuda, e gikiedo ngo lwiny i dhu Yehocafath. 11 Jufilisti gikelo giramiya ni Yehocafath, man gikelo ire sente ni ajok; Juarab bende gikelo ire rombe elufu abiro ku dak abiro (7 700) man nyogi diegi elufu abiro ku dak abiro (7 700) ma giting’o i kind udul lim migi.

12 Yehocafath umedere ameda nidoko tek, man egiero kabedo ma tek man adhura mi kakanpiny i Yuda. 13 Etimo tic ma dongo i adhura mi Yuda, man ebino ku juaskari ma gi jurumony ma jurukara i Yeruzalem. 14 Jukpero dhanu maeno nimakere ku thepacu migi; i suru pa Yuda jutelwic mi dhanu elufu ubino: Adna ma jatelwic man jurumony ma jurukara elufu dak adek (300 000) gibino karacelo kude. 15 Man i the telowic pare ubino Yehohanan ma jatelwic man dhanu elufu dak ario ku pier abora (280 000) gibino karacelo kude. 16 Amazia ma wod Zikri m’ugam uwodhere pi tic pa Yehova de ubino i the telowic pare, man jurumony ma jurukara elufu dak ario (200 000) gibino karacelo kude. 17 Kud i suru pa Benjamin ubino Eliada ma jaramony ma jarukara, man dhanu elufu dak ario (200 000) ma giweg athero ku ban gibino karacelo kude. 18 Yehozabad ubino i the telowic pare, man dhanu elufu dak acel ku pier abora (180 000) ma gitie ayika pi lwiny gibino karacelo kude. 19 Ju maeno gibed gitimo ni ubimo, gimedo ju m’ubimo uketho i adhura ma tek ceke mi Yuda.

18 Yehocafath ubino ku lonyo man dwong’ ma lee dit, ento etimo lembariba mi gamiri kud Ahab. 2 Pieno oro moko i ng’eye, eloro i bang’ Ahab i Samaria, man Ahab unego* rombe ku dhieng’ lee akeca ire man ni dhanu m’uwotho karacelo kude. Ahab ugam ukwaye* nia gicidh gikied gikude i kum Ramoth-gilead. 3 I ng’eye, Ubimo Ahab mir Israel uwacu ni Ubimo Yehocafath mi Yuda kumae: “Nyo wabicidho karacelo kudi pi nikiedo i Ramoth-gileadi?” Edwoko ire kumae: “An a calu in, man dhanu para gi calu dhanu peri. Wabikonyi i lwiny maeni.”

4 Ento Yehocafath uyero ni ubimo mir Israel kumae: “Akweyi, kelar ipenj lembe i bang’ Yehova.” 5 Pieno ubimo mir Israel ucoko dhu jubila karacelo, dhanu dak ang’wen man epenjogi kumae: “Nyo ukwayu wacidh wakied lwiny i dhu Ramoth-gilead kunoke ukwayu ngo wacidhi?” Gidwoko ire kumae: “Cidhi, kum Mungu mandha bimiye i cingi, E ubimo.”

6 I ng’eye Yehocafath uyero kumae: “Nyo jabila pa Yehova moko acel de mbe keni? Wakepenj Mungu nikadhu kud i bang’e bende.” 7 E ubimo mir Israel uyero ni Yehocafath kumae: “Moko acel fodi udong’ ma wacopo penjo Yehova nikadhu kud i bang’e; re adage, pilembe eewo ngo nyanok de lembe ma ber pira, ento saa ceke eewo lembe ma rac. Etie Mikaya ma wod Imla.” Ento Yehocafath uyero kumae: “Ubimo kud uwec kumeno.”

8 Pieno ubimo mir Israel ulwong’o jatic moko mi kal pare man ewacu ire kumae: “Kel Mikaya ma wod Imla pio i bang’a kae.” 9 Nwang’u ubimo mir Israel giku Yehocafath m’ubimo mi Yuda gibedo, ng’atuman iwi komker pare, ma gikendo kendi migi mi ker; nwang’u gibedo i lela mi fwodo cam ma n’i ceng’ini ku kamondo mi dhugang’ mi Samaria, man jubila ceke gibino ewo i wang’gi. 10 E Zedekia ma wod Kenana uyiko ire tung’ mi cuma man ewacu kumae: “Yehova uyero kumae: ‘Ku tung’ maenigi, ibicobo i* Jusiria nitundo ibidarugi.’” 11 Jubila mange ceke gibino ewo lembe ma rom, giyero kumae: “Cidh i Ramoth-gilead man ibiloyo; Yehova bimiyo adhurane i cingi, E ubimo.”

12 E jakwenda m’ucidh ulwong’o Mikaya uyero ire kumae: “Nen! jubila ceke gibeyero lembe ma ber ni ubimo. Dong’ akweyi, in de wec peri ubed calu migi man iyer lembe ma ber.” 13 Ento Mikaya uwacu kumae: “Calu andha Yehova ubedo kwo, gin ma Mungu para uwacu re ma tie gin m’abiyero.” 14 E emondo i bang’ ubimo, man ubimo upenje kumae: “Mikaya, nyo ukwayu wacidh wakied i kum Ramoth-gilead kunoke ukwayu ngo wacidhi?” E ndhu ndhu edwoko kumae: “Cidhi, kum ibiloyo; jubimiyogi i cingi.” 15 Ubimo ugam uwacu ni Mikaya kumae: “Wang’ adi m’abiketho ikwong’ nia ibiyero ira kende kende lemandha ku nying’ Yehova?” 16 E ewacu kumae: “Aneno Juisrael ceke gilal iwi gudi calu rombe ma jakwac migi mbe. Yehova uwacu kumae: ‘Dhanu maeni jawigi mbe. Wek ng’atuman udok i pacu pare i kwiyocwiny.’”

17 Ubimo mir Israel ugam uyero ni Yehocafath kumae: “Ayero iri ngo nia, ‘lembe ma ber m’ebiewo pira mbe, ndhu lembe ma rac kende’?”

18 I ng’eye, Mikaya uwacu kumae: “Dong’ kewinj lembe pa Yehova: Aneno Yehova ubedo iwi komker pare, man udul ceke mi polo gicungo i ng’ete, yor acwic man yor acam. 19 E Yehova uyero kumae: ‘Ng’a ma biwondo Ahab m’ubimo mir Israel kara ecidhi man etho i Ramoth-gileadi?’ Ng’atu acel ubino yero lembe ma e, ma kucelo ke ubino yero lembe mange. 20 E tipo* moko ucoro man ecungo i wang’ Yehova, ewacu kumae: ‘Abiwonde.’ Yehova upenje kumae: ‘Ibitimo nenedi?’ 21 Edwoko kumae: ‘Abicidho, man abidoko ni tipo mi vupo i dhu jubila pare ceke.’ E Mungu wacu kumae: ‘Ibiwonde, man bende lembe biwotho iri miero. Cidhi, man itim kumeno.’ 22 Man kawoni Yehova uketho tipo mi vupo i dhu jubila peri maeni, ento Yehova ung’olo nikelo nyoth i wii.”

23 Zedekia ma wod Kenana ugam ucoro man epadu theng Mikaya, ewacu kumae: “Tipo pa Yehova ne ukadhu ku kani m’eweka ko, ecidh eweco i beng’i e?” 24 Mikaya udwoko kumae: “Nen! ibing’eyo yo m’ekadhu kud i iye, i ceng’ m’ibimondo i kusika ma yor i iye pi nipondo.” 25 I ng’eye, ubimo mir Israel uyero kumae: “Wumak Mikaya man wutere i bang’ Amon ma jadit mir adhura man i bang’ Yoac ma wod ubimo. 26 Wuwac igi kumae: ‘Ubimo uyero kumae: “Wubol ng’atu maeni i kol man wumii ire kende kende mukathi ku pii kadhiri ma nok nitundo m’abidwogo i kwiyocwiny.”’” 27 Ento Mikaya uwacu kumae: “Kan idwogo i kwiyocwiny, nwang’u Yehova uweco ngo i bang’a.” Edok emedo kumae: “Wu dhanu ceke, wuwinj lembe maeni.”

28 E ubimo mir Israel giku Yehocafath m’ubimo mi Yuda giidho i Ramoth-gilead. 29 Ubimo mir Israel uwacu ni Yehocafath kumae: “Abiranjara man abimondo i lwiny, ento in, kend kendi peri mi ker.” Pieno ubimo mir Israel uranjere, man gimondo i lwiny. 30 Nwang’u ubimo mi Siria ung’olo ni judongo mi juring magali pare kumae: “Kud wukied i dhu ng’atu mange, dok ebed ma nok kadi ma dit, wukied i dhu ubimo mir Israel kende.” 31 Kinde ma judongo mi juring magali gineno Yehocafath, giwacu i kindgi kumae: “Eni tie ubimo mir Israel.” Pieno gilokiri pi nikiedo i kume; man Yehocafath ucaku kok pi nikwayu kony, e Yehova ukonye, man Mungu ulalugi wang’ acel kud i kume. 32 Kinde ma judongo mi juring magali gineno nia eca tie ngo ubimo mir Israel, e ndhu ndhu giweko niriemo toke.

33 Ento ng’atu moko ukilo athero pare swa,* e atherone umaku ubimo mir Israel i kind cuma mi koti pare. Pieno ubimo uwacu ni jaring magali pare kumae: “Wir wi magali man wodha cen kud i lwiny,* pilembe anwang’u ret ma rac mandha.” 34 Lwiny ubogere cing’ nica duu, man ugam ukwayu nia jujeng ubimo mir Israel ajenga iwi magali nitundo uthieno, ma wang’e ubeneno yor i bang’ Jusiria; man i mwony pa ceng’ egam etho.

19 I ng’eye, Ubimo Yehocafath mi Yuda udwogo museme* i pacu* pare i Yeruzalem. 2 Yehu ma wod Hanani ma jaewlembe ucidh urombo kud Ubimo Yehocafath man eyero ire kumae: “Nyo ng’atu ma rac re m’icikiri nikonyo man ju ma gidagu Yehova re m’icikiri nimaru? Pi thelembe maeno, ng’eicwiny umaku Yehova i kumi. 3 Ento lembe moko ma beco unwang’ere i ii, pilembe ikabu mbegi mi thier* cen kud i ng’ombuni man iyiko adundeni* pi niyenyo kaka Mungu mandha.”

4 Yehocafath umedere nikwo i Yeruzalem, man ecidho kendo i kind dhanu ma niai i Ber-ceba nitundo i ng’om gudi pa Efraim pi nidwokogi i bang’ Yehova Mungu pa kwarugi. 5 Eketho bende jupoklembe i adhura ceke ma tek mi ng’om mi Yuda kubang’ adhura. 6 Man eyero ni jupoklembe maeno kumae: “Wuketh wiwu kilili i kum gin ma wubetimo kum wubepoko lembe pi dhanu ngo, ento pi Yehova man en’i kudwu kinde ma wubepoko lembe. 7 Dong’ lworo pa Yehova ubed i wiwu. Wubed ku weng’wu i kum gin ma wubetimo, kum Yehova Mungu mwa en e won gondiri ngo, e won akoyakoya de ngo, man eyiyo ngo kadok kanyaka.”*

8 I Yeruzalem bende Yehocafath uketho jumoko m’i kind Julawi ku julam man jumoko m’i kind judongo mi thepacu mir Israel kara gibed jupoklembe ni Yehova, man giyik lemkesi mi dhanu mi Yeruzalem. 9 Man eng’olo igi kumae: “Maeni utie gin ma wucikuru nitimo pi ninyutho nia wubelworo Yehova, wubegwoko bedoleng’ mwu ire, man wuthiero adundewu zoo ire: 10 Tek umego mwu ma gikwo i adhura migi gikelo lemkesi m’uketho i iye lemcwiro rimo kunoke penji iwi cik moko, lembang’ola, telowic kadi lembapoka, wucikuru nicimogi kara kier ubed umbe i wigi i wang’ Yehova; kan ungo ke ng’eicwiny bimake i kumwu man i kum umego mwu. Eno utie gin ma wucikuru nitimo kara wubed ma kier umbe i wiwu. 11 Amaria ma jadit mi julam de ni eni, ebitelo wiwu i lembe ceke m’uneno Yehova. Zebadia ma wod Ismael tie jatelwic mi suru pa Yuda pi lembe ceke m’uneno ubimo. Julawi de gibikonyowu ku tic; wubed tek man wutim tic, man Yehova ubed ku ju ma gibetimo lembe ma beco.”*

20 I ng’ey kare, Jumoab, Juamon karacelo ku Juamonim* moko gibino pi nikiedo lwiny i dhu Yehocafath. 2 Jugam juyero ni Yehocafath kumae: “Udul dhanu ma dit m’uai kud i ng’om mi dhu nam* man kud i Edom gibino kiedo lwiny i dhogi, man gini Hazazon-thamar, niwacu En-gedi.” 3 E lworo umaku Yehocafath man ekeco* nisayu kaka Yehova; pieno, eng’olo ni dhanu ceke mi Yuda nia gikwir cam. 4 E dhanu mi Yuda gicokiri karacelo pi nikwayu Yehova; gibino kud i adhura ceke mi Yuda pi nipenjo Yehova.

5 Yehocafath ugam ucungo i kind dhanu mi Yuda man mi Yeruzalem ma gicokiri i ot pa Yehova i wang’ lela ma nyen. 6 Man ewacu kumae:

“E Yehova Mungu pa kwaruwa, nyo itie ngo Mungu i polo, man nyo ibimo wi ker ceke mi thek ungo? Tego ku copo n’i cingi, man ng’atu moko mbe ma copo cungo i weng’i. 7 E Mungu mwa, nyo iriemo ngo dhanu ma gibedo i ng’ombuni kud i wang’ dhanu peri Israel, man imiye ni giralaga ma nja ni nyikway* Abraham ma jarimbi? 8 Gibedo i ng’ombe, gigiero iri hekalu i iye pi nyingi, ma giwacu kumae: 9 ‘Ka lembe moko ma rac ubino i wiwa, dok ebed palamularu, pokolembe ma rac, thong’om, kadi ndru, wabicungo i wang’ ot maeni man i weng’i, pilembe nyingi n’i ot maeni man wabikwayu ikonywa kud i peko mwa, man in, dong’ iwinjwa man ibodhwa.’ 10 Man kawoni Juamon, Jumoab man dhanu mi ng’om gudi mi Seir, m’iyiyo ngo ni Israel nia gimond i ng’om migi kinde ma giai kud i ng’om mi Misiri gini eni. Juisrael uwekogi man ginyothogi ngo. 11 Ento kawoni gibeculo iwa kawang’ bero ku racu, gibino niriemowa kud i ng’om peri m’imiyo iwa ni giralaga. 12 E Mungu mwa, nyo ibipoko ngo lembe i wigi? Kum tego mwa mbe i wang’ udul dhanu ma dit maeni m’ubino kiedo i dhogwa man wang’eyo ngo gin m’ukwayu watim, ento wang’ayu wang’wa i beng’i.”

