EKLEZIA

1 Wec pa jacok dhu dhanu* ma wod Daudi, ubimo mi Yeruzalem.

 7 Kulo ceke* mol loro i nam, re nam pong’ ungo.

Giloko gidok kendo i kaka ma gimol kud i iye, kara gimol kendo.

10 Nyo gin moko nuti de ma ng’atini romo wacu pire kumae: “Kenen, e tie gin ma nyeni”?

12 An a jacok dhu dhanu abino ubimo iwi Israel i Yeruzalem. 13 Aketho adundena pi niponjo man ning’iyo ku rieko i gin ceke m’ubetimere i the polo, niwacu tic mi can ma Mungu umiyo ni wot dhanu kara gisendiri ko.

16 E awacu i adundena kumae: “Nen! anwang’u rieko lee dit nisagu ng’atu moko ci m’ular ubino i wang’a i Yeruzalem, man adundena unwang’u rieko ku ng’eyong’ec lee dit.” 17 Aketho adundena pi ning’eyo rieko man lembabelu* man pi ning’eyo kasegu, man maeni de tie riemo tok yamu.

2 I ng’eye awacu i adundena kumae: “Bin, wek anyay anyong’a i iya man anen bero m’ebimiyo.” Ento nen! maeni de ubino gin ma iye nanu.

 2 Ayero pi ng’iero kumae: “Etie lembabelu!”

Man pir anyong’a kumae: “Tije tie ang’o?”

3 Ayenyo ning’eyo kud adundena gin ma madhu pigulok copo kelo, man i saa ma rom agwoko rieko para; amondo kadok i lemkasegu pi ning’eyo gin ma ber m’usagu m’ukwayu dhanu tim i nindo ma nok mi kwo migi i the polo. 4 Acaku tic ma dongo. Agiero ira udi man apidho ira podho mir ulok. 5 Ayiko ira podho ma dongo man ma thindho mir anena, man apidho kwond yen ceke ma cego nyinggi i igi. 6 Ayiko ira kut mi pii pi niketho pii umol ira i luli mi yen m’ulepini. 7 Amedo ira wend jutic ma co ku ma mon. Man jutic ginyoliri ira i ot para.* Anwang’u bende lim dupa, dhieng’ man rombe lee ma sagu ng’atu moko ci m’i kind ju ma gilar gibino i wang’a i Yeruzalem. 8 Acoko ira mola ma tar ku mola ma kwar, lonyo mi* jubim man m’i theng ng’om. Acoko ira juruwer ma co man ma mon man bende gin ma miyo anyong’a ma dit ni wot dhanu, niwacu dhaku, eyo, mon dupa. 9 Pieno adoko ng’atu ma dit man akadhu ng’atu moko ci m’ular ubino i wang’a i Yeruzalem. Man rieko para udong’ asu karacelo kuda.

10 Acerara ngo kud i kum gin moko ci m’ayenyo.* Acero ngo kit anyong’a moko ci ni adundena, kum anyong’a unego adundena i tic para ma tek ceke, man maeni ubino sukulia* para pi tic ma tek para ceke. 11 Ento kinde m’aparu i lembe iwi tic ceke ma cinga utimo man iwi tic ma tek ceke m’amulara ko pi nitimo, aneno nia gin ceke iye nanu, etie riemo tok yamu; gin moko bino mbe m’utie ku bero* mandha i the ceng’.

12 I ng’eye aloko paru para i bang’ rieko, man lembabelu man lemkasegu. (Kum ng’atu m’ubebino i ng’ey ubimo copo timo ang’o? Ndhu kende kende gin m’udaru timere.) 13 Man aneno nia rieko ber ma sagu lemkasegu, tap calu ma der ber ma sagu mudho.

14 Ng’atu ma riek wang’e n’i die wiye; ento jakasegu wotho i mudho. Anyang’ bende nia lembe ma rom tundo i wigi ceke. 15 E awacu i adundena kumae: “Lembe ma wok iwi jakasegu biwok i wiya bende.” Ka dong’ anwang’u ang’o pilembe adoko riek nikadhu mukero? Pieno awacu i adundena kumae: “Maeni de gin ma iye nanu.” 16 Kum jubipoy ungo pi nja pi ng’atu ma riek kadi pi jakasegu. I nindo m’ubebino jubiwil pigi ceke. Man ng’atu ma riek bitho nenedi? Calu jakasegu.

