HOSEYA
1 Lembe pa Yehova m’ubino i bang’ Hoseya* ma wod Beeri i nindo pa Uzia, Yotham, Ahaz man Hezekia, ma gi jubim mi Yuda man i nindo pa Yeroboam ma wod Yoac m’ubimo mir Israel. 2 Kinde ma Yehova ucaku yero lembe pare nikadhu kud i bang’ Hoseya, Yehova uwacu ni Hoseya kumae: “Cidhi, gam dhaku ma won asara* man nyol awiya mir asara, pilembe nikum asara ng’ombuni ulokere ceke kud i kum lubo Yehova.”
3 Pieno ecidho man egamu Gomer ma nyaku pa Diblaim; e Gomer ugamu iye man enyolo ire wode.
4 I ng’eye Yehova uyero ni Hoseya kumae: “Cak nyinge Yezreel,* kum pi kare ma nyanok abikwayu ot pa Yehu uwodh wel pi cwiro rimo m’utimere i Yezreel man abijigo the bimobim mi ot mir Israel. 5 I nindo nica, abituro i athero mir Israel i Poga* mi Yezreel.”
6 Egamu iye kendo man enyolo nyathin ma nyaku. Man Mungu uyero ni Hoseya kumae: “Cak nyinge Lo-ruhama,* kum abitimo ngo kisa kendo ni ot mir Israel pilembe andhandha abiriemogi cen. 7 Ento abitimo kisa ni ot mi Yuda man an a Yehova Mungu migi abibodhogi ngo kud athero, kadi ku palamularu, kadi ku lwiny, kadi ku riuni,* kadi ku juring riuni.”
8 I ng’ey m’ekwiro Lo-ruhama, egamu iye man enyolo nyathin ma nico. 9 E Mungu uyero kumae: “Cak nyinge Lo-ami* pilembe wutie ngo dhanu para man abibedo mwu ngo.
10 “Man wend dhanu* mir Israel bibedo calu nying kwiyo m’i nam ma jucopo pimo ngo kadi ma jucopo kwanu ngo. Man i kaka m’abed ayero igi i iye nia ‘Wutie dhanu para ngo,’ abiyero igi nia ‘Wutie wot Mungu ma kwo.’ 11 Man dhanu mi Yuda ku dhanu mir Israel gibicokiri karacelo i acel, man gibing’iyo igi jatelwic acel man gibiwok kud i ng’om, kum ceng’ pa Yezreel bibedo ceng’ ma dit.
2 “Wuyer ni umego mwu kumae: ‘Dhanu para!’*
Man ni nyimego mwu kumae: ‘Ee dhaku ma jutimo ire kisa!’*
2 Wudot megwu; wudote,
Kum etie ngo dhaku para man an atie ngo cware.
Ukwayu ekab asara* pare cen kud i kume
Man abor* pare kud i kind thunone,
3 Kan ungo abiwodho bongu kud i kume ebidong’ muneru,
Man abidwoke ebidoko calu i nindo ma junyole i iye,
Abiketho ebidoko calu langa,
Abidwoke ni ng’om ma pii mbe i iye,
Man abiketho ebitho ku rieu.
4 Man abitimo ngo kisa ni wote,
Kum gitie wot mir asara.*
5 Kum meggi utimo asara.*
En m’egamu ic migi etimo lembe mi lewic, kum eyero kumae:
‘Abilubo tok ju m’umara lee,
Ju ma miyo ira mukathi man pii,
Bongu mi yuk rombe, bongu ma nwang’, mo man giramadha.’
6 Pieno abiciko yo pare ku gang’ mir ukudho;
Man abigiero gang’ mi kidi i kume,
Kara kud enwang’ yo pare.
7 Ebiriemo tok ju m’umare lee, ento ebinwang’ugi ngo;
Ebisayu kakagi, ento ebinwang’ugi ngo.
I ng’eye ebiyero kumae: ‘Abidok i bang’ cwara ma kwong’a,
Kum lembe ubino ira ber i saa nica nisagu ma kawoni.’
8 Egam eng’eyo ngo nia an re m’abed amiyo ire nying cam, pigulok ma nyen man mo,
Man an re m’abed amiyo ire mola ma tar lee
Man mola ma kwar ma gitiyo ko i thier pa Baal.
9 ‘Pieno abiloko man abigamu nying cam para cen i saane
Man pigulok para ma nyen i nindone,
Man abimayu bongu para mi yuk rombe cen
Man bongu para ma nwang’* m’ubed uumo muneru pare.
10 Kawoni abiwodho muneru pare kamaleng’ i wang’ ju m’umare lee,
Man ng’atu moko mbe ma bilare kud i cinga.
11 Abidaru anyong’a pare ceke,
Foc pare, dwii pare ma por, sabatu pare man nindo mi foc pare ceke.
12 Abinyotho yend ulok pare man yend ulam pare, m’eyero pigi kumae:
“Maeni gi sukulia para ma ju m’umara lee gimiyo ira”;
Abidwokogi ni luli,
Man yedi mi lum bimvorogi.
13 Abikwayu ewodh wel i nindo m’ebed ethiero iye lam ni ayi gin m’acwiya pa Baal,
Kinde m’ebed erukere ku lagith man ku jamruko man ebed eriemo tok ju m’umare lee,
Man abino ng’atu ma wiye wil pire,’ Yehova wacu.
14 ‘Pieno abiloko paru pare,
Abitelo wiye abitere i langa,
Man abiweco wec ma bimondo i cwinye.