13 I saa maeno, dhanu ceke mi Yuda gicungo i wang’ Yehova karacelo kud awiya migi, mon migi man kadok awiya* ma thindho.

14 E kud i kind dhanu m’ucokiri, tipo pa Yehova ugam ubino iwi Yahaziel ma wod Zekaria, ma wod Benaya, ma wod Yeiel, ma wod Mathania ma Jalawi m’ikind nyikway Asaf. 15 Eyero kumae: “Wucik ithwu wu dhanu mi Yuda ceke, wu dhanu ma bedo i Yeruzalem, man in ubimo Yehocafath; Yehova uyero iwu kumae: ‘Lworo kud unegwu kadi ndiri de kud ung’oy i iwu pir udul maeni, kum lwiny en e mwu ngo ento pa Mungu. 16 Urwo wulor i kumgi. Gibiidho kud i kakadhu mi Ziz, man wubirombo kugi i ajiki mi poga i wang’ langa mi Yeruel. 17 Wubikiedo ngo i lwiny maeni. Wucidh wuriey man wucung ling’, wunen ayi ma Yehova bibodho kowu;* E dhanu mi Yuda man mi Yeruzalem, lworo kud unegwu kadi ndiri de kud ung’oy i iwu. Urwo wucidhi i kumgi man Yehova bibedo karacelo kudwu.’”

18 E wang’ acel Yehocafath urum piny epodho arieba wang’e i ng’om, man dhanu ceke mi Yuda ku dhanu ma bedo i Yeruzalem gipodho piny i wang’ Yehova, girwo* ni Yehova. 19 I ng’eye, Julawi ma gi nyikway Kohath man nyikway Kora giai malu pi nipaku Yehova Mungu mir Israel ku dwandgi ma tek mandha.

20 Urwonde giai pir kugweno man gicidho i langa mi Tekoa. Kinde ma gibecidho, Yehocafath ucungo man ewacu kumae: “E dhanu mi Yuda man ma bedo i Yeruzalem, wuwinja! Wubed ku yiyoyic i Yehova Mungu mwu, kara wubed ku copo mi cungo nging’ nging’;* wubed ku yiyoyic i jubila pare, e lembe biwotho iwu ma ber.”

21 I ng’ey m’epenjo paru mi dhanu, eketho jumoko ma gikendo bongu ma leng’ gitelo yo i wang’ udul askari, ma gibewer ni Yehova man gibepake, giwacu kumae: “Wudwok foyofoc ni Yehova, kum mer pare ma lokere ngo bedo rondo ku rondo.”

22 Kinde ma gicaku wero wer mi pak kud anyong’a, Yehova ukanu adhi i kum dhanu mir Amon, mi Moab, man mi ng’om gudi mi Seir ma nwang’u gibemondo pi nimaku Yuda, e gicaku negiri i kindgi. 23 Man Juamon ku Jumoab gilokiri pi ninego man pi ninyotho dhanu ma gibedo i ng’om gudi mi Seir. Kinde ma gidaru ninego dhanu ma gibedo i Seir, gicaku negiri i kindgi.

24 Saa ma dhanu mi Yuda gitundo i bang’ otkur ma wiw mi langa, man gineno udul dhanune, gineno avujgi re m’upodho i ng’om; ng’atu moko acel de mbe m’uboth. 25 Pieno, Yehocafath ku dhanu pare gibino pi niyaku piny migi, man ginwang’u jukupiny lee dit i kindgi, ginwang’u bende bongu ku piny ma beco ma giyaku kud i kumgi nitundo ma yeye uvoyogi; ugam ukwayu nindo adek pi nilabu piny ma giyakune, kum ebino lee dit. 26 I nindo mir ang’wende, gicokiri karacelo i poga* mi Beraka, kum keca re ma gipaku* Yehova. Pi thelembe maeno re ma gilwong’o nying’ kaka maeca nia poga mi Beraka* nitundo tin eni.

27 I ng’eye, Yehocafath utelo wi dhanu ceke mi Yuda man mi Yeruzalem, man gidwogo i Yeruzalem kud anyong’a, pilembe Yehova unyayu anyong’a i igi nikum aloci m’emiyo igi iwi judegi migi. 28 Pieno, gimondo i Yeruzalem ma gibegoyo jamgoyo wer ma juthondhe, adungu, man gibekudho agwara; e gicidh gimondo i ot pa Yehova. 29 Lworo pa Mungu ubino iwi ker ceke mi ng’ombe kinde ma giwinjo nia Yehova ukiedo i dhu judegi mir Israel. 30 E ker pa Yehocafath ubedo m’umbe anyobanyoba, man Mungu pare umedere nimiyo ire yom i ng’ete kun ku kun.

31 E Yehocafath umedere nibimo iwi Yuda; edoko ubimo kinde m’ebino ku oro pier adek wi abic, man ecamu ker pi oro pier ario wi abic i Yeruzalem. Nying’ min ubino Azuba m’ubino nyaku pa Cili. 32 Emedere niwotho i yo pa won ma Asa. Ekier ungo kud i yone, man etimo lembe m’atira i wang’ Yehova. 33 Ento jukabu ngo kaka ma malu, kum nwang’u fodi dhanu giyiko ngo adundegi pi Mungu pa kwarugi.

34 Dong kpawa mi kwo pa Yehocafath niai i acaki nitundo i ajiki, jukiewogi i kind lembe pa Yehu ma wod Hanani, man i buku mi jubim mir Israel. 35 I ng’ey lembe maeni, ubimo Yehocafath mi Yuda utimo lembariba kud ubimo Ahazia mir Israel m’ubino timo lembe ma reco. 36 Pieno, gidikiri kude kara giyik meli gior ucidh i Tharsis, man giyiko meline i Ezion-geber. 37 Ento Eliezer ma wod Dodavahu mi Mareca uewo lembila i kum Yehocafath, ewacu kumae: “Calu m’itimo lembariba kud Ahazia, Yehova binyotho tic peri.” E meline giwok ging’eny man gitundo ngo i Tharsis.

21 I ng’eye, Yehocafath uvuto pi niyom karacelo ku kwaru pare man jukunye karacelo ku kwaru pare i Adhura pa Daudi; e Yehoram ma wode udoko ubimo kakare. 2 Umego pare ma gi wot Yehocafath ubino Azaria, Yehiel, Zekaria, Azaria, Mikael man Cefathia. Ju maeni ceke gibino wot ubimo Yehocafath mir Israel. 3 Weggi ugam umiyo igi giramiya dupa mi mola ma tar man mi mola ma kwar, man piny ma pigi tek kud adhura ma pigi tek i Yuda; ento emiyo ker ni Yehoram kum en re m’ebino wode ma kayu.

4 Kinde ma Yehoram ucaku bimo iwi ker pa won, enego umego pare ceke ku palamularu, man bende jumoko m’i kind judongo ma wijo mir Israel, pi nidwoko ker pare tek. 5 Yehoram ubino ku oro pier adek wi ario kinde m’edoko ubimo, man ecamu ker pi oro abora i Yeruzalem. 6 Ewotho i yo mi jubim mir Israel calu ma ot p’Ahab utimo, pilembe egamu nyaku p’Ahab ni dhaku ire; man emedere nitimo lembe ma rac i wang’ Yehova. 7 Ento Yehova ugam umito ngo enyoth ot pa Daudi nikum lembariba m’etimo ku Daudi, kum egam eng’olo nia ebimiyo thala ire man ni wote pi nindo ceke.

8 I rundi pa Yehoram, dhanu mir Edom gijai ni Yuda man giketho ubimo migi i wigi gigi. 9 Pieno Yehoram, judong askari pare man magali pare ceke gikadhu loka, man eai ku diewor eloyo dhanu mir Edom ma nwang’u gitieke man gitieko jutelwic mi magali pare. 10 Ento dhanu mir Edom gimediri asu nijai i kum Yuda nitundo tin eni. I saa maeno, dhanu mi Libna de gijai ni Yehoram kum eweko Yehova Mungu pa kwaru pare. 11 Eyiko bende kaka ma malu iwi gudi mi Yuda pi nicwalu dhanu mi Yeruzalem gitim asara i thenge mi tipo,* man eketho Yuda kier bor.

12 Tokcenne jabila Eliya ugam uoro ire barua m’ekiewo, m’uwacu kumae: “Yehova Mungu pa kwarumiri ma Daudi uyero kumae: ‘Iwotho ngo i yo pa wuru ma Yehocafath kadi i yo pa Asa m’ubimo mi Yuda. 13 Ento iwotho i yo mi jubim mir Israel man iketho Yuda ku dhanu mi Yeruzalem gitimo asara i thenge mi tipo, tap calu asara ma ot p’Ahab utimo, man inego kadok umego peri ma buu, juruot pa wuru ma gibino ber nisegi. 14 Pieno, Yehova ubegoyo dhanu peri, woti, mon peri man piny peri ceke ku goco ma dit mandha. 15 Ibitwoyo twoyo dupa, uketho i iye, twoyo mi cindi ic, nitundo ma twoyone bibedhwolo cindi ii woko kubang’ ceng’ kubang’ ceng’.’”

16 I ng’eye, Yehova ucwalu Jufilisti* i kum Yehoram man ecwalu bende Juarabia ma gibino ceng’ini ku Juethiopia. 17 E gicoro i kum Yuda man giyeciri gimondo i iye, giyaku piny ceke ma ginwang’u i ot* p’ubimo, giyaku bende wote ku mon pare; ng’atu ma giweko udong’ ire ubino Yehoahaz* ma wode ma cogo. 18 I ng’ey lembe maeno ceke, Yehova ugoye ku tho ma key ungo i cindi iye. 19 I ng’ey nindo moko, kinde ma oro ario uthum, twoyo pare udhwolo cindi iye woko man etho m’eberemo lee mandha, man dhanu pare gikudho ngo mac pire calu ma jubed jukudho ni kwaru pare. 20 Yehoram ubino ku oro pier adek wi ario kinde m’edoko ubimo man ecamu ker pi oro abora i Yeruzalem. Tho parene unyayu ngo can i ng’atu moko. Pieno jukunye i adhura pa Daudi, ento i kakuny mi jubim ungo.

22 I ng’eye, dhanu mi Yeruzalem giketho Ahazia ma wode ma cogo ni ubimo kakare, kum udul mi weg ayeki ma gibino karacelo ku Juarabia i kagonjo ginego wote ma dongo ceke. Pieno Ahazia ma wod Yehoram ucaku bimo i Yuda. 2 Ahazia ubino ku oro pier ario wi ario kinde m’edoko ubimo man ecamu ker pi oro acel i Yeruzalem. Nying’ min ubino Athalia ma nyakwar* Omri.

3 En bende ewotho i yo ma ot p’Ahab uwotho i iye, kum min ubed umiyo ire juk uketho ebed etimo lembe ma rac. 4 Man emedere nitimo lembe ma rac i wang’ Yehova calu ma ot p’Ahab utimo, pilembe gidoko jumii juk pare i ng’ey tho pa won, pi nikelo nyoth i wiye. 5 Ewinjo juk migi man ecidho karacelo ku Yehoram ma wod ubimo Ahab mir Israel pi nikiedo lwiny i dhu ubimo Hazael mi Siria i Ramoth-gilead; kuca re ma weg athero ginyayu ret i kum Yehoram. 6 Eloko edok i Yezreel pi nicithiedho rem ma junyayu i kume i Rama kinde m’ebekiedo i dhu Ubimo Hazael mi Siria.

Ahazia* ma wod Yehoram m’ubimo mi Yuda ucidho i Yezreel pi nineno Yehoram ma wod Ahab pilembe jugam junyayu ret i kume.* 7 Ento Mungu ukelo nyoth iwi Ahazia kinde m’eciliewo Yehoram; saa m’etundo, giwok karacelo ku Yehoram pi nirombo ku Yehu ma nyakwar* Nimci ma Yehova ugam uwiro kara enyoth* juruot p’Ahab. 8 Kinde ma Yehu ucaku timo pokolembe iwi ot p’Ahab, enwang’u judongo ma wijo mi Yuda man wot umego p’Ahazia ma gi jutic p’Ahazia, e enegogi. 9 I ng’eye, esayu Ahazia; jumake kud i kaka m’epondo i iye i Samaria man jukele i bang’ Yehu. E ginege man giyike, kum giyero kumae: “En e nyakwar Yehocafath m’usayu kaka Yehova kud adundene ceke.” Ng’atu moko mbe mi ot p’Ahazia m’ubino ku tego mi bimo iwi ker.

10 Kinde m’Athalia ma min Ahazia uneno nia wode udaru tho, eai malu man enego dhanu ceke ma copo dok camu ker* i ot mi Yuda. 11 Ento Yehocabeath ma nyaku p’ubimo uting’o Yehoac ma wod Ahazia man ekwale kud i kind wot ubimo ma nwang’u jubecinego, ekethe karacelo ku japidi pare i kusika mi vuto ma yor i iye. Yehocabeath ma nyaku p’ubimo Yehoram m’ubino dhaku pa Yehoyada ma jalam man nyamin Ahazia, ukane ni Athalia; kumeno re m’Athalia unege ngo. 12 Ebedo karacelo kugi pi oro abusiel ma jukane i ot pa Mungu mandha, man saa maeno Athalia ubino bimo wi ng’ombe.

