ZABURI

1 Jamutoro tie ng’atu m’ubewotho ngo calku juk mi jutimrac

Man m’ucungo ngo i yo mi judubo

Man m’ubedo ngo i kabedo mi jucac.

 2 Ento anyong’a pare n’i cik pa Yehova,

Man esomo cik pare ku dwal ma piny* dieceng’ ku diewor.

 3 Ebibedo calu yen ma jupidho i dhu kulo,

Yen ma cego nyinge i nindone,

Ma ithe de ner ungo.

 4 Jutimrac gi kumeno ngo;

Gi calu cung’ cam ma yamu kudho cen.

 5 Pieno, jutimrac gibicungo ngo i saa mi pokolembe;

Kadi judubo de gibicungo ngo i cokiri mi weg bedopwe.

 6 Kum Yehova ung’eyo yo mi weg bedopwe,

Ento yo mi jutimrac birwinyo.

2 Pirang’o yakini n’i kind thek

Man dhanu gibeporo* lembe ma iye nanu?

 2 Jubim mi ng’om gicungo

Man jutic ma dongo gicokiri karacelo* ni acel

I dhu Yehova man i dhu ng’atu ma juwiro pare.*

 3 Giwacu kumae: “Wek watur i nyoro migi cen

Man wabay thol migi cen!”

 4 Ng’atu m’ujany iwi komker i polo bing’iero;

Yehova bicayugi.

 5 I saa nica ebiweco igi ku ng’eicwiny

Man ebinyayu lworo i igi ku kwinyo pare m’uopo,

 6 M’ewacu kumae: “Aketho jabim para

Iwi Sayuni ma en e got para ma leng’.”

 7 Wek atwong’ pi cik pa Yehova;

Ewacu ira kumae: “Itie woda;

Tin adoko wuru.

 8 Kwaya, e abimiyo iri thek ni giralaga

Man tung’ ng’om ni aba peri.

 9 Ibiturogi kud uluthker mi cuma,

Man ibirungogi calu adekle.”

10 Dong’ kawoni wu jubim, wubed riek;

Wujol twiny,* wu jupoklembe mi ng’om.

11 Wutim ni Yehova ku lworo,

Man anyong’a negwu ku mielkum.

12 Wuyung* wod, kan ungo kwinyo bimaku Mungu*

Man wubirwinyo kud i yo,

Kum kwinyo pare opo pio.

 3 Ento in, E Yehova, in i ban m’utieka,

Dwong’ para man Ng’atu m’uting’o wiya malu.

 4 Abiwak ma tek i bang’ Yehova,

Man ebidwoko ira lembe kud iwi got pare ma leng’. (Sela)

 5 Abivuto man abinindo;

Man abiai malu museme,

Kum Yehova ubemedere nigwoka.

 6 Lworo ubenega ngo i kum dhanu elufu

Ma girieyo i ng’eta kun ku kun.

Kum ibigoyo ding judegi para ceke;

Ibituro lak jutimrac.

 3 Wung’ey nia Yehova bitimo lembe ni won bedopwe pare i ayi ma segi;*

Yehova biwinja kinde m’alwong’e.

 5 Wuthier lam mi bedopwe,

Man wuketh genogen mwu iwi Yehova.

 7 Ipong’o adundena kud anyong’a ma dit

Ma sagu mi dhanu ma udi migi pong’ ku nying cam man ku pigulok ma nyen.

 8 Abivuto man abinindo i kwiyocwiny,

Pilembe in kendi, E Yehova, re m’iketho abekwo museme.

5 Winj lembe para, E Yehova;

Cik ithi pi niwinjo cur para.

 2 Winja kinde m’abekwayu kony i beng’i,

E Rwoth para man Mungu para, pilembe aberwo i beng’i.

 3 E Yehova, ibiwinjo dwanda kugweno;

Kugweno abikoro iri adieng’a para man abikuro dwokowang’e kud ava.

 4 Kum in i Mungu m’anyong’a nege ngo i lembe ma rac;

Ng’atu moko acel de mbe ma rac ma bedo karacelo kudi.

Idagu dhanu ceke ma timo lembe ma reco;

 6 Ibinyotho dhanu ma gicwayu vupo.

 7 Ento nikum mer peri ma lokere ngo ma dit, abimondo i ot peri;

Abirum piny yor i bang’ hekalu* peri ma leng’ nikum lworoni ma dit.

 8 E Yehova, tel wiya i bedopwe peri nikum judegina;

Kab ira macero cen kud i yo peri.

 9 Kum gin moko mbe ma giyero ma jucopo geno;

Paru ma reco kende re m’upong’ i igi;

Dwandgi en e liel ma thwolo;

Giwondo wang’ dhanu ku lebgi.

10 Ento Mungu bipoko lembe i wigi nia gi weg kosa;

Gamba ma gicamu gin gigi re ma biredhogi,

Dong’ jukabgi cen pilembe dubo migi dupa,

Kum gijai iri.

11 Ento dhanu ceke ma gipondo i beng’i anyong’a binegogi;

Saa ceke gibikok kud anyong’a.

Ibicero yo ceke m’ucidho i bang’gi,

Man ju ma gimaru nyingi anyong’a binegogi i ii.

12 Kum ibipoko mugisa iwi ng’atu moko ci ma pwe, E Yehova;

Ibitieko kumgi ku bero peri calu ma jutieko ko kum ku ban ma lac.

6 E Yehova, kud ijuka i saa mi ng’eicwiny peri,

Man kud itwinya kinde ma kwinyo meki.

 3 Eyo, wiya* unyothere lee dit,

Man abepenji, E Yehova, ebimedere nitundo awene?

 4 Loki man ilara,* E Yehova;

Bodha nikum mer peri ma lokere ngo.

 5 Kum jucopo weco* piri ngo i tho;

Man ng’a ma bipeki i Lieli?*

 6 Tego para uthum nikum cur m’acur ko;

Diewor traka atobo kavuto para ku piwang’a;*

Man atobo kabedo para ku wak.

 7 Tego mi wang’a uthum nikum can para;

Ecido* nikum dhanu ceke m’ubesenda.

 8 Wuai cen kud i vuta, wun ceke ma wutimo lembe ma reco,

Kum Yehova biwinjo dwal mi wak para.

 9 Yehova biwinjo kwac para;

Yehova bijolo rwo para.

10 Jubinyayu lewic iwi judegi para ceke man lworo bimakugi;

Gibidok ku ng’eygi nikum lewic m’unyay i wigi rek.

 2 Kan ungo gibiyeco iya* nziki nziki calu umvor,

Gibicidho kuda ma ng’atu moko mbe m’ulara.

 3 E Yehova Mungu para, tek atimo kosa moko i lembe maeni,

Tek atimo ku gondiri,

 4 Tek atimo racu ni ng’atu m’utima ber,

Kunoke ayaku jadegi para mananu,*

 5 Dong’ jadegi uriem toka man emaka;*

Wek enyon kwo para i ng’om

Man eketh dwong’ para urwiny i utur. (Sela)

 6 Ai malu i ng’eicwiny peri, E Yehova;

Cung i dhu judegi para ma gitie ku kwinyo i kuma,

Cew ira man keth pokolembe ma pwe utimere.

 7 Wek thek gicokiri i ng’eti tingili;

Man ibilokiri i kumgi niai ku malu.

Pok lembe para, E Yehova, nimakere ku bedopwe para

Man nimakere ku bedocu para.

Ento keth bedopwe ucungi,

Pilembe itie Mungu ma pwe ma ng’iyo i adunde man i paru ma thuc m’upondo.*

11 Mungu en e Japoklembe ma pwe,

Man Mungu twong’o pi pokolembe* pare kubang’ ceng’.

12 Tek ng’atu moko ulokere ngo, epaku palamularu pare;

Etelo athero pare man eketho ebedo ayika.

13 Eyiko ire jamlwiny ma nego nek;

Eketho athero pare ma lielo mac bedo ayika.

14 Nen ng’atu ma iye teng’ini ku lembe ma rac;

Egamu ic mi lembe ma rac man enyolo vupo.

15 Etong’o vur man eroke ma thuc,

Ento en gire epodho i vur m’etong’one.

16 Lembe ma rac m’enyayu bidwogo i wiye gire;

Man rop pare bidwogo i wiye gire.

17 Abipaku Yehova pi pokolembe pare ma pwe;

Abiwero wer mi pak* ni nying’ Yehova ma Ng’atu ma Malu ngbir.

8 E Yehova Rwoth mwa, nyingi dwong’ iwi ng’om zoo mire maa;

Iketho leng’o peri malu ngbir nisagu polo!*

 2 Kud i dhu awiya man mukere iketho tego ucungo

Pi jukwor peri,

Pi nimiyo dhu jadegi ku jaculkwor.

 3 Kan abeneno polo peri, tic mi cingi,

Dwi ku nyikaluku m’iyiko,

 4 Dhanu ma tho e en ang’o ma nia iketh paru peri i wiye,

Man wod dhanu ma nia idieng’ pire?

 5 Iketho ebedo piny nyanok nisagu jumalaika,*

Man ironye ku dwong’ man leng’o.

 6 Iketho ebim wi tic mi cingi;

Iketho gin ceke i the tiende:

 7 Udul rombe ceke ku dhieng’,

Man bende yedi mi lum,

 8 Winyo mi kor polo ku rec mi nam,

Piny ceke ma wotho i nam.

9 Abipeki kud adundena ceke, E Yehova;

Abikoro pi tic peri ceke ma wang’u ijo.

 2 Anyong’a binega man abipor ku mutoro piri;

Abiwero wer mi pak* ni nyingi, E Ng’atu ma Malu ngbir.

 3 Kinde ma judegina giloko ku ng’eygi,

Gibikier man gibitho kud i weng’i.

 4 Kum icero bang’a i lemkesi para ma kakare;

Ibedo iwi komker m’ibepoko lembe ku bedopwe.

 5 Ijuko thek man inyotho jutimrac,

Iruco nying’gi pi rondo ku rondo.

 6 Judegi ginyothiri mi nja;

Imugo adhura migi,

Man poy ma pigi ceke birwinyo.

 7 Ento Yehova ujany iwi komker mi nja;

Eketho komker pare ucungo nging’ nging’ pi pokolembe ma pwe.

 8 Ebipoko lembe iwi ng’om* zoo ku bedopwe;

Ebiketho lembe mi thek upokere atira.

 9 Yehova bidoko ni kapondo* ma museme ni ju ma jubesendo,

Kapondo ma museme i saa mi can.

10 Ju ma ging’eyo nyingi gibigeni;

Ibiwenjo ki ngo ju ma gibeyenyo kakeri, E Yehova.

11 Wuwer wer mi pak ni Yehova ma bedo i Sayuni;

Wuketh tic pare ung’eyere i kind dhanu.

12 Kum Ng’atu m’uculo kwor pi rimbgi ubepoy pigi;

Ebiwil ungo pi wak mi ju ma junyayu can i kumgi.

13 Nyuth ira bero, E Yehova; nen can ma ju ma gidaga gibenyayu i kuma,

In m’iting’a malu kud i dhugola mi tho.

14 Kara atwong’ pi tic peri m’uromo ku pak i dhugang’ pa Nyasayuni,

Man anyong’a nega i kum tic peri mi both.

15 Thek gipodho i vur ma gitong’o;

Tiendgi gigi umoko i voi ma giciko.

17 Jutimrac gibiloko ku ng’eygi gibidok yor i bang’ Liel,*

Man thek ceke ma giwil i kum Mungu.

18 Ento jubiwil ungo pi jacan saa ceke;

Kadi genogen mi ju ma mol birwinyo ki ngo.

20 Nyay lworo i igi, E Yehova,

Wek thek ging’ey nia gitie ndhu dhanu ma tho. (Sela)

 2 Jatimrac uberiemo tok ng’atu ma jakony pare mbe ku kuhaya,

Ento ebimoko en gire i gamba m’ecamu.

 3 Kum jatimrac ubelulere pir awanya* pare ma rac

Man ebemiyo mugisa ni ng’atu ma ketho cwinye hai i kum piny*

נ [Nun]

Eworo ngo Yehova.

 4 Ting’iri pa jatimrac ketho esayu ngo lembe;

Paru pare ceke tie kumae: “Mungu mbe.”

 5 Yo pare medere nidoko miero,

Ento enyang’ ungo i pokolembe peri;

Ecayu* judhoge ceke.

 6 Ewacu yor i adundene kumae: “Gin ma biyenga mbe;

Niai i kum dhanu m’utuk cil i kum dhanu m’utuk

Abineno ngo nyoth.”

 7 Dhoge upong’ kud alam, vupo, man dhaw;

The lebe upong’ ku yakini man gin ma timojo rac.

 8 Ekanu libo ceng’ini ku pacu m’i ng’ete;

Niai kaka m’epondo i iye enego ng’atu m’udubo ngo.

10 Erungo ng’atu m’emakune man ebole i ng’om;

Juruvwa gipodho i the lwete.*

Jaruvwa ubelokere i beng’i;

In i jakony pa nyathikic.*

15 Tur bot jatimrac man ng’atu ma rac,

Kara kinde m’ibisayu racu pare,

Ibinwang’e ngo.

18 Ibiketho lembe upokere pwe ni nyithikic man ni ju ma jurungo,

Kara dhanu ma tho mi ng’om e kud unyay lworo i igi kendo.

 2 Nen kite ma jutimrac gigomo ko i athero;

Giciko nying athero iwi thondhe,

Pi nikilo ju m’adundegi atira niai kud i mudho.

 3 Ka jurwombo kathere mi bedopwe,*

Weg bedopwe giromo timo ang’o?”

 5 Yehova ng’iyo won bedopwe man jatimrac;

Edagu* ng’atu moko ci m’umaru rop.

 6 Ebiketho uwic* bicwii iwi jutimrac;

Mac ku muganga man yamu ma thwoyo piny bibedo makapiny mi kikombe* migi.

12 Bodha, E Yehova, kum ng’atu mandha dong’ umbe;

Dhanu ma jugeno girwinyo kud i kind dhanu.

 2 Gicwayu ndra i kindgi;

Giwondo wang’jo ku dend dhoggi* man giweco kud adunde* mi vupo.

 3 Yehova bithumo dendhok ceke ma wondo wang’

Man leb ma lulere akeca,

 4 Ju ma gibeyero kumae: “Wabivoyo ku lebwa.

Watiyo ku dend dhogwa calu ma wamaru;

Ng’a ma bibedo jadit mwa?”

 5 “Nikum masendi mi ju ma jubenyayu can i kumgi,

Nikum cur mi jucan,

Abiai malu pi nibodhogi,” Yehova wacu.

