AMOS
1 Wec pa Amos* m’ubino i kind jutung rombe mi Tekoa, m’enwang’u i gin ma wok i wang’ pir Israel i nindo p’Ubimo Uzia mi Yuda man i nindo pa Yeroboam ma wod Yoac m’ubimo mir Israel, oro ario i wang’ digidi. 2 Ewacu kumae:
“Yehova birundo kud i Sayuni,
Man ebiting’o dwande malu kud i Yeruzalem.
Luba mi jukwac biwak,
Man usimbru wi Karmel bithwo.”
3 “Yehova uwacu kumae:
‘“Pi timo adek mi jai* pa Dameski man pir ang’wen, abiloko ngo paru para iwi matira m’amiyo ire,
Pilembe gifwodo Gilead ku jamfwodo cam mi cuma.
4 Pieno abioro mac iwi ot pa Hazael
Man ebiwang’u udi ma wiw ma tek pa Ben-hadad.
5 Abituro riu mi Dameski;
Abinyotho ju ma bedo i Bikath-aven,
Man ng’atu m’ubebimo* i Beth-eden;
Man dhanu mi Siria gibicidho i ng’eca i Kir,” Yehova wacu.’
6 Yehova uwacu kumae:
‘“Pi timo adek mi jai pa Gaza man pir ang’wen, abiloko ngo paru para iwi matira m’amiyo ire,
Pilembe giting’o ungu acel zoo mi ng’eca gimiyo i cing Edom.
7 Pieno abioro mac iwi gang’kidi mi Gaza,
Man ebiwang’u udi ma wiw ma tek m’i iye.
8 Abinyotho ju ma bedo i Acdod,
Man ng’atu m’ubebimo* i Ackelon;
Abiloko cinga i kum Ekron,
Man Jufilisti ma gidong’ gibitho,” Rwoth Ubimo ma Malu Ngbir Yehova wacu.’
9 Yehova uwacu kumae:
‘Pi timo adek mi jai pa Turo man pir ang’wen, abiloko ngo paru para iwi matira m’amiyo ire,
Pilembe gimiyo ungu acel zoo mi ng’eca i cing Edom,
Man pilembe gipoy ungo i kum lembariba m’i kind umego.
10 Pieno abioro mac iwi gang’kidi mi Turo,
Man ebiwang’u udi ma wiw ma tek m’i iye.
11 Yehova uwacu kumae:
‘Pi timo adek mi jai pa Edom man pir ang’wen, abiloko ngo paru para i kum matira m’amiyo ire,
Pilembe eriemo tok umin ma buu ku palamularu,
Man ekwero nitimo kisa;
Ku ng’eicwiny, emedere niyeco igi m’umbe niweko,
Man emedere nibedo ku kwinyo i kumgi thiri thiri.
12 Pieno abioro mac i Theman,
Man ebiwang’u udi ma wiw ma tek mi Bozra.’
13 Yehova uwacu kumae:
‘“Pi timo adek mi jai mi Juamon man pir ang’wen, abiloko ngo paru para iwi matira m’amiyo igi,
Pilembe gikaku i mon ma igi nuti mi Gilead dra pi nimedo kalac mi ng’om migi.
14 Pieno abicwinyo mac i kum gang’kidi mi Raba,
Man ebiwang’u udi ma wiw ma tek m’i iye,
Karacelo ku kok mi lwiny i nindo mi lwiny,
Man kud avuvu* i nindo mi yamu ma tek.
15 Man ubimo migi bicidho i ng’eca karacelo ku judongo ma wijo pare,” Yehova wacu.’
2 “Yehova uwacu kumae:
‘“Pi timo adek mi jai* pa Moab man pir ang’wen, abiloko ngo paru para iwi matira m’amiyo ire,
Pilembe ewang’u cogo ubimo mir Edom ni nunu.
2 Pieno abioro mac i Moab man ebiwang’u udi ma wiw ma tek mi Kerioth,
Moab bitho ku kind woy
Ku kok mi lwiny man ku dwand agwara.
3 Abikabu jabim* kud i iye
Man abinego judongo ma wijo pare ceke karacelo kude,” Yehova wacu.’
4 Yehova uwacu kumae:
‘Pi timo adek mi jai pa Yuda man pir ang’wen, abiloko ngo paru para iwi matira m’amiyo ire,
Pilembe gikwero cik* pa Yehova,
Man pilembe giworo ngo telowic pare;
Ento vupo ma rom ma kwarugi gilubo uketho gikier.