23 I oro mir abirone, Yehoyada utimo lembe ku tegocwinye man etimo lembariba ku judongo mi dhanu dak, niwacu, Azaria ma wod Yehoram, Ismael ma wod Yehohanan, Azaria ma wod Obed, Maseya ma wod Adaya man Elicafat ma wod Zikri. 2 I ng’eye giwotho i Yuda ceke man gicoko Julawi karacelo kud i adhura ceke mi Yuda man jutelwic mi thepacu mir Israel. Kinde ma gitundo i Yeruzalem, 3 cokiri ceke utimo lembariba kud ubimo i ot pa Mungu mandha, i ng’eye Yehoyada uwacu igi kumae:

“Wunen! wod ubimo bicamu ker, tap calu ma Yehova ung’olo pi wot Daudi. 4 Wubitimo lembe ma e: Wubipoko i ungu mi julam man mi Julawi ma gibitimo tic i ceng’ Sabatu ni adek, ungune mi kwong’o bikuro dhugola; 5 ungu mir arionde bibedo i kum ot* p’ubimo, man ungu mir adege bibedo i dhugang’ ma julwong’o nia Kathere. Dhanu ceke bibedo i lelagang’ mi ot pa Yehova. 6 Kud wuwek ng’atu moko acel de umond i ot pa Yehova, ndhu julam ku Julawi ma gibetimo tic kendgi. Ju maeni giromo mondo pilembe gitie ungu ma leng’, man dhanu ceke biworo lembang’ola pa Yehova. 7 Julawi gicikiri nitieko kum ubimo tingili, ng’atuman ku jamlwiny pare i cinge. Ng’atu moko ci m’ubemito mondo i ot, wucikuru ninege cen. Wubed karacelo kud ubimo kakare ceke m’ebecidho i iye.*

8 Julawi ku dhanu mi Yuda ceke gitimo tap gin ma Yehoyada ma jalam ung’olo. Pieno, ng’atuman ucoko dhanu pare ma gibino ku tic i ceng’ Sabatu karacelo ku ju ma gibino mbe ku tic i ceng’ Sabatu, kum Yehoyada ma jalam ulalu ngo ungu ma gibino ku tic kud i kum tic migi. 9 Yehoyada ma jalam umiyo tong’, nyithi ban* man ban ma ngulu ngulu m’ubino p’ubimo Daudi ni judongo mi juaskari dak. Nwang’u jukanugi i ot pa Mungu mandha. 10 I ng’eye, eketho dhanu ceke, ng’atuman ku jamlwiny pare i cinge, niai i ng’et hekalune ma yor acwic nitundo i ng’ete ma yor acam, ceng’ini i kum pemlam man i kum hekalu; gitieko ubimo tingili. 11 E giwodho wod ubimo woko man giketho jamker mi wic ku lembatuca* i wiye, e gikethe ni ubimo man Yehoyada ku wote giwire. I ng’eye giwacu kumae: “Ubimo kwo nja!”

12 Kinde m’Athalia uwinjo dwand dhanu ma giberingo man gibepaku ubimo, e ndhu ndhu ebino i bang’ dhanu ma nwang’u gin’i ot pa Yehova. 13 E eneno ubimo ucungo keca i ng’et mbegi pare i kamondo. Judongo ma wijo man ju ma kudho agwara gibino karacelo kud ubimo, man anyong’a ubino nego dhanu ceke mi ng’ombe man gibino kudho agwara, e juruwer ma gibino ku jamtic mi wer gibino telo wi wer mi pak. Athalia ugam uyeco bongu pare man ekok kumae: “Wucamu gamba! Wucamu gamba!” 14 Ento Yehoyada ma jalam uwodho judongo mi dhanu dak, niwacu ju ma jukethogi iwi udul askari, ewacu igi kumae: “Wuwodhe woko kud i kind udul askari; tekene ng’atu moko ulubo ng’eye, wunege cen ku palamularu!” Kum nwang’u jalam ular uyero kumae: “Ukwayu ngo junege i ot pa Yehova.” 15 Pieno gimake man kinde ma gitundo kude i kamondo mi Dhugang’ mi riuni mi kal* p’ubimo, e ndhu ndhu ginege kakeca.

16 E Yehoyada utimo lembariba i kindgi ku dhanu ceke man ubimo, nia gibimediri nibedo dhanu pa Yehova. 17 I ng’eye, dhanu ceke gibino i ot* pa Baal man girwombo ode, ging’enyo i pemlam pare nziki nziki man ayi gin m’acwiya pare, man ginego Matan ma jalam pa Baal i wang’ pemlam. 18 I ng’eye Yehoyada uketho julam ku Julawi ginen wi ot pa Yehova. Daudi ugam upoko igi ungu ungu pi nineno wi ot pa Yehova, kara githier lam m’awang’a ni Yehova nimakere ku lembe ma jukiewo i Cik pa Musa, kud anyong’a man ku wer calu ma Daudi ung’olo.* 19 Eketho bende jukur dhugang’ i dhugang’ mi ot pa Yehova, kara ng’atu m’ucido i ayi moko ci kud umondi. 20 Ecoko judongo mi dhanu dak, weg yung, jubim mi dhanu man dhanu ceke mi ng’ombe; e gilwoko ubimo niai i ot pa Yehova giloro kude i kal* p’ubimo. Gimondo ku dhugang’ ma yo malu man giketho ubimo ubedo iwi komker mi ker. 21 Pieno anyong’a unego dhanu ceke mi ng’ombe man adhura ukwiyo, pilembe junego Athalia ku palamularu.

24 Yehoac ubino ku oro abiro kinde m’edoko ubimo, man ecamu ker i Yeruzalem pi oro pier ang’wen. Nying’ min ubino Zibia man ebino dhanu mi Ber-ceba. 2 Yehoac umedere nitimo lembe m’atira i wang’ Yehova i nindo ceke pa Yehoyada ma jalam. 3 Yehoyada ugamu mon ario ni Yehoac man enyolo awiya ma co kud awiya ma nyir.

4 I ng’eye, Yehoac uyenyo kud adundene ceke nidoyiko ot pa Yehova. 5 Pieno ecoko dhu julam man Julawi karacelo man ewacu igi kumae: “Wucidh i adhura ma tung’ tung’ mi Yuda man wujok sente i Israel ceke pi niyiko ot pa Mungu mwu kubang’ oro; man wutim lembene nyapio pio.” Ento Julawi gitimo ngo nyapio pio. 6 Pieno ubimo ulwong’o Yehoyada ma jadit man ewacu ire kumae: “Pirang’o iketho ngo Julawi gikel niai kud i Yuda man i Yeruzalem ajok ma leng’ ma Musa ma jatic pa Yehova ung’olo, niwacu ajok mi cokiri mir Israel pi hema mi Lembatuca? 7 Kum wot Athalia ma tie dhaku ma rac maeni, gimondo ku tego i ot pa Mungu mandha man gitiyo ku piny ceke ma leng’ m’ubino i ot pa Yehova pi nitimo thier ni Baal.” 8 I ng’eye, calku lembe m’ubimo ung’olo, jugam juyiko sondu man jukethe woko i dhugang’ mi ot pa Yehova. 9 I ng’eye, jutwong’o ni dhanu mi Yuda man mi Yeruzalem ceke nia gikel ni Yehova ajok ma leng’ ma Musa ma jatic pa Mungu mandha ugam ung’olo iwi Israel i langa. 10 Anyong’a unego judongo ma wijo ceke man dhanu ceke, e gimediri nikelo giramiya man gibologi i sondu nitundo m’epong’o bik.*

11 Saa ma ka Julawi gimondo ku sondune kara gimiye i bang’ ubimo man gineno nia sente udoko lee i iye, jagor p’ubimo man jego pa jadit mi julam gibed gibin gicoko sente mi sondune, i ng’eye gidwoke kakare. Gibed gitimo kumeno kubang’ rupiny kubang’ rupiny, e gicoko dhu sente lee mandha. 12 E ubimo man Yehoyada gimiye i bang’ ju ma gibeneno wi tic mi ot pa Yehova, man gin lundo giculo kude jupay kidi man jubodho ma gibeyiko ot pa Yehova man bende jubodho mi cuma man mi mola pi niyiko ot pa Yehova. 13 E ju ma gibeneno wi tic giketho tije caku, man tije umedere i the telowic migi; giyiko ot pa Mungu mandha udoko ma leng’ calu m’elar ebino i wang’e man gidwoke tek. 14 Ndhu ndhu kinde ma gidaru, gitero dong sente m’udong’ i bang’ ubimo man i bang’ Yehoyada, man gitiyo kude pi niyiko ajeni mi ot pa Yehova, ajeni mi timo tic, man ajeni mi thiero girathiera ku kopo man ajeni mi mola ma kwar ku mi mola ma tar. Man gibed githiero lam m’awang’a i ot pa Yehova kubang’ ceng’ i nindo ceke pa Yehoyada.

15 Kinde ma Yehoyada utii man ekwo pi oro dupa, etho; ebino ku oro dak acel ku pier adek i saa mi tho pare. 16 Juyike i adhura pa Daudi karacelo ku jubim, pilembe etimo lembe ma ber i Israel pi Mungu mandha man hekalu* pare.

17 I ng’ey tho pa Yehoyada, judongo ma wijo mi Yuda gibino man girum i wang’ ubimo, e ubimo uwinjogi. 18 Giweko hekalu pa Yehova Mungu pa kwarugi man gicaku timo ni mbegi mi thier* man ni ayi gin m’acwiya, pieno ng’eicwiny pa Mungu uopo* i kum Yuda man i kum Yeruzalem pi kier migi. 19 Emedere nioro jubila i kindgi pi nidwokogi i bang’ Yehova man jubilane gimediri nicimogi,* ento gikwero niwinjo.

20 Tipo pa Mungu ugam ubino iwi* Zekaria ma wod Yehoyada ma jalam, e ecungo malu kaka m’uting’ere man ewacu kumae: “Mungu mandha uwacu kumae: ‘Pirang’o wubekadhu kud iwi lembang’ola pa Yehova? Lembe biwotho ngo iwu miero; calu ma wuweko Yehova, en bende ebiwekowu.’” 21 Ento gicamu gamba i kume man nimakere ku ng’ol p’ubimo, gicanye ku kidi i lela mi ot pa Yehova. 22 Kumeno re m’ubimo Yehoac upoy ungo i kum mer ma lokere ngo ma Yehoyada ma won Zekaria unyutho ire, man enego wode m’uwacu kumae kinde m’ebetho: “Dong’ Yehova re m’unen man ecul kwor i kumi.”

23 I caku pa oro,* udul askari mi Siria gibin gikiedo i dhu Yehoac, man gimondo i Yuda kud i Yeruzalem. I ng’eye ginego judongo ceke ma wijo mi dhanu man gioro piny ceke ma giyaku i bang’ ubimo i Dameski. 24 Kum kadok nwang’u udul askari mi Siria m’umondo i ng’ombe gibino nok de, re Yehova umiyo udul askari ma dit mandha i cing’gi, pilembe giweko Yehova Mungu pa kwarugi; pieno gitimo* pokolembe pa Mungu iwi Yehoac. 25 Man kinde ma giweke (kum giweke ku ret lee i kume*) jutic pare gicamu gamba i kume, pilembe ecwiro rimb wot* Yehoyada ma jalam. Ginege kud iwi kavuto pare gire. Pieno etho man gikunye i Adhura pa Daudi, ento gikunye ngo i kakuny mi jubim.

26 Ju ma gicamu gamba i kumene gi eni: Zabad ma wod Cimeath ma Nyaramon man Yehozabad ma wod Cimrith ma Nyamoab. 27 Lembe ceke m’uneno wote ku lembe ceke ma juewo i kume man ot pa Mungu mandha m’edok eyiko, lembe maeno ceke jukiewogi i lembagora ma n’i Buku mi jubim. E wode ma Amazia udoko ubimo kakare.

25 Amazia ubino ku oro pier ario wi abic saa m’edoko ubimo, man ecamu ker pi oro pier ario wi abung’wen i Yeruzalem. Nying’ min ubino Yehoadan mi Yeruzalem. 2 Emedere nitimo lembe m’atira i wang’ Yehova, ento kud adunde ma zoo ngo. 3 Saa m’eketho ker ucungo nging’ nging’ i cinge tap ci, egam enego jutic pare ma ginego won m’ubino ubimo. 4 Ento enego ngo wotgi, kum etimo nimakere ku lembe ma jukiewo i Cik, niwacu i buku pa Musa; Yehova ung’olo i iye kumae: “Wego bitho ngo pi dubo pa wotgi man wot de bitho ngo pi dubo pa weggi; ento ng’atuman bitho pi dubo pare gire.”

5 E Amazia ucoko dhu dhanu mi Yuda karacelo man eketho gicungo nimakere ku thepacu pa kwarugi, nimakere ku judongo mi dhanu elufu, man judongo mi dhanu dak, etimo kumeno pi Yuda man Benjamin ceke. Ekiewo nying’gi, ju ma niai i oro pier ario niidho malu man enwang’u jurumony ma jutendo* elufu dak adek (300 000) ma giromo timo i udul askari, ma gicopo tiyo ku tong’ man ban ma lac. 6 Bende, eculo mola ma tar talanto* dak acel pi nikwayu jurumony ma jurukara elufu dak acel (100 000) kud i Israel. 7 Ento dhanu pa Mungu mandha moko ubino i bang’e man uwacu kumae: “E ubimo, kud iwek udul askari mir Israel ucidh kudi, kum Yehova mbe karacelo ku Israel, kadok ku ng’atu moko acel de m’i kind Juefraim. 8 Ento cidh kendi, tim man cwinyi bed tek i lwiny, kum kan ungo, Mungu mandha romo ketho ipodho i wang’ jadegi, pilembe Mungu tie ku tego mi konyo man mi ketho ng’atini upodhi.” 9 Amazia ugam upenjo dhanu pa Mungu mandha kumae: “Ka dong’ talanto dak acel m’amiyo ni udul askari mir Israel ca ke?” Dhanu pa Mungu mandhane udwoko ire kumae: “Yehova tie ku copo mi miyo iri lee nisagu maeca.” 10 E Amazia uloko udul askari m’uai i Efraim ubino i bang’e gidok i kabedo migi. Ento kwinyo unegogi lee mandha i kum Yuda, pieno giloko gidok i kabedo migi ma kwinyo ubethukini i igi.