 6 Wec pa Yehova tie leng’;

Gi calu mola ma tar ma julilo i uka mir ulobo,* ma judwoko leng’ wang’ abiro.

 7 Ibikuro kumgi, E Yehova;

Ibigwoko ng’atuman m’i kindgi ni dhanu m’utuk maeni pi nja.

 8 Jutimrac gibewotho kun ku kun ma gin m’ubecerogi mbe

Pilembe wot dhanu gibecwaku lembe ma rac.

 2 Cwinya* bidieng’,

Man can binego adundena kubang’ ceng’ nitundo awene?

 3 Nena man dwok ira lembe, E Yehova Mungu para,

Mii der ni wang’a, kara kud anind i tho,

 4 Kara jadegina kud uyer kumae: “Avoye!”

 5 An re ageno para mer peri ma lokere ngo;

Anyong’a binego adundena i kum tic peri mi both.

Kura migi unyothere man gitimo gin ma judagu;

Ng’atu moko mbe m’ubetimo gin ma ber.

 2 Ento Yehova neno wot dhanu niai kud i polo

Pi nineno ka nyo ng’atu moko nuti m’utie ku rieko,

Ka nyo ng’atu moko nuti m’ubeyenyo Yehova.

 3 Gin ceke gilokiri cen;

Gin ceke ginyothiri.

Ng’atu moko mbe m’ubetimo gin ma ber,

Kadok ng’atu acel de.

 5 Ento ndiri ma dit bimakugi,

Kum Yehova ni karacelo ku dhanu m’utuk ma pwe.

 6 Wu jutimrac, wubemito wunyoth pangulembe pa ng’atu ma ka kite mbe,

Ento Yehova tie karingo pare.

Kinde ma Yehova udwogo dhanu pare kud i ng’eca,

Wek mutoro neg Yakobo, wek anyong’a neg Israel.

 2 Ng’atu ma wotho i bedocu,

Ma timo gin m’atira

Man ma yero lemandha i adundene.

 3 Eyero ngo nying’ ku lebe,

Etimo ngo gin ma rac acel de ni jadhugola pare,

Man ecido ngo* jurimbe.

 4 Ekoyere cen ku ng’atu moko ci m’uromo ku cac,

Ento eyungo ju m’ulworo Yehova.

 5 Emiyo ngo sente pare pi ninwang’u faida i wiye,

Eyiyo ngo kanyaka pi ninyayu peko i kum ng’atu ma lembe mbe i wiye.

 3 Ju ma leng’ m’i ng’om,

Ju m’uromo ku yung ginyayu anyong’a lee i iya.”

Abikonjo ngo girathiera migi mi rimo,

Kadi dend dhoga de bilwong’o nying’gi ngo.

Anyong’a upong’ lee i weng’i;*

Mutoro* n’i yor i cingi mir acwic pi nja.

17 Winj kwac para m’akwayu ko pokolembe ma pwe, E Yehova;

Cik ithi kum wak para m’akwayu ko kony;

Winj rwo para m’abeyero m’umbe vupo.

 2 Dong’ ipok lembe pwe pira;

Dong’ weng’i unen gin m’atira.

 3 Ing’iyo i adundena, iliewa ku diewor;

Idwoka leng’,

Ibinwang’u ngo nia apangu lembe moko ma rac,

Man dhoga de udubo ngo.

 4 Pi tic mi dhanu ke,

Auro yo mi weg ayeki nimakere ku lembe mi dend dhogi.

 5 Wek dagutielo para ubed i yo peri

Kara tienda kud ukier.

 7 Nyuth mer peri ma lokere ngo i ayi ma wang’u ijo,

E Jalar mi ju m’ubeyenyo kapondo i cingi ma yor acwic

Kud i cing’ ju m’ubejai i kumi.

 8 Gwoka calu tongili weng’i;

Kana i the tipo vombi.

 9 Gwoka ni jutimrac ma gibesaya kud ali,

Ni judegina* ma gitieka tingili pi ninega.

10 Cwinygi udoko nwang’;*

Man dhoggi yero lembe ku kuhaya;

11 Kawoni dong’ gitwodowa;

Gisayu yore ma giredh kowa.*

12 Jadegi tie calu umvor m’ubekuro kud ava niyeco i cam pare nziki nziki,

Calu nyathin umvor m’uvuto m’ekanu libo.

13 Ai malu, E Yehova, cung i wang’e man redhe piny;

Lara* ku palamularu peri kud i cing’ jatimrac;

14 Lara ku cingi, E Yehova,

Kud i cing’ dhanu m’i ng’om maeni ma makapiny migi n’i kwo maeni,

Ju m’ipong’ogi ku piny ma beco m’imiyo

Man ma giweko giralaga ni wotgi dupa.

15 Ento an, abineno weng’i i bedopwe;

Nicew i vuti* uromo ira.

Mungu para en e cana para m’apondo i iye,

Ban para man tung’* para mi both,* kapondo* para ma museme.

 3 Abekwayu Yehova m’uromo ku pak,

Man ebibodha kud i cing’ judegina.

 4 Thol mi tho utieka;

Angongo pii mi dhanu ma kony migi mbe unyayu ndiri i iya.

 5 Thol mi Liel* udhoka;

Tho uketho uwic i wang’a.

 6 I can para, akwayu Yehova,

Amedara niwak i bang’ Mungu para pi nikwayu kony.

Kud i hekalu pare ewinjo dwanda,

Man wak para m’akwayu ko kony i bang’e utundo i ithe.

 7 E ng’om ucaku yengere man umiel;

Kathere mi gudi umiel krr

Man eyengere kun ku kun pilembe junyayu ng’eicwiny i Mungu.

 8 Yiro uidho malu kud i odi ume,

Man mac ma wang’u piny ruk uwok kud i dhoge;

Cugimac m’ubogere uwok kud i iye.

 9 Kinde m’ebeloro, elung’o polo piny,

Man mudho ma col bii ubino i the tiende.

11 Egam eumere ku mudho,

Afuru ma col bii m’upong’ ku pii ubedo ni hema i ng’ete tingili.

12 Kud i der ma n’i wang’e

Pei man cugimac m’ubogere ukadhu kud i afuru.

13 E Yehova ucaku mor i polo;

Ng’atu ma Malu ngbir uketho dwande uwinjere

Ku lungu pei man cugimac m’ubogere.

14 Ekilo athero man elalu judegi pare;

Evudho lukoth pare man enyotho wigi.

15 Gengi pa pii* ucaku nen terere;

Nikum kwinyo peri, E Yehova, kathere mi ng’om uwok kamaleng’,

Nikum lietho mi yuyo m’uwok kud i odi umi.

16 Erieyo cinge ku malu;

Emaka man epeya kud i pii ma thuc.

17 Ebodha kud i cing’ jadegina ma tek,

Kud i cing’ ju m’udaga ma gibino tek nisaga.

18 Gicokiri i wiya i nindo mi masendi para,

Ento Yehova utiela.

19 Etera kaka ma tie museme;*

Ebodha pilembe anyong’a unege i kuma.

20 Yehova umiyo ira sukulia nimakere ku bedopwe para;

Eculo ira pilembe cinga unyotho ngo lembe moko.*

21 Kum saa ceke awotho i yo pa Yehova,

Man adubo ngo ma nia awek ko Mungu para.

22 Pokolembe pare ceke n’i wang’a;

Abicayu ngo cik pare.

23 Abibedo ma kosa mbe i wiya i wang’e,

Man abigwokara kara kud apodh i dubo.

24 Dong’ Yehova ucul ira nimakere ku bedopwe para,

Man pilembe cinga unyotho ngo lembe moko i wang’e.

25 Ni ng’atu m’ugwoko bedoleng’ pare, inyutho bedoleng’;

Ni ng’atu ma kosa mbe i wiye, itimo m’umbe kosa;

26 Ni ng’atu ma leng’, inyuthiri giri leng’,

Ento ni ng’atu m’ugondere, itimo ku rieko.

27 Kum ibodho ju ma kakitgi mbe,*

Ento ijwigo jukuhaya.*

28 Kum in re m’icwinyo thala para, E Yehova,

Mungu para ma lero mudho ma an’i iye.

29 Ku kony peri, acopo cidho i kum udul mi weg ayeki;

Nikum tego pa Mungu, aromo piey ku wi gang’kidi.

30 Yo pa Mungu mandha tie leng’;

Lembe pa Yehova tie tetete.

32 Mungu mandha re ma ronya ku tego,

Man ebidwoko yo para atira.

33 Edwoko tienda rep calu tiend ruda;

Eketho acungo kaka m’uting’ere.

34 Eponjo cinga pi lwiny;

Bota copo gomo athero mi mola.

35 Imiyo ira ban peri mi both,

Cingi mir acwic utiela,

Man jwigiri peri doda.

36 Iyabu gengi ma lac kara awoth i iye;

Tienda* bikier ungo.

37 Abiriemo tok judegina man abimakugi;

Abiloko ngo ka fodi adarugi ceke ngo.

38 Abirungo igi ma dong’ gicopo ai malu kendo ngo;

Gibipodho i the tienda.

39 Ibimiyo ira tego pi nikiedo lwiny;

Ibiketho jukwor para gibirwombiri i the tienda.

40 Ibiketho judegina gibiloko kud i wang’a;*

Man abijigo* wi ju ma gidaga.

41 Gibewak nia jukonygi, ento ng’atu moko mbe ma romo larugi;

Gibewak kadok i bang’ Yehova, ento ebedwoko ngo igi lembe moko.

42 Abirego igi ma yom calu utur ma duny i yamu;

Abibayugi calu ucodho m’i gengi.

44 Nikum rwonglembe ma kabang’e mbe* ma gibiwinjo kende ci gibiwora;

Juwirok gibibino rum i wang’a ma kumgi ubemiel.

45 Tegocwiny mi juwirok bithum;*

Gibiwok kud i udi ma tek migi ma kumgi ubemiel.

47 Mungu mandha culo kwor pira;

Eketho dhanu doko wor i the loc para.

48 Ebodha kud i cing’ judegina ma kwinyo ubenegogi;

Iting’a malu iwi ju ma gibino i kuma;

Ibodha kud i cing’ jarop.

49 Pieno re m’abiyungi i kind dhanu mi thek mange, E Yehova,

Man abipaku* nyingi ku wer.

50 Etimo tic ma dongo pi nibodho* ubimo pare;

Enyutho mer ma lokere ngo ni ng’atu ma juwiro pare,

Ni Daudi man ni nyikwaye* pi nja.

19 Polo ubetwong’o pi dwong’ pa Mungu;

Kor polo ubetwong’o pi tic mi cinge.

 2 Kubang’ dieceng’ giwodho wec,

Man kubang’ diewor ginyutho ng’eyong’ec.

 3 Giweco ngo man lembe ma giyero mbe;

Dwandgi de winjere ngo.

 4 Ento dwandgi* ucidho i wang’ ng’om zoo,

Man rwonglembe migi utundo kadok i bang’ dhanu mi gund ng’om* ma bor.

Eguro hema ni ceng’ i polo;

 5 Cenge calu cwar mugole m’ubewok kud i kusika pare;

Anyong’a nege calu jarukara m’uberingo i yo.

 6 Ewok kud i tung polo acel,

Man etwodere nitundo i tunge ma kucelo;

Man gin moko mbe ma pondo ni liethone.

 8 Ng’ol m’uai i bang’ Yehova gi pwe, ginyayu anyong’a i adunde,

Lembang’ola pa Yehova tie leng’, eketho wang’ rieny.

10 Jumarugi lee nisagu mola ma kwar,

Nisagu mola ma kwar dupa ma leng’,*

Man gi mit nisagu miyokic, miyokic m’ubeton kud i kum pedone.

11 Jatic peri nwang’u cimowang’ i igi;

Niworogi miyo sukulia ma dit.

13 Man cer jatic peri kud i kum timo mi rikini;

Kud iwek gibim wiya.

E abibedo ma boo,*

Man m’umbe dubo ma pek.*

14 Dong’ wec mi dhoga man nyamu i lembe mir adundena unyay anyong’a i ii

E Yehova, Cana para man Jawarna.

 2 Wek eor iri kony kud i kabedo ma leng’

Man etieli niai kud i Sayuni.

 3 Wek epoy pi giramiya m’athiera peri ceke;

Wek ejol lam m’awang’a peri ku bero.* (Sela)

 4 Wek emii iri gin m’adundeni yenyo

Man eketh lembe ceke m’ipangu* ubed miero.

 5 Wabikok ku mutoro pi tic mi both peri;

Wabiting’o bendela mwa malu i nying’ Mungu mwa.

Edwoko ire lembe kud i polo pare ma leng’

Kud aloci* ma dongo m’uai i cinge mir acwic.

 7 Jumoko jengiri iwi magali man jumange ke iwi riuni,

Ento wan walwong’o nying’ Yehova Mungu mwa.

 8 Girwombiri man gipodho,

Ento wan waai malu man wacungo nging’ nging’ kendo.

21 E Yehova, anyong’a nego ubimo pi tego peri;

Anyong’a nege i kum tic peri mi both mire maa!

 2 Imiyo ire gin m’adundene yenyo,

Man ikwero ngo kwac mi dend dhoge. (Sela)

 3 Kum ibin irombo kude ku mugisa lee,

Iketho jamker mi wic mi mola ma kwar ma leng’* i wiye.

 4 Ekwayu kwo i beng’i, e imiye ire,

Kwo mi nindo ma dupa, ma rondo ku rondo.

 6 Iketho mugisa ukwanye pi nja;

Inyayu anyong’a i iye kud anyong’a m’i weng’i.

 7 Kum ubimo ugeno Yehova;

Ebiyengere ngo nyanok de nikum mer ma lokere ngo pa Ng’atu ma Malu ngbir.

 8 Cingi binwang’u judegi peri ceke;

Cingi mir acwic binwang’u ju ma gidegi.

10 Ibinyotho nyikwaygi* kud i ng’om,

Man kodhigi* kud i kind wot dhanu.

11 Kum gipangu nitimo lembe ma rac i kumi;

Man gicamu gamba ma birombo ngo.

12 Kum ibiketho gibiloko ku ng’eygi

Ma nwang’u itelo athero* peri i kumgi.*

Pirang’o ibebino ngo nibodha,

Pirang’o ibewinjo ngo wak mi can para?

 2 Mungu para, abelwong’o kpe ku dieceng’, ento ibedwoko ngo lembe;

Man abeling’ ungo ku diewor.

 3 Ento in i leng’,

Pak mir Israel utwodi* tingili.

 4 Wegwa giketho genogen migi i wii;

Gigeni man ibed ilarugi.

 5 Giwak i beng’i man giboth;

Gigeni man lewic unyay ungo i wigi.