17 E adagu kwo, pilembe gin ceke m’ubetimere i the ceng’ unen ira ni gin ma nyayu can, kum gin ceke iye nanu, etie riemo tok yamu. 18 Adagu gin ceke m’atimo tic ma tek pigi i the ceng’, kum ubekwayu awekgi ni ng’atu ma bibino i ng’eya. 19 Man ng’a m’ung’eyo ka nyo ebibedo riek kunoke jakasegu? Re asu ebigarere iwi piny ceke m’atimo kero lee man rieko pi ninwang’u i the ceng’. Maeni de tie gin ma iye nanu. 20 E acaku bayu genogen i adundena pi tic ma tek ceke m’amulara ko i the ceng’. 21 Kum ng’atini copo timo tic ma tek, ma rieko man ng’eyong’ec ku bodho utelo wiye, ento ecikere niweko makapiny pare* ni ng’atu m’utimo tic de ngo pire. Maeni de tie gin ma iye nanu man can ma dit.

22 Ng’atini nwang’u ang’o i andha kud i tic pare ma tek ceke man ava m’ucwale* nitimo tic ma tek i the ceng’i? 23 Kum i nindo pare ceke, tic pare kelo litho man masendi, man kadok ku diewor adundene yom ungo. Maeni de tie gin ma iye nanu.

24 Gin moko mbe ma ber ni ng’atini ma sagu nicamu, nimadhu, man ninwang’u anyong’a* i tic pare ma tek. Anyang’ nia maeni bende tie gin m’uai i cing’ Mungu mandha, 25 kum ng’a ma camu man madhu ma sagu ani?

26 Ni ng’atu ma nyayu anyong’a i Mungu, emiyo rieko, ng’eyong’ec man anyong’a, ento ni jadubo emiyo tic mi gwoko piny man coko dhu piny pi nimiyogi ni ng’atu m’ubenyayu anyong’a i Mungu mandha. Maeni de tie gin ma iye nanu man riemo tok yamu.

9 Ng’atu m’ubetimo tic copo nwang’u ang’o niai kud i kero ceke m’ebetimo? 10 Aneno tic ma Mungu umiyo ni wot dhanu kara gimediri nitimo. 11 Ecwiyo piny ceke leng’* i saane. Eketho kadok ava mi kwo rondo ku rondo i adundegi;* re asu dhanu binyang’ ungo i tic ma Mungu mandha utimo niai i acaki nitundo i ajiki.

12 Anwang’u nia gin moko mbe ma ber igi m’usagu nia gibed kud anyong’a man gitim gin ma ber i nindo mi kwo migi, 13 bende nia ng’atuman ucam man umadhi man anyong’a nege i tic pare ma tek ceke. Maeni tie giramiya pa Mungu.

14 Atuc ninyang’ nia piny ceke ma Mungu mandha ucwiyo bibedo rondo ku rondo. Gin moko mbe ma jucopo medo i kume man gin moko mbe ma jucopo kabu kud i kume. Mungu mandha ucwiyogi kumeno kara dhanu ulwore.

15 Gin moko ci m’ubetimere ular utimere, man gin ma bibino ular ubedo nuti; ento Mungu mandha yenyo i gin ma judaru yenyo iye.*

16 Aneno bende lembe ma e i the ceng’: I ka lembe m’atira, racu re m’ubedo, man i ka bedopwe, racu re m’ubedo. 17 Pieno awacu i adundena kumae: “Mungu mandha bipoko lembe pa won bedopwe ku pa jatimrac ceke, kum saa nuti pi lembe ceke man pi tic ceke.”

18 Bende ayero pi wot dhanu i adundena nia Mungu mandha bikethogi i amulaic man ebinyutho igi nia gi calu ley, 19 kum gin ma wok i kum dhanu utie bende gin ma wok i kum ley; gin ceke gitie kud ajiki* ma rom. Tap calu m’acel tho, ma kucelo de tho kumeno man gin ceke gitie ku tipo ma rom. Pieno, dhanu usagu ley ungo kum gin ceke iye nanu. 20 Gin ceke gicidho kaka ma rom. Gin ceke giai i utur, man gin ceke gidok i utur. 21 I andha ng’a m’ung’eyo ka nyo tipo dhanu idho malu, man tipo ley loro piny i ng’omi? 22 Man aneno nia gin moko mbe ma ber m’usagu ni dhanu nia anyong’a nege i tic pare, pilembe eno re m’utie sukulia* pare; kum ng’a ma copo ketho eneno gin ma bidok timere yor i ng’eye ma dong’ ecidho?

4 Aketho wiya kendo i kum timo ceke mi masendi m’ubetimere i the ceng’. Aneno piwang’ ju ma jubesendo, man ng’atu moko ubino mbe m’ujuk cwinygi. Ju m’ubesendogi gibino ku tego, ento ng’atu moko ubino mbe m’ujuk cwinygi. 2 E afoyo ju m’utho ma dong’ gidaru tho kakare nifoyo ju ma kwo ma gibino mediri nikwo. 3 Man ma ber m’usagu gin ario zoo utie ng’atu ma fodi unyolere ngo, m’uneno ngo tic ceke mi masendi m’ubetimere i the ceng’.