11 I ng’eye, Amazia unwang’u tegocwiny man etelo wi udul askari pare, eloro kugi i Poga mi kadu man enego dhanu mi Seir elufu apar (10 000). 12 Man dhanu mi Yuda umaku dhanu elufu apar (10 000) ma kwo. E giidho kugi malu i lak cana man gicwalugi kud i lak cana kuca, e gin ceke igi ukethere. 13 Ento dhanu m’i kind udul askari ma Amazia uloko kara kud gilub toke i lwiny gimondo i adhura mi Yuda niai i Samaria nitundo i Beth-horon, ginego dhanu elufu adek (3 000) m’i kindgi man giyaku piny lee dit.

14 Ento i ng’ey ma Amazia uloko kinde m’eai enego Juedom, edwogo ku mungu mi dhanu mi Seir man ekethogi ire ni mungu. Ecaku rum i wang’gi man eketho yiro mi lam uduny igi. 15 E kwinyo unego Yehova lee mandha i kum Amazia man eoro jabila moko ubin uyero ire kumae: “Pirang’o ibetimo ni mungu mi dhanu maeni ma gilaru ngo dhanu migi kud i cingi?” 16 Kinde m’ebeweco i bang’e, ubimo uyero ire kumae: “Nyo wakethi ni jamii juk p’ubimo? Ling’ cen! Pirang’o imito junegi?” E jabilane ai, ento emedo kumae: “Ang’eyo nia Mungu ukeco nikelo nyoth i wii kum itimo lembe maeni man iwinjo ngo juk para.”

17 I ng’ey m’Ubimo Amazia mi Yuda upenjo paru mi jumii juk pare, eoro kwenda i bang’ Yehoac ma wod Yehoahaz ma wod Yehu m’ubimo mir Israel, ewacu kumae: “Bin waromb kudi man wakied lwiny i kindwa.”* 18 Ubimo Yehoac mir Israel ulund uoro kwenda ni ubimo Amazia mi Yuda kumae: “Lum ma kume ju ukudho mi Lebanon uoro kwenda ni yend tido mi Lebanon kumae: ‘Mii nyeri woda unyom ni dhaku.’ Ento yedi moko mi lum mi Lebanon ukadhu ku keca man enyono lum ma kume ju ukudhone cen. 19 Iyero kumae: ‘Nen! aloyo* Edom.’ E kuhaya umondo i ii man imito juyungi. Ento kawoni bed i pacu* peri. Pirang’o ibemito wayu can man nyoth i wii man iwi Yuda bende?”

20 Ento Amazia uwinjo ngo, kum eno ubino yeny pa Mungu mandha m’umito emiigi i cing’ judegi, pilembe gitimo ni mungu mir Edom. 21 Pieno ubimo Yehoac mir Israel uidho man gikiedo lwiny i kindgi gikud Ubimo Amazia mi Yuda i Beth-cemec ma nwang’ere i Yuda. 22 E Israel uloyo Yuda, pieno ng’atuman uringo i pacu* pare. 23 Ubimo Yehoac mir Israel ugam umaku Ubimo Amazia mi Yuda ma wod Yehoahaz* i Beth-cemec. I ng’eye, etere i Yeruzalem man Yehoac urwombo gang’kidi mi Yeruzalem niai i kum Dhugang’ mir Efraim nitundo i kum Dhugang’ mi gul; ebino bot dak ang’wen.* 24 Ecoko mola ma kwar ceke ku mola ma tar man piny ceke m’ubino i ot pa Mungu mandha i bang’ Obed-edom,* ku m’ubino i kakanpiny mi ot p’ubimo, ecoko bende ju ma jumaku. I ng’eye, edok i Samaria.

25 Amazia ma wod Yehoac m’ubimo mi Yuda ukwo pi oro apar abic i ng’ey tho pa Yehoac ma wod Yehoahaz m’ubimo mir Israel. 26 Dong kpawa mi kwo p’Amazia niai i acaki nitundo i ajiki, nen! jukiewogi i Buku mi Jubim mi Yuda man mir Israeli. 27 Niai ma Amazia uweko nitimo ni Yehova, jucamu gamba i kume i Yeruzalem, e egam eringo i Lakic, ento juoro dhanu i toke i Lakic kuca, man giwok ginege. 28 E juyeyo avuje ku riuni* man jukunye karacelo ku kwaru pare i adhura mi Yuda.

26 I ng’eye, dhanu mi Yuda ceke gigamu Uzia ma nwang’u ubino ku oro apar abusiel, man gikethe ni ubimo kaka Amazia ma won. 2 Egiero adhura mir Eloth kendo man edwoke ni Yuda i ng’ey m’ubimo* uvuto pi niyom* karacelo ku kwaru pare. 3 Uzia ubino ku oro apar abusiel kinde m’edoko ubimo man ecamu ker pi oro pier abic wi ario i Yeruzalem. Nying’ min ubino Yekolia ma dhanu mi Yeruzalem. 4 Emedere nitimo lembe m’atira i wang’ Yehova, tap calu ma Amazia ma won utimo. 5 Man emedere niyenyo kaka Mungu i nindo pa Zekaria m’ugam uponje nilworo Mungu mandha. I nindo m’ebino yenyo kaka Yehova, Mungu mandha uketho lembe pare ubedo miero.

6 Ewok man ecidh ekiedo lwiny i dhu Jufilisti man etuco wang’ gang’kidi mi Gath, wang’ gang’kidi mi Yabne man wang’ gang’kidi mi Acdod. I ng’eye, egiero adhura i ng’om mi Acdod man i kind Jufilisti. 7 Mungu mandha umedere nikonye kinde m’ebekiedo i dhu Jufilisti, i dhu Juarabia ma gibino kwo i Gur-baal man i dhu Jumeunim. 8 Juamon gicaku miyo ajok ni Uzia. Nyinge uyik nitundo i Misiri, kum edoko tek lee mandha. 9 M’umedo maeno, Uzia ugiero udi ma wiw i Yeruzalem i kum Dhugang’ mi gul, i kum Dhugang’ mi poga man i bang’ mbegi mi tielo vut gang’ man edwokogi tek. 10 Bende, egiero udi ma wiw i langa man etong’o* vuj pii dupa (kum ebino ku lim lee mandha); etimo bende kumeno i Cefela man i pambu.* Ebino ku jurufur man juyik kum yend ulok i kind gudi man i Karmel, kum egam emaru fur lee.

11 M’umedo maeno, Uzia ubino kud udul juaskari ma gitie ayika pi lwiny. Gibed gicidho i lwiny ma jupangugi i ungu. Yeiel ma jagor giku Maseya ma jego gibed gikwanugi man gikiewo nying’gi, i the telowic pa Hanania ma tie acel m’i kind judongo ma wijo p’ubimo. 12 Wend judongo ceke mi thepacu ma gibino telo wi jurumony ma jurukara maeno ubino elufu ario ku dak abusiel (2 600). 13 Wend juaskari ma gibino i the telowic migi ubino elufu dak adek kud abiro ku dak abic (307 500) ma gibino ayika pi lwiny, gin udul askari ma weg tego ma gibed gikonyo ubimo pi nikiedo i dhu judegi pare. 14 Uzia umiyo ban, tong’, sabu, koti mi cuma, athero man lacur ni udul askarine ceke. 15 M’umedo maeno, eketho jururieko giyiko atum ma dongo mi lwiny i Yeruzalem; jucikogi iwi udi ma wiw man iwi gul mi gang’kidi, jubed jukilo kugi athero man jucanyu kugi kidi ma dongo. Pieno nyinge uyik lee man ucidho bor, kum enwang’u kony dupa man edoko tek.

16 Ento saa m’edoko tek ci, kuhaya umondo i adundene man ukelo nyoth i wiye; egwoko ngo bedoleng’ pare ni Yehova Mungu pare, kum emondo i hekalu pa Yehova pi niwang’u udok ma ng’wice ng’ar iwi pemlam mir udok ma ng’wice ng’ar. 17 E ndhu ndhu Azaria ma jalam ku julam mange pa Yehova pier abora ma cwinygi tek gimondo i toke. 18 Gijai ni ubimo Uzia man giwacu ire kumae: “Etie lembe ma ber ungo iri Uzia, nia iwang’ udok ma ng’wice ng’ar ni Yehova! Julam kendgi re ma gicikiri niwang’u udok ma ng’wice ng’ar kum gitie nyikway Arun ma judwokogi leng’. Wok cen kud i hekalu, kum itimo lembe m’atira ngo man Yehova Mungu biyungi ngo pi lembe maeni.”

19 Ento ng’eicwiny umaku Uzia ma nwang’u ubino ku tabu ma juwang’u ko udok ma ng’wice ng’ar i cinge pi niwang’u udok ma ng’wice ng’ar. Kinde ma ng’eicwiny umake i kum julam, dhobu upodho i terwang’e i vut julam i ot pa Yehova ceng’ini i kum pemlam mir udok ma ng’wice ng’ar. 20 Kinde ma Azaria ma jadit mi julam ku julam ceke giloko wang’gi i bang’e, gineno nia jugoye ku dhobu i terwang’e, pieno giwodhe pio pio ku keca, man en de ewok nyapio pio, pilembe Yehova ugoye.

21 Ubimo Uzia udong’ won dhobu nitundo i nindo mi tho pare, man ebed ebedo i ot pare kende m’e won dhobu, kum jukoye kud i ot pa Yehova. Wode ma Yotham re m’ubed uneno wi ot p’ubimo man ebed epoko lembe mi dhanu mi ng’ombe.

22 Dong kpawa mi kwo p’Uzia, niai i acaki nitundo i ajikine, jabila Isaya ma wod Amoz re m’ukiewo. 23 I ng’eye, Uzia ugam uvuto pi niyom karacelo ku kwaru pare man jukunye karacelo ku kwaru pare, ento juyike i kakuny mi jubim kum juwacu kumae: “En e won dhobu.” E Yotham ma wode udoko ubimo kakare.

27 Yotham ubino ku oro pier ario wi abic kinde m’edoko ubimo, man ecamu ker pi oro apar abusiel i Yeruzalem. Nying’ min ubino Yeruca ma nyaku pa Zadok. 2 Emedere nitimo lembe m’atira i wang’ Yehova, tap calu m’Uzia ma won utimo, re en emondo ngo i hekalu pa Yehova, ento dhanu gibino mediri nitimo nyoth. 3 Egiero dhugang’ ma malu mi ot pa Yehova man egiero giedo lee i kum gang’kidi mir Ofel. 4 Egiero bende adhura i ng’om gudi mi Yuda man egiero udi ma tek ku udi ma wiw i luli. 5 Ekiedo lwiny i dhu ubimo mi Juamon man eloyogi, pieno i oro maeca Juamon gimiyo ire mola ma tar talanto* dak acel, nganu kor* elufu apar (10 000), man nganu ma juyuke kor elufu apar (10 000). Juamon giculo ire piny maeno bende i oro mir arionde man i oro mir adege. 6 Pieno Yotham umedere nidoko tek, pilembe eketho yo pare ucungo ma cuu* i wang’ Yehova Mungu pare.

7 Dong kpawa mi kwo pa Yotham, lwiny ceke m’ekiedo man lembe m’etimo, jukiewogi i Buku mi Jubim mir Israel man mi Yuda. 8 Ebino ku oro pier ario wi abic kinde m’edoko ubimo man ecamu ker pi oro apar abusiel i Yeruzalem. 9 I ng’eye, Yotham uvuto pi niyom karacelo ku kwaru pare, man jukunye i Adhura pa Daudi. E wode ma Ahaz udoko ubimo kakare.

28 Ahaz ubino ku oro pier ario kinde m’edoko ubimo man ecamu ker pi oro apar abusiel i Yeruzalem. Etimo ngo lembe m’atira i wang’ Yehova calu ma Daudi ma kwarumire ugam utimo. 2 Ento ewotho i yo mi jubim mir Israel man eyiko kadok ayi gin m’acwiya mi cuma* ma Baal. 3 M’umedo maeno, eketho yiro mi lam uduny i Poga pa Wod Hinom* man ewang’u wote i mac, m’elubo ko timo ma Mungu udagu mi thek ma Yehova ugam uriemo kud i wang’ Juisrael. 4 Bende, ebed ethiero lam man eketho yiro mi lam uduny i kaka ma malu, iwi ungulu gudi,* man i the yen ceke m’uluk.

5 Pieno, Yehova Mungu pare umiye i cing’ ubimo mi Siria, e eloye man eyaku dhanu dupa etero i Dameski. Mungu umiye bende i cing’ ubimo mir Israel m’unego dhanu pare ku nek ma dit. 6 Kum i nindo acel kende Peka ma wod Remalia unego dhanu mi Yuda elufu dak acel ku pier ario (120 000), gin ceke gibino dhanu ma cwinygi tek. Enegogi pilembe dhanu mi Yuda gigam giweko Yehova Mungu pa kwarugi. 7 Man Zikri ma jaramony ma Jaefraim unego Maseya ma wod ubimo man Azrikam m’ubino neno wi kal,* enego bende Elkana m’ubino ng’atu mir ario i ng’ey ubimo. 8 M’umedo maeno, Juisrael giyaku umego migi elufu dak ario, jumamon, awiya ma co man awiya ma nyir; giyaku bende piny lee dit man gidok ku piny ma giyakune i Samaria.

9 Ento jabila pa Yehova moko ma nyinge Oded ubino keca. Ecidh erombo kud udul askari m’ubedwogo i Samaria man eyero igi kumae: “Wunen! tie pilembe kwinyo umaku Yehova Mungu pa kwaruwu i kum Yuda re m’uketho emiyogi i cingwu man wunegogi ku kwinyo m’uidho cil i polo. 10 Kawoni wubemito dwoko dhanu mi Yuda man mi Yeruzalem gibed jutic mwu ma co ku ma mon. Nyo wun re wumbe ku kier i wang’ Yehova Mungu mwu? 11 Kawoni wuwinja man wudwok dhanu ma wuyaku kud i bang’ umego mwu, kum kwinyo pa Yehova uopo i kumwu.”