5 Pieno abioro mac i Yuda,
Man ebiwang’u udi ma wiw ma tek mi Yeruzalem.’
6 Yehova uwacu kumae:
‘Pi timo mi jai adek mir Israel man pir ang’wen, abiloko ngo paru para iwi matira m’amiyo ire,
Pilembe gilworo won bedopwe pi mola ma tar,
Man jacan pi wara.
7 Ginyono wi ju ma ka kitgi mbe i utur mi ng’om,
Man gitwiyo yo mi ju ma mol.
Ng’atu moko giku won gitimo ribiri ku nyaku ma rom,
Ma gicido ko nyinga ma leng’.
8 I ng’et pemlam ceke giberieyiri iwi bongu ma gimayu ni mukwatu* pi banja;
Man pigulok ma gibemadhu i ot* pa mungu migi ginwang’u i bang’ dhanu ma giketho uculo amandi.’
9 ‘Ento an re m’agam anyotho Juamor i wang’gi,
Ma gibino boco calu yend tido man tek calu yen m’ujany;
Anyotho nyinggi malu man ulaggi piny.
10 Awodhowu kud i ng’om mi Misiri,
Man aketho wuwotho i langa oro pier ang’wen,
Kara wumak ng’om mi Juamor.
11 Aketho jumoko m’i kind wotwu ni jubila
Man jumoko m’i kind awobi mwu ni Junaziri.
Nyo etie kumeni ngo, Ee dhanu mir Israel?’ Yehova wacu.
12 ‘Ento wumeduru nimiyo pigulok ni Junaziri kara gimadhi,
Man wung’olo ni jubila kumae: “Wucikuru ngo niewo.”
13 Pieno abirungo iwu ku kakewu,
Tap calu ma magali m’uyeyo nying cam ma jukayu rungo ko piny ma n’i the tiende.
14 Ng’atu ma kume rep binwang’u ngo kaka m’ering i iye,
Ng’atu ma tek bigwoko ngo tego pare,
Man jaramony moko mbe ma bibodho kwo* pare.
15 Jakil athero bicungo ngo kakare,
Ng’atu ma tiende rep biboth ungo,
16 Kadok ng’atu ma cwinye tek nisagu i kind jurumony de
Biringo muneru cing’ nica,’ Yehova wacu.”
3 “Wuwinj lembe ma e ma Yehova uyero piwu, Ee dhanu mir Israel, pi juruot ceke m’awodho kud i ng’om mi Misiri:
2 ‘Wun kendwu m’ang’eyowu kud i kind juruot ceke mi ng’om.
Pi thelembe maeno abikwayu wuwodh wel pi kosa mwu ceke.
3 Nyo dhanu ario biwotho karacelo tek giripo dhoggi ngo?*
4 Nyo umvor birundo i luli m’enwang’u ngo cami?
Nyo nyathin umvor* birundo ku kaka m’epondo i iye m’emaku ngo gin moko?
5 Nyo winyo bimoko i uwic iwi ng’om ma juciko ngo ire uwici?*
Nyo uwic copo tuk malu kud iwi ng’om m’emaku ngo gin moko?
6 Ka jukudho agwara i adhura, nyo kum dhanu miel ungo?
Ka peko moko uwok i adhura, nyo nwang’u tie ngo Yehova re m’ukele?
7 Kum Rwoth Ubimo ma Malu Ngbir Yehova bitimo lembe moko ngo
Tekene fodi enyutho ngo lembamung’a pare ni jutic pare ma gi jubila.
8 Umvor urundo! Ng’a ma lworo bimake ngo?
Rwoth Ubimo ma Malu Ngbir Yehova uweco! Ng’a ma biewo ngo?
9 Wutwong’ pire iwi udi ma wiw ma tek mir Acdod,
Man iwi udi ma wiw ma tek mi ng’om mi Misiri.
Wuyer kumae: “Wucokuru karacelo i kum gudi mi Samaria;
Wunen yakini ma n’i iye
Man ayeki m’ukadhu i iye.
10 Pilembe ging’eyo ngo kite mi timo lembe m’atira,” Yehova wacu,
“Gi ju ma gicoko dhu rop man nyoth i udi ma wiw migi ma tek.”’
11 Pieno Rwoth Ubimo ma Malu Ngbir Yehova uwacu kumae:
‘Jadegi moko bitieko ng’ombuni,
Ebimayuwu ku tego mwu,
Man ebiyaku udi ma wiw ma tek mwu.’