 6 Ento an atie ukoko, atie dhanu ngo,

Adoko jamcac ni dhanu man gicenja.

 7 Dhanu ceke ma gibenena gibeng’iera;

Gibenzera man gibeyengo wigi ku cac ma gibewacu kumae:

 9 In i Ng’atu m’uwodha kud i ic,

Ng’atu m’uketho awinjara museme i dhu thuno maa.

10 Juweka i cingi kara igwoka* niai ma junyola;

Niai ma an’i maa, in i Mungu para.

11 Kud ibed bor kuda pilembe peko ni ceng’ini

Man ambe ku jakony mange.

12 Nyithi thwoni dhieng’ dupa utwoda;

Thwoni dhieng’ ma tek mi Bacan gitieka tingili.

13 Giyabu dhoggi ma lac i kuma,

Calu umvor m’uberundo m’ubeyeco i cam pare thindho thindho.

14 Jukonja calu pii;

Cogona ceke ulokiri kud i ujonj.

Adundena udoko calu udok;

Ebeleny i iya.

15 Tegona uthwo kaw calu adekle;

Leba umoko i kum ring’ laka;

Ibelora piny i utur mi tho.

16 Kum gwogi utieka tingili;

Gibecoro i kuma calu udul mi jutimrac,

Calu umvor, gikayu cinga ku tienda.

18 Gipoko i kendi para i kindgi,

Man gigoyo bongu para ku gagi.

20 Bodha* ni palamularu,

Bodh kwo para* ma pire tek kud i tiend* gwogi.

21 Bodha kud i dhug umvor, man kud i kum tung thwoni dhieng’ mi lum;

Dwok ira lembe man bodha.

22 Abinyutho nyingi ni umego para;

Man abipeki i kind cokiri.

24 Kum ecayu ngo kadi ecenjo de ngo masendi pa ng’atu ma jubesendo;

Ekanu ngo ire wang’e.

25 Abipeki i cokiri ma dit;

Abipong’o lembang’ola para ma ku kwong’ i wang’ dhanu ma gilwori.

26 Ju ma mol gibicamu man gibiyeng’;

Ju ma gibeyenyo Yehova gibipake.

28 Pilembe ker utie pa Yehova;

Ebebimo iwi thek.

29 Julonyo* ceke mi ng’om gibicamu man gibirum piny;

Ju ceke ma gibeloro piny i utur gibirumo cong’gi i wang’e;

Ng’atu moko acel de mbe m’i kindgi ma copo bodho kwo* migi.

30 Nyikwaygi* bitimo ire;

Jubiyero pi Yehova ni dhanu m’utuk m’ubino.

 2 Eketho avuto kaka ma lum uloth i iye;

Ebetelo wiya i kabedo mi yom ma pii* lee i iye.

 4 Kadok nwang’u abewotho i poga mi mudho ma bii,

Alworo ngo gin ma romo tima rac,

Kum in i kuda;

Undoy peri man uluth peri tego cwinya.*

Ikwiyo* wiya ku mo;

Kikombe* para upong’o bik.

 6 M’umbe jiji, bero man mer ma lokere ngo bilubo toka i nindo ceke mi kwo para,

Man abibedo i ot pa Yehova pi nindo para ceke.

24 Ng’om ku piny ceke ma n’i iye tie pa Yehova,

Ng’om ma cego piny man ju m’ubedo i wiye.

 2 Kum eketho kathere ucungo ma tek iwi nam

Man eketho ecungo nging’ nging’ iwi kulo.

 3 Ng’a ma copo idho iwi got pa Yehova,

Man ng’a ma copo cungo i kabedo pare ma leng’i?

 4 Ng’atu ma cinge nyotho ngo lembe man m’adundene leng’,

Ng’atu m’ukwong’o ngo kwong’ mi vupo ku kwo para,*

Kadi m’ukwong’o ngo kwong’ mir abombi.

 5 Ebinwang’u mugisa i bang’ Yehova

Man bedopwe* i bang’ Mungu mi both pare.

 6 Maeni dhanu m’utuk mi ju ma gibeyenyo kakeri,

Mi ju ma gibeyenyo weng’i, E Mungu pa Yakobo. (Sela)

 7 Wuting’ wiwu, wu dhugang’;

Wuyeburu,* wu dhugola ma con,

Kara Ubimo ma dwong’ umondi!

Tie Yehova ma tek man ma jarukara,

Yehova e jarukara i lwiny.

 9 Wuting’ wiwu, wu dhugang’;

Wuyeburu, wu dhugola ma con,

Kara Ubimo ma dwong’ umondi!

 2 Mungu para, ageno in;

Kud iwek lewic unyay i wiya.

 3 Andhandha lewic binyay ungo iwi ng’atu moko ci m’ugeni,

Ento lewic ubekuro ju ma gicibojo m’umbe thelembe.

 4 Keth ang’ey yo peri, E Yehova;

Ponja ku gengi peri.

 5 Keth awoth i lemandha peri man ponja,

Kum in i Mungu mi both para.

 6 E Yehova, poy i kum kisa peri, man i kum mer peri ma lokere ngo,

M’inyutho niai con.*

Poy pira calku mer peri ma lokere ngo,

Nikum bero peri, E Yehova.

 9 Ebitelo wi ju ma mol i lembe m’atira,*

Man ebiponjo ju ma mol ku yo pare.

10 Gengi pa Yehova ceke nyutho mer ma lokere ngo ku bedoleng’ pare

Ni ju ma giworo lembariba pare man poyowic pare.

11 Pi nyingi, E Yehova,

Wek kier para, kadok nwang’u e dit.

13 Ebinwang’u* gin ma ber,

Man nyikwaye* bicamu ng’om ni aba.

14 Ju ma gilworo Yehova re ma gibedo jurimbe ma ceng’ini,

Man eketho ging’ey lembariba pare.

15 Ang’ayu wang’a i bang’ Yehova saa ceke,

Pilembe ebigonyo tienda kud i voi.

16 Lok weng’i i bang’a man nyuth ira bero,

Pilembe atie kenda man jakonyna mbe.

17 Can mir adundena umedere ameda;

Lara kud i adieng’a para.

18 Nen can para, peko para,

Man wek dubo para ceke.

19 Nen maram judegina upong’ ko

Man kite ma lak adegi migi tek ko i kuma.

21 Dong’ bedocu man lembe m’atira m’abetimo ugwoka,

Kum ageno in.

26 Pok lembe para, E Yehova, kum awotho i bedocu para;

Aketho genogen para iwi Yehova m’umbe nibedo ku jiji.

 2 Ng’iya cuu, E Yehova, man ketha i amulaic;

Dwok pidoic para m’upondo* man adundena nyen.

 3 Kum mer peri ma lokere ngo n’i wang’a saa ceke,

Man abewotho i lemandha peri.

 4 Adikara ngo* ku dhanu ma gi juvupo,

Man auro ju ma gikanu rambgi.*

 5 Adagu bedo ku dhanu ma reco,

Man akwero nidikara* ku jutimrac.

 6 Abilwoko cinga pi ninyutho nia kosa mbe i wiya,

Man abidhoko ng’et pemlam peri, E Yehova,

 7 Pi niketho dwal mi dwoko foyofoc uwinjere

Man pi nitwong’o pi tic peri ceke ma wang’u ijo.

 8 Yehova, amaru ot m’ibedo i iye,

Kaka ma dwong’ peri bedo i iye.

 9 Kud iweya* cen karacelo ku judubo,

Kadi kud ikab kwo para cen karacelo ku dhanu ma weg rop,*

10 Ma cing’gi timo lembe mi lewic,

Man ma cing’gi ma yor acwic upong’ ku kanyaka.*

12 Tienda ucungo iwi ng’om ma kpee,

Abipaku Yehova i cokiri* ma dit.

 2 Kinde ma dhanu ma reco gicoro i wiya pi nicamu ring’ kuma,

Jukwor para ku judegina re ma gilund gikier man gipodho.

 3 Kadok udul askari uketho kagonjo i kuma,

Adundena bilworo ngo.

Kadok lwiny utuk i dhoga,

De asu abibedo ma cwinya tek.

 4 Akwayu gin acel i bang’ Yehova,

Eno re ma tie gin m’abiyenyo;

Nia abed i ot pa Yehova i nindo ceke mi kwo para,

Kara anen bero pa Yehova

Man anen hekalu* pare kilili.

 5 Kum ebikana i otbak pare i nindo mi can;

Ebikana kii i kaka m’upondo mi hema pare;

Ebiketha malu iwi cana.

 6 Kawoni wiya ubedo ating’a malu iwi judegi para ma gitieka;

Abithiero lam i hema pare ku kok mir anyong’a;

Abiwero wer mi pak* ni Yehova.

 7 E Yehova, winja kinde m’abewak,

Nyuth ira bero man dwok ira lembe.

Itie jakonyna;

Mungu mi both para kud ikuna kadi kud iweka.

10 Kadok nwang’u vwa giku maa gikuna,

Yehova en gire bijola.

11 Ponja i yo peri, E Yehova,

Tel wiya i yo mi bedopwe pi jukwor para.

12 Kud imiya i cing’ judegi para,*

Kum jumulembe mi ndra giai i kuma,

Man gibecima ku rac.

13 Ka nwang’u ayiyo ngo nia abineno bero pa Yehova i ng’om mi ju ma kwo,*

Nwang’u eni ani kani?

14 Gen Yehova,

Cwinyi bed tek man bed tek.*

28 Abemedara nilwong’o in, E Yehova Cana para;

Kud idhing’ ithi ira.

Kum kan ibedo ling’ ira,

Abidoko calu ju ma gibeloro piny i vur ma lieng’.*

 2 Winj kwac para kinde m’abewak i beng’i pi nikwayu kony,

Ma nwang’u ating’o cinga malu yor i bang’ kusika m’upondo mi ot peri ma leng’.

 3 Kud iweya cen karacelo ku jutimrac, karacelo ku ju ma gitimo gin ma nyayu can ijo,

Ju ma giweco lembe mi kwiyocwiny ku dhanu wagi ma ke lembe ma rac n’i adundegi.

 4 Cul igi pi tic migi,

Nimakere ku lembe ma reco ma gibetimo.

Cul igi pi tic mi cing’gi,

Calku lembe ma gitimo.

 5 Kum giketho ngo wigi i kum tic pa Yehova,

Kadi i kum tic mi cinge.

 6 Dong’ pak ubed ni Yehova,

Pilembe ewinjo kwac para m’abekwayu ko kony.

 7 Yehova en e tego para man ban para,

Adundena ugeno en.

Anwang’u kony pare, man mutoro unyay i adundena,

Pieno abipake ku wer para.

 8 Yehova en e tego ni dhanu pare;

En e kaka ma tek ma kelo both ma dit ni ng’atu ma juwiro pare.

29 Wumii ni Yehova gin m’eromo ko, wu wot dhanu ma tek,

Wumii ni Yehova gin m’eromo ko nikum dwong’ man tego pare.

 3 Dwand Yehova ubewinjere iwi pii dupa;

Mungu ma dwong’ ubemor calu lukoth.

 4 Dwand Yehova tie ku tego;

Dwand Yehova dwong’.

 5 Dwand Yehova ubeturo yend tido;

Eyo, Yehova uberungo yend tido mi Lebanon.

 6 Eketho Lebanon* ubepor calu thwon dhiang’,

Man Sirion calu nyathi thwon dhiang’ mi lum.

 8 Dwand Yehova ubeyengo langa;

Yehova uketho langa mi Kadec ubeyengere.

 9 Dwand Yehova mielo kum ruda man ketho enyol

Elwero luli lelele.

10 Yehova ujany iwi komker pare iwi pii dupa;*

Yehova ujany iwi komker pare calu Ubimo pi rondo ku rondo.

30 E Yehova, abipeki, kum iting’a* malu;

Iweko ngo anyong’a neg judegina i kuma.

 4 Wuwer wer mi pak* ni Yehova, wu ju ma wugwoko bedoleng’ mwu ire,

Wupak nyinge* ma leng’;

 5 Kum nibedo the kwinyo pare en e mi nindo moko kende,

Ento ninwang’u bero pare en e mi kwo zoo.

 8 Amedara nilwong’o in, E Yehova,

Man amedara nikwayu nia anwang’ bero i weng’i Yehova.

11 Iloko wak para ni miel;

Ikabu kendi para mi saki kud i kuma, man ironya kud anyong’a,

12 Kara awer* pak peri man kud abed ling’.

Bed ira ni got ma museme calu kaka ma tek,

Kabedo ma tek pi nibodha.

 3 Kum in i cana para man kaka ma tek para;

Pi nyingi ibipeya man ibitelo wiya.

 4 Ibigonya kud i voi ma juciko ira i amung’,

Pilembe in i ot ma tek para.

 6 Adagu ju ma giworo ayi gin m’acwiya ma swa ma tijgi mbe,

Ento an, aketho genogen para i Yehova.

 7 Anyong’a binega lee dit pi mer peri ma lokere ngo,

Kum ineno masendi para;

Ing’eyo cuu can para ma dit.*

 8 Imiya ngo i cing’ jadegi,

Ento iketho acungo i kaka ma museme.*

10 Kwo para ubethum ku can

Man oro para ku cur.

Tego para ubejwik nikum kosa para,

Man tego mi cogona ubethum.

11 Judegina ceke gibecaya,

Asagane judhugola para.

Man ju ma wang’eyara kugi gibelwora;

Ka ginena i kind dhanu giringa.

12 Gikaba cen kud i adundegi* man giwil kuda calu ve dong’ atho;

Atie ve agulu m’ung’eny.

13 Awinjo rwonglembe dupa ma reco mi vupo;

E lworo utieka tingili.

Kinde ma gicokiri karacelo ni acel i kuma,

Gicamu gamba kara gikab kwo* para cen.

16 Keth weng’i urieny iwi jatic peri,

Bodha ku mer peri ma lokere ngo.

Wek lewic unyay iwi jutimrac;

Dong’ jumii dhoggi i Liel.*

18 Dong’ dendhok ma cwayu vupo udok ajuba,

Dendhok ma weco ku ting’iri, ku kuyunga man cac i kum won bedopwe.

Ikane ni ju ma gilwori,

Man inyuthe i wang’ dhanu ceke pi ju ma gibepondo i beng’i.

20 Ibigwokogi i kaka m’upondo m’i vuti

Ni gamba mi dhanu;

Ibikanugi i hema peri

Ni piem mi leb.

21 Dong’ Yehova unwang’ pak,

Kum i ayi ma wang’u ijo, enyutho ira mer pare ma lokere ngo i adhura ma jutieko.

24 Cwinywu bed tek man wubed tek,*

Wu ju ceke ma wubekuro Yehova.

