WAK
א [Alef]*
1 Akaa, ebedo eni kende, adhura ma nwang’u dhanu upong’ i iye!
Edoko calu dhatho, en ma nwang’u dhanu pong’ bik i iye i kind thek!
En ma nwang’u e nyar ubimo i kind theng ker, juketho ebetimo tic mir adici!
ב [Beth]
2 Ewak lee mandha ku diewor, man piwang’e ubemol iwi limbe.
Ng’atu moko mbe m’i kind jumer pare ceke ma n’i vute pi nijuko cwinye.
Juwodhe ma buu ceke ucibe; gidoko judhoge.
ג [Gimel]
3 Yuda udaru cidho i ng’eca; ebeneno can ma lee man ng’eca ma tek.
Ecikere nibedo i kind thek; enwang’u ngo kayom.
Ju m’ubenyayu ragedo i kume ceke unwang’e saa m’ebesendere.
ד [Daleth]
4 Gengi mi Sayuni ubewak, pilembe ng’atu moko mbe m’ubebino i foc.
Dhugang’ pare ceke tie uvuru; julam pare ubecur acura.
Jumanyir pare ma sumba utie ku can ma lee, man cwinye ng’abere ku rac.
ה [He]
5 Jukwor pare kawoni udoko rwoth* pare, cwiny judegi pare ubedieng’ ungo.
Kum Yehova ukelo can i wiye nikum kier pare ma dupa.
Nyithindhe ucidho i ng’eca i wang’ jakwor.
ו [Waw]
6 Leng’o pa Nyasayuni udaru thum ceke.
Judongo ma wijo pare utie calu thil m’unwang’u ngo kakwac,
Gibewotho ma givoc i wang’ ng’atu m’uberiemo tokgi.
ז [Zayin]
7 I nindo m’ebeneno i iye can man m’embe ku kabedo, Yeruzalem upoy
Pi piny ma beco ceke m’ebino ko yang’ con.
Saa ma dhanu pare upodho i cing’ jakwor man ma ng’atu moko mbe m’ukonye,
Jukwor unene man ung’iere pilembe erwombere.
ח [Heth]
8 Yeruzalem udubo lee mandha.
Eno re m’uketho edoko ni piny ma judagu ku rac.
Dhanu ceke m’ubed uyunge kawoni dong’ ubecaye, pilembe gineno muneru pare.
En de ebecur man eloko wang’e cen ku lewic.
ט [Teth]
9 Cilo pare unyotho dhu tiend kendi pare.
Eparu ngo pir anyim pare.
Ayi m’epodho ko tie lembe mi zungo; embe ku ng’atu moko m’ujuk cwinye.
Ee Yehova, nen can para, kum jadegi ubepakere.
י [Yod]
10 Jakwor udaru ketho cinge iwi lonyo pare ceke.
Kum eneno thek kinde ma gibemondo i kabedo pare ma leng’,
Ju m’ing’olo nia kud umond i kind dhanu peri.
כ [Kaf]
11 Dhanu pare ceke gibecur; gibesayu cam.*
Giwilo piny migi ma pigi tek ku piny moko mir acama, ndhu kara gibed kwo.*
Lok weng’i, Ee Yehova, man inen, adaru doko dhaku* ma tije mbe.
ל [Lamed]
12 Nyo etie ngo gin moko iwu wun ceke ma wubekadhu i gengi?
Wukelok weng’wu man wunen!
Nyo litho moko nuti de ma rom ku litho ma junyayu i kuma,
Ma Yehova unyayu i kuma i nindo mi ng’eicwiny pare m’uopo?
מ [Mem]
13 Niai ku malu eoro mac i cogona, man evoyo cogo ceke.
Epedho voi pi tienda; man ediya aloko ku ng’eya.
Eketho adoko dhaku m’udong’ kende.
Dieceng’ duu atwoyo atwoya.
נ [Nun]
14 Etwiyo kier para calu mberembere; etwiyogi karacelo ku cinge.
Jukethogi i ng’uta man kero para thum.
Yehova umiya i cing’ ju m’acopo cerara ngo igi.
