YOEL
1 Lembe pa Yehova m’ubino i bang’ Yoel* ma wod Pethuel:
2 “Wuwinj lembe ma e, wu judongo,
Man wucik ithwu, wu dhanu ceke mi ng’ombuni.*
Nyo lembe ma kumeni udaru timere de i nindo mwu
Kunoke i nindo pa kwaruwu?
3 Wuyer pire ni wotwu,
Man dong’ wotwu giyer pire ni wotgi,
Man wotgi ni dhanu m’utuk ma bilubo.
4 Gin ma bonyo ma mvoro piny uweko, bonyo ma juvombgi ucamu;
Gin ma bonyo ma juvombgi uweko, bonyo ma vombgi mbe ucamu;
Man gin ma bonyo ma vombgi mbe uweko, bonyo ma ramu piny ucamu.
5 Wucew, wu jumero man wuwaki!
Wuweguru, wun ceke ma wumadhu pigulok,
Pilembe jukabu pigulok ma mit cen kud i dhogwu.
6 Kum thek moko uidho i kum ng’om para, e tek man wende kwanere ngo.
Lake tie lak umvor man dinge tie ding umvor.
7 Enyotho ulok para man eweko yend ulam para udong’ ni cudho kende,
Enang’ugi ceke man ebayugi ang’et,
Eweko janggi udong’ ma tar.
8 Wegiri calu ma nyaku ma sumba* m’ukendo bongu mi saki wak ko
Pi nico ma nwang’u ubenyome* i aradu pare.
9 Girathiera mi nying cam man girathiera mi pigulok ujik i ot pa Yehova;
Julam ma gi jutic pa Yehova gin’i wak.
10 Podho unyothere, ng’om ubewak;
Kum nying cam unyothere, pigulok ma nyen uthwo, man mo uthum.
11 Cwiny jurufur ung’abere, juyik kum yend ulok ubewagiri
Pi nganu man nganu ma juyuke;
Kum cam mi podho unyothere.
12 Ulok uthwo,
Yend ulam uner.
Yend ulemo, yend ngasi man yend pom,
Yen ceke mi podho githwo;
Kum anyong’a udoko ni lewic i kind dhanu.
13 Wukend kendi mi saki man wuwaki, wu julam;
Wuwaki, wu jutic mi pemlam.
Wumondi man wuvut traka i kendi mi saki, wu jutic pa Mungu para;
Kum jucero girathiera mi nying cam man girathiera mi pigulok kud ubin i ot pa Mungu mwu.
14 Wutwong’ pi kwirocam;* wulwong’ coko ma dit.
Wucok dhu judongo karacelo man dhanu ceke mi ng’ombuni
I ot pa Yehova Mungu mwu, man wukok i bang’ Yehova pi nikwayu kony.
15 Can i nindo maeno!
Kum nindo pa Yehova ni ceng’ini,
Man ebibino calu nyoth m’uai i bang’ Jategokpo!
16 Nyo jukabu ngo cam cen kud i wang’wa,
Man mutoro kud anyong’a kud i ot pa Mungu mwa?
17 Kodhi* uthwo i the lupau migi.
Dero udong’ mananu.
Jurwombo goga kum cam utho.
18 Kadok udul lim de gibecur!
Udul dhieng’ gibewotho swa ma wigi jebere, pilembe gimbe ku luba!
Man udul rombe gibenwang’u matira.
19 Ee Yehova, abilwong’o in;
Kum mac uwang’u luba mi langa
Man lebmac uwang’u yen ceke mi podho.
20 Kadok yedi mi lum de gisayu kakeri,
Pilembe kulo udwono,
Man mac uwang’u luba mi langa.”
2 “Wukudh agwara i Sayuni!
Wukok kok mi lwiny iwi got para ma leng’.
Dong’ kum dhanu ceke mi ng’ombe* umiel,
Kum nindo pa Yehova ubebino! Eni ceng’ini!
2 Etie nindo mi piny ma col man mi mudho,
Nindo mir afuru man mi mudho ma col bii,
Calu der mi mombwa ma carere iwi gudi.
