EZRA

1 I oro ma kwong’a mi camuker p’Ubimo Kuro mi Persi, Yehova ucwalu* Ubimo Kuro mi Persi pi nitwong’o lembe i ker pare zoo, man ekiewo atwong’ane bende akiewa kara lembe ma Yehova uyero nikadhu kud i bang’ Yeremia upong’. Atwong’ane uwacu kumae:

2 “Kuro m’ubimo mi Persi uwacu kumae: ‘Yehova Mungu m’i polo umiyo ira ker ceke m’i wi ng’om man eng’olo ira nia agier ire ot i Yeruzalem ma n’i Yuda. 3 Ng’atu moko ci m’i kindwu ma tie i kind dhanu pare, dong’ Mungu pare ubed kude man dong’ eidh malu i Yeruzalem man i Yuda, man egier kendo ot pa Yehova Mungu mir Israel m’ubino i Yeruzalem;* en e Mungu mandha. 4 Ku ba dhanu ceke m’ubekwo ni umondo kaka moko ci m’ecopo nwang’ere i iye, dong’ judhugola pare* gikonye; gimii ire mola ma tar ku mola ma kwar, kum piny migi moko man udul lim, gimii bende giramiya ma ku berocwiny pi ot pa Mungu mandha m’ubino i Yeruzalem.’”

5 E jutelwic mi thepacu mi Yuda man mi suru pa Benjamin ku julam man Julawi, dhanu ceke ma tipo pa Mungu mandha ucwalugi,* giyikiri pi niidho malu man nigiero kendo ot pa Yehova m’ubino i Yeruzalem. 6 Dhanu ceke ma gikwo ceng’ini kugi gikonyogi, gimiyo igi* ajeni mi mola ma tar man mi mola ma kwar, piny migi, udul lim man piny ma pigi tek, m’uweko giramiya ma ku berocwiny ceke.

7 Ubimo Kuro uwodho bende ajeni mi ot pa Yehova m’ubimo Nebukadnezar ugam uting’o kud i Yeruzalem, man eketho i ot pa mungu pare. 8 Ubimo Kuro mi Persi uketho juwodhogi i the telowic pa Mithredath ma jagwok lonyo man en ekwanugi, emiyogi i bang’ Cecbazar* ma jadit ma wijo mi Yuda.

9 Wend piny ma jukwanune ni e: ajeni pier adek mi mola ma kwar ma juyiko ve kithunga, man ajeni elufu acel (1 000) mi mola ma tar ma juyiko ve kithunga, ajeni pier ario wi abung’wen mi wilo wadi, 10 nyithi tabu mi mola ma kwar pier adek, nyithi tabu mi mola ma tar dak ang’wen kud apar, man ajeni mange elufu acel (1 000). 11 Wend ajeni ceke mi mola ma kwar ku mi mola ma tar ubino elufu abic ku dak ang’wen (5 400). Cecbazar uidho kugi ceke kinde ma ju ma gibino i ng’eca giai kud i Babeli gidok i Yeruzalem.

2 Maeni ubino dhanu mi theng ng’om* ma giidho kud i kind ju ma jugam juyaku jutero i ng’eca, niwacu ju m’Ubimo Nebukadnezar mi Babeli utero i ng’eca i Babeli, man ma i ng’eye gidwogo i Yeruzalem man i Yuda, ng’atuman i adhura ma thugi. 2 Gi ju ma gidwogo karacelo ku Zerubabel, Yecuwa, Nehemia, Seraya, Relaya, Mordekai, Bilcan, Mispar, Bigvai, Rehum man Baana.

Wend jumaco mir Israel ubino e: 3 wot Paroc, elufu ario ku dak acel pier abiro wi ario (2 172); 4 wot Cefathia, dak adek ku pier abiro wi ario; 5 wot Ara, dak abiro ku pier abiro wi abic; 6 wot Pahath-moab mi ot pa Yecuwa man pa Yoab, elufu ario ku dak abora kud apar ario (2 812); 7 wot Elam, elufu acel ku dak ario pier abic wi ang’wen (1 254); 8 wot Zatu, dak abung’wen ku pier ang’wen wi abic; 9 wot Zakai, dak abiro ku pier abusiel; 10 wot Bani, dak abusiel ku pier ang’wen wi ario; 11 wot Bebai, dak abusiel ku pier ario wi adek; 12 wot Azgad, elufu acel ku dak ario pier ario wi ario (1 222); 13 wot Adonikam, dak abusiel ku pier abusiel wi abusiel; 14 wot Bigvai, elufu ario ku pier abic wi abusiel (2 056); 15 wot Adin, dak ang’wen ku pier abic wi ang’wen; 16 wot Ater mi ot pa Hezekia, pier abung’wen wi abora; 17 wot Bezai, dak adek ku pier ario wi adek; 18 wot Yora, dak acel kud apar ario; 19 wot Hacum, dak ario ku pier ario wi adek; 20 wot Gibar, pier abung’wen wi abic; 21 dhanu mi Bethlehem, dak acel ku pier ario wi adek; 22 jumaco mi Netofa, pier abic wi abusiel; 23 jumaco mir Anathoth, dak acel ku pier ario wi abora; 24 wot Azmaveth, pier ang’wen wi ario; 25 dhanu mi Kiriath-jearim, mi Kefira man mi Beroth, dak abiro ku pier ang’wen wi adek; 26 dhanu mi Rama man mi Geba, dak abusiel ku pier ario wi acel; 27 jumaco mi Mikmas, dak acel ku pier ario wi ario; 28 jumaco mi Bethel man mi Ai, dak ario ku pier ario wi adek; 29 wot Nebo, pier abic wi ario; 30 wot Magbic, dak acel ku pier abic wi abusiel; 31 wot Elam ma kucelo, elufu acel ku dak ario pier abic wi ang’wen (1 254); 32 wot Harim, dak adek ku pier ario; 33 wot Lod, Hadid man Ono, dak abiro ku pier ario wi abic; 34 dhanu mi Yeriko, dak adek ku pier ang’wen wi abic; 35 wot Sena, elufu adek ku dak abusiel pier adek (3 630).

36 Julam ubino: wot Yedaya mi ot pa Yecuwa, dak abung’wen ku pier abiro wi adek; 37 wot Imer, elufu acel ku pier abic wi ario (1 052); 38 wot Pacur, elufu acel ku dak ario pier ang’wen wi abiro (1 247); 39 wot Harim, elufu acel kud apar abiro (1 017).

40 Julawi ubino: wot Yecuwa giku Kadmiel mi ot pa Hodavia, pier abiro wi ang’wen. 41 Juruwer ubino: wot Asaf, dak acel ku pier ario wi abora. 42 Wot jukur dhugang’ ubino: wot Calum, wot Ater, wot Talmon, wot Akub, wot Hatita, wot Cobai, ceke wendgi ubino dak acel ku pier adek wi abung’wen.

