NEHEMIA

1 Maeni tie wec pa Nehemia* ma wod Hakalia: I nindo mi pier arionde mi dwi mi Kislev,* abino i Cucan* ma ot ma tek.* 2 I saa maeno Hanani ma tie acel m’i kind umego para utundo ku jumange niai i Yuda, man apenjogi pi dong Juyahudi ma giboth kud i ng’eca, man bende pi Yeruzalem. 3 Gidwoko kumae: “Dhanu ma giboth kud i ng’eca, ma gin’i theng ng’om kuca gibenwang’iri i lembe ma tek mandha man mi lewic. Gang’kidi mi Yeruzalem urwombere man dhugolane de juwang’u ku mac.”

4 Saa m’awinjo lembe maeno, abedo i ng’om, acaku wak, can umondo i iya pi nindo moko, man amedara nikwiro cam man nirwo i wang’ Mungu mi polo. 5 Ayero kumae: “E Yehova, Mungu mi polo, in m’i Mungu ma dwong’ man ma ng’oyo ndiri, ma woro lembariba pare man ma nyutho mer ma lokere ngo ni ju ma gimare man ma gibeworo lembang’ola pare, 6 abekweyi, wek ithi ubed acika man weng’i ubed ayaba pi niwinjo rwo para an a jatic peri, m’aberwo ko i beng’i tin dieceng’ ku diewor pi jutic peri Juisrael, saa ceke m’abetuco dubo ma dhanu mir Israel gitimo iri. An man ot pa vwa wadubo. 7 Watimo ku rac mandha iri ma waworo ko ngo lembang’ola, telowic man bende telowic mi pokolembe m’imiyo ni Musa ma jatic peri.

8 “Akweyi, poy i kum lembe m’ing’olo* ni Musa ma jatic peri kumae: ‘Tek wugwoko ngo bedoleng’ mwu, abilaluwu cen i kind dhanu. 9 Ento tek wulokuru i bang’a man wuworo lembang’ola para, kadok nwang’u dhanu mwu ma gilal gin’i ajiki mi polo, abicoko dhoggi ku kuca man abidwokogi kaka m’ang’iyo nia nyinga ubed i iye.’ 10 Gitie jutic peri man dhanu peri m’iwaru ku tego peri ma dit man cingi ma tek. 11 E Yehova, akweyi, dong’ cik ithi pi niwinjo rwo para an a jatic peri, man rwo mi jutic peri m’anyong’a negogi nilworo nyingi. Bende akweyi, keth lembe woth miero ni jatic peri tin man keth ubimo unen kisa i kuma.”

Nwang’u abino jamii giramadha p’ubimo.

2 I oro mi pier arionde mi camuker p’Ubimo Artacasta, i dwi mi Nisan,* pigulok ubino i wang’e man calu ma naka, ating’o pigulok man amiyo ni ubimo. Ento nwang’u fodi can umondo ngo i iya i wang’e. 2 E ubimo wacu ira kumae: “Pirang’o can ubenegi ma ke iberemo ngo e? Eni copo bedo lembe mange ngo, ndhu can mir adunde.” Lworo gam umaka lee dit.

3 E ayero ni ubimo kumae: “Ubimo kwo nja! Can bimondo ngo i iya nenedi m’adhura ma jukunyo kwaru para i iye udong’ ni uvuru, man juwang’u dhugolane ku mac e?” 4 Ubimo ugam upenja kumae: “Dong’ imito ang’o?” E wang’ acel arwo i bang’ Mungu mi polo. 5 I ng’eye awacu ni ubimo kumae: “Tekene e ber i wang’ ubimo man tekene jatic peri unwang’u bero i weng’i, ora acidh i Yuda, i adhura ma jukunyo kwaru para i iye, kara agiere kendo.” 6 E ubimo, ma nwang’u dhaker ubedo i ng’ete, uwacu ira kumae: “Woth perine bitimo nindo adi man ibidwogo awene?” Pieno ubimo nwang’u nia etie ber nia eora, man anyutho ire nindo m’abidwogo i iye.

7 Adok ayero ni ubimo kumae: “Tek e ber i wang’ ubimo, wek jumii ira barua pi jubim mi ng’om ma loka Kulo,* kara giwek akadh museme nitundo i Yuda, 8 man jumii bende barua ni Asaf ma jakur Luli p’ubimo, kara emii ira yen m’abiyiko ko riu mi dhugang’ mi Ot ma tek mi Ode,* gang’kidi mir adhurane, man ot m’abibedo i iye.” Pieno ubimo umiyo ira baruanegi, pilembe cing’ Mungu para ubino i wiya.

9 E atundo i bang’ jubim mi ng’om ma loka Kulo man amiyo igi barua p’ubimo. Ubimo uoro bende judongo mir askari ku juring riuni* karacelo kuda. 10 Kinde ma Sanbalat ma Jahoron man Thobia ma jatic ma Jaamon giwinjo lembuni, lembene uton i igi lee nia ng’atu moko ubino timo lembe ma ber ni dhanu mir Israel.

11 Tokcenne agam atundo i Yeruzalem, man abedo keca pi nindo adek. 12 E aai malu ku diewor, an karacelo ku jumaco moko, man ayero ngo ni ng’atu moko, gin ma Mungu para uketho i adundena nia atim pi Yeruzalem. Awotho ngo ku lei, ndhu acel kende m’aringo ko. 13 Agam awok woko ku diewor kud i Dhugang’ mi poga, akadhu ku yor i wang’ Kulo mi thwol ma dit, acidho i bang’ dhugang’ ma julwong’o Dhugang’ mi vuru, e ang’iyo kum gang’kidi mi Yeruzalem m’urwombere man dhugolane m’uwang’ ku mac. 14 Man akadhu kud i kum Dhugang’ mi pii ma dhenyini man kud i kum Kut p’Ubimo, ento kaka bino mbe m’aromo kadhu kud i iye ku lei m’abino ringo ko. 15 Re amedara niidho kud i wang’ poga* maeno ku diewor, man awotho ng’iyo kum gang’kidi asu. I ng’eye aloko man amondo kud i Dhugang’ mi poga, kan i ng’eye adok i pacu.

16 Jutelwic ging’eyo ngo nia acidho kani, man nia abetimo ang’o, kum nwang’u fodi ayero ngo lembe moko acel de ni Juyahudi, ni julam, ni weg yung, ni jutelwic, man ni dong dhanu m’utimo tic. 17 Tokcenne awacu igi kumae: “Wukenen kite ma lembe unyothere ko iwa, kite ma Yeruzalem utie ko uvuru, man kite ma dhugang’ne uwang’ ko ku mac. Wubin, wek wagieru gang’kidi mi Yeruzalem kendo, kara lewic maeni kud umedere asu.” 18 Agam anyutho igi kite ma cing’ Mungu para ubino ko i wiya man bende lembe m’ubimo uyero ira. E giwacu kumae: “Dong’ waeyu man waceku giedo.” Pieno, gimiyo amora i kumgi gigi* pi nitimo tic ma ber maeno.

19 Ento kinde ma Sanbalat ma Jahoron, Thobia ma jatic ma Jaamon man Gecem ma Jaarabia giwinjo lembene, gicaku cayuwa man ginywaruwa ma giwacu kumae: “Wubetimo ang’o no? Wubemito wujai i kum ubimo?” 20 Ento adwoko igi kumae: “Mungu mi polo re ma biketho lembe biwotho iwa miero, man wan wa jutic pare wabiay malu, man wabicaku giedo; ento wun, wumbe ku makapiny, kadi twero, kadi jampoy piwu de mbe i Yeruzalem.”

3 Eliacib ma jalam ma dit kud umego pare ma gi julam giai malu pi nigiero Dhugang’ mi rombe. Gidwoke leng’* man giroyo dhugolane; gidwoke leng’ nitundo i kum Otkur ma wiw pa Mea, man nitundo i kum Otkur ma wiw pa Hananel. 2 Dhanu mi Yeriko gibino giero i ng’etgi; man i ng’et dhanu mi Yeriko, Zakur ma wod Imri re m’ubino giero.

3 Wot Hasena gigiero Dhugang’ mi rec; giyiko kadhrumane, man i ng’eye giroyo dhugolane, lathine man riune. 4 I ng’etgi, Meremoth ma wod Uriya ma wod Hakoz uyiko gang’kidi; i ng’et Meremothgi, Meculam ma wod Berekia ma wod Mecezabel giyiko gang’kidi; man i ng’et Meculamgi, Zadok ma wod Baana giyiko gang’kidi. 5 I ng’etgi, Jutekoa giyiko gang’kidi, ento dhanu ma pigi tek m’i kindgi gijwigiri ngo pi nidikiri i* tic mi dhanu m’utelo wigi.

6 Yoyada ma wod Pasea giku Meculam ma wod Besodeya giyiko Dhugang’ mir adhura ma con; giyiko kadhrumane man i ng’eye giroyo dhugolane, lathine man riune. 7 I ng’etgi, Melatia ma Jagibeon giku Yadon ma Jameronothi giyiko gang’kidi; gibino dhanu mi Gibeon man mi Mizpa ma gibino i the telowic pa* jabim* mi ng’om ma loka Kulo.* 8 I ng’etgi, Uziel ma wod Harhaya ma en e ng’atu acel m’i kind jubodho mi mola ma kwar uyiko gang’kidi; man i ng’ete Hanania ma en e ng’atu acel m’i kind ju ma jebo mo mi wirojo* giyiko gang’kidi, man gitelo i* Yeruzalem ku kidi nitundo i kum Gang’kidi ma lac. 9 I ng’etgi, Refaya ma wod Hur ma jadit ma wijo mi nusu mi theng ng’om mi Yeruzalem uyiko gang’kidi. 10 I ng’etgi, Yedaya ma wod Harumaf uyiko gang’kidi i wang’ ot pare; man i ng’ete, Hatuc ma wod Hacabneya uyiko gang’kidi.