ס [Samek]
15 Yehova uvudho jumaco ceke ma jurukara kud i bang’a.
Ewaku udul dhanu i kuma pi nirungo i awobi para.
Yehova unyono i nyaku ma sumba mi Yuda i vur mi biyo pigulok.
ע [Ayin]
16 Abewak pi lembuni; piwang’a ubecwir.
Kum ng’atu moko ci ma nwang’u romo juko cwinya man ma romo dwogo kero i kuma ni bor kuda.
Wota gidong’ kendgi, pilembe jadegi udaru voyo.
פ [Pe]
17 Sayuni udaru thang’u cinge; embe ku ng’atu moko ma romo juko cwinye.
Yehova udaru ng’olo lembe pi Yakobo ni jukwor pare ceke m’utieke nia gibin i kume.
Yeruzalem udoko igi ni piny ma judagu ku rac.
צ [Tsade]
18 Yehova utie pwe, kum an re m’ajai i kum cik pare.*
Wuwinji, wu dhanu ceke, man wunen litho para.
Jumanyir para ma sumba man awobi para gidaru cidho i ng’eca.
ק [Kof]
19 Alwong’o jumer para, ento giciba.
Julam para man judongo para githum tup kud i adhura,
Kinde ma gibesayu cam kara gibed kwo.*
ר [Rec]
20 Nen, Ee Yehova, kum an’i can ma dit.
Iya ujebere.
Adundena ulokere yor i iya, kum ajai ku rac.
Woko palamularu ubekabu piny; i ot ke tho re m’utie.
ש [Cin]
21 Dhanu uwinjo abecur; man ng’atu moko mbe ma copo juka.
Judegina ceke giwinjo pi can para.
Anyong’a negogi, pilembe ikelo canne i wiya.
Ento ibikelo nindo m’itwong’o, kinde ma gin de gibidoko calu an.
ת [Taw]
22 Wek racu migi ceke ubed i weng’i man itimgi rac,
Tap calu m’itima ko rac nikum kier para ceke.
Kum cur para utie dit, man adundena ubetwoyo.
א [Alef]
2 Akaa, Yehova uumo Nyasayuni kud afuru nikum ng’eicwiny pare!
Ebolo leng’o mir Israel niai kud i polo iwi ng’om.
Epoy ungo pi dul mi the tiende i nindo mi ng’eicwiny pare
ב [Beth]
2 Yehova umwonyo kabedo pa Yakobo ceke m’umbe kisa acel de.
Erwombo ot ma tek pa Nyayuda nikum ng’eicwiny pare ma lake tek.
Eredho ker ku judongo ma wijo pare man ecidogi.
ג [Gimel]
3 Ekabu tego pa* Israel ceke nikum ng’eicwiny pare ma lake tek.
Edolo cinge mir acwic kinde ma judegi utundo,
Man i Yakobo emedere niliel calu mac m’uwang’u piny ceke m’utieko ng’ete.
ד [Daleth]
4 Etelo* i athero pare calu jadegi; cinge ma yor acwic ubedo ayika calu jakwor;
Emedere ninego dhanu ceke ma leng’ pir anena.
Man ekonjo ng’eicwiny pare ma lake tek calu mac i hema pa Nyasayuni.
ה [He]
5 Yehova udoko calu jadegi;
Emwonyo Israel.
Emwonyo udine ceke ma wiw;
Enyotho udi pare ma tek ceke
Man eketho wak ku cur upong’ i Nyayuda.
ו [Waw]
6 Erungo otbak pare ku kero, calu otbak mi podho.
Ejigo* foc pare.
Yehova uketho juwil ku foc man sabatu i Sayuni,
Man nikum ng’eicwiny pare ma lake tek, ekwanu ngo kud ubimo man jalam.
ז [Zayin]
7 Yehova ukwero pemlam pare;
Edagu kabedo ma leng’ pare.
Ethiero gang’kidi mi udi pare ma tek ma wiw i cing’ jadegi.
Giting’o dwandgi i ot pa Yehova calu ve i nindo mi foc.