43 Jutic mir hekalu* ubino: wot Ziha, wot Hasufa, wot Tabaoth, 44 wot Keros, wot Siaha, wot Padon, 45 wot Lebana, wot Hagaba, wot Akub, 46 wot Hagab, wot Salmai, wot Hanan, 47 wot Gidel, wot Gahar, wot Reaya, 48 wot Rezin, wot Nekoda, wot Gazam, 49 wot Uza, wot Pasea, wot Besai, 50 wot Asna, wot Meunim, wot Nefusim, 51 wot Bakbuk, wot Hakufa, wot Harhur, 52 wot Bazluth, wot Mehida, wot Harca, 53 wot Barkos, wot Sisera, wot Tema, 54 wot Nezia, man wot Hatifa.

55 Wot jutic pa Suleman ubino: wot Sothai, wot Sofereth, wot Peruda, 56 wot Yaala, wot Darkon, wot Gidel, 57 wot Cefathia, wot Hatil, wot Pokereth-hazebaim, man wot Ami.

58 Wend jutic ceke mir hekalu* man wot jutic pa Suleman ubino dak adek ku pier abung’wen wi ario.

59 Ju m’ulubo e gi ju ma giidho kud i Tel-mela, Tel-harca, Kerub, Adon, man Imer, ento gituc ungo ninyutho ka thepacu migi man ka thugi, ka nyo gibino Juisrael: 60 wot Delaya, wot Thobia man wot Nekoda, dak abusiel ku pier abic wi ario. 61 Man i kind wot julam ubino: wot Habaya, wot Hakoz, wot Barzilai m’ugamu dhaku i kind jumanyir pa Barzilai ma Jagilead, man julwong’e ku nying’ jalwon. 62 Giyenyo nying’gi i buku pi ning’eyo thekwaru migi, ento ginwang’u ngo; pieno junwang’u nia giromo ngo nitimo tic mi lamulam.* 63 E jabim* uyero igi nia kud gikegicam piny ma leng’ m’usagu, nitundo ma jalam moko bipenjo lembe kud Urim man Thumim.

64 Wend dhanu ceke mi cokiri ubino elufu pier ang’wen wi ario ku dak adek pier abusiel (42 360), 65 m’uweko ng’eca migi ma co ku ma mon ma wendgi ubino elufu abiro ku dak adek pier adek wi abiro (7 337); gibino bende ku juruwer ma co ku ma mon dak ario. 66 Riuni migi ubino dak abiro ku pier adek wi abusiel, kit kana migi mange* ubino dak ario ku pier ang’wen wi abic, 67 ngamia migi ubino dak ang’wen ku pier adek wi abic, man kana migi ubino elufu abusiel ku dak abiro pier ario (6 720).

68 Kinde ma gitundo i ot pa Yehova i Yeruzalem, jumoko m’i kind jutelwic mi thepacu gimiyo giramiya ma ku berocwiny pi ot pa Mungu mandha, kara jugiere kendo* kaka m’ebino i iye. 69 Nimakere ku copo migi, gimiyo drakma* mi mola ma kwar elufu pier abusiel wi acel (61 000) i kakanpiny mi tic mi giedo, mina* mi mola ma tar elufu abic (5 000) man kendi ma lorlor dak acel pi julam. 70 Man julam, Julawi, jumoko m’i kind dhanu, juruwer, jukur dhugang’ man jutic mir hekalu* gibedo i adhura migi, man dong Juisrael ceke* de gibedo i adhura migi.

3 Kinde ma dwi mir abiro uromo man Juisrael* de gidaru bedo i adhura migi, gicokiri karacelo ma dhoggi ripo i Yeruzalem. 2 Yecuwa ma wod Yehozadak ku julam wagi man Zerubabel ma wod Cealtiel kud umego pare, giai malu man gigiero pemlam pa Mungu mir Israel kara githier lam m’awang’a i wiye, calu ma jukiewo pire i Cik pa Musa ma dhanu pa Mungu mandha.

3 Pieno, gigiero pemlamne kaka m’elar ebino i iye, kadok nwang’u gibino lworo dhanu mi ng’om m’utiekogi de; man gicaku thiero lam m’awang’a ni Yehova i wiye: lam m’awang’a mi kugweno man mir uthieno. 4 I ng’eye, gitimo Foc mi otbak* nimakere ku lembe ma jukiewo, man kubang’ ceng’ gibed githiero lam m’awang’a i wel ma juketho kubang’ ceng’. 5 l ng’eye, githiero lam m’awang’a ma thiri thiri, girathiera mi por pa dwi, man girathiera pi foc ceke ma leng’ pa Yehova, ku girathiera ma ku berocwiny ma ju m’adundegi ubino ayika gimiyo ni Yehova. 6 Niai i nindo ma kwong’a mi dwi mir abiro, gicaku thiero lam m’awang’a ni Yehova kadok nwang’u fodi juketho ngo kathere mir hekalu pa Yehova.

7 Gimiyo sente ni jupay kidi man ni jubodho. Gimiyo bende cam ku giramadha man mo ni Jusidon ku Juturo kara gikel yend tido ku yo mi nam, niai i Lebanon nitundo i Yopa, calku twero m’ubimo Kuro mi Persi umiyo igi.

8 I oro mir arionde i ng’ey ma gitundo i ot pa Mungu mandha i Yeruzalem i dwi mir arionde, Zerubabel ma wod Cealtiel, Yecuwa ma wod Yehozadak man dong umego migi, niwacu julam ku Julawi man dhanu ceke ma gitundo i Yeruzalem ma giai kud i ng’eca, gicaku tic. Giketho Julawi ma niai i oro pier ario nidok yo malu gibed junen wi tic mi ot pa Yehova. 9 Pieno, Yecuwa ku wote kud umego pare man Kadmiel ku wote, ma ceke gibino nyikway Yuda gidikiri karacelo pi nineno wi ju ma gibetimo tic i ot pa Mungu. Wot Henadad, wotgi kud umego migi ma gi Julawi de gidikiri kugi.