 2 Jamutoro tie ng’atu ma Yehova uketho ngo kosa i wiye,

M’abombi mbe i adundene.

 5 Tokcenne atuco dubo para iri;

Aumo ngo wi kosa para.

 6 Eno re m’uketho ng’atu moko ci m’ugwoko bedoleng’ pare birwo i beng’i

Kinde ma fodi jucopo nweng’i.

 7 Itie ira kapondo;

Ibigwoka ni can.

 9 Kud idok* calu riuni* kadi kana ma rieko migi mbe

M’ukwayu jutel wi tego migi ku gwang’ kadi kud adila ma jutwiyo i dhoggi

Ka gibin i beng’i.”

10 Litho pa jatimrac gi dupa;

Ento ng’atu m’ugeno Yehova, mer pare ma lokere ngo tieke gbur.

11 Mutoro negwu nikum Yehova man wubed kud anyong’a, wu weg bedopwe;

Wukok kud anyong’a, wu ju ceke m’adundewu atira.

 2 Wudwok foyofoc ni Yehova kud adungu;

Wuwer wer mi pak* ire ku jamgoyo wer ma thondhe apar.

 3 Wuwer ire wer ma nyen;

Wugoy jamgoyo wer ma juthondhe ku bodho ma wubekok kud anyong’a.

 4 Kum lembe pa Yehova en e atira,

Man gin ceke m’etimo tie ma jugeno.

 6 Nikum wec pa Yehova, polo ucwiyere,

Man nikum yuyo* m’i dhoge, piny ceke m’i igi.*

 7 Ecoko dhu pii m’i nam calu ve juculo dhoge acula;

Eketho pii m’ubecorere ubed i dero.

 9 Kum eweco, e piny ucwiyere;

Eng’olo, e pinyne ucungo nging’ nging’.

10 Yehova unyotho camugamba* mi thek;

Eranyu pangulembe* mi dhanu.

11 Ento yub* pa Yehova bicungo mi nja;

Paru mir adundene tie niai kum dhanu m’utuk cil i kum dhanu m’utuk.

12 Jumutoro gitie thek ma Mungu migi tie Yehova,

Gi dhanu m’eng’iyo ni giralaga pare ma dhe.

13 Yehova neno yo piny niai kud i polo;

Eneno wot dhanu ceke.

14 Kud i kabedo pare,

Eneno dhanu m’i wi ng’om cuu.

15 En re m’ebinyo adunde dhanu zoo;

Eng’iyo i tic migi ceke.

16 Ubimo moko mbe ma both nikum udul askari ma dit;

Jarukara both ungo nikum tego pare ma dit.

17 Geno riuni pi both* en e genogen ma iye nanu;

Tego pare ma dit nyutho ngo nia jubiboth.

18 Nen! wang’ Yehova ubeneno wi dhanu ma lwore,

Dhanu ma gibekuro mer pare ma lokere ngo,

19 Pi nilarugi* kud i tho

Man nigwokogi gibed kwo i saa mi ndru.

21 Anyong’a nego adundewa pire,

Kum wageno nyinge ma leng’.

22 E Yehova, dong’ mer peri ma lokere ngo ubed i wiwa,

Kinde ma wabemedara nikuri.

34 Abipaku Yehova saa ceke;

Pak pare bibedo iwi dend dhoga thiri thiri.

 2 Abilulara* nikum Yehova;

Ju ma mol biwinjo man anyong’a binegogi.

 3 Wuyung Yehova karacelo kuda;

Wek wadod nyinge karacelo.

 5 Ju m’uneno bang’e wang’gi rieny kud anyong’a;

Lewic nego wang’gi ki ngo.

 7 Malaika pa Yehova ketho kagonjo gbur i ng’et ju m’ulwore,

Man elarugi.

 8 Wubil man wunen nia Yehova e ber;

Jamutoro tie ng’atu m’upondo i bang’e.

 9 Wulwor Yehova, wu ju ma leng’ pare ceke,

Kum ju ma gilwore gikoso ngo gin moko.

10 Kadok nyithindh umvor* ma gi tek de kec unegogi,

Ento ju m’ubeyenyo Yehova gibikoso ngo gin moko ma ber.

11 Wubin, wota, wuwinja;

Abiponjowu ku lworo pa Yehova.

12 Ng’a m’i kindwu m’ubemito ekwo ku mutoro

Man ekwo kud anyong’a pi nindo ma dupa?

13 Dong’ gwok lebi kud i kum gin ma rac,

Man dend dhogi kud i kum cwayu vupo.

14 Lokiri cen kud i kum lembe ma rac man tim lembe ma ber;

Yeny kwiyocwiny man riem toke.

15 Wang’ Yehova n’i wi weg bedopwe,

Man ithe winjo wak migi ma gibekwayu ko kony.

16 Ento wang’ Yehova n’i kum ju ma gibetimo lembe ma rac,

Pi niruco poy ceke ma pigi ku wi ng’om.

17 Weg bedopwe giwak, e Yehova uwinjo;

Elarugi kud i can migi ceke.

18 Yehova ni ceng’ini ku ju m’adundegi tur;

Ebodho ju ma cwinygi tur.*

19 Masendi* pa won bedopwe gi dupa,

Ento Yehova lare kud i igi ceke.

20 Ebegwoko cogone ceke;

Acel de mbe m’i kindgi m’utur.

21 Peko ma dit bikelo tho iwi jatimrac;

Jubing’olo kosa iwi ju ma gidagu won bedopwe.

22 Yehova waru kwo mi jutic pare;

Ng’atu moko acel de mbe m’i kind ju m’upondo i bang’e ma jubing’olo kosa i wiye.

35 E Yehova, cer bang’a i kesi i dhu judhoga;

Kied i dhu ju ma gibekiedo i dhoga.

 2 Ting’ ban peri ma nok* ku ma dit,

Man ai icer bang’a.

 5 Dong’ gidok calu cung piny i wang’ yamu;

Dong’ malaika pa Yehova uriemgi cen.

 6 Dong’ yo migi ubed col man udok foth

Kinde ma malaika pa Yehova uberiemo tokgi.

 7 Kum giciko ira voi ka m’upondo kara umaka mi mananu;

Gitong’o ira vur ma thelembene de mbe.

 8 Wek nyoth utund i wigi rek;

Wek voi ma giciko umak gin;

Wek gipodh i iye man ginyothiri.

 9 Ento mutoro binega* nikum Yehova;

Abibedo kud anyong’a nikum tic pare mi both.

Ilaru ng’atu ma jakony pare mbe kud i cing’ ju ma tek,

Ng’atu ma jakony pare mbe ku jacan kud i cing’ ju m’ubeyakugi.”

11 Jumulembe ma reco gibino,

Man gibepenja ku lembe m’ang’eyo pire ngo.

12 Giculo ira wang’ bero ku racu,

Uketho can umondo i iya* lee dit.

13 Ento kinde ma gibetwoyo, aronyara ku kendi mi saki;

Anyayu can i iya gira* ku kwirocam,

Man kinde ma rwo para udwogo ma kawang’e mbe,*

14 Awotho kun ku kun ve an’i lemcan pa jarimona kunoke p’umira;

Akulo wiya ku can calu ng’atu m’ubewagu min.

15 Ento kinde m’akier, mutoro unegogi man gicokiri karacelo;

Gikanu libo karacelo pi ninega;

Giyeco iya nziki nziki man giling’ ungo.

16 Dhanu ma giworo ngo Mungu ging’iera ku cac*

Man gikayu lakgi i kuma.

Lara* kud i ali migi ma gicoro ko rek i wiya,

Bodh kwo para ma pire tek* ni nyithindh umvor.*

18 E abidwoko iri foyofoc i cokiri ma dit;

Abipeki i kind piro mi dhanu.

19 Kud iwek ju ma gi judegina ma thelembene mbe gifoyiri pi can para;

Kud iwek ju m’udaga mananu gidii wang’gi i ayi ma rac.

20 Kum giyero ngo wec mi kwiyocwiny,

Ento gipangu lemndra i kum dhanu ma giweg kwiyocwiny mi ng’om.

21 Giyabu dhoggi ma lac pi nidota,

Ma nwang’u gibeyero ko kumae: “Aha! Aha! wang’wa udaru neno lembe m’itimo.”

23 Cew man ai malu pi nicero bang’a,

Yehova Mungu para, cer bang’a i kesi para.

24 Pok lembe para nimakere ku bedopwe peri, E Yehova Mungu para;

Kud iwek gifoyiri pi can para.

26 Wek gin ceke ginwang’ lewic man acidi,

Gi ju ma gibefoyiri pi can para.

27 Ento wek ju ma mutoro negogi pi bedopwe para gikok kud anyong’a;

Dong’ giyer thiri thiri kumae:

28 E leba bikoro pi* bedopwe peri

Man bipeki dieceng’ duu.

36 Dubo ubeweco i adunde jatimrac,

Lworo pa Mungu umbe nyanok de i the wang’e.

 2 Kum enenere gire nia pire tie tek lee

Uketho eng’iyo ngo man edagu ngo kosa pare.

 3 Wec mi dhoge timojo rac man en e mir abombi;

Enyutho ngo rieko pi timo gin ma ber.

Enwang’ere i yo ma ber ungo;

Ecerere ngo i kum lembe ma rac.

 5 E Yehova, mer peri ma lokere ngo utundo i polo,

Bedoleng’ peri utundo i afuru.

 6 Bedopwe peri calu gudi ma dongo;*

Lembapoka peri calu pii ma lac man ma thuc.

Wot dhanu gipondo

I the tipo vombi.

 8 Gimadhu miyo m’upong’ i ot peri nitundo ma giyeng’,

Iketho gimadh kulo mi mutoro peri.

 9 Kulo mi kwo n’i beng’i;

Nikum der peri waneno der.

10 Mediri ninyutho mer peri ma lokere ngo ni ju m’ung’eyi,

Man bedopwe peri ni ju m’adundegi atira.

11 Kud iwek tiend jakuhaya unyona

Kunoke cing’ jatimrac uriema.

12 Kuca jutimrac gipodho;

Juredhogi piny man gicopo ai ungo malu.

37 Ng’eicwiny kud unegi* i kum dhanu ma reco

Kadi kumira de kud unegi i kum jutimrac.

 2 Gibithwo pio calu lum

Man gibiner calu lum ma numu m’arusi.

 3 Gen Yehova man itim gin ma ber;

Kwo iwi ng’om man itim ku gwoko bedoleng’.

 4 Nwang’ anyong’a ma dit i Yehova,

Man ebimiyo iri yeny mir adundeni.

 5 Wek yo peri i cing’* Yehova,

Gene man ebitimo lembe piri.

 6 Ebiketho bedopwe peri urieny calu mombwa,

Man bedatira peri calu ceng’ mi dieceng’.

 7 Bed ling’ i wang’ Yehova

Man kure ku cirocir.

Ng’eicwiny kud umeki

I kum ng’atu m’ubetuc niketho pangulembe pare ma reco utimere.

 8 Wek ng’eicwiny man wek kwinyo cen;

Ng’eicwiny kud umeki, imaru timo lembe ma rac.*

 9 Kum jubikabu jutimrac cen,

Ento ju m’ugeno Yehova gibicamu ng’om ni aba.

10 Edong’ nyanok ci, e jutimrac bibedo mbe;

Ibineno kaka ma gibino i iye,

Ento gibibedo mbe keca.

11 Ento ju ma mol gibicamu ng’om ni aba,

Man gibibedo kud anyong’a lee nikum kwiyocwiny ma dit.

12 Jatimrac ubecamu gamba i kum won bedopwe;

Ebekayu lake i kume.

13 Ento Yehova bing’iere,

Kum eng’eyo nia nindo pare bibino.

14 Jutimrac giwodho palamularu migi man gigomo* athero migi

Pi niredho ju ma jubesendo man jucan,

Pi ninego ju ma yo migi atira.

15 Ento palamularu migi bicobo adundegi gigi;

Athero migi bitur.

16 Piny ma nok pa won bedopwe

Ber ma sagu piny m’upong’ mi jutimrac dupa.

17 Kum bot jutimrac bitur,

Ento Yehova bikonyo weg bedopwe.

18 Yehova ung’eyo gin ma ju ma lembe mbe i wigi gibekadhu kud i iye,*

Man giralaga migi bibedo mi nja.

19 Lewic binyay ungo i wigi i nindo mi can;

I saa mi ndru gibibedo ku cam lee.

20 Ento jutimrac gibirwinyo,

Judegi pa Yehova gibirwinyo calu leng’o pa luba;

Gibiduny calu yiro.

21 Jatimrac gamu banja man eculo ngo,

Ento won bedopwe miyo ku berocwinye* man enyutho kisa.

22 Ju ma Mungu umiyo igi mugisa gibicamu ng’om ni aba,

Ento ju m’elamu ebinyothogi cen.

23 Yehova telo wi dagutielo pa ng’atini*

Kan anyong’a unege i kum yo pa ng’atune.

24 Kadok nwang’u ekier, ebipodho ngo arieba wang’e,

Kum Yehova umaku cinge.*

25 Naka abino aradu man kawoni atii,

Ento aneno ngo won bedopwe moko ma juwenjo,

Kadi nyithindhe m’ubeyenyo cam.*

26 Saa ceke emiyo ku berocwinye,

Man nyithindhe gibinwang’u mugisa.

27 Lokiri cen kud i kum gin ma rac man tim gin ma ber,

E ibibedo nja.

28 Kum Yehova umaru lembe m’atira,

Man ebiwenjo ngo ju ma gibegwoko bedoleng’ migi ire.

Gibibedo agwoka saa ceke;

Ento jubinyotho nyikway jutimrac cen.

29 Weg bedopwe gibicamu ng’om ni aba,

Man gibikwo i wiye mi nja.

30 Dhu won bedopwe wodho rieko,*

Man lebe weco iwi lembe m’atira.

31 Cik pa Mungu pare n’i adundene;

Tiende bikier ungo.

32 Jatimrac neno won bedopwe cuu,

M’eyenyo ko nia enege cen.

33 Ento Yehova biwenje ngo i cing’ ng’atuno

Kadi ebinwang’u ngo nia e jakosa kinde ma jupoko lembe i wiye.

34 Gen Yehova man lub yo pare,

Ebidodi kara icam ng’om ni aba.

35 Aneno jatimrac ma kisa mbe i iye

Ubejany calu yen m’udinyo i ng’om m’etwii i iye.

36 Ento rek kumeni erwinyo man ekadhu;

Ayenye kpe re anwang’e ngo.

37 Nen cuu ng’atu ma lembe mbe i wiye,*

Man keth weng’i kilili i kum ng’atu m’atira,

Kum kwiyocwiny re m’ukuro ng’atu maeno.