15 Niai i nindo maeca abidwoko podho mir ulok pare i bang’e,
Man Poga* mir Akor bibedo calu dhugola ma miyo genogen;
Ebidwoko ira lembe keca calu i nindo m’ebino i iye aradu,
Man calu i nindo m’ewok i iye kud i ng’om mi Misiri.
16 Man i nindo nica,’ Yehova wacu,
‘Ibilwong’a nia cwara, ento ibilwong’a ngo kendo nia Rwoth para.’*
17 Abikabu nying ayi gin m’acwiya pa Baal cen kud i dhoge,
Man jubipoy i kum nying’gi kendo ngo.
18 I nindo nica abitimo lembariba pigi ku yedi mi lum,
Man ku winyo mi kor polo man ku piny ma mol ku korgi mi ng’om;
Abikabu athero, palamularu man lwiny kud i ng’om,
Man abiketho gibivuto* museme.
19 Abinyomi ira mi nja;
Man abinyomi ira i yo ma pwe man m’atira,
I mer ma lokere ngo man kisa.
20 Abinyomi ira i gwoko bedoleng’,
Man andhandha ibing’eyo Yehova.’
21 ‘I nindo nica abidwoko lembe,’ Yehova wacu,
‘Abidwoko lembe ni polo,
Man gibidwoko lembe ni ng’om;
22 Man ng’om bidwoko lembe ni nying cam, ni pigulok ma nyen man ni mo;
Man gibidwoko lembe ni Yezreel.*
23 Abicoye ira calu kodhi iwi ng’om,
Man abitimo ire kisa en ma jutimo ngo ire kisa;*
Abiyero ni ju ma gi dhanu para* ngo kumae: “Wutie dhanu para,”
Man gibiyero kumae: “In i Mungu mwa.”’”
3 I ng’eye Yehova uyero ira kumae: “Cidh kendo, mar dhaku ma nico mange umaru man m’ubetimo abor,* tap calu ma Yehova umaru dhanu mir Israel kinde ma gilokiri i bang’ mungu mange man gimaru mukathi mi nyingulok m’uthwo.”*
2 Pieno ang’iewe ira ku tongolo mi mola ma tar apar abic man ku nganu ma juyuke homer* acel ku nusu. 3 E ayero ire kumae: “Ibibedo para pi nindo dupa. Icikiri ngo nitimo asara* man icikiri ngo nitimo ribiri ku nico mange man an de abitimo iri kumeno.”*
4 Etie pilembe pi nindo ma dupa dhanu mir Israel gibibedo m’umbe ubimo, m’umbe jadit ma wijo, m’umbe lam, m’umbe mbegi, m’umbe efodh* man m’umbe therafim.* 5 I ng’eye dhanu mir Israel gibidwogo man gibiyenyo kaka Yehova Mungu migi man kaka Daudi m’ubimo migi, man gibibino i bang’ Yehova ma kumgi ubemiel man i bang’ bero pare i ajiki mi nindo.
4 Wuwinj lembe pa Yehova, Ee dhanu mir Israel,
Kum Yehova utie ku kesi i kum dhanu mi ng’ombe,
Pilembe lemandha kadi mer ma lokere ngo kadi ng’eyo Mungu umbe i ng’ombe
2 Kwong’ mi ndra man vupo ku nek
Man kwo kud abor* umew amewa,
Man cwiro rimo ubelubere aluba .
3 Pieno re ma ng’ombe bibedo ku can
Man ng’atu moko ci ma bedo i ng’ombe binyothere;
Yedi mi lum man winyo mi kor polo
Kadok rec mi nam de bitho.
4 “Ento dong’ ng’atu moko kud upiemere ku dhanu maeni kadi kud ujukgi,
Kum dhanu peri gi calu ju ma piemiri ku jalam.
5 Pieno ibikier ku dieceng’
Man jabila bikier karacelo kudi, calu ve piny utie uthieno.
Man abiketho meru biling’.*
6 Abiketho dhanu para gibiling’* pilembe ng’eyong’ec umbe.
Calu m’ikwero ng’eyong’ec,
An bende abikweri kud ibed jalam para;
Man pilembe iwil i kum cik* pa Mungu peri,
An de abiwil i kum woti.
7 Kubang’ med ma gibemediri ko, gibemediri ni dubo ira de kumeno.
Abiloko dwong’ migi bidoko ni lewic.*
8 Gibetungiri ku dubo mi dhanu para,
Man gibemito dhanu para umediri ameda i dubo.*
9 Ebibedo rom pi dhanu man pi jalam;
Abikwayu wel i bang’gi pi yo migi,
Man abiketho gibinwang’u matoke mi timo migi.
10 Gibicamu, ento gibiyeng’ ungo.
Gibitimo asara* lee, ento gibinyay ungo,
Pilembe giworo ngo Yehova.
12 Dhanu para gibepenjo paru i bang’ ayi gin m’acwiya migi mi yen,
Gibetimo gin m’uluth* migi ubeyero igi;
Pilembe tipo mir asara* uketho gibekier cen,
Man asara* migi uketho gikwero nijwigiri ni Mungu migi.
13 Gibethiero lam iwi gudi,
Man iwi ungulu gudi gibeketho yiro mi lam uduny,
I the yen m’ujany, i the yen storak man i the yen moko ci ma dit,
Pilembe tipogi ber.
Pilembe jumaco gibecidho ku weg asara.