10 Kinde ma jurugiedo giketho kathere mir hekalu pa Yehova, julam ma gikendo bongu mi tic man gimaku agwara, ku Julawi ma gi wot Asaf ma gimaku jamgoyo wer ma woy awoya, gicungo pi nipaku Yehova, calku telowic p’Ubimo Daudi mir Israel. 11 E gicaku wer, jumange gibino gamu the werne ma gibepaku Yehova man gibedwoko foyofoc ire, giwacu kumae: “Pilembe e ber man mer pare ma lokere ngo yor i bang’ Israel bedo rondo ku rondo.” I ng’eye, dhanu ceke gipaku Yehova ma gibekok ku dwandgi ma tek kum juketho kathere mi ot pa Yehova. 12 Ju ma dupa m’i kind julam, Julawi man judongo mi thepacu, niwacu judongo ma gigam gineno ot ma kwong’a, giwak ku dwandgi ma tek kinde ma gineno nia jubeketho kathere mi ot maeni, man saa maeno jumange ma dupa gikok ku dwandgi ma tek kud anyong’a. 13 Pieno, ecopere ngo ni dhanu ning’iyo dwal mi kok mir anyong’a man dwal mi wak, kum dhanu gibino kok ku dwandgi ma tek mandha uketho dwalne ubino winjere ka ma bor dit.

4 Kinde ma judegi mi dhanu mi Yuda man mi Benjamin giwinjo nia ju ma gidwogo kud i ng’eca gibegiero hekalu ni Yehova Mungu mir Israel, 2 e ndhu ndhu gibino i bang’ Zerubabel man i bang’ judongo mi thepacu man giwacu igi kumae: “Wuwek wagier otne karacelo kudwu, pilembe wan de waworo* Mungu mwu eno calu wun; man wacaku thiero ire lam niai i nindo p’Ubimo Esar-hadon mir Asiria m’ukelowa kakeni.” 3 Ento Zerubabel, Yecuwa, man dong judongo mi thepacu mir Israel giyero igi kumae: “Wubidikuru ngo kudwa i giedo mi ot ma wabegiero ni Mungu mwa, kum wan kendwa re ma wabigiere ni Yehova Mungu mir Israel, tap calu m’Ubimo Kuro ma en e ubimo mi Persi ung’olo iwa.”

4 E dhanu mi ng’ombe gimediri nituro cwiny dhanu mi Yuda* man ninyayu lworo i igi kara giwek giedone. 5 Giculo jumii juk pi nijai i kum Juyahudi man niranyu lembe ma Juyahudine gipangu i nindo ceke p’Ubimo Kuro mi Persi, nitundo i the bimobim p’Ubimo Dario mi Persi. 6 I acaki mi bimobim p’Ahasuero, gikiewo lembe pi nidoto dhanu mi Yuda man mi Yeruzalem. 7 Man i nindo p’Ubimo Artacasta mi Persi, Biclam, Mithredath, Tabel, man dong juwagi, gikiewo barua ni Artacasta m’ubimo. Giloko baruane i dhu Juaramea man gikiewe de ku nyiguta mi dhu Juaramea.*

8 * Rehum ma jadit mi judongo pa gavmenti, man Cimcai ma jagorcik gikiewo barua mir adote i kum Yeruzalem ni Ubimo Artacasta. 9 Baruane ai i bang’ Rehum ma jadit mi judongo pa gavmenti, man Cimcai ma jagorcik ku dong juwagi, jupoklembe, jubim ma thindho, jugor, dhanu mir Erek, dhanu mi Babeli, dhanu ma gibedo i Susa, niwacu Juelam, 10 man dong dhanu ma Asenapar ma dwong’ man m’utie ku yung utero i ng’eca, man eketho gibedo i adhura mi Samaria ku dong dhanu ma gin’i ng’om ma loka Kulo.* Nwang’u 11 barua ma gioro irene uwacu kumae:

“Ni Ubimo Artacasta: Barua maeni uai kud i bang’ jutic peri ma gi dhanu mi ng’om ma loka Kulo. Dong’ 12 ubimo ung’ey nia Juyahudi ma giai i beng’i gidwogo i bang’wa kuni gitundo i Yeruzalem. Gibegiero kendo adhura ma rac man ma jajai; gibedaru gang’kidi man gibeyiko katherene. 13 Kawoni ubimo ung’ey nia, ka judok jugiero adhura maeni kendo man tek judaru gang’kidine, gibimiyo ngo ajok, ajok pi ng’om, kadi palatha mi gengi man eno biketho piny bimondo ngo i kakanpiny mi jubim. 14 Calu ma wabed wanwang’u cul mwa i kal,* man e ber ungo iwa nineno nia lembe ma rac kumeno ubetimere i kum ubimo, eno re m’uketho wanyutho lembe maeni ni ubimo 15 kara jutim sayusac i buku mi kpawa mi kwaru peri. I buku maeno ibinwang’u nia adhura maeni tie adhura ma jajai, ma nyayu peko i kum jubim, man i kum theng ng’om; man i iye dhanu ma ginyayu yakini gibino nuti niai con. Pi thelembe maeno re ma jugam junyotho adhurane cen. 16 Wabeketho ubimo ung’ey nia, tek judok jugiero adhura maeni kendo man judaru gang’kidine, ibibedo mbe ku dito iwi* ng’om ma loka Kulo.”

17 E ubimo uoro kwenda ni Rehum ma jadit mi judongo pa gavmenti, man ni Cimcai ma jagorcik ku dong juwagi ma gibedo i Samaria man i dong ng’om ma loka Kulo, ewacu kumae:

“Moth iwu! Kawoni 18 jusomo* barua ma wuoro i bang’wa ngbeng’ i wang’a. 19 Nikum ng’ol m’amiyo, jutimo sayusac, e junwang’u nia niai yang’ con, adhura maeni ubed uai i kum jubim man jai ku yakini ubed ubedo i iye. 20 Jubim ma weg tego gibino nuti i Yeruzalem, man gibed gibimo wi ng’om ceke ma loka Kulo; e jubed juculo igi ajok, ajok pi ng’om, man palatha mi gengi. 21 Kawono wung’ol nia dhanu maeno gijig tic, kara kud jugier adhura maeno nitundo m’abing’olo an. 22 Wubed ku weng’wu man wiwu kud uwil nitimo lembe maeni, kara jujig nitimo lembe ma rac i kum ubimo.”

23 I ng’ey ma jusomo barua p’Ubimo Artacasta i wang’ Rehum man Cimcai ma jagorcik ku juwagi, gicidho nyapio pio i bang’ Juyahudi ma gin’i Yeruzalem man gidiyogi pi niketho gijig tic. 24 E i saa maeno re ma tic mi ot pa Mungu m’ubino i Yeruzalem ujik; ticne ujik nitundo i oro mir arionde mi camuker p’Ubimo Dario mi Persi.