4 Man aneno kite ma nyeko i kind dhanu ubecwalu kogi nitimo tic ku kero* man ku bodho; maeni de tie gin ma iye nanu, en e riemo tok yamu.

5 Jakasegu gwaku cinge ma nwang’u ke ring’ kume ubenyothere.*

6 Yom ma pong’ cing’ acel tie ber nisagu tic ma tek ma pong’ cing’ ario man riemo tok yamu.

7 Agam aketho wiya i kum ayi mange ma e mi gin ma iye nanu i the ceng’: 8 Ng’atu moko nuti ma tie kende, jawodhe de mbe; embe ku wode kadi umin, ento ajiki mbe ni tic pare ma tek ceke. Wang’e copo yeng’ de ngo ku lonyo. Ento nyo ebepenjere de nia, ‘Abetimo tic ma tek kumeni ni ng’a man pirang’o abetwonara* ku gin ma beri’? Maeni de tie gin ma iye nanu man tic mi can.

9 Juario tie ber ma sagu ng’atu acel, pilembe gitie ku sukulia* ma ber pi tic migi ma tek. 10 Kum ka ng’atu acel m’i kindgi upodho, ng’atu ma kucelo copo ting’o jawodhe malu. Ento lembe biwotho nenedi ni ng’atu m’upodho ma ng’atu mange mbe m’uting’e malu?

11 M’umedo maeno, ka juario givuto karacelo, kumgi bibedo mor; ento ng’atu acel kume copo bedo mor nenedi? 12 Man ng’atu moko copo voyo ng’atu acel en kende, ento juario karacelo copo cungo i dhoge. Man thol ma wang’e adek cot pio pio* ngo.

13 Nyathin ma jacan ento ma riek tie ber niloyo ubimo m’utii, ento ma jakasegu m’umbe ku rieko pi nijolo cimowang’. 14 Kum ewok* kud i otkol pi nidoko ubimo kadok nwang’u egam enyolere jacan i the ker p’ubimo maeno. 15 Aketho wiya i kum ju ma kwo ceke ma gibewotho kun ku kun i the ceng’, man bende i kum kite ma lembe wotho ko ni jalawobi m’ucamu ker kaka ng’atu mange. 16 Kadok nwang’u jucwak pare ceke wendgi kwanere ngo de, re ju ma gibibino i ng’eye gibifoye ngo. Maeni de tie gin ma iye nanu, riemo tok yamu.

5 Bed ku weng’i kinde m’ibecidho i ot pa Mungu mandha; pilembe e ber nicidho kuca pi niwinjo lembe kakare nicidho pi nimiyo lam calu ma jukusegu gitimo, kum ging’eyo ngo nia gin ma gibetimo tie rac.

2 Kud iwek dhogi uwec nyapio pio, kadi adundeni uwec m’umbe niparu i wang’ Mungu mandha, pilembe Mungu mandha n’i polo ento in in’i wi ng’om. Pi thelembe maeno, ukwayu wec peri ubed nok. 3 Kum lek wok nikum paru* ma dupa, man wec m’akeca pa jakasegu ketho ecaku coro lembe swa. 4 Tek itimo lembang’ola moko ma ku kwong’ ni Mungu, kud igal nipong’e, kum anyong’a nege ngo i kum jukusegu. Lembe m’ing’olo, pong’e. 5 E ber iri nia kud ing’ol lembe ku kwong’ kakare ning’olo, m’umbe nipong’e. 6 Kud iwek dhogi ucweli* i dubo, man kud iwac i wang’ malaika* nia dhogi kier akiera. Pirang’o wec peri unyay ng’eicwiny i Mungu mandha man uketh enyoth tic mi cingi? 7 Kum tap calu ma paru ma dupa terojo i lek, kumeno bende wec ma dupa terojo i gin ma iye nanu. Ento, lwor Mungu mandha.

8 Kan ibeneno jubesendo jacan man jubenyotho pokolembe ma pwe man bedopwe i theng ng’om ma in’i iye, ii kud uwang’ i kum lembe maeno. Kum calu ma jadit ma wijo ma n’i malu, ng’atu mange ma n’i malu nisage neno wiye, jumange nuti ma gin’i malu nisagu gin ario ceke.

9 Bende, gin ario ceke gipoko piny m’uai i podho; kadok ubimo de cam pare ai i podho.

10 Ng’atu m’umaru mola ma tar biyeng’ ki ngo ku mola ma tar, kadi ng’atu m’umaru lonyo biyeng’ ungo ku piny. Maeni bende tie gin ma iye nanu.

11 Kinde ma piny ma beco ubemedere, ju ma gicame de gimediri. Man bero ma kani ma won pinyne bedo ko, ndhu m’uweko ninenogi ku wang’e?