Man gibethiero lam karacelo ku ju ma timo asara mir hekalu;
Kit dhanu ma kumeno ma gimbe ku nyang’ i lembe gibinyothiri.
15 Kadok nwang’u ibetimo asara,* Ee Israel
Dong’ kosa kud ubed iwi Yuda.
Kud ibin i Gilgal kadi i Beth-aven,
Man kud ikwong’ kumae: ‘Calu andha Yehova bedo kwo!’
16 Kum calu dhiang’ ma wiye tek, wi Israel de udoko tek.
Nyo kawoni Yehova bikwayugi calu ma jukwayu ko nyathi nyog urombo i luba ma laci?
17 Efraim umoko i kum ayi gin m’acwiya.
Wuweke!
Man jubim* migi gimaru lembe mi lewic lee dit.
19 Yamu biume* i vombe,
Man lewic bimakugi i kum lam migi.”
5 “Wuwinj lembe ma e, wu julam,
Cik ithi, Ee ot mir Israel,
Winji, Ee ot p’ubimo,
Kum pokolembe n’i wiwu;
Pilembe wutie uwic ni Mizpa
Man voi ma juciko iwi Tabor.
2 Man ju ma gi jujai gimondo lee dit i nek,
Man abecimo wang’gi* gin ceke.
3 Ang’eyo Efraim
Man Israel upondo ngo ira.
Kum kawoni, Ee Efraim, itimo asara;*
Israel ucidere gire.
4 Timo migi ubeyiyo ngo nia gidwog i bang’ Mungu migi,
Pilembe tipo mir asara* n’i kindgi;
Man giyiyo ngo nia an a Yehova re m’atie Mungu migi.
5 Kuhaya pa Israel umiyo lembatuca i kume;*
Israel man Efraim ceke gikier i kosa migi,
Man Yuda bende ukier karacelo kugi.
6 Gicidho kud udul rombe man dhieng’ migi pi nisayu kaka Yehova,
Ento ginwang’e ngo.
Kum ewekogi.
7 Giwenjo Yehova
Pilembe ginyolo wot ma tie juwirok.
Kawoni dwi acel bimvorogi* man makapiny migi* bende.
8 Wukudh bilo i Gibea man agwara i Rama!
Wukok kok mi lwiny i Beth-aven; wan’i ng’eyi, Ee Benjamin!
9 Ee Efraim, ibidoko ni gin ma ng’oyo ndiri i nindo mi matira.
Anyutho ni suru mir Israel gin ma bitimere andhandha.
10 Judongo ma wijo mi Yuda gi calu ju m’ubecoro kieu.
Abikonjo kwinyo para i wigi calu pii.
11 Jusendo Efraim man pokolembe urunge,
Pilembe ekeco nilubo tok jadegi pare.
12 Pieno abino calu rudho ni Efraim
Man calu gin ma tobo piny ni ot mi Yuda.
13 Kinde ma Efraim uneno twoyo pare man Yuda uneno adhola pare,
Efraim ucidho i Asiria man eoro jukwenda i bang’ ubimo ma dit.
Ento ebino mbe ku copo mi keyo twoyo mwu,
Man ebino mbe ku copo mi keyo adhola mwu.
14 Kum abibedo calu nyathin umvor ni Efraim,
Man calu umvor ma tek* ni ot mi Yuda.
An gira abiyecogi nziki nziki man abicidho;
Abicidho kugi man ng’atu moko mbe ma bibodhogi.
15 Abicidho man abidok kakara nitundo ma gibinwang’iri ku matoke mi kier migi,
Man i ng’eye gibisayu ninwang’u bero i wang’a.*
Gibisayu kakara kinde ma gin’i peko.”
6 “Wubin man dong’ wadwogu i bang’ Yehova,
Pilembe eyeco iwa nziki nziki, ento ebikeyowa.
Egoyowa, ento ebiriwo wang’ rem mwa.
2 Ebidwoko tego i kumwa i ng’ey nindo ario.
I nindo mir adege ebiting’owa malu,
Man wabikwo i wang’e.
3 Wabing’eyo, wabiyenyo ning’eyo Yehova kud ava.
Ebibino andha calu piny ma ruu;
Ebibino i bang’wa calu koth m’ucorere,
Calu koth mi saa pa cir ma yomo ng’om.”
4 “Atimi nenedi Efraim?
Atimi nenedi Yuda?
Kum mer peri ma lokere ngo tie calu afuru mi kugweno,
Calu thoi ma rwinyo pio pio.
5 Pi thelembe maeno abing’ondogi nikadhu kud i bang’ jubila;
Abinegogi ku wec mi dhoga.
Man pokolembe mwu birieny calu der.
6 Kum anyong’a nega lee i kum mer ma lokere ngo,* ento ungo i kum lam,
Man i kum ng’eyo Mungu, ma sagu i kum lam m’awang’a ma boo.
7 Ento gin, calu dhanu ma dhanu, gituro lembariba.
Keca, giciba.
8 Gilead utie adhura mi jutimrac,
Epong’ ku batielo mi rimo.
9 Udul mi julam gi calu udul mi weg ayeki ma gikanu libo ni ng’atini.
Ginego nek i dhu yo mi Cekem,
Pilembe timo migi en e timo mi lewic.
10 Aneno lembe ma rac nisagu zoo i ot mir Israel.
Efraim ubetimo asara keca;
Israel ucidere gire.