11 Malkiya ma wod Harim giku Hascub ma wod Pahath-moab giyiko thenge ma kucelo* man bende Ot ma wiw mi furu. 12 Man i ng’etgi, Calum ma wod Halohec ma jadit ma wijo mi nusu mi theng ng’om mi Yeruzalem giyiko gang’kidi karacelo kud anyira pare.

13 Hanun karacelo ku dhanu mi Zanoa giyiko Dhugang’ mi poga, gigiere man giyiko kadhrumane man i ng’eye giroyo dhugolane, lathine man riune; bende giyiko gang’kidi bot elufu acel (1 000)* nitundo i kum Dhugang’ mi vuru. 14 Malkiya ma wod Rekab ma jadit ma wijo mi theng ng’om mi Beth-hakerem uyiko Dhugang’ mi vuru, egiere man i ng’eye eroyo dhugolane, lathine man riune.

15 Calun ma wod Kolhoze ma jadit ma wijo mi theng ng’om mi Mizpa uyiko Dhugang’ mi pii ma dhenyini; egiere man egiero wiye, eroyo dhugolane, lathine man riune. Eyiko bende gang’kidi mi Kut mi pii m’atela ma n’i kum Podho p’Ubimo nitundo i kum Mangasi m’uloro niai kud i Adhura pa Daudi.

16 I ng’ete, Nehemia ma wod Azbuk ma jadit ma wijo mi nusu mi theng ng’om mi Beth-zur uyiko gang’kidi, niai i wang’ Kakuny pa Daudi nitundo i kum kut mi pii ma jugiero man nitundo i kum Ot mi ju ma tek.

17 I ng’ete, Julawi ma e giyiko gang’kidi: Rehum ma wod Bani man i ng’ete, Hacabia ma jadit ma wijo mi nusu mi theng ng’om mi Keila, uyiko gang’kidi i theng ng’om pare. 18 I ng’ete, umeggi ma e giyiko gang’kidi: Bavai ma wod Henadad ma jadit ma wijo mi nusu mi theng ng’om mi Keila.

19 Man i ng’ete, Ezer ma wod Yecuwa ma jadit ma wijo mi Mizpa, ubino yiko ng’ete ma kucelo ma n’i wang’ ka m’uidho i bang’ Odi jamlwiny ma n’i ng’et mbegi mi tielo vut gang’.

20 I ng’ete, Baruk ma wod Zabai utimo tic ku tego man eyiko ng’ete ma kucelo niai i bang’ mbegi mi tielo vut gang’ nitundo i kamondo mi ot pa Eliacib ma jalam ma dit.

21 I ng’ete, Meremoth ma wod Uriya ma wod Hakoz uyiko ng’ete ma kucelo niai i kamondo mi ot pa Eliacib, nitundo i ajiki mi ot pa Eliacib.

22 I ng’ete, julam ma gi dhanu mi theng ng’om mi Yordan,* giyiko gang’kidi. 23 I ng’etgi, Benjamin gikud Hascub giyiko gang’kidi i wang’ ot migi gigi. I ng’etgi ke, Azaria ma wod Maseya ma wod Ananiya uyiko gang’kidi ceng’ini ku ot pare gire. 24 I ng’ete, Binui ma wod Henadad uyiko ng’ete ma kucelo niai i kum ot pa Azaria nitundo i kum mbegi mi tielo vut gang’ man nitundo i gul.

25 I ng’ete, Palal ma wod Uzai uyiko gang’kidi i wang’ mbegi mi tielo vut gang’ man ot ma wiw m’ucidho kud i kum Ot p’Ubimo,* en e ot ma wiw ma n’i kum Lela mi Jukur. I ng’ete ke ubino Pedaya ma wod Paroc.

26 Man jutic mir hekalu* ma gikwo i Ofel giyiko gang’kidi nitundo i wang’ Dhugang’ mi pii ma n’i yo nyangu man ot ma wiw ma n’i kume.

27 I ng’etgi, Jutekoa giyiko thenge ma kucelo, niai i wang’ ot ma wiw ma dit ma n’i wang’ gang’kidi nicidho i kum gang’kidi mir Ofel.

28 Julam giyiko gang’kidi ma n’i yo malu mi Dhugang’ mi riuni;* ng’atuman uyiko i wang’ ot pare.

29 I ng’etgi, Zadok ma wod Imer uyiko gang’kidi i wang’ ot pare.

Man i ng’ete, Cemaya ma wod Cekania ma jakur Dhugang’ ma yo nyangu uyiko gang’kidi.

30 I ng’et Cemaya, Hanania ma wod Celemia gikud Hanun ma tie wod Zalaf mir abusiel uyiko thenge mange.

I ng’ete, Meculam ma wod Berekia uyiko gang’kidi i wang’ ot pare.

31 I ng’ete, Malkiya ma tie ng’atu acel m’i kind jubodho mi mola ma kwar uyiko gang’kidi nitundo i kum ot mi jutic mir hekalu* man mi jukuloka, i wang’ Dhugang’ mi ng’iyo i lembe, man nitundo i kum kusika ma malu ma n’i gul.

32 Man i kind kusika ma malu mi gul ku Dhugang’ mi rombe, jubodho mi mola ma kwar ku jukuloka re ma giyiko gang’kidi.

4 Kinde ma Sanbalat uwinjo nia wabegiero gang’kidi kendo, kwinyo make man lembene utime rac mandha, e emedere ninywaru Juyahudi. 2 I vut umego pare man udul askari mi Samaria, eyero kumae: “Juyahudi maeni ma tego migi mbe gibetimo ang’o? Nyo andha gibeparu nia gicopo timo tic maeni? Nyo gibidaru tije i nindo aceli? Nyo andha gibiketho kidi m’uwang’ maeni ucer kud i kind udhuru susu?”

3 Thobia ma Jaamon ma nwang’u ucungo i ng’ete uwacu kumae: “Gang’kidi ma gibegiero no, ka nzer ma nzer e de uidho i wiye ci, ebirwombere cen.”

4 E Mungu mwa, winji, kum jubecayuwa, man keth wec migi mir anyware udok i wigi, keth juyakgi, jutergi i ng’om mi ng’eca. 5 Kud ium wi kier migi, kadi dubo migi de kud urucere kud i weng’i, kum giweco ku dhoggi ma rac i kum jurugiedo.

6 Pieno wamedara nigiero gang’kidi, man gang’kidine ceke urombo i kindgi karacelo; wagiero gicungo nitundo i nusu mi dongone, man dhanu gimediri niketho adundegi i kum tic.

7 Kinde ma Sanbalat, Thobia, Juarabia, Juamon man Juacdod giwinjo nia tic mi yiko gang’kidi mi Yeruzalem ubemedere, man nia jubepong’o wang’e m’umor, kwinyo ugam umakugi lee mandha. 8 Gicamu gamba karacelo pi nicikiedo i dhu dhanu mi Yeruzalem man ninyayu yakini i iye. 9 Ento warwo i bang’ Mungu mwa man waketho jukur pi nigwokowa i kumgi dieceng’ ku diewor.

10 Re dhanu mi Yuda gibino yero kumae: “Tego mi jutic* udaru thum, man susu de dit; wabicopo ngo nyanok de nigiero gang’kidi maeni.”

11 Man judegi mwa gimediri niyero kumae: “Wabicoro i wigi mbwang’ ma ging’eyo ngo, kadi ma ginenowa de ngo, e wabinegogi man wabijigo ticne.”

12 Ka Juyahudi ma gikwo ceng’ini kugi gitundo ci, gibed giyero iwa kendo kendo* kumae: “Gibicoro i wiwa ku kaka moko ci.”

13 Pieno aketho dhanu cungo piny i dhu kaka ma ngbeng’ ma n’i ng’ey gang’kidi, man aketho gicungo kubang’ juruotman ma gimaku palamularu migi, tong’ migi, man athero migi. 14 Saa m’aneno lworo benegogi, e ndhu ndhu aai malu man awacu ni weg yung man ni jutelwic ku dong dhanu kumae: “Lworo kud unegwu i kumgi, wupoy i kum Yehova, en m’e dwong’ man eng’oyo ndiri; wukied pir umego mwu, pi wotwu ku nyigwu, pi mon mwu man pi pacu mwu.”

15 Kinde ma judegi mwa giwinjo nia wang’eyo lembe ma gibetimo man nia Mungu mandha unyotho lembe ma gipangune, wan ceke wadok i kum tic mi gang’kidi. 16 Niai cing’ nica, nusu mi dhanu para gibed gitimo tic, man nusu migi ke gibed gimaku tong’, ban, athero, man gironyo koti mi cuma. E judongo ma wijo gicungo i kum dhanu mi Yuda ceke 17 ma gibino giero gang’kidi. Ju ma gibed giyeyo ter giwotho timo tic ku cing’gi acel, ma nwang’u gimaku jamlwiny ku cing’gi ma kucelo. 18 Ng’atuman m’i kind jurugiedo utwiyo palamularu i piere kinde m’ebegiero giedo man jakudh agwara ke ucungo i ng’eta.

19 I ng’eye ayero ni weg yung ku jutelwic man dong dhanu kumae: “Tic utie lee i kum gang’kidi man kindwa lal tung’ tung’ iwi gang’kidi. 20 Kinde ma wuwinjo dwand agwara, wucokuru karacelo kaka ma wan’i iye. Mungu mwa bikiedo piwa.”