12 Nindo pa jatic tie mit, dok ecam nyanok kadi lee, ento piny pa jalonyo m’upong’ yiyo ire ngo nindo.

13 Aneno lembe ma rac mandha* ma e i the ceng’: ng’atu moko ucoko lonyo pi nidok kelo nyoth i wiye gire. 14 Lonyo maeno uthum nikum tic moko m’uwotho cuu ngo, man kinde m’enyolo nyathin ma nico, ebino mbe ku gin m’ewek ni giralaga.

15 Tap calu ma ng’atini wok kud i min muneru, ebicidho bende muneru tap calu m’elar ewok ko. Man ecopo cidho ngo ku piny moko m’enwang’u ku tic pare ma tek ceke.

16 Maeni de tie lembe ma rac mandha:* tap calu m’ewok ko, ebicidho de kumeca; man bero ang’o ma ng’atini nwang’u i kum tic ma tek m’ebemedere nisendere ko mananu?* 17 Bende kubang’ ceng’ ecamu cam i mudho, m’etie ku can lee, man remokum, man kwinyo.

18 Aneno nia gin ma ber man m’umaku piny ni e: nia ng’atini ucam, emadhi man anyong’a nege i kum tic ma tek ceke m’ebemulere ko i the ceng’ i nindo ma nok mi kwo ma Mungu mandha umiyo ire, kum maeno tie sukulia* pare. 19 Bende, kinde ma Mungu mandha umiyo lonyo man piny ni ng’atu moko karacelo ku copo mi tiyo kugi, ng’atune ucikere ninwang’u sukulia* pare man anyong’a unege i kum tic pare ma tek. Maeni tie giramiya pa Mungu. 20 Kum ebinyang’* de ngo i kite ma nindo mi kwo pare ubekadhu ko, pilembe Mungu mandha upong’o adundene kud anyong’a.

6 Lembe mange nuti ma rac* m’aneno i the ceng’, man etimere wang’ ma pol i kind dhanu: 2 Mungu mandha miyo lonyo, piny man dwong’ ni ng’atini, uketho ekoso ngo gin m’eyenyo;* re Mungu mandha miyo ngo ire copo mi nyayu anyong’a i iye kugi, jawirok re ma nyayu anyong’a i iye kugi. Maeni de tie gin ma iye nanu man can ma dit. 3 Ka ng’atini udoko wego wang’ dak acel man ekwo oro ma lee, man etundo i kum tiyo, ento enyayu ngo anyong’a i iye* ku piny pare ma beco i wang’ m’elor i liel,* acopo wacu nia nyathin ma juoyo m’umbe tie ber nisage. 4 Kum nyathinne unyolere mananu man ecidho i mudho, man nyinge uumere i mudho. 5 Kadok nwang’u eneno ngo ceng’ kadi eng’eyo ngo gin moko, re asu lembe pare ber* nisagu pa jadwong’ maeno. 6 Berone tie ang’o nikwo oro elufu acel wang’ ario m’umbe ninyayu mutoro i ijo? Nyo gin ceke gicidho ngo i kabedo ma romi?

7 Tic ma tek ceke ma ng’atini timo tie pi nipong’o dhoge; re asu mido dhoge* thum ungo. 8 Kum ng’atu ma riek uloyo jakasegu kud ang’o, kadi berone tie ang’o nia jacan ung’ey kite m’ecopo bodhere ko?* 9 E ber nia ng’atini unwang’ anyong’a i kum gin ma wang’e ubeneno kakare nikadhu kun ku kun i tok awanya pare.* Maeni de tie gin ma iye nanu, riemo tok yamu.

10 Gin m’unuti jular jucaku nyinge, man jung’eyo nia dhanu tie ang’o; man ecopo piemere ngo ku* ng’atu ma tek nisage. 11 Tek wec* utie lee, gin ma iye nanu de medere; man bero ma kani ma gimiyo ni dhanu? 12 Ng’a m’ung’eyo gin ma ber nisagu m’ukwayu ng’atini utim i kwo pare i nindo ma nok mi kwo pare ma iye nanu m’ubekadhu calu tipopinyi? Kum ng’a ma copo yero ni ng’atini gin ma bidok timere i the ceng’ i ng’ey ma dong’ ecidho?

7 Nying’ ma ber* tie ber nisagu mo ma ber, man nindo mi tho tie ber nisagu nindo mi nyoliri. 2 E ber nicidho i ot mi wak kakare nicidho i ot mi mutoro, kum eno tie ajiki mi dhanu ceke, man ju ma kwo gicikiri niketho lembene i adundegi. 3 Nibedo ku can tie ber nisagu ng’iero, kum can m’i wang’jo dwoko adunde ber. 4 Adunde ng’atu ma riek n’i ot mi lemcan, ento adunde jakasegu n’i ot mi mutoro.*

5 E ber niwinjo juk pa ng’atu ma riek kakare niwinjo wer mi jukusegu. 6 Kum calu moc mir ukudho i mac m’ubeliel i ther agulu, ng’iero pa jakasegu de tie kumeno; maeni de tie gin ma iye nanu. 7 Ento masendi copo dwoko ng’atu ma riek abelu, man kanyaka nyotho adunde.