5 E jabila Hagai giku jabila Zekaria ma nyakwar Ido giewo ni Juyahudi ma gibino i Yuda man i Yeruzalem ku nying’ Mungu mir Israel ma bedo malu i wigi. 2 I saa maeno re ma Zerubabel ma wod Cealtiel giku Yecuwa ma wod Yehozadak gicaku giero kendo ot pa Mungu m’ubino i Yeruzalem, man jubila pa Mungu gibino karacelo kugi man gitielo cwinygi. 3 I saa maeno Tatenai ma jabim* mi ng’om ma loka Kulo* man Cethar-bozenai giku juwagi, gibino i bang’gi man gipenjogi kumae: “Ng’a m’umiyo iwu ng’ol ma wugier ko ot maeni man wuketh riu maeni?” 4 I ng’eye gipenjogi kumae: “Nying’ ju m’ubegiero ot maeni utie ng’agi?” 5 Ento wang’ Mungu ubino iwi judongo mi Juyahudi man gicerogi ngo nitundo ma juoro rwonglembene ni Dario man juoro barua udwogo ku kuca iwi lembene.

6 Maeni utie barua ma Tatenai ma jabim* ma loka Kulo man Cethar-bozenai ku juwagi, niwacu jubim ma thindho mi ng’om ma loka Kulo, gioro ni Ubimo Dario. 7 Barua ma gikiewone uwacu kumae:

“Ni Ubimo Dario:

“Kwiyocwiny ceke iri! 8 Dong’ ubimo ung’ey nia wacidho i theng ng’om mi Yuda i bang’ ot pa Mungu ma dit, man jubegiere ku kidi ma dongo ma jung’ielo nitundo keca man juberoyo riu i kor otne. Tije ubemedere pilembe dhanu gibetime kud amora man ku kero. 9 E wapenjo judongo migi kumae: ‘Ng’a m’umiyo iwu ng’ol ma wugier ko ot maeni man wuketh riu maeni?’ 10 Wapenjo bende nying’gi pi nikiewo nying’ ju m’ubetelo wi ticne kara wanyuth iri.

11 “Gidwoko iwa kumae: ‘Wan wa jutic pa Mungu mi polo ku ng’om, man wabegiero kendo ot ma jular jugiero oro dupa udaru kadhu; ubimo moko ma dit mir Israel re m’ugam ugiero otne man edare. 12 Re kwaruwa ginyayu kwinyo i Mungu mi polo, pieno emiyogi i cing Ubimo Nebukadnezar ma Jakaldayo, erwombo ot maeni man etero dhanu i ng’eca i Babeli. 13 Ento i oro ma kwong’a mi camuker p’Ubimo Kuro mi Babeli, Ubimo Kuro umiyo ng’ol ma jugier ko kendo ot pa Mungu maeni. 14 M’umedo maeno, ajeni mi mola ma kwar ku mi mola ma tar mi ot pa Mungu ma Nebukadnezar ugam ucoko kud i hekalu mi Yeruzalem man eterogi i hekalu mi Babeli, Ubimo Kuro uwodhogi kud i hekalu mi Babeli. Jumiyogi i bang’ ng’atu moko ma nyinge Cecbazar* ma Kuro uketho ni jabim.* 15 Kuro uwacu ire kumae: “Gam ajeni maeni, cidh ikethgi i hekalu ma n’i Yeruzalem, man dong’ jugier ot pa Mungu kendo i kakare ma con.” 16 Cecbazarne ugam ubino man eketho kathere mi ot pa Mungu ma n’i Yeruzalem; e jucaku giere niai eca nitundo kawoni, re ethum ungo.’

17 “Kawoni tek ebedo ber i wang’ ubimo, dong’ jutim sayusac i kakanpiny mi kal i Babeli kuno, pi ning’eyo ka nyo andha Ubimo Kuro umiyo ng’ol ma jugier ko kendo ot pa Mungu maeno i Yeruzalem; man dong’ juor iwa yub m’ubimo maku iwi lembe maeni.”

6 I saa maeno re m’Ubimo Dario umiyo ng’ol, man jutimo sayusac i ot ma jubed jugwoko i iye buku mi lemkei man lonyo i Babeli. 2 E junwang’u kithabu m’adola moko i ot ma tek i Ekbathana, i theng ng’om mi Medi, man i kithabune jukiewo rwonglembe ma e:

3 “I oro ma kwong’a mi camuker p’Ubimo Kuro, Ubimo Kuro umiyo ng’ol pi ot pa Mungu i Yeruzalem kumae: ‘Wek jugier otne kendo kara ebed kaka ma jubed juthier i iye lam, man juketh kathere mi ode kakare. Dongo pare bibedo bot pier abusiel,* lacne bot pier abusiel; 4 wucikuru nigiero kor ode ku leni adek mi kidi m’upangere iwi wadi, man leni acel wubiketho yen. Dong’ ot p’ubimo ucul welpinyne. 5 Bende, wek ajeni mi mola ma kwar man mi mola ma tar mi ot pa Mungu ma Nebukadnezar ucoko kud i hekalu m’ubino i Yeruzalem man udwogo ko i Babeli udoki, kara jukethgi kakagi i hekalu i Yeruzalem man jukethgi i ot pa Mungu.’

6 “Kawoni, in i Tatenai m’itie jabim mi ng’om ma loka Kulo,* Cethar-bozenai wuku juwedu, niwacu jubim ma thindho mi ng’om ma loka Kulo, kud wumond i lembuno. 7 Kud wucer tic m’ubetimere i kum ot pa Mungu maeno. Jabim* mi Juyahudi ku judongo mi Juyahudi gibigiero kendo ot pa Mungu kaka m’ebino i iye. 8 M’umedo maeno, abeng’olo iwu gin ma wucikuru nitimo ni judongo maeno mi Juyahudi kara gigier ot pa Mungu: Niai kud i kakanpiny mi kal, kud i kind ajok ma loka Kulo, jumii welpiny ma ticne ukwayu nyapio pio i bang’ dhanu maeno, kara ticne umedere m’umbe nicungo. 9 Man gin ceke ma yenyne nuti, niwacu nyithi thwoni dhieng’ man rombe ku nyithi rombe pi lam m’awang’a ni Mungu mi polo, ku nganu, kadu, pigulok man mo, tap calu ma julam mi Yeruzalem giyero, jucikiri niwotho bemiyogi igi kubang’ ceng’ m’umbe nikalu iye, 10 kara gimediri nithiero girathiera ma nyayu anyong’a i Mungu mi polo, man girwo pi kwo p’ubimo man mi wote. 11 Ang’olo bende nia, ng’atu ma tek uturo cik maeni, jubiwodho riu mi ot pare man jubiting’o ng’atune malu jubigure i wiye,* man ot pare bidoko ni kabini* mi dhanu ceke pi dubo maeno. 12 Dong’ Mungu m’uketho nyinge ubed keca, ubol ubimo moko ci man dhanu ma giting’o cing’gi pi nituro ng’ol maeni, man ninyotho ot pa Mungu maeno ma n’i Yeruzalem. An a Dario re m’ang’olo lembe maeni. Dong’ jutime pio pio.”