12 Yehova uwacu kumae:
‘Tap calu ma jakway rombe mayu tielo ario kunoke dund ith kud i dhug umvor,
Kumeno bende jubimayu dhanu mir Israel amaya,
Gi ju ma kawoni gibedo i Samaria iwi pem ma beco man iwi kabedo* ma beco.’
13 ‘Wuwinji man wumii cimowang’ ni* ot pa Yakobo,’ Rwoth Ubimo ma Malu Ngbir Yehova Mungu mir udul uwacu.
14 Kum i ceng’ m’abikwayu iye wel i bang’ Israel pi jai* pare ceke,
Abikwayu bende wel i bang’e pi pemlam mi Bethel;
Jubing’ondo tung pemlam man gibipodho i ng’om.
15 Abirwombo ot mi saa pa koyo karacelo ku ot mi saa pa oro.’
‘Udi mi lak liec gibinyothiri,
Man udi ma dongo* gibijik,’ Yehova wacu.”
4 “Wuwinj lembe ma e, wu dhieng’ mi Bacan,
Wun ma wubedo iwi got mi Samaria,
Wu mon ma wubeyaku ju ma ka kitgi mbe man wuberungo i jucan,
Wun ma wubeyero ni cogwu* kumae: ‘Wukel iwa gin moko wamadhi!’
2 Rwoth Ubimo ma Malu Ngbir Yehova ukwong’o i leng’o pare kumae:
“‘Nen! nindo ubebino i wiwu ma jubiting’owu i iye malu ku gol pa jathum ring’o
Man dongwu m’udong’ ku gol mi rec.
3 Wubiwok kud i wang’ gang’kidi m’umor, ng’atuman atira i wang’e;
Man jubibayuwu woko i bang’ Harmon,” Yehova wacu.’
4 Wubin i Bethel man wutur cik,*
Wubin i Gilgal man wutur cik lee!
Wukel lam mwu kugweno,
Man apaje mwu i nindo mir adege.
5 Wuwang’ mukathi ma thobi n’i iye ni lam mi dwoko foyofoc;
Wutwong’ ma tek pi girathiera mwu ma ku berocwiny!
Kum eno re ma tie gin ma wumaru nitimo, Ee dhanu mir Israel,’ Rwoth Ubimo ma Malu Ngbir Yehova uwacu.
6 ‘Ento an, aketho lekwu doko leng’ nikum koso cam* i adhura mwu ceke
Man aketho wukoso mukathi i udi mwu ceke;
Ento wudwogo ngo i bang’a,’ Yehova wacu.
7 ‘Acero bende iwu koth pi dwi adek i wang’ kayucam;
Aketho ecwii iwi adhura acel ento iwi adhura ma kucelo ecwii ngo.
Iwi theng podho acel ebed ecwii,
Ento iwi theng podho ma kucelo m’ubino keca ebed ecwii ngo uketho ethwo.
8 Dhanu mir adhura ario kunoke adek gibed giwotho thamba thamba pi nicidho i bang’ adhura acel pi nimadhu pii,
Re gibed ginwang’u ngo kadhiri ma romogi;
Ento wudwogo ngo i bang’a,’ Yehova wacu.
9 ‘Agoyowu ku lietho ma lake tek man ku laimo.
Wumedo wend podho mwu man wend podho mir ulok mwu,
Ento bonyo umvoro yend ulam mwu man yend oliv mwu;
Re asu wudwogo ngo i bang’a,’ Yehova wacu.
10 Aoro thong’om i kindwu calu mi Misiri.
Anego awobi mwu ku palamularu man amaku riuni* mwu.
Aketho ng’wic kagonjo mwu ung’wii i umwu;
Ento wudwogo ngo i bang’a,’ Yehova wacu.
11 Akelo nyoth i kindwu
Tap calu ma Mungu unyotho ko Sodoma ku Gomora.
Man wubino calu dund yen ma juyudho ayudha kud i mac;
Ento wudwogo ngo i bang’a,’ Yehova wacu.
12 Pieno abitimo lembe maeni i kumi, Ee Israel.
Dong’ calu m’abitimo lembe maeni i kumi,
Bed ayika nirombo ku Mungu peri, Ee Israel.
13 Kum nen! etie Ng’atu m’ucwiyo gudi man m’ucwiyo yamu;
Enyutho paru pare ni dhanu,
Eloko der mi mombwa doko ni mudho,
Man ewotho iwi ka ma malu mi ng’om;
Nyinge tie Yehova Mungu mir udul.”