12 E jutelwic moko mi Juefraim, niwacu Azaria ma wod Yehohanan, Berekia ma wod Mecilemoth, Yehizkia ma wod Calum man Amasa ma wod Hadlai gijai ni ju maeno ma giai i lwiny, 13 man giwacu igi kumae: “Kud wumond ku dhanu maeno ma wuyaku keni, kum eno biketho wabibedo ku kier i wang’ Yehova. Gin ma wubemito timo bimedo dubo man kier mwa ameda, kum kier mwa dong’ e dit, man kwinyo ma lake tek uopo i kum Israel.” 14 E juaskari ma gitie ku jamlwiny gimiyo dhanu man piny ma giyaku i bang’ judongo ma wijo man i bang’ dhanu ma gicokiri. 15 I ng’eye, dhanu ma jung’iyogi ku nying’gi giai malu man gigamu ju ma juyaku, giting’o kendi kud i kind piny ma juyaku, gimiyo ni dhanu ceke m’i kindgi ma gibino muneru. E gironyo bongu i kumgi man gimiyo igi wara, cam ku giramadha man mo kara giwir i kumgi. M’umedo maeno, giyeyo ju ma kero uthum i kumgi iwi kana man giterogi i bang’ umego migi i Yeriko, ma tie adhura mi yend ngasi. I ng’eye, gidwogo i Samaria.

16 I saa maeno ubimo Ahaz ukwayu kony i bang’ jubim mir Asiria. 17 Juedom gimondo pi nikiedo i ng’om Yuda kendo man giyaku dhanu mi iye gicidho ko. 18 Jufilisti bende gicoro iwi adhura mi Cefela man mi Negeb mi Yuda, man gimaku Beth-cemec, Ajalon, Gederoth, Soko ku nyithindh adhura m’i ng’ete,* Timna ku nyithindh adhura m’i ng’ete man Gimzo ku nyithindh adhura m’i ng’ete; e gibedo i igi. 19 Yehova ujwigo Yuda pir ubimo Ahaz mir Israel, kum eweko ng’atuman mi Yuda utim lembe m’emaru, eno uketho gidubo* lee dit ni Yehova.

20 Ubimo Tilgath-pilneser mir Asiria ugam ubino nikiedo i dhoge man enyayu can i kume, kakare nikonye akonya. 21 Kum nwang’u Ahaz ucoko piny mi ot pa Yehova, piny mi ot* p’ubimo man piny mi udi mi judongo ma wijo, emiyogi ni giramiya ni ubimo mir Asiria; ento eno de ukonye ngo. 22 Man i saa m’ubimo Ahaz ubino nwang’ere ku can maeno re m’emedere ameda nitimo dubo ma dongo ni Yehova. 23 Ecaku nithiero lam ni mungu mi Dameski m’ugam uloye man ewacu kumae: “Calu ma mungu mi jubim mi Siria gibekonyogi, abithiero igi lam kara gikonya.” Ento gikelo nyoth i wiye man iwi Israel ceke. 24 M’umedo maeno, Ahaz ucoko ajeni mi ot pa Mungu mandha; i ng’eye eng’ondo i ajeni mi ot pa Mungu mandhane nziki nziki, etwiyo dhugola mi ot pa Yehova man eyiko ire pemlam i akarayo ceke mi Yeruzalem. 25 Eyiko kaka ma malu i adhura ceke mi Yuda kara juketh yiro mi lam uduny i wigi ni mungu mange, man enyayu ng’eicwiny i Yehova Mungu pa kwaru pare.

26 Dong kpawa mi kwo pare, lembe ceke m’etimo niai i acaki nitundo i ajiki, jukiewogi i Buku mi Jubim mi Yuda man mir Israel. 27 I ng’eye, Ahaz uvuto pi niyom karacelo ku kwaru pare, man jukunye i adhura, i Yeruzalem, kum jukunye ngo i kakuny mi jubim mir Israel. E wode ma Hezekia udoko ubimo kakare.

29 Hezekia udoko ubimo nwang’u etie ku oro pier ario wi abic man ecamu ker pi oro pier ario wi abung’wen i Yeruzalem. Nying’ min ubino Abiya ma nyaku pa Zekaria. 2 Emedere nitimo lembe m’atira i wang’ Yehova, tap calu Daudi ma kwarumire utimo. 3 I oro ma kwong’a mi camuker pare, i dwi ma kwong’ane, eyabu dhugola mi ot pa Yehova man eyikogi. 4 I ng’eye, elwong’o julam ku Julawi man ecoko dhoggi kaka ma lac yo nyangu. 5 Ewacu igi kumae: “Wukewuwinja, wu Julawi. Kawoni wudwokuru giwu leng’ man wudwok ot pa Yehova Mungu pa kwaruwu leng’, bende wukab gin m’ucido cen kud i kabedo ma leng’. 6 Kum wegwa gigwoko ngo bedoleng’ migi man gitimo gin ma rac i wang’ Yehova Mungu mwa. Giweke man giloko wang’gi cen kud i bang’ hema mi thier pa Yehova, giloko bende ng’eygi ire. 7 M’umedo maeno, giciko dhugola mi pond ot man ginego thala. Giweko niwang’u udok ma ng’wice ng’ar man nithiero lam m’awang’a ni Mungu mir Israel i kabedo ma leng’. 8 Pieno kwinyo pa Yehova ubino i kum Yuda man Yeruzalem, uketho lworo umaku dhanu m’unenogi, igi uwang’ lii, man gibelwiyo alwiya,* calu ma wun de wubeneno. 9 Pi thelembe maeno re ma kwaruwa githo ku palamularu, man wotwa, nyigwa, ku mondwa de gicidho i ng’eca. 10 Kawoni abeyenyo kud adundena ceke nitimo lembariba ku Yehova Mungu mir Israel, kara ng’eicwiny pare ma lake tek m’uopo i kumwa ukwii. 11 Wota, kawoni utie ngo saa ma wutimuru nyawuna wuna* i iye, kum Yehova ung’iyowu kara wucung i wang’e, kara wubed ni jutic pare man kara wuketh yiro mi lam pare uduny.”

12 E Julawi giai malu: kud i kind Jukohath, Mahath ma wod Amasai man Yoel ma wod Azaria; kud i kind Jumerari, Kic ma wod Abdi man Azaria ma wod Yehalelel; kud i kind Jugercon, Yoa ma wod Zima man Eden ma wod Yoa; 13 kud i kind wot Elizafan, Cimri man Yeuel; kud i kind wot Asaf, Zekaria man Mathania; 14 kud i kind wot Heman, Yehiel man Cimei; kud i kind wot Yeduthun, Cemaya man Uziel. 15 I ng’eye, gicoko dhu umego migi karacelo man gidwokiri gigi leng’, e gibino, tap calu m’ubimo ung’olo nimakere ku lembe pa Yehova, nia judwok ot pa Yehova leng’. 16 E julam gimondo i ot pa Yehova kara gidwoke leng’ man giwodho piny ceke m’ucido ma ginwang’u i hekalu pa Yehova, gitero i lela mi ot pa Yehova. Julawi gilund gicokogi man giterogi woko i poga mi Kidron. 17 Kumeno re ma gicaku dwoko hekalu leng’ i nindo ma kwong’a mi dwi ma kwong’a, man i nindo mir abora mi dwije, gitundo i kum pond ot pa Yehova. Gidwoko ot pa Yehova leng’ pi nindo abora man i nindo mir apar abusiende mi dwi ma kwong’a gidare.

18 I ng’ey lembe maeno gimondo i bang’ ubimo Hezekia man giwacu kumae: “Wadaru dwoko ot pa Yehova zoo leng’ man pemlam mi lam m’awang’a kud ajenine ceke man bende meza mi mukathi ma jurodo iwi wadi* kud ajenine ceke. 19 Man ajeni ceke m’ubimo Ahaz m’ugam ugwoko ngo bedoleng’ pare uketho cen i saa mi bimobim pare de waketho ubedo ayika man wadwokogi leng’, gin’i wang’ pemlam pa Yehova.”

20 E ubimo Hezekia uai pir kugweno, ecoko dhu judongo ma wijo mir adhura karacelo man giidho malu i ot pa Yehova. 21 Gikelo thwoni dhieng’ abiro, nyogi rombe abiro, nyithi nyogi rombe abiro man nyogi diegi abiro ni lam mi dubo pi ot p’ubimo, pir hekalu man pi Yuda. E eyero ni julam, niwacu nyikway Arun, nia githiergi iwi pemlam pa Yehova. 22 Gigam ginego dhieng’ man julam giting’o rimone gikiro iwi pemlam; i ng’eye ginego nyogi rombe man gikiro rimone iwi pemlam; ginego bende nyithi nyogi rombe man gikiro rimone iwi pemlam. 23 I ng’eye, gikelo nyogi diegi mi lam mi dubo i wang’ ubimo man i wang’ cokiri, e giketho cing’gi i wigi. 24 Julam gigam ginegogi man githiero rimbgi ni lam mi dubo iwi pemlam, pi nitimo adunya pir Israel ceke, kum ubimo ung’olo nia juthier lam m’awang’a ku lam mi dubo pir Israel ceke.

25 I saa maeno, eketho Julawi gicungo i ot pa Yehova ku jamgoyo wer ma woy awoya, jamgoyo wer ma juthondhe man adungu, nimakere ku lembe ma Daudi giku Gad ma jaewlembe p’ubimo man Nathan ma jabila ging’olo, kum Yehova re m’ung’olo lembe maeno nikadhu kud i bang’ jubila pare. 26 Pieno, Julawi gicungo ku jamgoyo wer pa Daudi, julam ke kud agwara.

27 E Hezekia ung’olo nia juthier lam m’awang’a iwi pemlam. Kinde ma jucaku thiero lam m’awang’a, jucaku wero bende wer ni Yehova, ma jubegoyo jamgoyo wer p’ubimo Daudi mir Israel man jubekudho bende agwara. 28 Man cokiri ceke urum piny kinde ma jubewer man jubekudho agwara; lembe maeno ceke umedere nitundo ma judaru nithiero lam m’awang’a. 29 Kinde ma judaru nithiero lam ci, e ubimo ku dhanu ceke ma gibino karacelo kude, girum i ng’om man gipodho arieba wang’gi. 30 Ubimo Hezekia ku judongo ma wijo gigam giyero ni Julawi nia gipak Yehova ku wec pa Daudi man pa Asaf ma jaewlembe. Pieno gipake kud anyong’a ma dit, man girum i ng’om man gipodho arieba wang’gi.

31 I ng’eye Hezekia uwacu kumae: “Kawoni ma dong’ jukoyowu segi ni Yehova, wubin man wukel lam ku lam mi dwoko foyofoc i ot pa Yehova.” E cokiri ucaku kelo lam ku lam mi dwoko foyofoc, man ng’atu moko ci m’adundene ubino ayika ukelo lam m’awang’a. 32 Wend lam m’awang’a ma cokiri ukelo ubino dhieng’ pier abiro, nyogi rombe dak acel man nyithi nyogi rombe dak ario; eno ceke ubino lam m’awang’a ma jukelo ni Yehova, 33 man wend girathiera ma leng’ ubino dhieng’ dak abusiel ku rombe elufu adek (3 000). 34 Ento wend julam ma copo yang’u lei ceke ma jubithiero ni lam m’awang’a ubino nok, pieno umego migi ma gi Julawi gikonyogi, nitundo ma tic uthum ceke man nitundo ma julam gidwokiri leng’, kum Julawi gimiyiri lee* nidwokiri leng’ nisagu julam. 35 Lam m’awang’a de ubino lee, man bende miyo mi lam mi kwiyocwiny ku girathiera mi pigulok pi lam m’awang’a. Kumeno re ma tic mi ot pa Yehova udok kakare.* 36 E anyong’a unego Hezekia ku dhanu ceke pi lembe ma Mungu mandha utimo ni dhanu, kum lembe maeno ceke utimere rek.

30 Hezekia ugam uoro kwenda ni Israel ku Yuda ceke, ekiewo kadok barua ni dhanu mi suru pa Efraim man pa Manase nia gibin i ot pa Yehova i Yeruzalem pi nitimo Kadhukuwijo ni Yehova Mungu mir Israel. 2 Ento ubimo, judongo ma wijo pare man dhanu ceke m’ucokiri i Yeruzalem, ging’iyo nia gitim Kadhukuwijo maeno i dwi mir arionde, 3 kum nwang’u gitime ngo i saa m’ukethere, pilembe wend julam ma gidwokiri gigi leng’ ubino nok, man dhanu de gicokiri ngo i Yeruzalem. 4 Yub maeno uwok ber i wang’ ubimo man i wang’ cokiri ceke. 5 E ging’iyo nioro atwong’a i Israel ceke, niai i Ber-ceba nitundo i Dan, nia dhanu gibin i Yeruzalem man gitim Kadhukuwijo ni Yehova Mungu mir Israel, kum nwang’u fodi gicokiri ngo karacelo pi nitime nimakere ku gin m’ukiewere.

6 Pieno jukwenda* gicidho i Israel man i Yuda ceke ku barua m’uai i bang’ ubimo man i bang’ judongo ma wijo pare calu m’ubimo ugam ung’olo, giyero kumae: “Dhanu mir Israel, wudwog i bang’ Yehova Mungu pa Abraham, pa Isak man pa Israel kara edwog i bang’ dong dhanu m’uboth kud i cing’ jubim mir Asiria. 7 Kud wubed ve kwaruwu man umego mwu ma gigwoko ngo bedoleng’ migi ni Yehova Mungu pa kwarugi, uketho ekelo nyoth i wigi, tap calu ma wubeneno eni. 8 Kawoni dong’ wiwu kud ubed tek ve wi kwaruwu. Wujwiguru ni Yehova man wubin i hekalu pare m’edwoko leng’ pi nja man wutim ni Yehova Mungu mwu, kara kwinyo pare m’uopo i kumwu ukwii. 9 Kum ka wudwogo i bang’ Yehova, kisa binego ju m’utero umego mwu man wotwu i ng’eca, man gibiweko gibidwogo i ng’om maeni, kum Yehova Mungu mwu en e jabero* man e jakisa. Tek wudwogo i bang’e ebiloko ngo wang’e cen iwu.”

10 E jukwendane* gicidho kubang’ adhura ceke mi ng’om mir Efraim man mi Manase, man kadok i ng’om mi Zebulon; re dhanu ging’ierogi man gicayugi. 11 Ento dhanu moko mi suru pa Acer, pa Manase, man pa Zebulon gijwigiri gigi man gibino i Yeruzalem. 12 Cing’ Mungu mandha ubino bende iwi dhanu mi Yuda pi nidikogi i acel,* kara gitim lembe m’ubimo man ma judongo ma wijo ging’olo nimakere ku lembe pa Yehova.

