YOB

“Awok kud i maa muneru,

man abidok de muneru.

 3 “Wek nindo ma junyola i iye urwiny,

bende diewor ma ng’atu moko uyero i iye nia, ‘jugamu ic pa nyathin ma nico.’

Wek Mungu ma ni malu kud udieng’ pire;

dong’ der moko kud urieny i wiye.

 6 Wek mudho umwony diewor maeca;

dong’ anyong’a kud unege i kind nindo mi oro,

man dong’ kud emond i kind wend dwi.

 7 Eyo, dong’ diewor nica udok jamugumba,

man dong’ kud juwinj ba dwal mir anyong’a i iye.

 8 Dong’ ju ma gilamu nindo gilame,

ju ma gitie ku copo mi cewo Leviathan.*

 9 Wek nyikaluku mi mwony pa ceng’ mir uthieno nica gidok col;

wek ekur der mi rupiny kpe,

man dong’ kud enen lero mi mombwa.

10 Kum eciko ngo dhugola m’i maa;

kadi ekanu ngo peko kud i wang’a.

12 Pirang’o cong ubino nuti pi nijola

man thuno kara adhothi?

13 Kum eni nwang’u avuto ma gin m’ubesenda mbe;

nwang’u anindo man abeyom

14 karacelo ku jubim m’i ng’om man jumii juk migi,

ma gigiero igi kaka ma kawoni udong’ ni uvuru.*

15 Kunoke karacelo ku judongo ma wijo ma gibino ku mola ma kwar,

ma udi migi ugam upong’ ku mola ma tar.

16 Pirang’o abino ngo calu ic m’udubere ma jukanu,

calu mukere ma gineno ngo deri?

17 Kuca, kadok jutimrac de adieng’acwiny migi ujik;

kuca, ju m’uol gibeyom.

18 Kuca, jukol gitie agonya karacelo;

gibewinjo ngo dwand ng’atu moko m’ubediyogi nia gitim tic.

19 Kuca, ju ma thindho ku ju ma dongo ceke gi rom,

man ng’eca tie agonya kud i bang’ rwoth pare.

20 Pirang’o Mungu ubemiyo der ni ng’atu m’ubesendere,

man kwo ni ju ma gin’i can ma keci?*

Gibesayu kakare nisagu lonyo m’upondo,

22 gi ju m’anyong’a ubenegogi lee,

ma mutoro ubenegogi kinde ma ginwang’u liel.

23 Pirang’o ebemiyo der ni ng’atu ma gengi urwinyo ire,

ng’atu ma Mungu utwodo gang’ i kume?

24 Kum gamu ng’et para udoko ira calu cam,

man cur para ubethwogere calu pii.

25 Kum gin m’unyayu ndiri i iya uwok i wiya,

man gin m’abino lworo re m’unwang’a.

26 Abedo ngo ku kwiyocwiny, ku bedomoth kadi ku yom,

ento peko ubemedere ameda ninwang’a.”

 3 Andha, itwinyo dhanu dupa,

man ibed itielo cing’ ma ng’ic.

 4 Wec peri ubed uketho ng’atu m’ubekier cungo,

man ibed itielo ju ma cong’gi ubemiel.

 5 Ento kawoni ewok i wii, e cwinyi ung’abere;*

emulo kumi, e ndiri umeki.

 8 Gin m’aneno utie nia, ju ma gifuro* gin ma rac

man ju ma gicoyo can gibikayu gin ma rom.

 9 Girwinyo nikum yuyo pa Mungu,

man ng’eicwiny pare m’umoc jigo wigi.

10 Umvor rundo, man nyathin umvor twak,

ento kadok lak umvor* ma tek de tur.

11 Umvor tho nikum cam m’umbe,

man nyithindh umvor gilal.

12 Jukelo wec moko ira i amung’,

man wecne ma mung’ mung’ utundo i itha.

13 Ku diewor saa ma nindo ma pek podho i iye iwi dhanu,

anwang’u gin ma wok i wang’ m’usendo paru para.

14 Mielkum ma dit ubino i wiya,

epong’o cogona ceke ku ndiri.

15 Tipo moko ukadhu kud i wang’a;

yuk kuma ucaku dongo.

16 Ecungo ling’,

ento ang’iyo ngo kite.

Ayi moko ubino i wang’a;

piny uling’ ting’, e awinjo dwal moko ubeyero kumae:

18 Nen! egeno ngo jutic pare,

man enwang’u kosa i jumalaika* pare.

19 Dong’ ebinwang’u ngo kosa m’usagu i ju ma gikwo i udi mir ulobo,

ma kathere migi n’i utur,

ma jurungogi yot yot calu ukoko!*

20 Gikwo kugweno, uthieno ke githo magwei;

man ng’atu moko mbe ma dieng’ pi lembene.

 2 Kum akece binego jakasegu,

man kumira binego ng’atu ma yiyo lembe ngbaku.

 3 Aneno jakasegu ubeguro ulage,

ento rek kumeni, julamu kabedo pare.

 4 Wote gini bor ku bedomoth,

man jurungogi i dhugang’ mir adhura, ma ng’atu moko mbe m’ubodhgi.

 5 Ng’atu ma kec ubenego camu gin m’ekayu,

egamugi kadok kud i kind ukudho,

man piny migi umoko i uwic.

 6 Kum piny ma reco twii ngo kud i utur,

man peko wok ungo kud i ng’om.

 7 Kum dhanu nyolere pi peko,

tap calu ma mac m’umoc kilere ko malu.

 8 Ento nwang’u acipido i bang’ Mungu,

man nwang’u atero kesi para i bang’ Mungu,

 9 i bang’ Ng’atu m’utimo gin ma dwong’,

man piny ma junyang’ i kumgi ngo,

piny ma wang’u ijo, ma kwaniri ngo.

10 Eketho koth cwii iwi ng’om

man eoro pii i podho.

11 Eting’o ng’atu ma nok malu,

man eting’o ng’atu m’uvoc malu pi ninwang’u both.

12 Enyotho gamba mi ju ma riek,

uketho cing’gi copo timo ngo gin ma gikeco.

13 Emaku jurieko i uwic mi rieko migi,

uketho juk mi jurieko timo tic ungo.

14 Girombo ku mudho dieceng’,

man githambini ku dieceng’ ma ling’ calu vediewor.

15 Ebodho kud i lak palamularu m’i dhoggi,

ebodho jacan kud i cing’ ng’atu ma tek.

16 Ketho nia genogen bedo nuti ni ng’atu ma nok,

ento dhu jatimrac bedo acika.

17 Nen! jamutoro tie ng’atu ma Mungu juko;

pieno kud ikwer twiny pa Jategokpo!

18 Kum enyayu litho, ento eriwo wang’ rembe;

eturo, ento ekeye ku cinge gire.

19 Ebibodhi kud i can abusiel,

kadok mir abirone de bitimi rac ungo.

20 I saa mi ndru, ebibodhi* kud i tho,

man kud i tego mi palamularu i saa mi lwiny.

21 Ibibedo agwoka i kum goco mi leb,

man ibilworo ngo nyoth kinde m’ebibino.

22 Ibicayu nyoth man kec,

man ibilworo ngo yedi m’i lum mi ng’om.

23 Kum kidi m’i podho bitimi rac ungo,

man yedi m’i lum bibedo ku kwiyocwiny kudi.*

24 Ibing’eyo nia hema peri tie museme,*

man gin moko acel de mbe ma bikoso kinde m’ibeliewo luba peri.

25 Ibibedo kud awiya dupa,

man nyikweyi bipong’ bik ve uboko m’i ng’om.

26 Ibibedo asu ku tego kinde m’ibeloro i liel,

calu kanga mi nying cam ma jucoko i nindo migi.

 2 “Ka nwang’u ndhu jupimo peko para ceke,

man jukethogi karacelo ku can para iwi kilo ba!

 3 Kum kawoni e pek nisagu kwiyo mi dhu nam,

eno re m’uketho aweco swa.*

 4 Kum athero pa Jategokpo ucoba,

man tipona ubemadhu kwir migi;

ndiri m’uai i bang’ Mungu urieyo i kuma.

 5 Nyo kana mi lum biwak kinde ma lum utie ire,

kunoke thwon dhiang’ biwak kinde m’etie ku cami?

 6 Nyo jucopo camu cam ma tang’ m’umbe kadu,

kunoke nyo anyong’a moko nuti de i bilo pii yen ma midone mbe?

 9 Ka nwang’u Mungu copo bedo ayika nirungo iya,

man ka nwang’u ecopo rieyo cinge man edara cen!

10 Kum nwang’u maeno ci de ubejuko cwinya;

nwang’u apor malu kud anyong’a kadok nwang’u an’i litho ma yerere ngo,

kum akwero ngo wec pa Ng’atu ma leng’.

13 Acopo konyara nenedi

ma judaru maya ku yore ceke mi kony e?

14 Ng’atu moko ci m’ukwero ninyutho mer ma lokere ngo ni dhanu wadi,

biweko nilworo Jategokpo.

15 Umego para ma buu gidoko weg abombi calu kulo mi saa pa koyo,

calu pii m’i kulo mi saa pa koyo, ma dwono.

16 Gidoko col nikum lungu pei,

man pei m’ubeloy pondo i igi.

17 Ento i ng’ey kare, pii thum kud i igi man gitundo i ajiki migi;

kinde ma piny udoko lieth, gidwono.

18 Juwiro wi pii m’ubemol i igi;

gimol i langa, man girwinyo.

19 Jukuloka mi Thema giyenyogi;

juruwoth ma giai i Ceba* gikurogi.

20 Lewic negogi pilembe giketho genogen migi iwi gin m’umbe;

gibino nitundo keca, ento ginwang’u gin moko ngo.

21 Kum wudoko ira kumeno;

wuneno ndiri mi can para, e lworo umakuwu.

22 Nyo ayero de nia, ‘wumii ira piny moko,’

kunoke nyo akwayuwu nia wumii ira kum lonyo mwu moko?

23 Nyo akwayu de nia julara kud i cing’ jadegi,

kadi ke nia jubodha* kud i cing’ ju ma gibesenda?

26 Nyo wubecamu gamba pi nijuka pi wec para,

ma en e wec pa ng’atu ma cwinye tur ma yamu leko ceni?

27 Wuromo goyo bende gagi iwi nyathikic,

man wulworo jarimo mwu ma buu.

28 Pieno, kawoni wulokuru man wunen bang’a,

kum acopo wondowu ngo i weng’wu.

29 Akwayuwu, wukeng’ii i lembuni kendo, kud wupok lembe rac i wiya,

eyo, wukeng’ii i lembuni kendo, kum fodi bedopwe para tie kubang’e.

7 “Nyo kwo pa dhanu iwi ng’om tie ngo ve tic ma tek mir adici,

man nyo nindo pare tie ngo ve pa jatic ma juculo acula?

 2 Calu ng’eca, elarere alara i the tipo,

man calu jatic ma juculo acula, ekuro cul pare.

 3 Kumeno bende, jumiyo ira dwi dupa mi gin ma iye nanu,

man jung’olo ira can pi diewor dupa.

 5 Ukoko romo kuma ceke man ng’om ung’inere i kuma;

dend kuma pong’ ku rem man ebecwiro tuc.

 6 Nindo para ubekadhu pio ma sagu athuthe* pa jacwii bongu,

man gibethum ma genogen umbe.

 7 Poy nia kwo para tie yamu,

man nia wang’a bineno ngo mutoro* kendo nyanok de.

 8 Wang’ m’ubenena kawoni binena kendo ngo;

weng’i bisayu kakara, ento abibedo mbe.

 9 Calu afuru ma duny man erwinyo,

ng’atu m’uloro piny i Liel* de dwogo ngo.

10 Ebidwogo ngo kendo i ot pare,

man jubiwil pire kaka m’ebino i iye.

Abiweco nikum litho mir adundena,*

man abiwagara nikum can para ma dit!*

12 Nyo an a nam kadi yedi ma dit mi nam,

ma nia ikur ko wiya akura e?

13 Kinde m’awacu kumae: ‘Kavuto para bijuko cwinya,

man pem para bikwiyo lak can para,’

14 e ilund inyayu ndiri i iya ku lek

man imielo kuma ku gin ma wok i wang’,

15 uketho ang’iyo* nia athung’ cen,

eyo, ang’iyo tho kakare nikwo kumeni.*

17 Dhanu ma tho e tie ang’o, ma nia iketh wii zoo i kume,

man iketh adundeni i kume e?

18 Pirang’o ibeliewe nja kugweno

man ibemulo iye saa ceke?

19 Icopo loko ngo weng’i kud i bang’a,

man iweka kenda nyangbaa m’amwony ko ndhu lau e ci?

21 Pirang’o ibeweko ngo dubo para

man ibetimo ngo ira kisa pi kier para?

Kum ceng’ini eni abivuto piny i utur,

ibisayu kakara, ento abibedo mbe.”

 3 Nyo Mungu binyotho lembe m’atira,

kadi nyo Jategokpo binyotho bedopwe?