38 Ento jubinyotho judubo ceke;

Jubikabu anyim mi jutimrac.

39 Both mi weg bedopwe ai i bang’ Yehova;

En e ot ma tek migi i saa mi can.

Ebilarugi kud i cing’ jutimrac man ebibodhogi,

Kum gipondo i bang’e.

38 E Yehova, kud ijuka ku ng’eicwiny,

Kadi kud itwinya ku kwinyo.

 2 Kum athero peri unyang’ i kuma,

Man cingi ubenura.

 4 Kum kosa para ukadhu wiya;

Calu ter ma pek; gi lee dit, acopo yeyogi ngo.

 5 Rem para ubeng’wii man etop

Nikum kasegu para.

 6 Cwinya ng’abere man tegona thum pet;

Abedhokara duu ku can.

 7 Gin moko bewang’u iya,*

Kuma ceke uberemo.

 8 Avoc man arungara ceke;

Abecur ma tek* pi can mir adundena.

 9 E Yehova, yeny para ceke n’i weng’i,

Man cur para upondo ngo iri.

10 Adundena ubedhongo gbli gbli, tego para uweka,

Man der m’i wang’a de uthum.

11 Jurimba man juwodha gibelwora nikum rem para,

Man ju ma wang’iyo kugi cuu gicungo ku bor.

12 Ju ma gibeyenyo kwo para giciko uwic;

Ju ma gibesayu nitima rac giweco pi nyoth;

Gibepido lembabombi dieceng’ duu.

13 Ento calu udhing’, abewinjo ngo;

Calu ajuba, abeyabu ngo dhoga.

14 Adoko calu ng’atu ma winjo ngo lembe,

Ma dhoge copo yero ngo lembe moko pi nicero bang’e.

15 Kum akuro in, E Yehova,

Man idwoko ira lembe, E Yehova Mungu para.

16 Kum awacu kumae: “Kud iwek judegina gifoyiri pi can para

Kadi gidodiri i wiya kinde ma tienda kier.”

17 Kum nwang’u abecirwombara,

Man litho para umoko kii i kuma.

18 Atuco kosa para;

Wiya unyothere pi dubo para.

19 Ento judegi para gi fulful* man gi tek,*

Ju ma gidaga mananu ginyay anyaya.

20 Giculo ira kawang’ bero ku racu;

Gijai i kuma pilembe abino timo gin ma ber.

21 Kud iwenja, E Yehova,

E Mungu, kud ibed bor kuda.

22 Bin ikonya pio,

E Yehova, in m’i both para.

39 Awacu kumae: “Abigwoko yo para

Kara kud adub ku leba.

Abitwiyo dhoga kud utwindi

Tekene fodi ng’atu ma rac n’i vuta ci.”

 2 Aweco ngo man abedo ling’;

Aling’ kadok pi gin ma ber,

Ento litho para ubino lee.*

 4 “E Yehova, konya ang’ey kite ma ajiki para bibedo ko,

Man wend nindo para,

Kara ang’ey kite ma kwo para tie ko adundo.*

 5 Kum idwoko nindo mi kwo para nok;

Man nindo mi camu ng’om para en e calu gin moko ngo* i weng’i.

 9 Abedo ling’;

Acopo yabu dhoga ngo,

Pilembe in re m’itimo gin maeni.

11 Itwinyo ng’atini ku matira m’imiyo ire pi kosa pare,

Inyotho piny ma pigi tek lee i iye tap calu ma rudho nyotho ko.

12 Winj rwo para, E Yehova,

Winj wak para m’akwayu ko kony.

13 Kud inena ku kwinyo kara anyong’a unega kendo,

Ma fodi atho ngo man abedo mbe.”

40 Ageno Yehova kud adundena ceke,*

E eciko ithe* i bang’a man ewinjo wak para m’akwayu ko kony.

 2 Ewodha kud i vur ma iye bewoy,

Kud i ucodho ma thuc.

Man eketho acungo iwi cana;

Eketho awotho kaka ma tek.

 3 I ng’eye, eketho wer ma nyen i dhoga,

Ma en e pak ni Mungu mwa.

Dhanu dupa gibineno ku lworo

Man gibiketho genogen migi iwi Yehova.

 4 Jamutoro tie ng’atu m’ugeno Yehova

Man ma dikere ngo ku jujai kadi ku dhanu ma reco.*

E Yehova Mungu para,

Tic peri wang’u ijo man paru peri yor i bang’wa gi dupa;

Ng’atu moko mbe ma jucopo poro kudi;

Kan apimo niyero pigi man niweco pigi,

Gi lee dit mir akwana.

 6 Iyenyo ngo* lam kadi girathiera,

Ento iyabu itha pi niwinjo.

 8 E Mungu para, anyong’a nega nitimo yeny peri,

Man cik peri n’i adundena.

Nen! E Yehova, acero ngo dend dhoga

Calu m’ing’eyo ma ber.

10 Aumo ngo wi bedopwe peri i adundena,

Abetwong’o saa ceke nia itie Mungu ma jugeno man Mungu ma bodhojo.

11 E Yehova, kud icer kisa peri ira,

Timba mer peri ma lokere ngo man lemandha peri ugwoka saa ceke.

Kosa para gi dupa akeca uketho ginura man acopo neno ngo yo para;

Gi lee ma sagu yuk wiya,

Pieno amora thum i kuma.

14 Wek dhanu ceke ma gisayu nikabu kwo* para

Lewic unyay i wigi man gidok pang’ pang’.

Wek ju m’anyong’a negogi i masendi para

Gilok ku ng’eygi ku lewic.

16 Ento wek ju ma gibeyenyo kakeri,

Mutoro man anyong’a neggi i kumi.

17 Ento an, jakonyna mbe man a jacan;

Dong’ Yehova ulok wang’e yor i bang’a.

Itie jakonyna man jalarna;

E Mungu para, kud igal.

41 Jamutoro tie ng’atu m’ubedieng’ pi ng’atu ma ka kite mbe;

Yehova bilare i nindo mi can.

Jubiwacu nia e jamutoro iwi ng’om;

Ibimiye ngo ni yeny* mi judegi pare.

 3 Yehova bijenge iwi kavuto mi remo pare;

Kinde m’ebetwoyo ibiloko kavuto pare ceke.

Eyenyo lembe moko ma copo tima rac kara ecidh eyer;

E i ng’eye ewok man elale kaka moko ci.

 7 Ju ceke ma gidaga gibemung’ i kindgi;

Gibepangu lembe ma rac i kuma kumae:

 8 “Lembe moko ma pek* uwok i wiye;

Kawoni ma dong’ en’i ng’om, ebiai ungo kendo malu.”

 9 Kadok ng’atu ma wabedo kude ku kwiyocwiny, ma en e ng’atu m’ageno,

M’ubed ucamu mukathi para, uting’o ufuny tiende* i kuma.

10 Ento in, E Yehova, nyuth ira bero man ting’a malu,

Kara acul igi wang’ lembe ma gitimo.

12 Ento an, ibetiela pi bedocu para;

Ibiketho abibedo i vuti pi nja.

13 Dong’ jupak Yehova Mungu mir Israel

Rondo ku rondo.*

42 Calu ruda m’ubesayu ka pii m’ubemol kud ava,

An de abesayu* kakeri kumeno, E Mungu.

 3 Piwang’a udoko ni cam para dieceng’ ku diewor;

Dieceng’ duu dhanu ginywara kumae: “Mungu perine ni kani?”

 4 Abepoy i kum lembe maeni, man akoro iri kite m’awinjara ko,*

Kum con abed awotho karacelo kud udul dhanu;

Abed awotho kamaleng’* i wang’gi kinde ma wacidho i ot pa Mungu,

Ku dwal mi mutoro man mi dwoko foyofoc,

Ma en e dwand udul ma gibetimo foc.

Abikuro Mungu,

Kum fodi asu abipake, en m’e Jalarna ma Dit.

Eno re m’uketho abepoy piri,

Niai kud i ng’om mi Yordan man kud iwi usimbru Hermon,

Niai kud iwi Got Mizar.*

 7 Pii ma thuc ubelwong’o pii ma thuc

Ku ba dwand pii peri m’ubekworere.

 8 Yehova binyutho ira mer pare ma lokere ngo dieceng’,

Man diewor wer pare bibedo karacelo kuda,

Ma en e rwo ni Mungu m’umiyo ira kwo.

10 Judegina ma gidaga kud adegi mi nek* gibenywara;

Dieceng’ duu gibenywara kumae: “Mungu perine ni kani?”

Abikuro Mungu,

Kum fodi asu abipake, en m’e Jalarna ma Dit man Mungu para.

43 Pok lembe para, E Mungu,

Cer bang’ kesi para i dhu thek ma lworo ngo Mungu.

Dong’ gitel wiya;

Wek gitera i bang’ got peri ma leng’ man i bang’ hema ma dit mi thier peri.

 4 E abibino i bang’ pemlam pa Mungu,

I bang’ Mungu ma tie anyong’a para ma dit.

Abikuro Mungu,

Kum fodi asu abipake, en m’e Jalarna ma Dit man Mungu para.

44 E Mungu, wawinjo ku ithwa giwa,

Kwaruwa gikoro iwa

Gin m’itimo i nindo migi,

I nindo ma yang’ con.

 2 Iriemo thek ku cingi

Man iketho kwaruwa gibedo keca.

 3 En e nikum palamularu migi ngo re ma gimaku ng’ombe,

Man botgi gigi ngo re m’ukelo igi aloci.

Ento en e nikum cingi ma yor acwic ku boti man der m’i weng’i,

Kum anyong’a unegi i kumgi.

 4 In Ubimo para, E Mungu;

Ng’ol* aloci ma zoo* ni Yakobo.

 5 Nikum tego peri, wabiriemo jukwor m’ubino i kumwa;

I nyingi, wabinyono ju ma giai i kumwa.

 6 Kum ageno ngo athero para,

Man palamularu para copo bodha ngo.

 7 In re m’ibodhowa kud i cing’ jukwor mwa,

In re m’inyayu lewic iwi ju m’udaguwa.

 8 Wabipaku Mungu dieceng’ duu,

Man wabipaku nyingi nja. (Sela)

 9 Ento kawoni ibayuwa man inyayu lewic i wiwa,

Man dong’ iwok ungo karacelo kud udul mony mwa.

10 Iketho waberingo kud i wang’ jukwor mwa;

Ju ma gidaguwa gibecoko piny ceke ma gimaru.

11 Icibowa kara jucamwa calu rombe;

Ilaluwa i kind thek.

12 Ilworo dhanu peri ku welpiny ma nok magwei;

Inwang’u faida moko ngo i lworne.*

13 Inyayu lewic i wiwa i wang’ judhugola mwa,

Man iketho wadoko ni jamcac man jamng’iero ni dhanu ceke m’utwodowa.

14 Idwokowa ni jamcac* i kind thek,

Wadoko ni gin ma dhanu yengo wigi i kume.

15 Lewic unega dieceng’ duu,

Man lewicne usagu kero para,

16 Pi dwal migi mir ali man mi tang’dhok,

Nikum judegi mwa ma gibeculo kwor.

17 Gin maeni ceke utundo i wiwa, re asu wawil kudi ngo,

Man waturo ngo lembariba peri.

18 Adundewa ulokere ngo;

Tiendwa de ukier ungo kud i yo peri.

19 Ento girungo iwa kaka ma utho kwo i iye;

Iumowa ku mudho ma bii.

20 Tek wawil i kum nying’ Mungu mwa

Kadi tek wathang’u cingwa pi nirwo ni mungu mi juwirok,

21 Nyo Mungu bing’eyo maeni ngo?

22 Piri wabeboth abotha ku tho dieceng’ duu;

Dhanu ubenenowa calu rombe ma jubecithumo.

25 Kum jubolowa* piny i utur;

Judiyo kumwa i ng’om.

 3 Twii palamularu peri i wang’ ng’eti, E in m’i ng’atu ma tek,

I dwong’ peri man i leng’o peri.

 4 Man i leng’o peri, cidhi pi niloyo;

Ring ku riuni peri pi nikiedo pi lemandha, pi jwigiri, man pi bedopwe,

Man cingi mir acwic bitimo* lembe ma wang’u ijo.

 5 Athero peri lakgi bith, gibeketho dhanu upodh i weng’i;

Gibecobo i adunde judegi p’ubimo plu.

 6 Mungu tie komker peri rondo ku rondo;

Uluthker mi ker peri tie uluthker mi lembe m’atira.*

 8 Jukilo ng’wic mo ma ng’ar mi mira, mir ukozoro, man mi muruku i kum bongu peri ceke,

Jamgoyo wer ma juthondhe ubenyayu anyong’a i ii niai kud i kal ma dit mi lak liec.

10 Winji, E nyaku, winj kilili man cik ithi;

Wii wil pi juthu man pi ot pa wuru.

11 E leng’o peri bitelo ubimo,

Kum en e rwoth peri,

Pieno rum piny i wang’e.

12 Nyaku mi Turo bibino ku giramiya,

Ju m’ulony nisagu zoo gibisayu ginwang’ bero i weng’i.

13 Nyarubimo uberiang’ini ariang’a i kal,*

Juruko bongu pare ku mola ma kwar.

15 Jubikelogi kud anyong’a man mutoro;

Gibimondo i kal p’ubimo.

46 Mungu en e kapondo mwa man tego mwa,

Jakony ma junwang’u yot yot i saa mi can.

 2 Pieno wabilworo ngo kadok ng’om ubelokere,

Kadok nwang’u gudi urwombiri man uloro i the nam,

 3 Kadok pii nam ubewoy man ubethukini,

Kadok gudi ubeyengere nikum angongone. (Sela)

 4 Kulo moko nuti ma jange nyayu anyong’a i adhura pa Mungu,

Niwacu hema mi thier ma dit man ma leng’ pa Ng’atu ma Malu ngbir.

 6 Yakini ubino i kind thek, junyotho ker;

Eting’o dwande malu, man ng’om uloy.

 7 Yehova mir udul ni karacelo kudwa;

Mungu pa Yakobo en e kapondo* mwa ma museme. (Sela)

 8 Wubin man wunen tic pa Yehova,

Kite m’etimo ko lembe ma wang’u ijo iwi ng’om.

Ebeturo i athero man eberungo i tong’;

Ebewang’u magali* mi lwiny ku mac.

Jubiyunga i kind thek;

Jubiyunga i ng’om.”

11 Yehova mir udul ni karacelo kudwa;

Mungu pa Yakobo en e kapondo ma museme iwa. (Sela)

 2 Kum Yehova ma en e Ng’atu ma Malu ngbir ng’oyo ndiri;

Etie Ubimo ma dit iwi ng’om zoo.