13 E Tatenai ma jabim* mi ng’om ma loka Kulo, Cethar-bozenai ku juwagi, gitimo lembe ceke m’Ubimo Dario ung’olo pio pio mandha. 14 Man judongo mi Juyahudi gimediri nigiero otne, man ticne umedere pilembe lembila pa jabila Hagai giku Zekaria ma nyakwar Ido re m’utielo cwinygi; gidaru tic mi giedone nikum ng’ol pa Mungu mir Israel man nikum ng’ol pa Kuro, Dario, man Artacasta m’Ubimo mi Persi. 15 Gidaru otne i nindo mir adege mi dwi mir Adar* i oro mir abusiende mi camuker p’Ubimo Dario.

16 I ng’eye Juisrael, julam, Julawi, man dong ju ma gidwogo kud i ng’eca giyabu dhu* ot pa Mungu maeni kud anyong’a. 17 Pi niyabu dhu ot pa Mungu maeni, gimiyo thwoni dhieng’ dak acel, nyogi rombe dak ario, nyithi nyogi rombe dak ang’wen, man pi lam mi dubo pir Israel ceke, gimiyo nyogi rombe apar ario calku wend suru mir Israel. 18 E giketho julam i ungu migi, man Julawi de i ungu migi kara gitim tic pa Mungu i Yeruzalem, calku lembe ma jukiewo i buku pa Musa.

19 Man ju ma gidwogo kud i ng’eca gitimo Kadhukuwijo i nindo mir apar ang’wende mi dwi mi kwong’o. 20 Julam ku Julawi gidwokiri gigi leng’ ma ng’atu moko mbe m’udong’, uketho gin ceke gidoko leng’; githumo rombe mi Kadhukuwijo ni ju ceke ma gidwogo kud i ng’eca, ni julam wagi, man igi gigi. 21 I ng’eye Juisrael ma gidwogo kud i ng’eca gicame karacelo ku dhanu ceke ma gidikiri kugi, man ma gikoyiri gigi kud i kum piny m’ucido mi thek mi ng’ombe, pi nitimo thier* ni Yehova Mungu mir Israel. 22 Bende gitimo foc mi Mukathi ma thobi mbe i iye kud anyong’a pi nindo abiro, kum Yehova unyayu anyong’a i igi man eketho adunde ubimo mir Asiria ubedo ber yor i bang’gi, uketho ekonyogi* i tic mi ot pa Mungu mandha, ma Mungu mir Israel.

7 I ng’ey lembe maeni, i nindo mi camuker p’Ubimo Artacasta mi Persi, Ezra* udwogo. Ebino wod Seraya, ma wod Azaria, ma wod Hilkia, 2 ma wod Calum, ma wod Zadok, ma wod Ahitub, 3 ma wod Amaria, ma wod Azaria, ma wod Merayoth, 4 ma wod Zerahia, ma wod Uzi, ma wod Buki, 5 ma wod Abicuwa, ma wod Fineas, ma wod Eleazar, ma wod Arun ma jalam ma dit. 6 Ezra eni udwogo kud i Babeli. Ebino jagor* m’ung’eyo Cik pa Musa cuu,* Cik ma Yehova Mungu mir Israel ugam umiyo. Ubimo umiyo gin ceke m’ekwayu, pilembe cing’ Yehova Mungu pare ubino i wiye.

7 Jumoko m’i kind Juisrael, m’i kind julam, m’i kind Julawi, juruwer, jukur dhugang’, man jutic mir hekalu,* gidok i Yeruzalem i oro mir abiro mi camuker p’Ubimo Artacasta. 8 Ezra ugam utundo i Yeruzalem i dwi mir abic, i oro mir abiro mi camuker p’ubimo. 9 Ecoko woth kud i Babeli i nindo ma kwong’a mi dwi ma kwong’a, man etundo i Yeruzalem i nindo ma kwong’a mi dwi mir abic, kum cing’ Mungu pare ubino i wiye. 10 Ezra ugam uyiko adundene* pi ning’iyo i Cik pa Yehova man pi nitiyo kude, man pi niponjo cikne ku telowicne i Israel.

11 Eni tie barua m’Ubimo Artacasta umiyo ni Ezra ma jalam man jagor* ma jabodho m’ubed uponjo* lembang’ola pa Yehova man telowic pare i Israel:

12 * “Artacasta ma tie ubimo mi jubim, ni Ezra ma jalam, man jagor mi Cik pa Mungu mi polo: Kwiyocwiny ma dit ubed iri. Kawoni, 13 ang’olo nia ng’atu moko ci m’i the ker para, ma n’i kind dhanu mir Israel, man julam migi ku Julawi ma gitie ayika nicidho karacelo kudi i Yeruzalem, gicidhi. 14 Kum ubimo ku jumii juk pare abiro re ma giori, kara icidh isay ning’eyo nia nyo jubetiyo ku Cik pa Mungu peri ma ni karacelo kudi* i Yuda man i Yeruzalem, 15 man kara iter mola ma tar man mola ma kwar m’ubimo ku jumii juk pare gimiyo ku berocwinygi ni Mungu mir Israel, ma kabedo pare n’i Yeruzalem, 16 ku mola ma tar man mola ma kwar ceke m’igamu* i theng ng’om ceke mi Babeli, karacelo ku giramiya ma dhanu man julam gimiyo ku berocwinygi pi ot pa Mungu migi ma n’i Yeruzalem. 17 Man ku sentene ukwayu ing’iew nyapio pio thwoni dhieng’, nyogi rombe, man nyithi rombe, karacelo ku girathiera mi nying cam, man girathiera mi pigulok migi, man ukwayu ithiergi iwi pemlam mi ot pa Mungu peri i Yeruzalem.

18 “Man gin moko ci ma tie ber i weng’i man i wang’ umego peri nia wutim, wutimgi ku dong mola ma tar ku mola ma kwar m’udong’, calku yeny pa Mungu mwu. 19 Man ajeni ceke ma jumiyo i beng’i pi tic mi ot pa Mungu peri, tergi i wang’ Mungu i Yeruzalem. 20 Man dong piny ma pigi tek pi ot pa Mungu peri m’ukwayu nia imii, ibing’iewogi ku lonyo m’i kakanpiny p’ubimo.

21 “An Ubimo Artacasta, ang’olo ni jugwok lonyo ceke mi ng’om ma loka Kulo,* nia gin moko ci ma Ezra ma jalam man jagor mi Cik pa Mungu mi polo ukwayu i beng’wu, wutime pio pio, 22 nitundo mola ma tar talanto* dak acel, nganu kor* dak acel, pigulok agulu* dak acel, mo agulu dak acel, man kadu m’umbe nipimo. 23 Gin moko ci ma Mungu mi polo ung’olo, jutime kud amora pi ot pa Mungu mi polo, kara kwinyo kud ubed i kum ker p’ubimo man i kum wote. 24 Bende apoyowu nia jucikiri ngo nikwayu ajok, ajok pi ng’om, kadi palatha i bang’ jalam moko, Jalawi, juruwer, jukur dhugang’, jutic mir hekalu,* man ju ma gibetimo tic mi ot pa Mungu.