11 M’umedo maeno, Ee Yuda, nindo mi kayucam ukethere iri,
Kinde m’abidwogo dhanu para ma juyaku.”
7 “I saa m’abemito keyo iye kum Israel,
Kosa pa Efraim bende nen kamaleng’,
Man dubo pa Samaria.
Pilembe gibecwayu ndra;
Jukwo gibemondo i udi man udul mi weg ayeki gicidh giyaku piny.
2 Ento gibeparu de ngo i adundegi nia abipoy i kum timo migi ceke ma reco.
Kawoni timo migi utwodogi tingili;
Gitie kamaleng’ i wang’a.
3 Gibenyayu anyong’a i ubimo ku timo migi ma reco,
Man i judongo ma wijo kud awonde migi.
4 Gin ceke giweg abor,*
Gibeliel calu furu ma jated mukathi ukudho mac i iye,
M’eweko nivuko wang’ macne i ng’ey m’enyobo kwend mukathi nitundo ma thobi kwode.
5 I nindo pa jabim mwa, judongo ma wijo gitwoyo:
Kwinyo umakugi nikum pigulok.
Ethang’u cinge i bang’ jucac.
6 Kum gicoro kud adunde m’ubeliel calu furu.*
Jated mukathi nindo diewor traka;
Kugweno furune liel calu mac m’ugerini.
7 Gin ceke gi lieth calu furu,
Man gibemvoro jutelwic* migi.
Jubim migi ceke gipodho;
Acel de mbe m’i kindgi m’ubekwaya.
8 Efraim ujebere ku thek mange.
Efraim utie calu mukathi ma ngulu ngulu ma juloko ng’ete ngo.
9 Juwirok ginyotho tego pare, ento eng’eyo ngo.
Man yuk wiye udoko lwar, ento ebenyang’ ungo.
10 Kuhaya pa Israel umiyo lembatuca i kume,
Ento gidwogo ngo i bang’ Yehova Mungu migi,
Kadi gisayu ngo kakare kadok nwang’u lembe maeni zoo utimere i kumgi de.
11 Efraim tie calu akuru ma ming’, m’ukoso rieko.*
Gikwayu kony i bang’ Misiri; gicidho i Asiria.
12 Kaka moko ci ma gicidho i iye, abitelo voi para i wigi.
Abilorogi piny calu winyo mi kor polo.
Abimiyo igi twiny nimakere ku cimowang’ m’amiyo ni cokiri migi.
13 Can i wigi pilembe giringa!
Nyoth i wigi pilembe gidubo ira!
Abino ayika niwarugi, ento gicwayu ndra i wiya.
14 Gibekwayu ngo kony i bang’a niai kud i adundegi,
Kadok nwang’u gibewagiri iwi kavuto migi.
Kum giberiedo kumgi pi nying cam man pi pigulok migi ma nyen;
Gilokiri i kuma.
15 Kadok nwang’u amiyo igi twiny man adwoko botgi tek de,
Re gitie judhoga, gibepangu lembe ma rac.
16 Giloko timo migi, ento ungo i bang’ gin moko m’uting’ere;
Gibino dhanu ma jugeno ngo calu athero ma wiye ucungo ngo atira.
Judongo ma wijo migi gibipodho ku palamularu nikum wec migi* mi jai.
Nikum lembe maeni gibidoko ni jamng’iero i ng’om mi Misiri.”
8 “Keth agwara i dhogi!
Ng’atu moko ubebino calu acur i kum ot pa Yehova,
Kum gituro lembariba para man gituro cik para.
2 Gibekok i bang’a kumae: ‘Mungu mwa, wa Israel wang’eyi!’
3 Israel ukwero gin ma ber.
Dong’ jakwor uriem toke.
4 Giketho jubim, ento nimakere ku yeny para ngo.
Giketho judongo ma wijo, ento ayiyogi ngo.
Giyiko ayi gin m’acwiya ku mola ma tar man mola ma kwar migi,
Pi nyoth migi gigi.
5 Ee Samaria, jukwero nyathi dhiang’ peri.
Kwinyo para ubeopo i kumgi.
Gibibedo mbe ku copo mi dwokiri gigi leng’ nitundo awene?
6 Kum maeni uai i Israel.
Jabodho re m’utime, man etie ngo Mungu;
Jubirungo i nyathi dhiang’ mi Samaria nziki nziki.
7 Kum tie yamu re ma gibecoyo,
Man gibikayu avuvu.*
Tiend cam moko mbe m’ubecego nying cam ma juromo kayu;*
M’utwii ke ubewodho ngo mogo.
Tek moko cek, juwirok* re ma gibimwonye.
8 Jubimwonyo Israel cen.
Kawoni gibibedo i kind thek
Calu ajeni ma jumaru ngo.
9 Kum giidho i Asiria calu kana mi lum ma tie kende.
Efraim upangu jumer.
10 Kadok nwang’u gipangugi kud i kind thek de,
Kawoni abicoko dhoggi;
Gibicaku sendiri nikum ter m’ubimo ku judongo ma wijo giketho i wigi.
11 Kum Efraim umedo wend pemlam pi nitimo dubo.
Gidoko pemlam pare pi timo dubo.
12 Akiewo ire lembe dupa ma nwang’ere i cik* para,
Ento enenogi calu gin moko ma tung’.
13 Gibethiero lam ira man gibecamu ringe,
Ento anyong’a ubenego ngo Yehova i kumgi.
Kawoni ebipoy i kum kosa migi man ebimiyo igi matira pi dubo migi.
