EZEKIEL

1 I oro mi pier adege, i nindo mir abic mi dwi mir ang’wende, kinde m’abino i kind dhanu ma jutero i ng’eca i dhu kulo Kebar, polo ugam uyabere man acaku neno gin ma wok i wang’ pa Mungu. 2 I nindo mir abije mi dwije, niwacu i oro mir abije, niai m’Ubimo Yehoiakin ucidho i ng’eca, 3 Lembe pa Yehova ubino i bang’ Ezekiel* ma wod Buzi ma jalam i dhu kulo Kebar i ng’om mi Jukaldayo. Cing’ Yehova ubino i wiye keca.

4 Saa m’abeneno, aneno yamu ma tek uai yo malu, man afuru m’uculere ku mac* m’ubemil ma der m’ucaru piny utieko ng’ete, man i diere mi maje piny moko ubino nen ve mola ma kwar m’ujebere ku mola ma tar. 5 Piny moko ubino nen i die iye ma calu giracwiya ang’wen ma kwo; ayi giracwiyaneman ubino calu dhanu. 6 Giracwiyaneman ubino ku wang’e ang’wen, vombgi de ubino ang’wen ang’wen. 7 Tiendgi ubino atira, man the tiendgi ubino calu ubong’ tiend nyathi dhiang’; gibino rieny calu mola ma jurudo kume. 8 Giracwiyane ubedo ku cing’ dhanu i the vombgi i ng’ete ang’wen zoo, man gin ang’wen zoo gibino ku wang’gi man vombgi. 9 Vombgi ubino muliri i kindgi. Ka gibecidho i wang’gi gilokiri ngo; ng’atuman cidho atira i wang’e.

10 Wang’gi ubino ayi ma e: giracwiya ang’wen zoo gibino ku wang’ dhanu, ku wang’ umvor i ng’ete ma yor acwic, wang’ thwon dhiang’ i ng’ete ma yor acam, man gin ang’wen ceke gibino ku wang’ acur. 11 Wang’gi ubino kumeno. Vombgi uyarere yor i wigi. Gin ceke gibino ku vombgi ario ario m’ubemuliri i kindgi man vombgi ario uumo kumgi.

12 Giracwiyanegi ceke gicidho atira i wang’gi, gicidho kaka moko ci ma tipo ubecwalugi gicidh i iye. Gilokiri ngo ka gibecidho. 13 Ayi giracwiya ma kwonegi ubino calu cugimac m’ubeliel, man piny moko ubino nen calu dhukumac ma maje ulero ma tek m’ubekadhu kun ku kun i kind giracwiya ma kwonegi, man lukoth ubino mil i kind maje. 14 Man ka giracwiya ma kwone gibecidho man gibeloko, ringo migi nen ve mil pa lukoth.

15 Saa m’abeneno giracwiya ma kwonegi, aneno pine* acel acel iwi ng’om i ng’et giracwiyane ceke ma tie ku wang’ ang’wen. 16 Pinenegi man ayi ma juyiko kogi ubino nen calu krizolith* m’uberieny, man pine ang’wenne zoo gibino ayi ma rom. Ayi migi man ayi ma juyiko kogi ubino nen ve pine n’i pine wadi.* 17 Saa ma giberingo, gicidho i ng’ete ang’wen zoo m’umbe nilokiri. 18 Ng’et pinenegi uting’ere lir lir i ayi ma ng’oyo ndiri, man ng’etgi ang’wen zoo ubino ku wang’ i kumgi tingili. 19 Saa ma ka giracwiya ma kwone giberingo, pinene de giringo karacelo kugi, man saa ma ka giracwiya ma kwone giting’iri malu giweko ng’om, pinene de giting’iri malu. 20 Giwotho cidho kaka ma tipo ubecwalugi gicidh i iye, kaka moko ci ma tipo ubecidho i iye. Pine uwotho ting’ere malu karacelo kugi, kum tipo m’ubetiyo i giracwiya ma kwone* ubino bende i pine. 21 Saa ma ka giberingo, pinene de giringo; man saa ma ka gicungo dii, pinene de gicungo dii; man saa ma ka giting’iri malu giweko ng’om, pinene de giting’iri malu karacelo kugi, kum tipo m’ubetiyo i giracwiya ma kwonegi ubino bende i pine.

22 Yor iwi giracwiya ma kwonegi piny moko ubino tie m’ubino nen calu kor polo m’ubino rieny calu lungu pei ma wang’u ijo m’upedhere yor i wigi. 23 Yor i the kor polone vombgi urieyere atira man umulo kum wadi. Giracwiyaneman ubino ku vombe ario pi niumo kume yor i ng’ete acel man vombe ario pi niumo kume yor i ng’ete ma kucelo. 24 Saa m’awinjo badwand vombgi, ebino ve badwand pii m’ubecorere, calu dwand Jategokpo. Saa ma ka giberingo, dwangi winjere calu dwand udul mony. Saa ma ka gicungo dii, gikonjo vombgi piny.

25 Dwal ubino winjere iwi kor polo ma n’i wigi. (Saa ma ka gicungo dii, gikonjo vombgi piny.) 26 Yor iwi kor polo m’ubino i wigi, piny moko ubino nen calu kidi ma julwong’o safir* man erombo ku komker. Ng’atu m’ujany iwi komker ma ni malune ayi pare urombo kud ayi pa dhanu. 27 Aneno piny moko m’uriang’ini calu mola ma kwar m’ujebere ku mola ma tar m’ubino calu mac m’ucaru piny niai kaka m’unen ve piere niidho malu; man niai i piere niloro piny, aneno piny moko m’urombo ku mac. Piny m’ulero utieke tingili 28 calu danyu i afuru i nindo pa koth. Der m’ulerone ubino nen kumeno i ng’ete tingili. Ebino nen calu dwong’ pa Yehova. Saa m’anene, apodho arieba wang’a man acaku winjo dwand ng’atu moko ubeweco.

2 E eyero ira kumae: “Wod dhanu,* ai icung iwi tiendi kara awec i beng’i.” 2 Saa m’ebeweco i bang’a, tipo umondo i iya man eketho acungo iwi tienda kara awinj ng’atu m’ubeweco i bang’a.

3 Edog eyero ira kendo kumae: “Wod dhanu, abeori i bang’ dhanu mir Israel, i bang’ thek ma juthwon m’ujai ira. Gin ku kwarugi gidubo ira cil tin eni. 4 Abeori i bang’ wot ma jupiem man ma cwinygi nwang’ man icikiri niyero igi kumae: ‘Maeni tie lembe ma Rwoth Ubimo ma Malu Ngbir Yehova uwacu.’ 5 Ento gin re, dok giwinji kunoke gikwer niwinjo, pilembe gi ot m’ujai, gibing’eyo andha nia jabila moko ubino i kindgi.

6 “In re wod dhanu, kud ilworgi man kud ilwor lembe ma giyero, kadok nwang’u laa kud ukudho utieki* man ibedo i kind ith de. Kud ilwor lembe ma giyero man ndiri kud unegi pi wang’gi, pilembe gitie ot m’ujai. 7 Ento icikiri niyero igi lembe para, dok giwinji kunoke ngo de, pilembe gi dhanu ma jujai.

8 “Ento in, wod dhanu, winj lembe m’abeyero iri. Kud ijai calu ot maeni mi jujai. Yab dhogi man cam gin m’abemiyo iri.”

9 Saa m’aloko wang’a, agam aneno cing’ m’urieyere i bang’a, man aneno kithabu m’adola ma jukiewo iye i cing’ne. 10 Saa m’epedhe i wang’a, anwang’u jukiewo iye ku ng’eye zoo. Jukiewo wer wak, lemcan, man nduru i iye.

3 I ng’eye eyero ira kumae: “Wod dhanu, cam gin ma n’i weng’i no.* Cam kithabu m’adola maeni, man cidh iwec i bang’ ot mir Israel.”

2 E ayabu dhoga man eketho acamu kithabu m’adolane. 3 Eyero kendo ira kumae: “Wod dhanu, cam kithabu maeni m’adola m’abemiyo iri man pong’ ii kude.” E acaku came, man ebino mit calu miyokic i dhoga.

4 Eyero ira kumae: “Wod dhanu, cidh i kind ot mir Israel man yer igi lembe para. 5 Kum jubeori ngo i bang’ dhanu ma weco dhok ma junyang’ ungo i iye kadi ma dhok migi de jung’eyo ngo, ento i bang’ ot mir Israel. 6 Jubeori ngo i bang’ dhanu dupa ma weco dhok ma junyang’ ungo i iye kadi ma dhok migi jung’eyo ngo, ma wec migi icopo nyang’ ungo i iye. Ka nwang’u aori i bang’gi, nwang’u giwinji. 7 Ento ot mir Israel bikwero niwinji, kum gibemito ngo giwinja. Dhanu ceke mi ot mir Israel wigi tek man cwinygi nwang’. 8 Nen! adwoko weng’i tek tap calu wang’gi man adwoko ter weng’i tek tap calu ter wang’gi. 9 Aketho ter weng’i udoko calu dhiama ma tek nisagu kidi ma tek lee. Kud ilworgi kadi ndiri de kud ung’oy i ii pi wang’gi. Kum gitie ot m’ujai.”

10 Eyero ira kendo kumae: “Wod dhanu, keth lembe maeni i adundeni man winj lembe para m’abeyero iri. 11 Cidh i kind juthu* ma jutero i ng’eca man wec i bang’gi. Wac igi kumae: ‘Maeni tie lembe ma Rwoth Ubimo ma Malu Ngbir Yehova wacu,’ dok giwinji kunoke ngo de.”

12 Tipo ugam uting’a man awinjo dwal ma dit m’ubemor yor i ng’eya m’ubewacu kumae: “Wek dwong’ pa Yehova unwang’ pak niai ku kakare.” 13 Badwand vomb giracwiya ma kwo uwinjere ma giberudiri i kindgi man badwand pine i ng’etgi, ku dwal mi morpiny ma dit. 14 Man tipo uting’a man utera, e acidho ku cwinya ma kec man ma ng’eicwiny n’i iya, man cing’ Yehova ubedo ma tek i wiya. 15 Pieno acidho i bang’ ju ma n’i ng’eca i Tel-abib ma nwang’u gibedo i dhu kulo Kebar, man abedo keca kaka ma gikwo i iye; abedo i kindgi pi nindo abiro ku zungo ma dit.

16 I ajiki mi nindo abirone, lembe pa Yehova ubino i bang’a, uyero kumae:

17 “Wod dhanu, aketho ibed jakur ni ot mir Israel; man kan iwinjo lembe moko i dhoga, icikiri nipoyogi ira. 18 Saa ma kan ayero ni jatimrac nia, ‘Ibitho andha,’ ento icime ngo, man iweco ngo pi nipoyo jatimracne kara elokere kud i timo pare ma rac, wek kara ebed kwo, ebitho pi kosa pare pilembe e jatimrac, ento abikwayu rimbe i beng’i.* 19 Re tek ipoyo jatimrac man eloko ngo kud i racu pare man kud i timo pare ma rac, ebitho pi kosa pare, ento in ibibodho kwo* peri andha. 20 Enre tek ng’atu ma pwe uweko bedopwe pare man etimo lembe ma rac, abiketho cudho mi kier i wang’e man ebitho. Tek icime ngo, ebitho pi dubo pare man jubipoy ungo pi timo pare ma pwe, ento abipenjo rimbe i beng’i.* 21 Re tek icimo ng’atu ma pwe kara kud edubi, man edubo ngo, ebimedere andha nibedo kwo pilembe icime, man in de nwang’u ibodho kwo* peri.”

22 Cing’ Yehova ugam ubino i wiya keca man ewacu ira kumae: “Ai malu, cidh i pambu mi poga, man abiwok weco kudi kuca.” 23 Pieno aai malu man acidho i pambu mi poga, man nen! dwong’ pa Yehova ubino keca, calu dwong’ m’alar aneno i dhu kulo Kebar, man apodho arieba wang’a. 24 E tipo umondo i iya man uketho acungo iwi tienda, man eweco i bang’a, eyero kumae:

“Cidh icik beng’i i ot peri. 25 Ento in, wod dhanu, gibidhoko thol i kumi man gibitwiyi ku tholne kara kud iwok woko i kindgi. 26 Abiketho lebi bimoko i dendi man ibidoko buba m’iromo jukogi ngo, pilembe gi ot m’ujai. 27 Ento saa m’abiweco i beng’i abiyabu dhogi, man icikiri niyero igi kumae: ‘Maeni tie lembe ma Rwoth Ubimo ma Malu Ngbir Yehova uwacu.’ Dong’ ng’atu m’uwinjo, uwinji man ng’atu m’ukwero niwinjo de ukwer, pilembe gi ot m’ujai.

4 “Man in, wod dhanu, ting’ briki man kethe i weng’i. Ng’ik cal mir adhura mi Yeruzalem i wiye. 2 Tieke, gier gang’ i kume, gier gang’ ma tek i kume, keth kagonjo i kume, man tieke ku jamrwombo piny tingili. 3 Gam atangala mi cuma man kethe ni gang’ mi cuma i kindwu kud adhura. I ng’eye keth weng’i i kume man ebibedo atieka; icikiri nitieke. Eno tie giranyutha ni ot mir Israel.

4 “I ng’eye icikiri nivuto iwi ng’eti ma yor acam man niketho kier mi ot mir Israel i wii giri.* Ibiyeyo kier migi pi wend nindo m’ibivuto i iye iwi ng’eti. 5 Man abing’olo nindo dak adek ku pier abung’wen i wii, calku wend oro mi kier migi, man ibiyeyo kier mi ot mir Israel. 6 Man icikiri nidaru nindonegi zoo.

“E ibivuto kendo wang’ mir arionde iwi ng’eti ma yor acwic, man ibiyeyo kier mi ot mi Yuda pi nindo pier ang’wen. Nindo acel pi oro acel, nindo acel pi oro acel, eno tie gin m’ang’olo iri. 7 Man ibiloko weng’i yor i bang’ Yeruzalem ma jutieko ma boti adola, man icikiri niewo lembila i kume.

8 “Nen! abitwiyi ku thol kara kud ilokiri niai i ng’eti acel iwi ng’eti ma kucelo, nitundo m’ibidaru nindo mi tiek peri.

9 “Man icikiri nigamu nganu, nganu ma juyuke, amul, ralang’, kal, nganu ma poke tek man nikethogi i ajeni acel man yik kugi mukathi iri. Pilembe ibicamugi pi wend nindo dak adek ku pier abung’wen m’ibivuto i iye iwi ng’eti. 10 Icikiri nipime man nicamu kadhiri mi cekel* pier ario kubang’ ceng’. Ibicame i saa ma juketho.

11 “Man ibimadhu pii ma jupimo apima, niwacu thenge acel wi abusiel mi hin.* Ibimadhe i saa ma juketho.

12 “Ibicamu mukathine calu mukathi ma ngulu ngulu mi nganu ma juyuke; ibitede i wang’gi, ibitiyo ku ceth dhanu m’uthwo kaka yen.” 13 Yehova uyero ira kendo kumae: “Eni tie ayi ma Juisrael gibicamu ko mukathi migi m’ucido i kind thek m’abilalugi i iye.”

14 E awacu kumae: “Ewunu kumeno ngo, Rwoth Ubimo ma Malu Ngbir Yehova! Niai i aradu para nitundo tin fodi acido ngo* ku camu ring’ ley ma junwang’u utho, kunoke ma ley uyeco, man ring’o m’ucido de fodi umondo ngo i dhoga.”

15 Pieno eyero ira kumae: “Ber, abiyiyo iri itii kud uweyo kaka ceth dhanu, man ibitedo mukathi peri i wiye.” 16 E ewacu ira kumae: “Wod dhanu, nen abekabu cam ma jugwoko* kud i Yeruzalem man gibicamu mukathi migi ma jupimo apima kud ang’abacwiny ma dit, man gibimadhu pii migi ma jupimo apima ku ndiri. 17 Lembuno bitimere kara nikum koso mukathi man pii, gineniri ku zungo man ma givoc nikum kosa migi.

5 “Ento in, wod dhanu, gam iri palamularu ma lake bith man tii kude kaka riedi pa janyarwic. Nyar yuk wii man yir tiki, man i ng’eye pime i kilo man pok i yukwicne ni adek. 2 Ibiwang’u thenge acel wi adek i mac i die i adhura saa ma nindo mi tieke bithum. I ng’eye ibiting’o thenge acel wi adek ma kucelo man ibigoye ku palamularu i ng’et adhura tingili, man thenge acel wi adek ma tokcenne ibilalu i yamu, man abiwodho palamularu pi niriemo tokgi.

3 “Icikiri nigamu bende kume moko ma nok man nidole i dhu kendi peri. 4 Dog igam kume moko mange, bole i mac man iwang’e. Maje bimew niai kud i kume eno i ot mir Israel ceke.

5 “Rwoth Ubimo ma Malu Ngbir Yehova uwacu kumae: ‘Eni tie Yeruzalem. Akethe i diere mi thek ku ng’om ma tung’ tung’ i ng’ete tingili. 6 Ento ejai i kum telowic para man i kum cik para, etimo lembe ma rac magwei nisagu thek man ng’om ceke ma n’i ng’ete. Kum ekwero telowic para, man ewotho ngo nimakere ku cik para.’

7 “Pieno, Rwoth Ubimo ma Malu Ngbir Yehova uwacu kumae: ‘Calu ma wutimo lembe ma rac nisagu thek m’utiekowu, man wuworo ngo cik para kadi wutiyo de ngo ku telowic para, ento wulund wulubo telowic mi thek m’utiekowu, 8 Rwoth Ubimo ma Malu Ngbir Yehova uwacu kumae: “Nen ani kumi, Ee adhura, man an ku kuma abikelo pokolembe i kindwu i wang’ thek. 9 Lembe ma fodi atimo ngo i wang’e nyanok de re m’abitimo i ii, wagi lembe m’abitimo ngo kendo, nikum timo peri ceke ma judagu.

10 “‘“E wego m’i kindwu bicamu wotgi, man wot bicamu weggi. Abipoko lembe i kindwu man abilalu dongwu m’udong’ zoo kakare ceke.”’*

11 “‘Pieno calu andha abedo kwo,’ Rwoth Ubimo ma Malu Ngbir Yehova wacu, ‘calu hekalu para re m’icido kud ayi gin m’acwiya peri ceke ma judagu, man ku timo peri ceke ma judagu, an de abikweri.* Kisa binego ngo wang’a i kumi man ngisi binega ngo i kumi. 12 Thenge acel wi adek m’i kindwu bitho ku thong’om* kunoke bithum ku ndru. Thenge acel wi adek ma kucelo bipodho i lak palamularu i ng’etwu tingili. Man abilalu thenge acel wi adek ma tokcen i kakare ceke* man abiwodho palamularu pi niriemo tokgi. 13 E kwinyo para bijik, ng’eicwiny para de bikwiyo i kumgi man cwinya bikwiyo. Kinde m’adaru coro ng’eicwiny para i wigi, gibing’eyo nia an a Yehova aweco, pilembe akwayu ma tek nia jutim ira kende.

14 “‘Abidwoki ni uvuru man ni jamcac i kind thek m’utieki man i wang’ ng’atu moko ci m’ubekadhu kud i ng’eti. 15 Ibidoko ni jamcac man jamlewic, ni lapor mi cimowang’ man ndiri ni thek ceke ma n’i ng’eti, saa m’abikelo pokolembe i wii ku matira ma kwiny nikum ng’eicwiny para man kwinyo para. An a Yehova, adaru weco.

16 “‘Abioro athero ma negojo mi ndru i kumgi pi ninyothogi. Athero m’abiorone binyothowu. Abikabu cam mwu ma jukanu* pi niketho ndru mwu udok rac nisagu. 17 Abioro thong’om ku yedi ma kwiny mi lum i kumi, man gibikabu awiya peri. Thong’om ku cwir pa rimo bipong’i man abioro palamularu i kumi. An a Yehova, adaru weco.’”

6 Lembe pa Yehova ubino kendo i bang’a, uyero kumae: 2 “Wod dhanu, lok weng’i yor i bang’ gudi mir Israel man ew lembila i kumgi. 3 Yer kumae: ‘Ee gudi mir Israel, wuwinj lembe ma Rwoth Ubimo ma Malu Ngbir Yehova uwacu: Maeni tie lembe ma Rwoth Ubimo ma Malu Ngbir Yehova uyero ni gudi, ungulu gudi,* ni kulo, man ni poga: “Wunen! abekelo palamularu i kumwu, man abinyotho kaka mwu ma malu. 4 Jubirwombo pemlam mwu, jubituro pemlam mwu mir udok ma ng’wice ng’ar man abibayu avuj dhanu mwu ma junego i wang’ ayi gin m’acwiya mwu ma judagu.* 5 Abibayu avuj dhanu mir Israel i wang’ ayi gin m’acwiya migi ma judagu, man abilalu cogowu i ng’et pemlam mwu tingili. 6 Kaka ceke ma wubed wubedo i iye, jubinyotho adhura man jubirwombo kaka ma malu man gibidong’ ma ginyothiri. Jubirwombo pemlam mwu man jubirungo igi, ayi gin m’acwiya mwu ma judagu bithum, jubing’ondo pemlam mwu mir udok ma ng’wice ng’ar cen, man jubiweyo tic mi cingwu de cen. 7 Man ju ma junego bipodho i kindwu, e wubing’eyo nia an a Yehova.

8 “‘“Ento abiweko dongwu moko, pilembe jumoko m’i kindwu biboth kud i lak palamularu i kind thek, kinde ma julaluwu i ng’om ma tung’ tung’. 9 Man ju m’uboth bipoy pira i kind thek ma juterogi i iye i ng’eca. Gibinyang’ nia cwinya utur pi kosobedoleng’* mir adundegi ma gilokiri ko cen kud i kuma man pi wang’gi m’utie kud ava i tok ayi gin m’acwiya migi ma judagu. Lewic binegogi man gibidagu ku rac timo migi ceke ma reco, man piny ma judagu ma gitimo. 10 Gibing’eyo nia an a Yehova, man nia nyoth m’ayero nia abikelo i wigi utie ngo mi nyayu lworo mananu.”’

11 “Rwoth Ubimo ma Malu Ngbir Yehova uwacu kumae: ‘Pad cingi man goy tiendi, waki pi lembe ma reco ceke man lembe ma judagu, ma ot mir Israel utimo, kum gibipodho ku palamularu, ku ndru, man ku thong’om. 12 Ng’atu ma ni bor bitho ku thong’om, ng’atu ma ni ceng’ini ke bipodho i lak palamularu, man ng’atu m’uboth kud i maeno man m’udong’ bitho ku ndru. Abikonjo kwinyo para ceke i wigi. 13 E wubing’eyo nia an a Yehova, saa ma ju migi ma junego bivuto i kind ayi gin m’acwiya migi ma judagu, i ng’et pemlam migi ceke, iwi ungulu gudi ceke, i die wi gudi ceke, i the yen ceke m’ujany man i the jang yen ceke ma dongo, kaka ma gibed githiero i iye udok ma ng’wice ng’ar, pi niyomo cwiny ayi gin m’acwiya migi ceke ma judagu. 14 Abirieyo cinga i kumgi man abidwoko ng’ombe ni uvuru, kabedo migi ceke bidoko ni uvuru nisagu langa ma ni ceng’ini ku Dibla. E gibing’eyo nia an a Yehova.’”

7 Lembe pa Yehova ubino kendo i bang’a, uyero kumae: 2 “Ento in, wod dhanu, Rwoth Ubimo ma Malu Ngbir Yehova uwacu ni ng’om mir Israel kumae: ‘Ajiki! Ajiki udaru tundo iwi gund ng’ombe ang’wen. 3 Kawoni ajiki uwok i wii, man abicoro ng’eicwiny para i wii. Abipoko lembe i wii calku timo peri man abikwayu iwodh wel pi timo peri ceke ma reco ma judagu. 4 Kisa binego ngo wang’a i kumi; kadi ngisi de binega ngo, kum abikelo adwogi mi timo peri i wii, man ibinwang’u matoke mi timo peri ma reco ma judagu. E ibing’eyo nia an a Yehova.’

5 “Rwoth Ubimo ma Malu Ngbir Yehova uwacu kumae: ‘Nen! nyoth, nyoth ma segi ubebino. 6 Ajiki ubebino; ajiki bibino; ebiai en gire* i kumi. Nen! ebebino. 7 Kare peri* udaru romo, in m’ibedo i ng’ombe. Saa bebino, nindo dhingo. Iwi gudi yakini re m’utie, ento muzira ngo.

8 “‘Kago eni, abikonjo ng’eicwiny para ma lake tek i wii man abicoro ng’eicwiny para ceke i wii; abipoko lembe i wii calku timo peri man abikwayu iwodh wel pi timo peri ceke ma reco ma judagu. 9 Kisa binego ngo wang’a; kadi ngisi de binega ngo. Abikelo adwogi mi timo peri i wii, man ibinwang’u in giri matoke mi timo peri ma reco ma judagu. E ibing’eyo nia an a Yehova re m’abegoyi.

10 “‘Nen, nindo! Nen, ebebino! Kare peri* udaru romo; uluth udaru thiwo man rikini udaru loth. 11 Rop udaru dongo man edoko uluth mi lembe ma reco. Nik’ebed gin, kadi lonyo migi, kunoke udul dhanu migi kadi dhanu migi mir awora ma biboth umbe. 12 Saa bebino, nindo biromo. Anyong’a kud uneg ng’atu m’ung’iewo ng’iew, man ng’atu m’ulworo lwor de kud uwaki, kum ng’eicwiny n’i wi udul dhanu migi ceke.* 13 Kum jaralwor bidok ungo i bang’ piny m’elworo, kadok nwang’u edong’ kwo de, kum gin ma wok i wang’ utie pir udul dhanu maeni ceke. Ng’atu moko mbe ma bidwogo, man nikum kosa pare,* ng’atu moko mbe ma bibodho kwo pare.

14 “‘Gikudho agwara man dhanu ceke utie ayika, ento ng’atu moko mbe m’ubecidho i lwiny, pilembe kwinyo para n’i kum udul dhanune ceke. 15 Palamularu ni woko, man thong’om ku ndru n’i die i adhura. Ng’atu moko ci ma n’i lum bitho ku palamularu, man ndru ku thong’om bicamu ju ma n’i adhura. 16 Dhanu migi ma biboth bicidho iwi gudi, man ng’atuman biwak pi kosa pare calu akuru mi poga. 17 Cing’gi ceke bikonjere jebele, man cong’gi ceke bicwiro pii.* 18 Gikendo kendi mi saki, man kumgi ubemiel. Lewic bimaku gin ceke, man wic ceke biwang’.*

19 “‘Gibibayu mola ma tar migi i gengi, man mola ma kwar migi bidoko ni gin ma gidagu ku rac. Mola ma tar migi kadi mola ma kwar migi bituc ungo nibodhogi i nindo mi kwinyo pa Yehova. Gibiyeng’ ungo,* kadi gibipong’o de ngo igi, kum edoko* igi ni cudho mi kier m’uketho gidubo. 20 Gibed gihayiri pi leng’o mi jamruko migi. Gitiyo kugi pi niyiko ayi gin m’acwiya migi ma judagu, mungu m’araga migi ma judagu. Eno re m’uketho abidwoke ni piny ma gidagu ku rac. 21 Abimiye* i cing’ juwirok kara giyake man i cing’ jutimrac mi ng’om kara gikwale, man gibicide.

22 “‘Abiloko wang’a cen kud i bang’gi, man gibicido kabedo para m’upondo;* weg ayeki bimondo i iye man gibicide.

23 “‘Yik nyoro,* pilembe pokolembe ma rimo vuko kume upong’ i ng’ombe man adhura upong’ ku rop. 24 Abikelo dhanu ma reco mandha mi thek man gibimaku udi migi. Abijigo doro mi dhanu ma tek man jubicido kabedo migi ma leng’. 25 Saa m’ang’abacwiny bimakugi, gibisayu kwiyocwiny, ento kwiyocwiny bibedo mbe. 26 Nyoth bibino iwi wadi wi wadi, man rwonglembe iwi wadi wi wadi. Dhanu biyenyo gin ma wok i wang’ i bang’ jabila, ento cik* bithum kud i bang’ jalam man juk kud i bang’ judongo. 27 Ubimo bibedo i lemcan man jadit ma wijo bikoso genogen;* cing’ dhanu mi ng’ombe bimiel nikum ndiri. Abitimo igi lembe calku timo migi, man abipoko lembe migi calu ma gin de gipoko ko lembe. E gibing’eyo nia an a Yehova.’”

8 I oro mir abusiende, i nindo abic mi dwi mir abusiende, saa m’abedo i ot para man judongo mi Yuda ubino i wang’a, cing’ Rwoth Ubimo ma Malu Ngbir Yehova umaka keca. 2 Kinde m’abeneno, aneno ayi piny moko m’unen ve mac; mac ubino tie i the piny m’unen ve piere man niai i piere niidho malu, ayi pare ucaru piny calu ma mola ma kwar m’ujebere ku mola ma tar rieny ko. 3 I ng’eye erieyo piny m’unen ve cing’ man eting’a ku yuk wiya, e tipo uting’a malu i kind ng’om ku polo, man utera i Yeruzalem nikadhu kud i ayi gin ma wok i wang’ pa Mungu nitundo i dhu kamondo mi dhugang’ ma yor i iye m’ubeneno yo malu, kaka m’ayi gin m’acwiya m’unyutho nyeko ma nyayu nyeko ucungo i iye. 4 Man nen! dwong’ pa Mungu mir Israel ubino keca, calu ayi m’agam aneno i pambu mi poga.

5 I ng’eye eyero ira kumae: “Wod dhanu, akweyi, ting’ weng’i inen yo malu.” E ating’o wang’a aneno yo malu, man keca i ng’ete ma yo malu mi dhugang’ mi pemlam, ayi gin m’acwiya maeni ma nyayu nyeko ubino nuti i dhu kamondone. 6 Man eyero ira kumae: “Wod dhanu, nyo ibeneno lembe ma rac, gin ma judagu ma ot mir Israel ubetimo keni, lembe m’uketho abecoro bor ku kabedo para ma leng’i? Ento ibineno gin ma judagu man ma rac magwei.”

7 I ng’eye etera i dhu kamondo mi dhugang’ man saa m’ating’o wang’a, aneno vur moko i kor gang’. 8 E ewacu ira kumae: “Wod dhanu, akweyi, tuc kor gang’.” E atuco kor gang’ man aneno kamondo. 9 Eyero ira kumae: “Mondi man inen lembe ma rac, gin ma judagu ma gibetimo kuca.” 10 E amondo pi nineno, man aneno kwond ayi gin m’acwiya ceke mi piny ma lak alaka man yedi ma judagu man ayi gin m’acwiya ma judagu* ceke mi ot mir Israel; jung’ikogi i kor gang’ tingili. 11 Judongo pier abiro mi ot mir Israel ucungo i wang’gi, man Yazania ma wod Cafan ucungo i kindgi. Ng’atuman m’i kindgi umaku tabu pare mir udok ma ng’wice ng’ar i cinge, man afuru mir udok ma ng’wice ng’arne ubino duny malu. 12 Eyero ira kumae: “Wod dhanu, nyo ibeneno de lembe ma judongo mi ot mir Israel gibetimo i mudho, ng’atuman i kusika ma kut kaka ma juketho i iye ayi gin m’acwiya pare?* Kum gibeyero kumae: ‘Yehova ubenenowa ngo. Yehova udaru weko ng’ombuni.’”

13 Eyero ira kendo kumae: “Ibineno gin ma judagu kadok ma rac magwei ma gibetimo.” 14 E etera i dhu kamondo ma yo malu mi dhugang’ mi ot pa Yehova, man keca aneno jumamon ubedo man ubewagu mungu ma Tamuz.