5 “Wuwinj lembe maeni m’abeyero i kumwu calu wer wak, Ee ot mir Israel:
2 ‘Israel ma nyaku ma sumba upodho;
Ecopo ai malu kendo ngo.
Juwenje iwi ng’om pare;
Ng’atu moko mbe m’uting’e malu.’
3 “Kum Rwoth Ubimo ma Malu Ngbir Yehova uyero kumae:
‘Adhura m’uwok ku dhanu elufu acel (1 000), dhanu dak acel re ma bidong’;
Man adhura m’uwok ku dhanu dak acel, dhanu apar re ma bidong’ i ot mir Israel.’
4 “Kum Yehova ubeyero lembe ma e ni ot mir Israel:
‘Wuyeny kakara man wumeduru nikwo.
5 Kud wucidh i Bethel,
Kud wucidh i Gilgal kadi kud wukadh loka i Ber-ceba,
Pilembe Gilgal bicidho andha i ng’eca,
Man Bethel bidong’ ni gin moko ngo.*
6 Wuyeny ka Yehova man wumeduru nikwo,
Kara kud eopi calu mac iwi ot pa Yozefu,
M’ewang’ ko Bethel ma ng’atu moko mbe ma copo nege.
7 Wudwoko pokolembe m’atira udoko ni yendadra,*
Man wuredho bedopwe i ng’om.
8 Ng’atu m’ucwiyo yung’ini mi Kima* man yung’ini mi Kesil,*
Ng’atu ma loko mudho ma col bii doko ni kugweno,
Ng’atu ma ketho dieceng’ doko col ve diewor,
Ng’atu ma coko dhu pii mi nam
Pi nikwoyogi iwi ng’om
Nyinge tie Yehova.
9 Ebiketho nyoth bicorere iwi ng’atu ma tek,
Ebikelo nyoth i kum kabedo ma tek.
10 Gidagu ju m’ubejukogi i dhugang’ mir adhura,
Man gidagu ju m’ubeyero lemandha.
11 Pilembe wubemeduru niketho jacan upang podho apanga
Man wubegamu nying cam pare ni ajok pi ng’om,
Wubimeduru ngo nibedo i udi mi kidi m’apaya ma wugiero
Kadi nimadhu pigulok mi yend ulok m’ang’iya ma wupidho.
12 Kum ang’eyo kite ma jai* mwu upong’ ko
Man kite ma dubo mwu dit ko,
Wubesendo won bedopwe,
Wubegamu kanyaka,*
Man wubecero twero pa jacan i dhugang’ mir adhura.
13 Pieno ju ma gi riek gibibedo ling’ i saa maeca,
Pilembe ebibedo saa mi can.
14 Wutim gin ma ber, ento ma rac ungo
Kara wumeduru nikwo.
E Yehova Mungu mir udul bibedo karacelo kudwu,
Tap calu ma wubeyero.
15 Wudag lembe ma rac, ento wumar lembe ma ber,
Dong’ pokolembe ma pwe re m’utimere i dhugang’ mir adhura.
Saa moko nyo Yehova Mungu mir udul
Bitimo bero ni dong ju m’udong’ pa Yozefu.
16 “Pieno Yehova Mungu mir udul, Yehova uwacu kumae:
‘Wagiri bibedo nuti i lela ma lac ceke,
Man i gengi ceke gibiwacu kumae: “Kayo, kayo!”
Gibilwong’o jurufur pi niwak
Man ju ma ging’eyo wer wak pi niwak.’
17 ‘Wak bibedo nuti i kind podho mir ulok ceke;
Pilembe abikadhu kud i kindwu,’ Yehova wacu.
18 ‘Can ni ju ma gibekuro nindo pa Yehova kud ava!
Nindo pa Yehova ne bibedo iwu nenedi?
Ebibedo mudho ento der ungo.
19 Ebibedo ve kinde ma ng’atini uberingo umvor, ento elund erombo kud urudi,
Man kinde m’emondo i ot pare man eketho cinge i kor ot, thwol ulund utong’e.
20 Nyo nindo pa Yehova bibedo ngo mudho, ento der ungo?
Nyo ebibedo ngo mudho ma col bii, ento lero ngo?
21 Adagu, acayu foc mwu,
Man anyong’a nega ngo nyanok de i kum ng’wic coko ma dongo mwu.