13 Udul dhanu ma lee ugam ucokiri karacelo i Yeruzalem pi nitimo Foc mi mukathi ma thobi mbe i iye i dwi mir arionde; ebino cokiri ma dit mandha. 14 E giai malu man gikabu pemlam ceke m’ubino i Yeruzalem, gicoko bende pemlam ceke mir udok ma ng’wice ng’ar man gibayugi i poga mi Kidron. 15 I ng’eye, ginego lei ma jubithiero ni lam mi Kadhukuwijo i nindo mir apar ang’wende mi dwi mir arionde. Julam ku Julawi gibino ku lewic, pieno gidwokiri gigi leng’ man gikelo lam m’awang’a i ot pa Yehova. 16 Gigam gicungo kaka ma gibed gicungo i iye, nimakere ku Cik pa Musa ma dhanu pa Mungu mandha; i ng’eye julam gikiro rimo ma gigamu kud i cing’ Julawi. 17 Dhanu dupa m’i kind cokiri gigam gidwokiri ngo leng’, pieno Julawi re ma ginego lei mi lam mi Kadhukuwijo pi ju ceke ma gibino ngo leng’, pi nidwokogi leng’ ni Yehova. 18 Kum nwang’u dhanu ma wendgi lee, asagane ju mi suru pa Efraim, pa Manase, pa Isakar man pa Zebulon gidwokiri ngo gigi leng’, re asu gicamu Kadhukuwijo. Eno ubino tung’ ku gin ma jukiewo. Ento Hezekia urwo pigi, ewacu kumae: “Dong’ Yehova ma en e jabero, utim kisa ni 19 ng’atu moko ci m’uyiko adundene pi nisayu kaka Mungu mandha, niwacu Yehova Mungu pa kwaru pare, kadok nwang’u edwokere ngo leng’ calku cik mi leng’o.” 20 E Yehova uwinjo Hezekia man etimo kisa ni* dhanu.

21 Pieno Juisrael ma gibino i Yeruzalem gitimo Foc mi mukathi ma thobi mbe i iye pi nindo abiro kud anyong’a ma dit, man Julawi ku julam gibed gipaku Yehova kubang’ nindo ma gibegoyo jamgoyo wer migi ubewak ma tek ni Yehova. 22 M’umedo maeno, Hezekia uweco ku Julawi ceke ma gibetimo ni Yehova ku rieko man etielo cwinygi.* Bende gicamu pi nindo abiro mi foc, githiero lam mi kwiyocwiny man gidwoko foyofoc ni Yehova Mungu pa kwarugi.

23 I ng’eye, cokiri ceke ung’iyo nitimo focne pi nindo mange abiro. Pieno, gitime pi nindo abiro mange kud anyong’a. 24 Ubimo Hezekia mi Yuda umiyo thwoni dhieng’ elufu acel (1 000) ku rombe elufu abiro (7 000) ni cokiri; judongo ma wijo de gimiyo thwoni dhieng’ elufu acel (1 000) ku rombe elufu apar (10 000) ni cokiri; man julam ma wendgi lee dit gidwokiri gigi leng’. 25 Dhanu ceke mi ng’om mi Yuda ma gicokiri, julam, Julawi, dhanu ceke m’uai i ng’om mir Israel ma gicokiri, kud umondo ma giai i ng’om mir Israel man ma gikwo i ng’om mi Yuda gimediri nibedo kud anyong’a. 26 E anyong’a ma dit ubino nuti i Yeruzalem, kum niai i nindo pa Suleman ma wod Daudi m’ubimo mir Israel, nwang’u fodi lembe ma kumeno utimere ngo i Yeruzalem. 27 Tokcenne Julawi ma gi julam gicungo man gimiyo mugisa ni dhanu; e Mungu uwinjo dwandgi, man rwo migi uidho i polo i kabedo pare ma leng’.

31 Saa ma gidaru lembe maeni zoo, e Juisrael ceke ma gibino keca gicidho i adhura mi Yuda, man ging’enyo i kidi mi thier, ging’ondo mbegi mi thier,* girwombo kaka ma malu ku pemlam mi Yuda ceke man mi Benjamin man bende mir Efraim ku mi Manase, nitundo ma ginyothogi ceke, i ng’eye Juisrael ceke gidok i adhura migi, ng’atuman i bang’ giralaga pare.

2 I ng’eye Hezekia uketho julam i ungu migi man Julawi de i ungu migi, jalamman ku Jalawiman i tic pare, pi nithiero lam m’awang’a man lam mi kwiyocwiny, pi nitimo tic man pi nidwoko foyofoc man pi nipaku pak i dhugang’ mi lela* pa Yehova. 3 Ubimo umiyo ng’et piny pare gire kara juthier ni lam m’awang’a, uketho i iye girathiera mi kugweno man mir uthieno man bende lam m’awang’a mi ceng’ Sabatu, mi por pa dwi, man foc ma tung’ tung’, nimakere ku lembe ma jukiewo i Cik pa Yehova.

4 M’umedo maeno, eng’olo ni dhanu ma gikwo i Yeruzalem nia gimii ng’et piny ma jubed jumiyo ni julam man ni Julawi, kara gimok kikiki* i kum cik pa Yehova. 5 Kinde ma lembang’ola maeno uwok, Juisrael gimiyo landu wi mwoka mi nying cam, mi pigulok ma nyen, mi mo, mi miyokic man mi piny ceke mi podho i kadhiri ma lee; gikelo apajpiny mi piny ceke lee dit. 6 Man dhanu mir Israel ku mi Yuda ma gikwo i adhura mi Yuda de gikelo apaje mi dhieng’, mi rombe man apaje mi piny ma leng’ ma judwoko leng’ ni Yehova Mungu migi. Gikelogi man gidhurogi ungu ungu. 7 I dwi mir adege gicaku dhuro dhu giramiya migi ungu ungu, man i dwi mir abirone gidare. 8 Kinde ma Hezekia ku judongo ma wijo gibino man gineno piny udhurere ungu ungu, gipaku Yehova man gimiyo Mugisa ni dhanu pare Israel.

9 Hezekia upenjo julam ku Julawi pi piny m’udhurerene, 10 e Azaria ma jadit mi julam mi ot pa Zadok udwoko ire kumae: “Niai ma jucaku kelo giramiya i ot pa Yehova, dhanu gicamu man giyeng’, re asu dong piny udong’ bik, kum Yehova upoko mugisa iwi dhanu pare, uketho dong piny udong’ lee kumeni.”

11 E Hezekia uyero igi nia giyik kusika mi kanu piny* i ot pa Yehova; e gigam giyikogi. 12 Gimediri nikelo giramiya ku cwinygi ceke, apajpiny* man piny ma leng’; juketho Konania ma Jalawi re m’unen wi lembe maeni ceke man umin ma Cimei ubino mir ario i ng’eye. 13 Nimakere ku lembe m’Ubimo Hezekia ung’olo, Yehiel, Azazia, Nahath, Asahel, Yerimoth, Yozabad, Eliel, Ismakia, Mahath man Benaya gibino jung’et Konania gikud umin ma Cimei man gibed gikonyogi; Azaria ke ubino janen wi ot pa Mungu mandha. 14 Man Kore ma wod Imna ma Jalawi m’ubino jakur dhugang’ ma yo nyangu, ubed uneno wi giramiya ma ku berocwiny ma jumiyo ni Mungu mandha, man ebed epoko giramiya ma jumiyo ni Yehova man piny ma leng’ m’usagu. 15 Eden, Miniamin, Yecuwa, Cemaya, Amaria man Cekania gibino i the telowic pa Kore i adhura mi julam, i tic migi mi dhanu ma jugeno; gibed gipoko piny rom rom ni umego migi i ungu migi, nik’ebed ng’atu ma dit kadi ma nok. 16 M’umedo maeno, gibed gipoko bende piny maeno ni ju ma jukiewo nying’gi calku thekwaru migi, niwacu jumaco ma gibed gibino kubang’ ceng’ pi nitimo i ot pa Yehova man bende nitimo tic mir ungu migi, ku wotgi ma niai i oro adek niidho malu.

17 Jukiewo nying’ julam ku Julawi ma gibino ku oro pier ario niidho malu calku thekwaru migi, nimakere ku thepacu migi man ku tic ma gibed gitimo i ungu migi. 18 I nying’gi ma jukiewo calku thekwaru migine, jukiewo bende nying awiya migi, mon migi, wotgi, nyiggi ku cokiri migi ceke, kum gimediri nidwokiri gigi leng’ pi gin ma leng’ nikum tic migi ma en e tic mi ju ma jugeno; 19 jukiewo bende nying’ nyikway Arun ma gi julam ma gikwo i kabedo m’utieko adhura migi. I adhura ceke jung’iyo jumaco ku nying’gi kara gimii ng’et piny ni jumaco ceke m’i kind julam man ni ng’atuman ma jukiewo nyinge i thekwaru mi Julawi.

20 Hezekia utimo lembe maeni i Yuda ceke, emedere nitimo lembe ma ber man m’atira i wang’ Yehova Mungu pare man egwoko bedoleng’ pare ire. 21 Bende, tic ceke m’ecaku nitimo pi niyenyo kaka Mungu pare, nik’ebed tic mi ot pa Mungu mandha kunoke Cik man lembang’ola, etimogi kud adundene ceke man lembe uwotho ire miero.

32 I ng’ey ma Hezekia utimo lembe maeno ceke cuu mandha, Ubimo Senakerib mir Asiria ubin umondo i Yuda. Etieko adhura ma tek, m’ebemito erwomb gang’kidi mir adhurane man emakgi.

2 Kinde ma Hezekia uneno nia Senakerib ubino man nia ebemito ekied lwiny i kum Yeruzalem, 3 egam eng’iyo niculo dhu kulo mi pii ma ni woko mir adhura, i ng’ey m’epenjo paru mi judongo ma wijo pare man mi jurumony pare, e gicwaku paru pare. 4 Dhanu dupa gigam gicokiri karacelo man giculo pii ceke man kulo ceke m’ubemol i ng’ombe, giwacu kumae: “Kwayu ngo jubim mir Asiria giwok ginwang’ pii lee kinde ma gibino.”

5 M’umedo maeno, emiyere zoo niyiko gang’kidi ceke m’urwombere man egiero udi ma tek i wiye. Man yo woko, egiero gang’kidi mange, eyiko bende got Milo* mir adhura pa Daudi, man eyiko jamlwiny* lee dit ku ban bende. 6 I ng’eye, eketho judongo mir askari iwi dhanu man ecoko dhoggi i lela ma lac mi dhugang’ mir adhura, e etielo cwinygi,* ewacu kumae: 7 “Cwinywu ubed tek man wubed tek. Lworo kud unegwu kadi ndiri de kud ung’oy i iwu pir ubimo mir Asiria man pir udul ma ni karacelo kude, kum ju ma gini karacelo kudwa gi lee ma sagu ju ma gini karacelo kude. 8 Bot ma ni kude utie bot mi ring’kum,* ento karacelo kudwa utie Yehova Mungu mwa pi nikonyowa man nikiedo iwa.” E wec p’ubimo Hezekia mi Yuda umiyo tego i kum dhanu.

9 I ng’ey lembe maeni, kinde m’Ubimo Senakerib mir Asiria ubino i Lakic karacelo ku tego mi bimobim pare ceke,* eoro jutic pare i Yeruzalem i bang’ Ubimo Hezekia mi Yuda man i bang’ dhanu ceke mi Yuda ma gibedo i Yeruzalem, ewacu kumae:

10 “Ubimo Senakerib mir Asiria uwacu kumae: ‘Wuketho genogen mwu iwi ang’o ma wubebedo ko asu i Yeruzalem ma jutieko e? 11 Nyo Hezekia ubewondowu awonda ngo man ebemito miyowu kara wucidh wutho ku kec man ku rieu, kinde m’ebewacu nia, “Yehova Mungu mwa bibodhowa kud i cing’ ubimo mir Asiria”? 12 Nyo utie ngo Hezekia ma rom eni re m’ukabu kaka ma malu pa Mungu mwu man pemlam pare man i ng’eye ewacu ni dhanu mi Yuda man mi Yeruzalem kumae: “Wucikuru nirum i wang’ pemlam acel man i wiye re ma wucikuru niketho yiro mi lam udunyi”? 13 Wung’eyo ngo lembe ma an man kwaru para watimo i kum dhanu mi ng’om mange? Nyo mungu mi dhanu mi thek mi ng’om mange gibino ku copo mi bodho ng’om migi kud i cinga? 14 Kud i kind mungu ceke mi thek ma kwaru para unyotho, ma kani m’ubino ku copo mi bodho dhanu pare kud i cinga, ma nia Mungu mwu re m’ulund ubed ku copo mi bodhowu kud i cinga e? 15 Kud wuwek Hezekia uwondwu kadi kud ebombwu kumeni! Kud wuketh genogen mwu i wiye, kum mungu mi thek moko kadi mi ker moko acel de mbe m’ubino ku copo mi bodho dhanu pare kud cinga man kud i cing’ kwaru para. Mungu mwu bende bicopo ngo nibodhowu kud i cinga!’”

16 Jutic pa Senakerib gimediri niweco ku dhoggi ma rac i kum Yehova ma Mungu mandha man i kum Hezekia ma jatic pare. 17 Bende, ekiewo barua pi nicayu Yehova Mungu mir Israel man eweco ku tang’dhoge i kume i baruane, ewacu kumae: “Calu ma mungu mi dhanu mi thek mi ng’om mange ubodho ngo dhanu migi kud i cinga, Mungu pa Hezekia bende bibodho ngo dhanu pare kud i cinga.” 18 Gimediri nikok ma tek ku dhu Juyahudi i bang’ dhanu mi Yeruzalem ma gibedo iwi gang’kidi, pi ninyayu lworo i igi man ning’abu cwinygi, kara gimak adhurane. 19 Giweco ku dhoggi ma rac i kum Mungu mi Yeruzalem, tap calu ma giweco i kum mungu mi dhanu mi ng’om ma dhanu uyiko en. 20 Ento ubimo Hezekia man jabila Isaya ma wod Amoz, gimediri nirwo pi lembe maeno, man gikwayu Mungu mi polo ukonygi.