15 Man eyero ira kendo kumae: “Ee wod dhanu, nyo ibeneno lembuni de? Ibineno gin ma judagu ma rac magwei nisagu kadok maeni.” 16 E etera i lela ma yor i iye mi ot pa Yehova. Kuca i dhu kamondo mir hekalu pa Yehova, i kind pond ot ku pemlam, jumaco pier ario wi abic uloko ng’eygi ni hekalu pa Yehova man wang’gi ke giloko yo nyangu; gibino kulo korgi piny yo nyangu ni ceng’.

17 Ewacu ira kumae: “Wod dhanu, nyo ibeneno lembuni de? Nyo etie lembe ma nok ni ot mi Yuda nitimo lembe ma rac maeni ma judagu, nipong’o ng’om ku rop man nimediri ninyayu ng’eicwiny i iya? Nen, kawoni gibecoro jang yen* i uma. 18 Pieno abitimo lembe ku kwinyo ma dit. Kisa binego ngo wang’a; kadi ngisi de binega ngo. Kadok nwang’u gibekok ma tek i the itha de, abiwinjogi ngo.”

9 I ng’eye, ekok i the itha ku dwal ma tek kumae: “Wak ju ma bikelo matira iwi adhura, ng’atuman ku jamlwiny pare mi nyoth i cinge!”

2 Aneno jumaco abusiel ubebino niai kud i dhugang’ ma yo malu m’uloko yo malu, ng’atuman ku jamlwiny pare mi rungo piny i cinge; man ng’atu acel m’i kindgi ukendo bongu ma nwang’ man jamketho vino pa jagor ubino i piere, man gimondo gibin gicungo i ng’et pemlam mi mola.

3 I ng’eye, dwong’ pa Mungu mir Israel uai ku kaka ma nwang’u ebedo i iye iwi jukerubi man ecidho nitundo i wang’ dhugola mi ot, man ecaku lwong’o ng’atu m’ukendo bongu ma nwang’ ma jamketho vino pa jagor ubino i piere. 4 Yehova uwacu ire kumae: “Cidh i die i adhura, i die Yeruzalem zoo, man keth ayi i terwang’ dhanu m’ukumo man m’ubecur pi lembe ceke ma judagu m’ubetimere i adhura.”

5 Man eyero ni jumange m’abewinjo kumae: “Wucidh i die i adhura i toke man wuneg dhanu. Kisa kud uneg weng’wu man ngisi kud unegwu nyanok de. 6 Wucikuru ninegogi pet, nik’ebed judongo, awobi, jumanyir ma sumba, awiya ma thindho man jumamon. Ento kud wucor ceng’ini i bang’ ng’atu moko ci m’ayi n’i kume. Wucikuru nicaku i kabedo para ma leng’.” Pieno gicaku ku judongo m’ubino yor i wang’ ot. 7 l ng’eye, eyero igi kumae: “Wucid ot man wupong’ lela ku dhanu ma junego. Wucidhi!” E gicidho man ginego dhanu i adhura.

8 Saa ma gibenegogi, ani kenda re m’adong’, e apodho arieba wang’a man akok kumae: “Akaa, Ee Rwoth Ubimo ma Malu Ngbir Yehova! Nyo ibinyotho dong dhanu ceke mir Israel, saa m’ibekonjo kwinyo peri ma lake tek iwi Yeruzalemi?”

9 E edwoko ira kumae: “Kosa mi ot mir Israel man mi Yuda tie lee, lee mandha. Ng’ombe pong’ ku cwiro rimo man adhura upong’ ku gondiri. Kum gibeyero kumae: ‘Yehova udaru weko ng’ombuni man Yehova ubeneno ngo.’ 10 An re, kisa binego ngo wang’a; kadi ngisi de binega ngo. Abikelo matoke mi timo migi i wigi.”

11 I ng’eye, aneno ng’atu m’ukendo bongu ma nwang’ ku jamketho vino i piere ubedwoko rapor, ewacu kumae: “Atimo tap calu m’ing’olo ira.”

10 Kinde m’abeneno, aneno iwi kor polo m’ubino iwi jukerubi piny moko m’ubino calu kidi ma julwong’o safir* ubino nen i wigi, man ayine urombo ku komker. 2 I ng’eye, eyero ni ng’atu m’ukendo bongu ma nwang’ kumae: “Mond i kind pine,* yor i the jukerubi man job cugimac pong’ cingi kud i kind jukerubi man dhenye iwi adhura.” E emondo m’abeneno.

3 Saa ma ng’atune umondo, nwang’u jukerubi ucungo i ng’et ot yor acwic, man afuru upong’o lela ma yor i iye. 4 E dwong’ pa Yehova uai kud i bang’ jukerubi ucidho i wang’ dhugola mi ode, man nok nok afuru upong’o ode man lero mi dwong’ pa Yehova upong’o lelane. 5 Man badwand vomb jukerubi ubino winjere i lela ma woko, calu dwand Mungu ma Jategokpo saa ma kan ebeweco.

6 I ng’eye, eng’olo ni ng’atu m’ukendo bongu ma nwang’ kumae: “Gam mac kud i kind pine, kud i kind jukerubi,” man emondo ecungo i ng’et pine. 7 E jakerubi acel urieyo cinge yor i bang’ mac m’ubino i kind jukerubi. Egamu moko man ekethe i cing’ ng’atu m’ukendo bongu ma nwang’ne ario zoo, egamu maje moko man ewok woko. 8 Jukerubi ubino ku piny moko m’ubino nen ve cing’ dhanu i the vombgi.

9 Kinde m’abeneno, aneno pine ang’wen i ng’et jukerubi, pine acel i ng’et jakerubiman, man pinenegi ubino nen calu krizolith* m’uberieny. 10 Ento pir ayigi, gin ang’wen zoo gibino ayi ma rom; gibino nen ve pine n’i pine wadi. 11 Saa ma giberingo, gicidho i ng’ete ang’wen zoo m’umbe nilokiri, pilembe gicidho kaka ma wic ubeneno m’umbe nilokiri. 12 Kumgi zoo, ng’eygi, cing’gi, vombgi, man pine, niwacu pine migi gin ang’wen zoo, wang’ ubino bik i kumgi tingili. 13 Man pi pinenegi, awinjo dwal m’ubelwong’ogi kumae: “Pine!”

14 Giracwiyaneman* ubino ku wang’ ang’wen. Wang’ ma kwong’a ubino wang’ jakerubi, wang’ mir ario ubino wang’ dhanu, mir adege ubino wang’ umvor, man mir ang’wende ubino wang’ acur.

15 Man jukerubine giai. Gibino giracwiya ma kwo ma rom m’aneno i dhu kulo Kebar. 16 Saa ma ka jukerubine giberingo, pinene giringo karacelo kugi; ka jukerubine giting’o vombgi malu ubed lir lir ku wi ng’om, pinene gilokiri ngo kadi giringo de ngo kud i ng’etgi. 17 Ka gicungo dii, pinene de gicungo dii man ka giai, pinene de giai karacelo kugi, kum tipo m’ubetiyo i giracwiya ma kwonegi* ubino i igi.

18 I ng’eye, dwong’ pa Yehova ugam uai kud i wang’ dhugola mi ot man ucidh ucungo dii iwi jukerubi. 19 Jukerubine gigam giting’o vombgi malu man giai kud iwi ng’om m’abeneno. Pinenegi ubino karacelo kugi kinde ma gicidho. Giwok gicungo i dhu kamondo ma yo nyangu mi dhugang’ mi ot pa Yehova, man dwong’ pa Mungu mir Israel ubino i die wigi.

20 Eno ubedo giracwiya ma kwo m’aneno ubino i the tiend Mungu mir Israel i dhu kulo Kebar, e anyang’ nia karaman tie jukerubi. 21 Gin ang’wen zoo gibino ku wang’ ang’wen ang’wen, vombgi de ubino ang’wen ang’wen, man piny moko m’ubino nen ve cing’ dhanu ubino i the vombgi. 22 Man ayi wang’gi ubino calu wang’ m’aneno i dhu kulo Kebar. Gin ceke gicidho atira i wang’gi.

11 Man tipo ugam uting’a malu utera i thenge ma yo nyangu mi dhugang’ mi ot pa Yehova, i dhugang’ m’uloko yo nyangu. Man i dhugang’ keca awok aneno jumaco pier ario wi abic, man Yazania ma wod Azur giku Pelatia ma wod Benaya ma gi judongo ma wijo mi dhanu gibino i kindgi. 2 I ng’eye, eyero ira kumae: “Wod dhanu, juni tie dhanu m’ubepangu lembe ma rac man m’ubemiyo juk ma rac i adhura maeni.* 3 Gibeyero kumae: ‘Nyo eni tie ngo saa mi giero udi? Adhura maeni* tie agulu mi tedo, man watie ring’o.’

4 “Dong’ ew lembe i kumgi. Ew, wod dhanu.”

5 E tipo pa Yehova ubino i wiya man eyero ira kumae: “Yer kumae: ‘Yehova uwacu kumae: “Ee ot pa Israel, lembe ma wuyero tie kakare, man ang’eyo gin ma wubeparu.* 6 Wuketho dhanu dupa utho i adhura maeni man wupong’o gengine kud avu.”’” 7 “Pieno Rwoth Ubimo ma Malu Ngbir Yehova uwacu kumae: ‘Avu ma wumoyo i adhura utie ring’o man adhurane ke utie agulu mi tedo. Wun re jubiwodhowu cen kud i iye.’”

8 “‘Wubelworo palamularu ento palamularu re m’abikelo i kumwu,’ Rwoth Ubimo ma Malu Ngbir Yehova wacu. 9 ‘Abiwodhowu kud i iye, abimiyowu i cing’ juwirok man abikelo pokolembe i wiwu. 10 Wubipodho i lak palamularu. Abipoko lembe i wiwu i wang’ mupaka mir Israel, e wubing’eyo nia an a Yehova. 11 Adhura bibedo ngo iwu ni agulu mi tedo, man wubibedo ngo ni ring’o m’i iye; abipoko lembe i wiwu i wang’ mupaka mir Israel, 12 e wubing’eyo nia an a Yehova. Kum wuworo ngo telowic para man wutiyo ngo ku lembapoka para, ento wutimo lembe nimakere ku lembapoka mi thek m’utiekowu.’”

13 Saa m’aewo lembilane tap ci, Pelatia ma wod Benaya ugam utho, e apodho arieba wang’a man akok ku dwanda ma tek kumae: “Akaa, Ee Rwoth Ubimo ma Malu Ngbir Yehova! Nyo ibecidaru dong dhanu m’udong’ mir Israel e kpo?”

14 Lembe pa Yehova ubino kendo i bang’a, uyero kumae: 15 “Wod dhanu, maeni tie lembe ma dhanu ma bedo i Yeruzalem uyero ni umego peri, ni ju kind umego peri m’utie ku twero mi war man bende ni ot pa Israel zoo: ‘Wubed bor mandha ku Yehova. Ng’om maeni zoo utie mwa; jumiye iwa ni aba.’ 16 Pieno yer kumae: ‘Rwoth Ubimo ma Malu Ngbir Yehova uwacu kumae: “Kadok nwang’u acorogi bor mandha kud i kind thek man alalu igi i ng’om dupa de, re abidoko igi ni hekalu pi kare ma nyanok i ng’om ma gicidho i iye.”’

17 “Pieno yer kumae: ‘Rwoth Ubimo ma Malu Ngbir Yehova uwacu kumae: “Abicokowu bende kud i kind dhanu man abicoko dhogwu kud i ng’om ma julaluwu i igi, e abimiyo iwu ng’om mir Israel. 18 Gibidwogo i iye man gibikabu piny ceke ma judagu m’i iye ku timo ma judagu. 19 Abimiyo igi adunde m’uripo acel* man abiketho tipo ma nyen i igi; abikabu adunde mi kidi kud i kumgi man abimiyo igi adunde mi ring’kum,* 20 kara giwor cik para, gigwok lembapoka para man giworgi. E gibibedo dhanu para man abibedo Mungu migi.”’

21 “‘“Ento pi ju m’uketho migi adundegi i kum lubo tok piny migi ma judagu man timo migi ma judagu, abikelo matoke mi timo migi i wigi,” Rwoth Ubimo ma Malu Ngbir Yehova wacu.’”

22 E jukerubi ugam uting’o vombgi malu, pine ubino dri i ng’etgi man dwong’ pa Mungu mir Israel ubino i wigi. 23 I ng’eye dwong’ pa Yehova uidho kud i adhura man ewok ecungo iwi got yo nyangu mir adhurane. 24 Tipo ugam uting’a malu i gin ma wok i wang’ ma tipo pa Mungu uketho aneno man etera i bang’ dhanu ma jutero i ng’eca i Kaldayo. E gin ma wok i wang’ m’abino neno uweka. 25 Man acaku koro lembe ceke ma Yehova unyutho ira ni dhanu ma jutero i ng’eca.

12 Lembe pa Yehova ubino kendo i bang’a, uyero kumae: 2 “Wod dhanu, ibekwo i ot m’ujai. Gitie ku wang’ mi neno piny, ento gibeneno ngo man gitie ku ith mi winjo lembe, ento gibewinjo ngo, pilembe gitie ot m’ujai. 3 Ento in, wod dhanu, yik iri ter icidh i ng’eca. I ng’eye i saa mi dieceng’ cidh i ng’eca ma gibeneno. Cidh i ng’eca niai ku yo peri i kabedo mange ma gibeneno. Saa moko nyo gibinyang’ kadok nwang’u gitie ot m’ujai de. 4 Wodh ter peri m’iboyo pi cidho i ng’eca ku dieceng’ ma gibeneno, man i ng’eye ku dhug uthieno ma gibeneno, tug woth calu ng’atu ma jubetero i ng’eca.

5 “Kinde ma gibeneno, tuc kor gang’ man wodh piny peri kud i wang’e. 6 Kinde ma gibeneno, biel piny peri iwi goki, man wok kude i mudho. Um weng’i kara kud inen ng’om, pilembe abekethi ibed lanyuth ni ot mir Israel.”

7 Atimo tap calu ma jung’olo ira. Ating’o ter para ku dieceng’ calu ma jucidho ko i ng’eca, man kud uthieno atuco kor gang’ ku cinga. Saa ma piny ucido, ating’o piny para abiele iwi goka tap i wang’gi.

8 Lembe pa Yehova ubino kendo i bang’a kugweno, uyero kumae: 9 “Wod dhanu, nyo ot mir Israel ma tie ot m’ujai ubepenji ngo nia, ‘Ibetimo ang’o?’ 10 Yer igi kumae: ‘Rwoth Ubimo ma Malu Ngbir Yehova uwacu kumae: “Atwong’a maeni utie pi jadit ma wijo mi Yeruzalem man pi ot mir Israel ceke ma n’i adhurane.”’

11 “Yer kumae: ‘Atie lanyuth iwu. Tap lembe m’atimo re ma jubitimo i kumgi. Gibicidho i ng’om mange i ng’eca. 12 Jadit ma wijo ma n’i kindgi bibielo piny pare iwi goke man ebitugo woth kud i mudho. Ebituco kor gang’ man ebiwodho piny pare kud i wang’e. Ebiumo wang’e kara kud enen ng’om.’ 13 Abiyaru voi para i wiye man ebimoko i voi para mi dwar. E abitere i Babeli i ng’om mi Jukaldayo, ento ebineno ngo ng’ombe man ebiwok tho kuca. 14 Man abilalu i dhanu ceke m’utieko ng’ete, jukony pare man udul mony pare kakare ceke; man abiwodho palamularu pi niriemo tokgi. 15 E gibing’eyo nia an a Yehova kinde m’abilalu igi i kind thek man abilalu igi i ng’om ma tung’ tung’. 16 Ento abiketho jumoko ma nok m’i kindgi biboth kud i lak palamularu, ndru man thong’om kara gikor pi timo migi ceke ma judagu i kind thek ma gibicidho i iye; e gibing’eyo nia an a Yehova.”

17 Lembe pa Yehova ubino kendo i bang’a, uyero kumae: 18 “Wod dhanu, icikiri nicamu cam* peri ma kumi ubemiel man nimadhu pii peri ku mielkum man ma cwinyi ng’abere. 19 Yer ni dhanu mi ng’ombe nia, ‘Rwoth Ubimo ma Malu Ngbir Yehova uyero ni dhanu ma bedo i Yeruzalem i ng’om mir Israel kumae: “Gibicamu cam migi ma cwinygi ng’abere man gibimadhu pii migi ku ndiri, kum ng’om migi zoo bidong’ ni uvuru nikum rop mi dhanu ma bedo i iye. 20 Adhura ma jubedo i iye binyothere, man ng’ombe bidoko ni ng’om ngele; e wubing’eyo nia an a Yehova.”’”

21 Lembe pa Yehova ubino kendo i bang’a, uyero kumae: 22 “Wod dhanu, eni lembabola ma nenedi ma wutie ko i Israel m’uwacu nia, ‘Nindo bekadhu man gin ma wok i wang’ acel de mbe m’utimere’? 23 Pieno yer igi kumae: ‘Rwoth Ubimo ma Malu Ngbir Yehova uwacu kumae: “Abiketho wec maeno bijik man jubitiyo ngo kude kendo nyanok de ni lembabola i Israel.”’ Ento yer igi kumae: ‘Nindo dhingo, man gin ma wok i wang’ ceke bitimere.’ 24 Kum gin ma wok i wang’ mi ndra man ewolembe mi ndra bibedo mbe kendo i ot mir Israel. 25 ‘“Kum an a Yehova, abiweco. Lembe ceke m’abiyero bitimere m’umbe galu nyanok de. I nindo mwu, Ee ot m’ujai, abiweco man abitimo lembene,” Rwoth Ubimo ma Malu Ngbir Yehova wacu.’”

26 Lembe pa Yehova ubino kendo i bang’a, uyero kumae: 27 “Wod dhanu, ot mir Israel ubewacu kumae: ‘Gin ma wok i wang’ m’eneno kawoni fodi utie lembe mi nindo ma bor, man lembila m’ebeewo utie pi nindo m’ubino ma ni bor kuca.’ 28 Pieno yer igi kumae: ‘Rwoth Ubimo ma Malu Ngbir Yehova uwacu kumae: “‘Lembe para acel de mbe ma bigalu; lembe ceke m’ayero bitimere,’ Rwoth Ubimo ma Malu Ngbir Yehova wacu.”’”

13 Man lembe pa Yehova ubino kendo i bang’a, uyero kumae: 2 “Wod dhanu, ew lembe i kum jubila mir Israel man yer ni ju m’ubethungo lembila migi gigi* kumae: ‘Wuwinj lembe pa Yehova. 3 Rwoth Ubimo ma Malu Ngbir Yehova uwacu kumae: “Can iwi jubila ma jukusegu m’ubelubo tok paru migi, ma ke gin ma gineno mbe! 4 Ee Israel, jubila peri gidoko calu nzer i kind uvuru. 5 Wubicidho ngo kaka m’urwombere i kind gang’kidi pi nidogierogi kendo ni ot mir Israel, kara Israel umedere nicungo i lwiny i nindo pa Yehova.” 6 “Gineno gin ma wok i wang’ mi ndra man giewo vupo, gi ju m’ubeyero kumae: ‘Maeni tie lembe pa Yehova,’ ma ke Yehova ku kume uorogi ngo, man gibekuro lembe ma giyero utimere. 7 Nyo tie ngo gin ma wok i wang’ mi ndra re ma wuneno man vupo re ma wuewo kinde ma wuyero kumae: ‘Maeni tie lembe pa Yehova,’ ma ke gin m’ayero mbe?”’

8 “‘Pieno Rwoth Ubimo ma Malu Ngbir Yehova uwacu kumae: “‘Calu ma wuyero ndra man gin ma wok i wang’ mwu utie vupo, an’i kumwu,’ Rwoth Ubimo ma Malu Ngbir Yehova wacu.” 9 Cinga n’i kum jubila ma gin ma wok i wang’ migi tie ndra man m’ubeewo vupo. Gibibedo ngo i kind dhanu m’ageno; kadi nying’gi de jubikiewo ngo i kind ot mir Israel; man gibidwogo ngo i ng’om mir Israel; e wubing’eyo nia an a Rwoth Ubimo ma Malu Ngbir Yehova. 10 Lembuno zoo utie pilembe giketho dhanu para ukier ku wec ma giyero nia “Kwiyocwiny unuti!” ma ke kwiyocwiny umbe. Saa ma ka jugiero kor ot ma tek ungo, gigoyo pembe* i kume.’

11 “Yer ni ju m’ubegoyo pembe nia ebipodho. Koth ma kud avuvu bicorere, lungu pei bicwii, man yamu ma tek birwombe. 12 Kinde ma kor ot birwombere, jubipenjowu kumae: ‘Pembe ma wugoyo ni kani?’

13 “Pieno Rwoth Ubimo ma Malu Ngbir Yehova uwacu kumae: ‘Abiketho yamu ma tek bituk nikum kwinyo para, man abiketho koth ma kud avuvu bicorere nikum ng’eicwiny para man pei ma nyotho piny bicwii nikum ng’eicwiny para ma lake tek. 14 Abirwombo kor ot ma wugoyo pembe i kume man abiredhe i ng’om, e kathere bidong’ ngbeng’ kamaleng’. Kinde m’adhura bipodho, wubinyothuru i die iye; man wubing’eyo nia an a Yehova.’

15 “‘Kinde m’abicoro kwinyo para kpo iwi kor ot man iwi ju m’ugoyo pembe i kume, abiyero iwu kumae: “Kor ode mbe dong’ man ju m’ugoyo pembe i kume de gimbe. 16 Jubila mir Israel dong’ umbe, ju m’ubed uewo lembila ni Yeruzalem man m’ubed uneno gin ma wok i wang’ mi kwiyocwiny pire, ma ke kwiyocwiny umbe,”’ Rwoth Ubimo ma Malu Ngbir Yehova wacu.

17 “Ento in, wod dhanu, keth weng’i i kum nyig dhanu ma thu m’ubethungo lembila migi gigi, man ew lembila i kumgi. 18 Yer igi kumae: ‘Rwoth Ubimo ma Malu Ngbir Yehova uwacu kumae: “Can iwi jumamon m’ukwoyo jamtwic pi bot ceke* man m’uyiko kithambala pi kwond wic ceke pi nidwaru kwo* mi dhanu! Nyo wubedwaru kwo mi dhanu para man wubemito wugwok kwo mwu? 19 Nyo wubicida i kind dhanu para pi nganu ma juyuke pong’ cing’ man pi dong cam, ma wubenego ko dhanu ma nwang’u ukwayu ngo utho man wubeweko dhanu ma nwang’u ukwayu utho udong’ kwo,* ku ndra ma wubecwayu ni dhanu para m’ubewinjo ndra mwune?”’

20 “Pieno Rwoth Ubimo ma Malu Ngbir Yehova uwacu kumae: ‘Ee jumamon, an’i kum jamtwic mwu ma wutiyo ko pi nidwaru dhanu calu ve gitie winyo, abimayugi kud i botwu man abigonyo ju ma wudwaru calu winyo. 21 Abimayu kithambala mwu man abibodho dhanu para kud i the cingwu, gibibedo ngo kendo piny ma wumaku i dwar; e wubing’eyo nia an a Yehova. 22 Kum wuturo cwiny won bedopwe ku ndra mwu ma ke anyayu ngo can* i kume, man wudwoko cing’ jatimrac tek, uketho ebelokere ngo kud i timo pare ma rac kara ebed kwo. 23 Pieno wu jumamon wubineno ngo kendo gin ma wok i wang’ mi ndra man wubiewo ngo lembe kendo; abibodho dhanu para kud i the cingwu, e wubing’eyo nia an a Yehova.’”

14 Man jumoko m’i kind judongo mir Israel ubino man uwok ubedo i wang’a. 2 E lembe pa Yehova ubino i bang’a, uyero kumae: 3 “Wod dhanu, dhanu maeni gidaru keco nilubo tok ayi gin m’acwiya migi ma judagu,* man giketho cudho mi kier m’uketho dhanu dubo. Nyo mito awek gipenja? 4 Dong’ wec kugi man yer igi kumae: ‘Rwoth Ubimo ma Malu Ngbir Yehova uwacu kumae: “Tek Jaisrael moko ukeco nilubo tok ayi gin m’acwiya pare ma judagu man eketho cudho mi kier ma ketho dhanu dubo, man ebino pi nipenjo jabila moko, an a Yehova re m’abidwoko ire lembe m’eromo ko calkud ayi gin m’acwiya pare ma judagu ma dupa. 5 Kum abinyayu ndiri i adunde ot mir Israel,* pilembe gin ceke giweka man gilubo tok ayi gin m’acwiya migi ma judagu.”’

6 “Pieno yer ni ot mir Israel kumae: ‘Rwoth Ubimo ma Malu Ngbir Yehova uwacu kumae: “Wudwogi man wulokuru cen kud i kum ayi gin m’acwiya mwu ma judagu, man wulok weng’wu cen kud i kum timo mwu ceke ma judagu. 7 Kum tek Jaisrael moko kadi umondo moko ma kwo i Israel ukoyere kuda man ekeco nilubo tok ayi gin m’acwiya pare ma judagu man eketho cudho mi kier ma ketho dhanu dubo, e elund ebino pi nipenjo jabila para, an a Yehova abidwoko ire lembe an gira. 8 Abiketho wang’a i kum ng’atune man abidwoke ni lanyuth mi cimowang’ man wec mi lembabola; abikabu ng’atune kud i kind dhanu para; e wubing’eyo nia an a Yehova.”’

9 “‘Ento tek juwondo jabilane man edwoko lembe, eca nwang’u an a Yehova re m’awondo jabilane. Abirieyo cinga i kume man abikabe cen kud i kind dhanu para ma Israel. 10 Gicikiri niyeyo kier migi; kier pa ng’atu m’upenjo penji de bibedo rom ku kier pa jabila, 11 kara ot mir Israel uwek niwotho swa bor kuda man ujig nicidiri gigi ku kier migi ceke. E gibibedo dhanu para, man abibedo Mungu migi,’ Rwoth Ubimo ma Malu Ngbir Yehova wacu.”

12 Man lembe pa Yehova ubino kendo i bang’a, uyero kumae: 13 “Wod dhanu, tek ng’om moko udubo ira man egwoko ngo bedoleng’, abirieyo cinga i kume man abinyotho cam pare ma jugwoko,* abioro ndru i wiye man abikabu dhanu ku ley kud i iye.” 14 “‘Kadok nwang’u dhanu adek ma e, niwacu Noa, Daniel man Yob gibino i iye de, nwang’u gibodho kwo* migi kendgi nikum bedopwe migi,’ Rwoth Ubimo ma Malu Ngbir Yehova wacu.”

15 “‘Kunoke wakeketh nia aketho yedi mi lum ukadhu i die ng’ombe man gidaru dhanu m’i iye,* giketho edoko ni ng’om ngele ma ng’atu moko mbe ma copo kadhu kud i iye nikum yedi mi lum. 16 Calu andha abedo kwo,’ Rwoth Ubimo ma Malu Ngbir Yehova wacu, ‘kadok nwang’u dhanu adek maeni gin’i iye de, nwang’u gibodho ngo wotgi kadi nyiggi; nwang’u giboth ndhu kendgi, man ng’ombe dong’ ni uvuru.’”

17 “‘Kunoke wakeketh nia akelo palamularu i ng’ombe man awacu kumae: “Wek palamularu ukadh i ng’ombe,” man akabu dhanu ku ley m’i iye zoo, 18 kadok nwang’u dhanu adek maeno n’i iye de, calu andha abedo kwo,’ Rwoth Ubimo ma Malu Ngbir Yehova wacu, ‘nwang’u gibodho ngo wotgi kadi nyiggi; nwang’u giboth ndhu kendgi.’”

19 “‘Kunoke wakeketh nia aoro thong’om i ng’ombe man akonjo kwinyo para i wiye ku cwiro rimo pi nikabu dhanu ku ley kud i iye, 20 kadok nwang’u Noa, Daniel man Yob gin’i iye de, calu andha abedo kwo,’ Rwoth Ubimo ma Malu Ngbir Yehova wacu, ‘nwang’u gibodho ngo wotgi kadi nyiggi; nwang’u giboth ndhu kendgi nikum bedopwe migi.’”

21 “Kum Rwoth Ubimo ma Malu Ngbir Yehova uwacu kumae: ‘Lembe bibedo kumeno kinde m’abioro matira* para ang’wen, niwacu palamularu, ndru, yedi mi lum man thong’om i kum Yeruzalem pi nikabu dhanu man ley kud i iye. 22 Ento jumoko ma bidong’ i iye biboth man jubiwodhogi, awiya ma co ku ma nyir zoo. Gibebino i beng’wu man kinde ma wubineno kura ku timo migi, wubinwang’u jukocwiny andha pi nyoth m’akelo iwi Yeruzalem, pi lembe ceke m’atimo i iye.’”

23 “‘Gibijuko cwinywu kinde ma wubineno kura ku timo migi, man wubing’eyo nia atimo gin m’ukwayu atim i kume mananu ngo,’ Rwoth Ubimo ma Malu Ngbir Yehova wacu.”

15 Lembe pa Yehova ubino kendo i bang’a, uyero kumae: 2 “Wod dhanu, juromo poro yend ulok nenedi ku yen mange kunoke ku jang yen mi luli? 3 Nyo juromo tiyo ku yende moko pi nitimo tici? Kunoke nyo dhanu romo guro dund yende moko pi niliero ajeni? 4 Nen! jubole i mac pi niopo maje, man mac wang’u dhoge ario zoo, erewo dierene de. E nyo kawoni juromo tiyo kude pi tic moko? 5 Ma fodi etie ma boo de, juromo tiyo ngo kude i tic moko. Dong’ ka mac uwang’e man urewe, nyo tije romo bedo tiye?”

6 “Pieno, Rwoth Ubimo ma Malu Ngbir Yehova uwacu kumae: ‘Tap calu yend ulok ma n’i kind yen mi luli, m’amiyo juop ko mac, abitiyo bende ku dhanu ma bedo i Yeruzalem kumeno. 7 Adaru ketho wang’a i kumgi. Giboth kud i mac, ento mac biwang’ugi. E wubing’eyo nia an a Yehova kinde m’abiketho wang’a i kumgi.’”

8 “‘Abidwoko ng’ombe ni uvuru, pilembe gigwoko ngo bedoleng’,’ Rwoth Ubimo ma Malu Ngbir Yehova wacu.”

16 Lembe pa Yehova ubino kendo i bang’a, uyero kumae: 2 “Wod dhanu, keth Yeruzalem ung’ey timo pare ma judagu. 3 Ibiyero kumae: ‘Rwoth Ubimo ma Malu Ngbir Yehova uwacu ni Yeruzalem kumae: “Kaka ma junyoli i iye man thu n’i ng’om mi Jukanan. Wuru ubino Jaamon man meru ke Nyahiti. 4 I saa mi nyoliri peri, i nindo m’inyoliri i iye, juthumo ngo pel peri, jujomi ngo ku pii pi nidwoki leng’, jurudo ngo kumi ku kadu man juboyo ngo kumi ku bongu. 5 Ng’atu moko mbe ma kisa unego kadok nyanok de i kumi pi nitimo lembe acel kende ci m’i kind lembuno. Ngisi unego ngo ng’atu moko i kumi. Ento jubeyi i lum, pilembe judegi* i nindo ma junyoli i iye.

6 “‘“Kinde m’abekadhu kud i ng’eti, aneno ibegweyo tiendi i rimbi, man kinde m’ivuto keca i rimbi, ayero kumae: ‘Bed kwo!’ Eyo, ayero iri kinde m’ivuto keca i rimbi nia, ‘Bed kwo!’ 7 Aketho idoko ni udul ma lee mandha calu lum m’uloth i podho, man idongo imediri, ironyo jamruko ma beco mandha. Thunoni ucungo man yuk wii udongo; ento ibino asu muneru man ma nying’.”’