22 Kadok nwang’u wubethiero ira lam m’awang’a ma boo, man giramiya m’athiera mwu,
Anyong’a binega ngo i kumgi;
Man abineno ngo ku bero ley mwu m’ucwey ma wubethiero ni lam mi kwiyocwiny.
23 Wukab woy mi wer mwu cen kud i bang’a;
Man kud wuketh awinj dwal mi jamgoyo wer mwu ma juthondhgi.
24 Wek pokolembe ma pwe umol calu pii,
Man bedopwe calu kulo ma dwono ngo.
25 Nyo wukelo ira lam man giramiya m’athiera
Pi oro pier ang’wen maeno i langa, Ee ot mir Israel?
26 Kawoni wubiyeyo Sakuth m’ubimo mwu man Kaiwan*
Ayi gin m’acwiya mwu, nyakaluku pa mungu mwu ma wuyiko iwu giwu,
27 Man abiorowu wubicidho i ng’eca i ng’ey Dameski,’ ng’atu ma nyinge Yehova Mungu mir udul re m’uwacu.”
6 “Can ni ju mi Sayuni ma gigeniri gigi,*
Ni ju ma gibedo ma cwinygi kwiyo iwi got mi Samaria,
Gi dhanu ma pigi yik m’i kind thek ma pire yik lee i kind thek,
Gi ju ma ot mir Israel ubecidho i bang’gi!
2 Wukadh lokaca i Kalne man wunen.
Ku keca wucidh i Hamath ma dit,
Man wulor piny i Gath mi Jufilisti.
Nyo gi ber ma sagu ker* maeni?
Kunoke nyo ng’om migi lac nisagu mwu?
3 Nyo wubekabu nindo mi can kud i wiwu
Man wubekelo bimobim* mi ropi?
4 Givuto iwi kavuto mi lak liec man ging’ayu tokgi iwi kabedo,
Gicamu nyogi rombe mi dwol man nyithi dhieng’* ma fulful;
5 Githungo wer kubang’ dwand adungu,*
Man calu Daudi, giwodho jamgoyo wer ma nyen;
6 Gibemadhu pigulok pong’ tabu,
Gibewiro kumgi ku mo m’ang’iya.
Ento gibedieng’ ungo pi* nyoth pa Yozefu.
7 Pieno gibibedo ma kwong’a i kind ju ma bicidho i ng’eca,
Man foc mi ju ma givuto nwang’u ging’ayu tokgi bijik.
8 ‘Rwoth Ubimo ma Malu Ngbir Yehova ukwong’o ku ng’eyong’ec pare gire,’ Yehova Mungu mir udul uwacu,
‘“Adagu kuhaya pa Yakobo,
Adagu udi ma wiw ma tek pare,
Man abimiyo adhurane ku piny m’upong’o iye i cing’ judegi pare.
9 “‘“Man tekene jumaco apar gidong’ i ot acel, gin de gibitho. 10 Wat migi* moko bibino pi niwodhogi woko man ebiwang’ugi acel acel. Ebiwodho cogogi kud i ot; i ng’eye ebiwacu ni ng’atu ma n’i kusika ma yor i iye mi otne kumae: ‘Nyo ng’atu moko mange udong’ de karacelo kudi?’ Man ebidwoko ire kumae: ‘Umbe!’ I ng’eye ebiwacu ire kumae: ‘Ling’! Kum eni tie ngo saa mi lwong’o nying’ Yehova.’”
11 Kum Yehova re m’ubemiyo ng’ol,
Ebirungo ot ma dit bidoko ni udhuru susu,
Man ot ma nok ni ng’ili piny.
12 Nyo riuni* ringo iwi cana?
Kunoke nyo ng’atu moko bifuro piny ku dhieng’ keca?
Kum wuloko pokolembe ma pwe ni yendadra,
Man nying bedopwe ni piny ma kec.
13 Anyong’a negowu i kum gin ma tije mbe,
Man wuwacu kumae: “Nyo wadoko tek* ungo nikum tego mwa giwa?”
14 Pieno, Ee ot mir Israel, abikelo thek moko i kumi,’ Yehova Mungu mir udul uwacu,
‘Man gibisendi niai i Lebohamath* niloro piny i Ndaba* mir Araba.’”