8 Ajiki mi lembe tie ber nisagu acakine. Etie ber nibedo ng’atu ma twiyo cwinye kakare nibedo jakuhaya. 9 Ng’eicwiny kud umeki vur vur, kum ng’eicwiny ma vur vur bedo i kor jukusegu.*

10 Kud iwac kumae: “Pirang’o nindo ma con ubino ber nisagu maeni?” kum etie ngo rieko re m’uketho ipenjo penji maeno.

11 Rieko karacelo ku giralaga tie gin ma ber man etie bero ni ju ma gibeneno der mi dieceng’.* 12 Kum rieko tie jamgwok tap calu ma sente de tie jamgwok, ento bero pa ng’eyong’ec ni e: Rieko gwoko kwo pa ng’atu m’utie kude.

13 Keth wii cuu i kum tic pa Mungu mandha, kum ng’a ma copo twinyo gin m’egomo? 14 I nindo mi bero, tim berone, ento i nindo mi can, keth nia Mungu utimo nindo maeno de calu nindo ma kucelo, kara dhanu kud ung’ey cuu* gin moko ci ma bitundo i wigi i nindo m’ubino.

15 I nindo mi kwo para ma iye nanu aneno lembe ceke niai i kum won bedopwe m’ubetho i bedopwe pare, nitundo i kum jatimrac m’ubekwo nindo ma lee i racu pare.

16 Kud idok pwe nisagu kadi kud inyuthiri giri nia i riek nikadhu mukero. Pirang’o ikel nyoth i wii giri? 17 Kud ibed ng’atu ma rac nikadhu mukero, kadi kud idok jakasegu. Pirang’o itho i wang’ nindo peri? 18 E ber niwinjo cimowang’ acel m’umbe niweko ma kucelo; kum ng’atu m’ulworo Mungu bitiyo kugi gin ario kpo.

19 Rieko dwoko ng’atu ma riek tek lee nisagu jumaco ma tek apar mir adhura. 20 Kum ng’atu ma pwe mbe iwi ng’om ma timo kwa lembe ma ber, man edubo ngo.

21 Bende, kud iketh adundeni i kum lembe ceke ma dhanu ubeyero; kan ungo ibiwinjo jatic peri ubelemi; 22 kum ing’eyo cuu i adundeni nia wang’ ma pol in de ilamu jumange.

23 Apimo lembe maeno ceke ku rieko man awacu kumae: “Abidoko riek.” Ento ebino bor kuda. 24 Lembe m’utimere tie lembe ma jucopo tundo ngo i bang’e man ma thuc dit. Ng’a ma copo nyang’ i iye? 25 Atelo wi adundena pi ning’eyo, pi niponjo man pi nisayu rieko man thelembe ma ketho lembe timere, man ninyang’ i racu m’i lemkasegu, man i kasegu m’i timo mir abelu. 26 E anwang’u lembe ma e: Dhaku ma calu voi pa jadwar, m’adundene calu ndiya, ma cinge calu nyoro ma twiyojo i kol tie kec ma sagu tho. Ng’atu ma nyayu mutoro i Mungu mandha biboth kud i cinge, ento jadubo moko i uwic pare.

27 Jacok dhu dhanu uwacu kumae: “Nen, maeni tie gin m’anwang’u: Atimo sayusac iwi lembe acel i ng’ey ma kucelo kara acok dhu lembe para, 28 ento gin m’amedara* nisayu, anwang’e ngo. Anwang’u nico* acel i kind elufu acel, ento anwang’u ngo dhaku acel i kindgi. 29 Anwang’u gin acel ma e: Mungu mandha ucwiyo dhanu atira, ento gin re ma giyenyo nipangu lembe dupa.”

8 Ng’a ma calu ng’atu ma rieki? Ng’a m’ung’eyo kite mi yiko lembe* moko? Rieko pa ng’atini rienyo wang’e man gonyo wang’e.

2 Ayero kumae: “Wor ng’ol p’ubimo pilembe ikwong’iri ni Mungu. 3 Kud iai nyapio pio kud i wang’e. Kud icung i ng’ete moko ci mi gin ma rac; kum ecopo timo gin moko ci ma iye foyo, 4 kum lembe p’ubimo loyo zoo; ng’a ma copo yero ire nia, ‘Ibetimo ang’o?’”

5 Ng’atu m’ubeworo cik binwang’ere ngo ku peko, man ng’atu ma tie kud adunde ma riek bing’eyo saa ma tap man ayi mi timo lembe.* 6 Kum lembeman tie ku saane man ayi mi time,* pilembe peko mi dhanu upong’ dit. 7 Calu ma ng’atu moko mbe m’ung’eyo gin ma bitimere, ng’a ma copo koro kite m’ebitimere ko?