21 E wamedara nitimo tic, man i saa maeno nusu mi dhanu gimaku tong’ niai i ruu pa piny nitundo ma cero uwok. 22 I nindo maeno ayero ni dhanu kumae: “Wek jumaco, ng’atuman ku jatic pare givut i Yeruzalem; gibikuro kumwa diewor man gibitimo tic dieceng’.” 23 Pieno nik’ebed an, kadi umego para, jutic para, man jukur ma gibed gilubo ng’eya, ng’atu moko mbe m’uwodho bongu pare; ng’atuman m’i kindwa umedere nimaku jamlwiny pare i cinge ma yor acwic.

5 Ento dhanu ku mon migi gibino wagiri lee pir umego migi ma Juyahudi. 2 Jumoko bino wacu kumae: “Wan ku wotwa man nyigwa wendwa lee dit. Ukwayu wanwang’ cam ma waromo camu kara wabed kwo.” 3 Jumange ubino wacu kumae: “Wabecukumiyo podho mwa, podho mir ulok mwa, man udi mwa ubed ni mukwatu* kara wanwang’ cam i saa mi ndru.” 4 Jumange lundo ubino yero kumae: “Waguro podho mwa man podho mir ulok mwa kara wanwang’ sente ma wacul ko ajok ni ubimo. 5 Wan kud umego mwa warom,* man nyithindhwa de gi calu nyithindgi; re ukwayu wadwok wotwa ku nyigwa gidok ng’eca, man nyigwa moko dong’ gin’i ng’eca niai con. Ento wambe ku copo mi jigo lembe maeni, pilembe podho mwa man podho mir ulok mwa n’i cing’ jumange.”

6 Kinde m’awinjo wak migi man lembe maeno, kwinyo ugam umaka lee. 7 E ang’iyo i lembe maeno i adundena, man acimo wang’ weg yung ku jutelwic, ayero igi kumae: “Ng’atuman m’i kindwu ubelwong’o faida* i bang’ umin ma buu.”

M’umedo maeno, alwong’o coko ma dit pigi, 8 man awacu igi kumae: “Wagam waii ku kero mwa ceke pi nigonyo umego mwa ma Juyahudi ma julworo ni dhanu mi thek; ento wubemito wulwor umego mwu kendo? Nyo ubekwayu wagonygi kendo ku sente?” E giling’ ting’ man gikoso lembe ma giyer. 9 I ng’eye adok ayero kumae: “Lembe ma wubetimo no tie ber ungo. Nyo ukwayu ngo wulwor Mungu mwa, kara thek ma gi judegi mwa kud ginwang’ thelembe moko ma gicopo cayu kowa? 10 An, umego para, man jutic para de, wabemiyo igi banja mi sente man mi nying cam. Ento akwayuwu, waweku nimiyo igi banja ma nia gidwok ku faida. 11 Abekwayuwu, wudwok igi tin eni podho migi, podho mir ulok migi, podho mir oliv migi, udi migi man bende faida mi sente, nying cam, pigulok ma nyen man mo ma wukwayu i bang’gi ni faida.”

12 E gidwoko kumae: “Wabidwoko piny maeno igi man wabikwayu ngo nia gimii gin moko. Wabitimo lembe m’iyero kubang’e kubang’e.” Pieno alwong’o julam man aketho dhanune gikwong’o nia gibitimo lembe maeni ma ging’olo. 13 Bende ayengo bongu para man awacu kumae: “I ayi maeni, dong’ Mungu mandha uyeng kud i ot pare man kud i giralaga pare, ng’atu moko ci m’uworo ngo lembang’ola maeni, man i ayi maeni, dong’ eyenge nitundo ethum.” E dhanu ceke ma gicokiri giwacu kumae: “Amen!”* Man gipaku Yehova, e dhanu gitimo lembe ma ging’olo.

14 M’umedo maeno, niai i nindo m’ubimo uketho abed jabim mi ng’om mi Yuda, niai i oro mi pier arionde nitundo i oro mi pier adek wi arionde mi camuker p’Ubimo Artacasta, niwacu oro apar ario, an kadi umego para, wacamu ngo cam ma jubed jumiyo ni jabim.* 15 Ento jubim ma gibino i wang’a gibed giketho ter iwi dhanu man gibed gigamu mola ma tar cekel* pier ang’wen i bang’gi pi cam man pigulok ma kubang’ ceng’. Bende jutic migi gibed gisendo dhanu. Ento an, atimo ngo kumeno nikum lworo m’alworo ko Mungu.

16 Bende an gira de atimo tic mi yiko gang’kidi maeni, man wang’iewo ngo podho acel de; jutic para ceke gicokiri karacelo keca pi nitimo tic. 17 Juyahudi man jutelwic dak acel ku pier abic, man bende dhanu ma gibed giai kud i thek mange gibino i bang’wa gibed gicamu i dhu meza para. 18 Kubang’ rupiny abed aketho jutedo* thwon dhiang’ acel, rombe m’ang’iya abusiel, man winyo; bende wang’ acel i ng’ey nindo apar, wabed wang’iewo kwond pigulok ceke lee mandha. Re kadok kumeno de, akwayu ngo cam ma jubed jumiyo ni jabim, pilembe nwang’u dong’ dhanu gitie ku ter migi mi timo tic. 19 Dong’ poy pira man mii ira mugisa,* E Mungu para, pi lembe ceke m’atimo pi dhanu maeni.

6 Kinde ma juyero ni Sanbalat, Thobia, Gecem ma Jaarabia man ni dong judegi mwa nia adaru nigiero gang’kidi kendo man nia wang’e m’umor acel de mbe m’udong’ (kadok saa maeno nwang’u fodi aroyo ngo dhugola gang’ne de), 2 e ndhu ndhu Sanbalat giku Gecem gioro ira kwenda, giwacu kumae: “Bin wakethu nindo moko ma warombu i iye karacelo i pacu mi pambu mi Poga mi Ono.” Ento gibino pangu nia gibiwok tima rac. 3 Pieno aoro jukwenda gicidh giyer igi kumae: “Abetimo tic ma lee dit man acopo loro ngo piny. Pirang’o tic ujiki pilembe aweke man aloro piny i beng’wu?” 4 Gioro kwenda ma rom eno i bang’a wang’ ang’wen, man awotho dwoko igi de lembe ma rom.

5 I ng’eye Sanbalat uoro jatic pare i bang’a ku kwenda ma rom wang’ mir abije, man ku barua m’ayaba i cinge. 6 I baruane jukiewo kumae: “Lembe uyik i kind thek, man Gecem de ubeyero pi lembene, nia in ku Juyahudi wubemito nijai. Eno re m’uketho wubegiero gang’kidi; man nimakere ku rwonglembene, ibedoko ubimo migi. 7 Iketho bende jubila kara gitwong’ piri i Yeruzalem kumae: ‘Ubimo nuti i Yuda!’ Man kawoni jubidwoko lembe maeno ni ubimo. Dong’ bin wawecu iwi lembene karacelo.”

8 Ento aoro judwok ire kumae: “I kind lembe m’ibeyero no acel de mbe m’utimere; eno tie lembe m’ibepangu ku wii.”* 9 Kum kagi ceke gibino yenyo ginyay lworo i iwa ma gibewacu kumae: “Cwinygi bitur i kum tije,* man ebijik.” Kawoni akweyi, mii ira tego.*

10 I ng’eye acidho i ot pa Cemaya ma wod Delaya ma wod Mehethabel saa ma nwang’u ebed ebedo kwa i ot. Ewacu kumae: “Wawinjara wacidh waromb i ot pa Mungu mandha, i hekalu, man waciku dhugola mir hekalu, kum gibebino negi. Gibibino negi ku diewor.” 11 Ento ayero kumae: “Nyo dhanu ma ve an e ucikere niringo? Nyo ng’atu ma ve an e copo mondo i hekalu man ebedo kwo? Abimondo ngo!” 12 I ng’eye anyang’ nia Mungu uore ngo, ento nia Thobia giku Sanbalat re ma gicule ebin eyer lembila maeno i kuma. 13 Gicule pi ninyayu lworo i iya man pi niketho adubi, kara ginwang’ thelembe ma gicid ko nyinga man ma giketh ko kosa i wiya.

14 E Mungu para, poy pi Thobia giku Sanbalat man pi timo maeno, poy bende pi Noadia ma jabila ma dhaku man pi dong jubila ma gibed giyenyo saa ceke ninyayu lworo i iya.

15 Pieno gang’kidi uthum i nindo pier ario wi abic mi dwi mir Elul,* i ng’ey nindo pier abic wi ario.

16 Saa ma judegi mwa ceke giwinjo lembe maeni man thek ceke m’udhokowa gineno lembene, lewic unegogi* lee dit, man ginyang’ nia tic maeni utimere ku kony pa Mungu. 17 I nindo maeno, weg yung mi Yuda gibed gioro barua dupa ni Thobia, man Thobia ubed udwoko igi wang’e. 18 Ju ma dupa i Yuda gibed gikwong’iri nia gin’i ng’ete pare, kum ebino jalwod Cekania ma wod Ara, man wode ma Yehohanan ugamu nyaku pa Meculam ma wod Berekia. 19 Bende gibed gikoro ira lembe ma ber iwi Thobia, man gidwoko lembe m’ayero ire. I ng’eye Thobia ubed uoro ira barua pi ninyayu lworo i iya.

7 Saa ma wadaru nigiero gang’kidi tap ci, aroyo dhugolane; i ng’eye, aketho jukur mi dhugang’, juruwer, man Julawi. 2 Bende, aketho umira ma Hanani unen wi lembe mi Yeruzalem, man karacelo kude Hanania ma jadit mi Ot ma tek, kum ebino ng’atu ma jugeno nisagu man ma lworo Mungu mandha nisagu jumange dupa. 3 Pieno ayero igi kumae: “Kud juyab dhugang’ mi Yeruzalem nitundo dieceng’, man kinde ma jukur gibekuro kur, gicikiri niciko dhugola cen man nitielogi. Man wuketh dhanu mi Yeruzalem ni jukur, ng’atuman kaka ma juketho ekur i iye kur, man jumange i wang’ ot migi.” 4 Nwang’u adhurane ubino lac, man ma bor, man dhanu ubino nyanok i iye. Bende nwang’u fodi jugiero ngo udi mi iye kendo.