21 I ng’eye Yehova uoro malaika acel uweyo jurumony ma jurukara, judongo man jutelwic ceke mi kagonjo p’ubimo mir Asiria, pieno edok i ng’om pare ku lewic. I ng’eye ubimone umondo i ot* pa mungu pare man jumoko m’i kind wote ma buu ginege cen ku palamularu keca. 22 Pieno Yehova ubodho Hezekia man dhanu ma gibedo i Yeruzalem kud i cing Ubimo Senakerib mir Asiria man kud i cing’ dhanu mange ceke, e emiyo igi yom i ng’etgi ceke. 23 Dhanu dupa gikelo giramiya ni Yehova i Yeruzalem man piny m’ang’iya ni Ubimo Hezekia mi Yuda. I ng’ey lembe maeno, thek ceke uworo Hezekia lee dit.

24 I nindo maeno Hezekia ucaku twoyo man nwang’u edhingo tho, egam erwo i bang’ Yehova, e edwoko wang’ rwo pare man emiyo ire giranyutha* moko. 25 Ento Hezekia unyutho ngo foyofoc pi bero ma jutimo ire, kum kuhaya umondo i adundene, man eno uketho ng’eicwiny pa Mungu uopo i kume, i kum Yuda man i kum Yeruzalem. 26 Re Hezekia ujwigere man ekabu kuhaya cen kud i adundene, dhanu mi Yeruzalem de gijwigiri, e ng’eicwiny pa Yehova ubino ngo i wigi i nindo pa Hezekia.

27 Hezekia unwang’u lonyo ku dwong’ lee dit; man egiero ire dero pi nikanu mola ma tar, mola ma kwar, kidi ma pigi tek, moj balsam, ban man pi nikanu piny ceke ma pigi tek. 28 Egiero bende kakanpiny pi nigwoko nying cam, pigulok ma nyen man mo, bende eyiko dwol pi kit lim ma tung’ tung’ man dwol pir udul rombe. 29 M’umedo maeno, egiero ire adhura dupa man ecoko ire udul rombe, diegi, man dhieng’, kum Mungu umiyo ire jamcing’ lee dit. 30 Hezekia re m’ugam uculo dhu kulo mi pii mi Gihon ku yo malu man eloko pige uloro atira yo reto mir adhura pa Daudi, man tic ceke ma Hezekia utimo ubedo miero. 31 Ento kinde ma judongo ma wijo mi Babeli gioro jukwenda migi i bang’e pi nipenje pi giranyutha* m’utimere i ng’ombe, Mungu mandha uweke kende pi nimulo iye, kara eng’ey lembe ceke ma n’i adundene.

32 Dong kpawa mi kwo pa Hezekia man kite m’enyutho ko mer ma lokere ngo, jukiewogi i kind gin ma wok i wang’ pa Isaya ma jabila ma wod Amoz, i Buku mi jubim mi Yuda man mir Israel. 33 I ng’eye, Hezekia uvuto pi niyom ku kwaru pare man jukunye kaka ma juidho ko i kakuny pa wot Daudi; dhanu mi Yuda ceke ku dhanu mi Yeruzalem giyunge kinde m’etho. E wode ma Manase udoko ubimo kakare.

33 Manase ubino ku oro apar ario kinde m’edoko ubimo, man ecamu ker pi oro pier abic wi abic i Yeruzalem.

2 Etimo lembe ma rac i wang’ Yehova, m’elubo ko timo ma reco mi dhanu mi thek mange ma Yehova uriemo kud i wang’ dhanu mir Israel. 3 Edok egiero kendo kaka ma malu ma Hezekia ma won urwombo. Eguro pemlam ni Baal man eyiko mbegi mi thier.* Bende, erum i wang’ udul mi polo ceke man etimo igi. 4 Egiero bende pemlam i ot pa Yehova, ma Yehova uyero pire kumae: “Nyinga bibedo i Yeruzalem pi nja.” 5 Man egiero pemlam ni udul mi polo ceke, i lela ario mi ot pa Yehova. 6 Ewang’u wote ma buu i mac* i Poga pa Wod Hinom; etimo maji, eewo lembe, etimo lembajoga, eketho ju ma weco ku tipo dhanu m’utho man juewlembe. Etimo lembe ma reco i wang’ Yehova i mukero ma lee dit, pi ninyayu ng’eicwiny i iye.

7 Eketho ayi gin m’acwiya m’ang’ika mi mbegi mi thier m’eyiko i ot pa Mungu mandha, ma Mungu uyero pire ni Daudi man ni wode ma Suleman kumae: “Abiketho nyinga ubed mi nja i ot maeni man i Yeruzalem, ma tie adhura m’ang’iyo kud i kind suru ceke mir Israel. 8 Man tekene Juisrael giworo cuu mandha lembe ceke m’ang’olo igi, ma en e Cik ceke, niwacu cik man telowic mi pokolembe m’amiyo igi nikadhu kud i bang’ Musa, abiriemogi ngo kud i ng’om m’amiyo ni kwarugi.” 9 Manase umedere niketho Yuda man dhanu mi Yeruzalem gikier bor, eketho gitimo lembe ma reco magwei nisagu kadok dhanu mi thek mange ma Yehova unyotho kud i wang’ Juisrael.

10 Yehova umedere niweco i bang’ Manase man i bang’ dhanu pare, ento gikwanu ngo ku lembene. 11 E Yehova ucoro judongo mir udul askari p’ubimo mir Asiria i kumgi man gimaku Manase ku gol,* e gitwiye ku kongo ario mi mola, gitere i Babeli. 12 Kinde m’eni masendi, ekwayu Yehova Mungu pare unyuth ire bero man ejwigere gire lee dit i wang’ Mungu pa kwaru pare. 13 Emedere nirwo i bang’e man rwo parene umulo cwiny Mungu, e ewinjo kwac pare man edwoke kendo i Yeruzalem iwi ker pare. E Manase utuc ning’eyo nia Yehova utie Mungu mandha.

14 I ng’ey lembe maeno, egiero gang’kidi ma yo woko i kum Adhura pa Daudi yo reto mi Gihon i poga* nitundo i Dhugang’ mi rec, egiere tingili i kum adhurane nitundo i kum Ofel man eketho eidho malu lirlir. M’umedo maeno, eketho judongo mir udul askari i adhura ceke ma tek i Yuda. 15 I ng’eye, ekabu mungu ma juwirok man ayi gin m’acwiya cen kud i ot pa Yehova man pemlam ceke m’egiero iwi got mi ot pa Yehova man i Yeruzalem man eketho jubayugi woko mir adhura. 16 Eyiko bende pemlam pa Yehova man ecaku thiero lam mi kwiyocwiny ku lam mi dwoko foyofoc i wiye, man eyero ni dhanu mi Yuda nia gitim ni Yehova Mungu mir Israel. 17 Ento dhanu gimediri asu nithiero lam i kaka ma malu, re ni Yehova Mungu migi kende.

18 Dong kpawa mi kwo pa Manase, rwo m’erwo ko i bang’ Mungu pare man wec ma juewlembe gibed giyero ire i nying’ Yehova Mungu mir Israel, jukiewogi i kpawa mi jubim mir Israel. 19 M’umedo maeno, rwo pare, kite ma Mungu uwinjo ko kwac pare, dubo pare, man kosobedoleng’ pare ceke, kabedo ma tung’ tung’ m’egiero iye kaka ma malu man m’ecomo iye mbegi mi thier,* kud ayi gin m’acwiya m’eyiko i wang’ m’ejwigere, jukiewogi i kind wec mi juewlembe pare. 20 I ng’eye, Manase uvuto pi niyom karacelo ku kwaru pare, man jukunye i ng’et ot pare; e wode ma Amon udoko ubimo kakare.

21 Amon ubino ku oro pier ario wi ario kinde m’edoko ubimo man ecamu ker pi oro ario i Yeruzalem. 22 Emedere nitimo lembe ma rac i wang’ Yehova, tap calu ma Manase ma won utimo; Amon uthiero lam ni ayi gin m’acwiya m’ang’ika ceke ma won ma Manase uyiko, man emedere nitimo igi. 23 Re ejwigere ngo i wang’ Yehova calu ma won ma Manase ugam ujwigere ko; ento Amon umedo kier pare lee nisagu. 24 Nindo moko jutic pare gicamu gamba i kume man ginege i ot pare gire. 25 Ento dhanu mi ng’ombe ginego ju ceke ma gicamu gamba i kum Ubimo Amon, man giketho wode ma Yosiya udoko ubimo kakare.

34 Yosiya ubino ku oro abora kinde m’edoko ubimo man ecamu ker pi oro pier adek wi acel i Yeruzalem. 2 Etimo lembe m’atira i wang’ Yehova man ewotho i yo pa Daudi ma kwarumire ceke, ekier ungo yor acwic kadi yor acam.

3 I oro mir abora mi camuker pare, kinde ma fodi e jalawobi, ecaku sayu kaka Mungu pa Daudi ma kwarumire; i oro mir apar arionde ecaku dwoko Yuda ku Yeruzalem leng’, m’ekabu ko cen kaka ma malu, mbegi mi thier,* ayi gin m’acwiya m’ang’ika man ayi gin m’acwiya mi cuma.* 4 M’umedo maeno, jurwombo pemlam pa Baal i vute, man eturo pemlam mir udok ma ng’wice ng’ar m’ubino i wigi. Bende erungo i mbegi mi thier* nziki nziki, i ayi gin m’acwiya m’ang’ika kud ayi gin m’acwiya mi cuma* man eregogi gidoko ni mogo, e edhenye iwi liel mi ju ma gibed githiero lam igi. 5 Man ewang’u cogo julam iwi pemlam migi. Kumeno re m’edwoko Yuda ku Yeruzalem leng’.

6 I adhura mi suru pa Manase, pa Efraim, pa Simeon nitundo i suru pa Nafthali man i uvuru m’udhokogi, 7 erwombo pemlam, erungo i mbegi mi thier* man ayi gin m’acwiya m’ang’ika, eregogi ni mogo; bende eng’ondo pemlam mir udok ma ng’wice ng’ar ceke kud i ng’om mir Israel zoo, i ng’eye edok i Yeruzalem.

8 I oro mir apar aborane mi camuker pare, kinde m’edaru dwoko ng’ombe man hekalu* leng’, eoro Cafan ma wod Azalia, Maseya ma jatelwic mir adhura man Yoa ma wod Yoahaz ma jagor gicidh giyik ot pa Yehova Mungu pare. 9 E gicidho i bang’ Hilkia ma jalam ma dit man gimiyo sente ma jukelo i ot pa Mungu i bang’e, Julawi ma gi jukur dhugola re ma gijoko sentene kud i bang’ dhanu mi suru pa Manase, pa Efraim man kud i bang’ dong Israel ceke, man bende kud i bang’ dhanu mi suru pa Yuda, pa Benjamin ku dhanu mi Yeruzalem. 10 I ng’eye jumiyo sentene i bang’ ju ma juketho ginen wi tic mi ot pa Yehova. Jutic mi ot pa Yehova ke gitiyo ku sentene pi niculo wang’ ode man niyike. 11 Jumiyo sentene i bang’ bafundi, man i bang’ jurugiedo kara ging’iew ko kidi ma jupayu kumgi, yen mi tielo piny, man kara ging’iew riu pi nigiero ot ma jubim mi Yuda giweko unyothere.

12 Dhanune gitimo tic kubang’e kubang’e; juketho Julawi ma e ginen wigi: Yahath man Obadia ma gi Jumerari man Zekaria giku Meculam ma gi Jukohath. Julawi mange ma ceke gi jubodho mi wer, 13 gibed gineno wi juyey ter man wi dhanu ceke ma gibed gitimo kit tic ma tung’ tung’; Julawi moko gibino jugor, judongo, man jukur dhugang’.

14 Kinde ma jubewodho sente ma jukelo i ot pa Yehova, Hilkia ma jalam unwang’u buku mi Cik pa Yehova m’egam emiyo nikadhu kud i bang’* Musa. 15 E Hilkia uwacu ni Cafan ma jagor kumae: “Anwang’u buku mi Cik i ot pa Yehova.” Pieno, Hilkia umiyo bukune i bang’ Cafan. 16 I ng’eye, Cafan utero bukune i bang’ ubimo man eyero ire kumae: “Jutic peri gibetimo gin ceke ma jukwayu i bang’gi. 17 Gikonjo sente ma junwang’u i ot pa Yehova, gimiye i bang’ dhanu ma juketho man i bang’ ju m’ubetimo tic.” 18 Cafan ma jagor uyero bende ni ubimo kumae: “Hilkia ma jalam umiyo buku ma e i bang’a.” E Cafan ucaku somo lembe m’i iye i wang’ ubimo.

19 Kinde m’ubimo uwinjo lembe mi Cik, e ndhu ndhu eyeco bongu pare. 20 I ng’eye ubimo ung’olo ni Hilkia, Ahikam ma wod Cafan, Abdon ma wod Mika, Cafan ma jagor man ni Asaya ma jatic p’ubimo kumae: 21 “Wucidh wupenj lembe i bang’ Yehova pira, man pi dong ju m’udong’ i Israel man i Yuda iwi lembe mi buku ma junwang’u; kum kwinyo pa Yehova ma bicorere i wiwa e lee dit, pilembe kwaruwa giworo ngo lembe pa Yehova, gitimo ngo lembe ceke ma jukiewo i buku maeni.”

22 E Hilkia karacelo ku dhanu m’ubimo uoro gicidho i bang’ Hulda ma jabila ma dhaku. Ebino dhaku pa Calum ma wod Tikva ma wod Harhas ma jagwok bongu man ebed ebedo i theng adhura ma nyen mi Yeruzalem; e giweco kude keca. 23 Eyero igi kumae: “Yehova Mungu mir Israel uwacu kumae: ‘Wuyer ni ng’atu m’uorowu i bang’a kumae: 24 “Yehova uwacu kumae: ‘Abikelo nyoth iwi kabedo maeni man iwi dhanu ma bedo i iye, niwacu kwong’ ceke ma jukiewo i buku ma jusomo i wang’ ubimo mi Yuda. 25 Calu ma giweka man gibeketho yiro mi lam uduny ni mungu mange pi ninyayu ng’eicwiny i iya ku tic ceke ma gibetimo, abikonjo kwinyo para iwi kabedo maeni man lake bikwiyo ngo.’” 26 Ento wuyer ni ubimo mi Yuda m’uorowu wubin wupenj lembe i bang’ Yehova kumae: “Pi lembe m’iwinjo, Yehova Mungu mir Israel uwacu kumae: 27 ‘Calu m’adundeni ujolo* lembe para man ijwigiri giri i wang’ Mungu kinde m’iwinjo lembe m’ewacu pi kabedo maeni man pi dhanu m’i iye man ijwigiri i wang’a, iyeco bongu peri man iwak i wang’a, an de awinji, Yehova wacu. 28 Pi thelembe maeno, abicoki karacelo ku kwaru peri,* man ibivuto ku kwiyocwiny i liel peri. Weng’i bineno ngo nyoth ceke m’abikelo iwi kabedo maeni man iwi dhanu m’i iye.’”’”