8 “‘Saa m’abekadhu kud i ng’eti, agam aneni man aneno nia idaru thik ma dong’ juromo meri. Pieno ayaru bongu* para i wii man aumo muneru peri, e akwong’o kwong’ man atimo lembariba kudi,’ Rwoth Ubimo ma Malu Ngbir Yehova wacu, ‘man idoko para. 9 M’umedo maeno, ajomi ku pii, alwoko rimbi cen man awiro mo i kumi. 10 I ng’eye aronyi ku bongu ma juruko kume ku dheyo man amiyo iri wara mi del ma leng’, aumo kumi ku bongu ma nwang’ ma leng’ man aronyi ku bongu mi bei ma tek. 11 Aruki ku jamruko, aronyo mangil i cingi man aronyo tigo i ng’uti. 12 Aroyo bende lengethu i umi, lengethu i ithi man jamker mi wic ma leng’ i wii. 13 Imediri nirukiri ku mola ma kwar man mola ma tar man bongu peri ubino bongu ma nwang’ ma leng’, kendi mi bei ma tek man juruko dheyo i kum bongune. Ibed icamu mogo ma yom, miyokic man mo, e ifodoko leng’ magwei dong’ man iromo nibedo ubimo ma dhaku.’”*

14 “‘Nyingi ucaku yik i kind thek pi leng’o peri, kum ibino leng’ nikum leng’o para m’aketho i wii,’ Rwoth Ubimo ma Malu Ngbir Yehova wacu.”

15 “‘Ento icaku geno leng’o peri, man idoko won asara nikum nyingi m’uyik. Imiyiri nitimo asara ku ng’atu moko ci m’ubekadhu i yo man leng’o peri udoko pare. 16 Iting’o bongu peri moko man iyiko ko kaka ma malu m’ujebo rangi kaka m’itimo asara i iye, wadi gin m’ucikere ngo nitimere, kadi ecikere de ngo niwok. 17 Iting’o bende jamruko peri ma leng’ ma juyiko ku mola ma kwar man mola ma tar m’amiyo iri man iyiko ko ayi gin m’acwiya ma co man itimo asara kugi. 18 Igamu kendi peri ma juruko kumgi ku dheyo man iumo kumgi,* e ithiero igi mo para man udok para ma ng’wice ng’ar. 19 Man mukathi m’amiyo iri ma juyiko ku mogo ma yom, mo man miyokic m’amiyo iri nia icam de ithiero igi ni piny ma ng’wice ng’ar.* Eno tap lembe m’utimere,’ Rwoth Ubimo ma Malu Ngbir Yehova wacu.”

20 “‘Iting’o woti ku nyigi m’inyolo ira man ithierogi ni mungu m’araga kara ucamgi. Nyo timo peri mir asara de fodi uromi ngo? 21 Ithumo wota man ithierogi ni lam m’iwang’u kogi i mac.* 22 Kinde m’imiyiri i timo peri ceke ma judagu man i timo mir asara, ipoy ungo pi nindo mir aradu peri saa m’ibino muneru man ma nying’ m’ibegweyo tiendi i rimbi. 23 Can, can i wii, ing’ey timo peri ceke ma reco,’ Rwoth Ubimo ma Malu Ngbir Yehova wacu. 24 ‘Igiero iri ungulu got* man igiero iri kaka ma malu i akarayo ceke. 25 Igiero iri kaka ma malu i kabedo ma beco m’usagu mi gengi ceke, man iloko leng’o peri ni gin ma judagu nikum mic m’imiyiri ko* ni ng’atu moko ci m’ubekadhu kud i gengi, e inyayu wend timo peri mir asara. 26 Itimo asara ku wot Misiri, ma gi jirani peri ma gi weg ayiri lee,* man inyayu ng’eicwiny i iya ku timo peri mir asara ma wende kwanere ngo. 27 Kawoni abirieyo cinga i kumi man abijwigo cam m’abemiyo iri, e abiwenji ni yeny mi jumamon m’udegi, anyira mi Jufilisti, ma timo peri m’ucido uketho gikier.

28 “‘Calu maeno de uromi ngo, idog itimo asara ku wot Asiria, ento i ng’ey m’itimo kugi asara de, fodi asu eromi ngo. 29 Inyayu asara peri i ng’om mi jukuloka,* man yor i bang’ Jukaldayo, re asu de fodi eromi ngo. 30 Kinde m’itimo lembuno ceke, m’ibetimiri ko calu won asara ma lewic umbe i the wang’e, adundeni ubed uremo* remo maa!’* Rwoth Ubimo ma Malu Ngbir Yehova wacu. 31 ‘Ento saa m’igiero ungulu got peri i kabedo ma beco m’usagu mi gengi ceke man igiero kaka ma malu peri i akarayo ceke, ibino ngo calu won asara, pilembe ikwero cul ceke. 32 Itie dhaku ma won abor* m’umaru juwirok kakare nimaru cware ma dhe! 33 Dhanu bemiyo giramiya ni weg asara ceke, ento i ng’ete m’i beng’i, in re m’imiyo giramiya ni dhanu ceke m’ayiri makugi i kumi man ing’iewo cwinygi kara gitund i beng’i niai ku kakare ceke pi nitimo kudi asara. 34 Ikoc ku mon mange ma timo asara. Ng’atu moko mbe ma timo asara i ayi peri! In re m’iculo jumange man gin giculi ngo. Timo peri ukoc.’

35 “Pieno, Ee dhaku ma won asara, winj lembe pa Yehova. 36 Rwoth Ubimo ma Malu Ngbir Yehova uwacu kumae: ‘Calu m’iweko ayiri umeki lee man muneru peri unen saa m’ibetimo asara ku jumer peri, man ayi gin m’acwiya peri ceke ma reco ma judagu* ku rac m’ithiero igi kadok rimb woti, 37 pieno abecoko karacelo jumer peri ceke m’iyomo cwinygi, dhanu ceke m’imaru karacelo ku m’idagu. Abicoko dhoggi karacelo i kumi niai ku kaka ceke man abiyabu muneru peri igi, e gibineni m’itie muneru ma nying’.

38 “‘Man abimiyo iri matira ku pokolembe ma mon ma weg abor man mon ma cwiro rimo giromo ko, e rimbi bicwir ku kwinyo man ku nyeko. 39 Abimiyi i cing’gi, man gibirwombo ungulu gudi peri man gibituro kaka ma malu peri; e gibiwanyu bongu kud i kumi, gibimayu jamruko peri ma beco, gibiweki muneru man ma nying’. 40 Gibikelo udul dhanu i wii, gibicenyi ku kidi man gibinegi ku palamularu migi. 41 Abiwang’u udi peri ku mac man abipoko lembe i wii i wang’ jumamon dupa; abijigo ther asara peri man ibiweko niculo cul. 42 Abidaru ng’eicwiny para i kumi man kwinyo para biloko kud i beng’i; e cwinya bikwiyo man ng’eicwiny bimaka ngo kendo.’

43 “‘Calu m’ipoy ungo pi nindo mir aradu peri man inyayu ng’eicwiny i iya ku lembe maeno ceke m’itimo, kawoni abikelo matoke mi timo peri i wii,’ Rwoth Ubimo ma Malu Ngbir Yehova wacu, ‘e ibimediri ngo kendo ku timo peri mir acidi man timo peri ceke ma judagu.

44 “‘Nen! dhanu ceke ma bolo lembabola bitiyo ku lembabola ma e i kumi: “Nyaku kwanyu ndaku pa min!” 45 Itie nyaku pa meru m’ucayu cware man awiya pare. Man itie nyamin nyimego peri, m’ucayu coggi man awiya migi. Meru ubino Nyahiti man wuru ke ubino Jaamor.’”

46 “‘Nyameru ma dit utie Samaria, ma bedo kud awiya pare ma nyir* yo malu kudi,* man nyameru ma nok m’utie Sodoma bedo kud awiya pare ma nyir yo piny kudi.* 47 Ikwanyu ngo kende kende kura migi man ilubo ngo kende kende timo migi ma judagu, ento pi kare ma nok kende ci, kura peri ceke unyothere nisagu ma gibino ko. 48 Calu andha abedo kwo,’ Rwoth Ubimo ma Malu Ngbir Yehova wacu, ‘Sodoma ma nyameru man awiya pare ma nyir gitimo ngo gin ma in kud awiya peri ma nyir wutimo. 49 Nen! Kosa pa Sodoma ma nyameru ni e: En kud awiya pare ma nyir gibed giluliri man gibino ku cam lee, gibedo ma cwinygi kwiyo; re gikonyo ngo ju m’utagu man jucan. 50 Gimediri niting’iri man nitimo lembe ma judagu i wang’a, uketho anwang’u nia mito akabgi cen.

51 “‘Kadi Samaria de utuc ungo nitimo nusu mi dubo ceke m’itimo. Inyayu timo peri ma judagu nisagu ma gitimo, cil ma timo peri ceke ma judagu uketho nyimego peri ginen nia gi pwe. 52 Kawoni icikiri niyeyo acidi peri, pilembe icwaku ba timo mi nyimego peri. Gitie pwe nisegi pilembe nikum dubo peri, itimo gin ma judagu nisagugi. Dong’ kawoni lewic umeki man iyey acidi, pilembe iketho nyimego peri ginen nia gi pwe.’

53 “‘Man abicoko dhu dhanu migi ma jutero i ng’eca, niwacu dhanu mi Sodoma ma jutero i ng’eca ku jumanyir pare man dhanu mi Samaria ma jutero i ng’eca ku jumanyir pare; abicoko bende dhanu peri ma jutero i ng’eca karacelo kugi, 54 kara iyey acidi peri; man lewic bimeki pi gin m’itimo pilembe ijuko cwinygi. 55 Nyameru ma buu ma Sodoma ku jumanyir pare bidwogo i ayi ma gibino ko yang’ con, man Samaria ku jumanyir pare de bidwogo i ayi ma gibino ko yang’ con, in de karacelo ku jumanyir peri wubidwogo i ayi ma wubino ko yang’ con. 56 Sodoma ma nyameru uromo ngo nia iwec pire i rundi m’ibino doro i iye, 57 ma nwang’u fodi jutuco ngo wi timo peri ma reco. Kawoni anyira mi Siria ku jirani pare gibenyweri man anyira mi Jufilisti m’udhoki tingili gibeceyi. 58 Ibiyeyo matoke mi timo peri mir acidi man timo peri ma judagu,’ Yehova wacu.”

59 “Kum Rwoth Ubimo ma Malu Ngbir Yehova uwacu kumae: ‘Kawoni abitimo iri tap calu m’itimo, pilembe icayu kwong’ man ituro lembariba para. 60 Ento abipoy pi lembariba m’atimo kudi i nindo mir aradu peri, man abitimo kudi lembariba ma bicungo rondo ku rondo. 61 Ibipoy pi timo peri man lewic bimeki kinde m’ibijolo nyimego peri, ju ma judongo iri man ju m’i jadit igi; abimiyogi iri ni awiya peri ma nyir, re ebibedo ngo nikum lembariba peri.’

62 “‘An ku kuma abitimo lembariba kudi; e ibing’eyo nia an a Yehova. 63 I ng’eye ibipoy man lewic bimeki lee mandha m’iromo alu ngo dhogi nikum acidi peri, kinde m’abitimo adunya piri kadok nwang’u itimo lembuno zoo de,’ Rwoth Ubimo ma Malu Ngbir Yehova wacu.”

17 Lembe pa Yehova ubino kendo i bang’a, uyero kumae: 2 “Wod dhanu, bol koy man yer lembabola pi ot mir Israel. 3 Yer kumae: ‘Rwoth Ubimo ma Malu Ngbir Yehova uwacu kumae: “Acur ma dit, ma vombe dongo, m’ukondone boco boco man bik, ma yuke jebo rangi ubino i Lebanon man ewok ecodo lwith yend tido. 4 Ecodo lwithe ma lir lir man etere i ng’om mi jukuloka* man ewok ekethe i adhura mi jukuloka. 5 I ng’eye egamu kum kodhi moko mi ng’ombe man epidhe i podho ma miyo. Epidhe calu ma jupidho ko yen wilo i dhu kulo ma dit. 6 Pieno etwii man edoko ni yend ulok m’udongo ngo ma re m’udhath; ithe m’uluk uloko yor i iye man ulage ugurere yor i there. Pieno edoko yend ulok ma jange loth man m’udhath.

7 “‘“Acur mange ma dit ugam utundo, ma vombe dongo man ukondone boco boco. E yend ulokne ucwalu ulage yor i bang’e kud abamba bor ku podho ma jupidhe i iye man eoro jange de yor i bang’e kara ekwoy pii i wiye. 8 Nwang’u jupidhe i podho ma miyo i dhu kulo ma dit kara ewodh jange, eceg nyinge man edok yend ulok ma dit.”’

9 “Yer kumae: ‘Rwoth Ubimo ma Malu Ngbir Yehova uwacu kumae: “Nyo ebidongo? Nyo ng’atu moko mbe ma bifudho ulage, ma biketho nyinge bitop man biketho jange bithwo? Ebithwo magwei ma bikwayu ngo bot ma tek kunoke dhanu ma wendgi lee pi nifudhe bir kud ulage. 10 Kadok nwang’u judage kaka mange, nyo ebidongo? Nyo ebithwo ngo zoo saa ma yamu ma yo nyangu bikoto i wiye? Ebithwo i podho kaka m’edongo i iye.”’”

11 Man lembe pa Yehova ubino kendo i bang’a, uyero kumae: 12 “Akweyi, kepenj ot maeni m’ujai kumae: ‘Nyo wubenyang’ ungo i thelembe mi gin maeni?’ Yer kumae: ‘Nen! ubimo mi Babeli ubino i Yeruzalem, eting’o ubimone ku judongo ma wijo m’i iye man edok kugi i bang’e i Babeli. 13 M’umedo maeno, eting’o ng’atu acel m’i kind kodhi mi ker, etimo kude lembariba man eketho ekwong’o kwong’. I ng’eye ecoko dhanu mir awora mi ng’ombe, 14 kara julor kerne piny m’eromo ai ungo malu, kara kerne umedere nibedo nuti kende kende tek dhanune gibeworo lembariba pare. 15 Ento tokcenne ubimo ubin ujai ire, pilembe eoro jukwenda i Misiri pi ninwang’u riuni* man udul mony ma lee i bang’e. Nyo lembe bibedo miero ire? Nyo ng’atu m’ubetimo lembuno biboth andha ni matira? Nyo ecopo turo lembariba man eboth asu?’

16 “‘“Calu andha abedo kwo,” Rwoth Ubimo ma Malu Ngbir Yehova wacu, “ebitho i Babeli kaka m’ubimo* m’ukethe ni ubimo* kwo i iye, en m’ecayu kwong’ pare man eturo lembariba pare. 17 Udul mony ma lee man juaskari ma wendgi kwanere ngo pa Farao bibedo mbe ku kony i lwiny, saa ma jubigiero gang’ ma tek ku gang’ ma tek mi maku adhura pi nikabu kwo* dupa. 18 Ecayu kwong’ man eturo lembariba. Kadok nwang’u eng’olo lembe de,* etimo lembuno ceke. Ebiboth ungo.”’

19 “‘Pieno Rwoth Ubimo ma Malu Ngbir Yehova uwacu kumae: “Calu andha abedo kwo, abikelo matoke mi cayu kwong’ para man mi turo lembariba para i wiye. 20 Abiyaru voi para i wiye man ebimoko i voi para mi dwar. Abitere i Babeli man abiwok poko lembe i wiye kuca pi dubo m’etimo ira. 21 Juaskari pare ceke m’uringo bipodho i lak palamularu man ju m’udong’ bilal kakare ceke. E wubing’eyo nia an a Yehova re m’aweco.”’

22 “‘Rwoth Ubimo ma Malu Ngbir Yehova uwacu kumae: “Abiting’o lwith yend tido m’udongo lir lir man abipidhe, abicodo lwith jange ma lep lep man an ku kuma abipidhe iwi got ma lir lir m’uting’ere malu. 23 Abipidhe iwi got ma lir lir mir Israel; jange bidhath, ebicego nyinge, man ebidoko ni yend tido ma dit. Kwond winyo ceke bikwo i there man gibibedo i the tipo ithe. 24 E yen ceke mi luli bing’eyo nia an a Yehova re m’adaru jwigo yen m’udongo ma bor man adodo yen m’udongo ngo; adaru thwoyo yen ma numu man aketho yen m’uthwo uthiwo. An a Yehova re m’ayero lembuno man atime.”’”

18 Lembe pa Yehova ubino kendo i bang’a, uyero kumae: 2 “Lembabola ma e ma wubetiyo ko i ng’om mir Israel thelembe tie ang’o: ‘Wego camu nying ulok ma wac, ento lak awiya re m’utho’?

3 “‘Calu andha abedo kwo,’ Rwoth Ubimo ma Malu Ngbir Yehova wacu, ‘wubitiyo ngo kendo ku lembabola maeni i Israel. 4 Nen! ng’eyong’ec* ceke tie para. Ng’eyong’ec pa wego ku ng’eyong’ec pa wod bende tie para. Ng’eyong’ec* m’udubo re ma bitho.

5 “‘Wakeketh nia ng’atu moko tie pwe man etimo lembe m’atira man ma pwe. 6 Ecamu ngo piny ma juthiero ni mungu m’araga iwi gudi; eneno ngo bang’ ayi gin m’acwiya ma judagu* mi ot mir Israel; kadi ecido ngo ci wadi kadi etimo de ngo ribiri ku dhaku m’ubeneno nindo pare; 7 esendo ngo ng’atu moko, ento edwoko piny ma ng’atu m’ugamu banja umiyo i bang’e ni mukwatu; eyaku ngo ng’atu moko, ento emiyo cam pare ni ng’atu ma kec ubenego man eumo kum ng’atu m’ubedo muneru ku kendi; 8 emiyo ngo banja ma jucul ku faida kadi ku faida m’ukadhu mukero, ento ecerere i kum timo lembe m’atira ngo; epoko lembe i kind dhanu ario ku bedopwe mandha; 9 emedere niworo cik para man nilubo telowic para mi pokolembe pi nitimo lembe i ayi m’atira. Ng’atu maeni tie won bedopwe man ebimedere andha nikwo,’ Rwoth Ubimo ma Malu Ngbir Yehova wacu.

10 “‘Ento wakeketh nia enyolo nyathin ma won ayeki kadi ma janek* kunoke ma timo lembe moko m’i kind maeno 11 (kadok nwang’u wego utimo ngo lembe moko acel de m’i kind maeno): elund ecamu piny ma juthiero ni mungu m’araga iwi gudi, ecido ci wadi, 12 esendo ng’atu ma n’i yeny man jacan, eyaku piny, edwoko ngo mukwatu, eneno bang’ ayi gin m’acwiya ma judagu, emondo i timo ma judagu, 13 emiyo banja ma jucul ku faida man ku faida m’ukadhu mukero. E nyathinne bimedere ngo nibedo kwo. Pi lembe maeno ceke ma judagu m’etimo, jubinege andha. Rimbe bibedo i wiye gire.

14 “‘Ento wakeketh nia wego tie ku wod moko m’uneno dubo ceke ma won utimo, man kadok nwang’u enenogi de, etimo ngo lembe ma kumeno. 15 Ecamu ngo piny ma juthiero ni mungu m’araga iwi gudi; eneno ngo bang’ ayi gin m’acwiya ma judagu mi ot mir Israel; kadi ecido ngo ci wadi; 16 esendo ngo ng’atu moko; ecero ngo piny ma jumiyo ni mukwatu;* eyaku ngo piny; emiyo cam pare ni ng’atu ma kec unego man eumo kum ng’atu m’ubedo muneru ku kendi; 17 eii kara kud esend jacan; emiyo ngo banja ma jucul ku faida kadi ku faida m’ukadhu mukero; elubo telowic para mi pokolembe man eworo cik para. Ng’atu maeno bitho ngo pi kosa pa won. Ebimedere andha nibedo kwo. 18 Ento calu won ukwalu kwo, eyaku umin, man etimo lembe ma reco i kind juthugi, en re m’ebitho pi kosa pare.

19 “‘Ento wubiyero kumae: “Pirang’o wod uyeyo ngo kier pa woni?” Calu ma wod utimo lembe m’atira man ma pwe, eworo cik para ceke man etiyo kugi, ebimedere andha nibedo kwo. 20 Ng’eyong’ec* m’udubo re ma bitho. Wod biyeyo ngo kier pi kosa pa won, man wego de biyeyo ngo kier pi kosa pa wode. Jubikwanu bedopwe pa ng’atu ma pwe i wiye kende man jubikwanu racu pa jatimrac i wiye kende.

21 “‘Ento tek jatimrac moko uweko dubo ceke m’ebed etimo, eworo cik para man etimo lembe m’atira man ma pwe, ebimedere andha nibedo kwo. Ebitho ngo. 22 Dubo moko mbe m’etimo ma jubiketho i wiye.* Ebimedere nikwo pi lembe ma pwe m’ebetimo.’

23 “‘Nyo tho pa jatimrac nyayu anyong’a nyanok de i iya?’ Rwoth Ubimo ma Malu Ngbir Yehova wacu. ‘Nyo afoyo ngo nia elokere kud i yo pare man emedere nibedo kwo?’

24 “‘Ento tek ng’atu ma pwe uweko bedopwe pare man etimo lembe ma rac, m’ebetimo ko lembe ceke ma judagu ma jatimrac timo, nyo ebikwo? Jubipoy ungo pi lembe acel de ma pwe m’etimo. Nikum gondiri pare man dubo pare m’etimo, ebitho.

25 “‘Ento wubiyero kumae: “Yo pa Yehova ugondere.” Akwayuwu, wukewinji, Ee ot mir Israel! Nyo yo para re m’ugondere? Nyo tie ngo yo mwu re m’ugondere?

26 “‘Tek ng’atu moko ma pwe uweko bedopwe pare man etimo lembe ma rac, e etho pi lembene, nwang’u etho pi lembe ma rac m’etimo en.

27 “‘Man tek jatimrac uweko lembe ma rac m’ebed etimo, ecaku timo lembe m’atira man ma pwe, ebibodho kwo* pare. 28 Saa m’enyang’ man eweko dubo ceke m’ebed etimo, ebimedere andha nikwo. Ebitho ngo.

29 “‘Ento ot mir Israel biyero kumae: “Yo pa Yehova ugondere.” Nyo andha ndhu yo para re m’ugondere, Ee ot mir Israel? Nyo tie ngo yo mwu re m’ugondere?’

30 “‘Pieno abipoko lembe pa ng’atuman m’i kindwu nimakere ku gin m’etimo, Ee ot mir Israel,’ Rwoth Ubimo ma Malu Ngbir Yehova wacu. ‘Wulokuru cen, eyo, wulokuru magwei kud i dubo mwu ceke, kara kud gibed ni cudho mi kier ma kelo kier i wiwu. 31 Wukab dubo ceke ma wubed wutimo man wunwang’* adunde ma nyen ku tipo ma nyen. Pirang’o ukwayu wutho, Ee ot mir Israel?’

32 “‘Tho pa ng’atu moko nyayu ngo anyong’a nyanok de i iya,’ Rwoth Ubimo ma Malu Ngbir Yehova wacu. ‘Dong’ wulokuru kara wubed kwo.’”

19 “Icikiri niwero wer wak pi judongo ma wijo mir Israel 2 man yer kumae:

‘Meru ubino ang’o? Min umvor i kind umvor.

Evuto i kind nyithindh umvor ma tek* man etungo nyithindhe.

 3 Etungo acel m’i kind nyithindhe man edoko nyathin umvor ma tek.

 5 Min umvorne ukuro kpe man tokcenne enyang’ nia genogen mi dwogo mbe ire.

Pieno egamu nyathinne mange acel man eore m’etie nyathin umvor ma tek.

 6 Ewotho bende i kind umvor man edoko nyathin umvor ma tek.

Eponjo ayi mi yeco i cam man ecamu kadok dhanu.

 9 Giroye i goga ku gol man gitere i bang’ ubimo mi Babeli.

Kuca giwok gitwiyo bang’e kara kudi dwande uwinjere kendo nyanok de iwi gudi mir Israel.

10 Meru ubino calu yend ulok i rimbi,* jupidhe i dhu pii.

Ecego nyinge man jange pong’ lee i kume nikum pii m’upong’.

11 Jange* udoko ma tek m’uromo nibedo uluthker.

Jutong’o jange ma tek cen, e githwo man mac uwang’ugi.

“‘Eno tie wer wak, man jubitiyo kude de ni wer wak.’”

20 I oro mir abiro, i dwi mir abic, i nindo apar mi dwije, judongo moko mir Israel gibino man giwok gibedo i wang’a pi nipenjo Yehova. 2 E lembe pa Yehova ubino i bang’a, uyero kumae: 3 “Wod dhanu, wec ku judongo mir Israel man yer igi kumae: ‘Rwoth Ubimo ma Malu Ngbir Yehova uwacu kumae: “Wubino pi nipenja? ‘Calu andha abedo kwo, abidwoko ngo kawang’ penji mwu,’ Rwoth Ubimo ma Malu Ngbir Yehova wacu.”’

4 “Nyo itie ayika nipoko lembe i wigi? Wod dhanu, nyo itie ayika nipoko lembe i wigi? Keth ging’ey gin ma judagu ma kwarugi utimo. 5 Yer igi kumae: ‘Rwoth Ubimo ma Malu Ngbir Yehova uwacu kumae: “I nindo m’ang’iyo Israel, akwong’o bende kwong’* ni nyikway ot pa Yakobo man aketho ging’eya i ng’om mi Misiri. Eyo, akwong’o igi man awacu kumae: ‘An a Yehova Mungu mwu.’ 6 Cing’ nica, akwong’o nia abiwodhogi kud i ng’om mi Misiri pi niterogi i ng’om m’asayu* igi, ng’om ma molo cak ku miyokic. Ebino ng’om ma leng’ magwei nisagu ng’om ceke. 7 I ng’eye ayero igi kumae: ‘Ng’atuman m’i kindwu ucikere nibayu cen gin ma judagu ma n’i wang’e; kud wuciduru kud ayi gin m’acwiya ma judagu mi Misiri. An a Yehova Mungu mwu.’

8 “‘“Ento gijai ira man gibedo ngo ayika niwinja. Gibayu ngo piny ma judagu m’ubino i wang’gi, man giweko ngo ayi gin m’acwiya ma judagu mi Misiri. Pieno ang’olo nia abikonjo ng’eicwiny para i wigi man abicoro kwinyo para kpo i wigi i ng’om mi Misiri. 9 Ento atimo lembe pi nyinga kara kud jucide i wang’ thek ma gibino kwo i kindgi. Kum aketho ging’eya i wang’ thek maenogi saa m’awodhogi* kud i ng’om mi Misiri. 10 E awodhogi kud i ng’om mi Misiri man aterogi i langa.

11 “‘“I ng’eye amiyo igi cik para man aketho ging’eyo telowic para mi pokolembe kara ng’atu m’ubeworogi ubed kwo nikumgi. 12 Amiyo igi bende sabatu para ubed ni giranyutha i kindwa wakugi, kara ging’ey nia an a Yehova re m’abedwokogi leng’.

13 “‘“Ento ot mir Israel ujai ira i langa. Giworo ngo cik para man gikwero telowic para mi pokolembe, ma ka ng’atini ulubo, ebikwo nikumgi. Gicido sabatu para magwei. E ang’olo nia abikonjo kwinyo para ma lake tek i wigi i langa pi nidarugi pet. 14 Atimo lembe pi nyinga kara kud jucide i wang’ thek m’awodho Israel kud i wang’gi. 15 Akwong’o igi bende kud i langa nia abiterogi ngo i ng’om m’amiyo igi, ng’om ma molo cak ku miyokic man ng’om ma leng’ magwei nisagu ng’om ceke, 16 pilembe gikwero telowic para mi pokolembe, giworo ngo cik para, gicido sabatu para, kum adundegi ubino lubo tok ayi gin m’acwiya migi ma judagu.

17 “‘“Ento kisa unega* i kumgi man anyothogi ngo; adarugi ngo pet i langa. 18 Ayero ni wotgi i langa kumae: ‘Kud wulub telowic pa kwaruwu, kud wuwor cik mi pokolembe migi kadi kud wuciduru kud ayi gin m’acwiya migi ma judagu. 19 An a Yehova Mungu mwu. Wuwor cik para, wulub telowic para mi pokolembe man wutii kugi. 20 Man wudwok sabatu para leng’, e gibibedo ni lanyuth i kindwa wakudwu kara wung’ey nia an a Yehova Mungu mwu.’

21 “‘“Ento wotne gicaku jai ira. Giworo ngo cik para, gilubo ngo man gitiyo ngo ku telowic para mi pokolembe, ma ka ng’atini ulubo, ebikwo nikumgi. Gicido sabatu para. Pieno ang’olo nia abikonjo ng’eicwiny para i wigi man abicoro kwinyo para kpo i wigi i langa. 22 Ento acerara man atimo lembe pi nyinga kara kud jucide i wang’ thek m’awodho Israel i wang’gi. 23 Akwong’o igi bende i langa nia abilalu igi i kind thek man abilalugi mba mba i kind ng’om ma tung’ tung’, 24 pilembe gilubo ngo telowic para mi pokolembe man gikwero cik para, gicido sabatu para man gilubo tok* ayi gin m’acwiya ma judagu pa kwarugi. 25 Aweko giworo bende cik ma cuu ngo man telowic mi pokolembe ma copo miyo ngo igi kwo. 26 Aweko gicidiri ku lam migi saa ma giwang’u awiya migi ma kayu ceke i mac* pi ninyothogi, kara ging’ey nia an a Yehova.”’

27 “Dong’ wec i bang’ ot mir Israel, wod dhanu man yer igi kumae: ‘Rwoth Ubimo ma Malu Ngbir Yehova uwacu kumae: “I ayi ma rom eni bende, kwaruwu de giyero lembacidi i kuma, pilembe gigwoko ngo bedoleng’ migi ira. 28 Aterogi i ng’om m’akwong’o nia abimiyo igi. Saa ma gineno ungulu gudi* ceke m’uting’ere man yen ma ithe jiyo, gicaku thiero lam ku girathiera migi ma judagu. Githiero piny ma ng’wice ng’ar mi lam migi man gikonjo girathiera migi mi pigulok keca. 29 E apenjogi kumae: ‘Kaka ma malu ma wubed wucidho i iye thelembene tie ang’o? (Fodi asu nitundo tin de julwong’e Kaka ma Malu.) ’”’

30 “Kawoni yer ni ot mir Israel kumae: ‘Rwoth Ubimo ma Malu Ngbir Yehova uwacu kumae: “Nyo wubeciduru i ayi ma rom ma kwaruwu gicidiri ko ku lubo tok ayi gin m’acwiya migi ma judagu pi nitimo kugi asara mi tipo? 31 Man fodi asu wubeciduru nitundo tin ku thiero lam ni ayi gin m’acwiya mwu ceke ma judagu, ma wubewang’u ko wotwu i mac?* Nyo saa ma rom eno kwayu adwok wang’ penji mwu, Ee ot mir Israel?”’

“‘Calu andha abedo kwo,’ Rwoth Ubimo ma Malu Ngbir Yehova wacu, ‘abidwoko ngo wang’ penji mwu. 32 Man lembe ma wuparu* ma wuyero ko nia “wadok calu thek, calu dhanu mi ng’om mange ma woro* yen man kidi,” bitimere ngo nyanok de.’”

33 “‘Calu andha abedo kwo,’ Rwoth Ubimo ma Malu Ngbir Yehova wacu, ‘abibino i wiwu ku cing’ ma tek, ku bot m’arieya man ku konjo kwinyo ma lake tek. 34 Abiwodhowu kud i kind dhanu man abicoko dhogwu karacelo niai kud i ng’om ma julalu iwu i igi ku cinga ma tek, ku bot m’arieya man ku konjo kwinyo ma lake tek. 35 Abiterowu i langa mi dhanu man abipoko lembe i wiwu keca wang’ ku wang’.

36 “‘Tap calu m’apoko lembe iwi kwaruwu i langa mi ng’om mi Misiri, abipoko lembe i wiwu de kumeca,’ Rwoth Ubimo ma Malu Ngbir Yehova wacu. 37 ‘Abiketho wubikadhu kud i ther uluth pa jakwac man abiketho wubiworo lembariba kud adici.* 38 Ento abikabu jujai kud i kindwu man ju m’ubedubo ira. Abiwodhogi kud i ng’om ma gibedo i iye ni umondo, ento gibimondo ngo i ng’om mir Israel; e wubing’eyo nia an a Yehova.’