Giloko gidok* i Misiri.
14 Israel uwil i kum Jacwic pare man egiero hekalu,
Man Yuda umedo wend adhura ma tek.
Ento abioro mac i adhura pare,
Man ebiwang’u otkur pa ng’atuman.”
9 “Anyong’a kud unegi, Ee Israel,
Kud itim lembe kud anyong’a calu dhanu.
Kum nikum asara* ikier kud i kum Mungu peri.
Imaru sukulia mir asara m’inwang’u i lela mi fwodo cam ceke.
2 Ento lela mi fwodo cam ku vur mi biyo pigulok bitungogi ngo,
Man gibikoso pigulok ma nyen.
3 Gibimediri ngo nibedo i ng’om pa Yehova;
Ento Efraim bidok i Misiri,
Man i Asiria gibicamu piny m’ucido.
4 Gibithiero ngo kendo girathiera mi pigulok ni Yehova;
Lam migi binyayu ngo anyong’a i iye.
Gitie calu mukathi mi wak;
Dhanu ceke ma gibecame gibicido.
Kum mukathi migi tie pigi kendgi;*
Ebimondo ngo i ot pa Yehova.
5 Wubitimo ang’o i nindo mi coko,*
I nindo mi foc pa Yehova?
6 Kum nen! bikwayu giringi nikum nyoth.
Misiri bicoko dhoggi karacelo, man Memfis bikunyogi.
Ayilayila bimwonyo piny migi ma pigi tek mi mola ma tar,
Man vunga mir ukudho bibedo i hema migi.
7 Nindo mi wodho wel bitundo,
Nindo mi matira bitundo,
Man Israel bing’eye.
Jabila migi bibedo jakasegu, man ng’atu ma tipo uyuyo i wiye bibedo abelu;
Calu ma kier peri tie dupa, lembe ma jukeco i kumi de tie dupa.”
8 Jakur mir Efraim ubino karacelo ku Mungu para.
Ento kawoni yo mi jubila pare ceke utie calu uwic pa jacik winyo;
Akece n’i ot pa Mungu pare.
9 Ginyothiri ma rac calu i nindo mi Gibea.
Ebipoy i kum kosa migi man ebimiyo igi matira pi dubo migi.
10 “Anwang’u Israel calu ma junwang’u nying ulok i langa.
Aneno kwaruwu calu nying ulam ma kwong’a iwi yend ulam.
Ento gilokiri i bang’ Baal mi Peor;
Githieriri gigi ni gin mi lewic,*
Man gidoko gin ma judagu calu piny ma gimarune.
11 Dwong’ pa Efraim utuk man uringo bor calu winyo;
Nyoliri umbe, ic umbe, man gamu ic de mbe.
12 Kadok nwang’u gitungo awiya,
Abimayugi cen nitundo ma ng’atu moko mbe ma bidong’;
Eyo, can i wigi kinde m’abiloko ng’eya igi!
13 Efraim ma jupidho i luba ubino ira calu Turo;
Kawoni Efraim ucikere niwodho wote kara junegi.”
14 Ee Yehova, mii igi gin m’ukwayu imii igi:
Ic ma dubere man thuno m’utal.*
15 “Racu migi ceke ubino i Gilgal, kum kuca re m’atuc nidagugi.
Abiriemogi cen kud i ot para pi timo migi ma reco.
Abimarugi kendo ngo;
Judongo ma wijo migi ceke wigi tek.
16 Jubing’ondo Efraim.
Ulaggi bithwo, man gibicego nyinggi ngo.
Kadok nwang’u ginyolo awiya, abinego nyikwaygi ma gimaru akeca.”
17 Mungu para bikwerogi,
Kum giwinje ngo,
Man gibidoko juwoth i kind thek.
10 “Israel tie yend ulok m’unyothere* m’ucego nyinge.
Kinde ma nyinge ubemedere, emedo pemlam pare de kumeca;
Kinde ma ng’om pare ubecego piny lee, emedo leng’o mi mbegi mi thier pare de kumeno.
2 Adundegi tie kud umbili;*
Kawoni jubinwang’u kosa i wigi.
Ng’atu moko nuti ma bituro pemlam migi man binyotho mbegi migi.
3 Kawoni gibiwacu kumae: ‘Wambe kud ubimo, kum walworo ngo Yehova.
Man ubimo copo timo ang’o iwa?’
4 Gibeyero wec ma iye nanu, gibekwong’o kwong’ mi ndra man gibetimo lembariba;
Pieno pokolembe m’uwok tie calu lum ma kwir n’i iye m’utwii i sayo mi podho.
5 Lworo binego jurubedo mi Samaria i kum ayi gin m’acwiya mi nyathi dhiang’ mi Beth-aven.
Dhanu m’i iye gibiwage,
Man bende julam pare mi mungu mi juwirok m’anyong’a ubed unegogi i kume man i kum dwong’ pare,
Kum ebicidho cen kud i bang’gi i ng’eca.
6 Jubitere i Asiria calu giramiya ni ubimo ma dit.
Jubinyayu lewic iwi Efraim
Man lewic binego Israel pi juk m’elubo.
7 Andhandha jubikabu Samaria kud ubimo pare cen,*
Calu ridi yen ma jujaku m’ubelekere iwi pii.
8 Jubinyotho kaka ma malu mi Beth-aven m’uketho Israel udubo.
Ukudho man ucok bidongo iwi pemlam migi.