 4 Calu ma woti gidubo ire,

eweko ginwang’u matira pi jai migi;*

 5 ento tek ndhu isayu kaka Mungu

man ikwayu Jategokpo unyuth iri bero,

 6 man ka nwang’u andha ibino leng’ man atira,

nwang’u eai malu piri,

man edwoki kakeri ma tap.

 7 Man kadok nwang’u ku kwong’a kabang’ lem peri ubino mbe,

ento nwang’u i nindo m’ubino, ibedo ng’atu ma dit.

 8 Akweyi, kepenj dhanu m’utuk m’ukadhu,

man winj cuu lembe ma wego migi ginwang’u.

 9 Kum junyolowa ndhu nyaworo eni, man gin ma wang’eyo mbe,

pilembe nindo mwa iwi ng’om utie tipopiny.

10 Nyo gibiponji ngo,

man gibinyutho ngo iri gin ma ging’eyo?*

11 Nyo kolo copo dongo ma bor kaka ma jugu mbe i iye,

man nyo agada copo dongo ma bor m’umbe pii?

12 Kinde m’ebenyunyo anyunya ma fodi juthume ngo,

ebilar thwo ni lum moko ci.

13 Eno tie ajiki* mi dhanu ceke ma wigi uwil pi Mungu,

kum genogen pa ng’atu ma woro ngo Mungu* birwinyo.

14 Egeno gin m’umbe

man genogen parene ng’aw calu thondh* avaceng’.

15 Ebijeng’ i kum ot pare, ento ode bicungo ngo;

ebipimo nimake kii, ento ebigalu ngo.

16 E calu uboko ma numu i wang’ ceng’,

man jange lal i podho.

17 Ulage kadere i kind kidi m’udhurere,

eyenyo ot i kind kidi.*

18 Ento ka jufudhe* ku kakare,

kaka maeno bikwere man biwacu kumae: ‘Fodi aneni de ngo.’

19 Eyo, kumeno re m’ebirwinyo;*

i ng’eye, mange bidok twii kud i utur.

20 Andhandha, Mungu bikuno ngo ju ma gibegwoko bedocu* migi;

kadi ebicwaku ngo* dhanu ma reco.

21 Kum asu ebipong’o dhogi ku ng’iero,

man dend dhogi ku kok mir anyong’a.

22 Lewic bipong’ iwi ju m’udegi,

man hema mi jutimrac bibedo mbe.”

 3 Tek ng’atu moko ubemito piemere kude,*

ng’atuno bidwoko ngo wang’ penji pare acel de iwi penji elufu.

 5 Ecoro* got ma ng’atu ma ng’eyo mbe,

eloko thegi ka ng’eicwiny umake.

 6 Eyengo ng’om ai cen ku kakare,

e mbegine miel.

 7 Eng’olo ni ceng’ nia kud erieny,

man eciko ba der mi nyikaluku cen;

 8 emoyo polo en kende

man ewotho iwi mujanga mi nam m’udodere malu.

 9 Ecwiyo yung’ini mi Ac,* mi Kesil,* man mi Kima,*

man yung’ini mi polo ma yo piny.*

10 Etimo lembe ma dongo man ma nyang’ i igi tek,

lembe ma wang’u ijo man ma kwanere ngo.

11 Ekadhu kud i vuta, ento acopo nene ngo;

ekadhu kud i wang’a, ento ang’iye ngo.

13 Mungu bicero ngo ng’eicwiny pare,

kadok jukony pa Rahab* de gibirum piny ire.

14 Ka dong’ kinde m’abedwoko ire lembe ke,

nyo ukwayu ngo ang’ii cuu wec para m’apiemara ko kude?

17 Kum eberunga ku yamu ma tek,

man enyayu rem para mananu.

18 Ebeweko ngo ayuy ayuya de;

ebething’a ku piny ma kec thiri thiri.

19 Tek etie lembe mi tego, en re m’e tek;

tek etie lembe mi bedopwe, ewacu kumae: ‘Ng’a ma copo tera i wang’ pido?’

20 Kadok nwang’u lembe para en e mandha,* nwang’u dhoga gira ubepoko lembe rac i wiya;

kadok abegwoko bedocu* para de, ebiwacu nia a jakosa.*

21 Kadok abegwoko bedocu* para de, ang’eyo ngo lembe ma binwang’a;*

akuno* kwo para.

22 Ceke rom. Eno re m’uketho awacu nia,

‘enyotho ng’atu ma lembe mbe i wiye* man ng’atu ma rac bende.’

23 Tek pii m’upong’ mbwang’ unego dhanu rek,

ebing’iero ng’atu ma lembe mbe i wiye ma dong’ umbe ku genogen.

24 Jumiyo ng’om i cing’ jutimrac;

eumo wang’ jupoklembe m’i iye.

25 Kawoni nindo para uberingo pio nisagu jaring ng’wec;

giberingo m’umbe nineno gin ma ber.

26 Gibemol calu yei mir agada,

calu acur ma giberingo pio iwi cam migi.

27 Tek awacu kumae: ‘Wiya biwil i kum wak m’abewagara ko,

abikabu can kud i wang’a man anyong’a binega.’

28 Lworo binega asu pi litho para ceke

man ang’eyo ibinwang’u nia lembe n’i wiya.

30 Tek ajomo pii pei m’uloy

man alwoko cinga ku sabuni,*

31 e ibilund roya vuc i vur,

ma dong’ bongu para gira de bidaga.

32 Kum etie ngo dhanu ve an ma nia alok ire lembe,

kara wacidh wapid kude karacelo.

33 Ng’atu moko mbe ma romo poko kindwa,*

ma romo bedo japoklembe mwa.*

34 Tek ejigo nifwoda

man eweko ninyayu ndiri i iya ku lworo pare,

35 e abiweco i bang’e m’umbe lworo,

kum en e kura para ngo niweco ku lworo.

 2 Abiwacu ni Mungu kumae: ‘Kud iyer nia a jakosa;

nyuth ira nia pirang’o ibenyego i dhoga.

 3 Nyo berone nuti iri de nisendo

man nicayu tic m’i cingi,

m’ilund icwaku ko juk mi jutimrac e?

 4 Nyo itie ku wang’ mi ring’kum,

kunoke nyo ineno calu ma dhanu ma tho e neno ko?

 5 Nyo nindo peri gi calu nindo mi dhanu ma githo e,

kunoke nyo oro peri gi calu oro pa dhanu,

 6 ma nia isay ko kosa para,

man imediri ko niyenyo dubo para?

 7 Ing’eyo nia kosa mbe i wiya,

man ng’atu moko mbe ma copo bodha kud i cingi.

 8 Cingi giri re m’ubinya man ucwiya,

ento kawoni idhingo nyotha magwei.

 9 Akweyi, poy nia icwiya kud ulobo,

ento kawoni ibeketho adok i utur.

10 Nyo ikonja ngo calu cak

man ing’ina calu lungu cak m’utali?

11 Ironya ku dendkum man ring’kum,

man idika ku cogo man ler karacelo.

12 Imiyo ira kwo man mer ma lokere ngo;

ikuro kum tipona* nikadhu kud i gwok m’igwoka ko.

14 Ka nwang’u adubo, nwang’u inena,

man nwang’u iweko ngo ira kosa para.

Man kadok nwang’u lembe mbe i wiya, acopo ting’o ngo wiya malu,

kum apong’ ku lewic man can.

16 Tek ating’o wiya malu, idwara ve ibedwaru umvor,

man inyutho tego peri i kuma kendo.

17 Ikelo jumulembe ma nyen i kuma

man imedo ng’eicwiny peri i kuma,

ma ke nwang’u peko ubelwobere alwoba i wiya.

19 Nwang’u ecibedo ve nia abedo mbe;

nwang’u niai kud i ic, acidho para wang’ acel i liel.’

20 Nyo nindo para gi nok ungo? Dong’ Mungu uwek abed gira;

dong’ elok wang’e cen kud i bang’a, kara akenwang’ yom moko nyanok,*

21 i wang’ m’acidh i ng’om mi mudho ma bii,*

m’abidwogo ngo kud i iye,

22 i ng’om mi binga m’ucido bii,

ng’om mi tipopiny ma col ma lembe unyamere swa i iye,

kaka ma der de ubedo i iye ve mudho.”

 2 “Nyo wec maeni ceke jubidwoko ngo wang’gi,

kunoke nyo wec ma dupa copo nyutho nia lembe pa ng’atini en e andha?*

 4 Kum ibewacu kumae: ‘Ponji para leng’,

man ambe ku cilo i weng’i.’

 5 Ento ka nwang’u ndhu Mungu copo weco

man eyero iri lembe!

 6 E nwang’u ecituco iri lembamung’a mi rieko,

pilembe rieko mandha kwonde dupa.

 7 Nyo icopo ng’eyo lembe ma thuc pa Mungu,

kunoke nyo icopo nyang’ i lembe ceke iwi* Jategokpo?

 9 E bor nisagu ng’om,

man e lac ma sagu nam.

10 Tek ekadhu, etwiyo ng’atu moko i kol man elwong’o pido,

ng’a ma copo cerere ire?

12 Ento ng’atu ma wiye mbe binyang’

ndhu cing’ ma kana mi lum bibedo ku copo mi nyolo dhanu.*

13 Ka nwang’u ndhu iyiko adundeni

man ithang’u cingi i bang’e ba!

14 Tek cingi ubetimo lembe ma rac, kab lembene cen,

man kud iwek gondiri ukwo i hema peri.

15 E ibilund ting’o wii malu m’umbe lewic,

ibicungo ma tek m’umbe lworo.

16 E wii biwil i kum peko peri;

ibipoy pire kendo ngo calu m’icopo poy ungo pi pii m’udaru mol.

17 Kwo peri birieny ma tar ma sagu dieceng’;

kadok mudhone de bibedo calu kugweno.

18 Cwinyi bibedo tek pilembe nwang’u genogen unuti,

ibineno ng’eti kun ku kun man ibivuto museme.

19 Ibivuto ma ng’atu moko mbe m’ubenyayu lworo i ii,

man dhanu dupa gibiyenyo ginwang’ bero i weng’i.

20 Ento wang’ jutimrac bicor,

man gibinwang’u ngo karingo;

Genogen migi bibedo ndhu tho kende.”

 2 “Andhandha wun wu dhanu ma wung’eyo lembe,*

man rieko bitho karacelo kudwu!

 3 Ento an de anyang’ i lembe,*

a nok ungo ma saguwu.

 4 Adoko ni jamng’iero ni jurimba,

ng’atu m’ubekwayu Mungu udwok ire lembe.

 5 Ng’atu m’umbe kud adieng’a cayu can,

m’eparu ko nia etie mi ju ma tiendgi cungo ngo nging’ nging’.*

 6 Hema mi jukwo n’i kwiyocwiny,

man ju m’ubenyayu ng’eicwiny i Mungu gibedo museme,

gi dhanu ma gitie ku mungu migi i cing’gi.

 7 Ento akweyi, penj lei, man gibiponji;

penj bende winyo mi kor polo, man gibikoro iri lembe.

 8 Kunoke nen cuu piny ma n’i wi ng’om, e gibiponji;

man rec m’i nam gibinyutho iri lembene.

 9 Kud i kind giracwiya maeni ceke, ma kani m’ung’eyo ngo

nia cing’ Yehova re m’utimo gin maeni?

10 Kwo mi gin ceke* ma kwo n’i cinge,

man bende tipo* mi dhanu ceke.*

11 Nyo ith bilo ngo wec

calu ma leb* bilo ko mido cami?

12 Nyo rieko nwang’ere ngo i bang’ ju m’utii,

man nyo nyang’ i lembe ai ungo i bang’ ju ma gidaru kwo lee?

13 Rieko ku tego n’i bang’e;

etie ku juk man nyang’ i lembe.

14 Kan eturo gin moko, ecopo dogierere ngo kendo;

gin m’etwiyo dhoge, dhanu copo yabu ngo.

15 Kan etwiyo dhu pii, piny ceke thwo;

kan ewekogi, gipong’o ng’om.

Ng’atu m’ukier en e pare, man ng’atu m’ukiero jumange de e pare;

17 Eketho jumii juk gicidho ma tiendgi nanu,*

man ebolo abelu iwi jupoklembe.

18 Egonyo twic ma jubim giketho iwi dhanu;

man etwiyo mukaba i piergi.

19 Eketho julam giwotho ma tiendgi nanu,

man eng’ielo judongo ma gicungo ma tek.

20 Ecero wec kud i dhu jumii juk ma jugeno,

man emayu ju m’utii* cen ku ng’iyo i lembe.

21 Ekonjo cac iwi weg yung,

man ekwiyo* tego mi ju ma tek.

22 Enyutho lembe ma thuc ma n’i mudho,

man eloko mudho ma bii doko ni der.

23 Eketho thek doko tek kara enyothgi cen,

enyayu thek, kara etergi i ng’eca.

24 Emayu nyang’ i lembe* mi jutelwic mi dhanu,

man eketho giwotho swa i langa ma gengi mbe i iye.

25 Gimulo piny swa i mudho kaka ma der umbe i iye;

eketho giwotho thamba thamba calu dhanu m’umer.