25 “Man in i Ezra, nimakere ku rieko m’itie ko ma Mungu peri umiyo iri,* keth dhanu ceke ma ging’eyo cik pa Mungu peri, gibed jubim man jupoklembe pi nipoko lembe mi dhanu ceke ma gin’i ng’om ma loka Kulo, man iponj ng’atu moko ci m’ung’eyo ngo cikne. 26 Ng’atu moko ci m’ubeworo ngo cik pa Mungu peri, man cik p’ubimo, jucikiri ning’olo lembe i wiye nyapio pio; dok ebed tho, jutere i ng’eca, jung’ol amandi i wiye, kunoke juroye i kol.”

27 Dong’ pak ubed ni Yehova Mungu pa kwaruwa, m’uketho i adunde ubimo nia eruk ot pa Yehova ma n’i Yeruzalem! 28 Man enyutho ira mer ma lokere ngo i wang’ ubimo, i wang’ jumii juk pare man i wang’ judongo ma wijo ma tek ceke p’ubimo. Pieno anwang’u amora* pilembe cing’ Yehova Mungu para ubino i wiya, man acoko jutela* kud i Israel ceke kara wacidh kugi.

8 Maeni gi judongo mi thepacu man ayi ma jukiewo ko nying’gi nimakere ku thepacu migi, gi ju ma waidho kugi niai i Babeli i saa mi camuker p’Ubimo Artacasta. 2 Kud i kind wot Fineas, Gercom; kud i kind wot Ithamar, Daniel; kud i kind wot Daudi, Hatuc; 3 kud i kind wot Cekania m’ubino wod Paroc, Zekaria, man karacelo kude jukiewo nying’ jumaco dak acel ku pier abic; 4 kud i kind wot Pahath-moab, Elieho-enai ma wod Zerahia, man karacelo kude jumaco dak ario; 5 kud i kind wot Zatu, Cekania ma wod Yahaziel, man karacelo kude jumaco dak adek; 6 kud i kind wot Adin, Ebed ma wod Yonathan, man karacelo kude jumaco pier abic; 7 kud i kind wot Elam, Yecaya ma wod Athalia, man karacelo kude jumaco pier abiro; 8 kud i kind wot Cefathia, Zebadia ma wod Mikael, man karacelo kude jumaco pier abora; 9 kud i kind wot Yoab, Obadia ma wod Yehiel, man karacelo kude jumaco dak ario kud apar abora; 10 kud i kind wot Bani, Celomith ma wod Yosifia, man karacelo kude jumaco dak acel ku pier abusiel; 11 kud i kind wot Bebai, Zekaria ma wod Bebai, man karacelo kude jumaco pier ario wi abora; 12 kud i kind wot Azgad, Yohanan ma wod Hakatan, man karacelo kude jumaco dak acel kud apar; 13 kud i kind wot Adonikam, ju ma gibino ju ma tokcen nying’gi ni e: Elifelet, Yeiel, man Cemaya, man karacelo kugi jumaco pier abusiel; 14 kud i kind wot Bigvai, Uthai man Zabud, man karacelo kugi jumaco pier abiro.

15 Acoko dhoggi i dhu kulo m’uloro i Ahava, man wagonjo keca pi ceng’ adek. Ento kinde m’abeng’iyo dhanu man julam, anwang’u ngo Jalawi acel de. 16 E aoro jucidh julwong’o Eliezer, Ariel, Cemaya, Elnathan, Yarib, Elnathan, Nathan, Zekaria, man Meculam ma gibino jutelwic, man Yoiarib giku Elnathan ma gibino juponji. 17 Ang’olo igi lembe pi Ido ma jatela i kabedo ma julwong’o nia Kasifia. Ang’olo igi nia giyer ni Ido man ni umego pare ma gi jutic mir hekalu* ma gibino i Kasifia, nia gikel iwa jutic mi ot pa Mungu mwa. 18 Calu ma cing’ Mungu mwa ubino i wiwa, gikelo iwa ng’atu ma riek m’i kind wot Mahali ma nyakwar Lawi ma wod Israel, ma nyinge bino Cerebia man wote kud umego pare, gi jumaco apar abora; 19 gikelo bende Hacabia man karacelo kude Yecaya, umego pare man wotgi kud i kind Jumerari, ceke gi jumaco pier ario. 20 Jutic mir hekalu* ma Daudi man judongo ma wijo gimiyo pi nikonyo Julawi, wendgi ubino dak ario ku pier ario; gin ceke jukwanugi ku nying’gi.

21 E atwong’o nia jukwir cam i dhu kulo Ahava, kara wajwigara giwa i wang’ Mungu mwa, pi niyenyo telowic m’uai i bang’e pi woth mwa, piwa, pi nyithindhwa, man pi piny mwa ceke. 22 Lewic unega nikwayu juaskari ku juring riuni i bang’ ubimo pi nigwokowa i kum judegi mwa i gengi, pilembe wagam wawacu ni ubimo kumae: “Cing’ Mungu mwa n’i wi dhanu ceke ma gibeyenye, ento tego pare man ng’eicwiny pare n’i kum dhanu ceke ma gibeweke.” 23 Pieno, wakwiro cam man wakwayu Mungu mwa pi lembe nini, e ewinjo kwac mwa.

24 I ng’eye, akoyo dhanu apar ario kud i kind judongo mi Julam, niwacu Cerebia giku Hacabia karacelo kud umego migi apar. 25 I ng’eye, apimo igi mola ma tar ku mola ma kwar man ajeni, ma tie giramiya m’ubimo ku jumii juk pare man judongo ma wijo pare ku Juisrael ceke ma gibino keca gikelo pi ot pa Mungu mwa. 26 Piny m’apimo man m’amiyo i bang’gine ubino mola ma tar talanto* dak abusiel ku pier abic, ajeni mi mola ma tar dak acel ma welpinyne romo talanto ario, mola ma kwar talanto dak acel, 27 nyithi tabu mi mola ma kwar pier ario ma welpinyne romo darik* elufu acel (1 000), man ajeni ario mi mola ma leng’, ma kwar m’umil amila, man ma pire tek calu mola ma kwar.