7 Maeni tie gin ma Rwoth Ubimo ma Malu Ngbir Yehova unyutho ira: Nen! ecoko dhug udul bonyo kinde ma cam ma tokcen* ucaku bedongo. Maeni ubino cam ma tokcen i ng’ey ma junyaru lum p’ubimo. 2 Kinde m’udul bonyone gidaru nicamu uboko mi ng’ombe, awacu kumae: “Ee Rwoth Ubimo ma Malu Ngbir Yehova, akweyi, tim kisa! Yakobo copo both nenedi?* Kum e ng’ic!”
3 Pieno Yehova ung’iyo i lembe nini kendo. “Ebitimere ngo,” Yehova wacu.
4 Maeni tie gin ma Rwoth Ubimo ma Malu Ngbir Yehova unyutho ira: Nen! Rwoth Ubimo ma Malu Ngbir Yehova ulwong’o mac pi nimiyo matira. Macne uwang’u pii ma dit man ma thuc man ewang’u ng’et ng’ombe. 5 E awacu kumae: “Ee Rwoth Ubimo ma Malu Ngbir Yehova, akweyi, cer maeni cen. Yakobo copo both nenedi?* Kum e ng’ic!”
6 Pieno Yehova ung’iyo i lembe nini kendo. “Maeno de bitimere ngo,” Rwoth Ubimo ma Malu Ngbir Yehova wacu.
7 Maeni tie gin m’enyutho ira: Nen! nwang’u Yehova ucungo iwi gang’kidi ma jugiero ku thol mi pimo alima man thol mi pimo alima ubino i cinge. 8 E Yehova upenja kumae: “Amos ibeneno ang’o?” Adwoko kumae: “Thol mi pimo alima.” Yehova udok uwacu kumae: “Abeketho thol mi pimo alima i kind dhanu para Israel. Abiweko igi lembe kendo ngo. 9 Kaka ma malu pa Isak bidong’ ni uvuru, man hekalu mir Israel binyothiri; man abibino i kum ot pa Yeroboam ku palamularu.”
10 Amazia ma jalam mi Bethel uoro kwenda ma e ni Ubimo Yeroboam mir Israel: “Amos ubecamu gamba i kumi i die Israel. Dhanu mi ng’ombuni copo ciro ngo wec parene ceke. 11 Kum Amos ubewacu kumae: ‘Yeroboam bitho ku palamularu man Israel bicidho andha i ng’eca kud i ng’om pare.’”
12 E Amazia uwacu ni Amos kumae: “Ee jaewlembe, cidhi, ring i ng’om mi Yuda, say mukathi* peri kuca man iew lembe kuca. 13 Ento dong’ ukwayu ngo iew kendo i Bethel kum etie hekalu p’ubimo man ot mi ker.”
14 E Amos udwoko ni Amazia kumae: “Abino jabila ngo kadi wod jabila de ngo, ento abino jakwac man abed agwoko yend duru.* 15 Ento Yehova uting’a cen kud i ng’ey udul rombe, man Yehova uwacu ira kumae: ‘Cidh iew lembe ni dhanu para Israel.’ 16 Dong’ kawoni, winj lembe ma Yehova uyero: ‘Ibeyero kumae: “Kud iew lembe i kum Israel man kud irwey lembe i kum ot pa Isak.” 17 Ka kumeno Yehova uwacu kumae: “Dhaku peri bidoko won asara i adhura, man woti ku nyigi gibipodho ku palamularu. Jubipoko ng’om peri ku thol mi pimo piny man in de ibitho i ng’om m’ucido; man Israel bicidho andha i ng’eca kud i ng’om pare.”’”
8 Maeni tie gin ma Rwoth Ubimo ma Malu Ngbir Yehova unyutho ira: Aneno katoko moko ku nying yen mi saa pa cir i iye. 2 E ewacu kumae: “Amos ibeneno ang’o?” Adwoko kumae: “Katoko ku nying yen mi saa pa cir i iye.” E Yehova uwacu ira kumae: “Ajiki mi dhanu para Israel utundo. Abiweko lembe igi kendo ngo. 3 ‘Wer mir hekalu bilokiri bidoko ni wak i nindo maeca,’ Rwoth Ubimo ma Malu Ngbir Yehova wacu. ‘Jubibayu avu dupa kaka ceke, dong’ piny ubed ling’!’
4 Wuwinj lembe ma e, wun ma wubenyono wi jucan
Man wubejigo wi ju ma mol mi ng’om,
5 Ma wubewacu kumae: ‘Foc mi por pa dwi bithum awene, kara walwor nying cam mwa,
Man Sabatu, kara waketh nying cam mwa i lwori?