ח [Heth]
8 Yehova ukeco ninyotho gang’kidi pa Nyasayuni.
Etelo i thol mi pimo piny.
Ecero ngo cinge pi nikelo nyoth.*
Man eketho gang’ ma tek ku gang’kidi ubewak.
Gin ceke judaru tego i kumgi.
ט [Teth]
9 Dhugang’ pare umwony i ng’om.
Enyotho riu pare man eturo igi.
Ubimo pare man judongo ma wijo pare gin’i kind thek.
Cik* umbe; kadok jubila pare de dong’ ginwang’u ngo gin ma wok i wang’ niai kud i bang’ Yehova.
י [Yod]
10 Judongo pa Nyasayuni gibedo ling’ i ng’om.
Gidhenyo utur i wigi man gikendo kendi mi saki.
Jumanyir ma sumba mi Yeruzalem gikulo wigi piny i ng’om.
כ [Kaf]
11 Wang’a uol ku cwiro piwang’.
Iya ujebere.
Cwinya uoi i ng’om nikum nya dhanu para m’upodho,
Nikum awiya man mukere m’ubevoc i akarayo mir adhura.
ל [Lamed]
12 Gibemediri nipenjo meggi kumae: “Cam ku pigulok ni kani?”
Saa ma gibevoc calu ng’atu ma junyayu ret i kume i akarayo mir adhura,
Man saa ma cwinygi* ubemwony i kor meggi.
מ [Mem]
13 Aromo tiyo kud ang’o ni jamulembe,
Kunoke acopo pori kud ang’o, Ee Nyayeruzalem?
Aromo pori kud ang’o pi nijuko cwinyi, Ee nyaku ma sumba mi Sayuni?
Kum kaka m’utur peri utie lac calu nam. Ng’a ma copo keyo kumi?
נ [Nun]
14 Gin ma wok i wang’ ma jubila peri gineno piri ubino ndra man gin ma iye nanu,
Man ginyutho ngo dubo peri ngbeng’ kara kud icidh i ng’eca,
Ento gimediri nineno iri vupo man wec ma wingojo.
ס [Samek]
15 Dhanu ceke m’ubekadhu kud i yo i ng’eti gibipadu cing’gi ku cac.
Gibilwiyo ku zungo man gibiyengo wigi pi Nyayeruzalem ma gibewacu kumae:
“Nyo eni tie ngo adhura ma jubed juyero pire nia, ‘e leng’ magwei, anyong’a mi ng’om zoo e’?”
פ [Pe]
16 Judegi peri ceke gibeng’amu dhoggi i kumi.
Gibelwiyo man gibeng’enjo lakgi ma gibeyero kumae: “Wadaru mwonye cen.
Eni tie nindo ma wakuro hai! Edaru tundo man wanene.”
ע [Ayin]
17 Yehova utimo lembe m’ekeco; etimo lembe m’eyero,
Lembe m’eng’olo yang’ con.
Erwombo piny m’umbe kisa.
Eketho anyong’a nego jadegi i kumi; edodo tego mi* jukwor peri.
צ [Tsade]
18 Adundegi ubewak i bang’ Yehova, Ee gang’ pa Nyasayuni.
Wek piwang’gi umol calu kulo, dieceng’ ku diewor.
Kud imii iri yom, kud iketh weng’i uyom.
ק [Kof]
19 Ai malu! Wak ku diewor i caku mi kur.
Konj adundeni calu pii i wang’ Yehova.
ר [Rec]
20 Lok weng’i, Ee Yehova, man nen ng’atu m’itimo rac dit.
Nyo ukwayu mon ucam nyithindhgi* ma buu, awiya migi ma ful ful,
Kunoke nyo ukwayu juneg julam ku jubila i kabedo ma leng’ pa Yehova?
ש [Cin]
21 Avuj awobi man ju m’utii uvuto i ng’om i gengi.
Jumanyir para ma sumba man awobi para gipodho i lak palamularu.
Inegogi i nindo mi kwinyo peri man ithumogi ma kisa mbe.
ת [Taw]
22 Iwaku ndiri ku kakare ceke calu ve i nindo mi foc.
I nindo mi ng’eicwiny pa Yehova, ng’atu acel de mbe m’uboth kadi m’udong’ kwo.