8 Tap calu ma ng’atini umbe ku copo iwi tipo,* kadi ecopo cero ngo tipo, kumeno bende ng’atu moko mbe m’utie ku copo iwi nindo mi tho. Tap calu ma i saa pa lwiny, lwiny weko ngo ng’atu moko, kumeno bende lembe ma rac biweko ngo ju ma gibetime gibothi.*

9 Aneno lembe maeni ceke, man aketho adundena i kum tic moko ci m’ubetimere i the ceng’ i saa ma dhanu bimo iye wi dhanu pi nitime rac. 10 Man aneno jutimrac ma jubekunyo, gi ju ma gibed gimondo man giwok kud i kabedo ma leng’, ento pio pio wijo uwil i kumgi i adhura ma gibed gitimo iye lembe kumeno. Maeni bende tie gin ma iye nanu.

11 Kum jung’olo ngo lembe iwi timo ma rac nyapio pio, adunde dhanu udoko nwang’ nitimo lembe ma rac. 12 Kadok nwang’u jadubo copo timo lembe ma rac wang’ dak acel man emedere asu nikwo pi nindo ma lee de, re ang’eyo nia lembe biwotho ma ber ni ju ma gibelworo Mungu mandha, pilembe gibelwore. 13 Ento lembe biwotho ngo ma ber ni jatimrac, kadi ebimedo ngo nindo pare ma calu tipopiny, pilembe ebelworo ngo Mungu.

14 Lembe ma iye nanu* ma e timere iwi ng’om: Weg bedopwe moko nuti ma jutimo igi lembe calu ve gitimo lembe ma rac, man jutimrac moko nuti ma jutimo igi lembe calu ve gitimo lembe m’atira. Awacu nia maeni bende tie gin ma iye nanu.

15 E ang’olo nia kwayu ng’atini unyay anyong’a i iye, pilembe gin moko mange ma ber umbe ire i the ceng’ m’usagu nicamu, nimadhu, man nibedo kud anyong’a; ukwayu etim kumeno kinde m’ebetimo tic ma tek i saa mi kwo pare ma Mungu mandha umiyo ire i the ceng’.

16 Aketho adundena i kum yenyo rieko man i kum neno tic ceke m’ubetimere iwi ng’om, atwonara kadok ku nindo dieceng’ ku diewor.* 17 I ng’eye aketho wiya i kum tic ceke pa Mungu mandha, man anyang’ nia dhanu copo nyang’ ungo i lembe m’ubetimere i the ceng’. Kadok nwang’u giii rukani, gicopo nyang’ ungo i iye. Kadok nwang’u gibegoyo korgi nia gi riek lee pi ning’eye de, re i andha gicopo nyang’ ungo i iye.

9 E aketho gin maeni ceke i adundena man anwang’u nia weg bedopwe ku ju ma riek karacelo ku tic migi bende gin’i cing’ Mungu mandha. Dhanu ung’eyo ngo mer man adegi m’ular ubino i wang’gi. 2 Gin ceke gitie kud ajiki* ma rom, won bedopwe man jatimrac, ng’atu ma ber man ng’atu ma leng’ man ng’atu m’ucido, ju ma gibethiero lam ku ju ma gibethiero ngo lam. Ng’atu ma ber tie rom ku jadubo; ng’atu ma timo lembang’ola ma ku kwong’ tie rom ku ng’atu ma lworo nitimo lembang’ola ma ku kwong’. 3 Maeni tie gin ma nyayu can m’ubetimere i the ceng’: Calu piny ceke tie kud ajiki* ma rom, adunde dhanu bende upong’ ku lembe ma reco; man abelu n’i adundegi i nindo mi kwo migi, i ng’eye ke githo!*

4 Genogen unuti ni ng’atu ma n’i kind ju ma kwo, kum gwok ma kwo tie ber ma sagu umvor m’utho. 5 Kum ju ma kwo ging’eyo nia gibitho, ento ju m’utho ging’eyo gin moko ngo, kadi gimbe ku sukulia moko de, kum wijo udaru wil pigi. 6 Bende mer migi man adegi migi ku kumira migi udaru rwinyo, man dong’ gidikiri ngo i gin moko ci m’ubetimere i the ceng’.

7 Cidhi, cam cam peri kud anyong’a, man madh pigulok peri kud adunde mi mutoro, kum Mungu mandha udaru nwang’u anyong’a i kum tic peri. 8 Dong’ bongu peri ubed tar* saa ceke man kud ikos niwiro mo i wii. 9 Kwo ku mutoro ku dhaku peri m’imaru i nindo ceke mi kwo peri ma iye nanu ma Mungu umiyo iri i the ceng’, i nindo ceke mi lembe peri ma iye nanu, kum eno tie makapiny peri i kwo man i tic ma tek m’ibemuliri ko i the ceng’. 10 Gin moko ci ma tek cingi unwang’u mir atima, time ku tegoni ceke, kum tic umbe, kadi pangulembe, kadi ng’eyong’ec, kadi rieko i Liel* m’icidho i iye.