13 “Eyo, wang’a uneno gin maeni ceke,

itha uwinje man anyang’ i iye.

 2 Gin ma wung’eyo, an de ang’eyo;

a nok ungo ma saguwu.

 3 Pira an, aromo mito awec ku Jategokpo,

abemito ater kesi para i wang’ Mungu.

 4 Ento wun, wubeng’ienda i vupo;

wun ceke wu bamunganga ma tijwu mbe.

 5 Ka nwang’u ndhu wubedo ling’,

nwang’u timba eno ubecinyutho nia wu riek.

 6 Akwayuwu, wukewinj lembe m’abekoro,

man wucik ithwu wuwinj kite m’abecero ko bang’a.

 7 Nyo wubiyero lembe m’atira ngo i kum Mungu,

man wubicwayu ndra ku nyinge?

 8 Nyo wubibedo i thenge pare,

nyo wubipimo nipido kaka Mungu mandha?

10 Andhandha ebijukowu

tek wubeyenyo ninyutho akoyakoya nyamung’ mung’.

11 Nyo dwong’ pare binyayu ngo ndiri i iwu,

man lworo pare bipodho ngo i wiwu?

12 Wec mwu mi bodho* gi lembabola mi vuru;

wec mwu ma wucero ko beng’wu* tijgi mbe calu ban ma juyiko kud ulobo.

14 Pirang’o abekethara gira i ariti*

man abemaku kwo* para i cinga?

15 Kadok nwang’u enega anega de, nwang’u akuro para asu;

nwang’u acero bang’a* i wang’e.

16 E nwang’u edoko both para,

kum ng’atu moko mbe ma lworo ngo Mungu,* ma copo mondo i wang’e.

17 Wuwinj wec para cuu;

wucik ithwu i kum lembe m’abeyero.

18 Kawoni wunen, ayiko lemkesi para.

Ang’eyo nia lembe para tie m’atira.

20 E Mungu, tim ira ndhu lembe ario* kende,

kara kud apond kud i weng’i:

21 Cor cingi ma pek cen kud i kuma,

man kud iwek lworo peri ung’oy ndiri i iya.

22 Kunoke lwong’a, man abidwoko iri lembe,

kadi ke wek aweci, e in ilund idwok ira.

24 Pirang’o ibekanu weng’i ira

man ibenena ni jadegi peri?

25 Nyo ibipimo ninyayu ndiri i ith yen ma yamu ubeleko,

kunoke nyo ibiriemo tok soka m’uthwo?

26 Kum ibemediri nikiewo adote ma pek m’ibedota ko,

man ibemiyo ira matira pi dubo m’atimo i aradu para.

27 Iroyo tienda i kongo,

ibelubo yo para ceke,

man ibelibo kakare ceke ma tienda unyono.

28 Pieno dhanu* nyothere calu piny m’utop,

calu bongu ma rudho ucamu.

14 “Ng’atu ma nico ma dhaku unyolo,

kwo pare adundo man epong’ ku can.*

 3 Eyo, iciko weng’i i kume,

man ikele kara jupok lembe i wiye.*

 5 Tek judaru ng’olo nindo pare,

wend dwi pare n’i beng’i;

iketho ire kieu m’ecopo kadhu ngo.

 6 Lok weng’i cen kud i kume kara eyom,

cil m’edar ko nindo pare calu jatic ma juculo acula.

Tek jung’onde, ebiloth kendo,

man nyithi jange ma thindho bimedere nidongo.

 8 Tek ulage utii i ng’om

man cudhone uthwo

 9 ng’wic pii kende ci biketho ebiloth,

man ebiwodho jange calu yen ma jupidho ma nyen.

10 Ento dhanu tho, man evuto gblaa, m’umbe tego;

tek ng’atini tho, eni kani?

11 Pii mi nam rwinyo,

man kulo dwono man ethwo.

Tek fodi polo nuti ci, ebiai ungo,

kadi ebicew de ngo kud i wang’ nindo pare.

I nindo ceke mi tic para ma tek mir adici, abikuro

nitundo ma gony para bibino ko.

16 Ento pi kawoni, ibemediri nikwanu dagutielo para acel acel;

ibeneno peri kwa dubo para.

17 Jumwono dhu kier para i usau,

man imwono dhu racu para kud udok.

18 Calu ma got podho man iye rungere,

man cana coro ku kaka m’ebino i iye;

19 calu ma pii nang’u kidi

man pige m’upong’ molo mor ng’om cen,

e in de inyotho genogen pa dhanu kumeno.

20 Idiye asu cil m’etho ko,

iranju ayine man irieme cen.

21 Juyungo wote, ento eng’eyo lembene ngo;

jujwigo yung migi, ento enyang’ de ngo.

22 Ewinjo litho ndhu kinde ma fodi etie ku ring’kum;

ewak* ndhu kinde ma fodi etie kwo.”

 2 “Nyo ng’atu ma riek bidwoko lembe ku wec ma iye nanu,*

kunoke nyo ebipong’o iye ku yamu ma yo nyangu?

 3 Nijuko dhanu ku lembayera tije mbe,

man niweco aweca kende de konyne mbe.

 4 Kum ikabu lworo ma julworo ko Mungu cen,

man icero jumange kud gipar pi Mungu.

 5 Kum kosa peri re m’ubecwayu weng’i niweco,*

man ibeng’iyo wec mir awondi.

 7 Nyo in re m’ibino ng’atu ma kwong’a ma jular junyolo,

kunoke nyo in re ma jular junyoli i wang’ ungulu gudi?*

 8 Nyo ibewinjo wec mir amung’ pa Mungu,

kunoke nyo in kendi re m’itie ku rieko?

10 Wic ma ju lwar ku dhanu m’utii ceke n’i kindwa,

dhanu ma oro migi sagu pa wuru.

11 Nyo juk pa Mungu uromo weng’i ngo,

kadi wec ma juweco ku yoo iri de uromi ngo?

12 Pirang’o adundeni uteri bor,

man pirang’o ng’eicwiny ubogo weng’i?

13 Kum ng’eicwiny umeki* i kum Mungu ku kume

man iweko wec ma kumeno uwok kud i dhogi.

14 Dhanu ma tho e en e ang’o ma nia ebed leng’,

kadi ng’atu moko ci ma dhaku unyolo ma nia ebed pwe?

15 Nen! egeno ngo ju ma leng’ pare,

man kadok polo de leng’ ungo i wang’e.

16 Ka dong’ ng’atu ma judagu man m’unyothere,

ng’atu ma madhu racu ve pii e copo bedo nenedi i wang’e!

Abikoro iri gin m’aneno,

18 gin ma jurieko gikanu ngo, ento gikoro;

lembe ma weggi ukoro igi.

19 Jumiyo ng’om igi gin kendgi,

man jawirok moko mbe m’ukadhu i kindgi.

20 Jatimrac neno can i nindo mi kwo pare ceke,

i kind oro ceke ma juketho ni jasend.

21 Ithe winjo dwal ma ng’oyo ndiri;

i nindo mi kwiyocwiny, weg ayeki gicoro i wiye.

22 Egeno ngo nia ebiboth kud i mudho,

tho ma ku palamularu ubekure.

24 Masendi kud ang’abacwiny nyayu ndiri i iye;

gidiye calu ubimo ma tie ayika nitugo lwiny.

25 Kum erieyo cinge malu pi nikethere i dhu Mungu,

man ebeng’ap nipiemere* ku Jategokpo;

26 Ecorere i kume ku tegowic,

ku ban* pare ma dhoge thuthuru man ma tek.

27 Miyo uumo wang’e,

man miyo ucokere bik i piere;

28 ekwo i adhura ma jubirwombo cen,

i udi ma ng’atu moko mbe ma bibedo i igi,

ma bidoko ni kidi ma judhuro.

29 Ebilony ungo man lim pare bimedere ngo,

kadi jamcinge de bilal ungo i wang’ ng’om.

30 Ebiboth ungo kud i mudho;

lebmac bithwoyo nyathi jange* cen,

man yuyo mi dhu Mungu* biketho ebirwinyo.

31 Kud ewondere man kud egen gin ma tije mbe,

kum adwogi m’ebinwang’u konyne bibedo mbe;

32 lembene bitimere ire kago eni,

man jange bilepini tak de ngo.

33 Ebibedo calu yend ulok ma oyo nyinge ma numu,

man calu yend oliv ma oyo thiwene.

34 Kum cokiri mi ju ma lworo Mungu ngo* bimedere ngo,

man mac biwang’u hema mi weg kanyaka.*

35 Gigamu ic mi masendi, man ginyolo lembe ma rac,

man usau nyodo migi nyolo ndra.”

Ka nwang’u lembe m’ubetima e utimo wun,*

nwang’u aweco lembe dupa i kumwu,

man abeyengo wiya i kumwu.

 5 Re kakare nitimo kumeno, nwang’u an alund miyo tego i kumwu ku wec m’i dhoga,

man nwang’u juk mi dend dhoga ubekwiyo wi litho mwu.

 6 Kan abeweco de litho para ubekwiyo ngo,

dong’ kan ajigo niweco, nyo litho parane bikwiyo andha?

 7 Ento kawoni, Mungu udaru tego para,

man enyotho juruot para* ceke.

 8 Imaka bende kii, man makne udoko ni jamulembe,

uketho mok m’amok ko uai malu man ubetuco lembe i kuma.

10 Dhanu giyabu dhoggi ma lac i kuma,

man gipadu thenga ku cac;

gicokiri dupa i wiya.

11 Mungu ubemiya i cing’ nyithindh awobi,

man ebebola i cing’ jutimrac.

12 Eng’enyo iya ma an ke nwang’u abedo para gira;

eng’wenyo the toka man erunga;

i ng’eye ke ekila ku nying athero pare.

13 Jukil athero pare gitieka tingili;

ecobo i rong’ini para m’umbe kisa;

eoyo kela para i ng’om.

14 Ebetong’o lero i kuma wi wadi wi wadi,

ebering’ini i wiya calu jaramony.

15 Athubo kendi mi saki pi niumo kuma,

man akunyo yung* para i utur.

16 Wak ubogo wang’a ceke,

man tipopiny ma pek* uumo bind wang’a,

17 ma ke cinga utimo ngo rop moko,

man rwo para de tie leng’.

19 Kadok kawoni de jamulembe para n’i polo;

ng’atu ma romo tuco lembe pira n’i malu lir.

20 Jurimba gibenywara,

ma an ke piwang’a ubecwir* i bang’ Mungu.

21 Wek ng’atu moko ubed jakind dhanu ku Mungu,

calu ma jubedo ko jakind ng’atini ku wadi.

22 Kum oro m’abikwo i iye udong’ nyanok,

e abicidho cen i yo ma judwogo ngo kud i iye.

17 “Tipona rungere, nindo para thum;

liel ubekura.

 2 Jucac gitieka,

man ubekwayu wang’a unen* timo migi mi jai.

 4 Kum ikanu ng’iyo i lembe cen ni adundegi;

eno re m’uketho ibedodogi ngo.

 5 Eromo penjo jurimbe nia emii piny pare moko igi,

ma ke nwang’u kec ucido wang’ awiya pare.

 6 Edwoka ni jamcac* i kind dhanu,

uketho adoko ng’atu m’umaku jung’iedh law i wang’e.

 7 Can udwoko wang’a nyaviavia,

man wathkuma ceke tie mudho.

 8 Lembene wang’u i dhanu m’atira lii,

man ng’eicwiny nego ng’atu ma lembe mbe i wiye i kum ng’atu ma woro ngo Mungu.*

 9 Won bedopwe moko kii i kum tic pare,

man ng’atu ma cinge leng’ doko tek m’usagu.

10 Ento wun ceke wubin man wucak wec mwu kendo,

kum anwang’u ngo ng’atu ma riek acel de i kindwu.

11 Nindo para thum;

lembe m’apangu man yeny mir adundena de ginyothiri.

12 Gibejigo ngo niloko diewor udok dieceng’,

ma gibewacu kumae: ‘Der ucikere nibedo ceng’ini pilembe piny ucido.’

13 Tek akuro asu, Liel* re ma bidoko ni ot para;

abipedho kavuto para i mudho.

16 Ebiloro* piny i dhugola mi Liel*

kinde ma wan ceke wabiloro karacelo i utur.”

 3 Pirang’o wubenenowa ve lei

man wubekwanuwa ni jukusegu?*

 4 Kadok nwang’u ng’eicwiny peri uketho ing’weko ii* nziki nziki,

nyo jubiwenjo ng’om piri,

kunoke nyo cana biai ku kakare?

 5 Eyo, der pa jatimrac bitho,

man lebmac pare bicaru piny ungo.

 6 Der ma n’i hema pare bicido bii andha,

man thala ma n’i wiye bitho.

 7 Kind tiende m’ebedagu ku tego ujwik,

man juk pare gire bibole.

 8 Kum tiende bitere i voi,

man ebiwotho swa i wang’ voine.

 9 Uwic bimaku tok tiende;

uwic ma kucelo bimake.

10 Jukanu ire thol i ng’om,

man juciko uwic i yo pare.