Kara wadwok efa* udok nyanok
Man cekel* udok dit,
Kara wanyoth kilo mwa mir awonde;
6 Kara wang’iew ng’atu m’utie ku yeny ku mola ma tar
Man jacan ku wara,
Man walwor dhoki nying cam.’
7 Yehova ukwong’o ku dwong’ pa Yakobo kumae:
‘Abiwil ki ngo pi timo migi ceke.
8 Pi thelembe maeno, ng’ombe* biyengere,
Man ng’atu moko ci m’ubedo i iye biwak.
Nyo ng’ombe ceke biting’ere ngo malu calu kulo Nil,
Ebidongo man ebidok piny calu Nil mi Misiri?’
9 ‘I nindo nica,’ Rwoth Ubimo ma Malu Ngbir Yehova wacu,
‘Abiketho ceng’ bimwony ku dieceng’ ma ling’,
Man abiketho ng’om bicido ku dieceng’ ma terere.
10 Abiloko foc mwu ni wak
Man wer mwu ceke ni wer wak.
Abiketho kendi mi saki i pier ceke man abiketho wic ceke biwang’;
Abiketho wakne bibedo calu wak ma juwagu ko wod ma kulong’,
Man ajikine bibedo calu nindo ma kec.’
11 ‘Nen! nindo ubebino,’ Rwoth Ubimo ma Malu Ngbir Yehova wacu,
‘M’abioro iye ndru iwi ng’om,
Ebibedo ndru mi mukathi ngo kadi mi rieu pii de ngo,
Ento mi winjo lembe pa Yehova.
12 Gibiwotho thamba thamba niai i bang’ nam acel nicidho i bang’ nam ma kucelo
Man niai yo malu nicidho yo nyangu.*
Gibiwotho kun ku kun ma gibeyenyo lembe pa Yehova, ento gibinwang’e ngo.
13 I nindo maeca, jumanyir ma sumba ma leng’ bipodho bir,
Awobi bende nikum rieu pii;
14 Ju ma gibekwong’o ku kier mi Samaria man giwacu kumae:
“Calu andha Mungu peri bedo kwo, Ee Dan!”
Man “Calu andha yo ma terojo i Ber-ceba unuti!”
Gibipodho man gibiai malu kendo ngo.’”
9 Aneno Yehova ucungo iwi pemlam man ewacu kumae: “Goy wi mbegi, e theggi biyengere. Tong’ wigi man abinego ma tokcen m’i kindgi ku palamularu. Ng’atu moko mbe m’uringo ma bicidho bor, man ng’atu moko mbe ma biboth.
2 Tek gikunyo ng’om piny nitundo i Liel,*
Ku kuca cinga bimakugi;
Man tek giidho malu i polo,
Ku kuca abilorogi piny.
3 Man tek gipondo iwi usimbru Karmel,
Kuca abiyenyogi man abimakugi.
Tek gipondo kud i wang’a i the nam,
Abing’olo ni thwol utong’gi kuca.
4 Tek gicidho i ng’eca i wang’ judegi migi,
Kuca abing’olo ni palamularu uneggi;
Abiketho wang’a i kumgi pi lembe ma rac, ento pi lembe ma ber ungo.
5 Kum Rwoth Ubimo ma Malu Ngbir Yehova mir udul re m’utie Ng’atu m’ubemulo ng’ombuni,*
Uketho ebeloy man dhanu m’i iye ceke gibiwak;
Man ju ceke m’i iye gibiting’iri malu calu kulo Nil,
Man gibidok piny calu Nil mi Misiri.
6 ‘Ng’atu ma giero mangasi pare i polo
Man ma giero ot pare malu iwi ng’om;
Ng’atu ma lwong’o pii kud i nam
Pi nikwoye iwi ng’om
Nyinge tie Yehova.’
7 ‘Nyo wutie ngo ira calu wot Jukuci, Ee dhanu mir Israel?’ Yehova wacu.
‘Nyo awodho ngo Israel kud i ng’om mi Misiri,
Jufilisti kud i Krete man Siria kud i Kir?’
8 ‘Nen! wang’ Rwoth Ubimo ma Malu Ngbir Yehova n’i wi bimobim mi dubo,
Man ebinyothe cen kud iwi ng’om.
Ento abinyotho ngo ot pa Yakobo kot,’ Yehova wacu.
9 ‘Kum nen! abemiyo ng’ol,
Man abilalu ot mir Israel i kind thek ceke,
Man abiyongogi calu ma ng’atini yongo ko piny ku kiyongila,
Ma nying kidi acel de mbe ma podho i ng’om.