Man dhanu biwacu ni gudi kumae: ‘Wuumwa!’
Man ni ungulu gudi kumae: ‘Wupodh i wiwa!’
9 Ee Israel, idubo niai i nindo mi Gibea.
Kuca gimediri asu ku timone.
Lwiny urubo ngo* wot mi gondiri i Gibea.
10 Abimiyo igi bende matira kinde ma iya yenyo.
Man dhanu bicokiri i kumgi,
Kinde ma jubiriwo kosa migi ario i kumgi.*
11 Efraim ubino rwaya dhiang’ ma juponjo, m’umaru fwodo cam,
Pieno, agwoko ng’ute ma leng’.
Kawoni abiketho ng’atu moko biidho iwi* Efraim.
Yuda bifuro fur; Yakobo biteng’o iye ire.
12 Wucoy kodhi iwu giwu i bedopwe man wukay mer ma lokere ngo.
Wufur iwu ng’om ma miyo
Kinde ma fodi saa mi yenyo Yehova unuti,
Nitundo m’ebin man eponjwu i bedopwe.
13 Ento wufuro mwu racu,
Wukayu gondiri,
Man wucamu nying yen mi ndra;
Kum wuketho genogen mwu i yo mwu giwu,
I udul jurumony mwu.
14 Woy biwok i kum dhanu mwu,
Man jubinyotho adhura mwu ma tek ceke,
Calu ma Calman unyotho ko ot pa Arbel,
I nindo mi lwiny kinde ma jugam jung’enyo i mego nziki nziki karacelo kud awiya migi.
15 Eni tie gin ma jubitimo i kumi, Ee Bethel, pi racu peri m’ukadhu mukero.
I mombwa, andhandha jubinego* ubimo mir Israel cen.”
11 “Kinde ma Israel ubino jalawobi, amare,
Man alwong’o woda kud i Misiri.
2 Kinde ma gimediri* nilwong’o Juisrael,
Gimediri nicidho bor kugi.
Gibed githiero lam ni ayi gin m’acwiya pa Baal
Man githiero lam ni ayi gin m’acwiya m’ang’ika.
3 Ento an re m’aponjo Efraim ku woth, abed ating’ogi i kora;
Re giyiyo ngo nia an re m’agam akeyogi.
4 Abed apeyogi ku uno mi dhanu,* ku thol mi mer;
Man abino igi calu ng’atu ma kabu mberembere cen kud i ding’gi,
Man abed akelo cam ni ng’atuman m’i kindgi ku yoo.
5 Gibidok ungo i ng’om mi Misiri, ento Asiria bibedo ubimo migi,
Pilembe gikwero nidwogo i bang’a.
6 Man palamularu biwirere i kum adhura migi,
Man ebinyotho riu migi man ebimvorogi nikum pangulembe migi ma reco.
7 Dhanu para gikeco nigwoko ngo bedoleng’ migi ira.
Kadok nwang’u gilwong’ogi nia giidh malu,* ng’atu moko acel de mbe m’uai malu.
8 Acopo wenji nenedi, Ee Efraim?
Acopo miyi i cing’ judegini nenedi, Ee Israel?
Acopo timo lembe m’atimo i kum Adma i kumi nenedi?
Acopo nyothi calu m’anyotho ko Zeboim nenedi?
Adundena ulokere;
I saa ma rom eno kisa para uopo.*
9 Abikonjo ngo ng’eicwiny para m’ubeliel.
Abinyotho ngo Efraim kendo,
Kum atie Mungu, ento dhanu ngo,
Ng’atu ma leng’ ma n’i kindwu;
Man abibino ngo i kumi ku kwinyo.
10 Gibiwotho i tok Yehova man ebirundo calu umvor;
Kinde m’eberundo, wote gibibino ma kumgi ubemiel niai ku yo reto.
11 Kumgi bimiel calu kum winyo kinde ma gibewok kud i Misiri,
Calu kum akuru kinde ma gibewok kud i ng’om mir Asiria,
Man abiketho gibibedo i udi migi,” Yehova wacu.
12 “Efraim utwoda tingili ku vupo,
Man ot mir Israel ku ndra.
Ento Yuda ubewotho asu ku Mungu,
Man ebegwoko bedoleng’ pare ni Ng’atu ma leng’ m’usagu.”
12 “Efraim ubetungere ku yamu.
Eberiemo tok yamu ma yo nyangu dieceng’ duu.
Ebemedo ndra man rop ameda.
Gitimo lembariba kud Asiria man gitero mo i Misiri.
2 Yehova utie ku lemkesi i kum Yuda;
Ebikwayu wel i bang’ Yakobo nimakere ku yo pare,
Man ebiculo ire nimakere ku timo pare.
3 I ic emaku ufuny tiend umin,
Man enyego ku Mungu ku tego pare zoo.
4 Emedere ninyego ku malaika man eloyo.
Ewak man ekwaye emii ire mugisa.”
Mungu unwang’e i Bethel man eweco kudwa keca,
5 Yehova Mungu mir udul,
Yehova tie nying’ mi poy pare.*
6 “Pieno, dwog i bang’ Mungu peri,
Mediri nigwoko mer ma lokere ngo man tim lembe m’atira,
Man gen Mungu peri saa ceke.
7 Ento kilo mi vupo n’i cing’ jakuloka;
Emaru nikwalu dhanu.
8 Efraim umedere niwacu kumae: ‘Afodoko jalonyo andha;
Anwang’u lonyo.