11 Ndiri unyayu lworo i iye kun ku kun

man eberieme m’ebenyono kaka m’enyono.

12 Tego ubethum kud i kume,

man peko pare biketho ebikomo akoma.

13 Tho ucamu dend kume;

twoyo ma negojo ku rac* umwodo wathkume.

14 Jutuge kud i hema pare ma nwang’u ebedo i iye museme

man jutere i bang’ tho ma rac dit.*

15 Juwirok* bikwo i hema pare;

jubidhenyo mac* iwi ot pare.

16 Ulage bithwo i there,

man jange biner i wiye.

17 Jubipoy pire ngo iwi ng’om,

man nyinge bing’eyere ngo i gengi.

18 Jubicwale kud i der ebicidho i mudho

man jubirieme cen kud i ng’om ma cego cam.

19 Ebibedo mbe kud awiya* man nyikwayu i kind jupagi,

man ng’atu moko mbe ma biboth kaka m’ebekwo i iye.*

20 Kinde ma nindo mi nyoth pare bitundo, i dhanu ma yo Reto biwang’ lii

man ndiri bimaku dhanu ma yo Nyangu.

21 Eno tie lembe ma wok i kum hema pa jatimrac

man i kum kabedo pa ng’atu m’ung’eyo ngo Mungu.”

 2 “Wubinyayu ng’eicwiny i ng’eyong’ec para,*

man wubirunga ku wec mwu nitundo awene?

 3 Wudaru juka* udoko wang’ apar;

lewic unegowu de ngo nitima rac.

 4 Meni kadok nwang’u andha akier,

de kosane n’i wiya.

 5 Tek wubemeduru nidoduru i wiya,

ma wubeloko ko nia peko m’ubenwang’a e unwang’a dre,

 6 e wung’ey nia Mungu re m’utimo ira lembe atira ngo,

man emaka i voi pare mi dwar.

 7 Wukenen! abewotho kok nia, “rop!” ento jubegamu dhoga ngo;

abekwayu kony kpe, re lembe m’atira mbe.

 8 Etwiyo gengi para ku gang’kidi, man acopo kadhu ngo;

eketho mudho ucido yo para.

 9 Eyaku dwong’ para

man ewodho jamker mi wic cen kud i wiya.

10 Erwomba piny kun ku kun nitundo m’arwinyo;

genogen para de efudho calu yen.

11 Ng’eicwiny pare ubogere i kuma,

man ebenena ni jadegine.

12 Udul askari pare gitundo karacelo man gitieka,

gigonjo i ng’et hema para tingili.

13 Eriemo umego para ma buu bor kuda,

man ju m’ung’eya giloko ng’eygi ira.

14 Jurimba ma ceng’ini* gicidho cen,

man dhanu m’ang’eyo cuu giwil kuda.

15 Welo mi ot para man jutic ma nyir mi ot para ginena ni umondo;

atie jawirok i wang’gi.

16 Alwong’o jatic para, ento edwoko ira lembe ngo;

apaku dhoga ire nia timba kisa unege i kuma.

17 Yuyo para doko tik ni dhaku para,

man ng’wica doko rac ni umego para ma buu.*

18 Kadok awiya ma thindho de gicaya;

kan aai malu, gicaku nywara.

19 Jurimba ma ceng’ini ceke gidaga,

man dhanu ma nwang’u amaru gilokiri i kuma.

20 Cogona umoko i kum dend kuma man i kum ring’ kuma,

man aboth ndhu ku dend laka.

21 Kisa negwu i kuma, jurimba, kisa negwu i kuma,

kum cing’ Mungu buu umulo kuma.

22 Pirang’o wubemeduru ninyayu ragedo i kuma calu ma Mungu ubenyayu,

pirang’o wubejigo ngo nisenda?*

23 Ka nwang’u ndhu jukiewo wec para akiewa ba,

ka nwang’u ndhu jukiewogi i buku ba!

24 Ah! ka nwang’u jung’ikogi pi nja i kor cana

ku kalamu mi cuma man ku cuma ma pek!

25 Kum ang’eyo ma ber nia jawarna tie kwo;

ebibino i ng’eye man ebicungo malu iwi ng’om.*

26 I ng’ey ma dend kuma udaru nyothere kumeno,

ma re nwang’u fodi asu ring’ kuma nuti, abineno Mungu,

27 abinene an gira,

wang’a gira binene, wang’ ng’atu mange ngo.

29 Wulwor palamularu,

kum palamularu kelo matira iwi racu;

ukwayu wung’ey nia japoklembe nuti.”

 2 “Eno re m’uketho wiya m’ujebere ubecwala nidwoko lembe

nikum lembe m’ubethukini i iya.

 3 Awinjo juk ma jubenywara ko;

man rieko para* ubediya nia adwok wang’ lembe.

 4 M’umbe jiji, ing’eyo lembe maeni niai con,

kum niai ma juketho dhanu* iwi ng’om, ebino kumeni,

 5 nia kok mi mutoro pa jatimrac galu ngo

man anyong’a pa ng’atu ma woro Mungu ngo* bedo pi saa ma nok.

 6 Kadok nwang’u e dit nitundo i polo

man wiye ubemulo kum afuru de,

 7 ebirwinyo pi nja calu cethe gire;

dhanu m’ubed unene gibiwacu kumae: ‘Eni kani?’

 8 Ebiduny calu lek, e jubinwang’e ngo;

jubirieme cen calu gin ma wok i wang’ mi diewor.

 9 Wang’ m’ular unene binene kendo ngo,

man kakare binene kendo ngo.

10 Awiya pare bisayu ginwang’ bero i wang’ jucan,

man cinge gire bidwoko lonyo pare.

11 Cogone ugam upong’ ku tego mir aradu,

ento ebivuto* piny karacelo kude i utur.

12 Tek gin ma rac udoko mit i dhoge,

tek ekane i the lebe,

13 tek ebenyang’e man ebeng’ule ngo,

ento egwoke kii i dhoge,

14 cam pare bidoko wac i cindi iye;

ebidoko calu kwir* p’urobi i iye.

15 Emwonyo lonyo, ento ebing’oge;

Mungu bigole kud i iye.

16 Ebidhodho kwir p’urobi;

lak* ui binege.

17 Ebineno ngo nyanok de kulo mi pii,

miyokic man cak* m’ubemol ve kulo.

18 Ebidwoko piny pare m’umbe nicamugi;

lonyo m’enwang’u ku kuloka pare bimiyo ngo ire bero.

19 Kum erungo i jacan man ewenje;

ecerere iwi ot m’egiero en ungo.

20 Ento ebinwang’u ngo kwiyocwiny yor i iye;

lonyo pare bibodhe ngo.

21 Gin moko mbe m’udong’ m’ecopo ramu;

eno re m’uketho piny pare bigalu ngo.

22 Kinde ma lonyo pare udoko lee, cwinye bicaku dieng’;

can bipodho gbuk i wiye ku tego pare zoo.

23 Kinde m’ebepong’o iye,

Mungu bioro* kwinyo pare ma lake tek i wiye;

ebiketho kwinyone bicwii i wiye nitundo i cindi iye.

24 Saa m’eberingo jamlwiny mi cuma,

nying athero m’uai kud i atumb athero mi mola bituco iye plu.

25 Ebefudho nying athero m’umondo i ng’eye,

nying athero m’uberiang’ini m’umondo i kela pare,

e ndiri umake.

26 Mudho ma bii ubekuro lonyo pare;

mac ma ng’atu moko mbe m’ukudho biwang’e ruk;

can ubekuro ng’atu moko ci mi hema pare m’uboth.

27 Polo bituco wi racu pare;

ng’om biai i kume.

28 Pii m’upong’ bimolo ot pare cen;

ebibedo kulo m’upong’ ma dit i nindo mi ng’eicwiny pa Mungu.*

29 Eno tie gin ma Mungu miyo ni jatimrac,

man giralaga ma Mungu kanu ire.”

 2 “Wukewinj cuu lembe m’abeyero;

man ebed ni jukocwiny ma wubemiyo ira.

 3 Wukecira kinde m’abeweco;

kan adaru weco, e i ng’eye wucopo ng’iera.

 5 Wunena man wuzungi;

wuketh cingwu iwi dhogwu.

 6 Kan aparu pi lembene, wiya jebere,

man kuma zoo miel krr.

 7 Pirang’o jutimrac gibekwo,

gibetii, man gibelonyi?*

 8 Saa ceke gitie kud awiya migi i vutgi,

man gineno nyikwaygi.

 9 Udi migi tie museme, lworo de negogi ngo,

re Mungu ubemiyo ngo igi matira kud uluth pare.

10 Thwoni dhieng’ migi poro tap;

megi dhieng’ migi nyol man givogo de ngo.

11 Wotgi ringo woko calu udul lim,

man awiya migi tuko kud anyong’a.

12 Giwer ku nyathi vul man adungu,

man badwal mir usegu nyayu anyong’a i igi.

13 Anyong’a negogi i nindo migi ceke

man giloro piny i Liel* ku kwiyocwiny.*

18 Nyo gidoko de calu lum i wang’ yamu

man calu cung’ piny ma wavuvu ting’o ceni?

20 Maku enen nyoth pare ku wang’e gire,

man maku en re m’emadh kwinyo pa Jategokpo.

21 Kum nyo ebidieng’ andha i kum lembe ma bitimo ot pare yor i ng’eye

tek jujwigo* wend dwi pare?

22 Nyo ng’atu moko copo ponjo Mungu ku ng’eyong’ec,*

ma ke en re m’epoko lembe kadok iwi ju ma ni malu hai?

23 Ng’atini tho ku kero pare zoo

ma nwang’u ebedo pare gire man cwinye kwiyo,

24 ma nwang’u bambe pong’ ku miyo

man cogone tek.*

25 Ento ng’atu mange lundo tho ku can ma lee,*

ma nwang’u ebilo ngo nyanok de piny ma beco.

26 Gibivuto karacelo i utur,

man ukoko bing’ino i kumgi gin ceke.

27 Nen! ang’eyo cuu gin ma wubeparu

man lembe ma wubepangu pi nitima rac.*

28 Kum wubewacu kumae: ‘Ot pa ng’atu ma pire yik ni kani,

man hema ma jutimrac gibed gikwo i iye ni kani?’

Nyo wubeponjo ngo kilili lembe ma giyero,*

30 nia jatimrac ubedo agwoka i nindo mi peko

man eboth i nindo mi ng’eicwinyi?

31 Ng’a ma bijuke ngbeng’ pi yo pare,

man ng’a ma biculo ire pi gin m’etimo?

32 Kinde ma jubitere i liel,

jakur bikuro kabuli pare.

33 Lungu ng’om mi poga* bibedo mit ire,

man dhanu ceke bilubo toke*

tap calu dhanu ma wendgi kwanere ngo m’ular ucidho i wang’e.

 4 Nyo ebimiyo iri matira

man ebiyabu kesi i kindwu wukude pilembe ibewore?

 5 Nyo etie ngo pilembe racu peri giri re ma lee akeca

man ajiki mi racu peri mbe?

 6 Kum iceriri iwi mukwatu* mir umego peri ma thelembene de mbe,

man iwodho bongu kud i kum dhanu, iwekogi muneru.*

 7 Kum imiyo ngo pii m’amadha ni ng’atu m’uol,

man itwono ng’atu ma kec ubenego ku cam.

 8 Ng’om utie pa won tego,

man ng’atu ma juworo re ma bedo i iye.

 9 Ento iriemo montho udok ma cing’gi nanu,

man ituro bot nyithikic.*

10 Eno re m’uketho uwic* utieki tingili,

man ndiri ma rek unyayu lworo i ii;

11 Pieno re ma piny ucido bii ma gin m’icopo neno de mbe,

man pii m’upong’ ubemwonyi.

14 Afuru ugeng’o bang’e uketho eneno piny ungo

kinde m’ebewotho iwi twodiri mi polo.’

15 Nyo ibilubo batielo ma con

ma jutimrac gigam giwotho kud i iye,

16 gi dhanu ma tho ular uyakugi rek ma fodi gin aradu,

man ma pii m’upong’ umolo kathere migi ceni?

19 Won bedopwe bineno gin maeno man anyong’a binege,

man ng’atu ma lembe mbe i wiye bing’iero dhoggi man ebiwacu kumae:

20 ‘Junyotho judhogwa,

man mac biwang’u babang’gi ceke m’udong’.’

21 Ng’eye, man ibibedo ku kwiyocwiny;

e ibinwang’u piny ma beco.

22 Jol cik m’uai kud i dhoge,

man gwok wec pare i adundeni.

23 Tek idwogo i bang’ Jategokpo, lembe bibedo miero iri kendo;

kan ikabu racu kud i hema peri,

24 tek ibolo mola ma kwar* peri i utur

man mola ma kwar mir Ofir i kind kidi mi poga,*

25 e Jategokpo bidoko mola ma kwar peri,

man ebibedo mola ma tar peri m’ang’iya.

26 Kum i saa maeno, mutoro binegi nikum Jategokpo,

man ibiting’o weng’i malu i bang’ Mungu.