Jadegi udaru dhanu m’anyolo man m’atungo.
א [Alef]
3 An a ng’atu m’uneno can nikum uluth mi ng’eicwiny pare ma lake tek.
2 Eriema man eketho awotho i mudho, i der ungo.
3 Eyo, ekelo cinge i kuma kendo kendo dieceng’ duu.
ב [Beth]
4 Enyotho ring’ kuma man dend kuma;
Eturo cogona.
5 Etieka, man etwoda tingili kud adra ma kec man masendi.
6 Ediya kara abed kaka ma col bii calu ng’atu m’utho yang’ con.
ג [Gimel]
7 Etieka ku gang’ ma dong’ acopo vuth ungo;
Etwiya ku kongo ma pek mi mola.
8 Man kinde m’abewak kpe pi nikwayu kony, ekwero* rwo para.
9 Etwiyo yo para ku kidi m’apaya;
Eketho gengi para ugondere.
ד [Daleth]
10 Epondo pi nikanu ira libo calu urudi, calu umvor m’upondo.
11 Eketho aweko gengi mi tek tek man eyeco iya nziki nziki;*
Eketho adong’ kenda.
12 Etelo* i athero pare, man eliba ni gin m’umito ekil.
ה [He]
13 Ekilo rong’ini para plu kud athero* mi thubu* pare.
14 Adoko ni jamng’iero ni dhanu ceke, thiwiwer migi dieceng’ duu.
15 Epong’a ku piny ma kec man eyeng’a ku yendadra.
ו [Waw]
16 Eturo laka ku korokoto;*
Ecung’a i vuru.
17 Itwona* ku kwiyocwiny; wiya uwil i kum gin ma ber.
18 Pieno ayero kumae: “Yung para uthum, man bende gin m’abino kuro i bang’ Yehova.”
ז [Zayin]
19 Poy pi masendi para man pi kite m’akoso ko kabedo, pi yendadra man pir adra ma kec.
20 Ibipoy* andhandha man ibikulo kori yor i bang’a.
21 Apoy pi lembene i adundena; pi thelembe maeno re m’abikuro ku twiyocwiny.
ח [Heth]
22 Tie nikum mer ma lokere ngo pa Yehova re m’uketho wathum ungo,
Kum kisa pare jik ungo nyanok de.
23 Gidoko nyen kubang’ kugweno; bedomandha peri utie dit.
24 Ayero* kumae: “Yehova tie makapiny para, pi thelembe maeno re m’abikure ku twiyocwiny.”
ט [Teth]
25 Yehova tie ber ni ng’atu m’ugene, ni ng’atu* m’ubemedere nisaye.
26 Etie ber nikuro both pa Yehova ling’ ling’.*
27 Etie ber nia ng’atini unwang’ere ku peko* kinde m’en aradu.
י [Yod]
28 Wek ebed kende man ebed ling’ kinde ma Mungu ukethe i wiye.
29 Wek eroy dhoge i die i utur; saa moko nyo fodi genogen utie.
30 Wek ethier limbe ni ng’atu m’ubegoye; wek epong’ ku cac.
כ [Kaf]
31 Kum Yehova biwenjowa ngo rondo ku rondo.
32 Kadok nwang’u enyayu can de, re ebibedo bende ku kisa nikum mer pare ma lokere ngo m’usagu.
33 Kum ninyayu can man nisendo wot dhanu utie ngo lembe ma n’i adundene.
ל [Lamed]
34 Ninyono jurukol ceke ma n’i wi ng’om i the tielo,
35 Nicero pokolembe m’atira i wang’ Ng’atu ma Malu Ngbir,
36 Nicero ng’atini kud uloy pido i lemkesi pare,
Yehova yiyo ngo lembe ma kumeno.
מ [Mem]
37 Dong’ ng’a ma copo weco man ma copo ketho lembene timere tek fodi Yehova ung’olo ngo lembene?
38 Niai kud i dhu Ng’atu ma Malu Ngbir,
Lembe ma rac ku ma ber wok ungo karacelo.