5 Ento Mungu para uketho i adundena nia acok dhu weg yung ku jutelwic man dhanu karacelo, kara akiew nying’gi calku thekwaru migi. I ng’eye anwang’u buku ma jukiewo i iye nying’ ju ma gilar gidwogo nimakere ku thekwaru migi. I bukune jukiewo kumae:

6 Maeni gi dhanu mi theng ng’om* ma gidwogo kud i ng’eca, niwacu dhanu m’Ubimo Nebukadnezar mi Babeli ugam utero i ng’eca, man ma i ng’eye gidwogo i Yeruzalem man i Yuda, ng’atuman i adhura pare; 7 gi jumaco ma gidwogo ku Zerubabel, Yecuwa, Nehemia, Azaria, Raamia, Nahamani, Mordekai, Bilcan, Mispereth, Bigvai, Nehum man Baana.

Wend jumaco mir Israel ubino: 8 wot Paroc, elufu ario dak acel ku pier abiro wi ario (2 172); 9 wot Cefathia, dak adek ku pier abiro wi ario; 10 wot Ara, dak abusiel ku pier abic wi ario; 11 wot Pahath-moab mi ot pa Yecuwa man pa Yoab, elufu ario dak abora kud apar abora (2 818); 12 wot Elam, elufu acel dak ario ku pier abic wi ang’wen (1 254); 13 wot Zatu, dak abora ku pier ang’wen wi abic; 14 wot Zakai, dak abiro ku pier abusiel; 15 wot Binui, dak abusiel ku pier ang’wen wi abora; 16 wot Bebai, dak abusiel ku pier ario wi abora; 17 wot Azgad, elufu ario dak adek ku pier ario wi ario (2 322); 18 wot Adonikam, dak abusiel ku pier abusiel wi abiro; 19 wot Bigvai, elufu ario ku pier abusiel wi abiro (2 067); 20 wot Adin, dak abusiel ku pier abic wi abic; 21 wot Ater mi ot pa Hezekia, pier abung’wen wi abora; 22 wot Hacum, dak adek ku pier ario wi abora; 23 wot Bezai, dak adek ku pier ario wi ang’wen; 24 wot Harif, dak acel kud apar ario; 25 wot Gibeon, pier abung’wen wi abic; 26 jumaco mi Bethlehem man mi Netofa, dak acel ku pier abora wi abora; 27 jumaco mir Anathoth, dak acel ku pier ario wi abora; 28 jumaco mi Beth-azmaveth, pier ang’wen wi ario; 29 jumaco mi Kiriath-jearim, mi Kefira man mi Beroth, dak abiro ku pier ang’wen wi adek; 30 jumaco mi Rama man mi Geba, dak abusiel ku pier ario wi acel; 31 jumaco mi Mikmas, dak acel ku pier ario wi ario; 32 jumaco mi Bethel man mi Ai, dak acel ku pier ario wi adek; 33 jumaco mi Nebo ma kucelo, pier abic wi ario; 34 wot Elam ma kucelo, elufu acel dak ario ku pier abic wi ang’wen (1 254); 35 wot Harim, dak adek ku pier ario; 36 dhanu mi Yeriko, dak adek ku pier ang’wen wi abic; 37 wot Lod, Hadid man Ono, dak abiro ku pier ario wi acel; 38 wot Sena, elufu adek dak abung’wen ku pier adek (3 930).

39 Julam ubino: wot Yedaya mi ot pa Yecuwa, dak abung’wen ku pier abiro wi adek; 40 wot Imer, elufu acel ku pier abic wi ario (1 052); 41 wot Pacur, elufu acel dak ario ku pier ang’wen wi abiro (1 247); 42 wot Harim, elufu acel kud apar abiro (1 017).

43 Julawi ubino: wot Yecuwa mi ot pa Kadmiel, mi ot pa Hodeva, pier abiro wi ang’wen. 44 Juruwer ubino: wot Asaf, dak acel ku pier ang’wen wi abora. 45 Jukur dhugang’ ubino: wot Calum, wot Ater, wot Talmon, wot Akub, wot Hatita, wot Cobai, dak acel ku pier adek wi abora.

46 Jutic mir hekalu* ubino: wot Ziha, wot Hasufa, wot Tabaoth, 47 wot Keros, wot Sia, wot Padon, 48 wot Lebana, wot Hagaba, wot Salmai, 49 wot Hanan, wot Gidel, wot Gahar, 50 wot Reaya, wot Rezin, wot Nekoda, 51 wot Gazam, wot Uza, wot Pasea, 52 wot Besai, wot Meunim, wot Nefucesim, 53 wot Bakbuk, wot Hakufa, wot Harhur, 54 wot Bazlith, wot Mehida, wot Harca, 55 wot Barkos, wot Sisera, wot Tema, 56 wot Nezia, wot Hatifa.

57 Wot jutic pa Suleman ubino: wot Sothai, wot Sofereth, wot Perida, 58 wot Yala, wot Darkon, wot Gidel, 59 wot Cefathia, wot Hatil, wot Pokereth-hazebaim, wot Amon. 60 Wend jutic mir hekalu* man wot jutic pa Suleman ceke ubino dak adek ku pier abung’wen wi ario.

61 Ju m’ulubo e gi ju ma giidho kud i Tel-mela, Tel-harca, Kerub, Adon man Imer, ento gituc ungo ninyutho ka thepacu migi man ka thugi, ka nyo gibino Juisrael: 62 wot Delaya, wot Thobia man wot Nekoda, dak abusiel ku pier ang’wen wi ario. 63 Man i kind julam ubino: wot Habaya, wot Hakoz, wot Barzilai m’ugamu dhaku i kind jumanyir pa Barzilai ma Jagilead, man julwong’e ku nying’ jalwon. 64 Giyenyo nying’gi i buku pi ning’eyo thekwaru migi, ento nying’gine unwang’ere ngo; pieno junwang’u nia giromo ngo pi tic mi lamulam.* 65 E jabim* uyero nia kud gikegicam piny ma leng’ m’usagu, nitundo ma jalam moko bipenjo lembe kud Urim man Thumim.

66 Wend dhanu ceke mi cokiri ubino elufu pier ang’wen wi ario ku dak adek ku pier abusiel (42 360), 67 m’uweko ng’eca migi ma co ku ma mon ma wendgi ubino elufu abiro ku dak adek ku pier adek wi abiro (7 337); gibino bende ku juruwer ma co ku ma mon dak ario ku pier ang’wen wi abic. 68 Riuni* migi ubino dak abiro ku pier adek wi abusiel, kit kana migi mange* ubino dak ario ku pier ang’wen wi abic, 69 ngamia migi ubino dak ang’wen ku pier adek wi abic, man kana migi ubino elufu abusiel dak abiro ku pier ario (6 720).

70 Jumoko m’i kind jutelwic mi thepacu gimiyo ajok pi tic. Jabim* umiyo drakma* mi mola ma kwar elufu acel (1 000) i kakanpiny, tabu pier abic, man kendi ma lorlor mi julam dak abic ku pier adek. 71 Man jumoko m’i kind jutelwic mi thepacu gimiyo drakma mi mola ma kwar elufu pier ario (20 000) i kakanpiny mi tic mi giedo man mina* mi mola ma tar elufu ario ku dak ario (2 200). 72 Dong dhanu gimiyo drakma mi mola ma kwar elufu pier ario (20 000), mina mi mola ma tar elufu ario (2 000), man kendi ma lorlor mi julam, pier abusiel wi abiro.

73 Man julam, Julawi, jukur dhugang’, juruwer, jumoko m’i kind dhanu, jutic mir hekalu* man dong Juisrael ceke* gibedo i adhura migi. Kinde ma dwi mir abiro utundo, nwang’u dong’ Juisrael gibedo i adhura migi.

8 I ng’eye, dhanu ceke gicokiri karacelo i lela ma lac ma n’i wang’ Dhugang’ mi pii, man giyero ni Ezra ma jagor* nia ekel buku mi Cik pa Musa, ma Yehova ung’olo ni Israel. 2 E i nindo ma kwong’a mi dwi mir abiro, Ezra ma jalam ukelo Cik i wang’ dhanu ceke ma gicokiri, niwacu jumaco, jumamon, man dhanu ceke ma gicopo winjo man gicopo nyang’. 3 Man esome ma tek niai kugweno nitundo dieceng’ ni jumaco, jumamon man dhanu ceke ma gicopo nyang’, ma gicokiri i lela ma lac ma n’i wang’ Dhugang’ mi pii; dhanu giwinjo kilili mandha lembe mi buku mi Cikne. 4 Ezra ma jagor* ucungo iwi bop mi yen ma juyiko pi lembene man Matithia, Cema, Anaya, Uria, Hilkia man Maaseya gicungo i ng’ete ma yor acwic, Pedaya, Micael, Malkiya, Hacum, Hac-badana, Zekaria man Meculam ke gicungo i ng’ete ma yor acam.