27 Ibikwaye, e ebiwinji;

man ibitimo lembe m’ing’olo ku kwong’.

28 Gin ceke m’ing’iyo nitimo birombo,

man der bicaru yo peri.

29 Kum jubinyayu lewic i wii kinde m’ibeweco ku kuhaya,

ento ebibodho ng’atu ma jwigere.*

30 Ebibodho ju ma lembe mbe i wigi;

pieno tek in de cingi tie leng’, ibiboth andha.”

 2 “Kadok tin eni de abiwagara para asu;*

tego para thum nikum cur para.

 4 Nwang’u atero kesi para i wang’e

man abepong’o dhoga ku wec mi cero bang’a;

 5 Nwang’u ang’eyo kite m’ebidwoko ko ira lembe

man abeciko itha pi niwinjo gin m’ebeyero ira.

 7 Kuca, ng’atu m’atira copo yiko lembe wang’ acel kude,

man nwang’u Japoklembe para gonyo lembe m’i wiya mi magwei.

 8 Ento tek acidho yo nyangu, nwang’u embe kuca;

man tek aloko, acopo dok nwang’e ngo.

 9 Tek ebetimo tic yor acam, acopo nene ngo;

i ng’eye edok elokere yor acwic, re asu anene ngo.

11 Tienda nyono batiende tap tap;

awotho kwa i yo pare m’umbe nikier.

14 Kum ebitimo gin ceke m’ekeco* pira,

man egwoko lembe dupa ma kumeno.

15 Eno re m’uketho lembe pare ubedieng’o cwinya;

kan aparu pire, lworo medere ameda i iya.

16 Mungu uketho adoko lwor,

man Jategokpo unyayu ndiri i iya.

17 Re fodi asu mudho uketho ngo abedo ling’

kadi mudho ma bii de uumo wang’a ngo.

 2 Dhanu moko gicoro alama m’i wang’ kieu;

gikwalu udul lim pi dwol migi gigi.

 3 Gimayu kana mi nyithikic*

man giceriri iwi thwon dhiang’ pa dhatho ni mukwatu* pi banja.

 4 Gidiyo jucan kara uwek yo cen;

ju ma jukony migi mbe mi ng’om gipondo aponda igi.

 5 Jucan sayu cam calu kana mi lum ma kwo i langa;

gisayu cam ni nyithindhgi i langa.

 6 Ukwayu gikay cam i podho pa ng’atu mange

man gibek kund ulok i podho mir ulok mi jutimrac.

 7 Givuto muneru m’umbe bongu diewor traka;

gimbe ku jam um pi koyo.

 8 Koth mi wi gudi tobogi blo;

ging’wenyo cana kii pilembe gimbe ku kavogo.

 9 Jufudho nyathikic* cen ku dhu cak;

man jumayu bongu mi jucan ni mukwatu* pi banja,

10 eno uketho gibewotho muneru ma bongu mbe i kumgi,

man ma kec unegogi ma giyeyo kanga cam.

11 Gitimo tic ma tek i kum got i kind gang’ mi kidi ku dieceng’ ma heyhey;*

ginyono nying ulok i vur mi biyo pigulok, re asu rieu negogi.

12 Ju m’udhingo tho giberundo i adhura;

ju m’ulimo ret ma pek* gibekok nia jubin jukonygi,

ento Mungu ubeneno lembuno rac ungo.*

13 Jumoko gibejai i kum der;

gibeng’eyo ngo yo mi derne,

man gibelubo ngo gengi pare.

14 Janek ai pir kugweno;

enego ju ma jukony migi mbe man jucan,

diewor ke emondo i kwalu kwo.

15 Wang’ won abor kuro piny ukeucidi,

ma nwang’u ewacu kumae: ‘Ngatu moko mbe ma binena!’

16 Gikakiri* i udi kud i mudho;

dieceng’ ke giciko bang’gi i udi migi.

17 Kum kugweno de bedo igi ve mudho ma bii;

ging’iyo ku ndiri ma mudho ma bii nyayu.

19 Tap calu ma pei m’uloy rwinyo ko i ka oro man i saa mi lietho,

ju m’udubo de girwinyo kumeno i Liel!*

Jubipoy pire kendo ngo,

man jubituro gondiri calu yen.

21 Evuro dhaku ma jamugumba,

man esendo dhatho.

22 Mungu* bitiyo ku tego pare pi nidaru weg tego cen;

kadok nwang’u giai malu, ging’eyo ngo nia gibikwo.

23 Mungu* weko gibed ma cwinygi tek man museme,

ento wang’e n’i wi gin ceke ma gibetimo.*

Gitie calu withcam ma jukayu man jucoko dhoge;

jujwigogi man githo calu dhanu ceke.

25 Kawoni ng’a ma copo nyutho ngbeng’ nia atie javupo,

kadi ke ma romo thiro wec para?”

 2 “Bimobim man tego ma ng’oyo ndiri utie pare;

eketho kwiyocwiny bedo nuti i polo.*

 4 Dong’ dhanu ma tho e copo bedo pwe i wang’ Mungu nenedi,

kadi ke ng’atu ma dhaku unyolo en copo bedo ma lembe mbe i wiye* nenedi?

 5 Kadok dwi de rieny ungo i wang’e,

kadok nyakaluku de leng’ ungo i wang’e,

 6 ka dong’ dhanu ma tho ma en e ukoko e,

man wod dhanu ma en e thwol koth e ke!”

 4 Ibeng’ap niweco i ba ng’a,

man ng’a m’uketho iyero lembe ma kumeni?*

 5 Ju ma tego migi mbe i tho kumgi ubemiel;

gini piny ma sagu pii man giki ma kwo i igi.

 6 Liel* ubedo muneru i wang’ Mungu,*

man kaka mi nyoth* ubedo ngbeng’.

 7 Erieyo yo malu mi polo* iwi kaka ma thwolo,

eliero ng’om iwi gin moko ngo;

 8 Eboyo pii i afuru pare,

kara afuru kud ung’eny nikum peko migi;

 9 Eciko ba komker pare,

kud afuru pare m’emoyo i wiye.

10 Eriedo kieu* iwi pii,

eketho mupaka i kind der ku mudho.

11 Mbegi mi polo yengiri;

man lworo makugi nikum juk pare.

12 Etugo i nam ku tego pare,

man nikum nyang’ i lembe, erungo i giracwiya ma dit mi nam* nziki nziki.

13 Eketho polo lero ku yuyo* pare;

cinge kadhu plu kud i thwol ma makere ngo.*

14 Nen! eni gi ng’et tic pare moko ma nok kende;

ndhu lembamung’a ma nok kende m’uwinjere pire!

 2 “Tek andha Mungu ubedo kwo, en m’ecero ira pokolembe ma pwe,

tek andha Jategokpo ubedo kwo, en m’eketho adoko* kec,

 3 tek fodi yuyo para n’i iya, man tipo m’uai i bang’ Mungu n’i odiuma,

 4 dend dhoga biyero ngo lembe ma rac; kadi leba de bicwayu ngo vupo!

 6 Abigwoko bedopwe para man abiweke ki ngo;

adundena bipoko ngo lembe i wiya* i nindo ceke m’akwo i iye.*

 7 Dong’ jadegina udok calu jatimrac,

man ju m’usaya kud ali gidok calu weg gondiri.

 8 Kum genogen ang’o ma ng’atu ma lworo ngo Mungu* bedo ko

kinde ma junyothe,

kinde ma Mungu ukabu kwo* pare?

 9 Nyo Mungu biwinjo wak pare,

kinde m’ang’abacwiny uwok i wiye?

11 Abiponjowu ku lembe iwi tego pa* Mungu;

abikanu ngo gin moko acel de iwi Jategokpo.

12 Nen! tek wun ceke wuneno gin ma wok i wang’,

dong’ pirang’o ke wec mwu igi nanu?

13 Eni tie sukulia ma jatimrac nwang’u i bang’ Mungu,

giralaga ma jusend ginwang’u i bang’ Jategokpo.

14 Tek wote ginyay, gibipodho i lak palamularu,

man nyikwaye gibinwang’u ngo cam m’uromgi.

15 Ju ma giboth ire thong’om re ma biyikogi,

man montho migi biwagugi ngo.

16 Kadok nwang’u ecoko dhu mola ma tar calu utur,

man edhuro bongu ma leng’ calu ulobo,

17 kadok nwang’u ecoko dhoge,

won bedopwe re ma bikende,

man ju ma lembe mbe i wigi re ma gibipoko i mola ma tar pare.

18 Ot m’ebegiero tegone mbe calu ot pa nyathin abirbir,*

calu otbak ma jakur ugiero.

19 Ebicivuto ma nwang’u elony, ento ebicoko gin moko ngo;

kinde m’ebiyabu wang’e, nwang’u gin moko mbe keca.

20 Ndiri rube calu pii m’upong’;

yamu ma tek leke cen ku diewor.

21 Yamu ma yo nyangu bitere, e ebibedo mbe;

ebiweye cen ku kakare.

22 Ebicorere i wiye m’umbe kisa

ma nwang’u ebeyenyo eringi i tego pare.

23 Epadu cinge i bang’e

man elwiyo i bang’e ku kakare.*

28 “Kaka ma jugolo i iye mola ma tar unuti

man kaka ma julilo i iye mola ma kwar.

 2 Jubed juwodho cuma kud i ng’om,

man julenyo* mola kud i cana.

 3 Dhanu bevoyo mudho;

ecidho i ajiki mi ka ma col man mudho ma bii,

pi niyenyo kidi ma pire tek.*

 4 Etong’o vur bor ku kaka ma dhanu bedo i iye,

i kabedo ma wijo wil ko, bor ku kaka ma dhanu wotho i iye;

dhanu moko giloro i the ng’om, gilieriri i kum thol man githoriri.

 5 Cam dongo iwi ng’om;

ento yor i there, ng’om lokere ve ku mac.*

 6 I kidi junwang’u safir,*

man utur ke utie ku mola ma kwar.

 7 Acuth moko acel de mbe m’ung’eyo yo maeno;

wang’ acey de unene ngo.

 8 Yedi ma kwiny moko mbe m’uwotho i wiye;

nyathin umvor de fodi unyono ngo keca.

 9 Dhanu goyo cana ma lake bith ku cinge;

eng’ielo gudi ku wi kathegi.

10 Eriego ora mi pii i cana;

wang’e libo gin ceke ma pire tek.

11 Eculo wang’ kulo

man gin m’upondo ewodho i der.

12 Ento jucopo nwang’u rieko kani,

man acaki mi nyang’ i lembe ni kani?

13 Ng’atu moko mbe ma ng’eyo bero pare,

man ecopo nwang’ere ngo i ng’om mi ju ma kwo.

15 Jucopo ng’iewe ngo ku mola ma kwar m’alili;

kadi mola ma tar de jucopo pimo ngo kara juwile ko.

16 Jucopo ng’iewe ngo ku mola ma kwar mir Ofir,

kadi kud oniks ma nwang’u tek man safir.*

17 Jucopo pore ngo ku mola ma kwar man kieu;

kadi ajeni mi mola ma kwar ma julilo ku mac* de copo wile ngo.

18 Korai* man kristhal* uromo de ngo juwec pigi,

kum rieko ma pong’ usau acel pire tek ma sagu kidi ma i upal ma pong’ usau acel.

19 Jucopo pore ngo ku thopaz mi Kuc;

jucopo ng’iewe ngo kadok ku mola ma kwar m’alili.

20 Re rieko beai kani,

man acaki mi nyang’ i lembe ni kani?

21 Jukane kud i wang’ gin ceke ma kwo

man epanere ni winyo mi kor polo.

23 Mungu ung’eyo yo mi nwang’e;

En kende re m’eng’eyo kaka m’ebedo i iye,

24 kum eneno cil i kajik mi tung’ ng’om,

man eneno piny ceke m’i the polo.

25 Kinde m’eketho tego* mi yamu

man epimo pii,

26 kinde m’eketho cik pi koth,

man yo pi yamu ma tek mir afuru man lukoth,

27 e eneno rieko man ekoro iye;

eketho ecungo man epime.

‘Nen! lworo Yehova en e rieko,

man nilokiri cen kud i kum lembe ma rac, en e nyang’ i lembe.’”

 2 “Ka nwang’u ndhu adok i dwi ma yang’ con ca ba,

i nindo ma nwang’u fodi Mungu ubed uneno wiya i iye,

 3 kinde m’ebed eketho thala pare rieny i wiya,

kinde m’abed awotho i mudho nikum der pare,

 4 kinde m’abino i* aradu para,

kinde ma mer pa Mungu unyuthere i ot para,

 5 kinde ma fodi Jategokpo ubino kuda,

kinde m’awiya* para gitieko ng’eta tingili,

 6 kinde ma tienda ubed ujom i cak m’umakere ma nwang’,

man kinde ma cana ubed uthwogo kulo mi mo ira.

 7 Kinde m’abed acidho i dhugang’ mir adhura

man abedo i lela ma lac,

 8 aradu gibed ginena man gileng’o yo,*

man kadok ju m’utii gibed giai malu man gicungo.