39 Pirang’o ng’atu ma kwo ubewagere pi matoke mi dubo pare?
נ [Nun]
40 Wang’iyu man waluru i yo mwa, man wek wadwogwu i bang’ Yehova.
41 Wek wating’u adundewa man cingwa malu i bang’ Mungu i polo.
42 “Wakier man wajai, man itimo ngo iwa kisa.
ס [Samek]
43 Nikum kwinyo peri icerowa kara kud wacor i beng’i;
Iriemowa man inegowa ma kisa mbe.
44 Itwiyo yo mi coro i beng’i kud afuru, uketho rwo mwa copo kadhu ngo kud i iye.
45 Iketho wadoko ni susu man cilo i kind dhanu.”
פ [Pe]
46 Judegi mwa ceke gibeng’amu dhoggi i kumwa.
47 Ndiri man vur re m’udoko makapiny mwa, uvuru man nyoth.
48 Piwang’a ubemol calu kulo pi nyoth pa nya dhanu para.
ע [Ayin]
49 Wak n’i wang’a m’umbe nijik man m’umbe yom,
50 Nitundo ma Yehova biloko wang’e piny man ebineno niai kud i polo.
51 Wang’a ubenyayu can i iya* nikum jumanyir ceke mir adhura para.
צ [Tsade]
52 Judegi para gibedwara mananu calu winyo.
53 Giketho kwo para ling’ i vur; gimediri nibolo kidi i wiya.
54 Pii umol i wiya man ayero kumae: “Adaru thum!”
ק [Kof]
55 Alwong’o nyingi, Ee Yehova, niai kud i the vur ma lieng’.
56 Winj dwanda; kud icul ithi ni wak m’abekwayu ko kony, pi jukocwiny.
57 Icoro ceng’ini i nindo m’alwong’i i iye. Iyero kumae: “Lworo kud unegi.”
ר [Rec]
58 Icero bang’a i lemkesi para, Ee Yehova, iwaru kwo para.
59 Ineno lembe ma rac ma jutimo i kuma, Ee Yehova; timba pok lembe para atira.
60 Ineno kwor migi zoo ma giculo, lembe migi ma reco ceke ma gipangu i kuma.
ש [Sin] kunoke [Cin]
61 Iwinjo cac migi, Ee Yehova, lembe migi ma reco ceke ma gipangu i kuma.
62 Lembe ma dend dhu judhoga ubeyero man ma gibemung’ ko i kuma dieceng’ duu.
63 Nen bang’gi; kadok nwang’u gibedo abeda kunoke gicungo acunga de, gibenywara i wer migi.
ת [Taw]
64 Ee Yehova, ibiculo igi calku timo migi.
65 Ibidwoko adundegi nwang’; eno tie kwong’ peri i wigi.
66 Ibiriemogi nikum ng’eicwiny peri, Ee Yehova, man ibidarugi pet kud i the polo.
א [Alef]
4 Kenen kite ma riang’ini mi mola mwa ma kwar uthum ko, mola ma kwar ma leng’!
Kite ma kidi mwa ma leng’ ulal ko i gund gengi ceke.*
ב [Beth]
2 Pi wot Sayuni ma pigi tek, gin ma juporo pek migi ku* mola ma kwar ma julilo ku mac,
Dong’ junenogi calu agulu mir ulobo,
Tic mi cing’ jacwii agulu ndhu ba!
ג [Gimel]
3 Kadok utho de wodho thunogi pi nimiyo cak ni nyithindhgi,
Ento nya dhanu para udoko kwiny calu udo i langa.
ד [Daleth]
4 Leb mukere ma dhoth umoko i dande nikum rieu.
Awiya ubekwayu cam,* ento ng’atu moko mbe m’umiyo.
ה [He]
5 Ju m’ubed ucamu cam ma mit givuto ma kec udarugi* i die gengi.
Ju m’ubed ukendo kendi ma kwar ngbo givuto iwi udhuru mir uvuru.
ו [Waw]
6 Matira* pa nya dhanu para utie dit nisagu matira pi dubo mi Sodoma,
Ma juredho cen wang’ acel, ma cing’ moko mbe m’ukonye.