 3 Eketho dhanu i the loc mwa,

Eketho thek i the tiendwa.

 4 Eng’iyo iwa giralaga mwa,

Ma en e jamluliri pa Yakobo m’emaru. (Sela)

 5 Mungu uidho kud i kind kok mir anyong’a;

Yehova uidho kud i kind dwand agwara.*

 7 Kum Mungu en e Ubimo mi ng’om zoo;

Wuwer wer mi pak man wubed riek.

 9 Jutelwic mi dhanu gicokiri karacelo

Ku dhanu pa Mungu p’Abraham.

48 Yehova e dwong’ man eromo jupake nisagu zoo

I adhura pa Mungu mwa, iwi got pare ma leng’.

 2 Got Sayuni ma ni bor yo malu tie leng’ i kadongone,

Etie anyong’a mi ng’om ngung’,

En e adhura p’Ubimo ma Dit.

 3 I udi ma wiw ma tek m’i iye,

Mungu uketho jung’eyo nia en e kapondo* ma museme.

 4 Kum nen! jubim gicokiri;*

Gicoro karacelo.

 6 Mielkum umakugi keca,

Nduru ma calu pa dhaku m’ubegonyere.

 8 Gin ma nwang’u wawinjo pire awinja, kawoni dong’ wanene wan giwa

I adhura pa Yehova mir udul, i adhura pa Mungu mwa.

 9 E Mungu, wabenyamu i lembe cuu iwi mer peri ma lokere ngo,

I hekalu peri.

10 Calu nyingi, E Mungu, pak peri de

Ucidho cil i gund ng’om zoo.

11 Wek anyong’a neg Got Sayuni,

Wek adhura* mi Yuda gibed ku mutoro nikum lembapoka peri.

12 Wuwoth i ng’et Sayuni, wudhoke tingili;

Wukwan wend udi ma wiw m’i iye.

Wung’ii kum udi ma wiw m’i iye,

Kara wukor pire ni dhanu m’utuk ma bibino.

Wucik ithwu wun ceke ma wubedo i ng’om,

 2 Ng’atu ma nok ku ng’atu ma dit,*

Jalonyo man jacan bende.

 3 Dhoga biweco lembe mi rieko,

Man nyamu i lembe mir adundena binyutho nyang’ i lembe.

 4 Abiciko itha i kum lembabola;

Abikoro the koy para kud adungu.

 5 Pirang’o abed ku lworo i saa mi peko,

Kinde ma racu* mi ju m’umito ng’iela utieka tingili?

 6 Ju ma gigeno jamcing’gi

Man ma gibeluliri pi lonyo migi ma dit,

 7 Ng’atu moko acel de mbe i kindgi ma copo waru umego moko

Kadi ma copo miyo jamgony ni Mungu pire,

 8 (Bei mi jamgony* pi kwo* migi ni malu dit

Ketho gicopo romo ngo nja de);

 9 Kara ekwo rondo ku rondo man kud enen vur.*

10 Ng’atuman ubeneno nia kadok dhanu ma riek de gibetho;

Jakasegu ku ng’atu ma rieko pare mbe gibenyothiri karacelo,

Man ukwayu nia giwek jamcing’gi ni jumange.

11 Ku yor i igi nwang’u gimito nia udi migi ubed rondo ku rondo,

Hema migi ugal cil i kum dhanu m’utuk ceke.

12 Ento dhanu, kadok nwang’u juyunge, ebibedo nja ngo,

Eloyo ngo yedi ma rwinyo.

13 Eno re m’utie yo mi jukusegu

Man mi ju m’ubelubo tokgi, m’anyong’a negogi i kum wec migi ma iye nanu. (Sela)

Tho bibedo jakwac migi;

Ju m’atira bibimo wigi kugweno.

Jubiruco babang’gi ceke;

Kakare ma gibed i kal, Liel* re ma bidoko ot migi.

15 Ento Mungu biwara* kud i tego pa* Liel,*

Kum ebimaka kii. (Sela)

16 Lworo kud unegi pilembe nia ng’atu moko ubelony,

Pilembe nia dwong’ mi ot pare ubemedere,

17 Kum kinde m’etho ebicidho ngo ku gin moko,

Dwong’ pare biloro ngo karacelo kude.

20 Ng’atu m’ubenyang’ ungo i lembe maeni, kadok nwang’u juyunge,

Eloyo ngo yedi ma rwinyo.

50 Yehova ma en e Mungu mi mungu* uweco;

Ewaku ng’om

Niai i wok pa ceng’ nitundo i mwony pa ceng’.*

Mac ma wang’u piny ruk n’i wang’e,

Man avuvu ma dit ubekoto i ng’ete gbur.

 4 Ewaku polo malu man ewaku ng’om,

Kara epok lembe mi dhanu pare, ewacu kumae:

 5 “Wucok dhu jupara ma gibegwoko bedoleng’ migi karacelo i bang’a,

Gin ma gibetimo lembariba kuda nikadhu kud i lam.”

 6 Polo ubetwong’o pi bedopwe pare,

Kum Mungu en gire etie Japoklembe. (Sela)

 7 “Wuwinji, E dhanu para, man abiweco;

E Israel, abituco lembe i kumi.

 8 Abejuki ngo pi lam peri,

Kadi pi lam m’awang’a peri ma boo ma n’i wang’a saa ceke.

 9 Ambe ku yeny mi gamu thwon dhiang’ kud i ot peri,

Kadi diegi* kud i dwol peri.

10 Kum yedi ceke mi luli gi para,

Kadok lei ma n’i wi gudi elufu acel (1 000).

11 Ang’eyo winyoman acel acel m’i wi gudi;

Lei ma wendgi kwanere ngo mi lum gi para.

12 Ka nwang’u kec ubenega, nwang’u ayero ngo iri,

Kum ng’om man piny ceke m’i iye tie para.

13 Nyo abicamu ring’ thwoni dhieng’

Man abimadhu rimb diegi?

14 Thier foyofoc re m’ubed ni lam peri ni Mungu,

Man pong’ lembang’ola peri ma ku kwong’ m’ing’olo ni Ng’atu ma Malu ngbir;

15 Lwong’a i nindo mi can.

“Ng’a m’umiyo iri twero mi weco pi telowic para

Man mi yero pi lembariba para?

17 Kum idagu twiny,*

Man ibeloko ng’eyi ni lembe para.*

18 Kan ineno jakwo, icwake,*

Man idikiri ku weg abor.*

19 Itiyo ku dhogi pi nimewo lembe ma rac,

Man vupo umoko i kum lebi.

20 Ibedo man iweco rac i kum umeru ma buu;

Ituco wi kosa pa* wod meru ma buu.

21 Kinde m’ibino timo lembe maeno, abedo ling’,

E iparu nia atie ve in.

Ento kawoni abijuki,

Man abiyabu kesi para i kumi.

22 Akwayuwu wupar i lembe maeni, wun ma wiwu wil pi Mungu,

Kan ungo abiyeco iwu nziki nziki ma ng’atu moko mbe ma bilaruwu.

23 Ng’atu m’ubethiero foyofoc ni lam pare, nwang’u ebeyungo an,

Man ng’atu m’ubelubo gengi m’atira ke

Abiketho ebineno both pa Mungu.”

 2 Lwok kosa para ceke kud i kuma,

Man dwoka leng’ kud i dubo para.

 3 Kum ang’eyo kier para cuu mandha,

Man dubo para n’i wang’a saa ceke.*

 4 Adubo iri, ku kwong’a zoo, iri in;*

Atimo gin ma rac i weng’i.

Pieno itie pwe kinde m’ibeweco

Man itie atira i pokolembe peri.

 5 Nen! junyola m’atie jakosa,

Man maa gamu iye m’enyola ko i dubo.*

 6 Nen! anyong’a negi i kum lemandha ma n’i adunde;

Ponja abed ku rieko mandha i pidoic para m’upondo.

 7 Lwok dubo para cen kud i kuma kud hizop,* kara adok leng’;

Lwoka, e abidoko tar calu pei.

 8 Wek awinj dwal mi mutoro man mir anyong’a,

Kara anyong’a neg cogo m’irungo.

 9 Lok weng’i cen* kud i kum dubo para,

Man wey* kosa para ceke.

10 Cwii adunde ma leng’ i iya, E Mungu,

Man keth tipo ma nyen i iya, man ma nging’ nging’.

11 Kud iriema kud i vuti;

Man kud imaya ku tipo ma leng’ peri.

12 Dwok ira anyong’a mi both peri;

Cew ava mi wori* i iya.

13 Abiponjo yo peri ni ju ma gikier,

Kara judubo gidwog i beng’i.

14 Bodha kud i dubo mi nek, E Mungu, Mungu mi both para,

Kara leba utwong’ pi bedopwe peri kud anyong’a.

15 E Yehova, yab dend dhoga,

Kara dhoga upeki.

16 Kum imito ngo lam, ka nwang’u ungo nwang’u amiye iri;

Anyong’a negi ngo i kum lam m’awang’a ma boo.

17 Lam ma nyayu anyong’a i Mungu tie cwiny ma can umondo i iye;

Adunde m’utur man m’urungere, E Mungu, ibikwero ngo.*

18 I berocwiny peri, tim gin ma ber ni Sayuni;

Gier gang’kidi mi Yeruzalem.

19 E anyong’a binegi i kum lam mi bedopwe,

I kum lam m’awang’a man girathiera ma boo;

E jubithiero thwoni dhieng’ iwi pemlam peri.

 2 Lebi ma lake ai calu lak riedi,

Ubepangu nitimo gin ma rac man ubeyero lembe mi ndra.

 3 Imaru racu nisagu gin ma ber,

Man cwayu ndra nisagu yero lembe m’atira. (Sela)

 4 Imaru wec ceke ma timojo rac,

E in i leb ma won abombi!

 5 Pi thelembe maeno Mungu binyothi mi magwei;

Ebimeki man ebipeyi cen kud i hema peri;

Ebifudhi kud i ng’om mi ju ma kwo. (Sela)

 6 Weg bedopwe gibineno lembene, e igi biwang’ lii,

Man gibing’iero jatimrac.

 7 “Nen, eni tie ng’atu m’uketho ngo Mungu ni kapondo* pare,

Ento egeno lonyo pare ma dit

Man ejengere iwi* camu gamba pare ma rac.”*

 8 Ento an abibedo calu yend oliv m’udinyo i ot pa Mungu;

Abigeno mer ma lokere ngo pa Mungu rondo ku rondo.

 9 Abipeki rondo ku rondo pi lembe m’itimo;

I vut ju peri ma gigwoko bedoleng’ migi,

Abigeno nyingi, kum nyingine ber.

Gitimo lembe ma pwe ngo man ma judagu;

Ng’atu moko mbe m’ubetimo gin ma ber.

 2 Ento Mungu neno wot dhanu niai kud i polo

Pi nineno ka nyo ng’atu moko nuti m’utie ku rieko,

Ka nyo ng’atu moko nuti m’ubeyenyo Yehova.

 3 Gin ceke gilokiri cen;

Gin ceke ginyothiri.

Ng’atu moko mbe m’ubetimo gin ma ber,

Kadok ng’atu acel de.

 5 Ento ndiri ma dit bimakugi,

Kit ndiri ma fodi umakugi ngo i wang’e,*

Kum Mungu bilalu cogo ju ma gikelo lwiny i kumi.*

Kinde ma Yehova udwogo dhanu pare kud i ng’eca,

Wek mutoro neg Yakobo, wek anyong’a neg Israel.

54 E Mungu, bodha pi nyingi,

Cer bang’a ku tego peri.

 2 E Mungu, winj rwo para;

Cik ithi iwinj wec m’i dhoga.

 3 Kum juwirok giai malu i kuma,

Dhanu ma kisa mbe i igi gibeyenyo kwo* para.

 4 Nen! Mungu en e jakony para;

Yehova ni karacelo ku ju ma gibetiela.*

 5 Ebidwoko racu mi jukwor para i wigi gigi;

Dargi* nikum bedoleng’ peri.

 7 Kum ibodha kud i masendi moko ci,

Abineno judegina ku wang’ mir aloci.

55 Winj rwo para, E Mungu

Kud ibed ling’ kinde m’abekwayu kisa.*

Adieng’acwiny para uketho acopo bedo yoo ngo,

Man wiya nyothere

 3 Nikum gin ma jadegi ubeyero

Man nikum masendi pa jatimrac.

Kum gidhuro peko i wiya

Man ku kwinyo gikayu lembe i kuma.

 4 Adundena uberemo yor i iya,

Man ndiri mi tho ubenura.

 5 Lworo man mielkum upodho i wiya,

Atem ugoya.

 8 Nwang’u aringo pio pio kaka m’aromo pondo i iye

Bor ku yamu m’ubekoto ma tek, bor kud avuvu.”

 9 Jeb wigi, E Yehova, man nyoth pangulembe migi,*

Kum aneno rop kud ali i adhura.

10 Dieceng’ ku diewor gibewotho iwi gang’kidi mir adhurane tingili;

Lembe ma rac man masendi upong’ i iye.

11 Nyoth n’i die iye;

Adici man ndra copo thum de ngo kud i lelane ma lac.

12 Kum jadegi ngo re m’ubecaya;

Ka nwang’u ngo nwang’u acopo ciro.

Jakwor ungo re m’uai i kuma;

Ka nwang’u ngo nwang’u acopo pondo ire.

13 Ento tie in, dhanu ma ve an,*

Jawodha m’ang’eyo cuu.

14 Wabino ku mer ma ceng’ini mandha wakudi;

Wabed wawotho karacelo kud udul dhanu kinde ma wabecidho i ot pa Mungu.

Wek gilor ma kwo i Liel;*

Kum racu ubedo i kindgi man i igi.

16 Ento an, abiwak i bang’ Mungu,

Man Yehova bibodha.

17 Uthieno, kugweno, man dieceng’ cwinya ng’abere man acur acura,*

Ento ewinjo dwanda.

18 Ebilara* kud i cing’ ju m’ubekiedo i dhoga, man ebimiyo ira* kwiyocwiny,

Kum udul dhanu ma dit ubino i kuma.

19 Mungu biwinjo man bidwoko igi lembe,

En m’ejany iwi komker niai yang’ con. (Sela)

Kum gibikwero nilokiri,

Gin ma gilworo ngo Mungu.

20 Elokere* i kum ju ma gibino kwo kugi ku kwiyocwiny;

Eturo lembariba pare.

21 Wec mi dhoge tie ma yom nisagu cak m’umakere ma nwang’,

Ento ali n’i adundene.

Wec mi dhoge tie ma foth nisagu mo,

Ento gi ve palamularu ma juwodho kud i ukorone.