28 I ng’eye, ayero igi kumae: “Wun wu leng’ ni Yehova, man ajeni maeni de gi leng’; mola ma tar man mola ma kwar gitie giramiya ma jumiyo ku berocwiny ni Yehova Mungu pa kwaruwu. 29 Wugwokgi cuu mandha nitundo ma wubipimogi i wang’ jutelwic mi julam man i wang’ Julawi ku judongo ma wijo mi thepacu mir Israel i Yeruzalem, i kusika* mi ot pa Yehova.” 30 E julam ku Julawi giting’o mola ma tar ku mola ma kwar man ajeni ma jupimo man jumiyo i bang’gi, kara gitergi i Yeruzalem i ot pa Mungu mwa.

31 Tokcenne wacoko woth kud i dhu kulo Ahava i nindo mir apar arionde mi dwi mi kwong’o pi nicidho i Yeruzalem. Cing’ Mungu mwa ubino i wiwa man egwokowa i kum judegi mwa man kud i cing’ weg ayeki i yo. 32 E watundo i Yeruzalem man wabedo keca pi ceng’ adek. 33 Man i ceng’ mir ang’wende, wapimo mola ma tar ku mola ma kwar man ajeni i ot pa Mungu mwa man wamiyogi i bang’ Meremoth ma wod Uriya ma jalam, man Eleazar ma wod Fineas ubino karacelo kude, bende Yozabad ma wod Yecuwa giku Noadia ma wod Binui ma gi Julawi, gibino karacelo kugi. 34 Jukwanu piny ceke man jupimo pek migi, man jukiewo pek migi ceke akiewa. 35 Ju ma gidwogo kud i ng’eca, niwacu ju ma gilar gibino ng’eca, gimiyo lam m’awang’a ni Mungu mir Israel: thwoni dhieng’ apar ario pi Israel ceke, nyogi rombe pier abung’wen wi abusiel, nyithi nyogi rombe pier abiro wi abiro, man nyogi diegi apar ario ni lam mi dubo; gin maeni ceke ubino lam m’awang’a ni Yehova.

36 I ng’eye, wamiyo cik m’ubimo umiyo ni judongo mi judongo* p’ubimo man ni jubim* mi ng’om ma loka Kulo,* e gikonyo dhanu man gimiyo giramiya pi ot pa Mungu mandha.

9 I ng’ey ma lembe maeni utimere, judongo ma wijo gicoro i bang’a man giwacu kumae: “Dhanu mir Israel man julam ku Julawi, gikoyiri ngo kud i kind dhanu mi ng’ombuni man kud i kum timo migi ma reco, timo ma reco mi Jukanan, mi Juhithi, mi Juperizi, mi Juyebusi, mi Juamon, mi Jumoab, mi Jumisiri, man mi Juamor. 2 Gigamu jumanyir moko mi thek maeno ni mon igi man ni wotgi. Kawoni gin ma gitie kodhi ma leng’, gijebiri karacelo ku dhanu mi ng’ombuni. Judongo ma wijo man jutelwic re ma gibino ma kwong’a nitimo dubo maeni.”

3 Kinde m’awinjo lembe maeno, ayeco bongu para man koti para ma bote mbe, man adoyo yuk wiya moko kud i wiya man yir tika, e abedo i ng’om ma cwinya ng’abere. 4 E dhanu ceke ma gibino lworo* lembe pa Mungu mir Israel gicokiri i ng’eta, pi dubo maeno ma dhanu ma gidwogo kud i ng’eca gitimo, kinde m’abedo ma cwinya ng’abere nitundo i saa ma juthiero i iye girathiera mi nying cam mir uthieno.

5 Agam aai malu i saa ma juthiero i iye girathiera mi nying cam mir uthieno, i ng’ey m’ajwigara man m’ayeco bongu ku koti para ma bote mbe, man arum iwi conga, e ating’o cinga malu i bang’ Yehova Mungu para. 6 Man awacu kumae: “E Mungu para, lewic ubenega man lworo ting’o cinga malu i beng’i de ubenega, E Mungu para, kum kosa mwa unyay anyaya i wiwa man kier mwa uidho malu i polo. 7 Niai i nindo pa kwaruwa nitundo tin, kier mwa udoko dit, man nikum kosa mwa, jumiyowa ku jubim mwa man julam mwa i cing’ jubim mi ng’om, junegowa ku palamularu, juterowa i ng’eca, juyakuwa man junyayu lewic i wiwa calu m’etie tin eni. 8 Ento kawoni pi saa ma nyanok, E Yehova Mungu mwa, inyutho iwa bero m’iweko ko dong dhanu moko uboth man imiyo iwa bedomoth i kabedo peri ma leng’, iketho wang’wa urieny, E Mungu mwa, man iketho wacer nyanok kud i ng’eca mwa. 9 Kadok nwang’u wa ng’eca, in i Mungu mwa iwekowa ngo i ng’eca mwa; ento inyutho iwa mer ma lokere ngo i wang’ jubim mi Persi, iketho wacer kara wadok wagier ot peri Mungu mwa man kara wayik uvurune, imiyo iwa gang’kidi* i Yuda man i Yeruzalem.

10 “Dong’ kawoni, E Mungu mwa, wacopo yero ang’o i ng’ey lembe maeni? Kum waweko lembang’ola peri 11 m’imiyo iwa nikadhu kud i bang’ jutic peri ma jubila, iwacu kumae: ‘Ng’om ma wubecimaku ni aba mwu utie ng’om m’ucido nikum cilo mi dhanu mi ng’ombe, man nikum timo m’adagu mi dhanu mi ng’ombe, ma gipong’o ko ng’ombe ku piny m’ucido i wang’a. 12 Pieno, kud wumii anyira mwu ni wotgi, kadi kud wugam anyira migi ni wotwu; man wucikuru ngo nisayu kwiyocwiny migi kadi mierolembe migi, kara wudok tek man wucam gin ma ber m’i ng’ombe man wumak ng’ombe ni aba ni wotwu pi nja.’ 13 Man i ng’ey ma lembe maeni zoo utimere i kumwa nikum timo mwa ma reco man nikum kier mwa ma dit, kum in, E Mungu mwa, itimo ngo iwa nimakere ku kier mwa, man iweko wan ma wani keni waboth, 14 nyo ukwayu watur lembang’ola peri kendo man watim lembariba mi gamiri* ku dhanu ma gibetimo lembe maeni m’idagu? Nyo kwinyo bimeki ngo i kumwa man ibinyothowa ceke m’ibiweko ngo dong dhanu kadi ng’atu moko m’ubothi? 15 E Yehova Mungu mir Israel, in i pwe, kum waboth calu dong dhanu nitundo tin eni. Wacungo i weng’i eni i kier mwa, kum ecopere ngo nicungo i weng’i pi lembe maeni.”