10 Judubo ceke m’i kind dhanu para gibitho ku palamularu,
Ju ma giwacu kumae: “Can bicoro ngo i vutwa kadi ebitundo ngo i kumwa.”’
11 ‘I nindo maeca abiting’o otbak* pa Daudi ma nwang’u upodho,
Abiculo wang’e* m’umor,
Man abidwoko uvurune kendo kakare;
Abigiere kendo calu m’i nindo ma con,
12 Kara gimak dong Edom m’udong’,
Man thek ceke ma nyinga ulwong’ere i kumgi,’ Yehova m’ubetimo gin maeni uwacu.
13 ‘Nen! nindo ubebino,’ Yehova wacu,
‘Ma jarafur bimaku jakay cam,
Man janyon nyigulok bimaku ng’atu m’uyeyo kodhi;
Man pigulok ma mit bicwir kud iwi gudi,
Man ebimol kud iwi ungulu gudi* ceke.
14 Abidwogo dhanu para Israel kendo kud i ng’eca,
Man gibigiero adhura m’udong’ ni uvuru man gibibedo i igi;
Gibipidho podho mir ulok man gibimadhu pigulok migi,
Man gibifuro podho man gibicamu nyinggi.’
15 ‘Abipidhogi i ng’om migi,
Man jubifudhogi ngo kendo
Kud i ng’om m’amiyo igi,’ Yehova Mungu peri uwacu.”
Thelembe tie “Ma tie ter” kunoke “Ma yeyo ter.”
Kunoke “turocik.”
I dhu Juebrania: “ng’atu m’umaku uluthker.”
I dhu Juebrania: “ng’atu m’umaku uluthker.”
Kunoke “wavuvu.”
Kunoke “turocik.”
I dhu Juebrania: “japoklembe.”
Kunoke “ponji.”
Kunoke “garanti.”
Kunoke “hekalu.”
Kunoke “ng’eyong’ec.”
Kunoke “kana mi lwiny.”
Kunoke “ng’eyong’ec.”
Kunoke “tekene gilar giwinjiri ngo nia gibirombo ka moko?”
Kunoke “nyathin umvor ma ng’ute jumuzuga.”
Kunoke nyo “tekene pomo mbe i uwici?”
Kunoke “kabedo m’uai i Dameski.”
Kunoke “wumii lembatuca i kum.”
Kunoke “turocik.”
Kunoke nyo “ma dupa.”
Kunoke “rwoth mwu.”
Kunoke “wujai.”
Kunoke “amiyo ngo iwu cam.”
Kunoke “kana mi lwiny.”
Kunoke nyo “bidoko ni gin mi zungo.”
Kunoke “gin ma kec.”
Copere eno tie njuru nyikaluku ma nwang’ere i yung’ini mi Taurus.
Copere eno ubenyutho yung’ini mi Orion.
Kunoke “turocik.”
Kunoke “akumu.”
Copere nia mungu m’araga ma mon maeno zoo ubenyutho planet ma julwong’o Satirne, ma jubed jurwo ire calu mungu m’araga.
Kunoke “ma giparu nia gimbe ku yeny pa ng’atu mange.”
M’umbe jiji eno ubenyutho ker mi Yuda man mir Israel.
I dhu Juebrania: “kabedo.”
Kunoke “nyithi thwoni dhieng’.”
Kunoke “jamgoyo wer ma juthondhe.”
I dhu Juebrania: “giberemo ngo pi.”
I dhu Juebrania: “Umin won.”
Kunoke “kana mi lwiny.”
I dhu Juebrania: “wating’o tung’ iwa giwa.”
Kunoke “kamondo mir Hamath.”
Nen Thelembe mi wec.
Niwacu i kind dwi mi kwong’o ku mir ario.
I dhu Juebrania: “biai malu nenedi?”
I dhu Juebrania: “biai malu nenedi?”
I dhu Juebrania: “cam mukathi.”
Kunoke “abed ariedo kum nying duru.”
Nen Thenge ma jumedo B14.
Nen Thenge ma jumedo B14.
Kunoke “ng’om.”
Kunoke “yo ka ma ceng’ wok i iye.”
Kunoke “Ceol,” niwacu liel mi dhanu ceke. Nen Thelembe mi wec.
Kunoke “ng’om.”
Kunoke “hema; dhir.”
Kunoke “wang’gi.”
Kunoke “nyithi gudi.”