11 Aneno lembe moko mange i the ceng’, ju ma ringo piyo giloyo ng’wec ungo saa ceke, kadi weg kero giloyo lwiny kwa ngo, kadi ju ma riek ginwang’u cam ungo saa ceke, kadi ju ma nyang’ i lembe gilony ungo kwa, kadi ju ma gitie ku ng’eyong’ec lembe wotho igi miero ngo saa ceke, pilembe saa man lembe ma wok rek rubogi ceke. 12 Kum dhanu ung’eyo ngo saa pare. Tap calu ma rec moko ko i voi, man winyo moko i uwic, kumeno bende wot dhanu moko i uwic i saa mi nyoth, kinde m’etundo i wigi rek.

13 Aneno bende lembe ma e iwi rieko i the ceng’, man lembene uwang’u iya: 14 Adhura moko ma nok ubino nuti ku wend dhanu ma nok i iye; man ubimo ma won tego ubino i kume man etieke man egiero jamtieko adhura ma dit i kume. 15 Ng’atu moko ma jacan ento ma riek ubino nuti i iye man ebodho adhurane ku rieko pare. Ento ng’atu moko mbe m’upoy pi jacan nino. 16 E awacu ira gira kumae: ‘Rieko ber ma sagu tego; re jucayu rieko pa jacan man wec pare juwinjo ngo.’

17 E ber niwinjo wec ma yoo pa ng’atu ma riek kakare niwinjo kok pa ng’atu m’ubebimo i kind jukusegu.

18 Rieko ber ma sagu jamlwiny, ento jadubo acel copo nyotho lembe ma beco dupa.

10 Calu ulwang’ini m’utho ketho ng’wic mo pa jajeb mo ng’wii tik man ewodho voyo, kumeno bende lemkasegu ma nok nyotho rieko man dwong’.

2 Adunde ng’atu ma riek telo wiye i yo m’atira,* ento adunde jakasegu telo wiye i yo ma rac.* 3 I yo moko ci ma jakasegu ubewotho i iye, ekoso rieko,* man eketho ng’atu moko ci ung’ey nia etie jakasegu.

4 Tek kwinyo* pa jabim uopo i kumi, kud iai ku kakeri, kum bedo yoo kwiyo lak dubo ma dongo.

5 Ma e tie lembe ma nyayu can m’aneno i the ceng’, niwacu kit kosa ma weg tego gibetimo: 6 Juketho jukusegu i kabedo dupa ma malu, ento julonyo* gidong’ kaka ma piny.

7 Aneno jutic iwi riuni, ento judongo ma wijo gibewotho ku tiendgi tap calu jutic.

8 Ng’atu m’ubetong’o vur copo podho i iye; man ng’atu m’ubetuco wang’ gang’kidi thwol copo tong’e.

9 Ng’atu m’ubewodho kidi, kidine romo nyayu ret i kume, man ng’atu m’ubekaku yen de romo nwang’ere i ariti nikumgi.*

10 Tek lak jamtic mi cuma utho man ng’atini upaku ngo lake, bikwayu etim kero lee. Ento rieko ketho lembe wotho miero.

11 Tek thwol utong’ojo i wang’ ma jurambe, nwang’u bero moko mbe ni jaramb ma jabodho.*

12 Wec ma wok kud i dhu ng’atu ma riek kelo bero, ento dend dhu jakasegu tie nyoth pare. 13 Wec ma kwong’a ma wok kud i dhoge tie lemkasegu, man wec pare ma tokcen tie lembabelu ma kelo nyoth. 14 Ento jakasegu medere asu niweco.

Ng’atini ng’eyo ngo gin ma bitimere; ng’a ma copo yero ire gin ma bitimere i ng’eye?

15 Tic ma tek pa jakasegu daru tego pare, kum eng’eyo ngo kadok kite m’ecopo nwang’u ko yo m’ucidho i adhura.

16 Etie lembe ma rac rukani ni ng’om ka jabim utie jalawobi man judongo ma wijo gicaku nitimo foc migi kugweno! 17 Etie lembe mir anyong’a rukani ni ng’om ka jabim utie wod weg yung man judongo ma wijo gicamu i saa m’ukwayere pi ninwang’u tego, ento ungo pi mero!

18 Nikum nyap m’ukadhu mukero riu ma wi ot mwony, man nikum cing’ ma jebele ot cwir.

19 Cam* tie pi ng’iero, man pigulok nyayu mutoro i kwo; ento sente pong’o yeny ceke.

20 Kud ilam ubimo kadok i paru peri,* man kud ilam jalonyo i kusika peri; pilembe winyo* moko copo yeyo dwendi* kadi giracwiya moko ma juvombe copo dok yero gin m’iyero.