10 Kinde ma Ezra ubino rwo man ebetuco dubo, ebewak man evuto arieba cwinye i wang’ ot pa Mungu, udul dhanu ma dit, jumaco, jumamon, man awiya mir Israel gicokiri i ng’ete, kum dhanu gibino wak lee mandha. 2 E Cekania ma wod Yehiel m’i kind wot Elam uyero ni Ezra kumae: “Wagwoko ngo bedoleng’ mwa ni Mungu mwa ma wagamu ko* mon ma juwirok kud i kind dhanu mi ng’ombuni. Re kadok kumeno de, genogen fodi unuti ni Israel. 3 Kawoni wek watimu lembariba ku Mungu mwa, nia waberiemo mon maeno ceke man awiya ma ginyolo calku telowic pa Yehova man mi ju ma giworo* lembang’ola pa Mungu mwa. Dong’ watim nimakere ku Cik. 4 Ai malu kum etie tic peri niyiko lembe maeni, man wani karacelo kudi. Bed tek man tim lembe.”

5 E Ezra uai malu, man eketho jutelwic mi julam, Julawi, man Juisrael ceke gikwong’iri nia gibitimo lembe ceke ma juai juyero. E gikwong’iri. 6 Ezra ugam uai kud i wang’ ot pa Mungu mandha, ecidh emondo i kusika* pa Yehohanan ma wod Eliacib. Kadok nwang’u ecidho kuca de, re ecamu ngo cam kadi emadhu ngo pii, kum ebino wak pi dubo mi ju ma gibino i ng’eca.

7 I ng’eye, gitwong’o i Yuda man i Yeruzalem nia dhanu ceke ma gibino i ng’eca gicokiri karacelo i Yeruzalem; 8 man calku yub ma judongo ma wijo ku judongo gimaku, ng’atu ma tek ubino ngo i kind ceng’ adek, jubimayu* piny pare ceke man jubirieme cen kud i cokiri mi dhanu ma giai i ng’eca. 9 Pieno, jumaco ceke mi suru pa Yuda man mi suru pa Benjamin gicokiri karacelo i Yeruzalem i kind nindo adek, niwacu i dwi mir abung’wen i nindo pier ario mi dwije. Dhanu ceke gibedo i lela mi ot pa Mungu mandha ma kumgi ubemiel pi lembe m’ubetimere man pi koth m’ubino cwii akeca.

10 I ng’eye, Ezra ma jalam uai malu man eyero igi kumae: “Wutimo dubo ma wugamu ko mon ma juwirok, man kumeno re ma wumedo kier mir Israel. 11 Kawoni wutuc dubo mwu ni Yehova Mungu pa kwaruwu man wutim yeny pare. Wukoyuru cen ku dhanu mi ng’om maeni, man ku mon maeni ma gi juwirok.” 12 E dhanu ceke ma gicokiri giloko lembe ku dwandgi ma tek kumae: “Etie tic mwa nitimo tap lembe m’iyero eno. 13 Ento, dhanu tie dupa dit man etie de saa pa koth. Ecopere ngo nicungo woko, man lembe maeni de copo ting’o ngo ceng’ acel kadi ceng’ ario, kum wajai ku rac dit i lembe nini. 14 Pieno wakweyi, wek judongo ma wijo mwa gicung ka cokiri ceke; man dhanu ceke mir adhura mwa ma gigamu mon ma juwirok gibin i saa ma juketho, karacelo ku judongo man jupoklembe mir adhuraman nitundo ma wakwii ko lak kwinyo pa Mungu mwa kud i kumwa pi lembe maeni.”

15 Ento Yonathan ma wod Asahel giku Yazeya ma wod Tikva, gijai i kum lembe nini man Meculam giku Cabethai ma gi Julawi, gidiko cing’gi kugi. 16 Re ju ma gibino i ng’eca gitimo lembe ma giwinjiri i wiye; man Ezra ma jalam karacelo ku judongo mi thepacu migi, gin ceke gi dhanu ma julwong’ogi ku nying’gi, gicokiri kakendgi i nindo ma kwong’a mi dwi mir apar pi ning’iyo i lembuno. 17 Man i nindo ma kwong’a mi dwi ma kwong’a, gidaru lembe mi jumaco ceke ma gigamu mon ma juwirok. 18 E junwang’u nia wot julam moko de gigamu mon ma juwirok. Kud i kind wot Yecuwa ma wod Yehozadak man umego pare, ubino: Maseya, Eliezer, Yarib, man Gedalia. 19 Ento ging’olo* nia giberiemo mon migine cen, man calu ma kier ubino i wigi, ging’olo bende nia gibithiero nyog urombo pi kier migi.

20 Kud i kind wot Imer, ubino Hanani giku Zebadia; 21 kud i kind wot Harim: Maseya, Eliya, Cemaya, Yehiel, man Uzia; 22 kud i kind wot Pacur: Elioenai, Maseya, Ismael, Nethanel, Yozabad, man Eleasa; 23 kud i kind Julawi, ubino Yozabad, Cimei, Kelaya, niwacu Kelitha, Pethahia, Yuda, man Eliezer; 24 kud i kind juruwer: Eliacib; kud i kind jukur dhugang’: Calum, Telem, man Uri.

25 Kud i kind dhanu mir Israel, i kind wot Paroc, ubino Ramia, Izia, Malkiya, Miyamin, Eleazar, Malkiya, man Benaya; 26 kud i kind wot Elam: Mathania, Zekaria, Yehiel, Abdi, Yeremoth, man Eliya; 27 kud i kind wot Zatu: Elioenai, Eliacib, Mathania, Yeremoth, Zabad, man Aziza; 28 kud i kind wot Bebai: Yehohanan, Hanania, Zabai, man Athlai; 29 kud i kind wod Bani: Meculam, Maluk, Adaya, Yacub, Ceal, man Yeremoth; 30 kud i kind wot Pahath-moab: Adna, Kelal, Benaya, Maseya, Mathania, Bezalel, Binui, man Manase; 31 kud i kind wot Harim: Eliezer, Isciya, Malkiya, Cemaya, Cimeon, 32 Benjamin, Maluk, man Cemaria; 33 kud i kind wot Hacum: Matenai, Mathatha, Zabad, Elifelet, Yeremai, Manase, man Cimei; 34 kud i kind wot Bani: Madai, Amram, Uel, 35 Benaya, Bedeya, Keluhi, 36 Vania, Meremoth, Eliacib, 37 Mathania, Matenai, man Yaasu; 38 kud i kind wot Binui: Cimei, 39 Celemia, Nathan, Adaya, 40 Maknadebai, Cacai, Carai, 41 Azarel, Celemia, Cemaria, 42 Calum, Amaria, man Yozefu; 43 man kud i kind wot Nebo: Yeiel, Matithia, Zabad, Zebina, Yadai, Yoel, man Benaya. 44 Ju maeni ceke gigamu mon ma juwirok, man giriemogi cen karacelo ku wotgi.