39 “Ento wun, Ee ot mir Israel, Rwoth Ubimo ma Malu Ngbir Yehova uwacu kumae: ‘Ng’atuman m’i kindwu ucidh utim ni ayi gin m’acwiya pare ma judagu. Ento i ng’eye tek wuwinja ngo, wubituc ungo nyanok de nicido nyinga ku lam mwu man kud ayi gin m’acwiya mwu ma judagu.’

40 “‘Kum ot mir Israel ceke, gin kpo gibitimo ira i ng’ombe, iwi got para ma leng’, iwi got ma lir lir mir Israel,’ Rwoth Ubimo ma Malu Ngbir Yehova wacu. ‘Anyong’a binega i kumgi keca man abikwayu ajok mwu ku landu wi mwoka mi girathiera mwu ku piny mwu ceke ma leng’. 41 Nikum piny ma ng’wice ng’ar,* anyong’a binega i kumwu saa m’abiwodhowu kud i kind dhanu man abicoko dhogwu kud i ng’om ma tung’ tung’ ma julaluwu i igi; e abidwokara leng’ i kindwu i wang’ thek.’

42 “‘E wubing’eyo nia an a Yehova saa m’abidwogowu i ng’om mir Israel, i ng’om m’akwong’o nia abimiyo ni kwaruwu. 43 Kuca wubiwok poy pi kura mwu ku timo mwu ceke ma wuciduru ko man wubideguru* ku rac nikum lembe ceke ma reco ma wutimo. 44 E wubing’eyo nia an a Yehova saa m’abitimo iwu lembe pi nyinga, ento ungo calku kura mwu ma reco kadi nikum timo mwu m’unyothere, Ee ot mir Israel,’ Rwoth Ubimo ma Malu Ngbir Yehova wacu.”

45 Man lembe pa Yehova ubino kendo i bang’a, uyero kumae: 46 “Wod dhanu, lok weng’i yor i ng’om ma yo piny, twong’ lembe ni yo piny man ew lembila ni urudi mi dwol ma yo piny. 47 Yer ni luli ma yo piny kumae: ‘Winj lembe ma Yehova uwacu. Rwoth Ubimo ma Malu Ngbir Yehova uwacu kumae: “Nen, abedhuro mac i kumi man ebiwang’u yen ma numu ceke ku yen m’uthwo ceke ma n’i ii. Leb mac m’ubelielne bibedo ma negere ngo man ebiwang’u wang’ dhanu ceke niai yo piny nitundo yo malu. 48 Man dhanu ceke* bineno nia an a Yehova re m’adhuro mac i kume kara kud enegere.”’”

49 E ayero kumae: “Akaa, Ee Rwoth Ubimo ma Malu Ngbir Yehova! Gibeyero pira kumae: ‘Nyo ebebolo ngo kende kende koy? ’”*

21 Lembe pa Yehova ubino kendo i bang’a, uyero kumae: 2 “Wod dhanu, lok weng’i yor i Yeruzalem, twong’ lembe i kum kabedo ma leng’ man ew lembila i kum ng’om mir Israel. 3 Yer ni ng’om mir Israel kumae: ‘Yehova uwacu kumae: “Nen, an’i kumi, man abiwodho palamularu para kud i ukorone, e abikabu won bedopwe ku jatimrac bende kud i beng’i. 4 Calu abikabu won bedopwe ku jatimrac bende kud i beng’i, palamularu para biwok kud i ukorone i kum dhanu ceke,* niai yo piny nitundo yo malu. 5 Dhanu ceke bing’eyo nia an a Yehova re m’awodho palamularu para kud i ukorone. Ebidok ungo kendo kakare.”’

6 “Man in, wod dhanu, cur ma kumi bemiel, eyo, cur ku can i wang’gi. 7 Man tek gipenji kumae: ‘Pirang’o ibecur?’ dwok kumae: ‘Utie pir atwong’a moko.’ Kum lembene bitimere andha man adunde ceke biloy nikum lworo, cing’ ceke bikonjere jebele, cwiny dhanu ceke bitur man cong’ ceke bicwiro pii.* ‘Nen! lembene bitimere andha, eyo, ebitimere,’ Rwoth Ubimo ma Malu Ngbir Yehova wacu.”

8 Lembe pa Yehova ubino kendo i bang’a, uyero kumae: 9 “Wod dhanu, ew lembila man yer kumae: ‘Maeni lembe ma Yehova uwacu: “Yer kumae: ‘Palamularu! Jupaku lak palamularu man jurudo kume. 10 Jupaku lake pi ninego nek ma dit, jurudo kume kara emil calu lukoth.’”’”

“Nyo kwayu ngo anyong’a negwa?”

“‘Nyo ebikwero* uluthker pa woda ma buu, calu m’ekwero ko yen ceke?

11 “‘Jumiye kara jurud kume man jumake ku cing’jo. Jupaku lak palamularu maeni man jurudo kume kara jukethe i cing’ janek.

12 “‘Waki man goy nduru, wod dhanu, pilembe palamularune ubino i kum dhanu para; en’i kum judongo ma wijo ceke mir Israel. Gibitho ku palamularu karacelo ku dhanu para. Dong’ goy bembi ku can. 13 Kum jung’iyo i lembe mi dhanu para, man lembang’o ma bitimere tek palamularu ukwero uluthkeri? Ebibedo mbe* dong’,’ Rwoth Ubimo ma Malu Ngbir Yehova wacu.

14 “Man in, wod dhanu, ew lembila man pad cingi man yer nia ‘Palamularu!’ wang’ adek. Etie palamularu mi ju ma junego, palamularu mi nek ma dit m’utiekogi. 15 Adundegi biloy ni lworo man dhanu dupa bipodho i dhugang’ mir adhura migi; abinego nek ku palamularu. Eyo, ebemil calu lukoth man jurudo kume pi nek! 16 Tong’ pu yor acwic! Tong’ yor acam! Cidh kaka moko ci ma palamularu peri loko i iye! 17 An de abipadu cinga man abikwiyo wi kwinyo para. An a Yehova, adaru weco.”

18 Man lembe pa Yehova ubino kendo i bang’a, uyero kumae: 19 “Ento in, wod dhanu, yik gengi ario kara palamularu p’ubimo mi Babeli ubin. Gin ario ceke gibiai i ng’om ma rom, man jucikiri niketho lanyuth* kaka ma gengi m’ucidho i adhura ario ukaru i iye. 20 Icikiri niyiko gengi acel kara palamularu ubin i kum Raba mi Juamon, man gengi ma kucelo i kum Yeruzalem ma tie adhura ma tek i Yuda. 21 Kum ubimo mi Babeli ucungo pi niewo lembe kaka ma gengi urombo i iye, kaka ma gengi ukaru i iye ni ario. Eyengo athero. Epenjo ayi gin m’acwiya pare;* eng’iyo i cwiny. 22 Gin m’emaku i cinge mir acwic pi niewo lembe uloko yor i bang’ Yeruzalem, pi niketho jamrwombo piny, pi ning’olo lembe pi nek, pi nikogo kok mi lwiny, pi niketho jamrwombo piny i kum dhugang’, pi niredho gang’ ma tek man pi nigiero gang’ ma tek mi maku adhura. 23 Ento ebinen ve ewolembe mi ndra i wang’ ju* m’ung’olo igi lembe ku kwong’. Re ebipoy pi kier migi man ebimakugi.

24 “Pieno Rwoth Ubimo ma Malu Ngbir Yehova uwacu kumae: ‘Wun giwu re ma wuketho jupoy pi kier mwu, pilembe wunyutho kosa mwu, wuketho dubo mwu unen pi lembe ceke ma wutimo. Dong’ kawoni ma jupoy piwu, jubiterowu ku kero.’*

25 “Ento nindo peri uromo, Ee in ma junyayu rem mi tho i kumi, jadit ma wijo ma rac mir Israel, saa mi matira peri ma tokcen udaru romo. 26 Rwoth Ubimo ma Malu Ngbir Yehova uwacu kumae: ‘Kab jamboyo wic ma segi man wodh jamker mi wic. Lembe bilokere. Dod ng’atu ma ni piny, man jwig ng’atu ma ni malu. 27 Abinyothe, abinyothe, abinyothe. Ebibedo pa ng’atu moko ngo cil ma ng’atu ma tie ku twerone bitundo, man abimiye ire.’

28 “Man in, wod dhanu, ew lembila man wac kumae: ‘Maeni tie lembe ma Rwoth Ubimo ma Malu Ngbir Yehova uwacu pi Juamon man pi cac migi.’ Yer kumae: ‘Palamularu! Judaru wodho palamularu pi nek; jurudo kume pi nimvoro man pi nimil calu lukoth. 29 Kadok juneno gin ma wok i wang’ mi ndra man juewo vupo piri de, jubirodi iwi ju ma junego,* jutimrac ma nindo migi uromo, nindo mi pokolembe migi ma tokcen. 30 Dwoke i ukorone. Abipoko lembe i wii kaka ma jucwiyi i iye i ng’om thu. 31 Abikonjo ng’eicwiny para i wii. Abikudho mac mi kwinyo para ma lake tek i wii, man abimiyi i cing’ dhanu ma kwiny, ma gi jubodho mi nyoth. 32 Ibidoko ni yenmac; jubicwiro rimbi i ng’om man jubipoy ungo piri nyanok de, pilembe an a Yehova adaru weco.’”

22 Man lembe pa Yehova ubino kendo i bang’a, uyero kumae: 2 “Ento in, wod dhanu, nyo idaru yikiri de nitwong’o pokolembe* iwi adhura ma cwiro rimo man niketho eng’ey piny pare ceke ma judagu? 3 Icikiri niyero kumae: ‘Rwoth Ubimo ma Malu Ngbir Yehova uwacu kumae: “Ee adhura ma cwiro rimo i die iye gire, in ma nindo peri bebino, in m’iyiko ayi gin m’acwiya ma judagu* pi nicidiri giri, 4 kier n’i wii, nikum rimo m’icwiro man ayi gin m’acwiya peri ma judagu uketho icido. Idhulo ajiki mi nindo peri man ajiki mi oro peri utundo. Pi thelembe maeno re m’abiketho ibidoko ni jamcac ni thek man jamng’iero ni ng’om zoo. 5 Ng’om ma ni ceng’ini man ma ni bor kudi bing’ieri, in ma nyingi cido man ipong’ ku yakini. 6 Nen! judongo ma wijo acel acel mir Israel ma n’i kindwu tiyo ku dito pare pi nicwiro rimo. 7 Gibecayu weggi ku meggi i die ii. Gibekwalu umondo man gibesendo nyathikic* ku dhatho.”’”

8 “‘Icayu kabedo para ma leng’, man icido sabatu para. 9 Juyernying’ ukeco nicwiro rimo i die ii. I die ii jubecamu lam iwi gudi man jubetimo lembe ma reco i die ii. 10 Gibecayu kavuto pa weggi* i die ii, man gibemaku dhaku m’ucido nikum nindo pare m’ebeneno. 11 Nico acel ubetimo lembe ma judagu ku ci wadi i die ii, ma kucelo ke ubecido ciwode ku timo mi lewic, man mange lundo ubemaku nyamin ma nyawon ma buu. 12 Gigamu kanyaka pi nicwiro rimo i die ii. Imiyo piny pi ninwang’u faida kunoke faida ma lee nisagu, man iyaku sente kud i bang’ wedu. Eyo, wii wil kuda magwei,’ Rwoth Ubimo ma Malu Ngbir Yehova wacu.

13 “‘Nen! apadu cinga pilembe adagu piny m’ibenwang’u i ayi m’atira ngo man pi timo mi cwiro rimo ma n’i ii. 14 Nyo tegocwiny peri bimedere asu man cingi bibedo asu ma tek i nindo m’abitimo i iye lembe i kumi? An a Yehova, adaru weco man abitimo lembe. 15 Abilalu ii i kind thek man abilalu ii mba mba i kind ng’om ma tung’ tung’, e abidaru cilo peri. 16 Lewic binyay i wii i wang’ thek, e ibing’eyo nia an a Yehova.’”

17 Man lembe pa Yehova ubino kendo i bang’a, uyero kumae: 18 “Wod dhanu, ot mir Israel udoko ira calu susu ma tije mbe. Gin ceke gitie mola, nyunyu ma tar ma lebe lebe,* cuma man cuma ma pek i furu. Gidoko ni ceth mola ma tar.

19 “Pieno Rwoth Ubimo ma Malu Ngbir Yehova uwacu kumae: ‘Calu ma wun ceke wudoko calu susu ma tije mbe, abecoko dhogwu karacelo i Yeruzalem. 20 Tap calu ma jucoko mola ma tar, mola, cuma ma pek man nyunyu ma tar ma lebe lebe i die i uka kara jukudh mac i wigi man uloygi, kumeno bende abicoko dhogwu karacelo nikum ng’eicwiny para man kwinyo para; abivuko mac i kumwu man abiketho wubiloy. 21 Abicoko dhogwu karacelo man abikudho mac i wiwu nikum kwinyo para ma lake tek man wubiloy i die i adhura. 22 Tap calu ma mola ma tar loy i uka, kumeno bende wubiloy i die i adhura; e wubing’eyo nia an a Yehova re m’akonjo ng’eicwiny para i wiwu.’”

23 Lembe pa Yehova ubino kendo i bang’a, uyero kumae: 24 “Wod dhanu, yer ire kumae: ‘Itie ng’om ma bidoko ngo leng’ kadi ma koth bicwii ngo i wiye i nindo mi ng’eicwiny. 25 Jubila pare gicamu gamba i iye calu umvor m’uberundo m’uyeco i cam. Gibemvoro dhanu.* Gibeyaku lonyo man piny ma pigi tek. Giketho mon dupa udoko ni montho i iye. 26 Julam pare gituro cik para man gimediri nicido kabedo para ma leng’. Giketho ngo tung’ tung’ i kind gin ma leng’ ku gin ma sai, man giketho ngo jung’ey gin m’ucido ku gin ma leng’, gikwero niworo sabatu para man adoko ni gin m’ucido i kindgi. 27 Judongo ma wijo pare ma n’i iye gi calu urudi m’ubeyeco cam; gicwiro rimo man ginego dhanu* pi ninwang’u piny i ayi m’atira ngo. 28 Ento jubila pare gibegoyo pembe i kum timo migi. Gibeneno gin ma wok i wang’ mi ndra man gibeewo vupo, giwacu kumae: “Rwoth Ubimo ma Malu Ngbir Yehova uwacu kumae,” ma ke Yehova uyero ngo lembe moko. 29 Dhanu mi ng’ombe gikwalu piny man giyaku piny, gisendo ju ma n’i yeny man jucan, giyaku umondo man gitwone ku pokolembe m’atira.’

30 “‘Abino sayu ng’atu moko kud i kindgi ma romo yiko kor ot ma jugiero ku kidi, kunoke ma romo cungo i wang’a kaka m’utuc pi nicero ba ng’ombe kara kud junyothe, ento anwang’u ngo ng’atu moko acel de. 31 Pieno abikonjo kwinyo para i wigi man abidarugi ku mac mi kwinyo para ma lake tek. Abikelo matoke mi timo migi i wigi,’ Rwoth Ubimo ma Malu Ngbir Yehova wacu.”

23 Lembe pa Yehova ubino kendo i bang’a, uyero kumae: 2 “Wod dhanu, jumamon moko ario ubedo nuti ma gibino jumanyir ma meggi acel. 3 Gidoko weg asara i Misiri. Gimiyiri i asara niai i aradu migi. Junyobo thunogi kuca man junyobo korgi ma gitie ko sumba. 4 Nying’ ma ditne ubino Ohola* man ma nok ke Oholiba.* Gidoko para man ginyolo awiya ma co ku ma nyir. Ohola utie Samaria man Oholiba utie Yeruzalem.

5 “Ohola ucaku timo asara ma ke etie para. Ebino kud ayiri lee pi jumer pare m’umare akeca, niwacu Juasiria m’ubino i ng’ete. 6 Gibino jubim m’ukendo bongu mi ble man jutelwic, ma gin ceke gin awobi ma beco ma giidho iwi riuni* migi. 7 Emedere nitimo asara ku wot ceke m’ang’iya mir Asiria man ecidere kud ayi gin m’acwiya ma judagu* mi ju m’ayiri umake i kumgi. 8 Eweko ngo asara pare m’etimo i Misiri, kum givuto kude niai i aradu pare man ginyobo kore m’etie ko sumba man gikonjo ayiri* migi i wiye. 9 Pieno amiye i cing’ jumer pare m’umare akeca, niwacu wot Asiria m’ayiri umake i kumgi. 10 Giyabu muneru pare man gimaku awiya pare ma co ku ma nyir, man ginege ku palamularu. E pire uyik i kind jumamon, man gipoko lembe i wiye.

11 “Saa ma nyamin ma Oholiba uneno lembuno, ayiri pare ufoutang’ dong’ magwei man asara pare udoko rac nisagu pa nyamin. 12 Ayiri umake i kum wot Asiria m’ubino i ng’ete, jubim man jutelwic m’ukendo kendi ma beco man m’uidho iwi riuni, niwacu awobi ceke ma beco. 13 Kinde m’ecidere, aneno nia gin ario zoo gikwanyu yo ma rom. 14 Ento ewotho medo asara pare ameda. Eneno jumaco ma jung’iko i kor ot, ayi Jukaldayo ma jung’iko man juwiro rangi ma kwar i kumgi, 15 ma gitwiyo mukaba i piergi ku jamboyo wic ma segi m’ubelierere i wigi; gibino nen calu jurumony, gin ceke gicungo kaka Jubabeli ma ginyoliri i ng’om mi Jukaldayo. 16 Saa m’enenogi tap ci, ayiri ucaku make i kumgi man eoro jukwenda i bang’gi i Kaldayo. 17 Pieno wot Babeli uwotho bino i kavuto pare mi mer man gicide kud ayiri* migi. I ng’ey ma gicide ci, elokere* cen kud i bang’gi m’edagugi.

18 “Saa m’emiyere nitimo asara m’umbe lewic man niyabu muneru pare, alokara cen kud i bang’e m’adage tap calu m’alokara* cen kud i bang’ nyamin m’adage. 19 Elund emedo asara pare ameda m’epoy ko pi nindo mir aradu pare kinde m’etimo asara i ng’om mi Misiri. 20 Ayiri umake i kumgi calu mon mi co ma yomgi calu pa kana man ma wathkumgi mi nyodo calu pa riuni. 21 Ava kura peri ma rac mir aradu peri i Misiri ubenegi, kinde ma jubed junyobo kori, thuno mir aradu peri.

22 “Pieno, Oholiba, Rwoth Ubimo ma Malu Ngbir Yehova uwacu kumae: ‘Nen, abecwalu jumer peri m’ilokiri kud i bang’gi* m’idagugi man abikelogi i wii niai kud i kakare ceke, 23 wot Babeli man Jukaldayo ceke, dhanu mi Pekod man Coa ku Koa, karacelo ku wot Asiria ceke. Gin ceke gin awobi ma beco, jubim man jutelwic, jurumony man ju m’alonda,* ma gin ceke giidho iwi riuni. 24 Gibiloy i wii ku magali man pine m’ubetwak man kud udul askari ma dit, ku ban ma dongo man ma thindho* man sabu. Gibikperiri i kumi tingili man abiyiyo igi nia gipok lembe, e gibipoko lembe i wii calu ma gifoyo. 25 Abikelo ng’eicwiny para i wii man gibitimo iri lembe ku kwinyo. Gibithumo umi ku ithi man juperi m’udong’ gibipodho i lak palamularu. Gibicoko awiya peri ma co ku ma nyir gibicidho ko, man gibiwang’u juperi m’udong’ ku mac. 26 Gibiwodho bongu kud i kumi man gibimayu jamruko peri ma beco. 27 Abijigo kura peri ma rac man asara peri m’ucaku i ng’om mi Misiri. Ibiweko nineno bang’gi man ibipoy ungo kendo pi Misiri nyanok de.’

28 “Kum Rwoth Ubimo ma Malu Ngbir Yehova uwacu kumae: ‘Nen, abecimiyi i cing’ ju m’idagu, ju m’ilokiri cen* kud i bang’gi m’idagugi. 29 Gibitimo iri lembe kud adegi man gibimayu piny ceke m’itimo tic ma tek pire, e gibiweki muneru man ma nying’. Lewic mi muneru mi lemsasa peri, kura peri ma rac man asara peri binen kamaleng’. 30 Jubitimo lembuni i kumi pilembe ilubo tok thek calu won asara, kum icidiri kud ayi gin m’acwiya migi ma judagu. 31 Ilubo tok timo pa nyameru man abiketho kikombe* pare i cingi.’

32 “Rwoth Ubimo ma Malu Ngbir Yehova uwacu kumae:

“Kum an ku kuma adaru weco,” Rwoth Ubimo ma Malu Ngbir Yehova wacu.’

35 “Pieno Rwoth Ubimo ma Malu Ngbir Yehova uwacu kumae: ‘Calu ma wii uwil kuda man icaya magwei,* ibinwang’u matoke mi kura peri ma rac man mi timo peri mir asara.’”

36 I ng’eye Yehova uwacu ira kumae: “Wod dhanu, nyo ibipoko lembe iwi Ohola giku Oholiba man ibinyutho igi timo migi ma judagu ngbeng’i? 37 Gitimo abor* man rimo n’i cing’gi. Gitimo ngo kende kende abor kud ayi gin m’acwiya migi ma judagu, ento giwang’u bende wotgi ma ginyolo ira i mac* ni cam mir ayi gin m’acwiya migi. 38 M’umedo maeno, gitimo ira lembe ma e: Gicido hekalu para i nindo maeca man gicido sabatu para. 39 I ng’ey ma githumo wotgi ni lam ni ayi gin m’acwiya migi ma judagu, gibino i hekalu para pi nicide i nindo ma rom eca. Eno re ma gin ma gitimo i ot para ma buu. 40 Gioro kadok jakwenda ucidh ulwong’ dhanu ubin niai ku bor. Kinde ma gibebino, ijom, iwiro weng’i man irukiri ku jamruko. 41 Ibedo piny iwi kom ma leng’, iketho meza i wang’e man iketho udok para ma ng’wice ng’ar ku mo para iwi mezane. 42 Dwand udul dhanu ma dieng’ ungo ubewinjere kuca, ma jumero ma jukelo niai kud i langa n’i kindgi. Gironyo mangil i cing’ jumamon man jamker mi wic ma beco i wigi.

43 “I ng’eye ayero pire, en m’eol kud abor kumae: ‘Re asu ebimedere kud asara pare.’ 44 Pieno gimediri nimondo i bang’e, tap calu ma jucidho ko i bang’ won asara. I ayi maeno re ma gicidho i bang’ Ohola man Oholiba ma gi jumamon ma kura migi reco. 45 Ento weg bedopwe bikelo pokolembe m’uromo kud abor man cwiro rimo i wiye; kum gitie weg abor man rimo n’i cing’gi.

46 “Kum Rwoth Ubimo ma Malu Ngbir Yehova uwacu kumae: ‘Jubikelo udul mony i wigi pi nidwokogi ni piny ma ng’oyo ndiri man piny ma juyaku. 47 Udul monyne bicanyugi ku kidi man gibitong’ogi ku palamularu migi. Gibinego awiya migi ma co ku ma nyir man gibiwang’u udi migi ku mac. 48 Abijigo kura ma rac kud i ng’ombe, e mon ceke gibinwang’u ponji man gibikwanyu ngo bang’ kura mwu ma reco. 49 Gibiketho wubinwang’u matoke mi kura mwu ma rac man mi dubo ma wutimo kud ayi gin m’acwiya mwu ma judagu; e wubing’eyo nia an a Rwoth Ubimo ma Malu Ngbir Yehova.’”

24 Lembe pa Yehova ubino kendo i bang’a i oro mir abung’wende, i dwi mir apar i nindo apar mi dwije, uyero kumae: 2 “Wod dhanu, kiew nindo maeni,* nindo ma tin eni. Ubimo mi Babeli ucaku loy iwi Yeruzalem tin eni. 3 Kor lembabola pi ot m’ujai man yer pigi kumae:

“‘Rwoth Ubimo ma Malu Ngbir Yehova uwacu kumae:

“Keth agulu mi tedo, kethe iwi mac man konj pii i iye.

 5 Gam urombo m’ang’iya kud i dwol, man pang dund yen i ther agulune tingili.

Bog unding’ ring’one man ted cogo i iye.”’

6 “Pieno Rwoth Ubimo ma Malu Ngbir Yehova uwacu kumae:

‘Can iwi adhura ma cwiro rimo, agulu ma munyali umaku, ma juwodho ngo munyaline!

Wodh unding’ m’i iye acel acel; kud igoy gagi pigi.

 7 Kum rimbe n’i die iye; eoye iwi cana ma lelele.

Eoye ngo i ng’om pi niumo wiye kud utur.

9 “Pieno Rwoth Ubimo ma Malu Ngbir Yehova uwacu kumae:

‘Can iwi adhura ma cwiro rimo!

Abirodo yen biidho malu.

E cilone biloy i iye man munyaline biwang’.

Dong’ baye i mac ku munyaline!’

13 “‘Kura peri ma rac uketho icido. Aii pi nidwoki leng’, ento iromo doko ngo leng’ nikum cilo peri. Ibidoko ngo leng’ ka fodi ng’eicwiny m’atie ko i kumi ukwiyo ngo. 14 An a Yehova adaru weco. Lembene bitimere. Abitimo lembe m’umbe nicerara, ma kisa kadi ang’eyang’o de mbe. Jubipoko lembe i wii nimakere ku kura man timo peri,’ Rwoth Ubimo ma Malu Ngbir Yehova wacu.”

15 Man lembe pa Yehova ubino kendo i bang’a, uyero kumae: 16 “Wod dhanu, abikabu ng’atu m’imaru mbwang’ kud i beng’i. Can kud unegi;* kud iwaki kadi piweng’i de kud ucwir. 17 Cur nyaling’ ling’ man kud itim lemcan pi ng’atu m’utho. Twii jamboyo wic peri ma segi man rony wara peri. Kud ium yir m’i dhu umi, man kud icam mukathi ma jumange ukelo iri.”

18 Aweco ku dhanu kugweno man uthienone dhaku para tho. E urwonde kugweno, atimo tap calu ma jung’olo ira. 19 Dhanu wotho penja kumae: “Kekor iwa, lembe m’ibetimo e ugwaku kumwa nenedi?” 20 Adwoko igi kumae: “Lembe pa Yehova ubino i bang’a, uyero kumae, 21 ‘Yer ni ot mir Israel kumae: “Rwoth Ubimo ma Malu Ngbir Yehova uwacu kumae: ‘Abecicido hekalu para, ju ma wer lee pire, piny ma wumaru akeca man m’adundewu yenyo. Awiya mwu ma co ku ma nyir ma wuweko i ng’eywu bipodho i lak palamularu. 22 E wubitimo tap calu m’atimo. Wubiumo ngo yir m’i dhu umwu man wubicamu ngo mukathi ma jumange ukelo iwu. 23 Jamboyo wic mwu ma segi bibedo i wiwu man wara mwu bibedo i tiendwu. Can binegowu ngo kadi awaka de wubiwak ungo. Ento wubitop pi kier mwu man wubicur ng’atuman ni wadi man ni wadi. 24 Ezekiel udoko iwu ni giranyutha. Wubitimo tap calu m’etimo. Saa ma lembene bitimere, wubing’eyo nia an a Rwoth Ubimo ma Malu Ngbir Yehova.’”’”

25 “Ento in, wod dhanu, nindo m’abikabu udi migi ma tek cen kud i bang’gi, piny ma leng’ m’anyong’a negogi i kume, piny ma gimaru akeca man ma giyenyo kud adundegi* zoo, karacelo kud awiya migi ma co ku ma nyir, 26 ng’atu m’uvuth re ma bibino nyutho iri lembene. 27 I nindo maeca ibiyabu dhogi man ibiweco i bang’ ng’atu m’uvuthne, e ibibedo ngo kendo buba. Ibidoko igi ni giranyutha, e gibing’eyo nia an a Yehova.”

25 Lembe pa Yehova ubino kendo i bang’a, uyero kumae: 2 “Wod dhanu, lok weng’i yor i bang’ Juamon man ew lembe i kumgi. 3 Yer pi Juamon kumae: ‘Wuwinj lembe pa Rwoth Ubimo ma Malu Ngbir Yehova. Rwoth Ubimo ma Malu Ngbir Yehova uwacu kumae: “Calu ma wuyero nia ‘Aha!’ i kum hekalu para saa ma jucide, i kum ng’om mir Israel saa m’edong’ ni uvuru man i kum dhanu mi Yuda saa ma gicidho i ng’eca, 4 pieno abemiyowu ni dhanu ma yo Nyangu ni aba. Gibiketho kagonjo* migi i kindwu man gibiguro hema migi i kindwu. Gibicamu nying yen mwu man gibimadhu cak mwu. 5 Abiketho Raba bidoko ni luba mi ngamia man ng’om mi Juamon ke bidoko kaka m’udul lim yom i iye, e wubing’eyo nia an a Yehova.”’”

6 “Kum Rwoth Ubimo ma Malu Ngbir Yehova uwacu kumae: ‘Calu ma wupadu cingwu, wugoyo tiendwu man anyong’a negowu* pi ng’om mir Israel ku cac ma tho rukeno, 7 abirieyo cinga i kumwu pi nimiyowu ni thek kara giyakwu. Abikabuwu cen kud i kind dhanu man abinyothowu kud i ng’om. Abinyothowu pet, e wubing’eyo nia an a Yehova.’

8 “Rwoth Ubimo ma Malu Ngbir Yehova uwacu kumae: ‘Calu ma Moab ku Seir giyero kumae: “Nen! dhanu mi Yuda gitie calu dhanu mi thek mange ceke,” 9 abeyabu ng’et* Moab i mupaka mir adhurane, leng’o mi ng’ombe, niwacu Beth-yecimoth, Baal-meon nitundo bir i Kiriathaim. 10 Abimiye karacelo ku Juamon ni aba ni dhanu ma yo Nyangu, kara kud jupoy kendo nyanok de pi Juamon i kind thek. 11 Man abipoko lembe i Moab, e gibing’eyo nia an a Yehova.’

12 “Rwoth Ubimo ma Malu Ngbir Yehova uwacu kumae: ‘Edom uculo kwor i kum dhanu mi Yuda man ewayu kier ma lee i wiye pi kwor m’eculo i wigi. 13 Pieno Rwoth Ubimo ma Malu Ngbir Yehova uwacu kumae: “Abirieyo bende cinga i kum Edom, abikabu dhanu kud udul lim kud i iye, man abidwoke ni uvuru. Gibipodho i lak palamularu niai i Theman nitundo i Dedan. 14 ‘Abiculo kwor i kum Edom nikadhu kud i cing’ dhanu para ma Israel. Gibikelo kwinyo ku ng’eicwiny para iwi Edom, kara ginwang’ kwor para,’ Rwoth Ubimo ma Malu Ngbir Yehova wacu.”’

15 “Rwoth Ubimo ma Malu Ngbir Yehova uwacu kumae: ‘Nikum adegi ma lee mi Jufilisti, gisayu niculo kwor man nikelo nyoth ku paru ma rac. 16 Pieno, Rwoth Ubimo ma Malu Ngbir Yehova uwacu kumae: “Nen, aberieyo cinga i kum Jufilisti, e abikabu Jukerethi man abinyotho dong dhanu ma bedo i dhu nam. 17 Abiculo kwor ma lee i kumgi ku matira ma kwiny, e gibing’eyo nia an a Yehova saa m’abiculo kwor i kumgi.”’”