5 Ezra uyabu bukune i wang’ dhanu ceke, pilembe nwang’u ecungo malu i wang’ dhanu ceke. Kinde m’eyabe, dhanu ceke giai gicungo. 6 I ng’eye Ezra upaku Yehova Mungu mandha, En m’e dwong’, e dhanu ceke gidwoko kumae: “Amen!* Amen!” E giting’o cing’gi malu. I ng’eye girum piny, gipodho arieba wang’gi i wang’ Yehova man gidong’ asu i ng’om. 7 Man Yecuwa, Bani, Cerebia, Yamin, Akub, Cabethai, Hodia, Maaseya, Kelitha, Azaria, Yozabad, Hanan man Pelaya ma gibino Julawi, gibino koro i Cikne ni dhanu kinde ma dhanune gicungo acunga. 8 Gimediri nisomo bukune ku dwandgi ma tek, niwacu buku mi Cik pa Mungu mandha, gikoro iye terere man gituco there; kumeno re ma gikonyo dhanu ninyang’ i gin ma gibesomo.*

9 E Nehemia ma nwang’u tie jabim,* Ezra ma jalam man jagor* ku Julawi ma gibino ponjo dhanu giwacu ni dhanu ceke kumae: “Nindo maeni tie nindo ma leng’ ni Yehova Mungu mwu. Can kud unegwu kadi kud wuwaki.” Kum nwang’u dhanu ceke gibino wak kinde ma gibewinjo lembe mi Cik. 10 Eyero igi kumae: “Wucidh wucam piny m’ang’iya* man wumadh piny ma mit. Wuor kum cam moko ni ju ma giyiko ngo piny moko, kum nindo ma tin en e leng’ ni Rwoth mwa, man can kud unegwu, kum anyong’a m’uai i bang’ Yehova en e ot ma tek* mwu.” 11 Man Julawi gibino juko dhanu ceke, giwacu kumae: “Wuling’! kum nindo ma tin utie leng’ man can kud unegwu.” 12 E dhanu ceke gicidho pi nicamu, nimadhu man nioro kum cam ni ju ma gimbe ku gin moko man nitimo foc ma dit, kum ginyang’ i lembe ma juyero igi.

13 Man i nindo mir arionde, judongo mi thepacu mi dhanu ceke, julam man Julawi gicokiri karacelo i ng’et Ezra ma jagor* pi ninwang’u ng’eyong’ec lee i lembe mi Cik. 14 E ginwang’u jugoro i Cik nia Yehova ugam ung’olo nikadhu kud i bang’ Musa nia Juisrael gicikiri nibedo i the otbak* i saa mi foc i dwi mir abiro, 15 man nia gicikiri nitwong’o man ninyutho i adhura migi ceke man i Yeruzalem ceke kumae: “Wucidh i ng’om gudi man wukel jang yend oliv ma ithe bik i kume, jang yend fathula,* jang yend mirthe man jang ngasi ku jang yen mange de ma ithgi bik i kumgi kara wagier ko otbak nimakere ku gin ma jukiewo.”

16 Pieno dhanu gicidho man gidwogo ku jang yen pi niyiko otbak igi gigi, ng’atuman iwi ot pare, man bende i lela migi, i lela mi ot pa Mungu mandha, i lela ma lac mi Dhugang’ mi pii man i lela ma lac mi Dhugang’ mir Efraim. 17 E cokiri ceke mi dhanu ma gigam gidwogo kud i ng’eca giyiko otbak man gibedo i otbak, kum nwang’u fodi Juisrael gitimo ngo focne i ayi maeni niai i nindo pa Yocuwa ma wod Nun nitundo i nindo maeca. Pieno anyong’a ma dit mandha ubino nuti. 18 Man kubang’ nindo jubed jusomo buku mi Cik pa Mungu mandha niai i nindo ma kwong’a nitundo i nindo ma tokcen, bende gitimo foc pi nindo abiro. I nindo mir aborane, gitimo coko ma dit calu ma cik ukwayu.

9 I nindo mi pier ario wi ang’wende mi dwi mir abiro, Juisrael gicokiri karacelo; gibino kwiro cam ma gikendo kendi mi saki i kumgi man kud utur i wigi. 2 Nyikwayu mir Israel gigam gikoyiri cen ku dhanu ceke ma gin umondo, e gicungo man gituco dubo migi gigi ku kosa mi kwaru migi bende. 3 Gimediri asu nicungo kakagi man jusomo buku mi Cik pa Yehova Mungu migi ku dwal ma tek pi saa adek; man pi saa adek mange, gituco dubo migi man girum piny i wang’ Yehova Mungu migi.

4 E Yecuwa, Bani, Kadmiel, Cebania, Buni, Cerebia, Bani man Kenani gicungo iwi bop mi Julawi man gikwayu Yehova Mungu migi ku dwandgi ma tek. 5 Man Yecuwa, Kadmiel, Bani, Hacabneya, Cerebia, Hodia, Cebania man Pethahia ma gi Julawi giwacu kumae: “Wuai malu man wupak Yehova Mungu mwu rondo ku rondo.* E Mungu, wek gipak nyingi ma dwong’ man ma dit nisagu mugisa ku pak ceke ma dhanu copo miyo.

6 “In i kendi m’itie Yehova; icwiyo polo, eyo, polo i dwong’ne zoo* kud udul migi ceke, ng’om ku piny ceke ma n’i iye man nam ku piny ceke ma n’i igi. Igwokogi ceke gibedo kwo man udul mi polo giberum piny i weng’i. 7 In i Yehova Mungu mandha, m’ung’iyo Abram, m’uwodhe kud i ng’om mi Ur mi Jukaldayo man m’umiyo ire nying’ ma Abraham. 8 Inwang’u nia etie kud adunde m’atira i weng’i, pieno itimo lembariba kude nia ibimiyo ire man ni nyikwaye* ng’om mi Jukanan, mi Juhithi, mi Juamor, mi Juperizi, mi Juyebusi man mi Jugirgaci; e ipong’o lembang’ola perine, pilembe in i pwe.

9 “Pieno ineno can pa kwaru mwa i Misiri, man iwinjo wak migi i dhu Nam ma kwar. 10 E itimo giranyutha man udu i kum Farao ku jutic pare ceke man dhanu ceke mi ng’om pare, kum ing’eyo nia kuhaya re m’ucwalugi nisendo dhanu peri. Iketho nyingi ung’eyere man jung’eye cuu nitundo tin. 11 Man ikaku nam i wang’gi uketho gikadhu nam ku wi ng’om m’uthwo. Bende, ibolo ju m’uberiemo tokgi kaka ma thuc calu kidi ma jubolo i nam ma yamu ubedhongo. 12 Itelo wigi ku mbegi mir afuru ku dieceng’, man kud uthieno ke ku mbegi mi mac, pi nimenyo igi yo m’ukwayu giwoth kud i iye. 13 Iloro iwi got Sinai man iweco i bang’gi niai kud i polo. Imiyo igi bende lembapoka ma pwe, cik mi lemandha,* telowic ma beco man lembang’ola. 14 Iketho ging’eyo Sabatu peri ma leng’ man imiyo igi lembang’ola, telowic, man cik nikadhu kud i bang’ Musa ma jatic peri. 15 Imiyo igi mukathi niai kud i polo kinde ma kec ubino negogi, man iwodho igi pii kud i cana kinde ma rieu ubino negogi, man iyero igi nia gimondi man gimak ng’om m’igam ikwong’o* nimiyo igi.

16 “Ento gin, niwacu kwaruwa, gitimo ku kuhaya man wigi doko tek,* e gibed giwinjo ngo lembang’ola peri. 17 Gikwero niwinjo man gipoy ungo i kum tic peri ma wang’u ijo m’itimo i kindgi, ento wigi doko tek* man ging’iyo igi jatelwic kara gidok i ng’eca migi i Misiri. Ento in, i Mungu ma tie ayika niweko lembe,* ma jabero man jakisa, ma yoo ni ng’eicwiny man ma dwong’ i mer ma lokere ngo,* e iwenjogi ngo. 18 Kadok kinde ma giyiko igi ayi gin m’acwiya ma nyathi dhiang’ mi cuma* man gibino yero nia, ‘maeni tie Mungu peri m’uwodhi kud i Misiri,’ man gitimo lembe ma dongo m’unyutho koso woro, 19 re asu in, i kisa peri ma dit, iwenjogi ngo i langa. Mbegi mir afuru uai ungo kud i wigi ku dieceng’ kara utel wigi i yo migi, man mbegi mi mac de ku diewor kara umeny igi yo ma gicikiri niwotho i iye. 20 Man imiyo tipo peri ma ber kara umii igi rieko. Bende itwonogi ngo ku mana peri, man imiyo igi pii kinde ma rieu pii ubino negogi. 21 Pi oro pier ang’wen imiyo igi cam i langa. Gin moko mbe m’urem igi. Bongu migi utii ngo man tiendgi de ukwot ungo.

22 “Imiyo igi ker man dhanu, ing’wekogi ungu ungu igi, e gimaku ng’om pa Sihon, niwacu ng’om p’ubimo mi Hecbon man bende ng’om pa Og m’ubimo mi Bacan. 23 Man iketho wotgi unyay lee calu nyikaluku mi polo. I ng’eye iterogi i ng’om m’igam ing’olo ni kwarugi nia gibimondo i iye man gibimake. 24 E wotgi gimondo i ng’ombe man gimake. Ivoyo bende Jukanan ma gibed gibedo i ng’ombe i wang’gi man imiyogi i cing’gi, nik’ebed jubim migi ku dhanu mi ng’ombe de, kara gitim gin ma gimaru i kumgi. 25 E gimaku adhura ma tek ku ng’om ma miyo, gimaku bende udi m’upong’ ku kwond piny ceke ma beco, kulo ma judaru tong’o, podho mir ulok, podho mir oliv man yen dupa ma cego nyinggi. Pieno gicamu, giyeng’ man gicwey, ginyayu anyong’a i igi nikum bero peri ma dit.