 9 Judongo ma wijo gibed giceriri niweco;

gibed giketho cing’gi iwi dhoggi.

10 Dwand dhanu ma pigi tek ubed uling’;

lebgi ubed umoko i dandgi.

11 Ng’atu moko ci m’uwinja ubed uweco ber pira,

man ju ceke m’unena gibed gimiyo lembatuca pira.

12 Kum abed abodho jacan m’uwak nia jukonye,

karacelo ku nyathin ma won umbe man ng’atu moko ci ma jakony pare mbe.

13 Ng’atu m’ubecitho ubed umiyo ira mugisa,

man abed aketho anyong’a nego adunde dhatho.

14 Akendo bedopwe calu bongu para;

bedo atira para ubino calu kanzu* man jamboyo wic ma segi.

15 Adoko ni wang’ ni abinga

man tielo ni wonabala.

16 Abino wego ni jacan;

abed ayenyo i lemkesi mi dhanu m’ang’eyo ngo.

17 Abed aturo ding jatimrac

man amayu cam cen kud i lake.

18 Abed ayero kumae: ‘Abitho i ot para gira

man nindo para bibedo lee calu nying kwiyo.

19 Ulaga biringo nitundo i pii,

man thoi bibedo traka iwi janga.

20 Dwong’ para ubedoko nyen thiri thiri,

man athero m’i cinga bimedere asu nikilo piny.’

21 Dhanu ubed uwinja ma igi uwang’ lii,

ma nwang’u gibedo ling’ gibekuro juk para.

22 I ng’ey ma kan aweco, gibed gikoso lembe ma giyer;

wec para ubino mit* i ithgi.

23 Gibed gikura calu jukuro koth;

gibed giyabu dhoggi ma lac calu ni koth ma tokcen.

24 Kinde m’abed avonjo i bang’gi, ebedo igi tek niyiyo;

der m’i wang’a ubed utego cwinygi.*

25 Amiyo igi telowic calu jatelwic migi,

man abed akwo calu ubimo i kind udul pare,

calu ng’atu m’ubejuko cwiny ju m’ubewak.

30 “Kawoni awobi

ma gin adiyona ngo gibeng’iera,

ju ma nwang’u acopo kwero niketho weggi

ubed ku gwogi m’ubed ukuro lim para.

 3 Can ku kec uketho givoc;

gimwodo ng’om m’uthwo

ma dong’ udaru nyothere man m’udong’ ni uvuru.

 4 Ging’wedo lum ma nyakadu kadu i vunga;

cam migi utie ulag yen m’udinyo.*

 5 Juriemogi kud i kind dhanu;

dhanu ukok i wigi calu ma jubed jukok ko iwi jakwo.

 6 Gikwo i longoro,*

i ka ma thwolo i ng’om man i cana.

 7 Gibekok kud i kind vunga,

man gicokiri karacelo i kind ayilayila.*

 8 Calu wot jukusegu man dhanu ma kony migi mbe,*

juriemogi* cen kud i ng’om.

 9 Ento kawoni gibeng’iera kadok i wer migi;

adoko igi ni jamcac.*

10 Gidaga man gikoyiri bor kuda;

gibelworo ngo ning’ulo law i wang’a.

11 Pilembe Mungu umayu atum para* man ejwiga,

gicoriri i vuta m’umbe macero.*

12 Giai malu yor i cinga ma yor acwic calu udul dhanu,

gikonjo kuda ng’wec

man giketho macero mi nyoth i yo para.

13 Ginyotho yo para

man giketho masendi para udoko rac magwei

ma ng’atu moko de mbe m’ubecerogi.*

14 Gibino calu ve gimondo kud i wang’ gang’ m’umor ma lac;

gibecoriri i kaka m’unyothere.

15 Ndiri umwonya,

yung para uringo calu yamu

man both para urwinyo calu afuru.

16 Kawoni kwo* para ubekonjere kud i iya;

nindo mi can umaka.

17 Remo ukakere i cogona ku diewor,

litho m’uwukini ubejik ungo.

18 Nikum tego ma dit, bongu para loko ayine;*

calu ng’ut bongu para, ebedeya.

19 Mungu ubaya i ucodho;

adoko ni utur man vuru.

20 Abewagu kony i beng’i, ento idwoko ira lembe moko ngo;

acungo, ento inena ndhu anena kende.

21 Ilokiri ku kwinyo i kuma;

itugo ali i dhoga ku tego mi cingi ceke.

22 Iting’a malu man itera karacelo ku yamu,

e ithora kun ku kun i yamu ma tek.*

23 Kum ang’eyo nia ibitera piny i tho,

i ot ma ju ceke ma kwo birombo i iye.

24 Ento ng’atu moko mbe ma bigoyo ng’atu m’urungere*

kinde m’ebewak nia kony i saa mi can pare.

26 Kadok nwang’u ageno lembe ma ber, lembe ma rac re m’uwok;

akuro der, ento mudho re m’ulund ubino.

27 Anyobanyoba m’i iya ujik ungo;

nindo mi masendi unyego i dhoga.

29 Adoko umin utho

man jarimb nyig udo.

30 Dend kuma udoko col man upodho;

cogona ubewang’ nikum lietho.*

31 Adungu para udong’ ndhu pi wer wak kende,

man usegu para pi dwal mi wak.

 2 Nwang’u makapiny para bedo ang’o niai malu i bang’ Mungu,

man giralaga para niai malu i bang’ Jategokpo?

 3 Nyo nyoth ubekuro ngo jatimrac,

man can ubekuro ngo ju m’utimo lembe ma raci?

 4 Nyo ebeneno ngo yo para

man ekwanu ngo dagutielo para ceke?

 6 Dong’ Mungu upima ku kilo ma tap,

e ebineno bedocu para.

 7 Tek dagutielo para ukier kud i yo

kunoke adundena ulubo tok wang’a,

kadi ke cinga ucido,

 8 dong’ wek acoy man ng’atu mange re m’ucam,

man dong’ judoy cen gin m’apidho.*

 9 Tek cwinya upodho iwi dhaku moko

man apondo m’abekiyo ko dhugola pa jadhugola para,

10 dong’ dhaku para ureg nying cam ni nico mange,

man co mange gitim ribiri kude.*

11 Kum nwang’u eno ucibedo ni timo mi lewic,

man kosa m’uromo jupoklembe gimii matira pire.

12 Nwang’u ecibedo ni mac ma wang’u man ma nyotho piny,*

m’ewang’u ko kadok ulag* piny ceke m’abedo ko.

13 Tek akwero pokolembe m’atira ni jutic para ma co kadi ke ma nyir

kinde ma gikelo adote* i kuma,

14 aromo timo ang’o ka Mungu ucungo i dhoga?*

16 Tek akwero nimiyo ni jucan gin ma gibemito

kunoke anyayu can i wang’ dhatho;*

17 tek acamu cam para kenda

man amiyo ngo moko ni nyithikic;

18 (kum niai ma fodi an aradu, nyathikic* udongo i bang’a calu ve atie won,

man atelo wi dhatho* niai ma fodi a nyathin.*)

19 tek aneno ng’atu moko m’ubetho kum ekoso kendi

kunoke ng’atu ma jacan m’umbe ku gin m’eumere ko,

20 tek emiyo* ngo ira mugisa

pilembe agam amiyo ngo ire yuk rombe para kara emur ko kume;

21 tek akunjo cinga man ating’e i kum nyathikic

kinde m’etie ku yeny mi kony para i dhugang’;*

22 dong’ wek bota upodh kud i kum goka,

man dong’ bota utur kud i the bota.

23 Kum ndiri ubino nega pi nyoth m’uai i bang’ Mungu,

man nwang’u acopo cungo ngo i wang’ dwong’ pare.

24 Tek aketho genogen para i mola ma kwar

kunoke awacu ni mola ma kwar ma julilo ku mac kumae: ‘In i bedomoth para!’

25 Tek anwang’u anyong’a para i lonyo para ma dit,

pilembe atie ku piny dupa m’abedo ko;

26 tek aneno ceng’* uberieny

kunoke dwi ubewotho i leng’o pare;

27 man adundena ubidhere nyaling’ ling’,

man dhoga ucwiyo cinga m’ebetimo ko thier igi,

28 e nwang’u eca tie kosa m’uromo jupoklembe gimii matira pire,

kum nwang’u akwero Mungu mandha ma malu.

29 Nyo anyong’a nega de i kum nyoth pa jadegina

kadi nyo mutoro nega de pi lembe ma rac m’uwok i wiye?

30 Aweko ngo nyanok de nia dhoga udubi

m’alame ko man akway nia etho.*

32 Umondo* moko mbe m’ubed uvuto woko;

abed ayabu dhugola para ni jawotho.

33 Nyo apimo de niumo wi kier para calu dhanu mange,

m’akan ko kosa para i jeba mi bongu para?

34 Nyo lworo ubed unega de i kum timo mir udul dhanu,

kunoke nyo ndiri nega de nikum cac mi juruot mange,

uketho nia abedo ling’ man alworo niwok woko?

36 Nwang’u abiele wi goka,

man nwang’u ariwe i wiya calu jamker mi wic.

37 Nwang’u adwoko wel ni Mungu pi dagutielo para ceke,

nwang’u acoro i vute ku tegocwinya calu jadit ma wijo.

38 Tek ng’om para gira uwak i wiya,

man sayune giwak karacelo;

39 tek acamu nyinge m’umbe niculo,

kunoke tek aketho weggi* gibedo mbe ku genogen;

40 wek dong’ ukudho utwii ira kaka nganu,

man lum ma ng’wice tik utwii kaka nganu ma juyuke.”

“An atie aradu,

ento wun wu judongo.

Pieno acerara cen ku woro,

man ang’ap ungo niyero iwu lembe m’ang’eyo.

 7 Aparu kumae: ‘Wek oro* uweci,

man wek udul oro gitwong’ rieko.’

 8 Ento tie tipo ma n’i dhanu,

yuyo pa Jategokpo re ma miyo igi nyang’ i lembe.

 9 Oro kende ngo* ma ketho ng’atini bedo riek,

kadi tie ngo dhanu m’utii kendgi re ma ginyang’ i lembe m’atira.

10 Pieno awacu kumae: ‘Wukewinja,

e an de abikoro iwu lembe m’ang’eyo.’

11 Nen! akuro wec mwu;

amedara niwinjo kite ma wuluro ko i lembe

kinde ma wubeyenyo gin ma wuyer.

12 Aketho wiya kilili i beng’wu,

ento ng’atu acel de mbe m’i kindwu m’ubino ku copo mi nyutho nia Yob utimo rac*

kadi m’udwoko wang’ wec pare.

13 Dong’ kud wuwac kumae: ‘Wanwang’u rieko;

Mungu re ma copo yero nia Yob utie ku kosa, dhanu ngo.’

14 Etiro ngo an ku wec pare,

pieno abidwoko ngo ire lembe ve wun.

15 Lworo umakugi, lembe ma gidwoki uthum;

gikoso lembe ma giyer.

16 Akuro, ento gimediri ngo ku wec;

gicungo acunga kende keca m’umbe nidwoko lembe mange.

17 Pieno, an de abidwoko lembe;

an de abiyero gin m’ang’eyo.

18 Kum wec upong’ i iya;

tipo ma n’i iya ubecwala.

19 Iya calu pigulok ma dhoge m’ewok ko mbe,

calu usau pigulok ma nyen m’udhingo moc.

21 Abinyutho ngo akoyakoya ni ng’atu moko,

kadi abiyungo ngo* ng’atu moko ci,

22 kum ang’eyo yungo yung ungo;

tek atimo kumeno, Ng’atu m’ucwiya bidara pio mandha.

33 “Ento kawoni Yob, akweyi, winj wec para;

winj lembe ceke m’abeyero.

 2 Ka copere cik ithi! Ukwayu ayab dhoga;

ukwayu leba* uweci.

 3 Wec para ubenyutho bedo atira mir adundena,

man leba ubeyero lembe m’ang’eyo m’umbe abombi.

 4 Tipo pa Mungu re m’ucwiya,

man yuyo pa Jategokpo re m’umiyo ira kwo.

 5 Dwok ira lembe tek icopo;

nyuth ira wec m’icero ko beng’i; cung ma tek.

 6 Nen! an a calu in i wang’ Mungu mandha;

an de jucwiya kud ulobo.

 7 Lworo para kud unyay ndiri i ii,

man lembe m’abiyero kud unuri.

 8 Ento iyero i itha,

eyo, amedara niwinjo wec ma e:

 9 ‘An a leng’ m’umbe kier;

a leng’ m’umbe kosa.

10 Re Mungu ubenwang’u thelembe mi ai i kuma;

ebenena ni jadegi pare.

11 Eroyo tienda i kongo,

ebeng’iyo i yo para ceke.’

12 Ento i lembe maeni iyero lembe m’atira ngo,

pieno abedwoko iri lembe ma e:

14 Kum Mungu weco wang’ mi kwong’o man wang’ mir ario,

ento ng’atu moko mbe m’uciko ithe,

15 i lek i gin ma wok i wang’ mi diewor,

kinde ma nindo ma pek upodho iwi dhanu

kinde ma ginindo iwi kavuto migi.