Dhanu moko nuti ma wendgi kwanere ngo man ma tek;
Dhanu moko mbe m’ubino calu en i wang’e,
Man mange mbe kendo ma bibedo calu en
I kind dhanu m’utuk ceke.
3 I wang’e, mac ubewang’u piny,
Man i ng’eye, lebmac ubewang’u piny ruk.
Ng’om ma n’i wang’e tie calu podho mir Eden,
Ento i ng’eye etie langa m’udong’ kende,
Man gin moko mbe ma copo both.
4 Ayi pare tie calu ayi pa riuni,*
Man giringo calu riuni mi lwiny.
5 Woy migi calu woy mi magali m’ubepor iwi gudi,
Calu moc pa mac m’uberungo soka.
Etie calu dhanu ma tek m’ukperiri pi lwiny.
6 Nikumgi, ndiri bing’oy i dhanu.
Wang’ ceke bilokere bidoko nyacan can.
7 Gicung’o calu jurumony,
Gipiey ku wi gang’kidi calu juaskari,
Ng’atuman ucidho atira i wang’e,
Man gibeweko ngo yo migi.
8 Gibegudiri ngo i kindgi;
Ng’atuman ubemedere ku woth pare.
Ka jumoko podho nikum jamlwiny,
Jumange loko ngo ku ng’eygi.
9 Gibecidho pio i adhura, giberingo iwi gang’kidi.
Gibeidho iwi gudi man gibemondo kud i wang’ madhirisa calu jakwo.
10 Ng’om ubeyengere i wang’gi man polo de ubeyengere.
Ceng’ ku dwi udoko col,
Man der mi nyikaluku urwinyo.
11 Yehova biting’o dwande i wang’ udul askari pare, kum udul pare kwanere ngo.
Pilembe ng’atu m’ubetimo lembe pare e tek;
Kum nindo pa Yehova tie dit man enyayu ndiri.
Ng’a ma copo cire?”
12 “Ento kadok kawoni de,” Yehova wacu, “wudwog i bang’a kud adundewu ceke,
Ma wubekwiro cam, wubewak man wubeweguru.
13 Wuyec adundewu, ento bongu mwu re ngo,
Man wudwog i bang’ Yehova Mungu mwu,
Kum e jabero* man e jakisa, e yoo ni ng’eicwiny man epong’ ku mer ma lokere ngo,
Man ang’eyang’o biwok i iye pi canne.
14 Ng’a m’ung’eyo ka nyo ecopo lokere ngo man ang’eyang’o wok ungo i iye
Man emii iwu mugisa lee,
Kara wunwang’ girathiera mi nying cam ku girathiera mi pigulok ni Yehova Mungu mwu?
15 Wukudh agwara i Sayuni!
Wutwong’ pi kwirocam;* man wulwong’ coko ma dit.
16 Wucok dhu dhanu, wudwok cokiri udok leng’.
Wucok dhu ju m’utii,* wucok dhug awiya man dhu mukere.
Dong’ cwar mugole uwoki kud i kusika pare ma kut, man nyamugole bende kud i kusika pare mi mugole.
17 I kind pond ot ku pemlam,
Dong’ julam ma gi jutic pa Yehova giwaki man giyer kumae:
‘Kisa negi i kum dhanu peri, Ee Yehova;
Kud idwok giralaga peri ni jamng’iero,
M’iwek ko thek ubim wigi.
Pirang’o dhanu giwac kumae: “Mungu migi ni kani?”’
18 E Yehova bigwoko ng’om pare kud amora
Man ngisi binege i kum dhanu pare.
19 Yehova bidwoko lembe ni dhanu pare kumae:
‘Abemiyo iwu nying cam, pigulok ma nyen man mo,
E wubiyeng’ lee;
Abiketho ngo kendo wudok ni jamcac i kind thek.
20 Abicoro ng’atu ma yor ariwa ma yo malu bor kudwu;
Abilale i ng’om langa man i ng’om m’uthwo ma jubedo ngo i iye,
Abicoro udul mony pare ma telo yo* yor i bang’ nam ma yo nyangu*
Man udul mony pare ma dong’ tokcen yor i bang’ nam ma yo reto.*
Ng’wic avuje bing’wii
Man ng’wic avujene bimedere nilal iwi ng’om;
Kum Mungu bitimo lembe ma dongo.’