26 I oro mir apar acende, i nindo ma kwong’a mi dwije, lembe pa Yehova ubino i bang’a, uyero kumae: 2 “Wod dhanu, calu ma Turo uyero pi Yeruzalem nia, ‘Aha! Dhugang’ mi dhanu daru tur! Piny ceke bibino i bang’a man kawoni ma judaru nyothe e, abilony lony maa!’ 3 Pieno Rwoth Ubimo ma Malu Ngbir Yehova uwacu kumae: ‘Nen, an’i kumi, Ee Turo, man abikelo thek dupa i kumi, tap calu ma nam kelo ko mujangane. 4 Gibinyotho gang’kidi mi Turo man gibirwombo udine ma wiw; abigobo ng’ombe man abidwoke ni cana ma lelele m’ubemil. 5 Ebidoko ni kathwoyo ndiya i die nam.’

“‘Kum an ku kuma adaru weco,’ Rwoth Ubimo ma Malu Ngbir Yehova wacu, ‘man ebidoko ni jambayeki ni thek. 6 Jubinego dhanu m’i pacu pare ma n’i kiaru ku palamularu, e dhanu bing’eyo nia an a Yehova.’

7 “Kum Rwoth Ubimo ma Malu Ngbir Yehova uwacu kumae: ‘Nen, abekelo Ubimo Nebukadnezar mi Babeli i kum Turo niai ku yo malu; etie ubimo mi jubim, kud udul riuni,* magali mi lwiny, juring riuni man udul mony ma juaskarine lee.* 8 Ebinyotho dhanu ma bedo i pacu peri ma n’i kiaru ku palamularu, ebigiero gang’ mi maku adhura ku gang’ ma tek i kumi man ebiting’o ban ma dwong’ i kumi. 9 Ebirungo i gang’kidi peri ku jamrwombo piny pare, man ebirwombo udi peri ma wiw ku lei pare. 10 Riuni pare bibedo lee mandha ma gibiumi kud utur, man dwand weg riuni pare, pine,* man magali biketho gang’kidi peri biyengere saa m’ebimondo i dhugang’ peri, calu dhanu m’ucoro wuu i adhura ma gang’kidine urwombere. 11 Ubong’ tiend riuni pare binyono gengi peri ceke; ebinego dhanu peri ku palamularu man mbegi peri ma tek birungiri i ng’om. 12 Gibimayu jamcingi, gibiyaku jamkuloka peri, gibirwombo gang’kidi peri man gibirungo udi peri ma beco; i ng’eye gibibayu kidi peri, piny peri ma juguro ku bau man gibidhenyo utur peri i pii.’

13 “‘Abijigo woy mi wer peri man jubiwinjo ngo kendo dwand adungu peri. 14 Abiketho ibidoko ni cana ma lelele m’umil, man ibidoko ni kathwoyo ndiya. Jubidogieri ngo kendo nyanok de, kum an a Yehova adaru weco,’ Rwoth Ubimo ma Malu Ngbir Yehova wacu.

15 “Rwoth Ubimo ma Malu Ngbir Yehova uwacu ni Turo kumae: ‘Saa ma badwand rwombiri peri biwinjere, saa ma dhanu m’ubetho ubecur, saa ma jubenego dhanu i beng’i, nyo kum cula bimiel ungo? 16 Judongo ma wijo ceke mi nam bilor kud iwi komker migi, gibiwodho kanzu* migi, gibilunyo kendi migi ma juruko ku dheyo man kumgi bimiel krr.* Gibibedo i ng’om ma kumgi umiel asu asu man gibineni ku zungo. 17 Gibiwero wer wak piri man gibiwacu iri kumae:

19 “Kum Rwoth Ubimo ma Malu Ngbir Yehova uwacu kumae: ‘Saa m’abinyothi calu adhura ma jubedo ngo i igi, saa m’abicoro pii m’udhetho i wii, man pii ma tek biumi, 20 abiteri karacelo ku dhanu m’ubeloro kudi i vur* i bang’ dhanu ma yang’ con; abiketho ibibedo i kabedo ma piny magwei calu kabedo ma yang’ con ma junyotho, karacelo ku ju m’ubeloro i vur, kara kud jubed i ii. E abiyungo* ng’om mi ju ma kwo.

21 “‘Abikelo ndiri rek i wii man ibibedo mbe kendo. Jubisayu kakeri ento jubinweng’i ngo kendo nyanok de,’ Rwoth Ubimo ma Malu Ngbir Yehova wacu.”

27 Lembe pa Yehova ubino kendo i bang’a, uyero kumae: 2 “Ento in, wod dhanu, wer wer wak pi Turo, 3 man yer ni Turo kumae:

“Ee Turo, in giri iwacu kumae: ‘Atie leng’ magwei.’

 8 Dhanu ma bedo i Sidon man Arvad ubino jugoy ngai peri.

E Turo, dhanu peri ma jubodho ubino jutic peri mi meli.

 9 Dhanu m’uteng’ini man jubodho mi Gebal ubed umwono wang’ meli peri.

Meli ceke mi nam man junam migi ubed ubino i beng’i pi niwilo jamkuloka.

10 Dhanu mi Persi, mi Lud, man mi Put ubino i kind udul mony peri; gibino dhanu peri mi lwiny.

Gibed ging’abu ban ku sabu migi i beng’i, man gin re ma giketho inwang’u dwong’.

12 “‘“Tharsis ubed utimo kuloka kudi pi lonyo peri m’upong’ bik. Gibed ging’iewo piny i beng’i ku mola ma tar, cuma, nyunyu ma tar ma lebe lebe,* man cuma ma pek. 13 Yavan, Thubal, man Mecek ubed utimo kuloka kudi, man gibed giwilo jamkuloka peri ku ng’eca man piny ma juyiko ku mola. 14 Juruot pa Thogarma gibed giwilo jamkuloka peri ku riuni, riuni mi lwiny man kana. 15 Dhanu mi Dedan ubed utimo kuloka kudi; iketho jukuloka i cula dupa. Gibed gimiyo iri lak liec ku yend eben ni giramiya. 16 Edom utimo kudi kuloka pi piny peri m’upong’ bik. Gibed giwilo jamkuloka peri ku turkwaz, bongu mi yuk rombe, bongu m’ujebo rangi ma juketho dheyo i kume, bongu ma leng’, korai man rubi.*

17 “‘“Yuda ku ng’om mir Israel ubed utimo kudi kuloka; gibed giwilo jamkuloka peri ku nganu mi Minith, cam m’alonda, miyokic, mo man balsam.

18 “‘“Dameski ubed utimo kudi kuloka pi piny peri m’upong’ bik man lonyo peri ceke; ebed elworo iri pigulok mir Helbon man bongu mi yuk rombe mi Zahar.* 19 Vedan man Yavan mir Uzal gibed gimiyo piny ma juyiko ku cuma, yen kasia man agada ma ng’wice ng’ar pi niwilo jamkuloka peri. 20 Dedan ubed ulworo iri bongu ma jupedho ni kabedo iwi kana. 21 Iketho Juarabia man judongo ma wijo ceke mi Kedar m’ubino jukuloka mi nyithi rombe, mi rombe man mi diegi gibed gitimo iri. 22 Jukuloka mi Ceba man mi Rama gibed gilworo iri piny; gibed gimiyo kwond mo ceke ma ng’wice ng’ar ma beco mandha, kidi ma pigi tek, man mola ma kwar giwilo ko jamkuloka peri. 23 Haran, Kane, Eden, jukuloka mi Ceba, Acur, man Kilmad gibed gilworo iri piny. 24 I soko peri, gibed gilworo bongu ma beco, koti ma juyiko ku bongu mi rangi mi ble man ma juketho dheyo m’ujebo rangi i kume, man bende thapi m’ujebo rangi; gin ceke jutwiyogi kii ku thol.

28 Saa ma jutic mi meli peri begoyo nduru, kum dhu wat bimiel.

32 I wak migi, gibiwero wer wak man gibiwero piri kumae:

‘Ng’a ma calu Turo, ma kawoni uling’ ting’ i die nam?

33 Saa ma jamkuloka peri ubed uai i die nam, ibed inyayu anyong’a i dhanu dupa.

Lonyo peri m’upong’ man jamkuloka peri ulonyo jubim mi ng’om.

36 Jukuloka ma n’i kind thek bilwiyo ku zungo pi lembe m’unweng’i.

Ajiki peri bitundo rek man ebiwang’u ijo.

E ibibedo nuti kendo ngo pi nja.’”’”

28 Lembe pa Yehova ubino kendo i bang’a, uyero kumae: 2 “Wod dhanu, yer ni jatela mi Turo kumae: ‘Rwoth Ubimo ma Malu Ngbir Yehova uwacu kumae:

“Calu m’adundeni uting’ere, ibemediri niyero kumae: ‘Atie mungu.

Ajany iwi komker pa mungu i cwiny nam.’

 3 Nen! nyo i riek nisagu Daniel?

Nyo lembamung’a moko mbe m’upondo iri?

6 “‘Pieno Rwoth Ubimo ma Malu Ngbir Yehova uwacu kumae:

 9 Nyo ibiyero asu nia ‘Atie mungu,’ ni ng’atu m’ubenegi?

Ibibedo kende kende dhanu ma dhanu, ento mungu ngo, i cing’ dhanu ma bicibi.”’

11 Man lembe pa Yehova ubino kendo i bang’a, uyero kumae: 12 “Wod dhanu, wer wer wak pir ubimo mi Turo man yer ire kumae: ‘Rwoth Ubimo ma Malu Ngbir Yehova uwacu kumae:

13 Ibino i Eden ma podho pa Mungu.

Juyikogi i nindo ma jucwiyi i iye.

14 Aketho ibedo calu jakerubi ma juwiro man ma jagwok.

Ibino iwi got ma leng’ pa Mungu, man ibed iwotho i kind kidi mi mac.

17 Adundeni caku ting’ere nikum leng’o peri.

Inyotho rieko peri nikum leng’o peri ma lee.

Abibeyi piny i ng’om.

Abiketho ibidoko ni thangu i wang’ jubim.

18 Nikum kier peri ma lee man kuloka m’itimo i ayi m’atira ngo, icido hekalu peri.

Abiketho mac bimoc i die ii man ebiweng’i.

Abidwoki ni vuru i ng’om i wang’ dhanu ceke m’ubeneni.

19 Ju ceke m’ung’eyi i kind dhanu bineni ku zungo.

20 Man lembe pa Yehova ubino kendo i bang’a, uyero kumae: 21 “Wod dhanu, lok weng’i yor i Sidon man ew lembila pire. 22 Icikiri niyero kumae: ‘Rwoth Ubimo ma Malu Ngbir Yehova uwacu kumae:

23 Abioro thong’om i iye man rimo bicwir i gengi pare.

24 “‘“E yend ukudho ma timojo rac man ukudho ma cobojo ma lith, niwacu ju m’ubecayu ot mir Israel, bitieke ngo kendo; e dhanu bing’eyo nia an a Rwoth Ubimo ma Malu Ngbir Yehova.”’

25 “‘Rwoth Ubimo ma Malu Ngbir Yehova uwacu kumae: “Saa m’abidocoko dhu ot mir Israel kendo i kind dhanu ma julalugi i kindgi, abidwokara leng’ i kindgi i wang’ thek. E gibibedo i ng’om migi m’agam amiyo ni jatic para ma Yakobo. 26 Gibibedo museme i iye, gibigiero udi, gibipidho yend ulok man gibibedo museme saa m’abikelo pokolembe iwi dhanu ceke m’utiekogi m’ubecayugi; e gibing’eyo nia an a Yehova Mungu migi.”’”

29 I oro mir apaje, i dwi mir apar, i nindo apar ario mi dwije, lembe pa Yehova ubino i bang’a, uyero kumae: 2 “Wod dhanu, lok weng’i yor i bang’ Farao m’ubimo mi Misiri, ew lembe i kume man i kum Misiri ceke. 3 Yer kumae: ‘Rwoth Ubimo ma Malu Ngbir Yehova uwacu kumae:

Ayike ira gira.’

 4 Ento abitong’o gol i dingi man abiketho rec mi Nil peri bimoko i kum apokani.

Abiwodhi woko kud i Nil peri ku rec ceke mi Nil m’umoko i kum apokani.

 5 Abiwenji i langa, in ku rec ceke mi Nil peri.

Ibipodho i die lum man jubiting’i ngo kadi acoka de jubicoko ngo dhogi.

Abimiyi ni cam ni yedi mi lum man ni winyo mi kor polo.

8 “‘Pieno Rwoth Ubimo ma Malu Ngbir Yehova uwacu kumae: “Nen, abekelo palamularu i wii, man abikabu dhanu ku yedi kud i ii. 9 Ng’om mi Misiri bidong’ ni uvuru ma jubedo ngo i iye; e gibing’eyo nia an a Yehova, pilembe iyero* kumae: ‘Kulo Nil utie para; an re m’ayike.’ 10 Pieno an’i kumi man i kum Nil peri, abidwoko ng’om mi Misiri bidoko ni uvuru m’uthwo kaw, man ni ng’om ngele m’udong’ kende, niai i Migdol nitundo i Siene, cil i kieu mir Ethiopia. 11 Dhanu kadi udul lim bikadhu ngo kud i iye, man jubibedo ngo i iye pi oro pier ang’wen. 12 Abiketho ng’om mi Misiri bidong’ kende nisagu ng’om ceke man adhurane de bidong’ ni adhura m’udong’ kende nisagu adhura ceke pi oro pier ang’wen; abilalu i Jumisiri i kind thek man abilalugi mba mba i ng’om ma tung’ tung’.”

13 “‘Kum Rwoth Ubimo ma Malu Ngbir Yehova uwacu kumae: “I ng’ey oro pier ang’wen, abicoko dhu Jumisiri kud i kind dhanu ma julalugi i kindgi man abidwogogi; 14 abiketho Jumisiri ma jutero i ng’eca bidwogo i ng’om mi Pathros, man kuca i ng’om thugi gibidoko ker ma kabang’e mbe. 15 Misiri bidoko ni ker ma tego pare mbe magwei man ebibimo ngo kendo wi thek mange; abiketho ebibedo nyanok mandha man ebibedo mbe ku copo mi diyo thek mange. 16 Ebibedo ngo kendo nyanok de gin ma ot mir Israel geno, ento ebibepoyo wigi kende kende pi kosa ma gitimo ma gilokiri ko i bang’ Jumisiri pi nisayu kony. E gibing’eyo nia an a Rwoth Ubimo ma Malu Ngbir Yehova.”’”

17 I oro mi pier ario wi abirone, i dwi ma kwong’a, i nindo ma kwong’a mi dwije, lembe pa Yehova ubino i bang’a, uyero kumae: 18 “Wod dhanu, Ubimo Nebukadnezar* mi Babeli uketho udul mony pare utimo tic ma tek mandha pi nikiedo i dhu Turo. Wi dhanu ceke uwang’ man gok ceke uluny. Ento en kud udul mony pare ginwang’u ngo cul pi tic ma tek ma gitimo i kum Turo.

19 “Pieno, Rwoth Ubimo ma Malu Ngbir Yehova uwacu kumae: ‘Nen, abemiyo ng’om mi Misiri ni Ubimo Nebukadnezar* mi Babeli man ebicoko lonyo m’i iye, ebiyaku man ebicoko piny lee kud i iye; eno bibedo cul mir udul mony pare.’

20 “‘Abimiyo ire ng’om mi Misiri kawang’ tic ma tek m’etimo i kume,* pilembe gitimo ira,’ Rwoth Ubimo ma Malu Ngbir Yehova wacu.

21 “I nindo maeca abiketho tung bitwii* ni ot mir Israel, man abimiyo iri kaka mi weco i kindgi; e gibing’eyo nia an a Yehova.”

30 Lembe pa Yehova ubino kendo i bang’a, uyero kumae: 2 “Wod dhanu, ew lembila man yer kumae: ‘Rwoth Ubimo ma Malu Ngbir Yehova uwacu kumae:

“Wugoy nduru kumae: ‘Akaa, nindo bebino!’

 3 Kum nindone ni ceng’ini, eyo, nindo pa Yehova ni ceng’ini.

Ebibedo nindo mir afuru, saa m’ukethere ni thek.

 6 Yehova uwacu kumae:

“‘Gibipodho i lak palamularu i ng’ombe niai i Migdol nitundo i Siene,’ Rwoth Ubimo ma Malu Ngbir Yehova wacu. 7 ‘Jubidwokogi ni ng’om m’udong’ kende nisagu ng’om ceke, man adhurane de bidong’ ni uvuru nisagu adhura mange ceke. 8 E gibing’eyo nia an a Yehova saa m’abicwinyo mac i kum Misiri man jubirungo dhanu ceke m’utimo kugi lembariba. 9 I nindo maeca abioro jukwenda ku meli pi niketho kum Ethiopia m’ugenere gire umiel; ndiri bimakugi i nindo m’ubebino iwi Misiri, kum ebibino andha.’

10 “Rwoth Ubimo ma Malu Ngbir Yehova uwacu kumae: ‘Abitiyo kud Ubimo Nebukadnezar* mi Babeli pi nijigo wi udul dhanu mi Misiri. 11 En kud udul mony pare, ma gi thek ma kisa mbe i igi nisagu zoo, jubiterogi pi ninyotho ng’ombe. Gibiwodho palamularu migi i kum Misiri man gibipong’o ng’ombe kud avu. 12 Abidwoko jang Nil ni ng’om m’uthwo man abilworo ng’ombe ni jutimrac. Abiketho juwirok binyotho ng’ombe ku piny ceke ma n’i iye. An a Yehova adaru weco.’

13 “Rwoth Ubimo ma Malu Ngbir Yehova uwacu kumae: ‘Abinyotho bende ayi gin m’acwiya ma judagu* man abidaru mungu ma tijgi mbe mi Nof.* Jadit ma wijo moko mbe ma bibedo kendo i ng’om mi Misiri man abinyayu lworo i ng’om mi Misiri. 14 Abinyotho Pathros, abicwinyo mac i Zoan man abipoko lembe iwi No.* 15 Abikonjo ng’eicwiny para iwi Sin ma ot ma tek mi Misiri man abinyotho dhanu mi No. 16 Abicwinyo mac i Misiri; ndiri bimaku Sin, jubituco gang’kidi mi No pi nimake man jubimaku Nof* ku dieceng’ ma tek! 17 Awobi mi On* ku mi Pibeseth bipodho i lak palamularu man adhurane bicidho i ng’eca. 18 Piny bicido duu i Tehafnehes saa m’abituro mberembere mi Misiri keca. Tego m’ebekethere ko bijik, afuru biume man adhura pare bicidho i ng’eca. 19 Abipoko lembe iwi Misiri, e gibing’eyo nia an a Yehova.’”

20 I oro mir apar acende, i dwi ma kwong’a, i nindo mir abiro mi dwije, lembe pa Yehova ubino i bang’a, uyero kumae: 21 “Wod dhanu, aturo bot Farao m’ubimo mi Misiri; jubitwiye ngo pi nithiedhe kadi jubiriwe de ngo ku bongu pi nidwoke tek m’eromo maku ko palamularu.”

22 “Pieno Rwoth Ubimo ma Malu Ngbir Yehova uwacu kumae: ‘Nen, an’i kum Farao m’ubimo mi Misiri, abituro bote, bote ma tek ku m’ular utur de, man abiketho palamularu bipodho kud i cinge. 23 I ng’eye abilalu Jumisiri i kind thek man abilalugi mba mba i ng’om ma tung’ tung’. 24 Abidwoko cing ubimo mi Babeli tek* man abiketho palamularu para i cinge, abituro bot Farao man ebicur ma tek calu ng’atu m’ubetho i wang’e.* 25 Abidwoko bot ubimo mi Babeli tek ento bot Farao bikonjere jebele; e gibing’eyo nia an a Yehova saa m’abiketho palamularu para i cing ubimo mi Babeli man ebitiyo kude pi nigoyo ng’om mi Misiri. 26 Abilalu Jumisiri i kind thek man abilalu igi mba mba i ng’om ma tung’ tung’, e gibing’eyo nia an a Yehova.’”

31 I oro mir apar acende, i dwi mir adege, i nindo ma kwong’a mi dwije, lembe pa Yehova ubino kendo i bang’a, uyero kumae: 2 “Wod dhanu, yer ni Farao m’ubimo mi Misiri man ni udul dhanu pare kumae:

‘Ng’a ma dwong’ calu ini?

 4 Pii uketho efung’ini ma dit, pii ma thuc uketho edongo lir lir.

 5 Eno re m’uketho edongo ma bor nisagu yen mange ceke mi lum.

 8 Yend tido mange mbe mi podho pa Mungu ma jucopo poro kude.

Yen mange mbe m’i podho pa Mungu ma copo pimere ku leng’o pare.

10 “Pieno Rwoth Ubimo ma Malu Ngbir Yehova uwacu kumae: ‘Calu edongo* ma bor man lwithe uwic nitundo i kind afuru man adundene uting’ere pi dongo pare, 11 abimiye i cing’ jabim mi thek ma jarukara. Ebitimo lembe andha i kume man abikwere pi racu pare. 12 Man juwirok ma gi thek ma cwinygi rac nisagu thek zoo bing’onde cen, man gibiweke iwi gudi. Ithe bioy i poga ceke man jange m’utur bivuto i kulo ceke mi ng’ombe. Dhanu ceke mi ng’om biai kud i the tipone man gibiweke. 13 Winyo ceke mi kor polo bikwo iwi tiende m’upodho, man yedi ceke mi lum bikwo iwi jange. 14 Eno tie kara yen moko ci ma n’i dhu pii kud udong ma bor lee kadi lwithe kud uwic nitundo i kind afuru, man kara yen m’umadhu pii ma ber kud udong lee calu gin. Kum gin ceke gibitho man gibiloro i ng’om ma piny karacelo ku wot dhanu m’ubeloro i vur.’*

15 “Rwoth Ubimo ma Malu Ngbir Yehova uwacu kumae: ‘Nindo m’ebiloro i Liel,* abinyayu lemcan. Pieno, abiumo wi pii ma thuc man abing’olo dhu kulo kara acer pii ma dit. Abiketho Lebanon bicido bii nikume man yen ceke mi lum bithwo. 16 Saa ma badwande m’epodho ko bewinjere, abiketho kum thek bimiel kinde m’abiketho ebiloro i Liel* karacelo ku dhanu ceke ma gibeloro i vur,* man yen ceke mir Eden, ma gitie yen m’ang’iya man ma beco nisagu mi Lebanon, yen ceke m’umadhu pii ma ber binwang’u jukocwiny i ng’om ma piny. 17 Gidaru loro karacelo kude i Liel,* i bang’ dhanu ma junego ku palamularu, karacelo ku ju m’ubed ukonye,* m’ubed ukwo i the tipone i kind thek.’

18 “‘Yen ma kani mir Eden m’ubino dwong’ man dit calu ini? Ento jubilori piny andha karacelo ku yen mir Eden i ng’om ma piny. Ibivuto piny i kind ju ma jutimo ngo yaa i kumgi, dhanu ma junego ku palamularu. Lembuno binwang’u Farao kud udul dhanu pare zoo,’ Rwoth Ubimo ma Malu Ngbir Yehova wacu.”

32 Man i oro mir apar arionde, i dwi mir apar ario, i nindo ma kwong’a mi dwije, lembe pa Yehova ubino kendo i bang’a, uyero kumae: 2 “Wod dhanu, wer wer wak pi Farao m’ubimo mi Misiri man yer ire kumae:

 3 Rwoth Ubimo ma Malu Ngbir Yehova uwacu kumae:

 7 ‘Saa m’ibitho abiumo polo man abiketho nyikaluku migi bicido bii.

11 Kum Rwoth Ubimo ma Malu Ngbir Yehova uwacu kumae:

‘Palamularu p’ubimo mi Babeli bibino i wii.

Gibiloro doro mi Misiri, e gibidaru udul dhanu peri pet.

Gibiwere pi Misiri man pir udul dhanu pare ceke,’ Rwoth Ubimo ma Malu Ngbir Yehova wacu.”

17 I ng’eye, i oro mir apar arionde, i nindo apar abic mi dwije, lembe pa Yehova ubino i bang’a, uyero kumae: 18 “Wod dhanu, goy nduru pir udul dhanu mi Misiri man lore i ng’om ma piny, en ku jumanyir mi thek ma jurukara, karacelo ku dhanu m’ubeloro i vur.*

19 “‘I leng’ nikadhu ng’a? Lor piny man vut karacelo ku ju ma jutimo ngo yaa i kumgi!’

20 “‘Gibipodho i kind ju ma junego ku palamularu. Judaru thiere ni palamularu; waye cen karacelo kud udul dhanu pare ceke.

21 “‘Juaskari pare ma jurukara biweco i bang’e man i bang’ jukony pare niai kud i the Liel.* Gibiloro piny andha man gibivuto tap calu ju ma jutimo ngo yaa i kumgi, ma junego ku palamularu. 22 Asiria ni kuca kud udul pare zoo. Liel migi udhoke tingili, gin ceke gipodho i lak palamularu. 23 Liel pare n’i the vur ma thuc, man udul dhanu pare udhoko liel pare tingili, gin ceke gipodho i lak palamularu, pilembe ginyayu ndiri i ng’om mi ju ma kwo.

24 “‘Elam ni kuca karacelo kud udul dhanu pare ceke i ng’et liel pare tingili, gin ceke gipodho i lak palamularu. Giloro i ng’om ma piny ma jutimo ngo yaa i kumgi, gin ma ginyayu ndiri i ng’om mi ju ma kwo. Kawoni gibiyeyo lewic migi ku dhanu m’ubeloro i vur.* 25 Juyiko ire kavuto i kind ju ma junego man udul dhanu pare ceke n’i ng’et liel pare tingili. Gin ceke jutimo ngo yaa i kumgi, junegogi ku palamularu, pilembe ginyayu ndiri i ng’om mi ju ma kwo. Man gibiyeyo lewic migi ku dhanu m’ubeloro i vur.* Jukethe i kind ju ma junego.

26 “‘Mecek ku Thubal gini kuca karacelo kud udul dhanu migi* ceke. Liel migi n’i ng’ete tingili. Gin ceke jutimo ngo yaa i kumgi man jutuco igi plu ku palamularu, pilembe ginyayu ndiri i ng’om mi ju ma kwo. 27 Nyo gibivuto ngo karacelo ku juaskari ma jurukara ma jutimo ngo yaa i kumgi, m’upodho, m’uloro i Liel* ku jamlwiny migi? Gibiketho palamularu migi i the wigi* man dubo migi iwi cogogi, pilembe juaskari ma jurukara eno ginyayu ndiri i ng’om mi ju ma kwo. 28 In re jubirungo ii i kind ju ma jutimo ngo yaa i kumgi man ibivuto karacelo ku ju ma junego ku palamularu.

29 “‘Edom ni kuca, ku jubim pare man judongo ma wijo pare ceke ma jupielo i kind ju ma junego ku palamularu kadok nwang’u gibino tek; gin de gibivuto karacelo ku ju ma jutimo ngo yaa i kumgi man ku ju m’ubeloro i vur.*

30 “‘Judongo ma wijo ma yo malu zoo ni kuca karacelo ku Jusidon ceke m’uloro piny ku lewic karacelo ku ju ma junego, kadok nwang’u tego migi unyayu ndiri de. Gibivuto ma jutimo ngo yaa i kumgi karacelo ku ju ma junego ku palamularu man gibiyeyo lewic migi ku ju m’ubeloro i vur.

31 “‘Farao binenogi zoo man ebinwang’u jukocwiny pi lembe ceke m’unwang’u udul dhanu pare; jubinego Farao kud udul askari pare zoo ku palamularu,’ Rwoth Ubimo ma Malu Ngbir Yehova wacu.

32 “‘Calu ma Farao unyayu ndiri i ng’om mi ju ma kwo, jubipiele kud udul dhanu pare zoo kara giyom ku dhanu ma jutimo ngo yaa i kumgi, karacelo ku ju ma junego ku palamularu,’ Rwoth Ubimo ma Malu Ngbir Yehova wacu.”

33 Man lembe pa Yehova ubino i bang’a, uyero kumae: 2 “Wod dhanu, wec i bang’ wot juthu man yer igi kumae:

“‘Wakeketh nia akelo palamularu iwi ng’om moko, man dhanu ceke mi ng’ombe gigamu ng’atu moko, gikethe ebed ni jakur migi, 3 e eneno palamularu ubebino iwi ng’ombe man ekudho agwara etwong’o ko dhanu. 4 Tek ng’atu moko uwinjo dwand agwarane, ento ekwanu ngo kud atwong’ane man palamularu ubin ukabu kwo pare, rimbe bibedo i wiye gire. 5 Ewinjo dwand agwara ento ekwanu ngo kud atwong’ane. Rimbe bibedo i wiye gire. Ka nwang’u ekwanu kud atwong’ane, e nwang’u ebodho kwo* pare.

6 “‘Ento tek jakur uneno palamularu bebino man ekudho ngo agwara, e dhanu unwang’u ngo atwong’a man palamularu ubin ukabu kwo* pa ng’atu acel m’i kindgi, ng’atune bitho pi kosa pare gire, ento abikwayu rimbe i bang’ jakur.’*

7 “Ento in, wod dhanu, aketho ibed jakur ni ot mir Israel; man kan iwinjo lembe moko i dhoga, icikiri nipoyogi ira. 8 Saa ma kan ayero ni jatimrac nia, ‘Jatimrac, ibitho andha!’ ento iweco ngo pi nipoyo jatimracne kara elok timo pare, ebitho calu jatimrac pi kosa pare, ento abikwayu rimbe i beng’i. 9 Re tek ipoyo jatimrac nia elok timo pare man ekwero niwilo kura pare, ebitho pi kosa pare ento in ibibodho kwo peri andha.

10 “Man in, wod dhanu, yer ni ot mir Israel kumae: ‘Wuwacu kumae: “Jai mwa man dubo mwa ubenurowa lee mandha uketho wabevoc; dong’ wacopo bedo asu kwo nenedi?”’ 11 Yer igi kumae: ‘“Calu andha abedo kwo,” Rwoth Ubimo ma Malu Ngbir Yehova wacu, “tho pa jatimrac nyayu ngo anyong’a i iya, ento anyong’a nega ka jatimrac uweko timo pare kara emedere nikwo. Dong’ wulokuru, wulokuru cen kud i timo mwu ma reco, kum pirang’o ukwayu wutho, Ee ot mir Israel?”’

12 “Man in, wod dhanu, yer ni wot juthu kumae: ‘Bedopwe pa won bedopwe bibodhe ngo saa ma kan ejai; kadi racu pa jatimrac de biketho ngo ekier saa ma kan elokere kud i timo pare ma reco; kadok ng’atu ma pwe de bimedere ngo nikwo pi bedopwe pare nindo ma tek edubo. 13 Saa ma kan ayero ni won bedopwe nia, “Ibimediri andha nikwo,” ento elund egeno bedopwe pare man etimo lembe ma rac,* jubipoy ungo pi lembe acel de ma pwe m’etimo ento ebitho pi racu m’etimo.

14 “‘Man tek ayero ni jatimrac nia “Ibitho andha,” man elokere kud i dubo pare, e etimo lembe m’atira man ma pwe, 15 tek jatimracne udwoko piny m’egamu ni mukwatu man eculo kawang’ piny ma nwang’u ekwalu, tek eworo cik mi kwo m’etimo ko ngo lembe ma rac, ebimedere andha nikwo. Ebitho ngo. 16 Dubo moko mbe m’etimo ma jubiketho i wiye.* Calu m’etimo lembe m’atira man ma pwe, ebimedere andha nikwo.’

17 “Ento juthu uwacu kumae: ‘Yo pa Yehova ugondere,’ ma ke i andha gin re ma yo migi ugondere.

18 “Tek ng’atu ma pwe uweko bedopwe pare man etimo lembe ma rac, ebitho pi lembene. 19 Ento tek jatimrac uweko nitimo lembe ma rac man etimo lembe m’atira man ma pwe, ebimedere nikwo pi lembe m’etimone.

20 “Ento wuyero kumae: ‘Yo pa Yehova ugondere.’ Abipoko lembe pa ng’atuman m’i kindwu nimakere ku gin m’etimo, Ee ot mir Israel.”