11 Bol mukathi peri iwi pii, kum i ng’ey nindo dupa ibinwang’e kendo. 2 Mii makapiny ni dhanu abiro kunoke ni dhanu abora, kum ing’eyo ngo nia peko* ma kani ma biwok iwi ng’om.

3 Tek pii upong’ i afuru, gibicwiyo koth iwi ng’om; man tek yen upodho yo piny kadike yo malu, kaka ma yenne upodho i iye, ebivuto de keca.

4 Ng’atu m’ubeneno yamu bicoyo ngo kodhi, man ng’atu m’ubeneno afuru bikayu ngo.

5 Tap calu m’ing’eyo ngo kite ma tipo timo ko i cogo nyathin ma n’i* dhaku ma iye nuti, kumeno bende ing’eyo ngo tic pa Mungu mandha m’ubetimo piny ceke.

6 Coy kodhi peri kugweno man kud iwek cingi uyom nitundo dhu uthieno; kum ing’eyo ngo nia ma kani ma bibedo miero, ka nyo ma e kunoke ma ca, kunoke ka nyo gin zoo gibibedo miero.

7 Der tie ber, man e ber nia wang’jo unen ceng’. 8 Kum ka ng’atini ukwo pi oro ma lee, dong’ anyong’a unege i kumgi ceke. Ento ecikere nipoy nia nindo mi mudho gicopo bedo dupa; gin ceke ma bibino tie gin ma igi nanu.

9 Anyong’a unegi jalawobi kinde ma fodi in aradu, man wek adundeni ubed kud anyong’a i nindo mir aradu peri. Lub yo mir adundeni man cidhi ka ma weng’i ubetelo wii i iye; ento ng’ey nia Mungu mandha bikelo pokolembe i wii* pi gin maeni ceke. 10 Pieno, kab lembe ma reco kud i adundeni man kab cen lembe ma timojo rac kud i kumi, kum aradu man tego mi saa mir aradu tie gin ma iye nanu.

12 Dong’ poy pi Jacwic peri ma Dit i nindo mir aradu peri, ma fodi nindo mi can* uwok ungo man oro m’ibiwacu i iye kumae: “Anyong’a nega ngo i kumgi”; 2 ma fodi ceng’, der, dwi, man nyikaluku gicido ngo man afuru udwogo ngo i ng’ey* koth; 3 i nindo ma kum jukur ot caku miel i iye, man ju ma tek igi gom, man jumamon giweko nirego rego pilembe gidong’ nok, man jumamon ma gibeneno piny kud i wang’ madhirisa ginwang’u nia piny tie col; 4 kinde ma dhugola ma wang’e ubeneno yo ucikere, kinde ma dwand rego ujwik, kinde ma ng’atini ai saa ma winyo ubewak i iye, man jumanyir ceke ma giwero wer tego migi ujwik. 5 Bende lworo kaka ma malu ubenegojo man ndiri ubenegojo i yo. Man yend amandh uthiwo, man usene ubewayere awaya, man mido dhok* ujwik, pilembe ng’atini ubecidho i ot pare m’ebibedo i yie pi kare ma lee, man juruwak gibewotho i yo; 6 i wang’ ma jukab thol mi mola ma tar, man jurung i tabu mi mola ma kwar, man agulu ung’eny i kulo man ukobre mi pii m’atong’a ung’eny. 7 I ng’eye utur dok i bang’ ng’om tap calu m’elar ebino, man tipo* ke dok i bang’ Mungu mandha m’umiye.

8 “Gin ma iye nanu nisagu zoo!” jacok dhu dhanu ubewacu. “Gin ceke iye nanu.”

9 Jacok dhu dhanu udoko riek arieka kende ngo, ento emedere niponjo dhanu ku lembe m’eng’eyo, eparu i lembe man etimo sayusac cuu kara ecok* dhu lembrieko dupa. 10 Jacok dhu dhanu uii ninwang’u wec ma mit man nikiewo wec ma tap mi lemandha.

11 Wec mi ju ma riek tie calu kenge, man lembe migi ma jucoko dhoge tie calu musumali ma juguro ucungo nging’ nging’; giai i bang’ jakwac acel. 12 Pi lembe mange m’uweko maeni, woda, acimo weng’i kumae: Niwodho buku lee ajikine mbe, man niwodhiri lee pigi tie olo ni ring’kum.

13 Lembe ceke daru winjere, ajiki mi lembe ni e: Lwor Mungu mandha man wor cik pare, kum maeni tie lembe ceke m’ukwayere ni dhanu. 14 Kum Mungu mandha bipoko lembe iwi tic ceke, uketho i iye piny ceke m’upondo, dok ebed ma ber kunoke ma rac.