21 Lworo kud unegi, Ee ng’om.
Anyong’a negi man bed ku mutoro, kum Yehova bitimo lembe ma dongo.
22 Lworo kud unegwu wu yedi mi lum,
Kum lum mi luba mi langa biloth kendo,
Man yen bicego nyinggi;
Yend ulam man ulok gicikiri nicego nyinggi bik.
23 Wu wot Sayuni, wubed ku mutoro man anyong’a unegwu i Yehova Mungu mwu;
Kum ebimiyo iwu koth ma kwong’a i kadhiri m’uromo,
Man ebioro koth ma dit i wiwu,
Koth ma kwong’a man koth ma tokcen, tap calu m’i wang’e.
24 Lela mi fwodo cam bipong’ bik ku nying cam ma leng’,
Man vur mi biyo pigulok bipong’ haw ku pigulok ma nyen man mo.
25 Man abiculo iwu kawang’ oro ma
Bonyo ma juvombgi, bonyo ma vombgi mbe, bonyo ma ramu piny, man bonyo ma mvoro piny gicamu,
Gin ma gin udul askari para m’aoro i kindwu.
26 Andha, wubicamu nitundo wubiyeng’,
Man wubipaku nying’ Yehova Mungu mwu,
En m’etimo lembe ma wang’u ic piwu;
Jubinyayu ngo lewic kendo iwi dhanu para.
27 Man wubing’eyo nia an’i kind Israel
Man nia an a Yehova Mungu mwu, mange mbe!
Jubinyayu ngo lewic kendo iwi dhanu para.
28 I ng’ey maeno abikonjo tipo para iwi kwond kum ceke,*
Man wotwu ku nyigwu gibiewo,
Ju m’utii mwu gibileko lek,
Man awobi mwu gibineno gin ma wok i wang’.
29 Man kadok iwi ng’eca para ma co ku ng’eca para ma mon de
Abikonjo tipo para i nindo maeca.
30 Abitimo thangu* malu i polo man iwi ng’om,
Rimo, mac man mbegi mi yiro bibedo nuti.
31 Ceng’ bidoko ni mudho man dwi ni rimo
Ma fodi nindo ma dit man ma ng’oyo ndiri pa Yehova utundo ngo.
32 Man ng’atu moko ci m’ubelwong’o nying’ Yehova biboth;
Kum iwi Got Sayuni man i Yeruzalem ju ma biboth bibedo nuti, tap calu ma Yehova uyero,
Gi ju ma giboth ma Yehova ubelwong’o.”
3 “Kum nen! i nindo maeca man i saa maeca,
Kinde m’abidwogo ju ma jumaku mi Yuda man mi Yeruzalem,
2 Abicoko bende dhu thek ceke karacelo
Abipoko lembe i wigi keca
Pi lembe ma gitimo i kum dhanu para man i kum giralaga para ma Israel,
Kum gilalugi i kind thek,
Man gipoko ng’om para i kindgi.
3 Kum gigoyo gagi pi nipoko dhanu para i kindgi;
Gibed gilworo jalawobi pi niculo dhaku ma won asara
Man gibed gilworo nyaku pi ning’iewo pigulok.
4 Bende wutie ku lembang’o i kuma,
Ee Turo ku Sidon man theng’ ng’om ceke mi Filistia?
Nyo wubeculo ira kawang’ lembe moko m’atimo i kumwu?
Tek wubeculo ira kawang’ lembe moko,
Abiketho lembe ma wubeculone udwog i wiwu nyapio pio mandha.
5 Pilembe wuting’o mola ma tar man mola ma kwar para,
Man wutero lonyo para ma pigi tek nisagu i hekalu mwu;
6 Man wulworo dhanu mi Yuda ku mi Yeruzalem ni Jugiriki,
Kara wukabgi bor kud i ng’om migi;
7 Nen abecewogi man gibibino ku kaka ma wulworogi i iye,
Man abiculo iwu* nimakere ku gin ma wutimo.