21 Tokcenne i oro mir apar arionde niai ma wacidho i ng’eca, i dwi mir apar, i nindo abic mi dwije, jalwo moko m’uvuth kud i Yeruzalem ubino i bang’a man eyero kumae: “Judaru rwombo adhura!”

22 Ento uthieno i wang’ ma jalwo m’uvuthne utundi, nwang’u cing’ Yehova ubino i wiya, man eyabu dhoga i wang’ ma jalwone ubin i bang’a kugweno. Pieno, dhoga ubino ayaba, man nwang’u dong’ atie ngo buba.

23 E lembe pa Yehova ubino i bang’a, uyero kumae: 24 “Wod dhanu, dhanu ma bedo i uvuru maeni gibeyero pi ng’om mir Israel kumae: ‘Abraham ubino eni kende, re asu emaku ng’ombe ni aba. Ento wan wa dupa; jumiyo ng’om maeni andha iwa ni aba.’

25 “Pieno yer igi kumae: ‘Rwoth Ubimo ma Malu Ngbir Yehova uwacu kumae: “Wubecamu cam ku rimo i iye, wubeng’ayu weng’wu i bang’ ayi gin m’acwiya mwu ma judagu* man wubemeduru nicwiro rimo. Ka wulund wumito wumak ng’ombe ni aba? 26 Wugeno palamularu mwu, wumiyuru i timo ma judagu, man ng’atuman m’i kindwu ucido ci wadi. Ka wulund wumito wumak ng’ombe ni aba?”’

27 “Maeni lembe m’icikiri niyero igi: ‘Rwoth Ubimo ma Malu Ngbir Yehova uwacu kumae: “Calu andha abedo kwo, dhanu m’ubekwo i uvuru bipodho i lak palamularu. Abimiyo ju ma n’i die lum ni cam ni yedi mi lum; ju ma n’i udi ma tek man i die cana ke bitho ku thong’om. 28 Abiketho ng’ombe bidoko ni ng’om ngele m’unyothere magwei, kuhaya pare ma lake tek bijik man gudi mir Israel bidong’ kendgi, ma ng’atu moko mbe ma bikadhu kud i wigi. 29 E gibing’eyo nia an a Yehova saa m’abidwoko ng’ombe ni ng’om ngele m’unyothere magwei pi lembe ceke ma judagu ma gitimo.”’

30 “Ento in, wod dhanu, juthu gibeweco piri i kindgi i ng’et gang’kidi man i dhu kamondo mi udi. Gibeyero i kindgi, ng’atuman ni umin kumae: ‘Bin man wawinju lembe m’uai i bang’ Yehova.’ 31 Gibibino bik pi nibedo i weng’i calu dhanu para; man gibiwinjo lembe m’iyero ento gibitiyo ko ngo. Kum gibewondi ku dhoggi, ento adundegi umaru akeca ninwang’u piny i ayi m’atira ngo. 32 Nen! itie igi calu wer mi mer, ma juwero ku dwal ma mit man ma jugoyo ku bodho ku jamgoyo wer ma juthondhe. Gibiwinjo lembe m’iyero ento ng’atu moko mbe ma bitiyo ku lembene. 33 E saa ma lembene bitimere, man ebitimere de andha, gibing’eyo nia jabila moko ubino i kindgi.”

34 Lembe pa Yehova ubino kendo i bang’a, uyero kumae: 2 “Wod dhanu, ew lembe i kum jukwac mir Israel. Ew man yer ni jukwac nia, ‘Rwoth Ubimo ma Malu Ngbir Yehova uwacu kumae: “Can iwi jukwac mir Israel ma gibetungiri gigi! Nyo utie ngo udul lim re ma jukwac gicikiri nikwayu? 3 Wubecamu miyo, wubekenduru ku kendi mi yuk rombe man wubethumo ley ma ful ful, ento wubekwayu ngo rombe. 4 Wumiyo ngo tego i kum ju ma ng’ic, wukeyo ngo kum ju m’uremo, wuriwo ngo wang’ rem mi ju m’unwang’u ret, wudwogo ngo ju m’ukier kadi wusayu de ngo ju m’urwinyo; ento wulund wubimo wigi ku kero man ku kwinyo. 5 E gilal pilembe jakwac ubino mbe; julalugi mba mba man gidoko ni cemo mi yedi ceke mi lum. 6 Rombe para lal iwi gudi ceke man iwi ungulu gudi* ceke m’uting’ere; rombe para lal mba mba i wang’ ng’om zoo, ma ng’atu moko acel de mbe m’ubesayu kakagi kadi m’ubedieng’ pi ninwang’ugi.

7 “‘“Pieno, wun wu jukwac, wuwinj lembe pa Yehova: 8 ‘“Calu andha abedo kwo,” Rwoth Ubimo ma Malu Ngbir Yehova wacu, “calu ma rombe para udoko ni giracama, ni cam ni yedi ceke mi lum, kum jukwac umbe, man jukwac para usayu ngo ka rombe para; ento gimediri nitungiri gigi man gikwayu ngo rombe para,”’ 9 pieno, wun wu jukwac, wuwinj lembe pa Yehova. 10 Rwoth Ubimo ma Malu Ngbir Yehova uwacu kumae: ‘An’i kum jukwac man abikwayu giwodh wel pi rombe para,* abiketho ngo gikway rombe para man jukwacne gibitungiri ngo kendo. Abilaru rombe para kud i dhoggi man gibibedo ngo igi kendo ni cam.’”

11 “‘Kum Rwoth Ubimo ma Malu Ngbir Yehova uwacu kumae: “Anuti eni, abisayu rombe para gira man abidieng’ pigi. 12 Abidieng’ pi rombe para calu jakwac m’unwang’u rombe pare m’ulal man m’ubekwayugi. Abibodhogi kud i kabedo ceke ma gilal i iye i nindo mir afuru man mi mudho ma bii. 13 Abiwodhogi kud i kind dhanu, abicoko dhoggi karacelo kud i ng’ombe, abidwokogi i ng’om migi man abikwayugi iwi gudi mir Israel, i dhu kulo man i ng’et kabedo ceke mi ng’ombe. 14 Abikwayugi i luba ma cuu man ng’om ma gibicamu i iye bibedo iwi gudi ma wiw mir Israel. Gibivuto keca kaka ma cemo ma cuu n’i iye man jubikwayugi i luba m’ang’iya iwi gudi mir Israel.”

15 “‘“Abikwayugi an gira man an gira re m’abiketho givuti,” Rwoth Ubimo ma Malu Ngbir Yehova wacu. 16 “Abisayu rombe m’urwinyo, abidwogo m’ukier, abiriwo wang’ rem pa rombe m’unwang’u ret man abidwoko ma ng’ic tek; ento abidaru m’ucwey man ma tek pet. Abitungo maeno ku pokolembe.”

17 “‘Ento wun, rombe para, Rwoth Ubimo ma Malu Ngbir Yehova uwacu kumae: “Abecipoko lembe i kind rombe acel ku rombe ma kucelo, i kind nyogi rombe ku nyogi diegi. 18 Nyo nikwayuwu i luba ma beco magwei e de fodi uromowu ngo? Nyo wucikuru ninyono bende dong luba mwune ku tiendwu? I ng’ey ma wumadhu pii ma wang’e tetete e, nyo wucikuru nirubo wang’e ma wubenyone ku tiendwu? 19 Nyo mito jukway rombe para i luba ma wunyono ku tiendwu man gimadh pii ma wang’e rubere ma wunyono ku tiendwu?”

20 “‘Pieno, Rwoth Ubimo ma Malu Ngbir Yehova uwacu igi kumae: “Anuti eni, man an gira abipoko lembe i kind rombe ma ful ful ku rombe m’umok, 21 pilembe wumeduru nicwalu ju ceke m’uberemo ku dirwu, ku gokwu, man wugudogi ku tungwu nitundo ma wulalu kogi bor. 22 Abibodho rombe para, e gibidoko ngo kendo ni piny mir acama; man abipoko lembe i kind rombe ku rombe. 23 Abiketho jakwac i wigi, jatic para ma Daudi man ebikwayugi. En re m’ebikwayugi man ebidoko jakwac migi. 24 Man an a Yehova, abidoko Mungu migi man jatic para ma Daudi bidoko jadit ma wijo i kindgi. An a Yehova, adaru weco.

25 “‘“Man abitimo lembariba mi kwiyocwiny kugi, e abikabu yedi ma kwiny kara gikwo museme i langa man givuti i luli. 26 Abiketho gin ku ng’et ungulu gudi para ginwang’ mugisa, man abiketho koth bicwii i saane. Mugisa bicorere calu koth. 27 Yen mi lum bicego nyinge, man ng’om bicego cam i iye, man gibikwo museme iwi ng’om. E gibing’eyo nia an a Yehova kinde m’abituro yen mi mberembere migi man abibodhogi kud i cing’ ju m’udwokogi ni ng’eca. 28 Gibidoko ngo kendo ni piny mir acama ni thek, yedi mi lum de bicamugi ngo man gibikwo museme ma ng’atu moko mbe m’ubenyayu lworo i igi.

29 “‘“Abiketho cam bitwii igi ma pire biyik ayika man gibitho ngo kendo ku ndru i ng’ombe, e thek binyayu ngo kendo lewic i wigi. 30 ‘E gibing’eyo nia an a Yehova Mungu migi ani kugi man nia gin, niwacu ot mir Israel, gitie dhanu para,’ Rwoth Ubimo ma Malu Ngbir Yehova wacu.”’

31 “‘Ento wun ma wu rombe para, rombe m’adieng’ pigi, wutie kende kende dhanu, an ke a Mungu mwu,’ Rwoth Ubimo ma Malu Ngbir Yehova wacu.”

35 Lembe pa Yehova ubino kendo i bang’a, uyero kumae: 2 “Wod dhanu, lok weng’i yor i bang’ ng’om gudi mi Seir man ew lembe i kume. 3 Yer ire kumae: ‘Rwoth Ubimo ma Malu Ngbir Yehova uwacu kumae: “Nen, an’i kumi, Ee ng’om gudi mi Seir, man abirieyo cinga i kumi, e abiketho ibidong’ ni ng’om ngele m’udong’ kende. 4 Abidwoko adhura mwu ni uvuru man ebidoko ni ng’om ngele m’udong’ kende; e ibing’eyo nia an a Yehova. 5 Kum ibedo kud adegi ma lee dit, man imiyo Israel ni palamularu i saa mi can, niwacu i saa mi matira migi ma tokcen.”’

6 “‘Pieno calu andha abedo kwo,’ Rwoth Ubimo ma Malu Ngbir Yehova wacu, ‘ayiko iri cwiro rimo man cwiro rimo bilubo toki. Calu ma rimo re m’idagu, cwiro rimo ma bilubo toki. 7 Abidwoko ng’om gudi mi Seir ni ng’om ngele m’udong’ kende, man abikabu ng’atu moko ci m’ukadhu kud i iye man m’udwogo i iye. 8 Abipong’o gudine ku ju ma junego; man ju ma junego ku palamularu bipodho iwi ungulu gudi* peri, i poga peri man i kulo peri ceke. 9 Abidwoki ni uvuru ma nja ku nja man jubibedo ngo i adhura peri; e wubing’eyo nia an a Yehova.’

10 “Pilembe iyero kumae: ‘Thek ario maeni man ng’om ario maeni bibedo para, man wabimakugi kpo,’ kadok nwang’u Yehova ubino keca en ku kume de. 11 ‘Pieno calu andha abedo kwo,’ Rwoth Ubimo ma Malu Ngbir Yehova wacu, ‘abitimo iri lembe nimakere ku ng’eicwiny man kumira ma rom m’ibedo ko i kumgi; man abiketho jubing’eya i kindgi kinde m’abipoko lembe i wii. 12 E ibing’eyo nia an a Yehova awinjo wec ceke mir anyware m’iyero i kum gudi mir Israel kinde m’iwacu kumae: “Junyothe man jumiye iwa kara wamvore.”* 13 Wuweco ku kuhaya i kuma man wuweco lee i kuma. Awinjo lembene zoo.’

14 “Rwoth Ubimo ma Malu Ngbir Yehova uwacu kumae: ‘Anyong’a binego ng’om zoo kinde m’abidwoki ni ng’om ngele m’udong’ kende. 15 Tap calu m’anyong’a unegi kinde ma junyotho giralaga mi ot mir Israel, in de abitimi kumeno. Ibidoko ni uvuru, Ee ng’om gudi mi Seir, eyo, Edom zoo; e gibing’eyo nia an a Yehova.”’

36 “Ento in, wod dhanu, ew lembe i kum gudi mir Israel man yer kumae: ‘Ee gudi mir Israel, wuwinj lembe pa Yehova. 2 Rwoth Ubimo ma Malu Ngbir Yehova uwacu kumae: “Jadegi uyero piwu kumae: ‘Aha! Kadok kabedo ma malu ma yang’ con de udoko mwa!’”’

3 “Pieno ew lembe man yer kumae: ‘Rwoth Ubimo ma Malu Ngbir Yehova uwacu kumae: “Calu ma ginyothowu man gicoriri i wiwu niai ku kaka ceke, uketho wudoko ni aba mi ju m’uboth* niai kud i kind thek man dhanu bemediri niweco piwu man niyero nyingwu, 4 pieno, Ee gudi mir Israel, wuwinj lembe ma Rwoth Ubimo ma Malu Ngbir Yehova uwacu! Maeni tie lembe ma Rwoth Ubimo ma Malu Ngbir Yehova uwacu ni gudi man ni ungulu gudi,* ni kulo man ni poga, ni uvuru m’udong’ kende man ni adhura ma juweko, ma ju m’uboth mi thek m’udhokogi uyaku man unyayu acidi i wigi; 5 Rwoth Ubimo ma Malu Ngbir Yehova uwacu igi kumae: ‘Abiweco nikum amora para m’ubeliel calu mac i kum ju m’uboth mi thek man i kum Edom ceke, ju m’ugoyo korgi kud anyong’a ma dit man cac ma lee nia ng’om para tie migi pi nimaku lubane man pi niyake.’”’

6 “Pieno ew lembe i kum ng’om mir Israel man yer ni gudi man ni ungulu gudi, ni kulo man ni poga nia ‘Rwoth Ubimo ma Malu Ngbir Yehova uwacu kumae: “Nen! abiweco nikum amora para man nikum ng’eicwiny para, pilembe thek unyayu acidi i wiwu.”’

7 “Rwoth Ubimo ma Malu Ngbir Yehova uwacu kumae: ‘Abeting’o cinga an gira ku kwong’ nia thek m’udhokowu biyeyo lewic migi gigi. 8 Ento wun, Ee gudi mir Israel, wubiwodho jengwu man wubicego nyingwu ni dhanu para Israel, kum ceng’ini eni gibidwogo. 9 Kum ani kudwu man abilokara i beng’wu, e wubifuro fur man wubicoyo kodhi. 10 Abinyayu dhanu peri, niwacu ot mir Israel zoo, gin kpo; man jubibedo i adhura, e jubidogiero uvuru kendo. 11 Eyo, abinyayu dhanu peri man udul lim peri; gibinyol man gibinyay lee. Man abiketho jubibedo i ii calu ma yang’ con man abiketho wubibedo ma ber nisagu ma naka, e wubing’eyo nia an a Yehova. 12 Abiketho dhanu, niwacu dhanu para Israel uwoth i wiwu man gibimakuwu ni aba. Wubidoko ni giralaga migi man wubikabu ngo kendo nyanok de awiya migi.’”

13 “Rwoth Ubimo ma Malu Ngbir Yehova uwacu kumae: ‘Calu ma giyero iri nia, “Itie ng’om ma mvoro dhanu man ma kabu awiya mi thek peri cen,”’ 14 ‘pieno ibimvoro ngo dhanu kendo kadi ibikabu ngo awiya mi thek peri,’ Rwoth Ubimo ma Malu Ngbir Yehova wacu. 15 ‘Abiweko ngo thek uyenyi kendo nyanok de kadi abiweko ngo dhanu uceyi, man ibiketho ngo kendo thek peri ukier,’ Rwoth Ubimo ma Malu Ngbir Yehova wacu.”

16 Lembe pa Yehova ubino kendo i bang’a, uyero kumae: 17 “Wod dhanu, kinde ma dhanu mir Israel gibino kwo i ng’om migi, gicide ku kura man timo migi. Timo migine ubino ira calu cilo pa dhaku m’ubeneno nindo pare. 18 Pieno akonjo ng’eicwiny para i wigi pi rimo ma gicwiro iwi ng’ombe man pilembe gicido ng’ombe kud ayi gin m’acwiya migi ma judagu. 19 E alalu igi i kind thek man alalu igi mba mba i ng’om ma tung’ tung’. Apoko lembe i wigi nimakere ku timo migi man kura migi. 20 Ento saa ma gitundo i bang’ thek maeno, dhanu ucido nyinga ma leng’ ma giyero ko nia, ‘Eni tie dhanu pa Yehova, re ugam ukwayu giai kud i ng’om pare.’ 21 Pieno, abinyutho nia adieng’ pi nyinga ma leng’ ma ot mir Israel gicido i kind thek ma gicidho i iye.”

22 “Dong’ yer ni ot mir Israel nia, ‘Rwoth Ubimo ma Malu Ngbir Yehova uwacu kumae: “Abetimo lembuno piwu ngo, Ee ot mir Israel, ento pi nyinga ma leng’ ma wucido i kind thek ma wucidho i iye.”’ 23 ‘Abidwoko nyinga ma dit leng’ andha, nyinga m’ucidere i kind thek, ma wucido i kindgi; e thek bing’eyo nia an a Yehova,’ Rwoth Ubimo ma Malu Ngbir Yehova wacu, ‘saa m’abidwokara leng’ i kindwu i wang’gi. 24 Abiting’owu kud i kind thek man abicokowu kud i ng’om ceke man abidwokowu i ng’om mwu. 25 Abikiro pii ma leng’ i kumwu, e wubidoko leng’; abilwoko cilo mwu ceke kud i kumwu man ayi gin m’acwiya mwu ceke ma judagu. 26 Abimiyo iwu adunde ma nyen man abiketho tipo ma nyen i iwu. Abikabu adunde mi kidi kud i kumwu man abimiyo iwu adunde mi ring’kum.* 27 Abiketho tipo para i iwu, e abiketho wubiworo cik para, wubiworo man wibitiyo ku telowic para mi pokolembe. 28 E wubibedo i ng’om m’amiyo ni kwaruwu, wubidoko dhanu para man abibedo Mungu mwu.’

29 “‘Abibodhowu kud i cilo mwu ceke, abilwong’o nying cam man abiketho ebipong’ bik, e abikelo ngo ndru i wiwu. 30 Abiketho nying yen man piny m’ucek i podho bipong’ bik, kara lewic mi ndru kud unegwu kendo nyanok de i kind thek. 31 I ng’eye wubipoy i kum kura mwu ma reco man timo mwu m’ubino rac, e wubideguru ku rac pi kier mwu man pi timo mwu ma judagu. 32 Ento wuwinj lembe ma e: Abetimo ngo lembuni piwu,’ Rwoth Ubimo ma Malu Ngbir Yehova wacu. ‘Ento lewic umakwu man wunwang’ acidi pi timo mwu, Ee ot mir Israel.’

33 “Rwoth Ubimo ma Malu Ngbir Yehova uwacu kumae: ‘I nindo m’abilwoko kier mwu ceke kud i kumwu, abiketho jubibedo i adhura man jubidogiero uvuru kendo. 34 Jubidofuro ng’om m’unyothere man m’udong’ kende ma dhanu ubed uneno kinde ma gibekadhu. 35 Man dhanu biyero kumae: “Ng’om ma nwang’u udong’ kende udoko calu podho mir Eden, man adhura ma nwang’u udong’ kendgi ni uvuru man ma jurwombo kawoni udoko tek man jubedo i igi.” 36 E thek m’udong’ i ng’etwu tingili bing’eyo nia an a Yehova re m’agiero gin ma nwang’u jurwombo man apidho gin ma nwang’u udong’ kende. An a Yehova adaru weco man atimo lembene.’

37 “Rwoth Ubimo ma Malu Ngbir Yehova uwacu kumae: ‘Abiweko bende ot mir Israel gikwaya atim igi lembe ma e: Abinyayu wend dhanu migi calu dwol. 38 Adhura ma nwang’u udong’ ni uvuru bipong’ bik kud udul dhanu calu dwol mi jumaleng’, calu dwol mi Yeruzalem* i saa mi foc pare, e gibing’eyo nia an a Yehova.’”

37 Cing’ Yehova ubino i wiya man Yehova uting’a ku tipo pare, etera i diere mi pambu mi poga, man cogo ubino bik i pogane. 2 Eketho adhoko ng’etgi tingili man aneno cogo lee dit m’umoyere i pambu mi pogane man githwo kaw. 3 Epenja kumae: “Wod dhanu, nyo cogo maeni copo do kwo kendo de?” E adwoko kumae: “Rwoth Ubimo ma Malu Ngbir Yehova, in re m’ing’eyo.” 4 Pieno eyero ira kumae: “Ew lembe pi cogo maeno man yer igi kumae: ‘Wu cogo m’utal kaw, wuwinj lembe pa Yehova:

5 “‘Rwoth Ubimo ma Malu Ngbir Yehova uyero ni cogo maeni kumae: “Abiketho yuyo bimondo i iwu man wubikwo kendo. 6 Abiketho ler ku ring’kum i kumwu man abiumo kumwu ku dendkum, abiketho yuyo i iwu man wubidoko kwo, e wubing’eyo nia an a Yehova.”’”

7 E aewo calu ma jung’olo ira. Saa m’aewo tap ci, woy ku dwal uwinjere man cogo ucaku coko dhoggi karacelo, cogoman ku wadi. 8 I ng’eye aneno ler man ring’kum ucoro i kumgi man dendkum uumogi, re asu yuyo bino mbe i igi.

9 I ng’eye eyero ira kumae: “Ew lembe ni yamu. Ew lembe wod dhanu, man yer ni yamu nia, ‘Rwoth Ubimo ma Malu Ngbir Yehova uwacu kumae: “Ee yamu,* wubin i igi niai kud i thenge ang’wen man wukot iwi dhanu maeni ma junego kara gidok kwo.”’”

10 Pieno aewo tap calu m’eng’olo ira man yuyo* ubino i igi, e gicaku kwo man gicaku ai iwi tiendgi; gibino udul ma lee dit.

11 I ng’eye eyero ira kumae: “Wod dhanu, cogo maeni gitie ot mir Israel zoo. Giyero kumae: ‘Cogowa thwo kaw man genogen mwa rwinyo. Jukabuwa pet.’ 12 Pieno ew lembe man yer igi kumae: ‘Rwoth Ubimo ma Malu Ngbir Yehova uwacu kumae: “Abiyabu liel mwu man abiting’owu kud i liel mwu, dhanu para, man abidwokowu i ng’om mir Israel. 13 E wubing’eyo nia an a Yehova saa m’abiyabu dhu liel mwu man abiwodhowu kud i liel mwu, Ee dhanu para.”’ 14 ‘Abiketho tipo para i iwu, e wubidoko kwo, man abikethowu i ng’om mwu; e wubing’eyo nia an a Yehova adaru weco man atimo lembene,’ Yehova wacu.”

15 Lembe pa Yehova ubino kendo i bang’a, uyero kumae: 16 “Man in, wod dhanu, ting’ dund yen man kiew i kume kumae: ‘Pi Yuda man pi dhanu mir Israel ma ni kude.’ I ng’eye ting’ dund yen mange man kiew i kume kumae: ‘Pi Yozefu, dund yen pa Efraim man ot mir Israel zoo ma ni kude.’ 17 Cor kindgi dri kara gidok dund yen acel kende i cingi. 18 Kinde ma juthu* biyero iri nia, ‘Nyo ibikoro ngo iwa nia thelembe mi gino tie ang’o?’ 19 dwok igi kumae: ‘Rwoth Ubimo ma Malu Ngbir Yehova uwacu kumae: “Abiting’o dund yen pa Yozefu ma n’i cing Efraim man suru mir Israel ma ni kude, man abidikogi ku dund yen pa Yuda; e abidwokogi ni dund yen acel man gibidoko acel i cinga.”’ 20 Dund yen m’ikiewo piny i wigi ucikere nibedo i cingi kara dhanune ginen.

21 “I ng’eye yer igi kumae: ‘Rwoth Ubimo ma Malu Ngbir Yehova uwacu kumae: “Abigamu Juisrael kud i kind thek ma gicidho i kindgi, abicokogi karacelo ku kakare ceke man abidwokogi i ng’om migi. 22 Abiketho gibidoko ni thek acel i ng’ombe, iwi gudi mir Israel, man ubimo acel re ma bibimo wigi ceke, e gibibedo ngo kendo ni thek ario kadi gibipokiri ngo kendo ni ker ario. 23 Gibicidiri ngo kendo kud ayi gin m’acwiya migi ma judagu,* ku timo migi ma judagu man kier migi ceke. Abibodhogi kud i timo migi ceke mi kosobedoleng’ ma gidubo ko ira man abidwokogi leng’. Gibibedo dhanu para man an ku kuma abibedo Mungu migi.

24 “‘“Jatic para ma Daudi bibedo ubimo migi man gin ceke gibibedo ku jakwac acel. Gibilubo telowic para mi pokolembe man gibiworo cik para cuu mandha. 25 Gibikwo i ng’om m’amiyo ni jatic para ma Yakobo, kaka ma kwaruwu gikwo i iye man gibibedo i iye rondo ku rondo, gin kud awiya migi* man nyikwaygi; man jatic para ma Daudi bibedo jadit ma wijo migi nja ku nja.

26 “‘“Abitimo lembariba mi kwiyocwiny kugi; ebibedo lembariba ma rondo ku rondo. Abiketho gibicungo ma tek man gibinyay lee man abiketho hekalu para i kindgi pi rondo ku rondo. 27 Hema* para bibedo karacelo kugi,* abibedo Mungu migi man gibibedo dhanu para. 28 E thek bing’eyo nia an a Yehova abedwoko Israel leng’ kinde ma hema para n’i kindgi rondo ku rondo.”’”

38 Lembe pa Yehova ubino kendo i bang’a, uyero kumae: 2 “Wod dhanu, lok weng’i i kum Gog mi ng’om mi Magog, ma jadit ma wijo ma dit* mi Mecek man mi Thubal man ew lembe i kume. 3 Yer kumae: ‘Rwoth Ubimo ma Malu Ngbir Yehova uwacu kumae: “Nen, an’i kumi, Ee Gog, in m’i jadit ma wijo ma dit mi Mecek man mi Thubal. 4 Abiketho ibiloko man abiketho gol i dingi, man abiwodhi kud udul mony peri ceke, ku riuni,* ku juring riuni ma gin ceke gironyiri ku kendi ma leng’, udul ma lee mandha m’umaku ban ma dongo ku nyithi ban* ma gin ceke ging’eyo tiyo ku palamularu; 5 Persi, Ethiopia man Put ni kugi, gin ceke gitie ku nyithi ban man sabu; 6 Gomer kud udul mony pare ceke, ot pa Thogarma niai kud i theng ng’om ma bor mandha ma yo malu, kud udul mony pare ceke, dhanu ma wendgi lee ni kudi.

7 “‘“Bed ayika man yikiri, in kud udul mony peri ma ni karacelo kudi, man ibibedo jatelwic* migi.

8 “‘“Jubidieng’ kudi* i ng’ey nindo dupa. I dong kajik rundi, ibicoro iwi ng’om mi dhanu ma judwogo, m’uboth kud i lak palamularu. Jucokogi karacelo niai kud i kind thek dupa iwi gudi mir Israel ma yang’ con jugam junyotho. Dhanu ma bedo i ng’ombe judwogogi niai kud i kind thek man gin ceke gikwo museme. 9 Ibicoro i wigi calu yamu ma tek man ibiumo ng’ombe calu afuru, in kud udul mony peri ceke man dhanu dupa ma ni kudi.”’

10 “Rwoth Ubimo ma Malu Ngbir Yehova uwacu kumae: ‘I nindo maeca paru bimondo i cwinyi man ibipangu lembe ma rac. 11 Ibiyero kumae: “Abicoro iwi ng’om ma pacu m’i iye tie ngo agwoka.* Abibino i kum ju ma bedo museme, ma ng’atu moko mbe m’usendo wigi, ma gin ceke gikwo i pacu ma jugwoko ngo ku gang’kidi, ku riu kadi ku dhugang’.” 12 Ebibedo pi nicoko man niyaku piny dupa, pi nicoro iwi kabedo ma nwang’u jular junyotho ma re kawoni dong’ jubedo i igi man pi nicoro iwi dhanu ma judwogo niai kud i kind thek, ma gibecoko lonyo man piny, gi ju ma gibekwo i diere mi ng’om.

13 “‘Ceba man Dedan ku jukuloka mi Tharsis man jurumony* pare ceke gibiyero iri kumae: “Nyo ibemondo pi nicoko piny dupa man niyaku lonyo? Nyo ibecoko udul mony peri pi niyeyo mola ma tar ku mola ma kwar, pi nicoko lonyo man jukupiny, pi nimayu piny lee mandha?”’

14 “Pieno ew lembe, wod dhanu, man yer ni Gog kumae: ‘Rwoth Ubimo ma Malu Ngbir Yehova uwacu kumae: “I nindo ma dhanu para Israel bibedo i iye museme, nyo ibing’eyo ngo? 15 Ibibino niai kud i kabedo peri, niai kud i theng ng’om ma bor mandha ma yo malu, in ku dhanu ma wendgi lee ma ni kudi, ma gin zoo giberingo ku riuni, udul ma lee, udul mony ma lee mandha. 16 Ibibino i kum Israel ma dhanu para calu afuru ma umo ng’om. I dong nindo mir ajiki, abikeli i kum ng’om para, kara thek ging’eya kinde m’abidwokara leng’ nikadhu kud i beng’i i wang’gi, Ee Gog.”’

17 “Rwoth Ubimo ma Malu Ngbir Yehova uwacu kumae: ‘Nyo itie ngo ng’atu ma rom m’aweco pire i rundi ma yang’ con nikadhu kud i bang’ jutic para ma jubila mir Israel, ma giewo lembila pi oro ma dupa nia jubikeli i kumgi?’

18 “‘I nindo maeca, niwacu i nindo ma Gog bicorere iwi ng’om mir Israel, kwinyo para ma lake tek biopo,’ Rwoth Ubimo ma Malu Ngbir Yehova wacu. 19 Abiweco nikum amora para, nikum mac mi kwinyo para; man i nindo maeca digidi ma dit biyengo ng’om mir Israel. 20 Nikuma, rec mi nam, winyo mi kor polo, yedi mi lum, giracwiya ceke ma mol ku korgi iwi ng’om man dhanu ceke m’i wi ng’om kumgi bimiel. Gudi birwombiri, kaka ma lung’ bitur, man gang’kidi ceke birungiri i ng’om.’

21 “‘Abilwong’o palamularu i kume iwi gudi para ceke,’ Rwoth Ubimo ma Malu Ngbir Yehova wacu. ‘Palamularu pa ng’atuman bibedo i kum umin ma buu. 22 Abikelo pokolembe para i wiye* ku thong’om man ku cwiro rimo, abicoro koth ma lee mandha i wiye man lungu pei, man mac ku muganga i wiye, iwi udul mony pare man iwi dhanu ma lee ma ni kude. 23 Abiyungara andha man abiketho pira bing’eyere i wang’ thek dupa; e gibing’eyo nia an a Yehova.’

39 “Man in, wod dhanu, ew lembe i kum Gog, man yer ire kumae: ‘Rwoth Ubimo ma Malu Ngbir Yehova uwacu kumae: “An’i kumi, Gog, in m’i jadit ma wijo ma dit* mi Mecek man mi Thubal. 2 Abiketho ibiloko man abitelo wii, abiketho ibiai kud i theng ng’om ma bor ma yo malu man abikeli iwi gudi mir Israel. 3 Abigoyo atumb athero peri bipodho kud i cingi ma yor acam man abiketho nying athero peri bipodho kud i cingi ma yor acwic. 4 Ibipodho iwi gudi mir Israel, in kud udul mony peri ceke man dhanu ma ni karacelo kudi. Abimiyi ni cam ni kwond acuth ceke man ni yedi mi lum.”’