Man i tic mi muliri para zoo, jubinwang’u ngo gin moko ma rac kadi dubo.’
9 Ento an a Yehova Mungu peri niai kud i ng’om mi Misiri.
Abiketho ibedo kendo i hema
Calu i nindo m’ukethere.*
10 Aweco i bang’ jubila,
Amedo wend gin ma wok i wang’ migi,
Man ayero lembabola nikadhu kud i bang’ jubila.
11 Vupo* man lemandha ngo ubino i Gilead.
Githiero thwoni dhieng’ i Gilgal,
Man pemlam migi gi calu udhuru kidi i sayo mi podho.
13 Yehova utiyo ku jabila pi niwodho Israel kud i Misiri,
Man etiyo ku jabila pi nigwoke.
14 Efraim unyayu can lee dit i Mungu;
Dubo pare mi cwiro rimo n’i wiye;
Rwoth pare biculo ire kawang’ lewic m’enyayu i wiye.
13 “Kinde ma Efraim ubed uweco, kum dhanu ubed umiel;
Ebino suru ma pire uyik i Israel.
Ento edubo nikum thier m’etimo ni Baal man etho.
2 Kawoni gibemedo dubo migi ameda
Man gibeyiko ayi gin m’acwiya mi cuma* ku mola ma tar migi;
Gibeyiko ayi gin m’acwiya ku bodho, ma gin ceke gi tic mi jubodho.
Gibewacu igi kumae: ‘Dong’ dhanu ma gibethiero lam gicwii kum ayi gin m’acwiya mi nyithi dhieng’.’
3 Pieno gibidoko calu afuru mi kugweno,
Calu thoi ma rwinyo con,
Calu cung’ cam ma yamu ma tek leko kud i lela mi fwodo cam,
Man calu yiro ma wok kud iwi ot.
4 Ento an a Yehova Mungu peri niai kud i ng’om mi Misiri;
Ing’eyo ngo Mungu moko mange,
Man m’uweko an jalar mange mbe.
5 Ang’eyi i langa, i ng’om m’uthwo.
6 Luba migi uyeng’ogi,
Giyeng’ man kuhaya umondo i adundegi.
Pieno wigi uwil i kuma.
7 Abidoko igi calu nyathin umvor,
Calu ng’uu m’ukanu libo i dhu yo.
8 Abipiey i wigi calu urudi ma nyithindhe urwinyo,
Man abiyeco korgi.*
Abimvorogi keca calu umvor;
Yedi mi lum biyeco igi nziki nziki.
9 Ebinyothi, Ee Israel,
Pilembe ilokiri i kuma, i kum jakony peri.
10 Dong’ ubimo perine ni kani kara ebodhi i adhura peri ceke,
Man jutelwic* peri m’iyero pigi kumae:
‘Mii ira ubimo man judongo ma wijo’?
11 Ng’eicwiny para uketho amiyo iri ubimo,
Man i kwinyo para, abikabe cen.
12 Juboyo kier pa Efraim aboya;
Dubo pare tie agwoka.
13 Moc mi nyodo bigoyo min.
Ento etie nyathin ma riek ungo;
Ewok ungo kinde ma saa mi nyole uromo.
14 Abiwarugi kud i tego mi Liel;*
Man abibodhogi kud i tho.
Ee tho, kwir peri ni kani?
Ee Liel, copo peri mi nyoth ni kani?
Kisa bibedo mbe i iya.
15 Kadok nwang’u elepini i kind agada,
Yamu ma yo nyangu bibino, niwacu yamu pa Yehova.
Ebiai kud i langa pi nithwoyo pii m’atong’a pare man pi nidwono kulo pare.
Ng’atu moko biyaku piny ma pigi tek pare ceke kud i kakanpiny pare.
16 Jubiketho nia Samaria utie ku kier pilembe ejai i kum Mungu pare.
Gibipodho ku palamularu,
Jubing’enyo i awiya migi nziki nziki,
Man jubikaku i mon migi ma igi nuti dra.”
14 “Ee Israel, dwog i bang’ Yehova Mungu peri,
Pilembe ikier nikum kosa peri.
2 Dwog i bang’ Yehova ku wec ma e,
Yer ire kumae: ‘Timba wek iwa kosa mwa, man yii gin ma ber,
E wabithiero iri pak mi dend dhogwa calu ma nwang’u waromo thiero ko nyithi thwoni dhieng’.*
3 Asiria bibodhowa ngo.
Wabiidho ngo kendo iwi riuni,*
Man wabiyero ngo kendo ni tic mi cingwa kumae: “Ee Mungu mwa!”
Pilembe in re m’itimo kisa ni nyathikic.’*
4 Abikeyo koso gwoko bedoleng’ migi.
Abimarugi ma judiya adiya ngo,
Pilembe ng’eicwiny para ulokere cen kud i kumgi.
5 Abidoko calu thoi ni Israel;
Ebithiwo calu thiwe
Man ebiguro ulage piny calu yen mi Lebanon.
6 Jange bijany,
Dwong’ pare bibedo calu pa yend oliv,
Man ng’wice bibedo calu ng’wic Lebanon.
7 Gibibedo kendo i the tipone.
Gibicoyo nying cam man gibiloth calu nying ulok.
Pire biyik* calu pi pigulok mi Lebanon.
8 Efraim biwacu kumae: ‘Abitimo ang’o kendo kud ayi gin m’acwiya?’
Abidwoko lembe man abikuro wiye.