8 Abilworo wotwu ku nyigwu i cing’ dhanu mi Yuda,
Man gibilworogi ni jumaco mi Ceba, ni thek ma bor;
Kum Yehova en gire uyero lembe maeni.
9 Wutwong’ lembe ma e i kind thek:
‘Wuyikuru pi lwiny!* Wuceg kum jumaco ma jurukara!
Dong’ juaskari ceke gicor ceng’ini! Dong’ gicok woth!
10 Wufwod kwej dhiang’ mwu ni palamularu man uligu mwu ni tong’.
Dong’ ng’atu ma ng’ic uyer kumae: “A tek.”
11 Wubin wukony, wu thek mi ng’ete ceke, wucokuru karacelo!’”
Ee Yehova, keth ju ma tek peri* gilor i kaka maeca.
12 “Dong’ thek gicew man gicidh i Poga* pa Yehocafath;
Kum keca re m’abibedo pi nipoko lembe mi thek m’i ng’ete ceke.
13 Wuroy viringo i iye, kum cam ucek.
Wulor man wunyon, kum vur mi biyo pigulok upong’.
Vur udhir haw, kum racu migi upong’ bik.
14 Udul dhanu, udul dhanu gin’i poga* mi pokolembe,*
Kum nindo pa Yehova ni ceng’ini i poga mi pokolembe.
15 Ceng’ ku dwi bidoko col,
Man der mi nyikaluku birwinyo.
16 Man Yehova birundo kud i Sayuni,
Ebiting’o dwande kud i Yeruzalem.
Man polo ku ng’om biyengiri;
Ento Yehova bibedo ni kapondo ni dhanu pare,
Ot ma tek ni dhanu mir Israel.
17 Man wubing’eyo nia an a Yehova Mungu mwu m’abedo i Sayuni, got para ma leng’.
Yeruzalem bidoko ni kabedo ma leng’,
Man juwirok* gibikadhu kud i iye ki ngo.
18 I nindo maeca pigulok ma mit bicwir kud iwi gudi,
Cak bimol kud iwi ungulu gudi,*
Man kulo mi Yuda ceke bimolo pii.
Pii bithwogere kud i ot pa Yehova,
Man ebiyomo Poga* mi yend utiep.
19 Ento Misiri bidoko ni uvuru,
Man Edom bidoko ni langa ma jubedo ngo i iye,
Nikum rop ma ginyayu i kum dhanu mi Yuda,
Ma i ng’om migi gicwiro rimo mi dhanu m’udubo ngo.
20 Ento jubibedo i Yuda pi nja,
Man i Yeruzalem niai i kum dhanu m’utuk cil i kum dhanu m’utuk.
21 Abineno rimbgi* m’abed aneno nia udubo ni rimo m’udubo ngo;
Man Yehova bibedo i Sayuni.”
Thelembene tie “Yehova en e Mungu.”
Kunoke “ng’om.”
Kunoke “dhaku m’aradu.”
Kunoke “won ot.”
I dhu Juebrania: “Wudwok kwirocam leng’.”
Kunoke nyo “Nying ulam.”
Kunoke “ng’om.”
Kunoke “kana mi lwiny.”
Kunoke “won ngisi.”
I dhu Juebrania: “Wudwok kwirocam leng’.”
Kunoke “judongo.”
I dhu Juebrania: “wang’e.”
Niwacu Nam m’utho.
Niwacu Nam Mediterane.
Kunoke “kwond dhanu ceke.”
Kunoke “Abiewo lembe.”
Kunoke “Pambu mi poga.”
Thelembene tie “Yehova tie Japoklembe.”
I dhu Juebrania: “i wiwu.”
I dhu Juebrania: “Wudwok lwiny leng’.”
Kunoke “jurumony peri.”
Kunoke “Pambu mi poga.”
Kunoke “pambu mi poga.”
Kunoke “yub.”
Kunoke “umondo.”
Kunoke “nyithi gudi.”
Kunoke “Ndaba.”
Kunoke “dubo mi rimo.”