26 “Ento wigi doko tek man gijai iri man giloko ng’eygi ni Cik peri.* Ginego jubila peri m’ubed ucimogi kara gidwog kendo i beng’i, man gitimo lembe m’unyutho koso woro ma lee. 27 Pi lembe maeni, imiyogi i cing’ jukwor migi ma gimediri nisendogi. Ento gibed giwak i beng’i i saa mi masendi migi man ibed iwinjogi niai kud i polo; man nikum kisa peri ma dit, ibed imiyo igi jular pi nibodhogi kud i cing’ jukwor migi.

28 “Ento ka ginwang’u gony ci, gidok gicaku timo lembe ma rac kendo i weng’i, e ibed iwenjogi kendo i cing’ judegi migi, ma gibimo wigi.* I ng’eye gibed gilokiri man gikwayu kony i beng’i, e iwinjogi niai kud i polo man ibodhogi kendo kendo nikum kisa peri ma dit. 29 Kadok ibed icimogi kara idwokgi i bang’ Cik peri de, re gibed gitimo ku kuhaya man gikwero niwinjo lembang’ola peri; gidubo i kum telowic peri, ma ng’atini bedo kwo tek ebeworogi. Man wigi doko tek, giloko ng’eygi man gidwoko ng’utgi tek man gikwero niwinjo. 30 Icirogi pi oro ma dupa man imiyo tipo peri ni jubila peri man icimogi nikadhu kud i bang’gi, ento gikwero niwinjo. Tokcenne imiyogi i cing’ dhanu mi ng’om m’udhokogi. 31 Man nikum kisa peri ma dit, ijigo ngo wigi, kadi iwenjogi de ngo, kum in i Mungu ma jabero man ma jakisa.

32 “Kawoni, E Mungu mwa, Mungu ma dit, ma jatego, ma ng’oyo ndiri, in m’igam itimo calku lembariba peri man inyutho mer ma lokere ngo, kud ivon peko ceke m’unwang’uwa ku jubim mwa, judongo ma wijo mwa, julam mwa, jubila mwa, kwaruwa man dhanu peri ceke, niai i nindo mi jubim mir Asiria, nitundo tin. 33 Ibino pwe i lembe ceke m’uwok i wiwa, kum itimo lembe i atira; wan re ma watimo lembe ma reco. 34 Ento jubim mwa, judongo ma wijo mwa, julam mwa, man kwaruwa giworo ngo Cik peri man giketho ngo wigi i kum lembang’ola peri, kadi i kum poyowic* peri, m’ibed imiyo pi nicimogi. 35 Kadok kinde ma gibino i the bimobim migi man gibino kwo ma ber ku piny dupa ma beco m’imiyo igi, man gibino i ng’om ma lac man ma miyo m’imiyo igi, re gitimo ngo iri, kadi gilokiri ngo cen kud i kum timo migi ma reco. 36 Eno uketho tin eni watie ng’eca, eyo, watie ng’eca i ng’om m’imiyo ni kwaruwa kara gicam nyinge man piny ma beco m’i iye. 37 Piny m’upong’ i ng’ombe zoo tie mi jubim m’iketho i wiwa nikum dubo mwa. Gibebimo wiwa man wi lim mwa calu ma gimaru, man wan’i can ma dit.

38 “Dong’ pi lembe maeno ceke, wabetimo lembang’ola ma tek, man wabekiewe akiewa. Bende judongo ma wijo mwa, Julawi mwa, man julam mwa gibimwono ayi* migi i there.”

10 Ju ma gimwono ayi* migi i kumene ubino dhanu ma e:

9 Julawi ke ubino: Yecuwa ma wod Azania, Binui m’i kind wot Henadad, Kadmiel, 10 man umego migi, niwacu Cebania, Hodia, Kelitha, Pelaya, Hanan, 11 Mika, Rehob, Hacabia, 12 Zakur, Cerebia, Cebania, 13 Hodia, Bani man Beninu.

14 Jutelwic mi dhanu ubino: Paroc, Pahath-moab, Elam, Zatu, Bani, 15 Buni, Azgad, Bebai, 16 Adoniya, Bigvai, Adin, 17 Ater, Hezekia, Azur, 18 Hodia, Hacum, Bezai, 19 Harif, Anathoth, Nebai, 20 Magpiac, Meculam, Hezir, 21 Mecezabel, Zadok, Yadua, 22 Pelatia, Hanan, Anaya, 23 Hoceya, Hanania, Hascub, 24 Halohec, Pilha, Cobek, 25 Rehum, Hacabna, Maaseya, 26 Ahiya, Hanan, Anan, 27 Maluk, Harim man Baana.

28 Dong dhanu, niwacu julam, Julawi, jukur dhugang’, juruwer, jutic mir hekalu,* man ng’atu moko ci m’ukoyere gire kud i kind dhanu mi ng’ombe pi nilubo Cik pa Mungu mandha, karacelo ku mon migi, wotgi man anyira migi, dhanu ceke ma gitie ku ng’eyong’ec man nyang’ i thelembe,* 29 gidikiri kud umego migi, dhanu migi ma pigi yik, man gitwiyiri gigi kud alam man kwong’ nia gibiwotho i Cik pa Mungu mandha, m’egam emiyo nikadhu kud i bang’ Musa ma jatic pa Mungu mandha, man nia gibiworo cuu mandha lembang’ola ceke pa Yehova Rwoth mwa, lembapoka pare, man telowic pare. 30 Wabimiyo ngo jumanyir mwa ni dhanu mi ng’ombuni, man wabigamu ngo jumanyir migi ni wotwa.

31 Tek dhanu mi ng’ombuni gibino ku jamkuloka migi man kwond nying cam ceke pi nilworo i ceng’ Sabatu, wabing’iewo ngo gin moko ci i bang’gi i ceng’ Sabatu, kadi i nindo ma leng’. M’umedo maeno, wabikayu ngo cam i oro mir abiro man wabiweko bende banja.

32 Waketho bende lembang’ola i wiwa giwa nia ng’atuman m’i kindwa ubed umii kubang’ oro mola ma tar grama ang’wen* pi tic mi ot* pa Mungu mwa, 33 pi mukathi ma jurodo iwi wadi,* pi girathiera mi nying cam ma thiri thiri, pi lam m’awang’a ma thiri thiri i ceng’ Sabatu man i por pa dwi, man pi foc ma juketho pi piny ma leng’, pi lam mi dubo ma jutimo ko adunya pi Israel, man pi tic ceke mi ot pa Mungu mwa.

34 Wagoyo bende gagi pi ning’eyo saa ma tap ma julam, Julawi, man dhanu calku thekwaru migi, gicikiri nikelo i iye yen i ot pa Mungu mwa kubang’ oro. Yen maeno jubiwang’ugi iwi pemlam pa Yehova Mungu mwa, calku gin ma jukiewo i Cik. 35 Bende, kubang’ oro wabibekelo nying cam ma kwong’a mi ng’om mwa man nying yen ma kwong’a mi kit yen ceke ma cego nyinggi, i ot pa Yehova. 36 Wabibekelo bende i bang’ julam ma gibetimo i ot pa Mungu mwa, kayu m’i kind awiya mwa ma co man kayu mi lim mwa, mi dhieng’, mi rombe, man mi diegi calu ma jukiewo i Cik. 37 Bende, mogo cam mwa ma kwong’a, giramiya mwa, nying yen mi kwond yen ceke, pigulok ma nyen man mo, wacikara nikelo i bang’ julam i kusika ma jugwoko piny i igi i ot pa Mungu mwa, karacelo kud apajpiny mi ng’om mwa ni Julawi, kum Julawi re ma gijoko apaje mir adhura mwa ceke ma jufuro fur i igi.

38 Man jalam, niwacu nyakwar Arun, bibedo karacelo ku Julawi kinde ma Julawi gibecoko apajpiny; Julawi gicikiri nithiero apaje mir apajpiny i ot pa Mungu mwa, i kusika* mi ot ma jukanu piny i iye. 39 Kum i kusika ma jukanu piny i igi* re ma Juisrael man wot Julawi gicikiri nikelo giramiya mi nying cam, pigulok ma nyen, man mo, man kuca re ma jugwoko ajeni mir hekalu. Bende julam ma gitimo tic, jukur dhugang’ man juruwer de gibed gibino kuca. Wabiwenjo ngo ot pa Mungu mwa.

11 Nwang’u judongo ma wijo mi dhanu gibino kwo i Yeruzalem; ento dong dhanu gigoyo gagi pi niketho juruot acel wi apar gibin gikwo i Yeruzalem ma tie adhura ma leng’, saa maeno nwang’u juruot abung’wen mange gidong’ i adhura mange. 2 Bende, dhanu umiyo mugisa ni jumaco ceke ma giwodhiri ku berocwinygi pi nikwo i Yeruzalem.

3 Man maeni gi judongo mi theng ng’om ma gibino kwo i Yeruzalem. (Dong Juisrael, julam, Julawi, jutic mir hekalu,* man wot jutic pa Suleman, gibino kwo i adhura mange mi Yuda, ng’atuman i aba pare, i adhura ma thugi.

4 Dhanu moko mi suru pa Yuda man mi suru pa Benjamin bende gibino kwo i Yeruzalem.) I kind dhanu mi suru pa Yuda ubino, Athaya ma wod Uzia, ma wod Zekaria, ma wod Amaria, ma wod Cefathia, ma wod Mahalalel m’i kind nyikway Perez, 5 man Maaseya ma wod Baruk, ma wod Kolhoze, ma wod Hazaya, ma wod Adaya, ma wod Yoiarib, ma wod Zekaria ma nyakwar Cela. 6 Nyikway Perez ceke ma gibino kwo i Yeruzalem gibino jumaco dak ang’wen ku pier abusiel wi abora ma giromo.