ז [Zayin]
7 Junaziri pare ubino leng’ nisagu pei, ma tar nisagu cak.
Gibino ngbo nisagu korai, gibed giriang’ini calu safir.*
ח [Heth]
8 Wang’gi udoko col nisagu bilo de;*
Jucopo ng’iyogi ngo i gengi.
Dend kumgi umoko i kum cogogi; edoko calu yen m’uthwo.
ט [Teth]
9 Ju m’utho ku palamularu ber ma sagu ju m’utho ku ndru,
Ju m’uvoc gi calu ju ma jucobogi plu nikum koso cam m’uai i podho.
י [Yod]
10 Mon ma weg ngisi gitedo nyithindhgi ku cing’gi.
Gidoko ni cam migi mi lemcan i saa mi nyoth pa nya dhanu para.
כ [Kaf]
11 Yehova udaru nyutho kwinyo pare;
Ecoro ng’eicwiny pare m’uopo.
Man egudo mac i Sayuni m’ubewang’u katherene.
ל [Lamed]
12 Jubim mi ng’om man dhanu ceke ma bedo i ng’ombe giyiyo ngo
Nia jakwor man jadegi copo mondo kud i dhugang’ mi Yeruzalem.
מ [Mem]
13 Ubino nikum dubo mi jubila pare, kier mi julam pare,
Ma gicwiro rimb ju ma pwe i die iye.
נ [Nun]
14 Giwotho bik bik calu abinga i die gengi.
Gicido ku rimo,
Uketho ng’atu moko mbe ma copo mulo kum kendi migi.
ס [Samek]
15 Jubekok i bang’gi kumae: “Wuai cen! Wun ma wucido! Wuai cen! Wuai cen! Kud wumul kumwa!”
Kum gimbe ku kaka ma giromo bedo i iye man giwotho riko.
Dhanu uyero i kind thek kumae: “Giromo bedo ngo keni karacelo kudwa.*
פ [Pe]
16 Wang’ Yehova re m’ulalugi;
Ebinenogi ngo kendo ku bero.
Dhanu biworo ngo kendo julam, man gibitimo ngo ber ni judongo.”
ע [Ayin]
17 Kadok kawoni de wang’wa ujony ku sayu kony mananu.
Wafowasayara ku kony i bang’ thek ma copo bodhowa ngo.
צ [Tsade]
18 Gidwaruwa kaka moko ci ma wadagu tiendwa i iye, uketho waromo wotho ngo i akarayo mwa.
Ajiki mwa uwok ceng’ini; nindo mwa udaru thum, kum ajiki mwa udaru tundo.
ק [Kof]
19 Ju m’uriemowa gibino ringo ma tek nisagu acur mi kor polo.
Giriemowa iwi gudi; gikanu iwa libo i langa.
ר [Rec]
20 Gidaru maku ng’atu ma juwiro pa Yehova i vur migi ma dit, en m’ebino yuyo m’i odi umwa,
Ng’atu ma wabed wayero pire kumae: “Wabikwo i the tipo pare i kind thek.”
ש [Sin]
21 Anyong’a ku mutoro unegi, Ee Nyaredom, in m’ikwo i ng’om mi Uz.
Ento jubiketho kikombe* bikadhu iri bende, ibimer man ibiyabu muneru peri.
ת [Taw]
22 Ee Nyasayuni, matira pi kier peri udaru tundo i ajikine.
Ebiteri ngo kendo i ng’eca.
Ento ebiloko wang’e i kum kier peri, Ee Nyaredom.
Ebiyabu wi dubo peri.
5 Ee Yehova, poy i kum lembe m’uwok i wiwa.
Lok weng’i man inen cac mwa.
2 Giralaga mwa juloko ni juwirok, udi mwa ke ni umondo.
3 Wadoko nyithikic m’umbe wego; megwa ke calu montho.
4 Pi nimadhu pii mwa giwa de ukwayu wacul acula, man yen mwa giwa de ukwayu wang’iew ang’iewa.
5 Ju m’uberiemowa gin’i ng’utwa;
Wadaru ol, ento jumiyo ngo iwa yom.