5 “‘Ibipodho i die lum, kum an ku kuma adaru weco,’ Rwoth Ubimo ma Malu Ngbir Yehova wacu.

6 “‘Abioro mac i kum Magog man i kum dhanu ma bedo museme i cula, e gibing’eyo nia an a Yehova. 7 Abiketho nyinga ma leng’ bing’eyere i kind dhanu para ma Israel man abiweko ngo nyinga ma leng’ ucidere kendo nyanok de; e thek bing’eyo nia an a Yehova, ma Ng’atu ma Leng’ i Israel.’

8 “‘Eyo, lembuni bebino man ebitimere,’ Rwoth Ubimo ma Malu Ngbir Yehova wacu. ‘Eni tie nindo m’agam aweco pire. 9 Dhanu ma bedo i adhura mir Israel gibiwok woko man gibikudho mac ku jambali, niwacu nyithi ban* man ban ma dongo, atumb athero man nying athero, undoy* man tong’. Man gibitiyo kugi pi nikudho mac pi oro abiro. 10 Gibibedo mbe ku yeny mi gamu yen niai kud i lum kadi mi coko yen mi luli, pilembe gibitiyo ku jambali pi nikudho mac.’

“‘Gibimayu piny mi dhanu m’ubed umayugi man gibiyaku dhanu m’ubed uyakugi,’ Rwoth Ubimo ma Malu Ngbir Yehova wacu.

11 “‘I nindo maeca, abimiyo kakuny ni Gog i Israel keca, i poga mi ju ma wotho yo nyangu mi nam man pogane bicero gengi mi ju ma kadhu kud i iye. Jubikunyo Gog kud udul dhanu pare ceke keca man jubilwong’e nia Poga mi Hamon-Gog.* 12 Ot mir Israel biting’o dwi abiro pi nikunyogi kara gidwok ng’ombe leng’. 13 Dhanu ceke mi ng’ombe bitimo tic mi kunyogi man eno biketho nying’gi biyik nindo m’abiyungara i iye,’ Rwoth Ubimo ma Malu Ngbir Yehova wacu.

14 “‘Jubiketho dhanu biwotho i die ng’ombe thiri thiri man gibikunyo avu m’udong’ i wang’ ng’ombe kara gidwoke leng’. Gibimediri nitimo sayusac pi dwi abiro. 15 Saa ma ju m’ubewotho i die ng’ombe gineno cogo dhanu, gibiketho ayi i ng’ete. E ju m’ubekunyo kuny biwok kunye i Poga mi Hamon-Gog. 16 Man bende adhura moko bibedo nuti keca ma jubilwong’o nyinge Hamona.* Man gibidwoko ng’ombe leng’.’

17 “Ento in, wod dhanu, Rwoth Ubimo ma Malu Ngbir Yehova uwacu kumae: ‘Yer ni kwond winyo ceke man ni yedi mi lum ceke kumae: “Wucokuru karacelo man wubin. Wucokuru tingili i kum lam para m’abeyiko piwu, ma en e lam m’ayiko piwu, lam ma dit iwi gudi mir Israel. Wubicamu ring’o man wubimadhu rimo. 18 Wubicamu ring’ jurukara man wubimadhu rimb judongo ma wijo mi ng’om, niwacu thwoni rombe, nyithi rombe, diegi man thwoni dhieng’ ma gin ceke gi ley ma ful ful mi Bacan. 19 Wubifocemuru ku miyo man wubimadhu rimo nitundo ma wubimer ku lam m’ayiko piwu.”’

20 “‘I dhu meza para, wubiyeng’ ku riuni* man ku juring riuni, ku jurukara man ku kwond jurumony ceke,’ Rwoth Ubimo ma Malu Ngbir Yehova wacu.

21 “‘Abinyutho dwong’ para i kind thek man thek ceke bineno pokolembe m’akelo man tego* m’anyutho i kindgi. 22 Niai cing’ nica, ot mir Israel bing’eyo nia an a Yehova Mungu migi. 23 E thek bing’eyo nia ot mir Israel ucidho i ng’eca nikum kier migi gigi, pilembe gigwoko ngo bedoleng’ migi ira. Pieno akanu wang’a igi man amiyogi i cing’ judegi migi, e gin ceke gipodho i lak palamularu. 24 Atimo igi lembe calku cilo migi man kier migi, e akanu wang’a igi.’

25 “Pieno Rwoth Ubimo ma Malu Ngbir Yehova uwacu kumae: ‘Abilwong’o ng’eca pa Yakobo man kisa binega i kum ot mir Israel zoo; abicero ba nyinga ma leng’ kud amora. 26 I ng’ey ma jubicidogi pilembe gikoso bedoleng’ migi ceke ira, gibibedo museme i ng’om migi ma ng’atu moko mbe m’ubenyayu lworo i igi. 27 Saa m’abidwogogi kud i kind dhanu man abicokogi karacelo kud i ng’om mi judegi migi, abidwokara bende leng’ i kindgi i wang’ thek dupa.’

28 “‘Gibing’eyo nia an a Yehova Mungu migi saa m’abiterogi i ng’eca i kind thek man i ng’ey m’abidwogogi i ng’om migi ma ng’atu moko acel de mbe m’abiweko bidong’ i ng’eygi. 29 Abikanu ngo wang’a kendo igi, kum abikonjo tipo para iwi ot mir Israel,’ Rwoth Ubimo ma Malu Ngbir Yehova wacu.”

40 I oro mi pier ario wi abije mi ng’eca mwa, i caku pa oro, i nindo apar mi dwije, niwacu oro apar ang’wen i ng’ey m’adhura podho, tap i ceng’ maeca, cing’ Yehova ubino i wiya man etera i adhura. 2 Mungu utera i ng’om mir Israel nikadhu kud i gin ma wok i wang’ m’uai i bang’e man eketha iwi got moko ma wiw mandha, ma giedo moko ma calu adhura ubino i wiye yo piny.

3 Kinde m’etera kuca, awok aneno jalwo moko m’ayine ubino calu mola. Ebino ku thondh lin man agada mi pimo piny* i cinge man ecungo i dhu kamondo. 4 Jalwone uyero ira kumae: “Wod dhanu, nen piny cuu mandha, winj lembe kilili man keth weng’i* i kum piny ceke m’abenyutho iri, kum eno re m’utie thelembe m’uketho jukeli keni. Lembe ceke m’ineno, dog ikor ni ot mir Israel.”

5 Aneno gang’kidi utieko hekalu* yo woko tingili. Agada mi pimo piny ma borne bot abusiel ubino i cing’ jalwone (i kum botman juwotho medo wang’ cing’ acel).* E ecaku pimo gang’kidine, dhoge bino thuthuru agada acel man dongone de agada acel.

6 I ng’eye ebino i dhugang’ m’uneno yo nyangu man eidho mangasine. Saa m’epimo wang’ kamondo mi dhugang’ne, lac wang’e ubino agada acel man lac wang’ kamondone ma kucelo de ubino agada acel. 7 Kubang’ kusika mi kur borne ubino agada acel, lac wang’e de agada acel. Kind kusika mi kurne ubino bot abic. Wang’ kamondo ma n’i ng’et pond ot mi dhugang’ m’uloko yor i iye ubino kadhiri mir agada acel.

8 Epimo pond ot mi dhugang’ m’ubeneno yor i iye man ebino agada acel. 9 I ng’eye, epimo pond ot mi dhugang’ m’ubino bot abora; edog epimo mbegi m’i ng’ete m’ubino bot ario. Pond ot mi dhugang’ ubino i ng’ete m’uloko yor i iye.

10 Kusika mi kur ubino adek adek i ng’eteman mi dhugang’ ma yo nyangu. Gin adek zoo gibino rom rom man mbegi m’i ng’ete kun ku kun de gibino rom rom.

11 I ng’eye epimo lac wang’ kamondo mi dhugang’, ebino bot apar; man bor mi dhugang’ne ubino bot apar adek.

12 Kaka ma jupoko ma n’i wang’ kusika mi kur, i ng’ete kun ku kun ubino bot acel. Ot ceke mi kur m’ubino i ng’ete kun ku kun ubino bot abusiel abusiel.

13 I ng’eye epimo dhugang’ niai iwi kusika acel mi kur nitundo iwi kusikane ma kucelo, man lac wang’e ubino bot pier ario wi abic; dhugang’ acel ubino atira ku dhugang’ ma kucelo. 14 I ng’eye epimo mbegi m’i ng’ete, ma dongo migi ubino bot pier abusiel man mbegi m’i ng’ete m’ubino i dhugang’ m’utieko lela tingili de ubino rom. 15 Niai i kamondo mi dhugang’ i thenge ma yor i wang’e, nitundo i pond ot mi dhugang’ i thenge ma yor i iye, ubino bot pier abic.

16 Juketho madhirisa ma liki liki ubedo nuti pi kusika mi kur man pi mbegi migi ma n’i dhugang’ i ng’ete kun ku kun. Madhirisa ubedo nuti bende i kum pond ot yor i iye i ng’ete kun ku kun man jung’iko ayi yen ngasi i kum mbegi m’i ng’ete ng’ete.

17 I ng’eye etera i lela ma yo woko, man awok aneno kusika ma jucamu i igi* man jutelo lelane tingili. Kaka ma jutelone ubino ku kusika ma jucamu i igi pier adek. 18 Kaka ma jutelo ma n’i ng’et dhugang’ ubino rom ku bor mi dhugang’; eno ubino kaka ma jutelo ma piny.

19 I ng’eye epimo bor* ma niai i wang’ lela ma yo piny nitundo i kieu mi lela ma yor i iye. Ebino bot dak acel yo nyangu man yo malu.

20 Lela ma yo woko ubino ku dhugang’ ma wang’e ubeneno yo malu, e epimo borne man lac wang’e. 21 Kusika mi kur ubino adek i ng’ete kun ku kun. Mbegi m’i ng’ete man pond ode ubino zoo kadhiri ma rom calu mi dhugang’ ma kwong’a. Borne ubino bot pier abic man lac wang’e bot pier ario wi abic. 22 Madhirisane, pond ode man ayi yen ngasi ma jung’ikone gibino kadhiri ma rom calu mi dhugang’ ma yo nyangu. Dhanu ubed uidho mangasi abiro pi nitundo i bang’e man pond ode ubino yor i wang’ mangasine.

23 Dhugang’ acel ubino nuti i lela ma yor i iye, yor i wang’ dhugang’ m’uloko yo malu man acel mange yor i dhugang’ m’uloko yo nyangu. Epimo bor m’i kind dhugang’ne, man borne ubino bot dak acel.

24 I ng’eye etera yo piny man aneno dhugang’ m’i thenge ma yo piny. Epimo mbegi m’i ng’ete ng’ete man pond ode, man gibino rom rom ku mange. 25 Madhirisa ubino i ng’ete kun ku kun man i ng’et pond ode bende kun ku kun calu madhirisa mange. Borne ubino bot pier abic man lac wang’e bot pier ario wi abic. 26 Mangasi ubedo abiro ma juidho ko i bang’e man pond ot ubino i wang’gi. Man jung’iko ayi yen ngasi i ng’et mbegine, i ng’ete kun ku kun.

27 Lela ma yor i iye ubino ku dhugang’ ma wang’e ubeneno yo piny; epimo niai i dhugang’ acel nitundo i dhugang’ ma kucelo ku yo piny, borne ubino bot dak acel. 28 I ng’eye eketho amondo i lela ma yor i iye kud i dhugang’ ma yo piny; kinde m’epimo dhugang’ ma yo piny, ebino rom ku mange. 29 Kusika mi kurne, mbegi m’i ng’ete ng’ete man pond ode ubino rom ku mange. Madhirisa ubino i ng’ete kun ku kun man i ng’et pond ode bende kun ku kun. Borne ubino bot pier abic man lac wang’e bot pier ario wi abic. 30 Pond ot udhoke tingili; bor pare ubino bot pier ario wi abic man lac wang’e bot abic. 31 Pond ode wang’e loko yor i lela ma yo woko, jung’iko ayi yen ngasi i kum mbegi m’i ng’ete ng’ete, man ebino ku mangasi abora ma juidho ko i bang’e.

32 Saa m’eketho amondo i lela ma yor i iye ku yo nyangu, epimo dhugang’ne man ebino rom ku mange. 33 Kusika mi kurne, mbegi m’i ng’ete ng’ete man pond ode ubino rom ku mange. Madhirisa ubino i ng’ete kun ku kun man i ng’et pond ode bende kun ku kun. Borne ubino bot pier abic man lac wang’e bot pier ario wi abic. 34 Pond ode wang’e loko yor i lela ma yo woko, jung’iko ayi yen ngasi i kum mbegi m’i ng’ete ng’ete ario zoo man ebino ku mangasi abora ma juidho ko i bang’e.

35 I ng’eye eroya i dhugang’ ma yo malu man epime; ebino rom ku mange. 36 Kusika mi kurne, mbegi m’i ng’ete ng’ete man pond ode ubino rom ku mange. Madhirisa ubino i ng’ete kun ku kun. Borne ubino bot pier abic man lac wang’e bot pier ario wi abic. 37 Mbegi m’i ng’ete ng’ete wang’gi uloko yor i lela ma yo woko, jung’iko ayi yen ngasi i kum mbegi m’i ng’ete ng’ete ario zoo man ebino ku mangasi abora ma juidho ko i bang’e.

38 Kusika ma jucamu i iye ku kamondone ubino ceng’ini ku mbegi m’i ng’ete ng’ete mi dhugang’, kaka ma jubed julwoko lam m’awang’a ma boo i iye.

39 Meza ubino ario ario i ng’et pond ot mi dhugang’ kun ku kun ma jubed juthumo lam m’awang’a ma boo, lam mi dubo man girathiera mi kier i wigi. 40 Meza ario ubino nuti yo woko i dhu kamondo mi yo m’uidho i dhugang’ ma yo malu. Meza mange ario ubino nuti i thenge ma kucelo mi pond ot mi dhugang’. 41 Meza ubino ang’wen ang’wen i thengeman mi dhugang’, i zoo meza abora ma jubed juthumo lam i wigi. 42 Meza ang’wen ma pi lam m’awang’a ma boo ubino mi kidi m’apaya. Bor migi ubino bot acel ku nusu, lac wang’gi de bot acel ku nusu man dongo migi ubino bot acel. Jubed jugwoko jamtic ma jubed juthumo ko lam m’awang’a man lam i wigi. 43 Jutwiyo tatu ma lac wang’e rom ku wang’ cing’ acel i kor ot tingili yor i iye; man jubed juketho ring’o mi giramiya m’athiera iwi meza.

44 Kusika ma juruwer ubed ucamu i igi ubino yo woko mi dhugang’ ma yor i iye; gibino i lela ma yor i iye ceng’ini ku dhugang’ ma yo malu ma wang’e ubeneno yo piny. Kusika mange ma jucamu i iye ubino ceng’ini ku dhugang’ ma yo nyangu, ma wang’e ubeneno yo malu.

45 Eyero ira kumae: “Kusika maeni ma jucamu i iye m’uloko yo piny utie pi julam ma gineno wi tic mir hekalu. 46 Kusika ma jucamu i iye m’uneno yo malu utie pi julam ma gineno wi tic mi pemlam. Gitie wod Zadok m’uai kud i kind Julawi ma juketho gibed gicor i vut Yehova pi nitimo ire.”

47 I ng’eye epimo lela ma yor i iye. Bor pare ubino bot dak acel man lac wang’e de bot dak acel, ng’ete ang’wen zoo ubino rom. Pemlam ubino i wang’ hekalu.

48 I ng’eye etera i pond ot mir hekalu, man ewok epimo mbegi m’i ng’et pond ot, ebino bot abic i thenge acel man bot abic i thenge ma kucelo. Lac wang’ dhugang’ ubino bot adek i thenge acel man bot adek i thenge ma kucelo.

49 Pond ode bor pare ubino bot pier ario man lac wang’e bot apar acel.* Dhanu ubed uidho i bang’e ku mangasi. Mbegi ubino nuti i kum mbegi m’i ng’ete, acel i ng’eteman.

41 I ng’eye eroya i kamaleng’* ma yo woko man epimo mbegi; lac wang’gi ubino bot* abusiel i ng’ete acel man i thenge ma kucelo de lac wang’gi ubino bot abusiel. 2 Lac wang’ kamondo ubino bot apar man kor ot mi kamondo ubino bot abic i ng’ete acel man bot abic i ng’ete ma kucelo. Epimo borne ubino bot pier ang’wen man lac wang’e bot pier ario.

3 I ng’eye emondo i iye* man epimo mbegi mi kamondo m’i ng’ete ng’ete, dhoge ubino thuthuru bot ario man lac wang’ kamondone ubino bot abusiel. Kor ot m’i ng’ete ng’ete mi kamondo ubino bot abiro. 4 I ng’eye epimo kusika ma wang’e loko yor i bang’ kamaleng’ ma yo woko man borne ubino bot pier ario, lac wang’e de bot pier ario. Man eyero ira kumae: “Eni tie Kamaleng’ m’usagu.”

5 Edog epimo kor hekalu man dhoge bino thuthuru bot abusiel. Kusika m’i ng’ete ng’ete m’udhoko hekalu tingili lac wang’gi ubino bot ang’wen. 6 Kusika m’i ng’ete ng’ete dongone ubino ethaj* adek, ma kusikaman urodere iwi wadi; ethajman ubino ku kusika pier adek. Jugiero kor od hekalune i ayi ma kusika m’i ng’ete ng’ete ubino ku piny moko m’utiele, ento piny m’utielo kusikane umondo ngo i kor hekalu. 7 I ng’et hekalune ario zoo yo ubino nuti m’udhoko adhoka,* ma lac wang’e wotho medere ameda kinde m’ebeidho i kusika ma malu. Ka jubekadhu kud i ode mi diere pi nicidho i ode ma malu, lac wang’ ethaj* medere ameda niai kud i ode mi there nitundo i ma malu.

8 Agam aneno the ode m’uting’ere m’udhoko hekalune tingili man kathere mi kusikaman ubino kadhiri mir agada ma zoo bot abusiel nitundo i gunde. 9 Lac wang’ kor ot ma yo woko m’i ng’et kusika ubino bot abic. Kaka moko m’udong’ thwolo* ubino i ng’et ode, i ng’et kusika m’utie bende kum hekalune.

10 I kind hekalu ku kusika ma jucamu i igi, kaka moko bino tie ma lac wang’e bot pier ario i ng’ete kun ku kun. 11 Kamondo bino tie i kind kusikaman ku kaka m’udong’ thwolo mi thenge ma yo malu man kamondo mange i thenge ma yo piny. Kaka m’udong’ thwolone bor pare ubino bot abic i ng’ete tingili.

12 Ode ma yo reto ma wang’e loko kaka m’udong’ thwolo, lac wang’e ubino bot pier abiro man bor pare bot pier abung’wen; kor ode tingili dhoge bino thuthuru bot abic.

13 Epimo hekalu man borne ubino bot dak acel. Kaka ma thwolo, ode* man kor ode bende borne ubino bot dak acel. 14 Wang’ hekalu m’uloko yo nyangu man kaka m’udong’ thwolo ubino lac bot dak acel.

15 Epimo bor mi ot m’uloko yor i bang’ kaka m’udong’ thwolo ma yor i ng’eye man bende kakadhune m’i ng’ete kun ku kun man borne ubino bot dak acel.

Epimo bende kamaleng’ ma yo woko, kamaleng’ ma yor i iye man pond ot mi lela, 16 man bende wang’ dhugola, madhirisa ma liki liki man kakadhu m’ubino kakare adek maeno. Kadhruma mi yen ubino nuti ceng’ini ku wang’ dhugola niai i ng’om nitundo i the madhirisa; man madhirisane ubino auma. 17 Epimo wi kamondo, i hekalu ma yor i iye man yo woko man wi kor ode tingili. 18 Ebino ku jukerubi ma jung’iko man ayi yen ngasi; yen ngasiman ubino i kind jukerubi ario man wang’ jakerubiman ubino ario. 19 Wang’e ma pa dhanu uloko yor i bang’ yen ngasi i thenge acel man wang’e ma p’umvor* uloko yor i bang’ yen ngasi i thenge ma kucelo. Jung’ikogi kumeno i hekalu zoo. 20 Jung’iko jukerubi man ayi yen ngasi i kor kamaleng’ niai i ng’om nitundo i thiwi kamondo.

21 Ng’et dhugola* mi kamaleng’ ang’wen zoo ubino rom rom. Piny moko ubino i wang’ kabedo ma leng’* ma calu 22 pemlam mi yen, ma dongo pare ubino bot adek man bor pare bot ario. Ebino ku mbegi mi gul, man juyiko there ku ng’ete ku yen. I ng’eye eyero ira kumae: “Eni tie meza m’i wang’ Yehova.”

23 Kamaleng’ ma yo woko ku kamaleng’ zoo ubino ku dhugola ario ario. 24 Ebino ku dhugola ma yabere ario, dhugolaman yabere ario. 25 Jung’iko jukerubi man ayi yen ngasi i kum dhugola mi kamaleng’ calu ma jung’iko i kor ot. Bau mi geng’o tipo de ubino nuti i wang’ pond ot yo woko. 26 Madhirisa ma liki liki man ayi yen ngasi bende urieyo i ng’et pond ot kun ku kun man kusika i ng’et hekalu man i kum kusika m’i ng’ete ng’ete mir hekalu man bau mi geng’o tipo.

42 I ng’eye etera yo malu i lela ma yo woko. E etera i kusika ma jucamu i igi m’urieyo i ng’et kaka m’udong’ thwolo, yo malu mi ot ma juthubo i kum wagi. 2 I dhu kamondo ma yo malu, bor pare ubino bot* dak acel man lac wang’e ke bot pier abic. 3 Ebino i kind lela ma yor i iye, ma lac wang’e bot pier ario man kaka ma jutelo mi lela ma yo woko. Kakadhuman uloko yor i bang’ kakadhu ma kucelo. Man kakadhunegi uidho ethaj* adek. 4 Kakadhu ma yor i iye ma lac wang’e ubino bot apar man borne bot dak acel* ubino yor i wang’ kusika ma jucamu i igi man kamondo migi ubino yo malu. 5 Kusika ma jucamu i igi mir ethaj ma malu ubino liki liki nisagu mir ethaj ma piny ku mi diere, pilembe kakadhu migi umaku kaka ma lee. 6 Dongone ubino ethaj adek, ento ebino mbe ku mbegi ma calu mbegi mi lela. Eno re m’uketho i ethaj ma malu ubino diny nisagu ethaj ma piny ku mi diere.

7 Gang’kidi ma yo woko m’ubino ceng’ini ku kusika ma jucamu i igi ma yor i bang’ lela ma yo woko ma wang’gi uloko yor i bang’ kusika mange ma jucamu i igi, bor pare ubino bot pier abic. 8 Kum bor mi kusika ma jucamu i igi m’ubino yor i lela ma yo woko ubino bot pier abic, ento ma wang’gi uloko yor i bang’ kamaleng’ bor migi ubino bot dak acel. 9 Kusika ma jucamu i igi ubino ku kamondo yo nyangu ma terojo i igi niai kud i lela ma yo woko.

10 Kusika mange bende ma jucamu igi ubino tie i gang’kidi mi lela yo nyangu, ceng’ini ku kaka m’udong’ thwolo man ot. 11 Kakadhu ubino tie i wang’gi calu mi kusika ma jucamu i igi ma yo malu. Bor migi man lac igi ubino rom, kawok migi man ayi ma jugiero kogi de ubino rom. Kamondo migi 12 ubino calu mi kusika ma jucamu i igi m’ubino yo piny. Kamondo ubino nuti kaka ma yo ucaku i iye, i wang’ gang’kidi ma yo nyangu m’ubino ceng’ini kude, kaka ma juromo mondo kud i iye.

13 I ng’eye eyero ira kumae: “Kusika ma jucamu i igi ma yo malu man kusika ma jucamu i igi ma yo piny ma n’i ng’et kaka m’udong’ thwolo utie kusika ma leng’ ma julam ma coro i vut Yehova gicamu i igi girathiera ma leng’ m’usagu. Keca re ma giketho girathiera ma leng’ m’usagu, girathiera mi nying cam, lam mi dubo, man girathiera mi kier, pilembe kabedone tie leng’. 14 Saa ma ka julam umondo, gicikiri ngo niai kud i kabedo ma leng’ pi niwok i lela ma woko ka fodi giwodho ngo kendi ma gitimo ko tic, kum etie kendi ma leng’. Gibiloko kendi mange i wang’ niwok kaka m’uyiyere nia dhanu tundo i iye.”

15 Kinde m’edaru pimo yor i ii hekalu, ewodha woko kud i dhugang’ m’uloko yo nyangu man epimo keca zoo.

16 Epimo thenge ma yo nyangu kud agada mi pimo piny. Nimakere kud agada mi pimo pinyne, bor pare ubino agada dak abic niai i thenge acel nitundo i thenge ma kucelo.

17 Epimo thenge ma yo malu man nimakere kud agada mi pimo piny, bor pare ubino agada dak abic.

18 Epimo thenge ma yo piny man nimakere kud agada mi pimo piny, bor pare ubino agada dak abic.

19 Edhoko thenge ma yo reto. Man epime kud agada mi pimo piny, bor pare ubino agada dak abic.

20 Epimo ng’ete ang’wen zoo. Gang’ m’utieke tingili bor pare ubino agada dak abic man lac wang’e de agada dak abic pi nipoko kind piny ma leng’ ku piny ma sai.

43 I ng’eye etera i dhugang’ m’uloko yo nyangu. 2 Kuca awok aneno dwong’ pa Mungu mir Israel m’uai yo nyangu, man dwande ubino calu dwand pii m’ubecorere; man dwong’ pare ucaru ng’om. 3 Gin m’aneno ubino calu gin ma wok i wang’ m’agam aneno kinde m’abino* pi ninyotho adhura man ayi pare ubino calu gin m’aneno ceng’ini ku kulo Kebar; e apodho arieba wang’a i ng’om.

4 I ng’eye dwong’ pa Yehova umondo i hekalu* kud i dhugang’ m’uloko yo nyangu. 5 Tipo ugam uting’a man uroya i lela ma yor i iye, e aneno dwong’ pa Yehova uromo i hekalu bik. 6 I ng’eye awinjo ng’atu moko ubeweco i bang’a kud i hekalu man ng’atune ubin ucungo i ng’eta. 7 Eyero ira kumae:

“Wod dhanu, eni tie kaka komker para man kaka m’aketho i iye the tienda, kaka m’abibedo i iye i kind dhanu mir Israel rondo ku rondo. Ot mir Israel bicido ngo nyinga ma leng’ kendo, gin ku jubim migi, nikadhu kud i asara migi mi tipo man avuj jubim migi i saa mi tho migi. 8 Ku wang’ dhugola migi ma giketho i ng’et wang’ dhugola para man ng’et dhugola migi ma giketho i kum ng’et dhugola para, ma wang’ gang’ acel kende re m’upoko kindwa kugi, gicido nyinga ma leng’ ku gin ma judagu ma gitimo, uketho adarugi pet nikum ng’eicwiny para. 9 Dong’ giketh asara migi mi tipo kud avuj jubim migi bor kuda, e abibedo i kindgi rondo ku rondo.

10 “Ento in, wod dhanu, kor ni ot mir Israel ayi ma hekalu tie ko, kara lewic umakgi pi kier migi man giponj ayi ma jugiere ko.* 11 Tek lewic umakugi pi lembe ceke ma gitimo, icikiri ninyutho igi ayi ma jugomo ko hekalune, ayi m’epangere ko, kawokne man kamondone. Nyuth igi ayi ma jugome ko ceke man cikne de ceke, ayi ma jugome ko man cikne, kiewgi i wang’gi kara ginen ayi ma jugiere ko ceke man giwor cikne. 12 Eni tie cik mir hekalu. Kabedo m’udhoko wi gode ceke utie leng’. Nen! eni tie cik mir hekalu.

13 “Maeni tie ayi ma jupimo ko pemlam ku bot (jumedo wang’ cing’ acel i kum botman).* There ubino bot acel, man lac wang’e ubino bot acel. Jamruko ma lac wang’e rom ku lac cing’* acel utwodo dhoge tingili. Eno tie the pemlam. 14 Niai i there ma n’i ng’om nitundo i dhoge ma piny m’udhoke tingili, utie bot ario man lac wang’e utie bot acel. Niai i dhoge ma nok m’udhoke tingili nitundo i dhoge ma dit m’udhoke tingili, utie bot ang’wen man lac wang’e utie bot acel. 15 Kakudho mac mi pemlam uidho bot ang’wen man tunge ang’wen ubino nuti niai kud i kum kakudho macne. 16 Theng kakudho mac ang’wen mi pemblamne zoo ubino rom: bor pare bot apar ario man lac wang’e de bot apar ario. 17 Thenge ang’wen m’udhoko dhoge tingili bor migi utie bot apar ang’wen man lac wang’gi de bot apar ang’wen; dhoge m’udhoke tingili utie nusu pa bot man there utie bot acel i ng’ete ceke.

“Man mangasinegi uloko yo nyangu.”

18 I ng’eye eyero ira kumae: “Wod dhanu, Rwoth Ubimo ma Malu Ngbir Yehova uwacu kumae: ‘Eni tie telowic ma jubilubo kinde ma jubegiero pemlam, kara juthier lam m’awang’a ma boo man jukir rimo i wiye.’

19 “‘Ibimiyo nyathi thwon dhiang’ acel kud i kind dhieng’ ni lam mi dubo ni julam ma Julawi ma gi nyikway Zadok, ma gicoro i bang’a pi nitimo ira,’ Rwoth Ubimo ma Malu Ngbir Yehova wacu. 20 ‘Ibigamu kum rimbe moko man ibikethe i kum pemlam, i kum gunde ang’wen mi dhoge m’udhoke tingili man i dhoge tingili, kara udwoke leng’ ni dubo man utim adunya pire. 21 I ng’eye ting’ nyathi thwon dhiang’, ma tie lam mi dubo, pi niwang’e kaka m’ukethere mir hekalu, yo woko mi kamaleng’. 22 I nindo mir arionde, ibithiero nyog diel acel ma mulima mbe i kume ni lam mi dubo; man jubidwoko pemlam leng’ ni dubo, tap calu ma judwoke ko leng’ ni dubo ku nyathi thwon dhiang’.’

23 “‘Kinde m’idaru dwoke leng’ ni dubo, ibithiero nyathi thwon dhiang’ acel ma mulima mbe i kume kud i kind dhieng’ man nyog urombo acel ma mulima mbe i kume mi dwol. 24 Ibithierogi ni Yehova, man julam ucikiri nikonjo kadu i wigi man nithierogi ni lam m’awang’a ma boo ni Yehova. 25 Pi nindo abiro, ibithiero nyog diel acel kubang’ ceng’ ni lam mi dubo man bende nyathi thwon dhiang’ acel m’i kind dhieng’ man nyog urombo acel mi dwol; ibithiero leya ma mulima mbe i kumgi. 26 Pi nindo abiro, jubitimo adunya pi pemlam man jucikiri nidwoke leng’, e jubikethe i tic. 27 Kinde ma nindone bithum, niwacu i nindo mir abora man yor i ng’eye, julam bithiero lam mwu m’awang’a ma boo man lam mi kwiyocwiny iwi pemlam; e anyong’a binega i kumwu,’ Rwoth Ubimo ma Malu Ngbir Yehova wacu.”

44 Edwoka kud i yo mi dhugang’ ma yo woko mi kamaleng’ m’uloko yo nyangu man ebino acika. 2 I ng’eye Yehova uyero ira kumae: “Dhugang’ maeni bibedo acika. Kud juyabe man ng’atu moko mbe ma bimondo kud i iye; kum Yehova ma Mungu mir Israel umondo kud i iye, pieno ecikere nibedo acika. 3 Ento jadit ma wijo bibedo i iye pi nicamu ring’o i wang’ Yehova, kum etie jadit ma wijo. Ebimondo kud i dhugang’ mi pond ot man ebiwok de kud i dhugang’ne.”