7 Man i kind dhanu mi suru pa Benjamin ubino: Salu ma wod Meculam, ma wod Yoed, ma wod Pedaya, ma wod Kolaya, ma wod Maaseya, ma wod Ithiel, ma wod Yecaya, 8 man i ng’eye, Gabai giku Salai, ceke dhanu dak abung’wen ku pier ario wi abora; 9 man Yoel ma wod Zikri ubino janen wi tic migi i adhura, man Yuda ma wod Hasenua ubino mir ario i ng’eye.

10 I kind julam ubino: Yedaya ma wod Yoiarib, Yakin, 11 Seraya ma wod Hilkia, ma wod Meculam, ma wod Zadok, ma wod Merayoth, ma wod Ahitub ma jatelwic mi ot* pa Mungu mandha, 12 man umego migi ma gibed gitimo tic i ode, ceke dak abora ku pier ario wi ario; man Adaya ma wod Yeroham, ma wod Pelalia, ma wod Amzi, ma wod Zekaria, ma wod Pacur, ma wod Malkiya, 13 man umego pare ma gi judongo mi thepacu, dak ario ku pier ang’wen wi ario; man Amacsai, ma wod Azarel, ma wod Azai, ma wod Mecilemoth, ma wod Imer, 14 man umego migi ma gibino dhanu ma jurukara man ma cwinygi tek, dak acel ku pier ario wi abora man janen wi tic migi ubino Zabdiel m’e ng’atu acel mi ot ma pire uyik.

15 Man i kind Julawi ubino: Cemaya ma wod Hascub, ma wod Azrikam, ma wod Hacabia, ma wod Buni, 16 man Cabethai giku Yozabad ma gi Jutelwic i kind Julawi, gibed gineno wi tic ma yo woko mi ot pa Mungu mandha; 17 man Mathania ma wod Mika, ma wod Zabdi, ma wod Asaf ma jatel wi wer, m’ubed utelo wi pak i saa mi rwo man Bakbukia m’ubino mir ario i ng’ey umego pare, man Abda ma wod Camua, ma wod Galal, ma wod Yeduthun. 18 Julawi ceke ma gin’i adhura ma leng’ gibino dak ario ku pier abora wi ang’wen.

19 Man jukur dhugang’ ubino Akub, Talmon, man umego migi dak acel ku pier abiro wi ario ma gibed gikuro dhugang’.

20 Dong Juisrael, julam, man Julawi gibino i adhura mange ceke m’i Yuda, ng’atuman i aba pare. 21 Jutic mir hekalu* gibed gikwo i Ofel, man Ziha giku Gicpa gibed gineno wigi.

22 Janen wi tic mi Julawi i Yeruzalem ubino Uzi ma wod Bani, ma wod Hacabia, ma wod Mathania, ma wod Mika m’i kind wot Asaf ma gi juruwer; ebed eneno wi tic mi ot pa Mungu mandha. 23 Kum ubimo ung’olo lembe pi juruwer, man eketho piny ma jubed jumii igi nimakere ku yeny migi ma kubang’ ceng’. 24 Pethahia ma wod Mecezabel m’i kind wot Zera, ma wod Yuda ubino jamii juk p’ubimo* i lembe ceke m’uneno dhanu.

25 I lembe m’uneno pacu ku podho m’udhokogi, dhanu moko mi Yuda gibed gikwo i Kiriath-arba ku nyithindh adhura m’i ng’ete, i Dibon ku nyithindh adhura m’i ng’ete,* i Yekabzel ku pacu m’i ng’ete, 26 i Yecuwa, i Molada, i Beth-peleth, 27 i Hazar-cual, i Ber-ceba ku nyithindh adhura m’i ng’ete,* 28 i Ziklag, i Mekona ku nyithindh adhura m’i ng’ete,* 29 i En-rimon, i Zora, man i Yarmuth, 30 i Zanoa, i Adulam ku pacu m’i ng’etgi, i Lakic ku podho m’udhoke, i Azeka ku nyithindh adhura m’i ng’ete.* Gibedo* niai i Ber-ceba nitundo i poga mir Hinom.

31 Man dhanu mi suru pa Benjamin gibino i Geba, i Mikmac, i Aija, i Bethel ku nyithindh adhura m’i ng’ete,* 32 i Anathoth, i Nob, i Ananiya, 33 i Hazor, i Rama, i Githaim, 34 i Hadid, i Zeboim, i Nebalat, 35 i Lod man i Ono, ma tie poga mi jubodho. 36 Man ungu mi Julawi moko mi Yuda, juketho gibedo i ng’om mi suru pa Benjamin.

12 Maeni ubino julam man Julawi ma gidwogo karacelo ku Zerubabel ma wod Cealtiel, man Yecuwa, Seraya, Yeremia, Ezra, 2 Amaria, Maluk, Hatuc, 3 Cekania, Rehum, Meremoth, 4 Ido, Ginethoi, Abiya, 5 Mijamin, Maadia, Bilga, 6 Cemaya, Yoiarib, Yedaya, 7 Salu, Amok, Hilkia man Yedaya. Ju maeni gibino jutelwic mi julam karacelo kud umego migi i nindo pa Yecuwa.

8 Julawi ubino Yecuwa, Binui, Kadmiel, Cerebia, Yuda man Mathania m’ubed utelo wi wer mi dwoko foyofoc karacelo kud umego pare. 9 Man Bakbukia giku Uni ma gin umego migi gibed gicungo i wang’gi pi tic mi kur.* 10 Yecuwa unyolo Yoiakim, Yoiakim unyolo Eliacib, man Eliacib unyolo Yoyada. 11 Yoyada unyolo Yonathan, man Yonathan unyolo Yadua.

12 I nindo pa Yoiakim, julam maeni gibino jutelwic mi thepacu migi: Meraya mi ju pa Seraya; Hanania mi ju pa Yeremia; 13 Meculam mi ju pa Ezra; Yehohanan mi ju pa Amaria; 14 Yonathan mi ju pa Maluki; Yozefu mi ju pa Cebania; 15 Adna mi ju pa Harim; Helkai mi ju pa Merayoth; 16 Zekaria mi ju pa Ido; Meculam mi ju pa Ginethon; 17 Zikri mi ju p’Abiya; mi ju pa Miniamin, . . .  ;* Pilthai mi ju pa Moadia; 18 Camua mi ju pa Bilga; Yehonathan mi ju pa Cemaya; 19 Matenai mi ju pa Yoiarib; Uzi mi ju pa Yedaya; 20 Kalai mi ju pa Salai; Eber mi ju pa Amok; 21 Hacabia mi ju pa Hilkia; Nethanel mi ju pa Yedaya.

22 Jukiewo nying’ jutelwic mi thepacu mi Julawi man bende mi julam i nindo pa Eliacib, pa Yoyada, pa Yohanan man pa Yadua cil i nindo mi bimobim pa Dario ma Japersi.

23 Jukiewo nying’ Julawi ma gibino jutelwic mi thepacu i buku mi kpawa cil i nindo pa Yohanan ma wod Eliacib. 24 Jutelwic mi Julawi ubino Hacabia, Cerebia man Yecuwa ma wod Kadmiel. Man umego migi ubed ucungo i wang’gi pi nimiyo pak man nidwoko foyofoc nimakere ku telowic ma Daudi ma dhanu pa Mungu mandha umiyo. Ungu mi jukurman ubed ucungo i ng’et ungu wadi. 25 Mathania, Bakbukia, Obadia, Meculam, Talmon man Akub gibed gikuro kur i dhugang’; gibed gikuro kaka ma jukanu i iye piny ma n’i kum dhugang’. 26 Ju maeni gibed gitimo i nindo pa Yoiakim ma wod Yecuwa ma wod Yozadak, man i nindo pa Nehemia ma jabim,* man pa Ezra ma jalam man jagor.*

27 I nindo mi thiero gang’kidi mi Yeruzalem, jusayu Julawi kud i kabedo ceke ma gikwo i iye man jukelogi i Yeruzalem pi nitimo foc mi thiero gang’kidi kud anyong’a, karacelo ku wer mi dwoko foyofoc man ku jamgoyo wer ma woy awoya, jamgoyo wer ma juthondhe man adungu. 28 Man wot juruwer* gicokiri karacelo niai kud i theng ng’om,* kud i ng’et Yeruzalem ceke, kud i pacu ceke mi Junethofa, 29 kud i Beth-gilgal, kud i ng’om mi Geba man Azmaveth, kum juruwer gigiero igi pacu i ng’et Yeruzalem ceke. 30 Man julam ku Julawi gidwokiri gigi leng’, gidwoko bende dhanu, dhugang’ man gang’kidi leng’.

31 E alund aketho judongo ma wijo mi Yuda giidho iwi gang’kidi. M’umedo maeno, ang’iyo ungu ario ma dongo mi juruwer ma gidwoko foyofoc man piro, ungu acel uwotho iwi gang’kidi ma yor acwic nitundo i bang’ Dhugang’ mir udhuru vuru. 32 Hocaya man nusu mi judongo ma wijo mi Yuda gibino wotho i ng’eygi 33 karacelo kud Azaria, Ezra, Meculam, 34 Yuda, Benjamin, Cemaya man Yeremia. 35 Man jumoko m’i kind wot julam ma gibino kud agwara ubino karacelo kugi: Zekaria ma wod Yonathan, ma wod Cemaya, ma wod Mathania, ma wod Mikaya, ma wod Zakur, ma wod Asaf, 36 man umego pare Cemaya, Azarel, Milalai, Gilalai, Maai, Nethanel, Yuda man Hanani ma gitie ku jamgoyo wer pa Daudi ma dhanu pa Mungu mandha; man Ezra ma jagor* utelo yo i wang’gi. 37 Niai kud i Dhugang’ mi pii ma dhenyini gicidho atira i wang’gi, gikadhu kud iwi mangasi mir Adhura pa Daudi, man kud i kaidho mi gang’kidi ma nwang’ere iwi ot pa Daudi, man kud iwi Dhugang’ mi pii yo nyangu.