E gidwoko lembe maeno ni ubimo. 29 E ubimo uoro jucidh julwong’o judongo ceke mi Yuda ku mi Yeruzalem. 30 I ng’eye, ubimo ucidho i ot pa Yehova karacelo ku jumaco ceke mi Yuda, dhanu mi Yeruzalem, julam man Julawi, niwacu dhanu ceke, ju ma dongo ku ma thindho bende. E esomo lembe ceke ma nwang’ere i buku mi lembariba ma junwang’u i ot pa Yehova i ithgi. 31 Ubimo ugam ucungo kakare man etimo lembariba* i wang’ Yehova nia ebilubo Yehova man ebiworo lembang’ola pare, poyowic pare, man telowic pare kud adundene ceke man ku ng’eyong’ec* pare ceke. Eng’olo nia ebitimo kumeno nwang’u ebekwo calku lembe ma jukiewo i buku mi lembaribane. 32 M’umedo maeno, eketho dhanu ceke mi Yeruzalem man dhanu mi suru pa Benjamin giyiyo dhu lembene. E dhanu mi Yeruzalem gitimo nimakere ku lembariba pa Mungu, niwacu Mungu pa kwarugi. 33 I ng’eye, Yosiya ukabu gin ma judagu ceke kud i ng’om mir Israel zoo, man eketho dhanu mir Israel ceke gitim ni Yehova Mungu migi. I nindo ceke mi kwo pare,* gilokiri ngo cen kud i kum lubo Yehova Mungu pa kwarugi.

35 Yosiya utimo Kadhukuwijo ni Yehova i Yeruzalem, man juthumo lei mi lam mi Kadhukuwijo i nindo apar ang’wen mi dwi mi kwong’o. 2 Eketho julam i dhu tic migi man emiyo amora i kumgi gitim tic migi i hekalu* pa Yehova. 3 I ng’eye eyero ni Julawi, ma gi juponji mir Israel ceke, ma gibino leng’ ni Yehova kumae: “Wuketh Sanduku ma leng’ i ot ma Suleman ma wod ubimo Daudi m’ubimo mir Israel ugiero; dong’ wubiyeye ngo kendo iwi gokwu. Kawoni wutim ni Yehova Mungu mwu man ni dhanu pare Israel. 4 Wuyikuru calku thepacu mwu nimakere kud ungu mwu calu m’Ubimo Daudi mir Israel man wode ma Suleman gikiewo. 5 Wucung i kabedo ma leng’ ma wucoko dhogwu i ungu calku thepacu mi dhanu, niwacu umego mwu, wucung i ayi ma juruotman bibedo kud ungu mi Julawi ma romo konyogi. 6 Wuthum lei mi lam mi Kadhukuwijo, wudwokuru giwu leng’ man wuyik piny pir umegwu kara wutim lembe ma Yehova uyero nikadhu kud i bang’ Musa.”

7 Yosiya umiyo udul lim ni dhanu, niwacu nyithi nyogi rombe man nyithi nyogi diegi, pi lam mi Kadhukuwijo ni dhanu ceke m’ubino keca, wend limne ceke ubino elufu pier adek (30 000), emiyo bende dhieng’ elufu adek (3 000). Ubimo uting’o piny maeno i kind piny pare gire. 8 Judongo ma wijo pare bende gimiyo piny ma jutiyo ko calu giramiya ma ku berocwiny pi dhanu, pi julam man pi Julawi. Hilkia, Zekaria man Yehiel ma gi jutela mi ot pa Mungu mandha gimiyo rombe elufu ario ku dak abusiel (2 600) ni julam pi lam mi Kadhukuwijo ku dhieng’ dak adek. 9 Konania man umego pare ma Cemaya giku Nethanel karacelo ku Hacabia, Yeiel man Yozabad, ma gi jutela mi Julawi gimiyo rombe elufu abic (5 000) ni Julawi pi lam mi Kadhukuwijo man dhieng’ dak abic.

10 Kinde ma tic mi yiko piny uthum, julam gigam gicungo kakagi man Julawi de gicungo calkud ungu migi, calu m’ubimo ng’olo. 11 Githumo lei mi lam mi Kadhukuwijo, man julam gikiro rimo ma gigamu kud i bang’ Julawi iwi pemlam, kinde ma Julawi gibino yang’u lei. 12 I ng’eye giyiko lam m’awang’a pi nipokogi ni dong dhanu m’udong’ ma gicokiri calku thepacu migi, kara juthier lamne ni Yehova calu ma jukiewo i buku pa Musa; gitimo kumeno ku dhieng’ bende. 13 Gitedo* ring’o mi Kadhukuwijone iwi mac, calu ma jubed jutimo, man gitedo giramiya ma leng’ i agulu, i aziza man i jam celo; i ng’eye gitere pio pio i bang’ dhanu m’udong’. 14 I ng’eye giyiko lam mi Kadhukuwijo pigi man pi julam, pilembe julam, niwacu nyikway Arun githiero lam m’awang’a man miyo nitundo uthieno, pieno Julawi giyiko lam mi Kadhukuwijo pigi gigi man pi julam, niwacu nyikway Arun.

15 Man juruwer ma gitie wot Asaf gibino i dhu tic migi calku lembe ma Daudi, Asaf, Heman man Yeduthun ma jaewlembe p’ubimo ging’olo; jukur dhugang’ gibino i dhugang’ ma tung’ tung’. Yeny mi weko tic migi ubino mbe pilembe umego migi ma gi Julawi giyiko lam mi Kadhukuwijo pigi. 16 Pieno cing’ nica gidaru niyiko piny ceke ma Yehova ukwayu i bang’gi pi nitimo Kadhukuwijo man pi nithiero lam m’awang’a iwi pemlam pa Yehova, calu m’Ubimo Yosiya ung’olo.

17 Juisrael ma gibino keca gitimo Kadhukuwijo i saa maeno, man Foc mi mukathi ma thobi mbe i iye pi nindo abiro. 18 Jutimo ngo kit Kadhukuwijo ma kumeca i Israel niai i nindo pa jabila Samwel; kadok jabim moko de mbe i kind jubim mir Israel m’utimo kit Kadhukuwijo ma calu ma Yosiya, julam, Julawi, dhanu mi Yuda ku mir Israel ceke ma gibino nuti man dhanu mi Yeruzalem gitimo. 19 Jutimo Kadhukuwijo maeno i oro mir apar aborane mi camuker pa Yosiya.

20 I ng’ey lembe maeni ceke, kinde ma Yosiya udaru niyiko hekalu, Ubimo Neko mi Misiri uidho pi nikiedo i Karkemic, ceng’ini kud Efrath. E Yosiya uwok pi nikiedo i dhoge. 21 Eoro jukwenda gicidh giyer ire kumae: “E ubimo mi Yuda, lembe peri tie ang’o i lembuni? Tin abebino kiedo ngo i dhogi, ento abecikiedo i dhu thek* mange, man Mungu uwacu ira nia acidh nyapio pio. Dong’ pi bero peri giri, kud ijai i dhu Mungu ma n’i kuda, kan ungo ebikelo nyoth i wii.” 22 Re Yosiya uloko ngo kud i kum Neko, ento eranjere pi nikiedo i dhoge; ewinjo ngo wec pa Neko m’uai i dhu Mungu. Pieno ecidho i lwiny i poga mi Megido.

23 E weg athero gikilo Ubimo Yosiya, man ubimo yero ni jutic pare kumae: “Wuwodha cen ku keni, kum anwang’u ret ma lee dit.” 24 Pieno jutic pare giwodhe kud i magali man gikethe i magali pare mir ario mi lwiny, gitere i Yeruzalem. E etho man jukunye i kabuli pa kwaru pare, man dhanu mi Yuda ku mi Yeruzalem ceke giwagu Yosiya. 25 Man Yeremia uwer pi niwagu Yosiya; juruwer ma co ku ma mon ceke gimediri niwer pi Yosiya i wer wak migi nitundo tin; bende jung’olo nia jubed juwer werne i Israel man jukiewogi i kind wer wak.

26 Dong kpawa mi kwo pa Yosiya man kite m’enyutho ko mer ma lokere ngo, m’eworo ko lembe m’ukiewere i Cik pa Yehova, 27 man lembe m’etimo niai i acaki nitundo i ajiki, jukiewogi i Buku mi Jubim mir Israel man mi Yuda.

36 I ng’eye, dhanu m’i ng’ombe giting’o Yehoahaz ma wod Yosiya man gikethe ni ubimo i Yeruzalem kaka won. 2 Yehoahaz ubino ku oro pier ario wi adek kinde m’edoko ubimo man ecamu ker pi dwi adek i Yeruzalem. 3 Ento ubimo mi Misiri ukabe cen kud iwi ker i Yeruzalem man eng’olo nia ng’om pare ucul amandi mi mola ma tar talanto* dak acel ku mola ma kwar talanto acel. 4 M’umedo maeno, ubimo mi Misiri uketho Eliakim m’umin Yehoahaz ni ubimo iwi Yuda man iwi Yeruzalem man eloko nyinge udoko Yehoiakim; ento Neko uting’o Yehoahaz m’umin man edok kude i Misiri.

5 Yehoiakim ubino ku oro pier ario wi abic kinde m’edoko ubimo, man ecamu ker pi oro apar acel i Yeruzalem. Emedere nitimo lembe ma rac i wang’ Yehova Mungu pare. 6 Ubimo Nebukadnezar mi Babeli uidho i kume pi nitwiye ku kongo ario mi mola kara etere i Babeli. 7 Nebukadnezar ucoko kum ajeni moko mi ot pa Yehova edok ko i Babeli man ekethogi i kal pare i Babeli. 8 Dong kpawa mi kwo pa Yehoiakim, gin ma Mungu dagu m’etimo, man lembe ma reco ceke m’ulwong’o nyinge, jukiewogi i Buku mi Jubim mir Israel man mi Yuda; e wode ma Yehoiakin udoko ubimo kakare.

9 Yehoiakin ubino ku oro apar abora kinde m’edoko ubimo, man ecamu ker i Yeruzalem pi dwi adek ku nindo apar; emedere nitimo lembe ma rac i wang’ Yehova. 10 I caku pa oro,* Ubimo Nebukadnezar mi Babeli uoro jucidh jugame jutere i Babeli man jucoko bende piny ma beco mi ot pa Yehova. E eketho Zedekia m’umin won ni ubimo iwi Yuda man iwi Yeruzalem.

11 Zedekia ubino ku oro pier ario wi acel kinde m’edoko ubimo, man ecamu ker i Yeruzalem pi oro apar acel. 12 Emedere nitimo lembe ma rac i wang’ Yehova Mungu pare. Ejwigere ngo gire i wang’ jabila Yeremia m’uweco ire nimakere ku lembe ma Yehova ng’olo. 13 Ejay bende i kum Ubimo Nebukadnezar m’ugam uketho ekwong’ere ku nying’ Mungu, man wiye medere nibedo tek,* cwinye de medere nibedo nwang’ man ekwero nidwogo i bang’ Yehova Mungu mir Israel. 14 Judongo mi julam ceke ku dhanu bende gimediri ameda nigwoko ngo bedoleng’ migi, ma gibetimo ko lembe ceke ma Mungu dagu mi thek, man gicido ot pa Yehova m’edwoko leng’ i Yeruzalem.

15 Yehova Mungu pa kwarugi umedere nicimogi nikadhu kud i bang’ jukwenda pare, ecimogi kendo kendo, pilembe kisa ubino nege i kum dhanu pare man i kum kabedo pare. 16 Ento gimediri ninywaru jukwenda pa Mungu mandha, gicayu lembe pare, man ging’iero jubila pare, nitundo ma kwinyo pa Yehova uopo ko i kum dhanu pare ma dong’ giromo both ungo.

17 E ekelo jabim mi Jukaldayo i kumgi, m’unego aradu migi ku palamularu i hekalu migi; kisa unege ngo i kum aradu kunoke nyaku ma sumba, ng’atu m’utii kadi won abala. Mungu umiyo piny ceke i cinge. 18 Ecoko ajeni mi ot pa Mungu mandha ceke, ma dongo man ma thindho, man bende lonyo mi ot pa Yehova ku lonyo p’ubimo man mi judongo ma wijo pare, eterogi ceke i Babeli. 19 Ewang’u ot pa Mungu mandha cen, erwombo gang’kidi mi Yeruzalem, ewang’u udi ma wiw ma tekne ceke ku mac, man enyotho piny ceke ma pigi tek. 20 Emaku ju ceke ma giboth kud i lak palamularu eterogi i ng’eca i Babeli, e gidoko jutic pare man mi wote nitundo ma ker mi Persi ucaku bimo, 21 pi nipong’o lembe ma Yehova uyero nikadhu kud i bang’ Yeremia, nitundo ma ng’om ukwiro ko sabatu pare. I nindo ceke m’edong’ ni uvuru, ekwiro sabatu pare nitundo ma oro pier abiro uthum.

22 I oro ma kwong’a mi camuker p’Ubimo Kuro mi Persi, Yehova ucwalu* Ubimo Kuro mi Persi pi nitwong’o lembe i ker pare zoo man ekiewo atwong’ane bende akiewa, kara lembe ma Yehova uyero nikadhu kud i bang’ Yeremia upong’. Atwong’ane uwacu kumae: 23 “Kuro m’Ubimo mi Persi uwacu kumae: ‘Yehova Mungu mi polo umiyo ira ker ceke m’i wi ng’om man eng’olo ira nia agier ire ot i Yeruzalem ma n’i Yuda. Ng’atu moko ci m’i kindwu ma tie i kind dhanu pare, dong’ Yehova ubed kude man dong’ eidh malu.’”