Abibedo calu yend jenevriye* m’ujany.
Man an re m’abimiyo iwu nying yen mwu.”
9 Ng’a ma rieki? Dong’ enyang’ i lembe maeni.
Ng’a ma tie ku ng’eyong’eci? Dong’ eng’eygi.
Pilembe yo pa Yehova gin atira,
Man weg bedopwe gibiwotho i igi;
Ento judubo gibikier i igi.
Eno tie nying’ ma Hocaya i adundo, ma thelembene tie “Ma Yah ubodho; Yah ubodho.”
Kunoke “tarwang’.”
Thelembene tie “Mungu bicoyo kodhi.”
Kunoke “Pambu mi poga.”
Thelembene tie “Jutimo ngo ire kisa.”
Kunoke “kana mi lwiny.”
Thelembene tie “Dhanu para ngo.”
I dhu Juebrania: “wot.”
Nen korolembe mi there iwi Hos 1:9.
Nen korolembe mi there iwi Hos 1:6.
Kunoke “tarwang’.”
Kunoke “gier.”
Kunoke “tarwang’.”
Kunoke “umondo i tarwang’.”
Kunoke “bongu mi lin.”
Kunoke “Pambu mi poga.”
Kunoke “Baal para.”
Kunoke “abiketho gibikwo.”
Thelembene tie “Mungu bicoyo kodhi.”
Nen korolembe mi there iwi Hos 1:6.
Nen korolembe mi there iwi Hos 1:9.
Kunoke “gier.”
Niwacu ma jubed jutiyo ko i thier mi ndra.
Homer 1 ubino litre 220. Nen Thenge ma jumedo B14.
Kunoke “Kud imond i tarwang’.”
Kunoke “man an de abitimo ngo kudi ribiri.”
Nen Thelembe mi wec.
Kunoke “mungu m’araga mi juruot; ayi gin m’acwiya.”
Kunoke “gier.”
Kunoke “abinyotho meru.”
Kunoke “abinyotho dhanu para.”
Kunoke “ponji.”
Kunoke nyo “Giloko dwong’ para udoko ni lewic.”
Kunoke “gibeting’o ng’eyong’ec migi malu i kum dubo mi dhanu para.” Nen Thelembe mi wec iwi “Ng’eyong’ec.”
Kunoke “Gibimiyiri i tarwang’.”
Kunoke “Tarwang’.”
I dhu Juebrania: “Kabu adunde cen.”
Kunoke “uluth mi ewo lembe.”
Kunoke “tarwang’.”
Kunoke “tarwang’.”
Kunoke “tarwang’.”
Kunoke “gier.”
Kunoke “tarwang’.”
Kunoke “gier.”
Kunoke “tarwang’.”
Kunoke “kong nganu.”
Kunoke “tarwang’.”
I dhu Juebrania: “ban.”
Kunoke “biweye cen.”
Kunoke “abimiyo matira igi.”
Kunoke “imiyiri i tarwang’.”
Kunoke “tarwang’.”
I dhu Juebrania: “i wang’e.”
Kunoke nyo “jubimvorogi i dwi acel.”
Kunoke “podho migi.”
Kunoke “nyathin umvor ma ng’ute jumuzuga.”
I dhu Juebrania: “gibisayu wang’a.”
Kunoke “i kum kisa.”
Kunoke “gier.”
Kunoke nyo “Kum adundegi ubeliel calu furu kinde ma gibecoro ku gamba migi.”
I dhu Juebrania: “jupoklembe.”
I dhu Juebrania: “m’ukoso adunde.”
I dhu Juebrania: “lebgi.”
Kunoke “wavuvu.”
Kunoke “m’ubecungo.”
Kunoke “umondo.”
Kunoke “ponji.”
Kunoke nyo “gibiloko gibidok.”
Kunoke “tarwang’.”
Kunoke “pi ng’eyong’ec migi kendgi.”
Kunoke “foc mwu m’ukethere.”
Kunoke “mungu mi lewic.”
Kunoke “m’udwono.”
Kunoke nyo “m’udhath.”
Kunoke “rac; foth.”
I dhu Juebrania: “jubimiyo dhoggi.”
Kunoke “unyotho ngo magwei.”
Niwacu kinde ma giyeyo matira migi calu mberembere.
Kunoke “abitwiyo kwej dhiang’ iwi.”
I dhu Juebrania: “jubimiyo dhu.”
Niwacu jubila man jumange ma juoro pi niponjo Israel.
Kunoke “uno mi bero,” ma calu mi junyodo.
Niwacu i bang’ ayi thier ma n’i malu.
I dhu Juebrania: “udoko lieth.”
Kunoke “tie nying’ ma jupoy ko i kume.”
Kunoke nyo “mi foc.”
Kunoke “Udu; Lemthangu.”
I dhu Juebrania: “kiaru.”
Kunoke “Siria.”
Kunoke “ayi gin m’acwiya m’atwaga.”
I dhu Juebrania: “gin m’ugeng’o bang’ adundegi.”
I dhu Juebrania: “jupoklembe.”
Kunoke “Ceol,” niwacu liel mi dhanu ceke. Nen Thelembe mi wec.
I dhu Juebrania: “Wan lundo wabithiero nyithi thwoni dhieng’ mi dend dhogwa.”
Kunoke “kana mi lwiny.”
Kunoke “nyathin ma won utho.”
I dhu Juebrania: “Poy pare bibedo.”
Eno tie yen m’uyenyo rombo ku sipre.