6 Wathang’u cingwa i bang’ Misiri man Asiria kara wanwang’ cam* m’uromo ma waromo camu.
7 Kwaruwa ma gigam gidubo dong’ gimbe, re ukwayu wayey kier migi.
8 Jutic re ma kawoni ubebimo wiwa; ng’atu moko mbe m’umaywa kud i cing’gi.
9 Kwo mwa* both abotha kinde ma wabesayu cam mwa, nikum palamularu ma n’i langa.
10 Dend kumwa udoko lieth calu furu nikum litho pa kec.
11 Gicido* jumamon mi Sayuni, jumanyir ma sumba mir adhura mi Yuda.
12 Gideyo judongo ma wijo ku cing’gi, man giworo ngo ju m’utii de.
13 Awobi yeyo kidirego, man awiya ma co gikier nikum yen ma pek ma giyeyo.
14 Judongo uwok kud i dhugang’ mir adhura; awobi dong’ ubegoyo ngo wer migi.
15 Anyong’a thum kud i adundewa; miel mwa udoko ni lemcan.
16 Jamker mi wic upodho kud i wiwa. Can i wiwa, pilembe wadubo.
17 Adundewa uberemo nikum lembuni,
Man wang’wa udoko nyavia via nikum lembe maeni,
18 Pilembe Got Sayuni udong’ ni uvuru; kawoni dong’ nzer re m’ubewotho i iye.
19 Ento in, Ee Yehova, ibedo iwi komker rondo ku rondo.
Komker peri utie pi dhanu m’utuk ceke.
20 Iwil piwa rondo ku rondo man iwenjowa pi kare ma lee kumeni pirang’o?
21 Dwogwa i beng’i, Ee Yehova, man wabibedo ayika nidwogo i beng’i.
Dwok nindo mwa nyen calu ma yang’ con.
22 Ento ikwerowa magwei.
Ibedo asu ku kwinyo ma lee i kumwa.
Thek mi 1 nicidho i 4 utie wer wak. Man wec mi caku pa verseman ulubere calkud alfabe mi dhu Juebrania.
I dhu Juebrania: “wic.”
I dhu Juebrania: “mukathi.”
Kunoke “kara udwok cwinygi.”
Dhaku maeno ubenyutho Yeruzalem.
I dhu Juebrania: “i dhoge.”
Kunoke “kara udwok cwinygi.”
I dhu Juebrania: “tung.”
I dhu Juebrania: “Enyono.”
Kunoke “Enyotho.”
I dhu Juebrania: “pi nimwonyo.”
Kunoke “Ponji.”
Kunoke “ng’eyong’ec migi.”
I dhu Juebrania: “tung.”
Kunoke “ng’eyong’ec.”
I dhu Juebrania: “iwi gengi ceke.”
Kunoke “kodhi migi.”
Kunoke “ecero; etwiyo.”
Kunoke nyo “eweko adong’ swa.”
I dhu Juebrania: “Enyono.”
I dhu Juebrania: “wot.”
Kunoke “usau mir athero.”
Kunoke “gravie.”
Kunoke “Itwono ng’eyong’ec para.”
Kunoke “Ng’eyong’ec peri bipoy.”
Kunoke “Ng’eyong’ec para yero.”
Kunoke “ni ng’eyong’ec.”
Kunoke “ku twiyocwiny.”
I dhu Juebrania: “uyey mberembere.”
Kunoke “i ng’eyong’ec para.”
I dhu Juebrania: “iwi gengi ceke.”
Kunoke “pigi bino tek calu.”
I dhu Juebrania: “mukathi.”
I dhu Juebrania: “gibedo kendgi.”
Kunoke “Kier.”
Nen Thelembe mi wec iwi “Kidi ma pigi tek.”
I dhu Juebrania: “col bitu.”
Kunoke “nibedo keni calu umondo.”
Kunoke “kopo; kalisi.”
I dhu Juebrania: “mukathi.”
Kunoke “Ng’eyong’ec mwa.”
Kunoke “Gimaku.”