38 Ungu ma kucelo mi juruwer ma gibedwoko foyofoc gibino wotho i thenge ma kucelo,* man alubo tokgi karacelo ku nusu mi dhanu iwi gang’kidi nitundo iwi Ot ma wiw mi furu man iwi Gang’kidi ma lac 39 man iwi Dhugang’ mir Efraim, iwi Dhugang’ mir adhura ma con, iwi Dhugang’ mi rec, iwi Ot ma wiw pa Hananel, iwi Ot ma wiw pa Mea man iwi Dhugang’ mi rombe; e gibin gicungo i Dhugang’ pa jakur.

40 Man tokcenne, ungu ario mi juruwer ma gibedwoko foyofoc gicungo i wang’ ot pa Mungu mandha; e an karacelo ku nusu mi jutelwic ma gi jubim de wacungo, 41 man Eliakim, Maseya, Miniamin, Mikaya, Elioenai, Zekaria man Hanania ma gi julam gibino kud agwara; 42 man Maseya, Cemaya, Eleazar, Uzi, Yehohanan, Malkiya, Elam man Ezer. E juruwer giwer ku dwandgi ma tek i the telowic pa Izrahia.

43 Cing’ nica githiero lam ma dit man anyong’a negogi, kum Mungu mandha unyayu anyong’a lee i igi. Jumamon kud awiya bende anyong’a negogi, uketho anyong’a mi Yeruzalem uwinjere bor mandha.

44 Cing’ nica juketho jumaco ginen wi udi ma jugwoko i iye giramiya, landu wi mwoka man apaje. I udinegi ubed ukwayu gicok dhu makapiny ma Cik ukwayu pi julam man Julawi kud i podho mir adhura ma tung’ tung’, kum anyong’a ubino i Yuda pilembe julam ku Julawi gibino timo tic. 45 Man gicaku timo tic pa Mungu migi man tic mi dwokiri leng’ calu ma juruwer ku jukur dhugang’ gitimo, nimakere ku telowic pa Daudi man pa Suleman ma wode. 46 Kum con i rundi pa Daudi man p’Asaf, jutelwic* mi juruwer, mi wer mi pak man wer mi dwoko foyofoc ni Mungu gibino nuti. 47 Man i rundi pa Zerubabel man pa Nehemia, Israel ceke umiyo makapiny mi juruwer ku mi jukur dhugang’ nimakere ku yeny ma kubang’ ceng’. Gikoyo bende makapiny mi Julawi, man Julawi gikoyo makapiny ni nyikway Arun.

13 Cing’ nica jusomo buku pa Musa i ith dhanu man junwang’u ekiewere nia Jaamon kadi Jamoab moko mbe m’ucikere nimondo i cokiri pa Mungu mandha, 2 kum gicidh gijolo ngo Juisrael ku mukathi man pii, ento giculo Balam i kumgi kara elamgi. Ento Mungu mwa uloko alam parene ni mugisa. 3 Saa ma giwinjo Cik tap ci, gicaku koyo nyikwayu mi juwirok* ceke kud i kind Israel.

4 I wang’ lembe maeni, nwang’u jalam m’ubed uneno wi kusika ma jukanu iye piny* mir hekalu* pa Mungu mwa ubino Eliacib ma wat pa Thobia. 5 Eyiko ire kusika ma lac ma jukanu piny i iye,* ma i wang’e jubed jukanu i iye girathiera mi nying cam, udok sengi man ajeni kud apaje mi nying cam, pigulok ma nyen, man mo ma jung’olo nia jumii ni Julawi, juruwer man jukur dhugang’, man jubed jucok dhu giramiya mi julam i iye.

6 I saa maeno zoo, abino mbe i Yeruzalem, kum acidho i bang’ Ubimo Artacasta mi Babeli i oro mi pier adek wi arionde mi camuker pare; man i ng’eye akwayu yom i bang’ ubimo. 7 I ng’eye abino i Yeruzalem man aneno lembe ma rac ma Eliacib utimo pi Thobia, m’eyiko ko ire kusika mi kanu piny i lela mi ot pa Mungu mandha. 8 Lembe maeni unyayu can lee dit i iya, uketho abayu piny mi ot pa Thobia ceke cen kud i kusika ma jukanu piny i iye.* 9 I ng’eye ang’olo nia gidwok kusika ma jukanu piny i iye leng’; e adwoko ajeni mi ot pa Mungu mandha kendo i igi, karacelo ku girathiera mi nying cam, ku lam man udok sengi.

10 Anwang’u bende nia makapiny mi Julawi de jubed jumiyo ngo igi, uketho Julawi ku juruwer ma gitimo tic gidok, ng’atuman udok nifuro podho pare. 11 Pieno adhaw iwi jutelwic man awacu kumae: “Pirang’o wuweko juwenjo ot pa Mungu mandha?” I ng’eye acoko dhoggi karacelo man adwokogi i tic migi. 12 Man dhanu mi Yuda ceke gikelo apajpiny mi nying cam, mi pigulok ma nyen man mi mo i kusika mi kanu piny. 13 I ng’eye aketho Celemia ma jalam, Zadok ma jagor* man Pedaya m’i kind Julawi ginen wi kusika ma jukanu piny i igi; man Hanan ma wod Zakur, ma wod Mathania ubino jakony migi, kum dhanu maeni, gibino dhanu ma jugeno. Ebino tic migi nipoko piny ni umego migi.

14 Poy pira, E Mungu para, pi lembe maeni man kud iruc mer ma lokere ngo m’anyutho pi ot peri man pi tic m’i iye.*

15 I nindo maeno, aneno dhanu mi Yuda gibenyono pigulok i vur mi biyo pigulok i ceng’ Sabatu, gibedhuro nying cam ungu ungu man gibekethogi iwi kana man gibekelo pigulok, nying ulok, nying ulam man kit cam ceke i Yeruzalem i ceng’ Sabatu. E acimogi iwi lworo piny i ceng’ maeno.* 16 Man dhanu mi Turo ma gikwo i adhura gibed gikelo rec ku kit jamkuloka ceke man gilworogi ni dhanu mi Yuda man i Yeruzalem i ceng’ Sabatu. 17 E agam adhaw iwi weg yung mi Yuda man ayero igi kumae: “Wubetimo lembang’o ma rac kumeni, ma wubecido ko kadok ceng’ Sabatu de e? 18 Nyo eni tie ngo gin ma kwaruwu gitimo uketho Mungu mwa ukelo can maeni ceke i wiwa, man iwi adhura maeni bende? Kawoni wubemedo lak kwinyo ma dong’ uopo i kum Israel nikum Sabatu ma wubecido.”

19 Saa ma tipopiny ucaku loro iwi dhugang’ mi Yeruzalem i wang’ Sabatu, ang’olo nia jucik dhugola. Ang’olo bende nia jucikiri ngo niyabugi nitundo i ng’ey Sabatu, man aketho jumoko m’i kind jutic para i dhugang’ kara kud juroy ter moko acel de i gang’ i ceng’ Sabatu. 20 Pieno jukuloka man jurulwor mi kit jamkuloka ceke givuto woko i ng’ey Yeruzalem wang’ acel kunoke wang’ ario. 21 I ng’eye acimogi man awacu igi kumae: “Pirang’o wubevuto i wang’ gang’kidi? Ka wutimo lembene kendo, abiriemowu ku tego.” Niai cing’ nica gibino ngo i ceng’ Sabatu.

22 Man ayero ni Julawi nia gicikiri nidwokiri gigi leng’ thiri thiri man gibin gikur dhugang’ kara gigwok ceng’ Sabatu ubed leng’. Pi maeni bende poy pira, E Mungu para, man nyuth ira kisa nimakere ku mer peri ma lokere ngo ma dwong’.

23 Nindo maeno, aneno bende Juyahudi moko ma gigamu* mon ma gi Juacdod, Juamon man Jumoab. 24 Nusu mi wotgi ubino weco dhu Juacdod man nusu ma kucelo ubino weco dhok mi dhanu mange, ento ng’atu acel de mbe i kindgi m’ung’eyo niweco dhok mi Juyahudi. 25 Pieno adhaw i wigi man alamugi, agoyo bende jumaco m’i kindgi moko, adoyo yuk wigi man aketho gikwong’o ku nying’ Mungu kumae: “Wucikuru ngo nimiyo jumanyir mwu ni wotgi man wucikuru ngo niyiyo jumanyir migi moko ci ni wotwu, kadi iwu giwu. 26 Nyo lembe maeno ngo re m’uketho Ubimo Suleman mir Israel udubo? I kind thek dupa ubimo moko mbe m’ubino calu en; man Mungu pare ugam umare, uketho Mungu ukethe ni ubimo iwi Israel ceke. Ento mon ma gi juwirok gigam giketho kadok en de edubo. 27 Nyo etie lembe ma rac ungo iwu ma wutimo ko tho dubo ma dit rukeni i kum Mungu mwa, ma wugamu ko mon ma juwiroki?”

28 Ng’atu acel m’i kind wot Yoyada ma wod Eliacib ma jalam ma dit udoko jalwod Sanbalat ma Jahoron. Pieno arieme cen kud i bang’a.

29 Poy pigi, E Mungu para, pilembe gicido tic mi lamulam, lembariba mi tic mi lamulam, man Julawi.

30 Man adwokogi leng’ ni cilo ceke mi juwirok man amiyo tic ni julam ku Julawi, ng’atuman udok i tic pare, 31 bende amaku yub kara jubed jukel yen i saane man nying cam ma kwong’a.

Dong’ poy pira ma ber,* E Mungu para.