22 Redh ter peri iwi Yehova,

Man ebitieli.

 2 Jukwor para gibesayu nimaka dieceng’ duu;

Ju ma gibekiedo i kuma ku kuhaya gi dupa.

 4 Aketho genogen para iwi Mungu m’abepaku lembe pare,

Aketho genogen para iwi Mungu, lworo ubenega ngo.

 5 Dieceng’ duu gibenyayu can i kuma;

Paru migi tie kende kende nitima rac.

 6 Gipondo kara gicoriri i wiya,

Gineno dagutielo para ceke

Ma nwang’u gigeno nia gibikabu kwo* para.

10 Aketho genogen para iwi Mungu m’abepaku lembe pare,

Aketho genogen para iwi Yehova m’abepaku lembe pare.

12 Atwiyara ku lembang’ola ma ku kwong’ m’atimo iri, E Mungu;

Abithiero iri lam mi dwoko foyofoc.

13 Kum ibodha* kud i tho

Man icero tienda kud ukier,

Kara awoth i wang’ Mungu i der mi ju ma kwo.

57 Nyuth ira bero, E Mungu, nyuth ira bero,

Kum apondo* i beng’i,

Man abipondo i the vombi cil ma peko bithum ko.

 2 Abewak i bang’ Mungu ma Malu ngbir,

I bang’ Mungu mandha, ma daru peko para ceke.

 4 Umvor utieka* tingili;

Ubekwayu avut i kind dhanu ma gibemito gimvora,

Ma lakgi ve tong’ man athero

Man ma lebgi bith ve lak palamularu.

 5 Dodiri malu iwi polo, E Mungu;

Wek dwong’ peri ubed iwi ng’om zoo.

 6 Giciko voi pi nimaku tienda;

Can m’unura* ugomo kora piny.

Gitong’o vur i wang’a,

Ento gipodho i iye gin gigi. (Sela)

 7 Adundena ucungo nging’ nging’, E Mungu,

Adundena ucungo nging’ nging’.

 9 Abipeki i kind dhanu, E Yehova;

Abiwero iri wer mi pak* i kind thek.

10 Kum mer peri ma lokere ngo e dwong’, e ni malu ve polo,

Man bedoleng’ peri de cidho cil i kum afuru.

11 Dodiri malu iwi polo, E Mungu;

Wek dwong’ peri ubed iwi ng’om zoo.

 2 Kakare nitimo kumeno, wubepangu i adundewu nitimo lembe ma pwe ngo,

Man cingwu ubenyayu rop i ng’om.

 3 Jutimrac ginyothiri niai i nyoliri migi;*

Gi jujai man jundra niai ma ginyoliri.

 4 Kwir migi calu kwir pa thwol;

Gitie udhing’ calu urobi ma culo ithe cen.

 5 Ebiwinjo ngo dwand jutimthangu,

Kadok nwang’u giberambu ku bodho.

 8 Wek gibed calu dholu ma leny kinde m’ebewotho;

Calu nyathin m’utho kud i min m’uneno ngo ceng’ nyanok de.

 9 Ma fodi maj ukudho uledho ngo agulu mwu,

Mungu biweyo jange ma numu ku m’umaku mac ceke ku yamu ma tek.

10 Anyong’a binego won bedopwe pilembe eneno culo kwor;

Tiende bijom i rimb jutimrac.

59 Lara kud i cing’ judegi para, E Munguna;

Gwoka ni ju ma gibeai i kuma.

 2 Lara kud i cing’ ju ma gitimo lembe ma reco,

Man bodha kud i cing’ dhanu ma jurop.*

 3 Nen! gikanu libo ira;*

Dhanu ma tek gicoro i wiya

Ungo nia pilembe ajai kunoke adubo, E Yehova.

 6 Gidwogo nja dhu uthieno;

Gigbuyo calu gwok man giwotho rr i adhura.

 7 Nen gin m’ubethwogere kud i dhoggi;

Dend dhoggi calu palamularu,

Kum gibewacu kumae: “Ng’a m’ubewinjo?”

 8 Ento in, E Yehova, ibing’ierogi;

Ibicayu thek ceke.

 9 E Tego para, abimedara nikuri;

Kum Mungu en e kapondo para ma museme.*

10 Mungu ma nyutho ira mer ma lokere ngo bibino konya;

Mungu biketho abineno jukwor para ku wang’ mir aloci.

Ku tego peri, keth giwoth swa;

Keth gipodhi, E Yehova ban mwa.

12 Pi dubo mi dhoggi, wec mi dend dhoggi,

Wek gipodh i uwic mi kuhaya migi,

Nikum alam man ndra ma gibeyero.

13 Dargi ceke nikum kwinyo peri;

Dargi pet, kara thegi thum;

Keth ging’ey nia Mungu ubebimo i Yakobo man cil i ajiki mi ng’om. (Sela)

14 Wek gidwog dhu uthieno;

Dong’ gigbuy calu gwok man giwoth rr i adhura.

15 Dong’ giwoth swa pi nisayu cam;

Kud iketh giyeng’ man kud ginwang’ kaka ma gibed i iye.

16 Ento an abiwero pi tego peri;

Kugweno abiweco pi mer ma lokere ngo peri kud anyong’a.

Kum in i kapondo para ma museme

Man kaka m’aringo i iye i saa mi can para.

17 E Tego para, abiwero wer mi pak* iri,

Kum Mungu en e kapondo para ma museme, Mungu ma nyutho ira mer ma lokere ngo.

 4 Tim* lanyuth ni ju ma gibelwori

Kara giringi man giuc athero. (Sela)

 5 Kara ju m’imaru gibothi,

Bodhwa ku cingi mir acwic man dwok iwa lembe.

“Anyong’a binega nimiyo Cekem ni giralaga,

Man abipimo Poga* mi Sukoth.

 7 Gilead en e para, tap calu ma Manase de para,

Efraim tie sabu* m’i wiya;

Yuda ke tie uluth mi bim para.

10 Nyo tie in ungo m’iwenjowa, E Mungu,

Mungu mwa ma dong’ cidho ngo kud udul askari mwa?

11 Konywa i masendi mwa,

Kum both ma ai i bang’ dhanu tije mbe.

12 Nikum Mungu wabinwang’u tego,

Man ebinyono judegi mwa i the tiende.

 2 Kinde ma dong’ adundena mbe ku genogen*

Abiwak i beng’i niai kud i ajiki mi ng’om.

 3 Kum itie kapondo para,

Ot ma wiw ma tek ma gwoka ni jadegi.

 4 Abibedo welo i hema peri nja ku nja;

Abipondo i the tipo vombi. (Sela)

 6 Ibimedo nindo mi kwo* p’ubimo,

Man oro pare bimedere cil i kum dhanu m’utuk ceke.

 7 Ebijany* iwi komker nja ku nja i wang’ Mungu;

Mii ire* mer ma lokere ngo man bedoleng’ kara gigwoke.

 8 E abiwero wer mi pak* ni nyingi nja ku nja

Kinde ma kubang’ ceng’ abepong’o lembe m’ang’olo ku kwong’.

 2 Eyo, etie cana para man both para, kapondo para ma museme;*

Kuma bimiel ungo nisagu.

 4 Kum gibeporo thelembe karacelo pi nibole piny kud i kabedo pare ma malu;*

Anyong’a negogi nicwayu ndra.

 5 Eyo, abekuro Mungu ling’ ling’*

Kum genogen para ai i bang’e.

 6 Eyo, etie cana para man both para, kapondo para ma museme;

Kuma bimiel ungo nyanok de.

 9 Wot dhanu gitie ndhu yuyo,

Wot dhanu gitie awonde.

10 Kud iketh genogen peri iwi avure

Kadi kud ibed ku genogen ma iye nanu iwi kwo.

12 Mer ma lokere ngo bende tie peri, E Yehova,

Kum iculo ni ng’atuman calku timo pare.

Tegona* thum nikum aveni m’unega lee

I ng’om m’uthwo man ma ngele kaka ma pii mbe i iye.

 2 Pieno, aneni i kabedo ma leng’;

Aneno tego peri man dwong’ peri.

 3 Calu ma mer peri ma lokere ngo tie ber nisagu kwo,

Dend dhoga biyungi.

 4 Pieno, abipeki i kwo para zoo;

Abilwong’o nyingi kinde m’ating’o cinga aberwo.

 5 Ayeng’* kud unding’ ma beco man m’ang’iya,*

Pieno, dhoga bipeki ku mutoro iwi dend dhoga.

 6 Apoy piri kinde m’an’i wi kavuto para;

Aparu kilili piri i saa mi kur mi diewor.

 7 Kum in i jakonyna,

Man akok kud anyong’a i the tipo vombi.

 8 Amoko* kikiki i kumi;

Cingi mir acwic umaka kii.

 9 Ento ju m’uyenyo ginyoth kwo para*

Gibiloro piny i the ng’om.

10 Jubimiyogi ni tego mi lak palamularu;

Gibidoko ni cam ni utho.*

Mutoro binego ng’atu moko ci m’ubekwong’o kwong’ ku nyinge,*

Kum jubimiyo dhu ju m’ubecwayu ndra.

 2 Kana ni lembapora ma mung’ mung’ mi dhanu ma reco,

Ni udul mi jutimrac.

 3 Gipaku lebgi calu palamularu;

Giciko wec migi ma kec calu athero,

 4 Pi nikilo ng’atu ma lembe mbe i wiye niai kud i kaka ma gipondo i iye;

Gikile rek, m’umbe lworo.

 5 Gimoko kikiki i kum pidoic migi ma rac;*

Gipangu kite ma gibiciko ko uwic migi.

 6 Giyenyo ayi ma nyen mi timo lembe ma reco;

Githungo plan migi mi rieko i amung’;

Paru mir adunde ng’atuman nyang’ere i iye ngo.

 7 Ento Mungu bikilogi;

Jubinyayu ret i kumgi rek kud athero.

 8 Lebgi gigi biredhogi;

Dhanu ceke m’ubeneno lembene biyengo wigi.

 9 E lworo bimaku dhanu zoo,

Man gibitwong’o pi gin ma Mungu utimo,

Man gibinyang’ i tic pare.

10 Anyong’a binego won bedopwe i Yehova man ebipondo i bang’e;

Mutoro binego dhanu ceke m’adundegi atira.*

65 Pak ubekuri i Sayuni, E Mungu;

Wabipong’o lembang’ola ma ku kwong’ ma watimo iri.

 3 Kosa para unura,

Ento iumo wi dubo mwa.

 4 Jamutoro tie ng’atu m’ing’iyo man m’ikelo ceng’ini

Kara ubed i lela peri.

Wabiyeng’ ku bero m’i ot peri,

Hekalu peri ma leng’.

 5 Ibidwoko iwa lembe ku tic ma wang’u ijo mi bedopwe,

E Mungu mi both mwa;

In i Genogen mi gund ng’om zoo

Man mi ju ma gin’i bor loka nam.

 6 Iketho* gudi ucungo nging’ nging’ ku tego peri;

Ironyiri* ku tego.

 7 Ikwiyo* wi nam m’utang’,

Mujanga migi m’ubedhongo man yakini mi thek.

 8 Dhanu m’i kabedo ma bor igi biwang’ lii pi giranyutha peri;

Ibiketho ju ma niai i wok pa ceng’ nitundo i mwony pa ceng’ gibikok kud anyong’a.

 9 Ibedieng’ pi ng’om,

Ibeketho ecego piny lee* man e miyo akeca.

Pii upong’ bik i kulo m’uai i bang’ Mungu;

Imiyo nying’ cam ni dhanu,

Kum kumeno re m’iyiko ng’om.

10 Ikwoyo pii i sayune man ipoto ng’ombe ma jufuro;*

Iyome ku koth; imiyo mugisa iwi piny m’utwii i iye.

11 Iruko oro ku bero peri;

Yo peri pong’ bik ku piny dupa.*

12 Luba mi langa ubedhir adhira* ku piny,

Man ungulu gudi* uronyiri kud anyong’a.

13 Udul lim upong’o luba bim,

Nying cam uromo poga* ceke.

Nikum tego peri ma dit,

Kum judegini bimiel amiela ku lworo i weng’i.

 4 Dhanu ceke m’i ng’om birumo cong’gi i weng’i;

Gibiwero wer mi pak iri;

Gibiwero wer mi pak ni nyingi.” (Sela)

 6 Eloko nam udoko ni ng’om m’uthwo;

Gikadhu kulo ku tiendgi.

 8 Wupak Mungu mwa, wu dhanu,

Man wuketh dwal mi pak pare uwinjere.

 9 Ebegwokowa wabed kwo;*

Ebeweko ngo tiendwa ukier.

10 Kum ing’iyowa cuu, E Mungu;

Ililowa calu ma julilo ko mola ma tar.

11 Iroyowa i voi mi dwar;

Iketho ter ma rungojo i wiwa.*

12 Iweko dhanu ma tho e uwotho i wiwa;

Wakadhu kud i mac man kud i pii;

E iterowa kaka mi yom.

13 Abimondo i ot peri ku lam m’awang’a ma boo;

Abipong’o lembang’ola ma ku kwong’ m’atimo iri,

14 Ma dend dhoga ung’olo

Man ma dhoga uyero kinde m’abino i can.

15 Abithiero lam m’awang’a mi lei ma fulful iri

Karacelo ku yiro mi lam mi nyogi rombe.

16 Wubin wuwinji, wun ceke ma wulworo Mungu,

Abikoro iwu gin m’etimo ira.*

17 Awak i bang’e ku dhoga

Man ayunge ku leba.

18 Ka nwang’u akanu gin moko ma timojo rac i adundena,

Nwang’u Yehova ubewinja ngo.

19 Ento Mungu uwinjo;

Eciko ithe i bang’ rwo para.

20 Pak ubed ni Mungu m’ukwero ngo rwo para

Kadi m’ucero ngo ira mer pare ma lokere ngo.

67 Mungu binyutho iwa bero man ebimiyo iwa mugisa;

Ebiketho wang’e birieny i wiwa (Sela)

 2 Kara jung’ey yo peri i wang’ ng’om zoo,

Man tic mi both peri i kind thek ceke.

 3 Dong’ dhanu gipeki, E Mungu;

Dong’ dhanu ceke gipeki.

 4 Wek mutoro uneg thek man gikok kud anyong’a,

Kum ibipoko lembe mi dhanu atira.

 5 Dong’ dhanu gipeki, E Mungu;

Dong’ dhanu ceke gipeki.

 6 Ng’om bicego nyinge;

Mungu, ma en e Mungu mwa, bimiyo iwa mugisa.

 7 Mungu bimiyo iwa mugisa,

Man tung’ ng’om ceke bilwore.*

68 Dong’ Mungu uai malu, wek judegine gilal,

Man wek ju m’udage giring cen kud i wang’e.