16 E eyabu ithgi

man ecung’o* telowic pare i wigi,

17 pi niloko ng’atini cen kud i kum timo ma rac

man nigwoko ng’atini kud i kum kuhaya.

18 Mungu gwoko ng’eyong’ec* pare kud i vur,*

man kwo pare kud i nyoth mi palamularu.

19 Ng’atini nwang’u bende twiny nikum remo iwi kavuto pare

man nikum adieng’acwiny m’uweko cogone ngo,

20 kara kwo pare* udag mukathi,

man ekwer* kadok cam ma ber.

21 Ring’ kume unyothere ma dong’ ubenen ungo,

man cogone ma naka upondo kawoni ubenen njer.*

22 Ng’eyong’ec* pare ucoro ceng’ini i dhu vur;*

kwo pare ni ceng’ini ku ju ma kelo tho.

23 Tek jakwenda* moko unuti ire,

jacer bang’jo acel kud i kind elufu,

pi niyero lembe m’atira ni dhanu,

24 e Mungu nyutho ire bero man ewacu kumae:

25 Wek ring’ kume udok nyen* nisagu ma nwang’u fodi en aradu;

wek edwog i nindo mi tego mir aradu pare.’

26 Ebikwayu Mungu, man ebijole,

man ebineno wang’ Mungu ku kok mir anyong’a,

man Mungu bidwoko bedopwe pare ni dhanu ma tho.

‘Adubo man awiro wi lembe m’atira,

ento anwang’u ngo gin m’uromo kuda.*

28 Ewaru ng’eyong’ec* para kara kud ucidh i vur,*

man kwo para bineno der.’

29 Eyo, Mungu timo lembuno ceke,

wang’ ario, wang’ adek pi dhanu,

30 pi niwodhe* kud i vur,*

kara der mi kwo ucare.

33 Tek lembe m’ibeyero mbe ke, dong’ ukwayu iwinja;

bed ling’ man abiponji ku rieko.”

 2 “Wuwinj wec para, wun ma wu riek;

wuwinja, wun ma wung’eyo lembe lee.

 3 Kum ith bilo wec

tap calu ma leb* bilo ko mido cam.

 4 Wek wanenu iwa giwa gin m’atira;

man wang’iyu i kindwa giwa gin ma ber.

 5 Kum Yob uwacu kumae: ‘Ayero lemandha,

ento Mungu ukwero nipoko lembe para atira.

 6 Nyo nwang’u ukwayu acway vupo

iwi kite ma nwang’u pokolembe para ucikere nibedo ko?

 7 Ng’atu mange ma kani ma calu Yob,

m’ubemadhu cac calu pii?

 8 Ebewotho ku jutimrac

man ebedikere ku dhanu ma reco.

 9 Kum eyero kumae: ‘Ng’atini copo nwang’u bero moko ngo

i kum tego m’ebetimo pi ninyayu anyong’a i Mungu.’

Etie lembe ma copere ngo ni Mungu mandha nia etim rac,

ni Jategokpo nia etim lembe ma rac!

11 Kum ebimiyo sukulia ni ng’atini nimakere ku gin m’ebetimo

man ebikelo adwogi mi timo* pare i wiye.

12 Kum i andha, Mungu timo ngo lembe ma rac;

Jategokpo nyotho ngo pokolembe m’atira.

13 Ng’a m’uketho etel wi ng’om,

man ng’a m’uketho enen wi ng’om* zoo?

14 Tek eketho paru pare* i bang’gi,

tek ecoko tipogi man yuyo migi i bang’e gire,

15 nwang’u dhanu* ceke tho karacelo,

man nwang’u dhanu ceke udok i utur.

16 Dong’ tek itie ku nyang’ i lembe, cik ithi i kum lembe maeni,

winj lembe m’abeyero e cuu.

17 Nyo ng’atu m’udagu lembe m’atira copo telo wijo?

Kadi nyo iromo poko lembe iwi ng’atu ma tek ma pwe?

19 Ng’atu moko nuti ma nyutho ngo akoyakoya ni judongo ma wijo

man ma cwaku ngo jalonyo nisagu jacan,*

kum gin ceke gi tic mi cinge.

20 Githo rek i diewor ma ling’;

kumgi miel ku rac man girwinyo;

kadok weg tego de jukabugi cen, ento ku cing’ dhanu ngo.

21 Wang’ Mungu n’i wi yo pa dhanu,

man eneno dagutielo pare ceke.

22 Mudho kadi tipopiny ma bii moko mbe

ma jutimrac copo pondo i igi.

23 Kum Mungu uketho ngo saa ni ng’atu moko ci

m’ecung ko i wang’e i pokolembe.

24 Eturo weg tego m’umbe niyenyo lembe i wigi

man eketho jumange kakagi.

25 Kum eng’eyo gin ma gibetimo;

eredhogi ku diewor, e girungiri.

26 Egoyogi pi racu migi,

i kabedo ma dhanu ceke copo neno,

27 pilembe gilokiri cen kud i kum lubo toke

man giworo ngo yo pare moko acel de;

28 Giketho jacan wak i bang’e,

kara ewinj wak mi ju ma jukony migi mbe.

Nik’ebed ni thek kadi ni ng’atu acel, adwogine ceke rom,

30 kara ng’atu ma woro ngo Mungu* kud ubim

kunoke ecik uwic ni dhanu.

31 Kum ng’atu moko biyero ni Mungu nia,

‘jumiyo ira matira ma ke adubo ngo;

32 ponja ku gin m’aneno ngo;

tek atimo gin moko ma rac, nyo abidotime kendo ngo?’

33 Nyo nwang’u emii iri sukulia calu m’iyenyo

ma in ke ikwero pokolembe pare?

34 Dhanu ma weg nyang’ i lembe* ku ju ma riek

ma gibewinja gibiyero ira kumae:

35 ‘Yob ubeweco m’umbe ng’eyong’ec,

man wec pare ukoso rieko.’

36 Wek jumul i Yob* nitundo i ajiki

kum dwokolembe pare utie calu mi jutimrac!

37 Ebemedo jai i kum dubo pare;

ebepadu cinge ku cac i wang’wa

man ebemedo wec pare i kum Mungu mandha!”

 2 “Nyo fodi asu iyiyo nia ibeyero lembe ma kakare kinde m’iwacu nia,

‘an a pwe ma sagu Mungu’?

 4 Abidwoko lembe iri

man ni jurimbi ma gini karacelo kudi.

 5 Ng’ay weng’i malu i polo man inen,

nen cuu afuru ma gini malu lir i wii.

 7 Tek i won bedopwe, imiyo ang’o ire;

ebenwang’u ang’o i beng’i?

 8 Racu peri mulo kende kende kum dhanu ma calu in,

man bedopwe peri mulo kum wod dhanu.

 9 Dhanu wak ka gin’i the loc mir adici ma tek;

gikwayu nia julargi kud i the bimobim* mi weg tego.

10 Ento ng’atu moko mbe m’uwacu nia,

‘Mungu ni kani, en m’e Jacwic* para Ma dit,

ng’atu ma ketho wer werere ku diewori?’

11 Eponjowa nisagu yedi mi ng’om,

man ecwiyowa riek nisagu winyo mi kor polo.

12 Dhanu ubekok, ento ebedwoko ngo,

pi kuhaya mi judubo.

13 Andha Mungu winjo ngo kok ma iye nanu;*

Jategokpo ketho ngo wiye i kume.

15 Kum ekwayu ngo ku ng’eicwiny nia iwodh wel;

kadi edieng’ de ngo i kum tegowic peri m’ukadhu mukero.

16 Yob ubeyabu dhoge ma lac mananu;

ebeweco lee m’umbe ng’eyong’ec.”

 2 “Kecira nyanok kinde ma fodi abekoro lembe,

kum fodi asu atie ku wec moko m’ukwayu ayer pi Mungu.

 3 Abiweco terere pi gin m’ang’eyo,

man abituco nia Ng’atu m’ucwiya re ma tie won bedopwe.

 4 Andha lembe para tie vupo ngo;

Ng’atu m’ung’eyo lembe ceke n’i weng’i eni.

 5 Andha, Mungu tie jatego man ecoro ngo ng’atu moko cen;

e dwong’ i copo pare mi nyang’ i lembe.*

 6 Ebigwoko ngo kwo mi dhanu ma reco,

ento ebiketho pokolembe ma pwe utimere ni ju ma can unego.

 7 Eloko ngo wang’e cen kud i kum weg bedopwe;

ekethogi iwi komker karacelo ku jubim,* man judodogi pi nja.

 8 Ento ka jutwiyogi ku nyoro

man gimoko i thol mi can,

 9 enyutho igi gin ma gitimo,

dubo migi ma kuhaya migi ukelo.

10 Eyabu ithgi kara uwinj twiny

man eyero igi nia gilokiri cen kud i kum timo ma reco.

11 Ka giworo man gitimo ire,

gibikwo ma ber i nindo migi,

man rundi migi bibedo miero.

12 Ento tek giworo ngo, gibitho ku palamularu

man gibitho m’umbe ng’eyong’ec.

14 Githo* ma nwang’u fodi gin aradu,

gikwo* kwo migi i kind jumaco ma weg asara mir hekalu.

15 Ento Mungu* bodho ju ma jubesendo i masendi migi;

eyabu ithgi kinde ma jubesendogi.

16 Eteri bor kud i dhu can

i kaka ma lac ma gin moko mbe ma copo dii i iye,

ku cam ma miyo iwi meza peri pi nijuko cwinyi.

17 E cwinyi bikwiyo pilembe jupoko lembe mi jutimrac,

kinde ma jupoko lembe man juketho bedopwe utimere kakare.

18 Bed ku weng’i kara kwinyo kud uteri i cac,*

man kud iwek kanyaka ma dwong’ uketh ikier.

19 Nyo wak m’ibekwayu ko kony

kadi nyo kero ma lee m’ibetimo bicero can kud uwok i wii?

20 Kud ikur diewor kud ava,

en e saa ma dhanu rwinyo i iye kud i kabedo migi.

21 Bed ku weng’i kara kud ilokiri nitimo lembe ma reco,

m’ing’ii ko maeno kakare ma nia inweng’iri ku peko.

22 Nen! Mungu udodere malu i tego pare;

japonji ma kani ma calu eni?

23 Ng’a ma copo telo wi* yo pare

kunoke ma copo yero ire kumae: ‘Gin m’itimo no tie raci’?

24 Wii kud uwil niyungo tic pare,

ma dhanu uwero pire.

25 Dhanu ceke ginene,

dhanu ma tho ginene ku bor.

26 Eyo, Mungu tie dwong’ i kadhiri ma wacopo ng’eyo ngo;

wend oro pare de wacopo nyang’ i iye ngo.*

27 Etelo pii idho malu;

liethone makere doko ni koth;

28 i ng’eye afuru core piny;

gicwii iwi dhanu.

29 Nyo ng’atu moko copo ng’eyo kite m’afuru udhurere ko,

kite ma morpolo wok ko kud i hema* pare?

30 Nen maram ecaru ko der pare i kume

man eumo ko the nam.*

31 I ayi maeno re m’ebeketho dhanu bedo kwo;*

ebemiyo igi cam bik.

32 Eumo lukoth ku cinge,

man etelo wiye kaka m’egoy.

33 Mor pare nyutho pire,

kadok lim nyutho nia ng’a* m’ubebino.

37 “Pi lembe maeni adundena ubedhongo

man ebepor ku kakare.

 2 Winj cuu kite ma dwande ubemor ko

man winj kite ma dwal m’ubeai kud i dhoge ubemor ko.

 3 Eketho elal i the polo ceke,

man eoro lukoth pare nitundo i ajiki mi ng’om.

 4 I ng’eye dwal ma dit winjere,

emor ku dwande ma tek mandha,

man ecere ngo cen kinde ma dwande winjere.

 5 Mungu mor ku dwande i ayi ma wang’u ijo,

etimo lembe ma dongo ma wacopo nyang’ i igi ngo.

 6 Kum eyero ni pei kumae: ‘Cwii iwi ng’om,’

man ni koth kumae: ‘Cwii ku tego.’

 7 Mungu jigo tic mi dhanu ceke*

kara ng’atu moko ci ung’ey tic pare.

 8 Yedi mi lum gicidho i odigi

man gibedo kaka ma gikwo i iye.

 9 Avuvu koto niai kud i kusika pare,

man yamu ma yo malu kelo koyo.

10 Nikum yuyo pa Mungu pei wok,

man pii ma lac makere doko ma tek.

11 Eyo, epong’o afuru ku ng’ico;

eketho lukoth pare lal i kind afuru;

12 giwiriri kaka m’etelo wigi i iye,

gitimo gin moko ci m’eng’olo igi i wang’ ng’om* ceke.

13 Eketho gin maeno gitimiri,

dok ebed pi nimiyo matira* kunoke pi niyomo ng’om,

kadi pi ninyutho mer pare ma lokere ngo.