4 I ng’eye ekela kud i dhugang’ ma yo malu i wang’ hekalu. Kinde m’anene, aneno dwong’ pa Yehova upong’o i hekalu pa Yehova bik. E apodho arieba wang’a i ng’om. 5 I ng’eye Yehova uyero ira kumae: “Wod dhanu, keth weng’i, nen man winj kilili lembe ceke m’abeyero iri pi telowic man pi cik mir hekalu pa Yehova. Keth weng’i cuu i kum kamondo mir hekalu man kawok ceke mi kabedo ma leng’. 6 Icikiri niyero ni ot m’ujai mir Israel kumae: ‘Rwoth Ubimo ma Malu Ngbir Yehova uwacu kumae: “Timo mwu ma judagu udaru kadhu mukero, Ee ot mir Israel. 7 Kinde ma wuroyo umondo ma jutimo ngo yaa i kum adundegi man i kum ring’ kumgi i kabedo para ma leng’, e gicido hekalu para. Wubethiero mukathi para, miyo man rimo ma ke wubeturo lembariba para nikum timo mwu ceke ma judagu. 8 Wugwoko ngo piny para ma leng’. Ento wudog wuketho jumange re m’utim tic i kabedo para ma leng’.”’

9 “‘Rwoth Ubimo ma Malu Ngbir Yehova uwacu kumae: “Umondo ma bedo i Israel ma jutimo ngo yaa i kum adundene man i kum ring’ kume copo mondo ngo i kabedo para ma leng’.”’

10 “‘Ento Julawi m’ukier bor kuda saa ma Israel uweka pi nilubo tok ayi gin m’acwiya migi ma judagu* gibiyeyo matoke mi kier migi. 11 Gibidoko jutic i kabedo para ma leng’ pi nineno wi dhugang’ mir hekalu man pi nitimo i hekalu. Gibibethumo lam m’awang’a ma boo ku lam pi dhanu, man gibicungo i wang’ dhanu pi nitimo igi. 12 Calu ma gitimo igi i wang’ ayi gin m’acwiya migi ma judagu man gidoko ni cudho mi kier m’uketho ot mir Israel udubo, pi thelembe maeno, ating’o cinga malu man akwong’o kwong’ i kumgi,’ Rwoth Ubimo ma Malu Ngbir Yehova wacu, ‘man gibiyeyo matoke mi kier migi. 13 Gibicoro ngo i vuta pi nitimo ira calu julam para, kadi gibicoro ngo i kum piny para moko ci ma leng’ kunoke ma leng’ m’usagu, man gibiyeyo lewic migi pi lembe ma judagu ma gitimo. 14 Ento abidwokogi ni ju ma juketho pi tic mir hekalu, pi nitimo tic m’i iye man lembe ceke m’ukwayu jutim i iye.’

15 “‘Ento julam ma Julawi ma gi wot Zadok, m’utimo tic mi kabedo para ma leng’ saa ma Juisrael giweka, gibicoro i vuta pi nitimo ira man gibicoro i wang’a pi nithiero ira miyo ku rimo,’ Rwoth Ubimo ma Malu Ngbir Yehova wacu. 16 ‘Gin re ma gibibemondo i kabedo para ma leng’, gibicoro i vut meza para pi nitimo ira man gibitimo tic migi ira.

17 “‘Saa ma gibemondo i dhugola mi lela ma yor i iye, gicikiri nikendo kendi mi bongu ma nwang’. Kud gikend bongu moko ci ma juyiko ku yuk rombe saa ma gibemondo i dhugang’ mi lela ma yor i iye kunoke i die iye. 18 Gicikiri nikendo jamboyo wic ma segi mi bongu ma nwang’ i wigi, man pali mi bongu ma nwang’ ucikere niumo piergi. Kud gikend piny moko ci ma copo ketho kwok cwir i kumgi. 19 I wang’ ma giwok woko i lela ma yo woko, niwacu i lela ma woko ma dhanu n’i iye, gicikiri niwodho kendi ma gibino timo ko tic man nikethogi i kusika ma leng’ ma jucamu i igi. I ng’eye gibiwilo kendi mange kara kud gidag leng’o i kum dhanu* ku kendi migi. 20 Kud giliel wigi man kud giwek yuk wigi udong ma bor. Gicikiri nijwigo yuk wigi. 21 Julam gicikiri ngo nimadhu pigulok kinde ma gibemondo i lela ma yor i iye. 22 Gicikiri ngo nigamu dhatho kadi dhaku ma gier pare lal; ento gicopo gamu nyaku ma sumba kunoke dhatho ma cware ubino jalam.’

23 “‘Gicikiri niponjo ni dhanu para tung’ tung’ ma n’i kind gin ma leng’ ku gin ma sai; man gibiponjogi ku tung’ tung’ ma n’i kind gin m’ucido ku gin ma leng’. 24 I saa mi kesi, gin re ma gibipoko lembe; gicikiri nipoko lembe nimakere ku telowic para mi pokolembe. Gicikiri niworo cik para ku telowic para m’ugwaku kum foc para ceke man nidwoko sabatu para leng’. 25 Kud gicor i kum avuj ng’atu moko ci, gimaru cido. Ento gicopo cido pi weggi, meggi, awiya migi ma co ku ma nyir, umeggi kunoke nyameggi ma fodi jugamu ngo. 26 I ng’ey dwokirileng’ pa jalam, jubikwanu ire nindo abiro. 27 I nindo m’ebemondo i kabedo ma leng’, i lela ma yor i iye, pi nitimo tic i kabedo ma leng’, ecikere nikelo lam pare mi dubo,’ Rwoth Ubimo ma Malu Ngbir Yehova wacu.

28 “‘Eni bibedo giralaga migi: An re m’atie giralaga migi. Kud wumii igi aba moko i Israel, kum an re m’atie aba migi. 29 Gin re ma gibibecamu girathiera mi nying cam man mi dubo, girathiera mi kier, man piny ceke ma jukoyo i Israel bidoko migi. 30 Landu wi mwoka ceke m’alonda mi nying yen man kwond ajok mwu ceke bibedo ni julam. Man wucikuru nimiyo landu wi mwoka mi mogo mwu ma juyongo ngo ni julam. Eno biketho mugisa bibedo iwi udi mwu. 31 Julam ucikiri ngo nicamu winyo kadi ley moko ci ma junwang’u utho kadi ma ley uyeco iye.’

45 “‘Kinde ma wubepoko ng’om ni giralaga, wucikuru niwodho kum ng’ombe moko man nimiye ni makapiny ma leng’ ni ajok ni Yehova. Bor pare ucikere nibedo bot* elufu pier ario wi abic (25 000) man lac wang’e, bot elufu apar (10 000). Ng’ombe ceke* bibedo makapiny ma leng’. 2 Ng’et ng’om moko bibedo nuti i iye ma thenge ang’wen zoo rom pi kabedo ma leng’ ma bor pare bot dak abic iwi bot dak abic, man ebibedo ku luba ma bor pare bot pier abic i thenge ceke. 3 Kud i piny m’ipimo eno, icikiri nipimo thenge moko ma bor pare bot elufu pier ario wi abic (25 000) man lac wang’e bot elufu apar (10 000) man kabedo ma leng’ ma piny ma leng’ m’usagu bibedo i iye. 4 Ebibedo makapiny ma leng’ mi ng’ombe pi julam, ma gi ju ma gitimo tic mi kamaleng’, ma gicoro pi nitimo ni Yehova. Ebibedo kaka udi migi man kaka ma leng’ pi kabedo ma leng’.

5 “‘Julawi ma gitimo tic mir hekalu gibibedo ku theng ng’om ma borne bot elufu pier ario wi abic (25 000) man lac wang’e bot elufu apar (10 000), man gibibedo bende ku kusika pier ario ma jucamu i igi kara ubed ni aba.

6 “‘Wucikuru nimiyo ng’om ma bor pare bot elufu pier ario wi abic (25 000) (m’urombo kud ajok ma leng’) man ma lac wang’e bot elufu abic (5 000) ni aba mir adhura. Ebibedo mi ot mir Israel zoo.

7 “‘Man jadit ma wijo bibedo ku ng’om i ng’et ajok ma leng’ kun ku kun man i ng’et ng’om ma jupoko ni adhura. Ebibedo i ng’et ajok ma leng’ man i ng’et aba mir adhura. Ebibedo i ng’ete ma yo reto man i ng’ete ma yo nyangu. Bor pare ma niai i kieu ma yo reto nitundo i kieu ma yo nyangu bibedo rom ku theng ng’om ma jumiyo ni suru acel. 8 Ng’om maeni bidoko ni aba pare i Israel. Judongo ma wijo para bisendo ngo kendo dhanu para man gibimiyo ng’om maeni ni ot mir Israel nimakere ku suru migi.’

9 “Rwoth Ubimo ma Malu Ngbir Yehova uwacu kumae: ‘Wudaru kadhu mukero wu judongo ma wijo mir Israel!’

“‘Wuwek rop mwu man masendi, wutim lembe m’atira man ma pwe. Wuwek nimayu piny mi dhanu para,’ Rwoth Ubimo ma Malu Ngbir Yehova wacu. 10 ‘Wucikuru nitiyo ku kilo ma tap, efa* mi pimo piny ma tap man agulu* mi pimo piny ma tap. 11 Efa mi pimo piny kud agulu mi pimo piny ucikere nibedo jampimo piny mi kadhiri ma rom. Agulu mi pimo piny ucikere nibedo kadhiri pa homer* acel iwi apar man efa mi pimo piny ucikere nibedo kadhiri pa homer acel iwi apar. Homer bibedo jampimo piny ma jung’olo nia jubibetiyo ko. 12 Cekel* acel utie gera* pier ario. Man cekel pier ario ka jumedo cekel pier ario wi abic i wiye, judok jumedo kendo cekel apar abic i wiye bibedo mane* acel iwu.’

13 “‘Maeni bibedo ajok ma wucikuru nimiyo: efa acel iwi abusiel mir homerman mi nganu man efa acel iwi abusiel mir homerman mi nganu ma juyuke. 14 Jubibepimo kadhiri mi mo ma juketho kud agulu. Agulu acel mondo wang’ apar i kor* acel man agulu apar utie homer acel, kum agulu apar romo homer acel. 15 Man kud i dwol mir udul lim mir Israel, ibimiyo urombo acel iwi rombe dak ario. Eno bibedo pi girathiera mi nying cam, lam m’awang’a ma boo man lam mi kwiyocwiny pi nitimo adunya pi dhanu,’ Rwoth Ubimo ma Malu Ngbir Yehova wacu.

16 “‘Dhanu ceke mi ng’ombe bimiyo ajok i bang’ jadit ma wijo mir Israel. 17 Ento jadit ma wijo re ma bimiyo lam m’awang’a ma boo, girathiera mi nying cam, girathiera mi pigulok i saa mi foc, i saa mi dwi m’upor, i saa mi Sabatu, man i saa mi foc ceke ma juketho pi ot mir Israel. En re m’ebimiyo lam mi dubo, girathiera mi nying cam, lam m’awang’a ma boo man lam mi kwiyocwiny pi nitimo adunya pi ot mir Israel.’

18 “Rwoth Ubimo ma Malu Ngbir Yehova uwacu kumae: ‘I dwi ma kwong’a, i nindo ma kwong’a mi dwije, wucikuru nigamu nyathi thwon dhiang’ acel ma mulima mbe i kume kud i kind dhieng’ man wubidwoko kabedo ma leng’ udok leng’ ni dubo. 19 Jalam bigamu kum rimo moko mi lam mi dubo man ebikethe i ng’et dhugola mir hekalu, iwi gul ang’wen mi dhu pemlam m’utieke tingili man i ng’et dhugola mi dhugang’ mi lela ma yor i iye. 20 Eni re ma gin m’ibitimo i nindo mir abiro mi dwije pi ng’atu moko ci m’udubo akakaka ngo kunoke m’eng’eyo ngo; man icikiri nitimo adunya pir hekalu.

21 “‘I dwi ma kwong’a, i nindo apar ang’wen mi dwije, wubitimo foc mi Kadhukuwijo. Wucikuru nicamu mukathi ma thobi mbe i iye pi nindo abiro. 22 Cing’ nica, jadit ma wijo bimiyo nyathi thwon dhiang’ pi lam mi dubo pire gire man pi dhanu ceke mi ng’ombe. 23 Lam m’awang’a ma boo m’ebimiyo ni Yehova pi nindo abiro mi foc bibedo nyithi thwoni dhieng’ abiro ma mulima mbe i kumgi, nyithi nyogi rombe abiro ma mulima mbe i kumgi pi nindo abirone zoo, man bende nyog diel acel kubang’ ceng’ ni lam mi dubo. 24 Bikwayu emii bende girathiera mi nying cam, efa acel pi nyathi thwon dhiang’man, efa acel pi nyathi nyog uromboman man bende hin* acel mi mo pir efaman.

25 “‘I dwi mir abiro, i nindo apar abic mi dwije, pi nindo abiro mi foc, ecikere nimiyo lam mi dubo ma rom, lam m’awang’a ma boo, girathiera mi nying cam man mo.’”

46 “Rwoth Ubimo ma Malu Ngbir Yehova uwacu kumae: ‘Dhugola mi dhugang’ mi lela ma yor i iye m’uloko yo nyangu ucikere nibedo acika pi nindo abusiel ma jutimo i iye tic, ento i ceng’ Sabatu man i nindo ma dwi por i iye, ecikere nibedo thwolo. 2 Kinde ma jadit ma wijo uai woko, ebimondo kud i gengi mi pond ot mi dhugang’, man ebiwok cungo i ng’et dhugola mi dhugang’. Julam bithiero lam pare m’awang’a ma boo ku lam pare mi kwiyocwiny man ebikulo kore piny i wang’ dhugang’, e i ng’eye ebiwok. Ento jubiciko ngo dhugang’ne nitundo uthieno. 3 Dhanu mi ng’ombe bikulo bende korgi piny i wang’ Yehova i dhu kamondo mi dhugang’ i ceng’ Sabatu man i por pa dwi.

4 “‘Lam m’awang’a ma boo ma jadit ma wijo bikelo ni Yehova i ceng’ Sabatu bibedo nyithi nyogi rombe abusiel ma mulima mbe i kumgi man nyog urombo acel ma mulima mbe i kume. 5 Girathierane mi nying cam bibedo efa* acel pi nyog urombo man gin moko ci m’ecopo miyo pi nyithi nyogi rombe ku mo hin* acel kubang’ efa. 6 I nindo ma dwi por i iye, girathierane bibedo nyathi thwon dhiang’ acel ma mulima mbe i kume m’i kind dhieng’, nyithi nyogi rombe abusiel man nyog urombo acel; gibibedo ma mulima mbe i kumgi. 7 Girathiera mi nying cam m’ecikere nithiero bibedo efa acel pi nyathi thwon dhiang’, efa acel pi nyog urombo man gin moko ci m’ecopo nwang’u pi nyithi nyogi rombe. Man ecikere nithiero hin acel kubang’ efa.

8 “‘Saa ma jadit ma wijo ubemondo, ebimondo kud i gengi mi pond ot mi dhugang’ man ecikere niwok de kud i gengi ma rom. 9 Man kinde ma dhanu mi ng’ombe gimondo i wang’ Yehova i saa mi foc, ju m’umondo kud i dhugang’ ma yo malu pi nitimo thier gicikiri niwok kud i dhugang’ ma yo piny, man ju m’umondo kud i dhugang’ ma yo piny gicikiri niwok kud i dhugang’ ma yo malu. Ng’atu moko mbe m’ucikere nidok kud i dhugang’ m’emondo kud i iye, kum gicikiri niwok kud i dhugang’ m’atira i wang’gi. 10 Jadit ma wijo ma n’i kindgi ucikere nimondo saa ma gibemondo man ecikere niwok saa ma gibewok. 11 I saa mi foc man i kind nindo mi foc, girathiera mi nying cam ucikere nibedo efa acel pi nyathi thwon dhiang’, efa acel pi nyog urombo man gin moko ci m’ecopo miyo pi nyithi nyogi rombe karacelo ku mo hin acel kubang’ efa.

12 “‘Tek jadit ma wijo umiyo lam m’awang’a ma boo kunoke lam mi kwiyocwiny ni girathiera ma ku berocwiny ni Yehova, jubiyabu ire dhugang’ m’uloko yo nyangu man ebimiyo lam pare m’awang’a ma boo man lam pare mi kwiyocwiny tap calu m’etimo i ceng’ Sabatu. Saa m’ewok ci, jubiciko dhugang’ne i ng’eye.

13 “‘Kubang’ ceng’, icikiri nimiyo nyathi nyog urombo acel ma mulima mbe i kume man ma oro pare ukadhu ngo acel ni lam m’awang’a ma boo ni Yehova. Icikiri nitimo kumeno nja kugweno. 14 Nja kugweno ibibemiye karacelo ku thenge acel wi abusiel mir efa ni girathiera mi nying cam, man bende mo hin acel wi adek ma jubibekiro iwi mogo ma yom ni girathiera mi nying cam ma nja ni Yehova. Eno tie cik ma nja. 15 Gicikiri nimiyo nyathi nyog urombo, girathiera mi nying cam man mo kubang’ kugweno ni lam m’awang’a ma boo ma nja.’

16 “Rwoth Ubimo ma Malu Ngbir Yehova uwacu kumae: ‘Tek jadit ma wijo umiyo giramiya ni ng’atuman m’i kind wote ni giralaga, ebidoko ni piny pa wote. Ebibedo ni aba migi ma gilagu alaga. 17 Ento tek kum giralaga pare re m’emiyo ni giramiya ni jatic pare acel, ebibedo pa jaticne nitundo i oro mi gony; i ng’eye ebidok ni jadit ma wijone. Wote kendgi re ma gibibedo ku giralaga migi awena. 18 Jadit ma wijo ucikere ngo nimayu giralaga mi dhanu m’eriem kogi kud i dhu piny migi. Kum piny ma pare gire re m’ecikere nimiyo ni giralaga ni wote, kara kud juriem ng’atu moko m’i kind dhanu para kud i dhu piny pare.’”

19 I ng’eye eketho amondo kud i kamondo ma n’i ng’et dhugang’ ma terojo i kusika ma leng’ ma julam gicamu i igi, ma kusikane wang’gi ubeneno yo malu, man kuca awok aneno kabedo moko yor i ng’eye ma wang’e uloko yo reto. 20 Eyero ira kumae: “Eni tie kaka ma julam bibetedo i iye girathiera mi kier ku lam mi dubo, man kaka ma gibibetedo i iye girathiera mi nying cam, kara kud giwok ku piny moko i lela ma woko man kud gidag leng’o i kum dhanu.”*

21 Ewodha i lela ma woko man eketho awotho i gund lela ang’wen zoo, man awok aneno lela, i ng’et gund lelaman ma woko. 22 Lela ma thindho thindho ubino nuti i gund lela ang’wenne zoo ma bor migi ubino bot* pier ang’wen man lac wang’gi bot pier adek. Gin ang’wenne zoo gibino rom rom.* 23 Dhoggi ang’wen m’udhokogi tingili ubino tie, man i the dhoggine jugiero kaka ma jubed jutedo i iye girathiera. 24 I ng’eye eyero ira kumae: “Eni tie udi ma jutic mir hekalu tedo i iye lam mi dhanu.”

47 I ng’eye edwoka i kamondo mir hekalu man kuca awok aneno pii ubemol ubedok yo nyangu niai kud i the wang’ dhugola mir hekalu, kum wang’ hekalu uloko yo nyangu. Pii bino mol niai kud i ther hekalu i thenge ma yor acwic, i ng’et pemlam yo piny.

2 I ng’eye ewodha kud i yo mi dhugang’ ma yo malu man ewodha woko, e adhoko dhugang’ ma yo woko m’uneno yo nyangu man aneno pii m’ubemol kud i thenge ma yor acwic.

3 Kinde ma jalwone uwok ku yo nyangu ku thol mi pimo piny i cinge, epimo piny bot* elufu acel (1 000) man eketho akadhu kud i pii; pige ujik i ng’udi tienda.

4 I ng’eye epimo piny kendo bot elufu acel (1 000) man eketho akadhu kud i pii; pige utundo iwi conga.

Edog epimo piny kendo bot elufu acel man eketho akadhu kud i pii; e pige utundo i piera.

5 Kinde m’epimo piny kendo bot elufu acel (1 000), edoko ni kulo ma romo mwomere ngo, kum pige doko thuc ma kwayu jukwang’ akwang’a; ebino kulo ma dit ma copo mwomere ngo amwoma.

6 Egam epenja kumae: “Wod dhanu, ineno gin maeni?”

I ng’eye eketho awotho man aloko i dhu kulo m’ubemol. 7 Saa m’aloko, aneno yen upong’ bik i dhu kulone kun ku kun. 8 I ng’eye eyero ira kumae: “Pii maeni ubemol nicidho i ng’om ma yo nyangu, eloro ekadhu kud i Araba,* i ng’eye ebimondo i nam. Kinde m’emondo i nam, pii mi nambe bikey. 9 Udul giracwiya ma kwo bikwo kaka moko ci ma pige* mol i iye. Rec bipong’ lee, pilembe pige bimol keca. Pii mi nambe kume bikey man piny ceke bikwo kaka moko ci ma pige cidho i iye.

10 “Judwar nam bicungo i ng’ete niai i En-gedi nitundo i En-eglaim kaka ma kathwoyo ndiya bibedo i iye, pilembe rec mi kwonde dupa bibedo kuca, calu rec mi Nam ma Dit.*

11 “Ebibedo ku jugu man kaka ma pii liwere i iye, man gin re gibikey ungo. Jubiwekogi ni kadu.

12 “Kwond yen ceke ma cego nying’gi pir acama bidongo i dhu kulone kun ku kun. Ithgi biner ungo kadi nying’gi de bikang’ ungo. Gibicego nying’gi ma nyen kubang’ dwi, pilembe pii ubemol igi niai kud i kabedo ma leng’. Nying’gi bibedo pir acama man ithgi ke pi keyokum.”

13 Rwoth Ubimo ma Malu Ngbir Yehova uwacu kumae: “Maeni tie ng’om ma wubipoko ni giralaga ni suru apar ario mir Israel, man Yozefu bimaku thenge ario. 14 Wubilage man jubipoke iwu rom rom.* Akwong’o nimiyo ng’om maeni ni kwaruwu, man kawoni judaru miye iwu ni giralaga.

15 “Eni tie wang’ kieu mi ng’om mi thenge ma yo malu: Ecaku niai i Nam ma Dit nicidho i yo mi Hethlon yor i bang’ Zedad, 16 Hamath, Berotha man Sibraim ma n’i kind ng’om mi Dameski ku ng’om mir Hamath nicidho i Hazer-hatikon ma n’i dhu kieu pa Hauran. 17 Pieno kieune biai kud i nam nitundo i Hazar-enon, kud i dhu kieu mi Dameski yo malu man kieu mir Hamath. Eno tie kieu ma yo malu.

18 “Theng kieu ma yo nyangu ukadhu i kind Hauran ku Dameski man i dhu Yordan i kind Gilead ku ng’om mir Israel. Wucikuru nipimo niai i kieune nitundo i nam ma yo nyangu.* Eno tie kieu ma yo nyangu.

19 “Kieu ma yo piny* bicaku niai i Thamar nitundo i kulo mi Meribath-kadec, i ng’eye ebiloro i Poga* man ebicidho nitundo i Nam ma Dit. Eno tie kieu ma yo piny.*

20 “Thenge ma yo reto bibedo Nam ma Dit, niai i kum kieu nitundo i kum kabedo ma n’i wang’ Lebo-hamath.* Eno tie kieu ma yo reto.”

21 “Wucikuru nipoko ng’ombe i kindwu, niwacu i kind suru apar ario mir Israel. 22 Wucikuru nipoke ni giralaga i kindwu man ni umondo ma bedo i kindwu m’unyolo awiya kinde m’ekwo i kindwu. Gibibedo iwu calu Juisrael mir anyoli, gibinwang’u giralaga i kind suru mir Israel karacelo kudwu. 23 Ni umondo wucikuru nimiyo giralaga i ng’om mi suru m’ebedo i kindgi,” Rwoth Ubimo ma Malu Ngbir Yehova wacu.

48 “Eni tie nying’ surunegi, nicaku i kieu ma yo malu: theng ng’om pa Dan umaku niai i gengi mir Hethlon nicidho i Lebo-hamath,* nitundo i Hazar-enan i ng’et kieu mi Dameski yo malu, i ng’et Hamath; man ebembo niai i kieune ma yo nyangu nitundo i kieu ma yo reto. 2 Theng ng’om p’Acer n’i dhu kieu pa Dan, niai i kieune ma yo nyangu nitundo i kieu ma yo reto. 3 Theng ng’om pa Nafthali n’i dhu kieu p’Acer, niai i kieune ma yo nyangu nitundo i kieu ma yo reto. 4 Theng ng’om pa Manase n’i dhu kieu pa Nafthali, niai i kieune ma yo nyangu nitundo i kieu ma yo reto. 5 Theng ng’om pa Efraim n’i dhu kieu pa Manase, niai i kieune ma yo nyangu nitundo i kieu ma yo reto. 6 Theng ng’om pa Ruben n’i dhu kieu pa Efraim, niai i kieune ma yo nyangu nitundo i kieu ma yo reto. 7 Theng ng’om pa Yuda n’i dhu kieu pa Ruben, niai i kieune ma yo nyangu nitundo i kieu ma yo reto. 8 I dhu kieu pa Yuda, niai i kieune ma yo nyangu nitundo i kieu ma yo reto, ajok ma wucikuru nikoyo ang’et, lac wang’e bibedo bot* elufu pier ario wi abic (25 000) man bor pare bibedo rom ku theng ng’om mi suru mange niai i kieune ma yo nyangu nitundo i kieu ma yo reto. Kabedo ma leng’ bibedo i dierene.

9 “Ajok ma wubikoyo ang’et ni Yehova, bor pare bibedo bot elufu pier ario wi abic (25 000) man lac wang’e bot elufu apar (10 000). 10 Eno bibedo ajok ma leng’ ma pi julam. Thenge ma yo malu bibedo bot elufu pier ario wi abic (25 000), thenge ma yo reto bot elufu apar (10 000), thenge ma yo nyangu bot elufu apar, man thenge ma yo piny bot elufu pier ario wi abic. Kabedo ma leng’ pa Yehova bibedo i dierene. 11 Ebibedo pi julam ma judwoko leng’ kud i kind wot Zadok, ma gitimo tic migi ira man ma gikier ungo saa ma Juisrael ku Julawi gikier. 12 Theng ng’om moko ma juketho ang’et ni ajok bibedo migi ni piny ma leng’ m’usagu, i dhu kieu mi Julawi.

13 “I kum ng’om mi julam dri, Julawi bibedo ku theng ng’om ma borne bot elufu pier ario wi abic (25 000) man lac wang’e bot elufu apar (10 000). (Borne zoo bibedo bot elufu pier ario wi abic man lac wang’e bot elufu apar.) 14 Gicikiri ngo nilworo, niwilo, kadi nimiyo kum ng’om m’ang’iya maeni moko ci, pilembe etie piny ma leng’ ni Yehova.

15 “Dong ng’ombe m’udong’ ma lac wang’e bot elufu abic (5 000) man bor pare bot elufu pier ario wi abic (25 000) bibedo pi lembe ma sai mir adhura, pi udi man pi luba. Adhura bibedo i dierene. 16 Maeni tie bor mir adhurane: kieune ma yo malu bot elufu ang’wen ku dak abic (4 500), kieune ma yo piny bot elufu ang’wen ku dak abic, kieune ma yo nyangu bot elufu ang’wen ku dak abic, man kieune ma yo reto de bot elufu ang’wen ku dak abic. 17 Luba mir adhurane bibedo bot dak ario ku pier abic yo malu, bot dak ario ku pier abic yo piny, bot dak ario ku pier abic yo nyangu, man bot dak ario ku pier abic yo reto.

18 “Dong ng’ombe ma bidong’ bor pare bibedo rom kud ajok ma leng’, niwacu bot elufu apar (10 000) yo nyangu man bot elufu apar yo reto. Ebibedo rom kud ajok ma leng’, man piny m’ucek i iye bibedo cam pi dhanu ma timo i adhura. 19 Dhanu ma timo i adhura m’uai i suru ceke mir Israel bibefure.

20 “Ajokne thenge ang’wen zoo bibedo rom rom, niwacu bot elufu pier ario wi abic (25 000). Wucikuru nikethe ang’et ni ajok ma leng’ karacelo kud aba mir adhurane.

21 “Donge m’udong’ kun ku kun i ng’et ajok ma leng’ man i ng’et aba mir adhura bibedo pa jadit ma wijo. Ebibedo i ng’et kieu ma bor pare bot elufu pier ario wi abic (25 000) ma ni yo nyangu man yo reto mir ajokne. Ebibedo rom ku theng ng’om ma n’i kume, man ebibedo pa jadit ma wijo. Ajok ma leng’ man kabedo ma leng’ mir hekalu bibedo i dierene.

22 “Aba mi Julawi kud aba mir adhura bibedo i kind piny pa jadit ma wijo. Ng’om pa jadit ma wijo bibedo i kind kieu pa Yuda ku kieu pa Benjamin.

23 “Pi dong surune m’udong’, theng ng’om pa Benjamin bibedo niai i kieune ma yo nyangu nitundo i kieu ma yo reto. 24 Theng ng’om pa Simeon n’i dhu kieu pa Benjamin, niai i kieune ma yo nyangu nitundo i kieu ma yo reto. 25 Theng ng’om pa Isakar n’i dhu kieu pa Simeon, niai i kieune ma yo nyangu nitundo i kieu ma yo reto. 26 Theng ng’om pa Zebulon n’i dhu kieu pa Isakar, niai i kieune ma yo nyangu nitundo i kieu ma yo reto. 27 Theng ng’om pa Gad n’i dhu kieu pa Zebulon, niai i kieune ma yo nyangu nitundo i kieu ma yo reto. 28 Kieune ma yo piny ma n’i dhu kieu pa Gad bimaku niai i Thamar nitundo i kulo mi Meribath-kadec, nicidho i Poga* man nitundo bir i Nam ma Dit.*

29 “Eni tie ng’om ma wucikuru nipoko ni giralaga ni suru mir Israel man eni tie theng ng’om migi,” Rwoth Ubimo ma Malu Ngbir Yehova wacu.

30 “Maeni bibedo kawok mir adhura: thenge ma yo malu bibedo bot elufu ang’wen ku dak abic (4 500).

31 “Gibicaku nying’ dhugang’ne nimakere ku suru mir Israel. I kind dhugang’ adek ma yo malu, dhugang’ acel bibedo pi Ruben, dhugang’ acel pi Yuda man dhugang’ ma kucelo ke pi Lawi.

32 “Thenge ma yo nyangu, borne bibedo bot elufu ang’wen ku dak abic (4 500) man dhugang’ bibedo adek keca: dhugang’ acel pi Yozefu, dhugang’ acel pi Benjamin man dhugang’ ma kucelo ke pi Dan.

33 “Thenge ma yo piny, bibedo bot elufu ang’wen ku dak abic (4 500) man ebibedo ku dhugang’ adek: dhugang’ acel pi Simeon, dhugang’ acel pi Isakar man dhugang’ ma kucelo ke pi Zebulon.

34 “Thenge ma yo reto, borne bibedo bot elufu ang’wen ku dak abic (4 500) man ebibedo ku dhugang’ adek: dhugang’ acel pi Gad, dhugang’ acel pir Acer man dhugang’ ma kucelo ke pi Nafthali.

35 “Bor m’udhoke zoo bibedo bot elufu apar abora (18 000). Man niai cing’ nica nying adhurane bibedo Yehova ni Keca.”