 2 Calu ma yamu riemo yiro cen, in de riemgi cen;

Calu m’udok leny i wang’ mac,

Dong’ jutimrac de girwiny i wang’ Mungu.

 3 Ento wek mutoro uneg weg bedopwe;

Wek anyong’a uneggi lee i wang’ Mungu;

Dong’ mutoro kud anyong’a uneggi.

 5 Mungu ma n’i kabedo pare ma leng’

En e wego mi nyithikic* man jagwok* mi montho.

 6 Mungu miyo ot ni ju ma gitie kendgi kara gibed i iye;

Ewodho jukol woko man eketho lembe migi bedo miero.

 7 E Mungu, kinde m’itelo wi* dhanu peri,

Kinde m’iwotho i langa, (Sela)

 8 Ng’om uyengere;

Nikum Mungu, polo konjo koth;*

Sinai maeni uyengere nikum Mungu, ma en e Mungu mir Israel.

 9 Iketho koth ucwii lee, E Mungu;

Idwoko kero i kum dhanu* peri ma givoc.

10 Gibedo i kagonjo mi hema peri;

Nikum bero peri, ipong’o yeny mi jucan, E Mungu.

11 Yehova ubemiyo ng’ol;

Jumamon ma giberweyo lembanyong’a gin udul ma dit.

13 Kadok nwang’u wun wu dhanu wugam wuvuto i kind mac mi kambi,*

Re asu vomb akuru ma juumo kume ku mola ma tar bibedo nuti,

Ma tie kud ukondo mi mola ma kwar ma leng’.*

14 Kinde ma Jategokpo ulalu i jubim mi ng’om maeca,*

Pei ucwii i Zalmon.*

15 Got mi Bacan en e got pa Mungu;*

Got mi Bacan en e got ma wiw.

16 Wu gudi ma wiw, pirang’o wubeneno bang’ got

Ma Mungu ung’iyo* ni kabedo pare ku kumira?

18 Iidho malu;

Igonyo ju ma gibino ng’eca;

Iting’o giramiya ma dhanu,

Eyo, kadok ju ma wigi tek, kara gibed i kindgi, E Yah Mungu.

19 Dong’ jupak Yehova, en m’eyeyo ter mwa kubang’ rupiny,

Mungu mandha mi both mwa. (Sela)

20 Mungu mandha tie Mungu ma bodhowa;

Man Yehova ma tie Rwoth Ubimo ma Malu ngbir bodhojo kud i tho.

21 Eyo, Mungu bing’enyo wi judegi pare,

Ebing’enyo upoko wi ng’atu moko ci m’ubemedere* i kier pare.

22 Yehova uwacu kumae: “Abiketho gibidwogo kud i Bacan;

Abiketho gibidwogo kud i the nam,

23 Kara tiendi ujom i rimb judegi

Man leb gwogi peri unang’ rimbgi.”

24 Gibeneno piro peri, E Mungu,

Piro pa Mungu para, ma en e Ubimo para i kabedo ma leng’.

25 Juruwer gibewotho i wang’e,

Jugoy mizik gibelubo ng’eygi ma gibegoyo jamgoyo wer ma juthondhe;

I diere, jumanyir gibegoyo nyithi vul.

26 Wupak Mungu i kind udul dhanu m’ucokiri;*

Wupak Yehova, wun ma wuai i Thekiri pa Israel.

27 Keca, Benjamin ma nyathin ubeketho dhanu i the loc pare,

Judongo ma wijo mi Yuda kud udul dhanu migi m’ubetimo yakini,

Man judongo ma wijo mi Zebulon, ku judongo ma wijo mi Nafthali bende.

29 Nikum hekalu peri ma n’i Yeruzalem,

Jubim gibikelo iri giramiya.

30 Juk yedi mi lum m’i kind agada,

Udul thwoni dhieng’ ku nyithindhgi,

Cil ma dhanu girum piny man gikel mola ma tar.*

31 Jubikelo jamtic mi mola* niai kud i Misiri;

Kuc bidhulere pi nikelo giramiya ni Mungu.

32 E ker mi ng’om, wuwer ni Mungu,

Wuwer wer mi pak* ni Yehova, (Sela)

Dwong’ pare n’iwi Israel,

Man tego pare ni i afuru.*

En e Mungu mir Israel,

Ma miyo tego ku kero ni dhanu.

Awok kaka ma pii thuc i iye,

Man angongo pii m’ubecorere umola cen.

 3 Adaru ol ku kok;

Dwanda ruu.

 4 Wend ju m’udaga mananu

Tie lee nisagu yuk wiya.

Ju ma gimito ginyotha cen

Man ma gi judegina ma thelembene mbe gidoko dupa.

 5 E Mungu, ing’eyo kasegu para,

Man kier para pondo ngo i weng’i.

 6 Timba lewic kud unyay iwi ju m’ugeni nikuma,

E Rwoth Ubimo ma Malu ngbir, Yehova mir udul.

Timba ju m’ubeyenyo kakeri kud gidok pang’ pang’ nikuma,

E Mungu mir Israel.

 7 Jubecida piri;

Lewic uumo wang’a.

 8 Adoko jakamange ni umego para,

Man jawirok ni wot maa.

 9 Amora m’atie ko pi ot peri uliel i iya,

Man cac mi ju m’ubeceyi udwogo i wiya.

10 Kinde m’akwiro cam* m’abejwigara ko gira,*

Jucaya pi lembene.

11 Kinde m’adwoko kendi mi saki ni bongu para,

Adoko ni jamng’iero* igi.

12 Ju ma gibedo i dhugang’ mir adhura gibeweco ku nyinga,

Man adoko ni wer ni jumer kong’o.

13 Ento wek rwo para utund i beng’i

I saa ma ber iri, E Yehova.

Nikum mer peri ma lokere ngo ma dit, E Mungu,

Dwok ira lembe ku tic mandha mi both peri.

14 Lara kud i usabu;

Kud iwek amwony.

Lara kud i cing’ ju m’udaga

Man kud i pii ma thuc.

15 Kud iwek pii ma dit m’ubecorere umola cen,

Kadi kud iwek kaka ma thuc umwonya

Kadi vur* ucik dhoge i wiya.

Lokiri i bang’a nikum kisa peri ma dit,

17 Man kud ikan weng’i ni jatic peri.

18 Cor ceng’ini kuda man ilara;*

Wara kud i cing’ judegina.

Ageno nyo kisa binego ng’atu moko i kuma, ento ng’atu ma kisa nego de mbe,

Man ageno nyo jubijuko cwinya, ento anwang’u ngo jajuk moko.

21 Ento kaka cam, gimiyo ira adra,*

Man pi rieyo m’ubenega gimiyo ira giramadha ma wac.

22 Wek foc* migi udok ni uwic igi,

Man lonyo migi udok ni uwic.

23 Wek wang’gi ucid bii kara kud ginen piny,

Man keth cong’gi* umiel saa ceke.

24 Konj ng’eicwiny peri i wigi,

Man dong’ kwinyo peri m’ubogere ucorere i wigi.

25 Wek kagonjo migi* udok ni uvuru;

Man dong’ ng’atu moko kud ubed i hema migi.

26 Kum giberiemo tok ng’atu m’igoyo,

Man gibemediri niyero pi remo mi ju m’inyayu ret i kumgi.

27 Med kosa mange iwi kosa migi,

Man kud ikwangi ni weg bedopwe.

28 Dong’ juweygi cen kud i buku mi ju ma kwo,*

Man dong’ kud jukiew nying’gi i kind weg bedopwe.

30 Abiwero wer mi pak ni nying’ Mungu,

Man abidwoko foyofoc ire pi niyunge.

31 Lembuno binyayu anyong’a i Yehova nisagu thwon dhiang’,

Nisagu nyathi thwon dhiang’ ma tie ku tunge man ubong’ tiende.

33 Kum Yehova ubewinjo jucan,

Man ebicayu ngo dhanu pare ma gi ng’eca.

34 Wek polo ku ng’om gipake,

Man nam ku piny ceke ma wotho i igi.

35 Kum Mungu bibodho Sayuni

Man ebigiero kendo adhura mi Yuda,

E dhanu pare gibibedo i iye man ebibedo* giralaga migi.

36 Nyikwayu mi jutic pare gibilagu ng’ombe,

Man ju m’umaru nyinge gibibedo i iye.

70 E Mungu, bodha;

E Yehova, bin pio pio pi nikonya.

 2 Wek dhanu ma gisayu nikabu kwo* para

Lewic unyay i wigi man gidok pang’ pang’.

Wek ju m’anyong’a negogi i masendi para

Gilok ku ng’eygi ku lewic.

 4 Ento wek ju ma gibeyenyo kakeri,

Mutoro kud anyong’a uneggi i kumi.

 5 Ento an, jakonyna mbe man a jacan;

E Mungu, tim pio pio pira.

Itie jakonyna man jalarna;

E Yehova, kud igal.

 3 Dok ira ni cana ma en e ot ma tek

Kaka m’acopo mondo i iye saa ceke.

Mii ng’ol kara jubodha,

Kum in i cana para man kaka ma tek para.

 4 E Mungu para, lara kud i cing’ jatimrac,

Kud i the lwet ng’atu m’ubesenda mananu.

 5 Kum in i genogen para, E Rwoth Ubimo ma Malu ngbir Yehova;

Ageni* niai ma fodi an aradu.

 6 Acaku jengara i wii niai m’anyolara;

In re m’iwodha kud i maa.

 7 Adoko ni udu ni dhanu dupa,

Ento in i kapondo para ma nging’ nging’.

 8 Dhoga upong’ bik ku pak peri;

Abeyero pi leng’o peri dieceng’ duu.

 9 Kud iwenja kinde m’atii;

Kud ikuna kinde ma tego para ubethum.

10 Judegina gibeweco rac i kuma,

Man ju ma gibeyenyo gikab kwo* para gibecamu gamba karacelo,

11 Giwacu kumae: “Mungu udaru kune.

13 Wek lewic umak judhoga*

Man girwiny.

Wek ju ma gibeyenyo can para

Gidong’ kud acidi man gidok pang’ pang’.

14 Ento an, abikuro asu;

Abipeki kendo nisagu.

15 Dhoga bikoro pi bedopwe peri,

Dieceng’ duu abikoro pi tic peri mi both,

Kadok gidupa dit m’acopo nyang’ i igi ngo.*

16 Abibino man abikoro pi tic mi tego peri,

E Rwoth Ubimo ma Malu ngbir Yehova;

Abinyutho pi bedopwe peri, peri kendi.

17 E Mungu, iponja niai ma fodi an aradu,

Man nitundo kawoni abetwong’o pi tic peri ma wang’u ijo.

Wek anyuth pi tego* peri ni dhanu m’utuk ma bibino,

Man pi kero peri ni dhanu ceke ma bibino.

19 E Mungu, bedopwe peri utundo malu ngbir;

Itimo giki ma dongo;

E Mungu, ng’a ma calu ini?

20 Kadok nwang’u iketho anwang’ara ku masendi man can dupa,

Dwok tego kendo i kuma;

Wodha kud i thuc* mi ng’om.

21 Dong’ med dwong’ para,

Tiek kuma gbur man juk cwinya.

22 E abipeki* ku jamgoyo wer ma juthondhe

Pi bedoleng’ peri, E Mungu para.

Abiwero iri wer mi pak kud adungu,

E in m’i Ng’atu ma leng’ mir Israel.

23 Dend dhoga bikok ku mutoro kinde m’abewero iri wer mi pak,

Kum ibodho kwo para.*

24 Leba biweco pi* bedopwe peri dieceng’ duu,

Kum ju ma gibeyenyo nia anyothara gibidong’ ku lewic man acidi.

72 E Mungu, keth ubimo ng’ey lembapoka peri,

Man mii bedopwe peri ni wod ubimo.

 2 Dong’ eng’ol kesi mi dhanu peri ku bedopwe,

Man mi juperi ma kitgi mbe, atira.

 3 Wek gudi ukel kwiyocwiny ni dhanu,

Man ungulu gudi* ukel bedopwe.

 4 Dong’ ecer bang’* ju ma ka kitgi mbe m’i kind dhanu,

Dong’ ebodh wot jacan,

Man erung i jakuvuga.

 5 Dhanu bilwori tek fodi ceng’ unuti ci

Man tek fodi dwi utie,

Cil i kum dhanu m’utuk ceke.

 6 Ebibedo calu koth ma cwii iwi lum ma junyaru,

Calu koth ma dit ma corere iwi ng’om.

 7 I nindo pare, weg bedopwe gibiloth calu lum,

Man kwiyocwiny bipong’ cil ma dwi bibedo mbe.

 8 Ebibedo ku lwak* niai i dhu nam acel nicidho i dhu nam ma kucelo

Man niai i dhu Kulo* nitundo i ajiki mi ng’om.

 9 Ju ma gibedo i langa gibirum piny i wang’e,

Man judegine gibinang’u utur.

11 Jubim ceke gibirum piny i wang’e,

Man thek ceke bitimo ire.

12 Kum ebibodho jacan m’ubekwayu kony,

Ku ng’atu ma ka kite mbe man ng’atu moko ci ma jakony pare mbe.

13 Kisa binege i kum ng’atu ma ka kite mbe man i kum jacan,

Man ebibodho kwo* mi jucan.

14 Ebilarugi* kud i masendi man kud i rop,

Man pi rimbgi bibedo tek i wang’e.

Dong’ jurwo pire saa ceke,

Man dong’ jumii ire mugisa dieceng’ duu.

16 Cam bipong’ lee dit iwi ng’om;

Ebisagere asaga i die wi gudi.

Nyinge binyamere calu i Lebanon,

Man i adhura, dhanu binyay calu lum mi ng’om.

17 Wek nyinge ugal rondo ku rondo,

Wek ebed nja ku nja calu ceng’.

Wek dhanu ginwang’ mugisa nikume;

Wek thek ceke gilwong’e jamutoro.

18 Dong’ pak ubed ni Yehova Mungu, ma en e Mungu mir Israel,

Ma en kende re m’etimo lembe ma wang’u ijo.

19 Wek jupak nyinge ma dwong’ rondo ku rondo,

Man wek dwong’ pare upong’ ng’om zoo.

 2 Ento an, tienda yenyo weko yo;

Tienda yenyo kier.

 3 Kum kinde m’abino neno kwiyocwiny mi jutimrac

Kumira unega i kum weg ting’iri.*

 4 Kum githo ma litho mbe;

Kumgi tie ma leng’.*

 5 Gibedieng’ ungo calu dhanu mange,

Kadi gibesendiri de ngo calu jumange.