14 Kewinj lembe maeni Yob;

cungi man ipar cuu pi tic pa Mungu ma wang’u ijo.

15 Nyo ing’eyo kite ma Mungu telo ko wi* afuru,

man kite m’eketho ko lukoth mil niai kud i afuru pare?

17 Pirang’o bongu peri doko lieth

kinde ma yamu ma yo piny uketho ng’om ucungo ting’i?

18 Nyo in, karacelo wukude wucopo pedho polo*

bedo ma tek calu maraya mi cuma?

19 Nyuth iwa gin ma wacikara niyero ire;

wacopo dwoko ngo lembe, kum wan’i mudho.

21 Dhanu romo neno der* de ngo

kadok nwang’u eberieny i kor polo,

nitundo ma yamu kadhu man eweyo afuru cen.

22 Dwong’ m’urieny calu mola ma kwar ai ku yo malu,

dwong’ pa Mungu wang’u ijo.

23 Ninyang’ i yo pa Jategokpo copere ngo iwa,

tego pare dwong’,

man epoko ngo lembe i ayi m’urombo ngo ku bedopwe pare ma dit.

 2 “Eni tie ng’a m’ubenyotho wi juk para

man m’ubeweco m’umbe ng’eyong’ec e?

 3 Akweyi, keyikiri calu co;

abipenji ku penji man in ibinyutho ira.

 5 Ng’a m’uketho kadhiri mi pimne tek ing’eyo,

kunoke ng’a m’utelo thol mi pimopiny i kume?

 6 Katherene umondo i ang’o,

kunoke ng’a m’uketho kidi mi gulne,

 7 kinde ma nyikaluku mi kugweno gikok karacelo kud anyong’a

man wot Mungu* ceke gicaku woy ku mutoro?

 8 Ng’a m’uciko ba nam ku dhugola

kinde m’ebethwogere kud i vuje,*

 9 kinde m’aronye kud afuru

man aboye ku mudho ma bii,

10 kinde m’aketho kieu ire

man aketho riune ku dhogolane,

11 e awacu kumae: ‘Icopo bino nitundo kae, ento kud ikadh bor,

kuhaya mi mujanga peri bijik kakae’?

12 Nyo idaru* ng’olo lembe de ni kugweno

kunoke iketho mombwa ung’eyo kakare,

13 kara emak ajiki mi ng’om

man eyeng jutimrac giwok kud i iye?

14 Ng’om lokere calu m’ulobo lokere ko i ther ayi,*

man piny ma n’i iye ginen terere calu jamruko mi bongu.

15 Ento jumayu der mi jutimrac cen kud i bang’gi,

man botgi ma giting’o malu tur.

16 Nyo iloro piny kaka ma pii denyini i iye i the nam

kunoke nyo iwotho i the pii ma thuci?

17 Nyo ng’atu moko udaru nyutho iri dhugola mi tho,

kunoke nyo ineno dhugola mi mudho ma bii?*

Man kabedo pa mudho ni kani,

20 kara itergi i ng’om migi

man ing’ey gengi m’ucidho i kabedo migi?

21 Nyo ing’eyo lembe maeni pilembe nwang’u dong’ judaru nyoli,

man wend oro* peri tie diti?

22 Nyo idaru mondo i dero mi pii m’umakere,

kadi idaru neno dero mi pei,

23 m’agwoko pi nindo mi can,

pi nindo mir ali, man mi lwinyi?

24 Der* lal kud i yo ma kani

man yamu ma yo nyangu koto iwi ng’om niai ku kani?

25 Ng’a m’utong’o ora ni pii m’upong’

man m’ukaku yo ni yamu ma tek ma kud afuru, man morpolo,

26 pi niketho koth ucwii kaka ma ng’atu moko mbe ma kwo i iye,

i langa kaka ma dhanu mbe i iye,

27 pi niyeng’o ng’om ngele m’udong’ ni uvuru

man niketho lum utwii?

28 Nyo koth e won utie de,

kunoke ng’a m’unyolo thoi?

29 Lungu pei uai kud i ng’a

man ng’a m’unyolo thoi ma tar mi polo,

30 kinde ma wi pii uumere calu ve juumo ku kidi,

man wi pii ma thuc utal udoko ma teki?

31 Nyo icopo twiyo thondh yung’ini mi Kima*

kunoke nigonyo thondh yung’ini mi Kesil?*

32 Nyo icopo ketho yung’ini* moko wok i nindo pare

kunoke nyo icopo telo wi yung’ini mi Ac* karacelo ku wote?

33 Nyo ing’eyo cik m’ubetelo wi polo,

kunoke nyo icopo ketho ng’om ubed i the loc migi?*

34 Nyo icopo ting’o dwendi malu nitundo i bang’ afuru

pi niketho pii m’upong’ uumi?

36 Ng’a m’uketho rieko i afuru

kadi m’umiyo nyang’ i lembe ni gin ma wang’u ijo ma timere i kor polo?

37 Ng’a ma riek lee m’ecopo kwanu ko afuru,

kadi ke ng’a ma copo lung’o dhug agulupii mi polo

38 kinde m’utur ubemol ni ucodho

man lungu ng’om ubemakere karacelo?

39 Nyo icopo dwaru cam ni umvor

kunoke nyo icopo daru mido dhok pa nyithindh umvor

40 kinde ma girieyo igi i odigi

kunoke givuto pi nikanu libo i kabedo migi?

41 Ng’a ma yiko cam ni ungoro

kinde ma nyithindhgi wak pi nikwayu kony i bang’ Mungu

man gibewotho kun ku kun pilembe gikoso gin ma gicami?

 3 Girum piny pi ninyolo nyithindhgi,

e igi m’uremo gam jik.

 4 Nyithindhgi doko tek man gidongo i lum;

gicidho man gidwogo ngo i bang’gi.

 5 Ng’a m’uweko kana mi lum ubed agonya,

man ng’a m’ugonyo thol pa kana mi lumi?

 6 Aketho pambu mi langa ni pacu pare

man ng’om kadu ni kabedo pare.

 7 Ecayu woy mir adhura,

man ewinjo ngo woy pa ng’atu m’ubeleko the lei.

 8 Eringo iwi gudi m’ebeyenyo ka lum,

eyenyo kit lum moko ci ma numu.

10 Nyo ibitiro wi thwon dhiang’ mi lum ku thol kara eried iri leni i podho,

kunoke nyo ebilubo toki pi nifuro* poga?

11 Nyo ibigeno tego pare ma dwong’

man ibiweke etim tic peri ma teki?

12 Nyo ibigene nia ebidwogo cam* peri i pacu,

man nyo ebicokogi i lela peri mi fwodo cami?

13 Udo padu vombe kud anyong’a,

re nyo ukondone man yuke urombo ku pa nunda?

14 Kum ewenjo tonge i ng’om,

man eumo kumgi kud utur kara gibed mor.

15 Wiye wil nia tielo moko copo loyogi

kunoke nia lei mi lum copo nyonogi.

16 Etimo wote yanga yanga ve nia gi pare ngo,

lworo nege ngo nia ecopo sendere ku tic mananu.

17 Kum Mungu utwone* ku rieko

man emiyo ngo ire nyang’ i lembe.

18 Ento kinde m’eai malu man epadu vombe,

eng’iero riuni ku ng’atu m’uberingo kude.

21 Enyono ng’om i poga, man epor ku tego;

emondo i lwiny.*

23 Thubu yengere i wiye,

tong’ man tong’ m’adundo ma lakgi rieny.

24 Kume miel kum etie kud amora, epor i wang’e,*

ecopo cungo ngo dii* kinde m’ewinjo dwand bilo.

Eng’wiyo ng’wic lwiny ku bor

man ewinjo kok mi judong askari ku kok mi lwiny.

26 Nyo en e nikum rieko peri re m’abiba tuk,

m’erieyo ko vombe yo piny?

27 Kunoke nyo etie nikum lembang’ola peri re m’acur tuk malu

man egiero ode lir lir;

28 etimo diewor traka i lak cana,

ebedo i ot ma tek pare ma ni lak cana?

29 Ku keca re m’esayu cam,

wang’e neno piny bor.

30 Nyithindhe gicwiyo rimo;

man kaka moko ci m’avu n’i iye nwang’u en de eni keca.”

 5 Aweco wang’ ma kwong’a, ento abidwoko ngo lembe kendo;

wang’ mir ario, ento abimedo ngo kendo.”

 7 “Akweyi, keyikiri calu co;

abipenji ku penji man in ibinyutho ira.

 9 Nyo boti utie ku tego calu bot Mungu mandha,

kunoke nyo dwendi copo mor calu dwande?

10 Akweyi, kerukiri ku dwong’ man tego;

ronyiri ku yung man leng’o.

11 Wek kwinyo ma lake tek umeki;

nen ng’atu moko ci ma jakuhaya, man ilore piny.

12 Nen ng’atu moko ci ma jakuhaya, man ijwige,

nyon jutimrac ku kaka ma gicungo i iye.

13 Kangi ceke i utur;

twiigi* i kaka m’upondo,

14 e kadok an de abiyiyo iri*

nia cingi mir acwic romo bodhi.

16 Kenen tego mi piere

man tego mi ring’kum ma n’i the iye.

17 Eciko yibe calu yend tido;

man ler mi bambe ukadere karacelo.

18 Cogone tie ve mola ma igi roko,

tiende tie calu uluth mi cuma ma jufwodo afwoda.

19 Etie ma kwong’a* i kind cwic pa Mungu;

Ng’atu m’ucwiye kende re ma copo coro i bang’e ku palamularu pare.

20 Kum gudi cego ire cam,

kaka ma yedi ceke mi lum tuko i iye.

21 Evuto i the vunga,*

i the tipo agada mi jugu.

22 Vunga umo wiye ku tipogi,

man mbegu mi poga* twode tingili.

24 Nyo ng’atu moko copo make kinde m’ebeneno,

kunoke copo tong’o ume ku goli?*

41 “Nyo icopo jaku Leviathan* ku gol mi rec,

kunoke nyo iromo twiyo lebe ku tholi?

 2 Nyo icopo royo thol* i odi ume

kunoke nyo icopo tuco dinge ku goli?*

 3 Nyo ebipaku dhoge wang’ dupa iri,

kunoke nyo ebiweco i beng’i ku dwande ma yoo?

 4 Nyo ebitimo lembariba kudi

kara idwoke ni ng’eca peri pi nja?

 5 Nyo ibituko kude calu m’ituko ku winyo

kadi ke nyo ibitwiye ku thol ni nyithi anyira peri?

 7 Nyo ibicobo ng’eye ku tong’ dupa

kunoke wiye ku tong’ mi cobo reci?

 8 Keketh cingi i kume;

e ibipoy pi lwiny man ibipimo kendo ngo!

12 Abiling’ ungo pi tiende,

pi tego pare, man pi kume m’ucwiyere ma leng’.

15 Apokane urieyo leni* i die ng’eye;

gitwiyiri kikiki karacelo.

16 Apokaneman umoko kii i kum wadi

ma yamu de romo kadhu ngo i kindgi.

17 Gitwiyiri i kindgi;

gimoko karacelo man kindgi romo pokere ngo.

18 Giro pare milo der,

man wang’e calu der mi mombwa.

19 Der m’ubemil wok kud i dhoge,

man mac m’umoc kilere woko.

20 Yiro thwogere kud i odi ume,

calu uka ma judhuro usi i iye.

21 Yuyo pare opo cugimac,

man lebmac kilere woko kud i dhoge.

22 Tego ma dit n’i ng’ute,

man lworo maku gin moko ci m’urombo kude.

23 Adila mi ring’ kume gimoko kii karacelo;

gimoko ma tek calu ve jumwonogi amwona i kume, man gialiri ngo.

24 Adundene tie tek ve kidi,

eyo, e tek ve kidi rego ma yor i there.

25 Kinde m’eai malu, lworo maku kadok jurukara;

kite m’evudhere ko nyayu akpal.

26 Palamularu moko mbe m’utundo i bang’e ma bivoye;

kadi tong’, kadi athero, kadi lak dindo tong’.

27 Eneno cuma calu soka,

man mola calu yen m’utop.

28 Eringo ngo athero;

kidi mi lacur doko calu lum ire.

29 Eneno undoy calu lum,

man eng’iero woy mi tong’.

30 The iye utie calu adekele ma lake bith;

evuto iwi ucodho calu bau mi fwodo nying cam.

31 Eketho pii ma thuc walini calu i agulu;

etugo nam calu agulu mi mo mi wirojo.

33 Gin moko mbe ma calu en iwi ng’om,

en e giracwiya ma lworo ngo gin moko.

 2 “Kawoni ang’eyo nia itie ku copo mi timo lembe ceke

man nia gin moko mbe m’ibeparu nitimo ma copere ngo iri.

Pieno aweco, ento m’umbe ninyang’

i lembe ma giwang’u iya dit, ma nwang’u ang’eyo ngo.

 5 Nwang’u abed awinjo piri awinja ku itha,

ento kawoni dong’ abeneni ku wang’a.

 6 Pieno, can ubenega i kum lembe ceke m’ayero,

man ayewo dubo para i utur man i vuru.”